CNI News

၂၀၂၄ ခုနှစ်၊ ဇူလိုင် ၁

ကယား(ကရင်နီ)ပြည်နယ်၊ လွိုင်ကော်မြို့မှာ ဖြစ်ပွားခဲ့သော တိုက်ပွဲများကြောင့် ဒေသခံအချို့မှာ နေရပ်မပြန်နိုင် သေးကြောင်း လွိုင်ကော်တိုက်ပွဲရှောင်တစ်ဦးက CNI သတင်းဌာနသို့ ပြောသည်။

လွိုင်ကော်မြို့၏ အချို့နေရာများမှာ နေထိုင်၍ ရပြီဖြစ်ကြောင်း၊ မိမိတို့ နေအိမ်လည်း မီးလောင်ပျက်စီးသွား ပြီဖြစ်ပြီး နေရပ်ပြန်ရန် မဖြစ်နိုင်သေးကြောင်း ၎င်းက ပြောသည်။

လွိုင်ကော်တိုက်ပွဲရှောင်တစ်ဦးက “လွိုင်ကော်ကို မပြန်တာ ၇ လရှိနေပြီ။ အခြေအနေတွေ မသိရဘူး၊ အခု လွိုင်ကော်ရောက်နေတာ မဟုတ်ဘူး။ အဝေးကို ရောက်နေတာ၊ စစ်ရှောင်လာတာလေ အခုထိ မပြန်ရသေးဘူး။ အိမ်လည်း မီးလောင်သွားပြီဆိုတော့ ပြန်လို့ မရတော့ဘူး။ တချို့နေရာ အစွန်အဖျားတွေတော့ ရတယ်၊ မြို့နေရာ တိုင်း မရဘူး။ တစ်မြို့လုံး အနေအထားနဲ့ဆိုရင်တော့ ရတဲ့နေရာလေးလဲ ရှိတယ်၊ မရတဲ့နေရာလေးလဲ ရှိတယ်၊ အခုချိန်အထိ ပြန်ဖို့ အစီအစဉ် မရှိသေးပါဘူး၊ အားလုံး ငြိမ်းချမ်းပြီဆိုမှ အားလုံးအေးအေးချမ်းချမ်း နေလို့ထိုင်လို့ ရပြီဆိုတဲ့ တစ်နေ့ကြရင်တော့ ပြန်ဖို့ စဉ်းစားမှာပေါ့၊ ဒီအတိုင်းကတော့ ဘယ်လိုမှ စဉ်းစားလို့ မရသေးဘူး” ဟု ပြောသည်။

KNDF တပ်ဖွဲ့ကိုတွေ့ရစဉ်

ပြီးခဲ့သည့် ၂၀၂၃ ခုနှစ်၊ နိုဝင်ဘာ ၁၁ ရက်နေ့က ကရင်နီတပ်ပေါင်းစုက ၁၁၁၁ စစ်ဆင်ရေးကို စတင်ဆင်နွှဲခဲ့ပြီး လွိုင်ကော်မြို့တွင် တိုက်ပွဲများ အပြင်းအထန် ဖြစ်ပွားခဲ့၍ မြို့ခံများ ဘေးလွတ်ရာသို့ ထွက်ပြေး တိမ်းရှောင်ခဲ့ကြ ရသည်။

အဆိုပါ စစ်ဆင်ရေးတွင် ကရင်နီတပ်မတော် (KA)၊ ကရင်နီအမျိုးသားများကာကွယ်ရေးတပ် (KNDF)၊ ကရင်နီ ပြည် လူမျိုးပေါင်းစုံ ပြည်သူ့လွတ်မြောက်ရေးတပ်ဦး (KNPLF)၊ ဒီးမော့ဆို ပြည်သူ့ကာကွယ်ရေးတပ် (DMO-PDF)၊ လွိုင်ကော်ပြည်သူ့ကာကွယ်ရေးတပ် (Loikaw-PDF)၊ မိုးဗြဲပြည်သူ့ကာကွယ်ရေးတပ်၊ ဖယ်ခုံ PDF တပ်ရင်း (၁၀၀၆)နှင့် ရှမ်းတောင် PDF တို့ ပါဝင်ကြောင်း သိရသည်။

ထို့နောက် တိုက်ပွဲရှောင်များမှာ ရှမ်းပြည်နယ်တောင်ပိုင်းသို့ တိမ်းရှောင်လာခဲ့ကြောင်း လက်ရှိ တိုက်ပွဲရှောင်အချို့ နေရပ်ပြန်မှုလည်း ရှိနေကြောင်း သိရသည်။

လက်ရှိတွင် လွိုင်ကော်မြို့ကို အုပ်ချုပ်ရေး ယန္တရားများ ပြန်လည်ပတ်နိုင်ရေး ဌာနဆိုင်ရာ ဝန်ထမ်းများအား လာမည့် ဩဂုတ်လအတွင်း ပြန်လာရန် ညွန်ကြားထားကြောင်း၊ ထို့အတူ ယနေ့ (ဇူလိုင် ၁ ရက်)မှ စတင်ကာ တောင်ကြီး - လွိုင်ကော် ခရီးသည်ယာဉ်လိုင်းများ ပြန်လည်ပြေးဆွဲရန် ညွန်ကြားထားကြောင်း သိရသည်။

လွိုင်ကော်မြို့ တိုက်ပွဲရှောင်တစ်ဦးက “ကျနော်တို့လည်း မနေဘူးဗျ၊ ကျနော်တို့လည်း အခြားတနေရာမှာ ဟိုဖက်နဲ့က ကျနော်တို့နဲ့က ဖုန်းအဆက်အသွယ် ဘယ်လိုမှ မရဘူးဗျ၊ အဲဒါကြောင့်မို့လို့ဗျ၊ ကျနော်တို့က ဖုန်းအဆက်အသွယ်မရတော့ အခြေအနေ ကောင်း/မကောင်း ကျနော်တို့တော့ မသိတော့ဘူးဗျ” ဟု ပြောသည်။

ကယားပြည်နယ်အစိုးရက လွိုင်ကော်မြို့လုံခြုံရေး စစ်ဆေးနေသလို နေရာချထားရေးလုပ်ပေးထားစဉ်

လက်ရှိအချိန်ထိ လွိုင်ကော်မြို့ကို တစ်ဖက်နှင့်တစ်ဖက် အပြတ်အသတ် တိုက်ခိုက်သိမ်းပိုက်နိုင်ခြင်း မရှိသေးဘဲ မကြာခဏ တိုက်ပွဲများသာ ဖြစ်ပွားလျက်ရှိနေကြောင်း ဒေသခံများ၏ ပြောပြချက်အရ သိရသည်။

နှစ်ဖက်တိုက်ပွဲကြောင့် လွိုင်ကော်မြို့ခံပြည်သူ ၄၀,၀၀၀ နီးပါးသည် နီးစပ်ရာ ရှမ်းပြည်နယ်တောင်ပိုင်း ပင်လောင်း၊ ဆီဆိုင်၊ ညောင်ရွှေ၊ တောင်ကြီး စသဖြင့် ဒေသများသို့ ပြောင်းရွှေ့ခဲ့ကြရကြောင်း သိရသည်။

လွိုင်ကော်မြို့မှာ ပုံမှန်အခြေအနေအတိုင်း ပြန်လည်တည်ငြိမ် အေးချမ်းလာပြီဖြစ်ကြောင်း နစက-က ၂၀၂၄ ခုနှစ်၊ ဇွန်လ ၁၅ ရက်မှာ ထုတ်ပြန်ထားသလို နေရပ်ပြန်လာသည့် တိုက်ပွဲရှောင် နေရာချထားရေးများ စီစဉ်ပေး လျက်ရှိသည်။

သို့သော် တချို့သော တိုက်ပွဲရှောင်များကတော့ လုံခြုံရေးစိတ်မချရသေးသည့်အတွက် နေရပ်ပြန်ရန် အခက်အခဲ ရှိနေသေးကြောင်း သိရသည်။

CNI News

၂၀၂၄ ခုနှစ်၊ ဇွန်လ ၂၉

ငြိမ်းချမ်းစွာအတူယှဉ်တွဲနေထိုင်ရေးမူ ၅ ချက် အတည်ပြုခဲ့ခြင်း နှစ် ၇၀ ပြည့်နှစ် အခမ်းအနားကို တရုတ်နိုင်ငံ မှာ ဇွန်လ ၂၈ ရက်နေ့က ကျင်းပခဲ့ရာ သမ္မတ(ငြိမ်း) ဦးသိန်းစိန်ကို တက်ရောက်ရန် တရုတ်အစိုးရမှ ဖိတ်ကြားခဲ့ သည်။

ထို့နောက် သမ္မတ(ငြိမ်း)ဦးသိန်းစိန်သည် ဇွန်လ ၂၇ ရက်နေ့က တပ်မတော်(လေ)အထူး လေယာဉ်ဖြင့် တရုတ်နိုင်ငံသို့ သွားရောက်ခဲ့ပြီး အခမ်းအနားကို တက်ရောက်ခဲ့သည်။

အဆိုပါ အခမ်းအနားတွင် တရုတ်သမ္မတ ရှီကျင့်ဖျင်နှင့် သမ္မတ(ငြိမ်း) ဦးသိန်းစိန် လက်ဆွဲနှုတ်ဆက်နေသည့် ဓာတ်ပုံများကို တရုတ်မီဒီယာများက ဖော်ပြလာခဲ့ကြသည်။

၁၉၅၅ ခုနှစ်မှာ အင်ဒိုနီးရှားနိုင်ငံ၊ ဘန်ဒေါင်းမြို့တွင် ကျင်းပခဲ့သည့် ဘန်ဒေါင်းညီလာခံသို့ အာရှ-အာဖရိက မှ နိုင်ငံပေါင်း ၂၉ နိုင်ငံက ခေါင်းဆောင်များ တက်ရောက်ခဲ့ကြပြီး တရုတ်၊ အိန္ဒိယနှင့် မြန်မာ သုံးနိုင်ငံ သဘောတူ ညီထားသည့် ငြိမ်းချမ်းစွာ အတူယှဉ်တွဲနေထိုင်ရေးမူ ၅ ချက်ကို အတည်ပြုခဲ့ကြသည်။

လက်ရှိ မြန်မာနိုင်ငံတွင် ဖြစ်ပွားနေသော နိုင်ငံရေးပဋိပက္ခ ကျယ်ပြန့်လာနေခြင်းအပေါ် အဖြေရှာရန်ခက်နေချိန် နှင့် သမ္မတ(ငြိမ်း) ဦးသိန်းစိန် တရုတ်ခရီးစဉ် ပေါ်ပေါက်လာခြင်းကလည်း အကျိုးသက်ရောက်မှုများ ရှိလာနိုင် သည်ဟု နိုင်ငံရေးအကဲခတ်များက သုံးသပ်နေကြသည်။

CNI News

၂၀၂၄ ခုနှစ်၊ ဇွန် ၂၈

သမ္မတ(ငြိမ်း) ဦးသိန်းစိန်၏ တရုတ်ပြည်ခရီးစဉ်မှာ မြန်မာ့နိုင်ငံရေး ပဋိပက္ခအပေါ် အကျိုးသက်ရောက်မှု ဘယ်လို ရှိလာနိုင်သလဲ နိုင်ငံရေးနှင့် စစ်ရေးအကဲခတ်များအကြား သုံးသပ်ဆွေးနွေးလျက်ရှိနေသည်။

ရှမ်းပြည်နယ်(မြောက်ပိုင်း)တွင် တကျော့ပြန်စစ်ပွဲ စတင်ချိန်၌ သမ္မတ(ငြိမ်း) ဦးသိန်းစိန်၏ တရုတ်ပြည်ခရီးစဉ် ပေါ်ပေါက်လာကြောင်း၊ ထိုခရီးစဉ်သည် မြန်မာ့တပ်မတော်နှင့် မြောက်ပိုင်းမဟာမိတ်သုံးဖွဲ့ (TNLA-MNDAA- AA)ကြားရှိ ဟိုင်ဂင်သဘော တူညီချက်အပေါ် တစ်စုံတစ်ရာ သက်ရောက်မှုရှိနိုင်ကြောင်း ပြောဆိုမှုများ ရှိနေသည်။

သမ္မတ(ငြိမ်း)ဦးသိန်းစိန်၏ တရုတ်ခရီးစဉ်သည် ဆက်ဆံရေး လမ်းကြောင်းကို ပြန်ရှာသည့် သဘောဟု ယူဆ ကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) မှ နာယက ဗိုလ်မှူးကြီး ခွန်ဥက္ကာက CNI သတင်း ဌာနသို့ ပြောသည်။

၎င်းက “တစ်ကတော့ သူ(ဦးသိန်းစိန်)တက်တဲ့ပွဲက ကျနော်တို့သိတယ်၊ ဘန်ဒေါင်းညီလာခံက ဘန်ဒေါင်း သဘောတူချက် ထွက်တဲ့ရက်ကို သွားတာ၊ ဘန်ဒေါင်းမှာတုန်းက ချူအင်လိုင်းရယ်၊ ဦးနုရယ်၊ နေရူးရယ်၊ ဂန်အို ရယ်၊ သူတို့ ခေါင်းဆောင်တွေ ဆုံပြီးတော့ ရထားတဲ့ ငြိမ်းချမ်းစွာ (အတူ)ယှဉ်တွဲနေထိုင်ရေးမူ ၅ ချက်ကို အဲဒီပွဲကို အကြောင်းပြလို့ ဦးသိန်းစိန်ကို လွှတ်တဲ့အခါကြတော့ ပြဿနာက တခြား  လက်ရှိ အရေးအခင်းတွေလည်း ပါနိုင် တယ်လို့တော့ ပြောလို့ရတယ်၊ သို့သော်လည်းပဲ ဦးသိန်းစိန်ကို ထုတ်သုံးတာကတော့ တရုတ်လည်း လိုလားတယ်၊ ဒီဖက်ကလည်း ဦးသိန်းစိန်ကို မေတ္တာရပ်ခံတော့ ဦးသိန်းစိန်လည်း လိုက်သွားတဲ့ သဘောပါပဲ၊ ကျနော်ထင်တာ တော့ တစ်ခါထဲနဲ့တော့ သဘောတူညီချက်တွေ ရဖို့တော့ မဟုတ်ဘူး။ ဒါပေမဲ့ ဆက်ဆံရေး လမ်းကြောင်း ပြန်ဖောက်ပြီးတော့ ထိန်းထိန်းသိမ်းသိမ်း လုပ်နိုင်တဲ့ လမ်းစကို ပြန်ရှာတဲ့သဘောလို့ ကျနော်ယူဆတယ်ဗျ” ဟု ပြောသည်။

၂၀၂၄ ခုနှစ်၊ ဇွန်လ ၂၇ ရက်နေ့က တရုတ်ပြည်သို့ သမ္မတ(ငြိမ်း)ဦးသိန်းစိန် သွားရောက်စဉ်

၁၉၅၅ ခုနှစ်၊ ဧပြီလမှာ အင်ဒိုနီးရှားနိုင်ငံ၊ ဘန်ဒေါင်းမြို့တွင် ကျင်းပခဲ့သည့် ဘန်ဒေါင်းညီလာခံသို့ အာရှ-အာဖရိက မှ နိုင်ငံပေါင်း ၂၉ နိုင်ငံက ခေါင်းဆောင်များ တက်ရောက်ခဲ့ကြပြီး တရုတ်၊ အိန္ဒိယနှင့် မြန်မာ သုံးနိုင်ငံ သဘောတူ ညီထားသည့် ငြိမ်းချမ်းစွာ အတူယှဉ်တွဲနေထိုင်ရေးမူ ၅ ချက်ကို အတည်ပြုခဲ့ကြသည်။

ထို့နောက် နှစ်ပေါင်း ၇၀ ပြည့် အခမ်းအနားကို သမ္မတ(ငြိမ်း)  ဦးသိန်းစိန်၊ မြန်မာနိုင်ငံ မဟာဗျူဟာနှင့် နိုင်ငံတကာလေ့လာရေးအဖွဲ့ ဥက္ကဋ္ဌ ဦးသန့်ကျော်၊ မြန်မာ - တရုတ် ချစ်ကြည်ရေးအသင်းဥက္ကဋ္ဌ ဦးတင်ဦး၊ ဦးနု-ဒေါ်မြရီ ဖောင်ဒေးရှင်းဥက္ကဋ္ဌ ဒေါ်သန်းသန်းနုတို့ တက်ရောက်ရန် သွားရောက်ခဲ့သည်။

ထိုခရီးစဉ်မှတဆင့် ပြည်တွင်း ငြိမ်းချမ်းရေး၊ နိုင်ငံရေးအပြင် တရုတ်-မြန်မာ နယ်စပ်ကုန်သွယ်ရေး အခြေအနေ များကို ဆွေးနွေးနိုင်ကြောင်း သုံးသပ်မှုများ ရှိနေသည်။

အဆိုပါ အခမ်းအနားသို့ ဦးသိန်းစိန် တက်ရောက်ခြင်းနှင့် ရှမ်းပြည်နယ်(မြောက်ပိုင်း)တိုက်ပွဲမှာ ဆက်စပ်မှု မရှိကြောင်း၊ ဟိုင်ဂင်စာချုပ်မှာလည်း ပြည်တွင်းပဋိပက္ခကို အကြောင်းပြု၍ ပေါ်ပေါက်လာခြင်း ဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၂၀၂၄ ခုနှစ်၊ ဇွန်လ ၂၇ ရက်နေ့က တရုတ်ပြည်သို့ သမ္မတ(ငြိမ်း)ဦးသိန်းစိန် သွားရောက်စဉ်

၎င်းက “မူကြီး ၅ ချက်ကလည်း ငြိမ်းချမ်းစွာ အတူယှဉ်တွဲနေထိုင်ရေး နောက်ပြီးတော့ တိုင်းပြည်တစ်ပြည်ရဲ့ အတွင်းရေးကို မစွက်ဖက်ရေး စတဲ့ မူတွေဖြစ်တဲ့အခါကြတော့ ဒါတွေက စစ်ကောင်စီအနေနဲ့ သူသဘောကျတဲ့ နိုင်ငံရေးလိုင်းဖြစ်တဲ့ အခါကြတော့ နောက်တစ်ခုက တရုတ်ပြည်ကလည်း ဖိတ်တဲ့အခါကြတော့ သွားတယ်လို့ပဲ ယူဆပါတယ်။ ကျနော်ထင်တာကတော့ ဟိုင်ဂင်အစည်းအဝေးဆိုတာ အတင်းဆွဲယူပြီးတော့ တွေးတာ၊ ကျနော်တို့ ဗမာပြည်ထဲမှာ ဖြစ်နေတဲ့ အကြောင်းကိစ္စတွေဆိုတာ စစ်ရေးပဋိပက္ခ၊ နိုင်ငံရေးပဋိပက္ခတွေ အကြောင်းပြုပြီး တော့ ပေါ်ပေါက်လာတဲ့ ဟိုင်ဂင်အစည်းအဝေးနဲ့ ဒီအစည်းအဝေးနဲ့ မတူပါဘူး။ ဒါကလည်း အစိုးရကိုယ်စားလှယ် အနေနဲ့ သွားတဲ့သဘောလည်း မဟုတ်ပါဘူး။ အခမ်းအနားသဘောလို့ပဲ ကျနော်က ယူပါတယ်။ ဒါမှမဟုတ် အများ မျှော်လင့်နေတဲ့ ဟိုင်ဂင်အစည်းအဝေး ပျက်ပြီးတော့ ရှမ်းမြောက်မှာ တိုက်ပွဲတွေ ပြန်ဖြစ်နေတဲ့ အခြေအနေမှာ ဦးသိန်းစိန်သွားတယ်ဆိုတာ တိုက်ဆိုင်တာ ကျနော်ကတော့ ဒီလိုပဲ မြင်တယ်ဗျ” ဟု ပြောသည်။

ပြီးခဲ့သည့် နှစ်ကုန်ပိုင်းက ရှမ်းပြည်နယ်(မြောက်ပိုင်း)မှာ တိုက်ပွဲများ အပြင်းအထန် ဖြစ်ပွားခဲ့ပြီးနောက် တရုတ်က ကြားဝင်စေ့စပ်မှုအရ ဟိုင်ဂင်သဘောတူညီချက်ကို ရရှိကာ မြန်မာ့တပ်မတော်နှင့် TNLA-MNDAA-AA တို့ကြား အပစ်အခတ်ရပ်စဲခဲ့ကြသည်။

ထို့နောက် ဟိုင်ဂင်သဘောတူညီချက်ကို ချိုးဖောက်သည်ဟု မြန်မာ့တပ်မတော်နှင့် TNLA တို့ အပြန်အလှန် စွပ်စွဲပြီး ဇွန်လ ၂၅ ရက်မှာ တိုက်ပွဲများ ပြန်လည်ဖြစ်ပွားခဲ့သည်။

CNI News

၂၀၂၄ ခုနှစ်၊ ဇွန်လ ၂၇

ရှမ်းပြည်နယ်မြောက်ပိုင်း၊ ကျောက်မဲမြို့နယ်အတွင်းမှာ တိုက်ပွဲများ ပြင်းထန်နေပြီး မြို့ခံအချို့ ပိတ်မိနေကြောင်း ဒေသခံများက ပြောသည်။

ကျောက်မဲမြို့တွင် မြန်မာ့တပ်မတော်နှင့် ပလောင်ပြည်လွတ်မြောက်ရေးတပ်ဦး (PSLF/TNLA)၊ ပြည်သူ့ကာကွယ် ရေးတပ် (PDF) ပူးပေါင်းတပ်တို့အကြား ဇွန်လ ၂၅ ရက်ကစတင်၍ တိုက်ပွဲဖြစ်နေသည်။

အဆိုပါ တိုက်ပွဲများအတွင်း ရပ်ကွက်အချို့မှာ ဒေသခံများ ပိတ်မိနေကြောင်း၊ လျှပ်စစ်မီးနှင့် ဖုန်းလိုင်းများလည်း ပြတ်တောက်နေကြောင်း ကျောက်မဲဒေသခံတစ်ဦးက CNI သတင်းဌာနသို့ ပြောသည်။

၎င်းက “ကျနော်တို့ကလည်း အပြင်မထွက်နိုင်တော့ဘူးနော်၊ ခတ်များများ မြို့ပေါ်မှာရှိတဲ့ ဒေသခံတွေကတော့ ကိုယ့်အိမ်ထဲမှာပဲ ကိုယ်နေနေကြရတယ်၊ အပြင်ထွက်ဖို့ သိပ်မရဲတော့ဘူးပေါ့နော်၊ ထွက်လို့မရတဲ့ အခြေအနေမှာ ရှိနေတယ်၊ သေနတ်သံတွေ လက်နက်ကြီးသံတွေက ပတ်ဝန်းကျင် ပတ်ပတ်လည်မှာ အကုန်ကြားနေရတော့ ဘယ်သွားမယ်မှန်းတော့ မသိတော့ဘူးပေါ့နော်၊ အဲဒီလိုပဲ အိမ်ထဲမှာ နေနေကြရတယ်ပေါ့နော်၊ ဆိုင်တချို့တော့ မြို့ပေါ်မှာ တိုက်ပွဲဖြစ်တော့ ဆိုင်တွေလည်း ပိတ်ထားတာ များပါတယ်။ ပိတ်ထားတာ များတယ်ဆိုတော့ ဝယ်လို့ လည်း မရတော့ဘူးပေါ့နော်၊ သွားလို့လည်း မရတော့ဘူးဆိုတော့ ကုန်ဈေးနှုန်းကလည်း တက်လား/ကျလား တောင် မပြောတတ်တော့ဘူး။ ဝယ်မှ မရတော့တဲ့ဟာ ဈေးသည်တွေလည်း မရှိတော့ဘူး၊ ပိုက်ဆံရှိရင်တောင် ဝယ်ရခက်သွားတဲ့ အခြေအနေ ဖြစ်သွားတာပေါ့နော်၊ အခုက အဲဒီလို ဖြစ်နေပါတယ်” ဟု ပြောသည်။

ကျောက်မဲမြို့မှာ လူသူရှင်းလင်းနေသလို တိုက်ပွဲအတွင်းပိတ်မိနေသော လူထုကိုတွေ့ရစဉ်

လက်ရှိတွင် ကျောက်မဲမြို့ပေါ်ရှိ ဆေးရုံ၊ ဌာနဆိုင်ရာများကို TNLA နှင့် ပူးပေါင်းတပ်ဖွဲ့က သိမ်းပိုက်ထားကြောင်း၊ ဆက်လက်၍ ခြေမြန်တပ်ရင်း (ခမရ ၅၀၁၊ ၅၀၂) ကို အင်အားအလုံးအရင်းဖြင့် တိုက်ခိုက်နေကြောင်း သိရသည်။

တိုက်ပွဲများ ပြင်းထန်လာသည်နှင့်အမျှ မြို့ခံအချို့မှာ နေရပ်စွန့်ခွာရန် ကြိုးပမ်းနေရသလို အချို့မှာလည်း မည်သည့်အခြေအနေကို ရင်ဆိုင်ရပါစေ နေရပ်မစွန့်နိုင်ဟု ပြောနေကြကြောင်း ကျောက်မဲမြို့ခံတစ်ဦးက CNI သတင်းဌာနသို့ ပြောသည်။

၎င်းက “လူတွေက အဲဒါမစဉ်းစားနိုင်ပါဘူး။ ဝင်ငွေတွေလည်း အကုန်ရပ်ကုန်တယ်လေ၊ ဘာမှ လုပ်မရဘူး။ အကုန် ရပ် ဝင်ငွေတွေ အကုန်ရပ်တဲ့အခါကြတော့ နေ့စဉ်စားဖို့ သောက်ဖို့တွေ ချွေတာပြီးသုံးပေါ့၊ နေမကောင်း ထိုင်မသာ ဖြစ်ရင်လည်း ဆေးရုံက ဆေးမကုပေးနိုင်ဘူး။ ဆေးရုံးက လူနာတက်ရင်လည်း လက်မခံဘူး။ အခုတော့ အကုန် သိမ်းလိုက်ပြီ။ ဆေးရုံတွေ ဘာတွေကလည်း TNLA က သိမ်းလိုက်ပြီဆိုတော့ ကိုယ်ကျန်းမာအောင်နေပေါ့ဗျာ၊ အဲဒီတော့ လူတွေကတော့ ထိတ်ထိတ်ပျာပျာနဲ့ ဒီလိုနေရမှာပဲ၊ ကိုယ့်ရပ်ရွာလည်း စွန့်ခွာသွားချင်တဲ့ လူရှိသလို မစွန့်နိုင်တဲ့လူတွေလည်း ရှိတယ်။ အဲဒီတော့ စွန့်ခွာထွက်ဖို့ဆိုတာလည်း ထွက်ပေါက်တွေ ပိတ်နေတယ်၊ အကုန် လုံး ပိတ်ထားတယ်၊ မစွန့်ချင်တဲ့ လူတွေကြတော့လည်း ဘာဖြစ်လို့လဲဆိုတော့ သွားစရာနေရာထိုင်ခင်း ဘယ်သွား ရမှန်း မသိဘူး။ ကျောထောက်နောက်ခံ မရှိဘူးပေါ့၊ သေလည်း သေပါစေပေါ့ဆိုပြီးတော့ အဲဒီလို နေနေကြရတယ်၊ အဲဒီအခု လတ်တလော အဲဒီလိုကို ဖြစ်နေကြတယ်” ဟု ပြောသည်။

TNLA တပ်ဖွဲ့ကို တွေ့ရစဉ် (Frontier Myanmar)

မိမိတို့ အနေဖြင့် အခြားဒေသသို့ တိုက်ပွဲရှောင်လိုသည့် ဒေသခံများ ဘေးလွတ်ရာ တိမ်းရှောင်နိုင်ရန် နှစ်ဖက် အဖွဲ့အစည်းထံ တောင်းဆိုမှုများ ပြုလုပ်သွားမည်ဖြစ်ကြောင်း ၎င်းက ပြောသည်။

ပြီးခဲ့သည့် ဇွန်လ ၂၅ ရက်က ရှမ်းမြောက်ရှိ ကျောက်မဲ၊ သီပေါ၊ နောင်ချို၊ မိုးကုတ်၊ မတ္တရာတို့တွင် မြန်မာ့တပ်မတော်နှင့် TNLA ပူးပေါင်းမဟာမိတ်အကြား တိုက်ပွဲများ ဖြစ်ပွားခဲ့ပြီး ဒေသခံများ ဘေးလွတ်ရာ ထွက်ပြေးတိမ်းရှောင်မှုများလည်း ရှိနေသည်။

CNI News

၂၀၂၄ ခုနှစ်၊ ဇွန်လ ၂၆

ကချင်ပြည်နယ်၊ မိုးညှင်းမြို့နယ်၊ အင်းတော်ကြီးဒေသမှာ မြန်မာ့တပ်မတော်နှင့် ကချင်လွတ်မြောက်ရေး တပ်မတော် (KIA)၊ ပြည်သူ့ကာကွယ်ရေးတပ် (PDF) ပူးပေါင်းတပ်တို့အကြား နှစ်ဖက်တိုက်ပွဲများဖြစ်ပွားကာ စစ်စခန်းတချို့ကို KIA/PDF က သိမ်းပိုက်ခဲ့ပြီး ဒေသခံများ ပိတ်မိနေဆဲဖြစ်ကြောင်း သိရသည်။

ပြီးခဲ့သည့် ဇွန်လ ၂၂ ရက်တွင် KIA/PDF ပူးပေါင်းတပ်ဖွဲ့က အင်းတော်ကြီးဒေသကို စတင်ထိုးစစ်ဆင် တိုက်ခိုက်ခဲ့ ပြီး ညောင်ပင်ကျေးရွာ၊ ချောင်းဝကျေးရွာကို သိမ်းပိုက်ထားကြောင်း သိရသည်။

ထို့နောက် နှစ်ဖက်စစ်ရေး တင်းမာနေခြင်းကြောင့် ဒေသခံများမှာ ဘေးလွတ်ရာ တိမ်းရှောင်လိုသော်လည်း ပိတ်မိနေဆဲဖြစ်ကြောင်း ဒေသခံတစ်ဦးက CNI သတင်းဌာနသို့ ပြောသည်။

၎င်းက “ထွက်ချင်ကြတယ်၊ ဟိုပင်၊ မိုးညှင်းဖက်ကိုတွေ ထွက်ချင်ကြတယ်၊ မနေ့ကလည်း မထွက်နိုင်ကြဘူး။ လမ်းက တစ်ဝက်ပိတ်လိုက်တဲ့ အခါကြတော့ နမ့်မွန်းတောင်ထိပ်မှာ ပိတ်ထားတာ” ဟု ပြောသည်။

KIA/PDF ကို တွေ့ရစဉ်

ညောင်ပင်ကျေးရွာ တိုက်ပွဲတွင် တပ်မတော်နှင့် KIA/PDF တို့က နှစ်ဖက်ညှိနှိုင်း၍ တပ်ဖက်က ဆုတ်ပေးခဲ့ ကြောင်း၊ ၎င်းတပ်များမှာ စက်လှေဖြင့် ဆုတ်ခွာကာ လုံးတုံ၊ နမ့်မွန်းစခန်းများနှင့် ပူးပေါင်းထားကြောင်း ဒေသခံများ၏ ပြောပြချက်အရ သိရသည်။

လက်ရှိတွင် ညောင်ပင်နှင့် ချောင်းဝတို့တွင် KIA/PDF များက နေရာယူထားကြောင်း၊ နမ့်မွန်းတွင်လည်း ပစ်ခတ်မှုအချို့ ရှိနေကြောင်း သိရသည်။

အင်းတော်ကြီးဒေသမှာ တိုက်ပွဲဖြစ်ပွားလာပြီး စာသင်ကျောင်းများ မဖွင့်လှစ်နိုင်သလို စပါးများလည်း စိုက်ပျိုး၍ မရသည့်အတွက် လာမည့်နှစ်မှာ စပါးဈေးတက်သွားမှာဖြစ်ကြောင်း ဒေသခံတစ်ဦးက CNI သတင်းဌာနသို့ ရှမ်းနီ ဘာသာစကားဖြင့် ပြောသည်။

အင်းတော်ကြီးဒေသ နန့်မွန်းမြို့ကိုတွေ့ရစဉ်

၎င်းက “ပိုခက်နေတာက ကျောင်းတွေ မဖွင့်ရတာတွေရယ်၊ လယ်လုပ်ချိန်မှာ လယ်ကောင်းကောင်းမွန်မွန် မလုပ်ရ တာရယ်၊ ဘာဖြစ်လို့လဲဆိုတော့ မိုးညှင်းနယ်ထဲမှာ အင်းတော်ကြီးက တစ်ခု အပါအဝင်ပေါ့၊ အင်းတော်ကြီးမှာ လယ်မလုပ်ရရင် နောက်နှစ်မှာ စပါးဈေးက တက်သွားတော့မှာ၊ နောက်နှစ်မှာ ပိုပြီး ခက်ခဲသွားတော့မှာ” ဟု ပြော သည်။

လက်ရှိတွင် KIA/PDF တို့က အင်းတော်ကြီး အင်းမြှီးဒေသမှ ညောင်ပင်စခန်း၊ ဝှေ့လုံစခန်း၊ ချောင်းဝစခန်းတို့ကို သိမ်းပိုက်ရရှိထားပြီး လုံးတုံ၊ နမ့်မွန်းတို့ကို ဆက်လက်ထိုးစစ်ဆင်မည့် အခြေအနေတွင် ရှိနေကြောင်း ဒေသခံများ က ပြောသည်။

CNI News

၂၀၂၄ ခုနှစ်၊ ဇွန်လ ၂၅

ရှမ်းပြည်နယ်မြောက်ပိုင်းမှာ မြန်မာ့တပ်မတော်နှင့် ညီနောင်မဟာမိတ်အဖွဲ့တို့ တိုက်ပွဲပြန်လည် ဖြစ်ပွားခဲ့ခြင်း ကြောင့် ဟိုင်ဂင်သဘောတူညီချက် ကျိုးပျက်သွားပြီလားဆိုသည့်အပေါ် စစ်ရေး-နိုင်ငံရေး အကဲခတ်များကြား မေးခွန်းထုတ်လျက်ရှိနေကြသည်။

ကျောက်မဲမြို့နယ်မှာ မြန်မာ့တပ်မတော်နှင့် ပလောင်ပြည်လွတ်မြောက်ရေးတပ်ဦး (PSLF/TNLA) တို့အကြား ယနေ့ (ဇွန်လ ၂၅ ရက်)နေ့ နံနက် ၅ နာရီဝန်းကျင်မှာ တိုက်ပွဲဖြစ်ပွားပြီး လက်နက်ကြီး၊ လက်နက်ငယ် ပစ်ခတ်မှု၊ ဒရုန်းဖြင့် တိုက်ခိုက်မှုများ ရှိနေကြောင်း သိရသည်။

တရုတ်၏ ကြားဝင်စေ့စပ်ညှိနှိုင်းမှုဖြင့် ဆောင်ရွက်ထားသော အပစ်အခတ်ရပ်စဲရေး ဟိုင်ဂင်သဘောတူညီချက်ကို ချိုးဖောက်လိုက်ကြပြီဟု ပြော၍ရကြောင်း၊ မြောက်ပိုင်းဒေသကို ပြန်လည်တိုက်ခိုက်ရန် တပ်ဖက်က အင်အား စုစည်းမှုများရှိနေကြာင်း မြန်မာ့နိုင်ငံရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြော သည်။

၎င်းက “ပြောလို့တော့ ရမယ်ထင်တယ်၊ ဘာဖြစ်လို့လဲဆိုတော့ အပစ်အခတ်ရပ်စဲထားတာကို ချိုးဖောက်လိုက်ကြ တာ ဖြစ်တာကိုနော်၊ ဘယ်ဘက်က စတိုက်တာတော့ မပြောတတ်ဘူး။ TNLA က ပြောနေတာတော့ ၃၊ ၄ ရက် လောက် ရှိနေပြီ၊ ကျမ ကြားနေတာ သူတို့ဆီလာပြီးတော့ ဗုံးကြဲတယ်တို့ ဘာတို့ အဲဒီတော့ စစ်တပ်ဘက် စဖောက်တယ်လို့ ပြောလို့ရမှာပေါ့၊ စစ်တပ်ဘက်ကလည်း ကျမကြည့်တာ လားရှိုးတို့ ဘာတို့မှာ အုံလိုက်ကျင်း လိုက် စောင့်နေတော့ မြောက်ပိုင်းဒေသကို ပြန်တိုက်ဖို့ လိုမယ်ဆိုပြီးတော့ ပြင်ဆင်တာထင်တယ်။ ဒါပေမဲ့ သူတို့ ဘယ်လို တိုက်တိုက်ပါ ပြန်မရနိုင်ပါဘူး။ လူတိုင်းလည်း မြင်နေတာပဲ၊ ဒါပေမဲ့ အထက်ကလည်း အောက်က ပြော တိုင်း ယုံတာ မဟုတ်ဘူးလေ၊ အပေါ်ကနေ အမိန့်တွေချ အောက်ကိုသွားခိုင်း အဲဒီလို လုပ်နေတယ်နဲ့ တူတယ်၊ ကြည့်ရတာ၊ စစ်တပ်က အခုချိန်ထိ လျှော့ပေးမယ့် လက္ခဏာမရှိဘူးဗျ၊ သူကတော့ သူ့စိတ်ထဲမှာ ဟိုတုန်းက မဆလတို့၊ နဝတတို့၊ နအဖတို့လိုပဲ ဆက်ပြီးတော့ ပြင်းပြင်းထန်ထန် ဖိနှိပ်နေရင် သူတို့ အောင်မြင်မယ်လို့ တွက်ပုံ ရတယ်” ဟု ပြောသည်။

MNDAA တပ်ဖွဲ့ကိုတွေ့ရစဉ်

အလားတူ ပြီးခဲ့သည့် ရက်ပိုင်းက လားရှိုးမြို့နယ်အတွင်း မြန်မာ့တပ်မတော်နှင့်  မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) တို့ တိုက်ပွဲဖြစ်ပွားခဲ့သည်။

လက်ရှိတိုက်ပွဲအရ နှစ်ဖက်အပြန်အလှန် ပစ်ခတ်သည့် သဘောဖြစ်သည့်အတွက် ဟိုင်ဂင်သဘောတူညီချက် ကျိုးပေါက်သွားပြီဖြစ်ကြောင်း တအာင်းအမျိုးသမီးအဖွဲ့အစည်း (TWO) မှ ပြောရေးဆိုခွင့်ရှိသူ လွေးချီဆငါးက CNI သတင်းဌာနသို့ ပြောသည်။

၎င်းက “ကျမတို့လည်း‌ မြေပြင်သတင်းအရတွေရော လိုင်းပေါ်မှာ တွေ့ရှိချက်အရတွေရောဆိုရင် ပြန်ပြီးတော့ ကျိုးပေါက်သွားတယ်လို့ ပြောလို့ရတယ်၊ ဘာဖြစ်လို့လဲဆိုတော့ ကြည့်ရတာက တိုက်ပွဲက အခုမှ ဖြစ်တာတော့ မဟုတ်ဘူးပေါ့နော်၊ အရင်ရက်တွေ ပြီးခဲ့တဲ့ လမှာကတည်းက ကြိုကြားကြိုကြား ဖြစ်နေတယ်၊ ဒါကတော့ များ သောအားဖြင့်တော့ စကစဘက်က စတင်ပြီး လုပ်ဆောင်ခဲ့တဲ့အပိုင်းတွေ မကြာခဏ တွေ့နေရတာပေါ့နော်၊ တစ်ဖက်သတ် ပုံစံမျိုးတော့ ဖြစ်တယ်၊ ဒီမနက်မှာကြတော့ ကျမတို့လည်း သတင်းကတော့ ပိုပြီးမှ သေချာ အောင်လို့ လိုက်လံစုံစမ်းနေတုန်းပေါ့နော်၊ အပြန်အလှန် ပစ်ခတ်နေတဲ့သဘော အနေအထားတော့ ရှိသွားပြီလို့ တွေ့ရတာပေါ့နော်” ဟု ပြောသည်။

ပြီးခဲ့သည့် ဇွန်လ ၂၀ ရက်က မိုးကုတ်မြိုနယ်၊ ဟိုဝိတ်ကျေးရွာတွင် တိုက်ပွဲဖြစ်ပွားခြင်းမရှိဘဲ တပ်ဖက်က ဂျက် လေယာဥ် ၂ စင်းဖြင့် လာရောက် ဗုံးကြဲတိုက်ခိုက်ခဲ့ကြောင်း ဇွန်လ ၁၈ ရက်နေ့မှ ဇွန်လ ၂၀ ရက်နေ့အထိ ၃ ရက် အတွင်း လက်နက်ကြီး၊ လေကြောင်း၊ ဒရုန်းများဖြင့် တိုက်ခိုက်မှုကြောင့် မိမိတို့ တပ်ဖွဲ့ဝင် ၃ ဦး သေဆုံးခဲ့ကြောင်း TNLA က ထုတ်ပြန်ထားသည်။

မြန်မာ့တပ်မတော် အနေဖြင့် ၎င်းတို့ လက်မှတ်ရေးထိုးထားသော ဟိုင်ဂင်သဘောတူညီချက်ကို လိုက်နာနိုင်ပါ့ မလားဆိုတာ သံသယရှိကြောင်း၊ မိမိတို့ ဒေသတွင် တိုက်ပွဲအချိန်မရွေး ပြန်ဖြစ်လာနိုင်ကြောင်း TNLA မှ အထွေထွေအတွင်းရေးမှူး ဗိုလ်ချုပ်တားဘုန်းကျော်က ပြောသည်။

TNLA တပ်ဖွဲ့ကိုတွေ့ရစဉ် (SPM News)

၎င်းက “ကျနော်တို့ကတော့ စိုးရိမ်တယ်၊ စကစ-က သူထိုးထားတဲ့ သူသဘောတူထားတဲ့ ဟိုင်ဂင်သဘောတူညီ ချက်ကို သူတကယ် လိုက်နာနိုင်ပါ့မလား၊ ကျနော်တို့ သံသယတော့ ရှိပါတယ်။ ဒါကြောင့်မို့ ကျနော်တို့က စကစ-က လိုအပ်သလို သူစစ်ကစားနေမှာ ဖြစ်တဲ့အတွက်ကြောင့် ကျနော်တို့ လူထုကို အထူးမှာကြားချင်တာကတော့ ကျနော်တို့ တော်လှန်ရေးသတိ စစ်ရေးသတိတော့ မပျက်ဖို့လိုပါတယ်။ အခြေအနေ တင်းမာမှုတွေက အချိန်မရွေး ပေါ်ပေါက်လာနိုင်တဲ့ အနေအထားမှာ ရှိတယ်လို့ ကျနော်တို့ ပြောချင်ပါတယ်။ လူထုအပေါ် ဖိနှိပ်မှု တအားများ လာမယ်ဆိုရင် လူထုကို ကာကွယ်ရမယ့် တာဝန်ရှိတယ်၊ ခုခံကာကွယ်ရမယ့် တာဝန်တွေ ရှိပါတယ်။ ဒါကြောင့်မို့ အဲဒီလို ဖြစ်လာမယ်ဆိုရင် ကျနော်တို့ ဒေသထဲမှာ တိုက်ပွဲတွေက အချိန်မရွေး ပြန်ဖြစ်လာနိုင်တယ်” ဟု ပြော သည်။

ပြီးခဲ့သည့် ၂၀၂၃ ခုနှစ်၊ အောက်တိုဘာ ၂၇ ရက်က ညီနောင်မဟာမိတ်သုံးဖွဲ့က ဆင်နွှဲခဲ့သည့် ၁၀၂၇ စစ်ဆင်ရေး အတွင်း ရှမ်းမြောက်မှာ တိုက်ပွဲအပြင်းအထန် ဖြစ်ပွားခဲ့သည်။

ထို့နောက် တရုတ်နိုင်ငံ၏ ကြားဝင်စေ့စပ်မှုအရ ဟိုင်ဂင်သဘောတူညီချက်ကို ရရှိကာ အပစ်အခတ်ရပ်စဲခဲ့ကြခြင်း ဖြစ်သည်။

CNI News

၂၀၂၄ ခုနှစ်၊ ဇွန်လ ၂၄

ကချင်ပြည်နယ်၊ မိုးညှင်းမြို့နယ်၊ အင်းတော်ကြီးဒေသမှာ မြန်မာ့တပ်မတော်နှင့် ကချင်လွတ်လပ်ရေးတပ်မတော် (KIA)၊ ပြည်သူ့ကာကွယ်ရေးတပ် (PDF) ပူးပေါင်းတပ်တို့ကြား ဖြစ်ပွားနေသော တိုက်ပွဲအတွင်း ဒေသခံလူထုများ ပိတ်မိနေကြောင်း သိရသည်။

အင်းတော်ကြီး အင်းမြှီးဒေသမှ ဒေသခံများကို KIA/PDF များက ဘေးလွှတ်ရာ တိမ်းရှောင်ခွင့် မပြုကြောင်း အင်းတော်ကြီးဒေသခံတစ်ဦးက CNI သတင်းဌာနသို့ ပြောသည်။

၎င်းက “ညောင်ပင်ကနေပြီးမှ အင်းမြှီးရွာတွေပေါ့နော်၊ ချောင်းဝတို့ အဲဒီကနေစပြီးမှ လွှဲမွန်တို့ ဘာတို့တွေလည်း ထွက်လို့(ဒေသခံတွေသွားလို့)မရဘူးလို့ ပြောတယ်။ လွှဲမွန်တို့ ညောင်ပင်တို့ အကုန်လုံးပေါ့၊ အဲဒီက တစ်လျှောက် ထွက်ခွင့်မပေးဘူးလို့ ပြောတယ်။ လုံတုံအထိတော့ ပါလိမ့်မယ် ထင်တယ်။ စခန်းက လုံးတုံအထိ ရှိတာဆိုတော့ လေ၊ သူတို့ရဲ့ (KIA/PDF) Targeted ထဲမှာလည်း ညောင်ပင်စခန်းရယ်၊ ပြီးတော့မှ ချောင်းဝစခန်းရယ်၊ လုံးတုံစခန်း ရယ်ဆိုပြီးမှ ပါတယ်ဆိုခဲ့ အခါကြတော့” ဟု ပြောသည်။

ထိုမတိုင်မီ ဒေသခံအချို့မှာ ဟိုပင်၊ မိုးညှင်းမြို့တို့ကို တိမ်းရှောင်ခဲ့ကြကြောင်း၊ လက်ရှိတွင် တိမ်းရှောင်ခွင့်အား KIA/PDF တို့က တားမြစ်ထားကြောင်း သိရသည်။

KIA/PDF ကို တွေ့ရစဉ်

ပြီးခဲ့သည့် ဇွန်လ ၂၂ ရက်တွင် KIA/PDF ပူးပေါင်းတပ်ဖွဲ့က အင်းတော်ကြီးဒေသကို စတင်ထိုးစစ်ဆင် တိုက်ခိုက်ခဲ့ ပြီး ညောင်ပင်ကျေးရွာကို သိမ်းပိုက်ထားကြောင်း၊ ချောင်းဝကျေးရွာကို ထိုးစစ်ဆင် တိုက်ခိုက်နေကြောင်း သိရ သည်။

ညောင်ပင်စခန်း တိုက်ပွဲမှာ မိနစ်အနည်းငယ်သာ ဖြစ်ပွားခဲ့ပြီး တပ်ဖက်က လုံးတုံစခန်းသို့ သွားရောက်ပူးပေါင်းနေ ကြောင်း၊ ချောင်းဝစခန်းကို ဆက်လက် တိုက်ခိုက်နေကြောင်း ဒေသခံတစ်ဦးက CNI သတင်းဌာနသို့ ရှမ်းနီဘာသာ စကားဖြင့် ပြောကြားသည်။

အင်းတော်ကြီးဒေသက ရှမ်းနီတိုင်းရင်းသားများကိုတွေ့ရစဉ်

၎င်းက “အခုကတော့ သူတို့ (စစ်တပ်) က ပြန်ဆုတ်ခဲ့တယ်။ ညောင်ပင်ဖက်က စခန်းက လုံးတုံဖက် လာပေါင်းထား တယ်၊ ၃၊ ၄ မိနစ်ပဲ တိုက်ကြတယ်လို့ ပြောတယ်၊ ရွာသူရွာသားတွေ ထိမှာစိုးလို့ လုံတုံဖက် ရွေ့တာလား၊ ဒါမှ မဟုတ် သူတို့ နှစ်ဖက်ညှိနှိုင်းလိုက်လို့ ရွေ့သွားတာလား မသိဘူး။ KIA/PDF တွေ ဝင်လို့ နေလိုက်တာ စိုးရိမ်ရတာ က ရွှေလုပ်ကွက်တွေ လုပ်မှာကိုပဲ၊ အရင်က ညောင်ပင်ရွာအနီးမှာ ရွှေတွေ မလုပ်ခိုင်းဘူး။ အင်းတော်ကြီးကို ထိခိုက်မှာရော၊ သဘာဝသယံဇာတကို ထိန်းသိမ်းတာရော ရွှေတွေ မတူးခိုင်းဘူး။ အခု KIA ဝင်လိုက်တာ ဒါတွေ တော့ စိုးရိမ်ရတယ်။ လောလောဆယ် ချောင်းဝမှာ သူတို့ (KIA/PDF) သွားတိုက်နေတယ်၊ သိမ်းလည်း သိမ်းနေပြီ လို့ ပြောကြတယ်။ ဘာကြောင့် KIA/PDF က ထိုးစစ်ဆင်တာလည်း မသိဘူး။ စစ်ကောင်စီရဲ့ စခန်းကြီးကြီးမားမား လည်း မရှိဘူး” ဟု ပြောသည်။

လက်ရှိတွင် KIA/PDF တို့က အင်းတော်ကြီး အင်းမြှီးဒေသမှ ညောင်ပင်စခန်း၊ ဝှေ့လုံစခန်းတို့ကို သိမ်းပိုက်ထားပြီး ချောင်းဝစခန်းရရှိရေး ထိုးစစ်ဆင် တိုက်ခိုက်နေကြောင်း သိရသည်။

အင်းတော်ကြီးဒေသတွင် ကျေးရွာပေါင်း ၃၉ ရွာရှိကာ တိုင်းလိုင် (ခေါ်) ရှမ်းနီလူမျိုး အများစုနေထိုင်ကြပြီး ဗမာ၊ ကချင် အနည်းငယ်နေထိုင်ရာ ဒေသဖြစ်ကြောင်း သိရသည်။

CNI News

၂၀၂၄ ခုနှစ်၊ ဇွန်လ ၂၃ 

ကချင်ပြည်နယ်၊ မိုးညှင်းမြို့နယ်အတွင်းရှိ အင်းတော်ကြီးဒေသ ထိန်းချုပ်နိုင်ရေး ကချင်လွတ်လပ်ရေးတပ်မ တော်(KIA)နှင့် ကချင်ပြည်သူ့ကာကွယ်ရေးတပ်ဖွဲ့(KPDF) ပူးပေါင်းတပ်ဖွဲ့က ဇွန်လ ၂၂ ရက်နေ့ကတည်းက အင်အား အလုံးအရင်းဖြစ် ထိုးစစ်ဆင် တိုက်ခိုက်နေကြောင်း ဒေသခံများက ပြောသည်။

လက်ရှိတွင် အင်းတော်ကြီးဒေသ ညောင်ပင်၊ ချောင်းဝ၊ လွဲပေါ စသည့် ရွာများ၌ တိုက်ပွဲများ ပြင်းထန်နေပြီး နေအိမ်များလည်း မီးရှို့ခံနေရကြောင်း ဒေသခံများက ပြောသည်။

အင်းတော်ကြီးဒေသရှိ ဒေသခံပြည်သူ့စစ်များနှင့် မြန်မာ့တပ်မတော် စစ်စခန်းများကို KIA-PDF ပူးပေါင်းတပ်ဖွဲ့ က အင်အားအလုံးအရင်းဖြစ် ထိုးစစ်ဆင် တိုက်ခိုက်နေသည်။ 

ထို့နောက် ဒေသခံများသည် ချောင်းဝရွာမှာ ပိတ်မိ နေသည်။

CNI News

၂၀၂၄ ခုနှစ်၊ ဇွန်လ ၂၁

လာမယ့် ၂၀၂၅ ခုနှစ်မှာ အထွေထွေရွေးကောက်ပွဲ ကျင်းပနိုင်ရန် ပြင်ဆင်နေကြောင်း နစက ဥက္ကဋ္ဌ ဗိုလ်ချုပ်မှူး ကြီး မင်းအောင်လှိုင်က ပြောကြားခဲ့ပြီးနောက် မည်ကဲ့သို့ ကျင်းပမလဲဆိုသည့်အပေါ် နိုင်ငံရေးအသိုင်းအဝိုင်းကြား သုံးသပ်လျက်ရှိနေသည်။

နစကအနေဖြင့် ရွေးကောက်ပွဲကို အခိုင်အမာ ကျင်းပမည်ဟု ပြောဆိုထားကြောင်း၊ ၂၀၀၈ ဖွဲ့စည်းပုံ အခြေခံဥပဒေ အရ လွှတ်တော်ကိုယ်စားလှယ် ၂၅ ရာခိုင်နှုန်း ကျင်းပနိုင်ပါက တပ်ကိုယ်စားလှယ် ၂၅ ရာခိုင်နှုန်းဖြင့် လွှတ်တော် အထမြောက်ကြောင်း ပြည်သူ့ပါတီ (PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

၎င်းက “ရွေးကောက်ပွဲကတော့ လုပ်ကိုလုပ်မှာ ဒါသူ့ဖက်က အခိုင်အမာ ပြောထားပြီးသား၊ အဲဒီလို လုပ်မယ့်နေရာ မှာ ပေးထားချက်ပေါ့၊ ၂၀၀၈ ဖွဲ့စည်းပုံရဲ့ ပုဒ်မ ၁၂၈ (က) အရဆိုလို့ရှိရင် လွှတ်တော်ကိုယ်စားလှယ် ထက်ဝက် ကျော်လို့ရှိရင် အထမြောက်တယ်၊ လောလောဆယ်မှာ တပ်မတော်သား ကိုယ်စားလှယ် ၂၅ ရှိပြီးသားဖြစ်တော့ နောက်ထပ် ၂၅ ရွေးကောက်ပွဲ ကျင်းပနိုင်ရင် လွှတ်တော်အထမြောက်တယ်၊ ဒါတောင်မှ သာမန်အခြေအနေ ဆိုးဆိုးဝါးဝါးကြီး ဖြစ်နေတယ်ဆိုရင် ထက်ဝက်ကျော်တောင် မရဘူးဆိုရင် သုံးပုံတစ်ပုံနဲ့ လွှတ်တော် အထမြောက် တယ်ဆိုတော့ ပုဒ်မ ၁၂၈ (ခ) အရ အဲဒါဆိုရင် ၃၃ ရာခိုင်နှုန်းပဲ လိုတယ်၊ အဲဒီ‌တော့ စစ်တပ်က ၂၅ ရာခိုင်နှုန်းဖြစ် တော့ ရွေးကောက်ခံ ၈ ရာခိုင်နှုန်း ဖြစ်ရင်ကိုပဲ လွှတ်တော်အထမြောက်တယ်၊ အဲဒီတော့ ဒါက ဖွဲ့စည်းပုံအခြေခံ ဥပဒေပါ ပေးထားချက်တွေနဲ့ ပြောတာပေါ့နော်၊ အဲဒီအခြေအနေ ကနေပြီးတော့ လက်ရှိရှိနေတဲ့ တပ်မတော် ကာကွယ်ရေးဦးစီးချုပ် ကနေပြီးတော့ အာဏာသုံးရပ်စလုံးကို ချုပ်ကိုင်ပြီး အုပ်ချုပ်နေတဲ့ ပုံစံကနေပြီးတော့ ရွေးကောက်ခံ လွှတ်တော်အစိုးရ တရားရေးအစရှိသဖြင့် ဒီပုံစံလေးတော့ စပြီးတော့ ပုံပေါ်လာမယ်၊ ပုံပေါ်တာပဲ ရှိသေးတယ်။ ထိထိရောက်ရောက် အကောင်အထည် ဖော်နိုင်ဖို့အတွက်ကလည်း ကျနော်တို့က ဆက်ပြီးတော့ ပွင့်လာတဲ့ အခြေအနေကနေပြီးတော့ အများကြီး ကျနော်တို့ ဆက်ကြိုးစားရဦးမယ်” ဟု ပြောသည်။

ပြည်သူ့ပါတီ(PP) ဥက္ကဋ္ဌ ဦးကိုကိုကြီးကို တွေ့ရစဉ်

လက်ရှိအခြေအနေကို မကြိုက်၍ လုံးဝပြောင်းလဲရန်မှာ ဖွဲ့စည်းပုံမရှိသော ၁၉၈၈ ခုနှစ်က စစ်အုပ်ချုပ်ရေး အခြေအနေကို ပြန်ရောက်နိုင်ကြောင်း၊ မိမိတို့အနေဖြင့် နိုင်ငံကို အထိအခိုက် အနည်းဆုံးဖြင့် ပြောင်းလဲနိုင်ရန် ကြိုးစားနေကြောင်း ဦးကိုကိုကြီးက ထောက်ပြသည်။

နိုင်ငံတစ်ဝှမ်း လက်နက်ကိုင်ပဋိပက္ခ ဖြစ်ပွားနေသော အခြေအနေမျိုးတွင် ရွေးကောက်ပွဲကျင်းပရန် မလွယ်ကူ ကြောင်း၊ ကိုယ်စားလှယ်များ၏ လုံခြုံမှု၊ မဲဆန္ဒရှင်များ၏ လုံခြုံမှုများကို မည်ကဲ့သို့ တာဝန်ယူမလဲဆိုသည့်အပေါ် ထောက်ပြမှုများ ရှိနေသည်။

တခြားတစ်ဖက်မှာလည်း အတိုက်အခံ အင်အားစုများက နစက ကျင်းပမည့် ရွေးကောက်ပွဲ အထမမြောက်စေရန် နည်းလမ်းပေါင်းစုံဖြင့် အနှောင့်အယှက်ပေးလာနိုင်သည့်အတွက် မည်သို့ ဆောင်ရွက်ကြမလဲ မေးခွန်းထုတ်စရာ ဖြစ်နေသည်ဟု နိုင်ငံရေးသုံးသပ်သူများက ပြောသည်။

နစကအနေဖြင့် ၂၀၁၀ အထွေထွေရွေးကောက်ပဲ အခင်းအကျင်းမျိုးကို မျှော်လင့်ကြောင်း၊ ရွေးကောက်ပွဲကို ၎င်းတို့၏ ထွက်ပေါက်အနေဖြင့် ကြိုးစားမှာဖြစ်ကြောင်း စည်းလုံးညီညွတ်သော တိုင်းရင်းသားလူမျိုးများမဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

နစက ကျင်းပမည့် ရွေးကောက်ပွဲဆန့်ကျင်နေကြစဉ် 

၎င်းက “ရွေးကောက်ပွဲ ကျင်းပမယ်ဆိုရင်တောင်မှ တစ်ခါမှ မရှိဖူးတဲ့ မဖြစ်ဖူးတဲ့ အနေအထားမျိုး သူတို့ ကြုံတွေ့ ရမှာပါ၊ ဘာဖြစ်လို့လဲဆိုတော့ တစ်ဖက်မှာလည်း အတုအယောင်ရွေးကောက်ပွဲ ဆန့်ကျင်နေကြတဲ့သူတွေက အများကြီးပါ။ အဖွဲ့အစည်းတွေလည်း အများကြီးပါ။ သူတို့ရဲ့ ထွက်ပေါက်ဟာလည်း ဒီဟာကိုပဲ ပြန်ပြီး ၂၀၀၈ တစ်ပတ်လည်မှာ အတုအယောင်ရွေးကောက်ပွဲဖြစ်နေပြီးတော့ ၂၀၁၀ အခင်းအကျင်းမျိုး သူတို့အနေနဲ့ကတော့ အရမ်းမျှော်လင့်ပုံရပါတယ်။ ဒါပေမဲ့ ကျနော့် အနေနဲ့ကတော့ ဒီရွေးကောက်ပွဲကတော့ ဖြစ်လာစရာလည်း အကြောင်းမရှိဘူးလို့ မြင်တယ်၊ သူတို့ အုပ်ချုပ်တဲ့ဟာလည်း မနိုင်မနင်းဖြစ်နေတယ်၊ စီးပွားရေးလည်း ချွတ်ခြုံကျ နေတယ်၊ ဒီအာဏာရူးတွေ အာဏာကို ဆုတ်ကိုင်ထားသရွေ့ကတော့ အတုအယောင် ရွေးကောက်ပွဲဆိုတာလည်း ဖြစ်လာဖို့ ကျနော့်အနေနဲ့ မမြင်ဘူးပေါ့ဗျာ၊ ဒါပေမဲ့ သူတို့ကတော့ သူတို့ရဲ့ ထွက်ပေါက်အနေနဲ့ အဲဒါကို အကောင်း ဆုံး မျှော်လင့်ချက် တစ်ခုအနေနဲ့ သူတို့ ကြိုးစားမှာပေါ့” ဟု ပြောသည်။

နစကသည် ယခုနှစ်(၂၀၂၄) အောက်တိုဘာလအတွင်း လူဦးရေနှင့် သန်းခေါင်စာရင်း ကောက်ယူမှာဖြစ်ပြီး လာမည့်နှစ်(၂၀၂၅)တွင် အထွေထွေရွေးကောက်ပွဲ ကျင်းပမည်ဖြစ်ကြောင်း ပြောကြားထားသည်။

အခြားတစ်ဖက်မှာတော့ နစက ကျင်းပမည့် ရွေးကောက်ပွဲကို အသိအမှတ်ပြုမှာ မဟုတ်ဘဲ မပျက်ပျက်အောင် ဖျက်မည်ဖြစ်ကြောင်း အမျိုးသားညီညွတ်ရေးအစိုးရ (NUG) ၏ ယာယီသမ္မတ ဒူဝါလရှီးလက ပြောကြားထား သည်။