CNI News

၂၀၂၂ ခုနှစ်၊ ဒီဇင်ဘာ ၈

ရှမ်းပြည်နယ်မြောက်ပိုင်း ပလောင်ကိုယ်ပိုင်အုပ်ချုပ်ခွင့်ရဒေသ နမ့်ဆန်မြို့နယ်အတွင်းရှိ ပလောင်ပြည် လွတ် မြောက်ရေးတပ်ဦး (PSLF/TNLA) ကို မြန်မာ့တပ်မတော်မှ လေကြောင်းဖြင့် ဗုံးကြဲတိုက်ခိုက်ခဲ့ကြောင်း သိရသည်။

ဒီဇင်ဘာ ၇ ရက် မွန်းလွဲ ၂ နာရီခန့်က လေကြောင်းကနေ ထိုးစစ်ဆင် တိုက်ခိုက်ခဲ့ပြီး ယနေ့ (ဒီဇင်ဘာ ၈ ရက်) အထိ တိုက်ပွဲ ပြင်းထန်နေကြောင်း ဒေသခံတစ်ဦးက CNI သတင်းဌာနသို့ ပြောသည်။

တပ်မတော် စစ်ရဟတ်ယာဉ်ကို တွေ့ရစဉ် (ရွှေဖီမြေ)

၎င်းက “ဒီမနက်လည်း ဗုံးလာကြဲတယ်၊ မနေ့ကတည်းက ဗုံးလာကြဲတာပဲ၊ ညလည်း ၁၂ အထိ လက်နက်ကြီးသံ တွေ ကြားရတယ်၊ အခုလည်း နမ့်ဆန်ကနေ လက်နက်ကြီးတစ်လုံး ထပ်ပစ်သေးတယ်၊ မနေ့က တပ်ဖက်က လေယာဉ် ၆ စီးလာတယ်၊ ၆ စီးမှာ ၄ စီးက စစ်သားတွေ လာချသွားတယ်၊ စစ်သားက ၈၀၊ ၁၀၀ လောက်ရှိမယ် ပေါ့နော်၊ အဲဒီမှာ နောက်ထပ် ၂ စီးက ကင်းထောက်တဲ့ ပုံစံပေါ့၊ ဗုံးကြဲသွားသေးတယ်၊ အဲကနေစပြီးတော့ တိုက်ပွဲ တွေ စဖြစ်တာပေါ့” ဟု ပြောသည်။

အဆိုပါ တိုက်ပွဲများမှာ မန်လုံးကျေးရွာ၊ ဟူးမန်းကျေးရွာနှင့် ကုန်းသာကျေးရွာ အနီးဝန်းကျင်တွင် ဖြစ်ပွားခဲ့ပြီး လက်ရှိမှာတော့ ဖုန်းဆက်သွယ်၍ မရသည့်အတွက် ဒေသခံများ၏ အခြေအနေကို မသိရှိရသေးကြောင်း ၎င်းက ပြောသည်။

ထို့နောက် လက်ရှိတွင်လည်း နှစ်ဖက် စစ်ရေးတင်းမာနေပြီး လက်နက်ကြီးသံများ ကြားနေရကြောင်း၊ ဒေသခံများ အနေဖြင့် နမ့်ဆန်မြို့သို့ တိုက်ပွဲရှောင်လာခြင်း မရှိသေးကြောင်း သိရသည်။

CNI News

၂၀၂၂ခုနှစ်၊ ဒီဇင်ဘာ ၈

ထိုင်းနိုင်ငံတွင် ပြီးခဲ့သည့် ရက်ပိုင်းမှစတင်ကာ မြန်မာအပါအဝင် ခွင့်ပြုကာလ ကျော်လွန်နေထိုင် နေသူများအား စီမံချက်ဖြင့် ဖမ်းဆီးနေကြောင်း ထိုင်းနိုင်ငံအခြေစိုက် မြန်မာအလုပ်သမားအရေး ဆောင်ရွက်နေသူများက CNI သတင်းဌာနသို့ ပြောသည်။

ယခု ဖမ်းဆီးနေခြင်းသည် ပြီးခဲ့သည် ကာလများနှင့်မတူဘဲ စစ်ဆေးရေးဂိတ်များ ချမှတ်၍လည်း‌ကောင်း၊ စမတ် ကင်းလှည့် ယာဉ်များဖြင့် လည်းကောင်း၊ မျက်နှာအား scan ဖတ်နိုင်သည့် နည်းပညာများ အသုံးပြု၍ လည်း ကောင်း လိုက်လံ ဖမ်းဆီးနေခြင်း ဖြစ်ကြောင်း သိရသည်။

မြန်မာရွှေ့ပြောင်းအလုပ်သမားအရေး ကူညီဆောင်ရွက်ပေးနေသည့် ကိုသားကြီးက "မြန်မာပြည်သားတွေက တော့ တော်တော်များများ အဖမ်းခံရတယ်။ ဒီရက်ပိုင်းမှာ။ လွန်ခဲ့တဲ့ တစ်ပတ်လောက်ကနေ ဒီနေ့အထိပေါ့ အဖမ်းခံရတာ များတယ်။

လက်ရှိ အခြေအနေ အထိက‌တော့ နိုင်ငံခြားသားတွေ ငှားရမ်း နေထိုင်နိုင်လောက်တဲ့ Apartment တွေ၊ ကွန်ဒိုတွေ၊ တန်းလျားတွေ အဲဒီလို နေရာတွေကို ဖမ်းတယ်။ နောက်တစ်ခုက နယ်စပ်ဂိတ်တွေ၊ ဒီနယ်စပ်ဂိတ်တွေမှာ ပိုမိုပြီးတော့မှ စစ်ဆေးလာတာများတယ်။ ဒီခွင့်ပြုကာလ ကျော်လွန်သွားတဲ့ သူတွေက သူတို့ ရဲ့ visa section တွေကို ပြန်ပြီး သက်တမ်းတိုးလို့ မရတဲ့ လူတွေကတော့ လုံးဝ blacklist ထဲ ဝင်သွားတယ်လေ။ အဲဒီလူတွေ အဖမ်းခံရရင်တော့ အနည်းဆုံးက blacklist ဖြစ်မယ်၊ ပြည်တော်ပြန် အဖြစ်နဲ့ သက်ဆိုင်ရာ မိခင်နိုင်ငံ ထဲကို ပြန်ပြီးတော့ ပို့ရခြင်း ခံရမယ်။ နောက် လက်ရှိ ထိုင်းနိုင်ငံမှာလည်း ခိုးဝင်လာတာတွေကများတဲ့ အခါကျ တော့ အဲဒီလို အဖမ်းအဆီးတွေ ပိုများတယ်" ဟု CNI သတင်းဌာနသို့ ပြောသည်။

ထိုင်းနိုင်ငံရောက် မြန်မာရွှေ့ပြောင်း အလုပ်သမားများကိုတွေ့ရစဉ်

လက်ရှိတွင် လုပ်ငန်းခွင်အတွင်း၌ တရားမဝင် အလုပ်သမားများ၊ ခွင့်ပြုကာလ ကျော်လွန်နေထိုင်သူများအား ဖမ်းဆီးရမိပါက လုပ်ငန်းရှင်ကိုပါ အပြစ်ပေး အရေးယူမှု ခံရမည်ဖြစ်ကြောင်း၊ ထို့ကြောင့် လုပ်ငန်းရှင်များက ၎င်းတို့ လက်ခံထားသည့် တရားမဝင် အလုပ်သမားများအား တရားဝင် နေထိုင်ခွင့် လက်မှတ်ရရှိရန် ပွဲစားများနှင့် ပူးပေါင်း၍ ပြုလုပ်ပေးနေကြကြောင်း သိရသည်။

တရားမဝင် အလုပ်သမားများအတွက် တရားဝင် နေထိုင်ခွင့် လက်မှတ်အား ထိုင်းအာဏာပိုင်များက ပြီးခဲ့သည့် အောက်တိုဘာလတွင် ပြုလုပ်ပေးခဲ့ပြီးဖြစ်သဖြင့် လက်ရှိတွင် ထပ်မံလုပ်ပေးနေခြင်းမျိုး မရှိသော်လည်း ပွဲစား များမှတဆင့် လုပ်၍ရနေကြောင်း ထိုင်းရှိ မြန်မာအလုပ်သမားအရေး ဆောင်ရွက်ပေးနေသူများက ပြောသည်။

သို့သော် ထိုသို့ ပြုလုပ်ရာတွင် ယခင်ပုံမှန်ကာလများထက် ကုန်ကျစရိတ်မှာ ပိုမိုပေးနေရကြောင်း FED မှ အမှုဆောင်ဒါရိုက်တာ ဦးထူးချစ်က CNI သတင်းဌာနသို့ ပြောသည်။

ထိုင်းအတွင်း သွားလာ လှုပ်ရှားနေသူများကိုတွေ့ရစဉ် (PBS)

၎င်းက “အနည်းဆုံး အခုနောက်ပိုင်းမှ လုပ်တဲ့ဟာပေါ့နော်။ ၁၆၀၀၀ ကနေ ၂၀၀၀၀ ဝန်းကျင်လောက်အထိ ပေးနေရတာတွေ ကျနော်တို့ တွေ့ရတယ်။ အစောပိုင်းတုန်းက ပွဲစားနဲ့လုပ်တဲ့လူက ၁၂၀၀၀ လောက်ပဲ ပေးရ တယ်။ တကယ် အစိုးရအတိုင်း သတ်မှတ်ချက်ဆိုရင် ၄၀၀၀၊ ၅၀၀၀ ပတ်ချာလည်လောက်ပဲ ကျတယ်။ အစော ပိုင်းတုန်းက ၁၂၀၀၀။ အခုက လက်မှတ် လုပ်ပေးတဲ့ကာလက ကုန်သွားတော့ special ပေါ့ VIP လိုမျိုး လုပ်ပေး တဲ့ဟာကျတော့ ၁၈၀၀၀ ကနေ ၂၀၀၀၀ လောက်အထိ ပေးနေရတယ်လို့ ကျနော်တို့ ကြားနေရတယ်။ အဓိက ကတော့ ဘယ်တော့မှ အလုပ်ရှင်က ပေးတာမရှိပါဘူး။ အလုပ်သမားတွေကပဲ ပေးရတာပဲ။ ဖြစ်နိုင်တယ် ဆိုရင် တော့ ရတဲ့နည်းလမ်းနဲ့ ထိုင်းနိုင်ငံထဲမှာ တရားဝင် နေထိုင်တာတော့ အကောင်းဆုံးပဲ။ တကယ်လို့ လက်မှတ် မရသေးတဲ့ ကာလဆိုရင်လည်း သွားတာလာတာလေးတွေ သတိထားရမယ်။ တချို့ကျတော့ ပွဲလမ်း သဘင်တွေ၊ ပျော်ပွဲရွှင်ပွဲတွေ လိုက်သွားနေတာမျိုးတွေ တရားဝင် လက်မှတ်မရှိရင် ဒီအချိန်မှာ ပိုအန္တရာယ် ရှိတယ်။ ကိုယ့် ဘာသာ ကိုယ်ပဲ သီးခြားပေါ့နော်။ ကိုယ့်လုပ်ငန်းခွင်မှာပဲ ကိုယ်နေတယ် ဆိုရင်တော့လည်း အဖမ်းအဆီးက လျော့ တာပေါ့။ ကျနော်တို့ အနေနဲ့ကတော့ လက်မှတ်မရှိတဲ့ လူတွေကို အဓိက ပြောချင်တာကတော့ လက်မှတ် တရားဝင်မှုဖြစ်အောင် လုပ်ပြီးနေထိုင်ကြဖို့ ပြောချင်တယ်”ဟု ပြောသည်။

ထိုင်းအာဏာပိုင်များကိုတွေ့ရစဉ်

ထိုင်းအာဏာပိုင်များက တရားဝင် နေထိုင်ခွင့်လက်မှတ် လုပ်ပေးခဲ့စဉ်က ငွေကြေးမတတ်နိုင်၍ မပြုလုပ်လိုက် ရသည့် တရားမဝင် မြန်မာအလုပ်သမား အများအပြား ရှိကြောင်းလည်း သိရသည်။

လက်ရှိတွင် နှစ်ကုန်ခါနီးဖြစ်သော်လည်း အဖမ်းအဆီးများ လျော့သွားနိုင်ဖွယ် မရှိသည့်အတွက် အထူးသတိထား နေထိုင်ကြရန်နှင့် လာမည့် နှစ်သစ်တွင်လည်း မည်သို့သော မူဝါဒများ အပြောင်းအလဲ ပြုလုပ်မည်ကို မသိရှိနိုင် သဖြင့် တရားဝင်ဖြစ်အောင် ပြုလုပ်ကြရန်လည်း ထိုင်းရှိ မြန်မာအလုပ်သမားအရေးဆောင်ရွက်နေသူများက အကြံပြုသည်။

CNI News

၂၀၂၂ ခုနှစ်၊ ဒီဇင်ဘာ ၈

မြန်မာနိုင်ငံမှာ လက်ရှိဖြစ်ပွားနေသော နိုင်ငံရေးအကျပ်အတည်းကို ဖြေရှင်းနိုင်မည့် နည်းလမ်းသည့် မည်သည့် နည်းလမ်းက အကောင်းဆုံးဖြစ်မလဲ သက်ဆိုင်ရာ နိုင်ငံရေး အင်အားစုများအကြား ဆွေးနွေး အဖြေရှာလျက်ရှိ နေကြသည်။

တချို့သော အင်အားစုများမှာ အပြုတ်တိုက်ရေးကို ဦးတည်နေသလို တချို့ အဖွဲ့အစည်းများမှာကတော့ တွေ့ဆုံ ဆွေးနွေးခြင်းက အကောင်းဆုံးဟု လက်ခံနေကြကြောင်း၊ သို့သော်လည်း အယူအဆများ ကွဲလွဲနေ၍ ငြင်းခုံလျက် ရှိနေကြသည်။

လက်ရှိ ပြည်တွင်းမှာ ဖြစ်ပွားနေသည့် လက်နက်ကိုင် ပဋိပက္ခကို ဖြေရှင်းနိုင်သည့် အနေအထား မရှိသေးကြောင်း ပအိုဝ်းအမျိုးသားဖက်ဒရယ်ကောင်စီ (PNFC) ဥက္ကဋ္ဌ ခွန်မြင့်ထွန်းက CNI သတင်းဌာနသို့ ပြောသည်။

မြန်မာ့တပ်မတော်မှ လုံခြုံရေးတပ်ဖွဲ့တစ်ဦးကိုတွေ့ရစဉ် (STR-GETTY IMAGES)

ခွန်မြင့်ထွန်းက “ဒီအခြေအနေ ထားမှာပေါ့နော်၊ ဆွေးနွေးမှု၊ ညှိနှိုင်းမှုတွေဆိုတဲ့ အလားအလာကလည်း အားနည်း နေသေးတယ်လို့ ကျနော်တို့ မြင်တယ်၊ စစ်အုပ်စု အနေနဲ့ကလည်း သူတို့အနေနဲ့ကတော့ လုံးဝ လက်နက် အားကိုး ပြီးတော့ အနိုင်ကျင့်ယူပြီးတော့ ဦးတည်နေတဲ့ အခါကြတော့ ကျနော်တို့ အနေနဲ့ကတော့ လောလောလတ်လတ် အခြေအနေမှာကတော့ အလားအလာတော့ မမြင်သေးပါဘူး”ဟု ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့ မြန်မာ့တပ်မတော်က အာဏာရယူပြီးနောက်ပိုင်း ဆန့်ကျင်ဆန္ဒပြမှုများနှင့် အတူ လက်နက်ကိုင် တော်လှန်ရေးကို ဆင်နွှဲလျက် ရှိနေကြသည်။

ထို့နောက် စီးပွားရေး၊ နိုင်ငံရေး၊ ကျန်းမာရေး၊ ပညာရေး၊ လူမှုရေး စသည့် အခန်းကဏ္ဍများ နိမ့်ကျကာ ကျပ်တည်း ရုန်းကန်နေကြရသည်။ အလားတူ လက်နက်နှင့် မူးယစ်ဆေးများ ပြည်တွင်းသို့ အဆမတန် ပြန့်ပွားနေခြင်းကြောင့် အရပ်သားများ၏ လုံခြုံရေးများလည်း ခြိမ်းခြောက်ခံနေရသည်။

လက်ရှိတွင် မြန်မာ့တပ်မတော်နှင့် တိုင်းရင်းသား လက်နက်ကိုင်အဖွဲ့အစည်း တချို့တို့ကြား ငြိမ်းချမ်းရေး ဆွေးနွေးနေ၍ ငြိမ်းချမ်းသွားမှာဖြစ်ကြောင်း ရှမ်းတိုင်းရင်းသားများ ဒီမိုကရက်တစ်ပါတီ (SNDP) မှ ဥက္ကဋ္ဌ စိုင်းအိုက်ပေါင်းက CNI သတင်းဌာနသို့ ပြောသည်။
၎င်းက “အပြုတ်မတိုက်လို့တောင်မှ AA နဲ့တောင်မှ အတိုက်အခိုက် ရပ်စဲနေပြီလေ၊ ဒီထဲမှာ KNU နဲ့လည်း စေ့စပ်နေတယ်နော်၊ ခင်ဗျားတို့ မီဒီယာတွေမှာသာ မရောက်တာ စေ့စပ်နေပြီနော်၊ အဖြေက ရတော့မှာ KNU နဲ့ စေ့စပ်နေတယ်၊ အဖွဲ့နာမည်တော့ ကျနော်မပြောပြပါရစေနဲ့ စေ့စပ်နေတယ်၊ အခြေအနေ ကောင်းနေတယ်၊ နောက်ပိုင်း ငြိမ်းချမ်းသွားမယ်” ဟု ပြောသည်။

လက်ရှိ မြန်မာ့နိုင်ငံရေး အကျပ်အတည်းမှာ မြန်မာ့တပ်မတော်ကြောင့် ဖြစ်ပေါ်လာခြင်း ဖြစ်ကြောင်း၊ နိုင်ငံရေး မပြေလည်မှုကို ၎င်းက ကြားဝင်လာကြောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။

 ဒီမိုကရေစီအရေး တောင်းဆိုကာ နွေဦးတော်လှန်ရေးကို ဆင်နွှဲနေသူတစ်ဦး(GETTY IMAGES)

၎င်းက “ဒီမိုကရေစီ နိုင်ငံရေး ဆိုတာက‌တော့ အတိုက်အခံရှိမယ်လေ၊ ပြောကြမယ်ဆိုကြမယ်၊ ပြည်သူရဲ့ အဆုံး အဖြတ်ကို ခံကြမယ်၊ ပြည်သူရဲ့ အဆုံးအဖြတ်ကို ခံပြီးတော့ ဖြေရှင်းကြမှာပေါ့၊ ဒီပါတီကို မကြိုက်ရင် နောက်တစ် ပါတီကို မဲပေးမှာပေါ့၊ ပါတီတွေကလည်း လက်လွတ်စပယ် မလုပ်ပါဘူး။ တိုင်းရင်းသားတွေကလည်း သူ့ဖက်ဒရယ် အခွင့်အရေးကို ‌တောင်းမှာပေါ့၊ ဈေးညှိကြမှာပေါ့ဗျာ၊ ဒီဖြစ်စဉ်ကို လွတ်လွတ်လပ်လပ် လုပ်ခွင့်မရှိအောင် တပ်မ‌တော်က ကြားဝင်ထားတယ်၊ နိုင်ငံအချင်းချင်း၊ ပါတီအချင်းချင်း၊ နိုင်ငံရေးသမား အချင်းချင်း ညှိနှိုင်းလို့ မရအောင်အထိ တပ်မတော်က ဒီနိုင်ငံရေးလောကမှာ ဖွဲ့စည်းပုံအရ ပါဝင်နေတယ်၊ တပ်မ‌တော်က နိုင်ငံရေး ဦးဆောင်မှု အခန်းက ပါဝင်ရမှာဆိုတာတို့ တစ်ခုတည်းသော တပ်မ‌တော် ဖြစ်ရမှာဆိုတာတို့ အဲဒါမျိုး ၂၀၀၈ ဖွဲ့စည်းပုံအားကိုးနဲ့ လွှတ်တော်ထဲမှာလည်း ၂၅ ရာခိုင်နှုန်းလည်း ယူထားသေးတယ်၊ စစ်တပ်ရဲ့ နိုင်ငံရေးလောက ထဲမှာ မပါပဲနဲ့ လုံးဝ နိုင်ငံတော်ရဲ့ ကာကွယ်ရေးပဲ အဲဒီမှာ နေလိုက်မယ်ဆိုရင် ဒီကိစ္စတွေက နိုင်ငံရေးသမား အချင်းချင်း ညှိနှိုင်းရင် အချိန်ကာလတစ်ခု အခြေအနေ ရောက်ရင်တော့ ကျေကျေနပ်နပ် ရာခိုင်နှုန်းပြည့် မဟုတ် ရင်တောင်မှ အတူတူလက်တွဲသွားလို့ ရနိုင်မယ့် အခြေအနေတစ်ခုကို တဖြည်းဖြည်း ရောက်လာလိမ့်မယ်လို့ ကျနော်ထင်တယ်” ဟု ပြောသည်။

လက်ရှိ မြန်မာနိုင်ငံ၏ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ကရင်ပြည်နယ်၊ ကယား ပြည်နယ်တို့တွင် လက်နက်ကိုင် ပဋိပက္ခများ ဖြစ်ပွားနေပြီး နေအိမ်နှင့် အဆောက်အဉီပေါင်း သောင်းနှင့်ချီ မီးရှို့ ဖျက်ဆီးခံထားရကြောင်း၊ ဒေသတွင်းနေ ပြည်သူများ နေရပ်စွန့်ခွာ ထွက်ပြေး တိမ်းရှောင်နေကြရသည်။

ဒီမိုကရေစီအရေး တောင်းဆိုနေကြစဉ်(STR- GETTY IMAGES)

ထို့ကြောင့် မြန်မာ့နိုင်ငံရေး အကျပ်အတည်းကို ဖြေရှင်းရန် သက်ဆိုင်ရာ နိုင်ငံရေးအင်အားစုများကြား အဖြေရှာ နေကြသလို ဆွေးနွေးညှိနှိုင်းမှုများ ပြုလုပ်လျက်ရှိသည်။

နစက-ကတော့ ၂၀၂၃ ခုနှစ်တွင် အထွေထွေရွေးကောက်ပွဲ ပြန်လည် ကျင်းပပေး၍ အနိုင်ရသည့် ပါတီကို နိုင်ငံ တော် အာဏာအား လွှဲပြောင်းပေးသွားမည်ဟု ကတိပြုကာ ထွက်ပေါက်ရှာနေသည်။

မြန်မာ့တပ်မတော်ကို ဖြုတ်လိုသည့် တော်လှန်ရေး အင်အားစုများကတော့ ရွေးကောက်ပွဲသည် နစကအတွက်သာ ထွက်ပေါက်ဖြစ်ခြင်းကြောင့် အပြုတ်တိုက်ရေးကို ဖော်ဆောင်လျက်ရှိနေသည်။

သို့သော် တချို့သော ဒီမိုကရေစီအင်အားစုများနှင့် နိုင်ငံတကာ အသိုင်းအဝိုင်းကတော့ သက်ဆိုင်သူ အားလုံး ပါဝင်၍ တွေ့ဆုံ ဆွေးနွေးကြရန် သဘောထား ရပ်တည်လျက်ရှိနေကြသည်။

CNI News

၂၀၂၂ ခုနှစ်၊ ဒီဇင်ဘာ ၈

ရခိုင်ပြည်နယ်တွင် မြန်မာ့တပ်မတော်နှင့် ရက္ခိုင့်တပ်တော်(AA)တို့အကြား အပစ်ရပ်စဲပြီးနောက် ရေလမ်းကြောင်း အပါအဝင် ကုန်းလမ်းကြောင်းကို ပြန်ဖွင့်ပေးထားပြီးဖြစ်သော်လည်း ကုန်ကားမောင်းနှင်သူများနှင့် ကားဂိတ်များ က ဆေးပစ္စည်းနှင့်ဆေးဝါးများကို လက်မခံသေး၍ ဆေးဝါးပြတ်နေဆဲ ဖြစ်ကြောင်း ရခိုင်ဆေးကုန်သည်များထံမှ သိရသည်။

ရခိုင်ပြည်နယ် စီမံအုပ်ချုပ်ရေးကောင်စီမှ ဆေးဝါးများကို တရားဝင် သယ်ဆောင်ခွင့်ပြုသည်ဟု ထုတ်ပြန်ထား ခြင်း မရှိသေးကြောင်း၊ ထို့နောက် ကားဂိတ်များမှ ဆေးဝါးများကို သယ်ဆောင်ခွင့်မပြုခြင်းဖြစ်ကြောင်း ရခိုင် ပြည်နယ် ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် ဥက္ကဋ္ဌ ဦးတင်အောင်ဦးက CNI သတင်းဌာန သို့ ပြောသည်။

၎င်းက “သယ်ခွင့် မပေးသေးဘူးဆိုတာက အခုက ကားဂိတ်တွေက လုံးဝလက်မခံသေးဘူး ဖြစ်နေတယ်။ ဆေးဝါး ဆိုလို့ရှိရင် သူတို့ကားတွေက လက်မခံဘူး။ လက်မခံဘူးဆိုတာက သူတို့ကတော့ သက်ဆိုင်ရာ ဒီဘက်က ပါမစ် ပေါ့လေ သယ်ယူခွင့်တစ်ခုခုပါလို့ရှိရင် သူတို့လက်ခံမယ်။ မဟုတ်ရင် သူတို့က လက်မခံနိုင်ဘူး။ သူတို့ဆီကိုလည်း လွတ်လွတ်လပ်လပ် သယ်နိုင်ပြီဆိုတဲ့အကြောင်းလည်း အကြောင်းကြားထားတာ မရှိတဲ့အတွက် လမ်းခရီးမှာ သူတို့ကားအနေနဲ့လည်း တင်လာပြီးတော့မှ စစ်တဲ့အချိန်မှာတွေ့လို့ ပြဿနာတက်မှာလည်း စိုးရိမ်တာနဲ့ တူပါတယ်။ အဲဒါကြောင့် သူတို့ကတော့ သူတို့ဆီလည်း သေသေချာချာ မသိသေးတဲ့အတွက် ဆေးဝါးပစ္စည်း တွေကို သူတို့ လက်မခံသေးဘူး ဆိုပြီးတော့ပဲ ကျနော်တို့အနေနဲ့ သိထားပါတယ်။အဲဒါကြောင့် ဆေးဝါး ပစ္စည်းတွေကတော့ လောလောဆယ်မှာတော့ ဒီအတိုင်းပဲ ပြတ်လပ်မှုတွေကတော့ အရင်တိုင်းပဲ အရင်လိုပဲ ရှိနေတာပေါ့လေ” ဟု ပြောသည်။

အိမ်သုံးဆေးပစ္စည်းများ ရောင်းချနေသည့် ဆေးဆိုင်

မြန်မာ့တပ်မတော်နှင့် ရက္ခိုင့်တပ်တော်အကြား တကျော့ပြန်တိုက်ပွဲ ပြင်းထန်လာပြီးနောက် ပြည်နယ်ကောင်စီက ရခိုင်ပြည်နယ်အတွင်း ဆေးဝါးတင်သွင်းခွင့်များကို ပိတ်ထားသည့်အပြင် ရခိုင်ဒေသအတွင်းရှိ မြို့နယ်တစ်ခုမှ တစ်ခုသို့ သယ်ယူခွင့်ကိုလည်း ပိတ်ထားခဲ့ခြင်းဖြစ်ကြောင်း ဆေးကုန်သည်များနှင့် ဆေးကုမ္ပဏီများထံမှ သိရ သည်။

ရခိုင်ပြည်နယ်တွင် ဆေးဝါးလက်ကျန်နည်းပါးနေခြင်းနှင့် ပြတ်လပ်မှုများ ဖြစ်ပေါ်နေခြင်းကြောင့် ရခိုင်ပြည်နယ် ကုန်သည်ကြီးများအသင်းမှတဆင့် သယ်ဆောင်ခွင့်ပြုရန်နှင့် ရန်ကုန်မှ စစ်တွေသို့ ဆေးဝါးများ တင်သွင်းခွင့်ပြုရန် ဆေးကုန်သည်များနှင့် ဆေးကုမ္ပဏီများက ရခိုင်ပြည်နယ် စီမံအုပ်ချုပ်ရေးကောင်စီသို့ တင်ပြတောင်းဆိုသော် လည်း ပြည်နယ်ကောင်စီမှ လက်ခံခြင်း မရှိသေးကြောင်း သိရသည်။

ဆေးဝါးများကို ကန့်သတ်ထားရာမှ တင်သွင်းခွင့်ပြုလိုက်ပြီဖြစ်ကြောင်း ထုတ်ပြန်ထားခြင်း မရှိသေးသည့်အတွက် ကုန်တင်ကားသမားများအနေဖြင့် ကျန်းမာရေးဌာန၏ အာမခံချက် ပါရှိမှသာ တင်ဆောင်နိုင်ကြောင်း မောင်တောမှ တောင်ပြိုသို့ ပြေးဆွဲသည့် ကုန်ကားသမားတစ်ဦးဖြစ်သည့် ကိုမောင်မောင်ထွန်းက CNI သတင်းဌာန သို့ ပြောသည်။

“တင်ရတဲ့ဟာတွေက ကန့်သတ်ထားတာ အများကြီးပါ။ ဆေးဝါးနဲ့ပတ်သက်ပြီးတော့ ကျနော်တို့ အများကြီးပေါ့ ကားသမားတွေကျတော့ မတင်ရဲဘူးလေ။ သူတို့က ဒီဟာကန့်သတ်ထားတယ်ဆိုရင် သူတို့က မတင်ရဘူး။ ကားသမားတွေကလည်း မတင်ရဲဘူးပေါ့။ ကျနော်တို့က အဓိက ကျန်းမာရေးဌာနကနေပြီးတော့ အာမခံချက်ရှိမှ ကျနော်တို့က တင်ရဲမှာလေ” ဟု ၎င်းက ပြောသည်။

လက်ရှိတွင် ရခိုင်ပြည်နယ်၌ ဆေးဝါးတချို့နည်းပါးနေခြင်းနှင့် ပြတ်လပ်မှု ဖြစ်ပေါ်နေကြောင်း။ ကိုယ်ဝန်ဆောင် မိခင်များနှင့် ကလေးငယ်များသည်လည်း ကာကွယ်ဆေးများ မထိုးရသေးသည့်အပြင် ဆေးဝါးဈေးနှုန်းများသည်  ၃ ဆခန့်အထိ မြင့်တက်မှု ဖြစ်ပေါ်နေသည်ဟု ရခိုင်ပြည်နယ် ဒေသခံများထံမှ သိရသည်။

CNI News

၂၀၂၂ ခုနှစ်၊ ဒီဇင်ဘာ ၇

ထိုင်းအစိုးရသည် မြန်မာနိုင်ငံဆိုင်ရာ ထိုင်းသံအမတ်ကြီးအဖြစ် H.E. Mr. Mongkol Visitstump ကို တာဝန် ပေးခဲ့ပြီးနောက် ယနေ့ (ဒီဇင်ဘာ ၇ ရက်) နံနက် ၁၀ နာရီက နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ထံ ခန့်အပ်လွှာပေးခဲ့သည်။

ထို့နောက် ထိုင်းသံအမတ်ကြီးနှင့် နစကဥက္ကဋ္ဌတို့ နှစ်နိုင်ငံသံတမန် ဆက်ဆံရေး၊ ချစ်ကြည်ရင်းနှီးမှုနှင့် ပူးပေါင်း ဆောင်ရွက်ရေးများ တိုးမြှင့် ဆောင် ရွက်သွားမည့်ကိစ္စရပ်များ၊ နယ်စပ် ကုန်သွယ်မှု၊ စီးပွားရေးရင်းနှီးမြှုပ်နှံမှုနှင့် ခရီးသွားလုပ်ငန်းများ ပိုမိုဖွံ့ဖြိုး တိုး တက်ရေးအတွက် ပူးပေါင်းဆောင်ရွက်သွားမည့် ကိစ္စရပ်များ၊ မြန်မာ-ထိုင်း အဆင့်မြင့်အရာရှိကြီးများ အစည်း အဝေး ကျင်းပနိုင်ရေးကိစ္စရပ်များကို ဆွေးနွေးခဲ့ကြကြောင်း နစကဘက်က ထုတ်ပြန်ခဲ့သည်။

H.E. Mr. Mongkol Visitstump နဲ့ ဒုတိယဗိုလ်ချုပ်မှူးကြီး စိုးဝင်းကို တွေ့ရစဉ်

အလားတူ ထိုင်းသံအမတ်ကြီး H.E. Mr. Mongkol Visitstump သည် နစက၏ ဒုဥက္ကဋ္ဌ ဒုတိယဗိုလ်ချုပ်မှူးကြီး စိုးဝင်းနှင့် တွေ့ဆုံ၍ နယ်စပ်ဒေသတည်ငြိမ်အေးချမ်းရေး၊ တရားမဝင် ကုန်သွယ်မှုနှင့် တရားမဝင် အလုပ်သမား တိုက်ဖျက်ရေး၊ ခရီးသွားကဏ္ဍဖွံ့ဖြိုးတိုးတက်ရေး၊ ထားဝယ်ရေနက်ဆိပ်ကမ်းစီမံကိန်းဆိုင်ရာကိစ္စရပ်များ၊ အာဆီယံရေးရာကိစ္စရပ်များကို ဆွေးနွေးခဲ့ကြသည်။

CNI News

၂၀၂၂ ခုနှစ်၊ ဒီဇင်ဘာ ၇

မြန်မာ့တပ်မတော် အနေဖြင့် နိုင်ငံကိုကာကွယ်ရန် ဝယ်ယူထားသည့် လက်နက်များဖြင့် တိုင်းရင်းသားများကို တိုက်ခိုက်နေကြောင်း ကရင်နီအမျိုးသားကာကွယ်ရေးတပ်(KNDF)မှ ပြန်ကြားရေးတာဝန်ခံတစ်ဦးက CNI သတင်းဌာနသို့ ပြောသည်။

လက်ရှိတွင်လည်း ကယား (ကရင်နီ) ပြည်နယ်တွင် မြန်မာ့တပ်မတော်နှင့် KNDF၊ မဟာမိတ် ပူးပေါင်းတပ် တို့အကြား တိုက်ပွဲဖြစ်ပွားနေကြောင်း၊ အဆိုပါ တိုက်ပွဲအတွင်း တပ်မတော်ဘက်မှ လက်နက်မျိုးစုံသုံး တိုက်ခိုက်နေကြောင်း ၎င်းက ပြောသည်။

တပ်မတော် ဖြုတ်ချရေး တော်လှန်ရေးလုပ်နေသော ကရင်နီအမျိုးသားကာကွယ်ရေးတပ်ဖွဲ့(KNDF) ကိုတွေ့ရစဉ် (KNDF)

KNDF မှ ပြန်ကြားရေးတာဝန်ခံတစ်ဦးက “လက်နက်ကတော့ အစုံပါပဲ ခင်ဗျ။ လေကြောင်း တိုက်ခိုက်မှု၊ လေယာဉ်နဲ့ ဗုံးကြဲတာကအစ၊ နောက်ပြီးတော့ ဟောင်ဝှစ်ဇာလို့ခေါ်တဲ့ အဝေးပစ်ပေါ့နော် လက်နက်ကြီးတွေ ပေါ့နော်၊ အဝေးပစ်ဒုံးတွေကို သုံးပြီးတော့ ပစ်တာပေါ့နော်၊ နောက်ပြီးတော့ ဒီမြေပြင်မှာဆိုရင်လည်း မြေမြှုပ်မိုင်း တွေကို အဓိက အများအပြား သုံးတာပေါ့နော်၊ အဆမတန် မြေမြှုပ်မိုင်းတွေကို သုံးတယ်၊ စစ်ကောင်စီ တပ်စွဲခဲ့တဲ့ ကျေးရွာတွေဆိုရင် ပြည်သူတွေ ပြန်လည်နေထိုင်လို့ မရတော့လောက်အောင် မြေမြှုပ်မိုင်းတွေက များပြားနေတာ ဖြစ်ပါတယ်၊ စစ်ကောင်စီက ထောင်ထားတာဖြစ်တယ်၊ စစ်ကောင်စီက ဒါကို နိုင်ငံကို ကာကွယ်ဖို့ ဝယ်ထားတဲ့ လက်နက်တွေကို ပြည်သူတွေကို တိုက်ခိုက်တဲ့ နေရာတွေမှာ၊ တိုင်းရင်းသားတွေကို တိုက်ခိုက်တဲ့ နေရာမှာ သုံး တယ်လို့ပဲ ကျနော်တို့ ပြောလို့ရပါတယ်ခင်ဗျ” ဟု CNI သတင်းဌာနသို့ ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်နောက်ပိုင်း ဖြစ်ပွားခဲ့သည့် လက်နက်ကိုင် ပဋိပက္ခတွင် မြန်မာ့တပ်မတော်ဘက်မှ လေကြောင်းဖြင့် တိုက်ခိုက်မှုများ ပိုမိုပြုလာခဲ့သည်။

လက်ရှိ ဖြစ်ပေါ်နေသည့် တိုက်ပွဲနှင့် သင့်လျော်သည့် လက်နက်အမျိုးအစားကို မြန်မာ့တပ်မတော်က အသုံးပြု ခြင်းဖြစ်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြော သည်။

တပ်မတော် ဆန့်ကျင်ရေး ဒီမိုကရေစီ တောင်းဆိုရေး ဆန္ဒပြခဲ့ကြသည်ကိုတွေ့ရစဉ် (GETTY IMAGES)

၎င်းက “ပြောရရင်တော့ ရင်ဆိုင်နေရတဲ့ စစ်ပွဲနဲ့ လိုက်လျောညီထွေတဲ့ လက်နက် အမျိုးအစားကို သုံးတယ်လို့ ပြောလို့ရပါတယ်။ တစ်ခုတော့ ရှိတာပေါ့လေ၊ လေယာဉ်မရှိတဲ့ သူကတော့ ဒါလေယာဉ်နဲ့ လာလိုက်တဲ့ အချိန်မှာ တော့ ဒီလိုမျိုး လက်နက်ကြီးနဲ့ ငါတို့ကို လာတိုက်ရလားဆိုတဲ့ ဝေဖန်မှုတွေ၊ သုံးသပ်ချက်တွေတော့ ဖြစ်ချင်ဖြစ်မှာ ပေါ့၊ ဒါပေမဲ့ စစ်ပွဲတစ်ပွဲမှာ စစ်ပွဲတစ်ပွဲဟာ ဘယ်လောက်အထိ ဆိုးဝါးလာသလဲ၊ ကြမ်းတမ်းလာသလဲ၊ တစ်ဖက်က တော့ ဒီစစ်ပွဲကို အနိုင်ရဖို့ နည်းလမ်းမျိုးစုံ သုံးလာတယ်ဆိုရင် တစ်ဖက်ကလည်း ဒါကို ဖြတ်နိုင်ဖို့ဆိုရင် လိုအပ်တဲ့ လက်နက်ကို အချိန်အတိုင်းအတာ အကန့်အသတ် ပိုင်းခြားပြီး သုံးရတာပေါ့လေ၊ အဲဒီတော့ နိုင်ငံတော် ကာကွယ် ရေးအတွက်ဆိုတဲ့ စကားလုံး တစ်ခုအောက်ထဲမှာ သွားပြီးတော့ လုံးချပြီးပြောလို့တော့ အဆင်မပြေပါဘူး။ သူ့ သက်ဆိုင်ရာ နယ်ပယ်နဲ့ ထိုက်တန်လျော်ကန်တဲ့ လက်နက်မျိုး သုံးတယ်လို့ပဲ ကျနော်တို့ သုံးသပ်ချက်ပေးလို့ ရပါတယ်” ဟု ပြောသည်။

လက်ရှိ ဖြစ်ပွားနေသည့် လက်နက်ကိုင် တိုက်ပွဲအတွင်း မြန်မာ့တပ်မ‌တော်ဘက်မှ လေယာဉ်ပစ်ကူများ၊ စစ် ရေယာဉ်များ၊ မြေပြင်ပစ် ဒုံးများဖြင့် တိုက်ခိုက်နေကြောင်း တော်လှန်ရေးအင်အားစုများက ပြောသည်။

လက်ရှိ မြန်မာနိုင်ငံတွင် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ကယားပြည်နယ်၊ ကရင်ပြည်နယ်တို့မှာ လက်နက်ကိုင် ပဋိပက္ခများ ဖြစ်ပွားနေပြီး နေအိမ်နှင့် အဆောက်အအုံများ မီရှို့ဖျက်စီး ခံနေရသလို ဒေသတွင်းနေ လူထုများလည်း ထွက်ပြေးတိမ်းရှောင်နေကြရသည်။

CNI News

၂၀၂၂ ခုနှစ်၊ ဒီဇင်ဘာ ၆

ရှမ်းပြည်နယ်၊ ကိုးကန့်ကိုယ်ပိုင်အုပ်ချုပ်ခွင့်ရဒေသ၊ လောက်ကိုင်မြို့ကို MNDAA (ကိုးကန့်)တပ်ဖွဲ့က ယနေ့ (ဒီဇင်ဘာ ၆ ရက်)တွင် ဝင်ရောက် တိုက်ခိုက်မည်ဆိုသော ကောလာဟလသတင်းသည် သတင်းအမှားဖြစ်ပြီး ကိုးကန့်ဒေသမှာ တည်ငြိမ်အေးချမ်းလျက်ရှိကြောင်း ကိုးကန့်ကိုယ်ပိုင်အုပ်ချုပ်ခွင့်ရဒေသ စီမံအုပ်ချုပ်ရေးအဖွဲ့ ရုံးက ထုတ်ပြန်ခဲ့သည်။

အဆိုပါ ထုတ်ပြန်ချက်တွင် လတ်တလောတွင် ကိုးကန့်ဒေသနှင့်စပ်လျဉ်း၍ အမျိုးမျိုးသော သတင်းမှားများနှင့် မဟုတ် မမှန်သော အချက်အလက်များ (ဗွီဒီယို/စာတို စသည့်) အများအပြားကို အွန်လိုင်း ပလက်ဖောင်းများ တွင် ပျံ့နှံ့စေခဲ့ကြောင်း၊ မိမိတို့ ဒေသရှိ လူမှုအသိုက်အဝန်းနှင့် ပြည်သူများ၏ ထုတ်လုပ်မှုများနှင့် လူနေမှုဘဝများ အပေါ် ထိခိုက်မှုများ ဖြစ်စေခဲ့ပါကြောင်း ဖော်ပြထားသည်။

ထို့နောက် မြန်မာနိုင်ငံရှိ ကိုးကန့်လူမျိုးသည် ငြိမ်းချမ်းရေးကို နှစ်သက်ကြပြီး ဒေသအတွင်း လက်ရှိ အခြေအနေ မှာ ပုံမှန်တည်ငြိမ်လျက်ရှိကြောင်း၊ တပ်မတော်နှင့် ကိုယ်ပိုင်အုပ်ချုပ်ခွင့်ရဒေသ လက်နက်ကိုင်အဖွဲ့အစည်းများ သည် ပြည်သူများ၏ အသက်အိုးအိမ်စည်းစိမ် လုံခြုံရေးကို ကာကွယ်နိုင်သော အရည်အချင်းရှိကြောင်း ကိုးကန့် ကိုယ်ပိုင်အုပ်ချုပ်ခွင့်ရဒေသ စီမံအုပ်ချုပ်ရေးအဖွဲ့ရုံးက ဆိုသည်။

ကိုးကန့်ကိုယ်ပိုင်အုပ်ချုပ်ခွင့်ရဒေသ စီမံအုပ်ချုပ်ရေးအဖွဲ့ရုံး တရုတ်ဘာသာနဲ့ထုတ်ပြန်ချက်

၎င်းက “ ပြည်သူလူထုများ အနေဖြင့် အွန်လိုင်းပေါ်က သတင်းမှားများကို မယုံမှားစေရန်နဲ့ သတင်းမှားများကို မဖြန့်ရန် သတိပြုပါ။ အွန်လိုင်း ပလက်ဖောင်း အသီးသီးတွင် ကျနော်တို့ ဒေသနှင့် သက်ဆိုင်သော အမျိုးမျိုး သော သတင်းမှားများနှင့် မဟုတ်မမှန်သော အချက်အလက်များ (ဗွီဒီယို၊ စာတိုစသည့်) သတင်းဖြန့်သော သူများ ချက်ချင်းဖျက်ရန်” တောင်းဆို ထုတ်ပြန်ထားသည်။

ထို့နောက် ကြေညာချက် ထုတ်ပြန်သည့် နေ့မှစ၍ မိမိတို့ဒေသတွင် အမျိုးမျိုးသော သတင်းမှားများနှင့် မဟုတ် မမှန်သော အချက်အလက်များ (ဗွီဒီယို၊ စာတိုစသည့်) ဖြန့်ကာ ထိတ်လန့်တကြားဖြစ်အောင် ဆိုးရွာသော အပြု အမှုများ ပြုလုပ်မည်ဆိုပါက ဥပဒေနှင့်အညီ စစ်ဆေး ဖော်ထုတ် အရေးယူမည်ဟု ကိုးကန့်ကိုယ်ပိုင်အုပ်ချုပ်ခွင့် ရဒေသ စီမံအုပ်ချုပ်ရေးအဖွဲရုံးက ဒီဇင်ဘာ ၆ ရက်နေ့တွင် ထုတ်ပြန်ခဲ့သည်။

၂၀၂၂ ခုနှစ်၊ နိုဝင်ဘာ ၂၈ ရက်နှင့် ၂၉ ရက်နေ့များက ကိုးကန့်ကိုယ်ပိုင်အုပ်ချုပ်ခွင့်ရဒေသ၊ ချင်းရွှေဟော်ဒေသ နမ့်ဖာတောင်ဒေသတွင် မြန်မာ့တပ်မတော်နှင့် MNDAA တို့ တိုက်ပွဲ အပြင်းအထန် ဖြစ်ပွားခဲ့ပြီးနောက် MNDAA သည် လောက်ကိုင်မြို့ကို တိုက်ခိုက်လာနိုင်သည်ဆိုသော သတင်းများ ကောလာဟလ ထွက်ပေါ်လာကာ ပြည်သူ များက ကြိုတင် တိမ်းရှောင်မှုများ ပြုလုပ်လာခဲ့ကြခြင်း ဖြစ်သည်။

ထို့နောက် လူထောင်နှင့်ချီ၍ ကားများဖြင့် လောက်ကိုင်မြို့မှ တခြားသော ဒေသများသို့ တိမ်းရှောင်နေကြသည်။ တချို့ ရွှေ့ပြောင်း နေထိုင်သူများကတော့ လောက်ကိုင်မြို့မှ မိမိနေရပ်သို့ ပြန်လည် တိမ်းရှောင်ရန် ကားများ ငှားရမ်းလျက်ရှိကြောင်း သိရသည်။

CNI News

၂၀၂၂ ခုနှစ်၊ ဒီဇင်ဘာ ၆

မြန်မာနိုင်ငံကူးလက်မှတ် လျှောက်ထားခြင်းအတွက် ရက်ချိန်းယူရာတွင် ယခင် အွန်လိုင်းဘိုကင်စနစ်အစား စနစ်အသစ်ပြောင်းလဲလုပ်ဆောင်ခြင်းက ပွဲစားများ ယခုထက်ပိုများလာနိုင်သည်ဟု အလုပ်သမားအရေး ဆောင်ရွက်နေသူများနှင့် အေဂျင်စီများက CNI သတင်းဌာနသို့ ပြောသည်။

အွန်လိုင်းဘိုကင်စနစ်အဟောင်းသည် ရုံးဖွင့်ရက်နှင့် ရုံးချိန်အတွင်းသာ လျှောက်ထားနိုင်သော်လည်း လက်ရှိ စနစ်အသစ်သည် ၂၄ နာရီပတ်လုံး ပိတ်ရက်မရှိ လျှောက်ထားနိုင်မည်ဖြစ်သည့်အတွက် ပွဲစားများ ယခုထက် ပိုများပြားလာနိုင်မည်ဟု အလုပ်သမားအရေး ဆောင်ရွက်နေသူများနှင့် အေဂျင်စီများက သုံးသပ်ကြခြင်း ဖြစ်သည်။

ဂျပန် ပြည်ပအလုပ်အကိုင်အေဂျင်စီတစ်ခုမှ ဒါရိုက်တာ ကိုနေဦးကိုက “QR စနစ်နဲ့ ဘိုကင်လုပ်တယ်ဆိုပေမယ့် အဲဒီ QR က တကယ်လုပ်မယ့်လူရဲ့ နာမည်မဟုတ်လည်း ရတယ်။ တချို့တွေက QR ကို ပြန်ပြီး ရောင်းစားကြတာ ပေါ့။ အဲဒါလေးကိုတော့ မဖြစ်အောင် ထိန်းသိမ်းစေချင်တာပေါ့။ အမှန်ကလေ တင်လို့ရှိရင် နာမည် ဘယ်သူပါ ဆိုပြီး တင်ကြတာပဲ။ တင်ကြတယ်ဆိုပေမယ့်လည်း QR Code တစ်ခု ရသွားတယ်ဆိုတာနဲ့ ကာယကံရှင်မဟုတ် လည်း သူက ပေးဝင်တာကိုး။ အဲဒီကျ သူတို့ချင်း လက်ဝါးချင်း ရိုက်ထားတာကိုး။ လက်ဝါးချင်း ရိုက်ထားတော့ ပေးဝင်တယ်ဆိုတော့ အရင်ကတည်းကလည်း QR Code မှာက ကာယကံရှင်နာမည်တို့ ပါပြီးသားတွေပါ။ မှတ်ပုံတင်နံပါတ်နဲ့၊ မွေးသက္ကရာဇ်က ပါပြီးသားတွေပဲ။ ဒါပေမယ့် အထဲကလူတွေနဲ့ အပြင်ကလူတွေ လက်ဝါး ရိုက်ပြီးလုပ်တာဆိုတော့ QR Code က လူနဲ့ အပြင်လူနဲ့မတူလည်း ပေးပြီး Pass လုပ်နေတာကို။ အဲဒါ မလုပ်ဘူး ဆိုရင်တော့ ပျောက်သွားမှာပေါ့။ ကြားထဲက ပွဲစားတွေ ပျောက်သွားမှာပေါ့။ အခုက ခွင့်ပြုနေလို့ကိုး” ဟု ပြော သည်။

 QR code ရက်ချိန်းရထားသူများ လာရောက်စောင့်ဆိုင်းနေစဉ်(ဓါတ်ပုံ-CNI)

လက်ရှိတွင် အွန်လိုင်းဘိုကင် စနစ်အဟောင်းမှ ရက်ချိန်းပေးခြင်းအား ဒီဇင်ဘာ ၅ ရက်နေ့မှ စတင်ရပ်နား ထားခြင်းဖြစ်ပြီး စနစ်အသစ်အား အချိန်ကာလ ၃ ပတ်ခန့်အကြာတွင် စတင်အသုံးပြုနိုင်မည်ဟု နစက သတင်း ထုတ်ပြန်ရေးမှ ပြောသည်။
ထို့အပြင် စနစ်ဟောင်းမှ QR Code ဖြင့် ရက်ချိန်းရယူထားပြီးသားသူများအနေဖြင့် QR Code တွင် ပါရှိသည့် ရက်ချိန်းအတိုင်း ရုံးတွင်းသို့ ဆက်လက် အသုံးပြုဝင်ရောက်နိုင်ကြောင်းလည်း မြန်မာနိုင်ငံကူးလက်မှတ် ထုတ်ပေးရေးရုံးက ထုတ်ပြန်ထားသည်။

နိုင်ငံကူးလက်မှတ်ပြုလုပ်ရန်အတွက် အွန်လိုင်းဘိုကင်စနစ်ဖြင့် ရက်ချိန်းရယူခြင်းအား ဒီဇင်ဘာ ၅ ရက်နေ့မှ စတင်ရပ်နားထားခြင်းဖြစ်သည့်အတွက် ပွဲစားများမှတစ်ဆင့် ရက်ချိန်းဝင်ရောက်ခွင့် QR Code များ မတန်တဆ ဈေးဖြင့်ဝယ်ယူခြင်း၊ အခြားသူ၏ QR Code အားလက်လွှဲအသုံးပြုနိုင်ရန် ကြိုးပမ်းခြင်းများ မပြုလုပ်ကြရန်လည်း မြန်မာနိုင်ငံကူးလက်မှတ် ထုတ်ပေးရေးရုံးက ထုတ်ပြန်ထားသည်။

နိုင်ငံကူးလက်မှတ်ပြုလုပ်ရာတွင် ယခင် လူကိုယ်တိုင်သွားရောက်လျှောက်ထားခြင်းစနစ်နှင့် ယခု အန်လိုင်း ဘိုကင်စနစ်တို့တွင် အားနည်းချက် အားသာချက် နှစ်မျိုးလုံးရှိကြောင်း ထိုင်းတွင် အလုပ်သမားအရေး ကူညီ ဆောင်ရွက်ပေးနေသည့် FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။

နိုင်ငံကူးလက်မှတ်ထုတ်ပေးရေးရုံး အနီးတဝိုက်မြင်ကွင်း(ဓါတ်ပုံ-CNI)

“ကိုယ်တိုင်တင်ရတဲ့ဟာကျတော့ လူက လိမ်လို့မရတော့ဘူး။ ကိုယ်တိုင်တင်ပြီးတော့မှ လုပ်ရတာကိုး။ ဒါပေမယ့် လည်း ပြဿနာက လိုအပ်တဲ့ ဖောင်တွေ ရေးတယ်၊ ဖြည့်တယ်ဆိုတဲ့ကိစ္စမှာ ကျနော်တို့ ခုနကပြောတဲ့ အခြေခံ ပညာအရ အားနည်းတယ်။ နောက် ရုံးနဲ့ပတ်သက်တဲ့ဟာဆိုရင် မဖြည့်တတ်၊ မရေးတတ်တဲ့အတွက်ကြောင့် အများစုက အဲဒီပြဿနာတွေကို မရင်ဆိုင်ချင်ဘူး။ အဲဒီအခါကျတော့ ပွဲစားတွေ၊ အကျိုးဆောင် လုပ်ပေးတဲ့ လူတွေကိုပဲ သုံးကြတာများတယ်။ ဝန်ဆောင်မှုပေးရတဲ့ ဘယ်လိုဟာမျိုးတွေပဲ ရှိရှိ သူတို့က အဲဒီဟာတွေကို အသုံးချပြီး လုပ်ကြတာပဲ။ ဒါပေမယ့်လည်း ကျနော်တို့အလုပ်သမားတွေဘက်မှာလည်း နည်းပညာပိုင်းဆိုင်ရာ အားနည်းတဲ့အခါ ပွဲစားတွေအတွက် အခွင့်အရေးတစ်ခု အမြဲတမ်း ရှိနေမယ့် သဘောရှိတယ်။ ကိုယ်တိုင်လုပ်တဲ့ ဟာက ပိုပြီးတော့ အဆင်ပြေတယ်ဆိုရင် ဒီပွဲစားတွေရဲ့ ကြားဝင်ဆောင်ရွက်မှု အပိုင်းက နည်းသွားမှာကို ကျနော်တို့ တွေ့ရမှာ။ ပွဲစားကတော့ ကျနော်ထင်တယ် လျော့သွားစရာအကြောင်းမရှိဘူး။ တိုးလာဖို့ပဲ ရှိတယ်လို့ ကျနော်မြင်တယ်” ဟု ၎င်းက ပြောသည်။

ထို့ကြောင့် ယခုပြုလုပ်မည့် အွန်လိုင်းဘိုကင်စနစ်အသစ်သည် ပြည်သူအားလုံး လုပ်ဆောင်နိုင်သည့် လွယ်ကူ ရိုးရှင်းလှသည့် စနစ်မျိုးဖြစ်ရန် လိုအပ်ကြောင်းလည်း အလုပ်သမားအရေး ဆောင်ရွက်နေသူများနှင့် အေဂျင်စီ များက ပြောသည်။

လက်ရှိတွင် နိုင်ငံကူးလက်မှတ်အား ပွဲစားများမှတဆင့် ပြုလုပ်ရာတွင် ကျပ်ငွေ ၅ သိန်းခန့်အထိ ပေါက်ဈေး ရှိနေကြောင်းနှင့် ပွဲစားများမှ QR Code အတုပြုလုပ်၍ လိမ်လည်ခြင်းများလည်း ကြုံတွေ့နေကြရကြောင်း အလုပ်သမားအရေး ဆောင်ရွက်နေသူများနှင့် အေဂျင်စီများထံက သိရသည်။

CNI News

၂၀၂၂ ခုနှစ်၊ ဒီဇင်ဘာ ၆

စစ်ကိုင်းတိုင်းဒေသကြီး၊ တမူးမြို့ လမ်းလယ်ခေါင်တွင် အမျိုးသမီးတစ်ဦးအား တမူး-PDF အဖွဲ့မှ သတ်ဖြတ်ခဲ့မှု အပေါ် စုံစမ်းစစ်ဆေးပြီး ကျူးလွန်သူကို ထိရောက်စွာ အရေးယူသွားမည်ဖြစ်ကြောင်း အမျိုးသားညီညွတ်ရေး အစိုးရ (NUG)မှ ဒီဇင်ဘာ ၅ ရက်က ထုတ်ပြန်ခဲ့သည်။

အဆိုပါဖြစ်စဉ် အသေးစိတ်နှင့် ဖြစ်စဉ်အတွင်း PDF များ ပါဝင်ပတ်သက်ခြင်း ရှိ/မရှိ သိရှိနိုင်ရန် စုံစမ်းစစ်ဆေးခြင်း လုပ်ငန်းများကို သက်ဆိုင်ရာ စစ်ရေးတာဝန်ရှိသူများအား ညွှန်ကြားထားပြီးဖြစ်ကြောင်း ထုတ်ပြန်ချက်တွင် ဖော်ပြ ထားသည်။

NUG က “အဆိုပါ ဖြစ်စဉ်သည် စစ်ဘက်ဆိုင်ရာ ကျင့်ဝတ်စည်းကမ်းများအရ လုံးဝ လက်သင့် မခံနိုင်သည့် ကိစ္စ ရပ် ဖြစ်သောကြောင့် ဖြစ်စဉ်နှင့်ပတ်သက်သည့် ကွင်းဆက်များကို စုံစမ်းစစ်ဆေး ဖော်ထုတ် သွားမည်ဖြစ်ပြီး ကျူးလွန်ခဲ့သူ မည်သူ့ကိုမဆို ဥပဒေနှင့်အညီ ထိရောက်စွာ အရေးယူသွားမည် ဖြစ်သည်” ဟု ထုတ်ပြန်ခဲ့သည်။

 NUG ကိုတွေ့ရစဉ်

PDF များ အနေဖြင့် အကြမ်းဖက်မှု တိုက်ဖျက်ရေးနှင့် ပြည်သူ့ခုခံ တွန်းလှန်စစ် ဆင်နွဲရာတွင် စစ်ဘက်ဆိုင်ရာ ဥပဒေများ၊ စစ်ရေးညွှန်ကြားချက်များနှင့် အညီသာ စီမံဆောင်ရွက်ကြရမည်ဖြစ်ကြောင်း ဖော်ပြထားသည်။

အဆိုပါ ကိစ္စမျိုးကို ယခင်က စစ်ကိုင်းတိုင်းဒေသကြီးအတွင်းမှာပဲ ပေါ်ပေါက်ခဲ့ကြောင်း၊ သို့သော်လည်း NUG အနေဖြင့် လက်တွေ့မှာ ထိထိရောက်ရောက် အရေးယူနိုင်သည့် အနေအထား မရှိသေးကြောင်း နိုင်ငံရေးလေ့လာ သုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “အဲဒီလို ပြဿနာမျိုးတွေ မပြန့်ပွားအောင် လုပ်ဆောင်မယ့် သဘောကို ဖော်ပြတာပါဗျာ၊ တကယ်ကတော့ အဲဒီလို လုပ်ဖို့အတွက် NUG မှာလည်း ပြည့်စုံတဲ့ ယန္တရားတွေတော့ မရှိသေးပါဘူး။ သို့သော်ငြားလည်းပဲ ဒါမျိုးက အရေးမယူလို့လည်း မဖြစ်သေးဘူး။ ဒါတွေက PDF တွေအတွင်းမှာ ဒီအပေါ်ကနေပြီးတော့ စိတ်ဝမ်းကွဲမှု သဘော ထားအရ မကျေလည်မှုတွေ ဖြစ်လာတဲ့အခါ ဒါတွေကို လိုအပ်သလို အရေးယူမယ်လို့ ပြောသွားပါတယ်။ အဲဒီလို ကိစ္စမျိုးတွေ စစ်ကိုင်းတိုင်းမှာလည်း ပေါ်ခဲ့ပါတယ်။ ဒါပေမဲ့ လက်တွေ့မှာ ကျနော်တို့ ထိထိရောက်ရောက် အရေး ယူနိုင်တဲ့ အနေအထားတော့ မရှိပါဘူး။ ဘာလို့လဲဆိုတော့ ကိုယ့်မှာ စစ်ဆေးရေးယန္တရားနဲ့ အဲဒီမှာ လုံခြုံစိတ်ချရ တဲ့ အကျဉ်းစခန်းနေရာ၊ ဘာညာ ဘာမှ မရှိပါဘူး။ ဆိုလိုတာက ဒီအလုပ်တွေကို NUG အနေနဲ့တော့ လက်မခံ နိုင် ဘူး။ ပြန့်ပွားလို့လည်း မဖြစ်ဘူး။ ဒါသင့်လျော် လျှောက်ပတ်တဲ့ အစီအစဉ်တစ်ခုနဲ့ ကိုင်တွယ် အ‌ရေးယူမယ်လို့ ကျနော်တော့ သဘောပေါက်ပါတယ်” ဟု ပြောသည်။

တမူးမြို့သို့ အ၀င်လမ်းကိုတွေ့ရစဉ်

စစ်ဘက်ဆိုင်ရာ ကျင့်ဝတ်များ ကျူးလွန်မှုများအား စုံစမ်းစစ်ဆေးခြင်းနှင့် အရေးယူမှုများကို NUG အနေဖြင့် လုပ်ဆောင်နေကြောင်း၊ သို့သော်လည်း မည်ကဲ့သို့ အရေးယူထားသည်ကို အသေးစိတ် ပြောနိုင်ရန် ခက်ခဲကြောင်း ၎င်းက ပြောသည်။

အနာဂတ် ဖက်ဒရယ်ဒီမိုကရေစီ ပြည်ထောင်စုကို မျှော်ရည်လျက် ယခုဖြစ်စဉ် ကဲ့သို့သော ကိစ္စရပ်မျိုး(တမူး ဖြစ်စဉ်)နိုင်ငံ၏ မည်သည့်နေရာတွင်မှ ထပ်မံဖြစ်ပွားခြင်း မရှိစေရန် တာဝန်ယူမှု တာဝန်ခံမှု အပြည့်ဖြင့် ကွပ်ကဲကြပ်မတ် ဆောင်ရွက် သွားမည်ဖြစ်ကြောင်း NUG က ထုတ်ပြန်ခဲ့သည်။

တမူးမြို့၏ လမ်းလယ်ခေါင်တွင် အမျိုးသမီးတစ်ဦးအား ကိုယ်ထိလက်ရောက် အနိုင်ကျင့်ခြင်းနှင့် သတ်ဖြတ်ခြင်း သည် အမျိုးသမီးအခွင့်အရေးအပေါ် ခြိမ်းခြောက်နေခြင်းကို ပြသနေသည်ဟု အမျိုးသမီးအခွင့်အရေး လှုပ်ရှားသူ များက ပြောသည်။