CNI News

၂၀၂၃ ခုနှစ်၊ ဖေဖော်ဝါရီ ၂၀

ရခိုင်ပြည်လွတ်မြောက်ရေးပါတီ/ရခိုင်ပြည်လွတ်မြောက်ရေးတပ်မတော်(ALP/ALA)မှ ဒုတိယစစ်ဦးစီးချုပ် ဗိုလ်မှူးချုပ် ခိုင်မင်းစိုးနှင့် စစ်သည် ၂ ဦးသည် အလယ်ပိုင်းတိုင်းစစ်ဒေသအမှတ်(၁၀၁) တပ်ရင်းမှ ရဲဘော်များ အား လျှို့ဝှက်စွာ ဖဲ့ထုတ်သွေးခွဲခြင်းနှင့် ကြံစည်စည်းရုံးခြင်းများ ပြုလုပ်သည်အတွက် ဒေါ်စောမြရာဇာလင်း ဦးဆောင်သည့် အမှတ်(၁၀၁)တပ်ရင်းက ဖမ်းဆီးထားကြောင်း သိရသည်။

ALP ၏ ဒုတိယစစ်ဦးစီးချုပ် ဗိုလ်မှူးချုပ် ခိုင်မင်းစိုးနှင့် စစ်သည် ၂ ဦးသည် ဖေဖော်ဝါရီ ၁၆ ရက်နေ့က စစ်တွေ လေဆိပ်သို့ ရောက်ရှိစဉ် ဒေါ်စောမြရာဇာလင်းက အကြောင်းကြား၍ မြန်မာ့တပ်မတော်မှ ဖမ်းဆီး၍ လက်ရှိ ALP/ALA အမှတ်(၁၀၁) တပ်ရင်းတွင် ဖမ်းဆီးထားသည်ဟု သိရကြောင်း၊ ထိုလုပ်ရပ်သည် ပါတီ၏ လုပ်ထုံးလုပ် နည်းနှင့် မညီသဖြင့် ဗိုလ်မှူးချုပ် ခိုင်မင်းစိုးနှင့် စစ်သည် ၂ ဦးအား ချက်ချင်းလွှတ်ပေးရန် ညွှန်ကြားအပ်သည်ဟု ALP ဥက္ကဋ္ဌ ခိုင်ရဲခိုင်က ဒေါ်စောမြရာဇာလင်းသို့ လိပ်မူကာ စာပေးပို့ခဲ့သည်။

ထို့နောက် ဒေါ်စောမြရာဇာလင်းက ALP ဥက္ကဋ္ဌ ခိုင်ရဲခိုင်သို့ အကြောင်းပြန်စာတစ်စောင်ပေးပို့ခဲ့ကြောင်း သိရသည်။

 ဒေါ်စောမြရာဇာလင်းထံ ခိုင်ရဲခိုင် ညွှန်ကြားသည့် စာကိုတွေ့ရစဉ်

ထိုစာထဲတွင် ဗိုလ်မှူးချုပ် ခိုင်မင်းစိုးသည် အလယ်ပိုင်းတိုင်းစစ်ဒေသ အမှတ်(၁၀၁) တပ်ရင်းမှ ရဲဘော်များအား လျှို့ဝှက်စွာ ဖဲ့ထုတ်သွေးခွဲခြင်း၊ ကြံစည်စည်းရုံးခြင်း တို့ကို ပြုလုပ်ခြင်းမှာ တပ်ခေါင်းဆောင်၊ ပါတီ ခေါင်းဆောင် တစ်ဦး၏ လုပ်ဆောင်ချက်နှင့်လုံးဝ မကိုက်ညီကြောင်း၊ ပါတီ/တပ်မတော်တို့သည် လုပ်ရိုးလုပ်စဉ်အတိုင်းသာ ပွင့်လင်းစွာ လုပ်ဆောင်ရမည်ဖြစ်ကြောင်း၊ တဖက်စောင်းနင်း မလုပ်သင့်ကြောင်း ထည့်သွင်း ပြောကြားထား သည်။

“ မိမိသည် ဒုတိယဥက္ကဋ္ဌ တစ်ဦးအနေဖြင့် လည်းကောင်း၊ အလယ်ပိုင်းတိုင်းစစ်ဒေသခိုင်မြဲ၍ တိုးတက်ရေးကို လည်းကောင်း၊ လုပ်ဆောင်နေသူဖြစ်ပါသည်။ ထိုနည်းတူ တပ်မှူး၊ ရဲဘော်များသည်လည်း ဤသို့ပင် ကြိုးစားနေကြပါသည်။ အလယ်ပိုင်းတိုင်း စစ်ဒေသ၏ ခိုင်မြဲမှုသည် ALP ၏ ခိုင်မြဲမှုကိုပြသနေခြင်းပင် ဖြစ်ပါသည်။ ၂၀၁၅ ခုနှစ်၊ NCA လက်မှတ်ရေးထိုးခဲ့ခြင်းနောက်တွင် စစ်တွေမြို့၌ ရုံးစိုက်ခွင့်ရလာသည်။ အစိုးရနှင့် တရားဝင် ပြောဆိုဆွေးနွေးခွင့်ရလာသည်။ NCA လက်မှတ်ရေးထိုးထားသော ALP ၏ လားရာလမ်းကြောင်းအတွက် အချက်အချာကျပါသည်။ ရဲဘော် ၅ ဦးအား လျှို့ဝှက်စွာ ကြံစည်စည်းရုံး ဖဲ့ထုတ်သည်မှာ များစွာ စိတ်ပူပန်ရပါ သည်။ ၅ ဦးထွက်က နော်ရဲဘော်များ ထိန်းသိမ်းရ အလွန်ခက်ခဲလာမည်။ ရဲဘော်တစ်ဦးကို စည်းရုံးရသည်ပင် မလွယ်ကူပါ”ဟု ၎င်း စာထဲတွင် ပြောကြားထားသည်။

 ခိုင်ရဲခိုင်ထံ ဒေါ်စောမြရာဇာလင်း ပြန်လည် အကြောင်းပြန်သည့် စာကိုတွေ့ရစဉ်

ထို့နောက် စစ်ဦးစီးချုပ် လုပ်ကြံခံရအပြီး တပ်တွင်း စည်းလုံးညီညွတ်မှု ခိုင်မြဲမှုကို အထူးဂရုစိုက်လုပ်ဆောင်နေရသော ကာလဖြစ်ကြောင်း၊ ဤကာလတွင် ရဲဘော်များကို “မနေချင်သူ၊ လာချင်သူလား၊ ငါလည်း လာချင် က လာမည်”ဟု အစည်းအဝေးတွင် တပ်ချုပ်ဟု ကင်ပွန်းတပ်ခံထားရသူ မပြောအပ်ပါကြောင်း၊ ခေါင်းဆောင် တစ်ဦး အနေနှင့် “ငါလာမည်ကို နှောင့်ယှက်ပါက တပ်တစ်ခုလုံးကို ဖြိုပစ်ခဲ့မည်”ဟုလည်း မပြောရပါကြောင်း၊ တပ်တစ်ခုကို ဖဲ့ထုတ်စည်းလုံးမှု မလုပ်သင့် မလုပ်အပ်ပါကြောင်း၊ ဤသို့ လုပ်ဆောင်ခြင်းသည် တပ်ရင်း တစ်ခု လုံးကို ဖြိုခွဲရာ ရောက်ပါကြောင်း၊ ၎င်း၏ ဇနီးဖြစ်သူ၏ လုပ်ရပ်များနှင့် ပတ်သက်၍လည်း ပြောစရာများစွာ ရှိပါ ကြောင်း၊ ယင်းတပ်သားများကို ဖဲ့ထုတ် စည်းရုံးခြင်းသည် တပ်ဥပဒေနှင့် လုံးဝကွဲလွဲ ဆန့်ကျင်သည့်အပြင် တပ်ရင်း တစ်ခုကို ဖြိုခွင်းရာ ရောက်ပါကြောင်း ဒေါ်စောမြရာဇာလင်းက ALP ဥက္ကဋ္ဌ ခိုင်ရဲခိုင်ထံသို့ ပြန်ကြားစာ ရေးသား ပေးပို့ခဲ့သည်။

အထက်ပါ ဖြစ်စဉ်များနှင့်ပတ်သက်ပြီး ALP ဒုဥက္ကဋ္ဌ ဒေါ်စောမြရာဇာလင်းထံသို့ CNI သတင်းဌာနက ဆက်သွယ် မေးမြန်းသော်လည်း ဖုန်းလက်ခံ ဖြေကြားခြင်း မရှိသေးပေ။

ALP သည် ၂၀၁၅ ခုနှစ်၊ အောက်တိုဘာ ၁၅ ရက်နေ့က တခြားသော တိုင်းရင်းသား လက်နက်ကိုင် ၇ ဖွဲ့နှင့်အ တူ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ်(NCA)ထိုးထားသည့် ရခိုင်လက်နက်ကိုင် အဖွဲ့ဖြစ်သည်။

CNI News

၂၀၂၃ ခုနှစ်၊ ဖေဖော်ဝါရီ ၂၀

ကချင်ပြည်နယ်အတွင်းရှိ ရှမ်းတိုင်းရင်းသားများ ဒီမိုကရက်တစ်ပါတီ(SNDP-ကျားဖြူပါတီ)ကို ရွေးကောက်ပွဲ မဝင်ရန် ကချင်လွတ်လပ်ရေးတပ်မတော် (KIA) မှ ခေါ်ယူ သတိပေးခဲ့ကြောင်း သိရသည်။

KIA ၏ ခေါ်ယူ သတိပေးမှုကို မိမိတို့ ပါတီဝင်များ ပြောပြချက်အရ သိရကြောင်း၊ လွတ်လပ်စွာ ရွေးကောက်ပွဲ ပြိုင်ခွင့်ပြုရန် မေတ္တာရပ်ခံချင်ကြောင်း SNDP မှ ဥက္ကဋ္ဌ စိုင်းအိုက်ပေါင်းက CNI သတင်းဌာနသို့ ပြောသည်။

စိုင်းအိုက်ပေါင်းက “ကျနော်တို့ကတော့ နံပါတ် ၁ အချက်က အတိအကျတော့ ကျနော်တို့ မသိဘူး၊ ကျနော်တို့ လူတွေ ပြောပြလို့ ကျနော် သိရတယ်၊ သူတို့လည်း ကြောက်နေတယ်။ ကျနော်တို့က မေတ္တာရပ်ခံချင်တာတော့ ပါတီတွေ အားလုံးပေါ့၊ ပါတီတွေ အားလုံး လွတ်လွတ်လပ်လပ် ပြိုင်ခွင့်ပြုစေချင်တယ်၊ ကချင်ပြည်နယ်မှာလည်း နော်၊ လွတ်လွတ်လပ်လပ် မကြောက်မလန့်၊ မစိုးရိမ်ရဘဲနဲ့ လွတ်လွတ်လပ်လပ် ပြိုင်ခွင့်ပြုပါလို့ ကျနော်အဲဒီလိုပဲ မေတ္တာရပ်ခံချင်တယ်” ဟု ပြောသည်။

အဆိုပါ ကိစ္စနှင့် ပတ်သက်၍ အကြောင်းစုံ သိရှိနိုင်ရေး KIA မှ ပြန်ကြားရေးတာဝန်ခံ ဗိုလ်မှူးကြီး နော်ဘူထံ CNI မှ ဖုန်းဆက်သွယ်မေးမြန်းခဲ့သော်လည်း ဖုန်းလက်ခံ ဖြေကြားခြင်း မရှိပေ။

KIA အနေဖြင့် နစက ကျင်းပမည့် ရွေးကောက်ပွဲကို လက်မခံဟု ပြောဆိုခြင်းမျိုး တွေ့ရှိရကြောင်း ကချင်နိုင်ငံရေး သမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။

 KIA ပြောခွင့်ရ ဗိုလ်မှူးကြီးနော်ဘူကိုတွေ့ရစဉ်

၎င်းက “KIA ကတော့ ကျနော်ထင်တယ် သူတို့ ကြေညာပြီးသားပဲ ရွေးကောက်ပွဲကို သူတို့အနေနဲ့ လက်မခံဘူး ဆိုတဲ့ဟာမျိုးကို ကျနော် တွေ့မြင်နေရတယ်။ ဆိုတော့ ဒီကျားဖြူပါတီပဲ မဟုတ်ပါဘူး။ တခြားဟာတွေလည်း ကျနော်ထင်တာ သူတို့အတိအလင်း သတိပေးတာတို့၊ ဘာတို့ ဖြစ်လိမ့်မယ်ထင်တယ်။ ဒါကတော့ ကျားဖြူပါတီ ရယ်လို့ မဟုတ်ပါဘူး။ ဘယ်ပါတီပဲဖြစ်ဖြစ် သူတို့ လက်လှမ်းမီတဲ့ အပိုင်းတွေကတော့ သူတို့ သတိပေးမယ်၊ နောက်ဆုံးမှာ အရေးယူနိုင်တဲ့အဆင့်ပါ ဖြစ်လာနိုင်တယ်” ဟု ပြောသည်။

ကချင်ပြည်နယ်တွင် ရှမ်းလူဦးရေး အများဆုံးရှိသည့် မြို့နယ်များစွာ ရှိနေကြောင်း၊ ယခင် အထွေထွေ ရွေးကောက် ပွဲတွင် မိမိတို့ပါတီ အနိုင်ရခဲ့ကြောင်း SNDP(ကျားဖြူပါတီ)ပါတီဥက္ကဋ္ဌ စိုင်းအိုက်ပေါင်းက CNI သတင်းဌာနသို့ ပြောသည်။

 SNDP ပါတီကိုတွေ့ရစဉ်

၎င်းက “ကျနော်တို့ကတော့ လုပ်ခိုင်းရင်လည်း သူတို့က ကြောက်နေတယ်ဗျာ၊ သူတို့ကြောက်နေတယ် ဆိုတော့ လည်း ကိုယ်ကလည်း မတိုက်တွန်းရဲဘူးလေ၊ တစ်ခုခု ဖြစ်သွားမှာလည်း စိုးရိမ်ရတယ်လေ၊ တကယ်လို့ သူတို့ (KIA) ကြည်ကြည်ဖြူဖြူနဲ့ အားလုံး ဒီမိုကရေစီပဲ လွတ်လွတ်လပ်လပ် ပြိုင်ကြပါ၊ ပြည်သူလူထု အဆုံးအဖြတ်ပဲ ယူမယ်ဆိုရင်လည်း အဲဒါတော့ ဝမ်းသာစရာ ကောင်းတာပေါ့နော်၊ ကျနော်တို့လည်း မေတ္တာရပ်ခံချင်တယ် သူတို့ ကိုလေ၊ တိုင်းရင်းသားတွေ ညီကိုတွေ အားလုံး လွတ်လွတ်လပ်လပ်နဲ့ ပါတီအားလုံး လွတ်လွတ်လပ်လပ် ပြိုင်ခွင့် ပြုပါလို့ ကျနော်က မေတ္တာရပ်ခံချင်တာလေ၊ ဘာလို့ဆို ကျနော်တို့ကလည်း ၂၀၁၀ တုန်းကလည်း ဝင်ပြိုင်ခဲ့တယ် ၆ ယောက်နိုင်ခဲ့တယ်၊ အဲဒီလိုမျိုးတော့ ကျနော်တို့က ဝင်ပြိုင်ပြီးတော့ ပြန်နိုင်ချင်တာပေါ့နော်၊ ဘာဖြစ်လို့လဲဆိုရင် ရှမ်းများတဲ့ မြို့နယ်တွေက ရှိတယ်လေ၊ မံစီ၊ မိုးမောက်၊ ဗန်းမော်၊ ဝိုင်းမော်၊ မိုးကောင်း၊ မိုးညှင်း အဲဒီဖက်က ရှမ်းတွေများတယ်လေ၊ ရှမ်းက Majority (လူများစု) လေ၊ နိုင်ခဲ့တာပဲ။ ဘယ်လိုပဲဖြစ်ဖြစ် လက်နက်ကိုင်အဖွဲ့က အာဏာပါဝါရှိတာပေါ့နော်။ ကျနော်တို့ တိုင်းရင်းသားတွေ အချင်းချင်းကို မေတ္တာထားစေချင်တာပေါ့” ဟု ပြောသည်။

SNDP သည့် လာမည့် ရွေးကောက်ပွဲတွင် ရှမ်းပြည်နယ်အပြင် ကချင်ပြည်နယ်၊ ရန်ကုန်တိုင်းဒေသကြီး၊ မန္တလေး တိုင်းဒေသကြီး၊ ပဲခူးတိုင်းဒေသကြီးနှင့် တနင်္သာရီတိုင်းဒေသကြီး စသည့် တိုင်းဒေသကြီးနှင့် ပြည်နယ် ၆ ခုထက် မနည်း ဝင်ရောက် ယှဉ်ပြိုင်ရန် လျာထားကြောင်း သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၁၈

အနာဂတ် ဖက်ဒရယ် ဒီမိုကရေစီ ပြည်ထောင်စု တည်ဆောက်‌ရေးမှာ ဗမာပြည်နယ်ဖွဲ့စည်းရေး ဆွေးနွေးမှုများ ရှိသည့်တိုင် ဗမာပြည်နယ်ဖွဲ့စည်းရန် ဖြစ်နိုင်ပါ့မလားဆိုသည့် မေးခွန်းထုတ်မှုများ မြန်မာ့နိုင်ငံရေး အသိုင်းအဝိုင်း ကြားမှာ ထွက်ပေါ်လာခဲ့သည်။

ပြီးခဲ့သည့် ဖေဖော်ဝါရီ ၁၂ ရက်တွင် ကျရောက်ခဲ့သည့် ၇၆ နှစ်မြောက် ပြည်ထောင်စုနေ့မှာ တိုင်းရင်းသားများ တန်းတူရေးအတွက် ဗမာပြည်နယ် ပေါ်ထွန်းရေးသည် အရေးကြီးကြောင်း အမျိုးသားညီညွတ်ရေး အတိုင်ပင်ခံ ကောင်စီ(NUCC)မှ ကိုယ်စားလှယ် လွေးပိုးငယ်မှ အကြံပြု ပြောကြားခဲ့သည်။
စစ်အာဏာရှင်စနစ်ကို ဖြုတ်ချပြီးမှသာ ဗမာပြည်နယ် ဖွဲ့စည်းရေးကိစ္စများကို ညှိနှိုင်းဆွေး‌နွေးသင့်ကြောင်း မြန်မာ့နိုင်ငံရေးလေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

ဒေါက်တာ လှကျော်ဇောက “ကျမ တိုင်းရင်းသား ခေါင်းဆောင် တစ်ယောက်ပြောတာ သိပ်သဘောကျတာ၊ သူပြောတာ ကျနော်တို့ရဲ့ အဓိက တာဝန်ကတဲ့ ဒီစစ်အာဏာရှင်စနစ်ကို ပြုတ်အောင် တိုက်ဖို့ပဲတဲ့၊ တိုက်ပြီးရင် ကျန်တာ ကျနော်တို့ မောင်နှမ အချင်းချင်းတွေတဲ့ ဖြေရှင်းလို့ ရပါတယ်။ ဒီကိစ္စတွေ ပြဿနာတက်နေတာ ဖက်ဒရယ် တို့၊ ဘာတို့ ဒါတွေဟာ ဒီစစ်တပ်က ပြည်တွင်းစစ်ကို ဖန်တီးပြီး ကတည်းက လူမျိုးစု အမျိုးမျိုးကွဲအောင် ပြည်တွင်းမှာရော၊ တောင်တန်းဒေသတွေ၊ လူမျိုးစုကြားတွေမှာရော သူတို့ လုပ်နေတာ ဒီကိစ္စပြီးသွားမှ ခုန တိုင်းရင်းသား ခေါင်းဆောင် တစ်ယောက် ပြောသွားတဲ့ မောင်နှမ အချင်းချင်း ဖြစ်တဲ့အတွက် ဖြေရှင်းလို့ရမှာပါ” ဟု ပြောသည်။

ပြီးခဲ့သည့် ၂၀၂၂ ခုနှစ်အတွင်း တိုင်းရင်းသား လက်နက်ကိုင် အဖွဲ့အစည်းတချို့နှင့် နစကတို့ ငြိမ်းချမ်းရေး ဆွေးနွေးစဉ် တိုင်းရင်းသား လက်နက်ကိုင် အဖွဲ့အစည်းများဘက်မှ တန်းတူရေးအတွက် ဗမာပြည်နယ် ဖွဲ့စည်းရေး တင်ပြဆွေး‌နွေးခဲ့သော်လည်း နစကဘက်မှ လက်ခံသည့် အနေအထားမရှိကြောင်း သိရသည်။

တိုင်းရင်းသားလူမျိုးစု ကိုယ်စားပြု အလံများကိုင်၍ EAO ခေါင်းဆောင်များကို ကြိုဆိုနေကြစဉ်

အနာဂတ် ပြည်ထောင်စုအတွက် ဗမာပြည်နယ် ဖွဲ့စည်းရန် လိုအပ်ကြောင်း၊ ထို့အတူ ပင်လုံစာချုပ်ကို အကောင် အထည်ဖော်ရန် လိုအပ်ကြောင်း ကချင်နိုင်ငံရေးသမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။

၎င်းက “ကျနော်တို့ သဘောထားတွေကလည်း ဒီအတိုင်းပါပဲ။ ဗမာပြည်နယ်ဖွဲ့စည်းဖို့ လိုပါတယ်၊ အဓိက-ကတော့ ၈ ပြည်နယ်မူပေါ့ဗျာ၊ ဒါပေမဲ့ တခြားအမျိုးသားများ ပြည်နယ်လည်း ရှိလာရင်လည်း ရှိလာနိုင်တာပေါ့။ ကျနော်တို့ ပင်လုံစာချုပ်အရ သွားဖို့တော့ လိုအပ်ပါတယ်။ ဘယ်လိုနေရာမှာလဲ ဆိုတာက‌တော့ ဒါက‌တော့ ဘယ်လိုနေရာဆို တာက ယတိပြတ် ပြောဖို့တော့ ခက်ပါတယ်။ ဒါက ပြန်ပြီးမှ ညှိနှိုင်းရမယ့် အခြေအနေမျိုး ဖြစ်ပါတယ်။ ဒါပေမဲ့ ဘယ်လိုပဲရှိရှိ ပြည်မလို့ခေါ်တဲ့ နေရာတွေကတော့ အထူးသဖြင့် အများဆုံးကတော့ ဗမာပြည်နယ်ထဲမှာ ပါသွားပါ လိမ့်မယ်၊ ပေါင်းစု ပြည်ထောင်စုဆိုတဲ့ဟာမျိုး ဖက်ဒရယ်ဆိုတာက အဲဒီအတိုင်းပဲ သွားရမယ် ဒါမှမဟုတ်ဘူးဆိုရင် ပြည်နယ်တွေနဲ့ပဲ အခုက တိုင်းလည်းရှိနေတယ်၊ ပြည်နယ်လည်း ရှိနေတယ်ဆိုတော့ ဒီနှစ်ခုက ယူနစ်ချင်းက တူချင်မှ တူမှာကိုး၊ ဒါကြောင့်မို့လည်း ပြည်နယ်ယူနစ် တစ်ခုတည်းဖြစ်ပြီးမှ သွားဖို့က လိုတာပေါ့၊ ဒါမှလည်း စစ်မှန်တဲ့ ဖက်ဒရယ်ပြည်ထောင်စုကို သွားရမှာ” ဟု ပြောသည်။

ဗမာပြည်နယ် ဖွဲ့စည်းရေးအတွက် ဗမာလူထု လက်ခံခြင်း၊ လက်မခံခြင်းဆိုသည်မှာ ဗမာလူထုကို ကိုယ်စားပြု သည့် အဖွဲ့အစည်းအပေါ် မူတည်ကြောင်း ရခိုင်အမျိုးသားပါတီ(ANP)မှ ဥက္ကဋ္ဌ ဦးသာထွန်းလှက CNI သတင်းဌာန သို့ ပြောသည်။

ဦးသာထွန်းလှက “ဒါကတော့က မြန်မာနိုင်ငံမှာ ဖြစ်ပေါ်လာမယ့် နိုင်ငံရေး အဖြေရှာမှု အပေါ်မှာ မူတည်လိမ့်မယ် ထင်တယ်၊ လောလောဆယ် မြန်မာနိုင်ငံမှာ ဖြစ်နေတဲ့ နိုင်ငံရေးပြဿနာကို ဘယ်လိုပုံစံ အဖြေရှာရမလဲ၊ အဲအပေါ် မှာသာ မူတည်လိမ့်မယ်လို့ ကျနော်တော့ အဲဒီလို မြင်တယ်လို့ပဲ ပြောချင်တယ်။ ဗမာလူထု လက်ခံနိုင်သလားဆို တာ ဗမာလူထုကို ကိုယ်စားပြုတဲ့ အဖွဲ့အစည်းတွေရဲ့ သဘောထားက ဘယ်လိုရှိမလဲဆိုတော့က ကျနော်တို့ စောင့်ကြည့်မှရမယ်၊ ဒါပေမဲ့ ဒါကလည်း မြန်မာနိုင်ငံမှာ ဖြစ်ပျက်နေတဲ့ နိုင်ငံရေးပြဿနာကို အဖြေရှာဖို့အတွက် စဉ်းစားချက် တစ်ခုတော့က ပြောလို့ရမယ်ထင်တယ်” ဟု ပြောသည်။

ဗမာပြည်နယ် ဖွဲ့စည်းရေးအတွက် တိုင်းရင်းသား အင်အားစုအချို့မှ တင်ပြမှုများ ရှိသလို အခြားတစ်ဖက်မှာလည်း ရှမ်းနီ၊ ပအိုဝ်း၊ တအာင်း (ပလောင်)နှင့် ‘ဝ’ တို့သည်လည်း ပြည်နယ်သစ်များ ဖွဲ့စည်း‌‌‌ပေးရန် တောင်းဆိုမှုများ ရှိနေသည်။

လက်ရှိ မြန်မာနိုင်ငံကို တိုင်းဒေသကြီး ၇ ခု၊ ပြည်နယ် ၇ ခု၊ ကိုယ်ပိုင်အုပ်ချုပ်ခွင့်ရဒေသ ၅ ခု၊ ကိုယ်ပိုင်အုပ်ချုပ်ခွင့် ရတိုင်း ၁ ခု၊ နေပြည်တော် ပြည်ထောင်စုနယ်မြေ ၁ ခု စသဖြင့် ဖွဲ့စည်းထားသည်။

CNI News
၂၀၂၃ ခုနှစ်၊ ဖေဖော်ဝါရီ ၁၇

နစကအဖွဲ့ဝင် ပူဂင့်ကမ်းလျန် အစား ဒေါက်တာမှုထန်ကို အစားထိုးခန့်အပ်ကြောင်း ၂၀၂၃ ခုနှစ်၊ ဖေဖော်ဝါရီ ၁၇ ရက်နေ့တွင် နစက-က ထုတ်ပြန် ကြေညာခဲ့သည်။

ပူဂင့်ကမ်းလျန်သည် ၂၀၂၃ ခုနှစ်၊ ဖေဖော်ဝါရီ ၁ ရက်နေ့က အသစ်ပြန်လည် ဖွဲ့စည်းလိုက်သော နစက အဖွဲ့ တွင် အဖွဲ့ဝင်အဖြစ် ထုတ်ပြန်ကြေညာခဲ့သည်။

ထို့နောက် ဖေဖော်ဝါရီ ၁၇ ရက်နေ့မှာတော့ ဒေါက်တာမှုထန်ကို အစားထိုးခန့်အပ်ခဲ့သည်။

ဒေါက်တာမှုထန်သည် ချင်းပြည်နယ်၊ ထန်တလန်မြို့နယ်၊ ကြောင်းထီးယားရွာတွင် မွေးဖွားခဲ့ပြီး လွှတ်တော် ကိုယ်စားလှယ်အဖြစ် တာဝန်ထမ်းဆောင်ခဲ့ဖူးသည်။

၂၀၂၁ ခုနှစ်၊ သြဂုတ် ၁၁ ရက်နေ့က ချင်းပြည်နယ်၊ ထန်တလန်မြို့ရှိ ဒေါက်တာမှုထန်၏ နေအိမ်တွင် ဗုံးပေါက် ကွဲမှု ဖြစ်ပွားခဲ့သေးသည်။

CNI News

၂၀၂၃ ခုနှစ်၊ ဖေဖော်ဝါရီ ၁၇

ရခိုင်ပြည်နယ်အတွင်းမှာ မြန်မာ့တပ်မတော်နှင့် ရက္ခိုင့်တပ်တော် (ULA/AA) တို့ကြား ဖြစ်ပွားခဲ့သော တိုက်ပွဲများ ပြန်လည် ရပ်စဲထားနိုင်ခဲ့သော်လည်း လုံခြုံရေးအခြေအနေ စိုးရိမ်ရသည့်အတွက် တိုက်ပွဲရှောင်များ နေရပ် မပြန် နိုင်သေးကြောင်း သိရသည်။

တိုက်ပွဲရှောင်များ နေရပ်ပြန်နိုင်ရေး နှစ်ဖက်အဖွဲ့အစည်းမှ အာမခံချက် မပေးနိုင်သေးသည့်အတွက် မပြန်နိုင် သေးကြောင်း၊ ထို့အတူ မြေမြှုပ်မိုင်း အန္တရာယ်များလည်း ရှိနေကြောင်း ရခိုင်ပြည်နယ်၊ မြောက်ဦးမြို့နယ်ရှိ စင်းဘောကိုင်း တိုင်ပွဲရှောင်တစ်ဦးက CNI သတင်းဌာနသို့ ပြောသည်။

 AA ခေါင်းဆောင်များကိုတွေ့ရစဉ်

၎င်းက “ကျနော်တို့ နေရပ်ပြန်မယ်ဆိုတော့ ပြန်တော့ ပြန်ချင်တာပေါ့၊ ဒါပေမဲ့ အဆင်မပြေဘူး ဖြစ်နေတယ်၊ WFP က ထောက်ပံ့တာလည်း သူ့ဟာလေးနဲ့သူတောင် စားဝတ်နေရေးက အဆင်မပြေဘူး။ နေရပ်ကို ပြန်မယ်ဆိုတော့ လည်း အိမ်တွေယာတွေက မရှိတော့ဘူး၊ ကျနော်တို့မှာ အကူအညီ အထောက်အပံ့ ဆိုတာလည်း မရှိဘူးလေ၊ ဒါနဲ့ မပြန်ဖြစ်တာက တစ်ကြောင်း၊ ဒါပေမဲ့ သူတို့ နှစ်ဦးနှစ်ဖက် တိုက်ပွဲတွေ ရပ်တော့ ရပ်ထားတယ်၊ ဘယ်တော့ ငြိမ်းချမ်းရေးရဦးမလဲဆိုတာကို ကျနော်တို့ တွေးပြီး စိတ်ပူရတာ တစ်ကြောင်း အဲဒါနဲ့ ကျနော်တို့ မပြန်ဖြစ်တာ” ဟု ပြောသည်။

နစကဘက်က ရခိုင်တိုက်ပွဲရှောင်များ နေရပ်ပြန်နိုင်ရေး အိမ်ထောင်စုတစ်စုကို ရိက္ခာတစ်လစာနှင့် ငွေကျပ် ၅ သိန်း ပေးမည်ဟု ပြောကာ စာရင်များ တောင်းယူထားသော်လည်း လက်ရှိအချိန်ထိ အကောင်အထည်ဖော်ခြင်း မရှိသေးကြောင်း သိရသည်။

စင်းဘောကိုင်း တိုက်ပွဲရှောင်စခန်းတွင် လူဦးရေ ၃၀၀၀ ကျော်ရှိကြောင်း၊ အဆိုပါ တိုက်ပွဲရှောင်များကို WFP မှ လူတစ်ဦးကို ၂၁၀၀၀ နှုန်းဖြင့် ထောက်ပံ့ကြောင်း စခန်းတာဝန်ခံ ဦးညီပုက CNI သတင်းဌာနသို့ ပြောသည်။

၎င်းက “အခုလောလောဆယ် အိမ်ပြန်မယ်ဆိုလို့ရှိရင် နှစ်ဖက် အဖွဲ့အစည်းကလည်း အာမခံချက် တစ်ခုပေးရမှာ ပေါ့၊ မိုင်းတွေ၊ ဘာတွေ ရှင်းလင်းမှု လုပ်ပေးရမယ်၊ ပြီးလို့ရှိရင် ပြန်လည် နေရာချထားဖို့အတွက် အထောက်အပံ့လေးတွေ လုပ်ပေးပြီးတော့ အစီအစဉ်လုပ်ပေးရင် ပိုကောင်းမယ်ထင်တယ်” ဟု ပြောသည်။

ပလက်ဝမြို့ကိုတွေ့ရစဉ်

ရခိုင်ပြည်နယ်တွင် ULA/AA နှင့် တပ်မတော်တို့ ၂ နှစ်နီးပါး ရပ်နားထားသည့် တိုက်ပွဲမှာ ပြီးခဲ့သည့် ၂၀၂၂ ခုနှစ်၊ ဩဂုတ်လ အတွင်းက တကျော့ပြန် ဖြစ်ပွားခဲ့သည်။

ထိုတိုက်ပွဲကြောင့် ရခိုင်ပြည်နယ်တွင် သြဂုတ်လနှင့် စက်တင်ဘာလအတွင်း တိုက်ပွဲရှောင် လူဦးရေ ၆၀၀၀ ကျော် တိုးလာကြောင်း AA က ထုတ်ပြန်ထားသည်။

ထို့နောက် မြန်မာ့တပ်မတော်နှင့် AA တို့သည် ရခိုင်ပြည်နယ်အတွင်းရှိ ဒေသခံလူထု၏ ဆုံးရှုံးနစ်နာမှုကို ထောက် ထား၍ နှစ်ဖက် အဖွဲ့အစည်းကြား နားလည်မှုယူကာ နိုဝင်ဘာလကုန်ပိုင်းတွင် စတင်ပြီး တိုက်ပွဲများ ရပ်စဲကြောင်း သဘောတူညီမှု ယူခဲ့ကြသည်။

မြန်မာ့တပ်မတော်နှင့် AA ကြား ဖြစ်ပွားသည့် တိုက်ပွဲများကြောင့် ရခိုင်ပြည်နယ် မြောက်ပိုင်းဒေသများနှင့် ချင်းပြည်နယ်၊ ပလက်ဝမြို့နယ် အတွင်းမှာ တိုက်ပွဲရှောင် ၁ သောင်းခွဲကျော် ရှိကြောင်း သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၁၆

အင်အားကြီးနိုင်ငံအချို့သည် ဒီမိုကရေစီနှင့် လူ့အခွင့်အရေးကို အကြောင်းပြ၍ မြန်မာနိုင်ငံ၏ ပြည်တွင်းရေး တွင် ဝင်ရောက်စွက်ဖက် ခြယ်လှယ်လိုနေမှုများကို တွေ့မြင်နေရသည်ဟု နစကဥက္ကဋ္ဌ ဗိုလ်ချုပ်မှူးကြီးမင်း အောင်လှိုင်က ပြောသည်။

ဖေဖော်ဝါရီ ၁၆ ရက်နေ့က ကျင်းပခဲ့သည့် ၇၅ နှစ်မြောက် မြန်မာ-ရုရှား သံတမန် ဆက်သွယ်ထူထောင်မှု အထိမ်းအမှတ် မြန်မာ-ရုရှား ချစ်ကြည်ရေးနှင့်ပူးပေါင်း ဆောင်ရွက်ရေးဖိုရမ်တွင် ၎င်းက အထက်ပါအတိုင်း ပြောကြားသွားခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ အင်အားကြီးကမ္ဘာ့နိုင်ငံအချို့သည် နိုင်ငံငယ်များအပေါ် တစ်ဖက်သတ် ဝါဒ စွဲဖြင့် မတူညီသည့် နိုင်ငံရေးစနစ်ဖြင့် အတွေးအခေါ်များအပေါ် လွှမ်းမိုးထိန်းချုပ်နိုင်ရန် နည်းလမ်းမျိုးစုံနှင့် အစဉ်တစိုက် ကြိုးပမ်းဆောင်ရွက်နေကြသည်ကိုလည်း အားလုံးက သတိပြုကြရန်လိုအပ်ပါကြောင်း၊ အဆိုးဆုံး မှာ ဒီမိုကရေစီနှင့်လူ့အခွင့်အရေးကို အကြောင်းပြ၍ အချုပ်အခြာ အာဏာပိုင်နိုင်ငံများ၏ ပြည်တွင်းရေးတွင် ဝင်ရောက်စွက်ဖက် ခြယ်လှယ်လိုမှုများကို စိတ်မကောင်းဖွယ် တွေ့မြင်နေရပါတယ်”ဟု ပြောသည်။

နိုင်ငံများအနေဖြင့် အချုပ်အခြာအာဏာကို အပြန်အလှန် လေးစားမှု၊ နားလည်ယုံကြည်မှုနှင့် နိုင်ငံတစ်နိုင်ငံ၏ ပြည်တွင်းရေးကိစ္စများတွင် ဝင်ရောက်မစွက်ဖက်ရေးတို့ကို လေးစားလိုက်နာ ဆောင်ရွက်ပေးကြရန် ၎င်းက ပြောသည်။

သို့သော် မြန်မာနိုင်ငံ၏ ပြည်တွင်းကို မည်သည့် အင်အားကြီး နိုင်ငံအချို့က ဝင်ရောက်စွက်ဖက်နေသည်ကို တော့ ရှင်းရှင်းလင်းလင်း ပြောမသွားပေ။

ဗိုလ်ချုပ်မှူးကြီးမင်းအောင်လှိုင်က “မိမိတို့နိုင်ငံအနေဖြင့် တစ်ဖက်က နိုင်ငံရေး တည်ငြိမ်အေးချမ်းမှုရရှိရေး အတွက် ကြိုးပမ်းဆောင်ရွက်မည်ဖြစ်သကဲ့သို့ အခြားတစ်ဖက်တွင်လည်း အာဆီယံအဖွဲ့ဝင် နိုင်ငံတစ်နိုင်ငံ ဖြစ်သည့်အတွက် အာဆီယံ၏ သဘောထားရပ်တည်ချက်များအတိုင်း ဒေသတွင်း တည်ငြိမ်အေးချမ်းရေးနှင့် ဖွံ့ ဖြိုးတိုးတက်ရေးတို့အတွက် အပြည့်အဝ ပါဝင်ဆောင်ရွက်လျက်ရှိသည်ကို အသိပေးလိုပါတယ်”ဟု ပြောသည်။

မိမိတို့အစိုးရအနေဖြင့် မြန်မာနိုင်ငံ၏ အကျိုးကို လိုလားသည့် မည်သည့်နိုင်ငံ၊ အဖွဲ့အစည်း၊ လူပုဂ္ဂိုလ်များနှင့် မဆို ပူးပေါင်းဆောင်ရွက်ရန် အသင့်ရှိသည်ဟု ၎င်းက ပြောသည်။

ယနေ့ကမ္ဘာကြီးတွင် အင်အားကြီးနိုင်ငံအချို့သည် နိုင်ငံငယ်များ၏ ပြည်တွင်းရေးကိစ္စများတွင် အကြောင်းအမျိုး မျိုးပြကာ ဝင်ရောက်စွက်ဖက်ပြီး တည်ငြိမ်မှုပျက်ပြားအောင်၊ စည်းလုံးညီညွတ်မှုပြိုကွဲအောင် နည်းလမ်းမျိုးစုံ အသုံးပြုပြီး ဆောင်ရွက်နေကြပါကြောင်း၊ တစ်နည်းအားဖြင့် နိုင်ငံငယ်လေးများအပေါ် မလိုတစ်မျိုး လိုတစ်မျိုး လုပ်ပြီး ဖိအားပေး အကျပ်ကိုင်မှုများ၊ အနိုင်ကျင့်ဗိုလ်ကျမှုများ၊ ခွဲခြားဆက်ဆံမှုများ ပြုလုပ်နေသည်ကို တွေ့မြင် နေရကြောင်း နစကဥက္ကဋ္ဌက ပြောသည်။

ထို့နောက် နိုင်ငံကြီးအချို့၏ မြန်မာနိုင်ငံအပေါ် အဆိုးမြင်စိတ်များစွာနှင့် အလုံးစုံပျက်သုဉ်းရေး ရည်ရွယ်ကျင့် ကြံ ဆောင်ရွက်မှုများကို ရင်ဆိုင်ကျော်လွှားနိုင်ရေးအတွက် မိတ်ကောင်းဆွေသဟာပီသစွာ အမြဲဖေးမကူညီ ရပ် တည်ပေးသည့် ရုရှားနိုင်ငံ၏ ခေါင်းဆောင်များနှင့် ရုရှားနိုင်ငံသူ/သားများကို ကျေးဇူးတင်ကြောင်း၊ မြန်မာနိုင်ငံ သည် ရုရှားကို မိတ်ကောင်းဆွေကောင်းအဖြစ် လေးစားတန်ဖိုးထားကြောင်း ၎င်းက ပြောသည်။

CNI News

၂၀၂၃ ခုနှစ်၊ ဖေဖော်ဝါရီ ၁၆

မြန်မာနိုင်ငံပြည်သူများအတွက် လူသားချင်းစာနာမှုဆိုင်ရာ အကူအညီ ဒေါ်လာ သန်း ၅၀ အသစ်ထပ်မံ ထောက်ပံ့ကြောင်း မြန်မာနိုင်ငံဆိုင်ရာ အမေရိကန်သံရုံးက ဖေဖော်ဝါရီ ၁၅ ရက်နေ့စွဲဖြင့် ထုတ်ပြန်ခဲ့သည်။

မြန်မာနိုင်ငံတွင် တိုးမြင့်လာသည့် နေရပ်စွန့်ခွာရမှုများ၊ လက်နက်ကိုင် ပဋိပက္ခများနှင့် စားနပ်ရိက္ခာ ပိုမိုရှားပါး လာမှုများက ရှိရင်းစွဲ လိုအပ်ချက်များနှင့် ပေါင်းစပ်လျက်ရှိသည့် ဒေသများအတွက် လူသားချင်းဆိုင်ရာ အကူ အညီအဖြစ် အရေးပေါ် စားနပ်ရိက္ခာနှင့်အာဟာရ အထောက်အပံ့များပေးရန် ဒေါ်လာ သန်း ၅၀ ကို အမေရိ ကန် နိုင်ငံတကာ ဖွံ့ဖြိုးရေးအေဂျင်စီ(USAID)က တဆင့် ထောက်ပံ့ပေးမည်ဟု ထုတ်ပြန်ချက်မှာ ဖော်ပြထားသည်။

ထို့နောက် ကမ္ဘာ့ကုလသမဂ္ဂမှ လတ်တလော ထုတ်ပြန်ခဲ့သည့် လူသားချင်း စာနာမှုဆိုင်ရာ လိုအပ်ချက်များအ ပေါ် ခြုံငုံသုံးသပ်ချက်အရ မြန်မာနိုင်ငံတွင် လူဦးရေ ၁၇ သန်းကျော်ရှိကြောင်း၊ လူ ၃ ဦးတွင် ၁ ဦးခန့်သည် ယခု ၂၀၂၃ ခုနှစ်တွင် လူသားချင်းစာနာမှုဆိုင်ရာ အထောက်အပံ့များကို လိုအပ်လျက်ရှိကြောင်း၊ ၂၀၂၀ တွင် ဤကဲ့ သို့ လိုအပ်ခဲ့သော လူဦးရေမှာ တစ်သန်းပင် မပြည့်ခဲ့ကြောင်း အမေရိကန်က ပြောသည်။

မကွေးတိုင်းဒေသကြီးအတွင်းက နေအိမ်များ မီးရှို့ခံရစဉ်

အမေရိကန်က “ ယခုထောက်ပံ့မှုဖြင့် USAID သည် ကုလသမဂ္ဂ ကမ္ဘာ့စားနပ်ရိက္ခာအစီအစဉ်နှင့်အတူ ပဋိပက္ခ ဖြစ်ပွားလျက်ရှိသော ပြည်နယ်များမှ လူပေါင်း ၇၅၀၀၀၀ ကျော်ကို အာဟာရချို့တဲ့မှု ကုစားရန်နှင့် ကာကွယ်ရန် ကူညီနိုင်မည်ဖြစ်ပါသည်။ ယခုထောက်ပံ့မှုတွင် လစဉ်စားနပ်ရိက္ခာခွဲတမ်းများ ပေးအပ်ခြင်းနှင့် အသက် ၅ နှစ် အောက် အာဟာရဖြစ်စားသုံးကုန်များ ပေးအပ်ခြင်းများ ပါဝင်ပါသည်”ဟု ပြောသည်။

လက်ရှိ မြန်မာနိုင်ငံတွင် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ကယားပြည်နယ်၊ ကရင် ပြည်နယ်တို့မှာ တပ်မတော်နှင့် NUG လက်အောက်ခံ သို့မဟုတ် မဟာမိတ် ဖြစ်သည့် PDF-LDF များနှင့် တိုက်ပွဲများဖြစ်ပွားနေသည်။

အလားတူ တိုင်းရင်းသား လက်နက်ကိုင်များဖြစ်သည့် CNF၊ KNU၊ KIA၊ KNPP တို့နှင့် တပ်မတော်ကြားမှာ လည်း တိုက်ပွဲများ ဖြစ်ပွားနေသည်။

အဆိုပါ တိုက်ပွဲများကြောင့် လူဦးရေ တစ်သန်းနီးပါး နေရပ်စွန့်ခွာ တိမ်းရှောင်နေကြရသလို နေအိမ်နှင့် အဆောက်အဦ သောင်းချီလည်း မီးရှို့ဖျက်ဆီးခံထားရသည်။

CNI News

၂၀၂၃ ခုနှစ်၊ ဖေဖော်ဝါရီ ၁၆

အမေရိကန် ပြည်ထောင်စုအနေဖြင့် မြန်မာ့ဒီမိုကရေစီအရေး ဆောင်ရွက်သူများနှင့် တိုင်းရင်းသားတော်လှန်‌ရေး အင်အားစုများကို အစဉ်အမြဲ အားပေးထောက်ခံကြောင်း အမေရိကန်ဒုနိုင်ငံခြားရေးဝန်ကြီး ဝင်ဒီရှားမန်း(Wendy Sherman) က ပြောကြားခဲ့သည်။

အမျိုးသားညီညွတ်ရေးအစိုးရ (NUG)၏ နိုင်ငံခြားရေးဝန်ကြီး ဒေါ်ဇင်မာအောင်နှင့် အမေရိကန် ဒုနိုင်ငံခြားရေးဝန်ကြီးတို့ တွေ့ဆုံဆွေးနွေးစဉ် ၎င်းက ပြောကြားခဲ့ခြင်း ဖြစ်သည်။

ဝင်ဒီရှားမန်းက “အမေရိကန် ဒုတိယနိုင်ငံခြားရေးဝန်ကြီးအနေနှင့် အမျိုးသားညီညွတ်ရေးအစိုးရ၊ နိုင်ငံခြားရေး ဝန်ကြီးဌာန၊ ဝါရှင်တန်ဒီစီ ရုံးခွဲ ဖွင့်လှစ်ခြင်းအား ကြိုဆိုပါကြောင်း၊ အမေရိကန်ပြည်ထောင်စုအနေနှင့် မြန်မာ့ ဒီမိုကရေစီအရေး ဆောင်ရွက်နေသူများနှင့် တိုင်းရင်းသားတော်လှန်ရေး အင်အားစုများအား အစဥ်အမြဲအားပေး ထောက်ခံနေပါသည်”ဟု ပြောသည်။

ဒီမိုကရေစီအရေး တောင်းဆိုနေကြစဉ်

ထို့အတူ မြန်မာ့ဒီမိုကရေစီ အရေးအတွက် ၎င်းတို့၏ မိတ်ဖက် အဖွဲ့အစည်းများနှင့် ဆက်လက် ပူးပေါင်း ဆောင်ရွက် သွားမည်ကြောင်း ပြောကြားထားသည်။

အမေရိကန်အနေဖြင့် ဒီမိုကရေစီအရေး လှုပ်ရှားသူများကို ကူညီမှုမှာ နည်းလမ်း မှန်ကန်ရန် လိုအပ်ကြောင်း အမျိုးသားညီညွတ်သော ဒီမိုကရက်တစ်ပါတီ(NUD)ဥက္ကဋ္ဌ ဦးစိန်ဝင်းက CNI သတင်းဌာနသို့ ပြောသည်။

၎င်းက “အားပေးတာက ဟုတ်တယ်လေ၊ အားပေးတဲ့ နည်းလမ်းက မှန်ဖို့လည်း လိုသေးတယ်လေ၊ အားပေးပြီး တော့ မြှောက်ပေးပြီးတော့ လက်ခုပ်တီးပေးနေလို့ မရဘူးလေ၊ အားပေးတယ်ဆိုတာက ဒို့ဒီမှာ သတ်မှတ်ထားတဲ့ အားပေးတာက ဒီမိုကရေစီ ကျင့်စဉ်နဲ့အညီဖြစ်အောင် အားပေးတာ လက်ခံပါတယ်။ ဒီမိုကရေစီကျင့်စဉ်နဲ့ မညီတဲ့ ဟာက အားပေးတာ မဟုတ်ဘူး။ ငါတို့ကတော့ ဒီမိုကရေစီ လိုချင်ရင် ဒီမိုကရေစီ ကျင့်စဉ်နဲ့အညီ အားပေး ထောက်ခံတာကို ငါတို့ လက်ခံပါတယ်” ဟု ပြောသည်။

မြန်မာ့တပ်မတော်ကို လက်နက်ကိုင် တော်လှန်နေကြသူများကိုတွေ့ရစဉ်

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့မှာ မြန်မာ့တပ်မတော်က အာဏာရယူပြီးနောက် ဆန့်ကျင်ဆန္ဒပြမှု နှင့်အတူ လက်နက်ကိုင် တော်လှန်ရေးကို ဒီမိုကရေစီအရေး တက်ကြွသူများမှ ဆင်နွှဲလျှက်ရှိသည်။

ဒီမိုကရေစီအရေး လှုပ်ရှားမှုအပိုင်းကို ကူညီမည်ဆိုသည်ကို ကြားမိကြောင်း သို့သော်လည်း မည်မျှအထိ ကူညီ မည် ဆိုသည်ကို မသိရှိရကြောင်း ကချင်နိုင်ငံရေးသမား ဦးကွမ်ဂေါင်အောင်ခမ်းက CNI သတင်းဌာနသို့ ပြော သည်။

၎င်းက “ ကျနော်တို့ ကြားသ‌လောက်တော့ ဒီလူသားချင်းစာနာတဲ့ ကဏ္ဍအနေနဲ့ ကူညီမယ်၊ ဒီမိုကရေစီလှုပ်ရှားမှု အပိုင်းတွေကို ကူညီမယ်ဆိုတဲ့ ဟာမျိုးတော့ ကြားပါတယ်၊ ဒါပြီးမှ နည်းပညာပိုင်းဆိုင်ရာ ကူညီမယ်ဆိုတာ ဒီလောက်ပဲ ကြားပါတယ်၊ ကျနော်ကြားသလောက်ပါပဲ၊ ကျနော်တို့လည်း ဒီဟာကို မတွေ့ဆုံဖူးဘူးဆို‌တော့ မသိဘူး။ ကြားသ‌လောက်တော့ ဘယ်လောက်အထိ ကူညီမယ်၊ မကူညီဘူးဆိုတာ သူတို့ ကူညီတဲ့အပေါ်မှာပဲ မူတည်ပါတယ်” ဟု ပြောသည်။

၂၀၂၂ ခုနှစ်၊ ဒီဇင်ဘာ ၂၃ ရက်တွင် အမေရိကန်သမ္မတ ဘိုင်ဒန် လက်မှတ်ရေးထိုး အတည်ပြုလိုက်သည့် အမျိုးသားကာကွယ်ရေး လုပ်ပိုင်ခွင့်ဆိုင်ရာ အက်ဥပဒေ (NDAA)တွင် မြန်မာ့တပ်မတော်ကို ဆန့်ကျင်နေသည့် တိုင်းရင်းသားလက်နက်ကိုင်များ၊ ပြည်သူ့ကာကွယ်ရေးတပ်ဖွဲ့ (PDF) များကို လက်နက် မဟုတ်သော နည်းပညာ အကူအညီများ ထောက်ပံ့ပေးမည်ဆိုသည့် အချက်များ ထည့်သွင်းထားကြောင်း သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၁၅

တည်ငြိမ်အေးချမ်းမှု၊ စည်းလုံး ညီညွတ်မှုနှင့် ဖွံ့ဖြိုးတိုးတက်မှုကို မလိုလားသည့် ပြည်ပနိုင်ငံကြီးများနှင့်  ပြည်ပြေးများသည် နိုင်ငံတော် အလုံးစုံ ပျက်သုဉ်းရေးကို  လုပ်ဆောင်နေသည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

ဖေဖော်ဝါရီ ၁၅ ရက်နေ့က ကျင်းပခဲ့သည့်  ၏ ၇၇ နှစ်မြောက် နှစ်ပတ်လည့်နေ့ အခမ်းအနားမှာ မိန့်ခွန်းပြောစဉ် ၎င်းက အထက်ပါအတိုင်း ပြောကြားခဲ့ခြင်း ဖြစ်သည်။

မိမိတို့သည် ၂၀၀၈ ဖွဲ့စည်းပုံအခြေခံဥပဒေအရ နိုင်ငံတော်တာဝန်ကို ထမ်းဆောင်ခဲ့သည်မှာ နှစ်နှစ်ပြည့် မြောက်ခဲ့ပြီ ဖြစ်ကြောင်း၊ သို့သော် နှစ်နှစ်တာ ကာလလုံးဖြစ်ခဲ့သည့် ဆူပူအကြမ်းဖက်မှုများ၊ လူသတ်၊ မီးရှို့၊ ဖောက်ခွဲဖျက်ဆီးမှုများသည် သိသိသာမြန်မာ့အသံနှင့်ရုပ်မြင်သံကြားသာ လျော့နည်းကျဆင်းသွားခြင်း မရှိသေးကြောင်း နစကဥက္ကဋ္ဌက ပြောသည်။

၎င်းက “ မိမိတို့နိုင်ငံ၏ တည်ငြိမ်အေးချမ်းမှု၊ စည်းလုံးညီညွတ်မှု၊ ဖွံ့ဖြိုးတိုးတက်မှုကို မလိုလားသည့် သြဇာခံဖြစ် အောင် အဓမ္မလုပ်ချင်ကြသည့် ပြည်ပနိုင်ငံကြီးများနှင့် ပြည်သူအကျိုးကို မျက်ကွယ်ပြုကာ မိမိတို့ ပုဂ္ဂိုလ်ရေးနှင့် အဖွဲ့အစည်းအကျိုးစီးပွားကိုသာ ရှေးရှုနေကြသည့် ပြည်တွင်းမှ သစ္စာဖောက်များနှင့် ပြည်ပြေးများသည် နိုင်ငံ တော် အလုံးစုံ ပျက်သုဉ်းရေးကို အရှိန်အဟုန်ဖြင့် တိုးမြှင့် ဆောင်ရွက်နေဆဲဖြစ်သည်ကို အားလုံး အသိပင် ဖြစ်ပါတယ်”ဟု ပြောသည်။

သို့သော် မည်သည့်နိုင်ငံဖြစ်သည်ကိုတော့ ထည့်သွင်း ပြောကြားသွားခြင်း မရှိပေ။ အလားတူ ပြည်ပြေးများဆိုသည်မှာလည်း မည်သည့် အဖွဲ့အစည်း သို့မဟုတ် လူပုဂ္ဂိုလ်များဖြစ်သည်ကိုတော့ ပြောကြားသွားခြင်း မရှိပါ။

နိုင်ငံတော်ပျက်သုဉ်းအောင် လုပ်သူသည် မည်သူလဲ သို့မဟုတ် မည်သည့် အဖွဲ့အစည်းလဲဟု ပြန်လည် မေးမြန်း လိုကြောင်း လုံခြုံရေးအရ အမည်မဖော်လိုသူ နိုင်ငံရေးလေ့လာသုံးသပ်သူ တစ်ဦးက ပြောသည်။

မြင်းမူမြို့နယ်မှ ကန်တော်ရွာ မီးရှို့ခံထားရစဉ်

ထို့နောက် နစကအနေဖြင့် နိုင်ငံတော်တည်ငြိမ် အေးချမ်းရေးနှင့် ထာဝရငြိမ်းချမ်းရေး၊ တိုင်းပြည်သာယာဝပြော ရေးနှင့် စားရေရိက္ခာဖူလုံရေး၊ လူမှုစီးပွားဘဝ ဖွံ့ဖြိုးတိုးတက်ရေး၊ စစ်မှန်စည်းကမ်းပြည့်ဝသည့် ပါတီစုံ ဒီမိုကရေ စီစနစ် ခိုင်မာစေရေး ကြိုးပမ်းလျက်ရှိကြောင်း နစကဥက္ကဋ္ဌက ပြောသည်။

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီ ၁ ရက်က အမျိုးသားဒီမိုကရေစီအဖွဲ့ချုပ်(NLD) အစိုးရကို ၂၀၂၀ အထွေထွေရွေးကောက်ပွဲ၌ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ တပ်မတော်က ဖြုတ်ချ၍ နိုင်ငံတော်ကို အရေးပေါ် ကြေညာခဲ့သည်။

ထို့နောက် တပ်မတော်ကို ဆန့်ကျင် ဆန္ဒပြခဲ့ကြသလို လက်နက်ကိုင် တော်လှန်ရေး နည်းလမ်းဖြင့် ပြန်လည် ဖြုတ်ချရန် ဒီမိုကရေစီအရေး တောင်းဆိုသူများက ကြိုးပမ်းလျက်ရှိသည်။

အဆိုပါ လက်နက်ကိုင်ပဋိပက္ခများကြောင့် နေအိမ်နှင့် အဆောက်အဦ သောင်းနှင့်ချီ မီးရှို့ခံခဲ့ရသလို လူဦးရေ သိန်းချီ နေရပ်စွန့်ခွာ ထွက်ပြေး တိမ်းရှောင်နေကြရသည်။