CNI News
၂၀၂၅ ခုနှစ်၊ ဧပြီ ၄

မူးယစ်ဆေးဝါးနှင့် တရားမဝင် လက်နက်ကိုင် ရောင်းဝယ်မှုများ ပပျောက်ရေး ထိုင်းဝန်ကြီးချုပ် ပေတုန်တန်နှင့် မြန်မာနိုင်ငံ၏ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ ၂၀၂၅ ခုနှစ်၊ ဧပြီ ၄ ရက်က တွေ့ဆုံ ဆွေးနွေးကြ သည်။

ဗိုလ်ချုပ်မှူးကြီးမင်းအောင်လှိုင်သည် ထိုင်းနိုင်ငံ၊ ဘန်ကောက်မြို့မှာ ကျင်းပသည့် ကဏ္ဍစုံ နည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) ထိပ်သီး ခေါင်းဆောင်များ အစည်းအဝေး တက်ရောက်ရန် ဧပြီ ၃ ရက်နေ့က ရောက်ရှိနေသည်။

ထို့နောက် ထိုင်းဝန်ကြီးချုပ် ပေတုန်တန်နှင့် သီးသန့် တွေ့ဆုံ၍ နယ်စပ်ဒေသ တည်ငြိမ်အေးချမ်းရေး၊ တရားမဝင် ကုန်သွယ်မှုများ ပူးပေါင်းတိုက်ဖျက်ရေး၊ မူးယစ်ဆေးဝါးနှင့် တရားမဝင် လက်နက်ရောင်းဝယ်မှုများ ပပျောက်ရေး၊ တရားမဝင် အွန်လိုင်းလောင်းကစားမှုများနှင့် ငွေကြေးလိမ်လည်မှုများ ပပျောက်ရေး စသည့် အခြေအနေများကို ဆွေးနွေးခဲ့ကြသည်။

အလားတူ နယ်စပ်ဖြတ်ကျော် မီးခိုးမြူငွေ့ ညစ်ညမ်းမှု လျော့နည်းပပျောက်စေရေးအတွက် နယ်စပ်နေ ပြည်သူများအား အသိပညာပေးမှုများနှင့် စိုက်ပျိုးရေးနည်းပညာများ ဖြန့်ဝေပေးသွားမည့် အခြေအနေများ၊ စီးပွားရေးကဏ္ဍ၊ စိုက်ပျိုးရေးနှင့်မွေးမြူရေးကဏ္ဍ၊ ကာကွယ်ရေးကဏ္ဍ စသည့် အခြေအနေများကိုလည်း ဆွေးနွေးခဲ့ကြောင်း နစက-က သတင်းထုတ်ပြန်ခဲ့သည်။

ထိုင်းဝန်ကြီးချုပ် ပေတုန်တန်က “ မြန်မာနိုင်ငံင ငလျင်ဘေးသင့် ပြည်သူများ ပြန်လည်ထူထောင်ရေး လုပ်ငန်း များနှင့် ဆေးဘက်ဆိုင်ရာ အကူအညီပေးရေး လုပ်ငန်းများကို ကူညီဆောင်ရွက်ပေးသွားမည်၊ မြန်မာနိုင်ငံမှ လိုအပ်သည့် အခြေအနေများကို သိရှိနိုင်ရန်အတွက် မိမိတို့နိုင်ငံမှ နိုင်ငံခြားရေးဝန်ကြီးနှင့် မလေးရှားနိုင်ငံမှ နိုင်ငံခြားရေးဝန်ကြီးတို့သည် မကြာမီ ကာလအတွင်း မြန်မာနိုင်ငံသို့ သွားရောက်မည်၊ မြန်မာနိုင်ငံအတွက် လိုအပ်သည့် အကူအညီများကို မိမိတို့ နိုင်ငံအနေဖြင့် ဆက်လက် ကူညီဆောင်ရွက်ပေးသွားမည်”ဟု ပြောသည်။

ထို့နောက် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ထိုင်းနိုင်ငံအနေဖြင့် မိမိတို့ နိုင်ငံတွင် ပြင်းထန်ငလျင် ကြောင့် ထိခိုက်ခဲ့မှုများနှင့် ပတ်သက်၍ ဝန်ကြီးချုပ်ပေတုန်တန်နှင့် ထိုင်းပြည်သူများက လိုအပ်သည့် အကူအညီ များ ဆောင်ရွက်ပေးမှုများကို ကျေးဇူးတင်ပါကြောင်း ပြောသည်။

မြန်မာနိုင်ငံတွင် မြန်မာ့တပ်မတော်နှင့် နစကကို ဖြုတ်ချရေး လက်နက်ကိုင်တိုက်ခိုက်လျက်ရှိသည့်အတွက် တိုက်ပွဲများ နိုင်ငံအနှံ့ဖြစ်ပွားနေသည်။

အဆိုပါ တိုက်ပွဲများကို တိုက်ခိုက်နိုင်ရန်အတွက် လက်နက်ကိုင်အင်အားစုများသည် ထိုင်းနိုင်ငံကနေတဆင့် တရားမဝင် လက်နက်ခဲယမ်းများ ဝယ်ယူအားဖြည့်နေနိုင်သည့်အတွက် တရားမဝင် လက်နက်ရောင်းဝယ်မှုကို တားဆီးပိတ်ဆို့ရန် မြန်မာ့တပ်မတော်က လိုလားနေသည်။

CNI News

၂၀၂၅ ခုနှစ်၊ ဧပြီ ၄

မြန်မာနိုင်ငံအတွက် လိုအပ်သည့် အကူအညီများကို မိမိတို့အနေဖြင့် ဆက်လက်ပေးအပ်သွားမည်ဟု အိန္ဒိယ ဝန်ကြီးချုပ် မိုဒီက နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံ၍ ပြောကြားခဲ့သည်။

ထိုင်းနိုင်ငံက အိမ်ရှင်အဖြစ် ကျင်းပသည့် ကဏ္ဍစုံ နည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) ထိပ်သီးခေါင်းဆောင်များ အစည်းအဝေးကို အိန္ဒိယဝန်ကြီးချုပ် မိုဒီနှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ တက်ရောက်လျက်ရှိသည်။

အဆိုပါ အစည်းအဝေး မတိုင်ခင် ဧပြီ ၄ ရက် နံနက်ပိုင်းတွင် အိန္ဒိယဝန်ကြီးချုပ် မိုဒီနှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ သီးသန့် တွေ့ဆုံ ဆွေးနွေးခဲ့ကြသည်။

ဝန်ကြီးချုပ် မိုဒီက “ မြန်မာနိုင်ငံတွင် ပြင်းထန်ငလျင်လှုပ်ခတ်ခဲ့မှုကြောင့် ထိခိုက်ပျက်စီးဆုံးရှုံးခဲ့ရမှုများကို မိမိနှင့် အိန္ဒိယပြည်သူများ အနေဖြင့် များစွာ စိတ်မကောင်းဖြစ်ရပါကြောင်း၊ မိမိတို့ ဂူဂျာရက်ပြည်နယ်၌လည်း ယခင်က ထိုကဲ့သို့ ပြင်းထန်သည့် ငလျင်ကို ထိခိုက်ခံစားခဲ့ရဖူးကြောင်း၊ မြန်မာနိုင်ငံအတွက်လိုအပ်သည့် အကူအညီများကို မိမိတို့အနေဖြင့် ဆက်လက်ပေးအပ်သွားမည်”ဟု ပြောသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က မြန်မာနိုင်ငံ၏ ငလျင်ဘေးကြောင့် ထိခိုက်ပျက်စီးဆုံးရှုံးမှုများ အပေါ် အိန္ဒိယဝန်ကြီးချုပ် မိုဒီနှင့် အိန္ဒိယပြည်သူများက အကူအညီများ ပေးအပ်မှုများအတွက် များစွာ ကျေးဇူးတင်ရှိပါကြောင်း ပြောကြားခဲ့သည်။

ထို့နောက် နှစ်နိုင်ငံအကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်များမြှင့်တင်ရေးဆိုင်ရာကိစ္စရပ်များ၊ မြန်မာ နိုင်ငံ တည်ငြိမ်အေးချမ်းရေး၊ သာယာဝပြောရေးနှင့် မြန်မာနိုင်ငံ၏ အချုပ်အခြာ အာဏာပိုင်ဆိုင်မှုကို အလေးထား မှု အခြေအနေများ၊ နယ်စပ်ဒေသ တည်ငြိမ်အေးချမ်းရေး၊ တရားမဝင် လူကုန်ကူးမှုများနှင့် လက်နက်မှောင်ခိုမှုများ ပပျောက်ရေး ပူးပေါင်းဆောင်ရွက်သွားမည့် အခြေအနေများကို ဆွေးနွေးခဲ့ကြသည်။

ထို့ပြင် မြန်မာနိုင်ငံအနေဖြင့် ပါတီစုံဒီမိုကရေစီလမ်းကြောင်းပေါ်၌ ဆက်လက်လျှောက်လှမ်းလျက်ရှိမှုနှင့် ယခုနှစ် ဒီဇင်ဘာလအတွင်း လွတ်လပ်ပြီး တရားမျှတသည့် ပါတီစုံဒီမိုကရေစီ အထွေထွေရွေးကောက်ပွဲ ကျင်းပနိုင်ရေး အခြေအနေများကို ဆွေးနွေးခဲ့ကြကြောင်း နစက-က ထုတ်ပြန်ခဲ့သည်။

လက်ရှိ မြန်မာနိုင်ငံတွင် အိန္ဒိယသည် ငလျင်ဘေးသင့် ပြည်သူများ ကူညီကယ်ဆယ်ရေးအတွက် ဆေးအဖွဲ့များနှင့် ကယ်ဆယ်ရေးအဖွဲ့များ စေလွှတ်၍ ကူညီပေးလျက်ရှိသလို စားနပ်ရိက္ခာ၊ ရွက်ဖျင်တဲ၊ ဆေးဝါးနှင့် တစ်ကိုယ်ရည် သုံး ပစ္စည်းများ ထောက်ပံ့ပေးထားသည်။

CNI News

၂၀၂၅ ခုနှစ်၊ ဧပြီ ၄

မြန်မာနိုင်ငံတွင် ပြင်အား ၇ ဒသမ ၇ အဆင့်ရှိ ငလျင်လှုပ်ခတ်မှုကြောင့် ထိခိုက်ခံစားခဲ့ရသော ပြည်သူလူထုများ အတွက် ကူညီကယ်ဆယ်ရေးလုပ်ငန်းများ ဆောင်ရွက်နိုင်ရန်အတွက် Quad ကနေ အမေရိကန် ဒေါ်လာ သန်း ၂၀ ကူညီထောက်ပံ့ပေးသွားမည်ဟု ၂၀၂၅ ခုနှစ်၊ ဧပြီ ၄ ရက်တွင် ပူးတွဲထုတ်ပြန်ခဲ့သည်။

Quad တွင် အမေရိကန်၊ ဩစတြေးလျ၊ ဂျပန်၊ အိန္ဒိယ စသည့် လေးနိုင်ငံစုစည်း၍ ဖွဲ့စည်းထားသော မဟာမိတ် အဖွဲ့ဖြစ်သည်။ 

Quad ၏ ပူးတွဲထုတ်ပြန်ချက်တွင် “ ၂၀၂၅ ခုနှစ်၊ မတ်လ ၂၈ ရက်နေ့တွင် မြန်မာနိုင်ငံအလယ်ပိုင်းတွင် လှုပ်ခတ် ခဲ့သော ငလျင်အပြီး မြန်မာနှင့် ထိုင်းပြည်သူများအား အလေးအနက်ထား၍ ဝမ်းနည်းကြေကွဲမိပါသည်”ဟု ပြော ကြားထားသည်။

ထို့နောက် မိမိတို့ Quad အဖွဲ့က အမေရိကန်ဒေါ်လာ သန်း ၂၀ ကို လူသားချင်းစာနာထောက်ထားမှု အကူအညီ အဖြစ် ပေးအပ်ရန် ကတိပြုပါသည်ဟု ထုတ်ပြန်ခဲ့သည်။ 

Quad မြန်မာငလျင်ဘေး ထောက်ပံ့မည့် ထုတ်ပြန်ချက်ကိုတွေ့ရစဉ် 

အဆိုပါ ထောက်ပံ့ငွေ မြန်မာနိုင်ငံတွင် လုပ်ဆောင်နေသော လူသားချင်းစာနာမှုဆိုင်ရာ မိတ်ဖက်နိုင်ငံများကနေ တဆင့် ပံ့ပိုးပေးသွားမှာဖြစ်ကြောင်း Quad အဖွဲ့က ထုတ်ပြန်ခဲ့သည်။

လက်ရှိ မြန်မာနိုင်ငံတွင် Quad အဖွဲ့ဝင် အိန္ဒိယနိုင်ငံက ကျန်းမာရေးစောင့်ရှောက်မှုပေးသည့် အဖွဲ့များနှင့် ပိတ်မိ နေသော ပြည်သူများ ကယ်ဆယ်ရေးလုပ်ပေးမည့်အဖွဲ့များကို စေလွှတ်၍ မြန်မာငလျင်ဘေးကို ထောက်ပံ့ကူညီ လျက်ရှိသည်။

အလားတူ အိန္ဒိယနိုင်ငံသည် မြန်မာငလျင်ဘေးသင့် ပြည်သူများအတွက် ဆေးဝါးများ၊ စားနပ်ရိက္ခာများ၊ တစ်ကိုယ် ရည်သုံး ပစ္စည်းများ၊ ရွက်ဖျင်တဲများကိုလည်း ထောက်ပံ့လှူဒါန်းပေးလျက်ရှိသည်။

တခြားသော နိုင်ငံများဖြစ်သည့် ရုရှား၊ ဂျပန်၊ တရုတ်၊ ထိုင်း၊ ဘူတန်၊ လာအို၊ ဗီယက်နမ်၊ စင်္ကာပူ၊ ဘင်္ဂလားဒေ့ရှ်၊ ‌ဟောင် ကောင် တို့ကလည်း ကူညီကယ်ဆယ်ရေးအဖွဲ့များ စေလွှတ်၍ ပိတ်မိနေသူများ ကယ်ထုတ်ရေးနှင့် ကျန်းမာရေး စောင့်ရှောက်မှုများ ပေးအပ်လျက်ရှိသည်။

CNI News

၂၀၂၅ ခုနှစ်၊ ဧပြီ ၄

မြန်မာနိုင်ငံတွင် သဘာဝဘေးအန္တရာယ် ကာကွယ်ရေးနှင့်ပတ်သက်ပြီး မူဝါဒများသည် စာရွက်ပေါ်တွင်သာရှိပြီး လက်တွေ့ အကောင်အထည်ဖော်မှု အားနည်းခဲ့ကြောင်း ရန်ကုန်စောင့်ကြည့်အဖွဲ့တည်ထောင်သူ ဒေါက်တာ ညိုညိုသင်းက CNI သတင်းဌာနသို့ ပြောသည်။

ပြီးခဲ့သည့် အစိုးရနှစ်ရပ် လက်ထက်က ပြုလုပ်ခဲ့သည် လွှတ်တော်များတွင် သဘာဝဘေး အန္တရာယ် ကာကွယ်ရေး နှင့်ပတ်သက်၍ အများအပြား ဆွေးနွေးခဲ့ကြသလို သက်ဆိုင်ရာဝန်ကြီးများမှလည်း စီမံဆောင်ရွက်ထားသည်ဟု ပြန်လည် ဖြေဆိုခဲ့မှုများရှိကြောင်း၊ သို့သော် အကောင်အထည် ဖော်မှုများသည် လက်တွေ့မှာ ဖြစ်မလာကြောင်း ၎င်းက ထောက်ပြသည်။

ဒေါက်တာညိုညိုသင်းက “ပြီးခဲ့တဲ့ လွှတ်တော်နှစ်ရပ်ကလည်း ဒါမျိုးတွေကို ဆွေးနွေးခဲ့ကြတာတွေ အများကြီးပါ။ သက်ဆိုင်ရာဝန်ကြီးတွေကလည်း စီမံဆောင်ရွက်ထားပါတယ်ဆိုပြီး ပြန်ဖြေခဲ့တာများတယ်လေ။ ဒါပေမယ့် ဒါတွေက မူဝါဒအနေနဲ့ ရှိခဲ့တာပေမယ့် လက်တွေ့မှာ အကောင်အထည်ဖော်မှုအပိုင်းမှာ အားနည်းခဲ့တယ်ပေါ့။ ပြီးခဲ့တဲ့ ၁၀ နှစ်ကျော် ကာလအတွင်းက အရမ်းနှမြောဖို့ ကောင်းတယ်။ အခုဆိုရင် မြန်မာနိုင်ငံ နာဂစ်ဖြစ်တာ ကလည်း နှစ် ၂၀ နီးပါး  လောက်ရှိနေပြီ။ အဲဒီ‌တော့ နာဂစ်ဖြစ်ပြီး နောက်ပိုင်းကဆို အခုချိန်ထိဆိုလို့ရှိရင် တကယ် လို့သာ စာရွက်ပေါ်မှာ ရှိတဲ့မူဝါဒတွေကို လက်တွေ့ကျကျ အကောင်အထည် ဖော်ခဲ့မယ်ဆိုရင် အခုချိန်မှာ အခုလို မျိုး ကပ်ဘေးတစ်ခု ထပ်ရောက်တဲ့အခါမှာ အန်တီတို့က အဆင်သင့် ဖြစ်နေမှာလေ။ အန်တီတို့ရဲ့ ပြဿနာက စာရွက်ပေါ်မှာရှိတဲ့ မူဝါဒတွေကို လက်တွေ့ကျကျ အကောင်ထည်ဖော်မှု အားနည်းခဲ့တယ်။ အဲဒီအတွက်လည်း ကျွမ်းကျင်လုပ်သားတွေ ရှားခဲ့တယ်။ မြန်မာလူမျိုးရဲ့ အကျင့်စရိုက်ကလည်း အပြစ်ပြောတာမဟုတ်ဘူး အန်တီတို့ အပါအဝင်ပါပဲ။ ဖြစ်နေတဲ့အချိန်မှာ အဲဒီကိစ္စကို ဝိုင်းလုပ်ပေးကြတယ်။ ပြီးရင် ရေရှည်အတွက်ကို ဖိအားပေးတာ တောင်းဆိုတာ တစိုက်မတ်မတ် မလုပ်ကြဘူး” ဟု ပြောသည်။

 ငလျင်ဘေး ကူညီကယ်ဆယ်ရေး လုပ်နေကြစဉ်

ပြီးခဲ့သည့် အမျိုးသားညီညွတ်ရေးအစိုးရ လက်ထက်က ကျင်းပခဲ့သည့် ဒုတိယအကြိမ် အမျိုးသားလွှတ်တော် (၁၅) ကြိမ်မြောက် ပုံမှန်အစည်းအဝေးတွင် မြေငလျင်များ မကြာခဏ လှုပ်ခတ်တတ်သဖြင့် ကာကွယ်ရေးအတွက် ကြိုတင် ပြင်ဆင်ထားမှုနှင့် ထိခိုက်ပျက်စီး ဆုံးရှုံးမှုနည်းရန် စီမံဆောင်ရွက်ထားသည်များကို လွှတ်တော် ကိုယ်စားလှယ်တစ်ဦးက မေးမြန်းခဲ့သည်။

ထိုမေးမြန်းမှုကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနမှ ဒုတိယဝန်ကြီး ဦးစိုးအောင်က  ရှာဖွေကယ်ဆယ်ရေး တပ်ဖွဲ့ဝင် စုစုပေါင်း (၁၃,၆၂၇) ဦးတို့ကို စုဖွဲ့၍ ရှာဖွေကယ်ဆယ်ရေး နည်းစနစ်များ လေ့ကျင့်သင်ကြားပေးထားကြောင်း ဖြေဆိုခဲ့သည်။

ထို့ပြင် ပိတ်မိနေသူများကို ရှာဖွေကယ်ဆယ်နိုင်ရန်အတွက် လူ့နှလုံးခုန်သံနှင့် ခန္ဓာကိုယ် အပူချိန်တို့ကို ထောက်လှမ်းသည့် စက်ကိရိယာများ စသည့် နည်းပညာသုံး ကိရိယာများကိုလည်း အရန်သင့် စုဖွဲ့ထားရှိ ကြောင်းလည်း သိရသည်။

မတ်လ ၂၈ ရက်နေ့က ပြင်းအား ၇ ဒဿမ ၇ အဆင့်ရှိသည့် ငလျင်လှုပ်ခတ်သွားပြီးနောက် ပြိုကျပျက်စီးမှုများ ကြား ကယ်ဆယ်ရေးလုပ်ငန်းများ ဆောင်ရွက်ရာတွင် ၎င်းစက်ကိရိယာများ အသုံးပြု၍ ရှာဖွေကယ်ဆယ်ခြင်းများ မတွေ့ရကြောင်း ပြည်သူလူထုများမှ ထောက်ပြလျက်ရှိသည်။

မြန်မာနိုင်ငံအနေဖြင့် ငလျင် အပါအဝင် သဘာဝဘေးအန္တရာယ်များကို လွှတ်တော်တစ်ခုတည်းတွင် ဆွေးနွေးရုံ ဖြင့် မလုံလောက်ဘဲ ပြင်ပပညာရှင်များအား ဖိတ်ခေါ်ကာ စီးပွားရေးနှင့် နိုင်ငံ‌ရေးဆွေးနွေးသကဲ့သို့ လုပ်ဆောင်ရန် လိုကြောင်း ဘဏ်ရေးရာကျွမ်းကျင်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။

ငလျင်ကြောင့် ထိခိုက်သေဆုံးသူများကို တွေ့ရစဉ်

၎င်းက “အဲဒါကတော့ serious  section စဉ်းစားရမှာပေါ့ လွှတ်တော်မှာလေ။ လွှတ်တော်တင်စဉ်းစားလို့ မရဘူး။ ဒီလွှတ်တော်လောက် ဆွေးနွေးရုံနဲ့ မရဘူး။ သေချာဝိုင်းထဲကလို ဟိုတခါ စီးပွားရေးနဲ့ပတ်သက်လို့ နိုင်ငံရေးနဲ့ ပတ်သက်လို့ ဆွေးနွေးသွားသလိုပေါ့။ ဒါမျိုးတွေက တစ်ခုတော့ရှိပါတယ်။ ရှေးတုန်းကတော့ ဒါမျိုးတွေ မတွေ့ ခဲ့ဖူးဘူး။ အခုကတော့ လုပ်တဲ့ result က ဘယ်လောက်အထိ ထိရောက်လဲတော့ မသိဘူးပေါ့လေ။ ဒါပေမယ့် နောက်ပိုင်းဆိုရင် ဒီထက်ပိုပြီး ပညာရှင်တွေပါတဲ့၊ အတွေ့အကြုံရှိတဲ့ လူတွေပါတဲ့၊ အတွေးအခေါ် ကောင်းတဲ့ လူတွေပါတဲ့ ဆွေးနွေးပွဲတွေ ဆက်လုပ်မယ်လို့ ပြောတယ်။ ဟိုတလောက လုပ်သွားတယ်လေ။ စီးပွားရေးနဲ့ နိုင်ငံရေးနဲ့ပတ်သက်လို့။ ငလျင်နဲ့ပတ်သက်လို့လည်း ဒီအတိုင်းပဲပေါ့။ ဒါမျိုးတွေက ကျနော်ထင်တာ လွှတ်တော် တင် လုပ်လို့မရဘူးပေါ့။ လွှတ်တော်အမတ်ဆိုတာလည်း ရိုးရိုးသားသားပြောရရင် ဘယ်နိုင်ငံမဆိုပါ သူ့မှာ knowledge က အကန့်အသတ်ရှိတယ်လေ။ လူဆိုတာက carrier အလွန်ဆုံး တကယ်တော်လှ ဉာဏ်ထက်လှ carrier တစ်ခုနှစ်ခု သေချာသိမှာပေါ့။ carrier ၃ ခုဆို သူအကုန် မသိနိုင်တော့ဘူး။ ပြောချင်တာက ဘာလဲဆို တော့ လွှတ်တော်တွင် ဆွေးနွေးလို့မရဘူး။ အပြင်မှာပါ ဒီဥစ္စာကို ဒီ system တစ်ခုကို ဘယ်လို တည်ဆောက် ရမလဲ ဒါကိုစဉ်းစားမှရမှာ” ဟု ပြောသည်။

လက်ရှိတွင် ငလျင်ကြီး လှုပ်ခတ်ပြီးနောက် ငလျင်ငယ်လေးများမှာလည်း ဆက်တိုက် လှုပ်ခတ်လျက်ရှိပြီး ဒေသခံ ပြည်သူလူထုအနေဖြင့် စိုးရိမ်မှုများလည်း ရှိနေကြသည်။

ထို့ပြင် ကူညီကယ်ဆယ်ရေးလုပ်ငန်းများ ဆောင်ရွက်ရာတွင် ပရဟိတအသင်းအဖွဲ့များမှ ပစ္စည်းကိရိယာ မစုံမလင် ဖြင့် ဆောင်ရွက်ရသည့်အတွက် အခက်အခဲများလည်း ရှိနေကြောင်း သိရသည်။

ငလျင်အတွက် ကြိုတင်ပြင်ဆင်မှုများ မရှိထားသဖြင့် လှုပ်ခတ်ပြီး နောက်ရက်များမှသာ ကယ်ဆယ်ရေးအဖွဲ့များမှ လာရောက်၍ ကူညီကယ်ဆယ်ရေးများ ဆောင်ရွက်ရသောကြောင့် လူသေဆုံးမှု ၃၀၀၀ ကျော်ရှိပြီး ထိခိုက်ဒဏ်ရာ ရရှိသူ ၄၀၀၀ ကျော်အထိ ရှိနေပြီဖြစ်သည်။

CNI News
၂၀၂၅ ခုနှစ်၊ ဧပြီ ၄

အိန္ဒိယဝန်ကြီးချုပ် မိုဒီနှင့် မြန်မာနိုင်ငံ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ ၂၀၂၅ ခုနှစ်၊ ဧပြီ ၄ ရက် နံနက်ပိုင်း ဘန်ကောက်မြို့မှာ သီးသန့်တွေ့ဆုံ ဆွေးနွေးခဲ့ကြသည်။

ဗိုလ်ချုပ်မှူးကြီးမင်းအောင်လှိုင်သည် ကဏ္ဍစုံ နည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC)အဖွဲ့ဝင်နိုင်ငံ ထိပ်သီးခေါင်းဆောင်များ အစည်းအဝေး တက်ရောက်ရန်အတွက် ဧပြီ ၃ ရက်က ဘန်ကောက်မြို့(ထိုင်းနိုင်ငံ)သို့ ရောက်ရှိလာခဲ့သည်။

ထို့နောက် အိန္ဒိယဝန်ကြီးချုပ် မိုဒီလည်း BIMSTEC အစည်းအဝေး တက်ရောက်ရန် ဘန်ကောက်မြို့သို့ ရောက်ရှိနေခြင်း ဖြစ်သည်။

တွေ့ဆုံဆွေးနွေးမှု အကြောင်းအရာ အသေးစိတ်ကို မသိရသေးသော်လည်း နီးစပ်သူများကတော့ ရွေးကောက်ပွဲ ကျင်းပနိုင်ရေး အခြေအနေ၊ ငလျင်ဘေးသင့် ပြည်သူများ ပြန်လည်ထူထောင်ရေးလုပ်ငန်းများ အခြေအနေ၊ နှစ်နိုင်ငံ စီးပွားရေး အခြေအနေ၊ နှစ်နိုင်ငံ နယ်စပ်ဒေသတည်ငြိမ်အေးချမ်းရေး အခြေအနေများကို ဆွေးနွေးခဲ့ ကြောင်း သိရသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ဧပြီ ၃ ရက်ကလည်း နီပေါဝန်ကြီးချုပ်နှင့် သီးသန့် တွေ့ဆုံ ဆွေးနွေးခဲ့သေးသည်။

CNI News
၂၀၂၅ ခုနှစ်၊ ဧပြီ ၄

ထိုင်းဝန်ကြီးချုပ် ပေတုန်တန်နှင့် မြန်မာနိုင်ငံ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ ၂၀၂၅ ခုနှစ်၊ ဧပြီ ၄ ရက် နံနက်ပိုင်း ဘန်ကောက်မြို့မှာ သီးသန့်တွေ့ဆုံ ဆွေးနွေးခဲ့ကြသည်။

ဗိုလ်ချုပ်မှူးကြီးမင်းအောင်လှိုင်သည် ကဏ္ဍစုံ နည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC)အဖွဲ့ဝင်နိုင်ငံ ထိပ်သီးခေါင်းဆောင်များ အစည်းအဝေး တက်ရောက်ရန်အတွက် ဧပြီ ၃ ရက်က ဘန်ကောက်မြို့(ထိုင်းနိုင်ငံ)သို့ ရောက်ရှိလာခဲ့သည်။

ထို့နောက် ထိုင်းဝန်ကြီးချုပ် ပေတုန်တန် ဧည့်ခံသည့် BIMSTEC အစည်းအဝေး ဂုဏ်ပြု ညစာစားပွဲကို တက်ရောက်ခဲ့သည်။

အလားတူ ဧပြီ ၄ ရက်နေ့မှာတော့ ထိုင်းဝန်ကြီးချုပ် ပေတုန်တန်နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် တို့ သီးသန့် တွေ့ဆုံ ဆွေးနွေးကြခြင်း ဖြစ်သည်။

တွေ့ဆုံဆွေးနွေးမှု အကြောင်းအရာ အသေးစိတ်ကို မသိရသေးသော်လည်း နီးစပ်သူများကတော့ ရွေးကောက်ပွဲ ကျင်းပနိုင်ရေး အခြေအနေ၊ ငလျင်ဘေးသင့် ပြည်သူများ ပြန်လည်ထူထောင်ရေးလုပ်ငန်းများ အခြေအနေ၊ နှစ်နိုင်ငံ စီးပွားရေး အခြေအနေ၊ နှစ်နိုင်ငံ နယ်စပ်ဒေသတည်ငြိမ်အေးချမ်းရေး အခြေအနေများကို ဆွေးနွေးခဲ့ကြောင်း သိရသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ဧပြီ ၃ ရက်ကလည်း နီပေါဝန်ကြီးချုပ်နှင့် သီးသန့် တွေ့ဆုံ ဆွေးနွေးခဲ့သေးသည်။

CNI News
၂၀၂၅ ခုနှစ်၊ ဧပြီ ၃ 

ကဏ္ဍစုံ နည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) အစည်းအဝေးသို့ တက်ရောက်လာသည့် နိုင်ငံတကာ ခေါင်းဆောင်များကို ထိုင်းဝန်ကြီးချုပ် ပေတုန်တန်က ၂၀၂၅ ခုနှစ်၊ ဧပြီ ၃ ရက်တွင် ညစာစားပွဲဖြင့် ဧည့်ခံခဲ့သည်။

အဆိုပါ ညစာစားပွဲကို နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်လည်း တက်ရောက်ခဲ့သည်။

BIMSTES ၏ ထိပ်သီးခေါင်းဆောင်များ အစည်းအဝေးကို ထိုင်းနိုင်ငံက အိမ်ရှင်အဖြစ် ဘန်ကောက်မြို့မှာ ဧပြီ ၄ ရက်တွင် ကျင်းပမည်ဖြစ်သည်။

၂၀၂၅ ခုနှစ်၊ ဧပြီ ၃ ရက် BIMSTEC ခေါင်းဆောင်များ အစည်းအဝေး ညစာစားပွဲမှာ နစကဥက္ကဋ္ဌကို တွေ့ရစဉ်

အဆိုပါ အစည်းအ‌ဝေးကို တက်ရောက်ရန် နစကဥက္ကဋ္ဌသည် ထိုင်းနိုင်ငံ၊ ဘန်ကောက်မြို့သို့ ဧပြီ ၃ ရက်နေ့ ညနေ ပိုင်းက ရောက်ရှိလာခဲ့သည်။

BIMSTEC အဖွဲ့ထဲတွင် ထိုင်း၊ မြန်မာ၊ အိန္ဒိယ၊ ဘင်္ဂလားဒေ့ရှ်၊ နီပေါ၊ သီရိလင်္ကာနှင့် ဘူတန်နိုင်ငံတို့ ပါဝင်ပြီး အဖွဲ့ဝင်နိုင်ငံများအကြား စီးပွားရေး ပူးပေါင်းဆောင်ရွက်မှုများကို မြှင့်တင်ရန် ရည်ရွယ်ချက်ဖြင့် အစည်းအဝေးများ ပြုလုပ်လေ့ရှိသည်။

CNI News

၂၀၂၅ ခုနှစ်၊ ဧပြီ ၃

ထိုင်းနိုင်ငံက အိမ်ရှင်အဖြစ် ကျင်းပသည့် ကဏ္ဍစုံ နည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) အစည်းအဝေးကို တက်ရောက်ရန် မြန်မာနစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် ထိုင်းနိုင်ငံ၊ ဘန်ကောက်မြို့သို့ ၂၀၂၅ ခုနှစ်၊ ဧပြီ ၃ ရက်တွင် ရောက်ရှိ လာခဲ့သည်။

အဆိုပါ BIMSTEC အစည်းအဝေးကို မြန်မာကိုယ်စားလှယ် အနေဖြင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် က တက်ရောက်ခြင်းဖြစ်သည်။

ထို့နောက် ထိုင်းဝန်ကြီးချုပ် ပေတုန်တန်၊ အိန္ဒိယဝန်ကြီးချုပ် မိုဒီနှင့် သီးသန့် တွေ့ဆုံဆွေးနွေး သွားရန်ရှိကြောင်း သိရသည်။

BIMSTEC အဖွဲ့ထဲတွင် ထိုင်း၊ မြန်မာ၊ အိန္ဒိယ၊ ဘင်္ဂလားဒေ့ရှ်၊ နီပေါ၊ သီရိလင်္ကာနှင့် ဘူတန်နိုင်ငံတို့ ပါဝင်ပြီး အဖွဲ့ဝင်နိုင်ငံများအကြား စီးပွားရေး ပူးပေါင်းဆောင်ရွက်မှုများကို မြှင့်တင်ရန် ရည်ရွယ်ချက်ဖြင့် အစည်းအဝေးများ ပြုလုပ်လေ့ရှိသည်။

CNI News

၂၀၂၅ ခုနှစ်၊ ဧပြီ ၃

ထိုင်းနိုင်ငံက အိမ်ရှင်အဖြစ် ကျင်းပသည့် ကဏ္ဍစုံ နည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) အစည်းအဝေးကို တက်ရောက်ရန် အိန္ဒိယဝန်ကြီးချုပ် မိုဒီသည် ထိုင်းနိုင်ငံ၊ ဘန်ကောက်မြို့သို့ ၂၀၂၅ ခုနှစ်၊ ဧပြီ ၃ ရက်တွင် ရောက်ရှိလာခဲ့သည်။

ထို့နောက် ဝန်ကြီးချုပ် မိုဒီနှင့် ထိုင်းဝန်ကြီးချုပ် ပေတုန်တန်တို့ တွေ့ဆုံ၍ ဆွေးနွေးခဲ့ကြသည်။

အဆိုပါ BIMSTEC အစည်းအဝေးကို မြန်မာကိုယ်စားလှယ် အနေဖြင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် လည်း တက်ရောက်ရန် ထိုင်းနိုင်ငံသို့ ထွက်ခွာသွားပြီးဖြစ်ပြီ အိန္ဒိယဝန်ကြီးချုပ် မိုဒီနှင့် သီးသန့် တွေ့ဆုံ ဆွေးနွေး သွားရန် ရှိကြောင်း သိရသည်။

BIMSTEC အဖွဲ့ထဲတွင် ထိုင်း၊ မြန်မာ၊ အိန္ဒိယ၊ ဘင်္ဂလားဒေ့ရှ်၊ နီပေါ၊ သီရိလင်္ကာနှင့် ဘူတန်နိုင်ငံတို့ ပါဝင်ပြီး အဖွဲ့ဝင်နိုင်ငံများအကြား စီးပွားရေး ပူးပေါင်းဆောင်ရွက်မှုများကို မြှင့်တင်ရန် ရည်ရွယ်ချက်ဖြင့် အစည်းအဝေးများ ပြုလုပ်လေ့ရှိသည်။