CNI News

၂၀၂၂ ခုနှစ်၊ နိုဝင်ဘာ ၁၄

ဒေါ်အောင်ဆန်းစုကြည် အနေဖြင့် ၎င်း၏ နိုင်ငံရေးသဘောထားကို NLD ဗဟိုအလုပ်အမှု ဆောင်အဖွဲ့နှင့် တွေ့ဆုံ ဆွေးနွေးခွင့်ရမှသာလျှင် ထုတ်ဖော်ပြောဆိုနိုင်မည်ဖြစ်ကြောင်း ပြောကြားချက်ကို မိမိတို့ ငြိမ်းချမ်းရေးလုပ်ငန်းစဉ် ဦးဆောင်အဖွဲ့(PPST) အနေဖြင့် ထောက်ခံကြိုဆိုပါကြောင်း နိုဝင်ဘာ ၁၄ ရက်တွင် ထုတ်ပြန်ခဲ့သည်။

PPST ထုတ်ပြန်ချက်

ထို့နောက် အာဆီယံ၏ ဘုံသဘောတူညီချက်(၅)ချက် အကောင်အထည်ဖော်အပေါ်တွင် SAC အနေဖြင့် ပူးပေါင်းပါဝင်ပါရန် အမေရိကန်ပြည်ထောင်စုသမ္မတ ဂျိုးဘိုင်ဒန်၏ ထောက်ခံကြိုဆိုကြောင်း PPST ၏ ထုတ်ပြန်ချက်တွင် ဖော်ပြထားသည်။

လက်ရှိတွင် ဒေါ်အောင်ဆန်းစုကြည်သည် ဖမ်းဆီးချုပ်နှောင်ခံထားရပြီး တရားဥပဒေအရ အမှုရင်ဆိုင်နေရသလို အမျိုးသားဒီမိုကရေစီအဖွဲ့ချုပ်(NLD)၏ CEC အဖွဲ့ဝင် တချို့ လည်း ဖမ်းဆီးထိန်းသိမ်းခံထားရသည်။

CNI News

၂၀၂၂ ခုနှစ်၊ နိုဝင်ဘာ ၁၄

ရခိုင်အမျိုးသား တော်လှန်ရေး အဖွဲ့အစည်း အချင်းချင်း စိတ်ဝမ်းကွဲနေမှုမှာ ကောင်းသည့် လက္ခဏာမဟုတ် ကြောင်း ရခိုင်ပြည်လွတ်မြောက်ရေးပါတီ (ALP)မှ ဒုဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြော သည်။

လက်ရှိတွင် Facebook(ဖေ့စ်ဘွတ်ခ်)၌ အကောင့်(Account)အတုများဖြင့် လူထု ထင်ယောင်ထင်မှား ဖြစ်အောင် လုပ်ဆောင်နေကြောင်း၊ တော်လှန်ရေး အဖွဲ့အစည်း အချင်းချင်း ရည်မှန်းချက်တူသော်လည်း စိတ်ဝမ်းကွဲမှု ရှိလာ ကြောင်း ၎င်းက ပြောသည်။

ဒေါ်စောမြရာဇာလင်းက “ကွဲတယ်ဆိုကတည်းက သူ့ကို ထောက်ခံတဲ့လူ ကိုယ့်ကိုယ် ထောက်ခံတဲ့လူ စသည် အား ဖြင့် အများကြီး ရှိပါတယ်။ ပြီးလို့ရှိရင် ဥပမာ မတော်ရာပေါ့နော်၊ Facebook အတုတွေ အများကြီး လုပ်ပြီးတော့မှ တိုက်ခိုက်တာ၊ အတုတွေ ဆိုတာကတော့ တော်တော်ကို ပုံတူ အကုန်လုံး Page တွေက ပုံတူ အတုယူပြီးမှ အဲဒီလို မျိုး ထင်ထောင်ထင်မှား ဖြစ်စေသည်သာမက ပြည်သူတွေ အကြည်အညှိပျက်အောင် အဲဒီလိုမျိုး အထိတောင်မှ ရှိ နေတယ်၊ အဲဒါ ဘယ်သူဘယ်ဝါလို့ လက်ကိုင် မပြောနိုင်ပေမယ့်၊ တစ်ဖွဲ့နဲ့ တစ်ဖွဲ့ မတူတဲ့ လူတွေထဲမှာ ဖြစ်ပေါ်နေ တယ်ဆိုတာမျိုးကတော့ ထင်လို့ရတာပေါ့နော်၊ ဘယ်လိုပဲ ပြောပြော တစ်ယောက်နဲ့ တစ်ယောက် စိတ်ဝမ်း ကွဲပြား မှု တွေကတော့ အများကြီး ရှိပါတယ်။ ဒီထက်လည်း ရှိနိုင်ပါတယ်။ ဒါကတော့ ကောင်းတဲ့ လက္ခာမဟုတ်ဘူးလို့ပဲ ပြောချင်ပါတယ်။ နာမည်ကွဲတယ်၊ လုပ်ဆောင်ချက် ကွဲတယ်ဆိုတော့ ဘယ်လိုပဲ ရည်မှန်းချက်တူတူ စိတ်ဝမ်း ကွဲပြားမှုကတော့ ရှိလာပါတယ်။ ကိုယ့်ဖက်ကို ထောက်ခံတဲ့လူ သူ့ဖက်ကို ထောက်ခံတဲ့လူ စသည်အားဖြင့်ပေါ့ နော်၊ ပြည်သူတွေ ကြားမှာလည်းပဲ အဲဒီလိုမျိုးတွေ ရှိနိုင်ပါတယ်။ ဒါကတော့ အမျိုးသားတော်လှန်ရေး အတွက် တော့ ကောင်းတဲ့လက္ခဏာ မဟုတ်ဘူးလို့ပဲ ပြောချင်ပါတယ်” ဟု CNI သတင်းဌာနသို့ ပြောသည်။

ရခိုင်ပြည်နယ်အတွင်းက လမ်းဆုံတစ်နေရာကိုတွေ့ရစဉ်

ပြီးခဲ့သည့် ၂၀၂၂ ခုနှစ်၊ နိုဝင်ဘာ ၇ ရက်နေ့က ALP ၏ ဗဟိုကော်မတီဝင် တစ်ဦးဖြစ်သူ ခိုင်မြသာကို ရက္ခိုင့် တပ်‌တော် (ULA/AA) က ဖမ်းဆီးသွားကြောင်း နိုဝင်ဘာ ၁၀ ရက်နေ့တွင် ALP မှ ထုတ်ပြန်ခဲ့သည်။

အဆိုပါ ဖမ်းဆီးမှုမှာ မြေပြင်သတင်းအရ ALP အချင်းချင်း ဖမ်းဆီးမှုဟု ကြားသိရကြောင်း၊ ULA/AA ဘက်မှ မဖမ်း ဆီးထားဟု ငြင်းဆိုထားကြောင်း၊ ထို့အတူ ALP နှင့် ULA/AA တို့ ဆန့်ကျင်ဘက် ဖြစ်လာသော်လည်း ပြည်သူ လူထုများ၏ ထောက်ခံမှုမှာ ကွဲထွက် သွားနိုင်သည့် အခြေအနေ မရှိကြောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။

၎င်းက “ဒါကတော့ ကျနော်တို့ အနေနဲ့ သိပ်ပြီးတော့ စိုးရိမ်စိတ်တော့ မရှိဘူး။ မြေပြင် အခြေအနေမှာ ULA/AA က ရခိုင် တစ်ပြည်လုံးကို ထိန်းချုပ်ထားတဲ့ အနေအထားရှိတယ်။ ALP အနေနဲ့ကတော့ အဖွဲ့အစည်းရယ်လို့ စောစောစီးစီး ပေါ်‌ပေါက်လာပေမယ့်၊ အင်အားက ရာဂဏန်းတောင် မရှိလောက်ဘူး။ အဲဒီလို အခြေအနေမျိုးမှာ ULA/AA က ရခိုင်တစ်ပြည်လုံးမှာ စခန်းတွေ အများကြီး သိမ်းထားတယ်၊ အများကြီးလည်း သူတို့ တည်ဆောက်ထားတယ်၊ နောက်ပြီးတော့ စစ်ကောင်စီ တပ်တွေကိုလည်း ပြင်းပြင်းထန်ထန် အနိုင်ပိုင်းနိုင်တယ်၊ ထိန်းချုပ်နိုင်တယ်၊ အဲဒါမျိုး ကြတော့ ALP မှာ အင်အားမရှိဘူး။ ALP မှာ စခန်းတစ်ခုတောင်မှ ပြည်တွင်းမှာ တည်ဆောက် ထားနိုင်တာ မရှိ ဘူး။ စစ်ကောင်စီနဲ့ ဆိုရင်လည်းပဲ သူတို့ အနေနဲ့ ငြိမ်းချမ်းရေးလမ်းစဉ်ကို လျှောက်နေတဲ့ အတွက်နဲ့ သူတို့ အတိုက်အခံ မရှိဘူး။ တိုက်ပွဲတွေလည်း မရှိဘူး။ တချိန်ချိန်မှာ သူတို့ လွှတ်တော်နိုင်ငံရေးထဲကို‌ ရောက်သွားပြီး တော့ပေါ့နော်၊ BGF လို နယ်ခြားစောင့်တပ်ဖွဲ့တွေ အရံတပ်ဖွဲ့တွေတော့ ဖြစ်လာနိုင်တာပေါ့၊ ဒါကြောင့် ပြည်သူ တွေကတော့ ALP နဲ့ ULA ကြားမှာ ဘယ်လိုပဲ စိတ်ဝမ်းကွဲပါစေ၊ ကွဲပြားပါစေ၊ ပြည်သူတွေရဲ့ နှလုံးသားကတော့ ULA ဖက်မှာ ရှိပါတယ်၊ ပြည်သူတွေရဲ့ ‌ထောက်ခံမှု အရရော၊ လက်တွေ့မြေပြင်မှာ အင်အားအရရော ALP က တော့ ULA/AA ကို ဆန့်ကျင်ဘက် ဖြစ်လာပြီဆိုပေမယ့်၊ ပြည်သူဖက်ကတော့ ကွဲထွက်သွားနိုင်တဲ့ အခြေအနေမျိုး မရှိဘူးလို့ ကျနော်တို့ သတ်မှတ်လို့ ရပါတယ်” ဟု ပြောသည်။

၂၀၁၆ ခုနှစ်၊ဇူလိုင်လက မိုင်ဂျာယန်တွင် ဒေါ်စောမြရာဇာလင်း ဦးဆောင်သည့် ကိုယ်စားလှယ်အဖွဲ့ကိုတွေ့ရစဉ်

လက်ရှိတွင် ALP ပါတီဝင်များကို ULA/AA မှ ဖမ်းဆီးထားသည်မှာ ခိုင်မြသာ အပါအဝင် ၁၇ ဦး ရှိပြီဖြစ်ကြောင်း ALP က ထုတ်ပြန်ထားသည်။

လက်ရှိတွင် ရခိုင်လက်နက်ကိုင် အဖွဲ့အစည်းများမှာ ရက္ခိုင့်တပ်တော် (ULA/AA)၊ ရခိုင်ပြည်လွတ်မြောက်ရေး ပါတီ(ALP)နှင့် ရခိုင်အမျိုးသားကောင်စီ (ANC/AA) တို့ ဖြစ်သည်။

ALP သည် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) လက်မှတ်ရေးထိုးထားပြီး ULA/AA နှင့် ANC/AA တို့သည့် မြန်မာ့တပ်မတော်နှင့် တိုက်ပွဲဖြစ်ပွားနေသည့် ရခိုင်လက်နက်ကိုင်တပ်ဖွဲ့ ဖြစ်သည်။

CNI News

၂၀၂၂ ခုနှစ်၊ နိုဝင်ဘာ ၁၂

ရန်ကုန်တိုင်းဒေသကြီး၊ ကမာရွတ်မြို့နယ်နှင့် စမ်းချောင်းမြို့နယ်တို့အတွင်း အုပ်စုဖွဲ့ ခါးပိုက်နှိုက်မှု ကျူးလွန်နေ သူ ၁၁ ဦးကို ဖမ်းဆီးရမိကြောင်း ၂၀၂၂ ခုနှစ်၊ နိုဝင်ဘာ ၁၂ ရက်တွင် နစက-က သတင်းထုတ်ပြန်ခဲ့သည်။

ခါးပိုက်နှိုက်မှု ကျူးလွန်သူ တရားခံ ၉ ဦးနှင့် ကျူးလွန်ရာမှ ရရှိသည့် လက်ကိုင်ဖုန်းများအား လက်ခံဝယ်ယူသူ တရားခံ ၂ ဦးတို့အား လက်နက်ကိုင်ဖုန်း မျိုးစုံ ၁၂၀ လုံး၊ ခါးပိုက်နှိုက်ရာမှ ရရှိခဲ့သည့် ငွေစက္ကူရောရာ ၅,၆၈၀,၀၀၀ိ/ကျပ် (ငွေကျပ် သိန်း ၅၀ ကျော်) အပါအဝင် ၎င်းတို့စီးနင်း အသုံးပြုခဲ့သည့် Toyota Filder အဖြူ ရောင် မော်တော်ယာဉ်တစ်စီးနှင့်အတူ ဖမ်းဆီးရမိခဲ့ကြောင်း နစက-က သတင်းထုတ်ပြန်ခဲ့သည်။

အဆိုပါ အုပ်စုဖွဲ့ ခါးပိုက်နှိုက်နေသူများသည် ကမာရွတ်မြို့နယ်၊ အမှတ်(၃)ရပ်ကွက်၊ လှည်းတန်းလမ်းဆုံအနီး နှင့် စမ်းချောင်းမြို့နယ်၊ မြေနီကုန်းတစ်ဝိုက်တို့တွင် ဆောင်ရွက်လျက်ရှိကြောင်း ထုတ်ပြန်ချက်တွင် ဖော်ပြထားသည်။

ခါးပိုက်နှိုက်ကျူးလွန်သူများကို ဖုန်းများ-ပိုက်ဆံများနဲ့အတူတွေ့ရစဉ်

နစက-က ဖမ်းဆီးခဲ့သူများမှာ စိန်သန်းအေး(ခ)စိန်ကြီး၊ ဇော်မင်းထွေး(ခ)အောင်လေး(ခ) ကုလားကြီး၊ ထွန်းမင်း လတ်(ခ)တုတ်တုတ်၊ မျိုးကျော်သူ(လက်ကိုင်ဖုန်းများဝယ်ယူသူ)၊ သူရထွန်း(ခ)ဘောကြီး၊ ဇော်မျိုးဦး(ခ)ဝက်ကြီး (ခ)ပါကျဲ၊ ကျော်ကျော်(ခ)အသေးလေး၊ သက်နိုက်ထွန်း၊ ကျော်မျိုးလှိုင်(ခ)ကျော်ကြီး(လက်ကိုင်ဖုန်းများဝယ်ယူ သူ)၊ လင်းလင်းထွန်း(ခ)ဝိုင်းဝိုင်း၊ ကျော်မျိုးနိုင်(ခ)ကိုမျိုး(ခ)အပုလေး တို့ဖြစ်သည်။

အဆိုပါ ဖမ်းဆီးရမိ တရားခံ ၁၁ ဦးအနက် စိန်သန်းအေး(ခ)စိန်ကြီး၊ ဇော်မင်းထွေး(ခ) အောင်လေး (ခ)ကုလား ကြီး၊ ဇော်မျိုးဦး(ခ)ဝက်ကြီး(ခ)ပါကျဲနှင့် ကျော်မျိုးနိုင်(ခ)အပုလေးတို့ ၄ ဦးသည် ၂၀၂၂ ခုနှစ်၊ မေလ ၁၁ ရက် မွန်းလွဲ ၂ နာရီ ၁၅ မိနစ်အချိန်က ကမာရွတ်မြို့နယ်၊ အမှတ်(၁) ရပ်ကွက်၊ ဇေယျာသီရိလမ်း၌ မောင်ကတုံး (စိစစ်ဆဲ)ကို ဝိုင်းဝန်းထိုးကြိတ်ပြီး ချွန်ထက်သောအရာဖြင့် ထိုး၍ သတ်ဖြတ်ခဲ့သူ ၁၃ ဦးအနက်မှ တရားခံပြေး ၄ ဦးဖြစ်သည်ဟု နစက၏ ထုတ်ပြန်ချက်တွင် ဖော်ပြထားသည်။

CNI News

၂၀၂၂ ခုနှစ်၊ နိုဝင်ဘာ ၁၂

ကရင်လက်နက်ကိုင် ၄ ဖွဲ့သည် အနာဂတ်တွင် မလွှဲမသွေ ပေါင်းစည်းရမည်ဖြစ်ကြောင်း ဒီမိုကရေစီအကျိုးပြု ကရင့်တပ်မတော် (DKBA)မှ ဗိုလ်မှူးကြီးစောဆန်းအောင်က CNI သတင်းဌာနသို့ ပြောသည်။

ကရင်လက်နက်ကိုင် တပ်ဖွဲ့အချင်းချင်း ပူးပေါင်းပါက ကရင်လူထု အပါအဝင် ကရင်ပြည်နယ်အတွင်းရှိ ဒေသခံ များလည်း ဝမ်းသာမည်ဖြစ်ကြောင်း ၎င်းက ပြောသည်။

ဗိုလ်မှူးကြီးစောဆန်းအောင်က “အဲဒါ အသေးစိတ် ဆွေးနွေးခြင်းတော့ မရှိဘူး။ မဝေးသော အနာဂတ်မှာတော့ ကရင်အလံတော်အောက်မှာ တစ်ခုတည်း စုပေါင်းဖို့ ရှိတယ်လေ။ တိုင်းပြည်ရဲ့ မဝေးသော အနာဂတ်မှာတော့ မလွှဲမသွေ စုပေါင်းရမယ်လေ၊ အဲဒါတွေတော့ ရှိတယ်နော်၊ ကိုယ့်လူမျိုး အချင်းချင်း ပေါင်းတာတော့ ပြဿနာ မရှိဘူးလေ။ ကိုယ့်လူမျိုး အချင်းချင်း ပေါင်းတာဆိုတာလည်း ပိုပြီးတော့ ဝမ်းသာရမှာပေါ့ဗျာ။ ကောင်းပါတယ်။ ကရင်လက်နက်ကိုင်တွေ တစ်ခုတည်းသော ညီညီညွတ်ညွတ် ပေါင်းစည်းမှု အကောင်အထည် ဖော်နိုင်တယ် ဆိုလို့ရှိရင် ဒေသခံပြည်သူလူထုတွေ၊ ကရင်လူမျိုးတွေ၊ ကရင်ပြည်နယ်ထဲမှာရှိတဲ့ ဒေသခံတွေ ဝမ်းသာမှာပေါ့လေ။ ဘာကြောင့်လဲဆိုတော့ တစ်ခုတည်း ဖြစ်သွားတော့ သက်သက်သာသာ ရှိတာပေါ့ဗျာ၊ အဖွဲ့များတော့လည်း ဂိတ် တွေများတယ်၊ ဂိတ်တွေများတော့ အကောက်ခွန်တွေ များတယ်ဆိုရင် လူထုအတွက် ဝန်ထုပ်ဝန်ပိုး ဖြစ်စေတာ ပေါ့” ဟု CNI သတင်းဌာနသို့ ပြောသည်။

၂၀၂၂ ခုနှစ်၊ နိုဝင်ဘာ ၁၁ ရက်နေ့က ကရင်ပြည်နယ်၊ လှိုင်းဘွဲ့မြို့နယ်၊ ကြာအင်းကျေးရွာတွင် ကရင်လက်နက်ကိုင်အဖွဲ့များမှ ခေါင်းဆောင်များနဲ့ ဒေသခံများ တွေ့ဆုံ ဆွေးနွေးနေစဉ်

ကရင်လက်နက်ကိုင် ၄ ဖွဲ့ ပေါင်းစည်းရန် အချိန်ယူရဦးမည်ဖြစ်ကြောင်း၊ လက်ရှိ တိုင်းပြည် အခြေအနေမှာ ရှုပ် ထွေးနေခြင်းကြောင့် တိုင်းပြည်တည်ငြိမ်မှ အကောင်အထည် ဖော်နိုင်မည်ဖြစ်ကြောင်း ၎င်းက ပြောသည်။

၂၀၂၂ ခုနှစ်၊ နိုဝင်ဘာ ၁၁ ရက်နေ့က ကရင်ပြည်နယ်၊ လှိုင်းဘွဲ့မြို့နယ်၊ ကြာအင်းကျေးရွာတွင် ကရင်အမျိုးသား အစည်းအရုံး (KNU)မှ ဦးဆောင်ကာ DKBA၊ ကရင်အမျိုးသားအစည်းအရုံး/ ကရင်အမျိုးသား လွတ်မြောက်ရေး တပ်မတော်/ ငြိမ်းချမ်းရေးကောင်စီ(KNU/KNLA/PC)၊ ကရင်ပြည်နယ် နယ်ခြားစောင့်တပ် (BGF) စသည့် ကရင် လက်နက်ကိုင် အဖွဲ့အစည်းများမှ ခေါင်းဆောင်များသည် ဒေသခံလူထုများဖြင့် တွေ့ဆုံကာ ငြိမ်းချမ်းရေး လုပ်ငန်း စဉ်များကို ဆွေးနွေးခဲ့ကြကြောင်း သိရသည်။

အဆိုပါ တွေ့ဆုံ ဆွေးနွေးပွဲတွင် KNU ဘက်က ဒုဥက္ကဋ္ဌ ပဒိုစောကွယ်ထူးဝင်းနှင့် စစ်ဦးစီးချုပ် ဗိုလ်ချုပ်ကြီး စောဂျော်နီတို့ တက်ရောက်ခဲ့သလို KNU/KNLA-PC မှ ဒုဥက္ကဋ္ဌ နော်ကပေါ်ထူး တက်ရောက်ခဲ့သည်ကို တွေ့ရသည်။

ဗိုလ်မှူးကြီးစောဆန်းအောင်က “ကရင်လက်နက်ကိုင် အချင်းချင်းကတော့ ပူးပေါင်း လုပ်ဆောင်တာ ကြာပြီ။ ဟိုးလွန်ခဲ့တဲ့ ၂၀၁၃ ကနေပြီးတော့ ညီညွတ်ရေးကော်မတီ တည်ဆောက်ထားတာ တည်ဆောက်တဲ့ အချိန်ကာလ မှာတော့ လူထုရှေ့မှောက်မှာ မဟုတ်ဘူး။ ညီလာခံ ခေါ်ပြီးလုပ်တာ မဟုတ်တော့ စုပေါင်းမှု၊ စုစည်းမှုဆိုတာ အားနည်းတယ်ပေါ့လေ။ မနေ့က ပွဲမှာ ဆိုလို့ရှိရင်တော့ ကျနော်တို့ လက်နက်ကိုင်တွေ ၂၀၁၃ ကနေပြီးတော့ ညီညွတ်မှုတွေ၊ စုပေါင်းမှုတွေ တည်ဆောက်ထားတယ်ဆိုတာ အဲဒါကို ပြန်လည်ချပြ၊ နှိုးဆော်ပြတာရှိတယ်၊ နောက်ဆိုလို့ရှိရင်လည်း ကိုယ့်အချင်းချင်း သွေးထွက်သံယိုကနေပြီးတော့ ကြီးကြီးမားမား မဖြစ်အောင် အေးအေး ဆေးဆေး၊ ငြိမ်းငြိမ်းချမ်းချမ်း ဖြေရှင်းနိုင်အောင် ဆိုပြီးတော့လည်း ပြောကြဆိုတာရှိတယ်” ဟု CNI သတင်းဌာန သို့ ပြောသည်။

၂၀၂၂ ခုနှစ်၊ သြဂုတ် ၃ ရက်က DKBA နှင့် KNU တို့မှ ခေါင်းဆောင်များ ဆွေးနွေးကြစဉ်

ပြီးခဲ့သည့် ၂၀၂၂ ခုနှစ်၊ သြဂုတ် ၃ ရက်က DKBA နှင့် KNU တို့မှ ခေါင်းဆောင်းများ တွေ့ဆုံဆွေးနွေး၍ ကရင် ပြည်နယ်အတွင်း တိုက်ပွဲများ မဖြစ်ပေါ်ရေး၊ ကရင်လက်နက်ကိုင်အဖွဲ့များ ပြန်လည်ပေါင်းစည်းရေး၊ ယာယီတူညီ တံဆိပ် အသုံးပြုရေးတို့ကို သဘောတူညီခဲ့ကြသည်။

လက်ရှိတွင် ကရင်လက်နက်ကိုင် တပ်ဖွဲ့များအဖြစ် ကရင်အမျိုးသားအစည်းအရုံး (KNU)၊ ဒီမိုကရေစီအကျိုးပြု ကရင့်တပ်မတော် (DKBA)၊ ကရင်အမျိုးသားအစည်းအရုံး/ ကရင်အမျိုးသား လွတ်မြောက်ရေး တပ်မတော်/ ငြိမ်းချမ်းရေးကောင်စီ (KNU/KNLA/PC)၊ ကရင်ပြည်နယ် နယ်ခြားစောင့်တပ် (BGF) တို့ ရပ်တည်လှုပ်ရှားလျက် ရှိသည်။

အဆိုပါ ကရင်လက်နက်ကိုင် ၄ ဖွဲ့အနက် KNU DKBA KNU/KNLA-PC တို့သည် တပ်မတော် ပါဝင်လက်မှတ် ရေးထိုးထားသည့် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA)ကို လက်မှတ်ထိုးထားပြီး BGF ကတော့ တပ်မတော်၏ လက်အောက်ခံအဖြစ် တည်ရှိနေသော အဖွဲ့ဖြစ်သည်။

CNI News

၂၀၂၂ ခုနှစ်၊ နိုဝင်ဘာ ၁၂

ပြည်သူအများစုက လက်ခံသည့် ရွေးကောက်ပွဲကို ကျင်းပနိုင်အောင် ဆောင်ရွက်ရန်လိုအပ်ကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၂ ခုနှစ်၊ နိုဝင်ဘာ ၁၁ ရက်နေ့က ကျင်းပခဲ့သည့် နစက၏ ၉/၂၀၂၂ အစည်းအဝေးမှာ ၎င်းက အထက်ပါ အတိုင်း ပြောကြားသွားခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ ပါတီစုံ ဒီမိုကရေစီအထွေထွေ ရွေးကောက်ပွဲ ကျင်းပရာတွင် လွတ်လပ်ပြီး တရားမျှတသည့် ရွေးကောက်ပွဲ ဖြစ်ရန် လိုအပ်ကြောင်း၊ ထို့ကြောင့် နယ်မြေများအားလုံးတွင် မှန်ကန်သည့် ရွေးကောက်ပွဲ၊ ပြည်သူအများစုက လက်ခံသည့် ရွေးကောက်ပွဲဖြစ်မှသာ နောင်တက်လာမည့် အစိုးရက လုပ်ငန်းများ အောင်မြင်အောင် ဆောင် ရွက် နိုင်မည်ဖြစ်ကြောင်း၊ မိမိတို့အနေဖြင့် ရွေးကောက်ပွဲ ပြန်လည် ကျင်းပနိုင်ရေးအတွက် တတ်နိုင်သမျှ ကြိုး ပမ်း ဆောင်ရွက်လျက်ရှိတယ်”ဟု ပြောသည်။

မဲထည့်နေသော ပြည်သူတစ်ဦးကိုတွေ့ရစဉ်

ထို့နောက် ရွေးကောက်ပွဲကို တိုင်းဒေသကြီးနှင့် ပြည်နယ်အားလုံးတွင် ရွေးကောက်ပွဲ ကျင်းပနိုင်ရန် လိုအပ် ကြောင်း၊ လွှတ်တော်တွင် တိုင်းရင်းသား ကိုယ်စားလှယ်များ ပါဝင်ရမည်ဖြစ်ကြောင်း၊ တိုင်းရင်းသားများ ပါဝင် နိုင်ရေး PR စနစ်ဖြင့် ဆောင်ရွက်နိုင်သည်ကို တိုင်းရင်းသားလက်နက်ကိုင်အဖွဲ့များအား ရှင်းပြရာ အချို့အဖွဲ့များ က သဘောတူညီမှုများရှိကြောင်း ၎င်းက ပြောသည်။

ဗိုလ်ချုပ်မှူးကြီးမင်းအောင်လှိုင်က “ ဖွဲ့စည်းပုံအခြေခံဥပဒေ(၂၀၀၈)ခုနှစ်နှင့်အညီ လွတ်လပ်ပြီး တရားမျှတ သော ပါတီစုံ ဒီမိုကရေစီ အထွေထွေ ရွေးကောက်ပွဲအား ပြန်လည်ကျင်းပ၍ အနိုင်ရသည့်ပါတီအား ဒီမိုကရေစီ စံနှုန်းများနှင့်အညီ နိုင်ငံတော်တာဝန်အား လွှဲအပ်နိုင်ရေး ဆက်လက်ဆောင်ရွက်သွားမည်ဟု ပါဝင်ပြီးဖြစ် ကြောင်း၊ ရွေးကောက်ပွဲကို သတ်မှတ်ထားသည့်အချိန် ကာလအတွင်း ဆောင်ရွက်နိုင်ရေး ကြိုးပမ်း ဆောင်ရွက် လျက်ရှိတယ်”ဟု ပြောသည်။

ပြီးခဲ့သည့် ရွေးကောက်ပွဲ ၃ ကြိမ်တွင် ပထမအကြိမ် ရွေးကောက်ပွဲတွင် မြို့နယ် ၃၂၅ မြို့နယ်၊ ဒုတယိအကြိမ် ၌ ၃၂၃ မြို့နယ်၊ တတိယအကြိမ်တွင် ၃၁၅ မြို့နယ်တို့တွင် ကျင်းပခဲ့ကြောင်း ၎င်းက ပြောသည်။

ကရင်နီအမျိုးသားတိုးတက်ရေးပါတီ(KNPP)

နစကသည် ၂၀၂၃ ခုနှစ်၊ သြဂုတ်လတွင် အထွေထွေရွေးကောက်ပွဲကို ကျင်းပသွားမည်ဖြစ်ပြီး အနိုင်ရရှိသည့် ပါတီအား နိုင်ငံတော်အာဏာလွှဲပြောင်းပေးအပ်သွားမည်ဖြစ်ကြောင်း ပြောကြားထားသည်။

လက်နက်ကိုင်အဖွဲ့များဖြစ်သည့် ကရင်နီအမျိုးသားတိုးတက်ရေးပါတီ(KNPP)နှင့် ချင်းပြည်နယ်ကာကွယ်ရေး တပ်ဖွဲ့ (CJDC) တို့ကတော့ ကယားပြည်နယ်နှင့် ချင်းပြည်နယ်အတွင်းရှိ နိုင်ငံရေးပါတီများအနေဖြင့် နစက ကျင်းပမည့် ရွေးကောက်ပွဲမှာ ပါဝင်ယှဉ်ပြိုင်မှုမပြုလုပ်ကြရန် ထုတ်ပြန်ထားသည်။

အလားတူ နစကဖြုတ်ချရေး ကြိုးပမ်းနေသည့် အမျိုးသားညီညွတ်ရေးအစိုးရ(NUG)ကလည်း နစက ကျင်းပ မည့် ရွေးကောက်ပွဲကို မပျက်ပျက်အောင် ဖျက်မည်ဟု ယာယီသမ္မတ ဒူးဝါလရှီလက ပြောကြားထားသည်။

မြန်မာနိုင်ငံအတွင်းရှိ နိုင်ငံရေးပါတီများကလည်း နစက ကျင်းပမည့် ရွေးကောက်ပွဲတွင် လုံခြုံရေးဆိုင်ရာ ပြင်ဆင်မှုအပိုင်းများကို မေးခွန်းထုတ်နေကြသည်။

CNI News

၂၀၂၂ ခုနှစ်၊ နိုဝင်ဘာ ၁၁

မြန်မာနိုင်ငံတွင် မြန်မာ့တပ်မတော်က အမျိုးသားဒီမိုကရေစီအဖွဲ့ချုပ်(NLD) အစိုးရကို ဖြုတ်ချခဲ့ပြီးနောက် ၂၀၂၂ ခုနှစ်၊ အောက်တိုဘာ ၃၁ ရက်နေ့အထိ လက်နက်ကိုင်ပဋိပက္ခနှင့် တိုက်ပွဲဖြစ်စဉ်များအတွင်း နေအိမ်၊ အဆောက်အအုံ (ဘာသာရေး အဆောက်အအုံများ အပါအဝင်) ၃၈,၅၆၈ လုံးထက် မနည်း မီးရှို့ဖျက်ဆီးခြင်းခံခဲ့ရသည်ဟု ISP Myanmar က နိုဝင်ဘာ ၁၁ ရက်နေ့မှာ ထုတ်ပြန်ခဲ့သည်။

ISP မြန်မာ၏ ထုတ်ပြန်ချက်

အဆိုပါ မီးရှို့ဖျက်ဆီးခံရမှုများသည် ၂၀၂၂ ခုနှစ်အတွင်း ပိုမို မြင့်တက်ခဲ့ပြီး စုစုပေါင်း ပမာဏ၏ ၉၄ ရာခိုင်နှုန်း ကျော်အထိ ရှိကြောင်း ISP ၏ ထုတ်ပြန်ချက်တွင် ဖော်ပြထားသည်။

လက်ရှိတွင် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ကယားပြည်နယ်၊ ကရင်ပြည်နယ်၊ ရခိုင်ပြည်နယ် စသည့် ဒေသများတွင် လက်နက်ကိုင် ပဋိပက္ခများ ဖြစ်ပွားလျက်ရှိပြီး နေအိမ်၊ အဆောက်အအုံများ မီးရှို့ဖျက်ဆီးခံနေရသည်။

CNI News

၂၀၂၂ ခုနှစ်၊ နိုဝင်ဘာ ၁၁

ထိုင်းနိုင်ငံတွင် ၎င်းတို့ နိုင်ငံအတွင်းသာမက ပြည်ပ အဝင်၊ အထွက်များတွင်ပါ ယခင်ထက် စစ်ဆေးမှုများ ပိုမို ရှိနေသဖြင့် လက်ရှိတွင် လေကြောင်းလိုင်းဖြင့် အလည်ခရီးလာမည့် မြန်မာများသည် အချက်အလက် အပြည့် အစုံပါရှိရန် လိုအပ်ကြောင်း မြန်မာအလုပ်သမားအရေးဆောင်ရွက်နေသူများက CNI သတင်းဌာနသို့ ပြောသည်။

ထိုင်းနိုင်ငံ၌ ၂၉ ကြိမ်မြောက် အာရှ-ပစိဖိတ် စီးပွားရေး ပူးပေါင်းဆောင်ရွက်ခြင်း (APEC) ထိပ်သီးအစည်းအဝေး ကျင်းပပြုလုပ်မည်ဖြစ်သဖြင့် လုံခြုံရေးအား ပိုမိုတင်းကြပ်လာခြင်းဖြစ်ပြီး ဆက်လက်၍လည်း ယခုကဲ့သို့ လုံခြုံရေးကြောင့် အစစ်အဆေးများ ပိုမိုများပြားလာဦးမည်ဖြစ်ကြောင်း ၎င်းတို့က ပြောသည်။

မြန်မာရွှေ့ပြောင်းအလုပ်သမားအရေး ကူညီဆောင်ရွက်ပေးနေသည့် ကိုသားကြီးက “နှစ်ပိုင်းပြောရမယ်ပေါ့။ အဲဒီလိုမျိုးအရေးကြီးတဲ့အစည်းအဝေးတွေကြောင့် နိုင်ငံခြားသားတွေကို Tourist visa နဲ့ လေဆိပ်နဲ့ဝင်တဲ့ နေရာမှာ စစ်ဆေးတာ ပိုမိုပြီးတင်းကြပ်လာတယ်လို့ ပြောလို့ရတယ်ပေါ့။ ဒါပေမယ့် ဒီလို စစ်နေတဲ့ သူ့ရဲ့ထုံးစံ အရကတော့ အရင်တုန်းကရော မစစ်ဘူးလားဆိုတော့ အရင်တုန်းကလည်းစစ်တယ်။ အခုကတော့ ပိုပြီးတော့မှ နည်းနည်းပိုဂရုစိုက်လာတယ်ပေါ့။ အထူးသဖြင့်တော့ မြန်မာနိုင်ငံသားကို ထိုင်းအစိုးရက ပစ်မှတ်ထားတာပေါ့ Tourist နဲ့ ဝင်လာရင် ဟိုဟာ ဒီဟာ စစ်ရမယ်ဆိုတာ။ အစိုးရနှစ်ခု ကြားထဲမှာ တစ်စုံတစ်ရာ အပေးအယူတွေ ပြောဆိုထားတာတွေ၊ သူတို့ ပေါ်လစီတစ်ခုခုအသစ်ကြောင့် ဒီလိုမျိုး ပိုမိုပြီးတော့မှ မြန်မာနိုင်ငံသားတွေကို စစ်ဆေးတယ်လို့ ကျနော်တို့ပြောလို့ရတယ်။ တချို့ကျတော့ ဒီမှာလာပြီး စာအုပ်ဖျောက်ပြီး နေလိုက်တာတွေ ရှိတယ်။ အဲဒီလို ဒီတိုင်းနေလိုက်တဲ့ဟာတွေ များလာတဲ့အခါကျတော့ သူ့အနေနဲ့ ဟိုတယ်ဘိုကင်စစ်ပြီလေ။ နောက် Show Money စစ်ပြီပေါ့။ တချို့တွေက Show Money တောင်မှ မပါဘူးလေ။ ပြည့်ပြည့်စုံစုံပေါ့။ လေယာဉ်ခလေးရရင်ပြီးရော သုံးဖို့ငွေ ဘတ် ၁၀၀၀ လောက်နဲ့ လာကြတာတွေလည်း ရှိတယ်။ ဒါကြောင့် ဒီလိုအကျိုးအကြောင်းကြောင့် ဖြစ်လာတယ်လို့ သုံးသပ်မိတယ်” ဟု ပြောသည်။

ထိုင်းတော်ဝင်ရဲတပ်ဖွဲ့များကိုတွေ့ရစဉ်(ဓါတ်ပုံ-ဘန်ကောက်ပို့စ်)

ပြီးခဲ့သည့်ရက်ပိုင်းက ထိုင်းလေဆိပ်တွင် အလည်လာသည့် မြန်မာအချို့သည် Show Money နှင့် လေယာဉ် အသွားအပြန်လက်မှတ်သာ ပြနိုင်ပြီး တည်းခိုနေထိုင်မည့် ဟိုတယ်အား ကြိုတင်ဘိုကင်လုပ်ထားခြင်းမရှိသဖြင့် ပြည်ဝင်ခွင့်မပေးခဲ့ကြောင်း သိရသည်။

ထို့နောက် ဘန်ကောက်ရှိ မြန်မာသံရုံးမှ ထိုင်းကိုအလည်လာမည့် မြန်မာများအနေဖြင့် ထိုင်းလေဆိပ်တွင် Show Money၊ လေယာဉ်အပြန်ခရီးလက်မှတ်၊ တည်းခိုနေထိုင်မည့် ဟိုတယ်(သို့မဟုတ်) နေအိမ်နှင့်ပတ်သက်၍ အထောက်အထားများ ပြနိုင်ရန်လိုအပ်ကြောင်း နိုဝင်ဘာ ၁၀ ရက်နေ့တွင် ထုတ်ပြန်ထားသည်။

Show Money ပြသရာတွင် လူပုဂ္ဂိုလ်တစ်ဦးအတွက် ဘတ်ငွေ ၁၀၀၀၀ နှင့်ညီမျှသည့် အမေရိကန်ဒေါ်လာ၊ မိသားစုတစ်စုအတွက် ဘတ်ငွေ ၂၀၀၀၀ နှင့် ညီမျှသည့် အမေရိကန်ဒေါ်လာအား ပြသရမည်ဖြစ်ကြောင်း သိရသည်။
ထို့အပြင် ထိုင်းလေဆိပ်မှ တာဝန်ရှိသူများနှင့် ပွဲစားကဲ့သို့ လူများပူးပေါင်း၍ အချက်အလက်၊ အထောက်အထား အပြည့်အစုံမပါသည့် မြန်မာအချို့တို့ထံမှ ငွေကြေးဖြင့် ညှိနှိုင်းမှုများပြုလုပ်ကြောင်းလည်း FED မှ အလုပ်သမား တာဝန်ခံ ဦးမင်းဦးက CNI သတင်းဌာနသို့ ပြောသည်။

“ကျနော်တို့ကြားတာက ဘာသာစကားလည်းအဆင်မပြေတဲ့အခါကျတော့ လာခေါ်မယ့်သူရှိမှ လုပ်ပေးမယ်တို့ ဘာတို့ အဲဒီလိုမျိုးလုပ်ပြီးတော့ နောက်ဆုံးကျတော့ အချိန်ကြာလာတဲ့အခါကျ မိုးချုပ်ဘာညာနဲ့ အကြာကြီး စောင့်ရတဲ့အခါကျတော့ သူတို့လည်း ဒါဆို သွားမယ်ဆိုရင် ဘယ်လောက်လဲပေါ့။ ဘယ်လောက်လဲဆိုတာက ကြားထဲမှာ ညှိပေးတဲ့လူရှိတယ်လို့ကြားတယ်။ အဲဒါကလည်း ဗမာပဲ ဖြစ်မှာပဲ။ အဲဒီမှာ သူတို့ညှိပေးပြီး ဖုန်းနဲ့ ပြောတဲ့အခါ ပိုက်ဆံဘယ်လောက်ပေါ့ တစ်သောင်းတို့ဘာညာ အဲဒီလိုပေးပြီးတော့ လုပ်စားခံရတာပေါ့။ ကောင်းတာက အကုန်လုံးကိုယ့်ဘက်က အပြည့်အစုံပေါ့နော်။ လေယာဉ်လက်မှတ်တို့၊ ပြီးတဲ့အခါ Show Money ပေါ့နော်။ နေရပ်လိပ်စာပေါ့။ ဟိုတယ်ဘိုကင်လုပ်ထားတယ်ဆိုလည်း ဘယ်ဟိုတယ်လဲပေါ့။ အဲဒါတွေ ပါဖို့လို တယ်။ ဘာဖြစ်လို့လဲဆိုတော့ APEC အစည်းအဝေးရှိနေတာကိုး။ လုံခြုံရေးကြောင့် သူတို့ အထူး ရဲ ဘာညာ လုံခြုံရေးတွေလည်း သီးသန့်သေချာချထားတယ်။ နယ်စပ်တွေရော၊ ခုနကလေဆိပ်က ဝင်တဲ့ဟာတွေရော အကုန်လုံးသူတို့သေချာလိုက်ပြီး စိစစ်တယ်။ ဒီလိုပြဿနာတွေဖြစ်မှာစိုးလို့။ ဒီဟာကလည်း အကြောင်းပြချက် တစ်ခုပါတယ်” ဟု ၎င်းက ပြောသည်။

ရဲတပ်ဖွဲ့များမှ လေဆိပ်သို့ရောက်ရှိလာသည့် ခရီးသွားများ၏ ပစ္စည်းများအား ကြည့်ရှုစစ်ဆေးစဉ်

အထောက်အထား တစ်စုံတစ်ရာ မပြည့်စုံသော်လည်း သဘောကောင်းသည့် တာဝန်ရှိသူများနှင့်တွေ့ပါက နားလည်မှုဖြင့် ပြည်ဝင်ခွင့်ပေးခြင်းများရှိသကဲ့သို့ စည်းကမ်းတင်းကြပ်သည့် တာဝန်ရှိသူများနှင့် ကြုံပါက နေရပ်ပြန်ပို့ခံရကြောင်း သိရသည်။

ထိုင်း လေဆိပ်တွင် ယခုကဲ့သို့ အလည်အပတ်ခရီးလာသည့် ခရီးသွားများအား စစ်ဆေးမှုပြုလုပ်ခြင်းသည် ၎င်းနိုင်ငံ၏ လုံခြုံရေးနှင့် ဥပဒေတစ်ခုဖြစ်သည့်အပြင် အခြားနိုင်ငံသားများထက် မြန်မာနိုင်ငံသားများကိုသာ အဓိထား စစ်ဆေးခြင်းဖြစ်ကြောင်းနှင့် ၎င်းတို့ စစ်ဆေးရာတွင် လူပုဂ္ဂိုလ်အားလုံးကို စစ်ဆေးခြင်းမျိုးမဟုတ်ဘဲ ရွေးချယ်၍ စစ်ဆေးခြင်းဖြစ်ကြောင်း သိရသည်။

CNI News

၂၀၂၂ ခုနှစ်၊ နိုဝင်ဘာ ၁၁

အာဆီယံအထူးကိုယ်စားလှယ်၏ မြန်မာပြည်ခရီးစဉ်အတွင်း လက်ရှိမြန်မာ့နိုင်ငံရေးပြဿနာ ဖြေရှင်းရေးနှင့် ပတ်သက်၍ များစွာမျှော်လင့်၍ မရသေးကြောင်း နိုင်ငံရေးလေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။

မြန်မာနိုင်ငံဆိုင်ရာ အာဆီယံအထူးကိုယ်စားလှယ် ပရတ်ဆိုခွန်သည် ယခုလ နိုဝင်ဘာလအတွင်း မြန်မာနိုင်ငံသို့ လာရောက်ရန် စီစဉ်ထားကြောင်း သိရသည်။

ဦးရဲထွန်းက “ဘာတွေ မျှော်လင့်လို့ ရမလဲဆိုရင် သူက တွေ့မယ်ဗျာ၊ တွေ့တဲ့အခါကြတော့ ဒေါ်အောင်ဆန်းစု ကြည်နဲ့ တွေ့ပြီး ထူးထူးခြားခြား သူက ဘာတွေပြောနိုင်မလဲ၊ ဘာတွေ ကြားထဲကနေပြီးတော့ စေ့စပ်နိုင်မလဲဆို တဲ့ လမ်းစပေါ့နော်၊ အဲဒီလို လမ်းစလေးတွေ မျှော်လင့်နိုင်တာပေါ့၊ ဒါကျနော်တို့က လမ်းစလို့ ပြောတာက ဘာမှ သိပ်ပြီးတော့ ရုတ်တရက်ကြီး ထူးထူးခြားခြားဖြစ်လာမှာ မဟုတ်လို့လေ၊ မဟုတ်တဲ့အခါကြတော့ သူက ဒေါ်အောင်ဆန်းစုကြည်နဲ့ တွေ့ခွင့်ရမယ်၊ စကားပြောခွင့်ရမယ်၊ နိုင်ငံရေးအခြေအနေတွေကို ဒေါ်အောင်ဆန်းစု ကြည် ကလည်း အကုန်မသိသေးတဲ့ အခါကြတော့ သူရဲ့ သဘောထားတွေ တောင်းခံတဲ့အခါမှာ သူကလည်း သဘောထား ပေးဖို့ကတော့ အခက်အခဲရှိနေဦးမှာ၊ ဒါကြောင့်မို့လို့ သိပ်အများကြီးတော့ ကျနော်တို့ မမျှော်လင့် နိုင်ဘူးပေါ့နော်” ဟု CNI သတင်းဌာနသို့ ပြောသည်။

ဒေါ်အောင်ဆန်းစုကြည်ကို တရားရုံးမှာ စစ်ဆေးနေစဉ်

ထို့နောက် အာဆီယံထိပ်သီး ခေါင်းဆောင်များသည် နိုဝင်ဘာ ၁၀ ရက်က ကမ္ဘောဒီးယားနိုင်ငံ ဖနွမ်းပင်မြို့မှာ အစည်းအဝေးကျင်းပ၍ မြန်မာ့နိုင်ငံရေး အခြေအနေများနှင့် အာဆီယံဘုံသဘောတူချက် ၅ ရပ်ကို ပြန်လည် သုံးသပ်ဆွေးနွေးလျက်ရှိသည်။

လက်ရှိ ပြည်တွင်းတွင် ဖြစ်ပေါ်နေသည့် နိုင်ငံ‌ရေးပြဿနာများ ဖြေရှင်းရေး အာဆီယံအနေဖြင့် ထိထိရောက် ရောက် လုပ်ဆောင်နိုင်လိမ့်မည်ဟု မမြင်မိကြောင်း ရခိုင်အမျိုးသားပါတီ (ANP)မှ ဥက္ကဋ္ဌ ဦးသာထွန်းလှက CNI သတင်းဌာနသို့ ပြောသည်။

၎င်းက “အာဆီယံကလည်း ASEAN’s 5-Point Consensus ကလည်း သဘောတူထားတာက ကြာနေပြီ။ လောလောဆယ် ဘာမှ အကောင်အထည် ဖော်လို့ရတဲ့ အခြေအနေမျိုးမှာလည်း မရှိဘူး။ အရင်တစ်ခါ လာတုန်း ကတော့က လူသားချင်းစာနာထောက်ထားမှု အကူအညီ ပေးရေးကိစ္စတွေကို အကူအညီပေးလို့ ရနေပြီဆိုတဲ့ သဘောတူညီချက်မျိုး ရထားတယ်လို့ အဲဒီလို ပြောထားတာမျိုး ရှိတယ်။ အခုတစ်ခါလာရင်လည်း လူသားချင်း စာနာထောက်ထားရေး အကူအညီပေးရေး ကိစ္စလောက်လား၊ အကောင်အထည်ဖော်လို့ ရနိုင်မလားဆိုပြီး ရနိုင် တဲ့ အခြေအနေမျိုးကို ဖန်တီးနိုင်မလား အဲဒါလည်း မျှော်လင့်ချက်လောက်ပဲ ဖြစ်လိမ့်မယ် ထင်တယ်၊ လက်တွေ့ အကောင်အထည်ဖော်ဖို့က အခုဖြစ်ပျက်နေတဲ့ အခြေအနေနဲ့ ပြောရမယ်ဆိုရင် သိပ်ကို ထိထိရောက်ရောက် လုပ်နိုင်လိမ့်မယ်လို့တော့ မမြင်ဘူး” ဟု ပြောသည်။

ဒီမိုကရေစီအရေး တောင်းဆိုနေကြစဉ် (ဖရွန်တီးယားမြန်မာ)

၂၀၂၂ ခုနှစ်၊ ဇူလိုင်လက အာဆီယံအထူးကိုယ်စားလှယ်၏ ခရီးစဉ်အတွင်း နစကဥက္ကဋ္ဌ အပါအဝင် နစက၏ နိုင်ငံခြားရေးဝန်ကြီး၊ ငြိမ်းချမ်း‌ရေးလုပ်ငန်းစဉ်ဦးဆောင်အဖွဲ့ (PPST)နှင့် နိုင်ငံရေးပါတီအချို့တို့ တွေ့ဆုံဆွေးနွေးခဲ့ သည်။ သို့သော် ဒေါ်အောင်ဆန်းစုကြည်နှင့် တွေ့ဆုံခွင့် မရခဲ့ပေ။

မြန်မာ့နိုင်ငံရေး ပြဿနာကို ဖြေရှင်းနိုင်ရန်အတွက် ဒေါ်အောင်ဆန်းစုကြည်နှင့် တွေ့ဆုံခွင့်ပြုရန် တောင်းဆိုထားပြီး နစကဘက်ကလည်း လာမည့် မြန်မာပြည် ခရီးစဉ်မှာ တွေ့ခွင့်ပေးမည်ဟု ကတိပြုထားကြောင်း ပရတ်ဆိုခွန် က ပြောကြားထားသည်။

လက်ရှိတွင် အာဆီယံ သဘောတူညီချက် ၅ ချက်ကို နစက-က အကောင်အထည် ဖော်ပေးနိုင်ခြင်း အားနည်းသည်ဟုဆိုကာ အာဆီယံအစည်းအဝေးများ၌ နစက၏ အဆင့်မြင့် ပုဂ္ဂိုလ်များအား တက်ရောက်ခွင့် မပေးဘဲ နိုင်ငံရေးနှင့်မဆိုင်သော သံတမန် တစ်ဦးကိုသား အာဆီယံအဖွဲ့ဝင် နိုင်ငံများက ဆုံးဖြတ်ထားကြသည်။

CNI News

၂၀၂၂ ခုနှစ်၊ နိုဝင်ဘာ ၁၀

၂၀၀၈ ဖွဲ့စည်းပုံအခြေခံဥပဒေပါ ပုဒ်မပေါင်း ၇၀ ကျော်အား ပြင်ဆင်ရန် နစကကို ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီ(UPDJC) နိုင်ငံရေးပါတီများ အစုအဖွဲ့မှ တောင်းဆိုထားကြောင်း သိရသည်။

ပြီးခဲ့သည့် အောက်တိုဘာ ၂၈ ရက်နေ့က အမျိုးသား စည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်ရေးကော်မတီ(NSPNC)နှင့် UPDJC နိုင်ငံရေးပါတီများ အစုအဖွဲ့တို့ ဆွေးနွေးခဲ့ကြောင်း သိရသည်။

လာမည့် လွှတ်တော် အခင်းအကျင်းတွင် တပ်မတော်၏ ၂၅ ရာခိုင်နှုန်းကို မပါရန် တင်ပြခဲ့ကြောင်း UPDJC နိုင်ငံရေးပါတီများ အစုအဖွဲ့မှ ကိုယ်စားလှယ် ဒေါ်ချိုချိုကျော်ငြိမ်းက CNI သတင်းဌာနသို့ ပြောသည်။

NSPNC ကိုယ်စားလှယ်အဖွဲ့ကိုတွေ့ရစဉ်

၎င်းက “ကျမကတော့ တင်ပြထားတာကတော့ လာမယ့်ရွေးကောက်ပွဲမှာ ဒီမိုကရက်တစ် ဖက်ဒရယ်အစိုးရ ဖြစ် မယ်ဆိုရင်တော့ ကျမက ကျမအမြင်နဲ့ တင်ခဲ့တာကတော့ စစ်တပ် ၂၅ ရာခိုင်နှုန်းကို မပါဖို့ ကျမတင်တယ်၊ ဒါပေမဲ့ ကျမတင်တဲ့အခါမှာ ချက်ချင်းကြီးပေါ့နော်၊ ဒီနေ့၊ မနက်ဖြန်၊ တဖက်ခါလို့လည်း ကျမ ချက်ချင်းမပြောဘူး။ ဘာဖြစ်လို့လဲဆို‌တော့ တိုင်းပြည်အခြေအနေက ဘယ်လောက် ရှုပ်ထွေးနေတယ် ဆိုတာလည်း သားတို့ ပိုသိမှာပါ။ အဲဒီတော့ တိုင်းပြည်မှာလည်း စစ်တပ်ဆိုတာလည်း မရှိမဖြစ်တဲ့ အဖွဲ့အစည်း တစ်ခုပေါ့နော်၊ ဒါပေမဲ့ အဲဒီ လွှတ်တော်ထဲမှာ ကြလို့ရှိရင်တော့ မပါအောင် ချက်ချင်းကြီးပေါ့နော်၊ ၂၅ ရာခိုင်နှုန်း မဟုတ်ရင်တောင်မှ လျော့ လျော့သွားဖို့ ဆိုပြီးတော့ ကျမအဲဒီလို တင်ခဲ့တယ်” ဟု ပြောသည်။
၂၀၀၈ ဖွဲ့စည်းပုံအခြေခံဥပဒေကို ပြင်ဆင်မည်ဆိုပါက လွှတ်တော်မှတဆင့် ပြင်ရမည်ဖြစ်ကြောင်း၊ လက်ရှိတွင် ဆွေးနွေးသည့် သဘောသာ ရှိသေးကြောင်း ရခိုင်အမျိုးသားပါတီ (ANP)မှ ဥက္ကဋ္ဌ ဦးသာထွန်းလှက CNI သတင်း ဌာနသို့ ပြောသည်။
၎င်းက “ကျနော်ကလည်း အဲဒီလုပ်ငန်းစဉ်ကို သေချာသိပ် မသိဘူး။ သိသလောက် ပြောမယ်ဆိုရင် ဖွဲ့စည်းပုံ ပြင်ဆင်ရေးနဲ့ ပတ်သက်ပြီး ဆွေးနွေးကြတယ်လို့ ပြောတယ်၊ ဒါပေမယ့် ဘယ်အချက်၊ ဘယ်အချက်ဆိုတာ ကျနော်က သေချာမသိဘူး။ အဲဒီကိစ္စတွေကို၊ ပြီးရင် သဘောတူညီချက်ကလည်း ကြီးကြီးမားမား ရထားတယ်လို့ အဲဒီလိုမျိုးလည်း သိပ်မကြားရဘူး။ အဲဒီလို ပါလား၊ မပါလားလည်း ကျနော်လည်း ရေရေရာရာ သိပ်မသိဘူး။ ဒါလည်း ဆွေးနွေးတယ်ဆိုတဲ့ ပုံစံမျိုးလောက်ပဲ ရှိမယ်ထင်ပါတယ်။ အဲဒီဖွဲ့စည်းပုံပြင်ဆင်ရေးကလည်း ၂၀၀၈ အခြေခံ ဥပဒေပြင်ဆင်ဖို့လည်း ၂၀၀၈ အခြေခံဥပဒေက လွှတ်‌တော်ပေါ်မှာ လွှတ်တော်ကတဆင့် ပြင်လို့ရမှာကို အခု ဆွေးနွေးတာကလည်း ဆွေး‌နွေးတယ်ဆိုတဲ့ သဘောလောက်ပဲ ရှိမယ်ထင်တယ်၊ ကျနော်သိသလောက် ပြောရရင်တော့ ကြီးကြီးမားမား သဘောတူညီချက်တွေ ရထားတယ်လို့တော့ မကြားမိသေးဘူး” ဟု ပြောသည်။

NSPNC နဲ့ UPDJC နိုင်ငံရေးပါတီများ အစုအဖွဲ့ တွေ့ဆုံ ဆွေးနွေးနေစဉ်

၂၀၀၈ ဖွဲ့စည်းပုံအခြေခံဥပဒေမှ ပြင်ဆင်ရန် တင်ပြခဲ့သည့် ပုဒ်မပေါင်း ၇၀ ကျော်ထဲက ပုဒ်မ ၂၆၁ ကို ပြင်ဆင်ရန် တပ်မတော်ဘက်မှ သဘောတူခဲ့ကြောင်း သိရသည်။

မွန်ညီညွတ်‌ရေးပါတီ (MUP) မှ ပြောရေးဆိုခွင့်ရှိသူ နိုင်သန်းရွှေက “ပြင်ဖို့အချက်တွေတော့ အများကြီးရှိတယ်ပေါ့ နော်၊ ပါတီက အရင်က တင်ထားတဲ့ စာတမ်းလည်း ရှိတယ်။ အခုလောလောဆယ် အခြေအနေအရ UPDJC မှာ တင်ထားတာတော့ ရှိတော့ရှိတယ် ကျ‌နော်တော့ မမှတ်မိဘူး။ ဒါပေမဲ့ အများကြီး ဖြစ်နေလို့ပါ။ ကျနော်တို့ UPDJC ကနေ ပြန်လို့ရှိရင် ကျနော်တို့ နိုင်ငံရေးအစုအဖွဲ့မှာ ကျနော်တို့ အစည်းအဝေး လုပ်မယ်၊ အဲဒါရှင်းပြမယ်၊ အခု အစည်းအဝေးလည်း မလုပ်တော့ UPDJC တက်တဲ့ ဒီနိုင်ငံရေးအစုအဖွဲ့မှာ တက်တဲ့လူတွေက မရှင်းပြရသေးတော့ သေချာ‌‌တော့ မသိသေးဘူး။ ဒါပေမဲ့ တင်ထားတာတော့ ရှိတာပေါ့” ဟု CNI သတင်းဌာနသို့ ပြောသည်။

UPDJC ကို အစိုးရ၊ လွှတ်တော်နှင့် တပ်မတော် ကိုယ်စားလှယ် ၁၆ ဦး၊ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) ထိုးထားသည့် လက်နက်ကိုင် အဖွဲ့အစည်းများမှ ကိုယ်စားလှယ် ၁၆ ဦး၊ နိုင်ငံရေးပါတီ များ အစုအဖွဲ့မှ ကိုယ်စားလှယ် ၁၆ ဦးတို့ဖြင့် ဖွဲ့စည်းရန် NCA စာချုပ်တွင် ပြဋ္ဌာန်းထားသည်။

သို့သော်လည်း ၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် တပ်မတော်က NLD အစိုးရကို ဖြုတ်ချ၍ နိုင်ငံတော်ကို အရေးပေါ် ကြေညာခဲ့ပြီးနောက် လက်နက်ကိုင် တိုက်ပွဲများဖြစ်ပွားလာကာ တိုင်းရင်းသား လက်နက်ကိုင်များက UPDJC မှာ မပါဝင်ဘဲ ရပ်တန့်ထားသည်။