CNI Sport News
၂၀၂၅ ခုနှစ် အောက်တိုဘာ ၁၆
ပိုလန်လက်ရွေးစင်အသင်းအတွက် ပါဝင်ကစားခဲ့ပြီး ကြွက်သားဒဏ်ရာရရှိခဲ့တာကြောင့် ရီးရယ်လ်အသင်းနဲ့ ကစားမယ့် El Clasico ပွဲကိုလွဲမယ့်တိုက်စစ်မှူးလီဝန်ဒေါစကီးကို ဘာစီလိုနာအသင်းက ဒေါသထွက်နေပါတယ်။
လီဝန်ဒေါစကီးဟာ ဒီပွဲမှာနာကျင်မှုကို ခံစားနေရပေမယ့် ပွဲကိုဆက်ကစားခဲ့တာကြောင့် ၁ လကြာအနားယူရမယ့်အပေါ်မှာ ဘာစီလိုနာအသင်းက ဒေါသထွက်နေတာလို့ စပိန်သတင်းတွေမှာ ဖော်ပြထားတာပါ။
အသက် ၃၇ နှစ်အရွယ်ရှိတိုက်စစ်မှူးဟာ ပိုလန်အသင်းနဲ့ လစ်သူယေးနီးယားအသင်းတို့ပွဲစဉ်မှာ ဒဏ်ရာရခဲ့တာကြောင့် ပထမပိုင်းမှာ အဆင်မပြေဖြစ်ခဲ့ပေမယ့် ဆက်ပြီးကစားဖို့ ရွေးချယ်ခဲ့တာဖြစ်ပါတယ်။
လီဝန်ဒေါစကီးဟာ အခုရာသီအစပိုင်းမှာ ဒီလိုအခြေအနေမျိုးကို ကြုံတွေ့ခဲ့ရဖူးပေမယ့် ပွဲကိုပြီးဆုံးအောင်အထိ ဆက်ကစားသွားခဲ့တာပါ။
လီဝန်ဒေါစကီးဟာ ဒီဆုံးဖြတ်ချက်ကြောင့် အနည်းဆုံး ၄ ပတ်ကြာအထိ အနားယူရမှာဖြစ်လို့ ရီးရယ်လ်အသင်းနဲ့ ပွဲကြီးပွဲကောင်းကို လွဲချော်တော့မှာဖြစ်ပါတယ်။
ဘာစီလိုနာအသင်းကတော့ လီဝန်ဒေါစကီးရဲ့ဒဏ်ရာအခြေအနေကိုင်တွယ်မှုကို စိတ်ပျက်နေပြီး စပိန်သတင်းစာမာကာက သူဟာ ချက်ချင်းလူစားလဲဖို့ တောင်းဆိုသင့်တယ်ဆိုပြီး ကလပ်အသင်းဘက်က ယုံကြည်နေကြောင်း ဖော်ပြခဲ့ပါတယ်။
ဘာစီလိုနာအသင်းနည်းပြဟန်ဆီဖလစ်နဲ့ဆေးအဖွဲ့ဝင်တွေကလည်း အတွေ့အကြုံရှိ ကစားသမားတစ်ဦးရဲ့ ဒဏ်ရာအခြေအနေကို ကြိုတင်ပြီး မကာကွယ်တဲ့အပေါ် စိတ်ပျက်နေကြတာပါ။
ဘာစီလိုနာအသင်းဟာ လက်ရှိအချိန်မှာ ဒဏ်ရာရကစားသမားအရေအတွက်တိုးလာနေပြီး နိုင်ငံတကာရက်သတ္တပတ်အတွင်းမှာ အော်လ်မိုနဲ့ ဖာရန်တောရက်စ်တို့လည်း ဒဏ်ရာရရှိခဲ့ကြပါတယ်။
ဘာစီလိုနာအသင်းဟာ လာမယ့်ပွဲတွေမှာ ရက်ရှ်ဖိုဒ့်ကို အထောင်တိုက်စစ်မှူးအဖြစ် အသုံးပြုရဖွယ်ရှိနေတာပါ။
လာလီဂါအမှတ်ပေးဇယားအဆင့် ၂ နေရာမှာရပ်တည်နေတဲ့ ဘာစီလိုနာအသင်းဟာ လာမယ့်လိဂ်ပွဲစဉ်အဖြစ် ဂျီရိုနာအသင်းနဲ့ ယှဉ်ပြိုင်ရမှာဖြစ်ပါတယ်။
Source:goal
