CNI News
၂၀၂၅ ခုနှစ်၊ ဖေဖော်ဝါရီ ၂၅
ရှမ်းပြည်နှင့် ပြည်ထောင်စု မြန်မာနိုင်ငံ၏ နိုင်ငံရေးပြဿနာကို တွေ့ဆုံဆွေးနွေးခြင်းနည်းလမ်းဖြင့် ကြိုးပမ်း ဖြေရှင်းသွားမည်ဟု ရှမ်းပြည်ပြန်လည်ထူထောင်ရေးကောင်စီ(RCSS)က ထုတ်ပြန်ပြောကြားသည်။
ဖက်ဒရယ်ဒီမိုကရေစီ ပြည်ထောင်စု တည်ဆောက်နိုင်ရေးအတွက် မျက်နှာချင်းဆိုင် တွေ့ဆုံဆွေးနွေး ဖြေရှင်းကြ ရန် ရှမ်းပြည်ပြန်လည်ထူထောင်ရေးကောင်စီ(RCSS)က ၂၀၂၅ ခုနှစ်၊ ဖေဖော်ဝါရီ ၂၅ ရက်တွင် ထုတ်ပြန် ပြော ကြားခဲ့သည်။
RCSS သည် ဖေဖော်ဝါရီ ၂၄ -၂၅ ရက်များက ၂၀၂၄ ခုနှစ်၊ နှစ်ပတ်လည် အစည်းအဝေးကို ဗဟိုဌာနချုပ် လွယ်တိုင်းလျဲန်းမှာ ကျင်းပခဲ့ပြီးနောက် အထက်ပါအတိုင်း တိုက်တွန်းချက် ထုတ်ပြန်ခဲ့ခြင်းဖြစ်သည်။
RCSS က “ ငြိမ်းချမ်းရေး ရေရှည်တည်တံ့ခိုင်မြဲရေးနှင့် ဖက်ဒရယ်ဒီမိုကရေစီပြည်ထောင်စု တည်ဆောက်နိုင်ရေး အတွက် မျက်နှာချင်းဆိုင် တွေ့ဆုံဆွေးနွေးဖြေရှင်းကြပါရန် သက်ဆိုင်ရာ အဖွဲ့အစည်းများအား လေးနက်စွာ တိုက်တွန်းပါသည်”ဟု ထုတ်ပြန်ချက်တွင် ပြောထားသည်။
ကျေးလက်ဒေသနှင့် မြို့နယ်အတွင်းရှိ ဒေသခံ လူထုတို့နှင့် လက်တွဲပူးပေါင်းပြီး ဒေသန္တရ အုပ်ချုပ်ရေး လုပ်ငန်း အား ဆက်လက်ဆောင်ရွက်သွားမည်ဟု RCSS က ပြောသည်။
RCSS တပ်ဖွဲ့များ ရှမ်းပြည်နယ်မြောက်ပိုင်းတွင် လှုပ်ရှားနေစဉ်က TNLA-SSPP-UWSA တို့ပူးပေါင်း၍ တိုက်ခိုက် ခဲ့ခြင်းကြောင့် တိုက်ပွဲများ အပြင်းအထန်ဖြစ်ပွားကာ ရှမ်းပြည်နယ်တောင်ပိုင်းသို့ ဆုတ်ခွာသွားခဲ့ရသည်။
ထို့နောက် ရှမ်းပြည်နယ်မြောက်ပိုင်းတွင် TNLA၊ MNDAA တို့သည် AA၊ PDFs၊ BPLA၊ PLA၊ KNDF၊ DPLA၊ MYD-PDF ၊ BNRA စသည့် လက်နက်ကိုင်အင်အားစုများဖြင့် ပူးပေါင်း၍ ၂၀၂၃ ခုနှစ်၊ အောက်တိုဘာ ၂၇ ရက်က ၁၀၂၇ စစ်ဆင်ရေးကို ဖော်ဆောင်၍ အရှေ့မြောက်ပိုင်းတိုင်းစစ်ဌာနချုပ် အပါအဝင် လားရှိုး၊ ချင်းရွှေဟော်၊ ဖောင်းဆိုင်၊ မုံးကိုး၊ လောက် ကိုင်၊ ကုန်ကြမ်း၊ ကြူကုတ်၊ သိန္နီ၊ ကွတ်ခိုင်၊ သီပေါ၊ နမ့်ခမ်း၊ နမ့်ဆန်၊ မန်တုံ၊ မိုင်းငေ့ါ၊ မိုင်းလုံ၊ နမ္မတူ၊ ကျောက်မဲ၊ နောင်ချို စသည့် မြို့နယ်များကို တိုက်ခိုက်သိမ်းပိုက်ထားသည်။
အလားတူ ရှမ်းပြည်နယ်တောင်ပိုင်းတွင်လည်း PNO/PNA၊ PNLO/PNLA၊ PDFs များကြား တိုက်ပွဲများ ဖြစ်ပွားနေ ပြီး RCSS တပ်ဖွဲ့များလည်း စစ်ရေးအရ အရေးပါသော နေရာများမှာ ခြေကုပ်ယူ၍ စစ်ရေးအသင့်ပြင်ထားရ ကြောင်း ဒေသခံများက ပြောသည်။
အဆိုပါ အခြေအနေများနှင့်အတူ ရှမ်းပြည်နယ်မြောက်ပိုင်းနှင့် ရှမ်းပြည်နယ်တောင်ပိုင်းအတွင်းမှာ TNLA၊ KIA၊ MNDAA၊ UWSA၊ RCSS၊ SSPP၊ PNO၊ PNLO စသည့် လက်နက်ကိုင်များအကြား နယ်မြေအငြင်းပွားမှုများ ပေါ် ပေါက်နေကြသည်။
