CNI News

၂၀၂၄ ခုနှစ်၊ ဇူလိုင် ၁၁

ရိုးမဘဏ်နှင့်ပတ်သက်ပြီး သတင်းအမှား ထုတ်လွှင့်မှုဖြင့် ခေတ်သစ်မီဒီယာကို တည်ဆဲဥပဒေများဖြင့် တရားစွဲ ဆိုပြီး ဥပဒေကြောင်းအရ ဆောင်ရွက်သွားမည်ဟု ၂၀၂၄ ခုနှစ်၊ ဇူလိုင် ၁၁ ရက်နေ့တွင် ရိုးမဘဏ်က တရားဝင် ထုတ်ပြန်ကြေညာခဲ့သည်။

ထုတ်ပြန်ချက်တွင် ရိုးမဘဏ်သည် ရှင်းလင်းစွာ ထုတ်ပြန်ပြောကြားလိုသည်မှာ ခေတ်သစ်မီဒီယာတွင် ပါရှိ သည့် ရိုးမဘဏ် ဒါရိုက်တာများ ငွေကြေးခဝါချမှုများနှင့် ပတ်သက်၍ စစ်ဆေးမေးမြန်းခံရခြင်း၊ ထိန်းသိမ်းခံရ ခြင်း စသည့်သတင်းများသည် မဟုတ်မမှန် မသမာသည့် ရည်ရွယ်ချက်နှင့် ထုတ်လွှင့်သည့် သတင်းမှားသာ ဖြစ်ကြောင်း နှင့် နိုင်ငံတော်၏ ငွေရေးကြေးရေးကဏ္ဍနှင့် ငွေကြေးဈေးကွက် မတည်ငြိမ်မှုဖြစ်စေရန် ရည်ရွယ်၍ ဆောင်ရွက် ခြင်းဖြစ်ကြောင်း ဖော်ပြထားသည်။

ထို့နောက် ယင်းသို့ မတည်ငြိမ်မှုများကြောင့် ပြည်သူများ၏ အကျိုးစီးပွား ထိခိုက်စေရန် ဆောင်ရွက်ချက်များဖြစ် ကြောင်း၊ ထို့ကြောင့် ရိုးမဘဏ်အနေဖြင့် မဟုတ်မမှန် သတင်းဖြန့်ချိသူများကို တည်ဆဲဥပဒေများဖြင့် တရားစွဲ ဆိုပြီး ဥပဒေကြောင်းအရ ဆောင်ရွက်သွားမည်ဟု ရိုးမဘဏ်က ထုတ်ပြန်ခဲ့သည်။

ခေတ်သစ်မီဒီယာ ဖော်ပြချက်ကိုတွေ့ရစဉ်

၂၀၂၄ ခုနှစ်၊ ဇူလိုင် ၁ ရက်နေ့က ရိုးမဘဏ်၊ မြန်မာနိုင်ငံသားများဘဏ်၊ ဧရာဝတီဘဏ်၊ အသေးစားနှင့် အလတ်စား လုပ်ငန်းများ ဖွံ့ဖြိုးရေးဘဏ်၊ UAB ဘဏ်၊ မြန်မာမက်ထရိုဘဏ်၊ ဆောက်လုပ်ရေးအိမ်ရာနှင့် အခြေခံ အဆောက် အအုံ ဖွံ့ဖြိုးရေးဘဏ်တို့သည် မြန်မာနိုင်ငံတော်ဗဟိုဘဏ်၏ သတ်မှတ်ချက်အား ကျော်လွန်၍ အိမ်ရာချေးငွေ ထုတ်ချေးထားကြောင်း စစ်ဆေးတွေ့ရှိခဲ့သည်ဟုဆိုကာ နစက-က အရေးယူခဲ့သည်။

ထို့နောက် ပြည်သူများအကြား စိုးရိမ်မှုများလွန်ကဲကာ ဘဏ်အပ်နှံငွေများကို ပြန်လည်ထုတ်ယူလာခြင်းကြောင့် ဘဏ်များသည် ထုတ်ယူငွေကို အကန့်အသတ်ဖြင့်သာ ထုတ်ပေးမှုများ ပေါ်ပေါက်လာခဲ့သည်။

အဆိုပါ အခြေအနေများ ဖြစ်ပေါ်လာပြီးနောက်မှာတော့ နစကအတွင်းရေးမှူး၊ တွဲဖက်အတွင်းရေးမှူး၊ ပြည်ထဲရေး ဝန်ကြီး၊ ဗဟိုဘဏ်နှင့် ဒုတိယဝန်ကြီးချုပ်တို့သည် နိုင်ငံပိုင်နှင့်ပုဂ္ဂလိကဘဏ်များမှ နာယကများ၊ ဥက္ကဋ္ဌများအား နေပြည်တော်သို့ ခေါ်ကာ ၂၀၂၄ ခုနှစ်၊ ဇူလိုင် ၁၀ ရက်နေ့က တွေ့ဆုံ ဆွေးနွေးခဲ့သည်။

 နစကနဲ့ ဘဏ်လုပ်ငန်းရှင်များတွေ့ဆုံစဉ်

နစကအတွင်းရေးမှူး ဒုတိယဗိုလ်ချုပ်ကြီးအောင်လင်းဒွေးက မိမိတို့ နိုင်ငံအနေဖြင့် ဈေးကွက်စီးပွားရေးစနစ် ကို ကျင့်သုံးနေသည့်အတွက် ဗဟိုဘဏ်နှင့် ဘဏ်များသည် သီးခြားလွတ်လပ်စွာ ဆောင်ရွက်နိုင်ပါကြောင်း၊ သို့ သော် ယခုအခါတွင် သတ်မှတ်စည်းကမ်းများကို ဖောက်ဖျက်မှုများသည် နိုင်ငံတော်၏စီးပွားရေး မူဝါဒများကို ထိပါးလာ သည့်အတွက် နိုင်ငံတော်အစိုးရအနေဖြင့် ထိုက်သင့်အားလျော်စွာ ကြီးကြပ်ဆောင်ရွက်ပေးနေပါကြောင်း၊ ပြည်သူ လူထု အနေဖြင့်လည်း မလိုအပ်ဘဲ ငွေကြေး အမြောက်အများ ထုတ်ယူခြင်း၊ ကောလာဟလ သတင်းများအပေါ် စိုးရိမ်စိတ်လွန်ကဲပြီး ထုတ်ယူခြင်းများ မပြုလုပ်ကြရန်လည်း လိုအပ်ကြောင်း၊ ဘဏ်များ အနေဖြင့် Card စနစ်များ e-Banking ကျယ်ကျယ်ပြန့်ပြန့် သုံးစွဲနိုင်ရေး အလေးထား ဆောင်ရွက်သွားစေလိုကြောင်း ပြောကြားခဲ့သည်။

CNI News

၂၀၂၄ ခုနှစ်၊ ဇူလိုင် ၁၀

တအာင်းအမျိုးသားလွတ်မြောက်ရေးတပ်မတော်(TNLA)၏ ထုတ်ပြန်ချက်အမှတ်(၀၆/၂၀၂၄)ပါ စွပ်စွဲချက်များ သည် ကလေးကလားဆန်သည့် စွပ်စွဲချက်များသာဖြစ်သည်ဟု ရှမ်းပြည်တိုးတက်ရေးပါတီ(SSPP)က ဇူလိုင် ၉ ရက်နေ့စွဲဖြင့် ထုတ်ပြန်ခဲ့သည်။

TNLA ၏ ထုတ်ပြန်ချက်ပါ “ SSPP ဗဟိုခေါင်းဆောင်အချို့၏ ရည်ရွယ်ချက်ရှိရှိပေးသည့် အမိန့်အတိုင်း အောက်ခြေတပ်ဖွဲ့ဝင်များ၏ နှောင့်ယှက်မှုအမျိုးမျိုး ဆက်တိုက်ကျူးလွန်နေသည်”ဆိုသည်မှာ အခြေအမြစ် မရှိသည့် စွပ်စွဲချက်သာဖြစ်ကြောင်း၊ စင်စစ်အားဖြင့် မည်သည့် SSPP/SSA ဗဟိုခေါင်းဆောင်မှ မဟာမိတ် တပ်ဖွဲ့များအား ထိပါးနှောင့်ယှက်ရန် အမိန့်ပေးစေခိုင်းထားခြင်းမရှိကြောင်း SSPP က ထုတ်ပြန်ခဲ့သည်။

SSPP ထုတ်ပြန်ချက်ကို တွေ့ရစဉ်

ထို့နောက် “SSPP/SSA တပ်ဖွဲ့များ၏ ဝိုင်းရံပိတ်ဆို့ခြင်းကိုခံရပြီး ထင်မှတ်မထားဘဲ ရက်ရက်စက်စက် ပစ်သတ် ခြင်းခံခဲ့ရသည်”၊ “PSLF/TNLA စစ်ဦးစီးမှူး၏ နာမည်ပြောဆိုသံကြားရပြီး ဒီနာမည်နဲ့လူဆိုရင် အပြတ်ရှင်းပစ် ဟူ၍ စကားပြောစက်မှ အမိန့်ပေးပြီးနောက် စက်သေနတ်များဖြင့် ပစ်ခတ်တိုက်ခိုက်ခြင်းခံရသည်”၊ “စကစ စစ်စခန်းများ မကျဆုံးမီ SSPP ထံလွှဲပြောင်းပေးခြင်း၊ SSPP တပ်ဖွဲ့များက စကစ တပ်ဖွဲ့များကို သယ်ယူပို့ ဆောင်ပေးခြင်း၊ လမ်းကြောင်းထွက်ပေါက်ဖွင့်ပေးခြင်းများ ပြုလုပ်ပေးခဲ့ကြသည်” စသည့် စွပ်စွဲချက်များမှာ ကလေးကလာဆန်သည့် စွပ်စွဲချက်များသာဖြစ်သည်ဟု SSPP က TNLA ကို တုန့်ပြန်ပြောကြားခဲ့သည်။

အလားတူ ၂၀၂၄ ခုနှစ်၊ ဇူလိုင် ၅ ရက်နေ့က TNLA နှင့် SSPP အကြား ထိတွေ့တိုက်ပွဲ ၄ နေရာ ဖြစ်ပွားခဲ့သည် မှာ TNLA ဘက်က လာရောက် တိုက်ခိုက်ခဲ့ခြင်းကြောင့် မိမိတို့မှ ပြန်လည် ခုခံတိုက်ခိုက်ခဲ့ရသော တိုက်ပွဲများ သာ ဖြစ်သည်ဟု SSPP က ထုတ်ပြန်ပြောကြားခဲ့သည်။

SSPP ထုတ်ပြန်ချက်ကို တွေ့ရစဉ်

SSPP နှင့် TNLA သည် “ဝ”ပြည်သွေးစည်းညီညွတ်ရေးတပ်မတော်(UWSA) ဦးဆောင်သည့် ပြည်ထောင်စု နိုင်ငံရေးဆွေးနွေးညှိနှိုင်းရေးကော်မတီ(FPNCC) အဖွဲ့ဝင်များဖြစ်ပြီး အငြင်းပွားနေသော အခြေအနေကို ဖြေရှင်း ပေးရန် ၂ ဖွဲ့စလုံးက FPNCC ကို စာပို့တောင်းဆိုထားသည်။

လတ်တလောတွင် TNLA သည် ရှမ်းပြည်နယ်မြောက်ပိုင်းအတွင်း လှုပ်ရှားနေကြသည့် SSPP၊ ကချင်လွတ်လပ် ရေးတပ်မတော်(KIA)၊ မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)တို့ဖြင့် နမ့်ခမ်း၊ ကွတ် ခိုင်၊ သိန္နီ၊ ကျောက်မဲ၊ သီပေါ စသည့်မြို့နယ်များအတွင်းမှာ နယ်မြေပိုင်ဆိုင်မှု အငြင်းပွားနေသလို အုပ်ချုပ်ရေး အငြင်းပွားနေသည်။

CNI News

၂၀၂၄ ခုနှစ်၊ ဇူလိုင် ၁၀

ကိုးကန့်တပ်ဖွဲ့ (MNDAA) သည် ကိုးကန့်ဒေသ၏ ပြင်ပကိုပါ တိုက်ခိုက်ပြီး နယ်မြေချဲ့ထွင်လာကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဇူလိုင် ၉ ရက်နေ့မှာ သတင်းထုတ်ပြန် ပြောကြားခဲ့သည်။

MNDAA သည် ကိုးကန့်နယ်မြေ အထူးဒေသ (၁) ရရှိရေးကို လုပ်ဆောင်လာကြောင်း၊ ထို့အတူ NUG နှင့် တွေ့ဆုံ ဆွေးနွေးမှုများ၊ NUG ၏ အသံကို လိုက်၍ ပြောဆိုမှုများ လုပ်ဆောင်နေကြောင်း ၎င်းက ပြောသည်။

ဗိုလ်ချုပ်ဇော်မင်းထွန်းက “MNDAA ဟာ ကိုးကန့်နယ်မြေ အထူးဒေသ (၁) ရရှိရေးဆိုပြီး လုပ်ဆောင်လာပါတယ်။ အကြမ်းဖက် NUG အဖွဲ့နဲ့ တွေ့ဆုံပြီး သူတို့ နယ်မြေကို လိုက်ပြတာတွေ၊ ဆွေးနွေးတာတွေ လုပ်ဆောင်လာတဲ့ အပြင် ကိုးကန့်ဒေသရဲ့ ပြင်ပကိုပါ ဆက်လက်နယ်မြေချဲ့ထွင် တိုက်ခိုက်လာတာ တွေ့ရပါတယ်။ NUG အဖွဲ့ရဲ့ အသံကိုလိုက်ပြီး ပြောကြားနေတာကိုလည်း တွေ့ရပါတယ်။ ကိုးကန့်နယ်မြေထဲက ကလေးငယ်များပါမကျန် လူသစ်စုဆောင်းတာတွေ၊ ကိုးကန့်ဒေသအတွင်းမှာ အလုပ်လုပ်ကိုင်ခဲ့ကြတဲ့ ဗမာအပါအဝင် တိုင်းရင်းသား အလုပ် သမားတွေကို ဖမ်းဆီးပြီး MNDAA ထဲကို သွင်းပြီး တိုက်ပွဲဝင်ခိုင်းတာတွေ လုပ်ဆောင်ခဲ့ပါတယ်။ စာသင်ကျောင်း တွေကို ပိတ်ပစ်တာတွေ၊ ပညာသင်ကြားမှု ပိတ်ပင်တာတွေကိုလည်း ပြုလုပ်ခဲ့ပါတယ်” ဟု ပြောသည်။

ပြီးခဲ့သည့် နှစ်ကုန်ပိုင်းက ညီနောင်မဟာမိတ်သုံးဖွဲ့(AA-TNLA-MNDAA) တို့က စတင်ခဲ့သည့် ၁၀၂၇ စစ်ဆင်ရေး အတွင်း ရှမ်းပြည်နယ်မြောက်ပိုင်းရှိ လောက်ကိုင်၊ ကုန်ကြမ်း၊ သိန္နီ၊ မုန်းကိုး၊ ဖောင်းဆိုင်၊ ချင်းရွှေဟော်နှင့် ကွမ်လုံ စသည့် မြို့နယ်များကို MNDAA က သိမ်းပိုက်ရရှိထားသည်။

လက်ရှိမှာလည်း ရှမ်းပြည်နယ်မြောက်ပိုင်းရှိ လားရှိုးမြို့ကို MNDAA နှင့် ပူးပေါင်းတပ်ဖွဲ့တို့က လာရောက် တိုက်ခိုက်နေပြီး မြန်မာ့တပ်မတော်နှင့် တိုက်ပွဲများ ဖြစ်ပွားလျက်ရှိနေသည်။

ရှမ်းပြည်နယ်မြောက်ပိုင်းတွင် နယ်မြေအငြင်းပွားမှု ပြဿာနာ ဖြစ်ပေါ်နေကြောင်း၊ အဆိုပါ ကိစ္စရပ်များကို ဖြေရှင်းနိုင်ရန် အချိန်ယူရမည်ဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

၎င်းက “အခုဟာက အဲဒီလိုဖြစ်တယ်၊ နယ်မြေလုတဲ့ဟာတွေ ဖြစ်နေတယ်၊ “ဝ”ကလည်း ချဲ့ချင်တယ်၊ အဲဒီလို လည်း ဖြစ်တယ်၊ တအာင်းကလည်း နယ်မြေတွေပြောတယ်၊ နောက်တစ်ခါ SSPP တို့ ဘာတို့ကလည်း ပြောတယ်၊ အဲဒီမှာ နယ်မြေတွေက အဲဒီ ပြဿနာတွေ အများကြီးဖြစ်နေတယ်၊ ဖြစ်နေတော့ အဲဒါတွေက တော်တော် ရှင်းယူ ရမယ်၊ ဒီမိုကရေစီရရင်တောင်မှ အဲဒီဟာတွေက တော်တော်ရှင်းယူရဦးမယ်၊ အဲဒီလိုဖြစ်တာပေါ့နော်၊ အဲဒါဟာ ကတော့ အနာဂတ်မှာ စောင့်ကြည့်ရမှာပါတယ်၊ ဗိုလ်ချုပ်ဇော်မင်းထွန်းတို့ ဘာတို့ကတော့ သူတို့ကတော့ ပြောမှာ ပေါ့၊ တဖက်ကနေပြီးတော့ နိုင်ငံရေး၊ စစ်ရေးပရိယာယ်အရ ထိုးခွဲရမယ့် စိတ်ဓါတ်စစ်ဆင်ရေး ဗျူဟာလည်း သူတို့ က ကျင့်သုံးမှာဆိုတော့ သူတို့ ပြောတာတွေတော့ အမှန်လို့ သွားယူလို့ မရဘူး။ သူတို့ချင်း ရှင်းကြလိမ့်မယ်လေ၊ သူတို့သူတို့ နားလည်ပြီးသားပဲ၊ သူလည်း သေနတ်နဲ့ ကိုယ့်လည်း သေနတ်နဲ့ဆိုတော့ အဲဒီဟာကတော့ သူတို့ စေ့စပ်ဆွေးနွေးပြီးတော့ သူတို့ အဖြေရှာကြရမှာပေါ့နော်၊ အဲဒီလိုပဲ မြင်ပါတယ်” ဟု ပြောသည်။

လက်ရှိ လားရှိုးမြို့နယ်အတွင်း ဖြစ်ပွားနေသော မြန်မာ့တပ်မတော်နှင့် MNDAA ပူးပေါင်းတပ်တို့အကြား တိုက်ပွဲ များကြောင့် ဒေသခံသောင်းနှင့်ချီ ဘေးလွတ်ရာသို့ ထွက်ပြေးတိမ်းရှောင်လျက်ရှိနေသည်။

၂၀၀၈ ဖွဲ့စည်းပုံအခြေခံဥပဒေအရ ရှမ်းပြည်နယ်ရှိ လောက်ကိုင်နှင့် ကုန်းကြမ်းမြို မြို့နယ်တို့ကို စုစည်းပြီး ကိုးကန့်ကိုယ်ပိုင်အုပ်ခွင့်ရဒေသ အထူးဒေသ (၁) အဖြစ် သတ်မှတ်ပြဋ္ဌာန်းထားသည်။

CNI News

၂၀၂၄ ခုနှစ်၊ ဇူလိုင် ၉

ရှမ်းပြည်တိုးတက်ရေးပါတီ (SSPP/SSA) နှင့် ပလောင်ပြည်လွတ်မြောက်ရေးတပ်ဦး (PSLF/TNLA) တို့အကြား စစ်ရေးပဋိပက္ခ ဖြစ်လာစရာ အကြောင်းမရှိဟု မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်း ဌာနသို့ ပြောသည်။

ယခုလ အစောပိုင်းမှာ SSPP နှင့် TNLA တို့ ရှမ်းပြည်နယ်မြောက်ပိုင်း ကျောက်မဲ၊ သီပေါမြို့နယ်တို့တွင် တိုက်ပွဲ များ ဖြစ်ပွားခဲ့ပြီး နှစ်ဖက်ထိခိုက် သေဆုံးမှုများလည်း ရှိခဲ့သည်။

SSPP နှင့် TNLA တို့သည် မဟာမိတ်အချင်းချင်းဖြစ်ပြီး ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC) အဖွဲ့ဝင်ဖြစ်ခြင်းကြောင့် ပြဿနာများကို ဖြေရှင်းနိုင်လိမ့်မည်ဟု မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

TNLA ရဲ့ ထုတ်ပြန်ချက်ကို တွေ့ရစဉ်

၎င်းက “အဲဒီပြဿနာတွေကတော့ မဟာမိတ်အချင်းချင်းလည်း ဖြစ်တယ်၊ နောက်ပြီးတော့ FPNCC တစ်ဖွဲ့ထဲ အောက်မှာရှိနေတဲ့ ပြဿနာတွေ ဖြစ်တဲ့အတွက် FPNCC က ဖြေရှင်းပေးနိုင်လိမ့်မယ်လို့ ကျနော်တော့ ယူဆပါ တယ်ခင်ဗျ၊ ဆိုလိုတာက အောက်ခြေမှာ ပဋိပက္ခအချို့ ရှိပေမယ့် ပြဿနာအကြီးကြီးအထိတော့ မဖြစ်နိုင်ဘူးလို့ ကျနော်တော့ ယူဆပါတယ်။ အဲဒီလို ကိစ္စတွေကတော့ နယ်မြေပိုင်ဆိုင်မှုနဲ့ ပတ်သက်တဲ့ ရှုပ်ထွေးတဲ့ ပထဝီ အနေအထားတွေလည်း ရှိတာကို၊ ရှမ်းတွေက မြစ်၊ ချောင်း၊ အင်း၊ အိုင်တွေ ရှိတဲ့နေရာမှာ နေပြီးတော့ တောင်ပေါ် မှာကတော့ တအာင်းတွေ နေထိုင်တာ ဖြစ်တာကို၊ အဲဒီတော့ နေထိုင်မှုက ရောထွေးနေတယ်၊ ဒီအစဉ်အလာ ကြောင့် အခွန်ကောက်တာလည်း အတော်လေး ကာလတစ်ခုက ရှုပ်ထွေးခဲ့ပါတယ်၊ ဒါပေမဲ့ ပြဿနာ အကြီးကြီး မဟုတ်ပါဘူး။ ဖြေရှင်းလို့ရတဲ့ ပြဿနာ၊ အောက်ခြေမှာ ပဋိပက္ခအချို့ရှိပေမယ့် အဖွဲ့နှစ်ဖွဲ့ကြားထဲမှာ စစ်ရေး ပဋိက္ခတွေ ဖြစ်လာနိုင်စရာအကြောင်း သိပ်မရှိပါဘူး” ဟု ပြောသည်။

မိမိတို့ တပ်ဖွဲ့ကို TNLA က အစီအစဉ်ရှိရှိဖြင့် ဝင်ရောက်တိုက်ခိုက်ခဲ့ကြောင်း၊ ထို့နောက် နှစ်ဖက်တိုက်ပွဲ ဖြစ်ပွားခဲ့ကြောင်း၊ အဆိုပါ အခြေအနေများကို ကူညီထိန်းကြောင်းပေးဖို့ “ဝ”ပြည်သွေးစည်းညီညွတ်ရေးပါတီ (UWSP/UWSA) ထံ SSPP က စာပေးပို့ တောင်းဆိုခဲ့သည်။

အလားတူ TNLA က ဆင်နွှဲနေသော ၁၀၂၇ စစ်ဆင်ရေးကို SSPP က ရည်ရွယ်ချက်ရှိရှိ နှောင့်ယှက်နေမှုကို ကန့်ကွက်ကြောင်းနှင့် အဆိုပါ ကိစ္စရပ်များကို FPNCC က ကြားဝင်ဖြေရှင်းပေးရန် TNLA က ဇူလိုင် ၈ ရက်နေ့မှာ ထုတ်ပြန်တောင်းဆိုခဲ့သည်။

အဆိုပါ ကိစ္စများနှင့် ပတ်သက်၍ အကြောင်းစုံ သိရှိနိုင်ရန် SSPP မှ ပြန်ကြားရေးတာဝန်ခံ ဗိုလ်မှူးစိုင်းဖုန်းဟန်နှင့် TNLA မှ ပြန်ကြားရေးတာဝန်ခံ လွေးယေဦးတို့ထံ ဖုန်းဆက်သွယ်ခဲ့သော်လည်း ဆက်သွယ်၍ မရသေးပေ။

SSPP ရဲ့ စာကိုတွေ့ရစဉ်

အဆိုပါ လက်နက်ကိုင်တပ်ဖွဲ့ အချင်းချင်းအကြား ဖြစ်ပွားခဲ့သော ပြဿနာများကို ပူးပေါင်းပြီး ဖြေရှင်းကြသည်ကို တွေ့ရကြောင်း၊ ပြဿနာပြေလည်မှု မရှိပါက ပြည်သူများမှာ နေရထိုင်ရ ခက်ခဲကြောင်း ပလောင်နိုင်ငံရေးသမား ဦးကျော်အောင်က CNI သတင်းဌာနသို့ ပြောသည်။

၎င်းက “လောလောဆယ်ကတော့ဗျာ တိုက်ပွဲဘာညာလည်း ဖြစ်နေတဲ့အခါကြတော့ ပြည်သူလူထုကတော့ လောလောဆယ်က စစ်ရှောင်ရတဲ့ အနေအထားတွေ ရှိတယ်၊ ခုနလို သွားရေး လာရေးပေါ့ဗျာ၊ အလုပ်အကိုင် စီးပွားကအစ အားလုံးတော့ ဒါအနည်းနဲ့ အများတော့ ရိုက်ခတ်ကုန်ကြတာပေါ့၊ ဒါတွေကတော့ တိုက်ရိုက်တော့ သိခွင့်မရှိပါဘူး။ ကျနော်တို့လည်း ခုနပြောသလို သတင်းပေါ်မှာပဲ စောင့်ကြည့်ရတာပဲ၊ ခါတိုင်းပြဿနာလေးတွေ ဖြစ်ခဲ့ကြရင် သူတို့လက်နက်ကိုင် အချင်းချင်းဆိုတာတော့ နောက်ဆုံး သက်ဆိုင်ရာ အဖွဲ့အစည်းတွေနဲ့ စုပေါင်းပြီး တော့မှ တစ်စုံတစ်ခု ဖြေရှင်းသွားတာပဲ တွေ့ရတာပဲလေ၊ မဟုတ်ရင်လည်း ပြည်သူတွေက ဒီကြားထဲမှာ နေရ ထိုင်ရ တအားခက်ခဲကုန်တာလေ” ဟု ပြောသည်။

လက်ရှိတွင်လည်း SSPP နှင့် TNLA တို့အကြား ရှမ်းပြည်နယ်မြောက်ပိုင်းမှာ စစ်ရေးတင်းမာနေပြီး နယ်မြေအငြင်း ပွားမှုများ ဖြစ်ပေါ်လျက်ရှိနေကြောင်း သိရသည်။

CNI News

၂၀၂၄ ခုနှစ်၊ ဇူလိုင် ၉

စစ်ကိုင်းတိုင်းဒေသကြီးအထက်ပိုင်း၊ ဟုမ္မလင်းခရိုင်၊ ဟုမ္မလင်းမြို့နယ်၊ ချင်းမြစ်ရိုးတစ်လျှောက်ရှိ ကျေးရွာများမှ ရေဘေးသင့် ပြည်သူလူထုများကို ရှမ်းနီအမျိုးသားများတပ်မတော်(SNA)က ဆန်အိတ်များနှင့် ဆီပုံးများကို ၂၀၂၄ ခုနှစ်၊ ဇူလိုင် ၉ ရက်နေ့က လိုက်လံလှူဒါန်းခဲ့ကြောင်း သိရသည်။

SNA သည် ဟုမ္မလင်းမြို့နယ်အတွင်းရှိ ရေဘေးသင့် ကျေးရွာပေါင်း ၁၀၀ မှ ပြည်သူလူထုအတွက် ဆန်အိတ် ၁၀၀၀ နှင့် ဆီပုံး ၅၀၀ ခန့်ကို သွားရောက်လှူဒါန်းခဲ့ခြင်း ဖြစ်သည်။

လက်ရှိတွင် စစ်ကိုင်းတိုင်းဒေသကြီးအတွင်းမှာ ချင်းတွင်းမြစ်နှင့် ဥရုချောင်း  ရေကြီးရေလျှံမှုများ ဖြစ်နေသည့် အတွက် ဟုမ္မလင်းမြို့နယ်နှင့် ခန္တီးမြို့နယ်များရှိ ပြည်သူများသည် ရေဘေးဒုက္ခကြုံတွေ့နေကြရသည်။

CNI News

၂၀၂၄ ခုနှစ်၊ ဇူလိုင် ၉

ရှမ်းပြည်နယ်မြောက်ပိုင်းအတွင်းမှာ အကောင်အထည်ဖော်နေသည့် ၁၀၂၇ စစ်ဆင်ရေး အပိုင်း-၂ ကို ရှမ်းပြည် တိုးတက်ရေးပါတီ(SSPP)က ရည်ရွယ်ချက်ရှိရှိ နှောင့်ယှက်နေသည်ဟု တအာင်းအမျိုးသား လွတ်မြောက်ရေး တပ်မတော်(TNLA)မှ ၂၀၂၄ ခုနှစ်၊ ဇူလိုင် ၈ ရက်နေ့တွင် ထုတ်ပြန် စွပ်စွဲခဲ့သည်။

တအာင်းအမျိုးသားလွတ်မြောက်ရေးတပ်မတော်(TNLA)သည် မြောက်ပိုင်းမဟာမိတ် (ကိုးကန်တပ်ဖွဲ့ MNDAA- ရခိုင်တပ်ဖွဲ့ AA)တို့နှင့်အတူ ၁၀၂၇ စစ်ဆင်ရေး အပိုင်း-၂ ကို ၂၀၂၄ ခုနှစ်၊ ဇွန်လ ၂၅ ရက်နေ့မှစတင်၍ အကောင်အထည်ဖော်လျက်ရှိနေသည်။

ထို့နောက် SSPP ဗဟိုခေါင်းဆောင်အချို့၏ ရည်ရွယ်ချက်ရှိရှိ ပေးသည့်အမိန့်အတိုင်း အောက်ခြေတပ်ဖွဲ့ဝင်များ ၏ နှောင့်ယှက်မှု အမျိုးမျိုး ဆက်တိုက်ကျူးလွန်နေသည်ကို အပြင်းအထန် ကန့်ကွက်ရှုတ်ချပြီး ထိုလုပ်ရပ်များ ရပ်တန့်ထိန်းသိမ်းရန် တောင်းဆိုပါသည်ဟု TNLA က ထုတ်ပြန်ခဲ့သည်။

TNLA ရဲ့ SSPP ကို စွပ်စွဲထုတ်ပြန်ထားသည့် ထုတ်ပြန်ချက်ကိုတွေ့ရစဉ်

ဇူလိုင် ၅ ရက်နေ့က TNLA ၏ စစ်ဆင်ရေး ကြီးကြပ်သည့်အဖွဲ့မှ ကျောက်မဲမြို့၊ နောင်ပိန်အနီး တောင်ခြေစခန်း ကို လှည့်လည်ကြီးကြပ်ရန်သွားစဉ် နောင်ပိန်လမ်းခွဲအနီးရှိ SSPP တပ်ဖွဲ့များ၏ ဝိုင်းရံပိတ်ဆို့ခြင်းကို ခံခဲ့ရပြီး ပစ် ခတ်တိုက်ခိုက်မှုကြောင့် TNLA မှစစ်ဆင်ရေးကြီးကြပ်သည့် ပထမတန်း-စစ်ဦးစီးအရာရှိတစ်ဦး၊ တပ်ရင်း ၄၃၄ တပ်ရင်းမှူး၊ တပ်ရင်း ၅၇၇ တပ်ရင်းမှူးနှင့်အတူ တပ်ဖွဲ့ဝင် ၃ ဦး သေဆုံးခဲ့သည်ဟု ထုတ်ပြန်ချက်တွင် ဖော်ပြ ထားသည်။

ထို့အပြင် ဇွန်လ ၂၅ ရက်နေ့မှ ပြန်လည်စတင်ခဲ့သည့် ၁၀၂၇ စစ်ဆင်ရေး အပိုင်း-၂ တွင် သီပေါနှင့် ကျောက်မဲ မြို့နယ်များရှိ ရန်သူ (စစ်တပ်) စစ်စခန်းများကို မိမိတို့ ဝန်းရံတိုက်ခိုက်ကြစဉ် အချို့နေ့ရာများတွင် စစ်တပ် စခန်းများ မကျရှုံးမီ SSPP တပ်ဖွဲ့များထံ လွှဲပြောင်းပေးခြင်း၊ SSPP တပ်ဖွဲ့များက မြန်မာ့တပ်မတော်မှ တပ်ဖွဲ့ဝင် များကို သယ်ယူပို့ဆောင်ပေးခြင်း၊ လမ်းကြောင်းထွက်ပေါက်ဖွင့်ပေးခြင်းများ ပြုလုပ်ခဲ့သည်ဟု TNLA က စွပ်စွဲ ထားသည်။

မြောက်ပိုင်းမဟာမိတ် ၃ ဖွဲ့သည် ယခုစစ်ဆင်ရေး မစမီကာလ ကတည်းကပင် SSPP ခေါင်းဆောင်များနှင့် ဆက်သွယ် ညှိနှိုင်းခြင်း၊ အစည်းအဝေး ပြုလုပ်ခြင်းတို့ဖြင့် အတူတကွ ပူးပေါင်းစစ်ဆင်ရန် ကြိုးပမ်းခဲ့သော် လည်း အခြေအနေအကြောင်း အမျိုးမျိုးကြောင့် ပါဝင်နိုင်ရန် အဆင်သင့် မဖြစ်သေးကြောင်း SSPP ခေါင်း ဆောင်များက တုန့်ပြန်ခဲ့သည်ဟု TNLA က ထုတ်ပြန်ခဲ့သည်။

SSPP ကတော့ TNLA ၏ စွပ်စွဲချက်မှာ မှန်ကန်မှုမရှိကြောင်းနှင့် ၁၀၂၇ စစ်ဆင်ရေးကို နှောင့်ယှက်ခြင်းမရှိ ကြောင်း တုန့်ပြန်ထားသည်။

SSPP ရဲ့ UWSA ထံ ပေးစာကို တွေ့ရစဉ်

TNLA သည် SSPP ထိန်းချုပ်နယ်မြေ နမ့်ခမ်း၊ သီပေါ၊ မူဆယ်၊ ကျောက်မဲ၊ နောင်ချို မြို့နယ်များအတွင်းသို့ ၁၀၂၇ စစ်ဆင်ရေးနှင့်အတူ ဝင်ရောက်ကာ စစ်ရေးလှုပ်ရှားလာခြင်းကြောင့် နှစ်ဖက် နယ်မြေအငြင်းပွားမှုနှင့် အုပ်ချုပ်မှု အငြင်းပွားလာကာ အပြန်အလှန် တပ်ဖွဲ့ဝင်များကို ဖမ်းဆီးကာ လက်နက်များဖြုတ်ခြင်း၊ တပ်ပြောင်း ရွှေ့ခြင်းများ ပြုလုပ်လာကြသည်။

အဆိုပါ အခြေအနေများကြောင့် SSPP က TNLA ၏ လုပ်ရပ်များကို ထိန်းကြောင်းပေးရန် “ဝ”ပြည်သွေးစည်း ညီညွတ်ရေး တပ်မတော်(UWSA) စစ်ဦးစီးချုပ် ဦးကျောက်ကျုံးတန်းကို ၂၀၂၄ ခုနှစ်၊ ဇူလိုင် ၆ ရက်က စာပို့ တောင်းဆိုထားသည်။

TNLA နှင့် SSPP သည် မဟာမိတ်များဖြစ်သလို UWSA ဦးဆောင်သည့် ပြည်ထောင်စုနိုင်ငံရေးဆွေးနွေး ညှိနှိုင်းရေးကော်မတီ(FPNCC) အဖွဲ့ဝင်များလည်း ဖြစ်သည်။ 

CNI News

တအာင်းအမျိုးသားလွတ်မြောက်ရေးတပ်မတော်(TNLA)၏ လုပ်ရပ်များကို ကူညီထိန်းကြောင်းပေးရန် “ဝ”ပြည် သွေးစည်းညီညွတ်ရေးတပ်မတော်(UWSA/UWSP)စစ်ဦးစီးချုပ် ဦးကျောက်ကျုံးတန်းကို ရှမ်းပြည်တိုးတက်ရေး ပါတီ(SSPP/SSA)မှ စာပို့ တောင်းဆိုခဲ့ကြောင်း သိရသည်။

SSPP/SSA ဒုဥက္ကဋ္ဌ(၁) စောဝ်ခေးတိုင်း လက်မှတ်ထိုး၍ ၂၀၂၄ ခုနှစ်၊ ဇူလိုင် ၆ ရက်နေ့က UWSA/UWSP စစ်ဦးစီးချုပ် ဦးကျောက်ကျုံးတန်းကို စာပေးပို့ခဲ့ခြင်း ဖြစ်သည်။

အဆိုပါ စာထဲတွင် မဟာမိတ် PSLF/TNLA တပ်ဖွဲ့များသည် မိမိတို့ SSPP/SSA တပ်ဖွဲ့များအား ၂၀၂၄ ခုနှစ်၊ ဇူလိုင် ၅ ရက်နေ့တွင် (ပူးတွဲနောက်ဆက်တွဲတွင် တင်ပြထားသည့်အတိုင်) ၄ ကြိမ်တိုင်တိုင် အစီအစဉ် ရှိရှိဖြင့် တစွတ်ထိုး ဝင်ရောက်တိုက်ခိုက်ခဲ့သောကြောင့် ရင်ဆိုင်တိုက်ပွဲများ ဖြစ်ပွားခဲ့ရပါသည်ဟု ဖော်ပြထားသည်။

ထို့နောက် မဟာမိတ် PSLF/TNLA နှင့် မိမိတို့ SSPP/SSA ဆက်ဆံရေး အခြေအနေကို မဟာမိတ် UWSP/UW SA နှင့် မိမိတို့ SSPP/SSA ဆက်ဆံရေးကဲ့သို့ အပြန်အလှန် လေးစားမှုနှင့် ကူညီဖေးမမှုရှိခြင်းများဖြင့် ရှေ့ဆက် ချီတက်သွားနိုင်ရေးအတွက် UWSP/UWSA လူကြီးမင်းများ၏ ကူညီထိန်းကြောင်းပေးမှုများ အထူးလိုအပ်လျက် ရှိပါသည်ဟု SSPP/SSA က ပေးပို့ခဲ့သော စာထဲတွင် ဖော်ပြထားသည်။

SSPP က UWSA စစ်ဦးစီးချုပ်ထံ ပေးပို့တဲ့စာကိုတွေ့ရစဉ်

ထို့ကြောင့် မဟာမိတ် UWSP/UWSA လူကြီးမင်းများ သိရှိနိုင်ပါရန်နှင့် လိုအပ်သလို ကူညီထိန်းကြောင်းပေးမှု များ ပြုလုပ်သွားနိုင်ပါရန် အကူအညီ တောင်းခံတင်ပြအပ်ပါသည်ဟု SSPP/SSA ဒုဥက္ကဋ္ဌ(၁) စောဝ်ခေးတိုင်း၏ စာထဲတွင် ပြောထားသည်။

TNLA သည် ကျောက်မဲနှင့် နောင်ချိုမြို့နယ်များအတွင်းရှိ SSPP စစ်စခန်းများကို တိုက်ခိုက်ခဲ့၍ နှစ်ဖက် တိုက်ပွဲ အနည်းအငယ် ဖြစ်ပွားခဲ့သလို ရှမ်းပြည်နယ်မြောက်ပိုင်း၊ နမ့်ခမ်းမြို့နယ်အတွင်းရှိ SSPP တပ်ဖွဲ့ဝင်များအား လက်နက်များဖြုတ်ပြီး တပ်ပြောင်းရွှေ့ခိုင်းမှုများလည်း ပြုလုပ်ခဲ့သည်။

ထို့နောက် SSPP ကလည်း ဇူလိုင် ၇ ရက်နေ့ ညပိုင်းက ရှမ်းပြည်နယ်မြောက်ပိုင်း၊ သီပေါမြို့နယ်အတွင်းမှာ လှုပ်ရှားလာသည့် TNLA နှင့် PDF ပူးပေါင်းတပ်ဖွဲ့ကို လက်နက်ဖြုတ်သိမ်း၍ တပ်ပြောင်းရွှေ့ခိုင်းခဲ့သလို ဇူလိုင် ၆ ရက်နေ့က မူဆယ်မြို့နယ်၊ မန်ဟီးရိုးမြို့ဘက် ရောက်လာသည့် TNLA တပ်ဖွဲ့များကို SSPP က တပ်ပြောင်း ရွှေ့ခိုင်းမှုများ ပြုလုပ်ခဲ့သည်။

အဆိုပါ လက်နက်ကိုင် ၂ ဖွဲ့ကြား ရှမ်းပြည်နယ်မြောက်ပိုင်းအတွင်းမှာ နယ်မြေအငြင်းပွားနေသလို အုပ်ချုပ်ရေး အငြင်းပွားကာ စစ်ရေးတင်းမာလျက်ရှိနေသည်။

CNI News

၂၀၂၄ ခုနှစ်၊ ဇူလိုင် ၈

ရှန်ဟိုင်းပူးပေါင်းဆောင်ရွက်ရေးအဖွဲ့ (SCO) အစည်းအဝေးကို တက်ရောက်ခဲ့သည့် နစကဒုဥက္ကဋ္ဌ  ဒုတိယ ဗိုလ်ချုပ်မှူးကြီး စိုးဝင်း၏ တရုတ်ပြည်ခရီးစဉ်မှတဆင့် မြန်မာနိုင်ငံတွင် ရပ်တန့်နေသော ကုန်သွယ်ရေးနှင့် တည်ငြိမ်ရေးကို ဖော်ဆောင်နိုင်မလားဆိုသည့်အပေါ် နိုင်ငံရေးနှင့် စီးပွားရေး အသိုင်းအဝိုင်းကြား သုံးသပ်မှုများ ရှိနေသည်။

နစက ဒုဥက္ကဋ္ဌ ဒုတိယဗိုလ်ချုပ်မှူးကြီး စိုးဝင်းသည် ရှန်ဟိုင်းပူးပေါင်းဆောင်ရွက်ရေးအဖွဲ့(SCO)၏ အိမ်နီးချင်း ကောင်း၊ မိတ်ဆွေ ဆက်ဆံရေးနှင့် ပူးပေါင်းဆောင်ရွက်မှုကော်မရှင်ဥက္ကဋ္ဌ မစ္စရှန်ယွဲ့ယွဲ့နှင့် ၂၀၂၄ ခုနှစ်၊ ဇူလိုင် ၇ ရက်နေ့က တရုတ်နိုင်ငံမှာ တွေ့ဆုံ ဆွေးနွေးခဲ့သည်။

နှစ်ဖက်ကိုယ်စားလှယ်အဖွဲ့ တွေ့ဆုံစဉ် ငြိမ်းချမ်းစွာ အတူယှဉ်တွဲ နေထိုင်ရေးမူကြီး ၅ ရပ်ကို အခြေခံ၍ ဆွေးမျိုး ပေါက်ဖော် ဆက်ဆံရေးကို တိုးတက်အောင် ဆောင်ရွက်လျက်ရှိသည့် အခြေအနေ၊ နှစ်နိုင်ငံ မိတ်ဖက်ဆက်ဆံရေး နှင့် ဘက်စုံမဟာဗျူဟာမြောက် ပူးပေါင်းဆောင်ရွက်မှု တိုးမြှင့်ရေးတို့ကို ဆွေးနွေးခဲ့ကြောင်း ဖော်ပြထားသည်။

 ရှမ်းပြည်နယ်မြောက်ပိုင်း လားရှိုးမြို့ကို လက်နက်ကိုင်များတိုက်ခိုက်လာလို့ ထွက်ပြေးနေကြတဲ့ ဒေသခံများရဲ့ ကားတန်းကြီးကို တွေ့ရစဉ်

အလားတူ နှစ်နိုင်ငံနယ်စပ် တည်ငြိမ်အေးချမ်းရေးနှင့် သက်ဆိုင်ရာ စီမံကိန်းလုပ်ငန်းများ အကောင်အထည်ဖော် ဆောင်ရွက်နိုင်ရန် လုံခြုံရေး အပြည့်အဝရရှိရေး ပူးပေါင်းဆောင်ရွက်သွားမည့် အခြေအနေများ၊ တရားမဝင် နယ်စပ်ဖြတ်ကျော်မှု၊ အွန်လိုင်းလောင်းကစား ပပျောက်ရေးနှင့် မူးယစ်ဆေးဝါး ကာကွယ်တားဆီးရေးဆိုင်ရာများ ဆွေးနွေးခဲ့ကြသည်ဟု သိရသည်။

လက်ရှိတွင်လည်း ရှမ်းပြည်နယ်မြောက်ပိုင်းမှာ ပလောင်ပြည်လွတ်မြောက်ရေးတပ်ဦး (PSLF/TNLA)၊ ကိုးကန့် တပ်ဖွဲ့ (MNDAA) တို့က တိုက်ပွဲများ ဖော်ဆောင်လျက်ရှိနေပြီး နယ်စပ်ကုန်သွယ်ရေးများလည်း ရပ်တန့်လျက်ရှိ နေသည်။

ဒုတိယဗိုလ်ချုပ်မှူးကြီး စိုးဝင်း၏ တရုတ်ပြည်ခရီးစဉ်မှာ ရှန်ဟိုင်းပူးပေါင်းဆောင်ရွက်ရေးအဖွဲ့ (SCO) အစည်း အဝေး သွားရောက်တက်ခြင်း ဖြစ်ကြောင်း၊ ရှမ်းပြည်နယ်မြောက်ပိုင်း တိုက်ပွဲအပေါ် သက်ရောက်မှု အများအပြား မရှိနိုင်ကြောင်း နိုင်ငံရေး သုံးသပ်သူတစ်ဦးက CNI သတင်းဌာနသို့ ပြောသည်။

၎င်းက “ဒါကတော့ ကျနော်တို့ သာမန် အစည်းအဝေးခေါ်လို့ ရှန်ဟိုင်းအဖွဲ့ဝင်မို့လို့ အစည်းအဝေး သွားတက်တယ်၊ သွားတက်ပြီးတော့ ဟိုမှာ သံတမန်ထုံးစံအရ သင့်သင့်လျှောက်ပတ်စွာ ပြောဆိုကြတာပေါ့နော်၊ ဒါပါပဲ၊ ဒီထက် လည်း ဘာမှ မပိုဘူး။ နောက်ထပ် ဖြစ်လာစရာလည်း မရှိဘူး။ သဘောတူညီချက်တွေ Agreement တွေဟာလည်း လွှတ်တော် မရှိတော့ ခက်တယ်လေ၊ အတည်ပြုမယ့်သူလည်း မရှိဘူးပေါ့နော်” ဟု ပြောသည်။

နစကအနေဖြင့် တရုတ် - မြန်မာ နှစ်နိုင်ငံ ကုန်သွယ်မှု တိုးမြှင့်ဖော်ဆောင်နိုင်ရေး ကြိုးပမ်းဆောင်ရွက်မှု၊ စီးပွားရေးဆိုင်ရာ ပူးပေါင်းဆောင်ရွက်မှုနှင့် ရင်းနှီးမြှုပ်နှံမှု တိုးမြှင့်ဖော်ဆောင်ရေးတို့ကိုလည်း ဆွေးနွေးခဲ့ကြ သည်။

၂၀၂၄ ခုနှစ်၊ ဇူလိုင် ၇ ရက်နေ့က ဒုတိယဗိုလ်ချုပ်မှူးကြီးစိုးဝင်းနဲ့မစ္စရှန်ယွဲ့ယွဲ့ကို တွေ့ရစဉ်

မြန်မာပြည် မတည်မငြိမ်ဖြစ်နေခြင်းက တရုတ်အတွက် အကျိုးအမြတ်ရနေစေသည်ဟု လီဆူအမျိုးသား ဖွံဖြိုးတိုးတက်ရေးပါတီ (ဒူးလေးပါတီ) ဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။

၎င်းက “တရုတ်ကလည်း သူ့ရဲ့ အကျိုးစီးပွားကလည်း ရှိတာကို၊ သူ့ရဲ့ အကျိုးစီးပွားကလည်း မတည်ငြိမ်လေလေ ကောင်းကောင်းလေလေ ဖြစ်နေတာကို၊ မတည်ငြိမ်လေလေ သူက ကျနော်တို့ နိုင်ငံမှာရှိတဲ့ သတ္ထုတွေ သဘာဝ တွေကို အခုဆိုရင် မတည်ငြိမ်ချိန်မှာ ကားက အကြီးအကျယ် သစ်တွေထုတ်၊ ဘာထုတ် လုပ်နေတယ်၊ တည်ငြိမ် သွားရင်တော့ တရားဥပဒေစိုးမိုးသွားရင်တော့ ဒါတွေက ထုတ်လို့ မရတော့ဘူး။ အခုက သစ်တွေက ထုတ်နေတာ ကို” ဟု ပြောသည်။

လက်ရှိ ရှမ်းပြည်နယ်မြောက်ပိုင်းတွင် ဖြစ်ပွားနေသော လက်နက်ကိုင်ပဋိပက္ခများကြောင့် တရုတ် - မြန်မာ နယ်စပ်ကုန်သွယ်ရေး ပြန်လည်လုပ်ဆောင်ရန် မဖြစ်နိုင်ကြောင်း နယ်စပ်ကုန်သွယ်ရေး လုပ်ငန်းရှင်တစ်ဦးက ပြောသည်။

တရုတ် - မြန်မာ နယ်စပ်တစ်လျှောက် ဖြစ်ပွားနေသော လက်နက်ကိုင်ပဋိပက္ခများကြောင့် နယ်စပ်ကုန်သွယ်ရေး မှာ ရပ်တန့်လျက်ရှိနေသလို ဒေသခံပြည်သူ အများစုမှာလည်း ဘေးလွတ်ရာသို့ ထွက်ပြေးတိမ်ရှောင် လျက်ရှိ နေသည်။

CNI News

၂၀၂၄ ခုနှစ်၊ ဇူလိုင် ၈

နှစ်နိုင်ငံနယ်စပ်ဒေသတည်ငြိမ် အေးချမ်းရေးနှင့် သက်ဆိုင်ရာ စီမံကိန်းလုပ်ငန်းများ အကောင်အထည်ဖော် ဆောင်ရွက်နိုင်ရန် လုံခြုံရေးအပြည့်အဝ ရရှိရေး ပူးပေါင်းဆောင်ရွက်သွားမည့် အခြေအနေများကို နစက ဒုဥက္ကဋ္ဌ ဒုတိယဗိုလ်ချုပ်မှူးကြီး စိုးဝင်းနှင့် ရှန်ဟိုင်းပူးပေါင်းဆောင်ရွက်ရေးအဖွဲ့(SCO)၏ အိမ်နီးချင်းကောင်း၊ မိတ်ဆွေ ဆက်ဆံရေးနှင့် ပူးပေါင်းဆောင်ရွက်မှုကော်မရှင်ဥက္ကဋ္ဌ မစ္စရှန်ယွဲ့ယွဲ့တို့ တွေ့ဆုံ ဆွေးနွေးခဲ့ကြသည်။

နစကဒုဥက္ကဋ္ဌ ဒုတိယဗိုလ်ချုပ်မှူးကြီး စိုးဝင်းသည် တရုတ်နိုင်ငံမှာ ကျင်းပသည့် ရှန်ဟိုင်းပူးပေါင်းဆောင်ရွက် ရေးအဖွဲ့(SCO)၏ စိမ်းလန်းသော ဖွံ့ဖြိုးမှုဖိုရမ်ကို တက်ရောက်နေပြီး ဇူလိုင် ၇ ရက်နေ့ ညနေ ၅ နာရီမှာတော့ တရုတ်ကိုယ်စားလှယ်အဖွဲ့နှင့် တွေ့ဆုံ ဆွေးနွေးခဲ့ခြင်း ဖြစ်သည်။ 

ထိုသို့ တွေ့ဆုံစဉ် ဘက်စုံမဟာဗျူဟာမြောက် ပူးပေါင်းဆောင်ရွက်မှုတိုးမြှင့်ရေး၊ နှစ်နိုင်ငံနယ်စပ်ဒေသတည်ငြိမ် အေးချမ်းရေးနှင့် သက်ဆိုင်ရာစီမံကိန်းလုပ်ငန်းများ အကောင်အထည်ဖော် ဆောင်ရွက်နိုင်ရန် လုံခြုံရေးအပြည့် အဝ ရရှိရေး ပူးပေါင်းဆောင်ရွက်သွားမည့် အခြေအနေများ၊ တရားမဝင် နယ်စပ်ဖြတ်ကျော်မှု၊ အွန်လိုင်း လောင်းကစားများ ပပျောက်ရေးနှင့် မူးယစ်ဆေးဝါး ကာကွယ်တားဆီးရေးဆိုင်ရာ လုပ်ငန်းများကိုလည်း ဆွေး နွေးခဲ့ကြသည်။

၂၀၂၄ ခုနှစ်၊ ဇူလိုင် ၇ ရက်နေ့က ဒုတိယဗိုလ်ချုပ်မှူးကြီးစိုးဝင်းနဲ့မစ္စရှန်ယွဲ့ယွဲ့ တွေ့ဆုံဆွေးနွေးစဉ်

ထို့နောက် နှစ်နိုင်ငံကုန်သွယ်မှု တိုးမြှင့်ဖော်ဆောင်နိုင်ရေး၊ နှစ်နိုင်ငံ စီးပွားရေးဆိုင်ရာ ပူးပေါင်းဆောင်ရွက်မှုနှင့် ရင်းနှီးမြှုပ်နှံမှု တိုးမြှင့်ဖော်ဆောင်ရေး၊ နစက အနေဖြင့် ရှေ့လုပ်ငန်းစဉ် ၅ ရပ်ကို အကောင်အထည်ဖော် ဆောင်ရွက်နေမှုများ၊ ပါတီစုံဒီမိုကရေစီ အထွေထွေရွေးကောက်ပွဲ အောင်မြင်စွာ ကျင်းပနိုင်ရေးကြိုးပမ်း ဆောင်ရွက်နေမှုများကိုလည်း ဆွေးနွေးခဲ့ကြကြောင်း သိရသည်။

လက်ရှိ မြန်မာနိုင်ငံအနှံ့အပြားတွင် အတိုက်အခံ အင်အားစုများနှင့် မြန်မာ့တပ်မတော်ကြား လက်နက်ကိုင် တိုက်ပွဲများ အပြင်းအထန် ဖြစ်ပွားနေသည်။ ထိုတိုက်ပွဲများကြောင့် နယ်စပ်ကုန်သွယ်ရေးများ ရပ်တန့်နေသလို စီးပွားရေး ရင်းနှီးမြှုပ်နှံမှုများနှင့် စီမံကိန်းများ အကောင်အထည်ဖော်မှုများလည်း ရပ်တန့်နေသည်။

သို့သော် တအာင်းအမျိုးသားလွတ်မြောက်ရေးတပ်မတော်(TNLA)၊ မြန်မာအမျိုးသားဒီမိုကရက်တစ်မဟာမိတ် တပ်မတော်(MNDAA)၊ အာရက္ခတပ်တော်(AA)၊ ဗမာအမျိုးသားလွတ်မြောက်ရေးတပ်မတော်(BNRA)တို့က တရုတ်နိုင်ငံ စီမံကိန်းများနှင့် စီးပွားရေး ရင်းနှီးမြှုပ်နှံမှုများကို ထိခိုက်အောင်လုပ်သည့် မည်သည့် အဖွဲ့အစည်း သို့မဟုတ် လူပုဂ္ဂိုလ်ကို မဆို အကြမ်းဖက်အဖြစ် သတ်မှတ်ကာ ထိရောက်စွာ အရေးယူသွားမည်ဟု ထုတ်ပြန် ထားကြသည်။

တရုတ်သည် မြန်မာနိုင်ငံအတွင်းမှာ ရေနံ၊ ဂတ်စ်၊ သစ်ထုတ်လုပ်ခြင်း၊ ရွှေတူးဖော်ခြင်း၊ ကြေးနီထုတ်လုပ်ခြင်း၊ စိုက်ပျိုးရေးလုပ်ငန်း၊ ဆောက်လုပ်ရေးလုပ်ငန်း၊ ကျောက်ဖြူရေနက်ဆိပ်ကမ်းလုပ်ငန်း အပါအဝင် စီးပွားရေး ရင်းနှီးမြှုပ်နှံမှု ပေါင်းစုံရှိသည်။