CNI News
၂၀၂၄ ခုနှစ်၊ ဇူလိုင် ၁၆
ရှမ်းပြည်နယ်မြောက်ပိုင်းမှာ မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA) နှင့် ပလောင်ပြည် လွတ်မြောက်ရေးတပ်ဦး (PSLF/TNLA) တို့ ၄ ရက်တာ အပစ်အခတ်ရပ်စဲကြောင်း ကြေညာခဲ့သော်လည်း မြန်မာ့ တပ်မတော်နှင့်တိုက်ပွဲများ ဆက်လက် ဖြစ်ပွားနေအပေါ် ဒေသခံများနှင့် စစ်ရေးအကဲခတ်များကြား မေးခွန်းများ ထုတ်နေကြသည်။
MNDAA က ဇူလိုင်လ ၁၄ ရက်နေ့မှ ၁၈ ရက်နေ့အထိ မြန်မာ့တပ်မတော်နှင့် ၄ ရက်တာ အပစ်အခတ်ရပ်စဲ ကြောင်း ထုတ်ပြန်ကြေညာခဲ့ပြီးနောက် TNLA ၏ အထွေထွေအတွင်းရေးမှူး တားဘုန်းကျော်ကလည်း ၄ ရက်တာ အပစ်အခတ်ရပ်စဲကြောင်း AFP သတင်းဌာနသို့ ပြောကြားထားသည်။
တရုတ်ကွန်မြူနစ်ပါတီ၏ တတိယအကြိမ် ဗဟိုကော်မတီ အစည်းအဝေးကို ဇူလိုင် ၁၅ ရက်နေ့မှ ၁၈ ရက်နေ့အထိ ကျင်းပနေခြင်းအပေါ် ကြိုဆိုဂုဏ်ပြုသည့်အနေဖြင့် TNLA၊ MNDAA တို့က တဖက်သတ် အပစ်အခတ်ရပ်စဲခြင်း ဖြစ်သည်။
သို့သော် မန္တလေးတိုင်းဒေသကြီးတွင် အကျုံးမဝင်ကြောင်း ၎င်းတို့က ပြောကြားထားသည်။
ထိုအပစ်အခတ်ရပ်စဲမှုကို တော်လှန်ရေးအင်အားစုများက တဖက်သတ် ကြေညာခြင်းဖြစ်ပြီး မြန်မာ့တပ်မတော် ဖက်က တိုက်ခိုက်လာပါက ကိုယ့်ဒေသအတွက် တိုက်ခိုက်ရမှာဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာ လှကျော်ဇောက CNI သတင်းဌာနသို့ ပြောသည်။
လောက်ကိုင်မြို့ ဗုံးကြဲခံရစဉ်
၎င်းက “ရုတ်တရက် ချက်ချင်း မရပ်နိုင်သေးတာနဲ့ တူပါတယ်။ ကြည့်ရတာ၊ သူတို့ ကြေညာတာတော့ ၄ ရက် ရပ်မယ်ဆိုတာတော့ ၁၄ ရက်နေ့က စတာလေနော်၊ ဒီနေ့ဆို ၁၆ ရက်တောင်ရှိပြီ အဲဒီတော့ ရပ်မရသေးတာ ထင် တယ်၊ နောက်နေ့တွေလည်း ထပ်ဖြစ်မလာ မဖြစ်လာဆိုတာ မသေချာဘူးဗျ၊ ပြောတာတော့ ပြောတာပေါ့ဗျာ၊ MNDAA တို့ ဘာတို့ကလည်း စစ်ဆိုတာ ချက်ချင်းရပ်လို့ ရကြတာမှ မဟုတ်ဘဲနော်၊ တရုတ်က ဖိအားပေးလာ တော့ တရုတ်ကို မျက်နှာလုပ်ပြီး ပြောရတာလည်း ဖြစ်ချင်ဖြစ်မှာပေါ့ဗျာ၊ တစ်ကြောင်းမထောက် တစ်ကြောင်း ထောက် ဆက်ဆံပြီး ပြောနေရတာကိုနော့်။ အဲဒါကြောင့်မို့လို့ ပြောပေမယ့် အပေါ်ယံတော့ အဲဒီလိုပြောပေမယ့် တိုက်စရာရှိတော့လည်း ဆက်တိုက်နေရတာ ဖြစ်ချင်ဖြစ်မှာပေါ့၊ နောက်ပြီးတော့ ဒီလိုဗျ အပစ်အခတ်ရပ်စဲရေးက တစ်ဖက်သတ်ပဲ ကြေညာရတာလေ၊ စစ်ကောင်စီက ရပ်မယ်လို့မှ မကြေညာတာ အဲဒီတော့ စစ်ကောင်စီက ဒါကို အလစ်အငိုက်ယူပြီး တိုက်လာရင်တော့ တော်လှန်ရေးသမားတွေဖက်ကလည်း ပြန်တိုက်စရာရှိရင် တိုက်ရမှာပေါ့ ဗျာ၊ ကိုယ့်နေရာ ကိုယ့်ဒေသအတွက်တော့ လုပ်စရာရှိတာ ဆက်လုပ်ကြရမယ်ထင်တယ် ကြည့်ရတာ” ဟု ပြော သည်။
ရှမ်းပြည်နယ်မြောက်ပိုင်း၊ နောင်ချိုမြို့နယ် သဲခေါ်ရွားအနီးရှိ TNLA တပ်စခန်းကို ဇူလိုင် ၁၅ ရက်နေ့ ညပိုင်းမှာ မြန်မာ့တပ်မတော်ဖက်က ဒရုန်းဖြင့် လာရောက်တိုက်ခိုက်ခဲ့ကြောင်း၊ အလားတူ လက်နက်ကြီးဖြင့် ၃ ကြိမ် တိုက်ခိုက်ခဲ့ကြောင်း TNLA က သတင်းထုတ်ပြန်ခဲ့သည်။
TNLA တပ်ဖွဲ့ကို တွေ့ရစဉ်
စစ်ရေးအကဲခတ်တစ်ဦးက “ဒါက MNDAA တဖက်သတ်ရပ်စဲတာပေါ့နော်၊ သူရပ်စဲတယ်ဆိုတာတော့ ဒီဖက်က ရပ်ချင်မှ ရပ်မှာပေါ့၊ သူရပ်စဲတယ်ဆိုပြီးတော့ ၄ ရက်အတွင်းသူက မတိုက်တော့ဘူးမှ မပြောဘူးလေ၊ အဲဒီတော့ ဒီဖက်ကလည်း နှစ်ဦးသဘောတူမှမဟုတ်ဘဲ ဒီအတိုင်းတော့ ပစ်တာ ခတ်တာ ဆက်ဖြစ်နေမှာပေါ့နော်” ဟု CNI သတင်းဌာနသို့ ပြောသည်။
လက်ရှိ TNLA နှင့် MNDAA တို့ တိုက်ခိုက်နေသည့် နေရာများမှာ မြန်မာ့တပ်မတော်အတွက် အရေးပါသည့် နေရာ များဖြစ်သည့်အတွက် တိုက်ပွဲများ ဆက်လက်ဖြစ်ပွားနိုင်ကြောင်း ၎င်းက ပြောသည်။
ပြီးခဲ့သည့် လကုန်ပိုင်းမှ စတင်ပြီး ရှမ်းပြည်နယ်မြောက်ပိုင်းရှိ ကျောက်မဲ၊ နောင်ချို၊ မိုးမိတ်၊ လားရှိုးနှင့် မန္တလေး တိုင်းဒေသကြီးအတွင်းရှိ မိုးကုတ်၊ မတ္တရာ၊ စဉ့်ကူးမြို့နယ်ရှိ မြန်မာ့တပ်မတော် စခန်းများကို TNLA ၊ MNDAA၊ MDY-PDF စသည့် ပူးပေါင်းတပ်ဖွဲ့တို့က လာရောက်တိုက်ခိုက်ခဲ့သည်။
ထို့နောက် မြန်မာ့တပ်မတော်နှင့် တိုက်ပွဲများ အပြင်းအထန် ဖြစ်ပွားလျက်ရှိသည်။
