CNI News

၂၀၂၃ ခုနှစ်၊ ဧပြီ ၄

ဧပြီ ၃ ရက်နေ့က ရန်ကုန်မြို့အတွင်းရှိ စက်သုံးဆီ အရောင်းဆိုင်တချို့တွင် စက်သုံးဆီ မရှိသည့်အတွက် ကွန်ဒို များ၊ ဟိုတယ်များနှင့် စက်မှုဇုန်များသည် စက်သုံးဆီ ဝယ်မရသည့် အခြေအနေနှင့် ကြုံတွေ့နေရသည်ဟု လုပ်ငန်း ရှင်များထံမှ သိရသည်။

လက်ရှိတွင် ကွန်ဒိုများတွင် စက်သုံးဆီ ဝယ်မရခြင်းကြောင့် ကွန်ဒိုနေ လူထုမှာ အခက်အခဲများ ကြုံတွေ့နေရသလို ဟိုတယ်များတွင်လည်း စက်သုံးဆီ ပြတ်လပ်မှုများ ဖြစ်ပေါ်နေသည်ဟု စီးပွားရေးလေ့လာသုံးသပ်သူ ဦးသက်ဇော် က CNI သတင်းဌာနသို့ ပြောသည်။

ဦးသက်ဇော်က “အခုဟာက တော်တော်များများ ဟိုတယ်တွေရော၊ စက်မှုဇုန်ပိုင်းတွေရော နည်းနည်း ဆီဝယ်လို့ မရဘူး။ အခုဟာက ပြဿနာရှိတာက ဆီဆိုင်တွေမှာတောင် ဆီမရှိဘူး။ အခုက ငါတို့ ကွန်ဒိုမှာတောင် ဆီဝယ်လို့ မရဘူးဖြစ်နေတယ်။ အခုက ဟိုတယ်တွေမှာလည်း ဆီပြတ်နေတယ်” ဟု ပြောသည်။

 ရန်ကုန်မြို့တွင်း မြင်ကွင်းကိုတွေ့ရစဉ်

လက်ရှိတွင် စက်သုံးဆီ ၁ လစာအတွက် အလုံအလောက် ရှိကြောင်း၊ ဖြန့်ဖြူးရာတွင် မူဝါဒပိုင်းဆိုင်ရာများကြောင့် အဆင်မပြေမှု ဖြစ်နေခြင်း ဖြစ်ကြောင်း မြန်မာနိုင်ငံ စက်သုံးဆီ တင်သွင်း ဖြန့်ဖြူးရောင်းချရေးအသင်းမှ တာဝန်ရှိ သူတစ်ဦးက CNI သတင်းဌာနသို့ ပြောသည်။

၎င်းက “ပြောလို့ရတာတော့ ဆရာတို့ဆီမှာ ဆီတွေ အလုံအလောက် ရှိတယ် ၁ လစာ ရှိတယ်။ ဆီက ရှိတယ်။ ဒါပေမယ့် ဖြန့်ဖြူးတဲ့ နေရာမှာတော့ မူဝါဒလေးတွေပေါ့။ အဆင်ပြေအောင်တော့ ဆရာတို့ ကြိုးစားပေးနေတယ်။

တောက်လျှောက်တော့ လုပ်နေတယ်။ အဆင်မပြေဘူးဆိုတာလည်း ဆရာသိတယ်၊ ကြားရတယ်။ အဲဒီတော့ ဆီ ဆိုင်တွေမှာလည်းပဲ ဆီရရှိအောင်တော့ ပေးထားတယ်။ တချို့ကျတော့ ဆီဆိုင်က မန်နေဂျာက နားမလည်တာ လည်း ပါတယ်။ ဆီ မပြတ်အောင်တော့ စီစဉ်ပေးထားတယ်၊ ဒါပေမယ့် အဲဒီက မန်နေဂျာက မသိဘူး။ မသိတော့ ဆီပြတ်မလို ဖြစ်တာပေါ့။ ဆရာက ဒီလူကို ရောင်းပေးလိုက်ပါဆိုရင် အဲဒါ ဆရာ ဆီနည်းနေပြီဖြစ်တယ် ဆိုလို တာကလေ။ အဲဒါမျိုးတွေတော့ ရှိတာပေါ့” ဟု ပြောသည်။

စက်သုံးဆီ ဝယ်ယူရ အဆင်မပြေမှု ဖြစ်ပွားပြီးနောက်တွင် စက်သုံးဆီ ဈေးနှုန်းများလည်း အနည်းငယ် မြင့်တက် လာကြောင်း၊ ဧပြီလ ၃ ရက်နေ့တွင် အောက်တိန်း ၉၂ တစ်လီတာလျှင် ၂၁၀၅ ကျပ် ရှိရာမှ ဧပြီလ ၄ ရက်နေ့တွင် ၂၂၅၀ ကျပ်သို့ မြင့်တက်လာသည်ကို တွေ့ရှိရသည်။

ရန်ကုန်မြို့တွင်းက စက်သုံးဆီဆိုင် တစ်ဆိုင်ကိုတွေ့ရစဉ်

အလားတူ ပရီမီယံဒီဇယ် ဈေးနှုန်းသည်လည်း အနည်းငယ် မြင့်တက်သွားသည်ကို တွေ့ရသည်။

ထို့အပြင် တချို့သော စက်သုံးဆီဆိုင်များတွင် စက်သုံးဆီ အမျိုးအစား စုံလင်စွာ မရှိခြင်းနှင့် ဆီပြတ်လပ်မှုများ ဖြစ်ပေါ်နေသည်ဟုလည်း မော်တော်ယာဉ် မောင်းနှင်သူများထံမှ သိရသည်။

ယခုရက်ပိုင်းအတွင်း လျှပ်စစ်မီး ရရှိချိန်သည် ယခင်ကထက် လျော့နည်းသွားပြီ ဖြစ်သည့်အတွက် လုပ်ငန်းများ လုပ်ကိုင်ရာတွင် မီးစက်များဖြင့် ပိုမိုလုပ်ဆောင်ကြရမည်ဖြစ်၍ စက်သုံးဆီ လိုအပ်ချက်မှာ ယခင်ကထက် များလာ မည်ဖြစ်သည်ဟု လုပ်ငန်းရှင်များက ပြောသည်။

လက်ရှိတွင် ကမ္ဘာ့ရေနံ ထုတ်လုပ်မှုသည် လျော့နည်းလာသည့်အတွက် ရေနံဈေးနှုန်းများ မြင့်တက် လာနေ ကြောင်း၊ ထို့ကြောင့် ပြည်တွင်း စက်သုံးဆီ ဈေးနှုန်းများ ယခုထက် မြင့်တက်မည်ကို လုပ်ငန်းရှင်များက စိုးရိမ် နေကြသည်။

CNI News
၂၀၂၃ ခုနှစ်၊ ဧပြီ ၃

နှစ်နိုင်ငံနယ်စပ်ဒေသ တည်ငြိမ်အေးချမ်းရေးဆိုင်ရာကိစ္စရပ်များအပေါ် တရုတ်နိုင်ငံ၊ ယူနန်ပြည်နယ် ပါတီ ကော်မတီ အတွင်းရေးမှူး H.E.Mr. Wang Ning နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ဧပြီ ၃ ရက် နေ့က တွေ့ဆုံ၍ ဆွေးနွေးကြသည်။

ထိုသို့ တွေ့ဆုံရာတွင် နှစ်နိုင်ငံ နယ်စပ်ဒေသ တည်ငြိမ်အေးချမ်းရေးဆိုင်ရာ ကိစ္စရပ်များ၊ မြန်မာနိုင်ငံနှင့် ယူနန် ပြည်နယ်အကြား နှစ်ဖက် ဖွံ့ဖြိုးတိုးတက်စေရေး ပူးပေါင်းဆောင်ရွက်သွားမည့်ကိစ္စရပ်များ၊ မြန်မာနိုင်ငံ၏ လျှပ်စစ်ကဏ္ဍ၊ လယ်ယာစိုက်ပျိုးရေးကဏ္ဍ၊ မွေးမြူရေးကဏ္ဍနှင့် စက်မှုကဏ္ဍများ ဖွံ့ဖြိုးတိုးတက်ရေးနှင့် နယ်စပ် ကုန်သွယ်မှုလုပ်ငန်းများ စသည့် ကိစ္စရပ်များကို ဆွေးနွေးခဲ့ကြောင်း သိရသည်။

ထို့နောက် ခရီးသွားလုပ်ငန်းများ ဖွံ့ဖြိုးတိုးတက်စေရေး ပူးပေါင်းဆောင်ရွက်သွားမည့် ကိစ္စရပ်များ၊ နှစ်နိုင်ငံ ယဉ် ကျေးမှု ဖလှယ်ခြင်းနှင့် ကျန်းမာရေးစောင့်ရှောက်မှု လုပ်ငန်းများတွင် ပူးပေါင်းဆောင်ရွက်ရေး၊ မြန်မာနိုင်ငံနှင့် ယူနန်ပြည်နယ်အကြား တိုက်ရိုက်လေကြောင်း ပြေးဆွဲရေးဆိုင်ရာကိစ္စရပ်များကိုလည်း ဆွေးနွေးခဲ့ကြောင်း နစက ဘက်က ထုတ်ပြန်သွားသည်။

 ၂၀၂၃ ခုနှစ်၊ ဧပြီ ၃ ရက်နေ့က ယူနန်ပြည်နယ် ပါတီ ကော်မတီ အတွင်းရေးမှူး H.E.Mr. Wang Ning နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ်

မြန်မာ-တရုတ်သည် နယ်နိမိတ် ထိစပ်မှု မိုင်ပေါင်း ၁၃၀၀ ကျော်ရှိပြီး နယ်စပ်ကုန်သွယ်ဂိတ်ပေါက် အနေဖြင့် ချင်းရွှေဟော်ဂိတ်၊ လွယ်ဂျယ်ဂိတ်၊ မူဆယ်ဂိတ်၊ ကန်ပိုက်တည်ဂိတ်၊ ပန်းဆိုင်(ကြူကုတ်)ဂိတ် တို့ရှိသည်။

လက်နက်ကိုင် အဖွဲ့များအနေဖြင့် ကချင်လွတ်လပ်ရေးတပ်မတော်(KIA)၊ “ဝ”ပြည်သွေးစည်းညီညွတ်ရေး တပ်မတော်(UWSA)၊ ဒီမိုကရက်တစ် မဟာမိတ်တပ်မတော်(NDAA-မိုင်းလား)၊ တအာင်း အမျိုးသား လွတ် မြောက်ရေးတပ်မတော်(TNLA)၊ မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA) တို့လှုပ်ရှား လျက်ရှိသည်။

CNI News

၂၀၂၃ ခုနှစ်၊ ဧပြီ ၃

လာမည့် သင်္ကြန်ကာလ အလွန်တွင် အပြန်အလှန် ထိုးစစ်များဖြင့် တစ်နိုင်ငံလုံးအနှံ့ တိုက်ပွဲများ ပြင်းထန်လာနိုင် ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ယခုနှစ် ၂၀၂၃ ခုနှစ်အတွင်း တန်ပြန် ထိုးစစ်ဆင်မည်ဟု အမျိုးသားညီညွတ်ရေးအစိုးရ (NUG) မှ ပြောကြားထား ကြောင်း ၎င်းက ပြောသည်။

ဦးသန်းစိုးနိုင်က “အခုက NUG ကာကွယ်ရေးဌာန ကနေပြီးတော့ ဒီ ၂၀၂၃ ထဲမှာ တန်ပြန် ထိုးစစ်တွေ ဆင်မယ်၊ စစ်ရေး ချိန်ခွင်လျှာ ပြောင်းလဲအောင် လုပ်မယ်ဆိုတဲ့ ကြေညာချက်တွေ ထုတ်ပြန်ထားပါတယ်။ တပ်မတော်နေ့ အခမ်းအနားမှာလည်း ကာကွယ်ရေးဦးစီးချုပ် ကနေပြီးတော့ NUG ဦးဆောင်တဲ့ PDF တွေ နှိမ်နင်းမယ်၊ အဲဒါတွေ မကဘူး။ NUG နဲ့ ပူးပေါင်းဆောင်ရွက်နေတဲ့ ERO အဖွဲ့တွေကိုလည်း နှိမ်နင်းတိုက်ခိုက်မယ်လို့ ပြောတဲ့အခါမှာ အဲဒီအထဲမှာ KIA, KNU, နောက်ပြီးတော့ ကရင်နီတပ်ဖွဲ့တွေလည်း ပါဝင်နေတဲ့ အခါကြတော့ တိုက်ပွဲက မလွှဲ မသွေ ကျနော်တို့ သင်္ကြန်အလွန် ကာလလောက်က စပြီးတော့ ပြန်လှန်ထိုးစစ်တွေ၊ ထိုးစစ်တွေ တစ်ပြည်လုံး အနှံ့ အပြားမှာ ဖြစ်ပွားလာစရာ အကြောင်းရှိပါတယ်” ဟု CNI သတင်းဌာနသို့ ပြောသည်။

ပြီးခဲ့သည့် တပ်မတော်နေ့ အခမ်းအနားမှာ NUG၊ PDF နှင့် ပူးပေါင်းနေသည့် တိုင်းရင်းသားလက်နက်ကိုင်များကို ပြတ်ပြတ်သားသား အရေးယူ ဆောင်ရွက်သွားမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောကြားခဲ့ ခြင်းကြောင့် အဆိုပါကိစ္စကို အာရုံစိုက် ဆောင်ရွက်သွားမည်ဟု ယူဆကြောင်း မြန်မာ့နိုင်ငံရေးလေ့လာသုံးသပ်သူ ဦးရဲထွန်း CNI သတင်းဌာနသို့ ပြောသည်။

စစ်ကိုင်းတိုင်းဒေသကြီး၊ ကလေးမြို့မှာ PDF ကိုတွေ့ရစဉ်(Kalay PDF)

ဦးရဲထွန်းက “အခုကတော့ တပ်မတော်နေ့မှာ နစကဥက္ကဋ္ဌက ပြောသွားတာကတော့ NUG၊ PDF တွေနဲ့ သူ့ကို ထောက်ခံနေကြတဲ့ တိုင်းရင်းသား လက်နက်ကိုင် အဖွဲ့အစည်းတွေကို အပြတ်ချေမှုန်း မယ်ဆိုပြီး သူကြုံးဝါးသွား တာကတော့ တွေ့လိုက်တယ်၊ အဲဒီတော့ သူကတော့ အဲဒီနေရာတွေကို သူအာရုံစိုက်ပြီး လုပ်မယ့်သဘော တွေ့ရ ပါတယ်” ဟု ပြောသည်။

ယခု ၂၀၂၃ ခုနှစ်ကို နွေဦးတော်လှန်ရေး၏ အဆုံးအဖြတ်နှစ် ဖြစ်ကြောင်း NUG မှ ယာယီသမ္မတ ဒူဝါလရှီးလက ပြောကြားထားသည်။

နှစ်ဖက်တိုက်ပွဲများ ပိုမိုပြင်းထန်လာနိုင်မည်ဟု မမြင်မိကြောင်း၊ မြန်မာ့တပ်မတော်မှ နယ်မြေရှင်းလင်းရေး လုပ်ဆောင်သည့် အပေါ်တွင် မူတည်မည်ဖြစ်ကြောင်း သေနင်္ဂမဟာဗျူဟာလေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

ဦးသိန်းထွန်းဦးက “အဲဒါက ပြင်းထန်တယ်ဆိုတဲ့ အပိုင်းတော့ ကျနော်မမြင်ဘူး။ ဒါပေမဲ့ တစ်ခုတော့ ရှိတယ်၊ ဘယ်လိုဖြစ်သွားမလဲဆိုတော့ သာမန်အားဖြင့် လူတွေ နားလည်သလို ရှင်းပြရမယ်ဆိုရင် တိုက်ပွဲပြင်းထန်တယ် ဆိုတာ ကြီးကြီးမားမား ဟိုဖက်မှာ တိုက်တယ်၊ ဒီလို တိုက်တယ်ဆိုတာ အဲဒါမျိုး ဖြစ်ဖို့က သိပ်မလွယ်ပါဘူး။ တစ်ခု တော့ ရှိတာပေါ့လေ၊ တပ်မတော်ဖက်က နယ်မြေရှင်းလင်းရေးနဲ့ ပတ်သက်လို့ ဥပမာ နယ်မြေတည်ငြိမ်အောင် သူတို့ စစ်ဆင်ရေးတွေ ဝင်တဲ့အခါမှာ ဘယ်လောက် အတိုင်းအတာထိ ဝင်လည်းဆိုတာလည်း မူတည်သေးတယ်၊ ထိတွေ့မှု အကြီးကြီးနဲ့ heavy မျိုးတော့ ကျနော်တို့ မျှော်လင့်လို့ မရဘူး၊ ဒါပေမဲ့ တစ်ခုတော့ ရှိတယ်၊ အထူးသဖြင့် PDF ဖက်ကနေပြီးတော့ ပြည်သူလူထု အများစုရှိတဲ့ နေရာတွေကို စိမ့်ဝင်လာပြီးတော့ အဖျက်အမှောင့် လုပ်ငန်း တွေ လုပ်တာတို့ ဥပမာ မိုင်းခွဲတာတို့ လူတွေသတ်တာတို့ ဒါမျိုးတော့ ဖြစ်လာနိုင်ဖို့တော့ ရှိတယ်၊ ခုနပြောသလို တိုက်ပွဲပြင်းထန် လာနိုင်တယ်ဆိုတဲ့ အနေအထားက ပြောရခက်ပါတယ်။ တစ်ခု စဉ်းစားစရာရှိတာက တချို့ EAO တွေပေါ့ သဘောထားတင်းမာတဲ့ EAO တွေက PDF နဲ့ ပူးပေါင်းပြီး တိုက်ပွဲဖော်တာမျိုး ရှိကောင်းရှိလိမ့်မယ်၊ ဒီ လောက်ပဲ မျှော်လင့်လို့ ရပါမယ်” ဟု ပြောသည်။

ကရင်အမျိုးသားလွတ်မြောက်ရေးတပ်မတော်(KNLA)ကို တွေ့ရစဉ် (KNU-fb) 

လက်ရှိတွင် မြန်မာ့တပ်မတော်နှင့် တိုင်းရင်းသား လက်နက်ကိုင် အဖွဲ့အစည်းအချို့၊ ဒေသကာကွယ်ရေးတပ် (PDF) ပူးပေါင်းတပ်တို့အကြား ကရင်ပြည်နယ်၊ ကယား (ကရင်နီ) ပြည်နယ်၊ ချင်းပြည်နယ်၊ စစ်ကိုင်းတိုင်း ဒေသကြီးနှင့် မကွေးတိုင်းဒေသကြီးတို့တွင် တိုက်ပွဲများ ဖြစ်ပွားလျက်ရှိသည်။

တခြားတစ်ဖက်မှာတော့ တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ထိုးထားသည့် RCSS/SSA(ရှမ်း)၊ PNLO(ပအိုဝ်း)၊ NMSP(မွန်)၊ ALP(ရခိုင်)၊ DKBA(ကရင်)၊ KNU/KNLA-PC(ကရင်)၊ LDU(လားဟူ) အပါအဝင် NCA မထိုးရသေးသည့် UWSA(ဝ)၊ SSPP(ရှမ်း)၊ NDAA(မိုင်းလား)တို့နှင့် နစကကြား ငြိမ်းချမ်းရေး ဆွေးနွေးလျက်ရှိသည်။

CNI News

၂၀၂၃ ခုနှစ်၊ ဧပြီ ၁

ပြည်ထောင်စုရွေးကောက်ပွဲကော်မရှင် (UEC)၏ ဥပဒေများမှာ လိုသလို အဓိပ္ပာယ်ဖွင့်ဆို၍ ရသည့် အပိုင်းတွင် ရှိနေကြောင်း လီဆူအမျိုးသားဖွံ့ဖြိုးတိုးတက်ရေးပါတီ(ဒူးလေးပါတီ)မှ နာယက ဦးရွှေမင်းက CNI သတင်းဌာနသို့ ပြောသည်။

ထို့နောက် ဖျက်သိမ်းလိုက်သည့် နိုင်ငံရေးပါတီများကို ယင်းနာမည်ဖြင့် ပြန်မှတ်ပုံတင်ရန် ခက်ခဲလိမ့်မည်ဟု မြင်မိ ကြောင်း ၎င်းက ပြောသည်။

ဦးရွှေမင်းက “သူ့ရဲ့ ရွေးကောက်ပွဲ ကော်မရှင်ဥပဒေကလည်း အဓိပ္ပာယ် လိုသလိုများ ဖွင့်ဆိုလို့ရတဲ့ အပိုင်းကဏ္ဍ မှာရှိတယ်၊ အဲဒီတော့ ဥပဒေပညာရှင်တွေက ဘယ်လိုများ ဖွင့်ဆိုမလဲပေါ့ဗျာ၊ ကျနော်တို့ အနေနဲ့ မြင်တာကတော့ နိုင်ငံရေးသမားတွေ အနေနဲ့ မြင်တာကတော့ ဖျက်သိမ်းလိုက်ပြီဆိုတဲ့ နာမည်ကတော့ ပြန်တင်ဖို့ကတော့ ခက် လိမ့်မယ်လို့ မြင်ပါတယ်။ ဒါပေမဲ့ ဒါအတွက်ကလည်း သိပ်ပြီး ကိစ္စမရှိဘူးလို့လည်း မြင်ပါတယ်။ ဘာကြောင့်လဲဆို တော့ အရင်တုန်းကလည်း (အမျိုးသား)ဒီမိုကရေစီအဖွဲ့ချုပ် NLD က သူ့ရဲ့ အမှတ်တံဆိပ်က ခမောက်ဖြစ်တာကိုး ဒါပေမဲ့ နောက်ပိုင်း ရွေးကောက်ပွဲဝင်ဖို့ မှတ်ပုံတင်ကြတဲ့အခါမှာ အချို့သော NLD တွေ မှတ်ပုံတင်တဲ့အခါ ခမောက်သင်္ကေတကို အသုံးပြုသွားတဲ့အတွက် နောက်ပိုင်းကြတော့ ခွတ်ဒေါင်းဖြစ်သွားတယ်၊ ထိုနည်းလည်း ကောင်းပဲ အခု NLD အနေနဲ့ ပြန်ပြီး မှတ်ပုံတင်မယ်ဆိုရင်လည်း အမည်နာမ တစ်ခုနဲ့ တင်သွားနိုင်တယ်လို့ ကျနော် ဒီအတိုင်းလေး မြင်တယ်ခင်ဗျ” ဟု ပြောသည်။

နိုင်ငံရေးပါတီများမှတ်ပုံတင် ဉပဒေကို UEC ဥက္ကဋ္ဌ ဦးသိန်းစိုး လက်မှတ်ထိုး ထုတ်ပြန်နေစဉ် 

အမျိုးသားဒီမိုကရေစီအဖွဲ့ချုပ် (NLD)နှင့် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) အပါအဝင် နိုင်ငံရေးပါတီ ၄၀ ကို ဖျက်သိမ်းကြောင်း ပြည်ထောင်စုရွေးကောက်ပွဲကော်မရှင်(UEC)က မတ်လ ၂၈ ရက်မှာ ထုတ်ပြန်ခဲ့သည်။

ထို့အတူ နိုင်ငံ‌ရေးပါတီတစ်ရပ် တည်ထောင် လိုသူများအနေဖြင့် ပါတီတည်ထောင်ခွင့်ကို နိုင်ငံရေးပါတီများ မှတ်ပုံတင်ခြင်း ဥပဒေပုဒ်မ ၃ အရ ဆက်လက် လျှောက်ထားနိုင်ကြောင်း ထုတ်ပြန်ချက်တွင် ဖော်ပြခဲ့သည်။

ဖက်ဒရယ်ဒီမိုကရက်တစ်ပါတီမှ ဒေါ်ချိုချိုကျော်ငြိမ်းက “UEC ကတော့ သူ့အလုပ် သူလုပ်နေတာပဲ အန်တီ ပြောပြ မယ်နော်၊ အန်တီ သဘောပြောတာလေ၊ UEC က သူ့သဘော သူလုပ်နေတာ ဒီ UEC ရဲ့ အထက်မှာ ဘယ်သူရှိလဲ ပေါ့၊ ဟုတ်ဘူးလား၊ UEC က မင်းသားပေါ့၊ သူက ဒါရိုက်တာ ခိုင်းသလို သူက လုပ်နေရတာပဲလေ ဟုတ်ဘူးလား။ အန်တီတို့ကလည်း ဘာပဲပြောပြော အလိုက်သင့် လိုက်လုပ်နေရတဲ့ သဘောရှိပါတယ်၊ အဲဒါကြောင့်မို့ ဘယ်ဟာကို ကောင်းတယ်၊ ဘယ်ဟာကို မကောင်းမှန်း မှတ်ချက်မပေးပါဘူး” ဟု CNI သတင်းဌာနသို့ ပြောသည်။

နိုင်ငံရေးပါတီများနဲ့ UEC တွေ့ဆုံစဉ်

UEC ထုတ်ပြန်ခဲ့သည့် နိုင်ငံရေးပါတီများ မှတ်ပုံတင်ခြင်း ဥပဒေ၊ နည်းဥပဒေမှာ နိုင်ငံရေးပါတီများအတွက် အခက်အခဲများ ဖြစ်စေကြောင်း နိုင်ငံရေးသမားများက ပြောသည်။

ယခု ၂၀၂၃ ခုနှစ်အတွင်း အထွေထွေရွေးကောက်ပွဲ ကျင်းပပေးမည် ဖြစ်ကြောင်းနှင့် အနိုင်ရသည့် နိုင်ငံရေးပါတီအား နိုင်ငံတော်အာဏာ လွှဲအပ်မည်ဖြစ်ကြောင်း နစကဥက္ကဋ္ဌက ပြောကြားထားသည်။

CNI News

၂၀၂၃ ခုနှစ်၊ မတ်လ ၃၁ 

စစ်ကိုင်းတိုင်းဒေသကြီး အထက်ပိုင်း ဗန်းမောက်မြို့နယ်၊ မန်ကျည်းကုန်းကျေးရွာ ရှမ်းနီစာပေယဉ်ကျေးမှုအဖွဲ့မှာ လူငယ်တစ်ဦးကို ကချင်လွတ်လပ်ရေးတပ်မတော် (KIA)၊ ဒေသကာကွယ်ရေးတပ် (PDF) တို့မှ ဖမ်းဆီးပြီး နမူနာ ဟုဆိုကာ ဓါတ်ဆီလောင်း မီးရှို့သတ်ဖြတ်လိုက်ကြောင်း ဒေသခံများက ပြောသည်။

မတ်လ ၂၉ ရက် ည ၁၀ နာရီဝန်းကျင်ခန့်က မန်ကျည်းကုန်းကျေးရွာမှ လူငယ် ၅ ဦးကို မင်းကုန်းသို့ ဖမ်းဆီးသွား ပြီး ယခင် အုပ်ချုပ်ရေးမှူးရုံး ယခု KIA၊ PDF ဆေးခန်းအဖြစ် အသုံးပြုနေသည့်ရှေ့တွင် ယနေ့ (မတ်လ ၃၁ ရက်) မွန်းလွဲ ၁ နာရီခန့်က အများပြည်သူရှေ့မှာ သတ်ဖြတ်လိုက်ခြင်း ဖြစ်ကြောင်း သိရသည်။

ဒေသခံတစ်ဦးက “လူငယ် ၅ ဦးကို ဖမ်းသွားတာ၊ ယောင်္ကျားလေး ၃ ဦးနဲ့ မိန်းကလေး ၂ ဦး ဖမ်းသွားတာ၊ ယောင်္ကျားလေး ၁ ဦးကို နမူနာအနေနဲ့ မင်းကုန်း အုပ်ချုပ်ရေးမှူးရုံးရှေ့မှာ ဓါတ်ဆီလောင်း မီးရှို့သတ်လိုက်တာ” ဟု ပြောသည်။

ထို့အတူ KIA၊ PDF မှ ဖမ်းဆီးသွားသည့် လူငယ် ၅ ဦးအနက် မိန်းကလေး ၂ ဦးကို ပြန်လွှတ်ပေးခဲ့ကြောင်း စုံစမ်း သိရှိရသည်။

အဆိုပါ ရှမ်းနီစာယဉ် လူငယ်တစ်ဦးကို အရှင်လတ်လတ် မီးရှို့သတ်ဖြတ်မှုနှင့် ပတ်သက်၍ အကြောင်းစုံ သိရှိနိုင် ရေး KIA၊ PDF ထံ CNI က ဆက်သွယ်နေဆဲ ဖြစ်သည်။

KIA၊ PDF တို့မှ မန်ကျည်းကုန်း ကျေးရွာနှင့် မင်းကုန်းကျေးရွာတွင် စခန်းချ နေထိုင်ပြီး မန်ကျည်းကုန်းရွာသားများ ကို ဘုန်းကြီးကျောင်းအတွင်း နေရာချထားကြောင်း၊ ၎င်းတို့ ထိခိုက်နစ်နာမှုအတွက် ကြွက်မနိုင် ကျီမီးရှို့သည့် လုပ်ရပ်ဖြစ်ကြောင်း ဒေသခံ ဆေကောင်းဖက CNI သတင်းဌာနသို့ ပြောသည်။

၎င်းက “ပြောရမယ်ဆိုရင် SNA အဖွဲ့နဲ့လည်း ဘာမှ မပတ်သက်ဘူး။ စာပေယဉ်ကျေးမှုကိုပဲ လုပ်ကြတဲ့ လူငယ်တွေ ဖြစ်တယ်၊ သူတို့ (KIA၊ PDF) အနေနဲ့ တချို့အပိုင်းတွေမှာ ထိခိုက်နစ်နာတာတွေ SNA နဲ့ ဖြစ်တဲ့တိုက်ပွဲတွေမှာ ထိခိုက် နစ်နာတာတွေ ရှိတဲ့ အခါကြတော့ အဲဒါက ကျနော်ထင်တယ် ကြွက်မနိုင် ကျီမီးရှို့တာလို့ပဲ ကျနော်တော့ ယူဆတယ်” ဟု ပြောသည်။

ပြီးခဲ့သည့် ၂၀၂၂ ခုနှစ်၊ စက်တင်ဘာလ အတွင်းကလည်း မန်စီ(ဗန်းမောက်မြို့နယ်)တွင် KIA၊ PDF မှ စစ်ရှုံးသည့် အချိန် နောင်ပတ် ဆရာတော်ကို ဖမ်းဆီးသတ်ဖြတ်မှု ဖြစ်စဉ်များလည်း ရှိခဲ့ကြောင်း ၎င်းက ပြောသည်။

၂၀၂၂ ခုနှစ်၊ ဇွန်လ ၁၉ ရက်က ဗန်းမောက်မြို့နယ် မံကပ်ကျေးရွာ ဘုန်းတော်ကြီးကျောင်းတွင် ရှမ်းနီစာပေ သင်ကြားရေးနှင့်ပတ်သက်၍ ရောက်ရှိစဉ် စိုင်းကျန်အောင်(ခ)စိုင်းဆေလိုင်းအား KIA၊ PDF က ဖမ်းဆီးသွားခဲ့ သည်။

ထို့နောက် ဇွန်လ ၂၃ ရက်တွင် ပြန်လွှတ်လာခဲ့သည်။

လက်ရှိတွင် ဗန်းမောက်မြို့နယ်အတွင်းမှာ KIA-PDF ပူးပေါင်းတပ်ဖွဲ့နှင့် မြန်မာ့တပ်မတော်ကြား တိုက်ပွဲများ ဖြစ် ပွားလျက်ရှိနေသည်။

CNI News

၂၀၂၃ ခုနှစ်၊ မတ်လ ၃၁

မိမိတို့သည် အားလုံးပါဝင်ရေးမူကို ကိုင်စွဲသလို စုပေါင်းခေါင်းဆောင်မှု စံနှုန်းကိုလည်း အခြေပြုထားသော်လည်း လက်တွေ့ကျကျ မလုပ်နိုင်သည်များ ရှိနေကြောင်း အမျိုးသားညီညွတ်ရေးအစိုးရ(NUG)၏ ယာယီသမ္မတ ဒူဝါလရှီးလက ပြောသည်။

၂၀၂၃ ခုနှစ်၊ မတ်လ ၃၁ ရက်နေ့က ကျင်းပသည့် ဖက်ဒရယ် ဒီမိုကရေစီ ပဋိညာဉ် (၂)နှစ်ပြည့် အခမ်းအနားမှာ မိန့်ခွန်းပြောစဉ် ၎င်းက အထက်ပါ အတိုင်း ပြောကြားခဲ့ခြင်း ဖြစ်သည်။

ဒူဝါလရှီးလက “ ကျနော်တို့ဟာ အားလုံးပါဝင်ရေးမူကို ကိုင်စွဲသလို၊ စုပေါင်းခေါင်းဆောင်မှု စံနှုန်းကိုလည်း အခြေပြုထားပါတယ်။ ဒီနေရာမှာ လက်တွေ့ကျကျ မလုပ်နိုင်တာတွေနဲ့ အကန့်အသတ်တွေ ရှိနေတယ်ဆို တာလည်း သတိချပ်ဖို့ လိုပါတယ်။ ဒါပေမယ့် ဘယ်လိုပဲ အကန့်အသတ်တွေ ရှိနေပါစေ အမျိုးသားညီညွတ်ရေး အတိုင်ပင်ခံကောင်စီရဲ့ စုဖွဲ့မှုနဲ့ ဖက်ဒရယ်ဒီမိုကရေစီပဋိညာဉ်ကို စနစ်တကျ ဆွေးနွေးအတည်ပြု ပြဋ္ဌာန်းနိုင် ခြင်းဟာ အောင်မြင်မှု တစ်ရပ်ဖြစ်တယ်လို့ ပြောနိုင်ပါတယ်”ဟု ပြောသည်။

ထို့နောက် နွေဦးတော်လှန်ရေးသည် လူထု၏ လွတ်လပ်ခွင့်နှင့် အကျိုးစီးပွားကို အခြေခံ၍ ပေါ်ထွက်လာသည့် လူထုတော်လှန်ရေးကြီးဖြစ်ကြောင်း၊ အုပ်စု အကျိုးစီးပွားများနှင့် ဖြစ်ပေါ်လာသည့် တော်လှန်ရေးမဟုတ်ဘူးဆို သည်ကို ပြတ်ပြတ်သားသား နားလည်ထားကြရန် လိုပါကြောင်း ၎င်းက ပြောသည်။

NUCC ကိုတွေ့ရစဉ်

ဒူဝါလရှီးလက “ အုပ်စုအသီးသီးရဲ့ အကျိုးစီးပွားအတွက် မဟုတ်ဘဲ လူထုရဲ့ လွတ်လပ်ခွင့်အတွက်သာ ကျနော်တို့ဟာ တိုက်ပွဲဝင်နေခြင်း ဖြစ်ပါတယ်။ လူထုရဲ့ အကျိုးစီးပွားအတွက်သာ တော်လှန်နေခြင်း ဖြစ်ပါ တယ်။ ဒါကြောင့်လည်း အင်မတန် ကျယ်ပြန့်သော / အင်မတန် အင်အားကြီးသော လူထုလှုပ်ရှားမှုပုံစံကို အလျင်အမြန် ရောက်ရှိလာခြင်း ဖြစ်ပါတယ်”ဟု ပြောသည်။

နွေဦးတော်လှန်ရေး လူထုလှုပ်ရှားမှုကြီးကို ဦးဆောင်ရာမှာ မိမိတို့ အားလုံးသည် ဖက်ဒရယ်ဒီမိုကရေစီ ပဋိညာဉ်ပါ အခြေခံမူများကို ဗဟိုပြုပြီး ခေါင်းဆောင်မှု ပြုကြပါဟု အထူး တိုက်တွန်းလိုပါကြောင်း NUG ၏ ယာယီသမ္မတက ပြောသည်။

အမျိုးသားဒီမိုကရေစီအဖွဲ့ချုပ်(NLD) အစိုးရသည် ၂၀၂၀ အထွေထွေရွေးကောက်ပွဲတွင် မဲစာရင်း အငြင်းပွားမှု ကို မဖြေ ရှင်းဘဲ အစိုးရဖွဲ့စည်းရေး ကြိုးပမ်းခြင်းကြောင့် ၂၀၂၁ ခုနှစ်၊ ဖေဖော်ဝါရီ ၁ ရက်၌ မြန်မာ့တပ်မတော် က ဖြုတ်ချ၍ နိုင်ငံတော်ကို အရေးပေါ် အခြေအနေ ကြေညာခဲ့သည်။

ထို့နောက် လူထု ဆန္ဒပြမှုများ ပေါ်ပေါက်လာကာ နွေဦးတော်လှန်ရေး လက်နက်ကိုင် ပဋိပက္ခများလည်း ပေါ် ပေါက်လာခဲ့သည်။

CNI News

၂၀၂၃ ခုနှစ်၊ မတ်လ ၃၁

ရှမ်းပြည်နယ်တောင်ပိုင်း မောက်မယ်မြို့နယ် ကဒူးကြီးဒေသတွင် အပစ်ရပ် လက်မှတ်ရေးထိုးထားသည့် သျှမ်းပြည်ပြန်လည်ထူထောင်ရေးကောင်စီ (RCSS) နှင့် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) တို့ ထိတွေ့ ပစ်ခတ်မှု ဖြစ်ပွားခဲ့ကြောင်း RCSS မှ ပြောရေးဆိုခွင့်ရှိသူ ဗိုလ်မှူး စိုင်းခမ်းစံက CNI သတင်းဌာနသို့ ပြောသည်။

RCSS စခန်းချထားသည့် နေရာသို့ PNLO တပ်ဖွဲ့ဝင်များ လာရောက် ပစ်ခတ်ခြင်းဖြစ်ကြောင်း၊ ထို့နောက် PNLO တပ်ဖွဲ့များ ပြန်လည် ဆုတ်ခွာသွားကြောင်း ၎င်းက ပြောသည်။

ဗိုလ်မှူးစိုင်းခမ်းစံက “တိုက်ပွဲတော့ မဖြစ်ဘူးခင်ဗျ၊ PNLO က သူတို့က ကျနော်တို့ ဒီ RCSS စခန်းချတဲ့ နေရာကို သူတို့ လာချောင်း ပစ်တယ်ခင်ဗျ၊ ချောင်းပစ်ပြီးတော့မှ သူတို့ နောက်ပြန် ဆုတ်သွားတယ်၊ ဒါပေမဲ့ ကျနော်တို့က တုန့်ပြန်မှု မလုပ်ဘူးပေါ့နော်၊ တုန့်ပြန်ပစ်ခတ်မှု မလုပ်ဘူးခင်ဗျ၊ တိုက်ပွဲတော့ မဖြစ်ဘူးပေါ့နော်၊ မနေ့က နေ့လယ် လောက်မှာပါ ခင်ဗျ၊ အချိန်အတိ၊ နေရာ အတိအကျတော့ ကျနော်လည်း မြေပုံမကြည့်ရသေးဘူးခင်ဗျ” ဟု CNI သတင်းဌာနသို့ ပြောသည်။

အဆိုပါ ထိတွေ့ပစ်ခတ်မှုနှင့် ပတ်သက်၍ PNLO မှ တာဝန်ရှိ ပုဂ္ဂိုလ်များထံ CNI က ဖုန်းဆက်သွယ်ခဲ့သော်လည်း ဖုန်းလက်ခံ ဖြေကြားခြင်း မရှိပေ။

PNLO မှ ကိုယ်စားလှယ်အဖွဲ့ နစကနဲ့ ငြိမ်းချမ်းရေးဆွေးနွေးဖို့ နေပြည်တော်ရောက်ခဲ့စဉ်

ကဒူးကြီးဒေသတွင် PNLO ကို အခြေစိုက်ခွင့် ဦးသိန်းစိန်အစိုးရက ပေးခဲ့ပြီးနောက် RCSS နှင့် PNLO တို့ ထိတွေ့ တိုက်ပွဲများ ဖြစ်ပွားခဲ့ကြောင်း နိုင်ငံရေး သုံးသပ်သူများက ပြောသည်။

PNLO အနေဖြင့် အောက်ခြေတပ်သားများကို ထိန်းသိမ်းရန်နှင့် စစ်ရေးဖြင့် မဖြေရှင်းရန်၊ ပုံမှန်ဆက်သွယ်ရေး လမ်းကြောင်းမှတဆင့် မေးမြန်းဖြေရှင်း သွားမည်ဖြစ်ကြောင်း ဗိုလ်မှူး စိုင်းခမ်းစံက ပြောသည်။

၎င်းက “ကျနော်တို့မှာ ပုံမှန်ဆက်သွယ်ရေး လမ်းကြောင်း ရှိတယ်ခင်ဗျ၊ ကျနော်တို့ ပြန်မေးမှာပေါ့နော်၊ သူတို့ဆီကို ပြန်မေးမယ် ပစ်ရတဲ့ အကြောင်းအရင်းကို ပြန်မေးမယ်၊ ဖြေရှင်းမှာပေါ့၊ တခြားမှတ်ချက်တော့ မရှိဘူးခင်ဗျ၊ ဘာဖြစ်လို့လဲဆိုတော့ တိုက်ပွဲကြီးကြီးလည်း မဟုတ်ဘူး၊ တိုက်ပွဲလည်း မဟုတ်ဘူးဆိုတော့ ပစ်ခတ်ရတဲ့ အကြောင်းအရင်းကို ပြန်မေးမြန်းမယ်၊ ပုံမှန်ဆက်သွယ်ရေး လမ်းကြောင်းလည်း ရှိတယ်၊ ဒါကြောင့် ကျနော်တို့ မေးမြန်းပြီးတော့ ဖြေရှင်းသွားမှာပေါ့နော်၊ အောက်ခြေဖက်ကို ထိန်းသိမ်းဖို့ နောက်စစ်ရေးနဲ့ မဖြေရှင်းဖို့ပေါ့” ဟု CNI သတင်းဌာနသို့ ပြောသည်။

PNLO နဲ့ RCSS ကိုယ်စားလှယ်များ ပါသည့် အပစ်ရပ် ၇ ဖွဲ့ကိုယ်စားလှယ်အဖွဲ့ကိုတွေ့ရစဉ်

ပြီးခဲ့သည့် ၂၀၂၂ ခုနှစ်၊ ဖေဖော်ဝါရီလ အတွင်းကလည်း မောက်မယ်မြို့နယ်၊ ကဒူးကြီးဒေသတွင် RCSS နှင့် PNLO တိုက်ပွဲဖြစ်ပွားခဲ့ရာ ထိခိုက်ဒဏ်ရာ ရရှိမှုများ ရှိခဲ့သည်။

PNLO နှင့် RCSS တို့သည့် တစ်နိုင်ငံလုံး အပစ်အခတ်တိုက်ခိုက်မှု ရပ်စဲရေးသဘောတူစာချုပ် (NCA) လက်မှတ် ရေးထိုးထားသည့် တိုင်းရင်းသား လက်နက်ကိုင်များ ဖြစ်ကြသည်။

ထို့ကြောင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ(JMC) အဆင့်ဆင့်ကနေလည်း ဖြေရှင်းနိုင်ကြောင်း သိရသည်။

သို့သော် လတ်တလောတွင် JMC လုပ်ငန်းများမှာ ထိထိရောက်ရောက် လည်ပတ်နိုင်ခြင်း မရှိသေးပေ။

CNI News

၂၀၂၃ ခုနှစ်၊ မတ်လ ၃၀

မြန်မာပြည်မြောက်ပိုင်းက တိုင်းရင်းသား လက်နက်ကိုင် အဖွဲ့အစည်းများကို ဗဟိုပြုပြီး ငြိမ်းချမ်းရေးညီလာခံ ကျင်းပလာနိုင်ကြောင်း မြန်မာ့နိုင်ငံရေးလေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။

တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးထားသည့် တိုင်းရင်းသား လက်နက်ကိုင် အဖွဲ့အစည်းများလည်း ပါဝင်မည်ဆိုပါက အဖွဲ့အစည်း စုံစုံလင်လင်ဖြင့် ကျင်းပနိုင်ကြောင်း ၎င်းက ပြောသည်။

ဦးရဲထွန်းက “ဖြစ်လာနိုင်ပါတယ်၊ သူက မြောက်ပိုင်း ၇ ဖွဲ့က တရုတ်က မြန်မာအထူးကိုယ်စားလှယ်နဲ့ တွေ့ဆုံ ပြီးတဲ့နောက် သူတို့ ကြေညာချက် ထုတ်တဲ့အထဲမှာ သူက ဖက်ဒရယ်ဒီမိုကရေစီနိုင်ငံကို သွားဖို့အတွက် လမ်း အမျိုးမျိုး ရှိနိုင်တယ်ဆိုတဲ့ဟာ ပြောထားတာ သတိထားမိတယ်၊ နောက်တစ်ခုက အရင် ဦးသိန်းစိန်အစိုးရ လက်ထက်တုန်းက ဒီလို ငြိမ်းချမ်းရေး ဆွေးနွေးဖို့အတွက် NCA စာချုပ် လက်မှတ်ထိုးတုန်းကလည်း မြောက်ပိုင်း အဖွဲ့တွေက မပါဘူးပေါ့နော်၊ နောက်တစ်ခါ ပင်လုံစာချုပ်ဆိုပြီး NLD အစိုးရလက်ထက်မှာ ပင်လုံအစည်းအဝေး ဆိုပြီး ခေါ်တဲ့အချိန်မှာလည်း သူတို့ မပါဘူးပေါ့နော်၊ အခုဖြစ်မယ့်ဟာကတော့ နစကအစိုးရအနေနဲ့ အဲဒီအဖွဲ့တွေနဲ့ တိုင်ပင်ပြီးတော့ လုပ်တာ၊ ခေါ်ယူတာ၊ ကျင်းပတာ အဲဒီအဖွဲ့တွေရဲ့ သဘောတူညီချက်နဲ့ လုပ်တာဆိုရင်တော့ မြန်မာနိုင်ငံမြောက်ပိုင်း တိုင်းရင်းသား လက်နက်ကိုင် အဖွဲ့အစည်းတွေကို ဗဟိုပြုတဲ့ ငြိမ်းချမ်းရေးဆွေးနွေးပွဲ ဖြစ်မှာပေါ့၊ အရင် NCA စာချုပ်ချုပ်ဖို့ ခေါ်ခဲ့တဲ့ ငြိမ်းချမ်းရေးဆွေးနွေးပွဲတို့ NLD အစိုးရလက်ထက်က ဆက်ပြီး တော့ ဖော်ခဲ့တဲ့ ပင်လုံငြိမ်းချမ်းရေးဆွေးနွေးပွဲတို့ ဆိုတာတော့ တောင်ပိုင်း တိုင်းရင်းသားလက်နက်ကိုင် အဖွဲ့အစည်းကို ဗဟိုပြုတဲ့ သူတို့ သဘောကျ သူတို့လိုလားတဲ့ အစည်းအဝေးဖြစ်မှာပေါ့၊ အဲဒီလို မြင်ရပါတယ်ဗျ၊ ဆိုတော့ ဒီတစ်ခေါက်ကတော့ အဲဒီ အစည်းအဝေး လုပ်ဖြစ်ရင် တောင်ပိုင်းက တိုင်းရင်းသား လက်နက်ကိုင် အဖွဲ့အစည်းတွေ တက်မလားဆိုတာ စောင့်ကြည့်ရမှာပဲ။ နစကတော့ ဖိတ်လိမ့်မယ် တက်မတက်တော့ သိပ် မသေချာဘူးပေါ့နော်၊ NCA လက်မှတ်ထိုးထားတဲ့ အဖွဲ့အစည်းပါ တက်တယ်ဆိုရင်တော့ တော်တော်များများ တောင်ပိုင်း၊ မြောက်ပိုင်း စုံသွားမှာပေါ့နော်” ဟု CNI သတင်းဌာနသို့ ပြောသည်။

၂၀၂၃ ခုနှစ်၊ မတ်လ ၂၂ ရက်နေ့က UWSA-SSPP-NDAA နဲ့ NSPNC တို့ တွေ့ဆုံ ဆွေးနွေးစဉ်

ပြီးခဲ့သည့် မတ်လ ၂၂ ရက်က နစကနှင့် "ဝ" ပြည်သွေးစည်းညီညွတ်ရေးပါတီ (UWSP)၊ အမျိုးသားဒီမိုကရက်တစ် မဟာမိတ်အဖွဲ့ (NDAA) နှင့် ရှမ်းပြည်တိုးတက်ရေးပါတီ (SSPP) တို့ တွေ့ဆုံဆွေးနွေးအပြီး ငြိမ်းချမ်းရေးညီလာခံ ကျင်းပနိုင်ရေး ဆွေးနွေးခဲ့ကြောင်း ထုတ်ပြန်ခဲ့သည်။

အလားတူ မတ်လ ၂၈ ရက်နှင့် ၂၉ ရက်က နစကနှင့် အပစ်ရပ် တိုင်းရင်းသား လက်နက်ကိုင် ၇ ဖွဲ့တို့ တွေ့ဆုံစဉ် ငြိမ်းချမ်းရေးညီလာခံ ကျင်းပနိုင်ရေး ဆွေးနွေးခဲ့ကြသည်။

လက်ရှိ နစကနှင့် တိုင်ရင်းသား လက်နက်ကိုင် အဖွဲ့အစည်းတို့ ဆွေးနွေးမှုမှ ရလာသည့် သဘောတူညီချက်ကို ငြိမ်းချမ်းရေးညီလာခံ ကျင်းပပြီး ပြည်သူသိအောင် ချပြနိုင်မှာ ဖြစ်ကြောင်း၊ ငြိမ်းချမ်းရေးညီလာခံ ကျင်းပသင့် ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

ဒေါက်တာအေးမောင်က “NSPNC ရဲ့ ကြွေးကြော်ချက်က ခုနလိုပေါ့ဗျာ၊ ဖွဲ့စည်းပုံ အခြေခံဥပဒေကို ပြင်ရင်း အဲဒီ နောက်မှာ ညီလာခံ တစ်ခုကိုလည်း သွားနိုင်တာပေါ့၊ သဘောတူညီချက် အဲဒီညီလာခံသည် ငြိမ်းချမ်းရေးညီလာခံ လည်း ဖြစ်နိုင်တယ်၊ ခုနဖွဲ့စည်းပုံအခြေခံဥပဒေကို Review (သုံးသပ်ချက်) တစ်ခုလည်း နောက်ဆုံးမှာ သွားနိုင် တာပေါ့၊ အဲဒီနောက်မှာ ရွေးကောက်ပွဲကြောင့် တက်လာတဲ့ အစိုးရ လွှတ်တော်ပေါ့ဗျာ၊ ထွက်ပေါက်ကောင်း ကောင်းနဲ့ အဲဒီထွက်ပေါက်ကို တရုတ်ဖက်က အားသန်သလား၊ တရုတ်ဖက်က ဒီထွက်ပေါက်အတိုင်းပဲ သွားသင့် တယ်ဆိုတဲ့ ယူဆချက် SAC နဲ့ တရုတ်ပြည်အစိုးရ၊ တရုတ်ပြည်ကွန်မြူနစ်ပါတီတို့ဖက်မှာ သဘောတူချက်တွေ သို့မဟုတ် တိုက်ဆိုင်မှုတွေ ရှိနေကြပြီလား၊ အဲဒီတိုက်ဆိုင်မှုအပေါ်မှာ FPNCC ဖက်ကလည်း သဘောတူညီကြ ပြီလား၊ သဘောထား တိုက်ဆိုင်မှုတွေ ရှိနေကြပြီလား၊ NCA ထိုးထားတဲ့ PPST ၇ ဖွဲ့မှာလည်း သဘောတူညီချက် တွေ ရှိပြီလား၊ တိုက်ဆိုင်မှုတွေ ရှိနေပြီလားဆိုရင်တော့ ခင်ဗျားပြောတဲ့ မေးခွန်းရဲ့ အဖြေပေါ့ဗျာ”ဟု ပြောသည်။

၂၀၂၃ ခုနှစ်၊ မတ်လ ၂၈ ရက်မှ ၂၉ ရက်အထိ အပစ်ရပ် ၇ ဖွဲ့နဲ့ NSPNC တွေ့ဆုံဆွေးနွေးနေစဉ်

ထို့နောက် ငြိမ်းချမ်းရေးညီလာခံသည် ဖွဲ့စည်းပုံအခြေခံဥပဒေ ပြင်ဆင်ရေးအတွက် ထွက်ပေါက်တစ်ခုလည်း ဖြစ်သည်ဟု ၎င်းက ပြောသည်။

ဒေါက်တာအေးမောင်က “ ငြိမ်းချမ်းရေးညီလာခံသည် ခုနက ကျနော်တို့ ပြောနေတဲ့ ဖွဲ့စည်းပုံအခြေခံဥပဒေကို ပြင်ရင်းနဲ့ ပတ်သက်လို့ NCA စာချုပ်အရ အဓိက ခုန ထွက်ပေါက်ဗျ၊ အဲဒီညီလာခံသည် ၂၁ ရာစုပင်လုံမှာ ၄ ကြိမ် လား ပြီးခဲ့ပြီးပြီ၊ ဆက်သွားမှာလား သဘောတူညီချက် ၅၇ ခုတော့ ရပြီးပြီ၊ အခု ညှိနှိုင်းမှုတွေမှာ ဘယ်နှစ်ချက် ရနေပြီးပြီလဲ၊ အဲဒီရထားတဲ့ ညှိနှိုင်းချက်တွေကို ညီလာခံမှာပဲ အများပြည်သူသိအောင် ကြေညာနိုင်မှာဗျ၊ အဲဒါ ကြောင့် ညီလာခံတစ်ခုက သွားနိုင်တယ်၊ သွားဖို့လည်း သင့်တယ်၊ သွားမှပဲ ရှေ့ဆက်သွားနိုင်မယ်၊ ဒါဖွဲ့စည်းပုံ အခြေခံဥပဒေ ပြင်ဆင်ရင်းနဲ့ လက်နက်ကိုင် တော်လှန်ရေးများနဲ့ SAC ရဲ့ မြန်မာ့တပ်မတော်ရဲ့ ငြိမ်းချမ်းရေး ဖြစ်စဉ်မှာ နှစ်ဖက် သဘောတူညီချက်နဲ့ သွားနေတဲ့ လမ်းကြောင်းပေါ့ဗျာ၊ အဲဒီမှာ နိုင်ငံရေးပါတီများရဲ့ ကဏ္ဍနဲ့ ရွေးကောက်ပွဲ၊ ၂၀၀၈ ဖွဲ့စည်းပုံအခြေခံဥပဒေ အကုန်လုံးကတော့ ရှေ့ဆက်ပြီး Process အတိုင်း သွားနေကြတာပဲ၊ အဲဒီလိုပဲ မြင်တယ်ဗျ” ဟု ပြောသည်။

ပြည်ထောင်စု ငြိမ်းချမ်းရေး ညီလာခံကို ယခင် သမ္မတဦးသိန်းစိန် အစိုးရလက်ထက် ၂၀၁၆ ခုနှစ်က စတင် ကျင်းပခဲ့ရာ ဒေါ်အောင်ဆန်းစုကြည် အစိုးရလက်ထက် ၂၀၂၀ ခုနှစ်၊ သြဂုတ်လအတွင်းက နောက်ဆုံးအကြိမ် ကျင်းပခဲ့သည်။

CNI News
၂၀၂၃ ခုနှစ်၊ မတ်လ ၂၉

ရွေးကောက်ပွဲနှင့် ငြိမ်းချမ်းရေး ညီလာခံ ကျင်းပနိုင်ရေး အပါအဝင် လုပ်ငန်းစဉ် ၉ ခုကို တစ်နိုင်ငံလုံး ပစ်ခတ် တိုက်ခိုက်မှု ရပ်စဲရေးသဘောတူစာချုပ်(NCA)ထိုးထားသည့် လက်နက်ကိုင် ၇ ဖွဲ့နှင့် အမျိုးသားစည်းလုံးညီ ညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC)တို့ တွေ့ဆုံ ဆွေးနွေးခဲ့ကြသည်။

အဆိုပါ တွေ့ဆုံ ဆွေးနွေးမှုကို ၂၀၂၃ ခုနှစ်၊ မတ်လ ၂၈ ရက်မှ ၂၉ ရက်အထိ ၂ ရက်တာ ဆွေးနွေးခဲ့ကြခြင်း ဖြစ်သည်။

ထို နှစ်ရက်တာ ဆွေးနွေးပွဲအတွင်း အားလုံးပါဝင်သည့် ငြိမ်းချမ်းရေး ဆွေးနွေးမှု အခင်းအကျင်း တစ်ရပ် ပေါ်ပေါက်ရေးကိစ္စ၊ ငြိမ်းချမ်းရေး လုပ်ငန်းစဉ် အဆင့်ဆင့်ဆိုင်ရာကိစ္စ၊ ရွေးကောက်ပွဲ ကျင်းပရေးကိစ္စ၊ ငြိမ်းချမ်းရေး ညီလာခံ ကျင်းပရေးကိစ္စ၊ ဒေသတည်ငြိမ်ရေးကိစ္စတို့ကို ဆွေးနွေးခဲ့ကြသည်။

ထို့အပြင် ဖက်ဒရယ်အခြေခံမူများကိစ္စ၊ အရပ်သားများ ကာကွယ်ပေးရေးဆိုင်ရာကိစ္စ၊ နှစ်ဖက် ဘုံသဘောတူ ညီချက်များ ရရှိနိုင်ရေးကိစ္စ၊ ဖွဲ့စည်းပုံအခြေခံဥပဒေ(၂၀၀၈ ခုနှစ်)မှ အခြေခံကျသော ပုဒ်မများကို ပြင်ဆင်နိုင် ရေးကိစ္စများကိုလည်း ဆွေးနွေးခဲ့ကြသည်ဟု နှစ်ဖက်စလုံးက ထုတ်ပြန်ခဲ့သည်။

ပြည်ထောင်စု ငြိမ်းချမ်းရေး ညီလာခံကို သမ္မတဦးသိန်းစိန် အစိုးရလက်ထက် ၂၀၁၆ ခုနှစ်က စတင် ကျင်းပခဲ့ရာ ဒေါ်အောင်ဆန်းစုကြည် အစိုးရလက်ထက် ၂၀၂၀ ခုနှစ်၊ သြဂုတ် ၃၁ ရက်တွင် ကျင်းပခဲ့သည့် အခမ်းအနားက နောက်ဆုံးဖြစ်သည်။

၂၀၂၀ အထွေထွေရွေးကောက်ပွဲကိုလည်း ၂၀၂၀ ခုနှစ်၊ နိုဝင်ဘာလက ကျင်းပခဲ့သော်လည်း ဒေါ်အောင်ဆန်းစု ကြည် ဦးဆောင်သည့် အစိုးရမှ မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ၂၀၂၁ ခုနှစ်၊ ဖေဖော်ဝါရီ ၁ ရက်မှာပဲ တပ်မတော်က ဖြုတ်ချ၍ နိုင်ငံတော်အား အရေးပေါ် အခြေအနေ ကြေညာထားသည်။

ထို့နောက် ရွေးကောက်ပွဲကို ပြန်လည် ကျင်းပမည်ဖြစ်သလို အနိုင်ရသည့် ပါတီကို နိုင်ငံတော် အာဏာ လွှဲပြောင်းပေးမည်ဟု တပ်မတော်ကာကွယ်ရေးဦးစီးချုပ်လည်းဖြစ် နစကဥက္ကဋ္ဌလည်းဖြစ်သည့် ဗိုလ်ချုပ်မှူးကြီး မင်းအောင်လှိုင်က ပြောကြားထားသည်။