CNI News

၂၀၂၅ ခုနှစ်၊ စက်တင်ဘာ ၃

စစ်ကိုင်းတိုင်းဒေသကြီးအထက်ပိုင်း၊ ဟုမ္မလင်းမြို့နယ်အတွင်း ဖွဲ့စည်းထားသော HPDF-124 အဖွဲ့ထဲက လူတချို့ သည် ရှမ်းနီ PDF ဖွဲ့စည်းရန် ကြိုးပမ်းသည်ဟုဆိုကာ စွပ်စွဲ၍ ဖမ်းဆီးခံခဲ့ရပြီးနောက် ကချင်လွတ်လပ်ရေးတပ်မတော်(KIA)ဘက်ကို ပို့ဆောင်လိုက်ကြောင်း ဒေသတွင်း သတင်းရင်းမြစ်များက ပြောသည်။

 ရှမ်းနီ PDF ဖွဲ့စည်းမည့် ကြိုးပမ်းမှုကြောင့် ဖမ်းဆီးခံခဲ့ရသူများမှာ ဟုမ္မလင်း HPDF-124 အဖွဲ့မှ ခေါင်းဆောင် တစ်ဦး ဖြစ်သူ စိုင်းအောင်နှင့်အဖွဲ့ဖြစ်သည်။

၎င်းတို့ကို ဟုမ္မလင်းမြို့၊ နတ်နန်းကျေးရွာတွင်  ဩဂုတ်လအတွင်းက NUG လက်အောက်ခံ ပကဖ၊ ပအဖနှင့်  ခန္တီးခရိုင်တပ်ရင်း စုစုပေါင်း အင်အား ၂၀၀ ဖြင့် ပိတ်ဆို့၍ ဖမ်းဆီးခဲ့ပြီးနောက် ကချင်ပြည်နယ်ဘက်သို့ ပို့ဆောင်လိုက်ကြောင်း သတင်းရင်းမြစ်များက ပြောသည်။

ဟုမ္မလင်းမြို့နယ်၊ နတ်နန်းကျေးရွာကို ဟုမ္မလင်း HPDF-124 နှင့် KIA ပူးပေါင်း၍ ထိန်းချုပ်ထားသည်။ 

CNI New

၂၀၂၅ ခုနှစ်၊ စက်တင်ဘာ ၃

နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က မြန်မာနိုင်ငံကို ရှန်ဟိုင်းပူးပေါင်းဆောင်ရွက်မှုအဖွဲ့(SCO)တွင် အဖွဲ့ဝင်နိုင်ငံအဖြစ် ပါဝင်ခွင့်ရရှိရေး ကြိုးပမ်းနေခြင်းကြောင့် အဖွဲ့ဝင်ဖြစ်လာပါက မြန်မာနိုင်ငံ အနေအထား ဘယ်လိုဖြစ်လာနိုင်လဲဆိုသည့်အပေါ် စစ်ရေးနှင့်နိုင်ငံရေးအကဲ ခတ်များက သုံးသပ်နေကြသည်။ 

တရုတ်နိုင်ငံ၊ ထျန်းကျင်းမြို့မှာ ၂၀၂၅ ခုနှစ်၊ ဩဂုတ် ၃၁ ရက်မှ စက်တင်ဘာ ၁ ရက်ထိ ကျင်းပသည့် ရှန်ဟိုင်း ပူးပေါင်းဆောင်ရွက်မှုအဖွဲ့(SCO) ထိပ်သီး အစည်းအဝေးကို ဗိုလ်ချုပ်မှူးကြီးမင်းအောင်လှိုင် တက်ရောက်၍ မြန်မာနိုင်ငံအား အဖွဲ့ဝင်အဖြစ် လက်ခံရန် ဆွေးနွေးခဲ့သည်။

မြန်မာအနေဖြင့် SCO အဖွဲ့ဝင်နိုင်ငံ ဖြစ်သွားလျှင် အင်အားကြီးနိုင်ငံများ၏ ကြားတွင် Proxy war ဒဏ်ကိုခံရ သည့်နိုင်ငံ ဖြစ်သွားနိုင်သလို ၎င်းတို့၏ စီးပွားရေးကို မှီခိုပြီး လိုက်ပါ စီးမျှောသွားနိုင်သော နိုင်ငံလည်းဖြစ်နိုင် ကြောင်း ရန်ကုန်စောင့်ကြည့်အဖွဲ့ တည်ထောင်သူ ဒေါက်တာညိုညိုသင်းက CNI သတင်းဌာနသို့ ပြောသည်။

SCO အစည်းအဝေးမှာ ဗိုလ်ချုပ်မှူးကြီးမင်းအောင်လှိုင် ဆွေးနွေးနေစဉ်

၎င်းက “အားနည်းချက်ကတော့ ကံမကောင်းဘူး ဆိုလို့ရှိရင်တော့ Proxy war ခံရမဲ့နိုင်ငံတွေရဲ့ အလားအလာ ရှိတယ်၊ အားနည်းချက်အနေနဲ့။ အားသာချက်က အိမ်နီးချင်း နိုင်ငံကြီးတွေရဲ့ စီးပွားရေးကို မှီခိုပြီးတော့ တစ်ခါထဲ ဒီစီးပွားရေး အမျှင်ကြောမှာ ကိုယ်က ပါးပါးနပ်နပ်နဲ့ လိုက်ပါစီးမျှောသွားနိုင်တယ်ဆို သူတို့ရဲ့ စီးပွားရေး တိုးတက် မှုပေါ့။ သူတို့ရဲ့ စီးပွားရေး တိုးတက်မှု အမျှင်ကြောမှာ စီးမျှောပြီးတော့ပေါ့။ ကိုယ့်ရဲ့ဒေသ အကြိုးစီးပွား ပါးပါး နပ်နပ်နဲ့ လိုက်ပါသွားမယ်ဆိုရင်တော့ အန်တီတို့ နိုင်ငံက စီးပွားရေး တိုးတက်မှုကို အမြန်ဆုံး ရသွားနိုင်တယ်။ အဲတာကတော့ အားသာချက်ပေါ့ အားနည်းချက်ကတော့ ခုနကလို နိုင်ငံရေးမှာ အန်တီတို့က ပါးပါးနပ်နပ် မရှိဘူး ဆိုလို့ရှိရင် အနေမတက် အထိုင်မတက်လို့ရှိရင် ဒီအင်အားကြီး နိုင်ငံတွေရဲ့ကြားမှာ Proxy war ဒဏ်ကို ခံရတဲ့ နိုင်ငံ ဖြစ်သွားနိုင်တယ်။ ရွေးကောက်ပွဲ ပြီးသွားရင်တော့ ရွေးကောက်ပွဲနဲ့ ပေါ်လာမဲ့ အစိုးရတစ်ရပ် ပေါ်လာမယ် အဲဒီအစိုးရကလည်း ဂုဏ်သိက္ခာရှိတဲ့ လွှတ်တော်တွေနဲ့ အတူတူ ဂုဏ်သိက္ခာရှိတဲ့ အစိုးရတစ်ရပ် ဖြစ်မယ်ဆိုလို့ ရှိရင်တော့ SCO နိုင်ငံ မြန်မြန်လေး ဖြစ်သွားနိုင်ပါတယ်”ဟု ပြောသည်။

ရှန်ဟိုင်းပူးပေါင်းဆောင်ရွက်မှုအဖွဲ့(SCO)သည် ကမ္ဘာ့လူဦးရေ၏ ၄၀ ရာခိုင်နှုန်း အထိရှိပြီး ၂၀၂၃ ခုနှစ် စာရင်းအရ ၎င်း၏ စုစုပေါင်း GDP သည် ကမ္ဘာ့ GDP ၏ ၃၂ ရာခိုင်နှုန်း ဝန်းကျင်ရှိသည်။

လက်ရှိတွင် SCO မှာ အမြဲတမ်းအဖွဲ့ဝင် ၁၀ နိုင်ငံ၊ လေ့လာသူအဆင့် ၁ နိုင်ငံနှင့် ဆွေးနွေးဖက်နိုင်ငံ ၁၄ နိုင်ငံ ပါဝင်သည်။  မြန်မာနိုင်ငံအနေဖြင့် ၂၀၂၃ ခုနှစ်တွင် ဆွေးနွေးဖက် နိုင်ငံအဖြစ် ပူးပေါင်းပါဝင်ခဲ့သည်။

SCO အဖွဲ့ဝင်နိုင်ငံဆိုလျှင် ကမ္ဘာ့ထိပ်သီး တိုင်းပြည်များ၏ အင်အားကြီး တိုင်းပြည်များလည်း အများကြီး ပါသော ကြောင့် အဖွဲ့ဝင်တစ်ခု အနေဖြင့် ပါသွားလျှင် အားနည်းချက်ဆိုသည်ထက် အားသာချက်များ အများစုရှိမည်ဟု အမျိုးသားဒီမိုက‌ရေစီ အင်အားစုပါတီ(NDF)မှဒုဥက္ကဋ္ဌ ဦးထက်အောင်ကျော်က CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ တရုတ်သမ္မတ ရှီကျင့်ဖျင်နှင့်ဆွေးနွေးနေစဉ် 

၎င်းက “SCO အဖွဲ့ဝင်နိုင်ငံ ဆိုလို့ရှိရင်က တကယ့်ကို ကမ္ဘာမှာ ကမ္ဘာ့ထိပ်သီး တိုင်းပြည်တွေ စီးပွားရေးအရရော အင်အားကြီးတဲ့ တိုင်းပြည်တွေလည်း အများကြီးပါတာပေါ့။ အဲလို တိုင်းပြည်တွေထဲမှာ ကျနော်တို့က အဖွဲ့ဝင် တစ်ခု အနေနဲ့ ပါသွားရတာနဲ့ကိုက ကျနော်တို့ အားနည်းချက် ဆိုတာထက် အားသာချက်တွေပဲ အများစုရှိမှာပါ ကမ္ဘာမှာရှိနေတဲ့ ဒီအဖွဲ့အစည်းတွေ ဒါတွေက ပြောရမယ်ဆိုရင် ကမ္ဘာ့အစီအစဥ်ပေါ့လေ။ တကယ့်ကို အင်အား ကြီး နိုင်ငံတွေ စုဖွဲ့ထားတဲ့ အစုဖွဲ့တွေမှာ ကိုယ်သည် ပါဝင်ခြင်းအားဖြင့်ကိုက ကိုယ်လည်း ဒီကနေ ကိုယ့်တိုင်း ပြည်အတွက် ပို၍ပို၍ ကောင်းမွန်တဲ့ အခင်းအကျင်းတွေ ဖော်ဆောင်နိုင်မှာပေါ့လေ။ နို့မို့ဆိုရင်က ကျနော်တို့က ကိုယ့်ဟာနဲ့ကိုယ် သီးသန့် isolate ဖြစ်နေတဲ့ဟာမျိုးက အဆင်မပြေဘူးလေ။ ဒါ SCO မှ မဟုတ်ဘူး ကျန်တဲ့ဟာ တွေလည်း တကယ်ကို ဖြစ်နိုင်သမျှပေါ့။ များများပေါ့နော်။ ဒါမျိုးတွေ ဟိုဝင်ပါပြီးတော့မှ တက်တက်ကြွကြွ ဆောင်ရွက်ခြင်း အားဖြင့်က ဒါတိုင်းပြည်ရဲ့ စီးပွားရေး တိုင်းပြည်ရဲ့ အနေအထားတွေ အားလုံးကို ကောင်းမွန် အောင် ဆောင်ရွက် ပေးသွားနိုင်ပါတယ်လို့ ယုံကြည်ပါတယ်”ဟု ပြောသည်။

ဗိုလ်ချုပ်မှူးကြီးမင်းအောင်လှိုင်က မိမိတို့အကြား အပြန်အလှန် ယုံကြည်မှု၊ ကွဲပြားသည့် ယဉ်ကျေးမှုများကို အပြန်အလှန် တန်ဖိုးထားလေးစားမှု၊ သာတူညီမျှရှိမှု၊ ဘုံဖွံ့ဖြိုးတိုးတက်ရေးတို့အတွက် ရှန်ဟိုင်းစိတ်ဓာတ်၏ လမ်းပြရှေ့ဆောင်မှုအောက်တွင် မိမိတို့အားလုံးအတွက် ငြိမ်းချမ်းရေး၊ တည်ငြိမ်ရေးနှင့် သာယာဝပြောရေးတို့ကို ဦးစားပေး ဆောင်ရွက်နိုင်ရန် အတူတကွ ကြိုးပမ်း ဆောင်ရွက်သွားကြရမည် ဖြစ်တယ်ဟု ပြောသည်။

CNI News

၂၀၂၅ ခုနှစ်၊ စက်တင်ဘာ ၃

မြောက်ကိုရီးယားခေါင်းဆောင် ကင်မ်ဂျုံအန်နှင့် နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ ၂၀၂၅ ခုနှစ်၊ စက်တင်ဘာ ၃ ရက်က တရုတ်နိုင်ငံ၊ ဘေကျင်းမြို့မှာ တွေ့ဆုံ ခဲ့ကြသည်။

၎င်းတို့ နှစ်ဦးသည် စက်တင်ဘာ ၃ ရက်က ကျင်းပသည့် တရုတ်ပြည်သူများ၏ ဂျပန် ခုခံတော်လှန်ရေးစစ်ပွဲနှင့် ကမ္ဘာ့ဖက်ဆစ် ဆန့်ကျင်ရေးစစ်ပွဲ အောင်နိုင်ခြင်းနှစ် (၈၀) ပြည့် အထိမ်းအမှတ် စစ်ရေးပြ အခမ်းအနားကို တက်ရောက်ရင် တွေ့ဆုံခဲ့ကြခြင်းဖြစ်သည်။

CNI News

၂၀၂၅ ခုနှစ်၊ စက်တင်ဘာ ၃

မြန်မာနိုင်ငံတွင် တရုတ်ကုမ္ပဏီနှင့် တရုတ်ဈေးကွက် ကြီးစိုးနေသည့် မြေရှားသတ္တုတူးဖော်ရေးလုပ်ငန်းကို အိန္ဒိယနိုင်ငံအနေဖြင့် ဝင်ရောက်လာပါက မည်သည့်ဒေသများ၌ တူးဖော်လာနိုင်သလဲ ဆိုသည့်အပေါ် စစ်ရေးနှင့် နိုင်ငံရေးအကဲခတ်များကြား သုံးသပ်မှုများ ရှိနေကြသည်။

မြန်မာနိုင်ငံမှ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ၏ တရုတ်ခရီးစဉ်တွင် အိန္ဒိယ ဝန်ကြီးချုပ် မိုဒီနှင့်တွေ့ဆုံခဲ့ပြီး မြေရှားသတ္တု တူးဖော်ရေးနှင့် လုံခြုံရေးကဏ္ဍများမှာ နှစ်နိုင်ငံ ဆက်ဆံရေး တိုးမြှင့်ရန် သဘောတူညီမှု ရရှိခဲ့သည်။

တရုတ်-မြန်မာနယ်စပ် ကချင်ဒေသက မြေရှားသတ္တုများသည် တရုတ်လုပ်ကွက်များ ဖြစ်နေသည့်အတွက် အိန္ဒိယ အနေဖြင့် အစိုးရချင်းသဘောတူညီမှု (G to G) ဖြင့် မြေရှားတူးဖော်ရေး လုပ်မည်ဆိုပါက စစ်ကိုင်းတိုင်းဒေသထဲ တွင် လုပ်ဆောင်နိုင်ကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

မြေရှားသတ္တုတူးဖော်နေသော လုပ်ငန်းခွင်ကို တွေ့ရစဉ်

၎င်းက “အထူးသဖြင့် ကျနော်တို့ ရှာဖွေတွေ့ရှိခြင်း မလုပ်ရသေးတာကတော့ မြန်မာနိုင်ငံရဲ့ အနောက်မြောက် ဘက် အခြမ်းပေါ့။ ကချင်ပြည်နယ်နဲ့ စစ်ကိုင်းတိုင်း ထိစပ်နေတဲ့ အပေါ်ဘက်ပေါ့။ အထူးသဖြင့် ဒုတိယကမ္ဘာစစ် အတွင်းက အင်ဖာ-ကိုဟီးမားကို ဂျပန်တွေ သွားတိုက်တဲ့ လမ်းကြောင်းမှာရှိတဲ့ မြို့တွေ၊ ရွာတွေပေါ့။ ဥပမာ ပန်ဆောင်တို့၊ ဟိုဘက်ကဆိုရင် မော်လိုက်တို့၊ နောက်ပြီးတော့ ဟုမ္မလင်းတို့၊ အဲဒီနေရာတွေက အိန္ဒိယနဲ့ ချိတ်ဆက်ပြီးတော့ ကျနော်ထင်တယ်လေ၊ လက်ရှိမြေရှားနဲ့ ပတ်သက်လို့လည်း ကျနော်တို့ မသိသေးတာလည်း ဖြစ်နိုင်တာပေါ့။ ဒါက ရှိကောင်းရှိနေနိုင်တာပေါ့။ ဒီလိုနေရာမျိုး ဆိုရင်တော့ အိန္ဒိယဘက်က ကျနော်တို့ အလိုရှိမှာ သေချာပါတယ်။ ဒါကြောင့်မို့လို့လည်း လက်ရှိ ယာယီသမ္မတကြီး အနေနဲ့ ဒါကို ဆွေးနွေးခဲ့တယ်လို့ ကျနော်ယူဆ ပါတယ်။ အဲဒါက သယ်မယ်ဆိုရင် အင်ဖာ-ကိုဟီးမားပေါ့။ တမူးပေါ့နော်။ စစ်ကိုင်းတိုင်း၊ ကလေးအပေါ်က တမူး။ အဲဒီဘက် အပေါ်မြင့်လို့လည်း လမ်းကြောင်းတွေက ရှိနေပါတယ်။ တောက်လျှောက်ကို နှစ်နိုင်ငံမှာ Trade အနေနဲ့ အကြီးအကျယ်ကြီးသာ မသွားပေမယ့် ဒေသန္တရ ပြည်သူအချင်းချင်း ဟိုဘက်၊ ဒီဘက် ပူးပေါင်းဆက်ဆံနေတဲ့ အိန္ဒိယ၊ အာသံပြည်နယ်၊ နာဂလန်း၊ အောက်ဆိုရင် မီဇိုရမ်၊ အားလုံးက မြန်မာနိုင်ငံနဲ့ကတော့ နယ်စပ်ဖြစ်တဲ့ အတွက်ကြောင့်မို့လို့ ချိတ်ဆက်မှုကတော့ အများကြီးရှိပါတယ်။ လမ်းကြောင်းအရကလည်း မရှိဘူးလို့ ပြောလို့ မရပါဘူး။ ရှိနေမှာပါ”ဟု ပြောသည်။

ပြီးခဲ့သည့် လပိုင်းက အမေရိကန်ဘက်မှ မြန်မာ့မြေရှားများအား စိတ်ဝင်စားသည့်အကြောင်း ထွက်ပေါ်လာပြီး နောက် ဒုတိယကမ္ဘာစစ်အတွင်း စစ်ရေးအတွက် အသုံးပြုခဲ့သည့် စတီးဝဲလမ်းခေါ် လီဒိုလမ်းမကြီးကို ကုန်သွယ်မှု လုပ်ငန်းများ လုပ်ကိုင်နိုင်ရန် အိန္ဒိယဘက်မှ တာဝန်ယူ ပြုပြင်ပေးသွားရန်ရှိကြောင်း ဘီဘီစီ သတင်းဌာနတွင် ဖော်ပြထားသည်။

ထိုလမ်းကြောင်းသည် အိန္ဒိယနိုင်ငံ၊ လီဒိုမြို့မှ မြန်မာနိုင်ငံ၊ စစ်ကိုင်းတိုင်းအထက်ပိုင်းနှင့် ကချင်ပြည်နယ်ကို ဖြတ်ပြီး တရုတ်ပြည် ကူမင်းမြို့အထိ ဖောက်လုပ်ထားသည့် လီဒိုလမ်းမကြီးဖြစ်ကြောင်း၊ ဒုတိယ ကမ္ဘာစစ်အပြီး ၁၉၄၅ ခုနှစ်၊ နိုဝင်ဘာလတွင် ရပ်နားထားခဲ့သည်မှာ ယနေ့တိုင် ဖြစ်သည်။

စစ်ကိုင်းတိုင်းဒေသကြီးသည် အိန္ဒိယနှင့် နီးစပ်သော်လည်း ပန်ဝါဘက်မှ မြေရှားသတ္တု တူးဖော်ရေး လုပ်မည်ဆိုပါ ကလည်း အိန္ဒိယနှင့် နီးစပ်ကြောင်း တိုင်းလိုင်(ရှမ်းနီ)အမျိုးသားများ ဖွံ့ဖြိုးတိုးတက်ရေးပါတီ (TNDP) မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

မြေရှားသတ္တုနဲ့ လက်နက်ကိုင်များကို တွေ့ရစဉ် 

၎င်းက “ဘယ်ဒေသတွေ ဖြစ်နိုင်မလဲဆိုတော့ စစ်ကိုင်းတိုင်းထဲမှာလည်း ဒီကိစ္စတွေက ရှိနေတယ်လို့တော့ ကြားသိ ထားတာပေါ့။ စစ်ကိုင်းတိုင်းဆိုရင်တော့ အိန္ဒိယနဲ့ တော်တော်လေး နီးစပ်တယ်ပေါ့။ အခု ပန်ဝါတို့ ဘာတို့ဆိုတာ လည်း တကယ်တမ်း တရုတ်နဲ့နီးစပ်တယ်။ လမ်းကြောင်းသာ ကောင်းသွားရင် အိန္ဒိယဘက်ကိုလည်း တစ်ရက် အတွင်းနဲ့ ပေါက်တဲ့ နေရာတွေပါ။ ဟိုတုန်းက စတီးဝဲလ်လမ်းမကြီး (လီဒို)ကိုအသုံးပြုပြီး သွားကြမယ်ဆိုရင်လည်း  အိန္ဒိယဘက်က လမ်းကောင်းကောင်း ဖောက်ထားတယ်။ မြန်မာဘက်ကပဲ ကျန်တော့တာလေ။ အဲဒီလမ်းဟောင်း ကြီးကလည်း ပြန်ပြင်မှာ။ ဒါက မြေရှားသယ်ယူရေး ကိစ္စတွေလည်း မဖြစ်လာဘူးလို့ ပြောလို့မရဘူး။ အဲဒီ စတီးဝဲလ်လမ်းမကြီး (လီဒို)ကိုလည်း။ ဒါကြောင့် အိန္ဒိယက လုပ်မယ်ဆိုရင် ဘယ်နေရာ လုပ်မယ်ဆိုတာ အတိ အကျ မပြောနိုင်ပေမယ့်လည်း မြန်မာပြည်မှာတော့ မြေရှားထွက်တဲ့နေရာ တော်တော်များများ ရှိတယ်။ အခုလော လောဆယ် ပန်ဝါကနေပြီးမှ လုပ်မယ်ဆိုရင်လည်း သူ့အိန္ဒိယနဲ့ နီးစပ်တယ်ဆိုတဲ့ အကြောင်းလေးကို ကျနော် ဆွေးနွေးလိုတာပါ” ဟု ပြောသည်။

လက်ရှိတွင် မြေရှားလုပ်ကွက်ပေါင်း ၃၀၀ နီးပါး ရှိနေသည့် ပန်ဝါဒေသ အပါအဝင် ကချင်ပြည်နယ်ထဲမှ မြေရှား သတ္တုထွက်ရှိရာ ဒေသများကို KIA မှ သိမ်းပိုက်ထားသည်။

KIA မသိမ်းပိုက်ခင်က မြန်မာဘက်ကနေ တရုတ်ကိုတင်ပို့သည့် မြေရှားသတ္တုသည် ၂၀၂၄ ခုနှစ်၊ စက်တင်ဘာလ တွင် တန်ချိန် ၄,၂၀၀ ရှိခဲ့ကြောင်း၊ ချီဖွေနှင့်ပန်ဝါ၌ KIA နှင့် တိုက်ပွဲ ဖြစ်နေစဉ်ကာလ အောက်တိုဘာမှ ဒီဇင်ဘာ အထိ သုံးလအတွင်း တန်ချိန် ၃,၃၀ဝ ကျော် တင်ပို့နိုင်ကြောင်း တရုတ်အကောက်ခွန်ဌာန၏ စာရင်းများအရ သိရသည်။

လက်ရှိတွင် တရုတ်ဘက်မှ မြေရှားသတ္တု တူးဖော်တင်ပို့သည့် လုပ်ငန်းများနှင့် ဝင်ငွေများသည် KIA ၏ ထိန်းချုပ်မှု အောက်တွင်သာ ရှိနေကြောင်း သိရသည်။

အလားတူ ရှမ်းပြည်နယ်အတွင်းက မြေရှားသတ္တုတူးဖော်နေသော ဒေသများကိုတော့ “ဝ”ပြည်သွေးစည်းညီညွတ် ရေးတပ်မတော်(UWSA)နှင့် အမျိုးသားဒီမိုကရေစီမဟာမိတ်တပ်မတော်(NDAA)တို့ ထိန်းချုပ်ထားသည်။

CNI News

၂၀၂၅ ခုနှစ်၊ စက်တင်ဘာ ၃

ပြည်သူများလိုလားသည့် ပါတီစုံဒီမိုကရေစီ ခိုင်မာစွာဖြင့် ဆက်လက် လျှောက်လှမ်းနိုင်ရေး တပ်မတော် အနေဖြင့် ကြိုးပမ်းဆောင်ရွက်နေသည်ဟု နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်း အောင်လှိုင်က ပြောသည်။

၂၀၂၅ ခုနှစ်၊ စက်တင်ဘာ ၂ ရက်က တရုတ်နိုင်ငံ၊ ဘေကျင်းမြို့ရှိ မြန်မာသံရုံးနှင့် စစ်သံရုံး မိသားစုများ၊ ပညာတော် သင် ကျောင်းသား/သူများဖြင့် မြန်မာသံရုံး၌ တွေ့ဆုံစဉ် ၎င်းက ပြောကြားခဲ့ခြင်း ဖြစ်သည်။

မိမိတို့ နိုင်ငံအနေဖြင့် လွတ်လပ်ရေး ရရှိပြီးအချိန်မှစတင်၍ နိုင်ငံရေးစနစ်အမျိုးမျိုး၊ စီးပွားရေးစနစ် အမျိုးမျိုးဖြင့် လျှောက်လှမ်းခဲ့ရကြောင်း၊ တပ်မတော် အနေဖြင့် ၂၀၁၀ ပြည့်နှစ်တွင် ပါတီစုံဒီမိုကရေစီ အထွေထွေရွေးကောက်ပွဲ ကို ကျင်းပ၍ နိုင်ငံတော်အား ပါတီစုံဒီမိုကရေစီလမ်းကြောင်းပေါ်တွင် လျှောက်လှမ်းနိုင်ရေး ‌ဆောင်ရွက်ပေးခဲ့ ကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။

ပါတီစုံဒီမိုကရေစီစနစ် ခိုင်မာမှုရှိစေရေး တပ်မတော်အနေဖြင့် ကြိုးပမ်း ဆောင်ရွက်လျက်ရှိကြောင်း၊ ဒီမိုကရေစီ ပထမအစိုးရသက်တမ်းတွင် ဒီမိုကရေစီစနစ် ခိုင်မာစေရေး ကြိုးပမ်းဆောင်ရွက်ခဲ့သကဲ့သို့ ပြည်တွင်းငြိမ်းချမ်းရေး ရရှိစေရေးအတွက်လည်း ကြိုးပမ်း ဆောင်ရွက်ခဲ့ကြောင်း၊ ဒီမိုကရေစီစနစ်ကို ကျင့်သုံးရာတွင် ပြည်တွင်းငြိမ်းချမ်း ရေးသည် မဖြစ်မနေ လိုအပ်ကြောင်း ၎င်းက ပြောသည်။

ဗိုလ်ချုပ်မှူးကြီးမင်းအောင်လှိုင်က “တပ်မတော်သားများသည် ပြည်သူများ၏ အစိတ်အပိုင်း၊ တပ်မတော်သည် နိုင်ငံတော်၏ အစိတ်အပိုင်းဖြစ်သည်နှင့်အညီ ပြည်သူများ လိုလားသည့် ပါတီစုံဒီမိုက‌ရေစီ လမ်းကြောင်းပေါ်တွင် ခိုင်မာစွာဖြင့် ဆက်လက် လျှောက်လှမ်းနိုင်ရေး တပ်မတော် အနေဖြင့် ကြိုးပမ်းဆောင်ရွက်လျက်ရှိသည်”ဟု ပြောသည်။

မိမိတို့အနေဖြင့် လာမည့် ဒီဇင်ဘာလအတွင်း ရွေးကောက်ပွဲ ကျင်းပနိုင်ရေး ကြိုတင်ပြင်ဆင်ခြင်း လုပ်ငန်းများ ဆောင်ရွက်နေကြောင်း၊ မဲပေးပိုင်ခွင့်ရှိသူအားလုံး မဲပေးနိုင်ရေး ကြိုးပမ်းဆောင်ရွက်နေကြောင်း၊ ရွေးကောက်ပွဲ အား ဒေသအလိုက် တည်ငြိမ်အေးချမ်းမှုများကို အခြေခံ၍ အပိုင်းလိုက် ကျင်းပဆောင်ရွက်သွားမည်ဖြစ်ကြောင်း၊ ရွေးကောက်ပွဲတွင် မဲစာရင်းများ မှားယွင်းမှု မရှိစေရေးအတွက် မြန်မာအီလက်ထရောနစ် မဲပေးစနစ်(MEVM)ဖြင့် ဆောင်ရွက်ပေးသွားမည်ဖြစ်ကြောင်း ၎င်းက ပြောသည်။

ရွေးကောက်ပွဲတွင် ဝင်ရောက်ယှဉ်ပြိုင်မည့် ကိုယ်စားလှယ်များအနေဖြင့် ပညာတတ်များဖြစ်ရန်လည်း လိုကြောင်း၊ ရွေးကောက်ပွဲ ကျင်းပချိန်တွင် နိုင်ငံအတွက်၊ ဒေသအတွက် အကျိုးပြုနိုင်မည့်သူကို ကိုယ်စားလှယ်အဖြစ် ရွေး ချယ်နိုင်ရန်လိုကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။

မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ ၂၈ ရက်၌ ရွေးကောက်ပွဲအား အပိုင်း(၁) အနေဖြင့် မြို့နယ်ပေါင်း ၁၀၂ မြို့နယ်မှာ ကျင်းပမည်ဖြစ်ပြီး ကျန်မဲဆန္ဒနယ်များကို ၂၀၂၆ ခုနှစ်၊ ဇန်နဝါရီလမှာ ဆက်လက် ကျင်းပမည် ဖြစ်သည်။

ထို့နောက် ‌ရွေးကောက်ပွဲ အနိုင်ရသည့် နိုင်ငံ‌ရေးပါတီကို နိုင်ငံတော်အာဏာ လွှဲပြောင်းပေးမည်ဖြစ်ပြီး တပ်မတော်က ကာကွယ်ရေး တာဝန်ကိုသာ ဆက်လက် ထမ်းဆောင်မည်ဖြစ်ကြောင်း ဗိုလ်ချုပ်မှူးကြီး မင်းအောင်လှိုင်က ပြောကြားထားသည်။

CNI News

၂၀၂၅ ခုနှစ်၊ စက်တင်ဘာ ၂

မိမိတို့ မြန်မာနိုင်ငံအနေဖြင့် ရှန်ဟိုင်းပူးပေါင်းဆောင်ရွက်မှုအဖွဲ့(SCO)၏ မူဘောင်များ အောက်မှပါဝင်ကာ ဒေသ လုံခြုံရေးနှင့် ခေတ်မီနည်းပညာများ ဖွံ့ဖြိုးတိုးတက်ရေးတို့အတွက် ပူးပေါင်းဆောင်ရွက်သွားလိုသည်ဟု နိုင်ငံ တော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ ဩဂုတ် ၃၁ ရက်မှ စက်တင်ဘာ ၁ ရက်အထိ တရုတ်နိုင်ငံ၊ တီယန်ကျင်းမြို့ရှိ Tianjin Meijiang Convention Center ၌ ကျင်းပခဲ့သည့် ရှန်ဟိုင်းပူးပေါင်းဆောင်ရွက်မှုအဖွဲ့ ထိပ်သီး အစည်းအဝေး (Shanhai Cooperation Organisation-SCO Summit 2025 Plus)သို့ တက်ရောက်၍ ဆွေးနွေးစဉ် ဗိုလ်ချုပ်မှူးကြီး မင်းအောင်လှိုင်က ပြောကြားခဲ့ခြင်း ဖြစ်သည်။

လုံခြုံရေးကဏ္ဍတွင် ရှန်ဟိုင်းပူးပေါင်းဆောင်ရွက်မှုအဖွဲ့(SCO) အနေဖြင့် အကြမ်းဖက်မှု တိုက်ဖျက်ရေး၌ တက်ကြွ စွာ ပူးပေါင်းဆောင်ရွက်လျက်ရှိရာ ယနေ့ မျက်မှောက်ခေတ်တွင် ရင်ဆိုင်ကြုံတွေ့နေရသည့် အကြမ်းဖက်ဝါဒ၊ ခွဲ ထွက်ရေးဝါဒနှင့် အစွန်းရောက်ဝါဒတို့၏ ခြိမ်းခြောက်မှုများကို တိုက်ဖျက်ရာမှာ ထိရောက်သည့် အောင်မြင်မှုများ ကို တွေ့မြင်ရကြောင်း ၎င်းက ပြောသည်။

၂၀၂၅ ခုနှစ်၊ စက်တင်ဘာ ၁ ရက်က ဗိုလ်ချုပ်မှူးကြီးမင်းအောင်လှိုင် SCO ထိပ်သီး အစည်းအဝေး တက်ရောက်လာစဉ်

ထို့နောက် ခေတ်မီနည်းပညာရပ်များ ဖြစ်သည့်ဥာဏ်ရည်တု(AI) နည်းပညာနှင့် Data အုပ်ချုပ်မှုဆိုင်ရာ ဒစ်ဂျစ် တယ် နည်းပညာပူးပေါင်း ဆောင်ရွက်မှုများကိုလည်း အလေးထား လုပ်ဆောင်လျက်ရှိသည့်အတွက် အဖွဲ့ဝင်နိုင်ငံ များအနေဖြင့် နည်းပညာဖွံ့ဖြိုးတိုးတက်မှုများ၏ အသီးအပွင့်များကို ခံစားရလျက်ရှိကာ အနာဂတ်တွင် ဖြစ်ပွား လာနိုင်သည့် ခေတ်မီ နည်းပညာသုံး တိုက်ခိုက်မှုများကို စုပေါင်းကာကွယ်နိုင်သော အလားအလာများကိုလည်း တွေ့မြင်ရကြောင်း ကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောကြားခဲ့သည်။

၎င်းက “ မိမိတို့ မြန်မာနိုင်ငံအနေဖြင့် ရှန်ဟိုင်းပူးပေါင်းဆောင်ရွက်မှုအဖွဲ့(SCO)၏ မူဘောင်များ အောက်မှ ပါဝင်ကာ ဒေသလုံခြုံရေးနှင့် ခေတ်မီနည်းပညာများ ဖွံ့ဖြိုးတိုးတက်ရေးတို့အတွက် ပူးပေါင်းဆောင်ရွက် သွားလိုသည်”ဟု ပြောသည်။

တရုတ်သမ္မတ ရှီကျင့်ဖျင်၏ ကမ္ဘာလုံးဆိုင်ရာ အုပ်ချုပ်မှု ပဏာမ အဆိုပြုချက် (Global Governance Initiative-GGI) ၅ ချက်ကို ထောက်ခံပါကြောင်း၊ မိမိတို့ မြန်မာနိုင်ငံအနေဖြင့် ရှန်ဟိုင်းပူးပေါင်းဆောင်ရွက်မှုအဖွဲ့(SCO)၏ အဖွဲ့ဝင် နိုင်ငံဖြစ်လာစေရေး ထောက်ခံပေးနိုင်ရန် အလေးအနက်ထား မေတ္တာရပ်ခံပါကြောင်း ဗိုလ်ချုပ်မှူးကြီး မင်းအောင်လှိုင်က ပြောကြားခဲ့သည်။

ထို့နောက် ဗိုလ်ချုပ်မှူးကြီးမင်းအောင်လှိုင်သည် SCO ထိပ်သီး အစည်းအဝေး တက်ရောက်လာကြသည့် မလေး ရှားဝန်ကြီးချုပ်၊ မွန်ဂိုလီးယားနိုင်ငံသမ္မတ၊ နီပေါ ဝန်ကြီး ချုပ်၊ အာဆီယံအတွင်းရေးမှူးချုပ်၊ ရှန်ဟိုင်း ပူးပေါင်း ဆောင်ရွက်ရေးအဖွဲ့ချုပ် အတွင်း‌ရေးမှူးချုပ်၊ ပါကစ္စတန် ဝန်ကြီးချုပ် အပါအဝင် တခြားသော ခေါင်းဆောင်များ ဖြင့် တွေ့ဆုံဆွေးနွေးခဲ့သည်။

CNI News

၂၀၂၅ ခုနှစ်၊ စက်တင်ဘာ ၂

တရုတ်နိုင်ငံ ဒုသမ္မတ H.E. Mr. Han Zheng(မစ္စတာဟန်ကျိန့်)နှင့် မြန်မာနိုင်ငံ ယာယီသမ္မတ နိုင်ငံတော်လုံခြုံရေး နှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ တရုတ်နိုင်ငံ၊ ဘေကျင်းမြို့ရှိ ကျောက်ယွိထိုင်နိုင်ငံတော် ဧည့်ဂေဟာတွင် ၂၀၂၅ ခုနှစ်၊ စက်တင်ဘာ ၂ ရက်က တွေ့ဆုံ ဆွေးနွေးခဲ့ကြသည်။

ဗိုလ်ချုပ်မှူးကြီးမင်းအောင်လှိုင်သည် တရုတ်သမ္မတ ရှီကျင့်ဖျင်၏ ဖိတ်ကြားချက်အရ တရုတ်နိုင်ငံသို့ ၂၀၂၅ ခုနှစ်၊ ဩဂုတ် ၃၀ ရက်က ရောက်ရှိနေခြင်း ဖြစ်သည်။

ထို့နောက် တရုတ်သမ္မတ ရှီကျင့်ဖျင်နှင့်လည်းကောင်း၊ အိန္ဒိယဝန်ကြီးချုပ် မိုဒီနှင့်လည်းကောင်း၊ တရုတ်-မြန်မာ စီးပွားရေးလုပ်ငန်းရှင်များနှင့်လည်းကောင်း တွေ့ဆုံ ဆွေးနွေးခဲ့သည်။

ထို့ပြင် ဩဂုတ် ၃၁ ရက်မှ စက်တင်ဘာ ၁ ရက်ထိ တရုတ်နိုင်ငံ၊ တီယန်ကျင်းမြို့တွင် ကျင်းပသည့် ရှန်ဟိုင်းပူး ပေါင်းဆောင်ရွက်မှုအဖွဲ့(SCO) ထိပ်သီး အစည်းအဝေးသို့ တက်ရောက်၍ ဆွေးနွေးခဲ့သလို တခြားသော တက်ရောက်လာသည့် နိုင်ငံတကာ ခေါင်းဆောင်များဖြင့် တွေ့ဆုံ ဆွေးနွေးခဲ့သည်။

အလားတူ စက်တင်ဘာ ၃ ရက်နေ့တွင် တရုတ်နိုင်ငံ၊ ဘေကျင်းမြို့မှာ ကျင်းပမည့် တရုတ်ပြည်သူများ၏ ဂျပန် ခုခံတော်လှန်ရေးစစ်ပွဲနှင့် ကမ္ဘာ့ဖက်ဆစ် ဆန့်ကျင်ရေးစစ်ပွဲ အောင်နိုင်ခြင်းနှစ် (၈၀) ပြည့် အထိမ်းအမှတ် စစ်ရေးပြ အခမ်းအနားကို တက်ရောက်မည်ဖြစ်သည်။

CNI News

၂၀၂၅ ခုနှစ်၊ စက်တင်ဘာ ၂

ကရင်အမျိုးသားအစည်းအရုံး(KNU)ကို အကြမ်းဖက်အဖွဲ့နှင့် မတရားအသင်းအဖြစ် ကြေညာလိုက်ခြင်းက တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ကနေ ထုတ်ပယ်လိုက်ခြင်းလား ဆိုသည့် အပေါ် စစ်ရေးနှင့်နိုင်ငံရေးအကဲခတ်များကြား သုံးသပ်မှုများ ရှိနေကြသည်။

၂၀၂၅ ခုနှစ်၊ ဩဂုတ် ၂၈ ရက်က KNU ကို အကြမ်းဖက်အဖွဲ့အဖြစ် နိုင်ငံတော်လုံခြုံရေးနှင့် အေးချမ်းသာယာရေး ကော်မရှင် လက်အောက်ရှိ အကြမ်းဖက်မှုတိုက်ဖျက်ရေးဗဟိုအဖွဲ့က ကြေညာခဲ့သလို ပြည်ထဲရေးဝန်ကြီးဌာန ကလည်း မတရားအသင်းအဖြစ် ကြေညာခဲ့သည်။

KNU သည် NCA လက်မှတ် ရေးထိုးထားသော အဖွဲ့တစ်ခုဖြစ်သောကြောင့် ယခုကဲ့သို့ အကြမ်းဖက်အဖြစ် ကြေညာလိုက်ခြင်းသည် NCA မှ ထုတ်ပယ်သည်ထက် ခေတ္တရပ်ဆိုင်းလိုက်သည့် သဘောဖြစ်နိုင်ကြောင်း မြန်မာ့နိုင်ငံရေးလေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

၎င်းက “NCA စာချုပ်ထဲမှာတော့ သူ အကြမ်းဖက်ခဲ့သည်ဖြစ်စေ၊ မခဲ့သည်ဖြစ်စေ စာချုပ် member အဖြစ်ကနေ ပျက်ပြယ်ပြီဆိုတာ မပါဘူး။ ဒီအကြမ်းဖက် ဖြစ်သွားလို့ရှိရင် စာချုပ်က ပျက်တယ်ဆိုတာလည်း စာချုပ်စာတမ်း ပြောရရင်တော့ ဘယ်‌ဥပဒေမှ မပါသေးဘူး။ ဒါက လက်ရှိပစ္စုပန် လုပ်ဆောင်မှုအပေါ်မှာပဲ မူတည်ပြီးတော့ ဆုံးဖြတ်တာဖြစ်တယ်။ သူ့ကို ပျက်ပြယ်တယ်လို့လည်း ပြောလို့မရဘူးဆိုတဲ့ အဓိပ္ပါယ်တော့ ဥပဒေသဘောတရား အရ သွားတွေ့ရတယ်။ တကယ်လို့ သူကနေပြီးတော့ ဒါတွေ စွန့်လွှတ်ပါမယ် NCA ထဲကို ပြန်ဝင်မယ်ဆိုရင်လည်း ပဲ NCA ထဲကို အသစ်ပြန်ချုပ်ဆိုစရာလည်း မလိုဘူး။ သူကရှိပြီးသားပေါ့ ဒီသဘောတော့ သွားတွေ့ပါတယ်။ ခဏ ယာယီ suspend လုပ်တဲ့ပုံစံမျိုးလို့ ပြောမယ်ဆိုရင်တော့ ပိုမှန်တယ်လို့ ပြောရမှာပေါ့” ဟု ပြောသည်။

၂၀၂၅ ခုနှစ်၊ အောက်တိုဘာ ၁၅ ရက်က NCA လက်မှတ်ထိုးခြင်း အခမ်းအနားတွင် KNU ခေါင်းဆောင်နဲ့ ဝန်ကြီးဦးအောင်မင်း စာချုပ်လဲလည်နေစဉ် 

KNU အဖွဲ့သည် အကြမ်းဖက် လုပ်ရပ်များကို နိုင်ငံတော်အတွင်း အခြေပြု၍ အကြမ်းဖက် ကျူးလွန်လျက်ရှိခြင်း၊ နိုင်ငံတော် တရားဥပဒေ စိုးမိုးရေးကိုလည်းကောင်း၊ နိုင်ငံတော် တည်ငြိမ်အေးချမ်းရေးကိုလည်းကောင်း၊ အများ ပြည်သူတို့၏ အေးချမ်းသာယာရေးကိုလည်းကောင်း အနှောင့်အယှက် အန္တရာယ်ဖြစ်စေခြင်းတို့ကြောင့် အကြမ်းဖက်နှင့် မတရားအသင်းအဖြစ် ကြေညာခဲ့ခြင်းဖြစ်သည်။

KNU သည် ၂၀၂၁ ခုနှစ်၊ ဖေဖော်ဝါရီ ၁ ရက် နောက်ပိုင်း နိုင်ငံရေး အပြောင်းအလဲ ဖြစ်ပြီးနောက် NCA မှ နှုတ်ထွက်ကြောင်း ပြောထားသည်။

လက်ရှိအချိန်မှ အကြမ်းဖက်အဖြစ် ကြေညာခြင်းက KNU ဘက်မှ ထုတ်ပြန်သည့်စာနှင့် အင်တာဗျူးတို့သည် သဘောထား တင်းမာသည့်ပုံစံ များပြားလာသောကြောင့် တုန့်ပြန်သည့် သဘောဟု ယူဆ၍ရကြောင်း NCA ထိုးထားသည့် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

ထို့ပြင် NCA သည် ပြည်ထောင်စုလွှတ်တော်မှ အတည်ပြုပြီးသား တရားဝင် အထောက်အထား ဖြစ်သည့်အတွက် ပါဝင် လက်မှတ် ထိုးထားသူများ အနေဖြင့် မိမိသဘောဖြင့် ထွက်၍ရသလို ပြန်ဖျက်၍လည်းရကြောင်း၊ သို့သော် NCA က ပျက်မသွားကြောင်း ၎င်းက ပြောသည်။

 ဗိုလ်ချုပ်မှူးကြီးမင်းအောင်လှိုင်နဲ့ KNU ဥက္ကဋ္ဌဟောင်းကို တွေ့ရစဉ် 

၎င်းက “ပြည်ထောင်စုလွှတ်တော်ကနေ rectification လို့ခေါ်တာပေါ့။ အတည်ပြုပြီးသား Legal Document ဖြစ်နေပြီ။ Legal Document မှာ ပါဝင် လက်မှတ်ထိုးသူတွေက သူ့သဘောနဲ့သူ ထွက်လို့ရတယ်။ သူ့ဟာသူ၊ သူ့ကိုယ်သူ ပြန်ဖျက်လို့ရတယ်။ သို့သော် NCA က မပျက်သွားဘူး။ ဒါကြောင့် NCA က သတ်မှတ်ချက်တွေ၊ ပြဋ္ဌာန်းချက်တွေက မှန်ပါသေးတယ်။ လိုက်မလုပ်ကြတာ တစ်ခုပါပဲ။ ဒါကြောင့် KNU က NCA က ထွက်တယ်၊ တကယ်တော့ NCA ကနေ ထွက်ပြီး ကတည်းကိုက မတရားအသင်းနဲ့ အကြမ်းဖက် အဖွဲ့စည်း သတ်မှတ်ချက်က ပျက်ပြယ်ပြီလို့ ပြောလို့ရပါတယ်။ ဒါပေမယ့် အစိုးရက မကြေညာဘဲနဲ့ ဒီတိုင်းထားတာက NCA ပျက်ပြီလို့ ပြောတဲ့အုပ်စုနဲ့ NCA အတိုင်းလိုက်နာ လုပ်ဆောင်တဲ့ အုပ်စုကလည်း KNU ထဲမှာ ရှိနေတယ်။ ဥပမာဆို တပ်မဟာ ၇ ဆို တိုက်ပွဲ မဖော်ရဘူး။ NCA ပြဋ္ဌာန်းချက်အတိုင်းပဲ ငြိမ်းချမ်းစွာ အဖြေရှာမယ် စသဖြင့်ပေါ့။ နောက်ပြီး တချို့ခေါင်းဆောင်တွေက ကရင် ပြည်နယ်အစိုးရနဲ့ ပူးပေါင်းဆောင်ရွက်တာတွေ၊ ဝင်ထွက်သွားလာတာတွေ ရှိတဲ့အခါကြတော့ KNU အပေါ်မှာ သက်တောင့်သက်သာပဲ ဆက်ဆံတာတွေ့ရတယ်။ အခု ရွေးကောက်ပွဲနီးတဲ့ အချိန်မှာတော့ ရွေးကောက်ပွဲ အပေါ်မှာ ပြင်းပြင်းထန်ထန် ဆုံးဖြတ်တိုက်ခိုက် ဆန့်ကျင်လာတဲ့ သဘောထားတွေကို ထုတ်လာတဲ့အခါကြတော့ အကြမ်းဖက် အဖွဲ့အစည်းနဲ့ မတရားအသင်းဥပဒေကို ပြန်ပြီး သတ်မှတ်လိုက်တယ်လို့ ယူဆရပါတယ်” ဟု ပြောသည်။

ရွေးကောက်ပွဲသည် “စစ်တပ်အတွက် အကျိုးရှိမည့် လူနှင့် ပါတီရွေးချယ်ပွဲ” ဖြစ်သဖြင့် ကရင်လက်နက်ကိုင်အဖွဲ့ များ၊ ကရင်နိုင်ငံရေး အင်အားစုများ၊ ကရင်ပါတီများနှင့် ပြည်သူလူထုတစ်ရပ်လုံးသည် အကြမ်းမဖက်သော နည်းလမ်းများဖြင့် ဆန့်ကျင်ကြရန် KNU က ဩဂုတ် ၂၆ ရက်နေ့တွင် သဘောထား ထုတ်ပြန်ကြေညာပြီးနောက် အကြမ်းဖက်အဖွဲ့အဖြစ် သတ်မှတ်ခံလိုက်ရခြင်းဖြစ်သည်။

တခြားတစ်ဖက်မှာလည်း မြန်မာ့တပ်မတော်နှင့် KNU တို့ကြား တိုက်ပွဲများ အပြင်းအထန် ဖြစ်ပွားနေသည်။

CNI News
၂၀၂၅ ခုနှစ်၊ စက်တင်ဘာ ၁

အမျိုးသားဒီမိုကရေစီအဖွဲ့ချုပ် ဗဟိုအလုပ်ကော်မတီ(NLD CWC)သည် တော်လှန်ရေးကာလထဲ အုပ်စုဖွဲ့အာဏာရှင်စရိုက်ဟု ပြည်ထောင်စုလွှတ်တော်ကိုယ်စားပြုကော်မတီ(CRPH)၏ ပြောရေးဆိုခွင့်ရှိသူ ကိုစည်သူမောင်က ပြောသည်။

NLD CWC အုပ်စုသည် ၂၀၂၅ ခုနှစ်၊ ဩဂုတ် ၃၀ ရက်က အမျိုးသားဒီမိုကရေစီအဖွဲ့ချုပ်(NLD) ပါတီပုံမှန်အစည်းအ ဝေး ကျင်းပ၍ ကိုစည်သူမောင်အား ပါတီဝင် အဖြစ်မှ ယာယီရပ်ဆိုင်းရန်နှင့် နီးစပ်ရာ နိုင်ငံလုံးဆိုင်ရာညီလာခံ (သို့)ဗဟိုကော်မတီ အစည်းအဝေးသို့ အယူခံဝင်နိုင်ကြောင်း အသိပေးရန် ဆုံးဖြတ်ခဲ့သည်။

အဆိုပါ ဆုံးဖြတ်ချက်နှင့် ပတ်သက်ပြီး မည်သည့်အချက်ကြောင့် ပါတီဝင်အဖြစ်မှ ယာယီရပ်ဆိုင်းထားရသည် လဲဆိုခြင်းမှာ မရှင်းလင်းကြောင်းနှင့် ယခုထိလည်း တရားဝင် ဆက်သွယ် အကြောင်းကြားလာခြင်း မရှိသေးဘူးဟု ကိုစည်သူမောင်က သူ၏ ဖေ့စ်ဘွတ်ခ် စာမျက်နှာမှတဆင့် ၂၀၂၅ ခုနှစ်၊ စက်တင်ဘာ ၁ ရက်တွင် ထုတ်ပြန်ခဲ့သည်။

၎င်းက “ ကျနော်ရေးတဲ့ NLD CWC ရဲ့ ၄ နှစ်တာ ကာလအတွင်း ဖြစ်ရပ်တွေကို အပိုင်းလိုက် ထောက်ပြသုံးသပ်ခဲ့ လို့ ဒီလို အရေးယူတယ်ဆိုရင်တော့ ပြန်လည်ရှင်းလင်းဖို့ မကြိုးစားဘဲ တုံ့ပြန်အရေးယူဖို့ပဲ ကြိုးစားမယ်ဆိုရင် တော့  Political Tolerance ပျောက်နေတယ်လို့ပဲ ယူဆရလိမ့်မယ်။ ငါတို့ကို မဝေဖန်နဲ့ မထောက်ပြနဲ့ ငါတို့ လုပ်ရပ်တွေ မှန်မှန်မှားမှား မင်းအလုပ် မဟုတ်ဘူး၊ ဝေဖန်ရင် အုပ်စုဖွဲ့ပြီး ပါတီအစည်းအဝေးတွေမှာ ပါတီဝိတ်နဲ့ လုပ်ပြမယ်ဆိုတဲ့ စရိုက်မျိုးက ဒီတော်လှန်ရေးကာလထဲ အုပ်စုဖွဲ့အာဏာရှင်စရိုက်ပဲ”ဟု ပြောသည်။

NLD CWC အမည်ခံ အုပ်စုအနေဖြင့် လုပ်ပိုင်ခွင့်မရှိသလို အရေးယူ ဆောင်ရွက်ခွင့်လဲ မရှိကြောင်း၊ NLD ပါတီဝင် အဖြစ် CWC ဆီလျောက်ထား၍ ပါတီဝင်ဖြစ်ခဲ့ခြင်း မဟုတ်ကြောင်း ကိုစည်သူမောင်က ပြန်လည် တုံ့ပြန်ခဲ့သည်။

၎င်းက “ နိုင်ငံရေးပါတီတစ်ခုမှာ အရေးယူတယ်ဆိုတာ စည်းကမ်းထိမ်းသိမ်းရေးက ကာယကံရှင်ကို စစ်ဆေးရ တယ်။ စစ်ဆေးပေါ်ပေါက်လို့ အပြစ်ရှိရင် CEC ဗဟိုအလုပ်အမှုဆောင် အဖွဲ့အစည်းအဝေးမှာ ဆုံးဖြတ်ရတယ်။ ခု CWC အမည်ခံ အုပ်စုအနေနဲ့ အဲလို လုပ်ပိုင်ခွင့်လည်း မရှိသလို ဒီလိုအရေးယူ ဆောင်ရွက်ခွင့်လည်း ရှိမနေဘူး။ ဒီချုပ်ပါတီဝင်အဖြစ် CWC ဆီလျောက်ထားပီး ပါတီဝင်ဖြစ်ခဲ့တာ မဟုတ်ပါ။ ဘာကြောင့် ဒီလိုအရေးယူ ဆောင် ရွက် ခဲ့ရတယ်ဆိုတာ ဒီအောက်ကလင့်စ်တွေမှာ အပိုင်းအလိုက် ဖော်ပြထားတဲ့ စာတွေကြောင့်ပဲ ဖြစ်နိုင်ခြေရှိ တယ်။ စိတ်ဝင်စားရင် ဖတ်ကြည့်နိုင်ရန် မျှဝေလိုက်ပါသည်”ဟု ပြောသည်။

ကိုစည်သူမောင်သည် ၂၀၂၀ အထွေထွေရွေးကောက်ပွဲတွင် ရန်ကုန်တိုင်းဒေသကြီး၊ ပန်းဘဲတန်းမြို့နယ်ကနေ ပြည်သူ့လွှတ်တော်ကိုယ်စားလှယ်အဖြစ် NLD ကိုယ်စားပြု ဝင်ရောက် အရွေးချယ်ခံခဲ့သူဖြစ်သည်။

ထို့နောက် ၂၀၂၁ ခုနှစ်၊ ဖေဖော်ဝါရီ ၁ ရက်တွင် မြန်မာ့တပ်မတော်က NLD အစိုးရကို ၂၀၂၀ အထွေထွေ‌ ရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချ၍ နိုင်ငံတော်ကို အရေးပေါ် အခြေအနေ ကြေညာခဲ့သည်။

အဆိုပါ နိုင်ငံရေး အပြောင်းအလဲနှင့်အတူ မြန်မာ့တပ်မတော်ကို ဆန့်ကျင်၍ ဖြုတ်ချနိုင်ရေး ကြိုးပမ်းသည်ဟု ပြည်ထောင်စုလွှတ်တော်ကိုယ်စားပြုကော်မတီ(CRPH)တွင် ပါဝင်ခဲ့ပြီး ပြောရေးဆိုခွင့်ရှိသူ တာဝန်ကိုယူထား သည်။

တခြားတစ်ဖက်မှာတော့ NLD CWC တွင် ပြည်ပနိုင်ငံများသို့ ထွက်ပြေးသွားသည့် ဦးအောင်ကြည်ညွန့်၊ ဒေါ်မေဝင်းမြင့်၊ ဦးထွန်းမြင့်၊ ဦးကျော်ထွေး၊ ဦးမျိုးနိုင်၊ ဦးဝင်းအောင်၊ ဦးတင်ထွဋ်ဦး၊ ဒေါက်တာခင်ဆောင် တို့ပါဝင် ကြသည်။

NLD ၏ ပါတီဖွဲ့စည်းပုံအရ NLD CWC ဖွဲ့စည်းခြင်းသည် တရားမဝင်ကြောင်း ပါတီစည်းကမ်းထိန်းသိမ်းရေးကို တာဝန်ယူခဲ့သူ ဦးတိုးလွင်က ထုတ်ဖော် ပြောကြားထားသည်။