CNI News
၂၀၂၆ ခုနှစ်၊ ဖေဖော်ဝါရီ ၂၀

ဗမာအမျိုးသားတော်လှန်ရေးတပ်မတော်(BNRA)၏ ဒုတိယအဖွဲ့ခေါင်းဆောင် အပါအဝင် ၅ ဦးသည် လက်နက် ခဲယမ်းများနှင့်အတူ မြန်မာ့တပ်မတော်ထံ ၂၀၂၆ ခုနှစ်၊ ဖေဖော်ဝါရီ ၂၀ ရက်က အလင်းဝင်ခဲ့ကြောင်း နေပြည်တော် မှ ထုတ်ပြန်ခဲ့သည်။

BNRA မှ ဒုတိယအဖွဲ့ခေါင်းဆောင် ၁ ဦး၊ တတိယ တာဝန်ခံအဆင့်ရှိသူ ၁ ဦး အပါအဝင် အဖွဲ့ဝင် ၅ ဦးသည် လက်နက်မျိုးစုံ ၅ လက်၊ လက်စပ်ပစ္စည်းများနှင့်အတူ ပုလဲမြို့နယ်အတွင်းရှိ လုံခြုံရေးတပ်စခန်း တစ်ခုထံ လာရောက် ဆက်သွယ်၍ အလင်းဝင်ခဲ့ခြင်း ဖြစ်ကြောင်း ထုတ်ပြန်ထားသည်။

အလားတူ BNRA ၏ ခေါင်းဆောင် ဗိုလ်နဂါးနှင့် မိသားစုဝင်များသည် ၂၀၂၆ ခုနှစ်၊ ဖေဖော်ဝါရီ ၁၈ ရက်က အလင်းဝင်ခဲ့ရာ မြန်မာ့တပ်မတော်က ပုလဲမြို့နယ်အတွင်းမှာ ရဟတ်ယာဉ်ဖြင့် ခေါ်ဆောင်လာခဲ့သည်။

အမျိုးသားညီညွတ်ရေးအစိုးရ(NUG)၏ လက်အောက်ခံ PDF တပ်ဖွဲ့များက BNRA ကို ၂၀၂၆ ခုနှစ်၊ ဖေဖော်ဝါရီ ၁၆ ရက်မှ စတင်ပြီး ပုလဲမြို့နယ်အတွင်းမှာ တိုက်ခိုက်လာခဲ့ပြီး BNRA တပ်ဖွဲ့ကို လက်နက်ချရန်နှင့် လက်နက်များ အပ်ရန် ထုတ်ပြန်ခဲ့သည်။

CNI News

၂၀၂၆ ခုနှစ်၊ ဖေဖော်ဝါရီ ၂၀ 

မြန်မာနိုင်ငံ၏ ပြည်တွင်း မငြိမ်မသက်မှု နိုင်ငံရေးနှင့်စစ်ရေး ပဋိပက္ခများသည် အိမ်နီနားချင်း ထိုင်းနိုင်ငံ၏ အကျိုး စီးပွားအပေါ် များစွာဆက်စပ်မှု ရှိနေသည်ဟု ရခိုင့်ဦးဆောင်ပါတီ(AFP)မှဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။ 

၂၀၂၆ ခုနှစ်၊ ဖေဖော်ဝါရီ ၁၈ ရက်တွင် ထိုင်းနိုင်ငံခြားရေးဝန်ကြီး ဆီဟာဆတ် ဖွန်ကတ်ကရောင်းနှင့် မြန်မာ နိုင်ငံခြားရေးဝန်ကြီး ဦးသန်းဆွေတို့သည် ထိုင်းနိုင်ငံ၊ ဖူးခတ်မြို့၌ သီးသန့် တွေ့ဆုံဆွေးနွေးခဲ့ကြသည်။

ထိုင်းနိုင်ငံ အနေဖြင့် မြန်မာနိုင်ငံ၏ လက်နက်ကိုင်ပဋိပက္ခ ဖြစ်စဥ်တိုင်းတွင် တိုက်ရိုက် သို့မဟုတ် သွယ်ဝိုက်သော် နည်းဖြင့် ပါနေကြောင်း၊ ထိုင်းအကျိုးစီးပွားနှင့် မြန်မာနိုင်ငံ၏ မတည်ငြိမ်မှုသည် များစွာ ဆက်စပ်မှု ရှိနေသည်ဟု ရခိုင့်ဦးဆောင်ပါတီ(AFP)မှဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။ 

၎င်းက “မြန်မာနိုင်ငံရဲ့ အိမ်နီးချင်း နိုင်ငံတွေထဲမှာ ထိုင်းကတော့ဖြင့် ပွင့်ပွင့်လင်းလင်း ပြောတာပါ မြန်မာနိုင်ငံရဲ့ လက်နက်ကိုင်ပဋိပက္ခ ဖြစ်စဉ်တိုင်းမှာ တိုက်ရိုက် သို့မဟုတ် သွယ်ဝိုက်တဲ့နည်းနဲ့ ပါနေကြတယ်။ အစိုးရ အဆက် ဆက်တွေမှာ။ ဖြစ်လာတဲ့ ပြည်တွင်း မငြိမ်သက်မှု အဲဒါကြောင့် ဖြစ်လာတဲ့ ပြီးခဲ့တဲ့ကာလပေါ့။ မြဝတီမြို့ဖြစ်စဉ် အဲဒီမှာ ထိုင်း-မြန်မာ စီးပွားရေးစင်္ကြံ တစ်ခုလုံး ပျက်သွားပေါ့ ရပ်သွားတာပေါ့။ အဲဒီမှာ မြန်မာနိုင်ငံရဲ့ လူသန်းချီရှိ တဲ့ ထိုင်းကိုရောက်တဲ့လူ အားလုံးနီးပါး လောက်ကလည်းပဲ အဓိက,ကတော့ဖြင့် အောက်ခြေသိမ်းကအစ လုပ်ရတဲ့ ပုဂ္ဂိုလ်တွေ ဖြစ်တာပေါ့။ ထိုင်းရဲ့ စီးပွားရေး မောင်နှင်အား တစ်ခုလုံးနဲ့ အထွေထွေ အလုပ်သမား ကျွမ်းကျင် အလုပ်သမား တော်တော်များများသည် မြန်မာလူထု ဖြစ်နေတာကို။ အထူးသဖြင့် လူငယ်မျိုးဆက် ဖြစ်နေတာကို။ ဒါတွေကိုပြန်ကြည့်ရင် ထိုင်းရဲ့ စက်မှုလက်မှုကအစ တော်တော်များများ ကဏ္ဍများသည် အောက်ခြေသိမ်း အလုပ် လုပ်‌တဲ့ မြန်မာလုပ်သား အင်အားမရှိရင် ရပ်တည်ဖို့ ခက်တဲ့ပုံ ပေါက်ပါတယ်။ ထိုင်းအကျိုးစီးပွားနဲ့ မြန်‌မာ ရွှေ့ ပြောင်း လုပ်သား မြန်မာနိုင်ငံရဲ့ မတည်ငြိမ်မှု‌က ဆက်စပ်တယ်။ အဲဒါကြောင့် အခု အာဆီယံသွားနေတဲ့ 5 point Consensus ကိုပဲပြောပြော တရုတ်ကပြောတဲ့ စည်း ၃ စည်းကိုပဲပြောပြော မြန်မာနိုင်ငံ တည်ငြိမ်အေးချမ်းမှုက အရှေ့တောင်အာရှအတွက် အရေးပါသလို SCO တို့ အားလုံးနဲ့လည်း ပတ်သက်တာဖြစ်တယ်။ ဒါကြောင့်မို့လို့ မြန်မာနိုင်ငံရဲ့ တည်ငြိမ်မှုကို ထိုင်းကလည်းပဲ လိုလားမှုကို ပြလာတာ ဖြစ်တယ်လို့ သုံးသပ်ပါတယ်” ဟု ပြော သည်။

ထိုင်းနိုင်ငံခြားရေးဝန်ကြီး သီဟဆက်ကို တွေ့ရစဉ်

နှစ်နိုင်ငံ တွေ့ဆုံဆွေးနွေးမှုတွင် ထိုင်း- မြန်မာ နယ်စပ်ကုန်သွယ်ရေး ပြန်လည်ဖွင့်လှစ်နိုင်ရန် နယ်စပ် တည်ငြိမ် အေးချမ်းရေး လိုအပ်သည့် အတွက်ကြောင့် တိုင်းရင်းသားလက်နက်ကိုင်များနှင့် မြန်မာ့တပ်မတော်ကြား တွေ့ဆုံ ဆွေးနွေးနိုင်အောင် ကူညီပေးမည်ဟု ထိုင်းနိုင်ငံခြားရေးဝန်ကြီးက ကမ်းလှမ်းခဲ့သည်။

မြန်မာနိုင်ငံ၏ ပြည်တွင်း ပဋိပက္ခများကို မိမိတို့အချင်းချင်း ညှိနှိုင်းဆွေးနွေးမှုများ ပြုလုပ်ပြီး အမြစ်ပြတ် မဖြေရှင်းနိုင် သရွေ့ နိုင်ငံတကာမှ မည်မျှပင် ဝင်ရောက်ကူညီသည်ဖြစ်စေ အဆင်ပြေနိုင်မှာ မဟုတ်ဘူးဟု နိုင်ငံရေးလေ့လာသုံးသပ်သူ စိုင်းမိဏ်းက CNI သတင်းဌာနသို့ ပြောသည်။ 

၎င်းက “ကျနော်တို့ ပြည်တွင်းရေး အခြေအနေက တကယ့်ကိုဖြစ်နေတဲ့ နိုင်ငံရေး၊ ဇာစ်မြစ်က သွားဦးတည်ပြီး တော့မှ သွားမရှင်းနိုင်သရွေ့ ကျနော်တို့ အချင်းချင်း မရှင်းနိုင်သရွေ့က ထိုင်းကတော့ သူဘယ်လောက်ပဲ‌ မျှော်လင့် မျှော်လင့် နိုင်ငံတကာက ဘယ်‌လောက်ပဲ ဝင်ကူဝင်ကူ ဖြေရှင်းနိုင်မှာ မဟုတ်ဘူး။ တရုတ် အပါအဝင်ပေါ့နော်။ တရုတ်က ရွေးကောက်ပွဲကို ဘယ်လောက်ပဲ တွန်းအားပေးပြီးတော့မှ လုပ်နေလုပ်နေ ဒါက တိုင်းပြည်ငြိမ်သွား မယ့် အနေအထားမှာ မရှိဘူး။ ယာယီအပစ်ရပ် သွားရင်တောင်မှ အင်အားစုပြီးတော့မှ တိုက်ပွဲပြန်ဝင်ဖို့ အသင့် ပြင်နေတဲ့ အနေအထားပဲရှိတယ်။ ထို့အတူပဲ ဒီထိုင်းကလည်း နယ်စပ်ကုန်သွယ်ရေး ပြဿနာလည်း အဲဒီလိုပဲ အရင်းအမြစ်က တကယ့်ကို ဇာစ်မြစ်က ကျနော်တို့ တိုင်းပြည်ရဲ့အရေးက ကိုယ်တို့ အချင်းချင်း ကိုယ့်ပြည်တွင်းက အဖွဲ့အစည်းတွေအားလုံး စစ်တပ် အပါအဝင် တော်လှန်ရေးတပ် အပါအဝင် တိုင်းရင်းသားအင်အားစု အပါအဝင် တန်းတူညီမျှမှု လိုအပ်ချက်တွေကို ဖြေရှင်းပေးနိုင်မှသာလျှင် ဒီဟာက ရေရှည်တည်တံ့သွားမှာပေါ့နော်။ အခုဟာ က ဘယ်လောက်‌ပဲ ဝင်နေနေ ဒီတိုင်းပဲသွားနေမှာပဲ လက်ရှိ အနေအထားက။ အခုထိုင်းတို့ အာဆီယံတို့ဝင်မယ် အလားအလာ ကောင်းလာအုံးမှာ မဟုတ်ဘူး။ စစ်ကောင်စီကနေပြီးတော့မှ ရွေးကောက်ပွဲ လုပ်လာတဲ့ကိစ္စ အစိုးရ သစ် ထူထောင်လာတဲ့ ကိစ္စကလည်း တကယ့်ကို ဇာစ်မြစ် မဖြေရှင်းနိုင်လို့ရှိရင်တော့ နယ်စပ်ကုန်သွယ်ရေး လမ်း ကြောင်းက ဘယ်တော့မှ ကောင်းလာမှာ မဟုတ်ဘူး။ တိုင်းပြည်ဆိုရင်လည်း အခုလို ကမောက်ကမ ဖြစ်နေအုံးမှာ ပဲပေါ့” ဟု ပြောသည်။

ထိုင်းနိုင်ငံခြားရေးဝန်ကြီး သီဟဆက်နဲ့ မြန်မာနိုင်ငံခြားရေးဝန်ကြီး ဦးသန်းဆွေကို တွေ့ရစဉ် 

မြန်မာနိုင်ငံတွင် ပြည်တွင်းရေး သင့်မြတ်မှု ရရှိမှသာ ငြိမ်းချမ်းရေး ရရှိမည်ဖြစ်သဖြင့် နှစ်ဖက် အဖွဲ့အစည်းများကို ဆွေးနွေးမှုများ ပြုလုပ်ရန် မိမိတို့အနေဖြင့် တိုက်တွန်းမည် မဟုတ်ဘဲ ပြည်တွင်းရေး ဆွေးနွေးညှိနှိုင်းမှုများကို စတင်ရန်မှာ မြန်မာနိုင်ငံအပေါ်တွင်သာ မူတည်ကြောင်း ထိုင်းနိုင်ငံခြားရေးဝန်ကြီး သီဟဆက်က ပြောသည်။

မြန်မာနိုင်ငံသည် လက်ရှိတွင် အစိုးရသစ် ဖွဲ့စည်းရန် လုပ်ဆောင်နေပြီး အစိုးရဖွဲ့ပြီးနောက် လွှတ်တော် ခေါ်ယူ ခြင်းနှင့် နိုင်ငံတော်သမ္မတ၊ ဝန်ကြီးချုပ်၊ တပ်မတော်ကာကွယ်ရေးဦးစီးချုပ်တို့ကဲ့သို့ အဓိက ရာထူးနေရာများကို ခန့်အပ်ခြင်းများ ဆက်လက် လုပ်ဆောင်သွားမည်ဖြစ်ကြောင်း၊ ထို့ပြင် လုပ်ပိုင်ခွင့် အာဏာများကို ပိုမိုခွဲဝေ အပ် နှင်းသွားမည်ဖြစ်ကြောင်း ၎င်းက ပြောကြားခဲ့သည်။

နောက်တက်လာမည့် မြန်မာအစိုးရသစ် အနေဖြင့် တည်ငြိမ်မှုကို ပြန်လည် ဖော်ဆောင်ရန်နှင့် အမျိုးသား ပြန်လည်သင့်မြတ်ရေးကို လုပ်ဆောင်ရန် ရည်မှန်းထားပြီး တိုင်းရင်းသား လက်နက်ကိုင် အဖွဲ့အစည်းများနှင့် ဒီမိုကရေစီလိုလားသော အင်အားစုများ အပါအဝင် အတိုက်အခံ အဖွဲ့အစည်းများနှင့် ဆွေးနွေးရန် လမ်းဖွင့်ထား ကြောင်း ထိုင်းနိုင်ငံခြားရေးဝန်ကြီးက ပြောသည်။

CNI News

၂၀၂၆ ခုနှစ်၊ ဖေဖော်ဝါရီ ၂၀

ရှမ်းပြည်ပြန်လည်ထူထောင်ရေးကောင်စီ(RCSS/SSA)ဥက္ကဋ္ဌအဖြစ် ဗိုလ်ချုပ်ကြီးယွက်စစ်ကို ဆက်လက် တင်မြှောက်ခဲ့ကြောင်း ၂၀၂၆ ခုနှစ်၊ ဖေဖော်ဝါရီ ၂၀ ရက်တွင် RCSS က ထုတ်ပြန်ခဲ့သည်။

RCSS/SSA ၏ (၂၆)ကြိမ်မြောက် နှစ်ပတ်လည် အစည်းအဝေးကို ၂၀၂၆ ခုနှစ်၊ ဖေဖော်ဝါရီ ၁၆-၁၇ ရက်များတွင် လည်းကောင်း၊ စတုတ္ထအကြိမ်မြောက် ကောင်စီကွန်ဂရက်အား ၂၀၂၆ ခုနှစ်၊ ဖေဖော်ဝါရီ ၁၈ ရက်တွင်လည်း‌ ကောင်း လွယ်တိုင်းလျဲန်း၌ ကျင်းပခဲ့သည်။

ထို့နောက် ဗိုလ်ချုပ်ကြီးယွက်စစ်အား ဥက္ကဋ္ဌအဖြစ် ပြန်လည် ရွေးချယ်တင်မြှောက်ခဲ့ပြီး အကြံပေးအဖွဲ့ဝင် ၂ ဦးကိုလည်း ခန့်အပ်ခဲ့သည်။

ထို့ပြင် ပေါ်လစီကြီးကြပ်ရေးကော်မတီ၊ ဗဟိုအလုပ်အမှုဆောင်ကော်မတီ၊ ဌာနအသီးသီး ဌာနမှူးများအား ရွေးချယ် အတည်ပြုခြင်းများကိုလည်း လုပ်ဆောင်ခဲ့ကြောင်း၊ လာမည့် ၄ နှစ်တာ ရှေ့လုပ်ငန်းစဉ်များကိုလည်း ချမှတ်နိုင်ခဲ့ကြောင်း RCSS/SSA က ထုတ်ပြန်ခဲ့သည်။

RCSS/SSA က “မိမိတို့ အဖွဲ့အစည်းသည် ငြိမ်းချမ်းရေးလုပ်ငန်းစဉ်အပေါ် ရပ်တည်၍ နိုင်ငံရေး ပြဿနာများအား ဆွေးနွေးခြင်း နည်းလမ်းဖြင့် အခြား အဖွဲ့အစည်းများ၊ အဖက်ဖက်တို့နှင့် တွေ့ဆုံညှိနှိုင်းဖြေရှင်းသွားမည်။ စစ်ဘေး ဒဏ်ခံ ပြည်သူများ နေထိုင်ရန် အိမ်ရာများကို မိမိတို့ အဖွဲ့အစည်းမှ ကူညီဆောက်လုပ်ပေးမည်။ အဖွဲ့အစည်း၏ ပေါ်လစီနှင့်အညီ မူးယစ်ဆေးဝါး တိုက်ဖျက်ရေး လုပ်ငန်းများအား ဆက်လက် ဆောင်ရွက်သွားမည်”ဟု ပြော သည်။

ဗိုလ်ချုပ်ကြီးယွက်စစ်သည် RCSS/SSA ဥက္ကဋ္ဌအဖြစ် ၂၀၁၄ ခုနှစ်၊ ဖေဖော်ဝါရီ ၃ ရက်ကတည်းက တာဝန်ယူခဲ့ရာ ယနေ့ ၂၀၂၆ ခုနှစ်၊ ဖေဖော်ဝါရီ ၁၈ ရက်တွင် ထပ်မံ တင်မြှောက်ခံခဲ့ရသည်။

လက်ရှိတွင် RCSS/SSA သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) လက်မှတ် ထိုးထားသလို ပြည်နယ်အဆင့်/ပြည်ထောင်စုအဆင့် ပဏာမ အပစ်အခတ်ရပ်စဲရေးစာချုပ်(Bilateral)လည်း ထိုးထားသည်။

CNI News

၂၀၂၆ ခုနှစ်၊ ဖေဖော်ဝါရီ ၂၀

အမျိုးသားညီညွတ်ရေးအစိုးရ(NUG)၏ ဝန်ကြီးချုပ်ရုံးတွင် တာဝန်ထမ်းဆောင်နေသော ဒေါ်ကြည်ပြာ၏ အဂတိလိုက်စားမှုကို အရေးမယူ၍ NUG အား ကန့်ကွက်စာများ ထုတ်ပြန်လာခဲ့ကြသည်။

NUG  ဝန်ကြီးချုပ်ရုံး၏ ၂၀၂၆ ခုနှစ်၊ ဖေဖော်ဝါရီ ၁၈ ရက်နေ့ ရက်စွဲပါ အမိန့်အမှတ် (၁၅/၂၀၂၆)ဖြင့် ထုတ်ပြန်လာ သော ထုတ်ပြန်ချက်သည် အလွန်ပင် တာဝန်ယူမှု တာဝန်ခံမှု ကင်းမဲ့သော၊ မိမိတို့ ယုံကြည်အားကိုးရသော အစိုးရ တစ်ရပ်အပေါ် အလွန်အမင်း စိတ်ပျက်ဖွယ် ဖြစ်စေသော အခြေအနေ ဖြစ်ပေါ်စေခဲ့သည်ဟု NUG ပညာရေးဝန် ကြီးဌာန တက္ကသိုလ်ဝင်ခွင့်လမ်းညွှန်ဖြစ်မြောက်ရေးအဖွဲ့က ၂၀၂၆ ခုနှစ်၊ ဖေဖော်ဝါရီ ၁၉ ရက်တွင် ထုတ်ပြန်ခဲ့ သည်။

ထိုကြောင့် NUG ခေါင်းစဉ်အောက်မှ ဆောင်ရွက်နေသော တက္ကသိုလ်ဝင်ခွင့် (စတုတ္ထအကြိမ်) ခေါ်ဆိုခြင်း လုပ်ငန်းစဉ်များ အားလုံးကို ယနေ့မှစ၍ တစ်စုံတစ်ရာ ကျေလည်မှု မရမချင်း ရပ်ဆိုင်းပါသည်ဟု NUG ပညာရေး ဝန်ကြီးဌာန တက္ကသိုလ်ဝင်ခွင့်လမ်းညွှန်ဖြစ်မြောက်ရေးအဖွဲ့က ထုတ်ပြန်ခဲ့သည်။

ကန့်ကွက်စာကို တွေ့ရစဉ်

အလားတူ လွတ်လပ်သော CDM နိုင်ငံ့ဝန်ထမ်းထု အဖွဲ့အစည်းကလည်း NUG ၏ ဂုဏ်သိက္ခာ၊ ပြည်သူလူထုနှင့် CDM များ၏ ယုံကြည်မှုကို မျက်နှာမူ၍ ယခုဖြစ်စဉ်တွင် နစ်နာသူများအတွက် တရားမျှတမှု ရရှိရေးကို အမြန်ဆုံး ဆောင်ရွက်ပေးရန် အလေးအနက်ထား တိုက်တွန်း တောင်းဆိုလိုက်သည်ဟု ၂၀၂၆ ခုနှစ်၊ ဖေဖော်ဝါရီ ၁၉ ရက် တွင် ထုတ်ပြန်ခဲ့သည်။

ထို့နောက် Emergency Care Support Network(MOH-Branch) က “ NUG ဝန်ကြီးချုပ်ရုံး အမြဲတမ်းအတွင်းဝန် ဒေါ်ကြည်ပြာနှင့် ခင်ပွန်းတို့ကို တိုင်ကြားထားသည့် အဂတိလိုက်စားမှု၊ အလွဲသုံးစားမှု၊ လူ့အခွင့်အရေး ချိုးဖောက် မှုဆိုင်ရာကိစ္စရပ်များနှင့် ပတ်သက်၍ NUG ဝန်ကြီးချုပ် မန်းဝင်းခိုင်သန်း လက်မှတ်ပါ ဖြေရှင်းချက်များသည် အဆိုပါ ကိစ္စအပေါ် အမြဲတစေ စောင့်ကြည့်ဆန်းစစ်လျှက်ရှိသော တော်လှန်ပြည်သူ့ဝန်ထမ်းများအတွက် အလွန် ပင် စိတ်ပျက်စေခဲ့ပါသည်”ဟု ဖေဖော်ဝါရီ ၁၉ ရက်က ထုတ်ပြန်ခဲ့သည်။

ဒေါ်ကြည်ပြာနှင့် ခင်ပွန်းဖြစ်သူ၏ အဂတိလိုက်စားမှုအပေါ် စုံစမ်းစစ်ဆေးရေးအဖွဲ့အနေဖြင့် သတင်းစာ ရှင်းလင်း ပွဲတစ်ရပ် အမြန်ဆုံး ပြုလုပ်ရန် သို့မဟုတ် အစီရင်ခံစာပါ တွေ့ရှိချက်များကို ပြည်သူလူထု၊ ပညာရေးဝန်ထမ်းများ နှင့် တော်လှန်ရေးအင်အားစုများ သိရှိနိုင်ရန် ပွင့်လင်းမြင်သာစွာ ထုတ်ပြန် အစီရင်ခံပေးရန် တောင်ကြီးမြို့နယ် ပညာရေးဘုတ်အဖွဲ့က ၂၀၂၆ ခုနှစ်၊ ဖေဖော်ဝါရီ ၁၉ ရက်တွင် တောင်းဆိုခဲ့သည်။

ကန့်ကွက်စာကို တွေ့ရစဉ်

ဒေါ်ကြည်ပြာနှင့် ခင်ပွန်းဖြစ်သူတို့သည် NUG ၏ ဝန်ကြီးချုပ်ရုံးတွင် အတွင်းဝန်အဖြစ် တာဝန်ယူထားပြီး အဂတိလိုက်စားမှုများ ကျူးလွန်ခဲ့သလို လက်အောက်ငယ်သား ဝန်ထမ်းများအပေါ် အနိုင်ကျင့် ဖိနှိပ်မှုများ ကျူးလွန်သည်ကို စုံစမ်းစစ်ဆေးပေးရန် ကာယကံရှင်များက တိုင်ကြားခဲ့သည်။

ထို့နောက် ဒေါက်တာဇော်ဝေစိုး ဦးဆောင်သည့် စုံစမ်းစစ်ဆေးရေးအဖွဲ့က ဒေါ်ကြည်ပြာနှင့် ခင်ပွန်းဖြစ်သူသည် အဂတိလိုက်စားမှု ကျူးလွန်ခြင်းမရှိကြောင်း၊ ဖိနှိပ်အနိုင်ကျင့်မှုမရှိကြောင်း၊ နှုတ်ချိုသာစွာ မပြောဆိုခြင်းသာ ရှိကြောင်း တွေ့ရှိရသည်ဟု ၂၀၂၆ ခုနှစ်၊ ဖေဖော်ဝါရီ ၁၈ ရက်တွင် ထုတ်ပြန်ခဲ့သည်။

ထို့ကြောင့် နောက်နောင်တွင် နှုတ်ချိုသာစွာ ဆက်ဆံရန် သတိပေးခဲ့သည်ဟု NUG က ထုတ်ပြန်ခဲ့သည်။

အဆိုပါ ထုတ်ပြန်ချက်သည် ဗိုလ်နဂါး ဦးဆောင်သည့် ဗမာအမျိုးသားတော်လှန်ရေးတပ်မတော်(BNRA)ကို NUG က စစ်ကိုင်းတိုင်းဒေသကြီး၊ ပုလဲမြို့နယ်အတွင်းမှာ တိုက်ခိုက်နေချိန်နှင့် ဗိုလ်နဂါးနှင့်မိသားစုဝင်များ တပ်မတော် ထံ အလင်းဝင်သွားသည့် အချိန်များဖြင့် တိုက်ဆိုင်စွာ ထုတ်ပြန်ခဲ့ခြင်းအပေါ်လည်း အားလုံးက ဝေဖန်ထောက်ပြ နေကြသည်။

CNI News

၂၀၂၆ ခုနှစ်၊ ဖေဖဝါရီ ၂၀

မြန်မာနိုင်ငံတွင် ဖက်ဒရယ်ဒီမိုကရေစီကို သွားမည်ဆိုလျှင် သွားလို့ရသော်လည်း အစိုးရဘက်မှ လျှောက်လှမ်း နိုင်မည့် အခွင့်အလမ်းများ၊ လမ်းကြောင်းများနှင့် နည်းလမ်းများ ဖွင့်ပေးရန်လိုကြောင်း နိုင်ငံရေးလေ့လာသုံးသပ်သူ ဒေါက်တာအန်ကောလက CNI သတင်းဌာနသို့ ပြောသည်။

အစိုးရဘက်က လမ်းကြောင်းများ ဖွင့်လိုက်မှ ဥပဒေလက်အောက်မှာ နေနေသည့် လက်နက်ကိုင်အုပ်စုက သူ့ အပိုင်းနှင့်သူ စုစည်းကြလိမ့်မည်ဖြစ်ပြီး၊ သို့သော် ပုံစံမတူသည့် လမ်းကြောင်းရွေးပြီး သေချာလုပ်ရမည်ဟု ၎င်းက ပြောသည်။

ဒေါက်တာအန်ကောလက “EAO အပိုင်းက သူတို့အပိုင်းက သူတို့ရည်မှန်းချက်တွေ ပြောနေတာ ရှိပါလိမ့်မယ်။ အဲ့တာကတော့ သူတို့ရဲ့ လိုချင်တဲ့ အပိုင်းတွေပေါ့နော်။ တကယ်တမ်း ဖက်ဒရယ်ဒီမိုကရေစီပြည်ထောင်စုကို အကောင်အထည် ဖော်မယ်ဆိုတဲ့ လမ်းကြောင်းက တကယ်တမ်း ချပေးရမှာက ဒီဘက်က အစိုးရပိုင်းက လုပ်ပေး ရမှာ။ EAO က ဘယ်လောက်ပြောပြော အကောင်အထည်ဖော်ချင်မှ ဖော်မယ်လေ။ လျှောက်သာတဲ့ အခွင့်အလမ်းတွေ၊ လမ်းကြောင်းတွေ၊ နည်းလမ်းတွေ ဖော်ပြပေးဖို့ လိုတယ်လို အဲ့ဒါကိုပြောတာ။ တကယ်တမ်း ကျတော့ ဖက်ဒရယ်ဒီမိုကရေစီ သွားမယ်ဆို သွားလို့ရပါတယ်။ ကျနော်တို့ အိမ်နီးချင်း နိုင်ငံတွေမှာလည်း ရှိနေ တာပဲ။ အဲ့ဒီတော့ ကျနော်တို့ ဒီမှာလည်း တိုင်းနဲ့ပြည်နယ် ၁၄ ခုရှိတဲ့ နေရာမှာ ပြည်နယ် ၇ ခု ရှိတယ်လေ။ ၇ ခုလုံး ဒီလိုသွားရမယ်လို့တော့ မဟုတ်ဘူး၊ အခုလာမယ့်ကာလ သက်တမ်း ၅ နှစ်မှာ pilot project တစ်ခုတော့ လုပ်သင့်တယ်။ pilot project ဆိုတာ ကချင်မှာလုပ်မလား၊ ရခိုင်မှာလုပ်မလား၊ ချင်းမှာပဲလုပ်မလား၊ ကယားမှာပဲလုပ်မလား တစ်ခုခု ရွေးပေါ့ နော်။ ကျနော်တို့က ဒီသီးခြားစီ Article ရွေးနိုင်တဲ့ အခင်းအကျင်းတစ်ခုကို ဆောင်ရွက်နိုင်တဲ့ လမ်းကြောင်းတွေ အားလုံးဖွင့်ပြီး ဆောင်ရွက်မှ ဖက်ဒရယ်ဒီမိုကရေစီကို ပိုပြီးဆန်မယ်။ ဒီတိုင်းကတော့ ရေစုန်မျောနေမှာပဲ။ ကျနော်တို့ တိုင်းပြည်မှာ မဖြစ်ခဲ့ဘူးလားဆိုတော့ ဖြစ်ခဲ့တယ်။ လူတွေက သတိမထားမိလို့။ သမိုင်းကြောင်း မလှန် လို့ ၁၉၄၇ အခြေခံဥပဒေက ကချင်ရယ်၊ ရှမ်းရယ်၊ ချင်းဝိဒေသတိုင်းရယ် အဲ့ဒီသုံးခုကို သီးခြား Article အနေနဲ့ ဖော်ပြပြီးတော့မှ ဆောင်ရွက်ဖူးတယ်ဗျ။ အဲ့ ဒီပုံစံမျိုးကို သွားမလားပေါ့။ သွားမလားဆိုတဲ့ ဆွေးနွေးချက်တွေ လို တယ်။ ဘယ်အခင်းအကျင်းက သွားမလဲဆိုတော့ အခြေခံဥပဒေ ပြင်ဆင်ပြောင်းလဲရေးဆိုတဲ့ ညီလာခံ တစ်ခုက နေ သွားရမှာ သို့မဟုတ် အခင်းအကျင်းတစ်ခု ဖန်တီးရမယ်။ ဒါကတော့ အစိုးရက ဖိတ်ခေါ်ရမယ့်အပိုင်း။ အစိုးရက ဦးဆောင်ပြီးလုပ်မယ့်အပိုင်း။ ဟိုဘက်ကတော့ သူတို့ကလည်း တိုက်ရေးခိုက်ရေးပဲ ပြောနေမှာ။ ကျန်တာကတော့ ဒီဘက် က အစိုးရကပဲ ဖက်ဒရယ်ဒီမိုကရေစီ လမ်းကြောင်းကို ဖွင့်ရမှာဖြစ်တယ်”ဟု ပြောသည်။ 

ဖက်ဒရယ် အလုပ်ရုံ ဆွေးနွေးပွဲ ကျင်းပနေစဉ်

မြန်မာနိုင်ငံတွင် ဖက်ဒရယ်ဒီမိုကရေစီစနစ်ကို သွားရန်အတွက် လက်ရှိအစိုးရ (သို့မဟုတ်) တာဝန်ယူထားသည့် အဖွဲ့အစည်းမှ ဗဟိုချုပ်ကိုင်မှု လျှော့ချခြင်း၊ ဖွဲ့စည်းပုံအခြေခံဥပဒေသစ် ရေးဆွဲခြင်းနှင့် နိုင်ငံရေးအရ လမ်း ကြောင်း ဖွင့်ပေးခြင်းများ ပြုလုပ်ရန် တောင်းဆိုမှုများရှိနေသည်။

အစိုးရသည် ပြည်နယ်များသို့ အာဏာခွဲဝေပေးခြင်းနှင့် ငြိမ်းချမ်းရေး ရရှိရန်အတွက် အဓိကသော့ချက်ဖြစ်ကြောင်း၊ လက်ရှိ ၂၀၀၈ ဖွဲ့စည်းပုံအခြေခံဥပဒေသည် တပ်မတော်ကြီးစိုးရေးကို အခြေခံထားသဖြင့် စစ်မှန်သည့်ဖက်ဒရယ် ဒီမိုကရေစီအတွက် အခြေခံဥပဒေသစ် လိုအပ်ကြောင်း နိုင်ငံရေးလေ့လာသုံးသပ်သူများက ထောက်ပြကြသည်။

တိုင်းရင်းသား လက်နက်ကိုင် ပဋိပက္ခများ ချုပ်ငြိမ်းပြီး ဖက်ဒရယ်ပြည်ထောင်စု ပေါ်ထွန်းရန် နိုင်ငံရေးအရ တံခါး ဖွင့်ဆွေးနွေးရန် လိုအပ်သည်ဟု စစ်ရေးနှင့်နိုင်ငံရေးအကဲခတ်များက အကြံပြုကြသည်။

တိုင်းရင်းသား လူငယ်များကို တွေ့ရစဉ်

မြန်မာနိုင်ငံတွင် ဖက်ဒရယ်ဒီမိုကရေစီသွားရန်က လွယ်လွယ်လေးဖြစ်ကြောင်း၊ ကဏ္ဍအလိုက် အပြီးအပြတ် လုပ်ပိုင်ခွင့် ပေးခြင်းက ဖက်ဒရယ်ပိုကျကြောင်း နိုင်ငံရေးလေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

၎င်းက “တကယ့် တကယ်ကျတော့ ဖက်ဒရယ်ဒီမိုကရေစီသွားဖို့က လွယ်လွယ်လေးပါပဲ၊ သူတို့က စကားတွေများ နေကြတာပဲ၊ ပြောနေကြတာပဲ။ တကယ့် တကယ်ကျတော့ ဖက်ဒရယ်ဒီမိုကရေစီ သွားဖို့ဆိုတာက လက်ရှိဖွဲ့စည်း ပုံအခြေခံဥပဒေ ၂၀၀၈၊ ၂၀၀၈ က တကယ်တော့ ဖက်ဒရယ်ပဲလေ၊ ၂၀၀၈ မှာ နည်းနည်းတော့ ပြင်ပေးရမှာရှိတာ။ ဥပမာ ဝန်ကြီးချုပ်ကို သမ္မတက ခန့်တယ်ဆိုတာမျိုးက ဒါကဖက်ဒရယ်တော့ မဟုတ်တော့ဘူး။ ဦးလှဆွေတို့ပြော တဲ့ ၂၆၁ ကို ပြင်လိုက်လို့ရှိရင် တော်တော်ကောင်းမယ်ဆိုတာလည်း မှန်ပါတယ်။ ဦးလှဆွေတို့ တပ်ကော၊ ကြံ့ခိုင် ရေးကရော သဘောတူထားပြီးသား ပုံစံမျိုးကောင်းတယ်။ သူ့ကဏ္ဍအလိုက် ကဏ္ဍအလိုက် အပြီးအပြတ်လုပ်ပိုင် ခွင့်ပေးလိုက်တာ ဖက်ဒရယ်ပိုကျတယ်”ဟု ပြောသည်။

ဖက်ဒရယ်ဒီမိုကရေစီစနစ်သည် ဗဟိုအစိုးရနှင့် ပြည်နယ်/ဒေသ အစိုးရများအကြား အာဏာခွဲဝေကျင့်သုံးခြင်းနှင့် ပြည်သူကို အာဏာအပ်နှင်းသည့် ဒီမိုကရေစီမူဝါဒကို ပေါင်းစပ်ထားသော စနစ်ဖြစ်ကြောင်း၊ ၎င်းသည် ကိုယ်ပိုင် ပြဋ္ဌာန်းခွင့်၊ တန်းတူညီမျှမှု၊ တရားမျှတမှုနှင့် ကိုယ်ပိုင်အုပ်ချုပ်ခွင့်ရဒေသများ တည်ဆောက်ခြင်းဖြင့် အမျိုးသား စည်းလုံးညီညွတ်မှုကို ရှေးရှုခြင်းဖြစ်သည်။

CNI News

၂၀၂၆ ခုနှစ်၊ ဖေဖော်ဝါရီ ၂၀

ဗမာအမျိုးသားတော်လှန်ရေးတပ်မတော်(BNRA)၏ ခေါင်းဆောင်ဖြစ်သူ ဗိုလ်နဂါး လက်နက်ချ အလင်းဝင်လာ မှုကြောင့် မြန်မာ့တပ်မတော် အနေဖြင့် ဘယ်လို အကျိုးဖြစ်ထွန်းသွားသလဲ ဆိုသည့်အပေါ် စစ်ရေးနှင့်နိုင်ငံရေး အကဲခတ်များကြား သုံးသပ်မှုများ ရှိနေကြသည်။

ဗိုလ်နဂါးသည် ၂၀၂၁ ခုနှစ် နိုင်ငံရေး အပြောင်းအလဲဖြစ်ပြီးနောက် ပေါ်ပေါက်လာသည့် နွေဦးတော်လှန်ရေးတွင် ၅ နှစ်ကြာ လက်နက်ကိုင်၍ စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်အတွင်း လှုပ်ရှားခဲ့သူဖြစ်သည်။

ထိုကဲ့သို့ လူပုဂ္ဂိုလ်ကို တပ်မတော်ဘက်မှ ရရှိလိုက်သည့်အတွက် ၎င်းတို့နှင့် တိုက်ပွဲများ ရပ်တန့်သွားသဖြင့် လူ့ စွမ်းအား အရင်းအမြစ် ဆုံးရှုံးခြင်း၊ ၎င်းနယ်မြေဒေသကို ပြန်လည်ထူထောင်နိုင်ရေး အစရှိသော အချက်များအပြင် အများကြီး အားသာချက်ရှိသွားကြောင်း သေနင်္ဂမဟာဗျူဟာလေ့လာရေးအဖွဲ့မှ အမှုဆောင်ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

တပ်မတော် ထိပ်သီးခေါင်းဆောင်များကို တွေ့ရစဉ်

၎င်းက “အရေးကြီးသော အချက်ကတော့ ဗိုလ်နဂါးလို လူမျိုးပဲဖြစ်ဖြစ်၊ တခြားဘယ် အဖွဲ့အစည်းပဲဖြစ်ဖြစ် အလင်းဝင် သွားတဲ့အခါမှာ မလိုအပ်ဘဲနဲ့ လူ့စွမ်းအားအရင်းအမြစ် အသက်တွေ သေဆုံးတာ၊ ဆုံးရှုံးတာမဖြစ် တော့ဘူး။ တိုက်ပွဲဖြစ်ပွားမှုကို ရပ်တန့်နိုင်တဲ့ အတွက်ကြောင့် မလိုလားအပ်တဲ့ လက်နက်ခဲယမ်းတွေ သုံးစရာ မလိုဘူး၊ ငွေကြေးကုန်ကျမှု မရှိတော့ဘူး။ အဲဒါကတော့ ကျနော်တို့အတွက် ရလိုက်တဲ့ အကြီးမားဆုံးအမြတ်ပဲ။ နောက်တစ်ချက်ကတော့ သူရှိနေတဲ့ နယ်မြေဒေသသည် နဂိုကတော့ လက်နက်ကိုင်ထားတဲ့ အတွက်ကြောင့် တစ်ဖက်နဲ့တစ်ဖက် ယုံကြည်မှုပိုင်း တည်ဆောက်ရာမှာ အခက်အခဲ ရှိနိုင်တယ်။ သွားဖို့၊ လာဖို့၊ ညှိဖို့၊ နှိုင်းဖို့တွေ အခက်အခဲတွေ ရှိသွားတယ်။ ဒါဆိုရင် အဲဒီလိုမျိုး နယ်မြေဒေသဟာ အခုလိုမျိုး ငြိမ်းချမ်းရေး ယူလိုက်တဲ့အတွက်၊ အလင်းဝင်လိုက်တဲ့ အတွက်ကြောင့် အဲဒီနယ်မြေဒေသ ပြန်လည်ထူထောင်ရေးနဲ့ လုံခြုံရေးလုပ်ဖို့အတွက် အင်မတန် အားသာချက်ရှိသွားပြီ။ တပ်မတော်တစ်ရပ် အနေနဲ့ အားသာချက်မျိုးကတော့ ပြောစရာမလိုဘူး။ ပထမ ၂ ချက်နဲ့တင် အတော်ကြီး ပြည့်စုံသွားပြီ။ တပ်မတော် အနေနဲ့ကတော့ ရှင်းပါတယ်။ နောက်ဆုံး ဒီအဖွဲ့က လက်နက်စွန့် လိုက်ပြီးတော့ အကယ်၍များ သူတို့နယ်မြေဒေသမှာ လုံခြုံရေးအတွက် တစ်ဖက်တစ်လမ်းက ပါဝင် ချင်တဲ့ ကိစ္စတွေ၊ နောက်ဆုံး BGF လိုပုံစံမျိုး ပြောင်းသွားမယ်ဆိုရင်တောင် အကျိုးအမြတ်က နောက်ထပ် အများ ကြီး အများကြီး ရဖို့တွေ ရှိတာပေါ့။ အဲဒီအပိုင်းကတော့ နောက်ပိုင်း ကျနော်တို့ စောင့်ကြည့်ရမှာပေ့ါ။ ကျနော်ပြော တဲ့ ပထမတစ်ချက် လူ့စွမ်းအားအရင်းအမြစ် ဆုံးရှုံးမှု၊ မလိုလားအပ်ပဲနဲ့ ဆုံးရှုံးရမယ့် လူ့စွမ်းအားအရင်းအမြစ်တွေ၊ သဘာဝ သယံဇာတတွေ၊ ပတ်ဝန်းကျင်ပျက်စီးမှာ ဒါတွေကို ရပ်တန့်နိုင်လောက်တယ်။ ဒါသည် ပထမဆုံး အားသာချက်ပဲ။ ဒုတိယတစ်ချက်ကတော့ နယ်မြေကို ပြန်လည်ထူထောင်ရေးမှာ သိပ်ကို ကောင်းတဲ့ အားသာချက် ရသွားတယ်။ အဲဒီ ၂ ချက်နဲ့တင် အများကြီး လုံလောက်သွားပါပြီ” ဟု ပြောသည်။

၂၀၂၆ ခုနှစ်၊ ဖေဖော်ဝါရီ ၁၈ ရက်နေ့က BNRA အဖွဲ့ခေါင်းဆောင် နိုင်လင်း(ခေါ်) နဂါးနှင့် ၎င်း၏ မိသားစုဝင်များ သည် လက်နက်၊ ခဲယမ်းများနှင့်အတူ ဥပဒေဘောင်အတွင်းသို့ ဝင်ရောက်လာကြောင်း နေပြည်တော်က သတင်း ထုတ်ပြန်ထားသည်။

ဗိုလ်နဂါးဘက်မှ တပ်မတော်ထံ လက်နက်ချ အလင်းဝင်ကာ ပူးပေါင်းသွားပြီးနောက် ဗိုလ်နဂါး ခေါင်းဆောင်သည့် ဗမာအမျိုးသားတော်လှန်ရေးတပ်မတော် (BNRA) တပ်ဖွဲ့ဝင် ၁၅၀ ခန့် ပြည်သူ့ကာကွယ်ရေးတပ်မတော် (PDF) နှင့် ဒေသခံပြည်သူ့ကာကွယ်ရေးအဖွဲ့ (ပကဖ) များထံ ချိတ်ဆက်အဖမ်းခံခြင်း၊ လာရောက် ပူးပေါင်းခြင်းနှင့် လက်နက်ချခြင်းများ လုပ်ဆောင်လာနေသည်ဟု NUG ဘက်က ထုတ်ပြန်သည်။

ထို့ပြင် ဗိုလ်နဂါး အပါအဝင် BNRA တပ်ဖွဲ့ဝင်အချို့ကို သက်ငယ်မုဒိမ်းမှု၊ တော်လှန်ရေးတပ်ဖွဲ့ဝင်ကို သတ်မှု၊ PDF ဂိတ်စခန်း စီးနင်းမှု အစရှိသော အမှု ၇ ခုအတွက် အမှုဖွင့်ထားကြောင်းလည်း NUG က ထုတ်ပြန်ခဲ့သည်။

 ဗိုလ်နဂါး အလင်းဝင်လာစဉ်

ဗိုလ်နဂါးသည် ၎င်းလှုပ်ရှား နယ်မြေဒေသ၌ ခေါင်းဆောင်ပိုင်းဖြစ်သောကြောင့် ယခုကဲ့သို့ အလင်းဝင် သွားခြင်းက တပ်မတော်အတွက် ရန်သူ့စစ်အင်္ဂါများကို ရရှိသွား၍ အများကြီး အကျိုးရှိကြောင်း နိုင်ငံရေးလေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

၎င်းက “အများကြီးရှိတာပေါ့။ ရန်သူ့စစ်အင်္ဂါတွေကို ရသွားတာပေါ့။ ဘယ်မှာနေတယ်။ ဘယ်မှာဌာနချုပ် လုပ် တယ်။ ဘယ်သူတွေက အဓိကပါတယ်။ ထောက်ပံ့ပို့ဆောင်ရေးလမ်းကြောင်းက ဘယ်လိုသွားတယ်။ KIA ဆီက ဘယ်လိုယူတယ်။ ဘယ်ဘက်ကနေ ဘယ်လိုသွင်းတယ်ဆိုတဲ့ ဥစ္စာတွေ အားလုံးက သူက သူ့‌ဒေသမှာတော့ သူက လူကြီးဆိုတော့ ပေါ်လစီနဲ့ ပတ်သက်တာတွေရော၊ နည်းဗျူဟာ၊ မဟာဗျူဟာနဲ့ ပတ်သက်တာတွေ အကုန်လုံး ရသွားတော့ စစ်တပ်ဘက်တော့ အများကြီး အကျိုးရှိသွားတာပေါ့” ဟု ပြောသည်။

၂၀၂၁ ခုနှစ် နိုင်ငံရေး အပြောင်းအလဲ ဖြစ်ပြီးနောက် ဗိုလ်နဂါးသည် ပုလဲမြို့နယ် ပြည်သူ့ကာကွယ်ရေးတပ်ကို ဦးဆောင်ဖွဲ့စည်းခဲ့ကာ ၂၀၂၂ ခုနှစ်တွင် မြန်မာ့တော်ဝင်နဂါးတပ်တော်(MRDA) အမည်ပြောင်းလဲ ဖွဲ့စည်းခဲ့သည်။

ထို့နောက် ၂၀၂၃ ခုနှစ်တွင် MRDA မှ ဗမာအမျိုးသားတော်လှန်ရေးတပ်မတော် (BNRA) ကို ဖွဲ့စည်းခဲ့ကာ NUG ၏ လက်အောက်ခံ မဟုတ်ဘဲ သီးခြားရပ်တည်နေသည့် တော်လှန်ရေးအဖွဲ့ အနေဖြင့် ယင်းမာပင်ခရိုင်၊ ပုလဲမြို့နယ် အတွင်း လှုပ်ရှားသည်။

CNI News

၂၀၂၆ ခုနှစ်၊ ‌ဖေဖော်ဝါရီ ၁၉

၂၀၂၆ ခုနှစ်၊ ဧပြီလတွင် ဖွဲ့စည်းလာမည့် အစိုးရသစ်သည် စုပေါင်းခေါင်းဆောင်မှုရှိသည့် အစိုးရတစ်ရပ် ဖြစ်လာနိုင် သည်ဟု နိုင်ငံရေးလေ့လာသုံးသပ်သူ ဒေါက်တာအန်ကောလက CNI သတင်းဌာနသို့ ပြောသည်။

မြန်မာနိုင်ငံတွင် ၂၀၂၅ အထွေထွေရွေးကောက်ပွဲကို ၂၀၂၅ ခုနှစ်၊ ဒီဇင်ဘာ ၂၈ ရက်မှ ၂၀၂၆ ခုနှစ်၊ ဇန်နဝါရီ ၂၅ ရက် ထိ အပိုင်း(၃)ပိုင်း ခွဲ၍ ကျင်းပခဲ့ပြီးနောက် မတ်လမှာ လွှတ်တော်ခေါ်၍ ဧပြီလမှာ အစိုးရသစ်ကို ဖွဲ့စည်းမည်ဖြစ် သည်။

လာမည့် အစိုးရသစ် လက်ထက်တွင် ပြည်ထောင်စုအတိုင်ပင်ခံကောင်စီကို ဖွဲ့စည်း၍ Checks and Balances သွားမည့် အနေအထားရှိ၍ စုပေါင်းခေါင်းဆောင်မှု အစိုးရတစ်ရပ် ဖြစ်လာနိုင်သည်ဟု နိုင်ငံရေးလေ့လာသုံးသပ်သူ ဒေါက်တာအန်ကောလက CNI သတင်းဌာနသို့ ပြောသည်။

၎င်းက “၂၀၂၆ မှာတော့ ကျနော်တို့ အစိုးရသစ်ပုံစံပေါ့။ ပြီးခဲ့တဲ့ ၂၀၁၀၊ ၂၀၁၅ နောက်တစ်ခု နစက အစိုးရပုံစံအနေ နဲ့ အများကြီး ကွဲပြားမယ်။ မြန်မာဆိုရှယ်လစ်လမ်းစဉ်ပါတီ ခေတ်အစိုးရပုံစံ အနေနဲ့လည်း ကွဲတယ်ပေါ့နော်။ အဲ့ဒီဟာကို သိဖို့လိုတယ်။ အခုက နိုင်ငံတော်အတိုင်ပင်ခံကောင်စီပါ ပါပြီးတော့မှ အုပ်ချုပ်ရေး၊ လွှတ်တော်၊ နိုင်ငံတော်အတိုင်ပင်ခံကောင်စီ ဆိုပြီးတော့မှ ဒီလိုပုံစံကို Checks and Balances သွားဖို့၊ စုပေါင်းခေါင်းဆောင်မှုပုံစံနဲ့သွားမယ့် အခင်းအကျင်း တစ်ခု တွေ့ရတယ်။ ပိုမို save ဖြစ်တဲ့ တပ်မတော်ဘက်ဆိုင်ရာ အစိုးရပေါ့နော်။ ဒီသဘောပဲရှိတာကို ပိုမိုကျစ်လစ် တဲ့ စုစည်းမှုပုံစံကို ပြင်ဆင်တာလို့ ကျနော်မြင်တယ်။ အဲ့ဒါက ဘာလဲဆိုတော့ နိုင်ငံတကာနဲ့ပတ်သက်ပြီး ပိုပြီး တော့မှ ကျစ်လစ်တဲ့ သံတမာန် အခင်းအကျင်းတွေ၊ အစိုးရပုံစံတွေ၊ နောက်ထပ် စီးပွားရေးပုံစံကို ပြောင်းဖို့ ပြင် ဆင်တယ်လို့ မြင်တယ်။ ဒီတိုင်းကြီး လွှတ်တော်ရယ်၊ အုပ်ချုပ်ရေးပုံစံရယ်၊ တရားစီရင်ရေးရယ် မဏ္ဍိုင်ကြီး ၃ ရပ်နဲ့ သွားတဲ့ပုံစံက လက်ရှိ အခင်းအကျင်း အရဆိုရင် လိုအပ်နေတယ်။ ဒီထပ် စုပေါင်းခေါင်းဆောင်မှု တစ်ရပ်ကိုလို တယ်။ ပိုပြီးထိန်းချုပ်ဖို့ လိုတယ်လို့ ကျနော်တော့ မြင်တယ်။ မြန်မာနိုင်ငံ ကြုံတွေ့နေရတဲ့ နိုင်ငံရေး အကျပ် အတည်းတွေ နိုင်ငံတကာနဲ့ ပတ်သက်တဲ့ အကျပ်အတည်းတွေမှာ ဒီပုံစံသွားတာကတော့ မြန်မာနိုင်ငံအတွက် တော့ ကောင်းတယ်လို့ ယူဆပါတယ်။ ဒါကတော့ အစိုးရသစ် အခင်းအကျင်း ပုံစံပေါ့နော်”ဟု ပြောသည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

ဒီမိုကရက်တစ်ခေါင်းဆောင်မှု သို့မဟုတ် စုပေါင်းခေါင်းဆောင်မှုသည် အုပ်စုအတွင်း၌ ပါဝင်သူများအနေဖြင့် ဆုံး ဖြတ်ချက်ချမှတ်ခြင်း၊ လုပ်ငန်းစဉ်တွင် ပိုမိုပါဝင်ကြသည့် ခေါင်းဆောင်မှု တစ်မျိုးဖြစ်ပြီး၊ ထိုခေါင်းဆောင်မှုကို အဖွဲ့အစည်းတစ်ခု၊ ပုဂ္ဂလိက လုပ်ငန်းတစ်ခုက အစိုးရအဖွဲ့အထိ ကျင့်သုံးနိုင်ကြောင်း သိရသည်။ 

အဆိုပါ ခေါင်းဆောင်မှုတွင် လူတိုင်းပါဝင်ရန် အခွင့်အလမ်းရှိခြင်း၊ စိတ်ကူး သဘောထားများကို လွတ်လပ်စွာ ဖလှယ်နိုင်ခြင်းနှင့် ဆွေးနွေးညှိနှိုင်းမှုများကို အားပေးခြင်းတို့ရှိကြောင်း၊ ဒီမိုကရက်တစ် လုပ်ငန်းစဉ်သည် စိတ်ကူး သဘောထားများ လွတ်လပ်စွာ စီးဆင်းရေးနှင့် အုပ်စုတွင်း ညီမျှရေးတို့ကို အဓိကထားသော်လည်း လမ်းညွှန်မှုများ ပေးရန်နှင့် ထိန်းချုပ်မှုပြုလုပ်ရန် အုပ်စု၏ခေါင်းဆောင် ရှိနေဆဲဖြစ်သည်။

အစိုးရသစ် အခင်းအကျင်းတွင် စုပေါင်းခေါင်းဆောင်မှုဆိုခြင်းက ခေါင်းဆောင်ပေါ် မူတည်ကြောင်း နိုင်ငံရေးလေ့ လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

၎င်းက “စုပေါင်းခေါင်းဆောင်မှုဆိုတာ သူကဒီမှာကျတော့ ဒီလက်ရှိ ဖွဲ့စည်းပုံကတော့ အမေရိကန်ပုံစံပဲလေ။ သ မ္မတက အာဏာရှိတယ်။ ဒီမှာလည်း ထိန်းကျောင်းမှုက အတန်အသင့်တော့ရှိတယ်။ စုပေါင်းခေါင်းဆောင်မှုဆို တာကတော့ ခေါင်းဆောင်ပေါ် မူတည်တာပေါ့နော်။ ခေါင်းဆောင်က လက်ခံလား၊ လက်မခံဘူးလား ဆိုတဲ့သ ဘောတော့ ရှိတာပေါ့နော်။ ဒါကတော့ ကျနော်တို့ စောင့်ကြည့်ရမှာ။ ပထမ တစ်ချက်က လွှတ်တော်က ကြံ့ခိုင်ရေး ကြီးပဲ အကုန်ဖြစ်နေတယ်လေ။ သမ္မတကလည်း ဘာပဲပြောပြော ကြံ့ခိုင်ရေး လိုလားတဲ့သူပဲဖြစ်မှာ။ ပြောရရင် တော့ အုပ်ချုပ်ရေးကလည်း ကြံ့ခိုင်ရေး၊ လွှတ်တော်ထဲမှာလည်း ကြံ့ခိုင်ရေးကြီးပဲ။ လွှတ်တော်ထဲမှာလည်း ဘယ် လိုမှ အချေအတင် စကားများစရာလူက မရှိတော့ဘူး။ ပြောဆိုဆွေးနွေးမဲ့ လူတွေက မရှိတော့ဘူး။ ပြောရမယ် ဆိုရင်တော့ စုပေါင်းခေါင်းဆောင်ဆိုတာထက် သမ္မတတစ်ယောက်ကပဲ ဆင်ခြင်တုံတရားနဲ့ ဒါထိန်းထိန်းသိမ်း သိမ်း လုပ်ရမယ်လို့ အမြင်နဲ့လုပ်တာက ပိုပြီးကောင်းတယ်။ တိုးတက်စရာရှိရင်လည်း ပိုတိုးတက်တယ်ပေါ့ နော်”ဟု ပြောသည်။

မြန်မာနိုင်ငံတွင် ပေါ်‌ပေါက်လာမည့် အစိုးရသစ်ကို အမျိုးသားညီညွတ်ရေးအစိုးရပုံစံ ဖွဲ့စည်း၍ စုပေါင်းခေါင်း ဆောင်မှုဖြင့် လက်ရှိ အကျပ်အတည်းများအား ဖြေရှင်းရန် နိုင်ငံရေးပါတီများက ထောက်ပြလျက်ရှိသည်။

သို့မဟုတ်ဘဲ တစ်ဦးတစ်ယောက်တည်း တစ်ပါတီတည်းက ဦးဆောင်၍ သွားမည်ဆိုပါက လက်ရှိ အကျပ်အတည်း များကို ကျော်လွှားနိုင်ရန် ခက်ခဲနိုင်ပြီး အပြန်အလှန် ထိန်းကျောင်းမှုမရှိဘဲ ဖြစ်သွားနိုင်ကြောင်း ၎င်းတို့က ထောက်ပြနေကြသည်။

CNI News

၂၀၂၆ ခုနှစ်၊ ဖေဖော်ဝါရီ ၁၉

ဗမာအမျိုးသားတော်လှန်ရေးတပ်မတော်(BNRA)၏ ခေါင်းဆောင်ဖြစ်သူ ဗိုလ်နဂါးတစ်ယောက် တပ်မတော်ထံ လက်နက်ချ အလင်းဝင်သွားမှုက ဘာကြောင့် ဖြစ်နိုင်လဲဆိုသည့်အပေါ် စစ်ရေးနှင့် နိုင်ငံရေး အကဲခတ်များကြား သုံးသပ်မှုများ ရှိနေကြသည်။

၂၀၂၆ ခုနှစ်၊ ဖေဖော်ဝါရီ ၁၈ ရက်နေ့က BNRA အဖွဲ့ခေါင်းဆောင် နိုင်လင်း(ခေါ်) နဂါးနှင့် ၎င်း၏ မိသားစု ဝင်များသည် လက်နက်၊ ခဲယမ်းများနှင့်အတူ ဥပဒေဘောင်အတွင်းသို့ ဝင်ရောက်လာကြောင်း နေပြည်တော်က သတင်းထုတ်ပြန်ထားသည်။

ယခုကဲ့သို့ ဗိုလ်နဂါး အလင်းဝင်သွားခြင်းသည် တော်လှန်ရေး အဖွဲ့အစည်းများကြား စုစည်းမှု မရှိသည် ကို ပြရာရောက်ပြီး NUG ဘက်မှ လက်ဦးမှုရှိစွာ သေချာ စည်းရုံးဖျောင်းဖျမှု အားနည်းခဲ့သည်ဟု ထင် ကြောင်း တရုတ်-မြန်မာအရေးလေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြော သည်။

NUG ရဲ့ ကာကွယ်ရေးဝန်ကြီး ဦးရည်မွန်နဲ့ PDF ကို တွေ့ရစဉ်

၎င်းက “တချို့လူတွေ ထင်သလို ဗိုလ်နဂါးက အစောကြီးကတည်းက စစ်တပ်နဲ့များ အဆက်အသွယ် ရှိလားမှ မသိတာ။ ဘာဖြစ်လို့လဲဆိုတော့ ကျမတို့ဘက်က တော်လှန်ရေးသမားတွေဘက်က အမြဲသတိ ရှိရမှာက စစ်အုပ်စုကလည်း သူအလကား မနေဘူး။ သူကလည်း သူ့ဆက်လက် ရှင်သန်ရေးအတွက် အမြဲတမ်း စစ်အုပ်စုမှာ အင်မတန် အောင်မြင်တဲ့ နည်းလမ်းရှိတယ်။ အဲဒါက ဘာလဲဆိုတော့ တော်လှန် ရေးတပ်ဖွဲ့တွေထဲမှာ သွေးခွဲတာပဲ။ ကျမတို့ ပါတီ(ဗကပ)ကိုလည်း ဒီလိုပဲသွေးခွဲတာပဲ။ သွေးခွဲပြီးတော့ သူက အောင်အောင် လုပ်တာ။ အဲဒီတော့ ကျမကြည့်တယ် ဗိုလ်နဂါးကို အစောကြီးကတည်းကများ သူ တို့ ကပ်ပြီးတော့ ဟိုဒင်းရှိရှိ စည်းရုံးကြလားမသိဘူး။ ဥပမာအားဖြင့် တချို့ ဘိန်းချနေတဲ့ တပ်မှူးတွေရှိ တယ်၊ နေတာထိုင်တာ တော်လှန်ရေးသမား‌ဘဝနဲ့ မကိုက်ညီတဲ့ လူမျိုးတွေ ရှိတယ်။ အဲဒီလိုလူမျိုးတွေ ကို ကပ်ပြီးတော့ စည်းရုံးတာပဲ။ အဲဒီလူတွေကပဲ ခွဲထွက်ကြတာ။ divide and rule  ပေါ့ အင်္ဂလိပ်ကိုလိုနီ တွေ လုပ်ခဲ့တာ။ ဒါစစ်တပ်က ဆက်တိုက်လုပ်တာနော် မဆလခေတ် ကတည်းက။ အဲဒါသူတို့ တော် တော်ကို အောင်အောင်မြင်မြင် လုပ်နိုင်တယ်။ ကြည့်ရတာ ဒီဟာရဲ့ အဆက်ပဲနဲ့တူတယ်။ ကျမတို့ တော်လှန်ရေး သမားဘက်က NUG တို့ ဘာတို့ဘက်က လက်ဦးမှုရှိရှိ သူ့ကို စည်းရုံးတာ၊ ဖျောင်းဖျတာ၊ ကိုယ့်ဘက် ပါအောင်လုပ်တာ အဲဒီမှာလည်း အားနည်းတယ်ထင်တယ်။ တော်လှန်ရေးအဖွဲ့တွေကြား ပဋိပက္ခဖြစ်ရင် ကျမတို့က ဒါကို အေးအေးချမ်းချမ်း စေ့စပ်ဆွေးနွေး အဖြေရှာဖို့တော့ ကြိုးစားဖို့လိုတာ ပေါ့နော်။ ဒီကြားထဲမှာ အနှောင့်ပယောဂတွေကလည်း ရှိနိုင်တယ်လေ။ အဲဒါကို ခေါင်းဆောင် အဖွဲ့ အစည်းတွေက သေချာ ဟိုဒင်းပြုဖို့လိုတယ်။ ကျမတို့ တော်လှန်ရေး အဖွဲ့အစည်းတွေကြားမှာ တစ်စု တစ်စည်း တည်းရှိတဲ့ စုစည်းမှု မရှိဘူးဆိုတာ ပြတာပေါ့။ အဲဒီအတွက် ကျမတို့ ပိုကြိုးစားဖို့လိုတဲ့ သင်ခန်းစာတော့ ရလိုက်တာပေါ့လေ” ဟု ပြောသည်။

စစ်ကိုင်းတိုင်းဒေသကြီး၊ ပုလဲမြို့နယ်တွင်  ဗိုလ်နဂါး ဦးဆောင်သည့် BNRA စခန်း သုံးခုကို အမျိုးသား ညီညွတ်ရေးအစိုးရ (NUG)၏ လက်အောက်ခံတပ်များက ၂၀၂၆ ခုနှစ်၊ ဖေဖော်ဝါရီ ၁၇ ရက်တွင် ဝင် ရောက် စီးနင်း တိုက်ခိုက်ပြီးနောက် ဖေဖော်ဝါရီ ၁၈ ရက်၌ ဗိုလ်နဂါးနှင့် မိသားစု မြန်မာ့တပ်မတော်ထံ အလင်းဝင် သွားခြင်းဖြစ်သည်။

ဗိုလ်နဂါးသည် ထိုကိစ္စများ မတိုင်ခင် NUG နှင့်ပတ်သက်၍ အမျိုးမျိုးသော ဝေဖန်ထောက်ပြမှုများကို လုပ်ဆောင်ခဲ့သကဲ့သို့ ၂၀၂၆ ခုနှစ်၊ ဇန်နဝါရီ ၉ ရက်နေ့က ပုလဲမြို့နယ်ရှိ BNRA ၏ စစ်ဆေးရေးဂိတ် စခန်းနှစ်ခုကို NUG လက်အောက်ခံ တပ်ရင်းတပ်ဖွဲ့များက ဝင်ရောက်စီးနင်းသည့် ဖြစ်စဉ် ဖြစ်ပွားခဲ့ သည်။

ထို့နောက် ၂၀၂၆ ခုနှစ်၊ ဇန်နဝါရီလ ၁၇ ရက်တွင် NUG လက်အောက်ခံ ပြည်သူ့ကာကွယ်ရေးအဖွဲ့ (ပကဖ) ဖွင့်ထားသည့် ဂိတ်တစ်ခုကို BNRA က ပြန်လည်စီးနင်းခဲ့သည်။ 

ဗိုလ်နဂါး ဦးဆောင်တဲ့ BNRA ကို တွေ့ရစဉ်

ထိုသို့ ဂိတ်များ အပြန်အလှန် စီးနင်းမှုအပြီး  နှစ်ဖက်တပ်များအကြား ဆက်ဆံရေး တင်းမာမှုများ ရှိနေခဲ့ ကာ ၂၀၂၆ ခုနှစ်၊ ဖေဖော်ဝါရီ ၁၇ ရက်နေ့တွင် BNRA စခန်းသုံးခု ထပ်မံ တိုက်ခိုက်ခံ ခဲ့ရခြင်းဖြစ်သည်။

တော်လှန်ရေးတွင် ညီညွတ်ရေးကို တည်ဆောက်ရ ခက်ခဲပြီး အလင်းဝင်သွားသည့် ဗိုလ်နဂါးအား တပ်ဘက်မှ သဘောတူညီချက်ရပါက ပြည်သူ့စစ်သဘောမျိုး စုဖွဲ့လာနိုင်ကြောင်း NCA ထိုးထားသည့် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

၎င်းက “ကြည့်ရတာတော့ ဗိုလ်နဂါးက NCA လမ်းကြောင်းတို့၊ အပစ်အခတ်ရပ်စဲရေး လမ်းကြောင်းတို့ သဘောကျတဲ့အကြောင်း ကြားတယ်လေ။ ဒါကြောင့် သူက သူ့နယ်မြေနဲ့သူ၊ သူ့လက်နက်ကိုင်နဲ့သူ အပစ်အခတ်ရပ်စဲရေး သဘောတူချက် ရမယ်ဆိုရင် အဲဒါ‌လေးနဲ့ နေချင်တဲ့ သဘောတော့ရှိတယ်။ NUG တပ်တွေနဲ့ ထိပ်တိုက်တွေ့တယ်ဆိုတော့ ရပ်တည်ချက် နည်းနည်း ကွာတာလည်း ဖြစ်နိုင်ပါတယ်။ တော်လှန်ရေးမှာ ညီညွတ်ရေး တည်ဆောက်တာ ခက်တယ်။ ညီညွတ်ရေးဆိုတာက သဘာပေါ် မူတည် တယ်။ အတွေးအခေါ် ညီညွတ်မှရတာ၊ လုပ်နည်းလုပ်ဟန် ညီညွတ်မှရတာ။ အစကတည်းက အတွေး အခေါ် တစ်ဖက်တည်း မဟုတ်ဘူးဆိုရင် ညီညွတ်ရေး တည်ဆောက်ဖို့က ခက်တယ်။ ဒါကြောင့် နဂို ကတည်းက လက်နက်ကိုင်တွေကို စပြီး အကောင်အထည်ဖော်ကတည်းက အတွေးအခေါ် ညီညွတ် ရေးကို အရင်တည်ဆောက်ရမယ်ဆိုတာ သင်ခန်းစာ ယူလို့ရတာပေါ့။ အကယ်၍ လက်ရှိ အုပ်ချုပ်နေ တဲ့အဖွဲ့က သူ့နေရာကို ပြန်ပေးမယ်၊ ပြည်သူ့စစ် သဘောမျိုး၊ BGF သဘောမျိုး ဖွဲ့ပြီးတော့ ပြန်ထားရင် တော့ အရင် NCA ထိုးထားတဲ့ အဖွဲ့တွေလို ဖြစ်သွားနိုင်တာပေါ့ သဘောတူရင်ပေါ့လေ။ ဖြစ်နိုင်ခြေတွေ က အများကြီးပါ အဲဒါကြောင့် စောင့်ကြည့်ရမှာပေါ့”ဟု ပြောသည်။

၂၀၂၁ ခုနှစ် နိုင်ငံရေး အပြောင်းအလဲ ဖြစ်ပြီးနောက် ဗိုလ်နဂါးသည် ပုလဲမြို့နယ် ပြည်သူ့ကာကွယ်ရေး တပ်ကို ဦးဆောင်ဖွဲ့စည်းခဲ့ကာ ၂၀၂၂ ခုနှစ်တွင် မြန်မာ့တော်ဝင်နဂါးတပ်တော်(MRDA)  အမည်ပြောင်းလဲ ဖွဲ့စည်းခဲ့သည်။

ထို့နောက် ၂၀၂၃ ခုနှစ်တွင် MRDA မှ ဗမာအမျိုးသားတော်လှန်ရေးတပ်မတော် (BNRA) ကို ဖွဲ့စည်းခဲ့ကာ အမျိုးသားညီညွတ်ရေးအစိုးရ (NUG) ၏ လက်အောက်ခံ မဟုတ်ဘဲ သီးခြားရပ်တည်နေသည့် တော်လှန် ရေးအဖွဲ့ အနေဖြင့် ယင်းမာပင်ခရိုင်၊ ပုလဲမြို့နယ်အတွင်း လှုပ်ရှားသည်။

CNI News

၂၀၂၆ ခုနှစ်၊ ဖေဖော်ဝါရီ ၁၉

တရုတ်သည် ရှမ်းပြည်နယ်မြောက်ပိုင်းက လက်နက်ကိုင် ၃ ဖွဲ့အပေါ်တွင် ဩဇာညောင်းသော်လည်း ကချင်လွတ် လပ်ရေးတပ်မတော်(KIA)အပေါ်မှာတော့ ထင်သလောက် ဩဇာမညောင်းဘူးဟု တရုတ်-မြန်မာအ‌ရေး လေ့လာ သုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။ 

ရှမ်းပြည်နယ်မြောက်ပိုင်းက လက်နက်ကိုင်  ၃ ဖွဲ့ဖြစ်သည့် ကိုးကန့်၊ မိုင်းလား၊ “ဝ”တို့သည် တရုတ်နှင့် ခိုင်မာသည့် ဆက်ဆံရေးတစ်ခု ရှိထားပြီးသားဖြစ်ကြောင်း၊ KIA အနေဖြင့် တရုတ်ပြောသမျှ နာခံမည့်သဘောမျိုး မရှိကြောင်း ၎င်းက ပြောသည်။ 

‌ဒေါက်တာလှကျော်ဇောက “ဒီလိုရှိတယ်ဗျ။ သူတို့က နယ်ချင်းစပ်နေတာ တရုတ်နယ်စပ်မှာ ထိပ်ဆုံးကဆို KIA တို့နဲ့ ဆက်စပ်နေတာရှိတယ်။ အောက်ပိုင်းမှာကျတော့ ကိုးကန့်တို့၊ မိုင်းလားတို့ရှိတာပေါ့ဗျာ “ဝ”တို့။ အဲဒီ “ဝ”တို့ မိုင်းလားတို့၊ ကိုးကန့်တို့နဲ့ တရုတ်နဲ့ဆက်ဆံရေးက ပိုပြီးတော့ ခိုင်မာတယ်။ ပိုပြီးတော့လည်း အခုကတော့ တော် တော်ကြီးကို စီးပွားရေးအရပါ အဆက်ဆက် ရှိနေပြီဖြစ်တယ်။ ဒါပေမယ့် KIA ကျတော့ သူက တရုတ်ရဲ့ အကြံပေး မှုတွေပဲဖြစ်ဖြစ် ဖိအားပေးမှုတွေပဲဖြစ်ဖြစ် သူဒါကို ဟိုလူတွေလောက် MNDAA တို့၊ “ဝ” တို့လောက် လက်မခံသလို ဆက်ဆံလို့ရတယ်။ ဟိုလောက် မရင်းနှီးပေါ့ဗျာ။ ဟိုမှာကတော့ စီးပွားရေးအရရော ဘာရောက တော်တော် ဆက်စပ်နေပြီဗျ။ ဘာလို့လဲဆိုတော့ မဲခေါင်မြစ်ဝှမ်း ဖွံ့ဖြိုးတိုးတက်ရေးနဲ့ ဆက်စပ်ပြီးတော့ အဲဒီ ကိုးကန့်တို့၊ “ဝ” တို့၊ မိုင်းလားတို့ကို တရုတ်က ပုံပြီး ကူညီထားတာတွေရှိတယ်။ ဒါကြောင့်မို့လို့ စီးပွားရေးအရကော၊  ဟိုဒင်းအရ ကော တော်တော် ဆက်စပ်နေပြီ တရုတ်နဲ့လေ။ ဒါပေမယ့် KIA ကျတော့ တရုတ်ရဲ့ဩဇာပေါ့နော် တရုတ်ပြော စကားကို ဟိုအဖွဲ့တွေလောက် သူနာခံစရာမလိုဘူး။ KIA က သူ့ဟာသူ သီးသန့် တတ်နိုင်သမျှ လွတ်လပ်တဲ့ တွေးခေါ်မှုတွေ ရှိနိုင်တယ်ဗျ။ မတူဘူး။ ဟိုလူတွေကတော့ အစစအရာရာ စီးပွားရေးအရရော ဘာမဆို (မှီ)ခိုနေရ သလို ဖြစ်တာပေါ့နော် တရုတ်ပြည်ကို။ ဒါကြောင့်မို့လို့ တရုတ်ပြည်ရဲ့ ဩဇာပိုကြီးတယ်ဗျ။ သို့သော်လည်း တရုတ် ပြောသမျှတိုင်းလည်း သူနာခံမှာ မဟုတ်ဘူး။ နောက် တရုတ်ရဲ့ စီးပွားရေးအရလည်း အပြတ်အသတ် ဆက်စပ် မနေဘူးဗျ။ နောက် သူ့မှာက နိုင်ဖဲရှိတယ်လေဗျာ။ (Rare Earth) ပေါ့နော် ရှားပါး မြေရှားသတ္ထုက ကိုင်ထားနိုင် တာဖြစ်တော့ သူက တရုတ်ကို စကားပြောတဲ့အခါမှာ ဟိုလူတွေထက် ပိုပြီးတော့ ပြောနိုင်ဆိုနိုင်တာတော့ ရှိတာ ပေါ့ဗျာ” ဟု ပြောသည်။ 

KIA ခေါင်းဆောင် ဒုဗိုလ်ချုပ်ကြီးဂွမ်မော်နဲ့ ချင်းညီနောင်အဖွဲ့(Chin Brother)ကို တွေ့ရစဉ်

KIA သည် ကချင်ဒေသဆိုင်ရာ လက်နက်ကိုင် အဖွဲ့အစည်းဖြစ်ပြီး ပထဝီ အနေအထားအရ ဒေသ အကန့်အသတ် များရှိသဖြင့် ကချင်ပြည်နယ်ကို ထိန်းချုပ်နိုင်ရေးအတွက်သာ ကြိုးစားမည်ဖြစ်ကြောင်း၊ တရုတ်နှင့် ထိစပ်နေ သည့်အတွက် ၎င်းတို့အနေဖြင့် အင်အားကြီးအောင် လုပ်ဖို့မလွယ်ကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

တရုတ်အနေဖြင့် KIA အား ယခင် အခြေအနေ အတိုင်းဆိုလျှင် ဖိအား ပေးကောင်းပေးလာနိုင်ကြောင်း၊ KIA သည် အနောက်နိုင်ငံနှင့် တရုတ်နိုင်ငံကြားတွင် ကစားနေသည့် ပုံစံမျိုးဖြစ်ကြောင်း၊ အနောက် အင်အားစုများ ဝင်လာပြီ ဆိုပါက တရုတ် ထိန်းနိုင်တော့မည် မဟုတ်ကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ (TNDP) မှ ဥက္ကဋ္ဌ စိုင်းဋ္ဌေး‌အောင်က CNI သတင်းဌာနသို့ ပြောသည်။ 

၎င်းက “ယခင်တုန်းကတော့ ဖိအားပေးနိုင်ကောင်း ပေးနိုင်မယ်။ ခုနတုန်းက ‌ကျနော်ပြောတဲ့ စကားထဲမှာပါတယ် အရှေ့နဲ့အနောက် သူက ကစားနေတယ်ဆိုတဲ့ အခါကျတော့။ ဒီ ဖေဖော်ဝါရီ ၂ ရက်နေ့မှာ တရုတ်ကလည်း တက်ရောက်တာ တွေ့တယ်။ သူတို့က တိုက်ပွဲ‌ မဖော်ဆောင်ဖို့ ပြောတယ်။ ဒါဂွမ်မော် ပြောထားတဲ့ စကားအတိုင်း ကျနော် ပြောတာပေါ့။ အဲဒီအခါကျတော့ သူတို့တွေကတော့ စစ်ကဝောာ့ ဆက်တိုက်သွားမယ်ဆိုတဲ့ အကြောင်း ပြောတယ်။ စစ်တိုက်ဖို့က လက်နက်အင်အားနဲ့ ဆေးဝါးတွေ လိုတယ်လေ။ ရိက္ခာကတော့ ကိုယ့်ဒေသက ထွက် တယ် ထားလိုက်အုံး။ အဲဒီ လက်နက်အင်အားနဲ့ ဆေးဝါးတွေ ဘယ်က ထောက်ပံ့လဲ။ အဲဒီ ထောက်ပံ့မှုတွေ ရနေတဲ့ အခါကျတော့ သူကလည်း တရုတ်ကို ဒီလိုမျိုး စကားမျိုး ပြောနိုင်တယ်လို့ဝောာ့  ကျနော့် အနေနဲ့ကတော့ မြင်တယ်။ အဲဒါကြောင့်မို့လို့ တရုတ်က မထိန်းနိုင်ဘူးလားဆိုတော့ အနောက်အင်အားစုတွေ ဝင်လာပြီဆိုရင် တရုတ် မထိန်းနိုင်ပါဘူးဗျ။ KIA ကို စစ်ရေးအရ ဖိအားပေးဖို့တော့ သိပ်မလွယ်ဘူး။ ဒါပေမယ့် နိုင်ငံရေးအရ ညှိညှိ နှိုင်းနှိုင်း တိုင်တိုင်ပင်ပင် ဆွေးဆွေးနွေးနွေးနဲ့ လုပ်သွားကြရင်တော့ လမ်းကြောင်းတစ်ခုအပေါ် ရောက်လာလိမ့် မယ်လို့ ကျနော် မြင်ပါတယ်။ အချိန်တို အတွင်းကတော့ ဖြစ်နိုင်မယ် မထင်ဘူး ဒါလည်း” ဟု ပြောသည်။

ယော PDF နဲ့ KIA ခေါင်းဆောင် ဒုဗိုလ်ချုပ်ကြီးဂွမ်မော်ကို တွေ့ရစဉ်

မြန်မာနိုင်ငံတွင် တရုတ်ရင်းနှီးမြှုပ်နှံမှု စီမံကိန်းများမှာ ကျောက်ဖြူ အထူးစီးပွားရေးဇုန်၊ မြစ်ဆုံဆည်၊ မိုးပျံရထား လမ်း၊ ကန်ပိုက်တီ စီးပွားရေး ပူးပေါင်းဆောင်ရွက်မှုဇုန်၊ မူဆယ်- မန္တလေး ကုန်သွယ်ရေးလမ်း၊ ရထားလမ်း၊ ရွှေလီ-မန္တလေး-ကျောက်ဖြူ အမြန်လမ်း စသဖြင့် အများအပြား ရှိနေသည်။

လက်ရှိတွင် KIA သည် နွေဦးတော်လှန်‌ရေး အင်အားစုများကို လက်နက်ခဲယမ်း အပါအဝင် စစ်သင်တန်းများ၊ နေထိုင်နိုင်ရေးတို့ကို ထောက်ပံ့ကူညီပေးနေသလို စစ်ကိုင်းတိုင်းဒေသကြီးနှင့် ကချင်ပြည်နယ်အတွင်း စစ်ဆင် ရေးများတွင်လည်း ပူးပေါင်းတိုက်ခိုက်နိုင်ရေး ထောက်ပံ့ပေးလျက်ရှိသည်။