CNI News

၂၀၂၄ ခုနှစ်၊ ဩဂုတ် ၇

ရှမ်းပြည်နယ်မြောက်ပိုင်းနှင့် မန္တလေးတိုင်းဒေသကြီး အစပ်အထိ ဖြစ်ပွားနေသော တိုက်ပွဲများမှာ မန္တလေးအထိ စစ်မီးကူးစက်လာနိုင်သလား ဆိုသည့်အပေါ် နိုင်ငံရေးနှင့် စစ်ရေးအကဲခတ်များက မေးခွန်းထုတ် သုံးသပ်ဆွေးနွေး လျက်ရှိနေကြသည်။

ပြီးခဲ့သည် ဇွန်လကုန်ပိုင်းမှာ ၁၀၂၇ စစ်ဆင်ရေး ဒုတိယလှိုင်းကို ညီနောင်မဟာမိတ်တို့က ရှမ်းမြောက်တွင် စတင် အကောင်အထည်ဖော် ဆောင်ရွက်ခဲ့ပြီး မန္တလေးတိုင်းဒေသကြီးအတွင်းရှိ မိုးမိတ်၊ မိုးကုတ်၊ မတ္တရာ၊ စဉ့်ကူးတို့ အထိ ဖြစ်ပွားခဲ့သည်။

ထို့နောက် မန္တလေးမြို့နယ်အတွင်း ကူးစက်လာနိုင်သည်ဟုဆိုကာ မြို့ခံများ စိုးရိမ်၍ ရန်ကုန်၊ နေပြည်တော်သို့ ကြိုတင်တိမ်းရှောင်မှုများလည်း ရှိနေသည်။

မန္တလေးမြို့ကို ခြိမ်းခြောက်နိုင်သော်လည်း တိုင်းရင်းသား လက်နက်ကိုင် အဖွဲ့အစည်းများ မပါဝင်ပါက မြို့သိမ်း တိုက်ပွဲ ဆင်နွှဲရန် ခက်ခဲနိုင်ကြောင်း၊ လာမည့် ဟိုင်ဂင်ဆွေးနွေးပွဲကို စောင့်ကြည်ရမည်ဖြစ်ကြောင်း ပအိုဝ်း အမျိုးသားလွတ်မြောက်ရေးအဖွဲ့ချုပ် (PNLO) မှ နာယက ဗိုလ်မှူးကြီး ခွန်ဥက္ကာက CNI သတင်းဌာနသို့ ပြော သည်။

မန္တလေးမြို့စည်ပင်ရုံးကို တွေ့ရစဉ် 

၎င်းက “ကျနော်တို့ ကြည့်ရတာတော့ ခြိမ်းခြောက်နိုင်တာပေါ့လေ၊ မန္တလေးတော့ ခြိမ်းခြောက်နိုင်တယ်၊ ဒါပေမဲ့ အဲဒီမှာတော့ ပလောင်တပ်တို့၊ ကိုးကန့်တပ်တို့၊ “ဝ”တပ်တို့တော့ လိုက်လာမလား၊ မလာဘူးလား ကျနော်တို့ မပြောနိုင်ဘူး။ သို့သော်လည်းပဲ တခြား ဗမာတပ်တွေလည်း ရှိသေးတာကို အဲဒါကြောင့် အဲဒီအဖွဲ့တွေကတော့ မန္တလေးပျောက်ကြားတွေက ဝင်ချင်ဝင်မှာ၊ ဒါပေမဲ့ သူတို့ အလုံးအရင်းလောက်တော့ သိမ်းဖို့တော့ လွယ်မှာ မဟုတ်ဘူး။ နှောင့်ယှက်တာတော့ ဖြစ်နိုင်ပါတယ်။ သိမ်းတာတော့ မြောက်ပိုင်းတိုင်းရင်းသား တပ်ကြီးတွေ မပါရင် တော့ သိမ်းဖို့ မလွယ်ပါဘူး။ ကျနော်အထင်ပေါ့လေ၊ အဲဒါကြောင့် ခြိမ်းခြောက်တာတော့ ခြိမ်းခြောက်နိုင်တယ်၊ ဒီကြားထဲမှာ ဆွေးနွေးပွဲ တစ်မျိုးမျိုး ပြန်ဖြစ်ရင်တော့ နည်းနည်းတန့်သွားနိုင်တာပေါ့၊ အဲဒါလေး ကျနော်တို့ စောင့်ကြည့်နေတာ၊ ဒီရက်ထဲမှာ ကူမင်းမှာလည်း ဆွေးနွေးပွဲ ထပ်ဖြစ်ဖို့ ရှိတယ်ဆိုတာ သတင်းထဲက ကြားနေ တော့ အားလုံးကတော့ အခြေအနေကတော့ ပိုဆိုးလာဖို့တော့ လောလောဆယ် မရှိဘူးလို့ ထင်ပါတယ်” ဟု ပြောသည်။

လာမည့် ဩဂုတ် ၈ ရက်နေ့ တရုတ်နိုင်ငံ၊ ကူမင်းမြို့တွင် ညီနောင်မဟာမိတ်တို့နှင့် တွေ့ဆုံမည့် ၆ ကြိမ်မြောက် ဟိုင်ဂင်အစည်းအဝေးကို အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) က တက်ရောက်မှာ မဟုတ်ဟု စာပို့အကြောင်းကြားထားသည်ဟု သိရသည်။

ဒီမိုကရေစီအင်အားစုနှင့် စစ်အင်အားစု အားပြိုင်မှုတွင် ဒီမိုကရေစီ အင်အားစုများက မန္တလေးမြို့ကို မြန်မြန် ကျစေလိုကြောင်း မြန်မာ့နိုင်ငံရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

၎င်းက “ဒီမိုကရေစီအင်အားစုနဲ့ စစ်အင်အားစု အားပြိုင်တဲ့ နေရာမှာတော့ ဒီမိုကရေစီအင်အားစုတွေက မန္တလေး မြန်မြန် ကျစေချင်တယ်၊ အဲဒါပဲ၊ ဘယ်လိုနည်းနဲ့ ကျကျ၊ မြန်မြန်ကျပြီး ဒီမိုကရေစီဖက်ကိုရ ဒီမိုကရေစီ လွတ်မြောက်သွားချင်တယ်၊ အဲဒါကတော့ ဒီမိုကရေစီ အင်အားစုတွေရဲ့ ဆန္ဒပဲ” ဟု ပြောသည်။

လက်ရှိ ရှမ်းမြောက်နှင့် မန္တလေးတိုင်းဒေသကြီး တိုက်ပွဲအတွင်းမှာ ပလောင်ပြည်လွတ်မြောက်ရေးတပ်ဦး (PSLF/TNLA)၊ မြန်မာအမျိုးသား ဒီမိုကရက်တစ်မဟာမိတ် တပ်မတော် (MNDAA) တို့နှင့် မန္တလေးပြည်သူ့ ကာကွယ်ရေးတပ် (MDY-PDF)၊ ဗမာပြည်သူ့လွတ်မြောက်ရေးတပ်မတော်(BPLA)တို့ ပါဝင်ကြသည်။

မန္တလေး PDF နဲ့ TNLA ပူးပေါင်းတပ်ဖွဲ့ကိုတွေ့ရစဉ်

ပြင်ဦးလွင်ကို အရောင်ပြတိုက်ခိုက်ပြီး အဓိက မန္တလေးမြို့ကို တိုက်ခိုက်လာနိုင်ကြောင်း နိုင်ငံရေး‌လေ့လာ သုံးသပ်သူ တစ်ဦးက CNI သတင်းဌာနသို့ ပြောသည်။ 

၎င်းက “မန္တလေး ရောက်လာနိုင်တာပေါ့၊ အဓိက မန္တလေးကို တိုက်မှာလေ၊ ပြင်ဦးလွင်က သူက ယောင်ပြပဲ လုပ်မှာ၊ အဓိက မန္တလေးကို တိုက်မှာပေါ့နော်၊ တစ်ခုရှိတာက သူက (TNLA/MNDAA) ယူနီဖောင်းပြောင်း ဝတ်လိုက်မှာပေါ့နော်၊ တိုက်နိုင်တာပေါ့၊ တိုက်ဖို့အတွက်က နောက်က ရုပ်ဝတ္ထု ပစ္စည်းခဲယမ်းက တရုတ်ပြည်က ထောက်ပံ့ အဲဒီတော့ အင်အားကြီး နိုင်ငံကြီး ထောက်ပံ့နေပြီဆိုတော့ ဒါက တိုက်နိုင်တဲ့ အနေအထား အပြည့်အဝ ရှိတယ်လေ” ဟု ပြောသည်။

လက်ရှိတွင် ရှမ်းမြောက်နှင့် မန္တလေးတိုင်းဒေသကြီးအတွင်းရှိ ကျောက်မဲ၊ နောင်ချို၊ မိုးကုတ်၊ စဉ့်ကူး၊ မတ္တရာတို့ တွင် မြန်မာ့တပ်မတော်နှင့် တော်လှန်ရေးအင်အားစုတို့အကြား တိုက်ပွဲများ ဖြစ်ပွားလျက်ရှိနေသည်။

မန္တလေးမြို့ကို တိုက်ခိုက်နိုင်ရေးအတွက်လည်း အတိုက်အခံ လက်နက်ကိုင်အင်အားစုများက အင်အားစုဖွဲ့နေ ကြောင်းလည်း စစ်ရေးအကဲခတ်များက ထောက်ပြကြသည်။