CNI News

၂၀၂၄ ခုနှစ်၊ ဇန်နဝါရီ ၃

လာမည့် ဇန်နဝါရီ ၄ ရက်နေ့တွင် ကျရောက်မည့် လွတ်လပ်ရေးနေ့အလွန်၌ ဒေါ်အောင်ဆန်းစုကြည် ပြန်လွတ် လာနိုင်သလားဆိုသည့်အပေါ် နိုင်ငံရေးအသိုင်းအဝိုင်းနှင့် သံတမန်အသိုင်းအဝိုင်းကြား သုံးသပ် ဆွေးနွေးမှုများ ကျယ်ကျယ်ပြန့်ပြန့် ထွက်ပေါ်နေသည်။

နေပြည်တော်မှာ ဖမ်းဆီးထိန်းသိမ်းခံထားရသော အမျိုးသားဒီမိုကရေစီအဖွဲ့ချုပ်(NLD) ခေါင်းဆောင် ဒေါ်အောင်ဆန်းစုကြည် ပြည်လည်လွတ်မြောက်လာရေးမှာ နစကနှင့် အပေးအယူအပေါ် မူတည်ကြောင်း တိုင်းရင်းသားလက်နက်ကိုင် ခေါင်းဆောင်တစ်ဦးဖြစ်သူ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

၎င်းက “အဲဒီဟာကတော့ ကျနော်ခုနက ပြောတဲ့ဟာပဲ ပြန်ပြောရမှာပေါ့၊ နိုင်ငံရေး မိုးလေဝသပေါ့ဗျာ၊ ဒေါ်အောင် ဆန်းစုကြည်ရဲ့ လက်ရှိ အခြေအနေအပေါ် သုံးသပ်ချက် နောက်ပြီး သူ့ရဲ့ ပါဝင်နိုင်မှုပေါ့၊ သူ့ရဲ့ Constitution ပေါ့၊ အပေးအယူပေါ့ဗျာ၊ အဲဒါတွေက ပြဿနာရှိတယ်လို့ ထင်တယ်။ အဲဒီဟာတွေကို ရှင်းနိုင်ရင် တော့ သူလည်းပဲ တိုင်းပြည် ပြန်လည်ထူထောင်တဲ့ နေရာမှာ ပြန်ပါလာမှာပေါ့။ အပေးအယူ မသင့်သေးဘူး။ အပေးအယူ မတည့် သေးဘူးဆိုရင်လည်း ဒီ Position နဲ့ပဲ ဆက်သွားမယ့် သဘောရှိတာပေါ့၊ ကျနော် အဲဒီလိုပဲ တွက်ပါတယ်” ဟု ပြောသည်။

ဒေါ်အောင်ဆန်းစုကြည်နဲ့ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

လက်ရှိတွင် ဒေါ်အောင်ဆန်းစုကြည်သည် အမှု ၁၉ မှုအတွက် ထောင်ဒဏ် ၃၃ နှစ် ကျခံနေရပြီး သြဂုတ်လ ၁ ရက်နေ့မှာ အမှု ၅ မှုအတွက် ၆ နှစ် လွတ်ငြိမ်းသက်သာခွင့်ရခဲ့ခြင်းကြောင့် ထောင်ဒဏ် ၂၇ နှစ် ဆက်လက် ကျခံရန် ကျန်ရှိနေသည်။

ဒေါ်အောင်ဆန်းစုကြည် ပြန်လည်လွတ်မြောက်လာရန် မိမိတို့အနေဖြင့် မျှော်လင့်ကြောင်း သို့သော်လည်း လက်ရှိ မြန်မာ့နိုင်ငံရေးမှာ ပြန်လည်ဝင်ရောက်ရန် အခက်အခဲရှိနိုင်ကြောင်း စည်းလုံးညီညွတ်သော တိုင်းရင်းသားလူမျိုး များမဟာမိတ် (UNA)မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

၎င်းက “ကျနော်ထင်တယ်၊ သူနိုင်ငံရေးထဲ ပြန်ဝင်လာရင်တော့ သူ့အတွက်လည်း အများကြီး စိန်ခေါ်မှုတွေ ရှိ တယ်ပေါ့ဗျာ၊ ဘာဖြစ်လို့လဲဆိုတော့ ကျနော်စောစောက ပြောသလိုပေါ့။ အသက်အရွယ်အားဖြင့်လည်း အရမ်း ကြီးနေတဲ့ အမယ်အိုတစ်ယောက်ကို ဒီထဲမှာ ထည့်ပြီးတော့ နိုင်ငံရေးကွင်းထဲမှာ ထပ်ရောက်လာလို့လည်း ကျနော် ထင်တယ်၊ အခုချိန်မှာ အခက်အခဲ ဖြစ်ပါလိမ့်မယ်။ အဲဒီတော့ ကျနော်အနေနဲ့က လွတ်လာတယ်ဆိုတောင်မှ သူ နိုင်ငံရေးထဲမှာ မဝင်ဘဲနဲ့ပဲ သွားသင့်တယ်လို့ ကျနော်ကတော့ အဲဒီလိုပဲ မြင်တယ်၊ သူဝင်လာခြင်းအားဖြင့် သူ့ရဲ့မူနဲ့ ဒီနေ့ ဒီဖက်မှာ ဒီ NUG တို့၊ CRPH တို့ဆိုတာ သူ့ရဲ့ မူနဲ့ရော ကိုက်ညီပါ့မလားပေါ့နော်၊ အဲဒီတော့ အချင်းချင်း ကွဲ တာ၊ ပြဲတာနဲ့ မလိုလားအပ်တဲ့ဟာတွေက သူ့ရဲ့ ကောင်းဂုဏ်သတင်းကိုလည်း ထိခိုက်နိုင်တယ်လို့ပဲ ကျနော်က တော့ မြင်ပါတယ်လို့” ဟု ပြောသည်။

NUG နဲ့ PDF ရဲဘော်များကို တွေ့ရစဉ်

ပြည်တွင်း/ပြည်ပ သံတမန်အသိုင်းအဝိုင်းကြားမှာတော့ ဒေါ်အောင်ဆန်းစုကြည်သည် လွတ်လပ်ရေးနေ့အလွန် လွတ်မြောက်လာနိုင်သလို နေအိမ်အကျယ်ချုပ် ပြန်ပို့နိုင်ကြောင်း သတင်းများ ထွက်ပေါ်နေသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က ဖြစ်ပေါ်ခဲ့သည့် နိုင်ငံရေး အပြောင်းအလဲကြောင့် အမျိုးသား ဒီမိုကရေစီအဖွဲ့ချုပ် (NLD)၏ ခေါင်းဆောင်များဖြစ်သော ဒေါ်အောင်ဆန်းစုကြည်၊ ဦးဝင်းမြင့် အပါအဝင် ပါတီဝင် အချို့ကို ဖမ်းဆီးထိန်းသိမ်းထားသည်။

တခြားတစ်ဖက်မှာတော့ NLD လွှတ်တော်အမတ်များနှင့် ဒီမိုကရေစီအရေး တောင်းဆိုသူများက အမျိုးသားညီ ညွတ်ရေးအစိုးရ(NUG)နှင့် ပြည်သူ့ကာကွယ်ရေးတပ်ဖွဲ့ (PDF)များ ဖွဲ့စည်းကာ မြန်မာ့တပ်မတော်ကို ဖြုတ်ချရေး လက်နက်ကိုင် တိုက်ခိုက်လျက်ရှိသည်။

CNI News

၂၀၂၄ ခုနှစ်၊ ဇန်နဝါရီ ၃

အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှုညှိနှိုင်းရေးကော်မတီ(NSPNC)နှင့် မြောက်ပိုင်း မဟာမိတ်သုံးဖွဲ့(MNDAA-TNLA-AA)တို့ တရုတ်နိုင်ငံ၊ ကူမင်းမြို့မှာ တတိယအကြိမ် တွေ့ဆုံ ဆွေးနွေးကြမည် ဟု နှစ်ဖက်စလုံးမှ နီးစပ်သူများထံကနေ သိရသည်။

အဆိုပါ တတိယအကြိမ် တွေ့ဆုံ ဆွေးနွေးမှုကို ဇန်နဝါရီ ၇-၈-၉ ရက်နေ့များတွင် ကျင်းပမည် ဖြစ်သည်။

ပထမအကြိမ် တွေ့ဆုံမှုကို ၂၀၂၃ ခုနှစ်၊ ဒီဇင်ဘာပထမအပတ်အတွင်း ကျင်းပခဲ့ပြီး ဒုတိယတွေ့ဆုံမှုကိုတော့ ဒီဇင်ဘာ ၂၃-၂၄ ရက်များက ကျင်းပခဲ့ကြသည်။ 

ထိုသို့ တွေ့ဆုံစဉ် အချိန် ၁၀ မိနစ်ခန့်သာ ကြာမြင့်ကြောင်းနှင့် မည်သည့် သဘောတူညီချက်မှ မရရှိခဲ့ကြောင်း သတင်းများ ထွက်ပေါ်ခဲ့သည်။

မြောက်ပိုင်းမဟာမိတ်သုံးဖွဲ့မှ ခေါင်းဆောင်များကို တွေ့ရစဉ်

သို့သော် မြောက်ပိုင်းမဟာမိတ်သုံးဖွဲ့နှင့် NSPNC တို့ဖြင့် နီးစပ်သူများကတော့ တွေ့ဆုံချိန်သည် နာရီ ၅၀ ကျော် ရှိကြောင်း၊ ပထမ တစ်ကြိမ် တွေ့ဆုံစဉ်က ယာယီအပစ်ရပ်ရန် နှစ်ဖက် လက်မှတ်ထိုးခဲ့ကြောင်း၊ ဒုတိယအကြိမ် တွေ့ဆုံမှုတွင် နယ်မြေတောင်းဆိုမှုများအပေါ် အပြန်အလှန် ဆွေးနွေးခဲ့ကြကြောင်း CNI သတင်းဌာနသို့ ပြော သည်။

၎င်းက “ စုစုပေါင်း ဆွေးနွေးပွဲ ၂ ကြိမ် လုပ်ပြီးပြီ၊ တတိယအကြိမ် လုပ်ဖို့ရှိတယ်။ ပြီးခဲ့တဲ့ ဆွေးနွေးပွဲ ၂ ကြိမ်မှာ ဆွေးနွေးပွဲကြာချိန် နာရီ ၅၀ ကျော်ရှိတယ်။ ပထမအကြိမ်က အပစ်ရပ်ဖို့လုပ်တာ သုံးဖွဲ့လက်မှတ်ထိုးတယ်”ဟု ပြောသည်။

မြောက်ပိုင်းမဟာမိတ်သုံးဖွဲ့သည် ဗမာပြည်သူ့လွတ်မြောက်ရေးတပ်တော်(BPLA)၊ ပြည်သူ့လွတ်မြောက်ရေးတပ် မတော်(PLA)၊ ဗိုလ်နဂါးဦးဆောင်သော အဖွဲ့၊ မန္တလေးပြည်သူ့ကာကွယ်ရေးတပ်ဖွဲ့(MDY-PDF)၊ ကရင်နီအမျိုး သားကာကွယ်ရေးတပ်ဖွဲ့(KNDF)တို့ဖြင့် ပူးပေါင်း၍ ၁၀၂၇ စစ်ဆင်ရေးကို ၂၀၂၃ ခုနှစ်၊ အောက်တိုဘာ ၂၇ ရက် တွင် စတင်ဖော်ဆောင်ခဲ့သည်။

ထို့နောက် နမ့်ခမ်း၊ သီပေါ၊ သိန္နီ၊ ချင်းရွှေဟော်၊ ကြူကုတ်၊ နမ့်ဆန်၊ မန်တုံ၊ နမ္မတူ၊ လောက်ကိုင်၊ ကွတ်ခိုင်၊ မိုင်းငေါ့၊ ဖောင်းဆိုင်၊ မုံးကိုး စသည့် မြို့နယ်များရှိ တပ်မတော် စစ်စခန်းများကို တိုက်ခိုက်သိမ်းပိုက်လျက်ရှိ သလို မြို့နယ် တချို့ကိုလည်း ထိန်းချုပ်ထားသည်။

အဆိုပါ တိုက်ပွဲများ ရပ်တန့်ရေးနှင့် နယ်မြေတည်ငြိမ်အေးချမ်းရေးအတွက် NSPNC နှင့် မြောက်ပိုင်းမဟာမိတ် သုံးဖွဲ့(MNDAA-AA-TNLA)ကြား ၂၀၂၄ ခုနှစ်၊ ဇန်နဝါရီ ၇ ရက်မှ ၉ ရက်နေ့အထိ တတိယအကြိမ် တရုတ်နိုင်ငံ မှာ တွေ့ဆုံ ဆွေးနွေးကြမည်ဖြစ်သည်။

CNI News

၂၀၂၄ ခုနှစ်၊ ဇန်နဝါရီ ၂

မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA-ကိုးကန့်တပ်ဖွဲ့)၏ စစ်ဦးစီးချုပ် ဦးဖုန်တာရွန်း သည် ဇန်နဝါရီ ၁ ရက်နေ့က ၂၀၂၄ နှစ်သစ်ကူး သဝဏ်လွှာ တစ်စောင် ထုတ်ပြန်၍ MNDAA တပ်ဖွဲ့များကို ရည်မှန်းချက်ပန်းတိုင်များ ချပြသွားခဲ့သည်။

ဦးဖုန်တာရွန်းသည် အွန်လိုင်းလောင်းကစားကို နှိမ်နှင်းနိုင်ရေး၊ အထူးဒေသ(၁) ပြန်လည် တည်ဆောက်နိုင်ရေး၊ တပ်မတော် စခန်းများကို တိုက်ခိုက် သိမ်းပိုက်နိုင်ခဲ့မှု အခြေအနေများ၊ အထူးဒေသ(၁)ကို ပြန်လည် တည် ဆောက်နိုင်သည့်အခါ မည်ကဲ့သို့ အုပ်ချုပ်မည်ဆိုသော အခြေအနေများကို ပြောကြားသွားခဲ့သည်။

သို့သော် အားလုံးက ထူထောင်လိုသော ဖက်ဒရယ်ပြည်ထောင်စု တည်ဆောက်ရေး၊ NUCC က ချမှတ်ထားသော ဖက်ဒရယ်ပဋိညာဉ်၊ NUG အပေါ်သဘောထားနှင့် မည်ကဲ့သို့ လက်တွဲလုပ်ဆောင်နေသလဲ၊ နွေဦးတော်လှန်ရေး အခြေအနေ စသည့် အရေးကိစ္စများနှင့်ပတ်သက်ပြီး တစ်စုံတစ်ရာ ပြောကြားသွားခြင်း မရှိသေးကို တွေ့ရသည်။

MNDAA တပ်ဖွဲ့များကို တွေ့ရစဉ်

ဦးဖုန်တာရွန်းက “ မြန်မာနိုင်ငံ ရှမ်းပြည်နယ် အထူးဒေသ(၁)၏ အာဏာပြန်လည် ရရှိရေးသည် မိမိတို့ အမျိုးသား ရေး လုပ်ငန်းစဉ်၏ ပထမခြေလှမ်းများသာဖြစ်သည်။ မိမိတို့အနေဖြင့် အထူးဒေသ(၁)ကို ပြန်လည် ထူထောင်ရန် အတွက် ပါတီ၊ အုပ်ချုပ်ရေးကော်မတီနှင့် တပ်မတော် တည်ဆောက်ရေးစနစ်၊ နိုင်ငံရေးစနစ်၊ အုပ်ချုပ်ရေးစနစ်နှင့် ကေဒါသင်တန်းများကို ပြင်ဆင်မှုများ ပြုလုပ်ခဲ့ပြီးဖြစ်ပေမယ့် စစ်ပွဲအပြီး ကိုးကန့်ဒေသ ပြန်လည် ကောင်းမွန်လာ စေရန်အတွက် ရဲဘော်တို့အနေဖြင့် ရှေးတော်လှန်ရေးသမား၊ လူကြီးတို့၏ ချွေတာတတ် သော အစဉ်အလာ၊ လုပ်ပုံကိုင်ပုံ၊ အမွေများကို ဆက်ခံပြီး မိမိဒေသ တည်ဆောက်ရေးအပေါ်ကို အစွမ်းကုန် အပင်ပန်းခံ ကြိုးစားအား ထုတ်သော လုပ်ဟန်ဖြင့် အထူးဒေသ(၁) အခြေခံဥပဒေကို အခြေခံပြီး ဒေသဖွံ့ဖြိုး တိုးတက်ရေးကို ပြည်သူလူထု နှင့်တကွ ကြိုးပမ်း အားထုတ်ကြရမည်”ဟု ပြောသည်။

ထို့နောက် ကိုးကန့်၏ အနာဂတ်မည်မျှပင် ခက်ခဲစေကာမူ အထူးဒေသအုပ်ချုပ်ရေးကော်မတီ အနေဖြင့် အွန်လိုင်း လောင်းကစားနှင့် အွန်လိုင်းငွေကြေးလိမ်လည်မှု၊ မူးယစ်ဆေးဝါးလုပ်ငန်းများ ပြန်လည် ရှင်သန်လာ ခြင်းမျိုးကို လုံးဝ ခွင့်ပြုမည်မဟုတ်ကြောင်း၊ ပြည်သူလူထုများလည်း ဖိနှိပ်မှုများကို မခံစေရကြောင်း၊ ကိုးကန့် ရုပ်သေးအဖွဲ့ အုပ်ချုပ်စဉ်အတွင်း အကျင့်ပျက် ခြစားမှုများနှင့်အကျင့်ဆိုးများ အားလုံးကို လုံးလုံးလျားလျား ပပျောက်စေမည် ဖြစ်ကြောင်း ၎င်းက ပြောသည်။

NUG ရဲ့ PDF တပ်ဖွဲ့၀င်များကိုတွေ့ရစဉ်

ဦးဖုန်တာရွန်းက “ ကျနော့်အနေဖြင့် အထူးဒေသ(၁) အတွင်းရှိ စစ်သားများနဲ့ အရပ်သားအားလုံးကို တာဝန်ရှိ စွာဖြင့် ပြောပြနိုင်သည်မှာ MNTJP ပါတီ၊ MNDAA တပ်မတော်နဲ့ အထူးဒေသ(၁)အုပ်ချုပ်ရေးကော်မတီတို့ အနေဖြင့် ဒေသအတွင်းရှိ ပြည်သူလူထုများအတွက် ဖွံ့ဖြိုးတိုးတက်ပြီး တည်ငြိမ်အေးချမ်းသော အထူးဒေသ(၁) တစ်ခုကို တည်ဆောက်ပေးရန် ကတိပြုပါသည်။ လက်ရှိအချိန်သည် အထူးဒေသ(၁) ပြန်လည်ထူထောင်ရေး အတွက် အရေးကြီးသော အချိန်ကာလဖြစ်သည့်အတွက်ကြောင့် တပ်ဖွဲ့ဝင်တို့ အားလုံးအနေဖြင့် နောက်ဆုံး အခက်အခဲများကို အောင်မြင်စွာ ကျော်လွှားနိုင်မည်ဆိုပါက နောက်ဆုံးအောင်မြင်မှုဟာ မိမိတို့အထူးဒေသ(၁) ၏ ပြည်သူလူထုလက်ထဲသို့ ပြန်လည်ရောက်ရှိလာမည်ဟု အပြည့်အဝ ယုံကြည်ပါသည်”ဟု ပြောသည်။

ဦးဖုန်တာရွန်း၏ ၂၀၂၄ ခုနှစ် နှစ်သစ်ကူး သဝဏ်လွှာတွင် ဖက်ဒရယ်ပဋိညာဉ်နှင့် NUG တို့အကြောင်းကို တစ်စုံ တစ်ရာ ထုတ်ဖော် ပြောကြားသွားခြင်း မရှိသည်မှာ ထူးဆန်းကြောင်း၊ ၁၀၂၇ စစ်ဆင်ရေးသည် ကိုးကန့်တပ်ဖွဲ့၏ အထူးဒေသ(၁) ပြန်လည် ရရှိရေးအဓိက ရည်မှန်းချက်ဖြစ်ပြီး NUG ၏ နွေဦးတော်လှန်ရေးနှင့် မပတ်သက် ကြောင်း ထင်ရှားသွားခဲ့ပြီဟု နိုင်ငံရေးလေ့လာသုံးသပ်သူများက ထောက်ပြကြသည်။

CNI News

၂၀၂၄ ခုနှစ်၊ ဇန်နဝါရီ ၂

လက်ရှိအချိန်သည် အထူးဒေသ(၁) ပြန်လည်ထူထောင်ရေးအတွက် အရေးကြီးသော အချိန်ကာလဖြစ်သည်ဟု မြန်မာနိုင်ငံအမှန်တရားနှင့်တရားမျှတသောအမျိုးသားပါတီ/မြန်မာအမျိုးသားဒီမိုကရက်တစ်မဟာမိတ်တပ်မတော်(MNTJP/MNDAA) ဥက္ကဋ္ဌ ဦးဖုန်တာရွန်းက ဇန်နဝါရီ ၁ ရက်နေ့ နှစ်သစ်ကူး သဝဏ်လွှာမှာ ပြောကြားထား သည်။

ဦးဖုန်တာရွန်းသည် MNTJP တွင် အထွေထွေအတွင်းရေးမှူးချုပ်အဖြစ်လည်းကောင်း၊ MNDAA တွင် စစ်ဦးစီး ချုပ်အဖြစ်လည်းကောင်း၊ ရှမ်းပြည်နယ်အထူးဒေသ(၁) အုပ်ချုပ်ရေးကော်မတီဥက္ကဋ္ဌအဖြစ်လည်းကောင်း အသီးသီး တာဝန်ယူထားသည်။

ဦးဖုန်တာရွန်းက “ မြန်မာနိုင်ငံ ရှမ်းပြည်နယ် အထူးဒေသ(၁)၏ အာဏာပြန်လည် ရရှိရေးသည် မိမိတို့ အမျိုးသားရေး လုပ်ငန်းစဉ်၏ ပထမခြေလှမ်းများသာဖြစ်သည်။ မိမိတို့အနေဖြင့် အထူးဒေသ(၁)ကို ပြန်လည် ထူထောင်ရန်အတွက် ပါတီ၊ အုပ်ချုပ်ရေးကော်မတီနှင့် တပ်မတော် တည်ဆောက်ရေးစနစ်၊ နိုင်ငံရေးစနစ်၊ အုပ်ချုပ်ရေးစနစ်နှင့် ကေဒါသင်တန်းများကို ပြင်ဆင်မှုများ ပြုလုပ်ခဲ့ပြီးဖြစ်ပေမယ့် စစ်ပွဲအပြီး ကိုးကန့်ဒေသ ပြန် လည် ကောင်းမွန်လာစေရန်အတွက် ရဲဘော်တို့အနေဖြင့် ရှေးတော်လှန်ရေးသမား၊ လူကြီးတို့၏ ချွေတာတတ် သော အစဉ်အလာ၊ လုပ်ပုံကိုင်ပုံ၊ အမွေများကို ဆက်ခံပြီး မိမိဒေသ တည်ဆောက်ရေးအပေါ်ကို အစွမ်းကုန် အပင်ပန်းခံ ကြိုးစားအားထုတ်သော လုပ်ဟန်ဖြင့် အထူးဒေသ(၁) အခြေခံဥပဒေကို အခြေခံပြီး ဒေသဖွံ့ဖြိုး တိုးတက်ရေးကို ပြည်သူလူထုနှင့်တကွ ကြိုးပမ်း အားထုတ်ကြရမည်”ဟု ပြောသည်။

ထို့နောက် ကိုးကန့်၏ အနာဂတ်မည်မျှပင် ခက်ခဲစေကာမူ အထူးဒေသအုပ်ချုပ်ရေးကော်မတီ အနေဖြင့် အွန်လိုင်းလောင်းကစားနှင့် အွန်လိုင်ငွေကြေးလိမ်လည်မှု၊ မူးယစ်ဆေးဝါးလုပ်ငန်းများ ပြန်လည် ရှင်သန်လာ ခြင်းမျိုးကို လုံးဝ ခွင့်ပြုမည်မဟုတ်ကြောင်း၊ ပြည်သူလူထုများလည်း ဖိနှိပ်မှုများကို မခံစေရကြောင်း၊ ကိုးကန့် ရုပ်သေးအဖွဲ့ အုပ်ချုပ်စဉ်အတွင်း အကျင့်ပျက် ခြစားမှုများနှင့်အကျင့်ဆိုးများ အားလုံးကို လုံးလုံးလျားလျား ပ ပျောက်စေမည်ဖြစ်ကြောင်း ၎င်းက ပြောသည်။

MNDAA တပ်ဖွဲ့ကို တွေ့ရစဉ်

ဦးဖုန်တာရွန်းက “ ကျနော့်အနေဖြင့် အထူးဒေသ(၁) အတွင်းရှိ စစ်သားများနဲ့ အရပ်သားအားလုံးကို တာဝန်ရှိ စွာဖြင့် ပြောပြနိုင်သည်မှာ MNTJP ပါတီ၊ MNDAA တပ်မတော်နဲ့ အထူးဒေသ(၁)အုပ်ချုပ်ရေးကော်မတီတို့ အနေဖြင့် ဒေသအတွင်းရှိ ပြည်သူလူထုများအတွက် ဖွံ့ဖြိုးတိုးတက်ပြီး တည်ငြိမ်အေးချမ်းသော အထူးဒေသ(၁) တစ်ခုကို တည်ဆောက်ပေးရန် ကတိပြုပါသည်။ လက်ရှိအချိန်သည် အထူးဒေသ(၁) ပြန်လည်ထူထောင်ရေး အတွက် အရေးကြီးသော အချိန်ကာလဖြစ်သည့်အတွက်ကြောင့် တပ်ဖွဲ့ဝင်တို့ အားလုံးအနေဖြင့် နောက်ဆုံး အခက်အခဲများကို အောင်မြင်စွာ ကျော်လွှားနိုင်မည်ဆိုပါက နောက်ဆုံးအောင်မြင်မှုဟာ မိမိတို့အထူးဒေသ(၁) ၏ ပြည်သူလူထုလက်ထဲသို့ ပြန်လည်ရောက်ရှိလာမည်ဟု အပြည့်အဝ ယုံကြည်ပါသည်”ဟု ပြောသည်။

ဦးဖုန်တာရွန်း၏ ၂၀၂၄ ခုနှစ် နှစ်သစ်ကူး သဝဏ်လွှာတွင် ဖက်ဒရယ်ပဋိညာဉ်နှင့် NUG တို့အကြောင်းကို တစ်စုံတစ်ရာ ထုတ်ဖော် ပြောကြားသွားခြင်းမရှိသည်မှာ ထူးဆန်းကြောင်း၊ ၁၀၂၇ စစ်ဆင်ရေးသည် ကိုးကန့် တပ်ဖွဲ့၏ အထူးဒေသ(၁) ပြန်လည် ရရှိရေးအဓိက ရည်မှန်းချက်ဖြစ်ပြီး NUG ၏ နွေဦးတော်လှန်ရေးနှင့် မပတ် သက်ကြောင်း ထင်ရှားသွားခဲ့ပြီဟု နိုင်ငံရေးလေ့လာသုံးသပ်သူများက ထောက်ပြကြသည်။

ဦးဖုန်တာရွန်းသည် အထူးဒေသ(၁)ကို ပြန်လည်တည်ဆောက်မည်ဟု ပြောသည့်တိုင် မည်သည့် ဒေသများကို စုစည်း၍ ရှမ်းပြည်နယ်အထူးဒေသ(၁)အား ပြန်လည်တည်ဆောက်မည်ကိုတော့ ထုတ်ဖော် ပြောကြားသွားခဲ့ ခြင်းမတွေ့ရပေ။

၁၉၈၉ ခုနှစ်က ဦးဖုန်တာရွန်း၏ ဖခင်ဖြစ်သူ ဦးဖုန်ကြားရှင် ဦးဆောင်သည့် ကိုးကန့်တပ်ဖွဲ့သည် နအဖနှင့် ငြိမ်းချမ်းရေးယူခဲ့ခြင်းကြောင့် ရှမ်းပြည်နယ်အတွင်းက လောက်ကုန်နှင့် ကုန်ကြမ်းဒေသကို အထူးဒေသ(၁) အဖြစ် သတ်မှတ်ပေးခဲ့၍ ကိုးကန့်တပ်ဖွဲ့အား အုပ်ချုပ်ခွင့်ပေးခဲ့သည်။

MNDAA သိမ်းပိုက်ထားတဲ့ မြို့တစ်မြို့မှာ MNDAA ရဲ့အလံလွှင့်ထူထားစဉ်

ထို့နောက် ၂၀၀၉ ခုနှစ်တွင် တပ်မတော်ဘက်က ကိုးကန့်တပ်ဖွဲ့အား ပြည်သူ့စစ် သို့မဟုတ် နယ်ခြားစောင့်တပ် အဖြစ် ပြောင်းလဲရန် ဖိအားပေးခဲ့ရာကနေ တိုက်ပွဲများ ပြန်လည်ဖြစ်ပွားပြီး ဖုန်ကြားရှင်၏ ကိုးကန့်တပ်ဖွဲ့မှာ အထူးဒေသ(၁)နယ်မြေကနေ ထွက်ခွာသွားခဲ့ရသည်။

ထိုသို့ ထွက်ခွာခဲ့ရသော အထူးဒေသ(၁)ကို ပြန်လည် ရရှိရေးအတွက် ကိုးကန့်တပ်ဖွဲ့(MNDAA)သည် ၂၀၂၃ ခုနှစ်၊ အောက်တိုဘာ ၂၇ ရက်တွင် ၁၀၂၇ စစ်ဆင်ရေးကို ဖော်ဆောင်၍ မြို့သိမ်းနှင့် တပ်မတော်စခန်းများ သိမ်းပိုက်ရေး ဆင်နွှဲလျက်ရှိနေသည်။

ထို့နောက် MNDAA (ကိုးကန့်တပ်ဖွဲ့)သည် ကုန်းကြမ်း၊ ဖောင်းဆိုင်၊ ချင်းရွှေဟော်၊ မုံးကိုး၊ သိန္နီ တို့ကို သိမ်း ပိုက်ထားပြီး ကွတ်ခိုင်နှင့် လောက်ကိုင်မြို့များကို သိမ်းပိုက်နိုင်ရေး ထိုးစစ်ဆင်တိုက်ခိုက်လျက်ရှိနေသည်။

လက်ရှိတွင် ၂၀၀၈ ဖွဲ့စည်းပုံအခြေခံဥပဒေ ပုဒ်မ ၅၆(င)တွင် ရှမ်းပြည်နယ်ရှိ ကုန်းကြမ်းမြို့နယ်နှင့် လောက်ကိုင် မြို့နယ်တို့ကို စုစည်းပြီး ကိုးကန့်ကိုယ်ပိုင်အုပ်ခွင့်ရဒေသအဖြစ် သတ်မှတ်ပြဋ္ဌာန်းထားသည်။

CNI News

၂၀၂၄ ခုနှစ်၊ ဇန်နဝါရီ ၂

အမျိုးသားညီညွတ်ရေးအစိုးရ (NUG) အနေဖြင့် တရုတ်တစ်နိုင်ငံတည်း မူဝါဒကို ဆက်လက်ထောက်ခံ ကျင့်သုံးမည်ဖြစ်ကြောင်း ထုတ်ပြန်ချက်သည် ဒီမိုကရေစီနိုင်ငံများဖြင့် သံတမန်ဆက်ဆံရေးအတွက် ရလဒ် ကောင်းမဟုတ်ဘူးဟု မြန်မာ့နိုင်ငံရေးသမားများက ထောက်ပြကြသည်။

မြန်မာနိုင်ငံနှင့် တရုတ်နိုင်ငံတို့သည် နှစ်နိုင်ငံကြား သမိုင်းကြောင်းအရ ခိုင်မာ၍ နီးကပ်သည့်ဆက်နွယ်မှု အစဉ် အလာများ ရှိသည်သာမက တရုတ်နိုင်ငံသည် ကမ္ဘာ့အင်အားကြီးနိုင်ငံ တစ်နိုင်ငံဖြစ်သည့် အားလျော်စွာ မြန်မာ နိုင်ငံအတွက် အထူးအရေးပါသည့် နိုင်ငံဖြစ်သည်ဟု ခံယူကြောင်း ဇန်နဝါရီ ၁ ရက်နေ့က NUG မှ ထုတ်ပြန်ခဲ့ သည်။

NUG က “မြန်မာနိုင်ငံနဲ့ တရုတ်နိုင်ငံတို့ဟာ နယ်နိမိတ်အားဖြင့် ကီလိုမီတာ နှစ်ထောင်ကျော် ထိစပ်လျက်ရှိပြီး၊ ကမ္ဘာတည်သရွေ့ အတူယှဉ်တွဲ နေထိုင်သွားရမည့် အိမ်နီးချင်းနိုင်ငံဖြစ်သည်နှင့်အညီ မြန်မာနိုင်ငံအနေဖြင့် နှစ်နိုင်ငံကြား စစ်မှန်တဲ့ “ဆွေမျိုး-ပေါက်ဖော်” ဆက်ဆံရေး တည်ဆောက်သွားမည်။ တရုတ်နိုင်ငံအတွက် အိမ်နီးချင်းကောင်း ဖြစ်ရေး မြန်မာနိုင်ငံက အမြဲကြိုးပမ်း ရပ်တည်မည်။ တရုတ် တစ်နိုင်ငံတည်း မူဝါဒကို ဆက်လက်ထောက်ခံကျင့်သုံးမည်” ဟု ပြောသည်။

 NUG ၏ ထုတ်ပြန်ချက်ကို တွေ့ရစဉ်

NUG အနေဖြင့် တရုတ်တစ်နိုင်ငံတည်း မူဝါဒကို ဆက်လက်ထောက်ခံမည်ဆိုသည့်အချက်အား ထည့်သွင်း ထုတ်ပြန်ခြင်းမှာ မိမိတို့အတွက် ရလဒ်ကောင်းတစ်ခု မဟုတ်ဟု ယူဆကြောင်း စည်းလုံးညီညွတ်သော တိုင်းရင်းသားလူမျိုးများမဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော် က CNI သတင်းဌာနသို့ ပြောသည်။

၎င်းက “အဲဒီအချက်ကိုတော့ အမှန်ကတော့ ဒီအချိန်မှာ အဲဒီဟာကို မပြောရင်လည်း ရပါတယ်။ နည်းနည်းလေး များသွားသလားလို့လေ၊ ဘာဖြစ်လို့လည်းဆိုတော့ ကျနော်တို့က အခုချိန်မှာ တစ်ဖက်မှာ နေပြီးတော့ ကျနော်တို့ ရဲ့ ဘုံရန်သူဖြစ်တဲ့ စစ်အာဏာရှင်ကို တိုက်နေရတာလေ။ ဆိုတဲ့အချိန်မှာ တစ်ဖက်မှာလည်း ကျနော်တို့ ဒီမိုကရက်တစ်အုပ်စုတွေက ကျနော်တို့ရဲ့ မိတ်ဖက်မဟာမိတ် အနေနဲ့ပေါ့ဗျာ၊ အနောက်ဒီမိုကရေစီနိုင်ငံတွေကို ကျနော်တို့က တစ်ဖက်ကတော့ အားယူနေရတဲ့ အချိန်မှာ သူတို့ရဲ့ မိတ်ဖက်ဖြစ်တဲ့ ထိုင်ဝမ်တို့လိုဟာမျိုးကို ကျနော်တို့က အခုကြေညာချက်မှာ နံပါတ် ၄ အချက်ကို ထည့်လိုက်ခြင်းအားဖြင့် ကျနော်တို့အတွက် အဲဒါက ရလဒ်ကောင်းတစ်ခု မဟုတ်ဘူးလို့ ကျနော်ကတော့ အဲဒီလို ယူဆပါတယ်” ဟု ပြောသည်။

ထို့အတူ နှစ်နိုင်ငံပြည်သူများ၏ အကျိုးစီးပွားဖြစ်ထွန်းရေးကို မျှော်ရည်လျှက် မြန်မာနိုင်ငံတွင်းရှိ တရုတ်နိုင်ငံ၏ စီးပွားရေးအရ ရင်းနှီးမြှုပ်နှံမှုများနှင့် အခြားလူမှုစီးပွားလုပ်ငန်းများ၏ လုံခြုံရေးကို ထိန်းသိမ်းကာကွယ်မည်ဟု ထုတ်ပြန်ချက်တွင် ဖော်ပြထားသည်။

NUG ၏ PDF တပ်ဖွဲ့ကိုတွေ့ရစဉ်

တရုတ်တစ်နိုင်ငံတည်း ထောက်ခံသည့်မူဝါဒမှာ မြန်မာနိုင်ငံ၏ ခေတ်အဆက်ဆက်က ကျင့်သုံးလာသော မူဝါဒ ဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

၎င်းက “အဲဒါကတော့ ပေါ်လစီပဲ ကျနော်တို့ ဗမာနိုင်ငံရဲ့ ပေါ်လစီအဆက်ဆက်ပဲ တရုတ်တစ်နိုင်ငံတည်းပဲ ထောက်ခံတာ အဲဒါမူပဲလေ၊ မူပဲ၊ တက်လာတဲ့ အစိုးရတိုင်းက ဒီမူကို လိုက်နာတာပဲ၊ အဲဒါကြောင့်မို့လို့ ထိုင်ဝမ် ကလည်းပဲ အခု နအဖနဲ့ ဒီစစ်ကောင်စီနဲ့ ထိုင်ဝမ်နဲ့ ကုန်သွယ်ရေး အများကြီးပဲ ဒေါ်လာဘီလီယံ ပေါင်းများစွာ ရှိတယ်၊ သူဆက်သွယ်နေတာပဲ၊ အဲဒီလိုပဲ NLD လက်ထက်တုန်းကလည်း ဒီလိုပဲ ဆက်သွယ်ရတာပဲ၊ ဟောင်ကောင်အရေးနဲ့ ပတ်သက်လို့ ဟောင်ကောင်ကတော့ ပြီးသွားပြီလေ၊ ဟောင်ကောင်က တရုတ်ပြည်ရဲ့ တစ်ခုတည်းသော အနေနဲ့ ပြီးသွားပြီး မပြတ်သေးတာ ထိုင်ဝမ်ကိစ္စပဲ၊ ထိုင်ဝမ်ကိစ္စကလည်း တစ်ကမ္ဘာလုံးက အမေရိကန်ကစတာ ထိုင်ဝမ်ဟာ အမေရိကန် တရုတ်ရဲ့အောက်မှာရှိတဲ့ ပေါ်လစီကိုလည်း အမေရိကန် ကိုယ်တိုင် က အသိအမှတ်ပြုတယ်၊ ဒါပေမဲ့လို့ ဒီမိုကရေစီစနစ်နဲ့ သွားတာကို အသိအမှတ်ပြုပေးဖို့ အဲဒါကို အမေရိကန်က တောင်းဆိုနေတာလေ၊ ဗမာကတော့ အဲဒီလို မတောင်းဆိုသော်လည်းပဲ ထိုင်ဝမ်နဲ့ ဗမာနဲ့ အစိုးရအဆက်ဆက် အခု စစ်အစိုးရလက်ထက်မှာ ပိုတောင်မြင့်သေးတယ် ဆက်ဆံရေးလေ” ဟု ပြောသည်။

လက်ရှိတွင် အမျိုးသားညီညွတ်ရေး အစိုးရ (NUG) သည် တပ်မတော်ဖြုတ်ချရေး ကြိုးပမ်းလုပ်ဆောင်နေသလို တရုတ်နိုင်ငံရှိ ထိုင်ဝမ်၊ ဟောင်ကောင်၊ မကာအိုနှင့် ရှင်ကျန်းပြည်နယ်ရှိ ဝီဂါမူဆလင်များကလည်း မိမိတို့ ဒေသ လွတ်မြောက်ရေးအတွက် လှုပ်ရှားလျက်ရှိနေသည်။ 

CNI News

၂၀၂၄ ခုနှစ်၊ ဇန်နဝါရီ ၂

တရုတ်တစ်နိုင်ငံတည်း မူဝါဒကို ဆက်လက် ထောက်ခံကျင့်သုံးမည်ဟု အမျိုးသားညီညွတ်ရေးအစိုးရ(NUG)က ၂၀၂၄ ခုနှစ်၊ ဇန်နဝါရီ ၁ ရက်နေ့က သဘောထား ထုတ်ပြန် ကြေညာခဲ့သည်။

NUG ၏ တရုတ်နိုင်ငံဆိုင်ရာ သဘောထားဟုဆိုကာ ထုတ်ပြန်ခဲ့ခြင်း ဖြစ်သည်။

NUG က “ မြန်မာနိုင်ငံနှင့် တရုတ်ပြည်သူ့သမ္မတနိုင်ငံသည် နယ်နိမိတ်အားဖြင့် ကီလိုမီတာ နှစ်ထောင်ကျော် ထိစပ်လျက်ရှိပြီး၊ ကမ္ဘာတည်သရွေ့ အတူယှဉ်တွဲ နေထိုင်သွားရမည့် အိမ်နီးချင်းနိုင်ငံများဖြစ်သည်နှင့်အညီ မြန်မာနိုင်ငံအနေဖြင့် နှစ်နိုင်ငံကြား စစ်မှန်သည့် ဆွေမျိုး-ပေါက်ဖော် ဆက်ဆံရေး တည်ဆောက်သွားမည်။ တရုတ်နိုင်ငံအတွက် အိမ်နီးချင်းကောင်း ဖြစ်ရေး မြန်မာနိုင်ငံက အမြဲကြိုးပမ်း ရပ်တည်မည်”ဟု ထုတ်ပြန်ခဲ့ သည်။

ထို့နောက် တရုတ် တစ်နိုင်ငံတည်း မူဝါဒကို ဆက်လက် ထောက်ခံကျင့်သုံးမည်၊ နှစ်နိုင်ငံ ပြည်သူများ၏ အကျိုး စီးပွားဖြစ်ထွန်းရေးကို မျှော်ရည်လျှက် မြန်မာနိုင်ငံတွင်းရှိ တရုတ်နိုင်ငံ၏ စီးပွားရေးအရ ရင်းနှီးမြှုပ်နှံမှုများနှင့် အခြားလူမှုစီးပွားလုပ်ငန်းများ၏ လုံခြုံရေးကို ထိန်းသိမ်းကာကွယ်မည်ဟု NUG ၏ ထုတ်ပြန်ချက်တွင် ဖော်ပြ ထားသည်။

အလားတူ အိမ်နီးချင်းနိုင်ငံများ၏ နိုင်ငံတော်လုံခြုံရေးကို ခြိမ်းခြောက်နေသည့် မည်သည့်အဖွဲ့အစည်းကိုမျှ မြန်မာ့ပိုင်နက်အတွင်း အခြေချခွင့်မပြုဟု NUG က ထုတ်ပြန်ပြောကြားခဲ့သည်။

NUG တွင် တာဝန်ထမ်းဆောင်နေကြသူများသည် တရုတ်၏ ပြိုင်ဘက် အမေရိကန်နှင့် ဥရောပနိုင်ငံများတွင် ခိုလှုံနေကြရသလို အထောက်အပံ့များ ရယူနေရသည့်တိုင် တရုတ်အလိုကျ သဘောထား တစ်ရပ်ကို ထုတ်ပြန် လိုက်ခြင်းက သံတမန်ဆက်ဆံရေး မှာ ကျရှုံးသွားနိုင်သည်ဟု နိုင်ငံလေ့လာသုံးသပ်သူများက ထောက်ပြကြ သည်။

ထို့ပြင် ထိုင်ဝမ်အရေးကြောင့် အမေရိကန်၊ ဂျပန်တို့နှင့် တရုတ်အကြား သံတမန်ဆက်ဆံရေး တင်းမာနေချိန်မှာ ဒီမိုကရေစီတော်လှန်ရေးကို ဆောင်ရွက်နေသည့် NUG အနေဖြင့် ဘဝတူ ထိုင်ဝမ်ကို မထောက်ခံဘဲ တရုတ် အား ထောက်ခံခြင်းကလည်း သံတမန်ဆက်ဆံရေးကို မပါးနပ်ကြောင်း ပြသနေသည်ဟု ၎င်းတို့က ထောက်ပြ ကြသည်။

CNI News

၂၀၂၄ ခုနှစ်၊ ဇန်နဝါရီ ၁

တိုင်းရင်းသားများ၏ မြို့ရွာဒေသများကို စစ်ရေးနည်းနှင့် တိုက်ယူ၍ရခဲ့ရင်တောင်မှ ၎င်းတို့ဒေသများကို လက်နက်ဆန်းများ သုံးပြီး လေကြောင်းကနေ ဗုံးကြဲနေမှာပဲလို့ NSPNC၏ အတွင်းရေးမှူး ဒုတိယဗိုလ်ချုပ်ကြီး မင်းနိုင်က ပြောကြားခဲ့သည်ဟု TNLA အထွေထွေအတွင်းရေးမှူး ဗိုလ်မှူးချုပ် တားဘုန်းကျော်က ပြန်လည် ရေးသား ထုတ်ဖော်ပြောကြားခဲ့သည်။

ဗိုလ်မှူးချုပ် တားဘုန်းကျော်က “ NSPNC အတွင်းရေးမှူးရဲ့ တိုင်းရင်းသားနဲ့ တိုင်းပြည်အပေါ် စေတနာ….၊ မင်းတို့ တိုင်းရင်းသားတွေရဲ့ မြို့ရွာဒေသတွေကို စစ်ရေးနည်းနဲ့ တိုက်ယူလို့ရခဲ့ရင်တောင် မင်းတို့ဒေသတွေ ဘယ်တော့မှ အေးချမ်းသာယာမှာမဟုတ်ဘူး၊ ငါတို့မှာရှိတဲ့ လက်နက်ဆန်းတွေသုံးပြီး လေကြောင်းတိုက်ခိုက် ရေးနဲ့ အမြဲ့တမ်း ဗုံးကြဲနေမှာပဲ”ဟု သူ၏ လူမှုကွန်ရက် စာမျက်နှာမှာ ၂၀၂၄ ခုနှစ်၊ ဇန်နဝါရီ ၁ ရက်နေ့က ရေးသားခဲ့သည်။

အဆိုပါ မှတ်ချက်စကားကို အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှု ညှိနှိုင်းရေး ကော်မတီ (NSPNC)အတွင်းရေးမှူး ဒုတိယဗိုလ်ချုပ်ကြီးမင်းနိုင် ဦးဆောင်သည့် ကိုယ်စားလှယ်အဖွဲ့နှင့် မြောက်ပိုင်းမဟာ မိတ်သုံးဖွဲ့(MNDAA-TNLA-AA)တို့ တရုတ်နိုင်ငံ၊ ကူမင်းမြို့မှာ ၂၀၂၃ ခုနှစ်၊ ဒီဇင်ဘာ ၂၃ ရက်နေ့က တွေ့ဆုံ ဆွေးနွေးပွဲတွင် ပြောကြားခဲ့ခြင်း ဖြစ်သည်ဟု ၎င်းက ရေးသားထားသည်။

လက်ရှိတွင် ရှမ်းပြည်နယ်မြောက်ပိုင်းရှိ နမ္မတူ၊ နမ့်ခမ်း၊ နမ့်ဆန်၊ မန်တုံ စသည့် မြို့နယ်များကို TNLA တပ်ဖွဲ့က တိုက်ခိုက် သိမ်းပိုက်ထားပြီး ကျောက်မဲနှင့်သီပေါမြို့များကို သိမ်းပိုက်နိုင်ရေး ဆက်လက် ထိုးစစ်ဆင်နေသည်။

ဗိုလ်မှူးချုပ်တားဘုန်းကျော် ရေးထားသည့် စာကိုတွေ့ရစဉ်

အလားတူ  MNDAA ကလည်း မုံးကိုး၊ ဖောင်းဆိုင်၊ ကုန်ကြမ်း၊ ကြူကုတ်(ပန်ဆိုင်း)၊ ချင်းရွှေဟော် မြို့နယ် များကို သိမ်းပိုက်ထားသကဲ့သို့ လောက်ကိုင်မြို့အား သိမ်းပိုက်နိုင်ရေး ထိုးစစ်ဆင် တိုက်ခိုက်လျက် ရှိနေ သည်။

တခြား တစ်ဖက်မှာလည်း AA သည် ရခိုင်ပြည်နယ်အတွင်းမှာ တိုက်ပွဲများ ဖော်ဆောင်၍ နယ်မြေထိန်း ချုပ်ရေး ဧရိယာများ ချဲ့ထွင်လျက်ရှိနေသည်။

AA၊ MNDAA၊ TNLA တို့ ဦးဆောင်၍ မန္တလေးပြည်သူ့ကာကွယ်ရေးတပ်ဖွဲ့(MYD-PDF)၊ ဗမာပြည်သူ့လွတ် မြောက်ရေးတပ်တော်(BPLA)၊ PLA ၊ ဗိုလ်နဂါးဦးဆောင်သည့် PDF များ ပါဝင်သည့် ၁၀၂၇ စစ်ဆင်ရေးကို ၂၀၂၃ ခုနှစ်၊ အောက်တိုဘာ ၂၇ ရက်က စတင်အကောင်အထည်ဖော်လျက်ရှိသည်။

CNI News

၂၀၂၄ ခုနှစ်၊ ဇန်နဝါရီ ၁

၂၀၂၄ ခုနှစ်မှာလည်း နစကမှ ချမှတ်ထားသော နိုင်ငံရေးရည်မှန်းချက်များ၊ ရှေ့လုပ်ငန်းစဉ်များ အောင်မြင်စွာ ဆက်လက် ဆောင်ရွက်သွားမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က နှစ်သစ်ကူး နှုတ်ခွန်းဆက် စကားပြောကြားရာတွင် ထည့်သွင်း ပြောကြားခဲ့သည်။

ပြီးခဲ့သည့် ၂၀၂၃ ခုနှစ်မှာ အဖျက်လုပ်ငန်း အမျိုးမျိုးကြောင့် နိုင်ငံပိုင်၊ ပြည်သူများ၏ ပိုင်ဆိုင်မှုများ ထိခိုက်ပျက်စီး ခဲ့ကြောင်း၊ တိုင်းပြည်အတွက် အနုတ်လက္ခဏာဆောင်ခဲ့ကြောင်း ၎င်းက ပြောသည်။

ပြည်ထောင်စုအစိုးရအဖွဲ့ အစည်းအဝေး ကျင်းပနေစဉ်

ဗိုလ်ချုပ်မှူးကြီး မင်းအောင်လှိုင်က “ပြီးခဲ့တဲ့ ၂၀၂၃ ခုနှစ် ကာလအတွင်းကလည်း တွေ့ကြုံခဲ့ရတဲ့ အခက်အခဲ အချို့နဲ့ စိန်ခေါ်မှုများကိုလည်း နိုင်ငံတော် အစိုးရနဲ့ တိုင်းရင်းသား ပြည်သူအားလုံး လက်တွဲပူးပေါင်းပြီး အောင်မြင် စွာ ရင်ဆိုင်ကျော်လွှား နိုင်ခဲ့ကြပါတယ်။ ဒီမိုကရေစီနည်းလမ်းတကျနဲ့ ငြိမ်းချမ်းစွာ ကိုယ့်နိုင်ငံ တိုးတက်စေဖို့ ဆန္ဒ မရှိသူတွေကတော့ ပြည်သူပြည်သားတွေကို နည်းမျိုးစုံနဲ့ နှောက်ယှက်ခဲ့ကြတာလည်း ရှိပါတယ်။ အဖျက်လုပ်ငန်း အမျိုးမျိုးကြောင့် နိုင်ငံပိုင်၊ ပြည်သူပြည်သားတွေရဲ့ ပိုင်ဆိုင်မှုများ ထိခိုက်ပျက်စီးဆုံးရှုံးမှုဟာ တိုင်းပြည်အတွက် အနုတ်လက္ခဏာပဲ ဖြစ်ခဲ့ပါတယ်။ ဒါတွေသာ မရှိခဲ့ရင်၊ မဖြစ်ခဲ့ဘူးဆိုရင် ကျနော်တို့နိုင်ငံဟာ များစွာကို တိုးတက် နေမှာ ဖြစ်ပါတယ်။ ဒါဟာ ကျနော်တို့အတွက် သင်ခန်းစာပါ။ ကျနော်တို့အားလုံး နိုင်ငံကို ချစ်တဲ့၊ အမျိုးကို ချစ်တဲ့ စိတ် ညီညွတ်တဲ့အားနဲ့ ကျော်လွှားရပါမယ်။ ၂၀၂၄ ခုနှစ်မှာလည်း ကျနော်တို့ အစိုးရအနေနဲ့ ချမှတ်ထားတဲ့ အမျိုးသားရေး ရည်မှန်းချက်များ၊ နိုင်ငံရေး ရည်မှန်းချက်များ၊ ရှေ့လုပ်ငန်းစဉ်များနဲ့ ဦးတည်ချက်များကို အောင် မြင်စွာ အကောင်အထည်ဖော်နိုင်ဖို့ ပြည်သူလူထုနဲ့ လက်တွဲပြီး ဆက်လက်ဆောင်ရွက်သွားမှာ ဖြစ်ပါတယ်” ဟု ပြောသည်။

သို့သော်လည်း အမျိုးသားရေး ရည်မှန်းချက်၊ နိုင်ငံရေးရည်မှန်းချက်များကို အောင်မြင်ရန်အတွက် မည်ကဲ့သို့ ချဉ်းကပ်မှုများ ပြုလုပ်ဆောင်ရွက်မည်ကိုတော့ ထည့်သွင်းပြောကြားသွားခြင်း မရှိပေ။

 နစက-က ရှေ့လုပ်ငန်းစဉ် ၅ ရပ်ကို တွေ့ရစဉ်

ထို့အတူ စီးပွားရေး ပိုမိုကောင်းမွန်အောင် ကြိုးပမ်းဆောင်ရွက် သွားမည်ဖြစ်ကြောင်းနှင့် ပညာရေးကိုလည်း ပိုမို အားပေး ဆောင်ရွက်သွားမည်ဟု ဗိုလ်ချုပ်မှူးကြီး မင်းအောင်လှိုင်က ပြောသည်။

လာမည့် ဇန်နဝါရီလကုန်ပိုင်းနှင့် ဖေဖော်ဝါရီ ၁ ရက်နေ့တို့တွင် အလှည့်အပြောင်းများ ပေါ်လာနိုင်ကြောင်း၊ ထို့ ကြောင့် လက်ရှိမှာ နဂိုရှိရင်းစွဲအတိုင်း ပြောဆိုမှုမှာ အမှားမယွင်းနည်းကြောင်း တိုင်းရင်းသား လက်နက်ကိုင် ခေါင်းဆောင်တစ်ဦးဖြစ်သူ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

၎င်းက “ကျနော်တွက်တာတော့ နှစ်သစ်ကူးအချိန်မှာ တခြားအလှည့်အပြောင်း စုဖွဲ့ပုံတွေ တခြား အလှည့် အပြောင်းတွေ ရုတ်တရက် ဘာမှ မရှိသေးတဲ့အခါကြတော့ နဂိုအတိုင်းပဲ ဆိုပြီးတော့ ပြောလိုက်တာလည်း ဖြစ်နိုင် ပါတယ်။ အကယ်၍ လာမယ့် ဇန်နဝါရီလကုန်တို့၊ ဖေဖော်ဝါရီ ၁ ရက်တို့ နောက်ပြီးတော့ ဖေဖော်ဝါရီ ၁၂ ရက် ပြည်ထောင်စုနေ့တို့ အဲဒီဖက်တွေ ရောက်သွားရင်တော့ တခြားအလှည့်အပြောင်းတွေ ပေါ်ချင်လည်း ပေါ်လာနိုင် တာပေါ့၊ ဒါပေမဲ့ လောလောဆယ်ဆယ်တော့ နဂိုအတိုင်းပဲ ပြောထားတာက အမှားအယွင်း နည်းတာပေါ့၊ ကျနော် အဲဒီလို ယူဆပါတယ်” ဟု ပြောသည်။

ပြည်ထောင်စုအစိုးရအဖွဲ့ အစည်းအဝေး ကျင်းပနေစဉ်

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က နစကမှ နိုင်ငံတော်အား အရေးပေါ်အခြေအနေ ကြေညာ၍ အာဏာရယူခဲ့သည်မှာ လာမယ့် ဖေဖော်ဝါရီ ၁ ရက်နေ့တွင် ၃ နှစ်ပြည့်မည် ဖြစ်သည်။

အထွေထွေရွေးကောက်ပွဲ ကျင်းပပြီး နိုင်ငံတော်အာဏာကို ပြန်လည်လွှဲပြောင်းနိုင်ရေး ယခုနှစ်အတွင်း ပြည်လုံး ကျွတ် လူဦးရေနှင့် အိမ်အကြောင်းအရာ သန်းခေါင်စာရင်း ကောက်ယူသွားမည်ဖြစ်ကြောင်း ဗိုလ်ချုပ်မှူကြီး မင်းအောင်လှိုင်က ပြောသည်။

CNI News
၂၀၂၃ ခုနှစ်၊ ဒီဇင်ဘာ ၂၉

၈၈ မျိုးဆက်ကျောင်းသားခေါင်းဆောင်ဖြစ်ခဲ့သူ ဦးကိုကိုကြီး ဦးဆောင်သည့် ပြည်သူ့ပါတီ(PP)ကို ပြည်ထောင်စု ရွေးကောက်ပွဲကော်မရှင်(UEC)က ပါတီတည်ထောင်ခွင့်ပြုလိုက်ကြောင်း သိရသည်။

UEC သည် ၂၀၂၃ ခုနှစ်၊ ဇန်နဝါရီလက နိုင်ငံရေးပါတီများ မှတ်ပုံတင်ခြင်းနည်းဥပဒေကို ထုတ်ပြန်ခဲ့ပြီးနောက် နိုင်ငံရေးပါတီများကို ပြန်လည်၍ ပါတီမှတ်ပုံတင်ခိုင်းခဲ့သည်။

ထို့နောက် ပြည်သူ့ပါတီ(PP)သည် ပြည်ထောင်စုအဆင့်(နိုင်ငံတစ်ဝှမ်းလုံး) ဝင်ရောက် ယှဉ်ပြိုင်မည့် နိုင်ငံရေး ပါတီအဖြစ် ပါတီမှတ်ပုံတင်ခဲ့ရာ အကြောင်းအမျိုးမျိုးကြောင့် မှတ်ပုံတင်မကျဘဲ ဖြစ်နေရာမှ ၈ လကျော်အကြာ ဒီဇင်ဘာ ၂၉ ရက်နေ့တွင် ပါတီမှတ်ပုံတင်ခွင့်ပြုကြောင်း UEC က အကြောင်းကြားလာခဲ့သည်။

ဦးကိုကိုကြီးကို တွေ့ရစဉ်

ပြည်သူ့ပါတီ(PP)ဥက္ကဋ္ဌ ဦးကိုကိုကြီးက “ ဒီနေ့ ညနေ ဖုန်းဆက်လာတာ၊ ပါတီမှတ်ပုံတင်ခွင့်ကျပြီးဆိုတဲ့ အကြောင်း။ ကျနော်တို့ မှတ်ပုံတင်ထားတာ ၈ လကျော်ပြီးမှ အခုလို မှတ်ပုံတင်ခွင့် ချပေးလာတာပါ”ဟု CNI သတင်းဌာနသို့ ပြောသည်။

UEC က နိုင်ငံရေးပါတီများကို ပြန်လည်၍ မှတ်ပုံတင်ရန် ထုတ်ပြန်ခဲ့ပြီးနောက် လက်ရှိတွင် နိုင်ငံရေးပါတီ ၄၀ ကျော်အား မှတ်ပုံတင်ချထားပေးပြီး ဖြစ်သည်။

 နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က အထွေထွေရွေးကောက်ပွဲ ကျင်းပပေးမည်ဖြစ်ပြီး ရွေးကောက်ပွဲ အနိုင်ရရှိသည့် နိုင်ငံရေးပါတီကို အာဏာလွှဲပြောင်းပေးမည်ဟု ပြောကြားထားသည်။

မြန်မာ့တပ်မတော်နဲ့ တိုက်ပွဲဖြစ်နေတဲ့ KNDF တပ်ဖွဲ့ကိုတွေ့ရစဉ်

သို့သော် လက်ရှိ မြန်မာနိုင်ငံ၏ ရှမ်းပြည်နယ်(မြောက်ပိုင်း)၊ ကချင်ပြည်နယ်၊ ချင်းပြည်နယ်၊ ကရင်ပြည်နယ်၊ ကယားပြည်နယ်၊ ရခိုင်ပြည်နယ်၊ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ တနင်္သာရီတိုင်းဒေသကြီးတို့ တွင် မြန်မာ့တပ်မတော်နှင့် လက်နက်ကိုင်(EAO)များ၊ ပြည်သူ့ကာကွယ်ရေးတပ်ဖွဲ့(PDF)များဖြင့် တိုက်ပွဲများ အပြင်းအထန်ဖြစ်ပွားလျက်ရှိနေသည်။

ထို့ကြောင့် မြန်မာနိုင်ငံတွင် နိုင်ငံရေးဘောင်ကျဉ်းပြီး စစ်ဘောင်ကျယ်ပြန့်နေချိန်မှာ နစက အနေဖြင့် နိုင်ငံပါတီ များကို ကန့်သတ်ထိန်းချုပ်ထားမှုများ ဖြေလျှော့ပေးသင့်ကြောင်း၊ နိုင်ငံရေးဘောင် ပြန်လည်ကျယ်ပြန့်လာရေး အတွက် နိုင်ငံရေးပါတီများကို လွတ်လွတ်လပ်လပ် လှုပ်ရှားခွင့်ပေးသင့်ကြောင်း ထောက်ပြလျက်ရှိသည်။