CNI News

၂၀၂၃ ခုနှစ်၊ မေလ ၁၇

ငြိမ်းချမ်းရေး လုပ်နေသူများအနေဖြင့် ကိုယ်ကိုယ်တိုင်က မငြိမ်းချမ်းပါဘဲနှင့် ငြိမ်းချမ်းရေးကို လုပ်၍ မရနိုင်ဘူး ဟု NCA-S EAO(၇)ဖွဲ့၏ ထိပ်သီး မျက်နှာစုံညီ အစည်းအဝေး သဘာပတီ စဝ်ခွန်းဆိုင်က ပြောသည်။

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ထိုးထားသည့် လက်နက်ကိုင် ၁၀ ဖွဲ့အနက် ၇ ဖွဲ့၏ ထိပ်သီး မျက်နှာစုံညီ အစည်းအဝေးကို မေလ ၁၇ ရက်မှ ၁၈ ရက်နေ့အထိ ထိုင်းနိုင်ငံ၊ ချင်းမိုင်မြို့မှာ ကျင်းပနေသည်။

စဝ်ခွန်းဆိုင်က “ကျနော်တို့ လိုရာပန်းတိုင်ကို ရောက်ဖို့ တစိုက်မတ်မတ် ချီတက်သွားရမှာဖြစ်ပါတယ်။ ဒီလို ချီတက်တဲ့နေရာမှာ အခက်အခဲတွေ အများကြီးရှိပါတယ်။ ရှိလည်း ရှိခဲ့တယ်၊ ရှိလည်း ရှိနေဆဲ၊ ထပ်ပြီးတော့ လည်း ရှိနေဦးမှာ ဖြစ်ပါတယ်။ ဘာဖြစ်လို့လဲဆိုတော့ ကျနော်တို့ရဲ့ အလုပ်က ကိုယ့်အဖွဲ့၊ ကိုယ့်ရဲ့လူမျိုး၊ ကိုယ့်ရဲ့ နယ်မြေအတွက် မဟုတ်ဘူး။ ကျနော်တို့အလုပ်က ပြည်ထောင်စုအကျိုးအတွက်၊ ပြည်သူတစ်ရပ်လုံးနဲ့ ပြည်ထောင်စုအကျိုးအတွက် လုပ်ဖို့ဖြစ်တယ်။ ကျနော်တို့ လုပ်တဲ့အလုပ်က လက်ရှိနိုင်ငံရေး အကျပ်အတည်း ကို ကျော်လွှားနိုင်ရေးနှင့် ငြိမ်းချမ်းရေး ရရှိဖို့ကိစ္စများ ဖြစ်ပါတယ်။ ဒီလိုငြိမ်းချမ်းရေး ရရှိဖို့လုပ်နေတဲ့ အချိန်မှာ ငြိမ်းချမ်းရေး လုပ်နေတဲ့ သူတွေအတွက် အလိုအပ်ဆုံးက ဘာလဲဆိုတော့ ကိုယ်ကိုယ်တိုင်က ငြိမ်းချမ်းဖို့၊ ကိုယ် ကိုယ်တိုင်က မငြိမ်းချမ်းပါဘဲနဲ့ ငြိမ်းချမ်းရေးကို လုပ်တယ်ဆိုရင် ဒါဟာမဖြစ်နိုင်တဲ့ အလုပ်ပဲဆိုတာကို သိထား ကြရမှာ ဖြစ်တယ်”ဟု ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်တွင် တပ်မတော်မှ အရပ်သား အစိုးရကို ဖြုတ်ချလိုက်ပြီးနောက်မှာ NCA-S EAO များသည် အလုပ်ရုံ ဆွေးနွေးပွဲများ အကြိမ်ကြိမ်လုပ်ကာ ရှေ့ဆက်လုပ်ဆောင်ရမည့် အခြေအနေများကို ဆွေးနွေးခဲ့ကြသည်။

၂၀၂၃ ခုနှစ်၊ မေလ ၁၇ ရက်နေ့က NCA-S EAO ၇ ဖွဲ့အစည်းအဝေး ကျင်းပနေစဉ်

စဝ်ခွန်းဆိုင်က “ NCA ရဲ့ လုပ်ငန်းစဉ်တွေကို NCA မူဘောင်အတိုင်း ဆက်လက် အကောင်အထည်ဖော်လို့ မရနိုင်တဲ့ အခြေအနေဖြစ်ပါတယ်။ ဘာဖြစ်လို့လဲဆိုတော့ ကျနော်တို့ရဲ့ ပေါ်လစီတွေ ချမှတ်ဖို့နဲ့ လုပ်ငန်းစဉ် များ ဖော်ဆောင်နိုင်ရန် အစည်းအဝေးများ ကျင်းပနိုင်ဖို့အတွက် ဒိုင်ယာလော့ခ်ပါတနာ(Dialogue Partner) တွေက ပြည့်ပြည့်စုံစုံ မရှိတော့ပါဘူး၊ အဲဒီတော့ ကျနော်တို့ လုပ်နိုင်တာ ဘာရှိမလဲ၊ ကျနော်တို့ လုပ်နိုင်တာက NCA ထဲမှာပါတဲ့ ကျနော်တို့အားလုံး ဝိုင်းပြီးတော့မှ လက်မှတ်ထိုးထားတဲ့ အခြေခံမူ ဖြစ်ပါတယ်”ဟု ပြောသည်။

အဆိုပါ အခြေခံမူထဲမှာ အခြေခံအကျဆုံးဖြစ်သည့် နံပါတ်တစ် နိုင်ငံရေးပြဿနာကို အင်အားနှင့် မဖြေရှင်းဘဲ နိုင်ငံရေးနည်း၊ ငြိမ်းချမ်းသည့်နည်းနှင့်ဖြေရှင်းရန်၊ နံပါတ်နှစ် မိမိတို့အားလုံး သက်ဆိုင်ရာ Stakeholders များ ပါဝင်ဖို့ အဓိပ္ပာယ်ပြည့်ဝသည့် အမျိုးသားအဆင့် ဆွေးနွေးပွဲဖြစ်ရန်၊ နံပါတ်သုံး အရပ်သား ကာကွယ်ရေးနှင့် လူသားချင်း စာနာမှု အကူအညီရနိုင်ရေး တို့ဖြစ်သည်ဟု ၎င်းက ပြောသည်။

NCA ကို ကရင်အမျိုးသားအစည်းအရုံး(KNU)၊ ရှမ်းပြည်ပြန်လည်ထူထောင်ရေးကောင်စီ(RCSS)၊ ဒီမိုကရေစီအ ကျိုးပြုကရင်တပ်မတော်(DKBA)၊ ကရင်အမျိုးသားအစည်းအရုံး/ကရင်အမျိုးသားလွတ်မြောက်ရေးတပ်မတော်- ငြိမ်းချမ်းရေးကောင်စီ(KNU/KNLA-PC)၊ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)၊ ရခိုင်ပြည်လွတ် မြောက်ရေးပါတီ(ALP)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး(ABSDF)၊ မွန်ပြည်သစ် ပါတီ(NMSP)၊ လားဟူဒီမိုကရက်တစ် အစည်းအရုံး(LDU) တို့ လက်မှတ်ရေးထိုးထားသည်။

အဆိုပါ NCA ထိုးအဖွဲ့များသည် ငြိမ်းချမ်းရေးလုပ်ငန်းစဉ်ဦးဆောင်အဖွဲ့(PPST)တွင် ပါဝင်ခဲ့သော်လည်း ၂၀၂၁ ခုနှစ်၊ ဖေဖော်ဝါရီ ၁ ရက်နေ့နောက်ပိုင်း နိုင်ငံရေး အပြောင်းအလဲကြောင့် KNU၊ CNF က နှုတ်ထွက်သွားသလို RCSS၊ ABSDF၊ NMSP တင်းပြည့်မပါဝင်ဘဲ တွဲဖက်အနေဖြင့်သာ ပါဝင်တော့သည်။

သို့သော်လည်း မေလ ၁၇ ရက်မှ ၁၈ ရက်နေ့အထိ ကျင်းပသည့် အစည်းအဝေးမှာတော့ RCSS၊ ABSDF၊ ALP၊ KNU/KNLA-PC၊ PNLO၊ ALP၊ LDU တို့ တက်ရောက်သည်ကို တွေ့ရသည်။

CNI News

၂၀၂၃ ခုနှစ်၊ မေလ ၁၆

မလေးရှားတွင် တရားမဝင်လုပ်သားများအတွက် အလုပ်အကိုင်ရှားပါးနေသောကြောင့် လက်ရှိ၌ တရားမဝင် မြန်မာလုပ်သားများအနေဖြင့် မိမိအား အလုပ်ခေါ်သည့် သူဌေးရှိပါက လုပ်ငန်းခွင်မရွေးချယ်ဘဲ လုပ်ကိုင်ကြရန် မလေးရှားတွင် မြန်မာနိုင်ငံသားများအရေး ကူညီဆောင်ရွက်ပေးနေသူများက CNI သတင်းဌာနသို့ ပြောသည်။

လက်ရှိတွင် စက်ရုံ၊ အလုပ်ရုံများ၌ အလုပ်အကိုင် အဓိက ရှားပါးနေခြင်းဖြစ်ပြီး အခြားစိုက်ပျိုးရေးနှင့် ဆောက်လုပ်ရေးလုပ်ငန်းများတွင် အလုပ်အကိုင်များရှိသော်လည်း ပင်ပန်း၍ မလုပ်နိုင်ကြသည့်အတွက်ကြောင့် တရားမဝင် မြန်မာလုပ်သားများအနေဖြင့် အလုပ်အကိုင်ပို၍ ရှားပါးနေခြင်းဖြစ်ကြောင်း မလေးရှားတွင် မြန်မာ များအား ကူညီပေးနေသူ မွှားမိုက်ကယ်က CNI သတင်းဌာနသို့ ပြောသည်။

“အလုပ်အကိုင်ကတော့ အရင်လိုမပေါပေမယ့် အလုပ်တကယ်လုပ်ချင်တဲ့သူတွေအတွက်က မရှားပါဘူး။ အလုပ် တွေရွေးနေကြလို့သာ လူတွေကလေ။ အဲဒါကြောင့် အလုပ်အကိုင်တွေ ရှားပါးနေတာ။ ဒါကတော့ အလုပ်သမား တွေအပေါ်မှာ မူတည်တယ်။ သူတို့က မလေးရှားကိုလာပြီဆို မလေးရှားရောက်ပြီဆိုပြီးတော့ ပိုက်ဆံရပြီ ဆိုပြီး တော့ တွက်ကြတာလေ။ မလေးရှားရောက်ပြီဆို အလုပ်လုပ်မှ ပိုက်ဆံရမှာလေ။ မြန်မာပြည်လိုမျိုး တနေ့ကို ၂ နာရီ၊ ၃ နာရီ လုပ်ရတာမျိုးမဟုတ်ဘူး။ ဒီမှာ အနည်းဆုံး အောက်ထစ် ၈ နာရီ လုပ်ရတယ်။ ၈ နာရီ လုပ်ရတဲ့ အနေအထားမျိုးတွေကြတော့ မခံနိုင်တော့ဘူးလေ မြန်မာပြည်မှာလည်း လုပ်စရာလည်း မရှိဘူး။ သူတို့တွေက စက်ရုံထဲမှာ အဲကွန်းလေးနဲ့ လုပ်ချင်တဲ့ဟာမျိုးတွေ သူတို့က တောင်းဆိုကြတာ။ ဒါပေမယ့် ဒီအချိန်မှာ အဲဒီ စက်ရုံတွေ ဘာတွေက လုပ်ငန်းတွေက ရှားပါးသွားပြီ။ ရှားပါးတော့ လူတွေက တအားဝင်တော့ အခုလက်ရှိ ကတော့ စိုက်ပျိုးရေးတို့ နေပူတာပေါ့နော်။ ဆောက်လုပ်ရေးတို့ အဲဒီလိုနေရာမျိုးတွေမှာပဲ အဆင်ပြေတယ်။ အလုပ်တွေပေါတယ်ပေါ့။ အဲဒါကျတော့လည်း မလုပ်နိုင်လို့ အလုပ်အကိုင်ရှားပါးတယ် ပြောတာ။ ဒါပေမယ့် တကယ့်တကယ် ပိုက်ဆံရှာပြီးတော့ လုပ်နိုင်တဲ့ အလုပ်ကြမ်းသမားတွေအတွက်ကတော့ အလုပ်မရှားပါဘူး” ဟု ၎င်းက ပြောသည်။

ထို့အပြင် မလေးရှားနိုင်ငံ၌ မြန်မာလုပ်သားများအား အဓိက ခေါ်ယူသော စက်ရုံ၊ အလုပ်ရုံကြီးများတွင် လုပ်သား လျော့ချသည့်အနေဖြင့် စာချုပ်သက်တမ်းပြည့်သူ မြန်မာလုပ်သားများအား စာချုပ်သက်တမ်း ထပ်မတိုးတော့ဘဲ နေရပ်သို့ ပြန်ပို့ခြင်း အများအပြား ရှိနေကြောင်း မလေးရှားတွင် မြန်မာနိုင်ငံသားများအရေး ကူညီဆောင်ရွက် ပေးနေသူများထံက သိရသည်။

ထိုသို့ စာချုပ်သက်တမ်းပြည့်သည့် မြန်မာလုပ်သားများထဲတွင် နေရပ်မပြန်ဘဲ အခြားလုပ်ငန်းခွင်များတွင် အလုပ် အကိုင်ရှာဖွေကာ မလေးရှားနိုင်ငံ၌ ကျန်နေခဲ့သူများလည်းရှိကြောင်း၊ ၎င်းတို့ အလုပ်အကိုင် ရှာဖွေမှုများကြောင့် တရားမဝင် မြန်မာလုပ်သားများမှာ အလုပ်ရှာရ ပို၍ခက်ခဲခြင်းဖြစ်ကြောင်းလည်း ၎င်းတို့က ပြောသည်။

မလေးရှားနိုင်ငံရှိ လုပ်ငန်းခွင်တစ်ခု(ဓါတ်ပုံ-Getty Images)

ထို့ကြောင့် တရားမဝင်မြန်မာလုပ်သားများအနေဖြင့် လက်ရှိတွင် လုပ်ငန်းခွင်နှင့် ငွေကြေးရရှိမှုအပေါ် မရွေးချယ် ဘဲ ရရာ လုပ်ငန်းခွင်၌ ဝင်ရောက်လုပ်ကိုင်ကြရန် မလေးရှားတွင် မြန်မာများအား ကူညီဆောင်ရွက်ပေးနေသူ ဦးဘာဘူကြီးက CNI သတင်းဌာနသို့ ပြောသည်။

“အလုပ်ကရှားသွားတာတစ်ခုပေါ့။ နောက်တစ်ခုက လုပ်ငန်းရှင်တွေကလည်း တရားမဝင်အလုပ်သမားတွေကို လက်မခံရဲတာတွေလည်း ပါပါတယ်။ နေ့စဉ်နဲ့အမျှ ထပ်ပြီးတော့ ဝင်လာတဲ့ မြန်မာနိုင်ငံသားတွေလည်း အများကြီး ရှိနေသလို ခုနကပြောခဲ့တဲ့ စက်ရုံတွေကနေ ထုတ်လိုက်တဲ့ လူတွေကလည်း မြန်မာပြည်မပြန်ဘဲနဲ့ ဒီမှာပဲ ဆက်ပြီး တော့ဖြစ်သလို နေတဲ့သူတွေ ရှိလာတော့လေ တရားမဝင်အလုပ်သမားတွေက များလာ၊ အလုပ်တွေကလည်း ရှာဖို့ ခက်ခဲလာတယ်ပေါ့။ လက်ရှိအနေအထားမျိုးမှာ ပြောချင်တာက လခ နည်းတာ၊ များတာကို မကြည့်ကြပါနဲ့။ နောက်တစ်ခု အလုပ်ပင်ပန်းတာ မပင်ပန်းတာကို မကြည့်ကြပါနဲ့။ ပြီးတော့ ကိုယ်လုပ်တဲ့အလုပ်နဲ့ ကိုယ်ရတာ လေးနဲ့ မမျှတဘူးဘာညာ အဲဒီလို လောလောဆယ်တော့ မစဉ်းစားစေချင်ဘူး။ မရှိ ရှိတဲ့အလုပ် ကိုယ့်ကို လက်ခံ မယ့် သူဌေးတွေရှိခဲ့ရင် လုပ်ငန်းရှင်တွေရှိခဲ့ရင် လောလောဆယ် မှေးပြီးတော့ လုပ်စေချင်ပါတယ်။ ဘာလို့ဆို ရှေ့ဆက် အသက်ရှင်နေထိုင်ဖို့အတွက် အလုပ်က လုပ်နေရမှာပဲ။ ဆိုတော့ ဒီအချိန်မှာ အလုပ်မရွေးပါနဲ့။ လခ နည်းတာ များတာကိုလည်း မရွေးပါနဲ့” ဟု ၎င်းက ပြောသည်။

လက်ရှိတွင် တရားမဝင် မြန်မာများ အလုပ်အကိုင် ရှားပါးခြင်းသာမက တရားဝင်လုပ်ကိုင်နေသည့် မြန်မာများ အတွက်လည်း OT မရရှိမှုများ ဖြစ်နေကြောင်းလည်း သိရသည်။

ထို့အပြင် လက်ရှိတွင် မလေးရှားဘက်မှ မြန်မာလုပ်သားများအား တရားဝင်ခေါ်ယူသည့် အလုပ်ခေါ်စာများလည်း မရှိသလောက် နည်းပါးနေကြောင်း မြန်မာနိုင်ငံ ပြည်ပအလုပ်အကိုင် ရှာဖွေရေး အေဂျင်စီများအဖွဲ့ချုပ်(MOEAF) မှ သိရသည်။

ထိုသို့ တရားဝင်ခေါ်ယူမှုနည်းသည့်အတွက် မြန်မာနိုင်ငံသားများအနေဖြင့် အိမ်နီးချင်း ထိုင်းနိုင်ငံမှ တဆင့်သော် လည်းကောင်း၊ အခြားလမ်းကြောင်းများဖြင့်သော်လည်းကောင်း တရားမဝင် ခိုးဝင်ကာ သွားရောက်ကြသူဦးရေ မှာလည်း အများအပြားရှိကြောင်း သိရသည်။

CNI News

၂၀၂၃ ခုနှစ်၊ မေလ ၁၆

ပြီးခဲ့သည့် ရက်ပိုင်းက ကျင်းပခဲ့သည့် ထိုင်းရွေးကောက်ပွဲတွင် အတိုက်အခံပါတီများ အနိုင်ရကာ အစိုးရ အပြောင်း အလဲ ဖြစ်လာသော်လည်း မြန်မာ့နိုင်ငံရေးအပေါ် သက်ရောက်မှု ရှိဦးမှာ မဟုတ်ကြောင်း တိုင်းရင်းသား လက်နက် ကိုင် ခေါင်း‌‌ဆောင်တစ်ဦးဖြစ်သူ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

မေလ ၁၄ ရက်က ကျင်းပခဲ့သည့် ထိုင်းရွေးကောက်ပွဲတွင် လူငယ်အများစုဖြင့် ဖွဲ့စည်းထားသည့် Move Forward ပါတီက နေရာအများစုကို အနိုင်ရရှိခဲ့သည်။

အစိုးရသစ်ဖွဲ့စည်းပြီး‌နောက် နိုင်ငံခြားရေးမူဝါဒ၊ ကာကွယ်ရေးမူဝါဒများမှာ ချက်ချင်းပြောင်းလဲမှာ မဟုတ်ကြောင်း ၎င်းက ပြောသည်။

ဗိုလ်မှူးကြီး ခွန်ဥက္ကာက “ချက်ချင်းလက်ငင်းတော့ ဘာမှ မပြောင်းပါဘူးဗျ၊ တစ်နှစ်လောက်‌တော့ ဘာဖြစ်လို့လဲ ဆို လက်ရှိ အစိုးရသစ် ဖြစ်လာလို့ ပြန်ပြီး ညွန့်ပေါင်းဖွဲ့ရမယ်ဆို လွန်ခဲ့တဲ့ နိုင်ငံခြားရေးမူဝါဒတို့၊ အိမ်နီးနား မူဝါဒ တို့ကြ‌တော့ ကာကွယ်ရေးမူဝါဒတို့ကြတော့ ချက်ချင်းပြောင်းလဲလို့တော့ မရဘူးဗျ၊ ဒါကြောင့် သူက လွှတ်တော်နဲ့ အစိုးရ အခုလက်ရှိ တက်မယ်ဆိုရင်တောင်မှ သူတို့ရဲ့ ပေါ်လစီကို မိတ်ဆက်ဖို့က နှစ်နဲ့ချီပြီးမှ စောင့်ဖို့လိုမယ်၊ ကျနော်ထင်တယ် ဒီ ၂၀၂၄ အလွန်လောက်မှ နည်းနည်းလေး ရွေ့နိုင်တဲ့ သဘောပေါ့ဗျာ၊ ဒီနှစ်ထဲမှာတော့ ဘာ ဖြစ်ဖြစ် ချက်ချင်းကြီးတော့ အဖြူအမဲ ပြောင်းဖို့တော့ မရှိသေးပါဘူး။ ကြည့်ရတာတော့ မူဟောင်းအတိုင်းပဲ ခဏ ဆက်ထိန်းရမှာပေါ့၊ ကျနော်အဲဒီလို မြင်ပါတယ်ဗျ၊ ထိုင်းအနေနဲ့” ဟု CNI သတင်းဌာနသို့ ပြောသည်။

ထိုင်းရွေးကောက်ပွဲမှာ ဦးဆောင် အနိုင်ရသူ Move Forward ပါတီ အောင်ပွဲခံနေစဉ်

ထို့အတူ ထိုင်းနိုင်ငံ‌ရောက် မြန်မာ့ရွေ့ပြောင်းအရေး၊ ထိုင်းနယ်စပ်မှ တိုက်ပွဲရှောင်များအရေးနဲ့ ပတ်သက်ပြီး မည်ကဲ့သို့သော မူဝါဒများ ချမှတ်မည်ဆိုသည်ကို ၆ လခန့် စောင့်ကြည့်ရန် လိုအပ်ကြောင်း ၎င်းက ပြောသည်။

ထိုင်းဝန်ကြီးချုပ် ဗိုလ်ချုပ်ကြီးဟောင်း ပရာယွတ် ချန်အိုချာသည် လက်ရှိ နစက ခေါင်းဆောင်များနှင့် နီးစပ်သည့် အတွက်ကြောင့် ထိုင်းနိုင်ငံရောက် တော်လှန်ရေး အင်အားစုများအပေါ် ဖမ်းဆီးမှု၊ ဖိအားပေးမှုများ ရှိနေကြောင်း ပြောကြသည်။

ဥပဒေပညာရှင်များ၊ လူ့အခွင့်အရေး လှုပ်ရှားသူများဖြင့် ဖွဲ့စည်းထားသည့် Move Forward ပါတီမှာ ရွေးကောက် ပွဲတွင် အနိုင်ရခြင်းကြောင့် မြန်မာပြည်သူများအတွက် ပိုမိုကောင်းမွန်သည့် အလားအလာများ ရှိနေကြောင်း မြန်မာရွှေ့ပြောင်း လုပ်သားအရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။

ဒီမိုကရေစီအရေး တောင်းဆိုနေသူ

၎င်းက “အရင် ရွေးကောက်ပွဲမတိုင်ခင် အာဏာသိမ်းအစိုးရက ဗမာစစ်တပ်နဲ့ ပေါင်းပြီးတော့မှ ဒီလိုခိုးဝင်လာတဲ့ မြန်မာပြည်သူတွေကို ဖမ်းဆီးပြီးတော့ ပို့တာတွေ ရှိသလို အာဏာသိမ်း စစ်ခေါင်းဆောင် အနေနဲ့လည်း မြန်မာ ပြည်သူတွေကို ဖမ်းပြီးတော့ ပြန်ပို့ဖို့ဆိုတာကို အာဏာသိမ်း ထိုင်းစစ်တပ်ကို အမြဲတမ်း ပြောလေ့ ရှိတယ်ဆိုတာ ကိုလည်း မီဒီယာမှ ပျံ့နှံ့နေတယ်၊ အားလုံးလည်း သိပြီးသားဖြစ်တယ်၊ ဒါကြောင့်မို့လို အခုလို အတိုက်အခံပါတီ ဖြစ်တဲ့ အနိုင်ရပါတီဟာ သူတို့ဟာ လူ့အခွင့်အရေး လုပ်တဲ့ အဖွဲ့အစည်းဖြစ်တာ အလျှောက် မြန်မာပြည်သူတွေ အတွက် ပိုမိုကောင်းမွန်တဲ့ အလားအလာတွေ ရှိနိုင်သလို ဖမ်းပြီးတော့ မတရားဖမ်းပို့တယ်ပေါ့နော်၊ တရားဥပဒေမဲ့ မတရားဖမ်းပို့တဲ့ အခြေအနေတွေဟာ လျော့နည်းသွားနိုင်သလို တစ်ဖက်နိုင်ငံမှာ ကျနော်တို့နိုင်ငံထဲမှာ အာဏာ သိမ်းခြင်း ခံထားရတာ ဖြစ်တဲ့အတွက် ခိုးဝင်လာတဲ့သူတွေကို စနစ်တကျ ဒုက္ခသည် စခန်းတွေပေါ့ ဟောဒီ နယ်စပ်မှာ ဒုက္ခသည်စခန်းတွေ ပြန်လည် အသစ်ဖွင့်ပြီးတော့မှ ဒီ Refugee (ဒုက္ခသည်)အဖြစ်နဲ့ ပြန်လည် လက်ခံ နိုင်စရာ အကြောင်းရှိတယ်” ဟု ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်နောက်ပိုင်း ဖြစ်ပေါ်ခဲ့သည့် နိုင်ငံရေး အခင်းအကျင်းများကြောင့် ထိုင်းနိုင်ငံသို့ နိုင်ငံရေးသမားများ ခိုလှုံမှု၊ တိုက်ပွဲများကြောင့် အရပ်သားများ ထွက်ပြေးတိမ်းရှောင်မှုများ ရှိနေသလို မြန်မာ့ ရွှေ့ပြောင်း လုပ်သားများ အနေဖြင့်လည်း ထိုင်နိုင်ငံတွင် ၇ သန်းဝန်းကျင် လုပ်ကိုင်နေကြကြောင်း သိရသည်။

CNI News
၂၀၂၃ ခုနှစ်၊ မေလ ၁၅
အလွန်အားကောင်းသော ဆိုင်ကလုန်းမုန်တိုင်း(မိုခါ) တိုက်ခတ်မှုကြောင့် ရခိုင်ပြည်နယ်အတွင်း ပျက်စီးသွား သော အခြေအနေများကို ပြန်လည်ထူထောင်နိုင်ရေးအတွက် နစက-က ကျပ်သိန်းပေါင်း ၇ သောင်း ထောက်ပံ့ ပေးအပ်ခဲ့ကြောင်း သိရသည်။

အဆိုပါ ထောက်ပံ့ငွေကို နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ကိုယ်တိုင် ပေးအပ်ခဲ့ခြင်းဖြစ်ပြီး မုန်တိုင်း ဒဏ်သင့် ရခိုင်ပြည်နယ်သို့ သွားရောက်၍ အခြေအနေများကို ကြည့်ရှုလေ့လာခဲ့ကြောင်းလည်း သိရသည်။

ရခိုင်ကမ်းရိုးတန်း ဒေသများကို မေလ ၁၄ ရက် မိုခါမုန်တိုင်း တိုက်ခတ်ခဲ့၍ လူနေအိမ်များ ပျက်စီးခြင်း၊ သစ်ပင် များ လဲခြင်း၊ ဆက်သွယ်ရေးတာဝါတိုင် တချို့လဲကျခြင်း၊ ရေကြီးရေလျှံမှုများဖြစ်ခြင်း၊ လမ်းမီးတိုင်များ ပြိုလဲခြင်း စသည့် အခြေအနေများ ဖြစ်ပွားခဲ့သည်။

မုန်တိုင်းဒဏ်သင့် ရခိုင်ပြည်နယ်အခြေအနေကို နစကဥက္ကဋ္ဌ လေ့လာနေစဉ်

ထို့နောက် ရခိုင်ပြည်နယ်အတွင်းရှိ မြို့နယ်ပေါင်း ၁၇ မြို့နယ်ကို သဘာဝဘေးအန္တရာယ်ကျရောက်သော ဒေသ များအဖြစ် မေလ ၁၅ ရက်က နစက-က သတ်မှတ်ကြေညာခဲ့သည်။

ထို့ကြောင့် ပြန်လည်ထူထောင်ရေးလုပ်ငန်းများ လုပ်ဆောင်နိုင်ရန်အတွက် ပြည်နယ်အစိုးရသို့ ကျပ်သိန်းပေါင်း ၇ သောင်း နစက-က ထောက်ပံ့ပေးခဲ့သည်။

CNI News

၂၀၂၃ ခုနှစ်၊ မေလ ၁၃

မြန်မာနိုင်ငံတွင် နိုင်ငံရေးပဋိပက္ခများ ပြင်းထန်နေစဉ် ကာလအတွင်း နောက်ကွယ်မှ နေနေသည့် တရုတ်အစိုးရ သည် ယခုအခါမှာတော့ ပေါ်ပေါ်ထင်ထင် ပါဝင်လာခြင်းကြောင့် နိုင်ငံရေး အရွေ့တစ်ခု မကြာခင် ပေါ်ပေါက်လာ နိုင်သည်ဟု နိုင်ငံရေး အသိုင်းအဝိုင်းကြားမှာ သုံးသပ်နေကြသည်။

၂၀၂၁ ခုနှစ်၊ ဖေဖော်ဝါရီ ၁ ရက်နောက်ပိုင်း မြန်မာ့တပ်မတော်က အာဏာရယူပြီးနောက် တရုတ်အနေဖြင့် နစက ဥက္ကဋ္ဌ အပါအဝင် ဝန်ကြီးများ၊ နိုင်ငံခြားရေး သံတမန်များဖြင့် မကြာခဏ တွေ့ဆုံဆွေးနွေးလာသည်ကို တွေ့ရ သည်။

မြန်မာနိုင်ငံသည် မဟာဗျူဟာကျသည့် အိမ်နီးချင်းနိုင်ငံဟု တရုတ်က သတ်မှတ်ထားခြင်းကြောင့် ပါဝင်လာ ခြင်း ဖြစ်သည်ဟု မြန်မာ့နိုင်ငံရေးလေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။

ဦးရဲထွန်းက “တရုတ်ကတော့ မြန်မာနိုင်ငံ အရေးအခင်းမှာ မြန်မာပြည်မှာ ပြဿနာတွေ လက်နက်ကိုင်ပဋိပက္ခ တွေ ကြီးကြီးမားမား ဖြစ်ပြီးတော့ ပေါက်ကွဲထွက်သွားတာမျိုး သူမလိုလားလို့ပေါ့၊ အဲဒီလို ဖြစ်သွားလို့ရှိရင် အခြေအနေတွေက ဘယ်သူ့ဘယ်သူမှ မထိန်းနိုင်ဘဲနဲ့ ပိုဆိုးကုန်မယ်ပေါ့နော်၊ သူတို့ နိုင်ငံအနေနဲ့လည်း မြန်မာ နိုင်ငံနဲ့ ဆက်နွယ်ပြီးတော့ ရင်းနှီးမြှုပ်နှံမှုတွေ၊ စီးပွားရေး ဖွံ့ဖြိုးတိုးတက်မှုတွေ လုပ်ဖို့ဟာ အခက်အခဲ ရှိမှာပေါ့၊ သူ့ရဲ့ အိမ်နီးချင်း နိုင်ငံဖြစ်တာကိုး သူကိုယ်၌က မြန်မာနိုင်ငံကို မဟာဗျူဟာကျတဲ့ အိမ်နီးချင်းနိုင်ငံလို့ အသိအ မှတ် ပြုထားတာ ဒါကြောင့်မို့လို့ ဒီကိစ္စ သူဝင်မပါလို့ ရှိရင်တော့ ပြီးမှာ မဟုတ်ဘူးဆိုတဲ့ အနေနဲ့ ဝင်လာတာပေါ့၊ ဝင်လာတော့ သူ့ရဲ့ချည်းကပ်ပုံကတော့ တစ်မျိုးပေါ့နော်၊ သူ့ရဲ့ချည်းကပ်ပုံကတော့ အာဆီယံရဲ့ 5 Point Consensus ကို အကောင်အထည်ဖော်ဖို့တော့ သူက ထောက်ခံတယ်၊ သို့သော် သူပြောတဲ့အထဲမှာ ထူးခြားချက် တွေ ပါတယ်။ ဘာပြောလဲဆိုတော့ အခြေခံဥပဒေတွေနဲ့အညီ ဖြေရှင်းဖို့ဆိုတဲ့ဟာ ပါတဲ့အခါကြတော့ ခုန ကျနော် ပြောခဲ့သလိုမျိုး ရွေးကောက်ပွဲ လုပ်မယ်ဆိုတဲ့ဟာက အခြေခံဥပဒေအရ သူတို့ စစ်ကောင်စီက အာဏာရယူထား တာ အချိန်သတ်မှတ်ချက် ရှိတယ်၊ အဲဒီ သတ်မှတ်ချက် ပြည့်တဲ့အခါမှာ ရွေးကောက်ပွဲ အခြေခံဥပဒေအတိုင်း လုပ် ဖို့ဆိုတဲ့ဟာကို တရုတ်က ရည်ညွန်းပုံရတယ်။ အဲဒီလို လုပ်တဲ့အခါမှာ အားလုံးပါဝင်နိုင်ဖို့အတွက် လမ်းဖွင့်ပေးရ မယ်” ဟု ပြောသည်။

တရုတ်ကို ကန့်ကွက်နေကြစဉ်

ပြီးခဲ့သည့် မေလ ၂ ရက်က မြန်မာနိုင်ငံသို့ တရုတ်နိုင်ငံခြားရေးဝန်ကြီး မစ္စတာကျင်ဂန်း ရောက်ရှိလာပြီး နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံကာ စီးပွားရေး၊ နယ်စပ်တည်ငြိမ်ရေးတို့ကို ဆွေးနွေးခဲ့ကြ ကြောင်း သိရသည်။

အလားတူ ဗိုလ်ချုပ်မှူးကြီး သန်းရွှေ(ငြိမ်း)နှင့်လည်း တွေ့ဆုံ ဆွေးနွေးခဲ့သည်။

မြန်မာ့နိုင်ငံရေး အခြေအနေမှာ ပိုမိုရှုပ်ထွေးလာသည့်အတွက် အိမ်နီးချင်းနိုင်ငံ တစ်နိုင်ငံအနေဖြင့် ပါဝင် ပတ်သက်နေခြင်း ဖြစ်ကြောင်း ရခိုင်အမျိုးသားပါတီ (ANP) မှ ဥက္ကဋ္ဌ ဦးသာထွန်းလှက CNI သတင်းဌာနသို့ ပြောသည်။

ဦးသာထွန်းလှက “တရုတ်ကလည်း မြန်မာနဲ့ အိမ်နီးချင်း နိုင်ငံဆိုတော့ မြန်မာ့နိုင်ငံရေးပြဿနာက ဖြစ်ပေါ်နေတဲ့ အခြေအနေက တရုတ်နိုင်ငံ အပေါ်မှာလည်း တစ်စုံတစ်ရာ အကျိုးစီးပွားအတွက် အခက်အခဲတွေ အနှောင့် အယှက်တွေ ဖြစ်စေတယ်လို့ တရုတ်က အဲဒီလို သုံးသပ်လိမ့်မယ် ထင်တယ်၊ အဲဒါကြောင့် မြန်မာ့နိုင်ငံရေး ပြဿနာကလည်း အခုဆိုရင် ပိုလို့ ရှုပ်ထွေးတဲ့ အခြေအနေတစ်ရပ်ကို ရောက်ရှိလာတဲ့ အတွက်ကြောင့် အိမ်နီးချင်း နိုင်ငံတစ်ခုအနေနဲ့ သူပါဝင်ပတ်သက်ပြီး လုပ်ကိုင်ဆောင်ရွက်ပေးဖို့ လိုတယ်လို့ အဲဒီလို ယူဆတဲ့ အတွက်ကြောင့် အဲဒီလို ပါဝင်ပတ်သက် တွေ့ဆုံမှု အပိုင်းတွေကို လုပ်လာရတဲ့ အခြေအနေမျိုးလို့ ကျနော်အဲဒီလို မြင်တယ်” ဟု ပြောသည်။

၂၀၂၃ ခုနှစ်၊ မေလ ၂ ရက်က တရုတ်နိုင်ငံခြားရေးဝန်ကြီး မစ္စတာကျင်ဂန်းနဲ့ နစက၏ နိုင်ငံခြားရေးဝန်ကြီး ဦးသန်းဆွေ တွေ့ဆုံစဉ်

တရုတ်နိုင်ငံအနေဖြင့် နိုင်ငံရေးထက် စီးပွားရေးကို ဦးစားပေးသည့် နိုင်ငံဖြစ်သောကြောင့် မြန်မာ့နိုင်ငံရေး တည်ငြိမ်မှ ၎င်းတို့ အကျိုးစီးပွား အနှောင့်အယှက် မရှိမှာဖြစ်ကြောင်း လီဆူအမျိုးသား ဖွံ့ဖြိုးတိုးတက်ရေးပါတီ (ဒူးလေးပါတီ)မှ ဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။

ဦးလီပေါ်ရဲ့က “တရုတ်ကတော့ သူတို့ဝမ်းစာပေါ့၊ အဓိကကတော့ သူတို့ရဲ့ စီးပွားရေးပါပဲ၊ တရုတ်ကတော့ နိုင်ငံ ရေးထက်စာရင် စီးပွားရေးကို ဦးစားပေးတဲ့ နိုင်ငံဆိုတော့လည်း မြန်မာ့နိုင်ငံရေးကတော့ ရှင်းရှင်းပြောရရင် သူက ကောင်းစေချင်တာပေါ့ကွာ မကောင်းရင် သူ့ရဲ့စီးပွားရေးတွေကလည်း အများကြီး ရှိတာကိုး၊ အနှောင့်အယှက်တွေ ရှိတာကိုး၊ သူကတော့ ကောင်းစေချင်မှာပဲလေ၊ ကောင်းစေချင်ပေမယ့်လည်း ဒါကကောင်းအောင် လုပ်နိုင်မှလည်း ကောင်းလာမှာကိုး အခုအခြေအနေကတော့ မလွယ်ဘူးလေ၊ နဂိုက တိုင်းရင်းသား လက်နက်ကိုင် ၁၈ ဖွဲ့ပဲ ရှိတဲ့ ဟာတောင်မှ မလွယ်တဲ့ဟာ အခုက လက်နက်ကိုင်အဖွဲ့ပေါင်း ရာနဲချီဆိုတော့ လွယ်တော့ မလွယ်ပါဘူး” ဟု ပြောသည်။

တရုတ် - မြန်မာ နှစ်နိုင်ငံနယ်နိမိတ်မှာ မိုင်ပေါင်း ၁၃၀၀ ကျော် ထိစပ်လျက်ရှိပြီး ထိုနယ်စပ်အနီးတွင် ကချင်လွတ် လပ်ရေးတပ်မတော်(KIA)၊ "ဝ" ပြည်သွေးစည်းညီညွတ်ရေးတပ်မတော်(UWSA)၊ အမျိုးသားများ ဒီမိုကရေစီ မဟာ မိတ်တပ်မတော်-မိုင်းလား(NDAA)၊ ရှမ်းပြည် ပြန်လည် ထူထောင်ရေးကောင်စီ (RCSS/SSA)၊ ရှမ်းပြည်တိုးတက် ရေးပါတီ (SSPP/SSA)၊ မြန်မာနိုင်ငံ အမှန်တရားနှင့် မျှတမှု အမျိုးသားပါတီ (MNDAA)၊ ပလောင်ပြည် လွတ် မြောက်ရေးတပ်ဦး (PSLF/ TNLA) စသည့် လက်နက်ကိုင် အဖွဲ့အစည်းများ လှုပ်ရှားလျက်ရှိသည်။

CNI News

၂၀၂၃ ခုနှစ်၊ မေလ ၁၂

အာဆီယံဘုံသဘောတူညီချက် ၅ ရပ် တိုးတက်မှု ရရှိရေးမှာ လက်ရှိ ပဋိပက္ခဖြစ်ပွားနေသည့် နစကနှင့် NUG တို့အကြား နိုင်ငံရေးအရ တွေ့ဆုံဆွေးနွေး အဖြေရှာမှုမှာ အဓိကကျကြောင်း မြန်မာ့နိုင်ငံရေး လေ့လာသုံးသပ်သူ ဦးရဲထွန်းက ပြောသည်။

မြန်မာ့နိုင်ငံရေး အကျပ်အတည်းကို ဖြေရှင်းနိုင်ရေး နစကနှင့် သဘောတူညီမှု ယူထားသည့် အာဆီယံ ဘုံသဘော တူညီချက် ၅ ရပ်မှာ တိုးတက်မှုမရှိကြောင်း အင်ဒိုနီးရှားနိုင်ငံတွင် မေလ ၉ ရက်မှ ၁၁ ရက်အထိ ကျင်းပခဲ့သည့် အာဆီယံထိပ်သီးညီလာခံ၌ အာဆီယံဥက္ကဋ္ဌ အင်ဒိုနီးရှာသမ္မတ ဂျိုကိုဝီဒိုဒိုက ပြောကြားခဲ့သည်။

၎င်းက “သူတို့က အဓိက အားဖြင့်တော့ 5 Point Consensus ပေါ့နော် သူတို့ ဘုံသဘောတူညီချက် ၅ ရပ်ကို အကောင်အထည်ဖော်ဖို့ အဲဒါကို ဦးတည်ပြီးတော့ သူတို့ လုပ်ဆောင်နေတာပေါ့၊ အဲဒီတော့ သူတို့က အခုဒီ အာဆီယံအသင်း အလှည့်ကျဥက္ကဋ္ဌလုပ်တဲ့ နိုင်ငံတွေကပေါ့၊ သူတို့က တာဝန်ယူပြီး လုပ်တာ များတယ် 5 Point Consensus ကို အကောင်အထည်ဖော်ဖို့ အဲဒီတော့ အဲမှာက အရေးကြီးတာက မြန်မာ့အရေးမှာ နှစ်ဖက် ထိပ် တိုက်ဖြစ်နေတဲ့ အဖွဲ့တွေ အပါအဝင်ပေါ့နော်၊ ဆိုလိုတာတော့ NUG တို့၊ PDF တို့၊ CRPH တို့၊ NLD တို့ပေါ့ဗျာ အဲဒီ ဟာနဲ့ နစကနဲ့ အပါအဝင် မြန်မာ့အရေးမှာ ပါဝင်ပတ်သက်နေတဲ့ သူတွေအားလုံး တွေ့ဆုံဆွေးနွေးပြီးတော့ နိုင်ငံ ရေးအရ အဖြေရှာဖို့ဆိုတာကို အဲဒါက နည်းနည်း အဓိကကျတဲ့ အချက်ဖြစ်နေတယ်၊ အဲဒီဟာကိုရောက်အောင် သူတို့ တွန်းနေတာပေါ့နော်၊ ဝိုင်းပြီးတော့ ကြိုးစားနေတာ” ဟု ပြောသည်။

 အာဆီယံဥက္ကဋ္ဌ အင်ဒိုနီးရှာသမ္မတ ဂျိုကိုဝီဒိုဒိုကို တွေ့ရစဉ်

၂၀၂၁ ခုနှစ်၊ ဖေဖော်ဝါရီလ နောက်ပိုင်း နိုင်ငံရေး အခင်းအကျင်းအရ ပေါ်ပေါက်ခဲ့သည့် NUG၊ CRPH တို့မှာ ၎င်းတို့ ၏ အစီအစဉ်အတိုင်း လုပ်ဆောင်နေပြီး နစကနှင့် မတူညီသည့် လမ်းကြောင်းကို သွားနေကြကြောင်း၊ ထို့ကြောင့် အာဆီယံ ဘုံသဘောတူညီမှု ၅ ရပ်မှာ အလုပ်မဖြစ်နိုင်ကြောင်း ၎င်းက ပြောသည်။

နစကနှင့် NUG တို့ တွေ့ဆုံဆွေးနွေးမှုမှာ မဖြစ်နိုင်သောကြောင့် ဘုံသဘောတူညီချက်မှာ တိုးတက်လာမှာ မဟုတ် ကြောင်း မြန်မာ့နိုင်ငံရေးလေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

၎င်းက “ဒီနေရာမှာ ကျနော်တို့ သွားကြည့်ရမှာပေါ့၊ သွားကြည့်ရမယ်ဆိုတာက ဆွေးနွေးဖက်က ဘယ်သူလဲဆိုတာ ကြည့်ရမှာပေါ့နော်၊ ဒါကတော့ ကျနော်က ပြောရလို့ရှိရင်က နစက နေရာကနေ ပြောမယ်ဆိုရင် အနည်းဆုံး ပြော ချင်တယ်ဆိုရင်တော့ ဘာပဲပြောပြော အကြမ်းဖက်မှုကိုလည်း ရပ်တန့်ရမယ်ဗျ၊ မရပ်တန့်လိုတော့ မရဘူး၊ ဘာကြောင့်လဲဆိုရင် အကြမ်းဖက်သမားနဲ့ ဆွေးနွေးတယ်ဆိုတာက ဘယ်နိုင်ငံမှာမှ မရှိဘူးလေ၊ ဘယ်နိုင်ငံမှာမဆို အကြမ်းဖက်သမားကို စင်ပေါ်မှာ အရောက်ခေါ်ပြီး မဆွေးနွေးကြပါဘူး။ မဆွေနွေးကြပါဘူးဆိုတာ လက်ရှိမှာ တော့ သူက လူသတ်ဝါဒပေါ့နော်၊ ဒလန်ဆို သတ်ရမယ်ဆိုတဲ့ ဟာကို ဒီမူကြီးကို သူက ချချင်လည်း ချမယ်၊ မချရင် လည်း ဒီလို လုပ်နေတာကို အားပေးအားမြှောက် ပြုနေတဲ့ အဖွဲ့အစည်းဆိုတာကတော့ အကြမ်းဖက်သမားဆိုတဲ့ အခါကြတော့ ဆွေးနွေးမှာ မဟုတ်ဘူးဗျ၊ အပစ်အခတ် အတိုင်အခိုက်တွေ ရပ်စဲတယ်ဆိုရင်တော့လည်း စဉ်းစား ကောင်း စဉ်းစားနိုင်တာပေါ့နော်၊ ကျနော်သာဆိုရင် ဆိုပြီးတော့ ပြောတာပါ။ ဖြစ်ဖို့များတာကတော့ အကြမ်းဖက်မှု တွေ လုပ်နေတဲ့အတွက် သူက ဆွေးနွေးမှာ မဟုတ်ဘူးဗျ၊ ဒါက အဓိကလို့ ထင်ပါတယ်၊ ဒါကြောင့်မို့လို့ ဘာတိုး တက်မှုမှ မရှိတာပေါ့နော်” ဟု ပြောသည်။

အာဆီယံညီလာခံကို တွေ့ရစဉ်

၂၀၂၁ ခုနှစ်၊ ဖေဖော်ဝါရီ ၁ ရက်နောက်ပိုင်း နိုင်ငံရေး အပြောင်းအလဲများကြောင့် ပြည်တွင်းတွင် လက်နက်ကိုင် ပဋိပက္ခများ ဖြစ်ပွားလျက်ရှိနေပြီး နိုင်ငံရေး၊ စီးပွားရေး၊ ကျန်းမာရေး၊ လူမှုရေးများမှာ အဖက်ဖက်မှ ယိုယွင်း ကျဆင်းလျက် ရှိနေသည်။

မြန်မာ့နိုင်ငံရေးပြဿနာ ပြေလည်ရေး နိုင်ငံတကာများ အပါအဝင် အာဆီယံ၊ ကုလ စသည့် အဖွဲ့အစည်းများ ကြားဝင်ဆောင်ရွက်နေသော်လည်း ဖြေရှင်းနိုင်ခြင်း မရှိသည်ကို တွေ့ရသည်။

CNI News

၂၀၂၃ ခုနှစ်၊ မေလ ၁၁

ပစ်ခတ်တိုက်ခိုင်ခြင်းအားဖြင့် မိမိတို့၏ အဖွဲ့ရည်မှန်းချက်၊ မျှော်မှန်းချက် ပန်းတိုင်သို့ ရောက်နိုင်မည်ဟု ယုံကြည် ပါသလားဟု ကရင်အမျိုးသားအစည်းအရုံး(KNU) တပ်မဟာ(၆)၏ ခရိုင်ဥက္ကဋ္ဌ ပဒိုစောရွှေမောင်းက ယနေ့ (မေလ ၁၁ ရက်)တွင် ထုတ်ပြန်ချက် တစ်စောင် ထုတ်ပြန်၍ မေးခွန်းထုတ်ခဲ့သည်။

အဆိုပါ ထုတ်ပြန်ချက်တွင် တိုက်ပွဲဖော်ဆောင်သူ၊ ပစ်ခတ်သူများကို မေးလိုသည်ဟု ရည်ညွန်းထားသည်။ သို့သော် မည်သည့် လက်နက်ကိုင်တပ်ဖွဲ့ကို ပြောသည်ကိုတော့ အတိအကျ ဖော်ပြထားခြင်း မရှိပေ။

ပစ်ခတ်တိုက်ခိုက်ကြသော လက်နက်ကိုင် အဖွဲ့များ၏ ရည်ရွယ်ချက်သည် မည်ကဲ့သို့သော အရာများ ဖြစ်သ နည်း၊ ဤကဲ့သို့ ပစ်ခတ်တိုက်ခိုက်ခြင်းအားဖြင့် မိမိတို့၏ အဖွဲ့ရည်မှန်းချက်၊ မျှော်မှန်းချက် ပန်းတိုင်သို့ ရောက် နိုင်မည်ဟု ယုံကြည်ပါသလား၊ ပစ်ခတ်တိုက်ခိုက် သတ်ဖြတ်ကြသော လက်နက်ကိုင်အဖွဲ့များတို့၏ သစ္စာ အဓိဋ္ဌာန်ပြုချက်များသည် လက်ရှိဖြစ်ပေါ်နေသော အနိဋ္ဌာရုံအတိုင်း ဟုတ်ပါသလားဟု ပဒိုစောရွှေမောင်းက မေးခွန်းထုတ်ထားသည်။

၎င်းက “ကျွနှ်ပ်တို့ ဒေသတွင်း နေထိုင်ကြသော မိဘပြည်သူများတို့သည် လက်ရှိကာလ၌ ပစ်ခတ် တိုက်ခိုက်နေ ကြခြင်းကြောင့် လယ်ယာထွန်ယက် စိုက်ပျိုးရမည့်အချိန်၊ ကလေးသူငယ်များ ကျောင်းတတ်ပညာသင်ယူရမည့် အချိန်၌ မည်သည့်အရာမျှ မလုပ်ဆောင်နိုင်ဘဲ ပြေးရှောင်နေကြရသည်။ တိုက်ပွဲကြောင့် ဆုံးရှုံးစွန့်လွှတ်နေကြရ သည်ကို ဂရုပြုမိပါသလား၊ လက်နက်ကိုင် အဖွဲ့များ၏ ကြွေးကြော်သံနှင့် ဆောင်ရွက်လိုကြသည့် အရာတို့သည် ကျွနှ်ပ်တို့ ပြည်သူများနှင့် ရင်သွေးငယ်များအတွက် ရှိပါသေးသလား၊ ထည့်သွင်းထားရှိသေးပါသလား”ဟု ပြော သည်။

ပဒိုစောရွှေမောင်း ထုတ်ပြန်ချက်ကိုတွေ့ရစဉ်

ထို့အပြင် အဘယ်ကြောင့် တစ်ဖွဲ့နှင့်တစ်ဖွဲ့၊ တစ်ဖက်နှင့်တစ်ဖက်၊ ပစ်ခတ်တိုက်ခိုက်နေကြရသနည်း၊ ပစ်ခတ် တိုက်ခိုက်နေကြသည့်အပေါ် မည်သို့သော အကျိုးရလဒ် ထွက်ပေါ်ရရှိခံစားကြရသနည်း၊ ကျွနှ်ပ်တို့ပြောသော ကြွေးကြော် အဓိဋ္ဌာန်ပြုချက်များနှင့် ကိုက်ညီပါသေးသလား၊ ပြန်လည်ဆန်းစစ်ရန် မလိုအပ်သေးဘူးလားဟု ပဒိုစောရွှေမောင်းက ထုတ်ပြန်ချက်မှာ မေးခွန်းထုတ်ထားသည်။

၎င်းက “မိဘ ပြည်သူများ၏ အကျိုးစီးပွားကို ဦးထိပ်ပန်ဆင် ဆောင်ရွက်နေသည့် လက်နက်ကိုင်အဖွဲ့များ ဖြစ်ပါ က မိမိတို့၏ လုပ်ဆောင်ချက်များတို့သည် ပြည်သူလူထုများ၏ ဘဝ ပိုမို တိုးတက်စေရမည်၊ ပိုမိုအေးချမ်းစေရ မည်၊ ပိုမို လုံခြုံစိတ်ချမ်းမြေ့ဖွယ် ဖြစ်စေရမည်ဟု ယူဆရပါသည်။ သို့ကြောင့် မိဘပြည်သူအတွက် အမျိုးသားထု အတွက်၊ ဆောင်ရွက်နေကြပါသည်ဟု ပြောဆို ကြွေးကြော်နေကြသော လက်နက်ကိုင်အဖွဲ့များအား မေတ္တာရပ် ခံ လိုသည်မှာ လက်ရှိ ဖြစ်ပေါ်နေသော နိုင်ငံရေးအခင်းအကျင်း၊ နိုင်ငံရေးအခြေအနေ၊ အနေအထားအရ တွေ့ ဆုံ ဆွေးနွေးသည့် လမ်းကြောင်းမှ တဆင့် ပြောဆိုညှိနှိုင်းမှုများ ပြုလုပ်ပါက ယခုလက်ရှိ ပစ်ခတ်တိုက်ခိုက် သတ် ဖြတ်နေကြသည့် ဆောင်ရွက်မှု လုပ်ဟန်များထက် အဆများစွာ အားလုံးအတွက် ပိုမိုသာလွန် အကျိုးများ စေမည် ဟု ယုံကြည်ပါသည်။ အကြမ်းမဖက် ညှိနှိုင်းဆောင်ရွက်ကြစေလိုသောဆန္ဒဖြင့်”ဟု ပြောသည်။

ကရင်ပြည်နယ်အတွင်းက ဒေသခံများ တိုက်ပွဲကြောင့် ထွက်ပြေးတိမ်းရှောင်နေကြရစဉ်

ပဒိုစောရွှေမောင်းသည် KNU ၏ ကရင်အမျိုးသားလွတ်မြောက်ရေးတပ်မတော်(KNLA)၏ အမှတ်(၆) တပ်မဟာ ၏ ခရိုင်ဥက္ကဋ္ဌ ဖြစ်သည်။

လက်ရှိတွင် KNU ၏ လက်အောက်ခံ KNLA သည် ဒီမိုကရေစီအရေး လှုပ်ရှားခြင်းကနေ ပေါ်ပေါက်လာသည့် ပြည်သူ့ကာကွယ်ရေးတပ်ဖွဲ့(PDF)များကို စစ်ရေးသင်တန်းများပေးခြင်းနှင့် ပူးတွဲ စစ်ဆင်ခြင်းများ ပြုလုပ်နေခြင်း ကြောင့် တပ်မတော်နှင့် တိုက်ပွဲများ ဖြစ်ပွားလျက်ရှိနေသည်။

အဆိုပါ တိုက်ပွဲများကြောင့် ကရင်ပြည်နယ်အတွင်းရှိ ဒေသခံတချို့မှာ နေရပ်စွန့်ခွာ ထွက်ပြေး တိမ်းရှောင်နေကြရသည်။

CNI News

၂၀၂၃ ခုနှစ်၊ မေလ ၁၁

အမျိုးသားရေးအမည်ခံပြီး လက်နက်ကိုင်ဆောင် ကိုယ်ကျိုးစီးပွားရှာနေကြသည့် အဖွဲ့အစည်းများကို ပြင်းထန်စွာ ကန့်ကွက်ရှုတ်ချကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ (TNDP) က မေလ ၁၀ ရက် နေ့စွဲဖြင့် ထုတ်ပြန်ခဲ့သည်။

တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ (TNDP) ဖွဲ့စည်းတည်ထောင်ခြင်း (၁၁)နှစ်ပြည့်တွင် ထည့်သွင်း ထုတ်ပြန်ခဲ့ခြင်း ဖြစ်ပြီး သေနတ်ကိုင် ကိုယ်ကျိုးရှာမှု များပြားလာသည့်အတွက် ထိုကိစ္စ ထည့်သွင်း ထားခြင်း ဖြစ်ကြောင်း TNDP မှ ဥက္ကဋ္ဌ စိုင်းဌေးအောင်က CNI သတင်းဌာနသို့ ပြောသည်။

၎င်းက “အဲဒီမှာ ကချင်မှာလည်းရှိတယ်၊ ငါတို့ လူမျိုးတွေမှာလည်း ရှိတယ်၊ အမျိုးသား အကျိုးစီးပွား လုပ်ရင်တော့ ဘာမှ မပြောလိုဘူးလေ၊ အမျိုးသား အကျိုးစီးပွားမလုပ်ဘဲ ကိုယ်ကျိုးစီးပွားလုပ်နေတဲ့ လူတွေကို ပြောတာပေါ့၊ သေနတ်ကိုင်ပြီးမှ ကိုယ်ကျိုးစီးပွား ရှာတယ်ဆိုတော့ ဓါးမြဖြစ်တာပေါ့၊ အမျိုးသားအကျိုးစီးပွား ရှာကြတယ်ဆိုရင် တော့ အမျိုးသားအကျိုးစီးပွားအတွက် လုပ်ကြတယ်ဆိုရင်တော့ ဘာမှ ပြောစရာ မလိုပါဘူးဒါက အမျိုးသား အတွက် တိုးတက်ရာ တိုးတက်ကြောင်း လုပ်ကြတာပဲ” ဟု ပြောသည်။

တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ ဆိုင်းဘုတ်တင်ခြင်းကို တွေ့ရစဉ်

နှစ်ပေါင်းကြာရှည်စွာ ဖြစ်ပွားလာသည့် ပြည်တွင်းစစ်ကြောင့် ပြည်သူလူထုများ ဆင်းရဲဒုက္ခ ရောက်ခဲ့ကြကြောင်း ပြည်သူ့အကျိုးစီးပွားကို ထောက်ရှု၍ တိုင်းပြည် မနစ်နာသည့် အကောင်းဆုံးနည်းလမ်းဖြင့် အဖြေရှာကြရန် တိုက်တွန်းထားသည်။

တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ (TNDP) ပါတီအနေဖြင့် နိုင်ငံရေးပြဿနာကို နိုင်ငံရေး နည်းလမ်းဖြင့် ဖြေရှင်းနိုင်မည်ဟု ယုံကြည်ကြောင်း ထုတ်ပြန်ချက်တွင် ဖော်ပြထားသည်။
မြန်မာနိုင်ငံမှာ လက်နက်ကိုင်ပြီး စီးပွားရှာကြသည့် ဖြစ်စဉ်ကြောင့် နောက်ထပ် လက်နက်ကိုင်ပြီး စီးပွားရှာသည့် အဖွဲ့များ များလာကြောင်း၊ လက်နက်ကိုင် အဖွဲ့အစည်းများခြင်းကြောင့် ပြည်သူများ ဒုက္ခရောက်ကြရကြောင်း စိုင်းဌေးအောင်က ပြောသည်။

TNDP ပါတီ၏ ထုတ်ပြန်ချက်ကိုတွေ့ရစဉ်

၎င်းက “ကျနော်တို့ နအဖ၊ နဝတ ခေတ်တုန်းက တိုင်းရင်းသား လက်နက်ကိုင် အဖွဲ့အစည်းတွေကို သူတို့က ငြိမ်းချမ်းရေး ယူလိုက်တယ်၊ ဗိုလ်ခင်ညွန့်တို့ပေါ့၊ ငြိမ်းချမ်းရေး ယူလိုက်တဲ့ အခါမှာ သူက ဘာဖြစ်လဲဆိုတော့ သူ့ရဲ့ နယ်မြေချဲ့ထွင်ရေးကို ကစားလိုက်တယ်၊ နဝတ၊ နအဖက တိုင်းရင်းသားတွေမှာ ရတနာတွေ ထက်တယ်၊ သစ် တောတွေ ပေါတယ်၊ အဲဒီနေရာမှာ ကုမ္ပဏီတွေ ချပေးလိုက်တယ်၊ သူ့ရဲ့စခန်းတွေ ရှေ့တိုးရှေ့တိုးနဲ့ လုပ်လိုက်တဲ့ အခါကြတော့ သူ့ဖက်က နယ်ချဲ့ပြီးသားဖြစ်သလို တိုင်းရင်းသားတွေဖက်ကလည်း ဒါကို ထိလို့မရဘူး။ ဒါပေမဲ့ ဒါကို ထိလို့ရတဲ့ကိစ္စက လက်နက်ကိုင် အဖွဲ့အစည်းတွေကပဲ၊ အဲဒီ လက်နက်ကိုင် အဖွဲ့အစည်းတွေက ကိုယ်ကျိုး စီးပွားရှာသွားတဲ့ အခါကြတော့ သက်ဆိုင်ရာ တိုင်းရင်းသားတွေ အင်မတန်မှ နစ်နာသွားကြတယ် အဲဒီအချိန်တုန်း က၊ သဘာဝပတ်ဝန်းကျင် ပျက်စီးတာလည်း ပြည်သူပဲ ခံရတယ်၊ အဲဒီမြေတွေကို သူတို့ ရတနာတွေ တူးလိုက်တဲ့ အတွက်ကြောင့် သစ်တောတွေ ပျက်စီးသွားလို့ ပြုန်းတီးသွားလို့ ခံရတာလည်း ပြည်သူပဲ ခံရတယ်၊ အဲဒီ လက်နက် ကိုင် အဖွဲ့အစည်းတွေကတော့ သူတို့တော့ မြိုးမြိုးမြိုက်မြိုက် နည်းနည်းပါးပါးတော့ ရသွားကြတာပေါ့၊ သူတို့တွေ ကြီးပွားသွားကြတယ်၊ ဒါပေမဲ့ ဒုက္ခရောက်တာ ပြည်သူဒုက္ခရောက်ပြီးမှ တိုင်းပြည်က နစ်နာဆုံးရှုံးရတယ်၊ ယနေ့ ဖြစ်ပျက်တဲ့ အာဏာသိမ်းမှု နှစ်နှစ်ကျော် အတွင်းမှာဆိုရင်လည်း ဒီပုံစံမျိုးတွေ တွေ့ရှိရတာပေါ့နော်၊ လက်နက် ကိုင် အဖွဲ့အစည်းတွေနဲ့ ပေါင်းစည်းသွားကြတယ်၊ လက်ညိုးနိုင်ငံရေး လက်ညိုးနိုင်ငံရေးနဲ့ ဘယ်လက်နက်ကိုင် အဖွဲ့အစည်းမှ ပြည်သူ့ကို အကျိုးရှိအောင် လုပ်ပေးခဲ့တာ မရှိဘူးဆိုတဲ့ အခါကြတော့ ကျနော်တို့ ဒီအချက်ကို ထည့်သွင်းထားတာ ဖြစ်တယ်” ဟု ပြောသည်။

တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ (TNDP) သည် အမျိုးသားရေးကို မဏ္ဍိုင်ထားပြီး ဖက်ဒရယ်ဒီမိုကရေစီနိုင်ငံတော် ဖြစ်ပေါ်လာရေး ကြိုးစားဆောင်ရွက်သွားမည်ဟု ပြောသည်။

CNI News

၂၀၂၃ ခုနှစ်၊ မေ ၁၀

အပစ်ရပ်အဖွဲ့များဖြင့် ဖွဲ့စည်းထားသည့် ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST)မှ မွန်ပြည်သစ်ပါတီ (NMSP) နုတ်ထွက်စာ တင်ထားကြောင်း သတင်းများ ထွက်ပေါ်လာပြီးနောက် ငြိမ်းချမ်းရေးသံတမန်များကြား PPST ကနေ NMSP တကယ်နုတ်ထွက်လာနိုင်လား သုံးသပ်လျက်ရှိနေကြသည်။

လက်ရှိ PPST ကို ဦးဆောင်နေသည့် မွန်ပြည်သစ်ပါတီ အနေဖြင့် ၎င်းတို့၏ ဝန်ထုပ်ဝန်ပိုးကို လျှော့ချလို၍ နုတ်ထွက်စာ တင်ခြင်း ဖြစ်နိုင်ကြောင်း PPST အဖွဲ့ဝင် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO)မှ နာယကဖြစ်သူ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

ဗိုလ်မှူးကြီး ခွန်ဥက္ကာက “အခု မွန်ပြည်သစ်ပါတီလည်းပဲ သူတို့ အဖွဲ့ခေါင်းဆောင် တာဝန်ယူပြီး ဦးဆောင်နေတာ ၂ နှစ်ရှိသွားပြီ၊ အဲဒီမှာ PPST အတွင်း ဝန်ထုပ်ဝန်ပိုးတွေပေါ့ဗျာ၊ တစ်ဖွဲ့တစ်ဖွဲ့ထဲမှာတင် ၃၊ ၄ ခု ကွဲတာတို့ ပြဿနာပေါ်တာတို့ နောက်ပိုင်းမှာ ကြေညာချက်တွေ ထုတ်လို့ရှိရင် တစ်ဖက်က ဆွေးနွေးဖက်ပေါ့ နေပြည်တော် အဖွဲ့တွေကို သွားပြီးတော့ ထိပါးတာတွေ ဖြစ်တော့ အဖွဲ့ခေါင်းဆောင်အနေနဲ့ တာဝန်ယူ တာဝန်ခံရတာ နည်း နည်း ခက်လာတဲ့ သဘောလို့ ယူဆပါတယ်၊ ဒါကြောင့် သူတို့အနေနဲ့လည်း တတ်နိုင်သလောက် ပူးပေါင်းပါဝင်မှာ သို့သော် အပေါင်းလက္ခဏာ အဖွဲ့ထဲမှာဆိုရင် သူသက်သာမလားပေါ့ဗျာ၊ တာဝန်ယူမှု၊ တာဝန်ခံမှု ပိုပြီးတော့ ပေါ့မ လားလို့ တွက်တာနဲ့ တူပါတယ်ဗျ၊ အလုပ်ကတော့ တွဲလုပ်မှာပါ၊ ကြည့်ရတာ ဒါပေမဲ့ တာဝန်ယူမှု၊ တာဝန်ခံမှု ရာခိုင်နှုန်းပြည့် ယူတဲ့ အဆင့်ကို လျှော့ချမယ့် သဘောမျိုးလို့ မြင်ရပါတယ်” ဟု ပြောသည်။

PPST အစည်းအဝေး တစ်ရပ်ကိုတွေ့ရစဉ်

အဆိုပါ ကိစ္စနှင့် ပတ်သက်ပြီး PPST အဖွဲ့အတွင်း ဆွေးနွေးမှု မပြုလုပ်ရသေးကြောင်း၊ နုတ်ထွက်စာ တင်ထား သော်လည်း PPST နှင့် ပူးပေါင်းဆောင်ရွက်မှု အချို့ ရှိနေမည်ဖြစ်ကြောင်း ၎င်းက ပြောသည်။

လက်ရှိတွင် မွန်ပြည်သစ်ပါတီ(NMSP)သည် PPST ၏ ဦးဆောင်မှုကော်မတီ အဖွဲ့ခေါင်းဆောင်အဖြစ် တာဝန်ယူ ထားသူ ဖြစ်၍ တာဝန်ယူမှု တာဝန်ခံမှု ပိုမိုယူရသည်။

နုတ်ထွက်စာ တင်ရသည့် ကိစ္စနှင့် ပတ်သက်ပြီး သိရှိနိုင်ရေး မွန်ပြည်သစ်ပါတီမှ တာဝန်ရှိပုဂ္ဂိုလ်များထံ ဖုန်း ဆက်သွယ်ခဲ့‌သော်လည်း ဆက်သွယ်၍ မရသေးပေ။

NMSP သည် PPST ကနေ နုတ်ထွက်ကြောင်း စာတင်ထား သည်ကိုတော့ မကြားရသေးကြောင်း၊ သို့သော် ဆွေးနွေးဘက် အဖွဲ့ဝင်အသစ်များ ထပ်တိုးမလာပါက ဆွေးနွေး ညှိနှိုင်းမှုများကို ယာယီရပ်ဆိုင်းထားမည်ဟု အသိပေးမှု ရှိထားကြောင်း မွန်ပြည်သစ်ပါတီ(NMSP)နှင့် နီးစပ်သူများက CNI သတင်းဌာနသို့ ပြောသည်။

PPST အဖွဲ့ဝင်များ နုတ်ထွက်မှုသည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) နှင့် ငြိမ်းချမ်းရေး လုပ်ငန်းစဉ်ကို ထိခိုက်စေကြောင်း ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

တပ်မတော်၏ ငြိမ်းချမ်းရေးဆွေးနွေးဖက်များနဲ့ PPST အဖွဲ့၀င်များ  တွေ့ဆုံစဉ်

၎င်းက “ဟုတ်ပါတယ်၊ အဲဒါလည်း ကြားပါတယ်၊ ဒါကြောင့် အဖွဲ့ဝင်အသစ်တွေ ပါဖို့အတွက် ပူးပေါင်းဆောင်ရွက် မယ့် နေရာမှာ နည်းနည်းလေး နိုင်ငံရေးအရပေါ့ဗျာ ဖိအားပေးတဲ့ သဘောမျိုးလားတော့ မသိဘူးဗျ၊ ကျနော်တို့ PPST ကတော့ အပေါင်းလက္ခဏာနဲ့ပဲ နေတော့မယ်ဆိုပြီး ဒါပေမဲ့ ပြန်စဉ်းစားခိုင်းမှာပေါ့ဗျာ၊ ဒီလိုတော့ အဖွဲ့ အစည်းတွေက တစ်ဖွဲ့ပြီးတစ်ဖွဲ့ သက်သာသလို နေမယ်ဆိုရင်တော့ ကျနော်တို့ NCA တန်ဖိုးနဲ့ ကျနော်တို့ရဲ့ ငြိမ်းချမ်းရေး လုပ်ငန်းစဉ်ကိုတော့ အများကြီး ထိခိုက်နိုင်ပါတယ်” ဟု ပြောသည်။

PPST ကို NCA လက်မှတ်ရေးထိုးထားသည့် ရှမ်းပြည်ပြန်လည်ထူထောင်ရေးကောင်စီ(RCSS)၊ ကရင်အမျိုးသား အစည်းအရုံး(KNU)၊ ပအိုဝ်း အမျိုးသား လွတ်မြောက်ရေးအဖွဲ့ချုပ်(PNLO)၊ ဒီမိုကရေစီအကျိုးပြု ကရင်တပ်မတော် (DKBA)၊ ကရင်အမျိုးသား အစည်းအရုံး/ ကရင်အမျိုးသား လွတ်မြောက်ရေးတပ်မတော် (KNU/KNLA-PC)၊ ချင်း အမျိုးသားတပ်ဦး (CNF)၊ ရခိုင်ပြည်လွတ်မြောက်ရေးပါတီ (ALP)၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး (ABSDF)၊ မွန်ပြည်သစ်ပါတီ(NMSP)၊ လားဟူဒီမိုကရက်တစ် အစည်းအရုံး(LDU)တို့ဖြင့် ဖွဲ့စည်းထားသည်။

သို့သော်လည်း ၂၀၂၁ ခုနှစ်၊ ဖေဖော်ဝါရီ ၁ ရက်နေ့နောက်ပိုင်း ပြောင်းလဲခဲ့သည့် နိုင်ငံရေး အခင်းအကျင်းကြောင်း KNU၊ RCSS၊ CNF၊ တို့မှာ PPST အဖွဲ့ဝင်အဖြစ်မှ နုတ်ထွက်ထားကြသလို ABSDF ကလည်း ပူးပေါင်းဆောင်ရွက်မှု လျှော့ချထားသည်။