CNI News

၂၀၂၄ ခုနှစ်၊ ဇူလိုင် ၂၉

ရှမ်းပြည်နယ်တောင်ပိုင်းဒေသ တည်ငြိမ်ရေးနှင့် ပြည်သူလူထု၏ အသက်၊ အိုးအိမ်၊ ပစ္စည်းဥစ္စာများ ပျက်စီးဆုံးရှုံးမှု မဖြစ်စေရေးအတွက် သျှမ်းပြည်ပြန်လည်ထူထောင်ရေးကောင်စီ (RSSS/SSA) အနေဖြင့် ပြည်သူနှင့် လက်တွဲ၍ ကာကွယ်စောင့်ရှောက်သွားမည်ဖြစ်ကြောင်း ထုတ်ပြန်ခဲ့သည်။

ရှမ်းပြည်နယ်မြောက်ပိုင်း တိုက်ပွဲများကြောင့် ရှမ်းပြည်လူထုတို့ အိုးအိမ်ပစ္စည်းများ ပျက်စီးဆုံးရှုံးရခြင်း၊ သေဆုံး ဒဏ်ရာရခြင်း၊ နေရပ်စွန့်ခွာ ထွက်ပြေးတိမ်းရှောင်ရခြင်း၊ ကလေးသူငယ်၊ အမျိုးသမီးများ၊ သက်ကြီးရွယ်အိုများ အခက်အခဲများ ကြုံတွေ့နေရခြင်းတို့အပေါ် စိတ်မကောင်းဖြစ်ရကြောင်း ဇူလိုင် ၂၉ ရက်နေ့ RCSS ၏ (၆) လပတ် အစည်းအဝေး ထုတ်ပြန်ကြေညာချက်တွင် ဖော်ပြထားသည်။

ရှမ်းပြည်နယ်မြောက်ပိုင်းရှိ တော်လှန်ရေးအင်အားစုများ၏ လူအင်အားအရ တောင်ပိုင်းသို့ ကူးလာနိုင်ကြောင်း၊ သို့သော်လည်း ရှမ်းတောင်တွင် ကြီးမားသော စစ်ရေးရည်မှန်းချက်မရှိဟု ယူဆကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) မှ နာယက ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

RCSS တပ်ဖွဲ့ကို တွေ့ရစဉ်

၎င်းက “သူ့လူအရတော့ ချဲ့မယ်ဆိုရင်တော့ ကူးလာနိုင်တယ်၊ သို့သော်လည်းပဲ မြောက်ပိုင်းက အဖွဲ့အစည်းတွေ လက်နက်ကိုင်တိုက်နေတဲ့ ကိုးကန့်တို့၊ ပလောင်တို့၊ “ဝ”တို့ နောက်ပြီးတော့ SSPP ပေါ့၊ ဒီဖက်မှာ သူတို့ရဲ့ ရေရှည်ဗျူဟာတော့ ကျနော်တို့ မသိဘူး။ သို့သော်လည်းပဲ SSPP ဆိုရင် မိုင်းပွန်တို့ လွိုင်လင်တို့ကို မကြာခဏ ရောက်နေတာ တွေ့ရတယ်၊ သွားလိုက်ပြန်လိုက်ပေါ့၊ တစ်ခါတစ်လေ မိုင်းပွန်တို့ လွိုင်လင်တို့ရဲ့ နောက်ကျောမှာပဲ ဝပ်နေတာလည်း ရှိတယ်ဗျ၊ သူတို့ တကယ်လို့ ရှမ်းတောင်ကို ကူးမယ်ဆိုလည်း ကူးနိုင်တဲ့ အနေအထားတော့ ရှိတယ်။ သို့သော်လည်းပဲ ရှမ်းတောင်မှာက ကြီးမားတဲ့ စစ်ရေးရည်မှန်းချက်တော့ ဒီလောက်ရှိမယ့်ပုံ မပေါ်ဘူး။ သံလွင်အရှေ့ကို ပိုပြီးတော့ အားစိုက်တဲ့သဘောရှိတယ်၊ “ဝ”ကတော့၊ ဒါကြောင့် ကျနော်ထင်တယ် ဟိုပုံးတစ်ခွင်နဲ့ တောင်ကြီးတစ်ခွင်ကတော့ လောလောဆယ်ဆယ် စစ်မဲ့ဇုန် အနေအထားမှာ ရှိနိုင်မယ်” ဟု ပြောသည်။

လက်ရှိ ရှမ်းပြည်နယ်တောင်ပိုင်းရှိ မြို့နယ်အချို့မှာ စစ်မဲ့ဇုန်ဖြစ်နေပြီး တည်ငြိမ်နေကြောင်း၊ ကရင်နီဒေသမှ အင်အားစုအချို့ ရှမ်းပြည်နယ်တောင်ပိုင်းသို့ တိုက်ပွဲဖော်မှုအချို့ရှိနေကြောင်း ဗိုလ်မှူးကြီး ခွန်ဥက္ကာက ဆက်လက် ပြောကြားသည်။

၎င်းက “အဲဒီစစ်မဲ့ဇုန်ရှိနိုင်မယ့် အနေအထားမှာ အဲဒီဒေသမှာရှိတဲ့ လက်နက်ကိုင်တပ်က တပ်မတော်ရှိမယ်၊ အရှေ့ပိုင်းတိုင်းနဲ့ အလယ်ပိုင်းတိုင်း၊ နောက်ပြီးတော့ RCSS ရှိမယ်၊ ကားလမ်းတောင်ဖက် နောက်ပြီးတော့ PNO/PNA က ရှိမယ်၊ နောက်ကောင်ခဲဒေသရဲ့ ပအိုဝ်းပြည်သူ့စစ်ရှိမယ်၊ အဲဒီလို စုပေါင်းရှိနေတဲ့ အခါကြတော့ RCSS ကတော့ အဆင်မပြေဘူး၊ မြောက်ပိုင်းနဲ့ ကျန်တဲ့ PNO/PNA တို့ ကျန်တဲ့အဖွဲ့တွေကတော့ SSPP ဆိုရင် အားလုံးနဲ့ မဟာမိတ်ဖြစ်နေတော့ တောင်ဖက်ကို ဆင်းလာရင်တောင်မှ တောင်ကြီး၊ မိုင်းပွန်၊ လွိုင်လင်လမ်းကြော ကို မသုံးဘဲနဲ့ အင်းအနောက်ဖက်လမ်းကြော သော်လည်းကောင်း၊ သံလွင်အရှေ့ဖက် လမ်းကြော သော်လည်း ကောင်း သူတို့ သုံးနိုင်တယ်လို့ ကျနော်ယူဆတယ်၊ အဲဒါကြောင့် ရှမ်းတောင်မှာ ဘာပဲဖြစ်ဖြစ် ကရင်နီဖက်က အင်အားတစ်ချို့ လာရောက်နှောက်ယှက်တာက လွဲရင်ပေါ့၊ လောလောဆယ်တော့ လုံခြုံတဲ့ သဘောတော့ ရှိပါတယ်။ အဲဒါကို အခွင့်ကောင်းယူပြီးတော့ RCSS က ပြောလိုက်တာ ဖြစ်ပါလိမ့်မယ်” ဟု ပြောသည်။

RCSS ဥက္ကဋ္ဌဗိုလ်ချုပ်ကြီး ယွက်စစ်ကိုတွေ့ရစဉ်

RCSS အနေဖြင့် မြန်မာ့တပ်မတော်၏ အလယ်ပိုင်းတိုင်း၊ အရှေ့ပိုင်းတိုင်းတို့နှင့် နီးစပ်၍ဖို့ လိုအပ်သလို ၎င်းတို့ မဟာမိတ်ပြုထားသည့် ပအိုဝ်းအမျိုးသားအဖွဲ့ (PNO/PNA) တို့ဖြင့် နီးကပ်မှုရှိပါက ရှမ်းပြည်တောင်ပိုင်း တည်ငြိမ်လုံခြုံနိုင်ကြောင်း ၎င်းက ပြောသည်။ 

အဆိုပါ ကိစ္စနှင့် ပတ်သက်၍ အကြောင်းစုံသိရှိနိုင်ရေး RCSS မှ ပြန်ကြားရေးတာဝန်ခံများထံ ဖုန်းဆက်သွယ်ခဲ့ သော်လည်း ဆက်သွယ်၍ မရသေးပေ။

တပ်မတော်က အာဏာရယူပြီးနောက် ၃ နှစ်ကျော် ကာလအတွင်း အကျိုးဆက်အားဖြင့် တိုင်းပြည်အနှံ့ တိုက်ပွဲ ဖြစ်ပွားခြင်း၊ စီးပွားရေး ကျဆင်းခြင်း၊ လူ့အခွင့်အရေး ချိုးဖောက်မှု များပြားလာခြင်း၊ တရားဥပဒေစိုးမိုးမှု အားနည်းခြင်းကြောင့် နေရာဒေသ အသီးသီးတွင် လူဆိုး၊ သူခိုး၊ ဓါးမြ ပေါများလာကြောင်း၊ ထို့ကြောင့် ပြည်သူ လူထုများမှာ လူမှုဒုက္ခအဝဝနှင့် အခက်အခဲများ ကြုံတွေ့နေရကြောင်း RCSS က ထုတ်ပြန်ခဲ့သည်။

သက်ဆိုင်ရာအဖွဲ့အစည်းများ တွေ့ဆုံဆွေးနွေးပြီး အပစ်အခတ်ရပ်စဲရေး ဆောင်ရွက်ကြရန်နှင့် ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးအတွက် တွေ့ဆုံဆွေးနွေးခြင်းဖြင့် ဖြေရှင်းသွားရန် RCSS က ထုတ်ပြန် တိုက်တွန်းထားသည်။

CNI News

၂၀၂၄ ခုနှစ်၊ ဇူလိုင် ၂၉

ထိုင်းရောက် နိုင်ငံ့ဝန်ထမ်းများ အမည်မည်းစာရင်းမှ ပယ်ဖျက်နိုင်ရန် လျှောက်ထားနိုင်ကြောင်း သံရုံးမှ ထုတ်ပြန် ထားသော်လည်း လျှောက်ထားလာမည့် သူများအတွက် မည်သို့ စီစဉ်ပေးထားသည်ကို သေချာချပြရန်လိုအပ် ကြောင်း ရွှေ့ပြောင်းအလုပ်သမားအရေး ဆောင်ရွက်နေသူများက CNI သတင်းဌာနသို့ ပြောသည်။

ထိုသို့ လျှောက်ထားလိုသူများအနေဖြင့် ဘန်ကောက်ရှိ မြန်မာသံရုံး၌သာ လျှောက်ထားရမည်ဖြစ်သောကြောင့် နယ်စပ်ဒေသများမှ လျှောက်ထားလိုသူများအတွက် အခက်အခဲဖြစ်စေကြောင်း၊ သို့သော် လူအများစုသည် ထိုအစီအစဉ်အား ‌လျှောက်ထားကြမည် မဟုတ်ကြောင်း ပညာရေးနှင့် ဖွံ့ဖြိုးတိုးတက်ရေးဖောင်ဒေးရှင်း FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။

၎င်းက “တချို့တွေကြတော့ Blacklist စာရင်းထဲမှာ ပါတယ်၊ မပါဘူးဆိုတာ မသိတဲ့လူတွေ အများကြီးရှိတာပေါ့။ အဲဒီသံရုံးကို တိုက်ရိုက်သွားပြီး လျှောက်ဖို့ဆိုတာက နယ်မှာရောက်နေတဲ့ လူတွေအနေနဲ့ အဲဒါမျိုးဆိုရင်လည်း အခက်အခဲဖြစ်တယ်။ ပြီးတော့ အများစုရဲ့ ခံယူချက်ပေါ့ သူတို့အပေါ် မူတည်တာပေါ့။ သူတို့တွေက ဟိုမှာ မြန်မာ ပြည်ထဲမှာတုန်းက အစိုးရတွေကို ဆန့်ကျင်တဲ့ လှုပ်ရှားမှုတွေမှာ ပါဝင်ခဲ့တဲ့ သူတို့ရဲ့ အတိုင်းအတာတွေ အပေါ် လည်း မူတည်တာပေါ့။ သူတို့ ခံယူချက်တွေအပေါ် မူတည်ပြီး ဒီဟာကို ပြန်ပြီးလျှောက်ထားမလား၊ သွားဖို့အတွက် ဆုံးဖြတ်မလား အဲဒါသူတို့အပေါ် မူတည်တယ်။ သို့သော် အများစုကတော့ ဒီဟာမျိုးကို လုပ်မယ်လို့တော့ မထင်ဘူး။ ဒါကတော့ တစ်ဦးချင်းစီနဲ့ လည်း ဆိုင်သွားတယ်။ နောက်တစ်ခုကတော့ အခုကြော်ငြာလိုက်တာတော့ မှန်တယ်။ ဘယ်လောက်အထိ အဆင်ပြေအောင် ဒီလူတွေအတွက် စီစဉ်ပေးထားလဲပေါ့။ ဒါမျိုးတွေအပေါ်လည်း မူတည်သေးတာပေါ့” ဟု ပြော သည်။

 CDM လုပ်ရန် တိုက်တွန်းနေသူများကို တွေ့ရစဉ်

ဘန်ကောက်ရှိ မြန်မာသံရုံး၏ ထုတ်ပြန်ချက်အရ နိုင်ငံ့ဝန်ထမ်းများ အမည်မည်းစာရင်းမှ ပယ်ဖျက်ဖြေလျှော့ ပေးနိုင်ပါရန် လျှောက်ထားလျက်ရှိကြောင်း သိရသည်။

လျှောက်ထားလိုသူများအနေဖြင့် လုပ်ငန်းခွင်စွန့်ခွာရသည့် အကြောင်းအရင်းကို ဖော်ပြထားသော ကိုယ်ရေးစာ၊ ၆ လအတွင်း ရိုက်ကူးထားသော ဓါတ်ပုံ၊ ထိုင်းနိုင်ငံရှိ နေရပ်လိပ်စာ အပြည့်အစုံ၊ နိုင်ငံကူးလက်မှတ်၊ နိုင်ငံသား စိစစ် ရေးကဒ်ပြား မိတ္တူတို့အပြင် အခြားထည့်သွင်းလိုသော စာရွက်စာတမ်းများနှင့်အတူ လူကိုယ်တိုင်သော် လည်း ကောင်း၊ စာတိုက်မှတဆင့်လည်းကောင်း  လျှောက်ထားနိုင်ကြောင်း သိရသည်။

မြန်မာနိုင်ငံဘက်မှ အာဏာပိုင်များအနေဖြင့် အပြောနှင့်အလုပ် တစ်ထပ်တည်း မကျသည့်အတွက် ယခုကဲ့သို့ ဖြေလျှော့‌‌ပေးရန် လျှောက်ထားခိုင်းခြင်းအပေါ် ထိုင်းရောက် ဝန်ထမ်းများအနေဖြင့် အယုံအကြည် မရှိကြကြောင်း အလုပ်သမားအခွင့်အရေးဖောင်ဒေးရှင်း LRF မှ ဦးအောင်ကျော်က CNI သတင်းဌာနသို့ ပြောသည်။

CDM လုပ်ရန် တိုက်တွန်းနေသူများကို တွေ့ရစဉ်

၎င်းက “ဒါကတော့ ပရိယာယ်တစ်ခုလို့ပဲ ကျနော်သုံးသပ်တယ်။ ဒီကိုရောက်နေကြတဲ့ ပြည်သူ့ဝန်ထမ်း၊ နိုင်ငံ့ ဝန်ထမ်းတွေကတော့ အယုံအကြည် ကင်းမဲ့နေတာကို တွေ့ရှိရပါတယ်။ ဘာလို့လဲဆိုတော့ အပြောနဲ့အလုပ် ဘယ်တော့မှ တစ်ထပ်တည်း မကျတဲ့အတွက်ကြောင့်။ ဘာကြောင့်လဲဆို ဒါက သက်သက်မဲ့ကို နိုင်ငံတကာကို ဟန်ရေးပြတာတို့၊ နောက်သူတို့အပေါ်မှာရှိတဲ့ PRESSURE ဖိအားလေးတွေ လျော့ပါးစေရေး လုပ်တာတို့ နည်းလမ်းလေးတွေကို ပရိယာယ်သုံးပြီး လုပ်တယ်လို့ သုံးသပ်ပါတယ်။ ဒါကြောင့်မို့လို့ တော်တော်များများ ကလည်း ဒီမှာ ရောက်နေတဲ့ နိုင်ငံ့ဝန်ထမ်းတွေက လူငယ်လူရွယ်တွေ များပါတယ်။ ၈၈ တုန်းက လိမ်ရင် လိမ်သလို ခံခဲ့ရပေမယ့် အခုမျိုးဆက်သစ်တွေက ကမ္ဘာကြီးကို စက္ကန့်ပိုင်း မိနစ်ပိုင်းအတွင်း ထိတွေ့မှုဆိုတာ ကမ္ဘာပတ်ပြီး လျှောက်လှမ်းတာနဲ့ အတူတူ ဖြစ်တာကြောင့် ဘယ်သူမှ အယုံအကြည်မ ရှိဘူးဆိုတာ ထပ်လောင်း ပြောလိုပါတယ်” ဟု ပြောသည်။

၂၀၂၁ ခုနှစ် နိုင်ငံရေး အပြောင်းအလဲများဖြစ်ပြီးနောက် CDM ဝန်ထမ်းများ အပါအဝင် မြန်မာနိုင်ငံမှ လူအများစု သည် ထိုင်းနိုင်ငံသို့ ထွက်ပြေးတိမ်းရှောင်သွားကြခြင်းဖြစ်သည်။

ထိုသို့ ထွက်ပြေးတိမ်းရှောင် သွားကြသူထဲမှ အများစုသည် ထိုင်းအစိုးရမှ ထုတ်ပေးသည့် အထောက်အထားကဒ် များ ပြုလုပ်ကာ ထိုင်းနိုင်ငံအတွင်း နေထိုင်အလုပ်လုပ်လျက် ရှိနေကြသည်။

CNI News
၂၀၂၄ ခုနှစ်၊ ဇူလိုင် ၂၈

ရှမ်းပြည်နယ်မြောက်ပိုင်း၊ လားရှိုးမြို့ရှိအရှေ့မြောက်တိုင်းစစ်ဌာနချုပ်(ရမခ) အပါအဝင် မြို့သိမ်းတိုက်ပွဲကို ကိုးကန့်တပ်(MNDAA)က ဖော်ဆောင်နေချိန်မှာပဲ “ဝ”တပ်ဖွဲ့က လားရှိုးမြို့ထဲ ဝင်ရောက်လာပြီး နေရာတချို့ကို ထိန်းချုပ်နေရာယူထားကြောင်း နီးစပ်သူများက ပြောသည်။

“ဝ”တပ်ဖွဲ့သည် ဇူလိုင် ၂၇ ရက်နေ့ ညပိုင်းက လားရှိုးမြို့ထဲ ဝင်ရောက်လာပြီး အရေးကြီးနေရာများကို ထိန်းချုပ် နေရာယူထားကြောင်း နစကနှင့် “ဝ”တပ်ဖွဲ့တို့ဖြင့် နီးစပ်သူ သတင်းရင်းမြစ် ၃ ဦးထက်မနည်းက CNI သတင်းဌာန သို့ ပြောသည်။

“ဝ”တပ်ဖွဲ့ လားရှိုးမြို့ထဲ ဝင်ရောက်လာမှုနှင့်ပတ်သက်ပြီး UWSA ၏ လားရှိုးမြို့ဆက်ဆံရေးတာဝန်ခံ ဦးညီရန်းကို ဆက်သွယ်သော်လည်း ဆက်သွယ်၍ မရသေးပေ။

ထိုသို့ “ဝ”တပ်ဖွဲ့ လားရှိုးမြို့ထဲ ဝင်ရောက်လာခြင်းမှာ နေပြည်တော်၏ ခွင့်ပြုချက်ဖြင့်ဖြစ်ကြောင်း၊ သို့သော် ဆွေးနွေး သဘောတူညီချက် အသေးစိတ်ကိုတော့ မသိရသေးကြောင်း သတင်းရင်းမြစ်များက ပြောသည်။

MNDAA နှင့်ပူးပေါင်းတပ်ဖွဲ့သည် ရမခတိုင်းဌာနချုပ်ကို အပြင်းအထန် ထိုးစစ်ဆင်နေပြီး လားရှိုးမြို့ထဲက နေရာတချို့ကို ထိန်းချုပ်ထားပြီး ဖြစ်သည်။

သို့သော် တရုတ်အစိုးရက MNDAA နှင့် TNLA တို့ကို စစ်ဆင်ရေး ရပ်တန့်ရန် ဖိအားပေးနေပြီး MNDAA နှင့် TNLA ထိန်းချုပ်နယ်မြေအတွင်း အင်တာနက်၊ လျှပ်စစ်မီး၊ နယ်စပ်ဂိတ်များ ပိတ်ထားသည်။

တရုတ်အစိုးရဘက်က TNLA နှင့် MNDAA ကို အချက်သုံးချက် ပြောထားကြောင်း၊ ထိုအချက် သုံးချက်အရ ဇူလိုင်လကုန်နောက်ပိုင်းတွင် TNLA နှင့် MNDAA တို့အပစ်ရပ်နိုင်ကြောင်း၊ အပစ်အရပ်ခင် ရသလောက် TNLA နှင့် MNDAA က တိုက်နေခြင်းဖြစ်သည်ဟု မြောက်ပိုင်းမဟာမိတ်များဖြင့် နီးစပ်သူတစ်ဦးက ပြောသည်။

TNLA နှင့် MNDAA တို့ ၂၀၂၃ ခုနှစ်၊ အောက်တိုဘာ ၂၇ ရက်က ဖော်ဆောင်ခဲ့သည့် ၁၀၂၇ စစ်ဆင်ရေး (ပထမပိုင်း)ကာလတုန်းက “ဝ”တပ်ဖွဲ့ကို TNLA နှင့် MNDAA တို့က ဟိုပန်နှင့်ပန်လုံမြို့ကို ထိန်းချုပ်ခွင့်ပေးခဲ့သည်။

ထို့နောက် ၂၀၂၄ ခုနှစ်၊ ဇွန်လ ၂၅ ရက်ကနေ ယနေ့အထိ စတင်နေသော ၁၀၂၇ စစ်ဆင်ရေး (ဒုတိယပိုင်း)တွင် “ဝ”တပ်ဖွဲ့ကို တန့်ယန်းမြို့နယ်အား နေပြည်တော်က ထိန်းချုပ်ခွင့်ပေးခဲ့သလို ဇူလိုင် ၂၇ ရက်ကလည်း လားရှိုးမြို့ထဲကို ဝင်ရောက်ထိန်းချုပ်ခွင့်ပေးလိုက်သည်။

CNI News

၂၀၂၄ ခုနှစ်၊ ဇူလိုင် ၂၆

နိုင်ငံရေးပါတီတစ်ရပ်အနေဖြင့် ထပ်၍ မှတ်ပုံတင်ရန် မိမိတို့ ရခိုင်အမျိုးသားပါတီ (ANP) ပါတီဝင်အများစုက ဆန္ဒမရှိတော့ကြောင်း ANP မှ မူဝါဒရေးရာဦးဆောင်ကော်မတီဝင် ဦးထွန်းအောင်ကျော်က CNI သတင်းဌာနသို့ ပြောသည်။

ANP ၏ ပါတီမှတ်ပုံတင် လျှောက်ထားမှုကို နိုင်ငံရေးပါတီများ မှတ်ပုံတင်ခြင်း ဥပဒေပုဒ်မ ၇ ဖြင့် ငြိစွန်းနေခြင်း ကြောင့် ပြည်ထောင်စုရွေးကောက်ပွဲကော်မရှင် (UEC) က ငြင်းပယ်လိုက်ကြောင်း ဇူလိုင် ၁ ရက်နေ့မှာ ထုတ်ပြန် ခဲ့သည်။

ANP ပါတီမှ ဦးထွန်းအောင်ကျော်က “ကျနော်တို့ကို ပုဒ်မ ၇ နဲ့ ပြည်ထောင်စုရွေးကောက်ပွဲ ကော်မရှင်က ညှိစွန်း တယ်ဆိုပြီးတော့ ကျနော်တို့ကို ငြင်းပယ်လိုက်တယ်ပေါ့၊ အဲဒီတော့ ကျနော်တို့က နိုင်ငံရေးပါတီ တစ်ရပ်အနေနဲ့ မိမိတို့ လုပ်သင့် လုပ်ထိုက်တဲ့ ဥပဒေနဲ့အညီ လုပ်ရမယ့် အလုပ်တွေကို ကျနော်တို့ ကျေပွန်စွာ ဆောင်ရွက်ခဲ့ပြီ အဲဒီတော့ နိုင်ငံတော်က ကျနော်တို့ကို နိုင်ငံရေးပါတီအနေနဲ့ ရပ်တည်စေချင်တဲ့ ဆန္ဒမရှိတော့ဘူးလို့ ကျနော်တို့ ခံယူတဲ့အတွက် ကျနော်တို့ကတော့ ဆက်လက်ပြီးတော့ မြန်မာနိုင်ငံရဲ့ နိုင်ငံရေးမှာ နိုင်ငံရေးအရ ဆောင်ရွက်ဖို့ အတွက် သတိကြီးကြီးထားပြီးတော့ပဲ ကျနော်တို့ ရပ်တည်သွားမယ်။ လိုအပ်ရင်လည်း မိမိတို့ ပါတီဝင်တွေအနေနဲ့ စုစည်းပြီးတော့မှ ဥပဒေနဲ့အညီ လိုအပ်သလို ဥပဒေအတိုင်း ဆောင်ရွက်ဖို့အတွက်ဘဲ စဉ်းစားထားပါတယ်။ ထပ်ပြီး တော့ နိုင်ငံရေးပါတီ တစ်ရပ်အနေနဲ့ မှတ်ပုံတင်ဖို့ ဆန္ဒကတော့ ကျနော်တို့ အများစုကတော့ ဆန္ဒမရှိကြဘူးခင်ဗျ” ဟု CNI သတင်းဌာနသို့ ပြောသည်။

ANP ပါတီကို တွေ့ရစဉ်

UEC က နိုင်ငံရေးပါတီများ ပြန်လည်မှတ်ပုံတင်ခြင်း ဥပဒေနှင့် နည်းဥပဒေများကို ၂၀၂၃ ခုနှစ်၊ ဇန်နဝါရီ ၃၁ ရက် တွင် ထုတ်ပြန်ခဲ့ပြီး ရက်ပေါင်း ၆၀ အတွင်း နိုင်ငံရေးပါတီများအား ပြန်လည် မှတ်ပုံတင်ခိုင်းခဲ့သည်။

ထို့နောက် ANP ပါတီ အပါအဝင် နိုင်ငံရေးပါတီအများစု ပြန်လည်မှတ်ပုံတင်ခဲ့ပြီး တစ်နှစ်ကျော်အကြာတွင် ပုဒ်မ ၇ ဖြင့် ညှိစွန်းသည်ဟုဆိုကာ ANP ၏ မှတ်ပုံတင်ခြင်းကို UEC က ငြင်းပယ်ခဲ့သည်။

နိုင်ငံရေးပါတီများ မှတ်ပုံတင်ခြင်းဥပဒေ ပုဒ်မ ၇ တွင် တည်ဆဲဥပဒေ တစ်ရပ်ရပ်အရ မတရားအသင်းအဖြစ် ကြေညာခြင်းခံရသော အဖွဲ့အစည်း၊ နိုင်ငံတော်ကို လက်နက်ကိုင် ဆန့်ကျင်နေသာ အဖွဲ့အစည်း၊ အကြမ်းဖက် လုပ်ရပ်များကို ကျူးလွန်သည်ဟု နိုင်ငံတော်က သတ်မှတ်သော အဖွဲ့အစည်း၊ ပုဂ္ဂိုလ်များနှင့် တိုက်ရိုက်ဖြစ်စေ၊ သွယ်ဝိုက်၍ဖြစ်စေ၊ အားပေးကူညီခြင်းပြုသည့် အဖွဲ့အစည်းများကို မှတ်ပုံတင်လျှောက်ထားခွင့် မရှိစေရဟု ပြဋ္ဌာန်းထားသည်။

မိမိတို့အနေဖြင့် နိုင်ငံရေးပြဿနာကို နိုင်ငံရေးနည်းဖြင့် ဖြေရှင်းရမည်ဆိုသော ခံယူချက်ကို လက်မလွှတ်ကြောင်း၊ တစ်ချိန်ချိန်တွင် နိုင်ငံရေးပါတီ တစ်ရပ်အနေဖြင့် ပါဝင်ခွင့်ရပါက ပါဝင်သွားမည် ဖြစ်ကြောင်း ဦးထွန်းအောင်ကျော် က ပြောသည်။

AA ခေါင်းဆောင် ၂ ဦးကို တွေ့ရစဉ်

၎င်းက “ကျနော်တို့ကတော့ ကိုယ့်ပြည်နယ်ကို အခြေခံပြီးတော့ ကိုယ့်ရခိုင်အမျိုးသား အခြေခံတဲ့ နိုင်ငံရေးပါတီ တစ်ရပ်ကို အခြေခံခဲ့တယ်၊ အဲဒီလို ရခိုင်အမျိုးသား အပါအဝင် ပြည်ထောင်စု တစ်ရပ်လုံးရဲ့ ဒေသဖွံ့ဖြိုးရေး အမျိုးသားအကျိုးစီးပွား ဖွံ့ဖြိုးတိုးတက်ရေးအတွက်ကို နိုင်ငံရေး ပြဿနာကို နိုင်ငံရေးနည်းနဲ့ ဖြေရှင်းမယ်ဆိုပြီး ကျနော်တို့ကတော့ အားသွန်ခွန်စိုက် ကျနော်တို့ကတော့ ရိုးရိုးသားသားနဲ့ ဥပဒေနဲ့အညီ ကြိုးစားဆောင်ရွက်ခဲ့ တယ်။ ဒီလို နိုင်ငံရေးပြဿနာကို နိုင်ငံရေးနည်းနဲ့ ဖြေရှင်းရမယ်ဆိုတဲ့ ခံယူချက်ကိုလည်း ကျနော်တို့ လက်မလွှတ် ဘူး။ အဲဒါကြောင့် တစ်နေ့တစ်ချိန်မှာတော့ အခွင့်ကောင်းတွေ ပေါ်ပေါက်လာလိမ့်မယ်၊ အဲဒီလို ဥပဒေနဲ့အညီ ပါဝင်သင့် ပါဝင်ထိုက်တဲ့အခါမှာတော့ ရခိုင်အမျိုးသားပါတီဝင်တွေအနေနဲ့ မဆုတ်မနစ် ပါဝင်ပြီးတော့ ပြည်ထောင်စုအကျိုးကို သယ်ပိုးဆောင်ရွက်သွားမယ်ဆိုတာကိုတော့ ပြောချင်ပါတယ်ခင်ဗျ” ဟု ပြောသည်။

ရခိုင်အမျိုးသားပါတီ (ANP) သည် ရခိုင်အင်အားကြီး နိုင်ငံရေးပါတီတစ်ခုဖြစ်ပြီး ပြီးခဲ့သည့် အထွေထွေ ရွေးကောက်ပွဲများတွင် နေရာအများစု အနိုင်ရရှိခဲ့သည်။

လက်ရှိတွင် ရခိုင်ပြည်နယ်အတွင်းမှာ အာရက္ခတပ်တော်(AA)နှင့် မြန်မာ့တပ်မတော်ကြား တိုက်ပွဲများ အပြင်း အထန်ဖြစ်ပွားနေသည်။

ထို့နောက် ANP ပါတီကနေ လွှတ်တော်အမတ်များဖြစ်ခဲ့သူတချို့က AA ထဲဝင်ရောက်၍ လက်နက်ကိုင် လှုပ်ရှားမှု များ ပြုလုပ်နေသလို ANP ပါတီထိပ်ပိုင်း ခေါင်းဆောင်တချို့မှာ AA ခေါင်းဆောင်များဖြင့် မိသားစုဖြစ်နေခြင်း ကြောင့် ပြည်ထောင်စုရွေးကောက်ပွဲကော်မရှင်(UEC)က ANP ပါတီအား ပုဒ်မ ၇ ဖြင့် ညှိစွန်းသည်ဟုဆိုကာ မှတ်ပုံ တင်ခွင့် ငြင်းပယ်လိုက်ခြင်း ဖြစ်နိုင်သည်ဟု နိုင်ငံရေးအကဲခတ်များက ပြောသည်။

CNI News

၂၀၂၄ ခုနှစ်၊ ဇူလိုင် ၂၅

စစ်ရေးအပြင်းအထန် ဖြစ်ပွားနေသော ရှမ်းပြည်နယ်မြောက်ပိုင်းမှာ ဘယ်လိုအခြေအနေ ရှိနေသလဲ ဆိုသည့် အပေါ် နိုင်ငံရေးနှင့် စစ်ရေးအကဲခတ်များက သုံးသပ်လျက်ရှိနေသည်။

ရှမ်းပြည်နယ်မြောက်ပိုင်း၊ လားရှိုးမြို.ရှိ မြန်မာ့တပ်မတော်၏ အရှေ့မြောက်တိုင်းစစ်ဌာနချုပ်(ရမခ)ကို မြန်မာ အမျိုးသားဒီမိုကရက်တစ် မဟာမိတ်တပ်မတော် (MNDAA) က ယနေ့ (ဇူလိုင် ၂၅ ရက်နေ့) နံနက် ၄ နာရီမှာ သိမ်းပိုက်နိုင်ခဲ့ကြောင်း သတင်းထုတ်ပြန်ခဲ့သည်။

အဆိုပါ ကိစ္စနှင့် ပတ်သက်၍ နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက “မှန်ကန်မှု မရှိပါ။ လားရှိုးမြို့အချို့ အစွန်ရပ်ကွက်များသို့ သောင်းကျန်းသူများ စိမ့်ဝင်လာ၍ လိုက်လံရှင်းလင်းနေ” ဟု ထုတ်ပြန်ပြောကြားထားသည်။

လက်ရှိတွင်လည်း လားရှိုးမြို့အတွင်း လက်နက်ကြီး ပစ်ခတ်မှု၊ လေကြောင်းတိုက်ခိုက်မှု၊ နှစ်ဖက်တိုက်ခိုက်မှုများ ရှိနေကြောင်း သိရသည်။

MNDAA အနေဖြင့် ယခု ဇူလိုင်လကုန်အထိ အပစ်အခတ် ရပ်စဲထားသည်ဟု ကြေညာထားသော်လည်း အောက်ခြေတွင် တိုက်ပွဲများ ဆက်လက်ဖြစ်ပွားနေမှာဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

မြန်မာ့တပ်မတော်ကို တွေ့ရစဉ်

၎င်းက “အခုကတော့ တရုတ်ရဲ့ ဖိအားကြောင့် MNDAA နဲ့တော့ တရားဝင် လားရှိုးတိုက်ပွဲကို အင်ကြီး အားကြီးနဲ့ ဆက်ပြီးတော့ တိုက်ဖို့အတွက် အကန့်အသတ် ဖြစ်သွားတာပေါ့၊ ဒါပေမဲ့ အောက်ခြေမှာကတော့ လားရှိုးကို ဝန်းရံ ထားတဲ့ တပ်တွေနဲ့ နောင်ချိုဖက်မှာ လှုပ်ရှားနေတဲ့ TNLA ရဲ့ တိုက်ပွဲတွေလည်း ဆက်လက်ရှိနေမှာ ဖြစ်တဲ့အတွက် ဗမာပြည်ရဲ့ စစ်ရေးလှုပ်ရှားမှုဟာ ပိုပြီးတော့ ပြင်းထန်လာစရာပဲ ရှိတယ်လို့ ကျနော်တို့ သုံးသပ်ပါတယ်” ဟု ပြော သည်။

ပြီးခဲ့သည့် ဇွန်လ ၂၅ ရက်က စတင်ပြီး ရှမ်းပြည်နယ်မြောက်ပိုင်းတွင် ညီနောင်မဟာမိတ်တပ်ဖွဲ့တို့ တစ်ကြော့ပြန် တိုက်ပွဲများ စတင်ဖော်ဆောင်ခဲ့ပြီး လားရှိုး၊ ကျောက်မဲ၊ နောင်ချို၊ မိုးကုတ်၊ မတ္တရာ၊ စဉ့်ကူးတို့တွင် မြန်မာ့တပ်မတော်နှင့် တိုက်ပွဲများ ဖြစ်ပွားလျက်ရှိနေသည်။

တိုက်ပွဲများ အပြင်းအထန် ဖြစ်ပွားခဲ့သော ကျောက်မဲမြို့တွင် တိုက်ပွဲငြိမ်နေသည်မှာ ၃ ရက်ရှိပြီဖြစ်ကြောင်း၊ လက်နက်ကြီးဖြင့် ပစ်ခတ်မှုရှိနေကြောင်း၊ ကျောက်မဲမြို့ခံ ၉၀ ရာခိုင်နှုန်းမှာ ဘေးလွှတ်ရာသို့ တိမ်းရှောင်သွားပြီ ဖြစ်ကြောင်း ကျောက်မဲဒေသခံတစ်ဦးက CNI သတင်းဌာနသို့ ပြောသည်။

MNDAA တပ်ဖွဲ့ကို တွေ့ရစဉ်

၎င်းက “လက်ရှိအနေအထားက ငြိမ်နေတာ ၃ ရက်ရှိပြီ။ အနေအထားကလေ။ ၃ ရက်ရှိပြီ မြို့ထဲ(ကျောက်မဲ)မှာ တိုက်ပွဲမဖြစ်တာ၊ တပ်နဲ့ ကျန်နေတဲ့ ၅၀၁၊ ၅၀၂ အဲဒီလိုမျိုး အဲဒီတပ်နဲ့ပဲ လှမ်းပစ်တာတွေ ဖြစ်ကြတာ။ မြို့ပြင်မှာ ပေါ့၊ မြို့တွင်းမှာတော့ လောလောဆယ် မရှိကြဘူး။ ကျနော်မနေ့က အခြေအနေအထိ သိထားတဲ့ အခြေအနေ ဖြစ်တယ်၊ ဒီနေ့(ဇူလိုင် ၂၅ ရက်)မနက်တော့ ကျနော် မသိရသေးဘူး” ဟု ပြောသည်။

ညီနောင်မဟာမိတ်တို့ ဆင်နွှဲခဲ့သည့် ၁၀၂၇ ဒုတိယလိုင်းတွင် နောင်ချို၊ စဉ့်ကူး၊ မိုးကုတ်မြို့ကို TNLA နှင့် ပူးပေါင်း တပ်များက တိုက်ခိုက်သိမ်းပိုက်ထားကြောင်း ထုတ်ပြန်ထားပြီး အဆိုပါကိစ္စတွင် နစကဖက်မှ တစ်စုံတစ်ရာ ထုတ်ပြန်ခြင်း မရှိသည်ကို တွေ့ရသည်။

TNLA နှင့် MNDAA ကို တိုက်ပွဲရပ်စဲရန် တရုတ်က အကြီးအကျယ် ဖိအားပေးနေကြောင်း၊ တိုက်ပွဲမရပ်ပါက မြန်မာ့တပ်မတော်ကို ထိရောက်သည့် လက်နက်အကူအညီများ ပေးမည်ဖြစ်သလို TNLA နှင့် MNDAA ခေါင်းဆောင်များကို တရုတ်က အရေးယူမည်ဖြစ်ကြောင်း၊ ထို့ကြောင့် ယခုလကုန်ပိုင်းတွင် တိုက်ပွဲများ ရပ်သွား နိုင်ကြောင်း၊ TNLA နှင့် MNDAA တို့သည် တိုက်ပွဲမရပ်ခင် ရသလောက် တိုက်ယူနေသည့် အနေအထားဖြစ်နိုင် ကြောင်း မြောက်ပိုင်းမဟာမိတ်အဖွဲ့နှင့်နီးစပ်သူ တစ်ဦးက ပြောသည်။

CNI News

၂၀၂၄ ခုနှစ်၊ ဇူလိုင် ၂၅

ရှမ်းပြည်နယ်မြောက်ပိုင်း၊ လားရှိုးမြို့အခြေစိုက် အရှေ့မြောက်ပိုင်းတိုင်းစစ်ဌာနချုပ်(ရမခ) ကျသွားပြီဆိုသည်မှာ မှန်ကန်မှုမရှိဘဲ လက်နက်ကိုင်များကို လိုက်လံတိုက်ခိုက်ရှင်းလင်းနေသည်ဟု နစကသတင်းထုတ်ပြန်ရေးအဖွဲ့ ခေါင်းဆောင် ဗိုလ်ချုပ်ဇော်မင်းထွန်းက ဇူလိုင် ၂၅ ရက်နေ့တွင် ပြောသည်။

၂၃ ရက်ကြာ တိုက်ပွဲများ ဖြစ်ပွားပြီးနောက် MNDAA မှ လားရှိုးမြို့ အရှေ့မြောက်စစ်ဒေသဌာနချုပ်ကို ဇူလိုင် ၂၅ ရက်နေ့ နံနက် ၄ နာရီတွင် လုံးဝ သိမ်းပိုက်နိုင်ခဲ့သည်ဟု MNDAA က ထုတ်ပြန်ခဲ့သည်။

ထို့နောက် လားရှိုးမြို့ကို လုံးဝ လွတ်မြောက်ကြောင်း MNDAA ၏ ရှေ့တန်းစစ်ဌာနချုပ်က ကြေညာခဲ့သလို လားရှိုးမြို့လွတ်မြောက်ရေး တော်လှန်ရေး လှုပ်ရှားမှုသည် သမိုင်းဝင်အောင်ပွဲတစ်ခုဖြစ်သည်ဟုလည်း MNDAA က ထုတ်ပြန်ခဲ့သည်။

လားရှိုးမြို့နယ်ရှိ စစ်စခန်းတစ်ခုကို MNDAA သိမ်းလိုက်စဉ်

အဆိုပါ ထုတ်ပြန်ချက်ကို MNDAA က ၂၀၂၄ ခုနှစ်၊ ဇူလိုင် ၂၅ ရက်နေ့ မွန်းလွဲ ၁၁ နာရီတွင် ထုတ်ပြန်ခဲ့သည်။

ဗိုလ်ချုပ်ဇော်မင်းထွန်းက “မှန်ကန်မှုမရှိပါ။ လားရှိုးမြို့အချို့အစွန်ရပ်ကွက်များသို့ သောင်းကျန်းသူများ စိမ့်ဝင် လာ၍ လိုက်လံရှင်းလင်းနေသည်”ဟု ဇူလိုင် ၂၅ ရက်နေ့ မွန်းလွဲ ၁၁ နာရီ ၅၅ မိနစ်တွင် ပြောကြားခဲ့သည်။

လက်ရှိတွင် လားရှိုးမြို့အတွင်းမှာ မြန်မာ့တပ်မတော်နှင့် MNDAA – PDF ပူးပေါင်းတပ်ဖွဲ့ကြား တိုက်ပွဲများ အပြင်းအထန် ဖြစ်ပွားနေသည်။

မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)သည် ဇူလိုင်လကုန်အထိ အပစ်အခတ်ရပ်စဲ ကြောင်း ထုတ်ပြန်ကြေညာထားသည့်တိုင် လားရှိုးမြို့ရှိ ရမခတိုင်းစစ်ဌာနချုပ်နှင့် မြန်မာ့တပ်မတော်၏ စစ်စခန်း များကို တိုက်ခိုက်နေခြင်းက မေးခွန်းထုတ်စရာ ဖြစ်နေသည်ဟု စစ်ရေးအကဲခတ်များက ထောက်ပြကြသည်။

CNI News

၂၀၂၄ ခုနှစ်၊ ဇူလိုင် ၂၄

ကရင်အမျိုးသားအစည်းအရုံး(KNU)ဒုဥက္ကဋ္ဌဟောင်း နော်စီဖိုးရာစိန်သည် ၂၀၂၄ ခုနှစ်၊ ဇူလိုင် ၂၄ ရက်တွင် ထိုင်း-မြန်မာနယ်စပ် တစ်နေရာမှာ ကွယ်လွန်သွားကြောင်း နီးစပ်သူများထံမှ သိရသည်။

နော်စီဖိုးရာစိန်သည် KNU ဥက္ကဋ္ဌဟောင်း တာမလာဘော၏ သမီးဖြစ်ပြီး ၁၉၅၅ ခုနှစ်တွင် ကရင်ပြည်နယ်၌ မွေးဖွားခဲ့သည်။ 

ထို့နောက် ကျောင်းဆရာမအဖြစ် ၁၉၉၅ ခုနှစ်အထိ လုပ်ကိုင်ခဲ့ပြီး ၁၉၈၈ ခုနှစ်မှ ၂၀၀၈ ခုနှစ်အထိ ကရင်အ မျိုးသမီးဒုက္ခသည်များအား ကူညီဆောင်ရွက်ပေးသည့် ကရင်အမျိုးသမီးအစည်းအရုံးတွင် အထွေထွေ အတွင်းရေးမှူးအဖြစ် တာဝန်ယူခဲ့သည်။

နော်စီဖိုးရာစိန်ကို တွေ့ရစဉ် (ဧရာ၀တီ)

အလားတူ ကရင်အမျိုးသားအစည်းအရုံး(KNU)တွင် ဒုဥက္ကဋ္ဌအဖြစ် ၂၀၁၂ ခုနှစ်က နော်စီဖိုးရာစိန် ရွေးချယ် တင်မြှောက်ခံခဲ့ရပြီး ငြိမ်းချမ်းရေးလုပ်ငန်းစဉ်များ၌ ပါဝင် ဆောင်ရွက်ခဲ့သည်။

နော်စီဖိုးရာစိန်သည် KNU အတွင်းမှာ သဘောထား တင်းမာသူအဖြစ် ကျော်ကြားလှပြီး မြန်မာ့တပ်မတော် အပေါ် သံသယကြီးသူအဖြစ်လည်း ထင်ရှားကြောင်း ငြိမ်းချမ်းရေးလုပ်ငန်းစဉ်တွင် လုပ်ကိုင်ခဲ့သူများက ပြောသည်။

CNI News

၂၀၂၄ ခုနှစ်၊ ဇူလိုင် ၂၄

တော်လှန်ရေး အောင်မြင်ပြီးလျှင် ဟန်လူမျိုးကြီးဝါဒကို ဘယ်တော့မှ အကောင်အထည်ဖော်မှာမဟုတ်ဘူးဟု မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)က ၂၀၂၄ ခုနှစ်၊ ဇူလိုင် ၂၃ ရက်တွင် ပြော ကြားခဲ့သည်။

မြန်မာ့တပ်မတော်မှ တပ်ဖွဲ့ဝင်များ အလင်းဝင်မှု လက်ခံခြင်း အခမ်းအနားတွင် MNDAA ၏ အရာရှိတစ်ဦးက အထက်ပါအတိုင်း ပြောကြားခဲ့ခြင်းဖြစ်သည်။

MNDAA အရာရှိက “တိုင်းရင်းသား လက်နက်ကိုင်တော်လှန်တဲ့ အဖွဲ့အစည်းတွေအားလုံးက ဗမာလူမျိုးကြီး ဝါဒကို ဆန့်ကျင်ကြသည်။ တော်လှန်ရေးအောင်မြင်ပြီးရင် ဟန်လူမျိုးကြီးဝါဒကို ဘယ်တော့မှ အကောင်အ ထည်ဖော်မှာ မဟုတ်ပါ။ တိုင်းရင်းသားလူမျိုးစုအားလုံး၏ အဆင့်အတန်းမခွဲခြားဘဲ တန်းတူညီမျှရေးကို ထောက်ခံအားပေးပြီး တိုင်းရင်းသားအားလုံး၏ နိုင်ငံရေးဆန္ဒနှင့် ကိုယ်ပိုင်ပြဋ္ဌာန်းခွင့်ကို အပြည့်အဝ လေးစား ပါသည်”ဟု ပြောသည်။

ထို့နောက် ပြည်ထောင်စုကို ပိုင်းခြားမည် မဟုတ်ကြောင်း၊ တိုင်းရင်းသားအားလုံး ကိုယ်ပိုင်အုပ်ချုပ်ခွင့်ကို လွတ်လပ်စွာ ခံစားနိုင်သော ဒီမိုကရေစီဖက်ဒရယ်ပြည်ထောင်စုနိုင်ငံတော် တည်ဆောက်ရာတွင် တက်ကြစွာ ပါဝင်ဆောင်ရွက်နေသည်ဟု ၎င်းက ပြောသည်။

မြန်မာအစိုးရသည် MNDAA သည် ကိုးကန့်လူမျိုးစု လက်နက်ကိုင်အဖြစ် နားလည်ထားသော်လည်း MNDAA ကမူ မိမိတို့သည် ကိုးကန့်လူမျိုးများဖြစ်သည်ဟု ပြောဆိုခြင်းထက် ဟန်လူမျိုး(တရုတ်)များ ဖြစ်ကြောင်းသာ ပြောဆိုလေ့ရှိခြင်းက မေးခွန်းထုတ်စရာဖြစ်နေကြောင်း မြန်မာနိုင်ငံရေးအသိုင်းအဝိုင်းက ထောက်ပြလျက်ရှိ သည်။

MNDAA တပ်ဖွဲ့ကို တွေ့ရစဉ်

တရုတ်နိုင်ငံတွင် လူမျိုးနွယ်စု ပေါင်းများစွာရှိသည့်အနက် ဟန်လူမျိုးသည် လူမျိုးကြီးဖြစ်သည်။

MNDAA သည် ၂၀၂၃ ခုနှစ်၊ အောက်တိုဘာ ၂၇ ရက်နေ့က အကောင်အထည်ဖော်ခဲ့သော ၁၀၂၇ စစ်ဆင်ရေးတွင် ကိုးကန့်ဒေသကို တိုက်ခိုက်သိမ်းပိုက်ခဲ့ပြီးနောက် လောက်ကိုင်မြို့၌ အုပ်ချုပ်ရေးထူထောင်စဉ် ဗမာတိုင်းရင်းသား များကို ထွက်ခွာခိုင်းခဲ့သလို လောက်ကိုင်မြို့သို့ ဗမာတိုင်းရင်းသားများကို ပြန်လည်အဝင်မခံတော့ပဲကြောင်း၊ လောက်ကိုင်မြို့ရှိ ဗမာတိုင်းရင်းသားများ နေထိုင်သည့် နေရာအဆောက်အအုံများကို ဖြိုချဖျက်ဆီးပစ်ခဲ့ကြောင်း လောက်ကိုင်မြို့မှ ထွက်ခွာလာရသူများက ပြောသည်။

ထို့ကြောင့် MNDAA ပြောဆိုသုံးနှုန်းနေသည့် ဟန်လူမျိုးဆိုသည်မှာ တရုတ်လူမျိုးဟု ခံယူနေသည့် သဘော သက်ရောက်နေခြင်းကြောင့် မြန်မာနိုင်ငံအတွင်း လက်နက်ကိုင် တော်လှန်ရေး၏ နောက်ကွယ်မှာ တရုတ်နိုင်ငံ ရှိနေ မလား မြန်မာ့နိုင်ငံရေး အသိုင်းအဝိုင်းကြား မေးခွန်းထုတ်လျက်ရှိနေသည်။

လက်ရှိတွင် MNDAA သည် ရှမ်းပြည်နယ်မြောက်ပိုင်း၊ လားရှိုးမြို့ရှိ အရှေ့မြောက်ပိုင်းတိုင်းစစ်ဌာနချုပ်(ရမခ) အပါအဝင် လားရှိုးမြို့ကို ကာကွယ်နေသော မြန်မာ့တပ်မတော် စစ်စခန်းများနှင့် ဌာနချုပ်များကို တိုက်ခိုက် လျက်ရှိနေသည်။

MNDAA ကို ၁၉၈၉ ခုနှစ်က ဗမာပြည်ကွန်မြူနစ်ပါတီ(ဗကပ)ကနေ ဖုန်ကြားရှင်က ခွဲထွက်ကာ ထူထောင်ခဲ့ ခြင်းဖြစ်သည်။

CNI News

၂၀၂၄ ခုနှစ်၊ ဇူလိုင် ၂၄

ပြည်တွင်း ပဋိပက္ခချုပ်ငြိမ်းပြီး ငြိမ်းချမ်းရေးရရှိဖို့ တိုက်ရင်းဆွေးနွေးဆိုသည့် နည်းလမ်းကို အသုံးပြုရန် လိုအပ်ကြောင်း ငြိမ်းချမ်းရေးလုပ်ငန်းစဉ်တွင် ပါဝင်နေသူ စဝ်ခွန်းဆိုင်က CNI သတင်းဌာနသို့ ပြောသည်။

လက်နက်ကိုင် တိုက်ခိုက်၍လည်း အဖြေမရရှိနိုင်ကြောင်း၊ တစ်ခုချင်းမဟုတ်ဘဲ နှစ်ခုစလုံးကို ပူးတွဲ လုပ်ဆောင်ရန် လိုအပ်ကြောင်း ၎င်းက ပြောသည်။

စဝ်ခွန်းဆိုင်က“တိုက်ရင် ဖြေရှင်းနိုင်မလား၊ ဆွေးနွေးရင် ဖြေရှင်းနိုင်မလား၊ နှစ်ခုစလုံးက တစ်ခုချင်း လုပ်သွား မယ်ဆိုရင် မဖြေရှင်းနိုင်ဘူး။ ဒါပေမဲ့ ပူးတွဲပြီးမှ လုပ်သွားလို့ရှိရင် ဖြေရှင်းနိုင်ဖို့ လမ်းပေါ်လာမယ်၊ ကျနော်တို့ ပညာရှင်၊ စစ်ပညာရှင် ဆွန်ဇူးက ပြောခဲ့တယ်။ အောင်ပွဲရယူဖို့က တိုက်ရိုက်နည်းရှိတယ်၊ နောက်ပြီးတော့မှ သွယ်ဝိုက် နည်းရှိတယ်။ ဒီတိုက်ရိုက်နည်းနဲ့ သွယ်ဝိုက်နည်းကို ပူးတွဲပြီးတော့မှ အသုံးချဖို့လိုတယ်၊ တစ်ခုချင်း မဟုတ်ဘူး။ နှစ်ခုစလုံးကို ပူးတွဲပြီးတော့ သုံးနိုင်မယ်ဆိုရင် အောင်ပွဲကို ရယူနိုင်တယ်လို့ ပြောထားပါတယ်။ ဒီတော့ ကျနော်တို့လည်း အဲဒီနည်းနဲ့ပဲ လုပ်သွားဖို့ လိုတယ်လို့” ဟု CNI သတင်းဌာနသို့ ပြောသည်။

ကိုးကန့်တပ်ဖွဲ့ MNDAA ကိုတွေ့ရစဉ်

မြန်မာနိုင်ငံမှာ ၁၉၄၈ ခုနှစ်၊ လွတ်လပ်ရေးနှင့်အတူ ဗမာမဟုတ်သော တိုင်းရင်းသားများ၏ တန်းတူရေး၊ ကိုယ်ပိုင် ပြ ဋ္ဌာန်းပိုင်ခွင့်များ ရရှိရေးအတွက် လက်နက်ကိုင်တော်လှန်ရေးကို စတင်ဆင်နွှဲခဲ့ကြပြီး ပြည်တွင်းလက်နက်ကိုင် ပဋိပက္ခ စတင်ဖြစ်ပွားလာခဲ့သည်။

ပြည်တွင်းစစ် ဖြစ်ပွားလာခဲ့ပြီး နှစ်ပေါင်း ၇၀ ကျော်ကြာခဲ့သော်လည်း ဖြေရှင်းနိုင်ခြင်း မရှိသေးဘဲ ငြိမ်းချမ်းရေးရရှိ ရန် ကြိုးပမ်းနေဆဲ ကာလတွင် ၂၀၂၁ ခုနှစ်၊ ဖေဖော်ဝါရီ ၁ ရက်နေ့မှာ နိုင်ငံရေး သဘောထားကွဲလွဲမှုကြောင့် နိုင်ငံအနှံ့အပြား တိုက်ပွဲများ ဖြစ်ပွားလာခဲ့သည်။

ယခင်ကတည်းက တိုင်းရင်းသားအရေးကို အလေးထား မဖြေရှင်းနိုင်ခဲ့၍ ယခုအခြေအနေထိ ရောက်ရှိခဲ့ကြောင်း၊ လက်နက်ကိုင်ယဉ်ကျေးမှု ထွန်းကားသွားသည့်အတွက် ပဋိပက္ခမှာ ရေရှည်ဖြစ်သွားနိုင်ကြောင်း ရခိုင်အမျိုးသား ပါတီ (ANP) မှ မူဝါဒရေးရာ ဦးဆောင်ကော်မတီတွင် ဦးထွန်းအောင်ကျော်က CNI သတင်းဌာနသို့ ပြောသည်။

ကရင်နီ KNDF ရဲဘော်များကို တွေ့ရစဉ်

၎င်းက “အစကတည်းက တိုင်းရင်းသားအရေးကို အလေးအနက်ထားပြီးတော့ စေတနာထားပြီး‌တော့ ဖြေရှင်း ဆောင်ရွက်ခဲ့ရင် ဒီအခြေအနေကို ရောက်မှာ မဟုတ်ဘူး၊ အခုက အရမ်းကို ခက်ခဲကျယ်ပြန့်သွားပြီ။ အဖြေတောင် မှ ကျနော်တို့ စဉ်းစားလို့မရတဲ့ အခြေအနေ ဖြစ်သွားတယ်။ အားလုံးက နိုင်ငံရေးဘောင်ကျဉ်းပြီးတော့မှ လက်နက်ကိုင်ယဉ်ကျေးမှုက ထွန်းကားသွားတဲ့အခါ ဒီပြဿနာကို ဘယ်လို ဖြေရှင်းမလဲဆိုတာကတော့ ကျနော် တို့လည်း ဥာဏ်မမှီတော့ဘူး။ ဘယ်လိုဖြေရှင်း ဆောင်ရွက်ရမလဲ ဆိုတာကတော့ ကျနော်တို့ကတော့ ရေရှည် အချိန်ယူပြီးတော့ အချိန်ကြာလိမ့်မယ်လို့ ယူဆပါတယ်” ဟု ပြောသည်။

ပြည်တွင်း လက်နက်ကိုင်ပဋိပက္ခကို ဖြေရှင်းနိုင်ရန် တိုင်းရင်းသားလက်နက်ကိုင် အဖွဲ့အစည်းအချို့၊ နိုင်ငံရေးပါတီ အချို့၊ တိုင်းရင်းသား အင်အားစုများ၊ အာဆီယံ အပါအဝင် နိုင်ငံတကာအဖွဲ့အစည်းအချို့က ကြိုးပမ်းလျက်ရှိ နေသည်။

သို့သော်လည်း လက်ရှိ လက်နက်ကိုင် တိုက်ပွဲများအတွင်း ပါဝင်ပတ်သက်နေကြသော အဖွဲ့အစည်းများမှာ တွေ့ဆုံဆွေးနွေး ဖြေရှင်းရေးထက် တစ်ဖက်နှင့် တစ်ဖက် အပြုတ်တိုက်ရေးကိုသာ ဦးတည်လုပ်ဆောင်နေကြ ကြောင်း သိရသည်။