CNI News

၂၀၂၃ ခုနှစ်၊ မေလ ၃၀

ခေတ်သစ်စစ်ပွဲများကို လေ့လာရန် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ပြောဆိုမှုသည် စစ်ပွဲရလဒ်များ တစ်မျိုးတစ်ဖုံ ပြောင်းလဲသွားရေးအတွက် လေ့လာခိုင်းခြင်း ဖြစ်နိုင်ဟု မြန်မာ့နိုင်ငံရေး လေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။

ယနေ့ခေတ်တွင် ခေတ်သစ်စစ်နည်းဗျူဟာများ ပြောင်းလဲလာသည်ကို တွေ့ရသည့်အတွက် ခေတ်သစ် စစ်ပွဲ များနှင့် ပတ်သက်၍လည်း မျက်ခြည်မပြတ် လေ့လာနေရန်လိုကြောင်း မေလ ၂၉ ရက်က နစကဥက္ကဋ္ဌမှ ပြော ကြားခဲ့သည်။

ဦးရဲထွန်းက “အဲဒါက အရင်တုန်းက ပုံစံအတိုင်းဆို မဟုတ်ဘူး။ အဲဒီ တနေရာကို သူက ခြေလျင်နဲ့ပဲ ချီတက်တာ‌ ပေါ့၊ ခြေလျင်ထဲမှာလည်း မော်တော်ကားတို့၊ ဘာတို့ အဲဒါတွေ အသုံးပြုပြီးတော့ ချီတက်ပြီးတော့ ဝိုင်းဝန်းပြီး တိုက်တာပေါ့၊ အခုကြတော့ အဲဒီလို သွားလို့ရှိရင် ကိုယ်က သတင်းလက်ဦးမှုက မရတဲ့အခါကြတော့ အဲဒီဒေသမှာ ကိုယ်ရည်မှန်းထားတဲ့ ပစ်မှတ်ကလည်း မရှိတော့ဘူး။ သူတို့ ဖြန့်ခွဲလိုက်တာတို့ ဒါမှမဟုတ် ကိုယ်သွားတဲ့ လမ်းကြောင်းမှာ ကိုယ့်ကို ချုံခိုတိုက်တာတို့ အဲဒီလိုတွေ ခံရတဲ့အခါကြတော့ ချုံခိုတိုက်တဲ့ အခါမှာလည်း အထိ အခိုက် အကျအဆုံးတွေ အများကြီး ဖြစ်တဲ့အခါကြတော့ စစ်ပွဲရလဒ်တွေက တစ်မျိုးတစ်ဖုံ ဖြစ်သွားတာပေါ့နော်၊ အဲဒါကို အပြောင်းအလဲ လုပ်ဖို့အတွက်ကို ခုန လေကြောင်းကနေ တိုက်ခိုက်တာတို့ ပြီးတော့မှ ခြေလျင်တပ်နဲ့ ဝင်ပြီးရှင်းတာတို့ ခြေလျင်တပ်ကိုတောင်မှ မြေပြင်ကနေ ချီတက်တာ မဟုတ်ဘဲနဲ့ လေကြောင်းချီပေါ့ဗျာ၊ လေ ကြောင်းကနေ သယ်လာပြီးတော့ လိုအပ်တဲ့နေရာမှာ ချတာတို့ အဲဒီလိုဟာ အဲဒါကို ကျင့်သုံးလာတာ၊ အဓိက အားဖြင့်တော့ ဒါက သတင်းစီးဆင်းမှုကို ကျော်နှင်းတာပါပဲ” ဟု ပြောသည်။

 ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

လက်ရှိ ဖြစ်ပွားနေသည့် စစ်ပွဲများတွင် သတင်းလက်ဦးမှု ရရှိသည့် အဖွဲ့အစည်းက အသာရလေ့ရှိကြောင်း၊ သတင်း စီးဆင်းမှုကို ကျော်နှင်းနိုင်သည့် နည်းဗျူဟာများကို သုံးရမည်ဟု ယူဆကြောင်း ၎င်းက ပြောသည်။

လတ်တလော တပ်မတော်နှင့် ပြည်သူ့ကာကွယ်ရေးတပ်ဖွဲ့(PDF) တို့အကြား ဖြစ်ပွားနေသည့် စစ်ပွဲများတွင် PDF ဖက်မှ ချုံခိုက်တိုက်ခိုက်မှုများ၊ ဒရုန်းအသုံးပြုကာ တိုက်ခိုက်မှုများ ရှိနေသည်။

ရုရှား-ယူကရိန်းတို့ ဖြစ်ပွားနေသည့် စစ်ပွဲပုံစံမျိုးကို အတုယူ၍ တော်လှန်ရေးအင်အားစုများ ဘက်က တိုက်ခိုက် မှုများရှိလာကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

၎င်းက “အခု လောလောဆယ် နောက်ပိုင်း ကျနော်တို့ မြင်လာမိတာကတော့ ရုရှား-ယူကရိန်း စစ်ပွဲက ပုံစံကို လိုက်အတုခိုးတဲ့ ပုံစံပေါ့၊ အဓိကတော့ ဒရုန်း‌တွေ များများသုံး လာတာပေါ့နော်၊ အဓိက‌ ဒရုန်းသုံးပြီးတော့ ဒီဖက်က တချို့ စခန်းငယ်လေးတွေမှာ လိုက်ပြီးတော့ ဗုံးဖြုတ်ချတာတို့ ဘာတို့ ဒီလောက်တော့ နည်းနည်း ထူးခြားတယ် လို့ပဲ ကျနော်တို့ မြင်ရမှာ ဒါပေမဲ့ သိပ်တော့လည်း ဆန်းတာတော့ မဟုတ်ပါဘူး။ ရိုးရိုးအပြင်မှာ အားကစားအနေနဲ့ ကစားတဲ့ ဒရုန်းတွေကအစ စစ်ပွဲမှာ အနည်းဆုံး ကင်းထောက်လောက်အထိ လုပ်လို့ရတဲ့ အပိုင်းဖြစ်တာတော့ ဒါမျိုးကို ထူးထူးခြားခြား သုံးလာတယ်၊ ဒါလည်း သိပ်ပြီး‌တော့ တိုးတက်တယ်လို့ ပြောလို့မရပါဘူး။ ခေတ်က ပြောင်းလာတော့ ပြောင်းလဲတဲ့အလျှောက် သုံးစွဲမှု ပြောင်းလာတဲ့ အပိုင်းပေါ့နော်၊ ဒီလိုပဲ ပြောလို့ရပါတယ်” ဟု ပြောသည်။

 ကော်ဘရာတပ်ဖွဲ့ကို တွေ့ရစဉ် (ကော်ဘရာ)

၂၀၂၁ ခုနှစ် နောက်ပိုင်း ဖြစ်ပွားခဲ့သည့် စစ်ပွဲများအတွင်း တပ်မတော်ဘက်မှ လေယာဉ်ဖြင့် ဗုံးကျဲတိုက်ခိုက်မှု ပိုများပြားလာကြောင်း၊ ၂၀၂၃ ခုနှစ် ပထမလေးလပတ် ကာလအတွင်း မြို့နယ် ၅၆ မြို့ထက်မနည်း လေကြောင်း တိုက်ခိုက်ခံရမှု ၄၄၂ ကြိမ်ထက် မနည်းရှိခဲ့ကြောင်း ISP Myanmar ၏ ထုတ်ပြန်ချက်အရ သိရသည်။

အလားတူ တော်လှန်ရေး အင်အားစုများဘက်က တပ်မတော်၏ လုံခြုံရေးစခန်းများ၊ စစ်ဆေးရေးဂိတ်များ၊ ရဲစခန်း များကို ဒရုန်းအသုံးပြု တိုက်ခိုက်မှုကလည်း ပိုမိုများပြား လာခဲ့ကြောင်း သိရသည်။

CNI News

၂၀၂၃ ခုနှစ်၊ မေလ ၂၉

အစိုးရ ရုံးစိုက်ရာ နေပြည်တော်နှင့် နီးကပ်နေသည့် ရှမ်း-ကယား(ကရင်နီ) နယ်စပ်က မိုးဗြဲ၊ ဖယ်ခုံမြို့နယ်တို့ကို ထိန်းချုပ်နိုင်ရေး မြန်မာ့တပ်မ‌တော်က ကြိုးစားနေကြောင်း မြန်မာ့နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

လက်ရှိ မြန်မာ့တပ်မ‌တော်၏ တိုက်ခိုက်မှုများမှာ မိုးတွင်းကာလတွင် တိုက်ခိုက်မှု လျော့ကျနိုင်ကြောင်း၊ ထို့ကြောင့် လက်ရှိကာလမှာ စစ်ရေးလှုပ်ရှားမှုများ ပိုများပြားလာနိုင်ကြောင်း ၎င်းက ပြောသည်။

ဦးသန်းစိုးနိုင်က “အခု ပွင့်လင်းရာသီ အတွင်းမှာ စစ်ကောင်စီအနေနဲ့ လေကြောင်း အင်အား အသုံးပြုပြီးတော့ တပ်တွေ ‌ရွှေ့ပြောင်းတာ စစ်ဆင်ရေးတွေ လုပ်တာ နောက်ပြီးတော့ ဗုံးကျဲတိုက်ခိုက်တာ စသည်အားဖြင့် ကိစ္စတွေ အတော်များများလုပ်နေ ဒါပေမဲ့ မိုးကျလာပြီဆိုရင်‌တော့ အဲဒီလုပ်ငန်းတွေ သိပ်ပြီးတော့ တွင်တော့မှာ မဟုတ်ပါ ဘူး။ ဒါကြောင့် သူတို့ရဲ့ မဟာဗျူဟာ စစ်ရေးအစီအစဉ်တွေ သူတို့က မိုးဦးကျတဲ့ ကာလမှာ စမယ်လို့ အဆိုရှိပါ တယ်။ အဲဒီအဆိုရှိတာနဲ့ တစ်ပြိုင်နက်ထဲ ကျနော်တို့ စစ်ကောင်စီဖက်ကလည်း သူ့ရဲ့ လုံခြုံရေးအရ ပြင်ဆင်မှုတွေ လှုပ်ရှားမှုတွေ တိုးလုပ်လာစရာရှိပါတယ်။ ရှမ်း-ကယားနယ်စပ် မိုးဗြဲဆိုလို့ရှိရင် အရေးတကြီး ထိန်းချုပ်ရမယ့် အခြေအနေ ဖြစ်ပါတယ်။ ဘာကြောင့်လဲဆိုတော့ ဒီဒေသက ကယန်းတောင်တန်းကို ကျော်လွှားလိုက်လို့ရှိရင် ကျနော်တို့ ပေါင်းလောင်းမြစ်ကို ထိုးဆင်းပြီးတော့ နေပြည်တော်ကို ခြိမ်းခြောက်နိုင်တဲ့ အနေအထားရှိတဲ့အတွက် အဲဒီဒေသတွေဟာ တခြားဒေသတွေထက် ပိုပြီး အရေးတကြီး ကာကွယ်ရမယ့် အနေအထားရှိတယ်လို့ ကျ‌နော် တော့ မြင်ပါတယ်ခင်ဗျ” ဟု ပြောသည်။

ဒေါလျားခူရွာနဲ့ တနီးလာလဲတောင်ပေါ် တိုက်ပွဲကို တွေ့ရစဉ်(KNDF)

လက်ရှိ တိုက်ပွဲများ ဖြစ်ပွားနေသည့် ရှမ်းပြည်နယ်တောင်ပိုင်း၊ ရှမ်း-ကယားနယ်စပ် မိုးဗြဲ၊ ဖယ်ခုံမြို့နယ်နှင့် ပင်လောင်းမြို့နယ်တို့မှာ နေပြည်တော်နှင့် မိုင် ၁၀၀ ကျော် ဝန်းကျင် အကွာအဝေးတွင်သာ ရှိနေသည်။

လတ်တလော တိုက်ပွဲဖြစ်ပွားနေသော မိုးဗြဲ၊ ဖယ်ခုံ၊ ဒီမော့ဆိုမြို့နယ် အခြေအနေများနှင့် ပတ်သက်ပြီး နစကမှ တစ်စုံတစ်ရာ ထုတ်ပြန်ခြင်း မရှိသေးပေ။

လက်ရှိတွင် တပ်မတော်နှင့် ကရင်နီအမျိုးသား ကာကွယ်ရေးတပ်ဖွဲ့ (KNDF)၊ တော်လှန်ရေး တပ်ပေါင်းစုတို့ အကြား ဖယ်ခုံမြို့နယ်တွင် တိုက်ပွဲဖြစ်ပွားနေကြောင်း KNDF မှ ပြန်ကြားရေးတာဝန်ခံတစ်ဦးက CNI သတင်းဌာန သို့ ပြောသည်။

နေပြည်တော်က လွှတ်တော် အဆောက်အဦများကိုတွေ့ရစဉ်

၎င်းက “တိုက်ပွဲ အခြေအနေကတော့ ဒီမော့ဆိုဖက်မှာက ကျနော်တို့ ပြီးခဲ့တဲ့ ရက်ပိုင်းက ထုတ်ပြန်ထားတဲ့ အတိုင်းပဲပေါ့၊ တိုက်ပွဲက မေလ ၁၄ လောက်ကစပြီး ပြင်းထန်တာပေါ့နော်၊ အဓိက တနီးလာလဲ တောင်ကြောပေါ် ကနေပြီးမှ စစ်ကောင်စီက ဒေါလျားခူရွာပေါ့နော် တနီးလာလဲတောင်ကျော်ပြီးတော့ ဒေါလျားခူရွာ အကျော်က တောင်ကြောပေါ် ရောက်လာတယ်၊ အဲဒါကို ကျနော်တို့ တန်ပြန် တိုက်ခိုက်ခဲ့တာပေါ့နော်၊ ၉ ရက်လောက်ကြာ တယ်၊ တိုက်ပွဲက တော်တော်လေး ပြင်းထန်ခဲ့တယ်၊ ဖြစ်ပြီးမှ စစ်ကောင်စီက မူလတပ်စွဲထားတဲ့ တနီးလာလဲ တောင် ကြောပေါ် ပြန်ပြီးတော့ ဆုတ်ခွာသွားတယ်ပေါ့နော်၊ အဲဒါကြောင့်မို့လို့ တိုက်ပွဲပြင်းထန်သွားတယ်၊ ဒီမော့ဆို အရှေ့ ဖက်ခြမ်းမှာပေါ့၊ ဒီမော့ဆိုမြို့နယ်ထဲမှာတော့ အခုကျနော်ပြောတဲ့ နေရာထဲမှာပဲ တိုက်ပွဲပြင်းထန် သွားတယ်ပေါ့ နော်၊ ဒီရက်ပိုင်းကတော့ နည်းနည်းလေး တိုက်ပွဲ ပြန်ငြိမ်တယ်ဗျ၊ ထိတွေ့မှုကတော့ အနည်းငယ်ပဲ ရှိတယ်၊ ပြော မယ်ဆိုရင် ကျိုကြားကျိုကြားပေါ့နော်၊ တိုက်ပွဲက ရှိတယ်ဗျ၊ အဓိက-က တိုက်ပွဲဖြစ်နေတာက ဒီရက် ပိုင်းထဲမှာက ဖယ်ခုံနဲ့ ပင်လောင်း နယ်စပ်မှာဖြစ်တဲ့ ‌တောင်စလုံးတို့ လွယ်လုံတို့ အဲဒီဖက်မှာ တိုက်ပွဲဖြစ်နေတာ ပေါ့နော်” ဟု ပြောသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့ နောက်ပိုင်း ဖြစ်ပေါ်ခဲ့သည့် နိုင်ငံရေး အခင်းအကျင်းအရ ကယား (ကရင်နီ) ပြည်နယ်တွင် လက်နက်ကိုင်ပဋိပက္ခ ကျယ်ကျယ်ပြန့်ပြန် ဖြစ်ပေါ်လာကာ နှစ်ဖက်ထိခိုက်ကျဆုံးမှု၊ အရပ်သားသေဆုံးမှု၊ နေအိမ်မီးလောင်မှု၊ လမ်းပန်းဆက်သွယ်ရေး ဖြတ်တောက်မှုများ ဖြစ်ပွားနေသည်။

လက်ရှိတွင်လည်း ကယား (ကရင်နီ)ပြည်နယ်အတွင်း တိုက်ပွဲရှောင် ၂ သိန်းကျော်ရှိလာကြောင်း သိရသည်။

CNI News
၂၀၂၃ ခုနှစ်၊ မေလ ၂၉

ယနေ့ခေတ်တွင် ခေတ်သစ်စစ်နည်းဗျူဟာများ ပြောင်းလဲလာသည်ကို တွေ့ရသည့်အတွက် ခေတ်သစ် စစ်ပွဲများနှင့် ပတ်သက်၍လည်း မျက်ခြည်မပြတ်လေ့လာနေရန်လိုကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

ယနေ့ (မေလ ၂၉ ရက်)နံနက်ကိုင်းက အရှေ့ပိုင်းတိုင်းစစ်ဌာနချုပ် ဟိုပုံးတပ်နယ်ရှိ တပ်မတော်ကွန်ပျူတာနှင့် နည်းပညာသိပ္ပံမှ နည်းပြအရာရှိများ၊ သင်တန်းသားများကို တွေ့ဆုံစဉ် ၎င်းက အထက်ပါအတိုင်း ပြောကြားခဲ့ ခြင်း ဖြစ်သည်။

ဗိုလ်ချုပ်မှူးကြီး မင်းအောင်လှိုင်က “ မိမိတို့ တက်ကျွမ်းသည့်ပညာရပ်များကို အပြည့်အဝ အသုံးချခြင်းဖြင့် စွမ်းအားရှိသည့် တပ်မတော်ကို တည်ဆောက်နိုင်မည်ဖြစ်ကြောင်း၊ ယနေ့ခေတ်တွင် ခေတ်သစ် စစ်နည်းဗျူဟာ များ ပြောင်းလဲလာသည်ကို တွေ့ရသည့်အတွက် ခေတ်သစ် စစ်ပွဲများနှင့် ပတ်သက်၍လည်း မျက်ခြည်မပြတ် လေ့လာနေရန် လိုသည်”ဟု ပြောသည်။

တပ်မတော်သားအားလုံးသည် မည်သူတစ်ဦးတစ်ယောက်၏ တိုက်တွန်းချက်မျှ မပါရှိဘဲ မိမိတို့တစ်ဦးတစ် ယောက်ချင်း၏ ကိုယ်ပိုင်ဆုံးဖြတ်ချက်များဖြင့် နိုင်ငံတော်ကာကွယ်ရေးတာဝန်များကို ထမ်းဆောင်ရန် တပ်မတော်သို့ ဝင်ရောက်အမှုထမ်းခဲ့ကြသူများဖြစ်ကြောင်း ၎င်းက ပြောသည်။

လက်ရှိ စစ်ပွဲများသည် နည်းပညာကို အသားစီးယူ၍ ခေတ်နှင့်လိုက်လျောညီထွေ ဖြစ်စေမည့် ပစ္စည်းများထုတ် လုပ်ကာ အသုံးပြု တိုက်ခိုက်လျက်ရှိနေသည်။

မြန်မာနိုင်ငံ၏ ပြည်တွင်းစစ်မှာတော့ လတ်တလောတွင် ဒရုန်းများကို ဗုံးသီးများ ချိတ်ကာ ဝေဟင်မှ ကြဲချခြင်း ဖြင့် ခေတ်သစ် စစ်ပွဲများကို ဆင်နွှဲနေကြသည်ကိုတွေ့ရသည်။

CNI News

၂၀၂၃ ခုနှစ်၊ မေလ ၂၇

နစကသည် အထွေထွေရွေးကောက်ပွဲ ပြန်လည် ကျင်းပပေးသွားမည်ဟု ကြေညာထားခြင်းကြောင့် မျှော်မှန်းထား သည့် ရွေးကောက်ပွဲ ရလဒ်မရပါက မည်ကဲ့သို့သော အခင်းအကျင်းများ ဖြစ်သွားနိုင်သလဲဟုဆိုကာ နိုင်ငံရေး အသိုင်းအဝိုင်းကြား သုံးသပ်မှုများ ရှိနေသည်။

ပြည်သူလူထု အများစုက လိုလားသည့် နိုင်ငံရေးပါတီများ မပါသည့် ရွေးကောက်ပွဲမှာ ပြည်သူလူထုနှင့် နိုင်ငံ တကာမှ အသိအမှတ်ပြုမှု အားနည်းလိမ့်မည်ဖြစ်ကြောင်း မြန်မာ့နိုင်ငံရေးလေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။

၎င်းက “ပြဿနာက ငါတို့နိုင်အောင် ဘယ်လို လုပ်ရမလဲဆိုတာကနေ စစဉ်းစားနေလို့ ရှိရင်တော့ မပြေလည်နိုင် ဘူးဗျ၊ ဆိုကြပါစို့ NLD က ၂၀၁၅ တုန်းကလို ပြန်ပါမယ်၊ တစ်နိုင်ငံလုံးပေါ့နော်၊ ၂၀၁၂ က စတာပေါ့လေ၊ ကြားဖြတ် ရွေးကောက်ပွဲက စတာပေါ့၊ ၂၀၁၅ မှာကြတော့ အထွေထွေရွေးကောက်ပွဲကြီးမှာ ပါလာတဲ့အခါကြတော့ မနိုင်ဘူး ပေါ့နော်။ ပြည်ခိုင်ဖြိုးက အဲဒီလိုမျိုး အခင်းအကျင်း ပြန်ပေါ်လာမှာစိုးလို့ ဆိုတဲ့ဘက်က စဉ်းစားရင်တော့ ကျနော် တို့ နိုင်ငံက မလွယ်ဘူး။ ဖြေရှင်းဖို့ နည်းလမ်းမရှိဘူးဗျ၊ အဲဒါက ဘာကြောင့်တုန်းဆိုတော့ ပြည်သူလူထု အများစု က လိုလားနေတဲ့ နိုင်ငံရေးအင်အားစုကို ပထားသလို ဖြစ်တာပေါ့နော်၊ ပထားသလို ဖြစ်နေတဲ့ အခါကြတော့ ဒါက ပြည်သူလူထု အများစုကလည်း ရွေးကောက်ပွဲနဲ့ တက်လာတဲ့ အစိုးရကို အသိအမှတ် ပြုမှုကလည်း အားနည်းလိမ့် မယ်၊ နိုင်ငံတကာ အသိအမှတ်ပြုမှုကလည်း အားနည်းမှာပေါ့နော်၊ ဆိုတော့ အခြေအနေတွေက ငြိမ်ငြိမ်သက် သက် အေးအေးချမ်းချမ်း ပြန်ဖြစ်သွားဖို့က အဲဒီလို စဉ်းစားနည်းနဲ့ လုပ်တယ်ဆိုရင်တော့ မဖြစ်နိုင်ဘူး၊ မအောင်မြင် နိုင်ဘူးပေါ့” ဟု ပြောသည်။

ဒေါ်အောင်ဆန်းစုကြည်ကို တွေ့ရစဉ်

‌ရွေးကောက်ပွဲ မျှော်မှန်းရလဒ် မရပါက အာဏာပြန်ယူနိုင်သည်ဟု သုံးသပ်မှုများရှိသလို ၂၀၀၈ ဖွဲ့စည်းပုံအခြေခံ ဥပဒေအတိုင်း ဆက်သွားနိုင်သည်ဟုလည်း ပြောဆိုမှုများ ရှိနေသည်။

ပြီးခဲ့သည့် ၂၀၂၀ အထွေထွေရွေးကောက်ပွဲတွင် မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်း‌ရေး ကြိုးပမ်းသည်ဟုဆိုကာ အမျိုးသားဒီမိုကရေစီအဖွဲ့ချုပ် (NLD) အစိုးရကို ဖြုတ်ချ၍ မြန်မာ့တပ်မ‌တော်က နိုင်ငံတော်ကို အရေးပေါ် အခြေအနေ ကြေညာထားသည်။

ထို့နောက် ရွေးကောက်ပွဲ ပြန်လည် ကျင်းပပေးမည်ဖြစ်ကြောင်း၊ ရွေးကောက်ပွဲ အနိုင်ရရှိသည့် ပါတီကို နိုင်ငံတော် အာဏာ ပြန်လည် လွှဲပြောင်းပေးမည်ဟု အာမခံကြောင်း နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြော သည်။

ရွေးကောက်ပွဲဆိုသည်မှာ ပြည်သူလူထုက ဆုံးဖြတ်သည့်အတွက် ၎င်းတို့ မျှော်မှန်းသည့် ရလဒ်မရပါက ၂၀၂၀ အထွေထွေရွေးကောက်ပွဲကဲ့သို့ လုပ်၍ မရတော့ကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေး ပါတီ (TNDP) မှ ဥက္ကဋ္ဌ စိုင်းဌေးအောင်က CNI သတင်းဌာနသို့ ပြောသည်။

ဗိုလ်ချုပ်မှူးကြီး မင်းအောင်လှိုင် မဲထည့်နေစဉ် 

၎င်းက “သူတို့လိုချင်တဲ့ ရလဒ် မရဘူးဆိုရင် ဒီတစ်ခါတော့ အာဏာအပ်ရမှာ ၉၀ တုန်းကလို ထိန်းထားလို့လည်း သူတို့ရမှာ မဟုတ်ဘူးလေ၊ သူတို့လိုချင်တဲ့ အခင်းအကျင်း ဖြစ်အောင်တော့ သူတို့ အသည်းအသန် လုပ်နေကြ တာပဲ၊ လုပ်နေတယ် ဆိုပေမယ့်လည်း ဒါပေမဲ့လည်း နိုင်ငံရေးဆိုတာ ပြည်သူက ဆုံးဖြတ်တာကိုး ဒီရွေးကောက်ပွဲ ဆိုတာမျိုးက ပြည်သူဆုံးဖြတ်လို့ သူတို့ အခင်းအကျင်း မဖြစ်ဘူးဆိုရင်လည်း သူတို့က ၉၀ ခုနှစ်တုန်းကလိုတော့ သူတို့ လုပ်လို့ မရဘူး။ အခုလို ၂၀၂၀ ပုံစံလည်း သူတို့ လုပ်လို့မရဘူး။ သူတို့ လွှဲပေးရမှာပဲ” ဟု ပြောသည်။

နိုင်ငံရေးပါတီများ မှတ်ပုံတင်ခြင်းဥပဒေ အသစ်ကို နစက-က ၂၀၂၃ ခုနှစ်၊ ဇန်နဝါရီ ၃၁ ရက်နေ့က ထုတ်ပြန် ခဲ့ပြီးနောက် ရက်ပေါင်း ၆၀ အတွင်း နိုင်ငံရေးပါတီအဖြစ် ဆက်လက် တည်ထောင်ခွင့်နှင့် မှတ်ပုံတင်ခွင့် လျှောက်ထားရမည်ဟု ပြဋ္ဌာန်းခဲ့သည်။

ထို့နောက် သတ်မှတ် ကာလအတွင်း မှတ်ပုံ ပြန်မတင်သည့် NLD နှင့် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) အပါအဝင် နိုင်ငံရေးပါတီ ၄၀ ကို ဖျက်သိမ်းကြောင်း ပြည်ထောင်စုရွေးကောက်ပွဲကော်မရှင်(UEC)က မတ်လ ၂၈ ရက်တွင် ထုတ်ပြန်ခဲ့သည်။

CNI News

၂၀၂၃ ခုနှစ်၊ မေလ ၂၅

ပြည်တွင်းမှာ ဖြစ်ပွားနေသည့် လက်နက်ကိုင်ပဋိပက္ခများ ချုပ်ငြိမ်းရေးအတွက် ငြိမ်းချမ်းရေး စကားဝိုင်းမှ ချုပ်ငြိမ်းနိုင်လိမ့်မည်ဟု မထင်ကြောင်း ကရင်နီပြည်နယ် လူ့အခွင့်အရေးအဖွဲ့မှ ကိုဗညားက CNI သတင်းဌာနသို့ ပြောသည်။

လက်ရှိ လက်နက်ကိုင်ပဋိပက္ခမှာ အစုအဖွဲ့တစ်ခုမှ တိုက်ခိုက်သည့် ပုံစံမျိုး မဟုတ်တော့ကြောင်း၊ လူထု တော်လှန်ရေး ဖြစ်သွားသည့်အတွက် ညှိနှိုင်းရန် ခဲယဉ်းသွားကြောင်း ၎င်းက ပြောသည်။

ကိုဗညားက “ညှိနှိုင်းဆွေး‌နွေးမှုကနေတော့ အဖြေရဖို့ကတော့ မလွယ်ဘူးပေါ့နော်၊ ပြန်ပြီးမှ ထပ်ခါတစ်လဲလဲ ပြန်ဖြစ်မှာဆိုတဲ့ စိုးရိမ်ချက်ကတော့ အများကြီး ရှိပါတယ်၊ သို့ပေမဲ့လည်း အခြားတစ်ဖက်မှာကလည်း ကျနော်တို့ ဒီလူထုရဲ့ နစ်နာထိခိုက်မှု အနည်းဆုံး ဖြစ်အောင်ကတော့ ဒီကြားကာလပုံစံမျိုး ငြိမ်းချမ်းရေး စကားဝိုင်းကနေ တစ်ဆင့် ကျနော်တို့ ဖြေရှင်းနိုင်မလားပေါ့နော်၊ ဒါပေမဲ့ ဒီဟာကလည်း ပွင့်ပွင့်လင်းလင်းပြောရရင် လူထုတွေရဲ့ လက်ခံနိုင်မှု မရှိရင်လည်း အစုအဖွဲ့တစ်ဖွဲ့နဲ့ လုပ်လို့ပြီးတဲ့ ပုံစံမဟုတ်တဲ့ အတွက်ကြောင့်မို့လို့ ဒီငြိမ်းချမ်းရေး စကားဝိုင်းကနေတော့ အလွယ်တကူ ဒီစစ်ပွဲတွေ ပြီးဖို့ ချုပ်ငြိမ်းနိုင်လိမ့်မယ်လို့ ကျနော် မထင်ဘူးခင်ဗျ” ဟု ပြော သည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီလအတွင်းက ဖြစ်ပေါ်ခဲ့သည့် နိုင်ငံရေး အခင်းအကျင်းအရ လက်နက်ကိုင် ပဋိပက္ခမှာ နိုင်ငံတစ်ဝှမ်း ကျယ်ကျယ်ပြန့်ပြန့် ဖြစ်ပေါ်ခဲ့သည်။

မြန်မာ့တပ်မတော် စစ်သမီးများကို တွေ့ရစဉ်

အဆိုပါ ပဋိပက္ခများကြောင့် လူသေဆုံးမှုများ၊ နေအိမ် မီးလောင်ပျက်စီးမှုများ၊ နေရပ်စွန့်ခွာ ထွက်ပြေး တိမ်းရှောင် မှုများ ဖြစ်ပွားလျှက်ရှိနေသည်။

ထိုပြဿနာများကို ဖြေရှင်းနိုင်ရေး နိုင်ငံတကာ အဖွဲ့အစည်းများ၊ ပြည်တွင်းရှိ အဖွဲ့အစည်းအချို့က ကြိုးစားနေ သည့်တိုင် ဖြေရှင်းနိုင်ခြင်း မရှိသေးဘဲ စစ်ပွဲများ ဆက်လက် ဖြစ်ပွားလျက် ရှိနေသည်။

လက်နက်ကိုင် ပဋိပက္ခများ ဖြေရှင်းနိုင်ရေး တွေ့ဆုံဆွေး‌နွေးပွဲများ လုပ်ရမည်ဖြစ်ကြောင်း၊ တစ်ဖွဲ့နှင့် တစ်ဖွဲ့ အပြုတ်တိုက်ရေးမှာ မဖြစ်နိုင်ကြောင်း ပြည်သူ့လွှတ်တော် ကိုယ်စားလှယ်ဟောင်း ဦးစိန်ဝင်းက CNI သတင်းဌာန သို့ ပြောသည်။

လုံခြုံရေးတပ်ဖွဲ့နဲ့ ဒီမိုကရေစီ တောင်းဆိုသူကိုတွေ့ရစဉ်

၎င်းက “ဒါကတော့ ကျနော်ပြောချင်တာက‌တော့ တွေ့ဆုံဆွေးနွေးပွဲလည်း လုပ်ရမယ်၊ ဒါပေမဲ့ တွေ့ဆုံဆွေး‌နွေး ပွဲကြီးလည်း မရဘူးဗျ၊ စာတွေ့ရော လက်တွေ့ရော လုပ်ရမယ်၊ တစ်ဖက်ကလည်း တွေ့ဆုံဆွေးနွေးပွဲ လုပ်ရမယ်၊ အဲဒီတွေ့ဆုံ ဆွေး‌နွေးပွဲအလိုက် ဆုံးဖြတ်တဲ့ဟာတွေကိုလည်း တစ်ခါထဲ ချက်ချင်း အကောင်အထည်ဖော်ရမယ်၊ ကျနော်သဘောကတော့ တွေ့ဆုံဆွေး‌နွေးမယ်၊ ပူးပေါင်းဆောင်ရွက်မယ်၊ ပူးပေါင်းဆောင်ရွက် အကောင်အထည် ဖော်ရမယ်၊ အဲဒါကို ပူးတွဲပြီး လုပ်ရမယ်၊ တစ်ဖက်နဲ့ တစ်ဖက် ကျနော် ဒီလိုမြင်တယ်၊ ဒုတိယအချက်ကတော့ ခင်ဗျား ခုနက မေးတဲ့ အကြမ်းဖက်လမ်းစဉ်ကို သူပြုတ်တိုက် ကိုယ်ပြုတ်တိုက် အဲဒါတော့ မဖြစ်နိုင်ဘူးဗျ၊ မဖြစ် နိုင်ဘူးဆိုတာက အပြုတ်တိုက် လမ်းစဉ်ဆိုတာ ဘယ်တော့မှ မပြီးဘူးဗျ၊ တစ်ယောက်နဲ့ တစ်ယောက် သူအား သာတဲ့အချိန်မှာ သူနိုင်မှာပဲ၊ သူအားနည်းတဲ့အချိန် ရှုံးသွားမှာပဲ အားသာမှု အားနည်းမှုဆိုတာလည်း ကျနော်တို့က ပြည်သူပါမှ ဖြစ်တာ ပြည်သူကလည်း ကနေ့ချိန်ခါမှာ အမှန်ပြောရရင် ဟိုဟာတွေ ဖြစ်ကုန်ပြီဗျ၊ ပြည်သူက နိုင်ငံရေးကို စိတ်ကုန်သွားပြီ” ဟု ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၃ ခုနှစ်၊ ဧပြီ ၃၀ ရက်အထိ နှစ်နှစ်ကျော်ကာလအတွင်း နိုင်ငံတစ်ဝှမ်း လက်နက်ကိုင် တိုက်ပွဲပေါင်း ၉၀၀၀ ကျော် ဖြစ်ပွားခဲ့ကြောင်း၊ ထို့နောက် ထိုပဋိပက္ခများကြောင့် တိုက်ပွဲရှောင် ၃ သန်းနီးပါး တိုးလာကြောင်း ISP Myanmar ၏ ထုတ်ပြန်ချက်အရ သိရသည်။

CNI News

၂၀၂၃ ခုနှစ်၊ မေလ ၂၄

ခေတ်နှင့်အညီ တိုးတက်ပြောင်းလဲလာသည့် နည်းပညာများကို အသုံးချနိုင်မှ တော်လှန်ရေး အောင်နိုင်မှာဖြစ် ကြောင်း ကရင်အမျိုးသားအစည်းအရုံး(KNU)ဥက္ကဋ္ဌ ပဒိုစောကွယ်ထူးဝင်းက ပြောသည်။

မေလ ၂၃ ရက်က ပြုလုပ်သော “စနစ်ဆိုးမှ လွှတ်မြောက်ရန်အတွက် သမိုင်းပေး တာဝန်ထမ်းဆောင်ကြ” ဆိုသည့် စကားဝိုင်း ဆွေးနွေးပွဲ အစီအစဉ်တွင် ၎င်းက ပြောကြားခဲ့ခြင်း ဖြစ်သည်။

KNU ဥက္ကဋ္ဌ ပဒိုစောကွယ်ထူးဝင်းက “ဒီကနေ့ တော်လှန်ရေးဟာ ၁၉၄၉ က စခဲ့တဲ့ တော်လှန်ရေး မဟုတ်တော့ ဘူး၊ ဆိုတဲ့သဘောက တိုးတက်ပြောင်းလဲလာတဲ့ အနေအထားပေါ်မှာ ခေတ်အ‌ပေါ်မှာ ကျနော်တို့ တော်လှန်‌ရေးက လည်း ခေတ်နဲ့အညီ ပြုပြင်ပြောင်းလဲမှုတွေ တိုးတက်ပြောင်းလဲမှုတွေနဲ့ လုပ်ဆောင်ရမှာ ဖြစ်ပါတယ်။ ဆိုလိုတဲ့ သဘောက အခု ၂၁ ရာစုမှာ တော်လှန်‌ရေးဟာ ၂၁ ရာစု အခြေအနေနဲ့ ကိုက်ညီတဲ့ တော်လှန်ရေးနဲ့ ရင်ဆိုင်ရမယ်၊ လုပ်ဆောင်ရမှာ ဖြစ်ပါတယ်၊ အထူးသဖြင့် စစ်ရေးအရမှာရော၊ နိုင်ငံရေးအရမှာရော ပြောင်းလဲလာတဲ့ အနေ အထားအ‌ပေါ်မှာ နည်းနာအပေါ်မှာ အဲဒါကို ကျနော်တို့ အမှီလိုက်နိုင်ဖို့ တစ်ဖက် ကျနော်တို့ ရင်ဆိုင်ရတဲ့ အဖွဲ့ အစည်းနဲ့ စစ်ရေးအရရော၊ နိုင်ငံရေးအရရော၊ အုပ်ချုပ်ရေးအရရော ကျနော်တို့ ယှဉ်ပြိုင်ရမှာ ဖြစ်တဲ့အတွက် တိုးတက်ပြောင်းလဲလာတဲ့ နည်းပညာတွေကို အသုံးချနိုင်မှသာ ကျနော်တို့ အောင်နိုင်မှုရမှာ ဖြစ်ပါတယ်” ဟု ပြောသည်။

မြန်မာ့တပ်မတော် လေကြောင်းတိုက်ခိုက်မှုတစ်ခုကို တွေ့ရစဉ်

လက်ရှိ စစ်ရေး အခြေအနေကို ပြန်ကြည့်ပါက တစ်ဖက်ရန်သူမှာ မိမိတို့ထက် စစ်ရေးအရ အားသာချက်များ ရှိနေ ကြောင်း၊ လေယာဉ်၊ လက်နက်ကြီး စသည်များကို အသုံးပြုလာကြောင်း၊ သို့သော် မိမိတို့ဖက်က တန်ပြန်ဆောင် ရွက်မှု၊ ဟန့်တားမှု မရှိသည့်အတွက် ပြည်သူလူထုကို အကာအကွယ် မပေးနိုင်ခဲ့ကြောင်း ၎င်းက ပြောသည်။

ယခု ၂၀၂၃ ခုနှစ် ပထမ လေးလပတ် ကာလအတွင်း မြို့နယ် ၅၆ မြို့ထက်မနည်း လေကြောင်း တိုက်ခိုက်ခံရမှု အနည်းဆုံး ၄၄၂ ကြိမ်ရှိခဲ့ကြောင်း ISP Myanmar ၏ ထုတ်ပြန်ချက်အရ သိရသည်။

နည်းပညာများ တိုးတက်လာသည့်နှင့်အမျှ စစ်လက်နက်အသုံးပြုကာ တိုက်ခိုက်ပုံ၊ တိုက်ခိုက်နည်းများမှ အမြဲတမ်း ကွဲပြားမှု ရှိနေမှာဖြစ်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

 ဒီမိုကရေစီ တောင်းဆိုနေသူများနဲ့ လုံခြုံရေးတပ်ဖွဲ့ ထိပ်တိုက်တွေ့ကြစဉ်

၎င်းက “စစ်ပွဲတစ်ပွဲကတော့ စစ်ပွဲရဲ့ သ‌ဘောတရားကတော့ နည်းပညာတွေ ဆန်းသစ်ပြီး တိုးတက်လာတာနဲ့အမျှ စစ်ပွဲနဲ့ ပတ်သက်တဲ့ ချည်းကပ်ပုံ၊ ချည်းကပ်နည်းတွေ တိုက်ခိုက်တဲ့ တိုက်ခိုက်ပုံ၊ တိုက်ခိုက်နည်းတွေ အသုံးပြုတဲ့ နည်းဗျူဟာတွေ၊ မဟာဗျူဟာတွေ ဒါတွေကတော့ ကွဲပြားမှု အမြဲတမ်းရှိပါတယ်။ ဒါကတော့ ဒီတစ်နိုင်ငံတည်း တင် မဟုတ်ဘူးလေ၊ ကမ္ဘာပေါ်မှာလည်း ဒီအတိုင်း စစ်ဆင်ရေးနဲ့ ပတ်သက်တဲ့ ဗျူဟာတွေက ခေတ်အလိုက် တိုးတက်ပြောင်းလဲ နေကြတာ‌တွေ အများကြီးပေါ့၊ အဲဒီတော့ သုတေသန အဖွဲ့အစည်း တစ်ရပ်အနေနဲ့ ကျနော်တို့ စောင့်ကြည့်ပြီး‌တော့ သုတေသန ပြုရမယ့် အပိုင်းတွေတော့ အများကြီးရှိတယ်၊ ဒါနဲ့ ပတ်သက်ပြီးတော့ ပြောင်းလဲ လာတဲ့ ခေတ်အလိုက် သုံးစွဲသူတွေအတွက် ခုနပြောသလို စစ်ပွဲကို စစ်ပွဲရဲ့ ဘောင်ထဲမှာ ဝင်နေကြတဲ့ သူတွေက လည်း ပြောင်းလဲတာမျိုး ရှိတယ်၊ ဒါကတော့ လေ့လာသုံးသပ်စရာ ကိစ္စတစ်ခု အနေနဲ့လွဲလို့ ကျန်တဲ့ ထွေထူး မှတ်ချက်ကတော့ မရှိပါဘူး” ဟု ပြောသည်။

၂၀၂၁ ခုနှစ်၊ ဖေဖော်ဝါရီလ အတွင်းက ဖြစ်ပေါ်ခဲ့သည့် လက်နက်ကိုင် ပဋိပက္ခအတွင်း မြန်မာ့တပ်မတော်ဘက်က လေကြောင်းတိုက်ခိုက်မှု၊ လက်နက်ကြီး ပစ်ခတ်မှုများ ပိုမိုလုပ်ဆောင်လာသည်ဟု သုံးသပ်မှုများ ရှိနေသည်။

CNI News

၂၀၂၃ ခုနှစ်၊ မေလ ၂၃

စစ်ကိုင်းတိုင်းဒေသကြီး၊ ဗန်းမောက်မြို့နယ်၊ ကြောင်လည်ဒေသတစ်ဝိုက်တွင် မြန်မာ့တပ်မတော်နှင့် ကချင် လွတ်လပ်ရေး တပ်မတော် (KIA)၊ ဒေသကာကွယ်ရေးတပ် (PDF) ပူးပေါင်းတပ်တို့အကြား တိုက်ပွဲ ပြင်းထန်နေပြီး နှစ်ဖက်ထိခိုက်ကျဆုံးမှုရှိကြောင်း ဗန်းမောက်ဒေသခံ တစ်ဦးက CNI သတင်းဌာနသို့ ပြောသည်။

ပြီးခဲ့သည့် မေလ ၂၀ ရက်မှ မေလ ၂၂ ရက်အထိ ဖြစ်ပွားခဲ့ကြောင်း၊ လေကြောင်းတိုက်ခိုက်မှုကို ၃ ရက်ဆက်တိုက် ပြုလုပ်ခဲ့ကြောင်း ၎င်းက ပြောသည်။

ဗန်းမောက်ဒေသခံ တစ်ဦးက “တိုက်ပွဲ အခြေအနေက မနေ့ကအထိတော့ ပြင်းထန်နေတုန်းပဲ၊ မနေ့ကအထိ ပြင်း ထန် နေတုန်းဆိုတာ အဲဒီ ကြောင်လည်ဒေသ တစ်ဝိုက်ပေါ့လေ၊ မံလူဒေသဂိတ်မှာပေါ့၊ ကျနော်တို့ သိသလောက် ဆိုရင် လေယာဉ်က ၃ ရက်ရှိပြီ၊ ၃ ရက်ဆက်တိုက် ၂၀ ရယ်၊ ၂၁ ရယ် မနေ့က တစ်ရက်ရယ် ၃ ရက် ဆက်တိုက် ပစ် နေတာ၊ ၃ ရက်စလုံးမှာ လေကြောင်းသုံး တိုက်ခိုက်တယ်၊ ပါတယ်။ တော်တော်လေးကို ပြင်းထန်တဲ့ပုံပဲ၊ ထိခိုက်မှု အခြေအနေကတော့ ၂၁ ရက်နေ့က အခြေအနေ သူတို့ ပြောပြချက်အရပေါ့လေ၊ စစ်မြေပြင်နဲ့ အနီးဆုံး ရွာသား တွေရဲ့ ပြောပြချက်အရ ဆိုလိုရှိရင် နှစ်ဖက်ထိခိုက်မှုတော့ ရှိတယ်တဲ့၊ တော်တော်လေး ထိတယ်လို့ ပြောတယ်။ မ‌နေ့ကနဲ့ ၂၀ ရက်နေ့ အခြေအနေက မသိရဘူး။ ၂၁ ရက်နေ့ အခြေအနေက တော်တော်လေးများတယ်လို့ ပြော တယ် နှစ်ဖက်စလုံးပါ့” ဟု CNI သတင်းဌာနသို့ ပြောသည်။

ကြောင်လည်ဒေသကို ယခင်က PDF၊ KIA တို့ ထိန်းချုပ်ထားပြီး လက်ရှိတွင် တပ်မတော်ဘက်က စစ်ကြောင်းထိုးကာ ပြန်သိမ်းယူခဲ့ကြောင်း၊ ထို့နောက် ကြောင်လည်ကျေးရွာမှ PDF၊ KIA တို့ ဆုပ်ခွာချိန် ဒေသခံအချို့ လိုက်ပါ သွားကြောင်း သိရသည်။

ဗန်းမောက် PDF ကို တွေ့ရစဉ်

ကျေးရွာတွင် ကျန်ရှိနေသည့် ‌ဒေသခံများကိုလည်း တပ်မတော်ဘက်က ဆက်သွယ်ရေးဖုန်းတွေကို လွတ်လွတ် လပ်လပ် ဆက်သွယ်ခွင့်မပြုပဲ ကန့်သတ်ထားကြောင်း၊ ထို့အတူ PDF၊ KIA နှင့်အတူ ပါသွားသည့် ဒေသခံများ အနေဖြင့်လည်း အခက်အခဲဖြင့် ကြုံတွေ့ရကြောင်း ဗန်းမောက်ဒေသခံတစ်ဦးက ပြောသည်။

၎င်းက “တော်လှန်ရေး အင်အားစုမှာ ပါသွားတဲ့ ပြည်သူလူထုတွေကတော့ ကျနော်တို့ ပြန်ကြားရတာ ဘယ်လိုလဲ ဆိုတဲ့အခါကြတော့ အခုလောလောဆယ်သူတို့ စစ်ထိုင်ထားတာတော့ မံလူဒေသစိတ်ပေါ့နော်၊ မံလူ‌ဒေသစိတ်ဆို တာ ကြောင်လည်နဲ့ ကြောင်လည်ပေါ့၊ ကြောင်လည်လို့ ပြောလို့ရတာပေါ့၊ သိသာမြင်သာအောင်ဆိုရင် ကြောင်လည်ရဲ့ ဟိုဖက်က မံပင်တို့၊ နားပင်တို့၊ ပါထွန်တို့ အဲဒီဖက်ခြမ်းဆိုလို့ရှိရင် တော်လှန်ရေးအင်အားစုတွေ နေ ထားတာ၊ တော်လှန်‌ရေး အင်အားစုဖက် ပါသွားတဲ့ ပြည်သူလူထုတွေကြတော့ အဲဒီမှာ လူတွေ အများကြီး သူတို့က စစ်တိုက်ရင်းနဲ့ ခေါ်သွားတာလေ လူတွေကို တော်လှန်ရေးအင်အားစုတွေက ခေါ်ဝင်သွားတဲ့ အခါကြတော့ အဲဒီ စီကတောင်ထဲမှာ ကြောင်လည်ရဲ့ အနောက်ခြမ်း ယာကြီး၊ စာခမ်း အဲဒီဖက်ကတွေ စီကတောင်ထဲမှာက ပြည်သူ လူထုတွေက ထောင်ချီသောင်းချီရှိနေတာ အဲဒီဖက်မှာ ရက်ကြာလာတဲ့ အခါကြတော့ အစားအသောက် ပြဿနာ တွေ တက်တယ်လို့ ပြောတယ်၊ ကြားရသလောက်ပေါ့လေ၊ ဘယ်လို တက်သလဲဆိုတော့ ကိုယ့်အိမ်ကိုယ့်ယာလို မဟုတ်တဲ့ အခါကြတော့ ထမင်းကို ဝဝလင်လင် မစားရဘူးပေါ့ရယ်၊ ကန့်သတ်ချက်တွေနဲ့ ဖြစ်သွားတာပေါ့၊ ထမင်း စားတာတော့ နပ်မှန်တယ်၊ ၃ နပ်မှန်တယ်၊ ဒါပေမဲ့ ဝဝလင်လင် မစားရတော့ဘူးလို့ ပြောတယ်” ဟု CNI သတင်း ဌာနသို့ ပြောသည်။

ထို့ကြောင့် ‌တောလမ်းမှ နေရပ်ပြန်သူများ ရှိသလို တချို့ကတော့ နေရပ်မပြန်ဘဲ ဝန်းသို၊ ကောလင်းမှ တဆင့် မန္တလေးသို့ စုန်ဆင်းသူ အများအပြားလည်း ရှိလာကြောင်း ၎င်းက ပြောသည်။

ထို့အတူ ပြီးခဲ့သည့် ရက်ပိုင်းက ဗန်းမောက်မြို့ပေါ်မှ ပြည်သူများ မြို့မှ ထွက်ခွာရန် PDF က စာပို့ပြီးနောက် မြို့ခံ လူထုအနေဖြင့် နှစ်ဖက်အဖွဲ့အစည်းကြား အခက်တွေ့နေကြောင်း မြို့ခံတစ်ဦးက CNI သတင်းဌာနသို့ ပြောသည်။

PDF ဘတ်တံဆိပ်ကိုတွေ့ရစဉ်

၎င်းက “နိုင်ငံရေး အခြေအနေကတော့ ဗန်းမောက်မြို့က စာရောက်တာကတော့ ဘယ်လို ရောက်တာလဲဆိုတော့ PDF က ထုတ်ပြန်တာ အိမ်တွေ ဗန်းမောက်မြို့က ရွှေ့ထားဖို့ပေါ့၊ သူတို့လာတိုက်တော့မှာပေါ့၊ ရွှေ့ဖို့ စာပို့တာ ဒါပေမဲ့ စစ်တပ်ကတော့ မရွှေ့နဲ့ ကိုယ့်ဟာကိုယ်ပဲ အေးဆေးနေကြ၊ ရွှေ့လို့ရှိရင် အဲဒီအိမ်က ၃ ရက် ပိတ်ထားတယ် ပေါ့‌၊ ၃ ရက်စလုံး ပိတ်ထားရင် အဲဒီအိမ်ကို သူတို့ မီးလာရှို့မှာ၊ ဘယ်သူမှ မရှိရင် ပိတ်ထားရင်ပေါ့၊ ကိုယ့်ဟာနဲ့ကိုယ် အေးဆေးနေနေကြရင် ပြောစရာမလိုဘူးပေါ့လေ၊ အခုက PDF တွေက တပ်ပေါင်းစု တိုက်မယ်ဆိုတော့ တောင်ပိုင်းတွေရော၊ အနောက်ပိုင်းတွေရော၊ အင်းတော်ဖက်ကတွေရော ဆင်းလာမှာပေါ့လေ၊ KIA နဲ့ ပူးပေါင်းပြီး တော့မှ လာသိမ်းတော့မှာပေါ့လေ၊ အဲလို ပြန့်နေတာ အခုကတော့ မြို့ကတော့ ခြောက်ကပ်နေတာ ဘယ်သူမှ မရှိ ဘူး။ ပထမတော့ ထွက်ကြသေးတယ်၊ တချို့အိမ်တွေ ထွက်ကြတာလေ၊ နောက်ပိုင်းကြတော့ လမ်းပါ ပိတ်သွား တော့တာ၊ လမ်းတွေလည်း အထွက်မခံတော့ဘူး ပိတ်လိုက်ပြီ။ ဆိုင်ကယ်လည်း သွားမရတော့ဘူး။ အင်းတော်ဖက် ကို ထွက်လို့ မရတော့ဘူး။ ဘယ်သူပိတ်တာလဲဆို PDF တွေက ပိတ်တာပေါ့” ဟု ပြောသည်။

လက်ရှိ ဗန်းမောက်မြို့နယ်တွင် နှစ်ဖက်တိုက်ပွဲ ဖြစ်ပွားမှု၊ အများသွားလာသည့် လမ်းများ ပိတ်ဆို့မှုကြောင့် ကုန်စည်စီးဆင်းမှုများ ရပ်တန့်နေပြီး စားသောက်ကုန် ရှားပါးမှုများ ကြုံတွေ့နေရကြောင်း သိရသည်။

ထို့အတူ နိုင်ငံ‌ရေး အပြောင်းအလဲကြောင့် ဖြစ်ပေါ်ခဲ့သည့် တိုက်ပွဲများကြောင့် ဒေသခံ သောင်းချီ ဘေးလွတ်ရာ ထွက်ပြေး တိမ်းရှောင်နေရကြောင်း သိရသည်။

CNI News
၂၀၂၃ ခုနှစ်၊ မေလ ၂၂

မိမိတို့အနေဖြင့် ရွေးကောက်ပွဲ ပြန်လည်ကျင်းပ၍ ရွေးကောက်ခံအစိုးရထံသို့ နိုင်ငံ့တာဝန်များ ပြန်လည်လွှဲ ပြောင်းပေးအပ်နိုင်ရေးအတွက် မဖြစ်ဖြစ်အောင် ဆောင်ရွက်သွားမည်ဟု အာမခံကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

ပဲခူးတိုင်းဒေသကြီးအတွင်းရှိ အသေးစား၊ အငယ်စားနှင့် အလတ်စား စီးပွားရေး(MSME) လုပ်ငန်းရှင်းများနှင့် ပဲခူးမြို့မှာ ၂၀၂၃ ခုနှစ်၊ မေလ ၂၂ ရက်က တွေ့ဆုံစဉ် ၎င်းက အထက်ပါအတိုင်း ပြောခဲ့သည်။

ဗိုလ်ချုပ်မှူးကြီးမင်းအောင်လှိုင်က “တိုင်းပြည်၏အားသည် ပြည်တွင်းမှာသာ ရှိကြောင်း၊ ထို့ကြောင့် မိမိတို့ နိုင်ငံ အခက်အခဲဖြစ်ပေါ်ချိန်တွင် မိမိတို့နိုင်ငံ၏အားဖြင့်သာ ဆောင်ရွက်ရမည်ဖြစ်ကြောင်း၊ မိမိတို့အနေဖြင့် ရွေးကောက်ပွဲ ပြန်လည်ကျင်းပ၍ ရွေးကောက်ခံ အစိုးရထံသို့ နိုင်ငံ့တာဝန်များ ပြန်လည်လွှဲပြောင်းပေးအပ် နိုင်ရေးအတွက် မဖြစ်ဖြစ်အောင် ဆောင်ရွက်သွားမည်ဟု အာမခံကြောင်း၊ ထို့ကြောင့် တိုင်းပြည်တည်ငြိမ် အေးချမ်းအောင် ဦးစွာ ဆောင်ရွက်နေခြင်းဖြစ်တယ်”ဟု ပြောသည်။

တိုင်းပြည်အတွက် ကောင်းမွန်သည့်စိတ်ဖြင့် ဆောင်ရွက်မည်ဆိုပါက မည်သူ့ကိုမဆို လက်တွဲဆောင်ရွက် သွားမည်ဖြစ်သည်ကို အသိပေးလိုကြောင်း၊ မိမိတို့အနေဖြင့် နိုင်ငံတော်ကို ကောင်းမွန်အောင် ဆောင်ရွက် လိုသည့် စိတ်ဖြင့်သာ လုပ်ဆောင်နေခြင်းဖြစ်သဖြင့် အောင်မြင်မှုများ ရရှိမည်ဟု ယုံကြည်ပါကြောင်း ၎င်းက ပြောသည်။

ဗိုလ်ချုပ်မှူးကြီးမင်းအောင်လှိုင်သည် ၂၀၂၃ ခုနှစ်အတွင်းမှာ အထွေထွေရွေးကောက်ပွဲ ကျင်းပသွားရန် စီစဉ် ဆောင်ရွက်နေသော်လည်း လက်ရှိအချိန်တွင် ကရင်ပြည်နယ်၊ ချင်းပြည်နယ်၊ ကယားပြည်နယ်၊ မွန်ပြည်နယ်၊ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ တနင်္လာရီတိုင်းဒေသကြီး၊ ပဲခူးတိုင်းဒေသကြီးတို့တွင် မြန်မာ့ တပ်မတော်နှင့် တိုင်းရင်းသားလက်နက်ကိုင်(EAO)- ပြည်သူ့ကာကွယ်ရေးတပ်ဖွဲ့(PDF) ပူးပေါင်းတပ်ဖွဲ့တို့ကြား လက်နက်ကိုင် တိုက်ပွဲများ ဖြစ်ပွားနေခြင်းကြောင့် ရွေးကောက်ပွဲလုပ်ရန် အခက်အခဲများဖြင့် ကြုံတွေ့နေရသည်။

သို့သော်လည်း ပြည်ထောင်စုရွေးကောက်ပွဲကော်မရှင်(UEC)က နိုင်ငံရေးပါတီများ ပြန်လည်မှတ်ပုံတင်ခြင်း ဥပဒေနှင့် နည်းဥပဒေများကို ၂၀၂၃ ခုနှစ်၊ ဇန်နဝါရီ ၃၁ ရက်တွင် ထုတ်ပြန်ခဲ့ပြီး ရက်ပေါင်း ၆၀ အတွင်း နိုင်ငံ ရေးပါတီများအား ပါတီမှတ်ပုံတင်ခြင်းကို ပြန်လည် လုပ်ဆောင်ခိုင်းခဲ့သည်။

ထို့နောက် နိုင်ငံရေးပါတီ ၆၀ ကျော် မှတ်ပုံတင်လာခဲ့ပြီး နစက ကျင်းပမည့် ရွေးကောက်ပွဲမှာ ဝင်ရောက် ယှဉ် ပြိုင်ရန် ကြိုတင်ပြင်ဆင် ဆောင်ရွက်မှုများလုပ်နေကြသည်။

လက်ရှိအချိန်မှာတော့ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် အထွေထွေရွေးကောက်ပွဲကို မည်သည့်နေ့တွင် ကျင်းပသွားမည်ဖြစ်ကြောင်း တရားဝင် သတ်မှတ်ကြေညာထားခြင်း မရှိသေးပေ။

CNI News

၂၀၂၃ ခုနှစ်၊ မေလ ၂၂

သျှမ်းပြည်ပြန်လည် ထူထောင်ရေးကောင်စီ (RCSS/SSA) နှင့် ပအိုဝ်းအမျိုးသားအဖွဲ့ချုပ် (PNO) တို့ ပူးပေါင်းပြီး ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) ကို လာရောက် တိုက်ခိုက်ကြောင်း PNLO မှ ဒုဥက္ကဋ္ဌ (၁) ခွန်ထွန်းတင်က CNI သတင်းဌာနသို့ ပြောသည်။

ပြီးခဲ့သည့် မေလ ၂၀ ရက်က ရှမ်းပြည်နယ်တောင်ပိုင်း၊ မောက်မယ်မြို့နယ်၊ ဟိုနမ့်ကျေးရွာအုပ်စု၊ ဝမ်ခဲကျေးရွာ အနီးတစ်ဝိုက် RCSS နှင့် PNLO တို့ တိုက်ပွဲဖြစ်ပွားခဲ့ကြသည်။

PNLO မှ ဒုဥက္ကဋ္ဌ (၁) ခွန်ထွန်းတင်က “ဒီခေါင်းဆောင်ပိုင်းမှာတော့ ဥပမာ ကျနော်တို့ PPST မှာတော့ ခေါင်းဆောင်ပိုင်းမှာတော့ စကားပြောနေကြတာပေါ့နော်၊ သို့ပေမဲ့လည်း အောက်ခြေမှာတော့ နည်းနည်းတော့ ထူးဆန်းတာ တစ်ခုတော့ ရှိတာပေါ့နော်၊ ဒါပေမဲ့ ကျနော်တို့ ဒီဖက်မှာ‌ မြေပြင်မှာ ရထားတဲ့ သတင်းအရ ဆိုရင် တော့ RCSS တစ်ဖွဲ့တည်း မဟုတ်ဘူး။ PNO နဲ့ ပေါင်းပြီးမှ လာတိုက်တာပေါ့နော်၊ PNO တပ်ရင်း ၄ မှာ လူအင်အား ၂၀ ပါတယ်လို့တော့ ကျနော်တို့ သတင်းရတာပေါ့နော်” ဟု ပြောသည်။

PNLO မှ ဒုဥက္ကဋ္ဌ(၁) ခွန်ထွန်းတင် ဦးဆောင်သည့် ကိုယ်စားလှယ်အဖွဲ့ NSPNC နဲ့ ငြိမ်းချမ်းရေး ဆွေးနွေးရန် နေပြည်တော်ရောက်စဉ်

အဆိုပါ RCSS နှင့် PNLO တို့ တိုက်ပွဲကြောင့် PNLO တပ်ဖွဲ့ဝင် ၂ ဦးသေဆုံး၊ ၁ ဦး ဒဏ်ရာရပြီး ၂ ဦး ပျောက်ဆုံး နေကြောင်း ၎င်းက ပြောသည်။

RCSS နှင့် PNO တို့ ပူးပေါင်းက PNLO ကို လာရောက် တိုက်ခိုက်ကြောင်း ပြောဆိုချက်နှင့် ပတ်သက်၍ သိရှိနိုင် ရန် RCSS မှ ပြောရေးဆိုခွင့်ရှိသူ ဗိုလ်မှူးစိုင်းခမ်းစံထံ CNI က ဆက်သွယ်ခဲ့သော်လည်း ဆက်သွယ်၍ မရသေးပေ။

အလားတူ RCSS နှင့် PNLO တို့ ဖြစ်ပွားသည့် တိုက်ပွဲမှာ PNO တပ်ဖွဲ့ဝင်များ ပါဝင်သည်ဟု ပြောဆိုမှုမှာ မိမိအနေ ဖြင့် မသိရှိသေးကြောင်း PNO မှ ဒုတိယကွပ်ကဲရေးမှူး ဒုဗိုလ်မှူးကြီး ခွန်ထွန်းရွှေက CNI သတင်းဌာနသို့ ပြော သည်။

ဒုဗိုလ်မှူးကြီး ခွန်ထွန်းရွှေက “အဲဒါကတော့ ကျနော်လည်း အဲဒီဖက်နယ်က တာဝန်ခံ မဟုတ်တော့ ကျနော်နဲ့ အလှမ်းဝေးနေ‌တော့ ကျနော်မှတ်ချက် မပေးနိုင်ပါဘူးခင်ဗျ၊ အဲဒါတော့ ကျနော်မှတ်ချက် မပေးနိုင်ဘူးခင်ဗျ၊ ကျနော်ကလည်း ပင်လောင်းမြို့နယ်ကြီး ခင်ဗျ” ဟု ပြောသည်။

PNLO တပ်ဖွဲ့ကို တွေ့ရစဉ်

RCSS နှင့် PNO တို့သည် မည်သည့် အပေးအယူကြောင့် မိမိတို့အား ပူးပေါင်းတိုက်ခိုက်သည်ကို မသိရှိကြောင်း PNLO မှ ဒုဥက္ကဋ္ဌ(၁) ခွန်ထွန်းတင်က ပြောသည်။

၎င်းက “ကျနော်တို့လည်း နားတော့ မလည်ဘူးဗျ၊ ဥပမာ PNO ဂိတ်တွေ ဟိုနမ့် အနီးမှာရှိတဲ့ ဂိတ်တွေက တချို့ ကတော့ RCSS က ဝင်ထိုင်လိုက်တယ်နောက်ပြီး အဲဒီလိုမျိုးတွေတော့ ရှိတာပေါ့နော်၊ နောက်ပြီး သူတို့ ဘယ်လို မျိုး အပေးအယူရှိသလဲ ကျနော်တို့လည်း မသိဘူးဗျ၊ သို့ပေမဲ့လည်း PNO ဆိုရင်လည်း စစ်တပ်ရဲ့ အောက်မှာ ရှိတာ ပေါ့နော်၊ အခုက စစ်တပ်အောက်မှာရှိတဲ့ PNO က RCSS နဲ့ ပေါင်းပြီးမှ ကျနော်တို့ကို လာတိုက်တယ်ဆို‌တော့ ကျနော်တို့လည်း စဉ်းစားစရာကြီး ဖြစ်နေတယ်ပေါ့နော်၊ တဖက်လှည့်နဲ့လည်း ဘယ်လိုမျိုးလည်း ကျနော်တို့လည်း နည်းနည်း စဉ်းစားစရာကြီး ဖြစ်နေတယ်ပေါ့” ဟု CNI သတင်းဌာနသို့ ပြောသည်။

ပြီးခဲ့သည့် ၂၀၂၃ ခုနှစ်၊ မတ်လ အတွင်းကလည်း မောက်မယ်မြို့နယ်၊ ကဒူးကြီးဒေသတွင် RCSS နှင့် PNLO တိုက်ပွဲ ဖြစ်ပွားခဲ့ရာ ထိခိုက်ဒဏ်ရာ ရရှိမှုများ ရှိခဲ့သည်။

PNLO နှင့် RCSS တို့သည့် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ် ရေးထိုးထားသည့် တိုင်းရင်းသား လက်နက်ကိုင်များ ဖြစ်ကြသည်။

PNO ကမူ ပအိုဝ်းပြည်သူ့စစ်အဖွဲ့ ဖြစ်သည်။