CNI News

၂၀၂၃ ခုနှစ်၊ ဇူလိုင် ၁၄

မြန်မာနိုင်ငံက ပြည်သူလူထုများအနေဖြင့် ဒီမိုကရေစီစနစ်ကို လက်ခံကျင့်သုံးရန် အသင့်ဖြစ်နေသလား ဆိုသည့် အပေါ် နိုင်ငံရေးအသိုင်းအဝိုင်းနှင့် နိုင်ငံတကာ သံတမန်များကြား သုံးသပ် ဆွေးနွေးမှုများ ရှိနေသည်။

မြန်မာနိုင်ငံမှာ ဒီမိုကရေစီစနစ်ကို စတင်ကျင့်သုံးခဲ့သည်မှာ နှစ်အနည်းငယ်သာ ရှိသေးကြောင်း၊ ဒီမိုက‌ရေစီ၏ စံချိန်စံနှုန်းများကို သိရှိလိုက်နာရန် လိုအပ်သေးကြောင်း နိုင်ငံရေးသမားအချို့က ထောက်ပြသည်။

ပြည်သူလူထုများအနေဖြင့် ဒီမိုကရေစီ၏ စည်းမျဉ်း/ စည်းကမ်းများကို သိရှိနိုင်ရန် နိုင်ငံရးသမားများတွင် ပို၍ တာဝန်ရှိကြောင်း မြန်မာ့နိုင်ငံရေးလေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်

၎င်းက “နိုင်ငံ‌ရေးစနစ်တစ်ခု အထူးသဖြင့် အခြေခံဥပဒေပေါ့နော်၊ အခြေခံဥပဒေတစ်ခုကို ဘယ်လိုပုံစံနဲ့ အပြစ် အနာဆာ ချို့ယွင်းချက်နည်းတယ်၊ ဆိုလိုတာတော့ဗျာ၊ နောင်မှာ ကွဲထွက်သွားနိုင်တဲ့ အလားအလာ ပိုများသလား။ ကွဲထွက်မှုထက် စည်းလုံးညီညွတ်မှုကို ပိုအားပြုသလား ဘယ်လိုပုံစံနဲ့ ဖြစ်သင့်သလဲ။ နောက်တစ်ခါ ပါဝင်တဲ့ ယူနစ်တွေရဲ့ ကိုယ်ပိုင်အုပ်ချုပ်ခွင့်နဲ့ ကိုယ်ပိုင်ရွေးချယ်ခွင့်ပေါ့နော်၊ သူ့အစိုးရကို ရွေးချယ်ခွင့် စတဲ့ဟာတွေကို ဘယ်လောက် အတိုင်းအတာအထိ ပေးမလဲ၊ ဆိုတဲ့ဟာတွေက နိုင်ငံရေးကို နားလည်တဲ့ ကျွမ်းကျင်တဲ့ ပုဂ္ဂိုလ်များနဲ့ နိုင်ငံ‌ရေးပါတီတွေပေါ့ သူတို့ကပဲ ဆုံးဖြတ်ကြတာ များပါတယ်။ ဆုံးဖြတ်ကြတာများတော့ အဲဒီဆုံးဖြတ်တဲ့ပါတီ အဲဒီဆုံးဖြတ်တဲ့ အဖွဲ့အစည်းကို ပြည်သူလူထုက ဘယ်လောက် ယုံကြည်သလဲဆိုတဲ့ပေါ်မှာ တည်တယ်၊ ပြောချင် တာက တကယ်တမ်းကြတော့ အများစုပြည်သူလူထုက ဒီအခြေခံဥပဒေဆိုတာတွေရဲ့ အလုပ်လုပ်ပုံနဲ့ အကျိုး သက်ရောက်မှုတွေကို သိပ်ပြီး ရှင်းရှင်းလင်းလင်း နားလည်တာ မရှိပါဘူး။ နားမလည်ပါဘူး။ သူတို့ ယုံကြည်တဲ့ နိုင်ငံရေးပါတီ တစ်ခုခုက ထောက်ခံတယ်၊ ဦးဆောင်ပြီးတော့ တင်ပြတယ်ဆိုရင် ပြည်သူလူထုကလည်း ထောက်ခံ လိုက်တာပေါ့၊ ဒါကြောင့်မို့လို့ နိုင်ငံရေးသမားတွေက ပိုပြီးတာဝန်ရှိပါတယ်လို့ ပြောချင်ပါတယ်” ဟု ပြောသည်။

မြန်မာနိုင်ငံတွင် ၂၀၁၀ ပြည့်နှစ်မှ စတင်ကာ ဒီမိုကရေစီစနစ်ကို ကျင့်သုံးခဲ့ကြောင်း၊ ထို့နောက် ၂၀၂၁ ခုနှစ်တွင် မြန်မာ့တပ်မ‌တော်က အာဏာရယူခဲ့ခြင်းကြောင့် ဒီမိုကရေစီ ဆိတ်သုန်းခဲ့ကြောင်း ထောက်ပြမှုများ ရှိသည်။

သို့သော် ဗိုလ်ချုပ်မှူးကြီးမင်းအောင်လှိုင်က ဒီမိုကရေစီကို အကောင်အထည်ဖော် ဆောင်ရွက်နေသလို ပါတီစုံဒီမိုကရေစီစနစ်ကို ကျင့်သုံးနေကြောင်း မကြာခဏ ထုတ်ဖော်ပြောကြားလျက်ရှိသည်။

ပြည်သူလူထုအများစုသည် ဒီမိုကရေစီ၏ လိုက်နာရမည့် စည်းမျဉ်းများကို မသိရှိသေးကြောင်း လီဆူအမျိုးသား ဖွံ့ဖြိုးတိုးတက်‌ရေးပါတီ (ဒူးလေးပါတီ)မှ ဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။

ရွေးကောက်ပွဲ မဲထည့်နေစဉ်

၎င်းက “အဲဒါတော့ နားမလည်သေးဘူး ကျနော်တို့ လူထုတွေက အဲဒါတော့ ကျနော်ပြောရဲတယ်၊ ဘာလို့ဆို လူထု တွေက ဒီမိုကရေစီမှာလည်း သူ့စည်းကမ်းနဲ့ သူ့စည်းနဲ့ ရှိတယ်လေ၊ ဒီမိုကရေစီဆိုတာ အကုန်လုံး လွတ်လပ်သွား ပြီလို့ မရဘူးလေ၊ ကိုယ့်ကြောင့် သူများဒုက္ခရောက်မယ့်ဟာတွေ၊ ကိုယ့်ကြောင့် သူများ အနှောင့်အယှက် ဖြစ်သွား မယ့်ဟာတွေ ဒါက ငါလုပ်ပိုင်ခွင့် ရှိတာပဲ၊ ပြည်သူတစ်ဦးချင်း ငါတို့ဒီမိုကရေစီ အခွင့်အရေးပဲ လူထုကတော့ အဲလောက်ထိ နားမလည်သေးဘူး။ ကျနော်တို့ နိုင်ငံလူထုက ဒီမိုကရေစီကလည်း ရှင်းရှင်းပြောရရင် နုတယ်လို့ ပြောရမှာပေါ့။ နုနေသေးတော့ နေရာတကာမှာ အခုမှ ဖြစ်သေးတော့ အကုန်လုံး လုပ်လို့ရတယ်၊ သူ့စည်းတွေ မရှိဘူးလို့ ထင်တဲ့သူတွေကလည်း အများကြီး ကျန်သေးတယ်လေ” ဟု ပြောသည်။

၂၀၀၈ ဖွဲ့စည်းပုံအခြေခံဥပဒေတွင် ပါတီစုံဒီမိုကရေစီစနစ်ကို အခြေခံသည့်အချက် ထည့်သွင်းထားသည်ကို တွေ့ရသည်။ 

ရွေးကောက်ခံ ကိုယ်စားလှယ်များဖြင့် လွှတ်တော်အသီးသီးကို ဖွဲ့စည်းကာ အုပ်ချုပ်ရေးအာဏာကို ကျင့်သုံးပိုင်ခွင့် ရှိသည်ကိုလည်း တွေ့ရသည်။

မြန်မာနိုင်ငံတွင် ပါတီစုံဒီမိုကရေစီစနစ်အရ ၂၀၁၀ ပြည့်နှစ် အထွေထွေရွေးကောက်ပွဲ၊ ၂၀၁၂ ကြားဖြတ်ရွေး ကောက်ပွဲ၊ ၂၀၁၅ အထွေထွေရွေးကောက်ပွဲ၊ ၂၀၁၇ ကြားဖြတ်ရွေးကောက်ပွဲ၊ ၂၀၂၀ ပြည့်နှစ် အထွေထွေ ရွေးကောက်ပွဲ စသဖြင့် ဖြတ်သန်းခဲ့သည်။

CNI News
၂၀၂၃ ခုနှစ်၊ ဇူလိုင် ၁၃

အကြမ်းဖက် ဖြစ်စဉ်များလျော့သွားသော်လည်း ဆက်လက်ဖြစ်ပွားလျက်ရှိသည်ကို တွေ့ရှိရသလို တည်ငြိမ် အေးချမ်းရေးနှင့် တရားဥပဒေစိုးမိုးရေး အပြည့်အဝ ဆောင်ရွက်နိုင်ရေးအတွက် လိုအပ်ချက်များရှိနေသေးကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

ပြည်ထောင်စုအစိုးရအဖွဲ့ အစည်းအဝေးကို ဇူလိုင် ၁၃ ရက်နေ့က ကျင်းပခဲ့ပြီး ၎င်းက အထက်ပါအတိုင်း ပြောကြားခဲ့ခြင်း ဖြစ်သည်။

တရားဥပဒေစိုးမိုးရေးနှင့် တည်ငြိမ်အေးချမ်းရေးအတွက် ဆောင်ရွက်ရမည်ဖြစ်ကြောင်း၊ ၂၀၂၁ ခုနှစ်မှ ၂၀၂၂ ခုနှစ်အတွင်း အကြမ်းဖက်မှု ဖြစ်စဉ်များကြောင့် အပြစ်မဲ့ပြည်သူ၊ နိုင်ငံ့ဝန်ထမ်းနှင့် သာသနာ့နွယ်ဝင်များစွာ ထိခိုက် သေဆုံးမှုများရှိခဲ့ကြောင်း၊ ထို့ကြောင့် အရေးပေါ် အခြေအနေနှင့်ပတ်သက်၍ ဆက်လက် ဆောင်ရွက် ရန် လိုအပ်နေသေးသဖြင့် အရေးပေါ်ကလာကို တိုးမြှင့် ဆောင်ရွက်ရန် ရှင်းလင်းပြောကြားခဲ့ပြီး ဖြစ်ကြောင်း နစကဥက္ကဋ္ဌက ပြောသည်။

ဗိုလ်ချုပ်မှူးကြီးမင်းအောင်လှိုင်က “ ယခုနှစ်အတွင်း ဇူလိုင် ၁၁ ရက်အထိ အကြမ်းဖက် ဖောက်ခွဲဖျက်စီးမှု ၄၈၉ ကြိမ်ဖြစ်ပွားခဲ့ပြီး သေဆုံးသူ ၇၈၂ ဦးရှိခဲ့ကြောင်း၊ အကြမ်းဖက် ဖြစ်စဉ်များလျော့သွားသော်လည်း ဆက်လက် ဖြစ်ပွားလျက်ရှိသည်ကို တွေ့ရှိရကြောင်း၊ လုံခြုံရေး၊ တည်ငြိမ်အေးချမ်းရေးနှင့် တရားဥပဒေစိုးမိုးရေးနှင့်ပတ် သက်၍ အပြည့်အဝ ဆောင်ရွက်နိုင်ရေး အလေးထား ဆောင်ရွက်သွားမည်ဆိုသည့် အချက်တွင် အကောင် အထည်ဖော်နိုင်ရန်အတွက် လိုအပ်ချက်များ ရှိနေသေးသည်ကို တွေ့ရှိရတယ်”ဟု ပြောသည်။

ပြည်ထဲရေးဝန်ကြီး ဒုတိယဗိုလ်ချုပ်ကြီးစိုးထွဋ်ကို ဆွေးနွေးနေစဉ်

ထို့နောက် အကြမ်းဖက်မှု ဖြစ်စဉ်များတွင် အဆိုးဆုံးမှာ စစ်ကိုင်းတိုင်းဒေသကြီး၊ ချင်းပြည်နယ်နှင့် ကယားပြည်နယ် တို့ဖြစ်ကြောင်း၊ ထို့ကြောင့် မိမိတို့အနေဖြင့် ပြည်သူ့လုံခြုံရေးအတွက် ယခုထက် ပိုမို ဆောင်ရွက်ကြရန်လိုအပ်ကြောင်း ၎င်းက ပြောသည်။

နစကအနေဖြင့် နိုင်ငံတော် တာဝန်ထမ်းဆောင်မှု ၂ နှစ်ပြည့်ပြီးနောက်ပိုင်း အရေးပေါ် သက်တမ်းကာလ ၆ လ တိုးပြီးသည့်အချိန်တွင် ရှေ့လုပ်ငန်းစဉ် (၅)ရပ် ပြင်ဆင်ချမှတ် ဆောင်ရွက်ခဲ့ပြီး ၎င်းတို့သည် နိုင်ငံ၏ အဓိက ဆောင်ရွက်ရမည့် အရေးကြီးလုပ်ငန်းများဖြစ်ကြောင်း၊ အဆိုပါ ရှေ့လုပ်ငန်းစဉ်များကို အစိုးရအဖွဲ့မှ အကောင် အထည် ဖော်ဆောင်ရွက်ရခြင်း ဖြစ်ကြောင်း နစကဥက္ကဋ္ဌက ပြောသည်။

ထိုရှေ့လုပ်ငန်းစဉ်တွင် အရေးကြီးဆုံးအချက်မှာ ပြည်သူတို့၏ လူမှုစီးပွားဘဝ လုံခြုံရေးအတွက် ပြည်ထောင်စု တစ်ဝန်းလုံး တည်ငြိမ်အေးချမ်းရေးနှင့် တရားဥပဒေစိုးမိုးရေး အပြည့်အဝ ရရှိစေရန် အလေးထား လုပ်ဆောင် မည်ဟူသည့် အချက်ဖြစ်ကြောင်း ၎င်းက ပြောသည်။

ဗိုလ်ချုပ်မှူးကြီးမင်းအောင်လှိုင်က “ရှေ့လုပ်ငန်းစဉ်များအနက် နောက်ဆုံးအချက်သည် အရေးပေါ် ကာလဆိုင် ရာ ပြဋ္ဌာန်းချက်များနှင့်အညီ ဆောင်ရွက်ပြီးစီးပါက ဖွဲ့စည်းပုံအခြေခံဥပဒေ(၂၀၀၈ ခုနှစ်)နှင့်အညီ လွတ်လပ်ပြီး တရားမျှတသော ပါတီစုံဒီမိုကရေစီ အထွေထွေရွေးကောက်ပွဲအား ပြန်လည်ကျင်းပ၍ အနိုင်ရသည့် ပါတီအား ဒီမိုကရေစီစံနှုန်းများနှင့်အညီ နိုင်ငံတော်တာဝန်အား လွှဲအပ်နိုင်ရေး ဆက်လက် ဆောင်ရွက်သွားမည်ဟူသည့် အချက်ဖြစ်ကြောင်း၊ ထိုသို့ ဆောင်ရွက်နိုင်ရန်အတွက် ပထမဆုံးအချက်ကို အလေးထား အကောင်အထည်ဖော် ဆောင်ရွက်သွားရမည်”ဟု ပြောသည်။

မိမိတို့အနေဖြင့် နိုင်ငံ့ဝင်ငွေမရှိဘဲ နိုင်ငံတည်ဆောက်ရေးလုပ်ငန်း၊ နိုင်ငံဖွံ့ဖြိုးရေးလုပ်ငန်း၊ နိုင်ငံတည်ငြိမ်အေး ချမ်းရေးလုပ်ငန်းများကို ဆောင်ရွက်၍မရကြောင်း၊ စီးပွားရေးကောင်းမွန်ခြင်းမရှိပါက ရာဇဝတ်မှုများ ထူပြော လာမည်ဖြစ်ကြောင်း၊ အကြမ်းဖက်မှုဖြစ်စဉ်များ၌ အချို့ဖြစ်စဉ်များသည် ပြန်ပေးဆွဲ၍ ငွေကြေးတောင်းယူခြင်း များ ဖြစ်သည်ကို စိစစ်ဖော်ထုတ်တွေ့ရှိရကြောင်း၊ အချို့သော အကြမ်းဖက်မှုများတွင် မိသားစုများပါ ပါဝင်နေ သည်ကို တွေ့ရှိရကြောင်း ၎င်းက ပြောသည်။

နစကသည် သာမန်အခြေအနေ မဟုတ်သည့်အတွက် ၂၀၂၃ ခုနှစ်၊ ဇန်နဝါရီ ၃၁ ရက်နေ့က အမျိုးသားကာ ကွယ်ရေးနှင့်လုံခြုံရေးကောင်စီ အစည်းအဝေး ကျင်းပခဲ့ပြီး ပုဒ်မ ၄၂၅ အရ အရေးပေါ်ကာလ သက်တမ်း ၆ လ တိုးထားသည်။

၂၀၂၃ ခုနှစ်၊ ဇန်နဝါရီ ၃၁ ရက်နေ့က အရေးပေါ်ကာလ သက်တမ်း ၆ လ တိုးထားသည်မှာ ဇူလိုင် ၃၁ ရက်နေ့ တွင် ပြည့်မည်ဖြစ်ကြောင်း၊ ထို့နောက် သြဂုတ် ၁ ရက်နေ့မှာ ကာ/လုံ အစည်းအဝေးခေါ်၍ နောက်ထပ် အရေး ပေါ်ကာလ သက်တမ်း ၆ လ တိုး မတိုးကို ဆွေးနွေး ဆုံးဖြတ်ရမည်ဖြစ်သည်။

ပုဒ်မ ၄၂၅ တွင် သာမန်အားဖြင့် တစ်ကြိမ်လျှင် ၆ လအထိ နှစ်ကြိမ် သက်တမ်းတိုးမြှင့်နိုင်သည်ဟု ပြဋ္ဌာန်းချက် ပါရှိ၍ ယခု အကြမ်းဖက်မှုများ ရှိနေသေးကြောင်း နစကဥက္ကဋ္ဌ ပြောနေသည့်စကားအရ နောက်ထပ် သက်တမ်း ၆ လ တိုးနိုင်ခြေရှိကြောင်း နိုင်ငံရေးသမားများက ပြောသည်။

CNI News

၂၀၂၃ ခုနှစ်၊ ဇူလိုင် ၁၃

ထိုင်းနိုင်ငံတွင် ဇူလိုင် ၁၂ ရက်နေ့မှ စတင်ကာ ထိုင်းဝန်ကြီးချုပ်ရာထူးအတွက် လူစုလူဝေးဖြင့် ထောက်ခံဆန္ဒပြမှု များ ပြုလုပ်နေကြသလို ထောက်ခံသူများ မျှော်မှန်းထားသည့် ရလဒ်မဖြစ်လာပါကလည်း ဆန္ဒပြပွဲများဖြစ်လာနိုင် ၍ ရွှေ့ပြောင်းမြန်မာနိုင်ငံသားများ ပါဝင်ခြင်း မပြုကြရန် ထိုင်းရှိ ရွှေ့ပြောင်းအလုပ်သမား အရေးကူညီဆောင်ရွက် ပေးနေသူများက သတိပေးသည်။

ဇူလိုင် ၁၃ ရက်နေ့တွင် ထိုင်းဝန်ကြီးချုပ် ရာထူးအတွက် ထိုင်းလွှတ်တော်မှာ မဲခွဲဆုံးဖြတ်ကြမည်ဖြစ်ပြီး မဲရလဒ် အခြေအနေအပေါ် မူတည်ကာ ဆန္ဒပြမှုများ၊ ဆူပူအုံကြွမှုများ ဖြစ်လာနိုင်ဖွယ်ရှိသည်ဟု ရွှေ့ပြောင်း အလုပ်သမား အရေးကူညီဆောင်ရွက်ပေးနေသူများက သုံးသပ်ကြသည်။

ထို့ကြောင့် မြန်မာနိုင်ငံသား ရွှေ့ပြောင်းလုပ်သားများအနေဖြင့် ထိုင်းနိုင်ငံရေးတွင် မည်သည့်အကြောင်းနှင့်မျှ ဝင်ရောက် ပါဝင်ပတ်သက်ခြင်း၊ ပူးပေါင်းခြင်းများ မပြုလုပ်ကြရန်နှင့် ပါဝင်မိခဲ့ပါက ပြဿနာတစ်စုံတစ်ရာ ဖြစ်ပွားနိုင်ကြောင်း ရွှေ့ပြောင်း အလုပ်သမားအရေးကူညီဆောင်ရွက်ပေးနေသူများက CNI သတင်းဌာနသို့ ပြောသည်။

Labour Rights Foundation မှ ဦးအောင်ကျော်က “ဒါကတော့ လက်ရှိအခြေအနေမှာ သူ့နိုင်ငံရဲ့အရှုပ်အထွေး တွေကြားမှာ ကျနော်တို့ရွှေ့ပြောင်းအလုပ်သမားတွေအနေနဲ့ ဆင်ခြင်သုံးသပ်ပြီး သွားလာနေထိုင်ဖို့လိုအပ်တယ် လို့ ကျနော်အသိပေးချင်တယ်။ ဘာကြောင့်လဲဆိုတော့ ဒီအခြေအနေက ချောချောမွေ့မွေ့နဲ့ ဝန်ကြီးချုပ် ရာထူး ရွေးချယ်တင်မြှောက်တဲ့ကိစ္စ ပြီးသွားမှာလား၊ ဒါမှမဟုတ် ဝိုင်းဝန်းထိန်းသိမ်းညှိနှိုင်း အဖြေရှာပြီးမှ အောင်မြင်မှု ရလဒ်တွေ ရသွားမှာလား၊ ဒါမှမဟုတ် မလိုလားအပ်သော ဆူပူအုံကြွမှုတွေ ဆိုးဆိုးရွားရွား ဖြစ်ပေါ်လာမှာလား ဆိုတာ ဘယ်သူမှ အခုအချိန်မှာ တပ်အပ်ပြောလို့မရတဲ့ အနေအထားဖြစ်နေတယ်။ လုပ်သားတွေ တော်တော် များများကတော့ ပုံမှန်အတိုင်းဆို မနက်စောစော ၈ နာရီဆို လုပ်ငန်းခွင်ဝင်ကြရတယ်။ အဲဒီလို ပုံမှန် အလုပ်သွား အလုပ်ပြန်သူတွေအတွက်ကတော့ မိမိကိုင်ဆောင်ထားတဲ့ တရားဝင်စာရွက်စာတမ်းတွေ ကိုင်ဆောင်ပြီး သွားလာ နေမယ်။ လူစုလူဝေးတွေကြားမှာ ရောယှက်ပြီးမှ ပါဝင်စုဝေးတာမျိုး မဖြစ်ဘူးဆိုရင်တော့ အန္တရာယ်ဆိုတာ မရှိ လောက်ဘူး။ အဲဒီလိုမဟုတ်ဘဲနဲ့ ကိုယ်ကိုယ်တိုင် စိတ်အားတအားထက်သန်ပြီးမှ အလုပ်မလုပ်ဘဲနဲ့ ဝင်ရောက်ပြီး လူထုအုံကြွမှုမှာ ရောယှက်သွားမယ်ဆိုရင် အာဏာပိုင်တွေက ဝင်ရောက်ပြီးမှ စစ်ဆေးလိုက်တဲ့အခါမှာဆိုရင် ထိုင်းနိုင်ငံရေးမှာ ဝင်ရောက်ပါဝင်ပတ်သက်တယ်ဆိုပြီးမှ မလိုလားအပ်တဲ့ ဥပဒေပုဒ်မတွေနဲ့ အရေးယူခံရနိုင်တယ်” ဟု ပြောသည်။

ထိုင်းဝန်ကြီးချုပ်ရာထူးအတွက် လူစုလူဝေးဖြင့် ထောက်ခံဆန္ဒပြစဉ်(ဓါတ်ပုံ- Thai PBS)

ယနေ့ ဇူလိုင် ၁၃ ရက်နေ့တွင် ထိုင်းဝန်ကြီးချုပ်ရာထူးအတွက် မဲခွဲဆုံးဖြတ်ရွေးချယ်နေသော ထိုင်းလွှတ်တော်ရှေ့ တွင် လုံခြုံရေးအတားအဆီးများ ချမှတ်ထားသည်ကို ထိုင်းသတင်းများ၏ ဖော်ပြချက်အရ သိရသည်။

ဝန်ကြီးချုပ်အဖြစ်မဲခွဲမရွေးချယ်ခင်ကာလများကတည်းက Move Forward Party မှ ခေါင်းဆောင် ပီတာသည် လူထု စည်းရုံးမှုများအား အားသွန်ခွန်စိုက် ဆောင်ရွက်ခဲ့ခြင်းဖြစ်ပြီး ပီတာအား ထိုင်းဝန်ကြီးချုပ် ရာထူးအတွက် ပြည်သူ အများစု ထောက်ခံအားပေးကြသည်။

သို့သော် ပီတာအား မဲဆွယ်စည်းရုံးရေးကာလတွင် ဥပဒေပြင်ဆင်မည့်အချက်အား ထည့်သွင်းအသုံးပြုခဲ့ခြင်း၊ မီဒီယာကုမ္ပဏီတစ်ခု၏ ရှယ်ယာပိုင်ဆိုင်မှုများနှင့်ပက်သက်၍ ကန့်ကွက် သဘောမတူကြသူများလည်းရှိကာ  ဝန်ကြီးချုပ်အဖြစ် အဆုံးအဖြတ် မဲပေးပွဲ မတိုင်မီ ဇူလိုင် ၁၂ ရက်တွင် ဝန်ကြီးချုပ်ဖြစ်ရေး ရေပန်းစား နေသော ပီတာအား ဟန့်တားမည့် ၎င်းစွဲချက်နှစ်ခုလည်း ထွက်ပေါ်လာခဲ့သည်။ 

ဝန်ကြီးချုပ်ရာထူးအတွက် ပီတာ အရွေးခံခဲ့ရပါက ၎င်းအား ကန့်ကွက်သူများမှ လူထုစုဝေးမှုများ၊ ဆန္ဒပြမှုများ ရှိလာနိုင်သကဲ့သို့ ၎င်းဝန်ကြီးချုပ်ရာထူးအတွက် အရွေးချယ်မခံရပါက ပြည်သူအများစု၏ ဆန္ဒပြမှုများနှင့် ဆူပူ အုံကြွမှုများ ဖြစ်ပေါ်လာနိုင်ကြောင်း ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။

ဝန်ကြီးချုပ်ရွေးချယ်နေသည့် ထိုင်း လွှတ်တော်ရှေ့တွင် အတားအဆီးများ ချထားစဉ်(ဓါတ်ပုံ- Thai PBS)

“အခုက နည်းနည်းလေး အချိန်ကိုက်လုပ်နေတာတစ်ခုက မြန်မာအပါအဝင် နိုင်ငံခြားသား ရွှေ့ပြောင်း အလုပ်သမားတွေကို ထိုင်းနိုင်ငံထဲမှာ ယာယီအလုပ်သမားလက်မှတ်အသစ်တွေ လုပ်ပေးမယ်ဆိုတဲ့ သတင်းတွေ ထွက်ပေါ်နေတာပေါ့။ ဒါပေမယ့် ထိုင်းနိုင်ငံထဲမှာ ထိုင်းအလုပ်သမားဝန်ကြီးဌာနက အတည်ပြုပြီးတော့ ဘတ်ပန်းရောင်ကဒ်ခေါ် ယာယီအလုပ်သမားလက်မှတ်ကို ထုတ်ပေးမယ်လို့ အတည်ပြုစာ ထွက်မလာသေးဘူး။ အစည်းအဝေးဆုံးဖြတ်ချက်က သက်တမ်းတိုးပေးလို့မမီခဲ့တဲ့ ကျန်တဲ့ နိုင်ငံခြားသား ရွှေ့ပြောင်းအလုပ်သမား တွေကိုပဲ ၁၅ ရက်နေ့ကနေပြီးတော့ ၃၁ ရက်နေ့အထိ သက်တမ်းတိုးပေးမယ်လို့ အစည်းအဝေးဆုံးဖြတ်ချက်က အတည်ပြုထားတာရှိတယ်။ ဒီအပေါ်မှာ ဒီနေ့ ၁၃ ရက်နေ့ရဲ့ ထိုင်းဝန်ကြီးချုပ်ကို အတည်ပြုရွေးချယ် မဲခွဲမယ့် အချိန်နဲ့ ကိုက်ညီနေတာကို တွေ့ရတယ်။ အဲဒါက ဘာလဲဆိုတော့ လူစုလူဝေးကို အာရုံလွှဲလိုက်တာနဲ့တူတယ်” ဟု ပြောသည်။

အတိုက်အခံပါတီများအကြား လူထုစုဝေး ဆန္ဒပြမှုများပြုလုပ်ခဲ့ပါက မြန်မာအပါအဝင် နိုင်ငံခြားသား ရွှေ့ပြောင်း လုပ်သားများကိုပါ အသုံးချမည်အား စိုးရိမ်ကြောင်းနှင့် အဆိုပါအခြေအနေမျိုး ဖြစ်ပေါ်လာနိုင်ကြောင်းလည်း ရွှေ့ပြောင်းအလုပ်သမားအရေးကူညီဆောင်ရွက်ပေးနေသူများက သုံးသပ်ကြသည်။

ထို့ကြောင့် မြန်မာရွှေ့ပြောင်းလုပ်သားများအနေဖြင့် မိမိသွားလာသည့်နေရာများတွင် မိမိ၌ရှိသည့် အထောက် အထား၊ စာရွက်စာတမ်းအပြည့်အစုံများအား လက်ဝယ်ကိုင်ဆောင်ထားပြီးမှ သွားလာကြရန် ရွှေ့ပြောင်း အလုပ်သမားအရေးကူညီဆောင်ရွက်ပေးနေသူများက တိုက်တွန်းသည်။

CNI News

၂၀၂၃ ခုနှစ်၊ ဇူလိုင် ၁၃

မြန်မာနိုင်ငံအတွင်းမှာ ဖြစ်ပေါ်နေသည့် လက်နက်ကိုင်ပဋိပက္ခတွင် အကြမ်းဖက်မှုများပါ ရှိလာခြင်းကြောင့် ထိုအကြမ်းဖက်မှုများ ရပ်တန့်ရေး မည်ကဲ့သို့ လုပ်ဆောင်သင့်သလဲဆိုသည့်အပေါ် နိုင်ငံရေးအသိုင်းအဝိုင်းကြား သုံးသပ် ဆွေးနွေးနေကြသည်။

လက်ရှိ လက်နက်ကိုင်ပဋိပက္ခမှာ နိုင်ငံတစ်ဝှမ်း ကျယ်ကျယ်ပြန့်ပြန့် ဖြစ်ပေါ်လာပြီး အရပ်သားသေဆုံးမှု၊ နေအိမ် မီးလောင် ပျက်စီးမှု၊ နေရပ်စွန့်ခွာ ထွက်ပြေးတိမ်းရှောင်မှုများ ဖြစ်ပေါ်လျက်ရှိနေသည်။

၂၀၂၁ ခုနှစ်နောက်ပိုင်း တိုက်ပွဲများ ပြင်းထန်လာသလို ပြည်သူလူထုမှာလည်း အခက်အခဲ ပေါင်းစုံဖြင့် ရင်ဆိုင်နေ ရကြောင်း၊ ထို့ကြောင့် နိုင်ငံရေးအင်အားစုများနှင့် လက်နက်ကိုင် အဖွဲ့အစည်းများအနေဖြင့် ပြည်သူများကို ထောက်ရှု၍ ဖြေရှင်းသင့်ကြောင်း ရခိုင်နိုင်ငံရေးသမား ဦးထွန်းအောင်ကျော်က CNI သတင်းဌာနသို့ ပြောသည်။

 နေအိမ်များ မီးလောင်နေစဉ်

ဦးထွန်းအောင်ကျော်က “အဓိက-ကတော့ ပြဿနာတစ်ခုဆိုတာက နှစ်ဦးနှစ်ဖက်အပေါ်မှာ ဘယ်လောက်စိတ်ကောင်း၊ စေတနာကောင်းနဲ့ ဒီအပေါ်မှာ နှစ်ဖက်စလုံးက ဘယ်လောက်အထိ စိတ်ကောင်း စေတနာကောင်း ထားနိုင်သလဲဆိုတဲ့အပေါ်မှာ အဓိက မူတည်တယ်လို့ ကျနော်အနေနဲ့ ဒီလိုမြင်ပါတယ်။ ကျနော်တို့ မြန်မာနိုင်ငံမှာ လက်နက်ကိုင်ပြီး ဖြေရှင်းလာကြတာက ၁၉၄၈ လွတ်လပ်ရေးနဲ့အတူ ပေါက်ဖွားလာတဲ့ ပဋိပက္ခပါပဲ၊ အဲဒီတော့ နှစ်ပေါင်းလည်း ၇၀ ကျော်ပါပြီ။ ဒီနည်းနဲ့ ဖြေရှင်းလို့ မရဘူးဆိုတာလည်း ကာယကံရှင်တွေ ကိုယ်တိုင်က ကောင်းကောင်းကြီး နားလည် သဘောပေါက်တယ်လို့ ကျနော်တို့ နားလည်ပါတယ်။ အဲဒီတော့ ပြည်သူလူထုလည်း ဖွတ်ဖွတ်ညက်ညက် ကြေနေကြပြီ၊ အခု ဒီ ၂၀၂၁ နောက်ပိုင်းမှာလည်း တိုက်ပွဲတွေ အင်မတန် ပြင်းထန်ပြီးတော့မှ မည်သည့်ခေတ်နဲ့မှ မတူအောင် အပြင်းထန်ဆုံးနဲ့ အနာကျင်ဆုံး ဝေဒနာကို ခံစားနေရတယ်၊ ပျက်စီးဆုံးရှုံးမှုတွေ ကြုံတွေ့နေရတယ်၊ အဲဒီတော့ ဒီနေ့ တာဝန်ရှိတဲ့ Stakeholders (သက်ဆိုင်သူများ) နိုင်ငံရေးအင်အားစုတွေနဲ့ လက်နက်ကိုင် အင်အားစုတွေ အားလုံးက ပြည်သူလူထုရဲ့ မျက်နှာကို ထောက်ရှုပြီးတော့မှ အကောင်းဆုံးဖြေရှင်း ဖို့ အချိန်တောင် လွန်နေပြီ၊ အရေးတကြီး လိုအပ်နေပြီ” ဟု ပြောသည်။

ပြီးခဲ့သည့် ၂၀၂၂ ခုနှစ်၊ ဒီဇင်ဘာလ ၂၁ ရက်နေ့က ကုလသမဂ္ဂ လုံခြုံရေးကောင်စီ၏ မြန်မာ့အရေး ဆုံးဖြတ်ချက် တွင် မြန်မာနိုင်ငံမှာ အကြမ်းဖက်မှုများ ရပ်ဆိုင်းရေးဆိုသော အချက်ကို ထည့်သွင်းထားသည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့ နောက်ပိုင်းတွင် စတင်ကာ နှစ်နှစ်ကျော်ကာလအတွင်း နှစ်ဖက်အဖွဲ့အစည်း၏ လက်နက်ကိုင်ပဋိပက္ခအတွင်း အရပ်သား သေဆုံးမှု ၈၆၀၀ ကျော်ရှိခဲ့ကြောင်း ISP Myanmar က ထုတ်ပြန်ထားသည်။

အကြမ်းဖက်မှုနှင့် ပတ်သက်၍ ဥပဒေများ ရှိပြီးဖြစ်ကြောင်း၊ ထိုဥပဒေအတိုင်း ကိုင်တွယ်မည်ဆိုပါက အကြမ်းဖက်မှုများ လျော့ကျသွားရန် လုပ်ဆောင်၍ရကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက ပြောသည်။

ထန်တလန်မြို့ပျက်ကိုတွေ့ရစဉ်

၎င်းက “အကြမ်းဖက်မှုနဲ့ ပတ်သက်လို့ ဥပဒေတွေ ရှိပြီးသားဖြစ်တယ်၊ နောက်တစ်ခါကြတော့ အကြမ်းဖက်မှုနဲ့ ပတ်သက်လို့ ဘယ်လိုကိုင်တွယ်ရမယ်ဆိုတဲ့ ကိုင်တွယ်တဲ့ နည်းလမ်းတွေ ရှိတယ်။ အဲဒီ ပုံစံတွေအတိုင်း စနစ် တကျ သွားမယ်ဆိုရင်‌တော့ အကြမ်းဖက်မှု လျော့ကျသွားအောင် လုပ်လို့ ရမှာပေါ့။ အခုလောလောဆယ်မှာက နစကအနေနဲ့ တော်တော်လေး ညင်ညင်သာသာနဲ့ ပျော့ပျော့ပြောင်းပြောင်း ကိုင်တွယ်နေတဲ့ အခါကြတော့ ဒီအကြမ်းဖက်မှုနဲ့ ပတ်သက်လို့ အမြစ်ပြတ်ဖို့က နည်းနည်း အရှိန်မြင့်ပြီး မသွားနိုင်တဲ့ ပုံစံမျိုးတွေ ကျနော်တို့ သုံးသပ်လို့ရတယ်။ ဆိုလိုတာက အကြမ်းဖက်မှုလို့ သတ်မှတ်ပြီးတဲ့အခါမှာ အဲဒီအကြမ်းဖက်မှုနဲ့ ဆက်နွယ်နေတဲ့ ငွေကြေးထောက်ပံ့တာရှိမယ်၊ လူထောက်ပံ့တာရှိမယ်၊ ဒါမျိုးပေါ့နော်၊ အဲဒါမျိုး အကြမ်းဖက်မှုကို အားပေးနေတဲ့ ထောက်ပံ့ပေးနေတဲ့ဟာတွေ အကုန်လုံး ဖြတ်တောက်နိုင်ဖို့ လိုတယ်၊ အကြမ်းဖက်မှုနဲ့ ပတ်သက်တဲ့ လူတွေကို လည်း တရားဥပဒေအတိုင်း ကျနော်တို့က တရားစွဲတင်ပြီးတော့ အပြစ်ပေးနိုင်ဖို့လိုသလို တိတိကျကျ ဥပဒေ အတိုင်း လုပ်နိုင်ဖို့လည်း လိုတယ်၊ အဲဒီအဓိက အချက်တွေကို လိုက်နာဆောင်ရွက်နိုင်မယ်ဆိုရင်တော့ အကြမ်း ဖက်မှုနဲ့ ပတ်သက်ပြီး ကျနော်တို့က နိုင်နိုင်နင်းနင်း ကိုင်တွယ်ထိန်းချုပ်နိုင်ဖို့ လွယ်သွားမယ်” ဟု ပြောသည်။

၂၀၂၃ ခုနှစ်၊ ပထမ ၅ လတာအတွင်း အရပ်သား ၇၄၀ ကျော် သေဆုံးခဲ့ကြောင်း၊ အဆိုပါ ပမာဏမှာ ၂၀၂၁ ခုနှစ် ဖေဖော်ဝါရီ ၁ ရက်နောက်ပိုင်း အများဆုံး ဖြစ်ကြောင်း ISP Myanmar ၏ ထုတ်ပြန်ချက်အရ သိရသည်။ 

လက်ရှိ မြန်မာနိုင်ငံတွင် မြန်မာ့တပ်မတော်အား ဖြုတ်ချရေး NUG-PDF- EAOs များက လက်နက်ကိုင် တိုက်ခိုက် လျက်ရှိသလို မြန်မာ့တပ်မတော်ဘက်ကလည်း နိုင်ငံတည်ငြိမ်ရေးဟုဆိုကာ လက်နက်ကိုင် တိုက်ခိုက်မှုများကို ချေမှုန်းလျက်ရှိသည်။

အဆိုပါ လက်နက်ကိုင် ပဋိပက္ခအတွင်း လက်နက်မကိုင်သော အရပ်သားများ သတ်ဖြတ်ခံရမှုများ ရှိနေသလို ဖမ်းဆီး အနိုင်ကျင့်ခံနေရမှုများလည်း ခံနေကြရကြောင်း၊ နေအိမ်များ မီးရှို့ဖျက်ဆီးခံရမှုများလည်း ကြုံတွေ့ နေရကြောင်း သိရသည်။

CNI News

၂၀၂၃ ခုနှစ်၊ ဇူလိုင် ၁၂

ဖမ်းဆီးထိန်းသိမ်းခံထားရသော ဒေါ်အောင်ဆန်းစုကြည်က တွေ့ဆုံဆွေးနွေးမှုကို အားပေးသည်ဟု မိမိအား ပြောကြားခဲ့ကြောင်း ထိုင်းဒုတိယဝန်ကြီးချုပ်နှင့် နိုင်ငံခြားရေးဝန်ကြီး မစ္စတာဒွန်ပရာမွတ်ဝီနိုင်းက ပြောသည်ဟု ဘန်ကောက်ပို့စ်က ဖော်ပြခဲ့သည်။

ဝန်ကြီးဒွန်သည် မြန်မာနိုင်ငံကို ၂၀၂၃ ခုနှစ်၊ ဇူလိုင် ၉ ရက်နေ့က နေ့ချင်းပြည် လာရောက်ခဲ့ပြီး နေပြည်တော် အကျဉ်းထောင်မှာ ဒေါ်အောင်ဆန်းစုကြည်နှင့် တွေ့ဆုံခဲ့သည်။

ထို့နောက် ၂၀၂၃ ခုနှစ်၊ ဇူလိုင် ၁၁ ရက်နေ့တွင် အင်ဒိုနီးရှားနိုင်ငံ၊ ဂျာကာတာမြို့မှာ ကျင်းပနေသည့် အာဆီယံနိုင်ငံခြားရေးဝန်ကြီးများ အစည်းအဝေးသို့ တက်ရောက်ကာ ဒေါ်အောင်ဆန်းစုကြည်နှင့် တွေ့ဆုံခဲ့ကြောင်း အစည်းအဝေးမှာ ပြောကြားခဲ့သည်။

မစ္စတာ ဒွန်ပရာမွတ်ဝီနိုင်းက " သူမသည် ကျန်းမာရေးကောင်းမွန်ပါတယ်။ တိုင်းပြည်ရဲ့ အကျပ်အတည်းကို ဖြေရှင်းဖို့ တွေ့ဆုံဆွေးနွေးမှုကို အားပေးတယ်" ဟု ပြောသည်။

ဒေါ်အောင်ဆန်းစုကြည် ဦးဆောင်သည့် NLD အစိုးရက ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်းခဲ့သည်ဟုဆိုကာ မြန်မာ့တပ်မတော်က ၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် ဖြုတ်ချ၍ နိုင်ငံတော်အား အရေးပေါ် အခြေအနေ ကြေညာထားသည်။

ထို့နောက် ဒေါ်အောင်ဆန်းစုကြည်၊ သမ္မတဦးဝင်းမြင့် အပါအဝင် NLD ပါတီ ခေါင်းဆောင်များကို ဖမ်းဆီးထိန်းသိမ်းထားခဲ့သည်။

အဆိုပါ အခြေအနေတွင် NLD အမတ်များနှင့် ဒီမိုကရေစီအရေး တောင်းဆိုသူများက အမျိုးသားညီညွတ်ရေးအစိုးရ(NUG)နှင့် ပြည်သူ့ကာကွယ်ရေးတပ်ဖွဲ့(PDF)ကို ဖွဲ့စည်း၍ မြန်မာ့တပ်မတော် အား ပြန်လည် ဖြုတ်ချရေး လက်နက်ကိုင် တိုက်ခိုက်လျက်ရှိသည်။

ထိုလက်နက်ကိုင် တိုက်ပွဲများသည် မြန်မာနိုင်ငံ၏ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊  တနင်္လာရီတိုင်းဒေသကြီး၊ ကရင်ပြည်နယ်၊ ကယားပြည်နယ်၊ ချင်းပြည်နယ်၊ မွန်ပြည်နယ်တို့တွင် ဖြစ်ပွားလျက်ရှိသည်။

ထို့နောက် NUG နှင့် PDF က ၂၀၂၃ ခုနှစ်သည် တော်လှန်ရေး၏ အဆုံးအဖြတ်နှစ်ဖြစ်ကြောင်း၊ သွေးကြွေးမှာ ဆွေးနွေးစရာမရှိဟု ကြွေးကြော်ထားသည်။

ပြည်တွင်းရှိ နိုင်ငံရေးအသိုင်းအဝိုင်းကတော့ မြန်မာ့အကျပ်အတည်းကို တွေ့ဆုံ ဆွေးနွေးအဖြေရှာကြရန် တိုက်တွန်းလျက်ရှိသည်။

CNI News

၂၀၂၃ ခုနှစ်၊ ဇူလိုင် ၁၂

ထိုင်းဒုတိယဝန်ကြီးချုပ်နှင့် နိုင်ငံခြားရေးဝန်ကြီးဖြစ်သူ Mr. Don Pramudwinai နှင့်တွေ့ဆုံစဉ် ဒေါ်အောင်ဆန်းစု ကြည်၏ ပြောဆိုချက်များကို တော်လှန်ရေး အင်အားစုများက သဘောတွေ့မှာ မဟုတ်ကြောင်း ရခိုင့်ဦးဆောင် ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

ထိုင်းဒုတိယဝန်ကြီးချုပ် Mr. Don Pramudwinai သည် ဇူလိုင် ၉ ရက်က မြန်မာနိုင်ငံသို့ ရောက်ရှိလာပြီး နေပြည်တော် အကျဉ်းထောင်တွင် ဖမ်းဆီးထိန်းသိမ်း ခံထားရသော ဒေါ်အောင်ဆန်းစုကြည်နှင့် တွေ့ဆုံခွင့် ရရှိခဲ့သည်။

ထိုသို့ တွေ့ဆုံစဉ် ဒေါ်အောင်ဆန်းစုကြည်က မြန်မာက အကြမ်းဖက် အဖွဲ့အစည်းများအဖြစ် သတ်မှတ်ထားပြီး အနောက်နိုင်ငံများ၏ ထောက်ပံ့မှုဖြစ် ရပ်တည်နေသည့် အမျိုးသားညီညွတ်ရေးအစိုးရ (NUG)၊ ပြည်သူ့ကာကွယ် ရေးတပ် (PDF) ကို မိမိအနေဖြင့် အသိအမှတ်မပြုကြောင်း သဘောထားပေးခဲ့သည်ဟု ဂျပန်သတင်းဌာန Pan Orient News က ရေးသားဖော်ပြခဲ့သည်။

ဒေါက်တာအေးမောင်က “အဲဒီရပ်တည်ချက်မျိုးကို ပြောလာမှာ ကြိုသိနေတဲ့ အင်အားစုတွေကတော့ သူနဲ့ သံခင်း တမန်ခင်း တွေ့တာကို ဆန့်ကျင်ကြမှာပေ့ါ၊ ခုနလို့ လက်နက်ကိုင်ပဋိပက္ခကို ချုပ်ငြိမ်းအောင် တနည်းအားဖြင့် သွေးမြေကျမှု မရှိအောင် ဆိုတဲ့ဘက်ကို သူ့ဘက်က ရပ်တည်တယ်ဆိုရင် သွေးမြေကျအောင် လုပ်နေကြတဲ့ အင်အားစုတွေနဲ့ သူနဲ့ သံခင်းတမန်ခင်း တွေ့ခြင်းသည် အနုတ်လက္ခဏာ ဆောင်တာပေါ့၊ သူ့ရဲ့ထွက်ဆိုချက်၊ သူ့ရဲ့ ရပ်တည်ချက်သည် ပြောင်းပြန်သူတို့အတွက် ဖြစ်သွားမှာ စိုးရိမ်တဲ့သဘောလည်း ဖြစ်သွားနိုင်တာပေါ့၊ အဲဒီလိုမျိုး ဖြစ်ရင်တော့ ဒေါ်အောင်ဆန်းစုကြည်နဲ့ လက်ရှိအစိုးရ ဆွေး‌နွေးတာတို့ သံခင်းတမန်ခင်း ဆွေးနွေးတာတို့ကို တစ်ဖက်က ခုနလို နွေဦးတော်လှန်ရေးနဲ့ ပတ်သက်တဲ့ အင်အားစုတွေဘက်က သိပ်ပြီးတော့ သဘောတွေ့မှာ မဟုတ်ဘူးပေါ့” ဟု ပြောသည်။

ဒေါ်အောင်ဆန်းစုကြည်နဲ့ ထိုင်းဒုတိယ၀န်ကြီးချုပ် Mr. Don Pramudwinai ကို တွေ့ရစဉ်

ဒေါ်အောင်ဆန်းစုကြည်နှင့် တွေ့ဆုံခဲ့ကြောင်းကို အင်ဒိုနီးရှားနိုင်ငံ၊ ဂျကာတာမြို့တွင် ကျင်းပနေသော အာဆီယံ နိုင်ငံခြားရေးဝန်ကြီးများ အစည်းအဝေး၌ ထိုင်းဒုတိယဝန်ကြီးချုပ် Mr. Don Pramudwinai က ပြောကြားခဲ့သည်။

အဆိုပါ တွေ့ဆုံမှုသည် ၂၀၂၁ ခုနှစ်၊ ဖေဖော်ဝါရီ ၁ ရက်နေ့ မြန်မာ့တပ်မတော်က အာဏာယူပြီးနောက်ပိုင်း ဒေါ်အောင်ဆန်းစုကြည်နှင့် အဆင့်မြင့်သံတမန်တို့ တွေ့ဆုံခြင်း ဖြစ်ကြောင်းလည်း သိရသည်။

ဒေါက်တာအေးမောင်က “‌ဒေါ်အောင်ဆန်းစုကြည်ရဲ့ ရပ်တည်ချက်က ဒီအတိုင်းပဲ သွားမှာဗျ၊ သူတောက်လျှောက် ပေါ့ သူအသက် ၇၀ ကျော်ပြီလေ၊ တောက်လျှောက်လာတယ် ငြိမ်းချမ်းတဲ့နည်းနဲ့ အဲဒီတော့ အကြမ်းမဖက်တဲ့ နည်းနဲ့ သူရပ်မှ ဖြစ်မှာပေါ့၊ သူဘက်ကလေ ဘယ်သူတွေ ဘာပြောပြောပေါ့လေ၊ သူရဲ့ ရပ်တည်ချက်သည် အကြမ်းမဖက်တဲ့နည်းနဲ့ပဲ တောက်လျှောက် သူ့သမိုင်းကို သူရေးသွားမှာပေါ့၊ လက်ရှိ NUG၊ PDF တွေရဲ့ အနေအ ထားကို သူသိကောင်း သိမှာပေါ့၊ ဒါပေမဲ့လို့ သိတယ်လို့ ပြောချင်မှ ပြောမှာပေါ့၊ သိချင်လည်း သိမှာပဲ၊ ဒါပေမဲ့ ကျနော် ထင်သလောက်တော့ တာဝန်အရလည်း မြန်မာနိုင်ငံ တည်ငြိမ်အေးချမ်းဖို့အတွက် ကြီးကြီးမားမား ရှိတယ်လေ၊ မွေးကတည်းက ပါလာတဲ့ တာဝန်ပေါ့ဗျာ၊ အဲဒီတာဝန်ကို ဆက်ပြီးတော့ သူထမ်းသွားမှာလား အချင်းချင်း သွေးမြေကျတဲ့ အနေအထား ပိုပြီးမြင့်မားလာအောင် တွန်းပို့ပေးမှာလားဆိုတဲ့ မေးခွန်းကို မေးရင် ကျနော်ထင်တယ် သွေးမြေကျမှုရပ်အောင် သူ့ဘက်က ဆန္ဒက မွေးကတည်းက ပါလာနိုင်ပါတယ်၊ ဆိုတော့ အဲဒီသဘောအရ သွားမယ်ဆိုရင် လက်ရှိဖြစ်နေတဲ့ ပဋိပက္ခကို ပိုကြီးလာစေလိုတဲ့ အင်အားစုဖက်မှာတော့ သူရပ်တည်မှာ မဟုတ်ဘူး။ သမိုင်းအရ သူ့ကို သုံးသပ်တာပါ၊ ဒီဟာတွေအားလုံးကို ရပ်စဲစေနိုင်တဲ့ဖက်မှာပဲ သူရပ်တည်ပြမယ်လို့ ယူဆတယ်” ဟု CNI သတင်းဌာနသို့ ပြောသည်။

ဖမ်းဆီးထိန်းသိမ်းခံထားရသော ဦးဝင်းမြင့်၊ ဒေါ်အောင်ဆန်းစုကြည်၊ ဒေါက်တာဇော်မြင့်မောင်တို့ကိုတွေ့ရ စဉ်

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က မြန်မာ့တပ်မတော်မှ NLD အစိုးရကို ၂၀၂၀ အထွေထွေ ရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချ၍ နိုင်ငံတော်ကို အရေးပေါ် ကြေညာထားသည်။

ထို့နောက် အမျိုးသားဒီမိုကရေစီအဖွဲ့ချုပ် (NLD) မှ ဥက္ကဋ္ဌ ဒေါ်အောင်ဆန်းစုကြည်၊ ဦးဝင်းမြင့် အပါအဝင် ခေါင်းဆောင်အချို့ကို ဖမ်းဆီးထိန်းသိမ်းခဲ့သည်။

တခြားတစ်ဖက်မှာတော့ NLD လွှတ်တော်အမတ်များနှင့် ဒီမိုကရေစီအရေး တောင်းဆိုသူများက အမျိုးသားညီ ညွတ်ရေးအစိုးရ(NUG)နှင့် ပြည်သူ့ကာကွယ်ရေးတပ်ဖွဲ့(PDF)များ ဖွဲ့စည်းရေး မြန်မာ့တပ်မတော်ကို ဖြုတ်ချရေး လက်နက်ကိုင် တိုက်ခိုက်လျက်ရှိသည်။

CNI News

၂၀၂၃ ခုနှစ်၊ ဇူလိုင် ၁၂

အနောက်နိုင်ငံများနှင့် ဥရောပနိုင်ငံများက ထောက်ခံနေသည့် အမျိုးသားညီညွတ်ရေးအစိုးရ(NUG)နှင့် ပြည်သူ့ ကာကွယ်ရေးတပ်ဖွဲ့(PDF)ကို အသိအမှတ်မပြုကြောင်း ဖမ်းဆီးထိန်းသိမ်းခံထားရသည့် ဒေါ်အောင်ဆန်းစု ကြည်က ထိုင်းဒုဝန်ကြီးချုပ် Mr. Don Pramudwinai ကို သဘောထားပေးခဲ့ကြောင်း ဂျပန်သတင်းဌာန တစ်ခု ဖြစ်သည့် Pan Orient News က ဇူလိုင် ၁၁ ရက်နေ့က ဖော်ပြခဲ့သည်။

ထိုင်းဒုဝန်ကြီးချုပ် Mr. Don Pramudwinai သည် မြန်မာနိုင်ငံသို့ ဇူလိုင် ၉ ရက်နေ့က နေ့ချင်းပြန် ခရီးစဉ် အဖြစ် ရောက်ရှိလာပြီး နေပြည်တော်အကျဉ်းထောင်တွင် ဖမ်းဆီးထိန်းသိမ်းခံထားရသော ဒေါ်အောင်ဆန်းစု ကြည်နှင့် တွေ့ဆုံခွင့်ရရှိခဲ့သည်။

အဆိုပါ တွေ့ဆုံစဉ် ဒေါ်အောင်ဆန်းစုကြည်က မြန်မာက အကြမ်းဖက်အဖွဲ့အစည်းများအဖြစ် သတ်မှတ်ထားပြီး အနောက်နိုင်ငံများ၏ ထောက်ပံ့မှုဖြစ် ရပ်တည်နေသည့် NUG၊ PDF ကို မိမိအနေဖြင့် အသိအမှတ်မပြုကြောင်း သဘောထားပေးခဲ့သည်ဟု ဂျပန်သတင်းဌာန Pan Orient News က ရေးသား ဖော်ပြထားခြင်း ဖြစ်သည်။

ထို့နောက် အင်ဒိုနီးရှားနိုင်ငံ၊ ဂျာကာတာမြို့မှာ ကျင်းပနေသည့် အာဆီယံနိုင်ငံခြားရေးဝန်ကြီးများ အစည်း အဝေးတွင် ထိုင်းဒုဝန်ကြီးချုပ် Mr. Don Pramudwinai က ဒေါ်အောင်ဆန်းစုကြည်နှင့်တွေ့ဆုံခွင့်ရခဲ့ပြီး သူမ၏ သဘောထား သဝဏ်လွှာကို ဖတ်ကြားသွားခဲ့ကြောင်း ဂျပန်သတင်းဌာန ကျိုဒို(Kyodo)က ဇူလိုင် ၁၂ ရက်နေ့ တွင် ဖော်ပြခဲ့သည်။

ဒေါ်အောင်ဆန်းစုကြည်နဲ့ Mr. Don Pramudwinai ကိုတွေ့ရစဉ်

ဒေါ်အောင်ဆန်းစုကြည်ကို အာဆီယံ အလှည့်ကျ ဥက္ကဋ္ဌများဖြစ်ခဲ့သည့် ဘရူးနိုင်း၊ ကမ္ဘောဒီးယား၊ အင်ဒိုနီးရှား နိုင်ငံများမှ တွေ့ဆုံခွင့် ရရှိရန် ကြိုးစားခဲ့သော်လည်း တွေ့ဆုံခွင့်မရခဲ့ဘဲ ထိုင်းဒုဝန်ကြီးချုပ်က ပထမဆုံး တွေ့ခွင့် ရသည့် နိုင်ငံခြားသံတမန်ဖြစ်သည်။

ထိုင်းနိုင်ငံသည် အမေရိကန်နှင့်ဆက်ဆံရေး ကောင်းမွန်သည့် နိုင်ငံဖြစ်၍ ထိုင်းဒုဝန်ကြီးချုပ်၏ တွေ့ဆုံခွင့် ရမှုက ထူးခြားသည်ဟု မြန်မာ့နိုင်ငံရေးအသိုင်းအဝိုင်းကြားတွင် သုံးသပ်နေကြသည်။

နေပြည်တော်က သတင်းရင်းမြစ်များကတော့ ဒေါ်အောင်ဆန်းစုကြည်နှင့် ထိုင်းဒုဝန်ကြီးချုပ် ဇူလိုင် ၉ ရက်နေ့က တွေ့ဆုံခဲ့သည်မှာ မှန်ကန်ကြောင်း၊ ဒေါ်အောင်ဆန်းစုကြည်က အကြမ်းမဖက် မူဝါဒအပေါ် ရပ်တည်သူဖြစ်သည့် အတွက် နိုင်ငံတကာ သတင်းဌာနများမှ ရေးသားဖော်ပြသည့် NUG-PDF ကို အသိ အမှတ်မပြုဘူးဆိုသည်မှာ ဖြစ်နိုင်ခြေရှိကြောင်း ပြောသည်။

လက်ရှိ မြန်မာနိုင်ငံတွင် ဒေါ်အောင်ဆန်းစုကြည် ဉီးဆောင်သည့် NLD အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ မြန်မာ့တပ်မတော်က ၂၀၂၁ ခုနှစ်၊ ဖေဖော်ဝါရီ ၁ ရက်တွင် ဖြုတ်ချ၍ နိုင်ငံတော်ကို အရေးပေါ်ကြေညာထားသည်။

Pan Orinet News သတင်းဌာန၏ ဖော်ပြချက်ကိုတွေ့ရစဉ်

ထို့နောက် နိုင်ငံတော်အတိုင်ပင်ခံ ဒေါ်အောင်ဆန်းစုကြည်၊ သမ္မတ ဦးဝင်းမြင့်၊ NLD ပါတီ ခေါင်းဆောင်များကို ဖမ်းဆီး ထိန်းသိမ်းခဲ့သည်။

အဆိုပါ အခြေအနေများတွင် မြန်မာ့တပ်မတော်ကို ဖြုတ်ချရေး NLD လွှတ်တော် အမတ်များနှင့် ဒီမိုကရေစီအရေး တောင်းဆိုသူများ စုပေါင်း၍ အမျိုးသားညီညွတ်ရေးအစိုးရ(NUG)နှင့် ပြည်သူ့ကာကွယ်ရေးတပ်ဖွဲ့(PDF)ကို ဖွဲ့ စည်းကာ လက်နက်ကိုင် တော်လှန်ရေး တစ်ရပ်အား ဆင်နွှဲလျက်ရှိသည်။

NUG-PDF က ၂၀၂၃ ခုနှစ်သည် တော်လှန်ရေး အဆုံးအဖြတ်အတွက် အဆုံးသတ်နှစ်ဖြစ်သည်ဟု ကြေညာထား သည်။

CNI News

၂၀၂၃ ခုနှစ်၊ ဇူလိုင် ၁၂

ထိုင်းဒုဝန်ကြီးချုပ်နှင့် နိုင်ငံခြားရေးဝန်ကြီး Mr. Don Pramudwinai သည် မြန်မာနိုင်ငံသို့ ဇူလိုင် ၉ ရက်နေ့က နေ့ချင်းပြန် ခရီးစဉ်အဖြစ် လာရောက်ခဲ့ပြီးနောက် ဒေါ်အောင်ဆန်းစုကြည်နှင့် တွေ့ဆုံခဲ့သည်။

အဆိုပါ တွေ့ဆုံမှုသည် အင်ဒိုနီးရှားနိုင်ငံ၊ ဂျာကာတာမြို့မှာ ကျင်းပနေသည့် အာဆီယံနိုင်ငံခြားရေးဝန်ကြီးများ အစည်းအဝေး မတိုင်ခင် ဖြစ်သည်။

ထို့နောက် Mr. Don Pramudwinai သည် အာဆီယံနိုင်ငံခြားရေးဝန်ကြီးများ အစည်းအဝေးမှာ ဒေါ်အောင်ဆန်း စုကြည်နှင့်တွေ့ဆုံခဲ့ကြောင်း၊ ဒေါ်အောင်ဆန်းစုကြည်၏ သတင်းစကားကို အာဆီယံနိုင်ငံခြားရေးဝန်ကြီးများ အစည်းအဝေးသို့ သယ်ဆောင်၍ ချပြခဲ့ကြောင်း ဂျပန်နိုင်ငံအခြေစိုက် ကျိုဒို(Kyodo)သတင်းဌာနက ဇူလိုင် ၁၂ ရက်နေ့တွင် ရေးသားဖော်ပြခဲ့သည်။

ဒေါ်အောင်ဆန်းစုကြည်နဲ့ ထိုင်းဒုဝန်ကြီးချုပ်နှင့် နိုင်ငံခြားရေးဝန်ကြီး Mr. Don Pramudwinai ကို တွေ့ရစဉ်

သတင်းအရင်းအမြစ်များ၏ အဆိုအရ နစက-က အကြမ်းဖက်အဖွဲ့အစည်းများအဖြစ် ကြေညာထားသည့် အမျိုးသားညီညွတ်ရေးအစိုးရ(NUG)နှင့် ပြည်သူ့ကာကွယ်ရေးတပ်ဖွဲ့(PDF)ကို အသိအမှတ်မပြုကြောင်း ဒေါ်အောင်ဆန်းစုကြည်က ထိုင်းဒုဝန်ကြီးချုပ်နှင့်တွေ့ဆုံစဉ် ပြောကြားခဲ့သည်ဟု Pan Orient News က ၂၀၂၃ ခုနှစ်၊ ဇူလိုင် ၁၁ ရက်နေ့က ရေးသားထားသည်။

နေပြည်တော်ရှိ သတင်းအရင်းအမြစ်များကလည်း ဒေါ်အောင်ဆန်းစုကြည်သည် အကြမ်းမဖက် နိုင်ငံရေး လမ်းစဉ်ကို ကိုင်ဆွဲထားသူဖြစ်၍ NUG၊ PDF က သူနှင့်မဆိုင်ကြောင်း သဘောထားရှိခြင်းက ဖြစ်နိုင်ခြေရှိသည် ဟု ပြောသည်။

CNI News

၂၀၂၃ ခုနှစ်၊ ဇူလိုင် ၁၁

၂၀၀၈ ဖွဲ့စည်းပုံအခြေခံဥပဒေမှ ပြင်ဆင်လိုသော အချက်များနှင့် ငြိမ်းချမ်းရေး ညီလာခံ ကျင်းပရေးကိစ္စတို့ကို ရှမ်းပြည်ပြန်လည်ထူထောင်ရေးကောင်စီ(RCSS)နှင့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော် ဆောင်မှု ညှိနှိုင်းရေးကော်မတီ(NSPNC)တို့ ဇူလိုင် ၁၁ ရက်တွင် နေပြည်တော်မှာ တွေ့ဆုံ ဆွေးနွေးခဲ့ကြသည်။

အဆိုပါ တွေ့ဆုံမှုတွင် နှစ်ဖက် ကိုယ်စားလှယ်များအကြား ယခင် ဆွေးနွေးပွဲများ၌ သဘောတူထားသည့် အချက်များအား အကောင်အထည်ဖော် ဆောင်ရွက်နိုင်ရေးကိစ္စ၊ ဒေသတည်ငြိမ်အေးချမ်းရေးကိစ္စ၊ မူးယစ် ဆေးဝါးတိုက်ဖျက်ရေးကိစ္စ၊ ဖွံ့ဖြိုးရေးကိစ္စနှင့် လူသားချင်း စာနာမှုဆိုင်ရာ အကူအညီပံ့ပိုးရေးကိစ္စတို့ကိုလည်း အပြန်အလှန် ဆွေးနွေးခဲ့ကြသည်။

ထို့နောက် ဆွေးနွေးပွဲကို ၁၂ ရက်နေ့တွင် ဆက်လက် ကျင်းပသွားမည် ဖြစ်သည်။

RCSS ဘက် အတွင်းရေးမှူး(၁) ဗိုလ်မှူးကြီး စိုင်းငင်း၊ ဗဟိုအလုပ်အမှုဆောင်ကော်မတီဝင် စဝ်ဆောင်းဟန်၊ ဗဟိုဦးစီးကော်မတီဝင် စဝ်စိုင်းဟန်တို့ တက်ရောက်ခဲ့ပြီး NSPNC ဘက်ကမူ အတွင်းရေးမှူး ဒုတိယဗိုလ်ချုပ်ကြီး ဝင်းဗိုလ်ရှိန်နှင့် ညှိနှိုင်းရေးကော်မတီ အဖွဲ့ဝင်များ တက်ရောက်ခဲ့ကြသည်။

RCSS သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ်ထိုးထားသည့် ရှမ်း လက်နက်ကိုင် အဖွဲ့ဖြစ်သည်။