CNI News

၂၀၂၃ ခုနှစ်၊ ဇူလိုင် ၁၁

မြန်မာ - တရုတ် နယ်စပ်ကုန်သွယ်ရေးလမ်းကြောင်းနှင့် မြန်မာ - ထိုင်း နယ်စပ်ကုန်သွယ်ရေး လမ်းကြောင်း ၂ ခု တွင် မည်သည့် ကုန်သွယ်ရေးလမ်းကြောင်းက ပိုတည်ငြိမ်သလဲဟု နိုင်ငံရေးအသိုင်းအဝိုင်းနှင့် ကုန်သည်အသိုင်း အဝိုင်းကြား သုံးသပ်လျက်ရှိသည်။

မြန်မာနိုင်ငံရှိ နေရာအနှံ့အပြားတွင် လက်နက်ကိုင် ပဋိပက္ခများဖြစ်ပွားနေပြီး နယ်စပ်ကုန်သွယ်ရေးလမ်းကြောင်း များလည်း မကြာခဏ ပိတ်ရသည့် အခြေအနေများရှိနေသည်။

ထိုနယ်စပ်ကုန်သွယ်ရေး လမ်းကြောင်းများအနက် ထိုင်းနယ်စပ်ကုန်သွယ်ရေးလမ်းကြောင်းတွင် လမ်းတံတားများ ဖျက်ဆီးခံရခြင်း၊ ကုန်သွယ်ရေးဇုန်များ မကြာခဏ ဗုံးပေါက်ကွဲမှုများကြုံတွေ့ရခြင်း၊ တိုက်ပွဲများကြောင့် ကုန် သွယ်ရေးလမ်းကြောင်းများ ပိတ်ရခြင်း စသည့် အခြေအနေများ မကြာခဏ ဖြစ်ပွားလေ့ရှိသည်။

သို့သော် တရုတ်နယ်စပ်ကုန်သွယ်ရေး လမ်းကြောင်းကတော့ ထိုင်းနယ်စပ်ကုန်သွယ်ရေး လမ်းကြောင်းမှာ ကြုံတွေ့ နေရသော အခြေအနေများကို မကြုံရပေ။

တရုတ်နယ်စပ် ကုန်သွယ်ရေး လမ်းကြောင်း တစ်လျှောက်တွင် တရုတ်နိုင်ငံပိုင် အကျိုးစီးပွားများ ရှိနေခြင်း ကြောင့် လက်နက်ကိုင် အဖွဲ့အစည်းများကလည်း တရုတ်၏ အကျိုးစီးပွားကို ထိခိုက်စေမည့် ကိစ္စများကို ရှောင်ကြကြောင်း၊ ထိုင်းနိုင်ငံသည် ၎င်းနယ်စပ်ရှိ လက်နက်ကိုင် အဖွဲ့အစည်းများအပေါ် ဩဇာသက်ရောက်မှု မရှိခြင်းကြောင့် မြန်မာ - ထိုင်း နယ်စပ်ကုန်သွယ်ရေးလမ်းကြောင်းသည် တည်ငြိမ်မှု မရှိဖြစ်ကြောင်း နိုင်ငံရေး လေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။

၂၀၂၂ ခုနှစ်၊ မတ်လ ၂၉ ရက်က မြဝတီ- ကော့ကရိတ်လမ်းပိုင်းတနေရာတွင် မီးရှို့ခံလိုက်ရသည့် ကုန်တင်ယာဉ်များ (CJ)

ဦးရဲထွန်းက “တရုတ်အရင်းအနှီးတွေပါတော့ လမ်းတွေဖျက်ဆီးတာ၊ တံတားတွေ ဖျက်ဆီးတာကိုလည်း တရုတ် က ကြိုက်ပုံမရဘူး။ နောက် ကုန်သွယ်ရေးလမ်းကြောင်းကို တကယ်လို့ တိုက်ခိုက်လို့ရှိရင်လည်း တရုတ်စီးပွားရေး ကိုလည်း ထိခိုက်မှာပေါ့နော်။ အဲဒါကြောင့်မို့လို့ ဒီဟာတော့ အဖွဲ့အစည်းတွေက ရှောင်ကုန်ကြတယ်။ ထိုင်းက လည်း ထိုနည်းလည်းကောင်းပဲ၊ ထိုင်းကိုကျတော့ ထိုင်းအစိုးရက အဲဒီအဖွဲ့တွေအပေါ်မှာ သိပ်ပြီး ဩဇာသက် ရောက်မှု မရှိဘူး။ သက်ရောက်မှု မရှိတဲ့အခါကျတော့ သူတို့က KNU နဲ့ NUG, PDF တွေကတော့ ဘာပဲဖြစ်ဖြစ် ထိုင်းနဲ့ ကုန်သွယ်ရေး ပြတ်တောက်သွားတာမျိုးပဲ သူတို့က လိုချင်မှာပေါ့။ အဲဒီကုန်သွယ်ရေးက နစကအစိုးရကို အခွန်တွေ အများကြီး ရှာပေးနိုင်တာကိုး။ ဒါကြောင့်မို့လို့ သူတို့က အဲဒါတွေကိုလည်း တိုက်ခိုက်တာပေါ့နော်။ တိုက်ခိုက်တော့ ထိုင်းအစိုးရကတော့ ဒီကိစ္စတွေ မဖြစ်အောင် သူ့ပြည်တွင်းမှာရှိတဲ့ ဖမ်းလို့ပြုလို့ရတာတွေတော့ ဖမ်းပြီးတော့ နှိမ်နှင်းပေးတာတွေ ရှိတယ်။ ဟိုတလောက သူတို့ဘက် ထွက်ပြေးလာတဲ့ တချို့ကို ဖမ်းပြီးတော့ နစကကို အပ်လိုက်တာမျိုးပေါ့နော်။ ဒါပေမယ့် ဒီဘက်က အဖွဲ့တွေအပေါ်မှာ သိပ်ပြီးတော့ ဩဇာမရှိဘူး” ဟု ပြောသည်။

မြောက်ပိုင်းမဟာမိတ်အဖွဲ့(AA- TNLA- MNDAA)တို့က “တရုတ်ရင်းနှီးမြှုပ်နှံမှုများ လုပ်ဆောင်နေသည့် ဒေသများ တွင် နိုင်ငံတကာ ရင်းနှီးမြှုပ်နှံမှု လုပ်ငန်းများကို နှောင့်ယှက်သည့် မည်သည့် အဖွဲ့အစည်းကိုမဆို အရေးယူသွား မည်”ဟု ၂၀၂၃ ခုနှစ်၊ ဇူလိုင် ၁ ရက်နေ့စွဲဖြင့် ထုတ်ပြန် ပြောကြားခဲ့သည်။

မြန်မာ - တရုတ်နယ်စပ် ကုန်သွယ်ရေး လမ်းကြောင်း တစ်လျှောက်ရှိ လက်နက်ကိုင် အဖွဲ့အစည်း အများစုအပေါ် တွင် တရုတ်နိုင်ငံက ဩဇာသက်ရောက်မှုများ ရှိနေခြင်းကြောင့် မြန်မာ - တရုတ် နယ်စပ်ကုန်သွယ်ရေးကို ထိခိုက် စေမည့် လုပ်ရပ်များကို လက်နက်ကိုင် အဖွဲ့အစည်းများက လုပ်ဆောင်ခြင်းမရှိကြောင်း နိုင်ငံရေးလေ့လာသူများ က ပြောသည်။

တရုတ်-မြန်မာ နယ်စပ်ကုန်သွယ်ရေးလမ်းကြောင်းပေါ်မှာ TNLA အဖွဲ့ကိုတွေ့ရစဉ်

သို့သော်လည်း တရုတ်ကုန်သွယ်ရေးနှင့် ထိုင်းကုန်သွယ်ရေးလမ်းကြောင်း ၂ ခုသည် မကွာခြားကြောင်း၊ တရုတ် ကုန်သွယ်ရေး လမ်းကြောင်းတွင်လည်း တိုက်ပွဲဖြစ်ပွားကြောင်း၊ ကုန်တင်ယာဉ်များ ပစ်ခတ်ခံရမှုကြောင့် ယာဉ်မောင်းများ သေဆုံးခြင်းနှင့် ကားများ မီးရှို့ခံရမှုများလည်း ရှိကြောင်း ပြောင်းကုန်သည် ဦးသန့်ဇင်ထွန်းက CNI သတင်းဌာနသို့ ပြောသည်။

၎င်းက “တရုတ်ပြည်ကို ပို့နေတဲ့အချိန်တုန်းက ကွတ်ခိုင်နဲ့ မူဆယ်ကြားထဲမှာရှိတဲ့ နမ့်ဖတ်ကာဆိုတဲ့ နေရာမျိုးမှာ ခဏခဏ နွားကားတွေ အပစ်ခံထိတယ်။ ယာဉ်မောင်းတွေ သေတယ်။ တိုက်ပွဲတွေ ဖြစ်တယ်။ နွားကားဆိုရင် စနိုက်ပါနဲ့ ပစ်လို့ နွားတွေသေတယ်၊ ခဏခဏ ချောက်ထဲကျတယ်။ နောက် တိုက်ပွဲဖြစ်လို့ ကားမီးရှို့တာတွေ၊ Express ကားတွေ မီးရှို့ခံရတာတွေ အတူတူပဲ သိပ်မကွာဘူး။ တရုတ်က သူကပါးစပ်က ပြောတာပဲရှိတာ။ အောက်က ဖြစ်တာဖြစ်တာပဲ။ တိုက်ပွဲက ဖြစ်တာပဲ။ ဆက်ကြေးက ကောက်တာကိုး။ ဟိုတလောကဆိုလို့ရှိရင် မူဆယ်တောင် မရောက်သေးဘူး သီပေါနဲ့ လားရှိုးကြားမှာတင် ဆက်ကြေးကောက်လို့ ဘယ်အဖွဲ့က ကောက်တာ လဲဆိုပြီး လက်နက်ကိုင် အချင်းချင်းတောင် ပြန်မေးရတယ်။ ကြားအဖွဲ့တွေက ကောက်နေတာ အဲဒါတွေ ရှိတယ်။ ပြီးတော့ တောင်ပေါ်မှာလည်း ခဏခဏ ဖြစ်တယ်။ ဖြစ်တာတော့ ဖြစ်နေကြတာပဲ။ ဒီကြားထဲ လွန်ခဲ့တဲ့ ၂ နှစ်က ဆိုရင် ကျင်စန်းကျော့ဆိုတာက မူဆယ် (၁၀၅) မိုင်ဇုန် စစ်ဆေးရေးဂိတ် ရှိတယ်။ အဲဒီကနေပြီးတော့မှ မူဆယ်မြို့ ထဲကို ဝင်ရတာပေါ့နော်။ မူဆယ်နဲ့ ကွင်းထဲက လမ်းကြောင်းက ၂ ခု၊ ၃ ခု ရှိတယ်။ ၁ ခုက ကျင်စန်းကျော့ဆိုတဲ့ ရွာ ဘေးနားကနေ ပတ်ပြီးတော့မှ ဝမ်တိန်ကို သွားတယ်။ များသောအားဖြင့် အသီးကားတွေပေါ့။ သစ်သီးကားတွေ၊ ကုန်စိမ်းကားတွေ သွားရတယ်။ ကျင်စန်းကျော့မှာ ပြည်သူ့စစ်တွေနဲ့ ဒေသခံတွေနဲ့ ပဋိပက္ခဖြစ်တဲ့အခါမှာ လမ်း ကြောင်းတွေ ပိတ်သွားတာ ရှိတယ်။ ၁ ပတ်၊ ၁၀ ရက်လောက်ဖြစ်လို့ အသီးတွေ ပုပ်လို့ လွှင့်ပစ်ရတာတွေ ရှိတယ်။ အမျိုးမျိုးပါပဲ၊ ဒါကတော့ သိပ်မကွာလှပါဘူး။ အားလုံးကတော့ အခြေအနေကြည့်ပြီး သွားကြလာကြရတာ” ဟု ပြောသည်။

နိုင်ငံရေးအပြောင်းအလဲ ဖြစ်ပွားပြီးနောက်ပိုင်း တရုတ်နယ်စပ် ကုန်သွယ်ရေး လမ်းကြောင်းနှင့် ထိုင်းနယ်စပ် ကုန်သွယ်ရေး လမ်းကြောင်း ၂ ခုလုံးတွင် လက်နက်ကိုင် အဖွဲ့အစည်းများက စစ်ဆေးရေးဂိတ်များဆောက်ပြီး ငွေကြေး တောင်းနေမှုများ ယခင်ကထက် ပို၍ များလာနေကြောင်း၊ လမ်းကြောင်းတစ်လျှောက် မကြာခဏ တိုက်ပွဲ ဖြစ်ပွားမှုများရှိကြောင်း ကုန်သည်များနှင့် ယာဉ်မောင်းများထံမှ သိရသည်။ 

CNI News

၂၀၂၃ ခုနှစ်၊ ဇူလိုင် ၁၁

တပ်တွင်းတပ်ပြင် စည်းလုံးညီညွတ်မှုရှိအောင် ကြိုးပမ်းဆောင်ရွက်ရန်လိုအပ်သလို သဘာဝဘေးဒဏ် ကျရောက် ခဲ့ချိန်တွင်လည်း အစိုးရ၊ တပ်မတော်တို့ ပူးပေါင်း၍ ဒေသ၏ အကျိုးများကို ဆောင်ရွက်ပေးခဲ့သည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

သဘာဝဘေးဒဏ်ခံခဲ့ရသော ရခိုင်ပြည်နယ်၊ ရသေ့တောင်မြို့နယ်နှင့် ဘူးသီးတောင်မြို့နယ်တို့မှ ဌာနဆိုင်ရာ ဝန်ထမ်းများ၊ မြို့မိမြို့ဖများနှင့် တပ်နယ်များရှိ အရာရှိ၊ စစ်သည်၊ မိသားစုများနှင့် တွေ့ဆုံစဉ် အထက်ပါအတိုင်း ပြောကြားခဲ့ခြင်း ဖြစ်သည်။

နစက ဥက္ကဋ္ဌက “‌ဒေသခံပြည်သူများသည် မိမိတို့၏ တိုင်းရင်းသားများဖြစ်ပြီး တစ်မြေတည်းနေ၊ တစ်ရေတည်း သောက်၊ တစ်လေတည်းအတူ ရှူနေကြသူများဖြစ်သဖြင့် ချစ်ချစ်ခင်ခင် ရင်းရင်းနှီးနှီး သူ့အကျိုးဆောင်၊ ကိုယ့် အကျိုးဆောင်ဖြင့် နေထိုင်သွားမည်ဆိုပါက ဒေသတိုးတက်မှုကို အထောက်အကူ ပြုမည်ဖြစ်ကြောင်း၊ တပ်တွင်း တပ်ပြင် စည်းလုံးညီညွတ်မှုရှိအောင် ကြိုးပမ်းဆောင်ရွက်ရန်လိုကြောင်း၊ ယခု သဘာဝဘေးဒဏ် ကျရောက်ခဲ့ချိန် တွင်လည်း အစိုးရ၊ တပ်မတော်တို့ ပူးပေါင်း၍ ဒေသ၏ အကျိုးများကို ဆောင်ရွက်ပေးခဲ့သည်”ဟု ပြောသည်။

ရခိုင်ပြည်နယ် မုန်တိုင်းသင့်ဒေသများ ပြန်လည်ထူထောင်ရေးအတွက် ဗိုလ်ချုပ်မှူးကြီးမင်းအောင်လှိုင် လေ့လာနေစဉ်

အစိုးရ၊ တပ်မတော်နှင့် ပြည်သူတို့ စည်းလုံးညီညွတ်စွာ ဆောင်ရွက်မည်ဆိုပါက ဒေသတစ်ခုချင်းမှ အစပြု၍ နိုင်ငံ‌တော်ကြီး တစ်ခုလုံး ဖွံ့ဖြိုးတိုးတက်လာမည် ဖြစ်ကြောင်းလည်း ထည့်သွင်း ပြောကြားခဲ့သည်။

နစက ဥက္ကဋ္ဌ အနေဖြင့် ၎င်းတို့၏ တပ်ပိုင်းဆိုင်ရာ ကိစ္စများကို ဆောင်ရွက်နေခြင်းကြောင့် အဆိုပါ ပြောဆိုမှု အပေါ် မှတ်ချက်မပြုလိုကြောင်း ရခိုင်နိုင်ငံရေးသမားတစ်ဦးက ပြောသည်။

ပြင်ပက မီဒီယာများ၊ အခြားအဖွဲ့အစည်းများမှ တပ်ကို စိတ်ဓါတ်ပိုင်းဆိုင်ရာ တိုက်ခိုက်မှုများကို ကျော်လွှားရန် အဓိက လိုအပ်သည်ဟု ပြောဆိုခြင်းဖြစ်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်း ဦးက CNI သတင်းဌာနသို့ ပြောသည်။

နွေဦးတော်လှန်ရေး ကမ်ပိန်းတစ်ခုကိုတွေ့ရစဉ်

၎င်းက “သမိုင်းကြောင်း တစ်လျှောက်မှာ တပ်က အားနည်းသွားတဲ့ အချိန်မျိုးမှာ တိုင်းပြည်ရဲ့ လုံခြုံရေးနဲ့ ကာကွယ်ရေးအပိုင်းမှာ တော်တော်လေး အားနည်းချိနည်းသွားတဲ့ဟာတွေ ရှိတဲ့အခါကြတော့ အခုဆိုရင်လည်း မြန်မာနိုင်ငံအနေနဲ့ ဒီမိုကရက်တစ် သွားနေတဲ့အချိန်မှာ တပ်မတော်က balanced လုပ်ရမယ့် နေရာမျိုးမှာ တော် တော်လေး တောင်းတောင်းတင်းတင်း ခိုင်ခိုင်မာမာ သွားနိုင်ဖို့ လိုအပ်တယ်၊ ဆိုလိုတာကတော့ ပြင်ပက ideology တွေက တပ်ရဲ့ အတွေးအခေါ်ပိုင်းထဲမှာ လာပြီး စိမ့်ဝင်သွားလို့ မရဘူး။ အဲဒါမျိုးက အဓိက စည်းလုံးညီညွတ်မှု ရှိ တယ်ဆိုတဲ့ဟာ ဒါမျိုးတွေကို အဓိကထားပြီး ဦးတည်ပြီးပြောတာ” ဟု ပြောသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က မြန်မာ့တပ်မတော်မှ NLD အစိုးရကို ၂၀၂၀ အထွေထွေ ရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချ၍ နိုင်ငံတော်ကို အရေးပေါ် ကြေညာထားသည်။

ထို့နောက် မြန်မာ့တပ်မ‌တော်အား ပြန်လည်ဖြုတ်ချနိုင်ရေး ဒီမိုကရေစီ အင်အားစုများမှ တော်လှန်တိုက်ခိုက်မှု များလည်း ရှိနေသလို တပ်တွင်းပြိုကွဲရေးကိုလည်း လုပ်ဆောင်နေကြကြောင်း နိုင်ငံရေးသုံးသပ်သူများက ပြော သည်။ 

CNI News

၂၀၂၃ ခုနှစ်၊ ဇူလိုင် ၁၀

ကချင်လွတ်လပ်ရေးတပ်မတော် (KIA) နှင့် ပြည်သူ့ကာကွယ်ရေးတပ် (PDF) တို့ ပူးပေါင်းနေမှုကို ဖိအားပေးလို၍ မြန်မာ့တပ်တော်မှ KIA ဌာနချုပ် လိုင်ဇာမြို့အနီးကို တိုက်ခိုက်ခြင်း ဖြစ်နိုင်ကြောင်း မြန်မာ့နိုင်ငံရေး လေ့လာသုံး သပ်သူ ဦးရဲထွန်းက CNI သတင်းဌာနသို့ ပြောသည်။

KIA အနေဖြင့် PDF များနှင့် ပူးပေါင်းကာ စစ်ကိုင်းတိုင်းဖက်ကို ထိုးဖောက် ဝင်ရောက်လာကြောင်း၊ ထို့ကြောင့် စစ်ရေးဖြင့် ဖိအားပေးခြင်း ဖြစ်နိုင်ကြောင်း ၎င်းက ပြောသည်။

ဦးရဲထွန်းက “အခုကတော့ ကာကွယ်ရေးဦးစီးချုပ်ကိုယ်၌က နိုင်ငံတော်အကြီးအကဲ တာဝန်ယူထားတော့ သူက ဆုံးဖြတ်တာတော့ တပ်ကတော့ ဖြေရဲမှာတော့ မဟုတ်ဘူးပေါ့နော်၊ ဘာကြောင့် ဟိုဟာ (တိုက်ခိုက်) လုပ်တယ်ဆို တာတော့ ပြောဖို့ခက်တယ်၊ ဖိအားပေးချင်တာ တစ်ခုတော့ သေချာတာပေါ့နော်၊ KIA က PDF တွေနဲ့ ပူးပေါင်းပြီး တော့ မြန်မာနိုင်ငံ အထက်ပိုင်းပေါ့၊ စစ်ကိုင်းတိုင်းတို့ ဘာတို့ကို ဝင်ရောက် ထိုးဖောက်ပြီးတော့ တိုက်နေတာ တိုက်ခိုက်နေတာကိုး၊ တိုက်ခိုက်နေတော့ ဒီဖက်က အရှေ့မြောက်ဖက်က TNLA တို့၊ MNDAA တို့နဲ့ ပူးပေါင်းပြီး တော့ ထိုးဖောက်လာတဲ့ PDF တွေကိစ္စကတော့ တရုတ်ကနေတဆင့် ပြောလိုက်တော့ ဟိုအဖွဲ့တွေကလည်း နား ထောင်တယ်၊ နားထောင်ပုံရပါတယ်၊ ပြီးတော့ အဲဒီထဲမှာတော့ တိုက်ပွဲတွေက နည်းနည်းအေးသွားတော့ အေးသွား တာ တွေ့ရတယ်၊ KIA ဖက်ကိုကြတော့ တရုတ်ရဲ့ဟာကို နားမထောင်လို့များ စစ်ရေးနဲ့ ဖိအားပေးသလားပေါ့နော်” ဟု CNI သတင်းဌာနသို့ ပြောသည်။

KIA တပ်ဖွဲ့ကို တွေ့ရစဉ်

KIA သည် စစ်ကိုင်းတိုင်းဒေသကြီးအတွင်းရှိ ပြည်သူ့ကာကွယ်ရေးတပ်ဖွဲ့(PDF)၊ ဒေသခံကာကွယ်ရေးတပ်ဖွဲ့(LDF) တို့ကို စစ်သင်တန်းများပေးခြင်း၊ လက်နက်နှင့် ခဲယမ်းများ ထောက်ပံ့ခြင်း၊ ပူးပေါင်း စစ်ဆင်ရေးများလုပ်ဆောင် ခြင်း၊ လက်နက်ခဲယမ်းများ ရောင်းချပေးခြင်းတို့ လုပ်နေကြောင်း ဒေသခံများက ပြောသည်။

ပြီးခဲ့သည့် ဇူလိုင် ၁ ရက်နေ့က စတင်၍ မြန်မာ့တပ်မတော်နှင့် KIA တို့ နမ့်ဆန်ယန်တွင် တိုက်ပွဲဖြစ်ပွားခဲ့ပြီး လက်ရှိအချိန်ထိ နှစ်ဖက်စစ်ရေး တင်းမာနေကြောင်း သိရသည်။

တိုက်ပွဲဖြစ်ပွားမှု အခြေအနေများကို သိရှိနိုင်ရေး KIA မှ ပြန်ကြားရေးတာဝန်ခံ ဗိုလ်မှူးကြီးနော်ဘူကို CNI က ဆက်သွယ်ခဲ့သော်လည်း ဆက်သွယ်၍ မရသေးပေ။

လက်ရှိတွင် နှစ်ဖက်စစ်ရေး ငြိမ်နေကြောင်း၊ မြန်မာ့တပ်မတော်ဘက်က စစ်အင်အား ဖြည့်လာသည့်အတွက် တိုက်ပွဲ ပိုပြင်းထန်လာမှာကို စိုးရိမ်ကြောင်း ကချင်ပြည်နယ်မှ ဒေသခံတစ်ဦးက CNI သတင်းဌာနသို့ ပြောသည်။

KIA ခေါင်းဆောင်တစ်ဦးဖြစ်သူ ဗိုလ်ချုပ်ဂွမ်မော်ကို တွေ့ရစဉ်

၎င်းက “အခုကတော့ နည်းနည်းငြိမ်နေတဲ့ သဘော၊ ငြိမ်နေတဲ့ သဘောဆိုတာက ဗမာစစ်တပ်ဖက်က မတိုးရင် တော့ သူတို့ကတော့ ငြိမ်နေတာပဲ၊ ဒီဖက်က ထိုးစစ်မရှိရင်တော့ ငြိမ်တာပေါ့၊ အဲဒါကြောင့် အများအားဖြင့် သူတို့ အခု ဗန်းမော်က တက်လာတဲ့ဟာရယ်၊ မြစ်ကြီးနားက တက်လာတဲ့ဟာရယ် သူတို့ နည်းနည်း စုပြုံလာပြီးဆိုရင် တော့ တစ်ခါတည်း အလုံးအရင်းနဲ့ တက်လာမလားပေါ့၊ အဲဒါတက်လာပြီဆိုရင် လေယာဉ်ပျံလည်း လာမယ်ထင် တာပဲ၊ ဟိုတနေ့ညကတော့ ဗုံးလာကြဲတယ် ပြောတယ်၊ လောလောဆယ်တော့ KIA ဖက်က ထိုင်ထားတယ်၊ သူတို့ (မြန်မာတပ်မတော်) ကတော့ အောင်ဂျာဆိုတဲ့ဟိုဖက် နမ့်ဆန်ချောင်းရဲ့ ဟိုးဖက်ကမ်းကုန်းပေါ့၊ အဲဒီကုန်းမှာ အရင် ကတည်းက သူတို့ ထိုင်တဲ့ဟာ၊ အဲဒီ အောင်ဂျာမှာကြတော့ ဗမာစစ်တပ်ထိုင်တာ အခု ဗမာစစ်တပ်က အဲဒီဖက်မှာ နည်းနည်းစုနေတာ ထင်တယ်၊ အဲဒီမှာရော လွယ်မောက်ဆိုတဲ့ဟာ အဲဒီမှာ လွယ်မောက်မှာ မနေ့တနေ့က ရွာထိပ် မှာ မိုင်းခွဲလို့ဆိုလား ရွာသွားတွေကိုလည်း အကုန်လုံးစုပြုံပြီးတော့ ခေါ်ထားတယ်လို့ ကြားတယ်” ဟု ပြောသည်။

တိုက်ပွဲများ ဆက်လက် မပြင်းထန်လာရေး နှစ်ဖက် အဖွဲ့အစည်းအနေဖြင့် ညှိနှိုင်းစေလိုကြောင်း၊ ယခင်တိုက်ပွဲ များကြောင့် နေရပ်မပြန်နိုင်သည့် တိုက်ပွဲရှောင်များလည်း ရှိနေသေးကြောင်း အထက်ပါ ဒေသခံက ပြောသည်။

လက်ရှိ တိုက်ပွဲဖြစ်ပွားနေသော နမ့်ဆန်ယန်ကျေးရွာသည် မြစ်ကြီးနား– ဗန်းမော် လမ်းမပေါ်တွင် တည်ရှိပြီး KIA ၏ဌာနချုပ်နှင့် အနီးဆုံးကျေးရွာဖြစ်ကြောင်း၊ ၁၀ မိုင်ခန့်သာ ကွာဝေးကြောင်း သိရသည်။

CNI News

၂၀၂၃ ခုနှစ်၊ ဇူလိုင် ၈

အဆိုတော် လီလီနိုင်ကျော်ကို လုပ်ကြံသတ်ဖြတ်ခဲ့သူ  ကောင်းဇာနည်ဟိန်း(ခ)လပြည့်နှင့် ကျော်သူရ(ခ)အီးတီ တို့နှစ်ဦးသည် ဇူလိုင် ၆ ရက်နေ့ ညပိုင်းက သက်သေခံပစ္စည်းများ သွားရောက်ရှာဖွေစဉ် ထွက်ပြေး၍ လုံခြုံရေး တပ်ဖွဲ့ဝင်များက ပစ်ခတ် ဖမ်းဆီးခဲ့သည်။

သို့သော် ပစ်ခတ် ဖမ်းဆီးမှုကြောင့် ရရှိခဲ့သော ဒဏ်များကြောင့် သေဆုံးသွားခဲ့ကြောင်း သိရသည်။

အဆိုတော် လီလီနိုင်ကျော်သည် ရန်ကုန်တိုင်းဒေသကြီး၊ ရန်ကင်းမြို့နယ်၊ အမှတ်(၂)ရပ်ကွက်၊ ရန်အောင်လမ်း ရှိ နေအိမ်သို့ ပြန်လာစဉ် ၂၀၂၃ ခုနှစ်၊ မေလ ၃၀ ရက်နေ့ ညပိုင်းတွင် အမျိုးသားတစ်ဦးက သေနတ်ဖြင့် ပစ်ခတ်၍ လုပ်ကြံသတ်ဖြတ်သွားခဲ့သည်။

လုပ်ကြံသတ်ဖြတ်ခံရသည့် လီလီနိုင်ကျော် ရုပ်အလောင်းကိုတွေ့ရစဉ်

ထို့နောက် အဆိုတော်လီလီနိုင်ကျော်ကို လုပ်ကြံသတ်ဖြတ်ခဲ့သူ ကောင်းဇာနည်ဟိန်း(ခ)လပြည့်နှင့် ကျော်သူရ (ခ)အီးတီတို့နှစ်ဦးကို ကမာရွတ်မြို့နယ်အတွင်းရှိ အမျိုးသား အဆောင်တစ်ခုမှာ ဇွန်လ ၆ ရက်နေ့က ဖမ်းဆီးရ မိခဲ့သည်။

ထို့နောက် ကောင်းဇာနည်ဟိန်းနှင့် ကျော်သူရတို့၏ ထွက်ဆိုချက်ကြောင့် ၂၉ ရပ်ကွက်၊ ဒဂုံမြို့သစ်( မြောက်ပိုင်း)၊ မောင်းမကန်လမ်းဘေး အနီးရေမြောင်းတွင် သိုဝှက်ထားသော လက်နက်၊ ခဲယမ်းနှင့် ဖောက်ခွဲ ရေးပစ္စည်းများ ရှာဖွေနေစဉ် ထွက်ပြေး၍ လုံခြုံရေးတပ်ဖွဲ့က သေနတ်ဖြင့် ပစ်ခတ် ဖမ်းဆီးခဲ့သည်။

အဆိုပါ ပစ်ခတ်ဖမ်းဆီးမှုတွင် ဒဏ်ရာအသီးသီး ရရှိ၍ အခင်းဖြစ်ပွားရာ နေရာတွင် သေဆုံးသွားကြောင်း သိရသည်။

CNI News

၂၀၂၃ ခုနှစ်၊ ဇူလိုင် ၈

ရခိုင်လူထုကို ကိုယ်စားပြု၍ လှုပ်ရှားနေသည့် ရခိုင်လက်နက်ကိုင်များအနက် နောက်ဆုံးတွင် လူထုထောက်ခံ သည့် အဖွဲ့အစည်းက ရှင်သန်ကျန်ရစ်နေမည်ဖြစ်ကြောင်း ရခိုင်အမျိုးသားကွန်ယက်မှ ဥက္ကဋ္ဌ ဦးတင်ထူးအောင်က CNI သတင်းဌာနသို့ ပြောသည်။

လက်နက်ကိုင် အဖွဲ့အစည်းများအနေဖြင့် လူထုအတွက် အလုပ်လုပ်ရခြင်းဖြစ်ကြောင်း၊ ပကတိ အရှိတရားအရ လူထုထောက်ခံသည့် အဖွဲ့အစည်းက အသာရလေ့ရှိကြောင်း ၎င်းက ပြောသည်။

ဦးတင်ထူးအောင်က “လက်နက်ကိုင် အဖွဲ့အစည်းဆိုတာကတော့ လူထုထောက်ခံမှု ရရတယ်၊ လူထုနဲ့ အနီးစပ်ဆုံး ပေါ့နော်၊ လူထုကို ဦးတည်ထားတဲ့ လူထုတပ်မတော်ဖြစ်တဲ့ လက်နက်ကိုင် အဖွဲ့အစည်းကတော့ နောက်ဆုံးမှာ တော့ ရှင်သန်ကျန်ရစ်မှာပဲ ဒါကတော့ ဒါရှေ့က အစဉ်အလာတွေကရော လက်ရှိ ဖြစ်ပျက်မှုတွေအရရော အနာဂတ်မှာ ဖြစ်တည်လာမယ့် အနေအထား အရရောပေါ့နော် ကျနော်တို့ကတော့ ဒီလိုမြင်တယ်၊ ဘယ်သူက လူထုအတွက် အလုပ်လုပ်ပြီးတော့ လူထုထောက်ခံမှု ပိုရသလဲ ဆိုတဲ့အချက်ကတော့ အချက်ကတော့ သူ့ရဲ့ ရှင်သန်မှုအပေါ် မူတည်လိမ့်မယ် ဒါက တစ်ချက်ပေါ့နော်၊ နောက်ပြီးတော့ ဒီဟာနဲ့ ပတ်သက်ပြီးတော့ ကျနော် ခုနက ပြောသလိုပဲပေါ့နော် အဓိက လက်နက်ကိုင်အဖွဲ့အစည်း အချင်းချင်းရဲ့ ပဋိပက္ခမှသည် လူထုပဋိပက္ခဆီသို့ ဆိုတဲ့ဟာ ဖြစ်မသွားဖို့ အရေးကြီးတယ်ပေါ့နော်” ဟု CNI သတင်းဌာနသို့ ပြောသည်။

လက်ရှိတွင် ရခိုင်လက်နက်ကိုင် အဖွဲ့အစည်းများ အနေဖြင့် ရက္ခိုင့်တပ်တော် (ULA/AA)၊ ရခိုင်ပြည်လွတ်မြောက် ရေးပါတီ(ALP)နှင့် ရခိုင်အမျိုးသားကောင်စီ (ANC/AA) တို့ လှုပ်ရှားလျက်ရှိသည်။ 

၂၀၁၆ ခုနှစ်က  KIA ဒုတိယဌာနချုပ် မိုင်ယန်ဂျာမှာ ALP မှ ဒေါ်စောမြရာဇာလင်းနဲ့ ကိုယ်စားလှယ် အဖွဲ့ကို တွေ့ရစဉ်

သို့သော် ALP နှင့် ULA/AA တို့သည် ရခိုင်ပြည်နယ်တွင် လှုပ်ရှားမှုများ ရှိနေပြီး မိုခါမုန်တိုင်းအလွန် ပြန်လည် ထူထောင်ရေး လုပ်ငန်းများတွင် ကူညီမှုများလည်း ရှိနေသည်။ 

ထိုသို့ မိုခါမုန်တိုင်းအလွန် ပြန်လည်ထူထောင်ရေး လုပ်ငန်းများ လုပ်ဆောင်ရာမှာလည်း ALP နှင့် AA ကြား လူထု စည်းရုံးမှု ပိုမိုရရှိရေး အားပြိုင်နေကြသည်။

ထို့နောက် ပြီးခဲ့သည့် ဇူလိုင်လ အစောပိုင်းက ALP ဒုဥက္ကဋ္ဌ ခိုင်နီရောင်၊ အမှတ်(၁၀၁) တပ်ရင်းမှူးနှင့် ရဲဘော် တစ်ဦး ရခိုင်ပြည်နယ်၊ စစ်တွေမြို့မှာ လုပ်ကြံခံရပြီးနောက် အပြန်အလှန် စွပ်စွဲမှုများဖြစ်လာကာ နှစ်ဖက် အဖွဲ့အစည်းကြား မသင့်မြတ်မှု ကြီးမားလာခဲ့သည်။

ရခိုင်ဒေသခံတစ်ဦးက “ထောက်ခံမှုတွေကတော့ ULA/AA ကတော့ ဒီဖက်မှာကတော့ လိုက်ကြည့်မှုတွေ၊ ထောက်ပံ့မှုတွေများတာတွေ နောက်ရခိုင်လူထုရဲ့ ခံစားချက်ထဲမှာတော့ ALP နဲ့ ULA/AA အပေါ်မှာတော့ ULA/AA အပေါ်မှာပဲ ယုံကြည်မှုနဲ့ ထောက်ခံချက်တွေ များနေတာတော့ တွေ့နေရတယ်၊ လူထုအ‌ပေါ်မှာတော့ သူတို့ လုပ် ဆောင်နိုင် မှုတွေလည်း ပါတယ်။ နောက်ပြီးတော့ သူတို့ ရခိုင်လူထုအပေါ်မှာ သိတတ်နေမှုတွေပါတယ်၊ လုပ် ဆောင်နိုင်မှုတွေ ပါတယ်။ ALP အနေနဲ့ကတော့ မြို့ပေါ်တွေမှာတော့ ကျနော်တို့ ကြားမိတာတော့ ရှိတယ်၊ ကျေး လက်တွေမှာတော့ လှုပ်ရှားမှုတွေတော့ ဘာမှ မရှိဘူး။ နောက်ပြီးတော့ ယုံကြည်ချက်ကတော့ လူထုများများက တော့ ULA/AA အပေါ်မှာ ယုံကြည်မှု များနေတာတော့ တွေ့ရတယ်” ဟု ပြောသည်။

၂၀၁၆ ခုနှစ်က  KIA ဒုတိယဌာနချုပ် မိုင်ယန်ဂျာမှာ AA နဲ့ ALP ခေါင်းဆောင်များကို တွေ့ရစဉ်

ရခိုင်လူထုများအနေဖြင့် အားကိုးအားထိုက်လောက်သည့် လက်နက်ကိုင်တပ်ဖွဲ့ကို လိုချင်ကြကြောင်း၊ လက်ရှိတွင် ပေးဆပ်မှုများနေသည့် ULA/AA အား ရခိုင်လူထုက အားသာချက် ပိုများနေကြောင်း ၎င်းက ပြောသည်။

ALP သည် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) လက်မှတ်ရေးထိုးထားပြီး ULA/AA နှင့် ANC/AA တို့သည့် မြန်မာ့တပ်မတော်နှင့် တိုက်ပွဲဖြစ်ပွားနေသည့် ရခိုင်လက်နက်ကိုင်တပ်ဖွဲ့ ဖြစ်သည်။

CNI News

၂၀၂၃ ခုနှစ်၊ ဇူလိုင် ၇ 

ဖက်ဒရယ်ပြည်ထောင်စု နိုင်ငံအဖြစ် တည်ဆောက်ရန် ကြိုးပမ်းနေသည့် မြန်မာနိုင်ငံတွင် မြန်မာနှင့် ဗမာလူမျိုးမှာ အတူတူလား သို့မဟုတ် သက်သက် ကွဲပြားသလားဆိုသည့်အပေါ် အငြင်းပွားမှုများ ရှိနေသည်။

လက်ရှိတွင် မြန်မာနိုင်ငံကို ဗမာနိုင်ငံ သို့မဟုတ် မြန်မာနိုင်ငံဟု အမျိုးမျိုး ခေါ်ဝေါ်မှုများရှိနေသလို ဗမာလူမျိုးနှင့် မြန်မာလူမျိုးဟုလည်း ခေါ်ဝေါ်သုံးစွဲမှုများ ရှိနေသည်။

ယခင် အင်္ဂလိပ်ခေတ်က ဗမာဆိုသည်ကို တိုင်းပြည်ဟု ဖြစ်သွားကြောင်း၊ သို့သော်လည်း နောက်ပိုင်းတွင် ပြောင်း လဲ ခေါ်ဝေါ်လာခဲ့ကြောင်း တိုင်းရင်းသားလက်နက်ကိုင် ခေါင်းဆောင်တစ်ဦးဖြစ်သူ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

ဗိုလ်မှူးကြီး ခွန်ဥက္ကာက “ကျနော်ထင်တာတော့ ကျနော်တို့ အင်္ဂလိပ်က အုပ်ချုပ်တဲ့အချိန်မှာ အင်္ဂလိပ်က Burma လို့ ခေါ်တာ၊ အဲဒီ Burma က တိုင်းပြည် နာမည်ဖြစ်ပြီးတော့ အဲဒီတုန်းကတော့ ပုဂံကျောက်စာတို့မှာ ရေးတာက တော့ မြန်မာလို့ ရေးတာတော့ ရှိတယ်ဗျ၊ မရရစ်၊ မနှစ်လုံးဆင့်ပေါ့၊ အဲဒီလိုရေးတဲ့ ကျောက်စာမှာ စာတွေ တွေ့ရ တယ်၊ အဲဒါကြောင့် မြန်မာက အရင်တုန်းကတော့ လူမျိုးဖြစ်ပြီးတော့ Burma ဗမာဆိုတာ တိုင်းပြည်လိုဖြစ်သွား တယ်၊ အင်္ဂလိပ်ခေတ်မှာ။ သို့သော် နောက်ပိုင်းမှာ အဲဒါကို ပြောင်းပြန်လုပ်ပြီးတော့ တစ်ခါ မြန်မာက တိုင်းပြည် ဗမာက လူမျိုးဆိုပြီး ပြန်ဖြစ်လာတယ်။ ဘယ်လိုပဲဖြစ်ဖြစ် စကားကတော့ လက်ရှိသုံးနေတဲ့ Burmese၊ Burma  ပေါ့လေ၊ အဲဒီဟာကတော့ ကျနော်တို့ ဘာသာဗေဒအရ ပြောရင်တော့ အဲဒီအုပ်စုက Burma ပေါ့ဗျာ၊ Burmese language ပေါ့၊ အဲဒီလိုတော့ ခေါ်လို့ ရမယ်ထင်တယ်” ဟု ပြောသည်။

 ဒေါ်အောင်ဆန်းစုကြည်ကို တွေ့ရစဉ်

ဗမာ ဟူသော စကားလုံးသည် အင်္ဂလိပ်လက်ထက်က နိုင်ငံတစ်ဝှမ်းရှိ ရှမ်း၊ ကချင်၊ ကရင်၊ ချင်း၊ မွန်၊ ရခိုင် စသော လူမျိုးစု အားလုံးကို ကိုယ်စားပြုကြောင်း၊ ထို့နောက် ဗိုလ်ချုပ်ကြီး နေဝင်းခေတ်မှ စတင်ကာ ပြောင်းပြန်လုပ်၍ ဗမာသည် လူမျိုး၊ မြန်မာသည် နိုင်ငံဟု ခေါ်ဆိုခဲ့ကြောင်း သိရသည်။

ဗမာနှင့် မြန်မာသည် အတူတူလားဆိုသည့် ကိစ္စကို တော်လှန်ရေးကာလပြီးဆုံးမှသာ ဖြေရှင်းရမှာဖြစ်ကြောင်း၊ လက်ရှိအချိန်တွင် ၎င်းကိစ္စအား ငြင်းခုံရမည့်အချိန် မဟုတ်ကြောင်း တော်လှန်ရေးအင်အားစုနှင့် နီးစပ်သူတစ်ဦး က ပြောကြားထားသည်။

ဒေါ်အောင်ဆန်းစုကြည်က “အကြောင်းပြချက်ကြီးက မခိုင်လုံဘူး၊ မခိုင်လုံဘူးဆိုတာ Burma ဆိုတာ မြန်မာလူမျိုး တွေကို ဦးတည်တာဖြစ် တယ်တဲ့ မြန်မာဆိုတာက တိုင်းရင်းသားတွေအားလုံးပါတယ်တဲ့၊ အဲဒါလည်း မမှန်ပါဘူး မြန်မာဆိုတာဟာ ဗမာကို စာပေသဘောတရားအရ မြန်မာလို့ရေးတာ၊ ဒါပေမဲ့ မြန်မာဆိုတာဟာ ဗမာပါပဲ။ မြန်မာဆိုတာ တိုင်းရင်းသား အားလုံးပါ ဝင်တယ်ဆိုတာ ဒါမဟုတ်ပါဘူး”ဟု ဂျပန်နိုင်ငံမှာ မြန်မာနိုင်ငံသားများနှင့် တွေ့ဆုံစဉ် ပြောကြားခဲ့သည်။

မြန်မာနှင့် ဗမာသည် အတူတူဖြစ်သည်ဟု ဂျပန်နိုင်ငံသို့ ဒေါ်အောင်ဆန်းစုကြည် ရောက်ရှိခဲ့စဉ်က ပြောကြားထား ကြောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။

ဖက်ဒရယ်ပြည်ထောင်စု တည်ဆောက်ရေး ဆွေးနွေးကြစဉ်

ဦးဖေသန်းက “ဒေါ်အောင်ဆန်းစုကြည် ဂျပန်မှာ ရောက်တုန်းက ပြောခဲ့တာဗျ၊ အဲဒါလည်း ဗမာနဲ့ မြန်မာဟာ အတူတူပဲဆိုပြီးတော့လေ၊ ဒီတော့ မြန်မာဆိုတာကတော့ ဗမာဆိုတဲ့စကားနဲ့ မြန်မာဆိုတဲ့စကားက အတူတူပဲလို့ ဒေါ်အောင်ဆန်းစုကြည်လည်း ပြောခဲ့ဖူးတယ်၊ မြန်မာစာ၊ ဗမာစာ အတူတူပါပဲဗျာ၊ ဒါတွေကတော့ ကျနော်တို့ အတွက် သိပြီးသားပါ၊ ဒါပေမဲ့ မြန်မာဆို နည်းနည်း နားဝင်ချိုတာပေါ့၊ အဲဒီလောက်ပဲ ရှိတာပါ” ဟု ပြောသည်။

မြန်မာ့လွတ်လပ်‌ရေး ကြိုးပမ်းကြရာတွင် တခန်းတကဏ္ဍအဖြစ် ပါဝင်၍ ထင်ရှား‌ပေါ်လွင်ခဲ့‌သော တို့ဗမာအစည်း အရုံးကြီးသည် သက္ကရာဇ် ၁၂၉၂ ခုနှစ်တွင် ပေါ်ပေါက်ခဲ့ပြီး လွတ်လပ်ရေးကြိုးပမ်းစဉ် ကာလတလျှောက်လုံး ‘သခင် မျိုးဟေ့ တို့ဗမာ’၊ ‘ဗမာပြည်သည် တို့ပြည်’၊ ‘ဗမာစာသည် တို့စာ’၊ ‘ဗမာစကားသည် တို့စကား’ စသဖြင့် ကြွေးကြော်ခဲ့သည်ကို တွေ့ရသည်။

လက်ရှိတွင် ဗမာပြည်နှင့် မြန်မာပြည်၊ ဗမာစာနှင့် မြန်မာစာ၊ ဗမာစကားနှင့် မြန်မာစကားသည် အတူတူလား ဆိုသည်ကို ငြင်းခုံလျက်ရှိသလို ဗမာပြည်နှင့် မြန်မာပြည်သည်လည်း မည်သည့် အသုံးအနှုန်းက နိုင်ငံတစ်ဝှမ်း လူမျိုးစုများ အားလုံးကို ကိုယ်စားပြုသည်ဆိုသည်မှာ အတိအကျ ဖော်ပြထားခြင်း မရှိသည်ကို တွေ့ရသည်။

CNI News

၂၀၂၃ ခုနှစ်၊ ဇူလိုင် ၆

အာဆီယံ တူညီဆန္ဒ(၅)ချက်ထဲက အားလုံးပါဝင်သည့် ဆွေးနွေးပွဲများ ကျင်းပရေးနှင့် လူသားချင်း စာနာထောက် ထားမှုဆိုင်ရာ ကူညီထောက်ပံ့မှုများ ပေးအပ်ရေးတို့ကို ဆောင်ရွက်လျက်ရှိကြောင်း နစက၏ နိုင်ငံခြားရေးဝန်ကြီး ဦးသန်းဆွေက ပြောသည်။

၂၀၂၃ ခုနှစ်၊ ဇူလိုင် ၆ ရက်နေ့က ရန်ကုန်မြို့မှာ နိုင်ငံတကာသံတမန်များနှင့် တွေ့ဆုံစဉ် ၎င်းက အထက်ပါအတိုင်း ပြောကြားခဲ့ခြင်း ဖြစ်သည်။

ဦးသန်းဆွေက “ အာဆီယံတူညီဆန္ဒ(၅)ချက် ဖော်ဆောင်ရာတွင် အရေးကြီးဆုံး အချက်များဖြစ်သည့် အကြမ်း ဖက်မှုများ ရပ်တန့်ရေး၊ အားလုံးပါဝင်သည့် ဆွေးနွေးပွဲများ ကျင်းပရေးနှင့် လူသားချင်း စာနာထောက်ထားမှု ဆိုင်ရာ ကူညီထောက်ပံ့မှုများ ပေးအပ်ရေးတို့ကိုလည်း ဆောင်ရွက်လျက်ရှိတယ်”ဟု ပြောသည်။

အိန္ဒိယသံအမတ်ကြီးနဲ့ တရုတ်သံတမန်ကို PDF များရဲ့ တိုက်ခိုက်ခံရမှုကို ဦးချမ်းအေးက ရှင်းပြနေစဉ်

ထို့နောက် PDF များ၏ တိုက်ခိုက်မှုကြောင့် အပြစ်မဲ့ပြည်သူ ၅၉၃၈ ဦး (အရပ်သား ၄၈၇၈ ဦးနှင့် အစိုးရဝန်ထမ်း ၁၀၆၀ ဦး)ကျော် ထိခိုက်သေဆုံးခဲ့ကြောင်း၊ PDF သည် အဖျက်အမှောင့် လုပ်ငန်းများ ကျူးလွန်နေသလို ဒီမိုက ရေစီ ဖော်ဆောင်ရေးလုပ်ငန်းစဉ်များအား အဟန့်အတားဖြစ်အောင် လုပ်ဆောင်နေကြောင်း၊ ၎င်းတို့၏ ဥပဒေ ပြင်ပ လုပ်ရပ်များမှ ပြည်သူများအား ကာကွယ်ရန် အစိုးရအနေဖြင့် PDF များကို တုံ့ပြန်ဆောင်ရွက်ရခြင်း ဖြစ် ကြောင်း ၎င်းက ပြောသည်။

မြန်မာနိုင်ငံသည် ပထဝီနိုင်ငံရေးအရ သက်ရောက်မှုများနှင့် သတင်းမီဒီ ယာ စစ်ပွဲဆိုင်ရာ စိန်ခေါ်မှုများကို ရင်ဆိုင် နေရကြောင်း၊ သို့သော်လည်း တရားဥပဒေစိုးမိုးရေး ဆောင်ရွက်ခြင်း၊ ငြိမ်းချမ်း၍ အများပါဝင်နိုင်သော နိုင်ငံရေး လုပ်ငန်းစဉ် ဖော်ဆောင်ခြင်းတို့ဖြင့် ကြိုးပမ်းနေကြောင်း နိုင်ငံခြားရေးဝန်ကြီး ဦးသန်းဆွေက ပြောသည်။

နိုင်ငံတကာ သံတမန်များကိုတွေ့ရစဉ်

လက်ရှိ မြန်မာနိုင်ငံတွင် မြန်မာ့တပ်မတော်ကို ဖြုတ်ချရေး အမျိုးသားညီညွတ်ရေးအစိုးရ(NUG)က ပြည်သူ့ ကာကွယ်ရေးတပ်ဖွဲ့(PDF)ကို ဖွဲ့စည်း၍ လက်နက်ကိုင် တိုက်ခိုက်လျက်ရှိသလို တိုင်းရင်းသား လက်နက်ကိုင် အဖွဲ့အစည်း တချို့ကလည်း အရပ်သားများကို စစ်ပညာသင်ကြားပေးကာ လက်နက်ကိုင်တပ်ဖွဲ့များ ဖွဲ့စည်းပေး ကာ တိုက်ခိုက်လျက်ရှိနေသည်။

ထို့ကြောင့် မြန်မာနိုင်ငံ၏ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ တနင်္လာရီတိုင်းဒေသကြီး၊ ချင်းပြည် နယ်၊ မွန်ပြည်နယ်၊ ကယားပြည်နယ် တို့တွင် တိုက်ပွဲများဖြစ်ပွားနေသည်။

အလားတူ မြန်မာ့တပ်မတော်ဘက်က NUG၊ PDF ကို အကြမ်းဖက် အဖွဲ့အစည်းများအဖြစ် ကြေညာ၍ ငြိမ်းချမ်း ရေး ဆွေးနွေးပွဲများ ဖိတ်ခေါ်ရာမှာ ချန်ထားသလို NUG၊ PDF ကလည်း မြန်မာ့တပ်မတော်အား အကြမ်းဖက် အဖွဲ့အစည်းအဖြစ် ကြေညာကာ သွေးကြွေးမှာ ဆွေးနွေးစရာ မရှိဟု ကြွေးကြော်ထားသည်။

အဆိုပါ အခြေအနေများကြောင့် အားလုံးပါဝင်သည့် တွေ့ဆုံဆွေးနွေးရေး အခင်းအကျင်းတစ်ရပ် ပေါ်ပေါက်လာ ရန် အခက်အခဲဖြစ်နေသည်ဟု ပြည်တွင်းရှိ နိုင်ငံရေးပါတီများနှင့် နိုင်ငံရေးသမားများက ပြောသည်။

CNI News

၂၀၂၃ ခုနှစ်၊ ဇူလိုင် ၆

စစ်ရေးနှင့် နိုင်ငံရေး အကျပ်အတည်းဖြစ် ရင်ဆိုင်နေရချိန်မှာပဲ မွန်ပြည်သစ်ပါတီ(NMSP)သည် နစက၏ နိုင်ငံတော်ငြိမ်းချမ်းရေးဆွေးနွေးရေးအဖွဲ့နှင့် နေပြည်တော်မှာ ဇူလိုင် ၅ ရက်နေ့က တွေ့ဆုံ၍ ဆွေးနွေးခဲ့သည်။

အဆိုပါ တွေ့ဆုံပွဲသို့ မွန်ပြည်သစ်ပါတီ(NMSP)၏ ဒုဥက္ကဋ္ဌ နိုင်အောင်မင်း၊ ဗဟိုအလုပ်အမှုဆောင်ကော်မတီဝင် နိုင်အောင်မငေး၊ နိုင်ဗညားလယ်တို့ တက်ရောက်ခဲ့ပြီး နစကဘက်က နစကအဖွဲ့ဝင် NSPNC ဥက္ကဋ္ဌ ဒုတိယဗိုလ် ချုပ်ကြီး ရာပြည့်၊ နစကအဖွဲ့ဝင် ဒုတိယဗိုလ်ချုပ်ကြီး မိုးမြင့်ထွန်း၊ NSPNC အတွင်းရေးမှူး ဒုတိယဗိုလ်ချုပ်ကြီး ဝင်းဗိုလ်ရှိန်တို့ တက်ရောက်ခဲ့သည်။

ထို့နောက် တွေ့ဆုံ ဆွေးနွေးပွဲကို ဇူလိုင် ၆ ရက်နှင့် ၇ ရက်နေ့များတွင် ဆက်လက် ကျင်းပလျက်ရှိသည်။

လက်ရှိတွင် မွန်ပြည်သစ်ပါတီ(NMSP)သည် ၎င်းလှုပ်ရှားနေသည့် မွန်ပြည်နယ်၊ ကရင်ပြည်နယ်၊ တနင်္လာရီ တိုင်းဒေသကြီးအတွင်းမှာ ကရင်အမျိုးသားအစည်းအရုံး(KNU)နှင့် ပြည်သူ့ကာကွယ်ရေးတပ်ဖွဲ့(PDF)တို့က စစ်ရေးလှုပ်ရှားမှု အရှိန်မြင့်လာခြင်းကြောင့် စစ်ရေး၊ နိုင်ငံရေး အကျပ်အတည်းများဖြင့် ရင်ဆိုင်နေရသည်။

 မွန်ပြည်သစ်ပါတီ ကိုယ်စားလှယ်များကို တွေ့ရစဉ်

အလားတူ မွန်ပြည်နယ်အတွင်း မွန်လက်နက်ကိုင်အဖွဲ့အသစ်များလည်း ပေါ်ပေါက်လာနေသလို KNU က တပ်မဟာ(၈) ကို မွန်ပြည်နယ်၊ ရေးမြို့နယ်မှာ ဖွဲ့စည်းရန် ပြင်ဆင်လျက်ရှိခြင်းကြောင့် ဒေသတွင်း မတည်ငြိမ်မှု များ ပိုမိုဖြစ်ပေါ်လာမည်ကို မွန်ပြည်သစ်ပါတီ(NMSP)က စိုးရိမ်နေသည်။

မွန်ပြည်သစ်ပါတီ(NMSP)ဥက္ကဋ္ဌ နိုင်ဟံသာကတော့ မြန်မာ့တပ်မတော်ကို တော်လှန်တိုက်ခိုက်နေသည့် တိုင်းရင်းသား လက်နက်ကိုင် အဖွဲ့အစည်း အားလုံးက တပြိုင်တည်း တိုက်ခိုက်မှုလုပ်လာမည်ဆိုပါက မိမိတို့ လည်း ပါဝင် တိုက်ခိုက်မှုလုပ်မည်ဟု ပြီးခဲ့သည့် ရက်ပိုင်းအတွင်းက မွန်သတင်းအေဂျင်စီကို ပြောထားသည်။

မွန်ပြည်သစ်ပါတီ(NMSP)သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ် ရေးထိုးထားသည့် လက်နက်ကိုင်အဖွဲ့ဖြစ်ပြီး ဒေသတွင် တည်ငြိမ်ရေးအတွက် အထူးသတိထား၍ ဆောင်ရွက် နေကြောင်း သိရသည်။

CNI News

၂၀၂၃ ခုနှစ်၊ ဇူလိုင် ၆

ရခိုင်ပြည်လွတ်မြောက်ရေးပါတီ (ALP)ကို နယ်ခြားစောင့်တပ်အဖြစ် ဖွဲ့စည်းလိုက်သည်မှာ မဟုတ်ကြောင်း ALP မှ အတွင်းရေးမှူးအဖွဲ့ဝင် ဗိုလ်မှူးခိုင်သူရိန်က CNI သတင်းဌာနသို့ ပြောသည်။

နယ်ခြားစောင့်တပ်အဖြစ် ဖွဲ့စည်းမည်ဟု ဆွေးနွေးမှုလည်း မရှိခဲ့ကြောင်း၊ မိမိတို့အား နယ်ခြားစောင့်တပ် အဖြစ် ပြောင်းလဲသွားသည်ဆိုသော သတင်းဌာနများ၏ ဖော်ပြမှုမှာ မှန်ကန်မှုမရှိကြောင်း ၎င်းက ပြောသည်။

ALP မှ အတွင်းရေးမှူးအဖွဲ့ဝင် ဗိုလ်မှူးခိုင်သူရိန်က “အဲဒီ BGF ဖွဲ့တယ်ဆိုတဲ့ သတင်းကရော ဘယ်သူက ပြောတာ လဲ၊ ပြောတဲ့လူကို သွားမေးရမှာပေါ့ဗျာ၊ ကျနော်တို့က BGF လုံးဝဖွဲ့မယ့်စကားကို ဆွေးနွေးမှုလည်း မရှိခဲ့ဘူး။ ညှိနှိုင်းမှုလည်း မရှိခဲ့ဘူး။ ကျနော်တို့ကို BGF ဆိုတာကတော့ ဒီသတင်းကို ထွက်လာတဲ့ လူကိုပဲ ပြန်မေးရမှာ ဖြစ် တယ်၊ သူဘယ်ကရတဲ့ သတင်းလဲ၊ ဘယ်လောက် အခြေအမြစ်ရှိပြီး ခိုင်လုံတဲ့ သတင်းနေရာက ရသလဲဆိုတာ သူ့ကို ပြန်မေးရမှာ” ဟု CNI သတင်းဌာနသို့ ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့က မြန်မာ့တပ်မတော်မှ အာဏာရယူပြီးနောက်ပိုင်း လက်နက်ကိုင် ပဋိပက္ခများ ကျယ်ပြန့်လာနေသည်။

 ALP ပါတီဝင်တဲ့ NCA ထိုးထားတဲ့ လက်နက်ကိုင် ၇ ဖွဲ့နဲ့ နစကရဲ့ NSPNC တို့ တွေ့ဆုံ ဆွေးနွေးနေစဉ်

ထို့နောက် ၂၀၂၂ ခုနှစ်၊ ဧပြီလတွင် နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က တိုင်းရင်းသား လက်နက်ကိုင် အဖွဲ့အစည်းများကို ငြိမ်းချမ်းရေး ဖိတ်ခေါ်ကမ်းလှမ်းခဲ့ရာမှ နစကနှင့် ALP သည် နေပြည်တော်မှာ မကြာခဏ ငြိမ်းချမ်းရေးလုပ်ငန်းစဉ်များအပေါ် ဆွေးနွေးလျက်ရှိသည်။

တခြား တစ်ဖက်မှာတော့ ပြီးခဲ့သည့် ဇူလိုင် ၁ ရက်နေ့က ရခိုင်ပြည်နယ်၊ စစ်တွေမြို့တွင် ALP မှ  ဒုဥက္ကဋ္ဌ ခိုင်နီရောင်၊ အမှတ်(၁၀၁)တပ်ရင်း မှ တပ်ရင်းမှူး ခိုင်ကျော်မင်းနှင့် တပ်သား ကျော်ကျော်နိုင်တို့ ၃ ဦး လုပ်ကြံ သတ်ဖြတ်ခံခဲ့ရသည့် ဖြစ်စဉ်များလည်း ရှိခဲ့သည်။

အဆိုပါ အခြေအနေများ ဖြစ်ပေါ်နေချိန်မှာပဲ ပြီးခဲ့သည့် ရက်ပိုင်းက ရခိုင်သတင်းဌာန တစ်ခုတွင် ALP ကို နယ်ခြား စောင့်တပ်အဖြစ် မြန်မာ့တပ်မတော်က ထားရှိရန် ပြင်ဆင်နေသည်ဟု ဖော်ပြခဲ့သည်။

မြန်မာ့နိုင်ငံရေး လေ့လာသုံးသပ်သူ ဦးရဲထွန်းက “အဲဒါတော့ ကျနော်တို့ ဘယ်လိုမှ သဘောထားမရှိပါဘူး။ ဒါက သူတို့ရဲ့ ဆုံးဖြတ်ချက်၊ သူတို့ အဖွဲ့အစည်းရဲ့ လွတ်လွတ်လပ်လပ် ဆုံးဖြတ်ချက်အပေါ်မှာပဲ တည်ပါတယ်” ဟု ပြောသည်။

ဒေါ်စောမြရာဇာလင်းကို တွေ့ရစဉ်

ရခိုင်ပြည်လွတ်မြောက်ရေးပါတီ (ALP) ကို ၁၉၆၇ ခုနှစ်၊ ဧပြီလ ၉ ရက်နေ့တွင် ဖွဲ့စည်းထူထောင်ခဲ့ပြီး ထိုင်း - မြန်မာနယ်စပ်နှင့် အိန္ဒိယ - မြန်မာနယ်စပ်များတွင် လှုပ်ရှားလျက်ရှိသည်။

လက်ရှိတွင် ရခိုင်ပြည်နယ်အတွင်း လှုပ်ရှားမှုများလည်း ရှိနေသည်။

ရခိုင်ပြည်လွတ်မြောက်ရေးပါတီ(ALP)သည် တစ်နိုင်ငံလုံး အပစ်အခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးထားသည့် ရခိုင်လက်နက်ကိုင်ဖြစ်ပြီး NCA ထိုးထားသည့် လက်နက်ကိုင်များဖြင့် ဖွဲ့စည်း ထားသော ငြိမ်းချမ်းရေးလုပ်ငန်းစဉ်ဦးဆောင်အဖွဲ့(PPST)မှာလည်း အဖွဲ့ဝင်အဖြစ် ပါဝင်နေသည်။