CNI News
၂၀၂၄ ခုနှစ်၊ အောက်တိုဘာ ၉
နိုင်ငံရေးတွင် ရိုးသားမှုမရှိပါက ရိုးသားမှုမရှိခြင်း၏ အကျိုးဆက်ကို ပြန်လည်ခံစားရမည်ဟု နစကဥက္ကဌ ဗိုလ်ချုပ်မှူးကြီးမင်းအောင်လှိုင်က ၂၀၂၄ ခုနှစ်၊ အောက်တိုဘာ ၈ ရက်နေ့က ရန်ကုန်တိုင်းဒေသကြီး လုံခြုံရေးနှင့် ဖွံ့ဖြိုးတိုးတက်ရေး အစည်းအဝေးတွင် ပြောကြားခဲ့သည်။
မိမိတို့အနေဖြင့် နိုင်ငံတော်တာဝန်များကို စတင်ထမ်းဆောင်ခဲ့ရစဉ်ကတည်းကပင် ရှေ့လုပ်ငန်းစဉ်များကို ချမှတ် ဆောင်ရွက်ခဲ့ပြီး အန္နိမရည်မှန်းချက်အနေဖြင့် ရွေးကောက်ပွဲပြန်လည် ကျင်းပ၍ အနိုင်ရသည့်အစိုးရကို နိုင်ငံတော် အာဏာများ ပြန်လည်အပ်နှင်းသွားမည်ဟု အတိအလင်း ပြောခဲ့ပြီးဖြစ်ကြောင်း၊ ယင်းရည်မှန်းချက် အောင်မြင်စေ ရေး မိမိတို့အနေဖြင့် တစ်စိုက်မတ်မတ် အကောင်အထည်ဖော် ဆောင်ရွက်လျက်ရှိကြောင်း ၎င်းက ပြောသည်။
ဗိုလ်ချုပ်မှူးကြီးမင်းအောင်လှိုင်က “ နိုင်ငံရေးတွင် ရိုးသားမှုမရှိပါက ရိုးသားမှုမရှိခြင်း၏ အကျိုးဆက်ကို ပြန်လည် ခံစားရမည်ဖြစ်ကြောင်းကို မိမိတို့နိုင်ငံတွင် ဖြစ်ပေါ်ခဲ့သည့် ဖြစ်စဉ်များအပြင် နိုင်ငံတကာဖြစ်စဉ်များတွင်လည်း မြင်တွေ့ရမည်”ဟု ပြောသည်။
မည်သည့် လူပုဂ္ဂိုလ် သို့မဟုတ် အဖွဲ့အစည်း၊ မည်သည့် နိုင်ငံရေးပါတီ သို့မဟုတ် မည်သည့် ဖြစ်စဉ်များကို ရည်ညွန်းပြောကြားခဲ့သည်ကိုတော့ မသိရပေ။
လက်ရှိ မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီ ၁ ရက်က တပ်မတော်မှ အမျိုးသားဒီမိုကရေစီအဖွဲ့ချုပ်(NLD) အစိုးရကို ၂၀၂၀ အထွေထွေရွေးကောက်ပွဲ မဲစာရင်းအငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည် ဟုဆိုကာ ဖြုတ်ချ၍ နိုင်ငံတော်အာဏာကို ရယူထားသည်။
ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်
ထို့နောက် NLD ပါတီခေါင်းဆောင်များ၊ လွှတ်တော်အမတ်များ၊ ဒီမိုကရေစီအင်အားစုများ၊ အရပ်ဖက် နိုင်ငံရေး သမားတချို့ ဖမ်းဆီးခံခဲ့ရသည်
ထိုအခြေအနေအတွင်းမှာ ဆန္ဒပြမှုများပေါ်ပေါက်ခဲ့ကာ အဓိကရုဏ်းများဖြစ်ပွား၍ သွေးထွက်သံယိုမှုများ ပေါ်ပေါက်ခဲ့သည်။
ထိုသို့ ဖြစ်တည်လာပြီးနောက် NLD ပါတီခေါင်းဆောင် တချို့နှင့် လွှတ်တော်အမတ်များ အပါအဝင် ဒီမိုကရေစီ အင်အားစုများ၊ တိုင်းရင်းသားလက်နက်ကိုင်(EAO)များက မြန်မာ့တပ်မတော်နှင့် နစကအစိုးရကို ဖြုတ်ချရေး လက်နက်ကိုင် တိုက်ခိုက်လျက်ရှိနေသည်။
လက်ရှိတွင် မြန်မာနိုင်ငံ၏ ရှမ်းပြည်နယ်၊ ကရင်ပြည်နယ်၊ ချင်းပြည်နယ်၊ ရခိုင်ပြည်နယ်၊ မွန်ပြည်နယ်၊ ကယား ပြည်နယ်၊ ကချင်ပြည်နယ်၊ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ မန္တလေးတိုင်း ဒေသကြီး၊ တနင်္သာရီတိုင်းဒေသကြီးတို့မှာ တိုက်ပွဲများ အပြင်းအထန် ဖြစ်ပွားနေကြသည်။
အဆိုပါ တိုက်ပွဲများကြောင့် စစ်ပြေးဒုက္ခသည် ၆ သန်းကျော်ရှိလာပြီးဟု ISP-Myanmar က အောက်တိုဘာ ပထမအပတ်ထဲမှာ ထုတ်ပြန်ထားသည်။
