CNI International News
ဝါရှင်တန်၊ နိုဝင်ဘာ ၂၀
အမေရိကန်တွင် သမ္မတရွေးကောက်ပွဲ အနိုင်ရခဲ့သည့် ဒေါ်နယ်ထရမ့် (Donald Trump) ၏ အစိုးရလက်ထက်၌ အမေရိကန်၏ နိုင်ငံခြားရေးမူဝါဒများ ပြောင်းလဲနိုင်ခြေရှိသဖြင့် ထရမ့်အစိုးရအဖွဲ့မတိုင်မီ ဩစတြေးလျ၊ ဂျပန်နှင့် လက်ရှိ အမေရိကန်အစိုးရအဖွဲ့က ကာကွယ်ရေးပူးပေါင်း ဆောင်ရွက်မှုများကို မြှင့်တင်နေကြောင်း Nikkei Asia မှ ဖော်ပြခဲ့သည်။
မကြာသေးမီက ဩစတြေးလျနိုင်ငံ၊ ဒါဝင် (Darwin) မြို့တွင် ပြုလုပ်ခဲ့သည့် ဆွေးနွေးပွဲများ၌ ထို ၃ နိုင်ငံစလုံးမှ ကာကွယ်ရေးဝန်ကြီးများသည် အင်ဒို-ပစိဖိတ်ဒေသကို အဓိကထားပြီး ဒေသတွင်း လုံခြုံရေးစိန်ခေါ်မှုများအား ဖြေရှင်းရန် စစ်ရေးပူးပေါင်းဆောင်ရွက်မှုများ မြှင့်တက်ရေးအတွက် အာရုံစိုက်ခဲ့ကြသည်။
ထိုပူးပေါင်းဆောင်ရွက်ရေး အစီအစဉ်များအနက် မဟာဗျူဟာမြောက် ပူးပေါင်းဆောင်ရွက်ရေးကို မြှင့်တင်ရေး အတွက် ယန္တရားတစ်ခုဖြစ်သည့် ၃ ပွင့်ဆိုင် ကာကွယ်ရေး ညှိနှိုင်းဆွေးနွေးပွဲများ လုပ်ဆောင်ရေးလည်း ပါဝင်ခဲ့ သည်။
ထို့ပြင် အဓိက အစီအစဉ်များအနက် Talisman Sabre အမည်ရှိ အမေရိကန်-ဩစတြေးလျ ပူးတွဲစစ်ရေး လေ့ကျင့် မှုများတွင် ဂျပန် ပါဝင်လာမှု၊ အမေရိကန်-ဂျပန် စစ်ရေးလေ့ကျင့်မှုများ၌ ဩစတြေးလျ ပါဝင်လာမှုကဲ့သို့ ပူးတွဲ စစ်ရေး လေ့ကျင့်မှု အစီအစဉ်များကို ချဲ့ထွင်ရေးလည်း ပါဝင်သည်။
ဒေါ်နယ်ထရမ့်ကို တွေ့ရစဉ်
အခြားအစီအစဉ်များမှာ ပင်လယ်ရေကြောင်း နယ်နိမိတ် သတိထားစောင့်ကြည့်ရေး၊ ဒုံးကျည်ကာကွယ်ရေးကဲ့သို့ ပူးတွဲတုန့်ပြန်ရေး စွမ်းဆောင်ရည်များ ဖော်ဆောင်ရန်လည်း အမေရိကန်၊ ဂျပန်နှင့် ဩစတြေးလျနိုင်ငံများက ရည်ရွယ်ထားသည်။
ထို့ပြင် ဩစတြေးလျ၊ ဗြိတိန်နှင့် အမေရိကန်တို့ ပါဝင်သည့် AUKUS မိတ်ဖက်အဖွဲ့ကဲ့သို့ ဒေသတွင်း လုံခြုံရေး မူဘောင်များအောက်နှင့် ဩစတြေးလျ-အမေရိကန်၏ ဦးဆောင်မှုအောက်တွင် ဂျပန်က ကြီးမားသည့် အခန်း ကဏ္ဍမှ ပါဝင်ရန်လည်း မျှော်မှန်းထားသည်။
ဒေသတွင်း တရုတ်၏ လှုပ်ရှားမှုများ မြင့်တက်နေချိန်တွင် အင်ဒို-ပစိဖိတ်ဒေသ၏ လွတ်လပ်ပွင့်လင်းသည့် အခြေအနေကို ထိန်းသိမ်းရန်နှင့် ထရမ့်အစိုးရအဖွဲ့ လက်ထက်တွင် မူဝါဒ အပြောင်းအလဲများ ရှိနိုင်သဖြင့် ထိုအစီအစဉ်များကို လုပ်ဆောင်ခဲ့ခြင်းဖြစ်သည်။
ထို့ပြင် အမေရိကန်၊ ဂျပန်နှင့် ဩစတြေးလျ ခေါင်းဆောင်များက ၃ ပွင့်ဆိုင် မိတ်ဖက်ဆက်ဆံရေးကို ထိန်းသိမ်း ရာတွင် မဟာဗျူဟာမြောက် အကျိုးစီးပွားများနှင့် စံတန်ဖိုးများအား မျှဝေမှု၏ အရေးကြီးပုံကိုလည်း အဓိကထား ပြောဆိုခဲ့ကြသည်။
Source: Nikkei Asia
