- By CNI
- Category: နိုင်ငံရေး
- Hits: 640
CNI News
၂၀၂၂ ခုနှစ်၊ အောက်တိုဘာ ၃၁
၂၀၂၃ ခုနှစ်တွင် ကျင်းပမည့် အထွေထွေရွေးကောက်ပွဲ ဝင်ရောက်ယှဉ်ပြိုင်ရန် မိမိတို့ ပါတီကို ကြိုးစား ပြင်ဆင် သွားမည်ဖြစ်ကြောင်း လီဆူအမျိုးသားများ ဖွံ့ဖြိုးတိုးတက်ရေးပါတီ (ဒူးလေးပါတီ) ဥက္ကဋ္ဌ ဦးရွှေမင်းက CNI သတင်းဌာနသို့ ပြောသည်။
မိမိတို့ပါတီ ဝင်ရောက်ယှဉ်ပြိုင်မည့် ဒေသများတွင် ရွေးကောက်ပွဲ ကျင်းပနိုင်ခြင်း ရှိ/မရှိကို မသိရှိရသေးကြောင်း ၎င်းက ပြောသည်။
ဦးရွှေမင်းက “ဒါကလည်း ကျနော်တို့ UEC က ဘယ်လိုများ သတ်မှတ်မယ်ဆိုတဲ့ အချက်ပေါ် အဓိက မူတည်မယ်၊ အဲဒါနဲ့ တွဲလျက်ဖြစ်လာမှာက လုံခြုံရေး အခြေအနေပေါ့ဗျာ၊ ဘယ်ဒေသဟာဖြင့်၊ ဘယ်ခရိုင်ဟာဖြင့် လုံခြုံရေး အခြေအနေအရ မဲရုံထားသင့် ပါတယ်ဆိုရင်တော့ ဖြစ်လာမယ်၊ အခုက ဘယ်မှာ ထားမယ်၊ မထားမယ်ကိုလည်း ကျနော်တို့ကလည်း မသိဘူး။ ရွေးကောက်ပွဲရဲ့ ရှေ့လုပ်ငန်းစဉ်တွေ ရွေးကောက်ပွဲ လုပ်မယ်ဆိုတာ လောက်ပဲ သိရ တယ်၊ ဘယ်ပုံစံနဲ့ သွားမယ်ဆိုတာ ကျနော်တို့က မသိရဘူး။ System (စနစ်) ကတော့ PR (အချိုးကျ ကိုယ်စားပြု စနစ်)လို့တော့ အပေါ်ယံလေး သိရတယ်၊ ဒါပေမဲ့ အသေးစိတ်ခရိုင်တွေကို ကျနော်တို့က အခြေခံပြီး သွားမှာလား၊ မြို့နယ်ကို အခြေခံမှာလားဆိုတာ အတိအကျ တရားဝင် အကြောင်းကြားတာတို့ မရှိသေးဘူးပေါ့ဗျာ၊ အဲဒါကြောင့် မို့လို့ ကျနော်တို့ကတော့ လာမယ့်ရွေးကောက်ပွဲအတွက် တော်တော်လေး သုံးသပ်ရခက်တယ်၊ ဒီခရိုင်တွေက လည်း ဘယ်ခရိုင်တွေကဖြင့် မဲပေးနိုင်မယ့်၊ မဲရုံဖွင့်လှစ်နိုင်မယ့် အခြေအနေ ရှိ/မရှိ ဆိုတာတော့ လက်ရှိ နိုင်ငံတော် အစိုးရနဲ့ ပြည်ထောင်စုရွေးကောက်ပွဲကော်မရှင်ကပဲ သိပါလိမ့်မယ်၊ ကျနော်တို့ကတော့ အဆင်သင့် အနေအထား ကို ပြင်ဆင်နိုင်ဖို့တော့ ကြိုးစားသွားမှာပါ”ဟု ပြောသည်။
လီဆူအမျိုးသားများဖွံ့ဖြိုးတိုးတက်ရေးပါတီ(ဒူးလေးပါတီ) မဲဆွယ်စည်းရုံးနေစဉ်
နစက ကျင်းပမည့် ရွေးကောက်ပွဲတွင် ပါဝင်ယှဉ်ပြိုင်ရန်အတွက် လီဆူအမျိုးသားဖွံ့ဖြိုးတိုး တက်ရေးပါတီ (ဒူးလေးပါတီ) အနေဖြင့် ၂၀၂၂ ခုနှစ်၊ ဒီဇင်ဘာလအတွင်း ပါတီညီလာခံကို ကျင်းပသွားမည်ဖြစ်ကြောင်း ၎င်းက ပြောသည်။
လာမည့်ရွေးကောက်ပွဲကို အချိုးကျကိုယ်စားပြုစနစ် (PR) ကို ကျင့်သုံးသွားမည်ဖြစ်ကြောင်း ပြည်ထောင်စု ရွေးကောက်ပွဲကော်မရှင် (UEC)က ပြောကြားထားသည်။
အဆိုပါ PR စနစ်မှာ လူနည်းစု တိုင်းရင်းသားများအတွက် လွှတ်တော်ရောက်ရန် အခက်အခဲ ရှိလိမ့်မည်ဖြစ် ကြောင်း ဦးရွှေမင်းက ပြောသည်။
၎င်းက “ကျနော်တို့ သိရသလောက်တော့ PR စနစ်နဲ့သွားမယ်လို့ သိရတယ်၊ ဒီအချိုးကျစနစ်ကတော့ တစ်ပါတီ ချုပ်ကိုင်မှု၊ သို့မဟုတ် တစ်ပါတီ အာဏာရှင်စနစ်ကိုတော့ မဖြစ်ပေါ်စေနိုင်ဘူးပေါ့ဗျာ။ ပါတီများရဲ့ ခဲယဉ်းမှု balanced တော့ ရှိလာလိမ့်မယ်ပေါ့ဗျာ၊ ဒါပေမဲ့လည်း ကျနော်တို့ ဒီလူနည်းစု တိုင်းရင်းသားတွေ အခွင့်အရေး ကတော့ တော်တော်လေး ခက်နေမလားလို့တော့ စဉ်းစားမိတယ်၊ ဘာကြောင့်လဲဆို ကျနော်တို့ လူနည်းစု တိုင်းရင်းသားတွေက အများစုအားဖြင့် FPTP (အနိုင်ရအကုန်ယူစနစ်) မှာ ကျနော်တို့ မြို့နယ်တွေမှာ နိုင်တာများ ကြတယ်၊ ကိုယ့်တိုင်းရင်းသား၊ ကိုယ့်လူမျိုးတွေ အများစု ရှိတဲ့နေရာမှာ နိုင်ကြတယ်၊ အဲဒီတော့ ခရိုင်အနေနဲ့ PR နဲ့ ပြန်သွားမယ်ဆိုရင် ဘယ်လိုသွားမလဲ၊ ကျနော့်တစ်ဦး၊ တစ်ယောက်ရဲ့ သုံးသပ်ချက်ကတော့ PR တော့ ကျနော် တို့ တိုင်းရင်းသားလူနည်းစုတွေ လွှတ်တော်ရောက်ဖို့က တော်တော်လေးကို အခက်အခဲ ရှိလိမ့်မယ်လို့ မြင်မိ တယ် ခင်ဗျ” ဟု CNI သတင်းဌာနသို့ ပြောသည်။
လီဆူအမျိုးသားများဖွံ့ဖြိုးတိုးတက်ရေးပါတီ(ဒူးလေးပါတီ)မဲဆွယ်စည်းရုံးနေစဉ်
လီဆူအမျိုးသားများ ဖွံ့ဖြိုးတိုး တက်ရေးပါတီ (ဒူးလေးပါတီ-LNDP)သည် ၂၀၂၀ ခုနှစ်၊ နိုဝင်ဘာလအတွင်းက ကျင်းပခဲ့သည့် အထွေထွေရွေးကောက်ပွဲတွင် ဝင်ရောက် ယှဉ်ပြိုင်ခဲ့ပြီး နေရာ ၂ နေရာ အနိုင်ရရှိခဲ့သည့် ပါတီ ဖြစ်ကြောင်း သိရသည်။
နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၃ ခုနှစ်၊ သြဂုတ်လတွင် ရွေးကောက်ပွဲ ပြန်လည် ကျင်းပပေး မည်ဖြစ်ကြောင်း၊ အနိုင်ရရှိသည့် ပါတီကို နိုင်ငံတော်အာဏာ လွှဲပြောင်းပေးမည်ဖြစ်ကြောင်း ပြောကြား ထား သည်။
- By CNI
- Category: နိုင်ငံရေး
- Hits: 609
CNI News
၂၀၂၂ ခုနှစ်၊ အောက်တိုဘာ ၂၉
အရှေ့တောင်အာရှနိုင်ငံများအသင်း (အာဆီယံ)ကနေ မြန်မာနိုင်ငံအနေဖြင့် နုတ်ထွက်မှာ မဟုတ်ကြောင်း ရခိုင့်ဦးဆောင်ပါတီ(AFP)ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။
နစကအနေဖြင့် လက်ရှိ အာဆီယံ၏ပဋိညာဉ် ချိုးဖောက်မှုများကို ထောက်ပြနေမှာဖြစ်ကြောင်း ၎င်းက ပြော သည်။
ဒေါက်တာအေးမောင်က “ကျနော် အမြင်ကတော့ လက်ရှိ အစိုးရက အာဆီယံကနေ နုတ်ထွက်မှာ မဟုတ်ဘူး။ အာဆီယံရဲ့ ပဋိညာဉ်တွေနဲ့ ပတ်သက်လို့ ထောက်ပြနေမှာပဲ။ ဘာလို့ဆို သူနုတ်ထွက်ရင် လာမယ့် အစိုးရအတွက် သူဆောင်ရွက်ခဲ့တာတွေ အပေါ်မှာ ထောက်ပြစရာ ဖြစ်လာမှာစိုးလို့ ဒီလိုပဲ သုံးသပ်ပါတယ်။ နောက်အစိုးရအတွက် အရင်အစိုးရကတည်းက ဆက်ဆံခဲ့တဲ့ အာဆီယံအပေါ်မှာ အာဆီယံရဲ့ မှားကွက်တွေပေါ့ဗျာ၊ အာဆီယံရဲ့ ပဋိညာဉ် ချိုးဖောက်မှုတွေကို သူထောက်ပြ၊ ထောက်ပြနေရုံလောက်ပဲ သူလုပ်မယ်ထင်တယ်၊ နောက်အစိုးရကပဲ တနည်း အားဖြင့် ရွေးကောက်ခံအစိုးရကပဲ ဘာလုပ်သင့်တယ်၊ ဘာမလုပ်သင့်ဘူးဆိုတာ ဆုံးဖြတ်နိုင်အောင်အထိ သူ့ဘက် က သွားမယ်ထင်တယ်” ဟု CNI သတင်းဌာနသို့ ပြောသည်။
၂၀၂၂ ခုနှစ်၊ အောက်တိုဘာ ၂၇ ရက်က အာဆီယံ နိုင်ငံခြား ရေးဝန်ကြီးများ အစည်းအဝေးကို တွေ့ရစဉ်
၂၀၂၂ ခုနှစ်၊ အောက်တိုဘာ ၂၇ ရက်နေ့က အင်ဒိုနီးရှားနိုင်ငံ၊ ဂျာကာတာမြို့မှာ ကျင်းပခဲ့သည့် အာဆီယံ နိုင်ငံခြား ရေးဝန်ကြီးများ အစည်းအဝေးမှ သဘောတူညီချက်များကို မြန်မာနိုင်ငံ ကိုယ်စားလှယ်အား တက်ရောက်ခွင့် မပြု ခဲ့ခြင်းကြောင့် လိုက်ပါ ဆောင်ရွက်မည် မဟုတ်ကြောင်း နစက၏ နိုင်ငံခြားရေးဝန်ကြီးဌာနက အောက်တိုဘာ ၂၇ ရက်တွင် ထုတ်ပြန်ခဲ့သည်။
နိုင်ငံရေးလေ့လာသုံးသပ်သူ ဦးသန်းစိုးနိုင်က “စစ်ကောင်စီ ဘက်ကနေတော့ နုတ်ထွက်မှာ မဟုတ်ဘူး။ ဘာကြောင့်လဲဆိုတော့ ဒါသူ့အနေနဲ့ ရှားရှားပါးပါး ရထားတဲ့ အခွင့်အရေးဖြစ်တယ်၊ ဦးသန်းရွှေ လက်ထက်က မနည်းကြိုးစားပြီးတော့ ဒီဟာရအောင် ကြိုးစားထားတာ၊ အဲဒီတော့ အာဆီယံကနေတော့ ဗမာပြည်ဟာ နုတ် ထွက်မှာ မဟုတ်ပါဘူး။ အာဆီယံအဖွဲ့က နုတ်ထွက်တာလည်း လုပ်မှာ မဟုတ်ဘူး”ဟု CNI သတင်းဌာနသို့ ပြော သည်။
အာဆီယံမှ မြန်မာနုတ်ထွက်ပါက ပြည်ထောင်စုငြိမ်းချမ်းရေးမှာ ကောင်းကျိုးထက် အခက်အခဲ ပိုဖြစ်စေနိုင်ခြင်း ကြောင့် နုတ်ထွက်ရန် အလားအလာ နည်းမည်ဖြစ်ကြောင်း ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST) မှာ ပြောခွင့်ရပုဂ္ဂိုလ် ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။
အာဆီယံအလှည့်ကျ ဥက္ကဋ္ဌ ကမ္ဘောဒီးယားနိုင်ငံဝန်ကြီးချုပ် ဟွန်ဆန်နဲ့ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ကိုတွေ့ရစဉ်
၎င်းက “နိုင်ငံအနေနဲ့ စုဖွဲ့ထားတဲ့ အင်အားစုတွေနဲ့သော်လည်းကောင်း၊ လက်ရှိဖြစ်ပေါ်နေတဲ့ ကမ္ဘာ့နိုင်ငံတကာ အခင်းအကျင်းအရ ဆိုရင်တော့ ဒီလိုမျိုး ကျနော်တို့ နိုင်ငံအနေနဲ့ အာဆီယံ အဝိုင်းအဝန်းထဲမှာ ပူးပေါင်း လုပ် ဆောင်နေတဲ့ နိုင်ငံတစ်ခုဖြစ်တဲ့ အတွက်ကြောင့်မို့လို့ နိုင်ငံတစ်နိုင်ငံကနေပြီးတော့ အစုအဖွဲ့ကနေ ခွဲထွက်ပြီး တော့ သီးခြားရပ်တည် နေထိုင်နိုင်ဖို့ဆိုရင်ကတော့ ပကတိနိုင်ငံရေး အခင်းအကျင်းအရ သော်လည်းကောင်း၊ နိုင်ငံတကာ ယဉ်ကျေးမှုအရ သော်လည်းကောင်း၊ ပထဝီ အနေအထားအရ သော်လည်းကောင်း၊ ကျနော်တို့ အနေနဲ့ကတော့ လက်တွေ့လည်း မကျဘူး။ အဲဒီလိုမျိုးဆိုရင် ကျနော်တို့ လိုလားနေတဲ့ ပြည်ထောင်စု ငြိမ်းချမ်း ရေး ကောင်းကျိုးထက် အခက်အခဲ ပိုဖြစ်စေနိုင်တယ်လို့ ကျနော်တို့ နားလည်မှုရှိတဲ့ အပေါ်မှာကတော့ ဒါဟာ ဖြစ်နိုင်တဲ့ အလားအလာ နည်းမယ်လို့ ကျနော်တို့အနေနဲ့ ရိုးရိုးသားသား အဲဒီလိုပဲ နားလည်မှုရှိတယ်ခင်ဗျ” ဟု ပြောသည်။
လက်ရှိတွင် အာဆီယံ သဘောတူညီချက် ၅ ချက်ကို နစက-က အကောင်အထည် ဖော်ပေးနိုင်ခြင်း အားနည်း သည်ဟုဆိုကာ အာဆီယံအစည်းအဝေးများ၌ နစက၏ အဆင့်မြင့် ပုဂ္ဂိုလ်များအား တက်ရောက်ခွင့် မပေးဘဲ နိုင်ငံရေးနှင့်မဆိုင်သော သံတမန် တစ်ဦးကိုသား အာဆီယံအဖွဲ့ဝင် နိုင်ငံများက ဆုံးဖြတ်ထားကြသည်။
- By CNI
- Category: နိုင်ငံရေး
- Hits: 457
CNI News
၂၀၂၂ ခုနှစ်၊ အောက်တိုဘာ ၂၈
နိုင်ငံရေးပြဿနာကို နိုင်ငံရေးနည်းဖြင့် ဖြေရှင်းရန် ကြိုးပမ်းအား ထုတ်မှုများအပေါ် အနုတ်လက္ခဏာဆောင်သည့် အကျိုးသက်ရောက်မှုများ ဖြစ်ပေါ်စေသော လုပ်ဆောင်မှုများကို ရှောင်ရှားကြရန် ငြိမ်းချမ်းရေးလုပ်ငန်းစဉ် ဦးဆောင်အဖွဲ့(PPST)က တိုက်တွန်းသည်။
PPST ၏ ၂/၂၀၂၂ အစည်းအဝေးကို အောက်တိုဘာ ၂၇ ရက်မှ ၂၈ ရက်နေ့အထိ ကျင်းပခဲ့ပြီးနောက် ယခု ထုတ်ပြန် တိုက်တွန်းချက် ထွက်ပေါ်လာခြင်း ဖြစ်သည်။
PPST က “မကြာမီက ဖြစ်ပေါ်ခဲ့သော စစ်ကိုင်းတိုင်းဒေသကြီး၊ ဒီပဲယင်းမြို့နယ်၊ လက်ယက်ကုန်းကျေးရွာရှိ စာသင်ကျောင်း ဖြစ်စဉ်နှင့် ကချင်ပြည်နယ်၊ ဖားကန့်မြို့၊ အနန့်ပါ ကျေးရွာဖြစ်စဉ်တို့တွင် လေကြောင်းမှ အင်အား အလွန်အကျွံ အသုံးပြုပြီး တိုက်ခိုက်ခံရမှုကြောင့် ပြည်သူများ အသက်ဆုံးရှုံးခဲ့ကြရသည့်အတွက် များစွာ ဝမ်းနည်းရပါသည်။ အဆိုပါ ဖြစ်ရပ်ကြောင့် နိုင်ငံရေးပြဿနာကို နိုင်ငံရေးနည်းဖြင့် ဖြေရှင်းရန် ကြိုးပမ်းအား ထုတ်မှုများအပေါ် အနုတ်လက္ခဏာဆောင်သည့် အကျိုးသက်ရောက်မှုများ ဖြစ်ပေါ်စေသည့်အတွက် သက်ဆိုင်သူများ အနေဖြင့် လက်ရှိဖြစ်ပွားနေသည့် နိုင်ငံရေး၊ စစ်ရေးပဋိပက္ခများကို ပိုမို ဆိုးရွားစေမည့် မည်သည့် လုပ်ဆောင်မှုမျိုးကိုမဆို ရှောင်းရှာကြရန်နှင့် နောက်နောင် မဖြစ်ပေါ်စေရေးအတွက် PPST အနေဖြင့် တိုက် တွန်းသည်”ဟု ထုတ်ပြန်ခဲ့သည်။
ထို့နောက် လက်ရှိ နိုင်ငံရေးအကျပ်အတည်းများကို ကျော်လွှားနိုင်ရန်အတွက် NCA အနှစ်သာ ၃ ချက်၊ PPST ၏ နိုင်ငံရေး ရည်မှန်းချက် ၇ ချက်နှင့် နိုင်ငံရေး လမ်းပြ မြေပုံဆိုင်ရာ အဆိုပြုချက် အဆင့် ၈ ဆင့်တို့ကို အခြေခံ ပြီး ဆက်လက်ကြိုးပမ်း ဆောင်ရွက်သွားမည်ဟု PPST က ပြောသည်။
PPST ထုတ်ပြန်ချက်ကိုတွေ့ရစဉ်
အလားတူ PPST အနေဖြင့် မိမိတို့၏ ရပ်တည်ချက် အခြေခံမူ ၃ ချက်ဖြစ်သော နိုင်ငံရေးပြဿနာကို နိုင်ငံရေး နည်းဖြင့် ဖြေရှင်းရေး၊ သက်ဆိုင်သူ အားလုံးပါဝင်သည့် အဓိပ္ပာယ်ပြည့်ဝသော နိုင်ငံရေး ဆွေးနွေးပွဲများ ဖြစ် မြောက်ရေး နှင့် အရပ်သားများကို အကာအကွယ်ပေးရေး စသည့် မူများအပေါ် ခိုင်မာစွာ ရပ်တည်ပြီး ရေရှည် တည်တံ့ခိုင်မြဲ သော ငြိမ်းချမ်းရေးနှင့် ဖက်ဒရယ်ဒီမိုကရေစီပြည်ထောင်စု တည်ဆောက်နိုင်ရေးအတွက် လှိုင်း လေထန်သည့် နိုင်ငံရေးမုန်တိုင်းကြား မမှိတ်မသုန် အားထုတ်ကြိုးပမ်းဆောင်ရွက်သွားမည်ဟု ထုတ်ပြန်ချက်မှာ ဖော်ပြထား သည်။
PPST ကို တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ် ထိုးထားသော တိုင်းရင်းသား လက်နက်ကိုင် အဖွဲ့များဖြင့် ဖွဲ့စည်းထားသည်။
NCA ကို ရှမ်းပြည်ပြန်လည်ထူထောင်ရေးကောင်စီ(RCSS)၊ ကရင်အမျိုးသားအစည်းအရုံး(KNU)၊ ပအိုဝ်း အမျိုး သား လွတ်မြောက်ရေးအဖွဲ့ချုပ်(PNLO)၊ ဒီမိုကရေစီအကျိုးပြု ကရင်တပ်မတော်(DKBA)၊ ကရင်အမျိုးသား အစည်းအရုံး/ ကရင်အမျိုးသားလွတ်မြောက်ရေးတပ်မတော်(KNU/KNLA-PC)၊ ချင်းအမျိုးသားတပ်ဦး (CNF)၊ ရခိုင်ပြည်လွတ်မြောက်ရေးပါတီ(ALP)၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး(ABSDF)၊မွန်ပြည်သစ်ပါတီ(NMSP)၊ လားဟူဒီမိုကရက်တစ် အစည်းအရုံး(LDU)တို့ လက်မှတ်ရေးထိုးထားသည်။
- By CNI
- Category: နိုင်ငံရေး
- Hits: 603
CNI News
၂၀၂၂ ခုနှစ်၊ အောက်တိုဘာ ၂၈
မြန်မာ့တပ်မတော်၏ လေကြောင်းတိုက်ခိုက်မှုမှာ အဖျက်စွမ်းအားကြီးသော်လည်း စစ်ရေးအဆုံးအဖြတ် ပြုနိုင် သည့် ယန္တရားမဟုတ်ကြောင်း အမျိုးသားညီညွတ်ရေးအစိုးရ (NUG) ၏ ကာကွယ်ရေးဝန်ကြီး ဦးရည်မွန်က ပြောသည်။
လက်ရှိတွင် ဒေသကာကွယ်ရေးတပ် (PDF) များ သတိပြုရမှာက လေကြောင်းစီးနင်း တိုက်ခိုက်မှုဖြစ်ကြောင်း အောက်တိုဘာ ၂၆ ရက်က NUG ၏ ရေဒီယို အသံလွှင့် အစီအစဉ်၌ ၎င်းက အထက်ပါအတိုင်း ပြောကြားခဲ့ခြင်း ဖြစ်သည်။
ဦးရည်မွန်က “လေကြောင်းဟာ အနှောင့်အယှက် အဖျက်စွမ်းအားကြီးတာ မှန်ပေမယ့် စစ်ရေးအဆုံးအဖြတ် ပြုနိုင် တဲ့ ယန္တရား မဟုတ်ဘူးလို့ ငါတို့နားလည်တယ်။ ငါတို့တော်လှန်ရေးဟာ ဥာဏ်နဲ့ယှဥ်တဲ့ တော်လှန်ရေး ဖြစ်တယ်။ ငါတို့ ဥာဏ် ရှိရင်ရှိသလို ရန်သူ့လေကြောင်းကို ဟန့်တားနိုင်မယ့် နည်းလမ်းတွေ ငါတို့ရှာဖွေနိုင်လိမ့်မယ်” ဟု ပြောသည်။
ဦးရည်မွန်နဲ့ PDF တပ်ဖွဲ့ကိုတွေ့ရစဉ်
ထို့နောက် မြန်မာ့တပ်မတော် အနေဖြင့် မြေပြင်တွင် တော်လှန်ရေးအင်အားကို မယှဉ်နိုင်ဘဲ အရေးနိမ့်လာသည် နှင့်အမျှ လေကြောင်းကို ပိုမိုအားပြုလာကြောင်း၊ PDF ရဲဘော်များအားလုံး မိမိတို့၏ တော်လှန်ရေးသတိ၊ တော် လှန်ရေး ဉာဏ်ပညာကို အမြင့်ဆုံး တပ်လှန့်ထားရန် လိုအပ်ကြောင်း ၎င်းက ပြောသည်။
မြန်မာ့တပ်မတော် အနေဖြင့် စစ်လေယာဉ် အသုံးပြု တိုက်ခိုက်ရုံဖြင့် နိုင်သည်ဟု ပြော၍မရကြောင်း၊ မြန်မာ့ တပ်မတော်မှာ အင်အားနည်းလာ၍ ယခုကဲ့သို့ လေကြောင်း အသုံးပြုမှု ပိုများပြားလာခြင်း ဖြစ်ကြောင်း ချင်းအမျိုးသားကာကွယ်ရေးတပ်ဖွဲ့ (CNDF) မှ ပြောရေးဆိုခွင့်ရှိသူ Salai Timmy က CNI သတင်းဌာနသို့ ပြော သည်။
၎င်းက “သူတို့ဒီမြေပြင်မှာ အခုလောလောဆယ် သူတို့ အင်အားလည်း အဲဒီလောက်အထိ သူတို့ မလောက်တော့ ဘူးနဲ့ တူပါတယ်၊ ကြည့်ရတာ၊ ဒီထိုးစစ်ဆင်မှုတွေလည်း မြေပြင်ကနေတော့ တော်တော်ကြီးကို နည်းလာတယ် ပေါ့နော်၊ ခုနပြောသလိုပေါ့၊ လေယာဉ်အသုံးပြုမှုတွေ ကလိမ်ကကျစ်နဲ့ အသုံးပြုတာတွေ ပိုပိုများလာတဲ့အတွက် သူတို့တော်တော်ကြီးကို အားနည်းလာတယ်ဆိုတာ သိသာပါတယ်။ ဒီလို တိုက်ရုံနဲ့တော့ ကျနော်တို့လည်း သူတို့ ဟာ နိုင်တယ်လို့တော့ ပြောလို့မရဘူးပေါ့နော်၊ နောက်ပြီးတော့ ဒါဟာ သူတို့ရဲ့ ကောက်ကျစ်မှု၊ ဒါဟာသူတို့ရဲ့ ဥာဏ်နီဥာဏ်နက်တွေ နောက်ပြီးတော့ နိုင်ငံတကာ ဥပဒေချိုးဖောက်တာတွေ ဖြစ်လာတဲ့အတွက် သူတို့ဖက် ကတော့ ပိုပြီးတော့ ရှုံးမှန်း ပိုသိသာလာတယ်ပေါ့” ဟု ပြောသည်။
လေကြောင်းတိုက်ခိုက်မှု စစ်ဆင်ရေး လေ့ကျင့်နေစဉ်
၂၀၂၁ ခုနှစ်၊ ဖေဖော်ဝါရီ ၁ ရက်နောက်ပိုင်း တပ်မတော်မှ အာဏာရယူပြီးနောက် တိုင်းရင်းသား လက်နက်ကိုင် အဖွဲ့အစည်းတချို့၊ PDF ပူးပေါင်းတပ်နှင့် မြန်မာ့တပ်တော်တို့ တိုက်ပွဲများ ဖြစ်ပွားခဲ့သည်။
အဆိုပါ တိုက်ပွဲများတွင် မြန်မာ့တပ်မတော်ဘက်မှ မြေပြင်ထိုးစစ်သာမက လေကြောင်းဖြင့်ပါ တိုက်ခိုက် လျက်ရှိသည်။
လက်ရှိတွင် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ကရင်ပြည်နယ်၊ ချင်းပြည်နယ်၊ ကယားပြည်နယ် တို့တွင် လက်နက်ကိုင် ပဋိပက္ခများဖြစ်ပွားနေသည်။
- By CNI News
- Category: နိုင်ငံရေး
- Hits: 1429
CNI News
၂၀၂၂ ခုနှစ်၊ အောက်တိုဘာ ၂၇
အင်ဒိုနီးရှားနိုင်ငံ၊ ဂျာကာတာမြို့မှာ အောက်တိုဘာ ၂၇ ရက်တွင် ကျင်းပခဲ့သည့် အာဆီယံ နိုင်ငံခြားရေးဝန်ကြီး များ အစည်းအဝေးမှ သဘောတူညီချက်များကို မြန်မာနိုင်ငံ ကိုယ်စားလှယ်ကို တက်ရောက်ခွင့် မပြုခဲ့ခြင်း ကြောင့် လိုက်ပါ ဆောင်ရွက်မည်မဟုတ်ကြောင်း နစက၏ နိုင်ငံခြားရေးဝန်ကြီးဌာနက ယနေ့ ထုတ်ပြန်ခဲ့သည်။
ယနေ့ ကျင်းပသည့် အာဆီယံ နိုင်ငံခြားရေးဝန်ကြီးများအစည်းအဝေးသို့ မြန်မာနိုင်ငံ ကိုယ်စားလှယ်ကို နိုင်ငံ ရေးအရ ကိုယ်စားမပြုသည့် ပုဂ္ဂိုလ်ကိုသာ တက်ရောက်ခွင့်ပြုခြင်းကြောင့် မြန်မာနိုင်ငံက မတက်ရောက်ခဲ့ပေ။
ထိုသို့ ဖိတ်ကြားခြင်းသည် အာဆီယံ ပဋိညာဉ်စာတမ်းအရ အာဆီယံ အဖွဲ့ဝင်နိုင်ငံအားလုံး တန်းတူညီတူ ကိုယ်စားပြုရေး “မူ”နှင့် တစ်နိုင်ငံ ပြည်တွင်းရေးကို ဝင်ရောက် မစွက်ဖက်ရေး “မူ”တို့ကို မြန်မာနိုင်ငံအနေဖြင့် ခိုင်မာစွာလိုက်နာလျက်ရှိသော်လည်း ယခုကဲ့သို့ ခွဲခြား ဆက်ဆံသည့် လုပ်ရပ်များကို လက်ခံနိုင်ခြင်းမရှိ ကြောင်း နစက-က ထုတ်ပြန်ခဲ့သည်။
၎င်းက “ အစည်းအဝေးတွင် မြန်မာနိုင်ငံက ပါဝင်ခြင်းမရှိဘဲ အာဆီယံ ၉ နိုင်ငံဖြင့်သာ ဆွေးနွေး သဘောတူညီ ခဲ့ခြင်းသည် အာဆီယံ ပဋိညာဉ်စာတမ်းပါ မူများနှင့်အညီ အဖွဲ့ဝင်နိုင်ငံအားလုံး၏ တူညီဆန္ဒအရ ဆောင်ရွက်ခဲ့ ခြင်း မဟုတ်သည့်အတွက် မြန်မာနိုင်ငံအနေနှင့် လိုက်ပါ ဆောင်ရွက်မည်မဟုတ်ပါ”ဟု ပြောသည်။
ထို့နောက် နစကသည် ၂၀၀၈ ဖွဲ့စည်းပုံအခြေခံဥပဒေနှင့်အညီ နိုင်ငံတော်တာဝန်ယူပြီးနောက်ပိုင်းတွင် ရှေ့လုပ် ငန်းစဉ်(၅)ရပ် ချမှတ်၍ မြန်မာနိုင်ငံ၌ ဒီမိုကရေစီပြန်လည်ဖော်ဆောင်ရေးအတွက် ကြိုးပမ်း ဆောင်ရွက်လျက်ရှိ ကြောင်း၊ တစ်ချိန်တည်းမှာပင် အာဆီယံ၏ တာဝန်သိ အဖွဲ့ဝင် နိုင်ငံတစ်နိုင်ငံအဖြစ် တူညီဆန္ဒ ၅ ချက် အကောင်အထည်ဖော်ခြင်းကို အာဆီယံ ဥက္ကဋ္ဌ၏ အထူးကိုယ်စားလှယ်နှင့် အပြုသဘော နီးကပ်စွာ ပူးပေါင်း ဆောင်ရွက်လျက်ရှိပါသည်ဟု နစက၏ ထုတ်ပြန်ချက်တွင် ဖော်ပြထားသည်။
တူညီဆန္ဒ ၅ ချက် အကောင်အထည်ဖော်ခြင်းသည် လုပ်ငန်းစဉ် တစ်ရပ်ဖြစ်ရာ အချိန်ကန့်သတ်ချက်ဖြင့် ဖိအား ပေး၊ အကြပ်ကိုင်သည့် ချဉ်းကပ်မှုမျိုးသည် အကျိုးမရှိနိုင်သည့်အပြင်၊ ဆိုးကျိုးသက်ရောက်မှုများကိုပင် ဦးတည် သွားစေနိုင်ကြောင်း နစက၏ နိုင်ငံခြားရေးဝန်ကြီးဌာနက ထုတ်ပြန်ခဲ့သည်။
၂၀၂၁ ခုနှစ်၊ ဧပြီ ၂၄ ရက်က အင်ဒိုနီးရှားနိုင်ငံမှာ အာဆီယံ ထိပ်သီး ခေါင်းဆောင်များ အစည်းအဝေးကို ကျင်းပခဲ့သည်။
အဆိုပါ အစည်းအဝေးကနေ သဘောတူညီချက် ၅ ချက်ကို ချမှတ်ခဲ့သည်။ ထိုအချက်များမှာ အကြမ်းဖက် မှုများ ရပ်ဆိုင်းရေး၊ သက်ဆိုင်သူ အားလုံး တွေ့ဆုံ ဆွေးနွေးအဖြေရှာရန်၊ လူသားချင်း စာနာထောက်ထားမှု အကူအညီများ ပေးအပ်ရေး၊ ဖမ်းဆီးထားသော နိုင်ငံရေး အကျဉ်းသားများ ပြန်လည်လွတ်ပေးရေး၊ မြန်မာနိုင်ငံ ဆိုင်ရာ အာဆီယံ အထူးကိုယ်စားလှယ်တစ်ဦး ခန့်အပ်ခွင့်ပြုရေးတို့ ဖြစ်သည်။
ထိုအာဆီယံ သဘောတူညီချက် ၅ ချက်ကို နစက-က အကောင်အထည်ဖော်ပေးနိုင်ခြင်း အားနည်းသည့် အတွက် အာဆီယံအစည်းအဝေးများတွင် နစကဥက္ကဋ္ဌနှင့် နိုင်ငံခြားရေးဝန်ကြီးတို့အား မဖိတ်ဘဲ နိုင်ငံရေး အရ ကိုယ်စားမပြုသူ တစ်ဦးကိုသာ ဖိတ်ကြားစေခဲ့သည်။
- By CNI
- Category: နိုင်ငံရေး
- Hits: 975
CNI News
၂၀၂၂ ခုနှစ်၊ အောက်တိုဘာ ၂၇
ကရင်နီလူမျိုးစုနှင့် ပအိုဝ်းလူမျိုးစုအကြား သွေးခွဲသပ်လျှို ရန်တိုက်မှုများကို သတိကြီးစွာထား၍ စည်းလုံးရမည့် အချိန်ဖြစ်ကြောင်း ပအိုဝ်းအမျိုးသားဖက်ဒရယ်ကောင်စီ (PNFC) က တိုက်တွန်းခဲ့သည်။
ယနေ့ (အောက်တိုဘာ ၂၇ ရက်) နေ့တွင် ကျရောက်သည့် ကရင်နီအမျိုးသားများ ကာကွယ်ရေးတပ် တပ်ရင်း-၁၀ (KNDF B-10) ၏ ဖွဲ့စည်းခုံတော်လှန်မှု နှစ်ပတ်လည် အခမ်းအနားသို့ ပေးပို့သည့် သဝဏ်လွှာတွင် ဖော်ပြထားသည်။
PNFC မှ ပေးပို့သည့် သဝဏ်လွှာတွင် “နယ်မြေအချင်းချင်း ပဋိပက္ခများကို ဖန်တီး၍ လူမျိုးတစ်မျိုး အတွင်းရှိ မတူကွဲပြားသော အစုအဖွဲ့များ အကြားတွင် သွေးခွဲသပ်လျှို ရန်တိုက်ပေးခြင်း၊ နယ်မြေချင်း ပဋိပက္ခများမှ တဆင့် လူမျိုးတစ်မျိုးနှင့် တစ်မျိုး အကြား လူမျိုးစုပဋိပက္ခများ ဖြစ်ပွားစေရန် သွေးခွဲသပ်လျှို ရန်တိုက်ပေးခြင်းတို့ကို ဖန်တီးလျက်ရှိသည်။ ကရင်နီ နှင့် ပအိုဝ်းတို့သည် ဆွေရင်းမျိုးရင် ညီကိုမောင်နှမရင်းများ ဖြစ်ကြသကဲ့သို့ “တစ်ဦး နှင့်တစ်ဦး မပစ်ပယ်ကြစတမ်း ကတိကဝတ်များ” ကို သမိုင်းစဉ် တစ်လျှောက်လုံး ထိန်းသိမ်း၍ အေးတူပူအမျှ နေထိုင်ခဲ့ကြသည့် မိသားစုများ ဖြစ် သည့် အလျှောက် ကရန်နီနှင့် ပအိုဝ်းအကြား သွေးခွဲသပ်လျှို ရန်တိုက်မှုများ ကို သတိကြီးစွားထား၍ စည်းလုံးရ မည့် အချိန်ဖြစ်သည်” ဟု ဖော်ပြထားသည်။
KNDF-B 10 တပ်ဖွဲ့ကိုတွေ့ရစဉ်(KNDF)
ထို့အတူ ပအိုဝ်းပြည်သူများနှင့် ကရင်နီပြည်သူများ အပါအဝင် လူမျိုးပေါင်းစုံ ပြည်သူလူထု တစ်ရပ်လုံးနှင့်အတူ စစ်အာဏာရှင်စနစ် ချုပ်ငြိမ်းရေး၊ ဖက်ဒရယ်ပြည်ထောင်စု ထူထောင်ရေးတွင် အစဉ်တစိုက် လက်တွဲ ဆောင်ရွက် သွားမည်ဖြစ်ကြောင်း ဖော်ပြထားသည်။
ပအိုဝ်းအမျိုးသား ဖက်ဒရယ်ကောင်စီ(PNFC)ကို ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO/PNLA) တွင် ဥက္ကဋ္ဌနှင့် ဒုဥက္ကဋ္ဌများအဖြစ် တာဝန်ထမ်းဆောင်ခဲ့သော ခွန်မြင့်ထွန်းက ဥက္ကဋ္ဌအဖြစ် တာဝန်ယူထားပြီး ပအိုဝ်း နွေဦးတော်လှန်ရေး အင်အားစုများဖြင့် စုဖွဲ့ထားသည်။
ကရင်နီအမျိုးသားများကာကွယ်ရေးတပ် (KNDF) သည် နွေဦးတော်လှန်ရေးတွင် ပေါ်ပေါက်ခဲ့သည့် ကရင်နီ လက်နက်ကိုင် အစုအဖွဲ့ဖြစ်သည်။
- By CNI
- Category: နိုင်ငံရေး
- Hits: 496
CNI News
၂၀၂၂ ခုနှစ်၊ အောက်တိုဘာ ၂၇
ရခိုင်ပြည်နယ်၊ ဘူးသီးတောင် မြို့နယ်အတွင်းရှိ တိုက်ပွဲရှောင်များကို နယ်မြေလုံခြုံမှု မရှိဘဲ နေရပ်ပြန်ခိုင်း ခြင်းကြောင့် ပြည်သူများ ဒုက္ခရောက်မည့် သဘောဖြစ်နေကြောင်း ရခိုင်အမျိုးသားပါတီ (ANP) မှ ဥက္ကဋ္ဌ ဦးသာထွန်းလှက CNI သတင်းဌာနသို့ ပြောသည်။
အဆိုပါ တိုက်ပွဲရှောင်များမှာ နေစရာ အိမ်မရှိတော့သည့် သူများ ပါဝင်ကြောင်း၊ တကျော့ပြန် တိုက်ပွဲမှာလည်း ပြင်းထန်လာနိုင်သည့် အနေအထားတွင် ရှိနေကြောင်း ၎င်းက ပြောသည်။
ဦးသာထွန်းလှက “အဲဒီမှာ စစ်ဘေးရှောင်တွေက အမှန်ပြောရရင် ဟိုမှာ တချို့ကျေးရွာတွေဆိုရင် နေစရာအိမ်ကို မရှိတော့ဘူး။ တချို့ကျေးရွာတွေကလည်း တိုက်ပွဲကာလတုန်းကလည်း ဖျက်ဆီးခံလိုက်ရတဲ့ သဘောမျိုးရှိတဲ့ ရွာတွေဖြစ်တယ်၊ အဲဒါကြောင့် အဲဒီလို ရွာတွေကို ဘာမှ နေစရာ၊ ထိုင်စရာအိမ် စီစဉ်ပေးတာလည်း မရှိဘဲနဲ့ လုပ်ကိုင် စားသောက်ဖို့ အတွက်လည်း ဘာမှ အကူအညီ မပေးဘဲနဲ့ နယ်မြေလုံခြုံမှုလည်း မရှိဘူး။ အခု ရခိုင်ပြည် မှာက တကျော့ပြန် တိုက်ပွဲကလည်း ပိုလို့ ပြင်းထန်လာနိုင်တယ်၊ အဲဒီလို အခြေအနေမျိုးမှာ အတင်းအဓမ္မပုံစံမျိုး လို အဲဒီလို ဖိအားပေးပြီး နေရပ်ပြန်ခိုင်းတာဆိုတော့ ပြည်သူတွေအတွက် အကြီးအကျယ် ဒုက္ခရောက်မယ့် သဘော ဖြစ်နေတယ်။ ကျနော်တို့ သိသလောက် ပြောမယ်ဆိုရင် အဲဒီလူတွေက ကိုယ့်ရပ်ကွက်ကို ပြန်လို့ရတဲ့ အခြေအနေ လုံးဝမရှိသေးဘူးလို့ ကျနော်ကတော့ အဲဒီလိုမြင်တယ်"ဟု CNI သတင်းဌာနသို့ ပြောသည်။
ဘူးသီးတောင်မြို့ဆိုင်းဘုတ်ကိုတွေ့ရစဉ် (Cape Diamond)
ဘူးသီးတောင်မြို့ပေါ်ရှိ တိုက်ပွဲရှောင် စခန်းများမှ တာဝန်ခံများကို နစက-က ခေါ်၍ အောက်တိုဘာ ၃၁ ရက်နေ့ နောက်ဆုံးထားပြီး နေရပ်ပြန်ကြရန် ပြောခဲ့ကြောင်း သိရသည်။
အဆိုပါ တိုက်ပွဲရှောင်များကို နေရပ်ပြန်ခိုင်းခြင်းနှင့် ပတ်သက်၍ ရခိုင်ပြည်နယ်စီမံအုပ်ချုပ်ရေးကောင်စီ၏ ပြောရေးဆိုခွင့်ရှိသူ ပြည်နယ်ဥပဒေချုပ် ဦးလှသိန်းထံ CNI သတင်းဌာနက ဖုန်းဆက်သွယ်ခဲ့သော်လည်း ဖုန်း လက်ခံ ဖြေကြားခြင်း မရှိပေ။
မြောက်ဦးမြို့နယ်အတွင်းရှိ တိုက်ပွဲရှောင်များကိုတော့ နေရပ်ပြန်ရန် ညွှန်ကြားချက် မရှိသေးကြောင်း၊ လက်ရှိ အနေအထားအရ နေရပ်ပြန်ရန် မဖြစ်နိုင်သေးကြောင်း စင်းဘောကိုင်း တိုက်ပွဲရှောင်စခန်းတာဝန်ခံ ဦးညီပုက ပြောသည်။
၎င်းက “ကျနော်တို့ဖက်တွေကိုတော့ အဲဒီဟာတွေ အကြောင်းကြားစာတွေတော့ မရောက်သေးပါဘူးခင်ဗျ၊ နေရပ် ပြန်ဖို့ ကိစ္စကတော့ မသေချာသေးဘူး ထင်တယ်၊ ဘာလို့လဲဆိုတော့ နှစ်ဖက်က စစ်ရေးတွေ တင်းမာနေကြတဲ့ အချိန်ကြတော့ ဒုက္ခသည်တွေက နေရပ်ပြန်ဖို့လည်း စိုးရိမ်နေကြတာ ရှိတယ်” ဟု CNI သတင်းဌာနသို့ ပြောသည်။
ရခိုင်ပြည်နယ်အတွင်းက လမ်းဆုံတစ်နေရာကိုတွေ့ရစဉ်
လက်ရှိတွင် တိုက်ပွဲရှောင်များမှာ မိမိတို့၏ လယ်ယာလုပ်ငန်းခွင်သုံး ကျွဲ၊ နွားများလည်း မရှိတော့ကြောင်း၊ ၎င်း အခြေအနေတွင် ဖိအားပေး နေရပ်ပြန်ခိုင်းခြင်းမှာ လူသားချင်းစာနာထောက်ထားမှု ကင်းမဲ့ရာကျကြောင်း ဦးသာထွန်းလှက ပြောသည်။
၎င်းက “တိုက်ပွဲရှိနေရင် ဒီလူတွေ အဲဒီဒေသက ကိုယ့်ရပ်၊ ကိုယ့်ရွာကို ပြန်လို့ရတဲ့ အခြေအနေမရှိဘူး။ အဲဒါ ကြောင့် အရေးကြီးတာက တိုက်ပွဲတွေ မရှိမှ၊ ပြီးရင် ရပ်ရွာတွေထဲမှာ အရင်တုန်းကလည်း တိုက်ပွဲတွေ ဖြစ်ခဲ့တဲ့ အတွက်ကြောင့် လက်နက်ကြီးတွေ၊ မပေါက်ကွဲသေးတဲ့ ကျန်နေခဲ့တဲ့ အရာတွေနဲ့ ဒီလူတွေနဲ့ အသက်အန္တရာယ် ကတော့က စိုးရိမ်မှု ရှိမယ်လို့ ကျနော်မြင်တယ်၊ ပြီးရင် ဒီလူတွေမှာ လုပ်ကိုင်စားသောက်ဖို့ ကိရိယာတွေ ဘာမှ အဆင်သင့် မရှိဘူး။ အရင်တုန်းကဆိုရင် မွေးမြူထားတဲ့ ကျွဲတွေ၊ နွားတွေနဲ့ လယ်ယာတွေ ဘာတွေ လုပ်ကိုင် စားသောက်တာ ရှိတယ်၊ အခုအဲဒီလို လုပ်ငန်းခွင်သုံး ကျွဲ၊ နွားတွေကလည်း မရှိတော့တဲ့ အခြေအနေမှာ အခုလို အတင်းအဓမ္မ ပုံစံမျိုးနဲ့ ဖိအားပေးပြီး တစ်စုံတစ်ရာ ကူညီထောက်ပံ့မှု မရှိဘဲနဲ့ အဲဒီလို ပြန်ခိုင်းတာတော့က ပြည်သူ တွေ အပေါ်မှာ လူသားချင်း စာနာထောက်ထားမှု ကင်းမဲ့ရာ ကျတယ်လို့ ကျနော်တော့ အဲဒီလို မြင်တယ်” ဟု ပြောသည်။
ရခိုင်ပြည်နယ်နှင့် ချင်းပြည်နယ် ပလက်ဝမြို့နယ်တို့တွင် မြန်မာ့တပ်မတော်နှင့် ရက္ခိုင့်တပ်တော် (AA) တို့ ၂၀၂၂ ခုနှစ်၊ သြဂုတ်လကနေ စက်တင်ဘာလအထိ တိုက်ပွဲများကြောင့် တိုက်ပွဲရှောင်ဦးရေ ၁၆၀၀၀ ကျော် တိုးလာခဲ့ ကြောင်း၊ ယခင်နှင့် လက်ရှိ ပဋိပက္ခကြောင့် ထွက်ပြေးရသူ စုစုပေါင်း ၉၀၀၀၀ ကျော် ရှိလာကြောင်း ကုလသမဂ္ဂ လူသားချင်းစာနာမှုဆိုင်ရာညှိနှိုင်းရေးရုံး (UNOCHA) က အောက်တိုဘာလ ၁၉ ရက်နေ့တွင် ထုတ်ပြန်ထားသည်။
- By CNI
- Category: နိုင်ငံရေး
- Hits: 713
CNI News
၂၀၂၂ ခုနှစ်၊ အောက်တိုဘာ ၂၆
မြန်မာ့တပ်မတော်ကို ဖြုတ်ချရေး ကြိုးပမ်းမှုများနှင့်အတူ တိုင်းရင်းသားလက်နက်ကိုင်များနှင့် PDF များ စုဖွဲ့ကာ ဖက်ဒရယ်တပ်မတော် ဖွဲ့စည်းသွားရန် ပြင်ဆင်နေခြင်းကြောင့် လက်တွေ့မှာ ဖွဲ့စည်းနိုင်ခြေ ရှိ/မရှိ အမျိုးမျိုးသော ထင်ကြေးများ ပေးလျက်ရှိနေသည်။
လက်ရှိမှာ အမျိုးသားညီညွတ်ရေးအစိုးရ (NUG) အနေဖြင့် ဖက်ဒရယ်တပ်မတော် ထူထောင်ရေး လုပ်ဆောင်နေ ကြောင်း၊ သို့သော် မည်သည့် အဆင့်ထိ ရောက်ရှိနေပြီလဲကိုတော့ မသိရှိရသေးကြောင်း နိုင်ငံရေးလေ့လာ သုံးသပ် သူ ဦးသန်းစိုးနိုင်က CNI သတင်းဌာနသို့ ပြောသည်။
၎င်းက “NUG ကတော့ ဖက်ဒရယ်တပ်မတော် ထူထောင်ရေးအတွက် ကြွေးကြော်ပြီးတော့ လုပ်ကိုင်နေတာပဲ၊ ဘယ်အခြေအနေအထိ ရောက်ပြီလဲဆိုတာတော့ ကျနော်တို့လည်း မသိပါဘူးဗျာ၊ သို့သော် ပူးပေါင်း ဆောင်ရွက်မှု တွေ ရှိတယ်ဆိုတာ လောက်ပဲ ယေဘုယျ သိတာပါ။ ဖက်ဒရယ်တပ်မတော် အဆင့်မျိုး အထိတော့ မရောက်ရှိသေး ဘူးလို့ ထင်ပါတယ်ခင်ဗျ။ တကယ်လို့ သူတို့ရဲ့ ဖက်ဒရယ်ဖွဲ့စည်းပုံ မူကြမ်းထွက်လာရင်တော့ ဖြစ်ကောင်း ဖြစ်ပါ လိမ့်မယ်၊ အခုကတော့ ဖွဲ့စည်းမယ်လို့ ကြွေးကြော်နေတာပါ။ လက်တွေ့ကတော့ မဖြစ်မြောက်သေးဘူးလို့ ကျနော်တို့ ကြားရပါတယ်” ဟု ပြောသည်။
၂၀၁၆ ခုနှစ်၊ဇူလိုင်လက မိုင်ဂျာယန်မြို့မှာ ကျင်းပသည့် တိုင်းရင်းသား လက်နက်ကိုင်အဖွဲ့များ ညီလာခံကို တွေ့ရစဉ်
ပြည်ထောင်စုလွှတ်တော် ကိုယ်စားပြုကော်မတီ (CRPH) အနေဖြင့် ဖက်ဒရယ်ပြည်ထောင်စုတစ်ရပ် ထူထောင်နိုင် ရန်အပြင် ဖက်ဒရယ်တပ်မတော် ပေါ်ထွန်းလာရန် တိုင်းရင်းသား လက်နက်ကိုင် အဖွဲ့အားလုံးနှင့် ဆွေးနွေးညှိနှိုင်း မှုများ ပြုလုပ်နေကြောင်း၊ ၈၀ ရာခိုင်နှုန်းခန့် ပြီးစီးနေပြီဖြစ်ကြောင်း CRPH အဖွဲ့ဝင် NUG ၏ နိုင်ငံခြားရေးဝန် ကြီး ဒေါ်ဇင်မာအောင်က ၂၀၂၁ ခုနှစ်၊ မတ်လ ၂၁ ရက်တွင် Myanmar Now သို့ ပြောကြားထားသည်။
လုံခြုံရေးဆိုင်ရာ မူဝါဒများကို ပြုပြင်ပြောင်းလဲခြင်း မပြုလုပ်ဘဲ ဖက်ဒရယ်တပ်မတော်ကို ဖော်ဆောင်၍ မရ ကြောင်း တိုင်းရင်းသား လက်နက်ကိုင် ခေါင်းဆောင်တစ်ဦးဖြစ်သူ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။
၎င်းက “အဲဒီဟာကတော့ ဒီလိုပဲ စိတ်ကူးယဉ်လို့ မရဘူးဗျ၊ တိုင်းပြည်ရဲ့ လုံခြုံရေးစနစ်ကို ဘယ်လို ပြုပြင် ပြောင်း လဲမလဲ၊ လုံခြုံရေးစနစ်ကို ပြုပြင်ပြောင်းလဲတဲ့ နေရာမှာ ကျနော်တို့ မူဝါဒတွေကို ပြောင်းလဲပြီးတော့မှ ဖက်ဒရယ် တပ်မတော်ဆိုတာ ပေါ်လာနိုင်တယ်ဗျ။ လုံခြုံရေးဆိုင်ရာ မူဝါဒတွေကို အပြောင်းအလဲ မလုပ်ဘဲနဲ့တော့ ဒီအတိုင်း ဖော်လို့တော့ မရဘူး။ အဲဒါကတော့ သူ့ရဲ့ ဟိုဟာပဲ။ လုံခြုံရေးဆိုင်ရာ မူဝါဒတွေကို ပြုပြင်ပြောင်းလဲဖို့ တိုင်ပင် ဆွေးနွေးပြီး သဘောတူမှ ပြောင်းလို့ရမှာဗျ။ အဲဒီလို” ဟု ပြောသည်။
မြန်မာ့တပ်မတော်ကို တိုက်ခိုက်ရန် ယခင်က တိုင်းရင်းသား လက်နက်ကိုင် အဖွဲ့အစည်း (၁၂) ဖွဲ့ဖြင့် ဖက်ဒရယ် ပြည်ထောင်စုတပ်မတော် (FUA) ကို ၂၀၁၁ ခုနှစ်တွင် ဖွဲ့စည်းခဲ့ဖူးသည်။
၂၀၁၁ ခုနှစ်က ဖက်ဒရယ်ပြည်ထောင်စုတပ်မတော်(FUA)ကိုဖွဲ့စည်းခဲ့စဉ်
အဆိုပါ FUA တွင် ကရင်အမျိုးသားအစည်းအ ရုံး(KNU)၊ ကချင်လွတ်လပ်ရေးတပ်မတော်(KIA)၊ ရှမ်းပြည်တိုးတက် ရေးပါတီ(SSPP)၊ ကရင်နီ အမျိုးသားတိုးတက်ရေးပါတီ(KNPP)၊ ချင်းအမျိုးသားတပ်ဦး(CNF) နှင့် တခြား လက်နက်ကိုင်များ ပါဝင်ကြ သော်လည်း လက်တွေ့မှာ ထိထိရောက်ရောက် အကောင်အထည် မဖော်နိုင်ခဲ့ ကြောင်း သိရသည်။
လက်ရှိ နွေဦးတော်လှန်ရေးတွင် တပ်ပေါင်းစုများ တဖြည်းဖြည်းဖြင့် နီးစပ်လာနိုင်မည်ဟု ယူဆကြောင်း တရုတ်-မြန်မာ အရေးလေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။
၎င်းက “ကျမကြည့်တာကတော့ တပ်ပေါင်းစုလုပ်ငန်းတွေ တဖြည်းဖြည်းနဲ့တော့ နီးစပ်လာ နိုင်မယ်ထင်တယ်၊ ဖက်ဒရယ် တပ်ဆိုတာထက်ပေါ့နော်၊ ဥပမာအားဖြင့် KIA နဲ့ ပေါင်းတဲ့ အဖွဲ့ရှိနိုင်တယ်၊ KNU နဲ့ ပေါင်းတဲ့ အဖွဲ့ ရှိနိုင်တယ်၊ အဲဒီပေါင်းတဲ့ နေရာလေးတွေ အလိုက်ပေါ့နော်၊ သူ့ပထဝီနေရာအလိုက် အဲလို ပူးတွဲစစ်ဆင်ရင်း၊ စစ်ဆင်ရင်းနဲ့ နောက်ပိုင်းကျမှ တဖြည်းဖြည်း ဖြစ်လာနိုင်မယ်ထင်တယ်၊ ချက်ချင်းကြီးကတော့ ဖြစ်လာနိုင်ဖို့ မလွယ်သေးပါဘူး” ဟု ပြောသည်။
လက်ရှိတွင် KNU၊ KIA၊ CNF၊ KNPP၊ ဒေသကာကွယ်ရေးတပ် (PDF) ပူးပေါင်းတပ်ဖွဲ့များနှင့် မြန်မာ့တပ်မတော် တို့အကြား ကရင်ပြည်နယ်၊ ကယား (ကရင်နီ) ပြည်နယ်၊ ချင်းပြည်နယ်၊ မကွေးတိုင်းဒေသကြီး၊ စစ်ကိုင်းတိုင်း ဒေသကြီးတို့တွင် တိုက်ပွဲများ ဖြစ်ပွားလျက်ရှိသည်။
- By CNI
- Category: နိုင်ငံရေး
- Hits: 789
CNI News
၂၀၂၂ ခုနှစ်၊ အောက်တိုဘာ ၂၅
ကရင်အမျိုးသားအစည်းအရုံး (KNU) ၏ ဗဟိုကော်မတီအတွင်း အားပြိုင်မှုကြောင့် ကွန်ဂရက်ကို မကြာခဏ ရွှေ့ဆိုင်းနေရခြင်း ဖြစ်နိုင်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနကို ပြောသည်။
အဆိုပါ အားပြိုင်မှုတွင် တစ်ဖွဲ့ဖွဲ့မှ ပြတ်ပြတ်သားသား အသားစီးရသွားမှသာလျှင် ကွန်ဂရက်ကို ကျင်းပနိုင်လိမ့်မည်ဖြစ်ကြောင်း ၎င်းက ပြောသည်။
ဦးသန်းစိုးနိုင်က “ကျနော်မြင်တာတော့ KNU ဆိုတာ ဗဟိုကော်မတီထဲမှာလည်း အင်အားစုကွဲနေတယ်၊ ဗဟိုကော် မတီနဲ့ အောက်ခြေတပ်တွေ ကြားထဲမှာလည်း သဘောထား မတူကြဘူး။ အဲဒီအောက်မှာ ဒီကိစ္စတွေ ခဏခဏ ဖြစ်နေတယ်၊ ဗဟိုကော်မတီမှာ စောမူတူးစေးဖိုးနဲ့ နော်စီဖိုးရာစိန်တို့ အုပ်စုက အားပြိုင်နေကြတာ၊ နောက်ပြီး တော့ တပ်မဟာတွေကလည်း ကျနော်တို့ အခု တစ်ဗိုလ်၊ တစ်မင်းပေါ့ ကိုယ့်နယ်နဲ့ လုပ်ကိုင်နေကြတယ်၊ အခု လှုပ်ရှားမှုအတွင်းမှာ ပေါ်လာတဲ့ နယ်ဒါးမြဆိုရင်လည်း သူ့ကို ဗဟိုကော်မတီက ထုတ်ထားတယ်၊ ဒါပေမဲ့ သူက KNLA တပ်ဖွဲ့တွေနဲ့ တိုက်နေတယ်၊ အဲဒီလို အနေအထားတွေ ရှိတဲ့အောက်မှာ ခဏခဏ ရွှေ့ပြောင်းရတာ မဆန်း ဘူးလို့ ထင်ပါတယ်။ အဖွဲ့တစ်ဖွဲ့က အင်အားစု ပြတ်ပြတ်သားသား အသာစီးရသွားတဲ့ အချိန်ကြမှ သူတို့ လုပ်ကြပါ လိမ့်မယ်၊ ကျနော်ထင်တာတော့” ဟု CNI သတင်းဌာနသို့ ပြောသည်။
KNU တပ်ဖွဲ့ကိုတွေ့ရစဉ် (KNU)
၂၀၂၂ ခုနှစ်၊ နှစ်ကုန်ပိုင်းတွင် ကျင်းပရန် လျာထားသည့် KNU ၏ (၁၇)ကြိမ်မြောက် ကွန်ဂရက်ကို အကြိမ်ကြိမ် ရွှေ့ ဆိုင်းလာခဲ့ရာ ယခုလ (အောက်တိုဘာ) ၂၄ ရက်၌ ကျင်းပရန် စီစဉ်ခဲ့သည်။
သို့သော် အစည်းအဝေးသို့ ကိုယ်စားလှယ် ၁၈၀ ဦး၏ ၇၅ ရာခိုင်နှုန်း ရောက်ရှိမှ အထမြောက်မည်ဖြစ်သော်လည်း ၇၅ ရာခိုင်နှုန်း မပြည့်မီသည့်အတွက် မကျင်းပနိုင်ဘဲ ဖြစ်ခဲ့ကြောင်း KNU နှင့် နီးစပ်သူများက ပြောသည်။
ထို့ကြောင့် KNU ကွန်ဂရက် မကျင်းပနိုင်ခဲ့ခြင်းနှင့် ရွှေ့ဆိုင်းနေရမှု အခြေအနေများနှင့်ပတ်သက်၍ KNU တာဝန်ရှိ ပုဂ္ဂိုလ်များထံ CNI သတင်းဌာနမှ အကြိမ်ကြိမ် ဖုန်းဆက်သွယ်ခဲ့သော်လည်း ဖုန်းလက်ခံ ဖြေကြားခြင်း မရှိပေ။
KNU ကွန်ဂရက်တွင် ခေါင်းဆောင်များကို ပြန်လည်ရွေးချယ်ရန်အပြင် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) စာချုပ်အတိုင်း ဆက်လက်ရပ်တည်ရန် သင့်/မသင့်နှင့် လက်ရှိ တပ်မတော်ကို တော်လှန်နေသည့် အဖွဲ့အစည်းများနှင့် ပူးပေါင်းမည် မပူးပေါင်းမည် စသည့် အကြောင်းအရာများကို ဆွေးနွေးရန် ရှိကြောင်း သိရသည်။
လက်ရှိတွင် KNU ၏ ကွန်ဂရက် ကျင်းပရန် အချိန် ၂ နှစ်လွန်သွားပြီဖြစ်ကြောင်း ကရင်အမျိုးသား ဒီမိုကရက်တစ် ပါတီမှ ဥက္ကဋ္ဌ မန်းအောင်ပြည်စိုးက CNI သတင်းဌာနသို့ ပြောသည်။
၎င်းက “အဲဒီဟာက သူတို့ ညီလာခံက လုပ်ဖို့ အချိန်ကျနေတာ ၂ နှစ်တောင် လွန်သွားပြီလေ၊ ၂ နှစ်တောင် လွန်သွားပြီဆိုတော့ အဲဒီဟာနဲ့ အခုဖြစ်တဲ့ဟာနဲ့ ပတ်သက်ပြီး တစ်စုံတစ်ခု သက်ရောက်မှု ရှိမလားဆိုတာ ကျနော်တို့လည်း ကြိုပြီးတော့ သုံးသပ်လို့ မရနိုင်သေးဘူးလို့ ပြောရမှာပဲ၊ သူတို့ ဘာတွေ ဆုံးဖြတ်လို့ ဘာတွေ လုပ်မလဲမှ မသိသေးတာ၊ အကြမ်းဖျင်း အားဖြင့်တော့ သူတို့ EC ပေါ့၊ အသစ်ပြန်ရွေးမယ်၊ အဲဒီ EC အသစ်တွေ ကနေ ဖြစ်လာတဲ့ လူတွေက ဘယ်လို သဘောထား ရှိသလဲဆိုတာ ကျနော်တို့လည်း မသိရသေးဘူးလေ၊ မသိနိုင် သေးဘူး၊ ဒါကြောင့်မို့ အဲဒီဟာကတော့ ပြောဖို့ နည်းနည်း မရသေးဘူး။ ပြောဖို့လည်း စောသေးတယ်လို့ပဲ ခင်ဗျား ကို အသိပေးပါရစေ” ဟု ပြောသည်။
မြန်မာ့တပ်မတော်နဲ့ တိုက်ပွဲဖြစ်ပြီးနောက် KNU က သိမ်းဆည်းရမိခဲ့သော လက်နက်များကိုတွေ့ရစဉ် (KNU)
KNU ၏ ဖွဲ့စည်းပုံ အခြေခံဥပဒေအရ ကွန်ဂရက်ကို လေးနှစ်တစ်ကြိမ် ကျင်းပရမည် ဖြစ်သော်လည်း ကိုဗစ်ကပ် ရောဂါနှင့် တပ်မတော်က အာဏာရယူပြီးနောက် ဖြစ်ပေါ်လာသည့် နိုင်ငံရေး အကျပ်အတည်းများကြောင့် ရွှေ့ဆိုင်းခဲ့ရကြောင်း သိရသည်။
ကရင်အမျိုးသားအစည်းအရုံး (KNU) သည် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးထားသည့် ကရင်လက်နက်ကိုင် တပ်ဖွဲ့ဖြစ်သည်။
တခြားတစ်ဖက်မှာလည်း နွေဦးတော်လှန်ရေး အင်အားစုများကို လူသားချင်းစာနာထောက်ထားမှုအရ စောင့် ရှောက်ထားသလို PDF များနှင့်ပူးပေါင်း၍ မြန်မာ့တပ်မတော်ကို တိုက်ခိုက်လျက်ရှိနေသည်။