CNI News

၂၀၂၄ ခုနှစ်၊ ဇူလိုင် ၁၇

တရုတ်နိုင်ငံ၏ ဖိတ်ကြားချက်အရ သွားရောက်မည့် နိုင်ငံရေးပါတီ ၄ ပါတီက လက်ရှိ မြန်မာ့နိုင်ငံရေး အကျပ် အတည်းများကို ကျော်လွှားနိုင်ရေး ဆွေးနွေးသွားမည်ဖြစ်ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

ပါတီမှတ်ပုံတင်ကျထားသည့် နိုင်ငံရေးပါတီများဖြစ်ကြသော AFP ပါတီ၊ ဦးကိုကိုကြီး ဦးဆောင်သည့် ပြည်သူ့ပါတီ (PP)၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP)၊ ရှမ်းနှင့်တိုင်းရင်းသားများ ဒီမိုကရက်တစ်ပါတီတို့ သွားရောက်ကြမည်ဖြစ်သည်။

ဒေါက်တာအေးမောင်က “အဲဒါ ဒုတိယနိုင်ငံခြားရေးဝန်ကြီး တရုတ်ပြည်ကွန်မြူနစ်ပါတီဖက်က ဘာတွေကို ဆွေးနွေးသလဲပေါ့လေ၊ ဘယ်လိုပဲဖြစ်ဖြစ် နိုင်ငံရေးပါတီ ၄ ပါတီဖက်ကတော့ မြန်မာ့နိုင်ငံရေးရဲ့ ပင်ရင်းနိုင်ငံရေး အကျပ်အတည်း လက်ရှိ အနေအထားတွေကို ဆွေးနွေးဖြစ်ကြမယ်ထင်ပါတယ်။ တရုတ်ရဲ့ ငြိမ်းချမ်းရေး အစီအစဉ်မှာ ပါဝင်မှု လက်ရှိအနေအထား မြန်မာနိုင်ငံ စစ်ရေး၊ နိုင်ငံရေး အကျပ်အတည်းကနေ ဘယ်လို ရုန်းထွက်ရင် ကောင်းမလဲ၊ ရုန်းထွက်မှပဲ မြန်မာနိုင်ငံ ရှေ့ဆက်ပြီးတော့ ခိုင်ခိုင်မာမာနဲ့ တိုင်းရင်းသားများ အားလုံး နဲ့ ရပိုင်ခွင့် အပြည့်အဝနဲ့ ချစ်ချစ်ခင်ခင် စည်းစည်းလုံးလုံး ဖြစ်တည်နိုင်တယ်၊ စသဖြင့်ပေါ့ဗျာ၊ ဒါလေးတွေတော့ ဝိုင်းဝန်းပြီးတော့ အမြင်သဘောမတူပေမဲ့လည်း အသွင်တစ်မျိုးစီနဲ့ ပါတီ ၄ ခုကတော့ဖြင့် အဲဒီခေါင်းစဉ်လာရင် ဆွေးနွေးဖြစ်ကြမယ် ထင်ပါတယ်။ တရုတ်ဖက်ကလည်း ယူဆတာက နှစ်နိုင်ငံချစ်ကြည်ရေး ူကြီး ၅ ချက် ဘောင်ထဲကပဲ ပြောကြဆိုကြ ဆွေးနွေးကြဖို့ နှစ်ဖက် ဆွေးနွေးကြဖို့ များပါတယ်” ဟု CNI သတင်းဌာနသို့ ပြော သည်။

ဦးကိုကိုကြီးနဲ့စိုင်းအိုက်ပေါင်းကိုတွေ့ရစဉ်

လာမည့် ဇူလိုင် ၂၁ ရက်နေ့မှ ဇူလိုင် ၂၇ ရက်နေ့အထိ တစ်ပတ်အကြာ တရုတ်နိုင်ငံသို့ သွားရောက်မည့် နိုင်ငံရေးပါတီ ၄ ပါတီကို တရုတ်ကွန်မြူနစ်ပါတီက ဖိတ်ကြားခဲ့ခြင်း ဖြစ်သည်။

အဆိုပါ ခရီးစဉ်အတွင်း ယူနန်မှ ကျေးလက်ဒေသဖွံ့ဖြိုးရေး အခြေအနေ၊ ကျေးလက်ဒေသများတွင် တရုတ်ကွန်မြူနစ်ပါတီရပ်တည်မှု အခြေအနေများကိုလည်း လေ့လာသွားမည်ဖြစ်ကြောင်း သိရသည်။

တရုတ်အစိုးရအနေဖြင့်လည်း မြန်မာပြည် ငြိမ်းချမ်းရေးရရှိရန် လုပ်ရမည်ဆိုသည့် သဘောထားရှိကြောင်း ဒေါက်တာအေးမောင်က ပြောသည်။

တရုတ်ကွန်မြူနစ်ပါတီ ညီလာခံကျင်းပနေစဉ်

၎င်းက “ကျနော်တို့က စဉ်းစားထားတဲ့ အချက်အလက်လေးတွေ ရှိပါတယ်။ ဟိုဖက်က မေးလာရင် ကျနော်တို့ ဖက်ကလည်း မြန်မာ့နိုင်ငံရေး အကျပ်အတည်းကို ကျော်လွှားချင်တဲ့ ကျနော်တို့ဖက်က ဆန္ဒအာသီသတွေ ရှိကြ ပါတယ်။ ပါတီတိုင်းက၊ တရုတ်အစိုးရကြီးလည်း ခုနလို ပူးပေါင်း ကူညီမှုနဲ့ ငြိမ်းချမ်းရေး မြန်မြန်ရအောင်လည်း လုပ်မှ ဖြစ်မယ်ဆိုတဲ့ ယူဆမှုတွေ ခိုင်ခိုင်မာမာ ရှိကြပါတယ်။ အဲဒီနှစ်ခု ပူးပေါင်းလိုက်ရင်တော့ဖြင့် လက်ရှိ ခရီး စဉ်ဟာ ဘယ်လိုပဲဖြစ်ဖြစ် အခြေအနေ အချိန်အခါအရ လိုအပ်ချက်ကြီးတစ်ခု အဲဒီလိုအပ်ချက်ကို ပေါက်ရောက် အောင်မြင်စွာ ဆောင်ရွက်နိုင်ပြီဆိုရင် မြန်မာ့ငြိမ်းချမ်းရေးနဲ့ လာမယ့် ကာလအတွက် ပိုပြီးတော့ အနှစ်သာရရှိရှိ ကျနော်တို့ နိုင်ငံရေးအားဖြင့် အကောင်အထည် ဖော်လိုက်နိုင်ပြီလို့ပဲ ပြောချင်တယ်” ဟု ပြောသည်။

ပြီးခဲ့သည့် နှစ်ကလည်းက မြန်မာ့နိုင်ငံရေးပါတီ ၅ ပါတီကို တရုတ်က လေ့လာရေးခရီးဖိတ်ကြားခဲ့ပြီး ယခုနှစ်မှာ နိုင်ငံရေးပါတီ ၄ ခုကို ဖိတ်ကြားခဲ့ခြင်း ဖြစ်သည်။

တရုတ်နိုင်ငံသို့ ဇူလိုင် ၂၁ ရက်မှ ၂၇ ရက်နေ့အထိ ပြည်သူ့ပါတီ(PP)၊ ရခိုင့်ဦးဆောင်ပါတီ(AFP)၊ ရှမ်းနှင့်တိုင်းရင်း သားများ ဒီမိုကရက်တစ်ပါတီ၊ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)မှ ခေါင်းဆောင်များ သွားရောက် ကြမည်ဖြစ်သည်။