CNI News

၂၀၂၃ ခုနှစ်၊ မေလ ၂

ပြည်တွင်းရှိ လက်နက်ကိုင် အဖွဲ့အစည်းများကို နှိမ်နင်းလို၍ ကာကွယ်ရေး အသုံးစရိတ်အား တိုးမြှင့်လိုက်ခြင်း ဖြစ်နိုင်ကြောင်း တိုင်းရင်းသားလက်နက်ကိုင် ‌ခေါင်းဆောင်တစ်ဦးဖြစ်သူ ဗိုလ်မှူးကြီး ခွန်ဥက္ကာက CNI သတင်း ဌာနသို့ ပြောသည်။

မြန်မာပြည်မှာ ပြည်ပရန် လုံးဝ မ‌ရှိကြောင်း၊ ထို့ကြောင့် ပြည်တွင်း လက်နက်ကိုင် ပဋိပက္ခများကို နှိမ်နင်းလို၍ ဖြစ်ကြောင်း ၎င်းက ပြောသည်။

ဗိုလ်မှူးကြီး ခွန်ဥက္ကာက “ပြည်တွင်းမှာ လက်နက်ကိုင်ပဋိပက္ခတွေ အနှံ့အပြား ဖြစ်နေတယ်လေဗျာ၊ ဒါကြောင့် ဒီဟာတွေနဲ့ ယှဉ်ပြိုင်ဖို့ နည်းနည်းလေး တည်ငြိမ် အေးချမ်းမှုရအောင် ပြန်လုပ်ချင်တယ်ဆိုရင် နည်းနည်းတော့ အသုံးစရိတ်ပေးတဲ့ သဘောလို့ ယူဆပါတယ်။ ပြည်မရန် ဗမာပြည်မှာ ပြည်ပရန် မရှိပါဘူးဗျာ၊ ပြည်ပရန် လုံးဝ မရှိပါဘူး ဗမာပြည်မှာ ဘာကြောင့်လဲဆိုတော့ အမေရိကန်ရဲ့ NDAA ကလည်း ဗမာပြည်တွင်းကို ဝင်ဖို့အကြောင်း မရှိပါဘူး။ ထို့အတူပဲ တရုတ်က အိမ်နီးနားချင်းဖြစ်နေတော့ တရုတ်ကလည်း ဘယ်သူမှ အဝင်ခံမှာ မဟုတ်ပါဘူး၊ ဗမာပြည်တွင်းရေးမှာ ထို့အတူပဲ အိန္ဒိယဆိုရင်လည်း တရုတ်ရဲ့ နောက်လိုက်ဆိုတော့ အိန္ဒိယ၊ ဘင်္ဂလားဒေ့ရှ် အိမ်းနီးနားချင်းတွေလည်း ဗမာပြည်ကို ကျူးကျော်ဖို့ မရှိပါဘူး။ ဒါကြောင့် ပြည်ပရန်က လုံးဝ မရှိသလောက်ပါဘဲ။ ပြည်တွင်းမှာ ဖြစ်နေတဲ့ ပဋိပက္ခတွေကိုပဲ နှိမ်နင်းချင်တဲ့ သဘောလို့ ယူဆပါတယ်” ဟု CNI သတင်းဌာနသို့ ပြောသည်။

တိုင်းရင်းသားလက်နက်ကိုင် TNLA တပ်ဖွဲ့ကိုတွေ့ရစဉ်

၂၀၂၁ ခုနှစ်၊ ကာကွယ်ရေး အသုံးစရိတ်မှာ ၁၀ ဒသမ ၆၆ ရာခိုင်နှုန်း၊ ၂၀၂၂-၂၃ မှာ ၂၀ ဒသမ ၅၈ ရာခိုင်နှုန်း၊ ၂၀၂၃-၂၄ မှာ ၂၈ ဒသမ ၂၃ ရာခိုင်နှုန်း တိုးမြင့်ထားပြီး ကျပ်ဘီလီယံ ၅,၆၀၀ ကျော်အထိ သုံးစွဲရန် တောင်းခံထားသည်။

ထို့ကြောင့် ယခင်နှစ်ထက် ကျပ်ဘီလီယံ ၂,၀၀၀ နီးပါး တိုးမြှင့်လာခဲ့ကြောင်း ISP Myanmar ၏ ဖော်ပြချက်အရ သိရသည်။

တစ်နိုင်ငံလုံး လက်နက်ကိုင် ပဋိပက္ခများ ဖြစ်ပွားနေသည့်အတွက် ကာကွယ်ရေးအသုံးစရိတ် တိုးမြှင့်ခြင်း ဖြစ်နိုင်ကြောင်း မြန်မာ့နိုင်ငံရေး လေ့လာသုံးသပ်သူ‌ ဒေါက်တာ အောင်မျိုးက CNI သတင်းဌာနသို့ ပြောသည်။

ဒေါက်တာအောင်မျိုးက “ဒါကတော့ ရှင်းပါတယ်။ အခုဟာက ပြောရလို့ရှိရင် တစ်နိုင်ငံလုံး အတိုင်းအတာနဲ့ လုပ်နေရတာလေ။ တစ်နိုင်ငံလုံး အတိုင်းအတာအနေနဲ့ ကျနော်တို့ ပြည်တွင်း သောင်းကျန်းမှု နှိမ်နင်းရေးက လုပ်နေရတာလေ၊ ဒီအတွက်ကြောင့်မို့လို့ ဒါက ပိုပြီးတော့ လုပ်ရမှာပဲလေ၊ ဒါက သဘာဝကျတဲ့ ဖြစ်စဉ်တစ်ခုပါ၊ လှုပ်ရှားမှုလည်း များတယ်၊ တပ်တွေလည်း ပြောရရင် စစ်ဆင်ရေး တာဝန်ထမ်းဆောင်ရတာ များတဲ့အခါကြတော့ နောက်ပြီးတော့ လက်နက်ခဲယမ်းလည်း ကုန်ကျမယ်၊ ဒါကြောင့်မို့လို့ ဒါလုပ်ရတာတော့ သဘာဝကျပါတယ်” ဟု ပြောသည်။

မြန်မာ့တပ်မတော် လေတပ်က ပစ်ခတ်နေစဉ်

ထိုသို့ တိုးမြှင့်လိုက်သည့် ကာကွယ်ရေး အသုံးစရိတ်ကို တပ်သားများအား လစာတိုးမြှင့်ခြင်းထက် စစ် လက်နက်များတွင် ပိုမို အသုံးပြုနိုင်ကြောင်း ၎င်းက ပြောသည်။

လက်ရှိတွင် မြန်မာ့တပ်မတော်နှင့် တိုင်းရင်းသား လက်နက်ကိုင် အဖွဲ့အစည်းအချို့၊ ဒေသကာကွယ်ရေးတပ် (PDF) ပူးပေါင်းတပ်တို့အကြား နိုင်ငံတစ်ဝှမ်း၌ တိုက်ပွဲများ ဖြစ်ပွားလျက်ရှိသည်။

ဒေသတွင်းနိုင်ငံများ ဖြစ်သည့် တရုတ်သည် ၂၀၂၃ ခုနှစ်တွင် စစ်အသုံးစရိတ်ကို ဒေါ်လာ ဘီလျံ ၂၀၀ ကျော် (၇ ရာခိုင်နှုန်း) တိုးမြှင့်ခဲ့သည်။ သို့သော် အမေရိကန်၏ စစ်အသုံးစရိတ်သည် တရုတ်ထက် လေးဆ ပိုများသည်။

ထို့နောက် ထိုင်းနိုင်ငံသည် ၂၀၂၃ ခုနှစ်အတွင် စစ်အသုံးစရိတ် ကာကွယ်ရေးဘတ်ဂျက်အတွက် ဘတ်ငွေ ၁၉၇.၂၉၂ ဘီလျံ တောင်းခံထားသလို အိန္ဒိယကလည်း တရုတ်ကို တန်ပြန်ရေးအတွက်၂၀၂၃ ခုနှစ်တွင် စစ်ရေးအသုံးစရိတ်ကို ၁၃ ရာခိုင်နှုန်းတိုးမြှင့်၍ အမေရိကန်ဒေါ်လာ ၇၃ ဘီလျံအထိ တိုးမြှင့်ထားသည်။

CNI News

၂၀၂၃ ခုနှစ်၊ ဧပြီ ၂၉

နိုင်ငံတကာ သံတမန်များသည် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံ၍ နေပြည်တော်မှာ ခြေရှုပ်နေကြခြင်းကြောင့် မြန်မာ့နိုင်ငံရေး အပြောင်းအလဲ တစ်ခု ဖြစ်လာမလား စောင့်ကြည့်နေကြသည်။

ပြီးခဲ့သည့် ဧပြီ ၁၆ ရက်က တရုတ်ကွန်မြူနစ်ပါတီရဲ့ နိုင်ငံတကာဆက်ဆံရေး ညွှန်ကြားရေးမှူးချုပ် Peng Xiubin သည်လည်းကောင်း၊ ဧပြီ ၂၁ ရက်တွင် ထိုင်းနိုင်ငံ ဒုဝန်ကြီးချုပ် H. E. Mr. Don Pramudwinai သည်လည်း ကောင်း၊ ဧပြီ ၂၃ ရက်၌ ဘန်ကီမွန်းသည်လည်းကောင်း မြန်မာနိုင်ငံသို့ လာရောက်၍ ဗိုလ်ချုပ်မှူးကြီး မင်းအောင် လှိုင်နှင့် တွေ့ဆုံခဲ့ကြသည်။

အလားတူ မြန်မာနိုင်ငံဆိုင်ရာ အိန္ဒိယသံအမတ်ကြီး၊ မြန်မာနိုင်ငံဆိုင်ရာ တရုတ်သံအမတ်ကြီးနှင့် တရုတ် သံမတန် တို့သည်လည်း မကြာခဏ နေပြည်တော်သို့ သွားရောက်၍ နစက ဥက္ကဋ္ဌ၊ ဒုဥက္ကဋ္ဌ တို့အပါအဝင် ပြည်ထောင်စု ဝန်ကြီးများနှင့် တွေ့ဆုံ ဆွေးနွေးလေ့ရှိနေသည်။

၂၀၂၃ ခုနှစ်၊ ဧပြီ ၂၈ ရက်နေ့က ဒုတိယဗိုလ်ချုပ်မှူးကြီး စိုးဝင်းနှင့် တရုတ်သံအမတ်ကြီး တို့တွေ့ဆုံစဉ်

သံတမန်များ နေပြည်တော်သို့ လာရောက်ခြင်းမှာ မြန်မာ့ငြိမ်းချမ်းရေးနှင့် နယ်စပ်တည်ငြိမ်ရေး၊ ဖွံ့ဖြိုး ရေးများနှင့် ဆက်စပ်နိုင်ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာ အေးမောင်က CNI သတင်းဌာနသို့ ပြောသည်။

ဒေါက်တာအေးမောင်က “အဲဒီတော့ တရုတ်ရဲ့ အရွေ့ကလည်း ကြီးကြီးမားမား နယ်စပ်တည်ငြိမ်ရေးကို ဆောင် ရွက်လာနိုင်တဲ့ အနေအထား နောက်ပိုင်းမှာ တွေ့နိုင်တာပေါ့၊ ဘန်ကီမွန်းရဲ့ ခရီးစဉ်ကလည်း ထိုင်းဒုဝန်ကြီးချုပ် အဆိုပြုခဲ့တဲ့ နောက်ပိုင်းမှာ ဖြစ်လာတဲ့ အခင်းအကျင်း ဖြစ်တဲ့အခါမှာ အဲဒီလိုပဲ သုံးသပ်တာပေါ့ဗျာ၊ သီးသန့် ခရီး စဉ် ဖြစ်ချင်ဖြစ်မှာပေါ့၊ ဒါပေမဲ့ ကြည့်ရတာ အာဆီယံဘက်ကလည်း မြန်မာ့နိုင်ငံရေး အခင်းအကျင်းကို ဖြေရှင်းလို တဲ့ သဘောတွေ့နိုင်တယ်၊ ပစ်ခတ်ရပ်စဲရေး ကဏ္ဍတွေမှာ ဘန်ကီမွန်း ပါခဲ့တဲ့ ခရီးလမ်းကိုကြည့်ရင် NCA စာချုပ် ချုပ်တဲ့ကာလက ပထမအကြိမ်၊ ဒုတိယအကြိမ် စသဖြင့်ပေါ့ဗျာ၊ ငြိမ်းချမ်းရေးညီလာခံကို ကြည့်ရင် ဘန်ကီမွန်း ကိုယ်တိုင်ပါခဲ့တဲ့ အခင်းအကျင်းတွေ တွေ့နိုင်တယ်၊ အဲဒီတော့ မြန်မာ့ငြိမ်းချမ်းရေးနဲ့ နယ်စပ်တည်ငြိမ်ရေး မြန်မာ နိုင်ငံ ဖွံ့ဖြိုးတိုးတက်ရေးနဲ့ ဒီမိုကရေစီဖက်ဒရယ် ပြည်ထောင်စုဖြစ်ရေးတွေက ဆက်စပ်နေတယ်လို့ပဲ သူတို့ သုံးသပ်တယ်။ ဆိုတော့ နိုင်ငံကြီးတွေရဲ့ ခေါင်းဆောင်မှုတွေ မြန်မာ့နိုင်ငံရေး အခင်းအကျင်းမှာ လာရောက်ပြီးမှ SAC နဲ့ တွေ့တာ ကတော့ NUG ဘက်က သိပ်ကျေနပ်တဲ့ပုံတော့ မပေါက်ဘူး။ ဒါပေမဲ့ SAC နဲ့ ဆွေးနွေးမှ ဖြစ်မယ် ဆိုတဲ့ ယူဆချက် တစ်ခုကတော့ဖြင့် အာဆီယံရော၊ ကုလသမဂ္ဂရော၊ Elders ရော၊ တရုတ်ရော၊ အိန္ဒိယရောဘက် က ဒီအတိုင်းပဲ သတ်မှတ်ချက်က ရှိထားပုံပေါက်တယ်” ဟု ပြောသည်။

လက်ရှိတွင်လည်း တရုတ်၊ ရုရှားမှ ကိုယ်စားလှယ်တို့နှင့် နစကတို့ နေပြည်တော်တွင် တွေ့ဆုံ ဆွေးနွေးလျက် ရှိနေသည်။

နစက ကျင်းပမည့် ရွေးကောက်ပွဲကို တရုတ်က ထောက်ခံသလို ၎င်းတို့ အကျိုးစီးပွားအရ လာရောက်ခြင်း ဖြစ်ကြောင်း တရားလွှတ်တော်ရှေ့နေ ဦးကြီးမြင့်က CNI သတင်းဌာနသို့ ပြောသည်။

၂၀၂၃ ခုနှစ်၊ ဧပြီ ၂၈ ရက်နေ့က ဗိုလ်ချုပ်မှူးကြီး မင်းအောင်လှိုင်နဲ့ ရုရှား-မြန်မာ ချစ်ကြည်ရေးနှင့် ပူးပေါင်းဆောင်ရွက်ရေးအသင်း ဒုတိယဥက္ကဋ္ဌ Mr. Anatoly Bulochnikov တွေ့ဆုံစဉ်

ဦးကြီးမြင့်က “ဆိုလိုတာကတော့ တရုတ်က စကစက ရွေးကောက်ပွဲလုပ်မယ်ဆို တရုတ်က ထောက်ခံတယ်၊ ထောက်ခံတဲ့အပြင်ကို သူက သူ့အကျိုးစီးပွားလည်း ကြိုက်တာကိုး။ ထောက်ခံတဲ့အပြင် သူက မြောက်ပိုင်း ၇ ဖွဲ့နဲ့ ရခိုင်ကို မင်းတို့ စစ်အစိုးရကို မတိုက်နဲ့တော့ မတိုက်နဲ့ ရွေးကောက်ပွဲကို ထောက်ခံလိုက်ကြ၊ ရွေးကောက်ပွဲလည်း လုပ်လိုက်ကြတော့လို့ သူက ဖိအားပေးပြီးပြီ၊ အဲဒါကို မင်းအောင်လှိုင်နဲ့ဆို မဖြစ်ဘူး။ မင်းအောင်လှိုင်နဲ့ဆို မဖြစ်နိုင် ဘူး။ ဒါကို ဦးသန်းရွှေတို့ ခင်ဗျားတို့ ကြီးကြပ်လုပ်ကြပါဦးဆိုပြီး လာပြောတာပဲလေ၊ ဘန်ကီမွန်းကတော့ ထားပါ တော့ဗျာ၊ ဒီစစ်အစိုးရက အသုံးချတာပါ ဘန်ကီမွန်းကတော့ ဘာမှ မဟုတ်ပါဘူး” ဟု ပြောသည်။

နိုင်ငံတကာမှ လာရောက်ခြင်းမှာ လက်ရှိ နိုင်ငံရေး အကျပ်အတည်းများကို ဖြေရှင်းနိုင်မည့် နည်းလမ်းများ ထွက် ပေါ် လာနိုင်သည်ဟု သုံးသပ်ကြောင်း ကရင်အမျိုးသားဒီမိုကရက်တစ်ပါတီ ဥက္ကဋ္ဌ မန်းအောင်ပြည်စိုးက CNI သတင်းဌာနသို့ ပြောသည်။

မန်းအောင်ပြည်စိုးက “ဒါကတော့ နိုင်ငံတကာက လာတာကတော့ လက်ရှိ နစကကို ဒါက နားလည် အသိအမှတ် ပြုတဲ့ သဘောလို့လည်း ပြောလို့ ရတာပေါ့လေ၊ ဘန်ကီမွန်းတို့ ဘာတို့ကတော့ ဘာကိစ္စလည်းတော့ မပြောတတ် ဘူးပေါ့၊ ထိုင်းနဲ့ တရုတ်ကတော့ လာပြီးတော့ ဆက်စပ်တယ်ဆိုတော့က ဒါကကျနော်တို့ တစ်ခုခု အဖြေထွက် မလားပေါ့လေ၊ ကောင်းတဲ့ဖက်က ဖြေရှင်းနိုင်တဲ့ နည်းများ ထွက်မလား အဲဒါလေးတော့ သုံးသပ်မိတယ်၊ အဲဒါ လေးတော့ ယူဆမိတယ်” ဟု ပြောသည်။

နစကအနေဖြင့် တရုတ်၊ အိန္ဒိယ၊ ရုရှားနှင့် ထိုင်းနိုင်ငံတို့မှ သံတမန်များ၊ ဒုဝန်ကြီးချုပ်များနှင့် မကြာခဏ ဆိုသလို တွေ့ဆုံမှုများ ရှိနေသည်။

CNI News

၂၀၂၃ ခုနှစ်၊ ဧပြီ ၂၈

The Elders ၏ ဒုတိယဥက္ကဋ္ဌလည်းဖြစ် ကုလသမဂ္ဂအထွေထွေအတွင်းရေးမှူးချုပ်ဟောင်းလည်း ဖြစ်သူ မစ္စတာ ဘန်ကီမွန်းသည် မြန်မာနိုင်ငံသို့ ဧပြီ ၂၃ ရက်မှ ၂၄ ရက်နေ့ထိ လာရောက်ခဲ့သည်။

ထိုခရီးစဉ်အတွင်း သမ္မတဟောင်း ဦးသိန်းစိန်နှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်တို့ကို သီးခြားစီ တွေ့ဆုံသွားခဲ့သည်။

ထိုနောက် သူ၏ ခရီးစဉ်နှင့် ပတ်သက်ပြီး မြန်မာဘာသာဖြင့် ယခုလို ထုတ်နြပ်ခဲ့သည်။

CNI News

၂၀၂၃ ခုနှစ်၊ ဧပြီ ၂၈

လက်ရှိ ကျင်းပနေသည့် ကရင်အမျိုးသားအစည်းအရုံး (KNU) ၏ ၁၇ ကြိမ်မြောက် ကွန်ကရက်မှာ နွေဦးတော်လှန် ရေးအပေါ် ၁၀၀ ရာခိုင်နှုန်း သက်ရောက်နေကြောင်း တရားလွှတ်တော်ရှေ့နေ ဦးကြီးမြင့်က CNI သတင်းဌာနသို့ ပြောသည်။

အဆိုပါ ကွန်ကရက်ကို စောင့်ကြည့်နေကြောင်း၊ သို့သော်လည်း တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) ကို အားသာသည့်အဖွဲ့က ဦးဆောင်သွားမှာကို စိုးရိမ်မိကြောင်း ၎င်းက ပြောသည်။

ဦးကြီးမြင့်က “ ၁၀၀ ရာခိုင်နှုန်းရှိမှာ၊ ၁၀၀ ရာခိုင်နှုန်းရှိမှာ၊ ကျနော်တို့လည်း အဲဒါ ရင်တမမနဲ့ဗျာ စောင့်ကြည့်နေ တာ၊ သူတို့ကလည်း သူတို့အတွင်းရေး ဖြစ်နေတော့ ကိုယ့်ဘက်ပဲ ဖြစ်နေတယ်ပေါ့ KNU အဖွဲ့အစည်းက ကိုယ်တွေကိုလည်း သမိုင်းစဉ်ဆက် ကူညီလာတယ်၊ ရှင်းရှင်းပြောရရင်တော့ ကယ်တင်လာတဲ့ သူတို့ဖက် ရောက်လာသူတွေကို ကယ်တင်လာတဲ့ အဖွဲ့အစည်းဖြစ်တော့ ဒီအဖွဲ့အစည်းကြီးရဲ့ စည်းလုံးညီညွတ်မှုကို ၁၀၀ ရာခိုင်နှုန်း လိုလားတယ်တယ်ဗျာ၊ ဒါကြောင့်မို့ ကျနော် ဝေဖန်တာတွေကို မလုပ်ခဲ့ပါဘူး။ တကယ်တမ်းကြတော့ တိုးတက်တယ်ပေါ့ဗျာ၊ စစ်အာဏာရှင် ဆန့်ကျင်တယ် တိုးတက်တဲ့ အဖွဲ့အစည်း နေရာကောင်းတွေ ရမယ်ဆိုရင်‌ တော့ အင်မတန် ဝမ်းမြောက်စရာရှိတာပေါ့ဗျာ၊ ဒါမှ မဟုတ်ဘဲနဲ့ စစ်အစိုးရကို ဓါတ်ပြားဟောင်းကြီး ဖွင့်ပြီးတော့ နှစ်ပေါင်း ၇၀ လောက် ဓါတ်ပြားဟောင်းကြီးကို ပြန်ဖွင့်ပြီးတော့ အထူးသဖြင့် ၈၈ နောက်ပိုင်းပေါ့ဗျာ၊ ဦးသိန်းစိန် လက်ထက် ငြိမ်းချမ်းရေး NCA ကို အကြောင်းပြပြီးတော့ ဦးသိန်းစိန်လက်ထက်မှာ KNU အဖွဲ့ကြီးက စောမူတူးစေး ဖိုးတို့က စစ်တပ်နဲ့ ပူးပေါင်းသွားတယ်ပေါ့ဗျာ၊ အဲဒီစိတ်ဓါတ်တွေက အခုထိ ကျန်နေဦးမယ်ဆိုရင်တော့ ဒါကတော့ မဖြစ်သင့်တော့ဘူး၊ ဒီအမှားတော့ မလုပ်သင့်တော့ဘူး၊ အခုအခါမှာတော့ ဦးသိန်းစိန်လည်း မဟုတ်တော့ဘူး” ဟု ပြောသည်။

ဗိုလ်ချုပ်ကြီး စောမူးတူစေးဖိုးနဲ့ ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်

အဆိုပါ ကွန်ကရက်ကို KNU တပ်မဟာ ၅ က တက်ရောက်ခြင်း မရှိခြင်းကြောင့် နွေဦးတော်လှန်ရေးနှင့် ပူးပေါင်း လိုသည့်အဖွဲ့အတွက် အားနည်းချက် ဖြစ်လာနိုင်ကြောင်း ဦးကြီးမြင့်က ပြောသည်။

လက်ရှိ KNU တွင် နွေဦးတော်လှန်ရေးဘက် အားသာသည့် အဖွဲ့နှင့် ငြိမ်းချမ်းရေး သွားလိုသည့် အဖွဲ့ဟူ၍ နှစ်ဖွဲ့ ဖြစ်နေကြောင်း နိုင်ငံရေးအသိုင်းအဝိုင်းကြားတွင် သုံးသပ်မှုများလည်း ရှိနေသည်။

လက်ရှိ ကရင်အမျိုးသားအစည်းအရုံး (KNU) ဥက္ကဋ္ဌမှာ ဗိုလ်ချုပ်ကြီး စောမူတူးစေးဖိုး ဖြစ်ပြီး ဒုဥက္ကဋ္ဌမှာ ပဒို စောကွယ်ထူးဝင်း၊ အထွေထွေအတွင်းရေးမှူးချုပ်မှာ ပဒို စောတာဒိုမူးတို့က တာဝန်ယူ ဆောင်ရွက်နေကြောင်း သိရသည်။

KNU ကွန်ကရက်မှာ ခေါင်းဆောင် အပြောင်းအလဲ ဖြစ်နိုင်ချေများကြောင်း ကရင်အမျိုးသား ဒီမိုကရက်တစ်ပါတီ ဥက္ကဋ္ဌ မန်းအောင်ပြည်စိုးက CNI သတင်းဌာနကို ပြောသည်။

KNU ၏ ၁၆ ကြိမ်မြောက် ကွန်ဂရက်ကိုတွေ့ရစဉ်

၎င်းက “သူတို့ရဲ့ ဆုံးဖြတ်ချက်တွေ ဘယ်လိုရှိလဲဆိုတဲ့ အပေါ်မှာ ကျနော်တို့ သိရမှ သုံးသပ်လို့ရမယ်ဗျ၊ အခု သူတို့ရဲ့ ဆုံးဖြတ်ချက်တွေက ဘယ်လို ဘာမှန်းမသိရသေးတော့ ကျနော်တို့လည်း သုံးသပ်လို့ မရသေးဘူး။ ဖြစ်ဖို့တော့ (ခေါင်းဆောင်အပြောင်းအလဲ) နည်းနည်း ရှိတယ်ပေါ့လေ၊ ဖြစ်ဖို့တော့ ထင်တယ်ပေါ့လေ၊ ယတိ ပြတ်ကြီးတော့ ပြောလို့မရဘူးဗျ၊ အပြောင်းအလဲကတော့ ဖြစ်နိုင်တဲ့ဘက်က များတာပေါ့” ဟု ပြောသည်။

KNU ၏ ဖွဲ့စည်းပုံ အခြေခံဥပဒေအရ ကွန်ဂရက်ကို လေးနှစ်တစ်ကြိမ် ကျင်းပရမည် ဖြစ်သော်လည်း ကိုဗစ်ကပ် ရောဂါနှင့် တပ်မတော်က အာဏာရယူပြီးနောက် ဖြစ်ပေါ်လာသည့် နိုင်ငံရေး အကျပ်အတည်းများကြောင့် ရွှေ့ဆိုင်းခဲ့ရကြောင်း သိရသည်။

ကရင်အမျိုးသားအစည်းအရုံး (KNU) သည် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သ‌ဘောတူစာချုပ် (NCA) လက်မှတ်ရေးထိုးထားသည့် ကရင်လက်နက်ကိုင် တပ်ဖွဲ့ဖြစ်သည်။

တခြားတစ်ဖက်မှာလည်း နွေဦးတော်လှန်ရေး အင်အားစုများကို လူသားချင်း စာနာထောက်ထားမှုအရ စောင့်ရှောက်ထားသလို PDF များနှင့် ပူးပေါင်း၍ မြန်မာ့တပ်မတော်ကို တိုက်ခိုက်လျက်ရှိနေသည်။

CNI News

၂၀၂၃ ခုနှစ်၊ ဧပြီ ၂၇

လက်ရှိ မြန်မာ့နိုင်ငံရေး အကျပ်အတည်းကို ဖြေရှင်းရာတွင် တိုင်းရင်းသားများ မပါဝင်ဘဲ ဖြေရှင်း၍ မရကြောင်း ရခိုင့်ဦးဆောင် ပါတီ(AFP)ဥက္ကဋ္ဌ ဒေါက်တာ အေးမောင်က CNI သတင်းဌာနသို့ ပြောသည်။

လွတ်လပ်ရေး စယူကတည်းက တိုင်းရင်းသားအားလုံး ညှိနှိုင်းတိုင်ပင်၍ ယူခဲ့ကြကြောင်း၊ သို့သော်လည်း ညှိနှိုင်းချက်များ အကောင်အထည် မပေါ်ခြင်းကြောင့် လက်နက်ကိုင်ခဲ့ကြကြောင်း ၎င်းက ပြောသည်။

၂၀၁၆ ခုနှစ်၊ ဇူလိုင်လက မိုင်ဂျာယန်မှာ ကျင်းပသည့် တိုင်းရင်းသားလက်နက်ကိုင်များ ထိပ်သီး ညီလာခံကို တွေ့ရစဉ်

ဒေါက်တာအေးမောင်က “မြန်မာ့နိုင်ငံရေး စပြီးတော့ လွတ်လပ်တဲ့ နိုင်ငံအဖြစ် ထူထောင်ကတည်းကိုက တိုင်းရင်း သား အားလုံးနဲ့ ညှိနှိုင်းတိုင်ပင်ပြီးမှ လွတ်လပ်မှုကို ယူကြမယ်လို့ ညှိနှိုင်းခဲ့ကြတာကို အဲဒီညှိနှိုင်းချက် အကောင် အထည် ဒီနေ့အထိ မပေါ်ဘူးဆိုတာ အားလုံးလက်ခံကြလို့သာ လက်နက်ကိုင် လာကြတာကိုး၊ နိုင်ငံရေးအရ ဖြေရှင်းလို့မရဘူး လက်နက်ကိုင်မှ ဖြစ်မယ်၊ အဲဒီတော့ လက်နက်ကိုင် ကြတာလည်း မြင့်လာပြီ၊ လက်နက်ကိုင် နည်းနဲ့ ဖြေရှင်းနိုင်မလားဆိုတဲ့ အခါကြတော့ မဟုတ်ပြန်ဘူး နိုင်ငံရေးအားဖြင့် ညှိနှိုင်းတိုင်ပင်မှ ဖြစ်မယ်၊ အဲဒီ တစ်ဖက်က သွားတာပေါ့၊ ဆိုတော့ တိုင်းရင်းသားတွေ မပါဘဲနဲ့ မြန်မာ့နိုင်ငံရေးကို ဖြေရှင်းလို့ ဘယ်ရမလဲ၊ အဲဒါ ကြောင့်လည်း အားလုံ လက်ခံနိုင်တဲ့ အမြဲတမ်းပြေလည်မှု၊ ငြိမ်ချမ်းမှုတစ်ခု ရအောင်ဆိုရင် လက်နက်ကိုင် ပဋိပက္ခ ပြေလည် သွားဖို့ လိုတာပေါ့၊ လက်နက်ကိုင်ရတဲ့ အကြောင်းအရင်း အမြဲတမ်းလည်း ပြောကြပါတယ်၊ စစ်မှန်တဲ့ ကိုယ်ပိုင်အုပ်ချုပ်၊ ကိုယ်ပိုင်ပြဋ္ဌာန်းပိုင်ခွင့်ကို ဖွဲ့စည်းပုံအခြေခံဥပဒေအရ ပြည့်ပြည့်ဝဝ ရနိုင်တဲ့ အနေအထား တစ်ခုကို ဖန်တီးပေးမှပဲ လက်နက်ကိုင်တဲ့ တိုင်းရင်းသားတွေက နောက်ကို ဆုတ်မှာကိုးဗျ” ဟု CNI သတင်းဌာန သို့ ပြောသည်။

လက်ရှိ ဖြစ်ပေါ်နေသည့် နိုင်ငံရေး အခင်းအကျင်းအရ တိုင်းရင်းသား အဖွဲ့အစည်းများမှာ တော်လှန်ရေး အင်အားစု များနှင့် ပူးပေါင်းမှု ရှိနေသလို နစကနှင့် ပူးပေါင်းသည့် အဖွဲ့အစည်းများလည်း ရှိနေသည်။

စနစ်တကျ စုဖွဲ့ထားပြီး ဟန်ချက်ညီညီ သွားနိုင်သည့် အပေါ်တွင် မူတည်ပြီး တော်လှန်ရေး၏ အနိုင်အရှုံးကို အဆုံး အဖြတ်ပေးမှာဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

၂၀၁၅ ခုနှစ်၊ အောက်တိုဘာ ၁၅ ရက်က NCA လက်မှတ်ထိုးနေကြစဉ်

၎င်းက “မဟုတ်ဘူးဗျ၊ အားလုံးအပေါ်မှာ မူတည်တယ်၊ တိုင်းရင်းသားအဖွဲ့တွေရော ပြည်တွင်းမှာ လှုပ်ရှားနေတဲ့ အခု NUG လှုပ်ရှားနေတဲ့ အကုန်လုံးအပေါ်မှာ မူတည်တယ်၊ တိုင်းရင်းသားတွေ အပေါ်မှာပဲ မူတည်တာ မဟုတ် ဘူး။ မူတည်တာက တိုင်းရင်းသား အဖွဲ့တွေရော ရပ်ကွက်အလိုက် စုစည်းနေတဲ့ အဖွဲ့တွေ အားလုံးရော တစ်စု တစ်စည်းတဲ့ စည်းစည်းလုံးလုံး ညီညီညွတ်ညွတ်နဲ့ စနစ်ကျစွာသွားမှ ဖြစ်မှာ အကုန်လုံး ဟန်ချက်ညီညီ လှုပ်ရှား မှုနဲ့ သွားမှ ဖြစ်မှာ။ တိုင်းရင်းသားကြီးပဲ လုပ်နိုင်ရင် သူတို့ လုပ်နေတာ ကြာပီလေ သူတို့လည်း မအောင်မမြင် ဖြစ်နေတာ ဟုတ်တယ်မလား၊ ကျမတို့ ပြည်တွင်းကလည်း ဒီစစ်အာဏာရှင် ဆန့်ကျင်ရေး လုပ်နေတာ အခုမှ မဟုတ်ဘဲ အနှစ် ၇၀ လောက်ရှိနေပြီ မအောင်မြင်ဘူး။ မအောင်မြင်ရတဲ့ အကြောင်းက ကျမတို့ အချင်းချင်း ကြားမှာ ကျယ်ပြန့်တဲ့ တပ်ပေါင်းစုကြီး မဖွဲ့နိုင်လို့ ကျမတို့ရဲ့ လှုပ်ရှားမှုတွေကို စနစ်တကျ မပူးပေါင်းနိုင်လို့ ဟန်ချက်ညီ မလုပ်နိုင်လို့ ဖြစ်တယ်၊ အဲဒီဟာပေါ်မှာ မူတည်ပြီး တော်လှန်ရေးရဲ့ အနိုင်အရှုံးက အဆုံးအဖြတ်ပေး မှာပဲ” ဟု ပြောသည်။

လက်ရှိ ဖြစ်ပေါ်နေသည့် နိုင်ငံရေး အကျပ်အတည်းများကို ဖြေရှင်းနိုင်ရေး ပြည်တွင်းရှိ အင်အားစု အဖွဲ့အစည်း အချို့၊ အာဆီယံ အပါအဝင် နိုင်ငံတကာကလည်း ဖြေရှင်းနိုင်ရေး ကြိုးပမ်းလျက် ရှိနေသည်။

CNI News

၂၀၂၃ ခုနှစ်၊ ဧပြီ ၂၆

နစက နှင့် NUG တို့သည် ဖက်ဒရယ်ပြည်ထောင်စု တည်ဆောက်မည်ဟုဆိုကာ စည်းရုံးနေမှုသည် နိုင်ငံရေး အမြတ်သဘောဖြင့်သာ ပြောနေကြကြောင်း တိုင်းရင်းသား လက်နက်ကိုင် ခေါင်းဆောင်တစ်ဦးဖြစ်သူ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

နစက နှင့် NUG သည် ဖက်ဒရယ်ကို နိုင်ငံ‌ရေးအမြတ်သဘော ပြောနေကြသော်လည်း ဖက်ဒရယ်မူများကို လက်ခံ ထားပြီး ကျင့်သုံးမည်ဆိုသည်ကို မတွေ့ရှိရကြောင်း ၎င်းက ပြောသည်။

ဗိုလ်မှူးကြီး ခွန်ဥက္ကာက “အဟန့်အတားကတော့ လက်ရှိ အကြမ်းဖက်တာပေါ့၊ အကြမ်းဖက်မှုတွေ ရှိနေသမျှ တော့ အဟန့်အတား ဖြစ်နေမှာပဲ၊ လက်နက်ကိုင်ပဋိပက္ခကို လျှော့ချပြီးတော့ တွေ့ဆုံ ဆွေးနွေးရေးတွေကို စမှ ဖက်ဒရယ် တည်ဆောက်တဲ့ လမ်းက ပေါ်မယ်၊ နောက်ပြီးတော့ တွေ့ဆုံဆွေးနွေးရေး စတယ်ဆိုတာတောင် ဖက်ဒရယ်တစ်ခါတည်း ပေါ်သေးတာ မဟုတ်သေးပါဘူး။ ဖက်ဒရယ်ပေါ်ဖို့အတွက် အခြေခံမူချတာတို့ သဘော တူညီချက် ယူတာတို့ နိုင်ငံရေးအရ Political solution လို့ခေါ်တာပေါ့။ နိုင်ငံရေး အဆုံးအဖြတ်တွေကို အရင်ယူ ပြီးမှ ဖက်ဒရယ်ကို သွားလို့ရမှာ၊ အခု အင်အားပြိုင်ဆိုင်နေတဲ့ အကြိတ်အနယ် သူနိုင်၊ ကိုယ်နိုင် အားပြိုင်နေတဲ့ အဖွဲ့တွေကတော့ ဖက်ဒရယ်ကို စည်းရုံးရေးသဘော နိုင်ငံရေးအမြတ်သဘော ပြောနေကြပေမဲ့ လက်တွေ့ ဖက်ဒရယ် အခြေခံမူတွေကို လက်ခံထားပြီး သူတို့ကိုယ်တိုင် ကျင့်သုံးမယ်ဆိုတာ မတွေ့သေးဘူး၊ အဲဒါကြောင့် အဲဒီ ဖက်ဒရယ် အခြေခံမူတွေကို ရတဲ့အထိ သဘောတူထားမှ ဒါက ကျနော်တို့ ဖက်ဒရယ်ကို သွားနိုင်မှာ ဖြစ် တယ်” ဟု CNI သတင်းဌာနသို့ ပြောသည်။

၁၀+၁၀ ထိပ်သီး ဆွေးနွေးပွဲ တက်ရောက်ခဲ့သော လက်နက်ကိုင် ခေါင်းဆောင်များကိုတွေ့ရစဉ်

နစကနှင့် NUG တို့သည် ဖက်ဒရယ်ဒီမိုကရေစီ ပြည်ထောင်စုကို တည်ဆောက်မည်ဟု အသီးသီး ပြောနေကြ သော်လည်း မည်ကဲ့သို့သော ဖက်ဒရယ်မျိုး တည်ဆောက်မည်ဆိုသည်ကိုတော့ ထုတ်ပြန်ခြင်း မရှိသေးကြောင်း သိရသည်။

ထို့အတူ နစကနှင့် NUG တို့သည့် ကျဉ်းထဲကျပ်ထဲရောက်မှ ဖက်ဒရယ်ကို အကြောင်းပြပြီး အပြိုင်အဆိုင် မဲဆွယ် သလို ဖြစ်နေကြောင်း မြန်မာ့နိုင်ငံရေး လေ့လာသုံးသပ်သူ စိုင်းထွန်းအောင်လွင်က CNI သတင်းဌာနသို့ ပြောသည်။

၎င်းက “စစ်တပ်ပဲနေနေ၊ ဒီ NLD ပဲနေနေ၊ ဒီ NUG ပဲ နေနေ သူတို့က ကျဉ်းထဲကျပ်ထဲရောက်မှ ဒီဟာကြီး (ဖက်ဒရယ်)ကို အပြိုင်အဆိုင်ပြပြီး မဲဆွယ်သလို ဖြစ်တယ်၊ အဲဒီဟာတော့ တော်တော်လေး နိုင်ငံတည်ဆောက် ရေးလား၊ တိုင်းပြည် တည်ဆောက်ရေးလား ဘာလုပ်မှာလဲဆိုတဲ့ အဓိက ဗမာနှစ်စုရဲ့ အမျှော်အမြင် အားနည်းမှု ပေါ့နော်၊ အဲဒီ weak point ကို ကွင်းကွင်းကွက်ကွက် မြင်ရတာပေါ့၊ နဂိုကတည်းက ကျနော်ဆိုလိုတာ ပရိုအက်တစ် ပေါ့ဗျာ၊ ဖြစ်လာမှ တုံ့ပြန်တာထက် ကြိုတင်ပြီး လုပ်ထားနိုင်တယ်ဆိုရင် ဒီအခြေအနေမျိုး မရောက်ဘူးပေါ့လေ၊ ဒါကတော့ ဘယ်ဖက်ပါမလဲဆိုပြီးမှ အနိုင်ကစားတဲ့ ပွဲမှာ မဲဆွယ်ကြတဲ့ဟာ တစ်ခုပါပဲ၊ တကယ်တမ်းကြတော့ သူတို့ရဲ့ မက်လုံးတွေက ကျနော်မြင်တဲ့အမြင်မှာ သိပ်ပြီး ဆွဲဆောင်မှု မရှိဘူး။ အဲဒီသဘောမျိုး ဖြစ်နေတယ်၊ ဒါပေမဲ့ တချို့ကတော့ အခြေအနေ အရဆိုတဲ့ဟာမျိုး ဖြစ်တာပေါ့လေ” ဟု ပြောသည်။

AA ခေါင်းဆောင် ၂ ဦးကိုတွေ့ရစဉ်

ဒီမိုကရေစီဖက်ဒရယ် ပြည်ထောင်စုကို တည်ဆောက်မည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားထားသလို NUG ကလည်း ဒီမိုကရေစီဖက်ဒရယ် ပြည်ထောင်စုအား တည်ဆောက်မည်ဟု ပြောကြား ထားသည်။
သို့သော်လည်း လက်ရှိအချိန်ထိ ဖက်ဒရယ်မူများကို ချပြနိုင်ခြင်း မရှိသေးပေ။

တိုင်းရင်းသား လက်နက်ကိုင် အဖွဲ့တချို့ကတော့ ဖက်ဒရယ်ပြည်ထောင်စု တည်ဆောက်ရေး တောင်းဆိုနေသော် လည်း ULA/AA ကမူ ဖက်ဒရယ်ထက် မြင့်မားသည့် အခွင့်အာဏာရှိသော ကွန်ဖက်ဒရေးရှင်း(ကွန်ဖက်ဒရိတ်) အဆင့်အတန်း ရလိုကြောင်း တောင်းဆိုလျက်ရှိသည်။

ထို့နောက် “ဝ”ပြည် သွေးစည်းညီညွတ်ရေး တပ်မတော်(UWSA)ကမူ ဖက်ဒရယ်ဟု မပြောသလို ကွန်ဖက်ဒရေး ရှင်းဟုလည်း မပြောဘဲ တရုတ်နိုင်ငံကဲ့သို့ တစ်နိုင်ငံတည်း မူဝါဒ ၂ ခုဖြင့် အုပ်ချုပ်နိုင်သော အခြေအနေကို ဖန်တီးရယူထားသလို ဖြစ်နေသည်ဟု နိုင်ငံရေးလေ့လာသုံးသပ်သူများက ပြောသည်။

CNI News

၂၀၂၃ ခုနှစ်၊ ဧပြီ ၂၅

နိုင်ငံအတွင်း လွတ်လပ်၍ တရားမျှတသည့် အခြေအနေများရှိမှသာ ရွေးကောက်ပွဲ ကျင်းပရန် ကုလသမဂ္ဂ အထွေထွေအတွင်းရေးမှူးချုပ်ဟောင်းလည်းဖြစ် The Elders ဒုဥက္ကဋ္ဌ ဘန်ကီမွန်းက ဧပြီ ၂၅ ရက်နေ့တွင် ထုတ်ပြန်ခဲ့သည်။

ဘန်ကီမွန်းသည် မြန်မာနိုင်ငံသို့ ဧပြီ ၂၄ ရက်နေ့က ရောက်ရှိလာပြီး နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် အပါအဝင် သမ္မတဟောင်း ဦးသိန်းစိန်တို့ကို သီးခြားစီ တွေ့ဆုံ၍ မြန်မာ့အရေး ဆွေးနွေးခဲ့သည်။

နစကသည် ရှေ့လုပ်ငန်းစဉ် ၅ ရပ်ကို ချမှတ် အကောင်အထည်ဖော်လျက်ရှိရာ ထိုထဲတွင် အထွေထွေ ရွေး ကောက်ပွဲ ကျင်းပ၍ အနိုင်ရရှိသည့် နိုင်ငံရေးပါတီကို နိုင်ငံတော်တာဝန် ပြန်လည် လွှဲပြောင်းပေးရန် အချက် ပါဝင်သည်။

လက်ရှိ အချိန်ထိ နစကသည် ရွေးကောက်ပွဲကို မည်သည့် အချိန်တွင် ကျင်းပမည်ဟု ထုတ်ပြန် ကြေညာထား ခြင်း မရှိသေးပေ။

ဘန်ကီမွန်းနဲ့ ဗိုလ်ချုပ်မှူးကြီးမင်းအောင်လှိုင် ၂၀၂၃ ခုနှစ်၊ ဧပြီ ၂၄ ရက်က တွေ့ဆုံစဉ်

သို့သော် ရွေးကောက်ပွဲ ကျင်းပနိုင်ရေးအတွက် ပြည်ထောင်စုရွေးကောက်ပွဲ ကော်မရှင် (UEC)ကလည်း နိုင်ငံရေး ပါတီများကို မှတ်ပုံတင်ခြင်း ဥပဒေနှင့် နည်းဥပဒေများကို ၂၀၂၃ ခုနှစ်၊ ဇန်နဝါရီ ၃၁ ရက်က ထုတ်ပြန်ခဲ့ပြီး ရက်ပေါင်း ၆၀ အတွင်း နိုင်ငံရေးပါတီများ မှတ်ပုံပြန်တင်ရန် သတ်မှတ်ခဲ့သည်။

လက်ရှိ မြန်မာနိုင်ငံတွင် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ကရင်ပြည်နယ်၊ ကယား ပြည်နယ်တို့တွင် လက်နက်ကိုင် တိုက်ပွဲများ ပြင်းထန်နေသလို ရန်ကုန်တိုင်းဒေသကြီးနှင့် မန္တလေးတိုင်းဒေသ ကြီးတို့တွင်လည်း ဗုံးပေါက်ကွဲမှုများနှင့် လုပ်ကြံ သတ်ဖြတ်မှုများ မကြာခဏ ဖြစ်ပွားလျက်ရှိနေသည်။

CNI News

၂၀၂၃ ခုနှစ်၊ ဧပြီ ၂၅

လက်ရှိ နွေဦးတော်လှန်ရေးတွင် ပြည်သူ့ကာကွယ်ရေးတပ် (PDF)၊ ဒေသကာကွယ်ရေးတပ် (LDF) ဟူကာ ကွဲပြား နေသည့် လက်နက်ကိုင်ထားသော အဖွဲ့အစည်းများကို မည်ကဲ့သို့ ထိန်းညှိသင့်လဲ နိုင်ငံရေးအသိုင်းအဝိုင်းကြား ဆွေးနွေးငြင်းခုံလျက်ရှိနေသည်။

ကွဲပြားမှုများအား စုစည်းပြီး တစ်သွေးတစ်သံတစ်မိန့် ကျင့်သုံးနိုင်သည့် ဖက်ဒရယ်တပ်မတော် တစ်ရပ်ကို ထူထောင်နိုင်ရန် ကြိုးစားရမှာဖြစ်ကြောင်း မြန်မာ့နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာန သို့ ပြောသည်။

ဗမာပြည်သူ့လွတ်မြောက်ရေးတပ်တော်(BPLA)ကိုတွေ့ရစဉ်

၎င်းက “ကျနော်တို့ကတော့ ခုချိန်ကာလမှာ အလုံးစုံ သဘောတူသည်ဖြစ်စေ၊ မတူသည်ဖြစ်စေ၊ မတူကွဲပြားမှု၊ ခြားနားမှုတွေ ရှိပေမဲ့ ဒီနေ့ အချိန်အခါမှာ အချင်းချင်း စည်းလုံးညီညွတ်စွာ ပူးပေါင်းဆောင်ရွက်ရမယ့် အချိန်ဆို တာ သဘောပေါက် နားလည်ပြီးတော့ NUG နဲ့ ပူးပေါင်းပြီးမှ အလုပ်လုပ်ကိုင်နိုင်ဖို့ ကျနော်တို့ကတော့ အဓိက တိုက်တွန်းပါတယ်၊ အဲဒီမှာ NUG အနေနဲ့လည်း ဒီနွေဦးတော်လှန်ရေး တစ်ခုလုံးရဲ့ ခေါင်းဆောင် အင်အားစုကြီး အဖြစ် အသိအမှတ်ပြုခံရမှု မကြိုးစားဘဲနဲ့ ညီညွတ်ရေးကို တည်ဆောက်ကြဖို့ ကျနော်တို့က တိုက်တွန်းပါတယ်။ ဒီအချိန်မှာ အဓိကအားဖြင့် စစ်ကောင်စီရဲ့ လုံခြုံရေးအင်အားစုတွေကို တိုက်ခိုက်နိုင်ဖို့ စုစည်းနိုင်တဲ့ နေရာကနေ ကျယ်ကျယ်ပြန့်ပြန့် စုစည်းပြီးတော့ တစ်သွေးတစ်သံတစ်မိန့် ကျင့်သုံးနိုင်တဲ့ ဖက်ဒရယ်အာမီတစ်ရပ်ကို ထူထောင် နိုင်အောင် ကြိုးစားရမယ့် ကိစ္စဖြစ်ပါတယ်၊ အဲဒီ အခြေအနေအတွင်းမှာ မိမိတို့ အချင်းချင်းကြားမှာ ဖြစ်တဲ့ နား မလည်မှုတွေ၊ သဘောမပေါက်မှုတွေ၊ သဘောထား မတူညီမှုတွေကို ကျနော်တို့ တတ်နိုင်သမျှ ကျော်လွှားပြီးတော့ စစ်ကောင်စီရဲ့ လုံခြုံရေး အင်အားစုတွေကို ပြန်လည်တုံ့ပြန် တိုက်ခိုက်နိုင်တဲ့ တစ်စည်းတစ်လုံးနဲ့ အင်အားစု ပြော ချင် တာကတော့ စစ်ရေးအရ ပြောလို့ရှိရင်တော့ အမိန့်ပေးစနစ် တစ်ခုအောက်မှာ အားလုံးပါဝင်ပြီးတော့ တိုက် ခိုက် သွားကြဖို့ လိုတယ်လို့ ကျနော်တို့ကတော့ အလေးအနက် မေတ္တာခံ တင်ပြလိုပါတယ်ဗျ” ဟု ပြောသည်။

ပြီးခဲ့သည့် ရက်ပိုင်းက အမျိုးသားညီညွတ်ရေးအစိုးရ (NUG)၏ လက်အောက်ခံ PDF များနှင့် Local PDF များ အကြားမှာ ဖမ်းဆီးမှုများ၊ အပြန်အလှန် ပစ်ခတ်မှုများ ဖြစ်ပွားကာ လူသေဆုံးမှုများ ဖြစ်ပွားခဲ့သည်။

NUG အနေဖြင့် PDF များကို စုစည်းနိုင်ရေး လုပ်ဆောင်နေကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာ လှကျော်ဇောက CNI သတင်းဌာနသို့ ပြောသည်။

ကရင်နီအမျိုးသားကာကွယ်ရေးတပ်ဖွဲ့(KNDF)ကို တွေ့ရစဉ်

၎င်းက “စစ်ကောင်စီကို ဆန့်ကျင်နေတဲ့ လူတွေအားလုံး စုစည်းပြီးတော့ တတ်နိုင်သမျှ သဘောထား ကြီးကြီးနဲ့ ပါဝင်တဲ့ အဖွဲ့တွေအားလုံး နိုင်ငံရေးအရ၊ စစ်ရေးအရ တတ်နိုင်တဲ့ဘက်က ကူညီပြီးတော့ ပညာပေးတာတွေလည်း လုပ်သင့်တာပဲလေ၊ ဘယ်လိုလုပ်ပါ၊ ဟိုလို လုပ်ပါလို့တော့ ဘယ် ကျမပြောလို့ ကောင်းပါ့မလဲဗျ” ဟု ပြောသည်။

ဘုံရည်မှန်းချက် တူညီသော လက်နက်ကိုင် အဖွဲ့အစည်းများ အနေဖြင့် စည်းလုံးညီညွတ်မှုရှိရန် လိုအပ်ကြောင်း၊ ထိုသို့ မဟုတ်ပါက ပြည်သူလူထုများ ထိခိုက်နစ်နာနိုင်ကြောင်း နိုင်ငံ‌ရေးသုံးသပ်သူ တစ်ဦးက ပြောသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က မြန်မာ့တပ်မတော်က အာဏာရယူပြီးနောက် နွေဦးတော်လှန်ရေး လှုပ်ရှားမှုနှင့်အတူ ပြည်သူ့ကာကွယ်ရေးတပ် (PDF)၊ ဒေသကာကွယ်ရေးတပ် (LDF) များ ပေါ်‌ပေါက်လာခဲ့သည်။

အလားတူ တိုင်းရင်းသား လက်နက်ကိုင်အဖွဲ့များ၏ ထိန်းကြောင်းမှုနှင့် ကရင်နီအမျိုးသားကာကွယ်ရေးတပ်ဖွဲ့ (KNDF)၊ ဗမာပြည်သူ့လွတ်မြောက်ရေးတပ်တော်(BPLA)တို့လို အဖွဲ့အစည်းများလည်း ပေါ်ပေါက်လာခဲ့သည်။

CNI News
၂၀၂၃ ခုနှစ်၊ ဧပြီ

လက်ရှိ မြန်မာနိုင်ငံတွင် ဖြစ်ပေါ်နေသော နောက်ဆုံး နိုင်ငံရေး အ ခြေအနေများနှင့်ပတ်သက်ပြီး The Elders ၏ ဒုတိယဥက္ကဋ္ဌလည်းဖြစ် ကုလသမဂ္ဂအထွေထွေအတွင်းရေးမှူးချုပ်ဟောင်း မစ္စတာ ဘန်ကီမွန်းနှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် တွေ့ဆုံ ဆွေးနွေးခဲ့ကြသည်။

တွေ့ဆုံမှုကို ဧပြီ ၂၄ ရက်နေ့က နေပြည်တော်မှာ ကျင်းပခဲ့သည်။

မစ္စတာ ဘန်ကီမွန်းသည် သမ္မတဟောင်း ဦးသိန်းစိန်နှင့်လည်း သီးသန့် တွေ့ဆုံခဲ့ကြောင်း သတင်းများ ထွက်ပေါ် လျက်ရှိသည်။

မစ္စတာ ဘန်ကီမွန်းသည် ဦးသိန်းစိန် အစိုးရလက်ထက် တိုင်းရင်းသား လက်နက်ကိုင် ၈ ဖွဲ့နှင့် အစိုးရ- တပ်မတော်ကြား ၂၀၁၅ ခုနှစ်၊ အောက်တိုဘာ ၁၅ ရက်က တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ်ရေးထိုးပွဲ အခမ်းအနားမှာ အသိသက်သေ အဖြစ် ပါဝင် လက်မှတ်ရေးထိုးခဲ့သူ ဖြစ်သည်။