CNI News

၂၀၂၂ ခုနှစ်၊ နိုဝင်ဘာ ၂၈

ထိုင်းနိုင်ငံတွင် MOU စနစ်ဖြင့် ရောက်ရှိလုပ်ကိုင်နေသည့် မြန်မာအလုပ်သမားများထဲတွင် သက်တမ်း ၆ နှစ်ပြည့် သူများသည် ထိုင်းမှ အလုပ်လုပ်ကိုင်ခွင့်(work permit) နှင့် ဗီဇာမထုတ်ပေးခြင်းကို ကြုံတွေ့နေရကြောင်း ထိုင်းရှိ မြန်မာအလုပ်သမား အရေး ဆောင်ရွက်နေသူများက CNI သတင်းဌာနသို့‌ ပြောသည်။

ယခုကဲ့သို့ MOU သက်တမ်း ၆ နှစ်ပြည့်သူများအား အလုပ်လုပ်ကိုင်ခွင့်နှင့် ဗီဇာသက်တမ်းမတိုးပေးခြင်း၊ မထုတ် ပေးခြင်းသည် အခြားအကြောင်းအရာများကြောင့် မဖြစ်နိုင်ဘဲ MOU နည်းလမ်းအရ ပြန်လည်လုပ်ဆောင်ရန် အတွက်သာ ဖြစ်နိုင်ကြောင်း ထိုင်းရှိ မြန်မာအလုပ်သမားအရေး ဆောင်ရွက်နေသူများက CNI သတင်းဌာနသို့ ပြောသည်။

MWRN မှ အကြံပေး ဦးအောင်ကျော်က “အလုပ်သမားအများစုကတော့ သူတို့ စက်ရုံ၊ အလုပ်ရုံ၊ ကုမ္ပဏီတွေကနေ ဦးဆောင်ပြီး သွားလုပ်တာ လုံးဝမရတော့ဘူးဆိုတာပြောတယ်။ အဲဒီလိုမထုတ်ပေးတော့ လုပ်ငန်းရှင်အပေါ်မှာပဲ မူတည်တယ်။

သူ့အလုပ်သမားက သူ့ရဲ့လုပ်ငန်းခွင်ကြီးကို ဖွံ့ဖြိုးတိုးတက်အောင် နေ့စဉ် အလုပ်လုပ်ကိုင်နေရတာ ဖြစ်တဲ့အတွက်ကြောင့် လုပ်ငန်းရှင်က မည်သို့ မည်ပုံ ဒီလုပ်သားတွေကို ဆက်လက်ပြီး တရားဝင်ရအောင် ဖန်တီးရမလဲဆိုတာ လုပ်ငန်းရှင်အပေါ်မှာပဲ မူတည်တယ်။ အဲဒီတော့ ကျနော်က ဘာကို သွားတွေးမိလိုက်လဲ ဆိုတော့ မူလ ဥပဒေမှာလည်း ရှိတယ်။ ကျနော်တို့ MOU လုပ်သားတွေက မြန်မာပြည်ကနေ စာချုပ်ချုပ်လာတဲ့ အခါမှာ ပထမတစ်ကြိမ် သက်တမ်း ၂ နှစ် ရတယ်။ သက်တမ်း ၂ နှစ် ရပြီးရင် နောက်ထပ် extension ၂ နှစ် တိုးရတယ်။ သူ့ရဲ့ MOU ဥပဒေ မူဝါဒအရ ၄ နှစ် ပြည့်ပြီးရင် မိခင်တိုင်းပြည်ကို ပြန်ပြီး နောက်တစ်ကြိမ် စာချုပ်ချုပ်ပြီး ပြန်တက်ရတာ။ အဲဒါတွေကို ၂၀၁၉ ဒီဇင်ဘာမှာ ပေါ်ပေါက်လာတဲ့ Covid19 ဖြစ်လာတဲ့အခါမှာ ဖြေလျှော့ဥပဒေနဲ့ ၄ နှစ်ပြည့်ရင်လည်း ဆက်ပြီး နေခွင့်ပြုပါတယ်ဆိုပြီး နေရင်းနေရင်းနဲ့ အခုက တချို့လူတွေက ၅ နှစ်ကျော် ၆ နှစ် ဆိုတာတွေ ဖြစ်ကုန်တာ။ အခုက ရောဂါတွေကလည်း လုံးဝကင်းစင်သလောက် ဖြစ်နေပြီ ဖြစ်တဲ့အတွက် မူလဥပဒေအတိုင်း ပြန်လည်အသက်ရှင်မယ်လို့ပဲ သူတို့ သုံးသပ်တာပဲဖြစ်မှာပါ။ ဒါကြောင့် ဒီမှာ သက်တမ်း မတိုးပေးတော့ဘူးဆိုတဲ့ အသံတွေလည်း စက်ရုံ တော်တော်များများမှာ ပြောနေတာတော့ ကြားပါ တယ်” ဟု ပြောသည်။

ထိုင်းအစိုးရအနေနှင့် MOU သက်တမ်း ၆ နှစ်ပြည့်သူများအား အလုပ်လုပ်ကိုင်ခွင့်(work permit)နှင့် ဗီဇာ မထုတ်ပေးရန် တရားဝင်ထုတ်ပြန်ထားခြင်း မရှိသော်လည်း ပတ်စပို့စာအုပ်သက်တမ်းကုန်၍ အသစ်ပြုလုပ် ပြီးသည့် MOU သက်တမ်း ၆ နှစ်ပြည့်သူ အများအပြားတွင် ယခုကဲ့သို့ ကြုံတွေ့နေကြခြင်းဖြစ်ကြောင်း ထိုင်းရှိ မြန်မာအလုပ်သမားအရေး ဆောင်ရွက်နေသူများထံက သိရသည်။

MOU သက်တမ်း ၆ နှစ်ပြည့်သူများသည် မိမိတို့ လုပ်လက်စစက်ရုံ၊ အလုပ်ရုံတွင်သာ ဆက်လက်လုပ်ကိုင်ပါက စာချုပ်အသစ်ချုပ်ဆိုမှု လုပ်ဆောင်ရန်လိုအပ်ကြောင်း FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။

ထိုင်းနယ်စပ်သို့ ဝင်ရောက်လာသည့် ရွှေ့ပြောင်းလုပ်သားများ(ဓါတ်ပုံ-ရိုက်တာ)

သို့သော် ၆ နှစ်ပြည့်ပြီး စာချုပ်အသစ် ထပ်မံမချုပ်ဆိုထားခြင်းနှင့် အခြားလုပ်ငန်းခွင် မပြောင်းထားပါက ယခုကဲ့သို့ အလုပ်လုပ်ကိုင်ခွင့်(work permit)နှင့် ဗီဇာမထုတ်ပေးခြင်း၊ သက်တမ်းတိုးမပေးခြင်း စသည့် ပြဿနာနှင့် ကြုံတွေ့ရကြောင်း ၎င်းက ပြောသည်။

“အရင်တုန်းက သူက တိုးပေးတယ်ဆိုတာက ကိုဗစ်ကြောင့် အစရှိသဖြင့် ဖြေလျှော့ပြီး တိုးပေးနေတာ။ ၆ နှစ် ပြည့်တဲ့လူတွေအနေနဲ့ သူတို့အနေနဲ့ အကောင်းဆုံးက အလုပ်အတွက် သက်တမ်းတိုးထားပြီးသားလား အဲဒီအပေါ် လည်း မူတည်တယ်။ တကယ်လို့ အလုပ်အတွက် သက်တမ်းမတိုးထားသေးဘူးဆိုရင်တော့ နောက်ဆုံးဟာက တော့ အခု လူသစ်စာရင်းသွင်းတဲ့ဟာကလည်း သက်တမ်းက ကာလကုန်သွားပြီ။ ကုန်သွားပြီ ဆိုပေမယ့် တချို့ ပွဲစားတွေကတော့ အဲဒီလိုလုပ်ပေးနေတုန်းပဲ ပိုက်ဆံတော့ ကုန်ကျတာပေါ့နော်။ တကယ်လို့ ကိုယ်က မပြန် ဖြစ်ဘူးဆိုရင်တော့ အတတ်နိုင်ဆုံး တရားဝင် အထောက်အထားတစ်ခုခု ရအောင်လို့ လုပ်ပြီးတော့ နေတာ ကတော့ အဆင်ပြေမယ်ထင်တယ်။ မဟုတ်ရင် ခုနကလို အရေးယူ ဖမ်းဆီး စစ်ဆေးတာ တွေ့ရှိတယ်ဆိုရင် ဥပဒေအတိုင်းအရေးယူခံရမှာစိုးလို့။ ထိုင်းနဲ့ မြန်မာနဲ့မှာတော့ နှစ်ခြမ်းပေါ့နော်။ ထိုင်းကတော့ သူ့ရဲ့ဥပဒေအတိုင်း လုပ်တာကတော့ လုပ်မှာပဲပေါ့။ ဥပမာသူ့ရဲ့ သတ်မှတ်ထားတဲ့ work permit တို့ ဗီဇာတို့မရှိဘူးဆိုရင် သူ့ရဲ့ ဥပဒေ အတိုင်းပဲ အရေးယူဆောင်ရွက်တာ မျိုးရှိမယ်။ အခု ဗီဇာသက်တမ်းကုန်နေတာတို့ လက်ရှိမှာဆိုရင် တချို့တွေက ဗီဇာသက်တမ်းကုန်ပြီး work permit တွေ ရှိနေသေးလို့ နေလို့ရတဲ့ဟာတွေ ရှိလိမ့်မယ်။ ဒါပေမယ့် အဲဒီလိုမှ မဟုတ်ဘဲနဲ့ ဗီဇာလည်းမရှိ။ work permit ရော သက်တမ်းကုန်နေတဲ့သူတွေကတော့ စစ်ဆေးတွေ့ရှိတယ်ဆိုရင် ဒါ အဖမ်းခံရမယ်။ အဖမ်းခံရပြီး နေရပ်ကို ပြန်ပို့မှာပဲ။ အခုရက်ပိုင်းမှာလည်း အော်ပရေးရှင်းတွေက လုပ်နေတာ များတယ်။ အထူးသဖြင့် လ.ဝ.က အနေနဲ့က နယ်စပ်ဖြတ်ကျော် ရာဇဝတ်မှုနဲ့ပတ်သက်တဲ့ကိစ္စတွေ၊ ငွေကြေး လိမ်လည်တဲ့ ဂိုဏ်းကိစ္စတွေ၊ အဲဒါတွေနဲ့ပတ်သက်ပြီးတော့ စစ်ဆင်ရေးလုပ်နေတာဆိုတော့ အဖမ်းအဆီး တွေကတော့ ရှိနေတာပဲ” ဟု ဦးမင်းဦးက ပြောသည်။

ထိုင်းနိုင်ငံတွင် MOU အလုပ်သမား အများအပြားရှိသဖြင့် ယခုကဲ့သို့ ၆ နှစ် ပြည့်သူများအား နေရပ်ပြန်ပို့ရန်မှာ မဖြစ်နိုင်သည့်အပြင် မလွယ်ကူလှကြောင်း ထိုင်းရှိ မြန်မာ အလုပ်သမားအရေး ဆောင်ရွက်နေသူများက ပြောသည်။

လက်ရှိတွင် MOU စနစ်ဖြင့် အလုပ်သမားစေလွှတ်ရာတွင်လည်း လူဦးရေအများအပြား မစေလွှတ်နိုင်သေးသလို လမ်းခရီးပိုင်းတွင်လည်း အဆင်မပြေမှုများကြောင့် ကြန့်ကြာမှုများလည်း ကြုံတွေ့နေခြင်း ဖြစ်သည်။

ထို့ကြောင့် MOU သက်တမ်း ၆ နှစ်ပြည့်သူများအား နေရပ်ပြန်ပို့ပြီး ထိုင်းသို့ တရားဝင် ပြန်ခေါ်ယူရန်အတွက်မှာ လုပ်ငန်းပိုင်းအရ အချိန်ကြန့်ကြာမှု အများအပြားရှိနိုင်သည်ဟု ထိုင်းရှိ မြန်မာအလုပ်သမားအရေး ဆောင်ရွက် နေသူများက သုံးသပ်သည်။

ထို့ကြောင့် ထိုင်းအလုပ်ရှင်များမှ MOU သက်တမ်း ၆ နှစ်ပြည့်သူများနှင့်ပတ်သက်၍ တရားဝင် နေထိုင် အလုပ်လုပ်ကိုင်ခွင့် တစ်စုံတစ်ရာ ထုတ်ပေးရန် ထိုင်းအစိုးရထံ တောင်းဆိုသင့်ကြောင်း ထိုင်းရှိ မြန်မာ အလုပ်သမားအရေး ဆောင်ရွက်နေသူများက ပြောသည်။

CNI News

၂၀၂၂ ခုနှစ်၊ နိုဝင်ဘာ ၂၆

အမျိုးသမီးများအပေါ် အကြမ်းဖက်မှုများ ကျူးလွန်နေသူများကို ထိရောက်စွာ အရေးယူနိုင်ရန် ဆောင်ရွက်နေ ကြောင်း အမျိုးသားညီညွတ်ရေးအစိုးရ (NUG)၏ ပြည်ထောင်စုဝန်ကြီးချုပ် မန်းဝင်းခိုင်သန်းက ပြောသည်။

အမျိုးသမီးများအပေါ် အကြမ်းဖက်မှု ပပျောက်ရေးနေ့အတွက် ပြည်သူသို့ ပြောကြားသော မိန့်ခွန်းတွင် ၎င်းက အထက်ပါအတိုင်း ပြောကြားခဲ့ခြင်း ဖြစ်သည်။

မန်းဝင်းခိုင်သန်းက “အမျိုးသမီးများနဲ့ ကလေးသူငယ်များအပေါ် အကြမ်းဖက်ခံရမှုဟာ တစ်နိုင်ငံလုံးနဲ့ ဆိုင်တဲ့ ကိစ္စဖြစ်ပါတယ်။ ပြည်သူ့တော်လှန်ရေးကာလမှာ စစ်တပ်ရဲ့ သန္ဓေယုတ်၊ ကြမ်းကြုတ်တဲ့ အလေးအထများ ကြောင့် အမျိုးသမီးနဲ့ ကလေးသူငယ်များဟာ အကြမ်းဖက်ခံရဆုံး ပုဂ္ဂိုလ်များ ဖြစ်နေပါတယ်။ ထိုအကြမ်းဖက်မှု များကို မိမိတို့ အမျိုးသားညီညွတ်ရေးအစိုးရ အနေဖြင့် ပြင်းပြင်းထန်ထန် ရှုတ်ချပြီး ထိရောက်စွာ အရေးယူနိုင် ရန်လည်း တစိုက်မတ်မတ် ဆောင်ရွက်လျက်ရှိပါတယ်” ဟု ပြောသည်။

မိမိတို့ နိုင်ငံတွင် အကြမ်းဖက်ခံနေရသည့် အမျိုးသမီးများ၊ ကလေးသူငယ်များအတွက် တက်ကြွလှုပ်ရှားသူများနှင့် အတူ ပူးပေါင်းဆောင်ရွက်ကြရန် မန်းဝင်းခိုင်သန်းက တိုက်တွန်း ပြောကြားခဲ့သည်။

အမျိုးသမီးများအပေါ် အကြမ်းဖက်မှု ဉပဒေအရ အကာအကွယ်ပေးဖို့ လှုပ်ရှားမှုတစ်ခုကိုတွေ့ရစဉ် (Htoi Gender Development Foundation)

အမျိုးသမီးများအပေါ် အကြမ်းဖက်မှု လုပ်ရပ်မှာ မည်သည့် အဖွဲ့အစည်းက လုပ်လုပ် မကောင်းကြောင်း ဒီမိုကရက်တစ်ပါတီမှ ဒေါ်ချိုချိုကျော်ငြိမ်းက CNI သတင်းဌာနကို ပြောသည်။

၎င်းက“တကယ်သာ လုပ်ခဲ့ရင်တော့ မကောင်းဘူးပေါ့နော်၊ ဘယ်ဖက်ကမှ မပြောဘူးနော်၊ စစ်တပ်က အဲဒီလို အမျိုးသမီး တွေကို နှိပ်စက်တယ်ဆိုရင်လည်း မကောင်းသလို၊ NUG ဖက်က နှိပ်စက်တယ်ဆိုရင်လည်း ဘယ်သူ ဖက်ကပဲ ဖြစ်ဖြစ် မိန်းကလေးတွေ အပေါ်မှာ အဲဒီလို အနိုင်ကျင့်တာ မကောင်းဘူးပေါ့။ ဒါပေမဲ့ NUG သူတို့ ဘယ်လို အရေးယူမလဲဆိုတာ ကျမက NUG နဲ့ အဆက်အသွယ် မရှိတော့ မသိဘူးလေနော်၊ အဲဒီလိုတော့ တိတိ ကျကျ ကျမ မပြောနိုင်ဘူး။ သူတို့က ဘယ်အခြေအနေရှိတယ်၊ NUG ဘာလုပ်မယ်ဆိုတာ ကျမမှ မသိတာ” ဟု ပြောသည်။

နိုဝင်ဘာ ၂၅ ရက်နေ့တွင် ကျရောက်သော နိုင်ငံတကာ အမျိုးသမီးများအပေါ် အကြမ်းဖက်မှု ပပျောက်ရေးနေ့ လှုပ်ရှားမှုအဖြစ် ဖဲကြိုးဖြူကမ်ပိန်းများ ပြုလုပ်ရန် တက်ကြွလှုပ်ရှားသူများမှ တိုက်တွန်းခဲ့သည်။

ထို့အတူ ၂၀၂၁ ခုနှစ်၊ ဖေဖော်ဝါရီ ၁ ရက် နောက်ပိုင်းမှစ၍ အိမ်တွင်းအကြမ်းဖက်မှု ၁၁၁ မှု၊ အရပ်သားမှ ကျူးလွန် သော မုဒိမ်းမှု ၁၄ မှု၊ မြန်မာ့တပ်မတော်မှ ကျူးလွန်သော မုဒိမ်းမှု ၁၆ မှုနှင့် လိင်ပိုင်းဆိုင်ရာ နှောင့်ယှက်မှု ၃ မှု ထက်မနည်း ရှိနေကြောင်း အမျိုးသမီးများအဖွဲ့ချုပ်(မြန်မာနိုင်ငံ)မှ နိုဝင်ဘာ ၂၅ ရက်က ထုတ်ပြန်ခဲ့သည်။

CNI News

၂၀၂၂ ခုနှစ်၊ နိုဝင်ဘာ ၂၅

ရှမ်းပြည်နယ်မြောက်ပိုင်း၊ သီပေါမြို့နယ်၊ ကုန်းသာကျေးရွာတွင် ကျင်းပခဲ့သော သက္ကရာဇ် ၂၁၁၇ ရှမ်းနှစ်သစ်ကူးပွဲနှင့် ကောက်ဦးဆွမ်းကပ်လှူပွဲကို လုံခြုံရေးယူထားသော ရှမ်းပြည်တိုးတက်ရေးပါတီ(SSPP)နှင့် မြန်မာ့တပ်မတော်တို့ နိုဝင်ဘာ ၂၅ ရက်နေ့က တိုက်ပွဲ ဖြစ်ပွါးခဲ့သည်။

SSPP က သီပေါမြို့နယ်၊ ကုန်းသာကျေးရွာတွင် ရှမ်းနှစ်သစ်ကူးပွဲနှင့် ကောက်ဦးဆွမ်းကပ်လှူပွဲကို နိုဝင်ဘာ ၂၃ ရက်မှ ၂၄ ရက်ထိ ကျင်းပခဲ့ရာ လုံခြုံရေးယူပေးခဲ့ကြောင်း၊ ထို့နောက် တပ်မတော်မှ အင်အား ၈၀ ခန့်ဖြင့် ထိုးစစ်ဆင်လာသည့် အတွက် နိုဝင်ဘာ ၂၅ ရက်နေ့ နံနက် ၆ နာရီ ၁၅ မိနစ်ကနေ နံနက် ၇ နာရီထိ နှစ်ဖက် တိုက်ပွဲဖြစ်ပွါးခဲ့ကြောင်း SSPP က သတင်းထုတ်ပြန်ခဲ့သည်။

 သီပေါမြို့နယ်၊ ကုန်းသာကျေးရွာမှာ ကျင်းပနေသည့် ရှမ်းနှစ်သစ်ကူးပွဲကို တွေ့ရစဉ်

အဆိုပါ တိုက်ပွဲကြောင့် ကုန်းသာကျေးရွာအုပ်စု အတွင်းမှ ဒေသခံ ၆၀၀ ခန့် သီပေါမြို့ပေါ်နှင့် လုံယွန်းဘုန်းကြီးကျောင်းများသို့ ထွက်ပြေးတိမ်ရှောင်နေကြရကြောင်း SSPP ၏ ထုတ်ပြန်ချက်တွင် ဖော်ပြထားသည်။

လက်ရှိတွင် နှစ်ဖက် အင်အားများ ဖြည့်တင်းလျက်ရှိပြီး စစ်ရေးတင်မာနေကြောင်း သိရသည်။

CNI News

၂၀၂၂ ခုနှစ်၊ နိုဝင်ဘာ ၂၅

ကချင်ပြည်နယ်၊ ဖားကန့်မြို့နယ်တွင် မြန်မာ့တပ်မတော်နှင့် ကချင်လွတ်လပ်ရေးတပ်မတော် (KIA)တို့ နိုဝင်ဘာ ၂၃ ရက်နေ့က စတင်ကာ တိုက်ပွဲဖြစ်ပွားခဲ့ကြောင်း သိရသည်။

ဖားကန့်မြို့နယ်တွင် တိုက်ပွဲများ ကြိုကြားဖြစ်ပွားနေကြောင်း၊ မြန်မာ့တပ်မတော်ဘက်မှ လှုပ်ရှားမှုများ ရှိလာကြောင်း KIA မှ ပြန်ကြားရေးတာဝန်ခံ ဗိုလ်မှူးကြီးနော်ဘူက CNI သတင်းဌာနသို့ ပြောသည်။

ဗိုလ်မှူးကြီး နော်ဘူ “ပြောလို့ရတာကတော့ ဖားကန့်ဖက်မှာ ကြိုကြား၊ ကြိုကြား တိုက်ပွဲဖြစ်နေတာ အဲဒါတော့ ပြောလို့ ရပါတယ်။ နောက်ပြီး ဗန်းမော်၊ မိုးမောက်ဖက်မှာလည်း စစ်အင်အားတွေ တိုးထားတာကိုတော့ ကျနော်တို့ တွေ့ရပါတယ်။ အဲဖက်မှာလည်း ကျနော်တို့ အချိန်မရွေး တိုက်ပွဲဖြစ်နိုင်တဲ့ အနေအထား ဖြစ်ပါတယ်။ ဖားကန့် ဖက်မှာတော့ မနေ့ကလည်း တိုက်ပွဲတွေ ဖြစ်ပါတယ်။ ပြောရမယ်ဆိုလို့ ရှိရင်တော့ ဖားကန့်ဖက်မှာ စစ်ကောင်စီ ဖက်ကလူတွေရဲ့ လှုပ်ရှားတာကို တွေ့ရတာ ဖြစ်ပါတယ်။ ကျန်တဲ့ မြို့နယ်တွေမှာတော့ အဲလောက်ထိ မဟုတ်ဘူး။ မြစ်ကြီးနားမြို့ ဘေးမှာကတော့ စစ်ကောင်စီဘက်က ပြည်သူလူထုတွေရဲ့ နေအိမ်ကို ပစ်တာနဲ့ ပစ္စည်းတွေကို စစ် တာတွေ၊ ကားတွေ၊ ဆိုင်ကယ်တွေကို စစ်တာတွေ ဆက်တိုက်လုပ်နေတာ တွေ့ရပါတယ်” ဟု ပြောသည်။

အဆိုပါ တိုက်ပွဲများကြောင့် ဆိပ်မှုကျေးရွာ အုပ်စုအတွင်းရှိ အောင်ကျော်စု၊ ကောင်းဆန်၊ သောင်းကော့၊ ပင်လောင် နှင့် ဝှေခါ စသည့် ကျေးရွာများမှ ဒေသခံ ၁၀၀၀ ကျော် ဘေးလွတ်ရာ တိမ်းရှောင်နေရကြောင်း သိရသည်။

မြို့တွင်း လုံခြုံရေး ကင်းလှည့်နေသော လုံခြုံရေးတပ်ဖွဲ့ကိုတွေ့ရစဉ် (GETTY IMAGES)

ဖားကန့်မြို့နယ် ဆိပ်မူတွင် မြန်မာ့တပ်မတော်နှင့် KIA တို့ တိုက်ပွဲ ဖြစ်ပွားခဲ့ကြောင်း ဖားကန့်ဒေသခံ တစ်ဦးဖြစ်သူ ကိုအောင်ခင်က CNI သတင်းဌာနသို့ ပြောသည်။

၎င်း“အခုလောလောဆယ်က မနေ့ကဆိုရင် ဆိုင်းတောင်(ဆိပ်မူ)မှာ ဖြစ်တာ၊ ဒါကတော့ အခြေအနေက မကောင်း ဘူးဗျ။ KIA ဘက်ကလည်း သူတို့က ကုန်းပေါ်ကြတော့ သူတို့က အချိန်မရွေး ငါတို့က နေပြည်တော်ဆင်းပြီး နှောင့်ယှက်တာ မဟုတ်ဘူး။ ငါတို့က ငါ့တို့နယ်မြေ မွေးဇာတိမှာ လာနှောင့်ယှက် နေတာဆိုတော့ တွယ်ချင်တာ (တိုက်ခိုက်) PDF တွေရယ်၊ ဒါပေမဲ့လည်း အထက်က KIA ရဲ့ အုပ်ချုပ်နေတဲ့ အခါကြတော့ KIA က မပစ်ခိုင်းဘူး လေ၊ မလုပ်နဲ့တဲ့ ငါတို့ နှစ်ပေါင်း ၆၀ ကျော်လုံးလုံး တော်လှန်ရေးလုပ်ခဲ့တာ သည်းခံဦး၊ သည်းခံဦးဆိုပြီး တခါ တည်း မပစ်ခိုင်းဘူး။ PDF တွေက ချချင်နေတာ။ လောလောဆယ်တော့ လေယာဉ်နဲ့ လုပ်တာတွေ၊ ဘာတွေတော့ အဲဒီတစ်လလောက်က ဖြစ်သွားတဲ့ဟာ အဲဒီနောက်ပိုင်းက မရှိသေးဘူး။ ဒီဖက်တော့” ဟု ပြောသည်။

ဖားကန့်မြို့နယ်သည် ရွေ့ပြောင်း အလုပ်သမား အများစုရှိသည့် ကျောက်စိမ်းထွက်ရှိရာ ဒေသဖြစ်ပြီး မြန်မာ့ တပ်မတော် အပါဝင် KIA၊ ဌာနေပြည်သူစစ်များလည်း လှုပ်ရှားလျက်ရှိသည်။

လက်ရှိတွင် ဖားကန့်၊ ဗန်းမော်၊ မိုးမောက်နှင့် တနိုင်းတို့တွင် မြန်မာ့တပ်မတော်နှင့် KIA၊ ဒေသကာကွယ်ရေးတပ် (PDF) ပူးပေါင်းတပ်တို့အကြား တိုက်ပွဲများ ဖြစ်ပွားလျက်ရှိသည်။

CNI News

၂၀၂၂ ခုနှစ်၊ နိုဝင်ဘာ ၂၄

ရှမ်နှစ်သစ်ကူးနေ့သို့ ပလောင်ပြည်လွတ်မြောက်ရေးတပ်ဦး (PSLF/TNLA)မှ ပေးပို့သည့် သဝဏ်လွှာသည် ရှမ်းပြည်ဌာနေသား အချင်းချင်း စည်းလုံးရန် ကောင်းသည့် လက္ခဏာဖြစ်ကြောင်း ရှမ်းလူ့အခွင့်အ‌ရေးမဏ္ဍိုင် (SHRF)မှ ယိင်းလျန်းဟန်က CNI သတင်းဌာနသို့ ပြောသည်။

တိုင်းရင်းသား အချင်းချင်း အပြုသဘောဆောင် ပြောခြင်းကြောင့် မိမိတစ်ဦးတည်း၏ အမြင်အရ ရှမ်းပြည်အရေး အတွက် ကောင်းမွန်ကြောင်း ၎င်းက ပြောသည်။

SHRF မှ ယိင်းလျန်းဟန်က “ဒါကတော့ ကျနော်ရဲ့ Personal အမြင်ပါ။ အဖွဲ့အစည်းရဲ့ ကိုယ်စားပြု အနေနဲ့တော့ မဟုတ်ဘူးပေါ့နော်၊ ဒီလိုမျိုးကို ကျ‌နော်တို့ တိုင်းရင်းသားအချင်းချင်း ဒီလိုမျိုးတွေ အပြုသဘော‌ဆောင်ပြီး ကျနော် တို့ အချင်းချင်း ဒီလိုမျိုးတွေ ပြောပေးတာ၊ ရှမ်းပြည်အရေးအတွက် ကောင်းတဲ့ လက္ခဏာပဲလို့ ကျနော်တို့ ပြောလို့ ရတယ်ပေါ့နော်၊ အဲလိုတော့ မြင်ပါတယ်ရှင့်၊ ကျနော်တို့ ရှမ်းပြည်ရှေ့ရေးအတွက် ဒီရှမ်းပြည်မှာဆို ကျနော်တို့ ငြိမ်း ငြိမ်းချမ်းချမ်း အတူတူနေဖို့ပေါ့နော်၊ တိုင်းရင်းသား အချင်းချင်း အတူတူနေဖို့ ဒီထက်ပိုပြီး စည်းလုံးနိုင်ဖို့ ဒီလိုမျိုး ပြောတာ‌မျိုးက ကျနော်တို့ ကြိုလည်း ကြိုဆိုပါတယ်၊ ကောင်းတဲ့ လက္ခဏာလို့လည်း မြင်ပါတယ်” ဟု CNI သတင်းဌာနသို့ ပြောသည်။

ပလောင်တိုင်းရင်းသားများကိုတွေ့ရစဉ်

နတ်တော်လဆန်း ၁ ရက်နေ့တွင် ကျရောက်သော ရှမ်းအမျိုးသားများ၏ ၂၁၁၇ မြောက် ရှမ်းနှစ်သစ် မင်္ဂလာနေ့၌ ရှမ်းလူမျိုးများ အားလုံး ဘေးအန္တရာယ် ကင်းဝေးပြီး၊ ကျန်းမာတိုးတက် ကြပါစေကြောင်း ဆုတောင်း မေတ္တာပို့သသည်ဟု TNLA မှ ပေးပို့သည့် သဝဏ်လွှာတွင် ဖော်ပြထားသည်။

ယခုလို သဝဏ်လွှာ ပေးပို့ခြင်းသည် ကောင်းသောလက္ခဏာဟု ပြော၍ရကြောင်း၊ ရှမ်းနှင့် တအာင်း အချင်းချင်း ကြား ညီညွတ်မှု ပိုခိုင်မာလာမည်ဟု မျှော်လင့်ကြောင်း တအာင်းအမျိုးသမီး အဖွဲ့အစည်း(TWO)မှ အထွေထွေ အတွင်းရေးမှူး လေးပိုးကမေဲ့ခြိူဝ်းက CNI သတင်းဌာနသို့ ပြောသည်။

ရှမ်းတိုင်းရင်းသားများကိုတွေ့ရစဉ်

၎င်းက “ဒီလိုပို့လိုက်တဲ့ အပေါ်မှာ ဒါကကောင်းတဲ့လက္ခဏာ တစ်ခုလို့လည်း ပြောလို့ရတယ်၊ ဒီစည်းလုံးညီညွတ်မှု အတွက်လည်း သက်သေအနေနဲ့ ပြတယ်လို့လည်း ကျမတို့ သုံးသပ်လို့ရတယ်ပေါ့၊ ကျမတို့ တိုင်းရင်းသားလူမျိုး အချင်းချင်း ညီညွတ်ပြီးတော့ ဒီအာဏာရှင်ကို တိုက်ထုတ်ပြီးတော့ ကျမတို့ရဲ့ ဖက်ဒရယ်နိုင်ငံတော်ကို တည် ထောင်ရမယ့် အချိန်ကောင်းဖြစ်တဲ့ အတွက်ကြောင့်မို့လို့ ဘာပဲနေနေ ဒီလိုသဝဏ်လွှာ ပို့တဲ့အတွက်ကြောင့်မို့လို့ ကျမတို့ တအာင်းနဲ့ ရှမ်းတွေ အချင်းချင်းကြားထဲမှာလည်း ညီညွတ်မှုတွေ ပိုပြီးမှ ခိုင်မာလာမယ်လို့လည်း ကျမ အနေနဲ့ မျှော်လင့်မိပါတယ်” ဟု ပြောသည်။

လက်ရှိတွင် ရှမ်းပြည်နယ်အတွင်း လူမျိုးစု လက်နက်ကိုင်တပ်ဖွဲ့များ အချင်းချင်း ငြိမ်းချမ်းရေး ကမ်းလှမ်းမှုများ ရှိလာကြောင်း၊ ထိတွေ့တိုက်ပွဲ ဖြစ်ပွားမှုများ နည်းလာကြောင်း၊ ထိုအခြေအနေများကြောင့် အချင်းချင်းအကြား ယုံကြည်မှုများ ပိုရှိလာမည်ဟု မြင်မိကြောင်း လေးပိုးကမေဲ့ခြိူဝ်းက ပြောသည်။

ရှမ်းပြည်နယ်တွင် တအာင်း၊ ရှမ်း၊ ကချင်၊ တရုတ်၊ ဗမာ၊ ဝ၊ ကိုးကန့်၊ အာခါ၊ ဓနု၊ ပအိုဝ်း၊ လားဟူ၊ လီဆူ အပါအဝင် တခြားသော တိုင်းရင်းသား လူမျိုးစုများလည်း နေထိုင်ကြသလို လက်နက်ကိုင်အဖွဲ့များ အနေဖြင့်လည်း လူမျိုးစု အလိုက် တည်ရှိနေကြောင်း သိရသည်။

CNI News

၂၀၂၂ ခုနှစ်၊ နိုဝင်ဘာ ၂၃

အချိန်တစ်ခု ရောက်လာသည့်အခါမှာ မျက်ရည်ကိုသုတ် ဓားကိုဆုပ် ရှေ့တစ်လှမ်းတိုးကြပါစို့ဟု ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီ(USDP)ဥက္ကဋ္ဌ ဦးခင်ရီက ပြောသည်။

ဦးခင်ရီသည် စစ်ကိုင်းတိုင်းဒေသကြီး၊ မုံရွာမြို့ရှိ USDP ရုံးချုပ်တွင် တိုင်း၊ ခရိုင်နှင့် မြို့နယ်တချို့မှ ပါတီဝင်များ အပါအဝင် သတ်ဖြတ်မှုများ ခံခဲ့ရသည့် ပါတီဝင် မိသားစုဝင်များဖြင့် ၂၀၂၂ ခုနှစ်၊ နိုဝင်ဘာ ၂၂ ရက်က တွေ့ဆုံ စဉ် အထက်ပါ အတိုင်း ပြောကြားသွားခြင်း ဖြစ်သည်။

ဦးခင်ရီက “အခုအချိန်ကစပြီး မှတ်ထားဖို့က ကိုယ်တစ်ယောက်တည်း မဟုတ်ဘူး။ ကျနော်တို့မှာ ပါတီဆိုတဲ့ အစုအဖွဲ့ကြီး ရှိတယ်။ တစ်ယောက်အားနဲ့မရရင် အများအားနဲ့ ဆောင်ရွက်ရမယ်။ ငါ့နောက်မှာ၊ ငါ့ဘေးမှာ၊ ငါ့အဖေ ရှိတယ်၊ ငါ့အစ်ကို ရှိတယ်၊ ငါ့မောင်တွေ ရှိတယ်၊ ခင်ဗျားတို့ရှေ့မှာ အနစ်နာခံဖို့ အဆင်သင့် ရှိနေဆဲပဲ၊ ရှေ့ခရီးမှာ သားသမီးတွေအတွက် ဘာလုပ်မလဲဆိုတာ စဉ်းစားရမယ်။ ကူညီပေးဖို့ ၊ နားထောင်ဖို့၊ ဖြေရှင်းဖို့ ကျနော်လာခဲ့တာပါ။ အချိန်တစ်ခု ရောက်လာတဲ့အခါမှာ မျက်ရည်ကိုသုတ်၊ ဓားကိုဆုပ်၊ ရှေ့တစ်လှမ်းတိုး ကြပါစို့"ဟု ပြောသည်။

၂၀၂၂ ခုနှစ်၊ နိုဝင်ဘာ ၂၁ ရက်က မုံရွာမြို့မှာ ဦးခင်ရီ ပါတီဝင်များနဲ့တွေ့ဆုံစဉ်

ဦးခင်ရီ၏ မုံရွာခရီးစဉ်တွင် USDP ပါတီ၏ ဗဟိုအလုပ်အမှုဆောင် ဦးမြင့်စိုး၊ ပါတီဗဟိုအတိုင်ပင်ခံ ဒေါက်တာ မြင့်သိန်းတို့ ပါဝင်ခဲ့ကြောင်း USDP က ထုတ်ပြန်ထားသည်။

ဦးခင်ရီသည် ၂၀၂၂ ခုနှစ်၊ အောက်တိုဘာ ၅ -၆ ရက်များက ကျင်းပခဲ့သော USDP ၏ တတိယအကြိမ် ပါတီညီ လာခံကနေ ဥက္ကဋ္ဌအဖြစ် ရွေးကောက် တင်မြောက်ခံခဲ့ရသူ ဖြစ်သည်။

ယခင်က USDP ၏ ဒုဥက္ကဋ္ဌအဖြစ် တာဝန်ယူနေပြီး နစက၏ လ.ဝ.က ဝန်ကြီးအဖြစ် တာဝန်ယူခဲ့သည်။

လက်ရှိတွင် ဦးခင်ရီသည် USDP ပါတီဥက္ကဋ္ဌအဖြစ် တိုင်းဒေသကြီးနှင့်ပြည်နယ် အသီးသီးသို့ သွားရောက်ကာ ပါတီစည်းရုံးရေးများကို လုပ်ဆောင်လျက်ရှိနေသလို သတ်ဖြတ်ခံရသော USDP ပါတီဝင် မိသားစုများနှင့် တွေ့ ဆုံလျက်ရှိနေသည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့ နောက်ပိုင်း မြန်မာနိုင်ငံတွင် နိုင်ငံရေးအကျပ်အတည်းဖြစ်ကာ လက်နက် ကိုင် ပဋိပက္ခများ ကျယ်ပြန့်လာပြီး USDP ပါတီဝင် ၂၀၀၀ ကျော် သတ်ဖြတ်ခံထားရသလို အရပ်သား ပြည်သူ ၂၀၀၀ ကျော်လည်း သတ်ဖြတ်ခံထားရသည်။

CNI News
၂၀၂၂ ခုနှစ်၊ နိုဝင်ဘာ ၂၂

၂၁၁၇ ခုနှစ် ရှမ်းနှစ်သစ်ကူးနှင့် ကောက်ဦးဆွမ်းကပ် လှူပွဲအတွက် အင်းတော်ကြီးဒေသ ဟွေဖာဆေ(နားလတန်း)ကျေးရွာတွင် ရှမ်းနီ တိုင်းရင်းသား/သူများ ပြင်ဆင်နေကြသည်ကို တွေ့ရသည်။

CNI News

၂၀၂၂ ခုနှစ်၊ နိုဝင်ဘာ ၂၂

ပြည်ပ နိုင်ငံများသို့ အလုပ်အကိုင် အခွင့်အလှမ်းရှိသည်ဟုဆိုကာ တရားမဝင်အေဂျင်စီ အဖြစ် လုပ်ကိုင်နေမှုများကို တိုင်ကြားလာလျှင် အရေးယူသွားမည်ဟု အလုပ်သမား ဝန်ကြီးဌာန အမြဲတမ်းအတွင်းဝန် ဦးညွန့်ဝင်းက CNI သတင်း ဌာနသို့ ပြောသည်။

“တရားမဝင်အေဂျင်စီကတော့ ကျနော်တို့ကတော့ အဲဒါတွေကို လိုက်ပြီးတော့ စုံစမ်းထောက်လှမ်းနေတဲ့ ဌာနတော့မဟုတ်ဘူး။ အဲဒီတော့ တိုင်မှရမယ်။ တိုင်မှလည်း သိမှာ။ ဘာလို့ဆို ကျနော်တို့ ရုံးတွေမှာ ရှိတာက လက်ရှိ လုပ်ဆောင်ရမယ့်လုပ်ငန်းတာဝန်အရ ကျနော်တို့ ဒီဟာတွေကိုလိုက်ပြီး နယ်မြေတွေဆင်းပြီး တစ်လမ်းဝင်၊ တစ်လမ်းထွက်နဲ့ ဟိုလူ့မေး၊ ဒီလူ့မေး အဲဒီလောက်အထိ ကျနော်တို့လုပ်ဖို့လည်း တာဝန်အရ မရှိဘူး။ အဲဒီတော့ပြောချင်တာက တိုင်လို့ရှိရင် ၁၉၉၉ ခုနှစ် ပြည်ပအလုပ်အကိုင်ဆိုင်ရာ ဥပဒေအရ ဒါ ရဲ အရေးပိုင်ခွင့်ရှိတဲ့ ဥပဒေဖြစ်တဲ့အတွက် ဒါ ကျ‌နော်တို့ တရားစွဲပြီးချက်ချင်းအရေးယူမှာဖြစ်ပါတယ်။ အဲဒီတော့ မတိုင်ရင် ကျနော်တို့ ဘာမှ မသိနိုင်ဘူးပေါ့။ ဒီဥစ္စာကို မတိုင်ဘူး သူတို့ဘာသာသူတို့ ကျေနပ်နေတယ်ဆိုရင် ဒါ အင်မတန်မှ လုပ်ရကိုင်ရ ခက်တဲ့ကိစ္စမျိုးဖြစ်ပါတယ်” ဟု ၎င်းက ပြောသည်။

မြန်မာနိုင်ငံတွင် လက်ရှိ၌ ပြည်ပသို့ သွားရောက်လုပ်ကိုင်လိုသူ များပြားနေသည့်အတွက် တရားမဝင် အေဂျင်စီ တို့သည်လည်း များပြားလာကာ ၎င်းတို့နှင့်ချိတ်ဆက်၍ ပြည်ပထွက် အလုပ်လုပ်သည့်အခါတွင် အခက်အခဲ၊ ဒုက္ခ များစွာကြုံရသကဲ့သို့ ငွေကြေးလိမ်လည်ခံလိုက်ရခြင်းများနှင့်လည်း ကြုံတွေ့နေရသည်။

ပြည်ပအလုပ်အကိုင်ရှာဖွေရေးအေဂျင်စီတစ်ခုတွင် လာရောက်လျှောက်ထားသူများအားတွေ့ရစဉ်

လိုင်စင်မရှိဘဲ အလုပ်သမားစေလွှတ်ခြင်းနှင့် အလုပ်သမားစုဆောင်းခြင်းတို့သည် ငွေဒဏ်တစ်ခုတည်းနှင့် မပြီးပြတ်ဘဲ ထောင်ဒဏ်ပါ ကျခံရနိုင်သည့် ကြီးလေးသော ပြစ်မှုဖြစ်ကြောင်း အလုပ်သမားဝန်ကြီးဌာန အမြဲတမ်းအတွင်းဝန် ဦးညွန့်ဝင်းက ဆက်ပြောသည်။

ယခင်ကတည်းက အလုပ်သမားဝန်ကြီးဌာနသို့ အလုပ်သမားအရေးနှင့်ပတ်သက်၍ တိုင်ကြားသည့်အခါတွင် အရေးယူမှုအပိုင်းတွင် အားနည်းသကဲ့သို့ ယခုလက်ရှိကာလ၌ ပိုမိုအားနည်းနိုင်သည်ဟု FED မှ အလုပ်သမား တာဝန်ခံ ဦးမင်းဦးက CNI သတင်းဌာနသို့ပြောသည်။

ထိုသို့ အရေးယူမှုအပိုင်း အားနည်းသည့်အတွက် ယခုကဲ့သို့ တရားမဝင်အေဂျင်စီ ပေါများလာပြီး လိမ်လည်မှု တို့မှာလည်း ပေါများလာခြင်းဖြစ်ကြောင်း ၎င်းက ပြောသည်။

ဦးမင်းဦးက “တကယ့်တကယ်က လုပ်ချင်တယ်ဆို လုပ်လို့ရပါတယ်။ ဒါကို ကိုင်တွယ်လို့ရတာပဲဥစ္စာ။ ဥပမာ အားဖြင့် ထိထိရောက်ရောက်နဲ့ အရေးယူတရားစွဲပြီးတော့ လုပ်ပြလိုက်ရင် နောက် ကျန်တဲ့လူတွေက ဘယ်လုပ် ရဲပါ့မလဲ။ အဲဒီလိုမဟုတ်ဘူးဆိုရင်တော့ ဒါတွေက ဖြစ်နေမှာ။ အခုလိုအချိန်မှာဆို ပိုလို့တောင် အခွင့်ကောင်း ဖြစ်နေတာပေါ့ သူတို့အတွက်။ အရေးယူမှုအပိုင်းမှာ မပြတ်သားတဲ့ဟာတွေပေါ့နော်။ နောက်ပြီးတော့ ပတ်သက်ရာ ပတ်သက်ကြောင်းတွေ ဆိုတဲ့ဟာတွေ။ အဲဒီလိုမျိုးတွေ ဖြစ်နေတာ။ အခုဆိုရင်တော့ အဲဒီ အရင်တုန်းက အခြေအနေတွေထက် ပိုပြီးတော့ ဆိုးမယ်လို့ ကျနော်ထင်တယ်။ လူတွေကလည်း တော်တော်များများကလည်း သူတို့ ရတဲ့နည်းနဲ့ ထွက်ဖို့ကြိုးစားတဲ့အခါမှာ ဟိုက တရားဝင်ဝင်၊ မဝင်ဝင်ပေါ့နော် ပြည်ပကို အမြန်ဆုံး ထွက်လို့ရတဲ့နည်းလမ်းကို ရှာကြတာ။ ဒီ မှန်တယ်၊ မှားတယ်ဆိုတဲ့ ကိစ္စတွေ သူတို့မစဉ်းစားနိုင်တော့ဘူး။ ပြောတဲ့အပေါ် ယုံပြီးတော့ လုပ်ကြတာပေါ့” ဟု ပြောသည်။

လက်ရှိတွင် ပြည်ပသို့ အလုပ်သမားစေလွှတ်ရာတွင် တာဝန်ယူမှု တာဝန်ခံမှုမရှိဘဲ တရားမဝင်လမ်းကြောင်းမှ စေလွှတ်သည့် တရားမဝင်အေဂျင်စီများရှိသကဲ့သို့ လူအစုအဖွဲ့ဖြင့် အမှန်တကယ် လုပ်ကိုင်နေသည့် တရားဝင် အေဂျင်စီများ၏ အမည်နှင့် အချက်အလက်တို့ကို အသုံးပြုကာ ငွေကြေးလိမ်လည်နေခြင်းများလည်း ရှိကြောင်း ပြည်ပအလုပ်အကိုင် အေဂျင်စီများထံက သိရသည်။

နိုင်ငံကူးလက်မှတ်ထုတ်ပေးသည့်ရုံးတွင် တန်းစီစောင့်ဆိုင်နေကြစဉ်

ထိုသို့ ကိစ္စရပ်များရှိနေသည့်အတွက် အမှန်တကယ် လိုင်စင်ဖြင့် တရားဝင်လုပ်ကိုင်နေသည့် ပြည်ပအလုပ်အကိုင် အေဂျင်စီများတွင် ထိခိုက်မှုရှိကြောင်း ပွင့်ဖူးအောင် အေဂျင်စီမှ မန်နေးဂျင်းဒါရိုက်တာ ဒေါ်မြတ်ဟေမာန်လင်းက CNI သတင်းဌာနသို့ ပြောသည်။

“နောက်တစ်ခုက ဆရာမတို့ဆီကို ဖုန်းတွေဆက်လာတယ်။ ဘာတွေ ဆက်လာလဲဆိုတော့ ဒီလထဲမှာ စာချုပ် ချုပ်တာ မရှိဘူးလားပေါ့။ ကိုယ့်ကိုလည်း စာအုပ်လည်း လာမအပ်သေးဘူး၊ ကိုယ့်အေဂျင်စီကလည်း ဘာမှန်းလဲ မသိဘူး။ သူတို့မေးတဲ့ မေးပုံမေးနည်းကိုကလေ။ အလုပ်အပ်ချင်တဲ့သူတွေက အမြန်သွားချင်တယ် အလုပ်နဲ့ပေါ့။ အမြန်ရတဲ့ စာချုပ်ပေးပါတို့၊ အခုပေါက်တဲ့ ဈေးတွေလည်းသိတယ်။ ဈေးချိုချိုပေါ့။ နောက်ငွေလွှဲပေးပါ။ ဘယ်နေ့ ကို စာချုပ်ချုပ်တော့မယ်ပေါ့။ ရက်စွဲတွေ သူတို့ပေးတယ်။ ဒါပေမယ့် တကယ့်မှာကတော့ အဲဒီအေဂျင်စီတွေမှာ ဆရာမတို့ အေဂျင်စီတွေမှာလည်း အဲဒီအလုပ်တွေမရှိဘူး။ တကယ်အထိနာတဲ့သူတွေက ဘယ်သူတွေလဲဆိုတော့ မြန်မြန်သွားချင်တယ်၊ နောက် ဒီလထဲမှာ စာချုပ်ချုပ်ချင်တယ်၊ ဒီလထဲမှာ စာချုပ်ချုပ်ပြီးရင် သူတို့က အပြော ကောင်းတယ် ရက် ၂၀ အတွင်းတောင် ထွက်ရမှာတို့။ အမှန်တကယ်ကတော့ မြေပြင်အခြေအနေ အလုပ်လုပ် နေတဲ့လူတွေက ဆရာမတို့မှာ ၃  လကျော်  ဟာတောင် ရှိတယ်။ စေလွှတ်ရက်တွေကပေါ့။ ကျော်တဲ့အကြောင်းအရင်းက တစ်ရက်မှ ၈၅၀ ပဲ စေလွှတ်လို့ရတာလေ။ အဲတော့ သူသူငါငါ စေလွှတ်နေတဲ့အချိန်မှာ ကိုယ်က ဒီလထဲမှာ သွားချင်တယ် ဆိုရင်တောင် ဆရာမက ဒီရက်ထဲ သွားတင်ရင်တောင် ဒီဇင်ဘာ ‌ကုန်တော့ မှ ရတော့မှာ။ အနည်းဆုံး စာချုပ်ချုပ်ဆိုပြီးရင် ၂ လကျော်မှ သွားရတာများတယ်”ဟု ၎င်းကပြောသည်။

တရားဝင်အေဂျင်စီကိုသော်လည်းကောင်း တရားမဝင် အေဂျင်စီကိုသော်လည်းကောင်း တိုင်ကြားချင်လျှင် တိုင်ကြားမည့်သူ၏ အချက်အလက်အပြည့်အစုံလိုအပ်သကဲ့သို့ တိုင်ကြားသည့်အကြောင်းနှင့်ပတ်သက်၍လည်း အချက်အလက်အပြည့်အစုံလိုအပ်ကြောင်း အလုပ်သမားဝန်ကြီးဌာနမှ သိရသည်။

ထို့အပြင် ဝန်ကြီးဌာနသို့ တိုင်ကြားလာသည့်အထဲတွင် အချက်အလက်ပြည့်စုံ မှန်ကန်မည်ဆိုပါက တရားဝင် အေဂျင်စီဖြစ်သော်လည်း အရေးယူခြင်းများ လုပ်ဆောင်ကြောင်းလည်း အလုပ်သမားဝန်ကြီးဌာနမှ သိရသည်။

CNI News

၂၀၂၂ ခုနှစ်၊ နိုဝင်ဘာ ၂၂

ကချင်ပြည်နယ်၊ တနိုင်းမြို့နယ်တွင် ကချင်လွတ်လပ်ရေးတပ်မတော် (KIA)၊ ဒေသကာကွယ်ရေးတပ် (PDF) တို့မှ ခရီးသွားလာသော ပြည်သူများထံမှ ငွေကြေး ကောက်ခံနေကြောင်း ဒေသခံများက ပြောသည်။

ငွေးကြေးကောက်ခံမှုကို လူခွန်ဟုဆိုကာ ကောက်ခံနေကြောင်း၊ KIA နှင့် PDF နှစ်ဖွဲ့ခွဲ၍ ကောက်ခံနေကြောင်း ဒေသခံ တစ်ဦးဖြစ်သူ ကိုမျိုးဝင်းက CNI သတင်းဌာနသို့ ပြောသည်။

တနိုင်းမြို့အ၀င်ကိုတွေ့ရစဉ်

၎င်းက “သူတို့က လဝါး တစ်လျှေက်လောက်ပေါ့၊ အဲဒီလောက်မှာ သူတို့က စောင့်ပြီးမှ ဘယ်လိုပြောမလဲ၊ ဝါးထမ်း လို့ ပြောတာပေါ့၊ လူခွန်ပြောတာပေါ့နော်၊ ဝါးထမ်းလို့ ပြောတာပဲ၊ ကချင်လိုလား၊ မြန်မာလို ပြောတာလားတော့ မသိဘူး။ ဝါးထမ်းလို့ ပြောတာပဲ။ အဲဒါပထမက KIA ဘက်ကနေ ၅ သောင်း၊ ၅ သောင်းကို ကျနော်တို့ တောင်း တောင်း ပန်ပန်နဲ့ ၃ သောင်းပေါ့၊ နောက်ဆုံး ၃ သောင်းနဲ့ ရသွားတာ၊ တစ်ယောက်ကို ၃ သောင်းနှုန်း တောင်းတယ်၊ ကားတွေကတော့ ၁ သိန်း ကောက်ရင်ကောက်မယ်၊ ၂ သိန်းကောက်ရင် ကောက်မယ်ပေါ့၊ ကျနော်တို့ လူခွန်က တော့ ၃ သောင်း၊ နောက် ၃ သောင်းဆိုရင် လက်မှတ်လုပ်ပေးတယ်၊ အဲဒီလက်မှတ်နဲ့ လမ်းမှာ ကျနော်တို့ နောက် တစ်ခေါက် သွားရင်းနဲ့ အဲဒီလက်မှတ်ပြတာ မဟုတ်တော့ဘူးတဲ့ အဲဒီအတွက် မဟုတ်ဘူးတဲ့ ကျနော်တို့ကတော့ PDF ကပါတဲ့၊ PDF ကြတော့ ရန်ပုံငွေပေါ့၊ ၂ သောင်း ပြန်ထည့်ပေးတယ်၊ ရန်ပုံငွေလည်း ပြောတယ်၊ စေတနာ မရဘူး။ ၂ သောင်း ပြန်သတ်မှတ်တယ်၊ အဲဒီ ၂ သောင်း ပြန်ထည့်ရတာပဲ၊ ၅ သောင်း ကျသွားတာပေါ့” ဟု ပြော သည်။

ထို့နောက် တနိုင်းမြို့နယ်အတွင်း ပယင်းလုပ်ငန်းများ လုပ်ကိုင်နေသူများသည် KIA ထံ အခွန်ဆောင်ထားပြီးသာ ပယင်းကျောက်များကို သွယ်ဆောင်သွားစဉ် လမ်း၌ဖြတ်သန်းသွားလာသူများကို ငွေကြေးကောက်ခံနေသော KIA အဖွဲ့က သိမ်းဆည်းသွားသည်များ ကြုံတွေ့နေရကြောင်း၊ ထိုပယင်းများကို KIA က ၎င်းတို့သတ်မှတ်သော ဈေးနှုန်းဖြင့် ပြန်လည် ရွေးယူခိုင်းကြောင်း ၎င်းက ပြောသည်။

KIA လက်အောက်ခံ KPDF ကိုတွေ့ရစဉ် (kpdf-hopin)

အဆိုပါ အခြေအနေများနှင့် ပတ်သက်ပြီး KIA ၏ ပြန်ကြားရေးတာဝန်ခံ ဗိုလ်မှူးကြီး နော်ဘူထံ CNI သတင်းဌာနမှ ဖုန်းဆက်သွယ် မေးမြန်းခဲ့သော်လည်း ဖုန်းလက်ခံ ဖြေကြားခြင်း မရှိပေ။

ယခင်က PDF များသည် ငွေကြေး ကောက်ခံခြင်း မရှိကြောင်း၊ ယခုကောက်ခံမှုမှာ အထက်က ညွှန်ကြားချက်အရ ကောက်ခံနေသည်ဟု ယူဆကြောင်း ကချင်နိုင်ငံရေးသမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။

ထို့နောက် ယခင်က ပယင်းကျောက် တစ်အိတ်ကို KIA ထံ အခွန်အနေဖြင့် ကျပ်ငွေ ၅ ထောင် ပေးဆောင်ရ ကြောင်း၊ သို့သော်လည်း ယခုလ ပထမပတ်မှ စတင်ပြီး တစ်အိတ်လျှင် ကျပ်ငွေ ၂ သောင်းနှုန်းဖြင့် ကောက်ခံနေ ကြောင်း တနိုင်းဒေသခံ တစ်ဦးဖြစ်သူ ကိုဇော်နိုင်က CNI သတင်းဌာနသို့ ပြောသည်။

ပယင်းကို စစ်ဆေးနေစဉ် (Hkun Lat)

၎င်းက “KIA ဘက်က ဖမ်းသွားတာပေါ့နော်၊ ပယင်းကျောက် ကုန်သည်တွေ ဆီကနေပြီးတော့မှ ပယင်းတွေ ဖမ်း သွားတာပေါ့နော်၊ အဲဒီ ကုန်သည်တွေကလည်း အားလုံးက အခွန်ဆောင်ပြီးသားပဲ၊ အခွန်ဆိုတာ KIA ဘက်က သတ်မှတ်ထားတဲ့ အခွန်တွေ၊ သူက ကားဂိတ်မှာ ဆောင်ရတာကိုး၊ ဒါပေမဲ့ ဂိတ်မှူးတွေ၊ ကားမောင်းတဲ့ သူတွေက သူတို့အဖွဲ့ကို သွားမပေးလို့များလား လာပြီးဖမ်းတာပေါ့နော်၊ လာပြီးဖမ်းတဲ့ အခါကြတော့ အကုန်လုံးပါသွားတယ်၊ ပါသွားတာက တန်ဖိုးက သိန်း ၁၀၀၀ ကျော်လောက်တော့ ရှိလိမ့်မယ် အနည်းဆုံး ၁၀၀၀ ဆိုရင် ကျနော်သိတဲ့သူ တောင် သိန်း ၁၀၀၀ လောက် ရှိနေပြီဆိုတော့ သိန်း ၁၀၀၀ ကျော်လောက်ပါတယ်။ ဒါပေမဲ့ လွန်ခဲ့တဲ့ ၂ ရက်၊ ၃ ရက်က ပြန်ရွေးခိုင်းတာ ရှိတယ်၊ ပြန်ပြီးတော့ ပိုက်ဆံပေးရတဲ့ အပိုင်းတွေ ရှိတယ်” ဟု ပြောသည်။

တနိုင်းဒေသတွင် KIA ၏ တပ်မဟာ (၉) လှုပ်ရှားလျက်ရှိကြောင်း၊ လက်ရှိတွင် KIA၊ PDF ပူးပေါင်းတပ်များ လှုပ်ရှားလျက်ရှိကြောင်း သိရသည်။

အဆိုပါ တနိုင်းဒေသတွင် မြန်မာ့တပ်မတော်နှင့် KIA ကြား တိုက်ပွဲများ မကြာခဏ ဖြစ်ပွားလျက်ရှိသည်။