CNI News
၂၀၂၄ ခုနှစ်၊ အောက်တိုဘာ ၂၁
ကချင်လွတ်လပ်ရေးတပ်မတော်(KIA)ကို စစ်ပွဲရပ်ဆိုင်းရန် ဖိအားပေးပြီးနောက် နယ်စပ်ဂိတ်များကို တရုတ်က ပိတ်လိုက်ခြင်းက လက်တွေ့မှာ တကယ်ပိတ်ဆို့နိုင်ပါ့မလားဟု စစ်ရေးအကဲခတ်များကြား မေးခွန်းထုတ်လျက်ရှိ နေသည်။
တရုတ်အထူးကိုယ်စားလှယ် တိန့်ရှီးကျွင်းသည် KIA ခေါင်းဆောင် ဗိုလ်ချုပ်ကြီးဂွမ်ရှောင်နှင့် တွေ့ဆုံ၍ စစ်ပွဲများ ရပ်တန့်ရန် အောက်တိုဘာ ၁၇ ရက်နေ့က တွေ့ဆုံဆွေးနွေးခဲ့ကြောင်း သတင်းများထွက်ပေါ်ခဲ့သည်။
ထို့နောက် တရုတ်နယ်စပ်လည်းဖြစ်သလို တရုတ်၏ မြေရှားသတ္ထူတူးဖော်ရေးနှင့် တခြားသော သယံဇာတ တူးဖော်ရေးလုပ်ငန်းများရှိသည့် ပန်ဝါမြို့ကို KIA က တိုက်ခိုက်သိမ်းပိုက်ခဲ့သည်။
ကချင်ပြည်နယ် ပန်ဝါမြို့ကို တွေ့ရစဥ်
ပန်ဝါမြို့ကို KIA က တိုက်ခိုက်သိမ်းပိုက်ခဲ့ပြီးနောက်မှာ တရုတ်က KIA ဌာနချုပ် လိုင်ဇာ၊ မိုင်ဂျာယန်၊ လိုင်ဆင်၊ ခါရှန်ဂိတ် စသည့် နယ်စပ်ကုန်သွယ်ရေးဂိတ်ပေါက်များကို ပိတ်လိုက်သည်။
တရုတ်ဖိအားသည် နိုင်ငံရေးအရ ဆန္ဒဖော်ထုတ်ခြင်းသာဖြစ်ပြီး အောက်ခြေ နယ်စပ်များတွင်တော့ လက်တွေ့ ပိတ်ပင်ဖို့ ခက်ခဲနိုင်ကြောင်း ပအိုးဝ်အမျိုးသားလွတ်မြောက်ရေးအဖွဲ့ချုပ် (PNLO-NCA/S)မှ ဥက္ကဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။
၎င်းက "ဟုတ်ကဲ့၊ တရုတ်ဖိအားကတော့ နိုင်ငံရေးအရ သူ့ရဲ့ဆန္ဒကို ဖော်ထုတ်တာပေါ့၊ ခင်ဗျားတို့ မလုပ်နဲ့ လုပ်ရင် နယ်စပ်ပိတ်မယ်၊ ဒီလောက်ပါပဲ။ လက်တွေ့ အောက်ခြေ နယ်စပ်မှာကတော့ တော်တော်လေး လက်တွေ့ပိတ်ဖို့ တော်တော်ခက်ပါတယ်။ တရုတ်ရဲ့ ယူနန်ပြည်နယ်ထဲက ကချင်တွေ အများအပြားက KIO နဲ့က ညီနောင်တွေ၊ ဆွေမျိုးသားချင်းလို၊ မိသားစုလိုဖြစ်နေတာ။ ဖြစ်နေတော့ အဲတာကိုတော့ သူတို့အသေးစိတ် ပိတ်ဆို့ဖို့ လွယ်မယ် လို့ ကျနော်မထင်ပါဘူး။"ဟု ပြောသည်။
KIA အနေဖြင့် ပန်ဝါမြို့တွင် စိုးမိုးနေသော ကုန်သွယ်ရေးနှင့် ပြည်သူ့စစ်၊ နယ်ခြားစောင့်တပ်များအား သိမ်းယူရ သည့် အကြောင်းအရင်းသည် မြန်မာ့တပ်မတော် အားနည်းနေသော အချိန်တွင် ကချင်ပြည်၏ နယ်မြေ အစိတ် အပိုင်းများကို ပြန်လည်စုစည်းချင်သော သဘောဖြစ်နိုင်ကြောင်း နိုင်ငံရေးလေ့လာသုံးသပ်သူများက ထောက်ပြ ကြသည်။
တရုတ်သည် သူ၏ မဟာဗျူဟာအရသာ ပြောဆိုနေခြင်းဖြစ်ကြောင်း၊ နှစ်နိုင်ငံနယ်စပ် နှစ်ဖက်စလုံးတွင် ကချင် များရှိသောကြောင့် တရုတ်အနေဖြင့် လူမျိုးစုပေါ်လစီအား ထောက်ထားရ၍ ပိုမိုဖိအားများပေးလာနိုင်ခြင်း မရှိကြောင်း တရုတ်-မြန်မာအရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။
လိုင်ဇာ-နဘန် တရုတ်-မြန်မာ နယ်စပ်ဂိတ်ကို တွေ့ရစဥ်
၎င်းက "တရုတ်ကလည်း သူ့ရဲ့မဟာဗျူဟာနဲ့ ပြောနေမှာပဲလေ။ ကျမတို့ကလည်း ကိုယ့်လုပ်စရာရှိတာ လုပ်တာ ပေါ့ဗျာ။ တရုတ်က ဒီထက်ပိုပြီးတော့လည်း ဖိအားပေးမလာနိုင်ပါဘူး။ သူပိတ်ဆို့တယ်ဆိုတာ ပိတ်လည်း ကျမတို့ တခြားနည်းလမ်းတွေနဲ့ ရှာလို့ရတာပဲလေနော်၊ ဒါပြဿနာမဟုတ်ဘူးဗျ။ အဲဒီနယ်စပ်မှာ ဒီဘက်ကချင်၊ ဟိုဘက် ကချင်ရှိတယ်။ သူတို့တရုတ်ပြည်ထဲက ကချင်တွေက အစိုးရက နယ်နိမိတ် ပိတ်ထားတာတောင် အပိတ်မခံဘူး။ သူ့လူတွေရယ်၊ သူတို့အမျိုးတွေဆိုရင် သူတို့ဟာသူတို့ လက်ခံနေတာပဲ။ အဲတော့ တရုတ်ပြည် အနေနဲ့ကလည်း သူက လူမျိုးစုပေါ်လစီကို တော်တော် ထောက်ထောက်ထားထား လုပ်ရတော့ အရမ်းမလုပ်ရဲဘူးဗျ။ နယ်နိမိတ် တွေ ဖြတ်ပြီးပြေးလာတဲ့ စစ်ဘေးဒုက္ခသည်တို့ ဘာတို့လည်းဒီလိုပဲ ဝင်တာပဲ။ ကျမသိသလောက်လေ ဒီဘက်က ကချင်တွေက နှစ်စဥ်နှစ်တိုင်း ဟိုဘက်က စစ်ဘေးရှောင်စခန်းတို့ ကချင်တို့ဘာတို့ အဝတ်အစားတွေလှူ၊ ကလေး တွေ ကျောင်းပစ္စည်းတွေလှူ အဲလိုလုပ်နေတာဗျ။ အဲတော့ တရုတ်ပြောလည်း ပြောပြောပေါ့ဗျာ၊ KIA က သူ လုပ်စရာရှိတာ ဆက်လုပ်မှာပါပဲ"ဟု ပြောသည်။
ထို့ပြင် KIA အနေဖြင့် ကချင်ပြည်နယ် ထူထောင်ချင်နေသောကြောင့် သူ့နယ်မြေများ ပြန်လည်သိမ်းယူခြင်း ဖြစ်ကြောင်း ဒေါက်တာလှကျော်ဇောက ဆက်ပြောသည်။
၎င်းက "KIA ကလည်း ကချင်ပြည်နယ် သူ့ဟာသူထောင်ချင်နေတာလေ။ အဲတော့ ကချင်ပြည်နယ်ပဲ ဖြစ်တာကိုး ပန်ဝါက။ တကယ်တော့ အစတုန်းကလည်း KIA ပိုင်ထားတာဖြစ်တယ်လေ။ ဇခုန်တိန့်ယင်းက အစက KIA ဗျ။ အဲဒီကမှ ဇခုန်တိန့်ယင်းက ကျမတို့ ဗကပ ထဲရောက်တာ။ ဗကပ-က ခွဲထွက်ပြီးခါမှ ဗိုလ်ခင်ညွန့်ရဲ့ ပြည်သူ့စစ်ဖြစ်တာဗျ၊ ဇာတ်လမ်းက တော်တော်ရှုပ်တယ်။ အဲတော့ ကချင်ကလည်း သူ့နေရာသူ ပြန်ယူတဲ့ သဘောပဲ၊ အဲဒီဒေသအားလုံးက ကချင်ရွာတွေဗျ၊ ကျမတို့ နေခဲ့ဖူးတယ်"ဟု ပြောသည်။
KIA ထိန်းချုပ်ထားသည့် တရုတ်နယ်စပ် တစ်လျှောက်တွင် စစ်ပြေးဒုက္ခသည် ၄၀၀၀ ခန့်နှင့် ပြည်သူ သောင်းနှင့်ချီ၍ရှိပြီး လိုအပ်သော စားသောက်ကုန်နှင့် လူသုံးကုန်များအား တရုတ်ဘက်မှ တင်သွင်းနေ ကြရသည်။
ရှမ်းပြည်နယ်မြောက်ပိုင်းတွင် ညီနောင်မဟာမိတ် ၃ ဖွဲ့(MNDAA-AA-TNLA) သိမ်းပိုက်ထားသော ကျင်စန်းကျော့၊ ချင်းရွှေဟော်၊ ရန်လုံကျိုင်း၊ မုံးကိုးနှင့် နမ့်ခမ်း စသည့် တရုတ်နယ်စပ်ဂိတ် ၅ ခုကိုလည်း တရုတ်ဘက်မှ ပိတ်ဆို့ထားသည်။
