CNI News

၂၀၂၅ ခုနှစ်၊ ဖေဖော်ဝါရီ ၂၆

မြန်မာ့နိုင်ငံရေး အခင်းအကျင်းတွင် လက်နက်ကိုင် တော်လှန်နေသည့် အဖွဲ့စည်းများအနေဖြင့် အာဏာရှင်ကို တော်လှန်ရင်း အာဏာရှင်ထက်ဆိုးသော ပုဂ္ဂိုလ်များဖြစ်လာကြကြောင်း တိုင်းလိုင်(ရှမ်းနီ) အမျိုးသားများ ဖွံ့ဖြိုး တိုးတက်ရေးပါတီ(TNDP)မှဥက္ကဋ္ဌ ဦးစိုင်းဋ္ဌေးအောင်က CNI သတင်းဌာနသို့ ပြောသည်။

၎င်းက “အာဏာရှင်ကို တော်လှန်ရင်းနဲ့ ပြောမယ်ဆိုရင်တော့ အာဏာရှင်ထက်ဆိုးတဲ့ ပုဂ္ဂိုလ်တွေဖြစ်လာ ကြတယ်။ တောတွင်းလက်နက်ကိုင် ဥပဒေမဲ့ပစ်ခတ်တာ၊ သတ်တာဖြတ်တာ အကြောက်တရားနဲ့ အုပ်ချုပ်လာ ကြတာပေါ့။ အဲဒီအခါကြတော့ ပြည်သူပဲ ဒုက္ခရောက်ကြရတယ်။ ပြည်သူတွေ ဒုက္ခရောက်တဲ့အခါကြ နိုင်ငံ အတွက်လည်း ဖွံ့ဖြိုးတိုးတက်မှုတွေ ဘာမှမဖြစ်လာဘူး။ ဒီနေ့ အရေးအခင်းပဲကြည့်ပါ။ ဟိုဘက်က ကိစ္စတွေ ထားလိုက်ပါဦး ၈၈ တို့ ၆၂ အာဏာသိမ်းတို့ အာဏာရှင်ကို တော်လှန်ရင်း ကွန်မြူနစ်တို့ ဖြစ်ခဲ့တဲ့ကိစ္စတွေ။ ဒီနေ့ အရေးခင်းကြီးမှာ တိုင်းပြည်ရဲ့ မြေပေါ်၊ မြေအောက် သယံဇာတတွေ ဘယ်လောက်အထိ ဆုံးရှုံးသွားလဲ။ အဲဒါတွေ က နိုင်ငံတော်အတွက်လည်း ဘာမှမရဘူး။ ပြည်သူတွေအတွက်လည်း ဘာမှမရဘူး။ လက်နက်ကိုင်အဖွဲ့အစည်းနဲ့ သူတို့ အပေါင်းအသင်းလောက်ပဲ ရသွားကြတာ” ဟု ပြောသည်။

KIA-TNLA နယ်မြေအငြင်းပွားပြီး ထိုးကြိတ်နေကြစဉ်

၂၀၂၁ ခုနှစ် နိုင်ငံရေး အပြောင်းအလဲ ဖြစ်ပွားပြီးနောက်ပိုင်း မြန်မာနိုင်ငံတွင် လက်နက်ကိုင်တော်လှန်ရေး အင်အားစုများမှာ ယခင်ကထက် ပိုမိုများပြားလာခဲ့သည်။

လက်ရှိ မြန်မာ့နိုင်ငံရေး အခင်းအကျင်းတွင် တွေ့ဆုံဆွေးနွေးခြင်း နည်းလမ်းဖြင့် အဖြေရှာရန်အတွက် စတင် လုပ်ဆောင်ရာမှာ တိုင်းရင်းသားလက်နက်ကိုင် ၂ ဖွဲ့ဖြစ်သည့် ကိုးကန့်တပ်ဖွဲ့(MNDAA)နှင့် ပလောင်တပ်ဖွဲ့(TNLA) တို့ဖြင့်သာ ဆွေးနွေးရသေးသည်။

ဆွေးနွေးမှုရလဒ်မှာ MNDAA နှင့် ယာယီအပစ်ရပ်ထားသော်လည်း TNLA နှင့် နစကတို့အကြားမှာမူ အဆင်မပြေခဲ့ ကြကြောင်း သိရသည်။

တွေ့ဆုံဆွေးနွေးကြရာတွင် တိုင်းရင်းသားလက်နက်ကိုင်များဘက်မှ ၂၀၀၈ ခြေ/ဥကို မလိုလားကြသော်လည်း နစကဘက်မှ ၂၀၀၈ ခြေ/ဥကို ကိုင်ဆွဲကာ ဆွေးနွေးနေခြင်းဖြစ်ကြောင်း၊ ထိုသို့ ဆွေးနွေးနေသရွေ့ ငြိမ်းချမ်းရေး ရရှိရန်မှာ မလွယ်ကူကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

တိုင်းရင်းသားလက်နက်ကိုင်များဘက်မှ သိမ်းပိုက်ရရှိထားသော နယ်မြေ အများပြား ရှိနေသည့်အတွက် တွေ့ဆုံ ဆွေးနွေးကြရာတွင် ယာယီအပစ်ရပ်ထားရေး အနေအထားကိုသာ ဆွေးနွေးနိုင်မည်ဖြစ်ကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ(TNDP)မှဥက္ကဋ္ဌ ဦးစိုင်းဋ္ဌေးအောင်က CNI သတင်းဌာနသို့ ပြောသည်။ 

အာဏာရှင်ဆန့်ကျင်ရေး လှုပ်ရှားမှုကိုတွေ့ရစဉ်

ထိုသို့ အပစ်ရပ်ခြင်းမှတဆင့် ထပ်မံဆွေးနွေးကြရင်း ထာဝရ ငြိမ်းချမ်းရေး ရရှိစေချင်ကြောင်း ၎င်းက ပြောသည်။

TNDP မှ ဥက္ကဋ္ဌ ဦးစိုင်းဋ္ဌေးအောင်က “ငြိမ်းချမ်းရေးကဏ္ဍမှာ အပစ်ရပ်သွားတယ်ဆိုတာကတဆင့် တက်သွား တာပေါ့။ အပစ်ရပ်ပြီး နောက်တဆင့် ပြန်ဆက်ဆွေးနွေး။ အဲဒါကတော့ ကျနော်တို့ ဖြစ်စေချင်တဲ့ ဆန္ဒပေါ့လေ။ လုံးဝငြိမ်းချမ်းသွားတာ မဟုတ်တောင် အပစ်ရပ်သွားရင်တော့ ပြည်သူ့ဘဝက သက်သာချောင်ချိ လာမယ်လေ။ ဒါပြီးရင်တော့ ဆွေးနွေးရင်း ဆွေးနွေးရင်းနဲ့ ထာဝရငြိမ်းချမ်းရေး ရရှိသွားစေချင်တာပေါ့။ အခုကတော့ မလွယ်ပါ ဘူး။ ကျနော်တို့ အခက်အခဲတွေ ကြီးကြီးမားမား ရင်ဆိုင်ရမှာပါ။ ဟိုဘက်ကလည်း ၂၀၀၈ အခြေခံဥပ‌ဒေအတိုင်း သွားမယ်ဆိုရင် ငြိမ်းချမ်းရေးက မရနိုင်ဘူး။ ဒီဘက်ကလည်း ၂၀၀၈ ကို လက်ကိုင်ပြီးမှ ပြောနေတဲ့အခါကြတော့ ငြိမ်းချမ်းရေးရဖို့က မလွယ်ဘူး။ မလွယ်ဘူးဆိုပေမယ့် နိုင်ငံသားအချင်းချင်းဆိုတော့ လုပ်ရမှာပါ။ ရှောင်လွှဲလို့ လည်း မရဘူးဆိုတော့လေ” ဟု ပြောသည်။

၂၀၀၈ ဖွဲ့စည်းပုံအခြေခံဥပဒေကို ပြုပြင်၊ ပြင်ဆင်ပြောင်းလဲရေးမှာ အရပ်သားအစိုးရ လက်ထက်ကတည်းက ဆွေးနွေးခဲ့ကြခြင်းဖြစ်သော်လည်း အထမမြောက်ခဲ့ကြောင်း၊ လက်ရှိ မြန်မာ့နိုင်ငံရေး အခင်းအကျင်းကိုလည်း ၂၀၀၈ ခြေ/ဥကို ပြောင်းလဲရုံဖြင့် ထိန်းသိမ်းနိုင်ခြေမရှိကြောင်း ဝေဖန်ထောက်ပြမှုများရှိသည်။