CNI News

၂၀၂၃ ခုနှစ်၊ ဖေဖော်ဝါရီ ၁၀

ဒီမိုကရေစီကို အကြမ်းဖက်နည်းလမ်းဖြင့် ရယူရန် လုပ်ဆောင်နေသည်ကို တွေ့မြင်ရကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

ဖေဖော်ဝါရီ ၉ ရက်နေ့ နံနက်ပိုင်းက ကျင်းပခဲ့သည့် နစက၏ ရှေ့လုပ်ငန်းစဉ်များနှင့်ပတ်သက်သော အစည်းအ ဝေးတွင် ၎င်းက ပြောကြားခဲ့ခြင်းဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ ဒီမိုကရေစီကို အကြမ်းဖက်နည်းလမ်းဖြင့် ရယူရန် လုပ်ဆောင်နေကြသည် ကို တွေ့မြင်ရကြောင်း၊ တိုင်းရင်းသား လက်နက်ကိုင်အဖွဲ့များ၏ ခံယူချက်များနှင့် ၎င်းအကြမ်းဖက်အဖွဲ့၏ ယုံ ကြည်ချက်၊ ခံယူချက်များ တူညီမှုမရှိကြောင်း၊ တိုင်းရင်းသားများ လက်နက်ကိုင် အဖွဲ့အစည်းအများစုသည် NCA အပေါ်တွင် လက်မှတ်ရေးထိုးထားခြင်းဖြစ်ကြောင်း၊ ၂၀၂၁ ခုနှစ် နောက်ပိုင်းတွင် ပေါ်ပေါက်လာသည့် လက်နက် ကိုင် အဖွဲ့အစည်းများသည် ဒီမိုကရေစီပေါ်တွင် သဘောထားကွဲလွဲမှုများကြောင့် ပေါ်ပေါက်လာသည့် အဖွဲ့အစည်း များဖြစ်ကြောင်း။ ဒီမိုကရေစီစနစ်တွင် လက်နက်ကိုင် အကြမ်းဖက်ခြင်းကို မည်သည့်နိုင်ငံ၊ မည်သည့် အစိုးရမှ ခွင့်ပြု ထားခြင်းမရှိ”ဟု ပြော သည်။

ဒီမိုကရေစီကို လက်နက်ကိုင် အကြမ်းဖက်နည်းလမ်းဖြင့် ရယူသွားသည်မှာ မည်သည့် အဖွဲ့အစည်းလဲဟု မေးခွန်း ထုတ်စရာဖြစ်နေကြောင်း၊ မြန်မာနိုင်ငံအတွင်းရှိ ပြည်သူတစ်ရပ်လုံးက ဒီမိုကရေစီကို လက်နက် အားကိုးဖြင့် အရ ယူသွားသည်မှာ မည်သည့်အဖွဲ့ သို့မဟုတ် လူပုဂ္ဂိုလ်ဖြစ်သည်ဟု ယုံကြည်ထားသလဲ မေး ကြည့်နိုင်ကြောင်း နိုင်ငံရေးလေ့လာသုံးသပ်သူများက ပြောသည်။

ဗိုလ်ချုပ်မှူးကြီးမင်းအောင်လှိုင်က “အကြမ်းဖက်မှုများကို ဒုတိယအကြိမ် အရေးပေါ် သက်တမ်းကာလတွင် ထိထိရောက်ရောက် ကိုင်တွယ်ဖြေရှင်းရန် လိုအပ်လာသဖြင့် အရေးကြီးသည့် မြို့နယ်များကို စစ်အုပ်ချုပ်ရေး အမိန့်များ တိုးမြှင့် သတ်မှတ်ခဲ့ရပြီး အကြမ်းဖက်မှုများ လျော့ပါးအောင် ကိုင်တွယ် ဆောင်ရွက်သွားမည်ဖြစ် ကြောင်း၊ စစ်အုပ် ချုပ်ရေး သတ်မှတ်ခြင်းသည် ပြစ်မှုကျူးလွန်သူများအတွက်သာဖြစ်ပြီး ပြည်သူများကို ကြေညာ ခြင်း မဟုတ်ကြောင်း၊ ပြည်သူများအနေဖြင့် စည်းကမ်းနှင့်အညီ လွတ်လပ်စွာ နေထိုင်သွားလာ လှုပ်ရှားနိုင် ကြောင်း၊ လာမည့် ၆ လတာ ကာလအတွင်း အဆိုပါ ဒေသများ၏ တည်ငြိမ်အေးချမ်းမှုသည်လည်း အတိုင်းအတာ တစ်ခုအထိ တိုးတက်လာမည်ဟု ယူဆသည်”ဟု ပြောသည်။

ထို့နောက် တပ်မတော်သည် နိုင်ငံတော်ကို ပါတီစုံစနစ်ပေါ်တွင် ခိုင်ခိုင်မာမာရပ်တည် နိုင်စေရန် ထိန်း သိမ်း စောင့်ရှောက်ပေးသည့် Guardian အဖွဲ့အစည်းတစ်ခုဖြစ်နေမည့် အဖွဲ့အစည်း အဖြစ် ခံယူထား ကြောင်း၊ မိမိတို့ သည် လုံခြုံရေးနှင့် တည်ငြိမ်အေးချမ်းရေးအတွက် ဆက်လက် ဆောင်ရွက်နေခြင်းဖြစ်သည်ကို ပြောကြား လို ကြောင်း၊ ရွေးကောက်ပွဲ ကျင်းပပြီးပါက အနိုင်ရရှိသည့် ပါတီကို နိုင်ငံတော်တာဝန် လွှဲပြောင်းပေး မည်ဖြစ် ကြောင်း ပြောသည်။

တခြား တစ်ဖက်မှာတော့ နစက ကျင်းပမည့် ရွေးကောက်ပွဲကို မပျက်ပျက်အောင် ဖျက်ဆီးမည်ဟု အမျိုးသား ညီညွတ်ရေးအစိုးရ(NUG)၊ ပြည်သူ့ကာကွယ်ရေးတပ်ဖွဲ့(PDF)၊ ဒေသခံကာကွယ်ရေးတပ်ဖွဲ့(LDP)နှင့် တိုင်းရင်း သား လက်နက်ကိုင်အဖွဲ့အစည်း တချို့က ထုတ်ဖော် ပြောကြားထားသည်။

CNI News

၂၀၂၃ ခုနှစ်၊ ဖေဖော်ဝါရီ ၉

ကရင်လက်နက်ကိုင် တပ်ဖွဲ့အချင်းချင်း လက်နက်ကိုင် စစ်ရေးနည်းလမ်းဖြင့် ဖြေရှင်းမှုထက် တွေ့ဆုံဆွေးနွေး အဖြေရှာသင့်ကြောင်း ကရင်အမျိုးသား ဒီမိုကရက်တစ်ပါတီမှ ဥက္ကဋ္ဌ မန်းအောင်ပြည်စိုးက CNI သတင်းဌာနသို့ ပြောသည်။

ကရင်အမျိုးသားအစည်းအရုံး (KNU) တပ်မဟာ ၄ နှင့် ကော်သူးလေတပ်မတော်(KTLA) တို့သည် တစ်ဖက်နှင့် တစ်ဖက် ဆက်ဆံရေး ပိုတင်းမာလာသည်ကို တွေ့ရပြီး ကရင်လက်နက်ကိုင် အချင်းချင်းအကြား ဖြစ်ပေါ်သော ပဋိပက္ခများကို ဖြေရှင်းရာမှာ လက်နက်ဖြင့် ဖြေရှင်းခြင်းသည် ကရင်လူထုအနေဖြင့် လုံးဝလက်ခံနိုင်သည့် အရာ မဟုတ်ကြောင်း ဖေဖော်ဝါရီ ၇ ရက်က တနင်္သာရီတိုင်းဒေသကြီးအတွင်းရှိ ကရင်လူထုများမှ သဘောထား ထုတ် ပြန်ခဲ့သည်။

အဆိုပါ ထုတ်ပြန်ချက်မှာ မှန်ကန်ကြောင်း၊ အချင်းချင်း တွေ့ဆုံဆွေး‌နွေးပြီးမှ ဖြေရှင်းစေလိုကြောင်း မန်းအောင်ပြည်စိုးက CNI သတင်းဌာနသို့ ပြောသည်။

၎င်းက “အဲဒါ သိပ်မှန်တယ်လို့ပဲ ကျနော်ပြောလိုက်တော့မယ်၊ တိုတိုတုတ်တုတ်ပဲ၊ သူတို့ရဲ့ ထုတ်ပြန်ချက်က သိပ်မှန်တယ်လို့ လက်နက်ကိုင်ဖြေရှင်းဖို့ မသင့်ဘူး၊ အချင်းချင်း တွေ့ဆုံဆွေး‌နွေးပြီးတော့မှ ကရင်တပ်ဖွဲ့ အချင်း ချင်းပဲဆိုတော့ ဒီလို လက်နက်နဲ့ ဖြေရှင်းကြလို့ရှိရင် တိုက်ပွဲ ပြီးဆုံးမှာ မဟုတ်ဘူး။ ကျန်တဲ့ ဒီဖက်က ဆန့်ကျင် ဘက် အဖွဲ့အစည်းလို့ပဲ ပြောပြော တပ်မတော်နဲ့လည်း လုပ်လာခဲ့တာ နှစ်ပေါင်း ၇၀ ကျော်နေပြီ ဒါလည်း မဖြေ ရှင်းနိုင်တဲ့ဟာကို ကိုယ့်အချင်းချင်းကြ ပိုဆိုးတာပေါ့ဗျာလို့ ကျနော်အဲဒီလိုပဲ ပြောချင်တယ်” ဟု ပြောသည်။

စောနယ်ဒါးမြကို တွေ့ရစဉ်

ကရင်လက်နက်ကိုင် အချင်းချင်းအကြား လက်နက်ကိုင် အဖြေရှာခြင်းမှာ ကရင်လူထုအတွက် ကောင်းမွန်သည့် ရလဒ်ကို မပေးခဲ့သလို ဆိုးရွားသည့် အခြေအနေသို့သာ တွန်းပို့ကြောင်း ကရင့်တော်လှန်‌ရေး၏ ခါးသီးသော အတွေ့အကြုံများမှလည်း သင်ခန်းစာများ ရယူစေလိုကြောင်း ထုတ်ပြန်ချက်တွင် ဖော်ပြထားသည်။

လက်ရှိ ဖြစ်ပွားနေသည့် ပြဿနာများကို တွေ့ဆုံညှိနှိုင်းသင့်ကြောင်း၊ KNU ၏ မူကို လက်ခံဖြေရှင်းပါက အဆင် ပြေမည်ဟု မြင်မိကြောင်း ကရင်ငြိမ်းချမ်းရေး အထောက်အကူပြု ကွန်ယက် (KPSN) မှ စောလေးကပေါက CNI သတင်းဌာနသို့ ပြောသည်။

၎င်းက “ KNU ရဲ့ မူကို လက်ခံတယ်ဆိုရင်တော့ ခွဲထွက်ရေးတို့၊ ကွဲပြားရတာတွေက ပိုမိုပြီးတော့မှ နည်းမယ်ပေါ့ နော်၊ ပြဿနာဖြစ်တာ ပိုနည်းမယ်ပေါ့၊ အရင်ကတည်းကလည်း တစ်လျှောက်လုံးကလည်း အရင်က ကျနော်တို့ တပ်မဟာ ၄ မှာရှိတဲ့ KNU ကပဲ ပိုပြီးမှ ဦးဆောင်နေတာ ရှိတာကိုး KNU ပဲ ဒီတော်လှန်ရေးမှာ တစိုက်မတ်မတ် လုပ်ဆောင်ခဲ့တာဆိုတော့ တွေ့ဆုံဆွေးနွေးတဲ့ အခါမှာလည်း KNU မူကို ပိုပြီးမှ ကျင့်သုံးတဲ့ဟာမျိုး ဆွေး‌နွေးတဲ့ ဟာမျိုးဆိုရင် ပိုကောင်းတဲ့ အဖြေရမယ်လို့ ကျနော် မြင်တယ်” ဟု ပြောသည်။

KNU တပ်မဟာ ၄ ကိုတွေ့ရစဉ်

ကော်သူးလေတပ်မတော်ကို ပြီးခဲ့သည့် ၂၀၂၂ ခုနှစ်၊ ဇူလိုင်လအတွင်းက ကရင်အမျိုးသားကာကွယ်ရေးအဖွဲ့ (KNDO) ၏ စစ်ဦးစီးချုပ် တာဝန်မှ ရပ်ဆိုင်းခြင်း ခံခဲ့ရသည့် ဗိုလ်မှူးချုပ် စောနယ်ဒါးမြက ဖွဲ့စည်းခဲ့ပြီး KNU တပ်မဟာ ၄ နယ်မြေတွင် လှုပ်ရှားလျက်ရှိကြောင်း သိရသည်။

ထို့နောက် နှစ်ဖက် အချင်းချင်းကြား ပဋိပက္ခများမှာ ပိုမို ကြီးထွားလာပြီး လက်နက်ကိုင် ဖြေရှင်းသည့် နည်းလမ်း များပါ ပါဝင်လာကာ နှစ်ဖက်အပြန်အလှန် ပစ်ခတ်မှုများ၊ ခြိမ်းခြောက်ပြောဆိုမှုများ၊ စွပ်စွဲပြောဆိုမှုများ ရှိလာခဲ့သည်။

CNI News

၂၀၂၃ ခုနှစ်၊ ဖေဖော်ဝါရီ ၈

ယခင်အစိုးရလက်ထက် ရွေးကောက်ပွဲ၌ သိက္ခာမဲ့သော ရွေးကောက်ပွဲဖြစ်ခဲ့သဖြင့် မိမိတို့အနေဖြင့် သိက္ခာရှိ သည့် ရွေးကောက်ပွဲ ကျင်းပနိုင်ရေး အဘက်ဘက်မှ ကြိုးပမ်းဆောင်ရွက်လျက်ရှိသည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

ဧရာဝတီတိုင်းဒေသကြီး၊ ဟိုင်းကြီးကျွန်းနှင့် ငပုတောမြို့နယ်တို့ရှိ ခရိုင်၊ မြို့နယ်အဆင့် ဌာနဆိုင်ရာတာဝန်ရှိသူ များ၊ မြို့မိမြို့ဖများနှင့် ယနေ့ (ဖေဖော်ဝါရီ ၈ ရက်)တွင် တွေ့ဆုံစဉ် အထက်ပါအတိုင်း ၎င်းက ပြောခဲ့ခြင်း ဖြစ် သည်။

ဗိုလ်ချုပ်မှူးကြီးမင်းအောင်လှိုင်က “ရွေးကောက်ပွဲ ဆောင်ရွက်ရန်အတွက် အချို့သော တိုင်းဒေသကြီးနှင့် ပြည်နယ်အချို့တွင် အခက်အခဲများရှိနေသေးကြောင်း၊ ရွေးကောက်ပွဲကို ကျင်းပရာတွင် ပြည်သူလူထုက လက်ခံသည့် သိက္ခာရှိသည့် ရွေးကောက်ပွဲကို ကျင်းပနိုင်ရမည်ဖြစ်ကြောင်း၊ ယခင်အစိုးရလက်ထက် ရွေး ကောက်ပွဲ၌ သိက္ခာမဲ့သော ရွေးကောက်ပွဲဖြစ်ခဲ့သဖြင့် မိမိတို့အနေဖြင့် သိက္ခာရှိသည့် ရွေးကောက်ပွဲ ကျင်းပ နိုင်ရေး အဘက်ဘက်မှ ကြိုးပမ်းဆောင်ရွက်လျက်ရှိကြောင်း၊ထို့ကြောင့် နိုင်ငံ့တာဝန် ထမ်းဆောင်နေသူများ အနေဖြင့်လည်း ဝန်ထမ်းတစ်ဦးအနေဖြင့် မိမိတို့တတ်နိုင်သည့်ဘက်မှ ဝိုင်းဝန်ကြိုးပမ်း ဆောင်ရွက်ရမည်” ဟု ပြောသည်။

ထို့နောက် ၂၀၂၀ ပြည့်နှစ် ပါတီစုံဒီမိုကရေစီ အထွေထွေရွေးကောက်ပွဲတွင် ဖြစ်ပေါ်ခဲ့သည့် မဲမသမာမှုဖြစ်စဉ် များကြောင့် မိမိတို့အနေဖြင့် နိုင်ငံတော်၏ တာဝန်များကို ထမ်းဆောင်ခဲ့ရခြင်းဖြစ်ကြောင်း၊ မိမိအနေဖြင့် ၂၀၁၉ ခုနှစ်နှင့် ၂၀၂၀ ပြည့်နှစ် အစောပိုင်းကာလများတွင် ရွေးကောက်ပွဲသည် လွတ်လပ်ပြီး တရားမျှတသည့် ရွေး ကောက်ပွဲ ဖြစ်ရန် လိုအပ်သည့် အခြေအနေများနှင့် တစ်ဦးချင်းစီ၏ အခွင့်အရေးများ ဆုံးရှုံးမှုမရှိစေရေး လူတိုင်းမဲပေးရန် လိုအပ်သည့် အခြေအနေများနှင့် ပတ်သက်၍ ပြောကြားခဲ့ကြောင်း၊ သို့သော် ရွေးကောက်ပွဲ မတိုင်မီ မဲဆွယ်စည်းရုံးမှုကာလများနှင့် ရွေးကောက်ပွဲ ကာလများတွင်လည်း မဲမသမာမှုများ ဖြစ်ပေါ်စေနိုင်မည့် လုပ်ဆောင်ချက်များကို တွေ့ရှိခဲ့ရကြောင်း ၎င်းက ပြောသည်။

ဗိုလ်ချုပ်မှူးကြီးမင်းအောင်လှိုင်က “ အဆိုပါ ကာလတွင် အစိုးရ၏ ရွေးကောက်ပွဲနှင့်ပတ်သက်၍ ဆောင်ရွက် ချက်များမှာ သံသယဖြစ်ဖွယ်တွေ့ရှိရကြောင်း၊ အစိုးရအနေဖြင့် ရွေးကောက်ပွဲ အကြိုကာလ ကြိုတင်မဲပေးချိန် တွင်လည်း ကိုဗစ်-၁၉ ရောဂါထိန်းချုပ်မှုကို အကြောင်းပြ၍မဲမသမာမှုများ ပြုလုပ်ခဲ့သည်ကို စိစစ်တွေ့ရှိခဲ့ရ ကြောင်း၊ ရွေးကောက်ပွဲရလဒ်များ ထွက်ပေါ်လာသည့်အချိန်တွင် မဖြစ်နိုင်ဖွယ်ရာ မဲစာရင်း ကွဲလွဲမှုများကို တွေ့ ရှိရသည့်အတွက် ကျွမ်းကျင်ပညာရှင်များဖြင့် မဲစာရင်းစစ်ဆေးမှုများကို ဆောင်ရွက်ခဲ့ကြောင်း၊ မဲစာရင်းကြီးမား စွာ ကွဲလွဲမှုများအပေါ် ဖြေရှင်းဆောင်ရွက်ပေးရန် မိမိတို့အနေဖြင့် တာဝန်ရှိသူများကို အကြိမ်ကြိမ်ပြောဆိုခဲ့ သော်လည်း ၎င်းတို့အနေဖြင့် ဖြေရှင်းဆောင်ရွက်ပေးခြင်းမရှိသည့်အပြင် တတိယအကြိမ် လွှတ်တော်ခေါ်ယူ၍ နိုင်ငံတော်၏ အာဏာကို အတင်းအဓမ္မရယူရန်အထိ ဆောင်ရွက်လာခဲ့ခြင်းကြောင့် ယခုအခြေအနေထိ ဖြစ် ပေါ်ခဲ့ရခြင်းဖြစ်သည်”ဟု ပြောသည်။

၂၀၂၀ အထွေထွေရွေးကောက်ပွဲမှာ ဒေါ်အောင်ဆန်းစုကြည် မဲထည့်နေစဉ်

လက်ရှိ မြန်မာနိုင်ငံတွင် တပ်မတော်က ၂၀၂၁ ခုနှစ်၊ ဖေဖော်ဝါရီ ၁ ရက်ကစတင်၍ အမျိုးသားဒီမိုကရေစီအဖွဲ့ ချုပ်(NLD)အစိုးရက ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ အရေးပေါ် ကြေညာထားသည်။

အဆိုပါ အရေးပေါ် ကြေညာထားမှုသည် ၂၀၂၂ ခုနှစ်၊ ဇန်နဝါရီ ၃၁ ရက်က ၂ နှစ်ပြည့်ခဲ့သော်လည်း သာမန် အခြေအနေ မဟုတ်သေးဟုကာ ၂၀၀၈ ဖွဲ့စည်းပုံအခြေခံဥပဒေ ပုဒ်မ ၄၂၅ အရ အရေးပေါ်ကာလကို ၆ လ သက်တမ်းတိုးကြောင်း ထုတ်ပြန်ကြေညာခဲ့သည်။

ထိုသို့ နိုင်ငံတော်အား တပ်မတော်က အရေးပေါ် ကြေညာထားခြင်းနှင့်အတူ NLD ပါတီဝင်များ၊ ဒီမိုကရေစီ အရေး လှုပ်ရှားသူများ၊ လက်နက်ကိုင်အဖွဲ့အစည်းများက နွေဦးတော်လှန်ရေးဟုကာ လက်နက်ကိုင် တိုက်ခိုက် ၍ တပ်မတော်ကို ဖြုတ်ချရန် ကြိုးပမ်းလျက်ရှိနေသည်။

NUG ၏ ဝန်ကြီးချုပ်အဖြစ် တာဝန်ယူနေသူ မန်းဝင်းခိုင်သန်းနဲ့ PDF တပ်ဖွဲ့ကိုတွေ့ရစဉ်

ထိုလက်နက်ကိုင် ပဋိပက္ခများသည် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ကရင်ပြည် နယ်၊ ကယားပြည်နယ်တို့မှာ ပြင်းပြင်းထန်ထန် ဖြစ်ပွားနေသည်။

ထို့နောက် ၂၀၂၃ ခုနှစ်အတွင်း နစက-က ကျင်းပရန် ပြင်ဆင်နေသည့် ရွေးကောက်ပွဲကို အမျိုးသားညီညွတ်ရေး အစိုးရ(NUG)၊ ပြည်သူ့ကာကွယ်ရေးတပ်ဖွဲ့(PDF)၊ ဒေသခံကာကွယ်ရေးတပ်ဖွဲ့(LDF) တို့ အပါအဝင် ချင်းအမျိုး သား တပ်ဦး(CNF)၊ ကရင်အမျိုးသားအစည်းအရုံး(KNU)၊ ကချင်လွတ်လပ်ရေးတပ်မတော်(KIA)၊ ကရင်နီတပ် မတော်(KA)တို့က မပျက်ပျက်အောင် ဖျက်မည်ဟု ပြောကြားထားသည်။

CNI News

၂၀၂၃ ခုနှစ်၊ ဖေဖော်ဝါရီ ၈

ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (USDP) နှင့် ဖက်ဒရယ်ဒီမိုကရက်တစ်ပါတီတို့ ရွေးကောက်ပွဲ ဝင်ရောက်ယှဉ်ပြိုင်ရန် မှတ်ပုံတင် ပြန်တင်လိုက်ကြောင်း သိရသည်။

ယခင် ဒီမိုကရက်တစ်ပါတီ (မြန်မာ)အစား ဖက်ဒရယ်ဒီမိုကရက်တစ်ပါတီဟု အမည်ပြောင်းလဲ၍ မှတ်ပုံတင် ခဲ့ကြောင်း ဖက်ဒရယ်ဒီမိုကရက်တစ်ပါတီမှ ဒေါ်ချိုချိုကျော်ငြိမ်းက CNI သတင်းဌာနသို့ ပြောသည်။

၎င်းက “လောလောဆယ်ကတော့ အန်တီတို့က အခုပဲလေ ဖက်ဒရယ်ဒီမိုကရက်တစ်ပါတီဆိုပြီးတော့ မနေ့ကပဲ မှတ်ပုံသွားတင်တယ်၊ ပြည်ခိုင်ဖြိုးက ပထမ အန်တီတို့က ဒုတိယနော်၊ မနေ့ကပဲ သွားတင်တာ အဲဒါလာတင် တာလေ နေပြည်တောင်ကို” ဟု ပြောသည်။

USDP ပါတီကိုတွေ့ရစဉ်

ဖက်ဒရယ်ဒီမိုကရက်တစ်ပါတီနှင့် ဦးစောသန်းမြင့် ဦးဆောင်သည့် ဖက်ဒရယ်ပြည်ထောင်စုပါတီနှင့် ပူးပေါင်းပြီး ရွေးကောက်ပွဲဝင်မည်ဟု သတင်းထွက်ပေါ်လာ‌သော်လည်း မိမိအနေဖြင့် အဆိုပါ ကိစ္စကို မသိရှိရသေးကြောင်း ဒေါ်ချိုချိုကျော်ငြိမ်းက ပြောသည်။

ရွေးကောက်ပွဲ ဝင်ရောက်ယှဉ်ပြိုင်ရန် ပါတီမှတ်ပုံတင် ပြန်တင်သည့် ကိစ္စနှင့် ပတ်သက်၍ အကြောင်းစုံသိရှိနိုင်ရေး USDP မှ တာဝန်ရှိသူများထံ CNI က ဖုန်းဆက်သွယ်ခဲ့သော်လည်း ဖုန်းလက်ခံ ဖြေကြားခြင်း မရှိပေ။

သို့သော် နီးစပ်သူများကတော့ USDP ပါတီသည် ပါတီမှတ်ပုံတင်ခြင်းကို ပြန်လည် လုပ်ဆောင်ထားပြီဖြစ်ကြောင်း သိရသည်။

ဖက်ဒရယ်ဒီမိုကရက်တစ်ပါတီ အနေဖြင့် ပဲခူးတိုင်းဒေသကြီးအတွင်း ဝင်ရောက်ယှဉ်ပြိုင်မှာ ဖြစ်ကြောင်း၊ တိုင်းပြည်ငြိမ်းချမ်းရေး၊ လူထုကောင်းကျိုးအတွက် ဦးတည်လုပ်ဆောင်ခြင်းဖြစ်ကြောင်း ဒေါ်ချိုချိုကျော်ငြိမ်းက ပြောသည်။

UEC နဲ့ နိုင်ငံရေးပါတီများတွေ့ဆုံစဉ်

၎င်းက “အန်တီတို့ကတော့လေ၊ အစကတည်းက ၈၈ ကတည်းက ကိုယ့်တိုင်းပြည်၊ ကိုယ့်လူမျိုး ကောင်းအောင်၊ ကြီးပွားအောင်၊ တိုးတက်အောင်ပဲ ရည်မှန်းပြီးတော့ပဲ နိုင်ငံရေး လုပ်ကြတာပဲလေ၊ အန်တီတို့ ပါတီမှာလည်း စိတ်တူကိုယ်တူ ဒီလိုလူမျိုးတွေပဲရှိတယ်၊ ကိုယ်ပိုင်တဲ့၊ ကိုယ်တာဝန်ယူနိုင်တဲ့ တိုင်းအလိုက်ပဲ ကြိုးစားပြီး လုပ်နေ ကြတယ်၊ အန်တီတို့ကလည်း ဒီအတိုင်းပဲ ဦးစောသန်းမြင့်တို့လည်း ဒီအတိုင်းပဲရှိမှာပါ၊ အားလုံး တူတူပါပဲလေ၊ အဲဒီ တော့ အန်တီတို့ကလည်း ကိုယ့်ဟာကိုယ် သားသိတဲ့အတိုင်း စည်းမျဉ်းတွေကလည်း ကြပ်တယ်၊ ပိုက်ဆံကလည်း နည်းနည်းများတယ်နော် အန်တီအမြင် ပြောတာပေါ့၊ အန်တီတို့က နိုင်ငံရေးသမားဆိုတော့ ပိုက်ဆံတော့ အဖွဲ့ အစည်းတိုင်းက တချို့နေရာမှာ ပိုက်ဆံပေါတယ်၊ အန်တီတို့ကတော့ ကိုယ့်ကိုယ်ပိုင် ပိုက်ဆံနဲ့ လုပ်ကြရတာဆို တော့လေ အဲလိုတော့ မများဘူးပေါ့၊ ကိုယ်တစ်နိုင် တစ်နိုင်၊ နိုင်မယ်ထင်မယ့် တိုင်းလို့ပဲ ကိုယ်ကြိုးစားပြီး လုပ်တာ ပါ၊ ဦးတည်ချက်ကတော့ တိုင်းပြည်ကောင်းဖို့ပါ၊ ငြိမ်းချမ်းချင်တယ်၊ တိုင်းပြည်ကောင်းချင်တယ်၊ ပြည်သူလူထု အားလုံး ငြိမ်းငြိမ်းချမ်းချမ်းနဲ့ တိုင်းပြည်ကို ကြီးပွားချင်တယ်” ဟု CNI သတင်းဌာနသို့ ပြောသည်။

နိုင်ငံရေးပါတီအဖြစ် ဆက်လက် တည်ထောင်လိုပါက ဥပဒေစတင်ပြဋ္ဌာန်းသည့် နေ့ရက်မှစ၍ ရက်ပေါင်း ၆၀ အတွင်း ကော်မရှင်သို့ ဥပဒေ၊ နည်းဥပဒေများနှင့်အညီ လျှောက်ထားရမည်ဖြစ်ကြောင်း၊ အဆိုပါ သတ်မှတ်ရက် အတွင်း လျှောက်ထားခြင်း မရှိပါက နိုင်ငံရေးပါတီအဖြစ်မှ အလိုအလျှောက် ပျက်ပြယ်ပြီးဖြစ်ကြောင်း နစကမှ ၂၀၂၃ ခုနှစ်၊ ဇန်နဝါရီ ၃၁ ရက်မှာ ထုတ်ပြန်ခဲ့သည်။

ထို့နောက် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၊ ဖက်ဒရယ်ဒီမိုကရက်တစ်ပါတီတို့သည် ပထမဦးဆုံး မှတ်ပုံ တင် ပြန်တင်သည့် နိုင်ငံရေးပါတီများ ဖြစ်သည်။

CNI News

၂၀၂၃ ခုနှစ်၊ ဖေဖော်ဝါရီ ၈

ကရင်ပြည်နယ်၊ ကော့ကရိတ်မြို့နယ်သည် စစ်အုပ်ချုပ်ရေးအဖြစ် ကြေညာထားသော မြို့နယ်များထဲတွင် ပါဝင်သဖြင့် ထိုင်းနိုင်ငံသို့ တရားဝင်စေလွှတ်နေသည့် MOU လုပ်သားများ၏ လုံခြုံရေးမှာ ပို၍ စိုးရိမ်ရကြောင်း ထိုင်းအခြေစိုက် အလုပ်သမားအရေး ဆောင်ရွက်သူများက CNI သတင်းဌာနသို့ ပြောသည်။

လက်ရှိတွင် MOU လုပ်သားများအား စေလွှတ်ရာတွင် မြဝတီ-မဲဆောက် အမှတ် (၂) တံတား လမ်းကြောင်းမှ အဓိကအများဆုံးစေလွှတ်ခြင်းဖြစ်ပြီး ထိုသို့စေလွှတ်ရာတွင် မြဝတီ-ကော့ကရိတ် (အာရှလမ်းမကြီး) မှ ဖြတ်သန်းသွားလာရခြင်းဖြစ်သည်။

ထို့ကြောင့် ယခုကဲ့သို့ စစ်အုပ်ချုပ်ရေးကြေညာလိုက်သည့်အခါတွင် အလုပ်သမားများအတွက် စိုးရိမ်စရာ ဖြစ်ကြောင်း အလုပ်သမားအရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။

“ဒီလို ရွှေ့ပြောင်းအလုပ်သမားစေလွှတ်တဲ့လမ်းကြောင်းမှာ စစ်ဇုန်အဖြစ် ကြေညာတာ တစ်နည်းအားဖြင့် စစ်ရိပ် မျက်နှာစာအဖြစ်ကြေညာတာတွေဟာ အပြစ်မဲ့တဲ့ သွားလာနေတဲ့ ရွှေ့ပြောင်းအလုပ်သမားအပါအဝင် နယ်မြေခံ ပြည်သူတွေအတွက်လည်း အန္တရာယ်ကြီးတာပေါ့။ ဒါဟာ အကြောက်တရားတစ်ခု ပိုမို ဖြစ်စေဖို့အတွက် တံဆိပ် ရိုက်လိုက်တယ်လို့ မြင်တယ်။ ဒီအလုပ်သမားတွေကို တာဝန်ယူစေလွှတ်တဲ့ သက်ဆိုင်ရာ အေဂျင်စီ တွေအပေါ်မှာ ပိုတာဝန်ကြီးသွားတာပေါ့။ နောက်တစ်ခုက ကျနော်တို့နိုင်ငံမှာ ပွင့်ပွင့်လင်းလင်း ပြောရရင် တရားဥပဒေစိုးမိုးမှုဆိုတာ လုံးဝ လုံးဝ မရှိဘူး ဖြစ်တဲ့အတွက် အလုပ်သမားတစ်ယောက်ချင်းစီရဲ့ လုံခြုံရေးကို ကိုယ့်လုံခြုံရေးကို ကိုယ်တိုင်သတိထားဖို့ လိုအပ်သလို ဒီအလုပ်သမားတွေကို တာဝန်ယူ စေလွှတ်တဲ့ အေဂျင်စီက ပိုမိုပြီးတော့မှ ဂရုစိုက်သင့်တယ်၊ တာဝန်ယူသင့်တာပေါ့နော်။ နောက် အလုပ်သမားတွေ အစုလိုက် အပြုံလိုက် ရာနဲ့ချီ ထောင်နဲ့ချီ express ကားကြီးတွေနဲ့ တောတောင် ဖြတ်ပြီးတော့ နယ်စပ်ကိုလာတာဖြစ်တဲ့အတွက် အင်မတန် အန္တရာယ်ကြီးတာပေါ့” ဟု ၎င်းက ပြောသည်။

MOU ဖြင့် စေလွှတ်နေသည့် မြန်မာအလုပ်သမားများ

စစ်အုပ်ချုပ်ရေးအဖြစ် ကြေညာထားသည်ဆိုသော်လည်း တိုက်ပွဲများ မဖြစ်ပွားပါက ရွှေ့ပြောင်းအလုပ်သမားများ သာမက ဒေသခံများအတွက်ပါ အဆင်ပြေသော်လည်း တိုက်ပွဲများဖြစ်ပွားခဲ့ပါက မိမိလုံခြုံရေးအား မိမိသာလျှင် တာဝန်ယူရမည့် အနေအထားဖြစ်ကြောင်းလည်း ထိုင်းအခြေစိုက် အလုပ်သမားအရေးဆောင်ရွက်သူများက ပြောသည်။

ပြည်တွင်းတွင် အလုပ်အကိုင်အခွင့်အလမ်း ရှားပါးခြင်း၊ လုပ်ခလစာနည်းပါးခြင်း၊ ကုန်ဈေးနှုန်းများ မြင့်တက် ခြင်းတို့ကြောင့် အိမ်နီးချင်းနိုင်ငံများသို့ နယ်စပ်လမ်းကြောင်းများမှ တရားဝင်သာမက တရားမဝင်နည်းလမ်းဖြင့်ပါ သွားရောက် အလုပ်လုပ်ကိုင်နေကြခြင်းဖြစ်သည်။

ထို့ကြောင့် ယခုကဲ့သို့ စစ်အုပ်ချုပ်ရေးအဖြစ် ကြေညာထားသည့်အတွက် MOU အလုပ်သမားများသာမက ထိုင်းနိုင်ငံသို့ တရားမဝင် သွားရောက်လုပ်ကိုင်မည့်သူများအနေဖြင့်ပါ ယခင်ထက်ပို၍ သတိထား သွားလာရန်သာ အရေးကြီးကြောင်း ထိုင်းအခြေစိုက် အလုပ်သမားအရေးဆောင်ရွက်သူများက အကြံပြုသည်။

MWRN မှ အလုပ်သမားတာဝန်ခံ ဦးဘရီက “စစ်အုပ်ချုပ်ရေးအနေနဲ့ ကြေညာထားတယ်ဆိုတော့ သူတို့အတွက် လည်း စိတ်ပူရတာပေါ့။ သွားရလာရတာ အရင်ကထက် အလုပ်သမားတွေအတွက် စိုးရိမ်စရာဖြစ်တာပေါ့။ စစ်ပွဲတွေ ဘာတွေဖြစ်လာမယ်၊ အင်မတန်မှ အနှောင့်အယှက်တွေ ဖြစ်လာနိုင်တာပေါ့။ စစ်ပွဲဖြစ်၊ မဖြစ် အဲဒီ အပေါ်မှာပဲ မူတည်ပါတယ်။ စစ်ပွဲမဖြစ်ရင်တော့ သိပ်စိုးရိမ်စရာ မရှိလောက်ပါဘူး။ စစ်ပွဲဖြစ်ရင်တော့ MOU နဲ့ လာတဲ့ အလုပ်သမားတွေလည်း ရပ်နားနိုင်ဖွယ် ရှိတာပေါ့။ တိုက်ပွဲတွေဘာတွေဖြစ်ပြီဆိုရင် အောက်လမ်းက လူတွေအတွက်လည်း ဒါ သွားလာရတာ အင်မတန်မှ ခက်ခဲတယ်။ အလုပ်သမားတွေပဲဖြစ်ဖြစ်၊ ဒေသခံတွေပဲ ဖြစ်ဖြစ်၊ ကျနော်တို့အမြင်ကတော့ ကိုယ့်ကိုယ်ကိုကနေပြီး လုံခြုံဖို့အတွက် ကိုယ့်ကိုယ်ကိုပဲ စောင့်ရှောက်ရမယ့် အနေအထားပါ။ တကူးတကကို ပြည်တွင်းမှာကတော့ ခရီးသွားပြည်သူတွေအတွက်သော်လည်းကောင်း၊ MOU နဲ့ လာတဲ့ ရွှေ့ပြောင်းအတွက်သော်လည်းကောင်း သီးသန့်စီမံချက်တွေ၊ သူတို့အတွက် လုံခြုံရေးတွေချတာ ကျနော် တို့ကတော့ မတွေ့ရှိပါဘူး။ သွားလာသူအတွက်ပဲ အဓိက ကိုယ့်ကိုယ်ကို ဆင်ခြင်သုံးသပ်ပြီးတော့ သွားလာဖို့ အတွက်ပဲ အရေးကြီးတယ်လို့ပဲ သုံးသပ်မိပါတယ်” ဟု ပြောသည်။

ကော့ကရိတ်မြို့အဝင်ဆိုင်းဘုတ်

ကော့ကရိတ်မြို့အား စစ်အုပ်ချုပ်ရေးအဖြစ် ကြေညာထားသည့်အတွက် MOU အလုပ်သမားများ စေလွှတ်ရာတွင် အလုပ်သမားဝန်ကြီးဌာနအနေဖြင့် အပြည့်အဝ တာဝန်ယူမှု၊ တာဝန်ခံမှု ရှိသင့်ကြောင်း အလုပ်သမားအရေး ကူညီ ဆောင်ရွက်ပေးနေသူ ကိုသားကြီးက CNI သို့ ပြောသည်။

“လုံးဝကို တာဝန်ယူသင့်တာပေါ့။ ဒီလိုလမ်းကြောင်းမှာ ဒီလိုဖြစ်နေရင် ဘယ်ပုံသဏ္ဍာန်နဲ့ အလုပ်သမားတွေကို မထိခိုက်ဘဲနဲ့ ကြိုတင်ပြင်ဆင်မှုတွေ လုပ်ရမလဲဆိုတာကို ပြင်ဆင်သင့်တာပေါ့ ဝန်ကြီးဌာနက။ အဲဒီတော့ နယ်စပ်မှာ ဒီ မြဝတီ-မဲဆောက်နယ်စပ်ကို အများဆုံး MOU ကူးကြနေတဲ့ ဒီလမ်းကြောင်းကို စစ်ဇုန်အဖြစ် ကြေညာတယ်ပေါ့နော်။ ဒါတစ်နည်းအားဖြင့် ဥပဒေမဲ့၊ အကြောင်းမဲ့လည်း ပစ်သတ်လို့ရတဲ့ပုံစံမျိုးတွေ ဖြစ်လာတဲ့ အခါကြတော့ ကျနော်တို့ အလုပ်သမားအရေးလုပ်တဲ့ အဖွဲ့အစည်းတစ်ခုအနေနဲ့ အလုပ်သမားတွေအပေါ်မှာ ပိုမိုပြီးတော့မှ စိုးရိမ်တာပေါ့နော်။ အစုလိုက်အပြုံလိုက်လာရင် ဘယ်သူဘယ်ဝါက ပစ်သွားမှန်းမသိ၊ ဘာမှန်းမသိ။ သူတို့ စစ်ဇုန်ကြေညာထားပြီးသားဖြစ်တဲ့အတွက် စစ်ဇုန်ထဲကို သွားနေတယ်၊ စစ်အုပ်ချုပ်ရေး ဒီလိုကြေညာထား တယ်၊ ဒါမျိုးတွေလည်း အကြောင်းပြချက်တွေ လာနိုင်တာပေါ့နော်” ဟု ၎င်းက ပြောသည်။

လက်ရှိတွင် မြန်မာနိုင်ငံမှ တိုင်းဒေသကြီးနှင့် ပြည်နယ်(၈)ခုရှိ မြို့နယ်(၃၇) မြို့နယ်အား စစ်အုပ်ချုပ်ရေးအာဏာ ကျင့်သုံးရန် နစက-က အမိန့် ထုတ်ပြန်ခဲ့ခြင်းဖြစ်ပြီး ထိုထဲတွင် စစ်ကိုင်းတိုင်းမှ ၁၁ မြို့နယ်၊ ချင်းပြည်နယ်မှ ၇ မြို့ နယ်၊ မကွေးတိုင်းနှင့် ပဲခူးတိုင်းတို့တွင် ၅ မြို့နယ်၊ ကယားပြည်နယ်တွင် ၄ မြို့နယ်၊ ကရင်ပြည်နယ်နှင့် တနင်္သာရီ တိုင်းတို့တွင် ၂ မြို့နယ်၊ မွန်ပြည်နယ်တွင် ၁ မြို့နယ်တို့ ဖြစ်ကြသည်။

CNI News

၂၀၂၃ ခုနှစ်၊ ဖေဖော်ဝါရီ ၇

ပင်လုံစာချုပ်၊ ပင်လုံကတိကဝတ်များကို အကောင်အထည်ဖော်နိုင်မှသာ လက်ရှိ တိုင်းပြည်မှာ ဖြစ်ပေါ်နေသည့် အထွေထွေ အကျပ်အတည်းကို ဖြေရှင်းနိုင်မည်ဖြစ်ကြောင်း သျှမ်းပြည်ပြန်လည်ထူထောင်ရေးကောင်စီ (RCSS/ SSA) က ထုတ်ပြန်ခဲ့သည်။

ယနေ့ (ဖေဖော်ဝါရီ ၇ ရက်)တွင် ကျရောက်သည့် (၇၆)နှစ်မြောက် သျှမ်းပြည် အမျိုးသားနေ့နှင့် ပတ်သက်ပြီး ထုတ်ပြန်ခဲ့သည့် ထုတ်ပြန်ချက်တွင် အထက်ပါအတိုင်း ဖော်ပြထားခြင်း ဖြစ်သည်။

RCSS က “သျှမ်းပြည်တိုင်းရင်းသားများနှင့် ပြည်ထောင်စုတစ်ဝန်းရှိ တိုင်းရင်းသားများ အားလုံးအနေဖြင့် သျှမ်း ပြည် အမျိုးသားနေ့ အနှစ်သာရနှင့် ပင်လုံကတိကဝတ်၊ ပင်လုံစိတ်ဓါတ်၊ ပင်လုံစာချုပ်ပါ သဘောတူချက်များ အတိုင်း စုပေါင်း အကောင်အထည်ဖော်၍ ဖက်ဒရယ်ဒီမိုကရေစီ ပြည်ထောင်စုကို တည်ဆောက်နိုင်မှသာ လက်ရှိ တိုင်းပြည် အထွေထွေအကျပ်အတည်းကို ဖြေရှင်းနိုင်မည်”ဟု ပြောသည်။

RCSS ဌာနချုပ် လွယ်တိုင်းလျဲန်တွင် သျှမ်းပြည်အမျိုးသားနေ့ကျင်းပနေစဉ်

ပင်လုံစာချုပ်သည် အနာဂတ် တိုင်းပြည် တည်ဆောက်ရာတွင် ဖက်ဒရယ်ဒီမိုကရေစီ ပြည်ထောင်စုစနစ်ဖြင့် တည်‌ဆောက်ပြီး တိုင်းရင်းသားများ အားလုံး အေးအတူပူအမျှ ငြိမ်းချမ်းစွာ အတူယှဉ်တွဲ နေထိုင်ခြင်းကို ဖော်ညွှန်း သည်ဟု ထုတ်ပြန်ချက်၌ ပါရှိသည်။

ပင်လုံစာချုပ် ချုပ်ဆိုနိုင်ခြင်းကြောင့်သာလျှင် ပြည်ထောင်စုအား တည်ဆောက်နိုင်ခဲ့ခြင်းကို သျှမ်းပြည် ပြည်သူ လူထု တစ်ရပ်လုံးအနေဖြင့် အမြဲထာဝရ သတိရပြီး ပင်လုံစာချုပ်သည် ပြည်ထောင်စုဖွား တိုင်းရင်းသားများ အားလုံးနှင့်လည်း ဆက်စပ် သက်ဆိုင်သည်ကို နှလုံးသွင်း ထားရမည်ဖြစ်ကြောင်း ဖော်ပြထားသည်။

သျှမ်းပြည်ပြန်လည်ထူထောင်ရေးကောင်စီ (RCSS/SSA) သည် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ် ရေးထိုးထားသည့် ရှမ်းလက်နက်ကိုင် တပ်ဖွဲ့ဖြစ်သည်။

CNI News

၂၀၂၃ ခုနှစ်၊ ဖေဖော်ဝါရီ ၇

လက်ရှိ မြန်မာ့နိုင်ငံရေး အကျပ်အတည်းကို ဖြေရှင်းနိုင်ရေး မြန်မာတွေပဲ အဖြေရှာရမှာ ဖြစ်ကြောင်း ရခိုင့်ဦး ဆောင်ပါတီ(AFP)ဥက္ကဋ္ဌ ဒေါက်တာ အေးမောင်က CNI သတင်းဌာနသို့ ပြောသည်။

၂၀၂၃ ခုနှစ်အတွင်း ကျင်းပမည့် အထွေထွေရွေးကောက်ပွဲမှာ ပြဿနာ ဖြေရှင်းရေးအတွက် ထွက်ပေါက်ဟု သုံးသပ်မှုများလည်းရှိသလို နိုင်ငံရေးအကျပ်အတည်းကို ဖြေရှင်းနိုင်မှာ မဟုတ်ဟုသုံးသပ်မှုများလည်း ရှိနေသည်။

ရွေးကောက်ပွဲကို ကျင်းပမည့် နစကနှင့် အာဆီယံအနေဖြင့် ယခုနောက်ပိုင်းတွင် ထိစပ်မှု မတွေ့ရကြောင်း၊ မြန်မာ့ နိုင်ငံရေး အကျပ်အတည်းကို အာဆီယံအနေဖြင့် ဖြေရှင်းနိုင်ရေး ချည်းကပ်မှု ရှိနေကြောင်း ဒေါက်တာ အေးမောင် က ပြောသည်။

 အာဆီယံမှာ မြန်မာကိုယ်စားလှယ် တက်ခွင့်မရလို့ ထိုင်ခုံလွတ်နေစဉ်

၎င်းက “အာဆီယံလက်ခံခြင်း၊ မလက်ခံခြင်းက အာဆီယံရဲ့ သဘောထားလေ၊ အာဆီယံနဲ့ လက်ရှိ ရွေးကောက်ပွဲ ကို ကျင်းပမယ်ဆိုတဲ့ အစိုးရကလည်း သိပ်ပြီး ထိစပ်မှု နောက်ပိုင်းမှာ မတွေ့ရဘူး။ မြန်မာ့နိုင်ငံရေးကို ဘယ်လို ဖြေရှင်းမှာလဲဆိုတဲ့ ပုဒ်စာတစ်ပုဒ်က အာဆီယံမှာ ကျန်ခဲ့တာကိုး။ သူတို့က ဖြေရှင်းပေးနိုင်မှာလား၊ ဘယ်လို ချည်း ကပ်မှု ပုံသဏ္ဍာန်နဲ့ မြန်မာ့နိုင်ငံရေးကို ဖြေရှင်းဖို့ ကြိုးစားမှာလဲဆိုတာ အာဆီယံရဲ့ ရပ်တည်ချက်နဲ့ အာဆီယံရဲ့ အခြေအနေပေါ့၊ အာဆီယံကို ကနဦး တည်ထောင်တာက ကျနော်တို့ နားလည်တာက တစ်နိုင်ငံရဲ့ ပြည်တွင်းရေး ကို တစ်နိုင်ငံက မစွက်ဖက်ရဘူးဆိုတဲ့ မူကြီးတွေ ရှိတာကိုး၊ အဲဒီမူကြီးတွေကို အာဆီယံလိုက်နာ သလားဆိုတာ လေးက အာဆီယံရဲ့ ရပ်တည်ချက်နဲ့ ဆိုင်တာပေါ့၊ မြန်မာ့နိုင်ငံရေးကို အာဆီယံ အဖွဲ့ဝင်နိုင်ငံတစ်ခုအဖြစ် သတ် မှတ်လို့ ဖြေရှင်းပေးလိုပါတယ်လို့ အာဆီယံဘက်က ပြောရင် မြန်မာ့နိုင်ငံရေးရဲ့ အရွှေ့က ဘယ်ဖက်ကို သွားနေ သလဲ၊ ဘယ်လိုရွှေ့ရင် ကောင်းမလဲဆိုတာ အာဆီယံကိုယ်တိုင်ကပဲ ဆုံးဖြတ်ပေးရမှာ မြန်မာ့နိုင်ငံရေးနဲ့ အာဆီယံ သည် တိုက်ရိုက် မပတ်သက်ဘူး။ မြန်မာ့နိုင်ငံရေးကို မြန်မာတွေက ထွက်ပေါက်အဖြစ် ရှာရမှာ ဖြစ်တယ်” ဟု ပြောသည်။

လက်ရှိ အာဆီယံတွင် တရုတ်လိုလားသည့် အာဆီယံနှင့် အနောက်အုပ်စုကို လိုလားသော အာဆီယံဟူ၍ အုပ်စု ၂ စု ကွဲနေကြောင်း မြန်မာ့နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

မြန်မာ့ဒီမိုကရေစီအရေးတောင်းဆိုကြစဉ်

၎င်းက “အာဆီယံအနေနဲ့ ပြောရရင်တော့ အာဆီယံက တချို့က လက်ခံတယ်ဗျ၊ တချို့က လက်ခံမှာ မဟုတ်ဘူး။ ဒါပေမဲ့ လက်ခံတဲ့ နိုင်ငံတွေကလည်း ဘယ်နိုင်ငံလဲဆိုတာ မပြောဘူး။ ဘာကြောင့်လဲဆိုတော့ အာဆီယံကလည်း ၂ ခြမ်းကွဲနေတာ၊ တရုတ်လိုလားတဲ့ အာဆီယံတွေနဲ့ အမေရိကန်နဲ့ အနောက်တိုင်းကို လိုလားတဲ့ အဖွဲ့အစည်းတွေ ရှိတော့ အဲဒီအဖွဲ့အစည်းတွေ အဲဒီနိုင်ငံတွေကတော့ ဒီရွေးကောက်ပွဲကို လုံးဝလက်မခံပါဘူး။ တရုတ်လိုလားတဲ့ အင်အားစုတွေကတော့ ရွေးကောက်ပွဲကို အသိအမှတ်ပြုမယ့် သဘောရှိပါတယ်။ အဲဒါကြောင့် တစည်းတလုံး တည်း၊ တညီတညာတည်း အနေထားဖြင့် မရှိပါဘူး” ဟု ပြောသည်။

ရွေးကောက်ပွဲကျင်းပနိုင်ရေး လူဦးရေစာရင်းများ ကောက်ခံပြီးဖြစ်သလို၊ နိုင်ငံရေးပါတီများ မှတ်ပုံတင် ပြန်တင်ရန် ဥပဒေ၊ နည်းဥပဒေများလည်း ထုတ်ပြန်ထားပြီး ဖြစ်သည်။

၂၀၂၃ ခုနှစ်အတွင်း အထွေထွေရွေးကောက်ပွဲ ကျင်းပပေးမှာ ဖြစ်ကြောင်း၊ အနိုင်ရသည့် နိုင်ငံရေးပါတီအား နိုင်ငံ တော်အာဏာ လွှဲအပ်ပေးမှာဖြစ်ကြောင်း နစက ဥက္ကဋ္ဌက ပြောကြားထားသည်။

CNI News
၂၀၂၃ ခုနှစ်၊ ဖေဖော်ဝါရီ ၆

မြန်မာနိုင်ငံ၏ ပထမဦးဆုံးသော နျူကလီးယား နည်းပညာ သတင်းအချက်အလက်စင်တာကို ရန်ကုန်မြို့၊ လှိုင်မြို့နယ်တွင် တည်ဆောက်၍ ယနေ့ (ဖေဖော်ဝါရီ ၆ ရက်) နံနက်ပိုင်းက ဖွင့်လှစ်ခဲ့ကြောင်း သိရသည်။

အဆိုပါ စင်တာဖွင့်ပွဲကို နစကဥက္ကဋ္ဌနှင့်အတူ ရုရှားဖက်ဒရယ်ရေးရှင်းနိုင်ငံပိုင် အဏုမြူစွမ်းအင်ကော်ပိုရေးရှင်း ROSATOM State Corporations ၏ ညွှန်ကြားရေးမှူးချုပ် Mr. Alexey Evgenievich Likhachev ဦးဆောင် သည့် ကိုယ်စားလှယ်အဖွဲ့ဝင်များနှင့် မြန်မာနိုင်ငံဆိုင်ရာ ရုရှားဖက်ဒရယ်ရေးရှင်း သံအမတ်ကြီး H.E.Mr. Nikolay LISTOPADOV တို့တက်ရောက်ခဲ့ကြကြောင်း သိရသည်။

နစကဥက္ကဋ္ဌက “ပြီးခဲ့သည့် ၂၀၂၂ ခုနှစ်၊ စက်တင်ဘာလ ဗလာဒီဗော့စတော့မြို့တွင် ကျင်းပခဲ့သည့် သတ္တမ အကြိမ်မြောက် အရှေ့ဖျားစီးပွားရေးဖိုရမ်ကာလအတွင်း လျှပ်စစ်စွမ်းအားဝန်ကြီးဌာန၊ သိပ္ပံနှင့်နည်းပညာဝန်ကြီး ဌာနနှင့် ROSATOM တို့အကြား ၂၀၂၃ ခုနှစ်နှင့် ၂၀၂၄ ခုနှစ်တွင် နျူကလီးယားစွမ်းအင်အား ငြိမ်းချမ်းစွာ အသုံးပြုမှု ပူးပေါင်းဆောင်ရွက်ရေး လမ်းပြမြေပုံကိုလည်း လက်မှတ်ရေးထိုးခဲ့ကြပါကြောင်း၊ ယနေ့တွင်လည်း နျူကလီးယားနည်းပညာ အသုံးချနယ်ပယ် ၁၄ ခုတွင် အစိုးရအချင်းချင်း ပူးပေါင်းဆောင်ရွက်ရေးဆိုင်ရာ သဘောတူညီချက်တစ်ခုကိုလည်း လက်မှတ်ရေးထိုးတော့မည် ဖြစ်ပါတယ်”ဟု ပြောသည်။

ထို့နောက် နျူကလီးယားနှင့် ဓာတ်ရောင်ခြည်နည်းပညာများကို ကျန်းမာရေး၊ စိုက်ပျိုးရေး၊ မွေးမြူရေး၊ စက်မှု၊ သဘာဝပတ်ဝန်းကျင် ထိန်းသိမ်းရေး ကဏ္ဍများတွင် အသုံးချနိုင်သည့်အတွက် နိုင်ငံ၏ နျူကလီးယား အခြေခံ အဆောက်အအုံ တည်ထောင်နိုင်ရေးနှင့်ပတ်သက်၍ နှစ်ဖက်ကျွမ်းကျင်သူများ တွေ့ဆုံ ညှိနှိုင်းဆွေးနွေးကာ လို အပ်သည့် နျူကလီးယားဘေးအန္တရာယ် ကင်းရှင်းရေး၊ လုံခြုံရေးနှင့် အရေးပေါ် အခြေအနေတုန့်ပြန် ဆောင် ရွက်ရေး ဆိုင်ရာလုပ်ငန်းများကို ဆန်းစစ်လေ့လာပြီး အပြည်ပြည်ဆိုင်ရာ အဏုမြူစွမ်းအင်အေဂျင်စီ(IAEA)၏ မှတ်တိုင်ပါ အချက် ၁၉ ချက်အတိုင်း အကောင်အထည်ဖော် ဆောင်ရွက်ရန်အတွက် ပူးပေါင်း ဆောင်ရွက်မည် ဖြစ်ကြောင်း ၎င်းက ပြောသည်။

ညွှန်ကြားရေးမှူးချုပ် Mr. Alexey Evgenievich Likhachev “နျူကလီးယား နည်းပညာ အသုံးပြုခြင်းအားဖြင့် မြန်မာနိုင်ငံ၏ စွမ်းအင်ကဏ္ဍ၊ စက်မှုလုပ်ငန်းနှင့် စီးပွားရေးတို့တွင် များစွာအကျိုးဖြစ်ထွန်းစေမည်ဖြစ်ပြီး သဘာဝသိပ္ပံ၊ ပညာရေးနှင့် နည်းပညာသင်ကြားရေးတို့ ဖွံ့ဖြိုးတိုးတက်မှုအတွက်လည်း အားကောင်းသည့် တွန်းအား တစ်ခုဖြစ်လာမည်”ဟု ပြောသည်။

ထို့နောက် နျူကလီးယားဓာတ်အားပေး စက်ရုံတည်ဆောက်ရေးကိစ္စရပ်များတွင် အရည်အချင်း ပြည့်မီသည့် ကျွမ်းကျင်ပညာရှင်များ လိုအပ်မည်ဖြစ်ပြီး ပညာရှင်လေ့ကျင့်ရေးဆိုင်ရာ ပူးပေါင်းဆောင်ရွက်မှုများတွင်လည်း မိမိတို့အနေဖြင့် သဘောတူညီမှု ရရှိထားပြီးဖြစ်ပါကြောင်း၊ မိမိတို့အနေဖြင့် နျူကလီးယားဆိုင်ရာ ပူးပေါင်း ဆောင်ရွက်မှုများနှင့်ပတ်သက်၍ ရလဒ်နှင့် အရည်အသွေးကို စိတ်ကျေနပ်မှုရရှိစေရေး အစွမ်းကုန်ကြိုးစား ဆောင်ရွက်လျက်ရှိကြောင်း ၎င်းက ပြောသည်။

CNI News

၂၀၂၃ ခုနှစ်၊ ဖေဖော်ဝါရီ ၆

ရှမ်းပြည်ပြန်လည်ထူထောင်ရေးကောင်စီ(RCSS/SSA)ဌာနချုပ် လွယ်တိုင်းလျန်မှာ ကျင်းပမည့် ၇၆ နှစ်မြောက် ရှမ်းပြည်အမျိုးသားနေ့ အခမ်းအနားကို RCSS/SSA က ဖေဖော်ဝါရီ ၅ ရက်နှင့် ၆ ရက်နေ့များတွင် ပြင်ဆင်နေသည်။

ရှမ်းပြည်အမျိုးသားများနေ့ကို ၁၉၄၇ ခုနှစ်၊ ဖေဖော်ဝါရီ ၇ ရက်နေ့က စတင် သတ်မှတ်ခဲ့ပြီး နှစ်စဉ် ကျင်းပလာခဲ့သည်မှာ ၇၆ နှစ်မြောက်ခဲ့ပြီး ဖြစ်သည်။