CNI News

၂၀၂၃ ခုနှစ်၊ ဇန်နဝါရီ ၂၄

ပါတီစုံဒီမိုကရေစီစနစ်ကို ကျင့်သုံးနေခြင်းဖြစ်သည့်အတွက် မည်သို့သော အခြေအနေရှိသည်ဖြစ်စေ လွတ်လပ်၍ တရားမျှတသော ရွေးကောက်ပွဲ ကျင်းပနိုင်ရေး လုပ်ဆောင်ရမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင် လှိုင်က ပြောသည်။

ဇန်နဝါရီ ၂၃ ရက်နေ့က ကျင်းပခဲ့သော နစက၏ (၁/၂၀၂၃) အစည်းအဝေးတွင် ၎င်းက အထက်ပါ အတိုင်း ပြောကြားခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ပါတီစုံဒီမိုကရေစီစနစ်ကို ကျင့်သုံးနေခြင်းဖြစ်သည့်အတွက် မည်သို့သော အခြေအနေရှိသည်ဖြစ်စေ လွတ်လပ်၍ တရားမျှတသော ရွေးကောက်ပွဲကျင်းပနိုင်ရေး လုပ်ဆောင်ရမည်များ ကို ကြိုးပမ်း ဆောင်ရွက်သွားရမည်ဖြစ်ကြောင်း၊ ပြည်သူများအားလုံးအကြား အလပ်မရှိ မဲပေးနိုင်ရန်လို ကြောင်း၊ ဆွေးနွေးပြီးသည့် EAO အဖွဲ့များနှင့်လည်း ပါတီစုံ ဒီမိုကရေစီစနစ် ခိုင်မာစေရေး၊ ဒီမိုကရေစီနှင့် ဖက်ဒရယ်စနစ် ကို အခြေခံသည့် ပြည်ထောင်စုစနစ် တည်ဆောက်ရေးကို မူအားဖြင့် သဘောတူညီမှု ရရှိပြီး ဖြစ်၍ နိုင်ငံအဝှမ်း အကြားအလပ်မရှိ ရွေးကောက်ပွဲ ကျင်းပနိုင်ရေး၊ ပြည်သူအားလုံး ခြိမ်းခြောက်မှု၊ အကျပ်ျပ်င် မှုမရှိဘဲ လွတ်လပ်စွာ ဆန္ဒဖော်ထုတ် မဲပေးနိုင်ရေး ဦးတည်ဆောင်ရမည်”ဟု ပြောသည်။

 ပြည်ထောင်စုရွေးကောက်ပွဲကော်မရှင် ဥက္ကဋ္ဌ ဦးသိန်းစိုးကိုတွေ့ရစဉ်

အမျိုးသားညီညွတ်ရေးအစိုးရ(NUG)နှင့် လက်အောက်ခံ ပြည်သူ့ကာကွယ်ရေးတပ်ဖွဲ့(PDF)များ အပါအဝင် ချင်းအမျိုးသားတပ်ဦး(CNF)၊ ကရင်အမျိုးသားတိုးတက်ရေးပါတီ(KNPP)၊ ကရင်အမျိုးသားအစည်းအရုံး(KNU)၊ တအာင်းအမျိုးသားလွတ်မြောက်ရေးတပ်မတော်(TNLA)တို့က နစက ကျင်းပမည့် ရွေးကောက်ပွဲကို လက်မခံ ကြောင်းနှင့် မပျက် ပျက်အောင် ဖျက်ဆီးမည်ဟု ထုတ်ဖော် ပြောကြားထားသည်။

နစကဥက္ကဋ္ဌကတော့ ရွေးကောက်ပွဲ ပြုလုပ်ရန်အတွက် နိုင်ငံရေးပါတီများ ရှိနေရမည်ဖြစ်ကြောင်း၊ ထို့ကြောင့် နိုင်ငံရေး ပါတီများ မှတ်ပုံတင်ခြင်း ဥပဒေပြဋ္ဌာန်းနိုင်ရန်လည်း အရေးကြီးကြောင်း၊ လိုအပ်သည်များ ထပ်မံ သုံးသပ် ပြင်ဆင်ပြီးပါက အတည်ပြု ထုတ်ပြန်သွားမည်ဖြစ်ကြောင်း ပြောသည်။

အလားတူ ရွေးကောက်ပွဲကော်မရှင် အနေဖြင့်လည်း ပါတိများကို မှတ်ပုံတင် ဆောင်ရွက်ရာတွင် ဖွဲ့စည်းပုံအခြေ ခံ ဥပဒေကို ချိုးဖောက်သည့် နိုင်ငံရေးပါတီများ မဖြစ်ရန်လိုကြောင်း၊ ရွေးကောက်ပွဲ ကော်မရှင်ရုံးများကို အပြည့် အစုံ ဖွင့်လှစ်နိုင်ရေး ဆောင်ရွက်သွားရမည်ဖြစ်ကြောင်း၊ မဲစာရင်းများ မှန်ကန်ရေးအတွက် ကြိုတင် ပြင်ဆင် ဆောင်ရွက်ရန်လိုကြောင်း ၎င်းက ပြောသည်။

မီးရှို့ဖျက်ဆီးခံထားရသော လ.ဝ.က ရုံးများ စာရင်းကိုတွေ့ရစဉ်

လက်ရှိတွင် PDF များနှင့် လက်နက်ကိုင်အဖွဲ့တချို့သည် လ.ဝ.က ရုံးများနှင့် ရွေးကောက်ပွဲ ကော်မရှင် ရုံးခွဲများ ကို မီးရှို့ဖျက်ဆီးခြင်း ရွေးကောက်ပွဲအား ဆန့်ကျင် ကန့်ကွက်ကြောင်း ပြသလျက်ရှိသည်။

ထို့နောက် နိုင်ငံရေးပါတီများနှင့် နိုင်ငံရေးလေ့လာသုံးသပ်သူများကတော့ မဲရုံများ လုံခြုံရေး အပါအဝင် ပြည်သူ များ လုံခြုံရေးနှင့် ကိုယ်စားလှယ်များ၏ လုံခြုံရေးကို မည်ကဲ့သို့ တာဝန်ယူဆောင်ရွက်မလဲဆိုသည်ကိုတော့ စောင့်ကြည့်ရန် လိုအပ်နေသည်ဟု ထောက်ပြကြသည်။

CNI News

၂၀၂၃ ခုနှစ်၊ ဇန်နဝါရီ ၂၃

ရှမ်းပြည်ပြန်လည်ထူထောင်ရေးကောင်စီ(RCSS/SSA)ဥက္ကဋ္ဌ ဗိုလ်ချုပ်ကြီးယွက်စစ်သည် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့်တွေ့ဆုံရန် နေပြည်တော်သို့ မကြာခင်သွားရောက်မည်ဖြစ်ကြောင်း RCSS ပိုင် Tai Freedom သတင်းဌာနက ရေးသား ထုတ်လွှင့်ခဲ့သည်။

အဆိုပါ ခရီးစဉ်တွင် RCSS ကိုယ်စားလှယ်အဖွဲ့ကို ဗိုလ်ချုပ်ကြီး ယွက်စစ်က ဦးဆောင်၍ ဗဟိုကော်မတီဝင်များ ဖြစ်သည့် ဗိုလ်မှူးကြီးဆောင်းဟန်၊ ဒုဗိုလ်မှူးကြီး အုပ်ခေး၊ ဗဟိုဦးဆောင်ကော်မတီဝင်များဖြစ်သော ဗိုလ်မှူး နန်းမိုးမိုးစော၊ ဗိုလ်မှူးနန်းစံဖောင်းနှင့် အထောက်အကူပြု အဖွဲ့များ ပါဝင်မည်ဖြစ်ကြောင်း သိရသည်။

ထို့နောက် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် နစက ငြိမ်းချမ်းရေးဖော်ဆောင်ရေးအဖွဲ့တို့အား တွေ့ဆုံ၍ လက်ရှိ နိုင်ငံရေးအခြေအနေများ၊ ငြိမ်းချမ်းရေးလုပ်ငန်းစဉ်များ၊ Bilateral ပါ အချက်အလက်များ၊ ယုံကြည်မှု တည်ဆောက်ရေး လုပ်ငန်းစဉ်များ စသည်တို့ကို ဆွေးနွေးကြမည်ဖြစ်သည်ဟု Tai Freedom က ရေးသား ဖော်ပြထားသည်။

RCSS ကိုယ်စားလှယ်အဖွဲ့နဲ့ နစက၏ ငြိမ်းချမ်းရေးဖော်ဆောင်ရေးအဖွဲ့ကိုတွေ့ရစဉ်

သို့သော် မည်သည့်အချိန်တွင် သွားရောက်မည်ကိုတော့ ရေးသားဖော်ပြထားခြင်းမရှိပေ။ နီးစပ်သူများကတော့ ယနေ့နေပြည်တော်ရောက်မည်ဟု ပြောသည်။

ဗိုလ်ချုပ်ကြီးယွက်စစ်သည် ၂၀၂၂ ခုနှစ်၊ မေလက နေပြည်တော် လာရောက်၍ ဗိုလ်ချုပ်မှူးကြီးမင်းအောင်လှိုင် နှင့် နစက၏ ငြိမ်းချမ်းရေးဖော်ဆောင်ရေးအဖွဲ့တို့ကို တွေ့ဆုံကာ ငြိမ်းချမ်းရေး လုပ်ငန်းစဉ်များအား ဆွေးနွေးခဲ့ သေးသည်။

RCSS/SSA သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ထိုးထားသည့် ရှမ်းလက်နက်ကိုင် အဖွဲ့ဖြစ်သည်။

CNI News

၂၀၂၃ ခုနှစ်၊ ဇန်နဝါရီ ၂၃

ရွေးကောက်ပွဲ မကျင်းပနိုင်ပါက မည်ကဲ့သို့သော အခင်းအကျင်းမျိုး ဖြစ်လာမလဲသည့် မေးခွန်းနှင့်ပတ်သက်ပြီး နိုင်ငံရေးအသိုင်းအဝိုင်းကြားတွင် ကျယ်ကျယ်ပြန့်ပြန့် သုံးသပ်ဆွေးနွေးလျက်ရှိနေသည်။

၂၀၀၈ ဖွဲ့စည်းပုံအခြေခံဥပဒေအရ ရွေးကောက်ပွဲ မကျင်းပနိုင်ပါက ၂၀၀၈ ဖွဲ့စည်းပုံ ပျက်သွားမှာဖြစ်ကြောင်း မွန်ညီညွတ်ရေးပါတီ (MUP) မှ ပြောရေးဆိုခွင့်ရှိသူ နိုင်သန်းရွှေက CNI သတင်းဌာနသို့ ပြောသည်။

နိုင်သန်းရွှေ “၂၀၀၈ အခြေခံဥပဒေအရပေါ့နော်၊ ရွေးကောက်ပွဲ မကျင်းပနိုင်ဘူးဆိုရင် ကျနော်တို့ ဒီအာဏာသိမ်းရမယ့် သဘောပေါ့နော်၊ ၂၀၀၈ ဖျက်ပြီးတော့ ဘယ်လိုပြောရမလဲ အခြေခံဥပဒေအသစ်ကို ပြန်ရေးမလား၊ အဲဒီ အခင်းအကျင်း တစ်ခုခု‌တော့ ဖြစ်မှာပေါ့နော်၊ အာဏာသိမ်းမလား ဒါကတော့ ကျနော်တို့ မပြောနိုင်ဘူးပေါ့၊ ရွေးကောက်ပွဲ မလုပ်ဖြစ်လို့ရှိရင် ၂၀၀၈ ကတော့ ပျက်သွားမှာတော့ သေချာတာပေါ့နော်” ဟု ပြောသည်။

လာမည့် ဩဂုတ်လအတွင်း အထွေထွေရွေးကောက်ပွဲ ကျင်းပသွားမည်ကြောင်း၊ အနိုင်ရသည့် နိုင်ငံရေးပါတီကို နိုင်ငံတော်အာဏာ လွှဲအပ်သွားမည်ဖြစ်ကြောင်း နစကဥက္ကဋ္ဌက ပြောကြားထားသည်။

ဗိုလ်ချုပ်မှူးကြီးမင်းအောင်လှိုင် မဲထည့်နေစဉ်

ရွေးကောက်ပွဲမှာ နစက၏ နိုင်ငံရေး ထွက်ပေါက်ဖြစ်ကြောင်း၊ မဖြစ်မနေ ကျင်းပမှာဖြစ်ကြောင်း နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ဦးသန်းစိုးနိုင်က “ကျနော်က ရွေးကောက်ပွဲ မကျင်းပနိုင်ရင်ဆိုတဲ့ အဆိုပြုချက်ကို ကျနော်က ငြင်းပယ်ပါတယ်ဗျ၊ ဘာလို့ ငြင်းပယ်တာလဲဆိုလို့ရှိရင် ‌ရွေးကောက်ပွဲက စကစရဲ့ နိုင်ငံရေးထွက်ပေါက် ဖြစ်ပါတယ်၊ သူက အဲဒီဟာကို မဖြစ်မနေ ကျင်းပမှာပါ၊ ဒါပေမဲ့ တရားမျှတမှု ရှိမှာ မဟုတ်ဘူး။ စနစ်တကျလုပ်မှာ မဟုတ်ဘူး။ လိမ်ညာမှု အမျိုး မျိုးနဲ့ မဖြစ်မနေသူက ရွေးကောက်ပွဲဖြစ်အောင် ကျင်းပသွားမယ်လို့ ကျနော် ယူဆပါတယ်၊ ဒါမှမဟုတ် ရွေးကောက်ပွဲ မဖြစ်ရင်ဆိုတဲ့ သဘောထားနဲ့ စဉ်းစားချက် ကျနော်မရှိပါဘူး။ တစ်ခုတော့ရှိတယ် တကယ်လို့ အခြေအနေက လုံးဝရွေးကောက်ပွဲ ကျင်းပဖို့အတွက် အခြေအနေ မပေးဘူးဆိုလို့ရှိရင်လည်း သူတို့က စစ်အာဏာ သိမ်းမှုကို ဆက်ပြီးတော့ အာဏာကို ဆက်လက်ပြီး ချုပ်ကိုင်သွားဖို့အတွက် ကြိုးစားသွားပါလိမ့်မယ်လို့ ပြောချင်ပါ တယ်” ဟု ပြောသည်။

ရွေးကောက်ပွဲ ကျင်းပနိုင်ခြင်းမရှိပါက ၂၀၀၈ ဖွဲ့စည်းပုံအခြေခံဥပဒေရှိတော့မှာ မဟုတ်ကြောင်း ကချင်နိုင်ငံရေး သမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။

၂၀၂၁ ခုနှစ်က နေပြည်တော်မြို့အ၀င်မှာ လုံခြုံရေးချထားသည်ကိုတွေ့ရစဉ်(AFP)

၎င်းက “အခုစစ်တပ်က ဘယ်လိုမျိုး သွားမလဲဆိုတဲ့ အပေါ်မှာပဲ မူတည်ပါတယ်။ ဒီဟာတော့ ၂၀၀၈ က‌‌တော့ ဖေဖော်ဝါရီ ၁ ရက်နေ့ဆိုရင် ပြည့်သွားပြီပေါ့၊ ၂၀၀၈ အခြေခံဥပဒေအရတော့ ရွေးကောက်ပွဲ ကျင်းပမလား မကျင်းပဘူးလားဆိုတဲ့ အပေါ်မှာတော့ စစ်တပ်အပေါ်မှာပဲ မူတည်တယ်၊ ရွေးကောက်ပွဲ မကျင်းပဘူးဆိုရင်တော့ အခြေခံဥပဒေက ရှိတော့မှာ မဟုတ်ဘူး။ ဒါပေမဲ့ အခြေခံဥပဒေရှိခြင်း၊ မရှိခြင်းဆိုတာထက် အခု ရွေး‌ကောက်ပွဲ ကျင်းပရင်လည်း အခက်အခဲတော့ ကြုံမယ်၊ ရွေးကောက်ပွဲ မကျင်းပရင်လည်း အခက်အခဲတော့ ကြုံမှာပါ၊ ဒါက‌ တော့ အာဏာသိမ်းတဲ့ နောက်ဆက်တွဲ ပြဿနာတွေ ဖြစ်ပါတယ်” ဟု ပြောသည်။

၂၀၂၃ ရွေးကောက်ပွဲကို နစက-က ၎င်းတို့၏ နိုင်ငံရေးထွက်ပေါက်ဟု မျှော်လင့်ထားကြောင်း၊ ထို့ကြောင့် အဆိုပါ ရွေးကောက်ပွဲကို မပျက်ပျက်အောင် ဖျက်မည်ဟု အမျိုးသားညီညွတ်ရေးအစိုးရ(NUG) ယာယီ သမ္မတ ဒူဝါလရှီးလ က ၂၀၂၂ ခုနှစ်၊ အောက်တိုဘာ ၁၁ ရက်က ပြောကြားခဲ့သည်။

တခြားတစ်ဖက်မှာတော့ နစက-က ရွေးကောက်ပွဲ ကျင်းပနိုင်ရေး လူဦးရေစာရင်းများ စတင်ကောက်ခံနေပြီ ဖြစ်ကြောင်း သိရသည်။

ထို့နောက် လ. ဝ.က ရုံးများ မီးရှို့ဖျက်ဆီးခံရမှုများလည်း ရှိလာနေသည်။

CNI News

၂၀၂၃ ခုနှစ်၊ ဇန်နဝါရီ ၂၁

လာမည့် ရွေးကောက်ပွဲမှာ လူပုဂ္ဂိုလ် တစ်ဦးတစ်ယောက်အတွက် အဖြေရှာသည့်ပုံစံမျိုး မဖြစ်သင့်ကြောင်း ရခိုင်အမျိုးသားပါတီ (ANP)မှ ဥက္ကဋ္ဌ ဦးသာထွန်းလှက CNI သတင်းဌာနသို့ ပြောသည်။

လက်ရှိ နိုင်ငံရေးပြဿနာကို ဖြေရှင်းနိုင်ရေး နိုင်ငံရေးအရ တွေ့ဆုံဆွေးနွေးရန် လိုအပ်ကြောင်း ၎င်းက ပြောသည်။

ဦးသာထွန်းလှက “မြန်မာနိုင်ငံမှာ ဖြစ်ပျက်နေတဲ့ ပြဿနာက နိုင်ငံရေး ပြဿနာဖြစ်တယ်၊ အဲဒါကြောင့် ဒီနိုင်ငံ ရေး ပြဿနာကို နိုင်ငံရေးနည်းလမ်းအရ တွေ့ဆုံပြီး ကတိကဝတ်တွေ ရရှိဖို့လိုတယ်၊ နိုင်ငံရေး ကတိကဝတ်တွေ ရရှိပြီးမှ အဲဒီကတိကဝတ်တွေ အကောင်အထည်ဖော်တဲ့ အစီအမံတွေ လုပ်ငန်းစဉ်တွေကို ပြည်သူတွေကို ချပြနိုင် ဖို့လိုတယ်၊ ပြည်သူကို ချပြနိုင်ရင်တော့က ပြည်သူတွေ စိတ်ဝင်စားမှု နိုင်ငံရေးဖြစ်စဉ်အပေါ်မှာ စိတ်ဝင်စားမှု ရှိလာမယ်၊ နိုင်ငံရေး လုပ်ငန်းစဉ်အပေါ်မှာ စိတ်ဝင်စားမှု ရှိလာမယ်၊ အဲဒါကြောင့် အဲဒီလို ပြည်သူတွေ စိတ်ဝင်စား တဲ့ နိုင်ငံရေး လုပ်ငန်းစဉ်ဖြစ်မှ တစ်နိုင်ငံလုံးအတွက် အကျိုးရှိမယ်လို့ မြင်တယ်၊ အဖွဲ့တစ်ဖွဲ့၊ လူပုဂ္ဂိုလ် တစ်ဦး တစ်ယောက်အတွက် အဖြေရှာတဲ့ ပုံစံမျိုးတော့က အဲဒီလို ပုံစံမျိုးတော့က မဖြစ်သင့်ဘူးလို့ပဲ ကျနော်အဲဒီလို ပြော လိုတယ်” ဟု ပြောသည်။

ရွေးကောက်ပွဲ မဲစာရွက်စစ်ဆေးနေကြစဉ်

မြန်မာ့နိုင်ငံရေး အကျပ်အတည်းကို ဖြေရှင်းနိုင်ရန် ရွေးကောက်ပွဲတစ်ခု ကျင်းပပေးရုံမျှ မလုံလောက်ကြောင်း ၎င်းက ပြောသည်။

လာမည့် ရွေးကောက်ပွဲမှာ ပြည်သူလူထု တစ်ရပ်လုံး၏ ငြိမ်းချမ်းရေးအတွက် နိုင်ငံရေးထွက်ပေါက်ဟု ပြော၍ ရကြောင်း မွန်ညီညွတ်ရေးပါတီ (MUP) မှ ပြောရေးဆိုခွင့်ရှိသူ နိုင်သန်းရွှေက CNI သတင်းဌာနသို့ ပြောသည်။

နိုင်သန်းရွှေက “ရွေးကောက်ပွဲကတော့ အရေးပေါ်ကာလ အခြေခံဥပဒေ ကုန်ဆုံးပြီးတဲ့နောက်မှာ ဒီ ၆ လ အတော အတွင်းမှာ ရွေးကောက်ပွဲ လုပ်ပေးရမယ်ဆိုတော့ ရှိတာပေါ့နော်၊ ၂၀၀၈ ကတော့နော်၊ ၂၀၀၈ အခြေခံဥပဒေ အရ တော့ ကျနော်တို့ ဒီရွေးကောက်ပွဲကိုတော့ လုပ်ကိုလုပ်ရမယ်၊ ဒါပေမဲ့ ကျနော်တို့ မျှော်မှန်းတဲ့ ဖက်ဒရယ် ဒီမိုကရေစီပေါ့နော်၊ ပြန်လည် စတင်နိုင်ဖို့အတွက်က ကျနော်တို့ ဒီရွေးကောက်ပွဲကတော့ အရေးကြီးတာပေါ့၊ အထူးသဖြင့်တော့ အားလုံးပေါ့၊ SAC သာမကပဲ ပြည်တွင်းရှိ ပြည်သူလူထု တစ်ရပ်လုံးအတွက် ငြိမ်းချမ်းမှုအတွက် က ရွေးကောက်ပွဲက နိုင်ငံရေးထွက်ပေါက် တစ်ခုလို့လည်း ဆိုလို့ရတာပေါ့” ဟု ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ ဒေါ်အောင်ဆန်းစုကြည်ကိုတွေ့ရစဉ်

ဒီမိုကရေစီစနစ်ကို သွားမည်ဆိုပါက ရွေးကောက်ပွဲတစ်ခုကို လိုအပ်ကြောင်း ၎င်းက ဆက်လက် ပြောသည်။

နစကသည် ၂၀၂၃ ခုနှစ်၊ သြဂုတ်လတွင် အထွေထွေရွေးကောက်ပွဲကို ကျင်းပသွားမည်ဖြစ်ပြီး အနိုင်ရရှိသည့် ပါတီအား နိုင်ငံတော်အာဏာ လွှဲပြောင်းပေးအပ်သွားမည်ဖြစ်ကြောင်း ပြောကြားထားသည်။

CNI News

၂၀၂၃ ခုနှစ်၊ ဇန်နဝါရီ ၂၀

အခြေခံအကျဆုံးဖြစ်သည့် တိကျမှန်ကန်သော လူဦးရေနှင့် လူမှုစီးပွားရေးအခြေအနေများကို အုပ်ချုပ်မှုဒေသ အသေးငယ်ဆုံးအဆင့်ထိ ရရှိနိုင်ရန် သန်းခေါင်စာရင်းကို မဖြစ်မနေ ကောက်ယူရမည်ဖြစ်ကြောင်း နစက၏ ဒုဥက္ကဋ္ဌ ဒုတိယဗိုလ်ချုပ်မှူးကြီးစိုးဝင်း က ပြောသည်။

ယနေ့(ဇန်နဝါရီ ၂၀ ရက်)တွင် ကျင်းပသည့် ဗဟိုသန်းခေါင်စာရင်း ကော်မရှင် ပထမအကြိမ် လုပ်ငန်းညှိနှိုင်း အစည်းအဝေး၌ ၎င်းက အထက်ပါအတိုင်း ပြောသွားခဲ့သည်။

ဒုတိယဗိုလ်ချုပ်မှူးကြီးစိုးဝင်း “စစ်မှန်၍ စည်းကမ်းပြည့်ဝသည့် ပါတီစုံဒီမိုကရေစီ ဖြစ်ပေါ်လာစေရေးနှင့် ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုဖြစ်ပေါ် လာစေရေးအတွက် အခြေခံအကျဆုံး ဖြစ်သည့် တိကျမှန်ကန်သော လူဦးရေနှင့် လူမှုစီးပွားရေး အခြေအနေများကို အုပ်ချုပ်မှုဒေသ အသေးငယ်ဆုံး အဆင့်ထိ ရရှိနိုင်ရန် သန်းခေါင်စာရင်းကို မဖြစ်မနေ ကောက်ယူရမည်”ဟု ပြောသည်။

ထို့အပြင် ကိုဗစ်-၁၉ ကမ္ဘာ့ကပ်ရောဂါ အန္တရာယ်ဆိုးကြီး၏ အကျိုးဆက်များကို ဆန်းစစ်လေ့လာ သုံးသပ်ရန် နှင့် ပြန်လည်ကုစားရေး အစီအစဉ်များကို စနစ်တကျ ရေးဆွဲနိုင်ရန် တိကျမှန်ကန်သည့် စာရင်းအင်း အချက် အလက်များလည်း လိုအပ်ကြောင်း ၎င်းက ပြောသည်။

မြန်မာနိုင်ငံ၏ သန်းခေါင်စာရင်းကောက်ယူမှု သမိုင်းမှာ လွတ်လပ်ရေး မရမီကာလ ၁၈၇၂ ခုနှစ်၊ ၁၈၈၁ ခုနှစ်၊ ၁၈၉၁ ခုနှစ်၊ ၁၉၀၁ ခုနှစ်၊ ၁၉၁၁ ခုနှစ်၊ ၁၉၂၁ ခုနှစ်၊ ၁၉၃၁ ခုနှစ်နှင့် ၁၉၄၁ ခုနှစ်တို့တွင် ၈ ကြိမ် ကောက်ယူခဲ့ ကြောင်း သိရသည်။

ထို့နောက် လွတ်လပ်ရေးရပြီးနောက် ၁၉၅၃ ခုနှစ်၊ မတ်လတွင် မြို့နယ်ပေါင်း ၂၅၂ မြို့နယ်နှင့် ချင်းပြည်နယ်ကို လည်းကောင်း၊ ၁၉၅၄ ခုနှစ်၌ မြန်မာပြည် ပြည်မကျေးရွာအုပ်စု ၂၁၄၃ ခုနှင့် ကချင်ပြည်နယ်ရှိ ကျေးရွာအုပ်စု ၁၀၁၆ ခုတွင် လည်းကောင်း လူဦးရေသန်းခေါင်စာရင်း ကောက်ယူခဲ့သည်။

တစ်နိုင်ငံလုံး အတိုင်းအတာနှင့် ကောက်ယူနိုင်ခဲ့သည်မှာ ၁၉၇၃ ခုနှစ်တွင် တစ်ကြိမ်၊ ၁၉၈၃ ခုနှစ်တွင် တစ်ကြိမ်၊ ၂၀၁၄ ခုနှစ်တွင် တစ်ကြိမ် စုစုပေါင်း ၃ ကြိမ် ရှိကြောင်း သိရသည်။

ထို့ကြောင့် ၂၀၂၄ ခုနှစ်တွင် တစ်နိုင်ငံလုံး အတိုင်းအတာနှင့် သန်းခေါင်စာရင်း ကောက်ယူရမည်ဖြစ်ကြောင်း၊ ၂၀၁၄ ခုနှစ်နှင့် ၂၀၂၄ ခုနှစ်ကြား မြန်မာနိုင်ငံ၏ လူဦးရေနှင့် လူမှုစီးပွားရေးဆိုင်ရာ ပြောင်းလဲမှုများကို နှိုင်းယှဉ် လေ့လာ သုတေသနပြုလုပ်ပြီး လိုအပ်သည့် မူဝါဒများ၊ မဟာဗျူဟာနှင့်နည်းဗျူဟာများကို ချမှတ်နိုင်ရန် ဆောင်ရွက်ရမည်ဟု ဒုတိယဗိုလ်ချုပ်မှူးကြီးစိုးဝင်းက ပြောသည်။

လက်ရှိတွင် နစက၏ လ.ဝ.ကမှ တာဝန်ရှိသူများသည် လူဦးရေ စာရင်းများကို မြို့နယ်အနှံ့လိုက်လံ ကောက်ယူလျက်ရှိနေကြောင်း သိရသည်။

အဆိုပါ လူဦးရေ စာရင်းကောက်ယူမှုများသည် နစက ကျင်းပမည့် ရွေးကောက်ပွဲအတွက် အထောက်အကူ ဖြစ်စေမည့်အတွက် နွေဦးတော်လှန်ရေး အင်အားစုများက သေနတ်ဖြင့် ပစ်ခတ်သတ်ဖြတ်ခြင်းဖြင့် ဟန့်တား မှုများ ပြုလုပ်လျက်ရှိသည်။

ထို့ပြင် စစ်ကိုင်းတိုင်းဒေသကြီး၊ မကွေးတိုင်းဒေသကြီးနှင့် ချင်းပြည်နယ် အတွင်းရှိ လူဝင်မှုကြီးကြပ်ရေးနှင့် ပြည်သူ့အင်အား ဦးစီးဌာနရုံး (၉)ခု မီးရှို့ဖျက်ဆီးခံထားရသည်။

CNI News

၂၀၂၃ ခုနှစ်၊ ဇန်နဝါရီ ၂၀

ရန်ကုန်မြို့ ရွှေလီလမ်းရှိ အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှုညှိနှိုင်းရေးကော်မတီ(NS PNC)ရုံးမှာ ယနေ့ (ဇန်နဝါရီ ၂၀ ရက်) နေ့လယ် ၁ နာရီကျော်က ဗုံးပေါက်ကွဲမှု ဖြစ်ပွားခဲ့ကြောင်း သိရသည်။

ရန်ကုန်မြို့ရှိ NSPNC ရုံးဝင်းအတွင်းသို့ ဗုံး ၂ လုံး ပစ်သွင်းခဲ့ရာ တစ်လုံး ပေါက်ကွဲခဲ့ပြီး တစ်လုံးမှာ မပေါက်ကွဲ ဘဲ ကျန်နေရာမှ လုံခြုံရေးတပ်ဖွဲ့က ဖောက်ခွဲခဲ့ရကြောင်း သိရသည်။

ပေါက်ကွဲခဲ့သော ဗုံးသည် NSPNC ရုံး ခြံဝင်းအတွင်းရှိ ကားများ ရပ်နားသည့် အမိုးပေါ်သို့ ကျရောက်ခဲ့ရာ ကား သုံးစီး ပျက်စီးခဲ့ခြင်း ဖြစ်သည်။

NSPNC နဲ့ နိုင်ငံရေးပါတီများ တွေ့ဆုံဆွေးနွေးစဉ်

အဆိုပါ NSPNC ရုံးသည် တိုင်းရင်းသား လက်နက်ကိုင်များ၊ နိုင်ငံရေးပါတီများ၊ နိုင်ငံတကာ သံတမန်များနှင့် တွေ့ဆုံကာ ငြိမ်းချမ်းရေး လုပ်ငန်းစဉ်များကို ဆွေးနွေးမှုများ ပြုလုပ်လေ့ရှိသော နေရာဖြစ်သည်။

ရန်ကုန်မြို့ရှိ NSPNC ရုံးအတွင်း ဗုံးပေါက်ကွဲမှု ဖြစ်စဉ်နှင့်ပတ်သက်ပြီး နစကသတင်းထုတ်ပြန်ရေးအဖွဲ့သို့ ဆက်သွယ် မေးမြန်းထားသော်လည်း ပြန်လည်ဖြေကြားခြင်း မရှိသေးပေ။

CNI News

၂၀၂၃ခုနှစ်၊ ဇန်နဝါရီ ၂၀

လက်ရှိ မြန်မာနိုင်ငံမှာ ဖြစ်ပေါ်နေသည့် နိုင်ငံရေး အကျပ်အတည်းကြောင့် အိမ်နီးချင်းနိုင်ငံများ အနေဖြင့် မည်ကဲ့သို့သော အကျိုးအမြတ်များ ရနေသလဲဆိုခြင်းအပေါ် နိုင်ငံရေးအသိုင်းအဝိုင်းကြား သုံးသပ်လျှက် ရှိနေသည်။

မြန်မာနိုင်ငံသည် မငြိမ်းချမ်းသည့်အတွက် အိမ်နီးချင်းနိုင်ငံများ အနေဖြင့် အကျိုးအမြတ် ရရှိနေကြောင်း မြန်မာ့ နိုင်ငံရေးလေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

၎င်းက “အိမ်နီးချင်းနိုင်ငံတွေ အမြတ်ရနေတာကတော့ အကြီးအကျယ် အမြတ်ရတာပေါ့နော်၊ ဥပမာ ဆိုပါတော့ ဗျာ၊ မြန်မာမှာက မငြိမ်းချမ်းတဲ့ အခါကြတော့ ပထမတစ်ချက်က ဘင်္ဂလားဒေ့ရှ်နဲ့ ပတ်သက်တဲ့ ဒုက္ခသည် ပြဿနာတွေ မြန်မာပြည်က ကောင်းကောင်း မကိုင်တွယ်နိုင်ဘူး၊ မကိုင်တယ်နိုင်တဲ့ အတွက်ကြောင့်မို့လို့ ဒီဒုက္ခ သည်တွေ အပေါ်မှာ မူတည်ပြီးတော့ ဘင်္ဂလားဒေ့ရှ်က အကျိုးအမြတ် တစ်ခုရတယ်၊ နောက်တစ်ခုကြတော့ ထိုင်း ပေါ့နော်၊ ထိုင်းကအခု ကျနော်တို့ အမေရိကန် ကာကွယ်ရေးအက်ဥပဒေအရ သူတို့ ငွေထောက်ပံ့တယ် ဆိုပါတော့ ဒါတွေအားလုံးက ထိုင်းကတဆင့် လာတာလေ၊ တရုတ်က တစ်ဆင့် လာတာမဟုတ်ဘူး၊ တရုတ်က ဒါကို ဒီအက် (NDAA)ကြီးက ထိုင်ဝမ်မှာပါနေတော့ အမှန်တိုင်း ပြောရလို့ရှိရင် ဒီဥပဒေတွေနဲ့ မြန်မာပြည်ကို လုပ်လိုက်တာဟာ တကယ်တော့ တရုတ်ပြည်ကြီးကို အမှန်တိုင်း ပြောရလို့ရှိရင် ခြိမ်းခြောက်လိုက်တာပဲ၊ တစ်ဖက် တစ်လမ်းကနေ ပြီးတော့၊ ခုနငွေတွေဟာ KNU၊ ဘာညာအကုန် အဲလူတွေက ယိုးဒယားကနေ တဆင့် လာတဲ့အခါကြတော့ ထိုင်း မှာ ဘတ်(ထိုင်းငွေ)လဲတဲ့ အခါကြတော့ အကျိုးအမြတ် တစ်ခါရသွားတယ် ထိုင်းက၊ နောက်တစ်ခုက လက်နက် တွေလည်း ရသွားတယ်” ဟု ပြောသည်။

ဒီမိုကရေစီအရေး တောင်းဆို ဆန္ဒပြနေသူများကိုတွေ့ရစဉ် (ဖရွန်းတီးယားမြန်မာ)

လက်ရှိ မြန်မာနိုင်ငံတွင် လက်နက်ကိုင် ပဋိပက္ခများ ဖြစ်ပွားလျက်ရှိနေပြီး၊ နိုင်ငံရေး၊ စီးပွားရေး၊ လူမှုရေး၊ ကျန်းမာ ရေး၊ ပညာရေး စသည့် အကျပ်အတည်းများဖြင့် ရင်ဆိုင်နေရသည်။

မြန်မာ့နိုင်ငံရေး မတည်ငြိမ်မှုကြောင့် အိမ်နီးချင်းနိုင်ငံများ လက်နက်ရောင်းချခွင့် ရနေကြောင်း နိုင်ငံရေးလေ့လာ သုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “အိမ်နီးချင်းနိုင်ငံတွေရဲ့ အကျိုးအမြတ်ကတော့ တစ်ခုကတော့ လက်နက်ရောင်းချခွင့် ရတာပေါ့ကွာ၊ အိမ်နီးချင်း နိုင်ငံအနေနဲ့ဆိုရင် အိန္ဒိယနဲ့ တရုတ်ပေါ့၊ ရုရှားကလည်း လေယာဉ်နဲ့ ပတ်သက်တဲ့ ပစ္စည်းတွေ ရောင်း ပါတယ်၊ ဒါပေမဲ့ ရုရှားက ဒီလောက် မဟုတ်ပါဘူး။ ဘာလို့လဲဆိုတော့ နည်းနည်းဝေးတာကိုး နောက်ပြီးတော့ သူက လေကြောင်းထိုးစစ်နဲ့ပဲ ဆိုင်တဲ့ ပစ္စည်း၊ ပစ္စယတွေပဲ ရောင်းချနေတာ၊ အဓိကက‌တော့ တရုတ်ရဲ့ လက်နက် စီးကြောင်းတွေဟာ တရားဝင် ရောင်းချနေတာ မဟုတ်ပေမဲ့ ပြည်တွင်းမှာ အများဆုံး ဝင်ရောက် နေတာက‌တော့ တရုတ်ကနေ ဝင်ရောက်နေတာ ဖြစ်ပါတယ်၊ အိန္ဒိယကလည်း လက်နက်ကျည်နဲ့ ပတ်သက်တာရယ်၊ နောက်ပြီး တော့ ရေကြောင်းတိုးချဲ့ တည်ဆောက်ရေး ဘာညာဆိုတဲ့ကိစ္စတွေ အဲဒါတွေလည်း များပါတယ်၊ အဓိကကတော့ ဒီနေ့ ဗမာပြည်မှာ လက်နက်စီးဝင်မှုကတော့ တရုတ်ဆီကပဲ အဓိကဖြစ်ပါတယ်၊ ဒါပေမဲ့ တရုတ်က တရားဝင်တဲ့ လမ်းကြောင်းကနေပြီးတော့ ပို့တာမဟုတ်ပါဘူး။ UWSA ကနေတဆင့် ပို့နေတာ ဖြစ်ပါတယ်” ဟု ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ တရုတ်အထူးကိုယ်စားလှယ်ကိုတွေ့ရစဉ်

မြန်မာ့နိုင်ငံရေး မတည်ငြိမ်မှုကြောင့် အိမ်နီးချင်းနိုင်ငံများမှ လက်နက်များ ရောင်းချနေကြသလို မြန်မာ အလုပ် သမားများကိုလည်း ဈေးနှုန်းသက်သာစွာခေါ်ယူခွင့် ရနေကြောင်း၊ ပဋိပက္ခကြောင့် ထွက်ပြေးလာသည့် ဒုက္ခသည် များမှတဆင့် လူသားချင်း စာနာမှု အကူအညီများ ပေးအပ်ရေးကနေလည်း အကျိုးအမြတ်များ ရရှိနေကြောင်း ထောက်ပြလျက်ရှိနေကြသည်။

အလားတူ မြန်မာနိုင်ငံအတွင်း အကျိုးအမြတ် သို့မဟုတ် အခွင့်အရေး အများအပြား ရယူ၍ စီးပွားရေး ရင်းနှီးမြှုပ် နှံမှုများလည်း ရရှိနေကြကြောင်း ထောက်ပြနေကြသည်။

CNI News

၂၀၂၂ ခုနှစ်၊ ဇန်နဝါရီ ၁၈

မြန်မာ့ငြိမ်းချမ်းရေးဖြစ်စဉ်နှင့် ပတ်သက်ပြီး တရုတ်မှ ကူညီချင်သည်ဟု မိမိအား ပြောလာကြောင်း ရခိုင့်ဦးဆောင် ပါတီ(AFP)ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

တရုတ်နိုင်ငံဘက်က ရက္ခိုင့်တပ်တော် (ULA/AA) နှင့် မြန်မာ့တပ်တော်တို့ ဒုတိယအကြိမ် အပစ်အခတ် ရပ်စဲလိုက် သည်ကိုလည်း စိတ်ဝင်စားနေကြောင်း ၎င်းက ပြောသည်။

ဒေါက်တာအေးမောင်က “မြန်မာ့နိုင်ငံရေးကို စိတ်ဝင်စားပါတယ် တရုတ်ကလေ၊ ULA/AA နဲ့ မြန်မာ့တပ်မတော် ဒုတိယအကြိမ် အပစ်အခတ် ရပ်စဲသွားတဲ့ ကိစ္စလေးတွေလည်း သူတို့က သိချင်တယ်၊ သူတို့ (တရုတ်) ကိုယ်တိုင် ကလည်း ငြိမ်းချမ်းရေးကို ကူညီဆောင်ရွက်ပေးလိုတဲ့ သဘော ကျနော်တို့ ဒီစာသားလေးတွေကို ကြည့်တဲ့အခါမှာ ပြောတာဆိုတာလေးတွေကို ကြည့်တဲ့အခါမှာ ဒါမျိုးသုံးသပ်တာပေါ့၊ တရုတ်ပြည်ဖက်က ငြိမ်းချမ်းရေးဖြစ်စဉ်ကို ကူညီချင်တယ်၊ ULA/AA နဲ့ မြန်မာ့တပ်မတော်၊ နောက် မြောက်ပိုင်းလည်း ပါမှာပေါ့ဗျာ” ဟု CNI သတင်းဌာနသို့ ပြောသည်။

ရခိုင်ပြည်နယ်တွင် ULA/AA နှင့် တပ်မတော်တို့ ၂ နှစ်နီးပါး ရပ်နားထားသည့် တိုက်ပွဲမှာ ပြီးခဲ့သည့် ဩဂုတ်လ အတွင်းက တကျော့ပြန် ပြန်လည်ဖြစ်ပွားခဲ့သည်။

 AA စစ်ဦးစီးချုပ် ဗိုလ်ချုပ်ထွန်းမြတ်နိုင်ကိုတွေ့ရစဉ်

ထို့နောက် ရခိုင်ပြည်နယ်အတွင်းရှိ ဒေသခံလူထု၏ ဆုံးရှုံးနစ်နာမှုကို ထောက်ထား၍ နှစ်ဖက်အဖွဲ့အစည်းကြား နားလည်မှုယူ၍ ပြီးခဲ့သည့် နိုဝင်ဘာ ၂၆ ရက်က တိုက်ပွဲများ ပြန်လည်ရပ်စဲကြောင်း သဘောတူညီမှု ယူခဲ့ကြ သည်။

တရုတ်နိုင်ငံသည် ၎င်းတို့၏ အကျိုးစီးပွားအတွက် မြန်မာနိုင်ငံကို ငြိမ်းချမ်းစေချင်သည်မှာ အမှန်တရားဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

၎င်းက “အားလုံးကတော့ ကိုယ့်အကျိုးစီးပွားအပေါ် မူတည်ကြတာပေါ့နော်၊ မြန်မာပြည်ကြီးက အေးချမ်းသွား ပြီဆိုရင် ဒါကတော့ တရုတ်ပြည်သူ့သမ္မတနိုင်ငံ အတွက်ကတော့ အကျိုးကျေးဇူးတစ်ခုပဲလေ၊ တရုတ်က မြန်မာကို ငြိမ်းချမ်းရေးမှာ ကူညီချင်တယ်ဆိုတာလည်း ဒါကတော့ အမှန်တရားပါပဲ၊ တစ်ခုရှိတာက တရုတ်က သူက သူ့သမိုင်းစဉ်လာကိုက လက်တွေ့ဖြစ်တည်မှု သဘောတရားကို သူက သွားတဲ့ သဘောရှိတယ်၊ မူဝါဒတွေထက်ကို တကယ်အလုပ်ဖြစ်ဖို့ အတိုင်းအတာကို သူက စဉ်းစားတဲ့သဘောရှိတယ်၊ အဲဒီအခါကြတော့ သူ့မှာ ဘာပြဿနာ ဖြစ်နေသလဲဆိုရင် ကျနော်က သူတို့ စိတ်ထဲကို ကြည့်လိုက်တာ လက်ရှိ ရှိနေတဲ့ နိုင်ငံရေးအကျပ်အတည်းမှာ သူ့ ရဲ့ အကျိုးစီးပွားဖြစ်တဲ့ ပိုက်လိုင်းကိစ္စ၊ ပိုက်လိုင်းကိစ္စရယ်၊ ကုန်သွယ်မှု ကိစ္စပေါ့နော်၊ ပြီး‌တော့ အဲဒီနေရာတွေမှာ တရုတ်အနေနဲ့က မြန်မာကို ကူညီတယ်၊ ဒါပေမဲ့ တိုင်းရင်းသား လက်နက်ကိုင်တွေအပေါ်မှာလည်း သူက မစွန့်ပစ်နိုင်ဘူး။ လိုရင် လိုသလို ကစားမယ်ဆိုတဲ့ သဘောထားကို သွားပြီးတော့ တွေ့နေတယ်” ဟု ပြောသည်။

မြောက်ပိုင်းလက်နက်ကိုင် သုံးဖွဲ့နဲ့ NSPNC  ဆွေးနွေးပွဲကိုတွေ့ရစဉ်

တရုတ်နိုင်ငံ၏ ရင်းနှီးမြှပ်နှံမှုအဖြစ် ရခိုင်ပြည်နယ်ရှိ ကျောက်ဖြူ ရေနက်ဆိပ်ကမ်းမှ တရုတ်နိုင်ငံ၊ ယူနန်ခရိုင်ရှိ ကူမင်းမြို့သို့ မိုင်ပေါင်း ၄၇၉ မိုင် ရှည်လျားသည့် ရေနံနှင့် သဘာဝဓာတ်ငွေ့ ပိုက်လိုင်းများရှိသလို နယ်စပ် ကုန် သွယ်မှုမှတဆင့် ‌အမေရိကန်ဒေါ်လာ သန်းနှင့်ချီ ရရှိကြောင်း သိရသည်။

လက်ရှိ မြန်မာနိုင်ငံတွင် လက်နက်ကိုင် ပဋိပက္ခများ ဖြစ်ပွားလျက်ရှိနေပြီး၊ နိုင်ငံရေး၊ စီးပွားရေး၊ လူမှုရေး၊ ကျန်းမာ ရေး၊ ပညာရေး စသည့် အကျပ်အတည်းများဖြင့် ရင်ဆိုင်နေရသည်။

တရုတ် - မြန်မာ နှစ်နိုင်ငံနယ်နိမိတ်မှာ မိုင်ပေါင်း ၁၃၀၀ ကျော် ထိစပ်လျက်ရှိပြီး နယ်စပ်အနီးတွင် ကချင် လွတ်လပ်ရေးတပ်မတော် (KIA)၊ ရှမ်းပြည်ပြန်လည် ထူထောင်ရေး ကောင်စီ (RCSS/SSA)၊ ရှမ်းပြည်တိုးတက် ရေးပါတီ (SSPP/SSA)၊ ‘ဝ’ ပြည်သွေးစည်းညီညွတ်ရေးပါတီ (UWSA)၊ မြန်မာနိုင်ငံ အမှန်တရား နှင့် မျှတမှု အမျိုးသားပါတီ (MNDAA)၊ အမျိုးသားဒီမိုကရေစီ မဟာမိတ်တပ်မတော် (NDAA)၊ ပလောင်ပြည် လွတ် မြောက်ရေးတပ်ဦး (PSLF/TNLA) စသည့် လက်နက်ကိုင် အဖွဲ့အစည်းများ လှုပ်ရှားလျက်ရှိသည်။

CNI News

၂၀၂၃ ခုနှစ်၊ ဇန်နဝါရီ ၁၇

တောင်ပိုင်းစစ်ဒေသ၊ စစ်ဒေသခွဲအမှတ်(၃)ရှိ ပြည်သူ့ကာကွယ်ရေးတပ်ဖွဲ့(PDF) ဒေါနစစ်ကြောင်း၏ သင်တန်း ဆင်းပွဲနှင့် လက်နက်များ ပေးအပ်ခြင်းကို ဇန်နဝါရီ ၁၇ ရက်က ကျင်းပခဲ့သည်ဟု တောင်ပိုင်းစစ်ဒေသမှ ထုတ်ပြန် ခဲ့သည်။

အဆိုပါ အခမ်းအနားကို အမျိုးသားညီညီညွတ်ရေးအစိုးရ(NUG)၏ ဝန်ကြီးချုပ် မန်းဝင်းခိုင်းသန်း၊ အမျိုးသမီး၊ လူငယ်နှင့် ကလေးသူငယ်ရေးရာဝန်ကြီးဌာန ဒုဝန်ကြီး ဒေါ်အိသဉ္ဇာမောင်၊ တောင်ပိုင်းတိုင်း စစ်ဒေသမှ ဗိုလ်မှူးကြီး စောဖီးနစ်၊ တောင်ပိုင်းတိုင်းစစ်ဒေသ- စစ်ဒေသခွဲအမှတ်(၃)မှ ဒုစစ်ဒေသမှူး ဗိုလ်စောရှားတို့ တက်ရောက်ခဲ့ကြောင်း သိရသည်။