- By CNI
- Category: နိုင်ငံရေး
- Hits: 492
CNI News
၂၀၂၂ ခုနှစ်၊ စက်တင်ဘာ ၁၄
ကယား(ကရင်နီ)ပြည်နယ်၊ မိုးဗြဲမြို့ပေါ်တွင် ကရင်နီ အမျိုးသားကာကွယ်ရေးတပ်ဖွဲ့(KNDF)၊ ကရင်နီ လက်နက် ကိုင်များ ပူးပေါင်းအဖွဲ့နှင့် မြန်မာ့တပ်မတော်ကြား ဖြစ်ပွားသည့် တိုက်ပွဲကြောင့် တိုက်ပွဲရှောင် ၄ ထောင်ကျော်ရှိ လာပြီး လက်ရှိအချိန်ထိ စစ်ရေးတင်းမာနေဆဲဖြစ်ကြောင်း ကရင်နီပြည်နယ် လူ့ အခွင့်အရေးအဖွဲ့မှ ကိုဗညား က CNI သတင်းဌာနသို့ ပြောသည်။
ပြီးခဲ့သည့် စက်တင်ဘာ ၈ ရက်နေ့က စတင် ဖြစ်ပွားခဲ့သော တိုက်ပွဲသည် ယနေ့ (စက်တင်ဘာ ၁၄ ရက်)အထိ နှစ်ဖက် ထိတွေ့တိုက်ပွဲများ ရှိနေသေးကြောင်း ၎င်းက ပြောသည်။
ကိုဗညားက “လောလောဆယ် ကျနော်တို့ Update ပေါ့နော်၊ နောက်ဆုံး ရတာကတော့ ထိခိုက်ဒဏ်ရာ ရတာက ၆ ယောက် ဖြစ်သွားတယ်၊ အရပ်သားပေါ့နော် ၆ ယောက်၊ နောက်ပြီးတော့မှ ၇ နှစ်အရွယ် သားလေး တစ်ယောက် ကတော့ ဆုံးသွားတာပေါ့။ ဒါကတော့ လူထိခိုက်မှုပုံစံ ဖြစ်တာပေါ့နော်၊ နောက်ပြီးတော့မှ အခုလက်ရှိချိန်ထိ မြေပြင်ရှိနေတဲ့ တချို့ Volunteer (စေတနာ့ဝန်ထမ်း) တချို့၊ မိတ်ဆွေတွေရဲ့ အသံကနေ တဆင့်ပေါ့၊ သူတို့ ပြော ကြားချက်အရ ပြန်ကြည့်မယ်ဆိုရင်တော့ လူဦးရေတော့ ၅၀၀၀ ဝန်းကျင်တော့ ပြေးလိမ့်မယ်လို့ သူတို့က ခန့်မှန်း တယ်၊ ဒါပေမဲ့ နည်းနည်းပြောရခက်တာက မိုးဗြဲမှာ အခုချိန်ထိလည်း နည်းနည်းလေး စစ်ရေးတင်းမာမှုတွေ ရှိသေး တာပေါ့၊ တချို့ပစ္စည်းတွေ ရွှေ့ခိုင်းတာ ကျနော်တို့ အသံတွေ ကြားတယ်၊ စစ်ရေးဘယ်လိုလာမလဲ မသိသေးဘူး ပေါ့နော်၊ အဲဒီတစ်ခုရှိတော့ အကယ်၍ ဒီအတိုင်း ဆက်ဖြစ်မယ်ဆိုရင်တော့ လူဦးရေ သောင်းဂဏန်း ဖြစ်သွားနိုင် တာပေါ့၊ အခုတောင်မှ ကျနော်တို့ မြို့ပေါ်ရပ်ကွက် နီးပါးဖြစ်တာပေါ့နော်၊ မြို့အပြင်လေးနားမှာပေါ့နော်၊ ရပ်ကွက် ပေါ့၊ အဲဒီလိုမျိုးဖြစ်တော့ လောလောဆယ်တော့ ကျနော်တို့ အဲဒီလောက်အထိပဲ Confirm လို့ ရပါသေးတယ် ခင်ဗျ” ဟု CNI သတင်းဌာနသို့ ပြောသည်။
ကရင်နီတိုက်ပွဲရှောင်များ နေဖို့ ဆောက်လုပ်နေစဉ်(ကရင်နီပြည် စစ်ဘေးရှောင် ကူညီစောင့်ရှောက်ရေးကွန်ရက်)
အဆိုပါ တိုက်ပွဲရှောင်များမှာ လွိုင်ကော်မြို့နှင့် အခြား နီးစပ်ရာများသို့ တိမ်းရှောင်နေရကြောင်း၊ စားနပ်ရိက္ခာနှင့် နေရာ အခက်အခဲ ရှိနေကြောင်း ၎င်းက ပြောသည်။
မိုးဗြဲမြို့တွင် တိုက်ပွဲပြင်းထန်ခဲ့ခြင်းကြောင့် ဒေသခံများသည် မိမိတို့၏ လယ်ယာများနှင့် လုပ်ငန်းခွင်များမှ ရုတ်တရက် ထွက်ပြေးခဲ့ရကြကြောင်း၊ တိုက်ပွဲမှာ ရက်ဆက် ဖြစ်နေသည့်အတွက် မိမိတို့ နေအိမ်ကို ပြန်ဝင်၍ မရဘဲ စားဝတ်နေရေးပိုင်း အခက်အခဲရှိနေကြောင်း လွိုင်ကော်မြို့သို့ တိုက်ပွဲရှောင်လာသူ တစ်ဦးက CNI သတင်းဌာနသို့ ပြောသည်။
၎င်းက “ပြည်သူတွေလည်း ခက်ခဲကြတယ်ပေါ့။ တချို့တွေက တချို့ အဖွဲ့အစည်းတွေက ဘယ်လောက်ပဲ စစ်ရှောင်တွေကို ဦးတည်ပြီးတော့ သွားတယ်ပြောပြော အကုန်လုံးလက်လှမ်းမမီနိုင်ဘူးလေ၊ အကုန်လုံး ကာဗာ မိအောင် မသွားနိုင်တဲ့ အနေအထား ရှိတယ်ပေါ့နော်၊ ပြောစရာတော့ မရှိပေမယ့် လုပ်နိုင်တဲ့ အဖွဲ့အစည်းတွေ ရှိရင်တော့ ကျမတို့ ကရင်နီပြည်မှာရှိတဲ့ စစ်ရှောင်တွေကို နည်းနည်းဖြစ်ဖြစ်၊ များများဖြစ်ဖြစ် ဆိုင်ရာဆိုင်ရာ အဖွဲ့အစည်းတွေနဲ့ ချိတ်ပြီးတော့ စစ်ရှောင်တွေအတွက် Support ပေးတာတွေပေါ့နော်၊ ထောက်ပံ့ရေး သွားတာ တွေ စားနပ်ရိက္ခာ လုပ်တာတွေ အဲဒါတွေကို လုပ်ပေးစေချင်တယ်လေ၊ ဘာလို့လဲဆို ကျမတို့က အကုန်လုံးကို လက်လှမ်းမီနိုင်တဲ့ အနေအထားတွေ တချို့အဖွဲ့အစည်းတွေက ရှိမနေဘူး။ တချို့က လုပ်တော့ လုပ်နေပေမယ့် လည်း ကျန်တဲ့သူတွေလည်း ကျန်တဲ့ အနေအထားတွေ ရှိတယ်လေ၊ ကျမတို့က အချင်းချင်း အကုန်လုံးကို ပြန်ပြီး တော့ ကာဗာမိအောင် သွားဖို့ဆိုတာ နည်းနည်းခက်ခဲတဲ့ အနေအထားတွေ ရှိလို့ပေါ့နော်၊ တစ်ခုလေးတော့ အလှူ ရှင်တွေ ရှိတယ်ဆိုရင်လည်း စစ်ရှောင်တွေကို နည်းနည်း ရိက္ခာနဲ့ ပတ်သက်တာတွေ များများဝင်ပေးဖို့အတွက် တောင်းဆိုချင်တယ်” ဟု ပြောသည်။
မိုးဗြဲတိုက်ပွဲရှောင်များကိုတွေ့ရစဉ် (ကရင်နီပြည် စစ်ဘေးရှောင် ကူညီစောင့်ရှောက်ရေးကွန်ရက်)
၂၀၂၁ ခုနှစ်၊ ဖေဖော်ဝါရီ ၁ ရက် မြန်မာ့တပ်မတော်က အာဏာယူပြီးနောက်ပိုင်း ကယား (ကရင်နီ) ပြည်နယ်တွင် မြန်မာ့တပ်မတော်နှင့် ကရင်နီအမျိုးသားများ ကာကွယ်ရေးတပ် (KNDF)၊ ကရင်နီ တပ်မတော် (KA)၊ မိုးဗြဲ (PDF)၊ ဖယ်ခုံ(PDF)၊ ကရင်နီ တော်လှန်ရေး တပ်ပေါင်းစု (KRU) တို့ကြား တိုက်ပွဲများ ဖြစ်ပွားခဲ့သည်။
အဆိုပါ တိုက်ပွဲများကြောင့် ကယား(ကရင်နီ)ပြည်နယ်တွင် တိုက်ပွဲရှောင် လူဦးရေ ၂ သိန်းနီးပါးရှိနေပြီး အရပ်သား သေဆုံးမှု ၃၀၀ ကျော်ရှိနေကြောင်း ကရင်နီပြည်နယ်လူအခွင့်အရေးအဖွဲ့မှ ကိုဗညားက ပြောသည်။
- By CNI News
- Category: နိုင်ငံရေး
- Hits: 600
CNI News
၂၀၂၂ ခုနှစ်၊ စက်တင်ဘာ ၁၃
ယခုနှစ်တွင် ပြီးခဲ့သည့် နှစ်ထက် စစ်ရှိန်ပိုမြှင့်သွားမည်ဟု အမျိုးသားညီညွတ်ရေးအစိုးရ(NUG)၏ ပြည်ထဲရေးဝန်ကြီး ဦးလွင်ကိုလတ်က စက်တင်ဘာ ၁၃ ရက်နေ့တွင် သူ၏ လူမှုကွန်ရက်စာမျက်နှာမှာ ရေးသား ထုတ်လွှင့်ခဲ့သည်။
ဦးလွင်ကိုလတ်က “ ဒီနှစ်မှာ ပြီးခဲ့တဲ့ နှစ်ထက် စစ်ရှိန်ပိုမြှင့်ပါမယ်။ ပြည်သူ့ကာကွယ်ရေး ရဲဘော်တွေဆီမှာ တိုက်စွမ်းအားဖြစ်တဲ့ လက်နက်တွေက အရင်နှစ်က တပ်ဆင်ထားတာနဲ့ ဒီနှစ်ထပ်တပ်ဆင်ပေးနေတာနဲ့ပေါင်း ရင် တိုက်စွမ်းအားက တိုးနေပါတယ်။ တိုက်စွမ်းရည်နဲ့ စိတ်ဓာတ်မှာလည်း စကစ ဘက်မှာ ရှေ့တန်းသွားရတာ များလို့ ပင်ပန်းလို့ တပ်တွင်း မငြိမ်မသတ်မှုတွေဖြစ်ပြီး ပြည်သူ့ရင်ခွင့် ခိုလုံတဲ့သူတွေ တစ်နေ့တခြား တိုးလာပြီး တိုက်ပွဲဝင် စိတ်ဓာတ်ထိုးကျနေချိန် PDF ရဲဘော်တွေက မတိုက်ရလို့ စိတ်မရှည်ဖြစ်ပြီး မနည်းထိန်းထားရတယ် ဒါပေမယ့် မကြာစေရပါဘူး။ ရဲဘော်တို့ရဲ့ တိုက်ပွဲဝင်စိတ်ဓာတ်တွေနဲ့အတူ ပြည်တော်ဝင်ကြမယ်လို့ ပြောထားတယ်” ဟု သူ၏ လူမှုကွန်ရက်စာမျက်နှာတွင် ရေးသား၍ ပြောထားသည်။
ထို့နောက် ပြည်သူလူထု၏ ထောက်ခံမှုကလည်း စီမံဘဏ္ဍာဝန်ကြီး ရောင်းသမျှ အကုန်ဝယ်နေကြခြင်းကို ကြည့်ပါက ပြည်သူတွင် အောင်စိတ်က အခိုင်အမာ ရှိနေကြောင်း၊ ပြီးခဲ့သည့်နှစ် သမ္မတကြီး ဒူဝါလရှီးလ အရေး ပေါ် အခြေအနေ ကြေညာခဲ့ပြီး တစ်နှစ်အတွင်းမှာ ပြည်သူ့ကာကွယ်ရေးတပ်ဖွဲ့(PDF)များ မြို့ပြပျောက်ကြား များ ဆင်နွဲခဲ့သည့် ခုခံစစ်သည် မြို့ပြ ကျေးလက်နှင့် တောတောင်ကြားမှာ ထိတွေ့တိုက်ပွဲမျိုးစုံနှင့် စစ်မျက်နှာစုံ ဖွင့်နိုင်ခဲ့ကြကြောင်း ၎င်းက ဆက်ပြောထားသည်။
ဦးလွင်ကိုလတ်က “ ဒီနှစ် (---) ကြေညာပြီးရင်တော့ အားလုံး အသင့်အနေအထား ဖြစ်အောင် ပြင်ထားကြပေ တော့”ဟု ပြောသည်။
အမျိုးသားညီညွတ်ရေးအစိုးရ(NUG)၏ ယာယီသမ္မတ ဒူဝါလရှီးလသည် ၂၀၂၁ ခုနှစ်၊ စက်တင်ဘာ ၇ ရက်နေ့ က ပြည်သူ့ခုခံတော်လှန်စစ်(D-Day)ကို ကြေညာခဲ့ရာ ၂၀၂၂ ခုနှစ်၊ စက်တင်ဘာ ၇ ရက် တစ်နှစ်တာကာလ အတွင်း မြန်မာ့တပ်မတော်ဘက်မှ သေဆုံးသူ ၂၅၁၀၇ ဦးရှိပြီး ထိခိုက်သူ ၈၀၂၃ ဦး ရှီကြောင်း NUG ၏ ပြည်ထဲ ရေးဝန်ကြီး ဦးလွင်ကိုလတ်က ရေးသားထုတ်လွှင့်ထားသည်။
လာမည့်နှစ် (၂၀၂၃ ခုနှစ်)တွင် တပ်မတော်ကို အမြစ်ပြတ်သုတ်သင်ပေးမည့် အဆုံးသတ်တိုက်ပွဲရောက်လာ မည်ဟု NUG ၏ ပြည်သူ့ခုခံတော်လှန်စစ် ကြေညာခဲ့သော တစ်နှစ်ပြည့်သွားသည့် ၂၀၂၂ ခုနှစ်၊ စက်တင်ဘာ ၇ ရက်တွင် ယာယီသမ္မတ ဒူဝါလရှီးလက နိုင်င်ငံတော်အခြေပြ မိန့်ခွန်းတွင် ထည့်သွင်း ပြောကြားခဲ့သွားသည်။
NUG ၏ ယာယီသမ္မတ ဒူဝါလရှီးလနဲ့ ကချင်ဒေသက PDF တပ်ဖွဲ့
NUG ၏ ယာယီသမ္မတ ဒူဝါလရှီးလက “လာမယ့် တစ်နှစ်အတွင်းမှာ ယခုထက် ပိုမိုကျယ်ပြန့်တဲ့ နိုင်ငံရေး၊ စစ် ရေး၊ နိုင်ငံတကာအရေး ရလဒ်တွေ ထွက်ရှိဖို့ အရှိန်အဟုန်မြှင့် အားသွန်ကြိုးပမ်းနေကြပါတယ်။ စစ်အာဏာရှင် ဟာ အဖက်ဖက်က မှေးမိန်ချည်းနဲ့လာနေပါပြီ။ ဖက်ဆစ်သန္ဓေကို အမြစ်ပြတ် သုတ်သင်ပေးမယ့် အဆုံးသတ် တိုက်ပွဲ ဟာ အနှေးနဲ့အမြန် ရောက်လာလိမ့်မယ်၊ အဲဒီအခါ အကြမ်းဖက် အုပ်စုအနေနဲ့ လူထုတရားစီရင်ရေးကို ခံယူနိုင်ဖို့ ရင်ဆိုင်နိုင်စွမ်းရှိအောင် ခုကတည်းကနေ ကိုယ့်ကိုယ်ကို အသင့်ပြင်ထားကြဖို့ ဒီကနေ အသိပေးလိုက် ချင်ပါတယ်” ဟု ပြောသည်။
လက်ရှိတွင် တစ်နိုင်ငံလုံးတွင် PDF တပ်ရင်းပေါင်း ၃၀၀ ကျော် ဖွဲ့စည်းနိုင်ခဲ့ကြောင်း၊ ထို့အပြင် တစ်နိုင်ငံလုံး တွင် မြို့နယ်ပေါင်း ၃၃၀ ရှိသည့်အနက် မြို့နယ်ပေါင်း ၂၅၀ ကျော်တွင် PDF တပ်ဖွဲ့များ ဖွဲ့စည်းလည်ပတ်နေေ ကြာင်း NUG ယာယီသမ္မတက ပြောသည်။
ထို့နောက် EAO နှင့် PDF တို့၏ ပူးပေါင်း ခုခံစစ်မှာ စစ်ရေး၊ အုပ်ချုပ်ရေးအရ ပိုင်ပိုင်နိုင်နိုင် စိုးမိုးထားသည့် ဒေသများစွာ ရှိလာပြီဖြစ်ပြီး နယ်မြေစိုးမိုးထားသည့် မြို့နယ်ပေါင်း ၂၄ ခုတွင် တရားသူကြီးအဖွဲ့များ စုဖွဲ့ပြီး တရားစီရင်ရေး လုပ်ငန်းများ စတင်အကောင်အထည်ဖော်နေပြီ ဖြစ်ကြောင်း NUG ယာယီသမ္မတက ပြောသည်။
- By CNI
- Category: နိုင်ငံရေး
- Hits: 887
CNI News
၂၀၂၂ ခုနှစ်၊ စက်တင်ဘာ ၁၃
ဖားကန့်မြို့နယ် ရှဒူးဇွပ်ကျေးရွာအနီးက ဆုံးရှုံးသွားသည့် စခန်းနှစ်ခုကို ကချင်လွတ်မြောက်ရေးတပ်မတော် (KIA)မှ ပြန်ယူမှာဖြစ်ကြောင်း ဖားကန့်ဒေသခံတစ်ဦးက CNI သတင်းဌာနကို ပြောသည်။
၎င်းက “အမှန်တော့ ကိုယ်တွေ ငယ်ကတည်းနဲ့ တစ်သက်လုံး မြင်တွေ့ရတာကတော့ စစ်တပ်က KIA စခန်းတွေ သိမ်း တယ်၊ သိမ်းပြီးရင် စစ်စခန်းထိုင်တာမှ မဟုတ်တာ၊ သူတို့က သိမ်းပြီးတော့ ပြန်ထွက်သွားတာချည်း။ ပြန် ထွက်သွားရင် KIA ပြန်ထိုင်တာပဲလေ။ အခုလည်း အဲဒီလိုပဲ နေမှာပါ စစ်တပ်က အဲဒီနေရာမှာ သွားမထိုင် နိုင်ပါ ဘူး။ မထိုင်နိုင်တော့ သူတို့တိုက်တယ်၊ တိုက်ပြီး ပြန်ဆုတ်သွားမှာပဲ၊ ပြန်ဆုတ်သွားရင် KIA က နေရာပြန်ယူမယ် ဒါပါပဲ” ဟု ပြောသည်။
ပြီးခဲ့သည့် စက်တင်ဘာ ၁၂ ရက်နေ့ နံနက်ပိုင်းတွင် KIA ၏ စခန်းနှစ်ခုကို တပ်မတော်နှင့် ပြည်သူ့စစ်များက ခြေလျင်ထိုးစစ်ဆင်ကာ လေကြောင်းပစ်ကူဖြင့် တိုက်ခိုက်သိမ်းယူခဲ့ခြင်း ဖြစ်ကြောင်း သိရသည်။
ပြည်သူ့စစ်အဖွဲ့ကိုတွေ့ရစဉ်
အဆိုပါ တိုက်ပွဲဖြစ်ပွားခဲ့သည့် ဟူးကောင်းဒေသတွင် ရွှေနှင့် ပယင်းများ ထွက်ရှိပြီး စီးပွားရေးအရ အချက်အချာ ကျသော ဒေသဖြစ်ကြောင်း သိရသည်။
တိုက်ပွဲဖြစ်ပွားပြီး တပ်စခန်းသိမ်းခံရခြင်းနှင့် ပတ်သက်၍ KIA မှ ပြောရေးဆိုခွင့်ရှိသူ ဗိုလ်မှူးကြီးနော်ဘူထံ ဖုန်း ဆက်သွယ် မေးမြန်းခဲ့သော်လည်း အပြင်ရောက်ရှိနေသည့်အတွက် လက်ခံဖြေကြားနိုင်ခဲ့ခြင်း မရှိကြောင်း ပြော သည်။
ပြည်သူ့စစ်များ အနေဖြင့် တပ်မတော်နှင့် ပူးပေါင်းနေ၍ တိုက်ခိုက်ရခြင်း ဖြစ်ကြောင်း KIA က ပြောသလို KIA သည်လည်း ရပ်ရွာကို ဒုက္ခပေးနေ၍ ပြည်သူ့စစ်များက ခုခံတိုက်ခိုက်ရခြင်းဖြစ်ကြောင်း အပြန်အလှန် ပြောဆိုနေ ကြောင်း ဖားကန့်ဒေသခံများက ပြောသည်။
၂၀၂၂ ခုနှစ်၊ စက်တင်ဘာ ၁၂ ရက်နေ့က KIA ရဲ့ ဒွန်ဘန်တိုက်နယ် စခန်းတစ်ခုကို တပ်မတော်နဲ့ ပြည်သူ့စစ်အဖွဲ့က သိမ်းခဲ့စဉ်
ဖားကန့်ဒေသခံတစ်ဦးက “ ဒါငါ့နယ်မြေ၊ သူ့နယ်မြေ၊ ဒါဟာ ငါ့စားကျက်၊ သူ့စားကျက် ဒီလိုတွေနဲ့ပဲ သွားနေကြ ဦးမယ်ဆိုရင် ဒို့နိုင်ငံကြီးကတော့ ငြိမ်းချမ်းရေးလည်း အလှမ်းဝေးနေဦးမှာပဲ၊ ဒေသကြီး ဖွံ့ဖြိုးတိုးတက်ဖို့ကလည်း ဝေးနေဦးမှာပဲ။ မေတ္တာရပ်ခံချင်တာကတော့ ပြည်သူတွေ ဒုက္ခမရောက်အောင် အေးအေးချမ်းချမ်းလေး၊ ငြိမ်းငြိမ်း ချမ်းချမ်းနေကြမယ်၊ သူ့စည်းကိုယ့်စည်းပေါ့။ သူ့စည်းကိုယ့်စည်း စောင့်ပြီးနေကြမယ်ဆိုရင်တော့ ပြဿနာတွေက ဖြစ်လာစရာ အကြောင်းမရှိပါဘူး။ အခုက စည်းတွေ မစောင့်ကြဘူး။ ခုနပြောသလိုပေါ့ သူ့နယ်မြေ ကိုယ့်နယ်မြေ သူ့ဒေသ ကိုယ့်ဒေသ ခုနပြောတဲ့ ရလိုမှုတွေ ရလိုမှုနောက်မှာ လက်နက်ကိုင်တဲ့ လမ်းစဉ်တွေ ပေါ်လာတယ်၊ အဲဒီ လက်နက်ကိုင်တဲ့ လမ်းစဉ်တွေ ပေါ်လာတော့ သေနတ်က ကျည်ဆံပဲ ထွက်တယ်၊ ပန်းမထွက်တော့ သေကြ၊ ကြေကြ သွေးစွန်းကြတာပေါ့။ အဲဒါမျိုးတွေကတော့ ကိုယ်တို့ ဒေသမှာကတော့ အရင်ငယ်ကတည်းက မြင်ဖူးနေရ တာ ဘယ်အချိန် နိဂုံးချုပ်ကြမလဲဆိုတာပဲ မျှော်လင့်နေရတာပေါ့လေ” ဟု ပြောသည်။
ဟူးကောင်းဒေသတွင် ရှဒူးဇွပ်ပြည်သူ့စစ်နှင့် KIA တို့အကြား မကြာခဏ စစ်ရေးတင်းမာမှုရှိခဲ့ပြီးနောက် စက်တင်ဘာ ၁၂ ရက်နေ့က တိုက်ပွဲဖြစ်ပွားခဲ့ခြင်းဖြစ်ကြောင်း ဒေသခံများက ပြောသည်။
ထို့နောက် ကချင်ပြည်နယ်အတွင်းရှိ ကျောက်စိမ်းထွက်ရှိသော ဖားကန့်ဒေသနှင့် ရွှေ၊ ပယင်းများ ထွက်ရှိသည့် တနိုင်းဒေသများတွင် KIA နှင့် ပြည်သူ့စစ်တို့အကြား တိုက်ပွဲများ မကြာခဏ ဖြစ်ပွားလေ့ရှိကြောင်း သိရသည်။
- By CNI
- Category: နိုင်ငံရေး
- Hits: 960
CNI News
၂၀၂၂ ခုနှစ်၊ စက်တင်ဘာ ၁၃
အမေရိကန်နိုင်ငံသည် စစ်လက်နက်ပစ္စည်း ထုတ်လုပ်ရောင်းချခြင်းကို စီးပွားရေး တစ်ခုအနေဖြင့် ဆောင်ရွက်နေ ခြင်းကြောင့် ပြဿနာများဖန်တီးပြီး လက်နက်ရောင်းချသည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။
ရုရှားနိုင်ငံ RIA သတင်းဌာနနှင့် တွေ့ဆုံမေးမြန်းမှုတွင် ၎င်းက အထက်ပါ အတိုင်း ပြောကြားခဲ့ခြင်း ဖြစ်သည်။
ဗိုလ်ချုပ်မှူးကြီးမင်းအောင်လှိုင်က “အမေရိကန်နိုင်ငံက ထိုင်ဝမ်ကို စစ်လက်နက်ပစ္စည်း ထောက်ပံ့ပေးတာတွေ၊ ရောင်းချပေးတာတွေ ကျနော်တို့ တွေ့ပါတယ်။ အမေရိကန်ရဲ့ အဓိကစီးပွားရေး လုပ်ငန်းထဲမှာ စစ်လက်နက် ပစ္စည်း ထုတ်လုပ်ရောင်းချတဲ့ စီးပွားရေး လုပ်ငန်းတစ်ခုလည်း ပါပါတယ်။ ပြီးခဲ့တဲ့ ယူကရိန်းဖြစ်စဉ်တွေကို ပြန် ကြည့်မယ်ဆိုလို့ရှိရင်လည်း အလားတူစွာပဲ ကျနော်တို့ တွေ့ရတယ်။ ပြဿနာကိုပဲ နယ်နယ်ရရ ဖန်တီးတတ် တယ်။ ပြီးတော့မှ လက်နက်ခဲယမ်း မီးကျောက်တွေ ထောက်ပံ့တယ်။ အရန်ထားရှိတဲ့ လက်နက်ခဲယမ်း မီး ကျောက်တွေ ထောက်ပံ့ပေးခြင်းအားဖြင့် တိုက်ပွဲရဲ့ စစ်ပွဲရဲ့ ပုံသဏ္ဌာန်ကို ပြောင်းလဲအောင် ဖန်တီးလာတယ်။ သူတို့နိုင်ငံရဲ့ အဓိကစီးပွားရေး လုပ်ငန်းထဲမှာ လက်နက်ခဲယမ်းမီးကျောက် ထုတ်လုပ်တဲ့ လုပ်ငန်းဟာလည်း ပါ တယ်။ အဲ့ဒီတော့ အရန်ထုတ်လိုက်ပြီဆိုကတည်းက ပစ္စည်းတွေထပ်ပြီး အသစ်ပြန်ထုတ်ရတယ်။ ဒါစစ်ပွဲကို နားလည်တဲ့သူတိုင်း သဘောပေါက်ပါတယ်”ဟု ပြောသည်။
RIA သတင်းဌာနနဲ့ ဗိုလ်ချုပ်မှူးကြီးမင်းအောင်လှိုင် အင်တာဗျူးလုပ်နေစဉ်
မြန်မာ့တပ်မတော်သည် တရုတ်နှင့် ရုရှား လက်နက်များ ဝယ်ယူအသုံးပြုကာ ဖိနှိပ်မှုများ ပြုလုပ်နေသည်ဟု စွပ်စွဲ ချက်ကို အကာအကွယ်လုပ်ရန် အမေရိကန် လက်နက်ရောင်းချသည့်အပေါ် ပြန်လည် တုန့်ပြန်ခြင်းဖြစ်နိုင်သည်ဟု နိုင်ငံရေးလေ့လာသူ ဦးသန်းစိုးနိုင်က ပြောသည်။
ဦးသန်းစိုးနိုင်က “စကစ ကိုလည်း ကမ္ဘာက စွပ်စွဲနေတာပေါ့ဗျာ၊ ပြည်တွင်းမှာ ကျနော်တို့ အကြမ်းဖက်လုပ်ရပ်တွေ လုပ်ဖို့အတွက် ကျနော်တို့ ရုရှားနဲ့တရုတ် လက်နက်တွေကို ဝယ်ယူအသုံးချနေတယ် ဆိုတဲ့အခါမှာ သူတင်လုပ်တာ မဟုတ်ဘူး ဒီမိုကရေစီနိုင်ငံလို့ ပြောတဲ့ ဒီအမေရိကန်ကလည်းပဲ တရုတ်ရဲ့ ထိုင်ဝမ်ကို လက်နက်တွေ ရောင်းချနေ တာ ရှိတာပေါ့။ အဲ့တော့ ကိုယ် လိုလားတဲ့စနစ်နဲ့ ကိုယ် လိုလားတဲ့တိုင်းပြည် ကာကွယ်ဖို့အတွက် နိုင်ငံကြီးတွေက တော့ ဒီလို လက်နက်ရောင်းချဖို့ ကြိုးစားနေတာပဲ။ သူ့ရဲ့ ရုရှား၊ တရုတ်ကို မှီခိုပြီးတော့ စစ်လက်နက် ဝယ်ယူမှု အပေါ်မှာ ဒါက အကြောင်းပြချက် တစ်ခုအနေနဲ့ ထုတ်ဖော်ပြောဆိုလာတာလို့ မြင်ပါတယ်”ဟု CNI သတင်းဌာန သို့ ပြောသည်။
၂၀၂၂ ခုနှစ်၊ စက်တင်ဘာ ၇ ရက်နေ့က ဗိုလ်ချုပ်မှူးကြီးမင်းအောင်လှိုင်နဲ့ ရုရှားသမ္မတ ပူတင် တွေ့ဆုံစဉ်
တရုတ်သည် မြန်မာနှင့် ဆက်ဆံရေးတွင် ကင်းကွာစွာ ရပ်တည်လာခြင်းကြောင့် မြန်မာ့တပ်မတော်သည် ရုရှားကို တစ်ဆင့်တိုး၍ ဆက်ဆံရေးမြှင့်တင်ရန် ကြိုးစားနေခြင်း ဖြစ်နိုင်သည်ဟု ၎င်းက ဆက်ပြောသည်။
လက်ရှိ မြန်မာနိုင်ငံတွင် နိုင်ငံရေး အကျပ်အတည်းဖြစ်ပေါ်နေကာ နစက၏ အုပ်ချုပ်မှုအပေါ် အမေရိကန် နှင့် ဥရောပ နိုင်ငံများက အသိအမှတ်ပြုရေး မျက်ကွယ်ပြုထားသလို စီးပွားရေးပိတ်ဆို့မှုများ ပြုလုပ်ကာ ဖိအားပေး လျက်ရှိနေသည်။
- By CNI
- Category: နိုင်ငံရေး
- Hits: 481
CNI News
၂၀၂၂ ခုနှစ်၊ စက်တင်ဘာ ၁၂
စစ်ကိုင်းတိုင်းဒေသကြီး၊ မုံရွာမြို့နယ်၊ ညောင်ဖြူပင်ကျေးရွာ ရဲကင်းစခန်းမှ ရဲတပ်ဖွဲ့ဝင် ၂ ဦးသည် ဈေးဝယ်ရန် ထွက်လာစဉ် မုံရွာခရိုင်တပ်ရင်း(၇)-Lightning People Defence Force က တိုက်ခိုက်ခဲ့ခြင်းကြောင့် သေဆုံး သွားကြောင်း Lightning People Defence Force မှ ထုတ်ပြန်ထားသည်။
ညောင်ဖြူပင်ရဲကင်းစခန်းမှ ရဲတပ်ဦး ပစ်သတ်ခံရသည်ကိုတွေ့ရစဉ် (Lightning People Defence Force)
ယနေ့ (စက်တင်ဘာ ၁၂ ရက်) နံနက် ၇ နာရီခွဲလောက်က အထက်ပါ တိုက်ခိုက်မှု ဖြစ်ပွားခဲ့ခြင်း ဖြစ်ပြီး ရဲနှစ်ဦး သေဆုံးခဲ့သလို ၎င်းတို့နှင့်ပါလာသော လက်နက် ၂ လက်ကိုလည်း သိမ်းဆည်းရမိခဲ့သည်ဟု ထုတ်ပြန်ချက်တွင် ဖော်ပြထားသည်။
အဆိုပါ တိုက်ခိုက်မှုကို မုံရွာခရိုင်တပ်ရင်း(၇)-Lightning People Defence Force မှ တပ်ခွဲ(၂)၊ တပ်ခွဲ(၃)၊ တပ်ခွဲ(၅)တို့ ပူးပေါင်း ဆောင်ရွက်ခဲ့ခြင်းဖြစ်ကြောင်း ထုတ်ပြန်ခဲ့သည်။
- By CNI
- Category: နိုင်ငံရေး
- Hits: 567
CNI News
၂၀၂၂ ခုနှစ်၊ စက်တင်ဘာ ၁၂
ရှမ်းပြည်နယ်တောင်ပိုင်း ကယား (ကရင်နီ) ပြည်နယ်အစပ် မိုးဗြဲမြို့တွင် ကရင်နီအမျိုးသားကာကွယ်ရေးတပ်ဖွဲ့ (KNDF)နှင့် မြန်မာ့တပ်မတော်အကြား တိုက်ပွဲဖြစ်ပွားခဲ့ရာမှာ လူနေအိမ် ၁၀၀ ဝန်းကျင် ပျက်စီးခဲ့ကြောင်း KNDF မှ တာဝန်ရှိသူ တစ်ဦးက CNI သတင်းဌာနသို့ ပြောသည်။
ပြီးခဲ့သည့် စက်တင်ဘာ ၈ ရက်နေ့က စတင် ဖြစ်ပွားခဲ့သော တိုက်ပွဲသည် ယနေ့ (စက်တင်ဘာ ၁၂ ရက်)အထိ နှစ် ဖက် စစ်ရေးတင်းမာနေကြောင်း၊ စာရင်းအတိအကျ မကောက်ရသေးကြောင်း ၎င်းက ပြောသည်။
KNDF မှ တာဝန်ရှိသူတစ်ဦးက “လောလောဆယ်က ပွင့်ပွင့်လင်းလင်းပြောရရင် ကျနော်တို့ ဒီနေအိမ် ပျက်စီးမှု ပေါ့နော်၊ နေအိမ်ပျက်စီးမှုကို ကျနော်တို့ KNDF အနေနဲ့က အတိအကျကြီးတော့ အတည်မပြုနိုင်သေးဘူးပေါ့နော်၊ ကျနော်တို့ မရေတွက်ရသေးဘူးပေါ့နော်၊ data မကောက်ရသေးဘူးပေါ့။ မလုပ်ရသေးဘူး။ ဒါပေမဲ့ ၁၀၀ နဲ့ ၇၀ ဝန်းကျင်မှာတော့ ရှိမယ်ထင်တယ်။ အိမ်ပျက်စီးသွားတာ တော်တော်များတယ်။ အိမ်ပျက်သွားတာ တော်တော် များတယ် အထက်မှာပဲ ရှိတယ်ကျနော်တို့ အဲလောက်အထိ ရှိတယ်ဗျ” ဟု CNI သတင်းဌာနသို့ ပြောသည်။
တိုက်ပွဲကြောင့် မိုးဗြဲဒေသက နေအိမ်မီးလောင်ထားသည်ကိုတွေ့ရစဉ်
အဆိုပါ မိုးဗြဲတိုက်ပွဲတွင် တပ်မတော်ဘက်မှ လေယာဉ်ပစ်ကူ၊ လက်နက်ကြီး ပစ်ကူများဖြင့် တိုက်ခိုက်ခဲ့ကြောင်း၊ တိုက်ပွဲပြင်းထန်ခဲ့သည့် ၄ ရက်အတွင်း တပ်မတော်ဘက်မှ ၅၀ ကျော်ကျဆုံးပြီး KNDF ဘက်မှ ၂ ဦး ကျဆုံးကာ ထိခိုက်ဒဏ်ရာရှိမှုများရှိခဲ့ကြောင်း ၎င်းက ပြောသည်။
ထိုတိုက်ပွဲဖြစ်ပွားသည့် ကိစ္စ၊ ထိခိုက်သေဆုံးမှုနှင့် ပတ်သက်၍ နစက ဘက်မှ တစ်စုံတစ်ရာ ထုတ်ပြန်ခြင်း မရှိသေးပေ။
တိုက်ပွဲဖြစ်ပွားခဲ့သည့် မြို့ပေါ်ရပ်ကွက် ၃ ခုမှ ပြည်သူများ ဘေးလွတ်ရာ ထွက်ပြေးတိမ်းရှောင်နေရကြောင်း KNDF မှ တာဝန်ရှိသူ တစ်ဦးက ပြောသည်။
KNDF တပ်ဖွဲ့ကိုတွေ့ရစဉ်
၎င်းက “ခုန ကျနော်တို့ တိုက်ပွဲ ဖြစ်တဲ့ နေရာပေါ့နော်၊ ရပ်ကွက် ၃ ရပ်ကွက်ပေါ့နော်၊ အဲဒီရပ်ကွက်ဆိုလို့ရှိရင် အကုန်လုံး ရှောင်နေရတယ်ပေါ့နော်၊ ဒေသခံတွေ အကုန်လုံး စစ်ရှောင်နေရတယ်၊ ပြီးရင် ရပ်ကွက်နဲ့ နည်းနည်း ဝေးတဲ့နေရာပေါ့ဗျာ၊ မြို့ထဲမှာတော့ မြို့ထဲမှာပဲ တချို့ကြတော့လည်း စစ်မရှောင်သေးဘူးပေါ့နော်၊ မြို့ထဲမှာပဲ ကိုယ့်အိမ်မှာ ရှိနေတဲ့ လူတွေလည်း ရှိကြတယ်။ ဒါပေမဲ့ ဒီတိုက်ပွဲဖြစ်တဲ့ အနီးတစ်ဝိုက်က ရပ်ကွက်တွေ ရပ်ကွက်မှာ ရှိတဲ့သူတွေက တော်တော်များများ စစ်ရှောင်နေရတယ်ပေါ့” ဟု CNI သတင်းဌာနသို့ ပြောသည်။
၂၀၂၁ ခုနှစ်၊ ဖေဖော်ဝါရီ ၁ ရက် မြန်မာ့တပ်မတော်က အာဏာယူပြီးနောက်ပိုင်း ကယား (ကရင်နီ) ပြည်နယ်တွင် မြန်မာ့တပ်မတော်နှင့် ကရင်နီအမျိုးသားများ ကာကွယ်ရေးတပ် (KNDF)၊ ကရင်နီ တပ်မတော် (KA)၊ မိုးဗြဲ (PDF)၊ ဖယ်ခုံ(PDF)၊ ကရင်နီ တော်လှန်ရေး တပ်ပေါင်းစု (KRU) တို့ကြား တိုက်ပွဲများ ဖြစ်ပွားခဲ့သည်။
အဆိုပါ တိုက်ပွဲများကြောင့် ကယား(ကရင်နီ)ပြည်နယ်တွင် တိုက်ပွဲရှောင် လူဦးရေ ၁၆၃,၆၀၀ ရှိပြီး နေအိမ် ပျက်စီးမီးလောင်မှု ၄၃၆ လုံးထက်မနည်း ရှိနေကြောင်း ISP – Myanmar ၏ နောက်ဆုံး ထုတ်ပြန်ချက်အရ သိရသည်။
- By CNI
- Category: နိုင်ငံရေး
- Hits: 668
CNI News
၂၀၂၂ ခုနှစ်၊ စက်တင်ဘာ ၁၂
ရှမ်းပြည်နယ်တောင်ပိုင်း၊ ကယားပြည်နယ်စပ်က မိုးဗြဲမြို့နယ်အတွင်း မြန်မာ့တပ်မတော်နှင့် ကရင်နီ လက်နက်ကိုင်များ (ပူးပေါင်းအဖွဲ့)ကြား ဖြစ်ပွားနေသော တိုက်ပွဲတွင် နေအိမ် ၁၀၀ ကျော် ပျက်စီး ဆုံးရှုံး ခဲ့ ကြောင်း တိုးတက်သောကရင်နီပြည်သူ့အင်အားစု(PKPF)က စက်တင်ဘာ ၁၂ ရက်တွင် ထုတ်ပြန်ခဲ့သည်။
မိုးဗြဲမြို့နယ်တွင် မြန်မာ့တပ်မတော်နှင့် ကရင်နီအမျိုးသားကာကွယ်ရေးတပ်ဖွဲ့(KNDF)၊ ကရင်နီတပ်မတော်(KA) ပူးပေါင်းတပ်ဖွဲ့တို့ စက်တင်ဘာ ၈ ရက်နေ့ကနေ စတင်ကာ တိုက်ပွဲဖြစ်ပွားနေပြီး ယနေ့ (စက်တင်ဘာ ၁၂ ရက် နေ့)အထိဆိုလျှင် နေအိမ် အလုံး ၁၀၀ ကျော် ပျက်စီးခဲ့သည်။
တိုက်ပွဲအတွင်း ပျက်စီးသွားသည့် မိုးဗြဲက နေအိမ်များ (PKPF)
PKPF သတင်းနှင့်ပြန်ကြားရေးဗျူရိုက “ ယမန်နေ့ည (စက်တင်ဘာ ၁၁ ရက်နေ့) တစ်ရက်အတွင်း မိုးဗြဲတိုက်ပွဲ စစ်ကောင်စီ လက်နက်ကြီး ရမ်းသမ်းပစ်ခတ်မှုကြောင့် ပွဲကုန်း ၁၊ ၂၊ ၃ ရပ်ကွက် နေအိမ်အလုံး ၄၀ ထက်မနည်း လက်နက်ကြီးထိမှန်ပြီး ပျက်စီးခဲ့ပါသည်။ ၄ ရက်အတွင်း တိုက်ပွဲပြင်းထန်မှုကြောင့် နေအိမ် အလုံး ၁၀၀ ထက် မနည်း ပျက်စီးနေပြီ”ဟု စက်တင်ဘာ ၁၂ ရက်နေ့တွင် ထုတ်ပြန်ခဲ့သည်။
ထို့နောက် ယနေ့ (စက်တင်ဘာ ၁၂ ရက်) ၅ ရက်မြောက်တွင်လည်း တိုက်ပွဲများ ဖြစ်နေခြင်းကြောင့် မိုးဗြဲ၊ ဖယ်ခုံလမ်း အသွားအလာ မပြုလုပ်ရန် ကရင်နီအဖွဲ့များက ထုတ်ပြန်ထားသည်။
- By CNI News
- Category: နိုင်ငံရေး
- Hits: 607
CNI News
၂၀၂၂ ခုနှစ်၊ စက်တင်ဘာ ၁၀
စစ်ကိုင်းတိုင်းဒေသကြီး၊ ဗန်းမောက်မြို့နယ်၊ နောင်ပတ်ကျေးရွာ၏ ဦးဆောင်သံဃာတော် ရှမ်းနီဆရာတော် ဦးဂန္ဓမာကို KIA၊ PDF ပူးပေါင်းအဖွဲ့မှ စက်တင်ဘာ ၄ ရက်တွင် ဖမ်းဆီးခေါ်ဆောင်သွားကာ သတ်ဖြတ်ခဲ့ခြင်း အား NUG နှင့် KIA က အများပြည်သူရှေ့မှောက် ခုံရုံးဖွဲ့စစ်ဆေးအရေးယူပေးရန် တိုင်းလိုင်(ရှမ်းနီ) အမျိုးသား များ ဖွံ့ဖြိုးတိုးတက်ရေးပါတီ(TNDP)က ထုတ်ပြန် ပြောကြားခဲ့သည်။
စက်တင်ဘာ ၁၀ ရက်နေ့ TNDP ပါတီ၏ ထုတ်ပြန်ချက်တွင် သံဃာတော် ဦးဂန္ဓမာအား ဖမ်းဆီးသတ်ဖြတ်ခြင်း နှင့် ပတ်သက်၍ NUG နှင့် KIA တို့မှ တာဝန်ရှိသူများသည် အများပြည်သူရှေ့မှောက် ခုံရုံးဖွဲ့စစ်ဆေး အရေးယူပြီး ဗုဒ္ဓဘာသာဝင်များနှင့် ရှမ်းနီတိုင်းရင်းသားတို့ကို တောင်းပန်ရန် တိုက်တွန်းသည်ဟု ဖော်ပြထားသည်။
TNDP က “အာဏာရှင်တော်လှန်ရေးနှင့် ဖက်ဒရယ်ဒီမိုကရေစီအရေး အကြောင်းပြပြီး မိမိကိုယ်တိုင် လူမျိုးကြီး ဝါဒ ကျင့်သုံးနေသော KIA နှင့် အာဏာရှင်ကို တော်လှန်ရင်း ကိုယ်တိုင်အာဏာရှင် ဖြစ်လာနေသော KIA နှင့် PDF ပူးပေါင်းအဖွဲ့တို့၏ အကြမ်းဖက် လုပ်ရပ်များကို ပြင်းထန်စွာ ရှုံ့ချသည်”ဟု ပြောသည်။
ထို့နောက် တော်လှန်ရေးလုပ်နေကြသော ရှမ်းနီလူမျိုးများသည် မိမိတို့လူမျိုးကို ချစ်မြတ်နိုးကြရန်နှင့် KIA ၏ ပယောဂကြောင့် ဖြစ်ပေါ်ခဲ့သော ပါဂျောင်အရေးအခင်းနှင့် စစ်အစိုးရနှင့် ငြိမ်းချမ်းရေးယူပြီးနောက် ၁၉၉၆ ခုနှစ် တွင် မြန်မာပြည်မြောက်ပိုင်းမှ ABSDF တို့ ထွက်ခွာခဲ့ရခြင်းများကို သင်ခန်းစာယူ၍ သတိထားဆောင်ရွက်ကြရန် အသိပေးသည်ဟုလည်း TNDP က ထုတ်ပြန်ခဲ့သည်။
၎င်းက “ ပြည်သူလူထုအပေါ် လက်နက်အားကိုးဖြင့် အနိုင်ကျင့် ဗိုလ်ကျပြီး အကြမ်းဖက် နေကြသော အဖွဲ့အစည်းများကို အမျိုးသားရေး စိတ်ဓာတ်ဖြင့် တွန်းလှန်တိုက်ထုတ်သွားကြရန် ရှမ်းနီတိုင်းရင်းသား အားလုံး ကို နှိုးဆော်သည်”ဟု ပြောသည်။
လက်နက်ကိုင် အဖွဲ့အစည်းများအနေဖြင့် ပြည်သူလူထု၏ အသက်အိုးအိမ်ကို ကာကွယ်စောင့်ရှောက်ပေးကြရန် နှင့် လက်နက်မဲ့ ပြည်သူလူထုကို အကြမ်းဖက် သတ်ဖြတ်ခြင်းများ မပြုလုပ်ကြရန် တိုင်းလိုင်(ရှမ်းနီ) အမျိုးသား များ ဖွံ့ဖြိုးတိုးတက်ရေးပါတီ(TNDP)က စက်တင်ဘာ ၁၀ ရက်နေ့တွင် ထုတ်ပြန်ခဲ့သည်။
လက်ရှိတွင် စစ်ကိုင်းတိုင်းဒေသကြီး၊ ဗန်းမောက်မြို့နယ်ထဲမှာ ကချင်လွတ်လပ်ရေးတပ်မတော်(KIA)၊ ပြည်သူ့ ကာကွယ်ရေးတပ်ဖွဲ့(PDF) ပူးပေါင်းအဖွဲ့နှင့် ရှမ်းနီအမျိုးသားများတပ်မတော်(SNA)တို့ကြား တိုက်ပွဲများ ဖြစ်ပွား နေသည်။
- By CNI
- Category: နိုင်ငံရေး
- Hits: 728
CNI News
၂၀၂၂ ခုနှစ်၊ စက်တင်ဘာ ၁၀
စစ်ကိုင်းတိုင်းဒေသကြီး၊ ဒီပဲယင်းမြို့နယ်အတွင်းရှိ တိုက်ပွဲရှောင် ပြည်သူများသည် စားနပ်ရိက္ခာများ လိုအပ်နေ သည်ဟု ဒီပဲယင်းမြို့နယ် တိုက်ပွဲရှောင်ထောက်ပံ့ရေးအဖွဲ့မှ CNI သတင်းဌာနသို့ ပြောသည်။
ပရဟိတအဖွဲ့အစည်းများသည် တိုက်ပွဲဖြစ်ပွားရာ နေရာများသို့ သွားရောက်ကူညီဆောင်ရွက်မှုများ မပြုလုပ်နိုင် ဘဲ ဖြစ်နေကြောင်း၊ လွန်ခဲ့သည့် ၅ လလောက်က ဒီပဲယင်းဘက်သို့ လူနာပို့ဆောင်ပေးစဉ် မိုင်းခွဲခံခဲ့ရကြောင်း မန္တလေးမြို့ ပရဟိတမင်းခေါင် ရှာဖွေကယ်ဆယ်ရေးအသင်းမှ ဥက္ကဋ္ဌ ဦးခင်မောင်တင့်က CNI သတင်းဌာနသို့ ပြောသည်။
၎င်းက “ အဲ့ဘက်က ခုလောလောဆယ် သွားဖို့ကို မလွယ်တာ ၊ ဒီပဲယင်းက ပိုဆိုးတယ်။ လုံးဝကို ကျနော်တို့ လူနာ သွားပို့ရင်တောင်မှ ဂိတ်တွေ အများကြီးဖြတ်ပြီးတော့မှ လူနာဆိုလည်း လူနာ၊ လူသေဆိုလည်းလူသေပေါ့ လုံးဝခါလီဆို အဲ့ဘက်ကို သွားလို့ကို မလွယ်တာ” ဟု ပြောသည်။
ဒီပဲယင်းမြို့နယ် မူးကမ်းကြီးရွာက နေအိမ်များ မီးလောင်သွားသည့် ဒေသခံများကို BIA တပ်ဖွဲ့က ဆန်များလှူဒါန်း (BIA-fb)
ဒီပဲယင်း မြို့နယ်အတွင်းတွင် တိုက်ပွဲရှောင်စခန်း (၆) ခုရှိကြောင်း၊ ထိုစခန်းများအနက် တချို့စခန်းတွင် လူဦးရေ ၇၀၀ ကျော်ရှိသော်လည်း တချို့ စခန်းမှာတော့ လူဦးရေ ၅၀ ကျော်ရှိကြောင်း ဒီပဲယင်းမြို့နယ် တိုက်ပွဲရှောင် ထောက်ပံ့ရေးအဖွဲ့မှ ကိုခန့်ဇော်(အမည်လွှဲ)က ပြောသည်။
၎င်းက “တစ်ရက်ကို ဆယ်တင်းကျော် ၁၂ တင်း လောက်ချက်ရတယ်။ အဲ့လောက်ကုန်ကြပြီးတော့ အလုပ်လုပ် ပေးနေရတယ်ပေါ့။ လိုအပ်တာတော့ စားဝတ်နေရေးပေါ့၊ နေရေးကတော့ ကျနော်တို့ ဘုန်းကြီးကျောင်းတွေတို့၊ စာသင်ကျောင်းတွေတို့ နီးစပ်ရာတွေမှာ တက်နေလို့ ရတယ်။ အသက်ရှင်ဖို့အတွက် စားဖို့သောက်ဖို့က အရမ်း အရေးကြီးတဲ့ အခါကြတော့ ဒီဟာကတော့ ရေရှည်ကြရင် ထောက်ပံ့မှုတွေ လိုအပ်တယ်ပေါ့နော်၊ ခုလည်း ထောက်ပံ့မှုတွေ လိုအပ်နေတယ်”ဟု ပြောသည်။
အဆိုပါ စခန်းများကို ပြည်သူ့အုပ်ချုပ်ရေးအဖွဲ့(ပအဖ)က လာရောက်လှူဒါန်းမှုများရှိသော်လည်း တိုက်ပွဲရှောင် စခန်းအတွင်းရှိ ကိုယ်ဝန်ဆောင်မိခင်များ၊ သက်ကြီးရွယ်အို နှင့် ကလေးသူငယ်များအတွက် ဆေးဝါး အကူအညီ များ လိုအပ်နေသေးကြောင်း သိရသည်။
ဒီပဲယင်းမြို့နယ်မှ တိုက်ပွဲရှောင်များ (ဒီပဲယင်းမြို့နယ် စစ်ရှောင်ထောက်ပံ့ရေး အဖွဲ့)
လက်ရှိ ဒီပဲယင်းမြို့နယ်အတွင်းရှိ တိုက်ပွဲရှောင် တချို့သည် စိတ်ပိုင်းဆိုင်ရာနှင့် ရုပ်ပိုင်းဆိုင်ရာ ထိခိုက်မှုများ ရှိနေ ကြောင်းလည်း သိရသည်။
UNHCR ၏ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့ ထုတ်ပြန်ချက်အရ ပြည်တွင်း နေရပ်စွန့်ခွာ ရွေ့ပြောင်းနေထိုင် သူ ၃၄၆,၆၀၀ ဦးကြောင်း၊ ထို့နောက် ပြည်တွင်းနေရပ် စွန့်ခွာနေထိုင်သူအသစ် ၈၆၆,၄၀၀ ဦး တိုးလာကြောင်း ထုတ်ပြန်ထားသည်။
ထို့နောက် ပဋိပက္ခဖြစ်ပွားရာ ဒေသများရှိ ထိခိုက်ခံစားနေရသော ပြည်သူများကို လူသားချင်း စာနာမှုဆိုင်ရာ အကူအညီပေးရေး လုပ်ငန်းစဉ်များအား ဆောင်ရွက် သွားမည်ဖြစ်ကြောင်း၊ အရပ်သားပြည်သူများ ကာကွယ် စောင့်ရှောက်ရေးဆိုင်ရာ ကိစ္စရပ်များကို ဆောင်ရွက်သွားမည်ဟု ငြိမ်းချမ်းရေးနှင့် ဖက်ဒရယ်ဒီမိုကရေစီ အဖွဲ့အစည်းများကွန်ရက်(CNPFD)က ၂၀၂၁ ခုနှစ်၊ မေလ ၂၆ ရက်တွင် ထုတ်ပြန်ခဲ့သည်။