- By CNI
- Category: နိုင်ငံရေး
- Hits: 674
CNI News
၂၀၂၃ ခုနှစ်၊ အောက်တိုဘာ ၁၇
တရုတ်အစိုးရက ဖမ်းဝရမ်းထုတ်ထားသည့် “ဝ”ပြည်သွေးစည်းညီညွတ်ရေးတပ်ဖွဲ့(UWSA)မှ လူငယ် ခေါင်းဆောင် ၂ ဦးကို UWSA မှ ထုတ်ပယ်လိုက်ကြောင်း ထုတ်ပြန်ခဲ့သည်။
ထုတ်ပယ်ခံရသူ နှစ်ဦးမှာ ပေါက်အိုက်ပန်း (ဆောက်လုပ်ရေးဌာနကြီးမှူး)နှင့် အိုက်ဟော်(မိုင်းလင်းခရိုင်မှူး)တို့ ဖြစ်သည်။
၎င်းတို့ နှစ်ဦး၏လုပ်ရပ်များသည် “ဝ”ဒေသ၏ နိုင်ငံတကာနှင့်သော်လည်းကောင်း၊ အိမ်နီးချင်း နိုင်ငံများနှင့် သော်လည်းကောင်း ဆက်ဆံရေးကို အကြီးအကျယ် ထိခိုက်စေခဲ့ကြောင်း၊ “ဝ”ဒေသနှင့် အိမ်နီးချင်းနိုင်ငံများ၏ နိုင်ငံရေးအရ အပြန်အလှန် ယုံကြည်မှုနှင့် မိတ်ဖက် ဆက်ဆံရေးကိုလည်း ထိခိုက်စေခဲ့ကြောင်း UWSA က ထုတ်ပြန်ခဲ့သည်။
UWSA ရဲ့ ထုတ်ပြန်ချက်ကို တွေ့ရစဉ်
ထို့နောက် အဆိုပါ ဖြစ်စဉ်ကို လေ့လာပြီးနောက် မိမိတို့၏ ဂုဏိသိက္ခာနှင့် ပတ်ဝန်းကျင် နိုင်ငံများနှင့် မိတ်ဝတ်မ ပျက် ဆက်ဆံရေးကို ထိန်းသိမ်းရန်အတွက် ပေါက်အိုက်ပန်းနှင့် အိုက်ဟော်တို့ကို ရာထူးမှ ထုတ်ပယ်လိုက် သည်ဟု UWSA မှ ထုတ်ပြန်ခဲ့သည်။
၎င်းတို့နှစ်ဦးသည် တရုတ်အစိုးရမှ အပြင်းအထန် ဖမ်းဆီးအရေးယူနေသည့် ကျားဖြန့်(အွန်လိုင်း ငွေလိမ်လည် ခြင်းနှင့် အွန်လိုင်းလောင်းကစား)လုပ်ငန်းများနှင့် ပတ်သက်နေခြင်းကြောင့် တရုတ်အစိုးရ ဖမ်းဝရမ်းထုတ်ထား ခြင်းခံထားရသည်။
လက်ရှိတွင် UWSA သည် “ဝ” ဒေသအတွင်းရှိ ကျားဖြန့်လုပ်ငန်း လုပ်ကိုင်နေသော တရုတ်နိုင်ငံသား ၁၀၀၀ ကျော်ကို ဖမ်းဆီးပြီး တရုတ်အစိုးရထံ လွှဲပြောင်းပေးလျက်ရှိသလို ကိုးကန့်ဒေသအတွင်းမှာလည်း ပြည်သူ့စစ် အဖွဲ့များက ကျားဖြန့်လုပ်ငန်း လုပ်ကိုင်နေသည့် တရုတ်နိုင်ငံသား ၃၀၀ ကျော်ကို ဖမ်းဆီး၍ တရုတ်အစိုးရထံ လွှဲပြောင်းပေးထားသည်။
- By CNI
- Category: နိုင်ငံရေး
- Hits: 1285
CNI News
၂၀၂၃ ခုနှစ်၊ အောက်တိုဘာ ၁၇
မဲဆန္ဒရှင်ပြည်သူများ၏ ဆန္ဒမှန်ကို ဖော်ထုတ်နိုင်သည့် လွတ်လပ်ပြီးတရားမျှတသော ရွေးကောက်ပွဲကို မဖြစ်မ နေ ပြုလုပ်ပေးသွားမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။
၂၀၂၃ ခုနှစ်၊ အောက်တိုဘာ ၁၅ ရက်နေ့က ကျင်းပခဲ့သော တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူ စာချုပ်(NCA) လက်မှတ်ထိုးခြင်း ၈ နှစ်မြောက် နှစ်ပတ်လည် အခမ်းအနားမှာ ၎င်းက အထက်ပါအတိုင်း ပြော သွားခဲ့ခြင်း ဖြစ်သည်။
ဗိုလ်ချုပ်မှူးကြီးမင်းအောင်လှိုင်က “ ကျနော်တို့ အစိုးရအနေနဲ့ကတော့ ပြည်သူ့ဆန္ဒဖြစ်တဲ့ စစ်မှန်စည်းကမ်း ပြည့်ဝတဲ့ ပါတီစုံဒီမိုကရေစီစနစ်ကို မလွဲမသွေ ဆက်လက်လျှောက်လှမ်းမှာပဲ ဖြစ်ပါတယ်။ ဒီလိုလျှောက်လှမ်း နိုင်ဖို့ လွတ်လပ်ပြီး တရားမျှတတဲ့ ပါတီစုံဒီမိုကရေစီ အထွေထွေရွေးကောက်ပွဲကြီး ကျင်းပနိုင်ရေး လိုအပ်တဲ့ ပြင်ဆင်မှုတွေ၊ အခင်းအကျင်းတွေကို ဆက်လက် ဆောင်ရွက်လျက်ရှိပါတယ်။ မဲဆန္ဒရှင် ပြည်သူများရဲ့ ဆန္ဒမှန် ကို ထုတ်ဖော်နိုင်တဲ့ လွတ်လပ်တရားမျှတတဲ့ အထွေထွေရွေးကောက်ပွဲကို မဖြစ်မနေ ပြုလုပ်ပေးသွားမှာဖြစ် ကြောင်း အလေးအနက် ပြောကြားလိုပါတယ်”ဟု ပြောသည်။
၂၀၂၀ အထွေထွေရွေးကောက်ပွဲ ကျင်းပနေစဉ်
ရွေးကောက်ပွဲကို မဖြစ်မနေ ကျင်းပသွားမည်ဟုပြောသော်လည်း မည်သည့် အချိန်တွင် ကျင်းပသွားမည်ကို တော့ အတိအကျ မပြောသွားပေ။
၂၀၂၄ ခုနှစ်တွင် နိုင်ငံတစ်ဝန်း သန်းခေါင်စာရင်း ကောက်ခံသွားမည်ဖြစ်ကြောင်း၊ သန်းခေါင်စာရင်း ကောက်ပြီး ပါက ရွေးကောက်ပွဲ ကျင်းပသွားမည်ဟု နစကဥက္ကဋ္ဌက ပြောကြားထားသည်။
ဗိုလ်ချုပ်မှူးကြီးမင်းအောင်လှိုင်က “ဒီမိုကရေစီရေးကို ဆောင်ရွက်နေပါတယ် ဆိုသူတွေကိုယ်တိုင်က မဲမသမာမှု တွေ ဆောင်ရွက်ခဲ့ပြီး ဥပဒေနဲ့အညီ ဒီမိုကရေစီ နည်းလမ်းကျဖြေရှင်းခဲ့ခြင်းမရှိဘဲ လက်နက်ကိုင် အကြမ်းဖက် လမ်းစဉ်ကို ရွေးချယ်ခဲ့ပါတယ်။ ဒီမိုကရေစီစနစ်ကို ကျင့်သုံးကာကွယ်နေပါတယ်ဆိုတဲ့ ပြည်ပနိုင်ငံအချို့က လည်း ဒီမိုကရေစီစနစ်နဲ့ ဆန့်ကျင်ဘက်ဖြစ်တဲ့ ဒီလက်နက်ကိုင် အကြမ်းဖက်တိုက်ခိုက်မှုတွေကို တိုက်ရိုက်ဖြစ်စေ၊ သွယ် ဝိုက်ဖြစ်စေ အားပေးတာတွေ၊ မြှောက်ထိုးပင့်ကော်ပြုလုပ်နေတာကို တွေ့ရပါတယ်။ ဒါတွေဟာ မြန်မာပြည်သူ တွေ လူထုရဲ့ ဆန္ဒဖြစ်တဲ့ ပါတီစုံဒီမိုကရေစီစနစ်ကို နှောင့်နှေးစေတာ၊ ဒီမိုကရေစီအမည်ခံ အာဏာရှင် စနစ်ကို အားပေးနေတာပဲ ဖြစ်ပါတယ်”ဟု ပြောသည်။
ဒေါ်အောင်ဆန်းစုကြည်နဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်
မြန်မာနိုင်ငံသည် ၂၀၁၀ အထွေထွေရွေးကောက်ပွဲ ကျင်းပခဲ့ပြီးနောက် ဦးသိန်းစိန် ဦးဆောင်သည့် အရပ်သား အစိုးရ တက်လာခဲ့ပြီး ၂၀၁၅ အထွေထွေရွေးကောက်ပွဲအား ဆက်လက် ကျင်းပခဲ့ရာမှာ ဒေါ်အောင်ဆန်းစု ကြည် ဦးဆောင်သော အရပ်သားအစိုးရ တက်လာခဲ့သည်။
ထို့နောက် ၂၀၂၀ အထွေထွေရွေးကောက်ပွဲ ကျင်းပခဲ့ရာ ဒေါ်အောင်ဆန်းစုကြည် ဦးဆောင်သည့် NLD ပါတီ အစိုးရက မဲဆန္ဒအငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ မြန်မာ့တပ်မတော်က ၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် ဖြုတ်ချ၍ နိုင်ငံတော်အာဏာကို ရယူလိုက်သည်။
မြန်မာ့တပ်မတော်က နိုင်ငံတော်အာဏာ ရယူပြီးနောက် နိုင်ငံတော်စီမံအုပ်ချုပ်ရေးကောင်စီ(နစက)ကို ဖွဲ့စည်း ၍ အုပ်ချုပ်ရေး၊ တရားစီရင်ရေး၊ ဥပဒေပြုရေးတို့ကို ဆောင်ရွက်နေသလို ရွေးကောက်ပွဲ ပြန်လည် ကျင်းပပေးနိုင်ရေး ကိုလည်း ဆောင်ရွက်လျက်ရှိသည်။
နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ရွေးကောက်ပွဲ မဖြစ်မနေ ကျင်းပပေးမည်ဖြစ်သလို ရွေးကောက် ပွဲ အနိုင်ရရှိသည့် ပါတီကို နိုင်ငံတော်အာဏာ ပြန်လည်လွှဲပြောင်းပေးသွားမည်ဟု ပြောထားသည်။
- By CNI
- Category: နိုင်ငံရေး
- Hits: 668
CNI News
၂၀၂၃ ခုနှစ်၊ အောက်တိုဘာ ၁၆
ရှမ်းပြည်ပြန်လည်ထူထောင်ရေးကောင်စီ(RCSS)ဥက္ကဋ္ဌ ဗိုလ်ချုပ်ကြီးယွက်စစ်နှင့် ကရင်အမျိုးသားအစည်းအရုံး (KNU)ဥက္ကဋ္ဌဟောင်း စောမူတူးစေးဖိုးတို့ကို အောက်တိုဘာ ၁၆ ရက်နေ့တွင် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က သီးခြားစီ တွေ့ဆုံခဲ့သည်။
ထို့နောက် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ထိုးထားသည့် လက်နက်ကိုင် ၁၀ ဖွဲ့အနက် ၇ ဖွဲ့မှ ခေါင်းဆောင်များနှင့်လည်း ဗိုလ်ချုပ်မှူးကြီးမင်းအောင်လှိုင်က တွေ့ဆုံခဲ့သည်။
စောမူတူးစေးဖိုးနဲ့ ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ်
အဆိုပါ တွေ့ဆုံမှုတွင် လက်ရှိ မြန်မာနိုင်ငံရေး အကျပ်အတည်းကို ဖြေရှင်းနိုင်ရေးနှင့် ငြိမ်းချမ်းရေးလုပ်ငန်းစဉ် များကို ဆွေးနွေးခဲ့ကြကြောင်း သိရသည်။
- By CNI
- Category: နိုင်ငံရေး
- Hits: 1010
CNI News
၂၀၂၃ ခုနှစ်၊ အောက်တိုဘာ ၁၆
အမျိုးသားပြန်လည်သင့်မြတ်ရေး လုပ်ငန်းစဉ်များကို မဖြစ်မနေ အကောင်အထည် ဖော်ရမည့်အချိန် ရောက်ရှိနေ ပြီဖြစ်သည့်တိုင် သူ့မူကိုယ့်မူ ကိုင်စွဲနေပါက နိုင်ငံရေး အကျပ်အတည်းကို ကျော်လွှားနိုင်မှာ မဟုတ်ကြောင်း သျှမ်းပြည်ပြန်လည်ထူထောင်ရေးကောင်စီ (RCSS/SSA) ဥက္ကဋ္ဌ ဗိုလ်ချုပ်ကြီး ယွက်စစ်က ပြောသည်။
အောက်တိုဘာ ၁၅ ရက်နေ့က နေပြည်တော်တွင် ကျင်းပခဲ့သည့် တစ်နိုင်ငံလုံး အပစ်အခတ်မှု ရပ်စဲရေး သဘော တူစာချုပ် (NCA) ၈ နှစ်ပြည့် အခမ်းအနားတွင် ပြောကြားသည့် မိန့်ခွန်း၌ ၎င်းက ထည့်သွင်း ပြောကြားခဲ့သည်။
ဗိုလ်ချုပ်ကြီး ယွက်စစ်က “ဒီနေ့ကာလဟာ အမျိုးသားပြန်လည်သင့်မြတ်ရေး လုပ်ငန်းစဉ်ကို မဖြစ်မနေ အကောင် အထည်ဖော်ရမယ့် အချိန်ရောက်နေပါပြီ။ ဒီအတွက် သက်ဆိုင်သူတွေအကြား ယုံကြည်မှု တည်ဆောက်ရေးက လည်း လိုအပ်နေပါတယ်။ သူ့မူကိုယ့်မူ အသေစွဲကိုင်နေကြမယ်ဆိုရင် လက်ရှိ နိုင်ငံရေး အကျပ်အတည်းကို ကျော် လွှားနိုင်မှာ မဟုတ်ပါဘူး။ ကြိုတင်စည်းကမ်း သတ်မှတ်ချက်များ မပါရှိတဲ့ ဆွေးနွေးခြင်းကသာ ပြည်ထောင်စုကြီး ရဲ့ ထွက်ရပ်ဖြစ်ပါတယ်။ နိုင်ငံတကာမိသားစုကြီးလည်း မိမိတို့ တိုင်းပြည်ရဲ့ အကျပ်အတည်းကို အားလုံးပါဝင်ပြီး အဓိပ္ပာယ်ပြည့်ဝတဲ့ နိုင်ငံရေးဆွေးနွေးပွဲများဖြင့် ဆွေးနွေး အဖြေရှာသွားနိုင်ရေးပံပိုးကူညီကြဖို့ အဆိုပြု တိုက်တွန်းလိုပါတယ်” ဟု ပြောသည်။
ဗိုလ်ချုပ်မှူးကြီးမင်းအောင်လှိုင်နဲ့အတူ လက်နက်ကိုင် ခေါင်းဆောင်များနဲ့နစက အဖွဲ့၀င်များကိုတွေ့ရစဉ်
NCA (၈) နှစ်ပြည့် အခမ်းအနားကို အပစ်ရပ် လက်မှတ်ရေးထိုးထားသည့် RCSS၊ ဒီမိုကရေစီ အကျိုးပြု ကရင် တပ်မတော် (DKBA)၊ ကရင်အမျိုးသားအစည်းအရုံး/ ကရင်အမျိုးသား လွတ်မြောက်ရေးတပ်မတော်- ငြိမ်းချမ်းရေး ကောင်စီ (KNU/KNLA-PC)၊ ရခိုင်ပြည်လွတ်မြောက်ရေးပါတီ(ALP)၊ ပအိုဝ်း အမျိုးသားလွတ် မြောက်ရေးအဖွဲ့ချုပ် (PNLO)၊ မွန်ပြည်သစ်ပါတီ (NMSP)၊ လားဟူဒီမိုကရက်တစ် အစည်းအရုံး(LDU)တို့ တက်ရောက်ခဲ့သည်။
၂၀၂၁ ခုနှစ်၊ ဖေဖော်ဝါရီ ၁ ရက်နေ့က မြန်မာ့တပ်မတော်မှာ အာဏာရယူလိုက်ခြင်းကြောင့် NCA ပျက်ပြယ်ပြီဟု ဆိုကာ အဆိုပါ အခမ်းအနားကို ကရင်အမျိုးသားအစည်းအရုံး (KNU)၊ ချင်းအမျိုးသားတပ်ဦး (CNF) နှင့် မြန်မာ နိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) တို့က တက်ရောက်ခြင်း မရှိခဲ့ပေ။
လက်ရှိ နိုင်ငံရေး အကျပ်အတည်းကြောင့် NCA အကောင်အထည်ဖော်မှုမှာ ရပ်နားသွားခဲ့ရကြောင်း NCA (၈) ပြည့် အခမ်းအနားသို့ တက်ရောက်လာသည့် KNU ဥက္ကဋ္ဌဟောင်း စောမူတူးစေးဖိုးက ပြောသည်။
ဗိုလ်ချုပ်မှူးကြီးမင်းအောင်လှိုင်နဲ့အတူ လက်နက်ကိုင် ခေါင်းဆောင်များ၊ နိုင်ငံတကာသံတမန်များကို တွေ့ရစဉ်
၎င်းက “ပြီးခဲ့တဲ့ကာလမှာ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA)ကို ဆက်လက် အကောင်အထည်ဖော်ခဲ့ရာမှာ အောင်မြင်သင့်သလောက် အောင်မြင်မှုရရှိခဲ့သလို နိုင်ငံရေး အကျပ်အတည်း ကြောင့် NCA အကောင်အထည် ဖော်မှုမှာလည်း ရပ်နားသွားခဲ့ရတယ်၊ ကျနော်တို့ အားလုံးဟာ မိမိတို့ အသီးသီးရဲ့ ဆန္ဒသဘောထားတွေကိုသာ ရှေ့တန်းမတင်ဘဲ အပြန်အလှန် လေးစားတန်ဖိုးထားမှုနဲ့ အမျိုးသားပြန်လည် သင့်မြတ်ရေးကို ဦးတည်ကာ ညှိနှိုင်းအဖြေရှာကြဖို့ကိုလည်း သက်ဆိုင်သူများ အားလုံးကို တောင်းဆိုလိုပါတယ်” ဟု ပြောသည်။
လက်ရှိတွင် NCA စာချုပ်ကို တိုင်းရင်းသား လက်နက်ကိုင် အဖွဲ့အစည်း ၁၀ ဖွဲ့က လက်မှတ် ရေးထိုးထားကြောင်း၊ မရေးထိုးရသေးသော တိုင်းရင်းသားလက်နက်ကိုင် အဖွဲ့အစည်းများကိုလည်း ဖိတ်ခေါ်ကြောင်း နစက ဥက္ကဋ္ဌက ပြောသည်။
သို့သော်လည်း နိုင်ငံရေး ခံယူချက်၊ သဘောထားများ၊ မူများ ကွဲလွဲမှုများကြောင့် တိုင်းပြည်မှာ လက်နက်ကိုင် ပဋိပက္ခများ ဆက်လက် ဖြစ်ပွားနေပြီး ယနေ့အချိန်ထိ ဖြေရှင်းနိုင်ခြင်း မရှိဘဲ ဖြစ်နေသည်။
- By CNI
- Category: နိုင်ငံရေး
- Hits: 600
CNI News
၂၀၂၃ ခုနှစ်၊ အောက်တိုဘာ ၁၄
အိန္ဒိယနိုင်ငံ၏ ဒုတိယအမျိုးသားလုံခြုံရေးဆိုင်ရာအကြံပေး H.E.Mr. Vikram Misri ဦးဆောင်သော ကိုယ်စားလှယ်အဖွဲ့နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ အောက်တိုဘာ ၁၄ ရက်နေ့က နေပြည်တော်မှာ တွေ့ဆုံခဲ့ကြသည်။
အဆိုပါ တွေ့ဆုံမှုတွင် နစကဘက်က ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်၊ နစက၏ တွဲဖက် အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး၊ နစကအဖွဲ့ဝင် ပြည်ထဲရေးဝန်ကြီးနှင့် NSPNC ဥက္ကဋ္ဌ ဒုတိယဗိုလ်ချုပ်ကြီး ရာပြည့် တို့တက်ရောက်ခဲ့ပြီး အိန္ဒိယဘက်က အိန္ဒိယနိုင်ငံ၏ ဒုတိယအမျိုးသားလုံခြုံရေးဆိုင်ရာအကြံပေး H.E. Mr. Vikram Misri ၊ အိန္ဒိယသံအမတ်ကြီး H.E.Mr. Vinay Kumar တို့ တက်ရောက်ခဲ့သည်။
၂၀၂၃ ခုနှစ်၊ အောက်တိုဘာ ၁၄ ရက်နေ့က ဗိုလ်ချုပ်မှူးကြီးမင်းအောင်လှိုင်နဲ့ H.E.Mr. Vikram Misri တို့တွေ့ဆုံစဉ်
ထို့နောက် ဒီမိုကရေစီနှင့်ဖက်ဒရယ်ကို အခြေခံသည့် ပြည်ထောင်စု တည်ဆောက်ရေး ဆောင်ရွက်နေမှု၊ ပြည်တွင်း ငြိမ်းချမ်းရေးရရှိအောင် ကြိုးပမ်းဆောင်ရွက်နေမှု၊ နယ်စပ်ဒေသ တည်ငြိမ်အေးချမ်းရေးအတွက် ပူးပေါင်းဆောင်ရွက်နေမှု၊ နှစ်နိုင်ငံ အပြန်အလှန် ကုန်သွယ်မှုများနှင့် ရင်းနှီးမြှုပ်နှံမှုများ၊ အစိုးရနှင့်တပ်မတော် အနေဖြင့် NCA လမ်းကြောင်းပေါ်၌ ခိုင်မာစွာရပ်တည် လျှောက်လှမ်းလျက်ရှိမှု၊ ပါတီစုံဒီမိုကရေစီ လမ်းကြောင်း ပေါ်၌ ခိုင်ခိုင်မာမာဖြင့် ဆက်လက်လျှောက်လှမ်းလျက်ရှိမှုတို့ကို နစကဥက္ကဋ္ဌက ချပြ ဆွေးနွေးခဲ့သည်။
အိန္ဒိယဘက်က အိန္ဒိယနိုင်ငံ၏ ဒုတိယအမျိုးသားလုံခြုံရေးဆိုင်ရာအကြံပေး H.E. Mr. Vikram Misri ၊ အိန္ဒိယသံအမတ်ကြီး H.E.Mr. Vinay Kumar တို့သည် အောက်တိုဘာ ၁၅ ရက်နေ့တွင် ကျင်းပမည့် NCA (၈) နှစ်မြောက် နှစ်ပတ်လည် အခမ်းအနားကို တက်ရောက်ကြမည်ဖြစ်ပြီး မိန့်ခွန်းလည်း ပြောကြားရန် ရှိကြောင်း သိရသည်။
- By CNI
- Category: နိုင်ငံရေး
- Hits: 616
CNI News
၂၀၂၃ ခုနှစ်၊ အောက်တိုဘာ ၁၃
တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) လက်မှတ်ရေးထိုးခြင်း (၈)နှစ်ပြည့် အခမ်းအနား တက်ရောက်ရန်အတွက် ရှမ်းပြည်ပြန်လည်ထူထောင်ရေးကောင်စီ(RCSS)ဥက္ကဋ္ဌ ဗိုလ်ချုပ်ကြီး ယွက်စစ်နှင့် ကရင်အမျိုးသားအစည်းအရုံး(KNU)ဥက္ကဋ္ဌ စောမူတူးစေးဖိုးတို့ အောက်တိုဘာ ၁၃ ရက်နေ့က တာချီလိတ်ကနေ လေယာဉ်ဖြင့် နေပြည်တော်သို့ ရောက်ရှိလာခဲ့သည်။
NCA (၈)နှစ်ပြည့် အခမ်းအနားတက်ရောက်ဖို့ တာချီလိတ်လေယာဉ်မှာ တွေ့ရသည့် လက်နက်ကိုင် ခေါင်းဆောင်များ(ရွှေတြိဂံသတင်းဌာန)
ဗိုလ်ချုပ်ကြီးယွက်စစ်၊ စောမူတူးစေးဖိုးတို့နှင့်အတူ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO) နာယက ဗိုလ်မှူးကြီးခွန်ဥက္ကာ၊ လားဟူဒီမိုကရက်တစ် အစည်းအရုံး(LDU)ဥက္ကဋ္ဌ စောလမွန်၊ ရခိုင်ပြည်လွတ်မြောက်ရေး ပါတီ(ALP)ခေါင်းဆောင်ဖြစ်ခဲ့ဖူးသူ ဦးခိုင်စိုးနိုင်အောင်၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး(ABSDF)ဒုဥက္ကဋ္ဌ ရဲဘော်မျိုးဝင်းတို့ကိုလည်း တွေ့ရသည်။
ရဲဘော်မျိုးဝင်းသည် ABSDF ကိုယ်စားပြု တက်ရောက်ခြင်းတက် တစ်သီးပုဂ္ဂလိက အနေအထားဖြင့် တက်ရောက်ခြင်း ဖြစ်ကြောင်း သိရသည်။
NCA (၈)နှစ်ပြည့် နှစ်ပတ်လည် အခမ်းအနားကို အောက်တိုဘာ ၁၅ ရက်နေ့တွင် နေပြည်တော်ရှိ MICC-2 မှာ ကျင်းပသွားမည်ဖြစ်သည်။
- By Webmaster
- Category: နိုင်ငံရေး
- Hits: 633
CNI News
၂၀၂၃ ခုနှစ်၊ အောက်တိုဘာ ၁၃
တစ်နိုင်ငံလုံး အပစ်အခတ်ရပ်စဲရေး သဘောတူစာချုပ် (NCA) ၈ နှစ်ပြည့် အခမ်းအနားကို အပစ်ရပ် လက်မှတ် ရေးထိုးထားသည့် တိုင်းရင်းသား လက်နက်ကိုင် အဖွဲ့အစည်း ၇ ဖွဲ့ တက်ရောက်မည် ဖြစ်ကြောင်း NCA လက်မှတ် ထိုးထားသည့် လက်နက်ကိုင်များဖြင့် ဖွဲ့စည်းထားသော ငြိမ်းချမ်းရေး လုပ်ငန်းစဉ် ဦးဆောင်အဖွဲ့(PPST)မှ ပြောခွင့်ရပုဂ္ဂိုလ် နန်းယဉ်ယဉ်စိုးက CNI သတင်းဌာနသို့ ပြောသည်။
တက်ရောက်မည့် အဖွဲ့များမှာ နေပြည်တော်တွင် နစကနှင့် ငြိမ်းချမ်းရေး ဆွေးနွေးနေသော အဖွဲ့များဖြစ်ကြောင်း ၎င်းက ပြောသည်။
နန်းယဉ်ယဉ်စိုးက “ဒီအောက်တိုဘာ ၁၅ မှာ ကျင်းပမယ့် ဒီ NCA ၈ နှစ်မြောက် နှစ်ပတ်လည် အခမ်းအနား ကျမ တို့ NCA-S EAO ၇ ဖွဲ့က တက်ရောက်ဖို့ အစီအစဉ်ရှိပါတယ်။ အဲဒီ ၇ ဖွဲ့မှာ ဆိုရင်တော့ ALP ပါမယ်၊ DKBA ပါမယ်၊ KNU/KNLA-PC ပါမယ်၊ LDU လားဟူပါမယ်၊ PNLO ပါမယ်၊ RCSS ပါမယ်၊ NMSP ပါမယ်၊ လက်ရှိ ကျမတို့ စစ်ကောင်စီနဲ့ သွားရောက်ဆွေးနွေးနေတဲ့ ၇ ဖွဲ့ဖြစ်ပါတယ်” ဟု CNI သတင်းဌာနသို့ ပြောသည်။
၂၀၁၅ ခုနှစ်၊ အောက်တိုဘာ ၁၅ ရက်က NCA စာချုပ် ရေးထိုးနေကြစဉ်
ယခုလ အောက်တိုဘာ ၁၅ ရက်နေ့တွင် NCA လက်မှတ်ရေးထိုးခြင်း ၈ နှစ်ပြည့် အခမ်းအနားကို ကျင်းပသွားမည် ဖြစ်ကြောင်း၊ အဆိုပါ အခမ်းအနားသို့ လက်မှတ် ရေးထိုးထားသော တိုင်းရင်းသား လက်နက်ကိုင် အဖွဲ့အစည်းများ အပြင် လက်မှတ်မထိုးရသေးသော အဖွဲ့အစည်းများနှင့် ပြင်ပနိုင်ငံများကိုလည်း ဖိတ်ကြားထားကြောင်း နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။
NCA (၈) နှစ်ပြည့် နှစ်ပတ်လည် အခမ်းအနားကနေ တိုင်းပြည် ငြိမ်းချမ်းရေးအတွက် အဖြေရှာနိုင်လိမ့်မည်ဟု ယုံကြည် ကြောင်း (PPST)မှ ပြောခွင့်ရပုဂ္ဂိုလ် နန်းယဉ်ယဉ်စိုးက ပြောသည်။
အဆိုပါ နှစ်ပတ်လည် အခမ်းအနားမှတဆင့် တိုင်းပြည်ငြိမ်းချမ်းရေးအတွက် ဖြစ်လာမည်ဆိုခြင်းက ယုံကြည်ရ ခက်သေးကြောင်း မွန်ညီညွတ်ရေးပါတီ (MUP) မှ ပြောရေးဆိုခွင့်ရှိသူ နိုင်သန်းရွှေက CNI သတင်းဌာနသို့ ပြော သည်။
NSPNC နဲ့ အပစ်ရပ် ၇ ဖွဲ့ တွေ့ဆုံ ဆွေးနွေးစဉ်
၎င်းက “ဒီ NCA နှစ်ပတ်လည် အနေနဲ့ကတော့ ဖြစ်လာနိုင်မယ်လို့တော့ ယုံကြည်ရ ခက်တယ်လေ၊ ဘာဖြစ်လို့လဲ ဆိုတော့ ဆွေးနွေးတွေ ရှိတယ်လို့ ကျနော်တို့ ကြားတယ်၊ အဲဒီဆွေးနွေးပွဲကနေ ထွက်လာတဲ့ အဖြေပေါ်မှာ မူတည် ပြီးတော့ ကျနော်တို့ ပြောရမှာပေါ့နော်၊ လောလောဆယ်တော့ ဒီအခမ်းအနား တစ်ခုတည်း ကျနော်တို့ ပြောလို့ မရဘူးပေါ့” ဟု ပြောသည်။
မြန်မာ့တပ်မတော်က အာဏာရယူမှုကို ဖယ်ရှားပြီး နိုင်ငံရေးတွင် စစ်တပ် ပါဝင်နေမှုကို အဆုံးသတ်နိုင်မှ တွေ့ဆုံ ဆွေးနွေးနိုင်မည်ဟု NCA လက်မှတ်ရေးထိုးထားသော ကရင်အမျိုးသားအစည်းအရုံး (KNU)၊ ချင်းအမျိုးသားတပ်ဦး (CNF) နှင့် မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) တို့မှ အောက်တိုဘာ ၁၂ ရက် မှာ ထုတ်ပြန်ခဲ့သည်။
NCA ကို KNU ၊ CNF၊ ABSDF၊ ရှမ်းပြည်ပြန်လည် ထူထောင်ရေးကောင်စီ(RCSS)၊ ဒီမိုကရေစီ အကျိုးပြုကရင် တပ်မတော်(DKBA)၊ ကရင်အမျိုးသားအစည်းအရုံး/ ကရင်အမျိုးသား လွတ်မြောက်ရေး တပ်မတော်- ငြိမ်းချမ်းရေး ကောင်စီ (KNU/KNLA-PC)၊ ရခိုင်ပြည် လွတ်မြောက်ရေး ပါတီ(ALP)၊ ပအိုဝ်း အမျိုးသား လွတ်မြောက်ရေး အဖွဲ့ ချုပ်(PNLO) တို့က ၂၀၁၅ ခုနှစ်၊ အောက်တိုဘာ ၁၅ ရက်မှာ လက်မှတ်ရေးထိုးခဲ့သည်။
ထို့နောက် မွန်ပြည်သစ်ပါတီ(NMSP)၊ လားဟူဒီမိုကရက်တစ်အစည်းအရုံး(LDU)တို့က ၂၀၁၈ ခုနှစ်၊ ဖေဖော်ဝါရီ ၁၂ ရက်တွင် NCA စာချုပ်ကို လက်မှတ်ထိုးခဲ့သည်။
- By CNI
- Category: နိုင်ငံရေး
- Hits: 627
CNI News
၂၀၂၃ ခုနှစ်၊ အောက်တိုဘာ ၁၂
လူထုထိခိုက် သေဆုံးမှုနည်းရန် လက်နက်ကိုင်အဖွဲ့အစည်းများ အနေဖြင့် တိုက်ပွဲဖြစ်ပွားမှုကို ချင့်ချိန်သင့်ကြောင်း တအာင်းအမျိုးသမီးအဖွဲ့အစည်း (TWO)မှ ပြောရေးဆိုခွင့်ရှိသူ လွေးချီဆငါးက CNI သတင်းဌာနသို့ ပြောသည်။
ပြည်သူလူထုများ နေထိုင်ရာ ကျေးရွာ၊ မြို့ပြများတွင် တိုက်ပွဲဖြစ်ပွားမှုကို ရှောင်ရှားသင့်ကြောင်း၊ ကျေးရွာများတွင် တိုက်ပွဲဖြစ်ပွားခြင်းကြောင့် လူထုထိခိုက်မှု ဖြစ်ပွားနိုင်သည်ကို သိရှိထားရန် လိုအပ်ကြောင်း ၎င်းက ပြောသည်။
လွေးချီဆငါးက “အရပ်သား ထိခိုက်မှု နည်းအောင်ဆိုရင်တော့ တိုက်ပွဲဖြစ်တာပဲဖြစ်ဖြစ်၊ တခြားစစ်ဆင်ရေး ကိစ္စ တွေပဲဖြစ်ဖြစ်၊ ကျေးရွာတွေ အနီးအနားမှာ မြို့တွေ အနီးအနားမှာ လူထုတွေ နေထိုင်ရာ ဧရိယာတွေမှာ မဟုတ်တဲ့ ပုံစံမျိုးတွေတော့ ရှောင်တယ်၊ ဒါလုပ်ခြင်းအားဖြင့် ပြည်သူလူထု အပေါ်မှာ ဘယ်လို သက်ရောက်နိုင်မလဲဆိုတဲ့ ချင့်ချိန်မှုတွေ ဆောင်ရွက်မှုတွေကို အရင်ဆုံး လေ့လာသင့်တယ်လို့တော့ မြင်တာပေါ့နော်၊ ဒါဖြစ်သွားပြီ၊ ဒီဧရိယာ မှာ ဒါမျိုးတိုက်ခိုက်မှု လုပ်ပြီဆိုရင်တော့ လူထုတွေ ဘယ်လောက်အထိ ထိခိုက်နစ်နာ နိုင်မလဲဆိုတဲ့ဟာ ချင့်ချိန် စေချင်တယ်၊ ဒီအပေါ်မှာ ကြည့်ခြင်းအားဖြင့် ပြည်သူလူထုအပေါ်မှာ ထိခိုက်မှုတွေက နည်းနည်းလေးတော့ လျော့ ကျသွားနိုင်မယ်လို့တော့ ထင်တာပေါ့နော်” ဟု CNI သတင်းဌာနသို့ ပြောသည်။
၂၀၁၇ ခုနှစ်က တပ်မတော်နှင့် AA တိုက်ပွဲကြောင့် ပလက်၀မြို့နယ်၊ ရှင်းလက်၀မှာ တိုက်ပွဲရှောင်နေကြသူ များကို တွေ့ရစဉ်
၂၀၂၁ ခုနှစ်၊ ဖေဖော်ဝါရီ ၁ ရက်နေ့ နောက်ပိုင်း ဖြစ်ပေါ်ခဲ့သော နိုင်ငံရေး အခင်းအကျင်းများကြောင့် နိုင်ငံတစ်ဝှမ်း လက်နက်ကိုင်ပဋိပက္ခများ ကျယ်ကျယ်ပြန့်ပြန့် ဖြစ်ပေါ်လျက်ရှိနေသည်။
အဆိုပါ ပဋိပက္ခများကြောင့် လူသေဆုံးမှု၊ နေအိမ် မီးလောင်ပျက်စီးမှု၊ ဆေးရုံ၊ စာသင်ကျောင်း၊ ဘာသာရေး အဆောက်အဦများ ပျက်စီးဆုံးရှုံးမှု၊ အရပ်သားများ ဘေးလွှတ်ရာ ထွက်ပြေးတိမ်းရှောင် ရမှုများ ဖြစ်ပွားနေသည်။
မည်သည့် လက်နက်ကိုင် အဖွဲ့အစည်းမဆို အရပ်သား ထိခိုက်သေဆုံးမှု မရှိရေး လုပ်ဆောင်ရန် လိုအပ်ကြောင်း ကချင်နိုင်ငံရေးသမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။
၎င်းက “အဲဒီဟာတွေကြတော့ လက်နက်ကိုင် အဖွဲ့အစည်းပေါ့ဗျာ၊ စကစဖြစ်ဖြစ်၊ တော်လှန်ရေး အဖွဲ့အစည်းပဲ ဖြစ်ဖြစ် နှစ်ဖွဲ့စလုံး အပေါ်မှာပဲ မူတည်ပါတယ်။ ဒါကတော့ ဘယ်လောက်အထိ ရှောင်မလဲ၊ ဘယ်လောက်အထိ လုပ်မလဲ၊ နောက်တစ်ချက်ကတော့ ကျနော်တို့ ကချင်လူမျိုးတွေရဲ့ ကျေးရွာဆိုရင် ဟိုးတုန်းကတည်းက အကုန် လုံး ပျက်စီးကုန်တာပေါ့ဗျာ၊ မီးရှို့တာတို့ ဘာတို့ အကုန်လုံး လက်နက်ကိုင် အဖွဲ့အစည်းတွေ တော်လှန်ရေး ဖြစ်ပြီ ဆိုတာကတော့ မလွှဲမသွေကြုံနေရမယ့် အပိုင်းတွေ ဖြစ်ပါတယ်၊ ဒါပေမဲ့ ကာယကံရှင် လက်နက်ကိုင်တဲ့ အဖွဲ့ အစည်းတွေဟာ ဒီဟာကို ဘယ်လိုမျိုး ရှောင်ရမလဲ ပြည်သူလူထုကို တစ်သားတည်းဖြစ်ဖို့ ပြည်သူလူထုနဲ့ တစ်သားတည်း ဖြစ်ဖို့ဆိုတာက ဒါတွေကို ရှောင်ဖို့ လိုတာပေါ့ဗျာ၊ ဒါမှမဟုတ်ဘူးဆိုရင် အမုန်းပွားပြီးမှ နောင် ခေတ်အဆက်ဆက် ဒီဟာတွေက ပုံရိပ်ကျန်ဖို့ပဲ ရှိပါတယ်၊ အခုလည်း အခြေအနေမျိုး ကျနော်တို့ကြတော့ လုပ်ပါ၊ မလုပ်ပါဆိုတဲ့ဟာမျိုး ကျနော်တို့ဆီမှာလည်း ပြောပိုင်ခွင့်မရှိဘူး။ ဒါပေမဲ့ စစ်တပ်ကနေ ဒါတွေကတော့ ဘယ်လို မျိုး လုပ်ရင်ကောင်းမလဲ၊ ဘာတွေ ဘယ်လိုမျိုး ရှောင်ရမလဲဆိုတဲ့ အပေါ်မှာပဲ မူတည်ပါတယ်၊ ကျနော်တို့ကတော့ ဒီဟာမျိုး မီးရှို့တာတို့၊ သတ်ဖြတ်တာတို့ မြင်တွေ့နေရတာတော့ ဘယ်အဖွဲ့အစည်းပဲဖြစ်ဖြစ် ဒီဟာကို မကြိုက်ပါ ဘူး။ ဒါကြောင့်မို့လို့ ဒီဟာတွေက ရှောင်သင့်တယ်ဆိုတဲ့ဟာမျိုးတော့ ကျနော်ပြောလိုပါတယ်” ဟု ပြောသည်။
၂၀၁၇ ခုနှစ်က တပ်မတော်နှင့် AA တိုက်ပွဲကြောင့် ပလက်၀မြို့နယ်၊ ရှင်းလက်၀မှာ တိုက်ပွဲရှောင်နေကြသူ များကို တွေ့ရစဉ်
၂၀၂၃ ခုနှစ် အောက်တိုဘာလ (၂) ရက်နေ့အထိ ကုလသမဂ္ဂ၏ နောက်ဆုံး ကိန်းဂဏန်းများအရ မြန်မာနိုင်ငံ တစ်ဝန်း ပြည်တွင်းနေရပ်စွန့်ခွာသူဦးရေ (၂) သန်းနီးပါးရှိလာပြီ ဖြစ်ကြောင်း UNOCHA က ယနေ့ (အောက်တိုဘာ ၁၂) ရက်တွင် ထုတ်ပြန်ခဲ့သည်။
ထို့အတူ လူဦးရေ ၁ ဒသမ ၇ သန်းနီးပါးဟာ ၂၀၂၁ ခုနှစ် ဖေဖော်ဝါရီလ မြန်မာ့တပ်မတော်၏ အရပ်သား အစိုးရကို ဖြုတ်ချလိုက်ပြီးနောက် ဖြစ်ပေါ်လာသည့် ပဋိပက္ခနှင့် မလုံခြုံမှုများကြောင့် နေရပ်စွန့်ခွာ ထွက်ပြေးကြရ သူများ ဖြစ်ကြောင်း ဖော်ပြထားသည်။
- By CNI
- Category: နိုင်ငံရေး
- Hits: 605
CNI News
၂၀၂၃ ခုနှစ်၊ အောက်တိုဘာ ၁၁
တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ၈ နှစ်ပြည့် နှစ်ပတ်လည် အခမ်းအနားကနေ တိုင်းပြည်ငြိမ်းချမ်းရေးအတွက် အဖြေရှာနိုင်လိမ့်မည်ဟု ယုံကြည်ကြောင်း NCA လက်မှတ်ထိုးထားသည့် လက်နက်ကိုင်များဖြင့် ဖွဲ့စည်းထားသော ငြိမ်းချမ်းရေး လုပ်ငန်းစဉ် ဦးဆောင်အဖွဲ့(PPST)မှ ပြောခွင့်ရပုဂ္ဂိုလ် နန်းယဉ်ယဉ်စိုးက CNI သတင်းဌာနသို့ ပြောသည်။
NCA အကောင်အထည်ဖော်မှုတွင်လည်း အခက်အခဲများ ရှိခဲ့ကြောင်း၊ ပြည်သူများ လိုလားသည့် ဒီမိုကရေစီ ဖက်ဒရယ်ပြည်ထောင်စု တည်ဆောက်ရေးအတွက်လည်း မည်ကဲ့သို့ လျှောက်လှမ်းမလဲဆိုသည်ကို ဆွေးနွေး သွားမည်ဖြစ်ကြောင်း ၎င်းက ပြောသည်။
နန်းယဉ်ယဉ်စိုးက “ကျမတို့တွေသည် NCA ကို ကိုယ်တိုင်ကိုယ်ကျ ရေးထိုးတဲ့ ဖြစ်စဉ်တွေမှာ ပါဝင်ခဲ့တဲ့ Joint Ownership ဖြစ်တဲ့အတွက်ကြောင့်မို့လို့ NCA အကောင်အထည်ဖော်ခဲ့တဲ့ တောက်လျှောက်မှာ အားနည်းချက်တွေ ရှိခဲ့တယ်၊ အားသာချက်တွေရှိခဲ့တယ်၊ စိန်ခေါ်မှုတွေ ရှိခဲ့တယ်၊ အခက်အခဲတွေ ရှိခဲ့တာပေါ့နော်၊ ဒီဟာတွေ အားလုံး ကို ဒီကနေ့ တွေ့ဆုံပွဲ အခင်းအကျင်းကနေ ကျမတို့ သင်ခန်းစာတွေယူပြီးတော့ ရှေ့ဆက်တိုင်းပြည်ရဲ့ ငြိမ်းချမ်း ရေး မြန်မာပြည်ရဲ့ အနာဂတ် ပြည်ထောင်စု၊ ပြည်ထောင်စုသားတွေ လိုလားတဲ့ မြန်မာနိုင်ငံရဲ့ ဒီမိုကရေစီ ဖက်ဒရယ် တည်ဆောက်ရေးဖြစ်စဉ် ဘယ်လိုလျှောက်လှမ်းမလဲဆိုတဲ့ ပြန်ပြီးတော့မှ ထိတွေ့ဆက်ဆံမှုတွေနဲ့ ကြိုးပမ်းမှုတွေကို ကျမတို့ ဒီတွေ့ဆုံပွဲကနေ တက်ရောက်တဲ့ ပွဲကနေပြီးတော့ ဆွေးနွေးအဖြေရှာနိုင်မယ်လို့ ယုံကြည်တယ်ဆိုတာကို ကျမအနေနဲ့ ဖြည့်စွက်ပြီး ပြောချင်ပါတယ်” ဟု ပြောသည်။
PPST ပြောခွင့်ရပုဂ္ဂိုလ် နန်းယဉ်ယဉ်စိုးကို တွေ့ရစဉ်
ယခုလ အောက်တိုဘာ ၁၅ ရက်နေ့တွင် NCA လက်မှတ်ရေးထိုးခြင်း ၈ နှစ်ပြည့် အခမ်းအနားကို ကျင်းပသွားမည် ဖြစ်ကြောင်း၊ အဆိုပါ အခမ်းအနားသို့ လက်မှတ် ရေးထိုးထားသော တိုင်းရင်းသား လက်နက်ကိုင် အဖွဲ့အစည်းများ အပြင် လက်မှတ်မထိုးရသေးသော အဖွဲ့အစည်းများနှင့် ပြင်ပနိုင်ငံများကိုလည်း ဖိတ်ကြားထားကြောင်း နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။
အဆိုပါ ၈ နှစ်ပြည့် အခမ်းအနားကို အပစ်ရပ် လက်မှတ်ရေးထိုးထားသည့် တိုင်းရင်းသားလက်နက်ကိုင် အဖွဲ့အစည်း(၇) ဖွဲ့ တက်ရောက်မည်ဖြစ်ကြောင်း PPST ၏ ပြောခွင့်ရပုဂ္ဂိုလ် နန်းယဉ်ယဉ်စိုးက ပြောသည်။
၎င်းက “ဒီအောက်တိုဘာ ၁၅ မှာ ကျင်းပမယ့် ဒီ NCA ၈ နှစ်မြောက် နှစ်ပတ်လည် အခမ်းအနား ကျမတို့ NCA-S EAO ၇ ဖွဲ့က တက်ရောက်ဖို့ အစီအစဉ်ရှိပါတယ်။ အဲဒီ ၇ ဖွဲ့မှာ ဆိုရင်တော့ ALP ပါမယ်၊ DKBA ပါမယ်၊ KNU/KNLA-PC ပါမယ်၊ LDU လားဟူပါမယ်၊ PNLO ပါမယ်၊ RCSS ပါမယ်၊ NMSP ပါမယ်၊ လက်ရှိ ကျမတို့ စစ်ကောင်စီနဲ့ သွားရောက်ဆွေးနွေးနေတဲ့ ၇ ဖွဲ့ဖြစ်ပါတယ်” ဟု CNI သတင်းဌာနသို့ ပြောသည်။
NCA လက်မှတ်ထိုးခြင်း ၆ နှစ်ပြည့် အခမ်းအနား ကျင်းပခဲ့စဉ်
NCA စာချုပ်ကို လက်မှတ်ရေးထိုးထားသည့် ကရင်အမျိုးသားအစည်းအရုံး(KNU)၊ မြန်မာနိုင်ငံလုံးဆိုင်ရာ ကျောင်း သားများ ဒီမိုကရက်တစ် တပ်ဦး (ABSDF)၊ ချင်းအမျိုးသားတပ်ဦး(CNF) တို့မှာ တက်ရောက်မှာ မဟုတ်ဟု သိရ သော်လည်း အချို့သော အဖွဲ့ဝင်များမှာ ပုဂ္ဂိုလ်ရေးအရ တက်ရောက်မည်ဖြစ်ကြောင်း သိရသည်။
NCA ကို KNU ၊ CNF၊ ABSDF၊ ရှမ်းပြည်ပြန်လည် ထူထောင်ရေးကောင်စီ(RCSS)၊ ဒီမိုကရေစီ အကျိုးပြုကရင် တပ်မတော်(DKBA)၊ ကရင်အမျိုးသားအစည်းအရုံး/ ကရင်အမျိုးသား လွတ်မြောက်ရေး တပ်မတော်- ငြိမ်းချမ်းရေး ကောင်စီ (KNU/KNLA-PC)၊ ရခိုင်ပြည် လွတ်မြောက်ရေး ပါတီ(ALP)၊ ပအိုဝ်း အမျိုးသား လွတ်မြောက်ရေး အဖွဲ့ ချုပ်(PNLO) တို့က ၂၀၁၅ ခုနှစ်၊ အောက်တိုဘာ ၁၅ ရက်မှာ လက်မှတ်ရေးထိုးခဲ့သည်။
ထို့နောက် မွန်ပြည်သစ်ပါတီ(NMSP)၊ လားဟူဒီမိုကရက်တစ်အစည်းအရုံး(LDU)တို့က ၂၀၁၈ ခုနှစ်၊ ဖေဖော်ဝါရီ ၁၂ ရက်တွင် NCA စာချုပ်ကို လက်မှတ်ထိုးခဲ့သည်။
Page 126 of 255
Connect with us
