CNI News
၂၀၂၄ ခုနှစ်၊ နိုဝင်ဘာ ၂၀
စစ်ရေးပဋိပက္ခ ပြင်းထန်နေသည့် ရခိုင်ပြည်နယ်တွင် ပြည်သူလူထုများ မနစ်နာစေရန်နှင့် ငြိမ်းချမ်းသော နည်းလမ်းများအား အဖြေရှာရန် တွေ့ဆုံဆွေးနွေးရေး သေချာပေါက် ဖြစ်လာနိုင်သည်ဟု စစ်ရေးနှင့်နိုင်ငံရေး အကဲခတ်များက CNI သတင်းဌာနသို့ ပြောသည်။
အချိန်တစ်ခု၌ စားပွဲဝိုင်းဆွေးနွေးရေး သေချာပေါက်ရောက်လာနိုင်ပြီး တိုက်ပွဲများ ကြာရှည်နေသရွေ့ ပြည်သူများ နစ်နာနေဦးမည်ဖြစ်ကြောင်း NCA ထိုးထားသည့် ရခိုင်ပြည်လွတ်မြောက်ရေးပါတီ (ALP) ဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။
၎င်းက “တိုက်ပွဲရဲ့ အခြေအနေအရ၊ လူတွေရဲ့အနေအထားအရ ကြည့်မယ်ဆိုရင် သူများအမြင်မှာ (AA) ဘက်က စစ်ရေး အသာစီးရနေတယ်လို့ မြင်ကြပါတယ်။ ဆိုတော့ (AA) ဘက်ကလည်း ပြည်သူတွေရဲ့ ဆုံးဖြတ်ချက်၊ သူတို့ အောက်ခြေက စစ်သားတွေရဲ့ သတင်းပေးမှုတွေ အရဆိုလို့ရှိရင် လောလောဆယ်မှာ ဆွေးနွေးမယ်လို့ သူတို့ ခံယူချက်နဲ့ ခံယူလိမ့်မယ်။ ဒါပေမယ့် ကျမမြင်တာကတော့ တချိန်ချိန်တနေ့နေ့မှာတော့ စားပွဲဝိုင်းကို သေချာပေါက် ရောက်လာရလိမ့်မယ်လို့တော့ ထည့်တွက်ထားပါတယ်။ ဘာကြောင့်လဲဆိုလို့ရှိရင် ဘယ်လောက်ပဲ တိုက်ပွဲတွေဖြစ်ဖြစ် နောက်ဆုံးမှာကတော့ ကျမတို့တွေ ပြည်တစ်ခုရဲ့ အခြေအနေ၊ တိုင်းပြည်ရေး၊ တည်ဆောက်ရေးတွေ အားလုံးကို ထိန်းချုပ်လိုက်တဲ့အချိန် စားပွဲဝိုင်းအပေါ် မလွဲမသေ ရောက်နေလိမ့်မယ်လို့ ထင်ပါတယ်။ တိုက်ပွဲရှည်ကြာလေလေ ပြည်သူတွေက နစ်နာလေလေ ဖြစ်လေပဲ၊ ပြည်သူတွေက အရမ်းကိုနစ်နာတယ်။ ” ဟု ပြောသည်။
စစ်တွေမြို့ အဝင်ဆိုင်းဘုတ်ကို တွေ့ရစဥ်
၂၀၂၃ ခုနှစ်၊ နိုဝင်ဘာလ ၁၃ ရက်နေ့မှစတင်ကာ မြန်မာ့တပ်မတော်နှင့် အာရက္ခတပ်တော် (AA) အကြား တိုက်ပွဲများစတင် ဖြစ်ပွားလာပြီး ၂၀၂၄ ခုနှစ်၊ နိုင်ဝင်ဘာလ ၁၃ ရက်နေ့တွင် တစ်နှစ်ပြည့်ခဲ့ပြီဖြစ်သည်။
ထို့အပြင် ရခိုင်ပြည်နယ်တွင် မြန်မာ့တပ်မတော်၏တပ်များ အလုံးစုံချုပ်ငြိမ်းသွားရန် ဆက်လက် လုပ်ဆောင် သွားမည်ဟု အာရက္ခတပ်တော် (AA) က ၂၀၂၄ ခုနှစ်၊ နိုဝင်ဘာ ၁၃ ရက်နေ့တွင် ထုတ်ပြန် ကြေညာခဲ့သည်။
လက်ရှိတွင် တရုတ်၏ စီမံကိန်းများရှိရာ ကျောက်ဖြူမြို့တွင်လည်း နစက ဘက်မှ လုံခြုံရေးတိုးမြှင့်ထားကြောင်း သိရသည်။
နှစ်ဖက်အဖွဲ့အစည်းအနေဖြင့် ပြည်သူ၏ အကျိုးကို အလေးထားနိုင်မည်ဆိုလျှင် တွေ့ဆုံဆွေးနွေးမှု ရှိလာနိုင် ကြောင်း ရခိုင်ဒီမိုကရေစီအဖွဲ့ချုပ် (ALD) မှ ဦးမျိုးကျော်က CNI သတင်းဌာနသို့ ပြောသည်။
တိုက်ပွဲရှောင်များကို တွေ့ရစဥ်
၎င်းက “ပြည်သူမနာချင်ဘူး၊ လူမနာချင်ဘူး၊ ကိုယ့်ပြည်မှာရှိတဲ့ အဆောက်အဦးတွေ ပျက်စီးဖို့ မလိုလားဘူး၊ တစ်နည်းအားဖြင့် ပြောရရင် ပြည်သူရဲ့ အကျိုးကို မျက်မှောက်ပြုမယ်ဆိုရင်တော့ ဆွေးနွေးမှုကတော့ တစ်ချိန် မဟုတ် တစ်ချိန်မှာတော့ တွေ့ဆုံဆွေးနွေးရဖွယ် ရှိလာနိုင်မယ်ပေါ့နော်။ အခုချိန်ထိကတော့ ပြီးပြည့်စုံအောင် ထိတော့ မဟုတ်သေးဘူးပေါ့ဗျာ။ ဘာလို့လဲဆိုတော့ ဒီအာရက္ခတပ်တော်ကလည်း ကြေညာထားတာ ရှိတယ်လေ။ ဒီရခိုင်ပြည်နယ်မှာ သူတို့ကလွဲလို့ တခြားလက်နက်ကိုင် အဖွဲ့အစည်း မရှိရဘူး ဆိုတဲ့ဟာမျိုး ကြေညာထားတယ်လေ။ ရခိုင်ပြည်တစ်ခုလုံးကို လွှမ်းခြုံလို့တော့ မရသေးဘူးပေါ့ဗျာ။ အထူးသဖြင့် ရခိုင်ပြည်ရဲ့မြို့တော် စစ်တွေ၊ နိုင်ငံတကာ ရင်းနှီးမြှုပ်နှံမှုမှာ တရုတ်ရဲ့ထွက်ပေါက်ဖြစ်တဲ့ ကျောက်ဖြူ ဒီနေရာတွေ မရဘဲနဲ့တော့ ညှိနှိုင်းဆွေးနွေးတယ်ဆိုရင် နောင်မှာအရှုပ်၊ ရှုပ်ထွေးမှုတွေ ဖြစ်လာနိုင်တယ်ပေါ့နော်၊ ဒီဟာတွေက ဘယ်လိုကစားမလဲဆိုတဲ့ ဟာတွေကတော့ တပ်တော်က ခေါင်းဆောင်တွေ အပေါ်မှာ မူတည် လိမ့်မယ်လို့ထင်ပါတယ်” ဟု ပြောသည်။
တိုင်းပြည်နှင့် ပြည်သူလူထုကို ထည့်တွက်ရန် လိုအပ်ပြီး ငြိမ်းချမ်းသောနည်းကို အခြေခံကာ ကြိုးပမ်းရမည် ဖြစ်ကြောင်း နိုင်ငံရေး လေ့လာသုံးသပ်သူများက သုံးသပ်သည်။
ရခိုင်ပြည်နယ်တွင် မြို့နယ် ၁၇ မြို့နယ်ရှိသည့်အနက် ၁၀ မြို့နယ်ကို AA က ထိန်းချုပ်ထားပြီး နစက မှ ထိန်းချုပ် ထားသည့် ကျန် ၇ မြို့အနက် ဂွ၊ မောင်တောနှင့် အမ်းမြို့နယ်များကို AA ဘက်က ထိုးစစ်ဆင် တိုက်ခိုက် နေသလို ကျောက်ဖြူ၊ တောင်ကုတ်၊ မာန်အောင်နှင့် စစ်တွေမြို့နယ်တို့ကိုလည်း AA ဘက်က ပိတ်ဆို့ထားသည်။
