CNI News

၂၀၂၃ ခုနှစ်၊ မတ်လ ၈

နစကမှ ရွေးကောက်ပွဲ ကျင်းပနိုင်ရန် ပြင်ဆင်ဆောင်ရွက်နေသော်လည်း အကြောင်းအမျိုးမျိုးကြောင့် ရွေးကောက်ပွဲ မဖြစ်ပါက ပြည်သူလူထု၏ စီးပွားရေး ကျပ်တည်းမှုမှာ ပိုဖြစ်လာနိုင်သည်ဟု စီးပွားရေး လုပ်ငန်း ရှင်များနှင့် စီးပွားရေး ပညာရှင်များက ပြောသည်။

အကယ်၍ နစက ပြင်ဆင်နေသည့် ရွေးကောက်ပွဲဖြစ်ပါက ရွေးကောက်ခံအစိုးရ တက်လာခြင်းနှင့်အတူ တိုင်းပြည် ၏စီးပွားရေး ကောင်းမွန်လာနိုင်ကြောင်း၊ စီးပွားရေး ကောင်းမွန်လာပါက ပြည်သူလူထု၏ အလုပ်အကိုင် အခွင့် အလမ်း နှင့် စားဝတ်နေထိုင်ရေးများလည်း အဆင်ပြေလာနိုင်ကြောင်း ၎င်းတို့က ပြောကြသည်။

ရွေးကောက်ပွဲ ကျင်းပပြီး ရွေးကောက်ခံ အစိုးရ တက်လာပါက လက်ရှိ စီးပွားရေး ပိတ်ဆို့ထားမှုများကို ဖြေလျှော့ လာရန် လုပ်လာနိုင်ကြောင်း၊ နိုင်ငံတကာ ရင်းနှီးမြှုပ်နှံမှုများလည်း ဝင်ရောက်လာမည်ဖြစ်ကြောင်း၊ ရွေးကောက်ပွဲ မဖြစ်ပါက နိုင်ငံတကာ၏ စီးပွားရေး ပိတ်ဆို့မှုများသည် လက်ရှိထက် ပိုမိုလုပ်ဆောင် လာနိုင်သည့်အတွက် ပြည်သူလူထု၏ စီးပွားရေးသည် ကျပ်တည်းလာနိုင်ကြောင်း စီးပွားရေး ကျွမ်းကျင်ပညာရှင် ဦးသက်ဇော်က CNI သတင်းဌာနသို့ ပြောသည်။

ဦးသက်ဇော်က “ရွေးကောက်ပွဲ အနေနဲ့ကတော့ ဒါကတော့ ဆရာတို့အမြင် ပွင့်ပွင့်လင်းလင်း ပြောရရင် ရှိသင့် တယ်။ ဘာလို့ဆို အရပ်သားရဲ့ အုပ်ချုပ်မှုနယ်ပယ်ကို ကျယ်ပြန့်စေချင်တဲ့ အတွက်ကြောင့်မို့လို့ အရပ်ဘောင် ကျယ်လာ မယ်။ အရပ်ဘောင် ကျယ်မယ်၊ စစ်ဘောင် ကျဉ်းစေတယ် ရွေးကောက်ပွဲက မဖြစ်မနေသွားရမယ်။ နောက်တစ်ခုက တို့နိုင်ငံက စီးပွားရေးဆိုင်ရာ ဆိုရင်လည်း ဆန်ရှင်တွေက အများကြီးထိခဲ့ပြီ နစကနဲ့ ပတ်သက်ပြီးတော့ resolution ချထား တာတို့၊ ဘာတို့ အစုံလုပ်ထားတဲ့ အခါကျတော့ ရွေးကောက်ခံအစိုးရ ဖြစ်လာရင်တော့ ဒါတွေကို ပြန်ဖြေလျှော့ လာအောင် ကြိုးစားရမှာ။ ကြိုးစားတဲ့ အတွက်ကြောင့်မို့လို့ စီးပွားရေးဘက်မှာလည်း အကယ်လို့ ရွေးကောက်ခံ အစိုးရ ဖြစ်လာရင်တော့ နိုင်ငံတကာ FDI တွေက ဝင်လာမယ်လို့ ဆရာတို့က မျှော်မှန်းတယ်။ ရွေးကောက်ပွဲ မဖြစ်လာရင်တော့ ဆန်ရှင်တွေက ပိုလာမယ်၊ resolution တွေ ပိုပြီးတော့ တင်းကျပ်လာမယ်။ နောက်ပိုင်းကျရင် ဒီထက် တင်းကျပ်မှုတွေ လာမယ်။ ဒီထက် တင်းကျပ်လာရင် တိုင်းပြည်ရဲ့ စီးပွားရေးက ဒီထက်ကျလာရင် လူတွေ ရဲ့ စီးပွားရေး ကျပ်တည်းမှုတွေ ပိုဖြစ်လာမယ်လို့ ဆရာတို့ကတော့ ထင်တာပေါ့နော်” ဟု ပြောသည်။

စားဝတ်နေရေး ခက်ခဲသူများကို ထမင်း-ဟင်း လှူဒါန်းနေစဉ်

လက်ရှိ ပြည်တွင်း၌ ရွေးကောက်ပွဲကို ဖြစ်စေလိုသည့် လူတန်းစားတစ်စု ရှိနေသလို ရွေးကောက်ပွဲ မဖြစ်စေလို သော လူတန်းစားတစ်ရပ်လည်း ရှိနေသည်။

ထို့ကြောင့် ရွေးကောက်ပွဲ ကျင်းပနိုင်ရေး မျှော်မှန်းချက်နှင့် အုပ်ချုပ်မည့် အစိုးရ၏ မူဝါဒအပေါ် မူတည်၍လည်း နိုင်ငံ၏စီးပွားရေးမှာ အပြောင်းအလဲ ဖြစ်သွားနိုင်ကြောင်း လုပ်ငန်းရှင်များက ပြောသည်။

ရွေးကောက်ပွဲ ပြီးမြောက်သွားပါက မြန်မာနိုင်ငံအတွင်းသို့ နိုင်ငံတကာ ရင်းနှီးမြှုပ်နှံမှု အများအပြား ဝင်ရောက် လာမည်ကို စီးပွားရေး လုပ်ငန်းရှင် အများစုက မျှော်လင့်နေကြသည်။

လက်ရှိ နိုင်ငံရေး အခြေအနေသည် ပြည်သူလူထု အားလုံးအတွက် ကောင်းမွန်သည့် အခြေအနေ မဟုတ်ကြောင်း၊ နိုင်ငံရေး အခြေအနေ မကောင်းပါက စီးပွားရေးလည်း ထိခိုက်မှုများ ဖြစ်လာနိုင်ကြောင်း ဘဏ်ရေးရာ ကျွမ်းကျင် ပညာရှင် ဦးဋ္ဌေးအောင်ကြည်က CNI သတင်းဌာနသို့ ပြောသည်။

၎င်းက “ရွေးကောက်ပွဲက ဘယ်လိုခေါ်မလဲ အားလုံးအတွက် ထွက်ပေါက်ပေါ့နော်။ ဒီထွက်ပေါက်ကို အားလုံးက ဘယ်လိုနားလည်ကြလဲအပေါ်မှာ မူတည်တာပေါ့။ အားလုံးက နားလည်တဲ့ပုံစံက ဘယ်လိုပြောမလဲ အဆင်ပြေ တယ်ဆိုလို့ရှိရင် ဒါက ကောင်းတဲ့ထွက်ပေါက် ဖြစ်သွားမှာပေါ့။ အားလုံးရဲ့ နားလည်မှုကို ဆရာတို့က မှန်းရတာ တော်တော်လေး ခက်တာပေါ့။ တစ်ခုရှိတယ် အခုလက်ရှိ ရှိနေတဲ့ စီးပွားရေးအားလုံးက နိုင်ငံရေးအပေါ် မူတည်နေ တာဆိုတော့ ပြောရမှာ အကျယ်ကြီးပေါ့။ အရှည်ကြီးပေါ့လေ။ ဆိုတော့ နိုင်ငံရေးအပေါ် မူတည်နေတော့ နိုင်ငံရေး က အားလုံးအတွက် ကောင်းတယ်လို့ ပြောလို့မရဘူး။ နိုင်ငံရေး မကောင်းတဲ့ အခါကျတော့ စီးပွားရေးပတ်ဝန်း ကျင် ထိခိုက်တာပေါ့။ စီးပွားရေးပါ ဆက်သွားတော့ ဒီဥစ္စာကို အားလုံး ကျယ်ပြန့် နားလည်ပြီးတော့ သဘောအမြင် မှန်မှန်ကန်ကန်နဲ့ ကြေညက်ရင်တော့ အားလုံးအတွက် ကောင်းတာပေါ့။ ဒါဆိုရင် အားလုံးအတွက် အဆင်ပြေသွား မှာပေါ့ ဒါကျနော့်အမြင်ကို ပြောတာပေါ့” ဟု ပြောသည်။

နယ်စပ်ကုန်သွယ်ရေး အနေဖြင့် ရွေးကောက်ပွဲ ဖြစ်မဖြစ်အပေါ် အများကြီး သက်ရောက်မှု မရှိကြောင်း၊ အချိန် အတိုင်းအတာ တစ်ခုအနေဖြင့် ဆိုင်ငံ့မှုတစ်ချို့ ဖြစ်ပေါ်လာမည် ဖြစ်သည်ဟု မြန်မာနိုင်ငံ ပြောင်းလုပ်ငန်းအသင်း ဒုတိယဥက္ကဋ္ဌ ဦးသန့်ဇင်ထွန်းက CNI သတင်းဌာနသို့ ပြောသည်။

ရန်ကုန်မြို့တွင်းကိုတွေ့ရစဉ်

ဦးသန့်ဇင်ထွန်းက “ဖြစ်သည်ဖြစ်စေ၊ မဖြစ်သည်ဖြစ်စေ အရောင်းအဝယ်တွေကတော့ လုပ်နေရမှာပဲလေ။ ဘာလို့လဲဆိုတော့ သူ့ဟာသူ ရွေးကောက်ပွဲ လုပ်သည်ဖြစ်စေ၊ မလုပ်သည်ဖြစ်စေ ဆံပင်ညှပ်တဲ့လူကတော့ ဆံပင်ညှပ်ရမှာပဲ၊ တောင်သူကလည်း တောင်သူအလုပ် လုပ်ရမှာပဲ။ ကုန်သည်ကလည်း ကုန်သည်အလုပ် လုပ်ရ မှာပဲ။ ဘာလို့လဲဆိုတော့ အကုန်လုံးက စားဝတ်နေရေးအတွက် တစ်ခုနဲ့ တစ်ခုပေါ့နော် အချိန်အတိုင်းအတာ တစ်ခုအနေနဲ့ ရပ်တန့်ကောင်း ရပ်တန့်မယ်။ ဒါပေမယ့် လုပ်ရတဲ့ အလုပ်တွေ အားလုံးကတော့ ကိုယ်လုပ်တဲ့ အလုပ်အတွက်ကြောင့် ဒီရွေးကောက်ပွဲ ဖြစ်ခြင်းမဖြစ်ခြင်း၊ လုပ်ခြင်း မလုပ်ခြင်း အပေါ်မှာတော့ နည်းနည်း ပြဿနာရှိလည်း အချိန်တစ်ခုပဲ၊ ပြဿနာမရှိလည်း အချိန်တစ်ခုပဲ ဆိုင်းငံ့တာ ဖြစ်ချင်ဖြစ်မယ်။ ပြီးရင်တော့ သူ့ဟာသူ လည်ပတ်ကြမှာပဲလေ။ လုံးလုံးကြီးပေါ့နော် ရှိခဲ့ဖူးတာက နယ်စပ်ရောင်းဝယ်ရေးမှာ ဥပမာ မြဝတီပဲ ဖြစ်ဖြစ်၊ ဘင်္ဂလားဒေ့ရှ်ပဲဖြစ်ဖြစ် အရောင်းအဝယ်တွေမှာက နှစ်နိုင်ငံ မူဝါဒကြောင့် မြဝတီနယ်စပ်မှာရှိတဲ့ တံတား တွေ ပိတ်လိုက်ပါတယ်၊ ကုန်သွယ်ရေး ပိတ်လိုက်ပါတယ်တို့၊ မူဆယ်မှာရှိတဲ့ လမ်းကြောင်းမှာ ပိတ်လိုက်ပါတယ် တို့၊ ကျန်းမာရေးအရ သော်လည်းကောင်း၊ မျှော်မှန်းမထားတဲ့ အကြောင်းအမျိုးမျိုးကြောင့် ပိတ်တာမျိုးလည်း ရှိ တာပဲလေ။ ပြီးရင်လည်း ပြန်ဖွင့်ကြပြီး ပြန်ရောင်းကြ ဝယ်ကြတာပဲဆိုတော့ အချိန်တစ်ခုပါပဲ။ ရွေးကောက်ပွဲ ရှိခြင်း၊ မရှိခြင်းနဲ့ကတော့ သိပ်ပြီးတော့ နယ်စပ်အရောင်းအဝယ်ကတော့ ရာခိုင်နှုန်း အများကြီး ထိခိုက်မှုတော့ မရှိပါဘူး” ဟု ပြောသည်။

ရွေးကောက်ပွဲ ကျင်းပပြီး သွားပါကလည်း ရင်းနှီးမြှုပ်နှံမှုများသည် ချက်ချင်း ဝင်ရောက်လာမည် မဟုတ်ကြောင်း၊ ရွေးကောက်ခံ အစိုးရမှ ချမှတ်မည့် မူဝါဒနှင့် နယ်မြေတည်ငြိမ်မှု အခြေအနေပေါ် မူတည်၍ နိုင်ငံတကာ အသိုင်း အဝိုင်းက စောင့်ကြည့်ကြမည်ဖြစ်ကြောင်း၊ ထို့ကြောင့် ၆ လကနေ ၁ နှစ်အထိ စောင့်ကြည့်ပြီးမှသာ ရင်းနှီးမြှုပ်နှံ မှုများ ဝင်ရောက်လာနိုင်ကြောင်း စီးပွားရေးလုပ်ငန်းရှင်များက သုံးသပ်နေကြသည်။

CNI News

၂၀၂၃ ခုနှစ်၊ မတ်လ ၇

ရန်ကုန်မြို့ရှိ မြန်မာနိုင်ငံကူးလက်မှတ် ထုတ်ပေးရေးရုံး online website တွင် ရက်ချိန်းလျှောက်ထားရာ၌ မသမာ သော နည်းဖြင့် စနစ်အတွင်း ဝင်ရောက်ရန် ကြိုးစားခြင်း၊ အချက်အလက် ပြင်ဆင်ခြင်း၊ ငွေကြေး လိမ်လည်မှု ပြုခြင်းများအား စိစစ်တွေ့ရှိပါက ထိရောက်စွာ အရေးယူမည်ဖြစ်ကြောင်း ထုတ်ပြန်ထားသည်။

လက်ရှိ ပြောင်းလဲလိုက်သည့် နိုင်ငံကူးလက်မှတ် ရက်ချိန်း လျှောက်ထားရသည့် စနစ်သစ်သည် ပွဲစားများနှင့် ငွေကြေးလိမ်လည်မှုများအား လျော့ကျသွားစေရန် လုပ်ဆောင်ခြင်း ဖြစ်သော်လည်း စောင့်ကြည့်ရမည့် အနေ အထားဖြစ်ကြောင်း ဂျပန်ပြည်ပ အလုပ်အကိုင် အေဂျင်စီတစ်ခုမှ ဒါရိုက်တာ ကိုနေဦးကိုက CNI သတင်းဌာနသို့ ပြောသည်။

၎င်းက “အခုကတော့ သူကတော့ အဓိကက ငွေကြေးလိမ်လည်၊ ပွဲစားတွေဘာတွေ လျော့ကျသွားအောင်လို့ လုပ် ပေး တယ်ဆိုပေမယ့် အခုလောလောဆယ်တော့ ပွဲစားနဲ့မဟုတ်ဘဲ ကိုယ်တိုင်တန်းစီစနစ်နဲ့ လုပ်ကြတာပေါ့လေ။ အဲဒီလိုလုပ်ကြတယ်ဆိုတော့ ကြာလို့ရှိရင် ပွဲစားတွေပပျောက် သွားမယ်လို့တော့ ထင်တာပဲ။ ဒါပေမယ့် အခု လော လောဆယ် နည်းနည်းတော့ ကျန်သေးတာပေါ့လေ။ နယ်ဘက်တွေ ဆိုရင်တော့ ပွဲစားအားကိုးရမယ်၊ မြန်မြန် လို ချင်ရင်တော့ ပွဲစားအားကိုးရမယ့်သဘော ဖြစ်သွားတာပေါ့။ စာရွက်စာတမ်း အတုကတော့ လွယ်တော့ မလွယ်ဘူး၊ သူက လုပ်ပေးတာ သူ့လမ်းကြောင်း အတိုင်းနဲ့ လုပ်တာဆိုတော့ စာရွက်စာတမ်း အတုတော့ လောလောဆယ် ကတော့ မရှိသေးဘူးပေါ့လေ။ Passport ရုံးက visa ထုတ်ပေးတာဖြစ်တဲ့အတွက် Passport Visa ရလို့ရှိရင်တော့ စာရွက်စာတမ်းအတုတော့ မရှိလာနိုင်တော့ဘူးထင်တာပဲ။ သူတို့လည်း အဲဒီလို မဖြစ်အောင်လည်း သေချာလုပ် ပေး နေတယ်ဆိုတော့လေ။ အမှန်တော့ သူ့ဟာသူ ပုံမှန်အတိုင်း လည်ပတ် နေရင်တော့ ကောင်းတာပေါ့လေ။ ရပ်လိုက်ပိတ်လိုက် ဆိုရင်တော့ ဟိုဘက်က သွားဖို့လူတွေ အတွက်ကြတော့ မလွယ်ဘူးပေါ့လေ။ ပတ်စပို့က လိုတာကို နိုင်ငံခြားထွက်ဖို့ အတွက်ကျတော့လေ။ ပုံမှန်လေး run နေရင်တော့ ကောင်းတယ်လို့ ထင်ပါတယ်”ဟု ပြောသည်။

မြန်မာနိုင်ငံကူးလက်မှတ်ထိုးပေးရေးရုံးရှေ့တွင် တန်းစီစောင့်နေကြသူများကိုတွေ့ရစဉ်

ယခင်က ရန်ကုန်မြို့ရှိ မြန်မာနိုင်ငံကူးလက်မှတ် ထုတ်ပေးရေးရုံး၏ စနစ်ဟောင်းသည် အွန်လိုင်းတွင် ရက်ချိန်း တစ်ခုတည်း လျှောက်ထားရခြင်းဖြစ်သော်လည်း ယခုအခါမှာတော့ စနစ်အသစ်ကို ပြောင်းလဲ ကျင့်သုံးလာခဲ့ သည်။

ထိုစနစ်အသစ်တွင် နိုင်ငံကူးလက်မှတ် ပြုလုပ်မည့်သူ၏ ကိုယ်ရေးအချက်အလက် အပြည့်အစုံနှင့်အတူ Online payment စနစ်ဖြင့် ကုန်ကျစရိတ်ငွေ ၃၅၀၀၀ ကျပ်ကိုပါ တစ်ပါတည်း ပေးချေရခြင်းဖြစ်ပြီး လက်ရှိတွင် နိုင်ငံကူး လက်မှတ် ပြုလုပ်ရန်အတွက် ရက်ချိန်းတိုကင် လျှောက်ထားသူ များပြားလွန်းသဖြင့် အဆင်မပြေမှု အပိုင်းများ လည်း ကြုံတွေ့နေကြရသည်။

ယခုစနစ်အသစ်သည် အေဂျင်စီများဖြင့် ပြည်ပသို့ ထွက်ခွာမည့် ရွှေ့ပြောင်းလုပ်သားများထဲတွင် နည်းပညာပိုင်း ကျွမ်းကျင်မှုအားနည်းသဖြင့် ကိုယ်တိုင်ပြုလုပ်ရန်မှာ မလွယ်ကူလှသောကြောင့် ၎င်းတို့အတွက် ဝန်ဆောင်ခ စရိတ်မှာ ပို၍မြင့်တက်သွားနိုင်ကြောင်း မဲဆောက်တွင် ရွှေ့ပြောင်းအလုပ်သမားအရေး ကူညီဆောင်ရွက် ပေး နေသူ ကိုသားကြီးက CNI သတင်းဌာနသို့ ပြောသည်။

မြန်မာနိုင်ငံကူးလက်မှတ်ထိုးပေးရေးရုံးရှေ့တွင် တန်းစီစောင့်နေကြသူများကိုတွေ့ရစဉ်

၎င်းက “တစ်ခုတော့ရှိတာပေါ့။ အဲဒီပေးလိုက်တဲ့ တိုကင် လက်မှတ်ကို ဥပမာ ကျနော် ကိုသားကြီးနာမည်နဲ့ သွားပေမယ့် ပတ်စပို့ရုံးမှာ စာအုပ်ထုတ်ရမယ့် စီနီယာ နံပါတ်တွေ ကုတ်နံပါတ်တွေတော့ ရှိပါလိမ့်မယ်။ အဲဒီတော့ ကျနော့်ရဲ့ မှတ်ပုံတင် နံပါတ်တွေ အစိုးရဌာနထဲကို မရောက်ပဲနဲ့ ဒီတိုင်းပဲ ဓာတ်ပုံရိုက်ပေးတာမျိုး၊ စာရွက် ထုတ် ပေးတာမျိုးတွေလည်း ဖြစ်လာနိုင်တယ်။ ဒါကတော့ ကြိုတင်တွေးထားရမယ့် အတုအယောင် ပြဿနာတွေပေါ့။ ကျနော်တော့ လျှောက်ခဲ့တယ်ပေါ့ ဘယ်ပွဲစားနဲ့ သုံးသောင်းခွဲ၊ ဒီမှာလေ ကျနော့်စာရွက်ဆို အဲဒီ မင်းစာရွက်က အတုကြီးပေါ့ဆိုတာ ဒါမျိုးတွေလည်း ဖြစ်လာနိုင်တယ်။ မြေပြင်မှာ လုပ်ငန်းပိုင်းဆိုင်ရာတွေကို တကယ် ကျွမ်း ကျွမ်း ကျင်ကျင်သိဖို့ လိုအပ်တာပေါ့။ ဘယ်လောက်ထိ ထိန်းနိုင်သလဲပေါ့ တာဝန်ရှိသူတွေက။ ဒါတွေလည်း လိုအပ်တယ်။ စနစ်အသစ်ဆိုရင် အားလုံးက ကောင်းတယ်လို့ထင်ပေမယ့် အဲဒီစနစ်အသစ်ကို အသုံးချပြီးတော့မှ မသမာတဲ့သူတွေက ပုံစံအမျိုးမျိုးတွေနဲ့ လိမ်လည်မှုတွေလည်း ဖြစ်လာနိုင်တယ်လေ”ဟု ပြောသည်။

နိုင်ငံကူးလက်မှတ် ထုတ်ပေးသည့် လုပ်ငန်းများ အဆင့်မြှင့်တင်ရန်အတွက် မြန်မာတစ်နိုင်ငံလုံးရှိ နိုင်ငံကူး လက်မှတ် ထုတ်ပေးရေးရုံးများအား ၂၀၂၂ ခုနှစ်၊ ဒီဇင်ဘာလတွင် ရပ်ဆိုင်းထားခဲ့ပြီး ၂၀၂၃ ခုနှစ်၊ ဖေဖော်ဝါရီ ၂၄ ရက်နေ့တွင် ပြန်လည် ထုတ်ပေးခဲ့ခြင်းဖြစ်သည်။

သို့သော် ရန်ကုန်မြို့ရှိ မြန်မာနိုင်ငံကူး လက်မှတ် ထုတ်ပေးရေးရုံးတွင် နိုင်ငံကူးလက်မှတ် လျှောက်ထားရန် ရက်ချိန်း အသစ်ရယူခြင်းအား မတ်လ ၁ ရက်နေ့တွင် ခေတ္တရပ်ဆိုင်းခဲ့ပြီး မကြာမီတွင် စနစ်အား ပြန်လည် ဖွင့်ပေးသွားမည်ဖြစ်ကြောင်း ထုတ်ပြန်ထားသည်။

ထို့အပြင် မိမိရရှိထားသည့် ရက်ချိန်းနေ့စွဲနှင့် အချိန်တို့တွင် တိကျမှန်ကန်စွာ မလာရောက်နိုင်ပါက ရုံးဖွင့်ရက် ၇ ရက်အတွင်း လာရောက် လျှောက်ထားနိုင်ကြောင်းလည်း ထုတ်ပြန်ချက်တွင် ဖော်ပြထားသည်။

CNI News

၂၀၂၃ ခုနှစ်၊ မတ်လ ၆

မြန်မာနိုင်ငံ၏ အိမ်ခြံမြေ အရောင်းအဝယ်ဈေးကွက်တွင် အိမ်ခြံမြေများ၊ တိုက်ခန်းများ၊ ကွန်ဒိုများနှင့် အိမ်ရာများ တွင် ရင်းနှီးမြှုပ်နှံမှုများ ပိုမိုလုပ်လာနိုင်၍ ဈေးနှုန်းများ မြင့်တက်လာနိုင်သည့်အတွက် အိမ်ခြံမြေ အရောင်းပြ ခန်းများဖြင့် ဈေးကွက်ကို ဆွဲခေါ်နေမှုများ ပြုလုပ်နေကြသည်ဟု အိမ်ခြံမြေ အရောင်းအဝယ်ဈေးကွက်အတွင်းမှ သိရသည်။

လက်ရှိ ပြည်တွင်းတွင် ရွှေဈေးနှုန်းနှင့် ဒေါ်လာဈေးနှုန်းများသည် ယခင်ကထက် ပြီးခဲ့သည့် ၂ နှစ်ထက် ၂ ဆမှ ၃ ဆအထိ ဈေးနှုန်း မြင့်တက်နေကြောင်း၊ ထို့ကြောင့် အိမ်ခြံမြေ ဈေးကွက်အပေါ် ရင်းနှီးမြှုပ်နှံ လာနိုင်ခြင်းကြောင့် အိမ်ခြံမြေ အရောင်းပြပွဲဖြင့် ရောင်းဝယ်မှု ပြုလုပ်နေကြခြင်း ဖြစ်ကြောင်း ရတနာဂီရိ အိမ်ခြံမြေ ဝန်ဆောင်မှု လုပ်ငန်းမှ CEO ကိုဇေယျက CNI သတင်းဌာနသို့ ပြောသည်။

ကိုဇေယျက “ဖြစ်နေတဲ့ဟာက အရောင်းပြခန်းဆိုတာက လက်ရှိ လုပ်စရာအလုပ်က သိပ်မရှိတော့ဘူးလေ။ ရင်းနှီး မြှုပ်နှံမှုမှာ လက်ရှိမှာ မြေတွေမြှုပ်မယ်၊ ကွန်ဒိုတွေ မြှုပ်မယ်၊ ရွှေတွေ မြှုပ်မယ် စသည်အားဖြင့်ပေါ့နော်။ အခု လက်ရှိ ရွှေတွေဆိုလည်း ဆထက်မက တက်သွားပြီ အခုလက်ရှိ။ ကုန်ဈေးနှုန်းလည်း ဆထက်မက တက်သွား တယ်။ အဲဒီအပေါ်မှာ မြေဈေးရဲ့ နှိုင်းယှဉ်မှု အရပေါ့နော် မြေဈေးက အခုက ဒေါ်လာဈေးက ၃ ဆ တက်သွား တယ်ဆိုလို့ရှိရင် မြေဈေးကလည်း ထိုက်သင့်သလောက် တက်ရမှာပေါ့နော်။ ဒါပေမယ့်လို့ အခုလက်ရှိ တက်တာ က ရွှေဈေးနဲ့ ဒေါ်လာဈေးတို့ရဲ့ နှုန်းထားကို မမှီသေးဘူး။ အဲတော့ မြေပေါ်မှာ ရင်းနှီးမြှုပ်နှံမှု များလာနိုင်တယ်ဆို တဲ့ အနေအထားတစ်ခုရှိလို့ ပြပွဲတွေက လုပ်ပြီးတော့ အရောင်းအဝယ် လုပ်နေကြတယ်။ အဓိက မျှော်လင့်ကြတာ ပေါ့နော်။ ဥပမာဆိုလို့ရှိရင် ရွှေဈေး ၃ ဆ တက်သွားတယ် ဆိုလို့ရှိရင် အရင်က ၁၃၀၀ တန်တယ်ဆိုလို့ရှိရင် အခုက ၃၀၀၀ တန်သွားပြီ။ လက်ရှိ ၂ ဆကျော်သွားပြီ။ မြေဈေးမှာလည်း ၂ ဆကျော် ဖြစ်နိုင်တယ်ဆိုတဲ့ အယူအဆတွေနဲ့ လက်ရှိ အရောင်းအဝယ်တွေကို ပိုခေါ်ကြတယ်၊ ပိုလုပ်နေကြတယ်။ အဲဒီအပေါ်မှာ ရောင်းဖြစ် ဝယ်ဖြစ်အောင်လို့ ပြပွဲတွေ လုပ်ပြီးတော့ ရောင်းနေတယ်လို့ ကျနော်ကတော့ အဲဒီလို အောက်မေ့တယ်” ဟု ပြောသည်။

အိမ်ခြံမြေ အရောင်းပြခန်းကိုတွေ့ရစဉ်

အိမ်ခြံမြေ အရောင်းပြပွဲများ ပြုလုပ်ခြင်းအားဖြင့် ဈေးကွက်အပေါ် ချက်ချင်း သက်ရောက်မှု ရှိလာမည် မဟုတ်သေးကြောင်း၊ တိုင်းပြည်၏ စီးပွားရေး လုပ်ကိုင်၍ လွယ်ကူမှုနှင့် ခက်ခဲသည့် အခြေအနေပေါ် မူတည်၍လည်း အိမ်ခြံမြေဈေးကွက်အပေါ် သက်ရောက်မှု ဖြစ်ပေါ်နိုင်သည်ဟု အိမ်ခြံမြေရောင်းဝယ်သူများက ပြောသည်။

အိမ်ခြံမြေ အရောင်းပြပွဲများကို ရန်ကုန်မြို့တွင် အများဆုံး လုပ်ဆောင်နေကြပြီး အနည်းဆုံး ၆ ခုခန့်ရှိကြောင်း၊ မန္တလေးမြို့တွင်လည်း အရောင်းပြပွဲများကို လုပ်ဆောင်နေကြပြီဖြစ်ကြောင်း သိရသည်။

အရောင်းပြပွဲ လုပ်ရာတွင် ငွေအင်အား၊ လူအင်အားနှင့် ကြော်ငြာ အများအပြား အသုံးပြုနိုင်သည့် ကုမ္ပဏီအနေ ဖြင့် အားသာချက် ရှိသွားမည် ဖြစ်သည်ဟု မြန်မာနိုင်ငံ အိမ်ခြံမြေ ဖွံ့ဖြိုးတိုးတက်ရေးအသင်းမှ တာဝန်ရှိသူ တစ်ဦး က CNI သတင်းဌာနသို့ ပြောသည်။

၎င်းက “အဲဒါမျိုးကတော့ အဲဒါတော့ လုပ်တော့ လုပ်နေကြတာပဲ။ ဒါပေမယ့်လို့ မြန်မာနိုင်ငံမှာက real estate law နဲ့ ပတ်သက်လို့ အတိအကျ မရှိသေးတဲ့အတွက် ဒီရုံးခန်းကို အပ်ပြီးတော့ ဒီရုံးခန်းနဲ့ ရောင်းဝယ်ရမယ်ဆိုတဲ့ ဥပဒေ က မရှိသေးဘူး။ မရှိသေးတဲ့အတွက် သူ့ဟာသူ ဘယ်လိုပဲ ကြော်ငြာကြော်ငြာ ကုမ္ပဏီကြီး တစ်ခုအနေနဲ့ ဥပမာ ရွှေတောင်ကြားမှာရှိတဲ့ အကွက်တစ်ခုကို ကြော်ငြာမယ်၊ တာမွေမှာရှိတဲ့ အကွက်တစ်ခုကို ကြော်ငြာမယ်၊ အဲဒီလို ကြော်ငြာသလို အပ်တဲ့သူက တခြားရုံးခန်းကို အပ်ရင်လည်း အပ်မယ်။ အပ်တဲ့နေရာမှာ ဒါကတော့ ကြော်ငြာတဲ့ နေရာမှာ ဆွဲဆောင်တဲ့နေရာမှာ ကာစတန်မာရဲ့ စိတ်ဝင်စားမှုကို မြင့်တက်အောင် လုပ်တာပေါ့။ မြင့်တက်အောင် လုပ်တော့ သူ့ရုံးခန်းမှာ များများလာရင် သူ့ရုံးခန်းမှာ များများဝင်မယ်ဆိုတဲ့ အတွေးပဲ ရှိတယ်။ မြန်မာနိုင်ငံမှာက တော့ အဲလိုဖြေသာတဲ့အတွက် ရုံးခန်းကလူတွေ ပြပွဲလုပ်တဲ့အတွက် အဲဒီပြပွဲအတွင်းမှာ ရှိနေတဲ့ ကွန်ဒိုတွေ၊ တိုက် ခန်းတွေကို အဲဒီလူနဲ့ ရောင်းပါ့မယ်ဆိုတဲ့ အဖြေတော့ မထွက်ဘူး။ မထွက်တဲ့အတွက် ကျန်တဲ့ အကျိုးဆောင်ဆီ သွားရင် သွားမှာပဲ။ အကျိုးဆောင်က ပြတာကိုလည်း ပုဂ္ဂလိကက သူ့ဟာသူ သွားဝယ်ချင်ရင်လည်း သွားဝယ်မှာပဲ အဲလိုကတော့ ရှိနေတာပေါ့။ ဒါပေမယ့် အကျိုးဆောင်ချင်း တူရင်တော့ အဲဒါမျိုး အုံနဲ့ ကျင်းနဲ့၊ အင်နဲ့ အားနဲ့ လူ စိတ်ဝင်စားအောင် ကြော်ငြာနိုင်တဲ့ အကျိုးဆောင်ကတော့ ငွေအင်အားလည်း သုံးမယ်၊ လူအင်အားလည်း သုံးမယ်၊ ကြော်ငြာအားလည်း သုံးမယ်ဆိုရင်တော့ တိုးတက်မှု မြန်ဆန်တာပေါ့” ဟု ပြောသည်။

အိမ်ခြံမြေ အရောင်းပြခန်းကိုတွေ့ရစဉ်

လက်ရှိတွင် အိမ်ခြံမြေ ဈေးကွက်အတွင်း၌ မြေကွက်များသည် ပုံမှန်အရောင်းအဝယ်ရှိနေပြီး၊ တိုင်ခန်းများနှင့် ကွန်ဒိုများ ဝယ်ယူမှုသည်လည်း အတန်အသင့် ရှိနေကြောင်း၊ အိမ်ရာများ အပိုင်းတွင် ဝယ်ယူမှု နှေးနေသည့် အခြေအနေတွင် ရှိနေသည်ဟု သိရသည်။

အိမ်ခြံမြေ ဈေးကွက်အနေဖြင့် သင်္ကြန်ကာလ နောက်ပိုင်း ဇွန်လအထိ အရောင်းအဝယ် ကောင်းလာနိုင်ကြောင်း အိမ်ခြံမြေဈေးကွက်အတွင်းမှ သိရသည်။

ထို့နောက် ရွေးကောက်ပွဲကာလ နီးလာချိန်မှာတော့ အရောင်းအဝယ် အေးသွားနိုင်ပြီး စောင့်ကြည့်မှုများသာ ရှိလာ မည်ဟု အိမ်ခြံမြေဈေးကွက် လေ့လာသူများက သုံးသပ်နေကြသည်။

CNI News

၂၀၂၃ ခုနှစ်၊ မတ်လ ၆

မြန်မာနိုင်ငံရှိ ခရီးသွားဧည့်လမ်းညွှန်(Tourist Guide) များသည် လက်ရှိတွင် ကိုယ်ပိုင်စီးပွားရေး၊ ကုမ္ပဏီ ဝန်ထမ်း၊ Online shopping အစရှိသဖြင့် လုပ်ငန်းခွင် ပြောင်းလဲလုပ်ကိုင်နေကြရကြောင်း ခရီးသွား ဧည့်လမ်းညွှန်နှင့် လုပ်ငန်းရှင်များက CNI သတင်းဌာနသို့ ပြောသည်။

ထိုသို့ ခရီးသွားဧည့်လမ်းညွှန်များ၏ ဘဝရပ်တည်နေထိုင်မှုပုံစံ ပြောင်းလဲသွားရခြင်းမှာ မြန်မာနိုင်ငံသို့ ကိုဗစ် ကပ်ရောဂါ စတင်ဝင်ရောက်သည့် ၂၀၂၀ ခုနှစ် ဧပြီလမှစတင်ကာ ခရီးသွားလုပ်ငန်း ထိခိုက်ကျဆင်းသွားသည့် အပြင် လက်ရှိ နိုင်ငံအရေးအပြောင်းအလဲများကြောင့်ဟု ၎င်းတို့က ပြောသည်။

၂၀၂၀ ခုနှစ် ဧပြီလမှ စတင်ကာ ခရီးသွားဧည့်လမ်းညွှန်(Tourist Guide) အဖြစ် ရပ်နားခဲ့ရပြီး လက်ရှိတွင် ကိုယ်ပိုင်စီးပွားရေး လုပ်ကိုင်နေသည့် မသိမ့်က ဧည့်လမ်းညွှန်တစ်ယောက်၏ အလုပ်အကိုင်နှင့် ကိုယ်ပိုင် လုပ်ငန်းဦးစီးရသည့်အခြေအနေ ကွာခြားချက်များရှိကြောင်း CNI သတင်းဌာနသို့ ပြောသည်။

“ကိုယ်ပိုင်လုပ်ငန်းကတော့ ကိုယ်ဘယ်လောက် စွမ်းဆောင်နိုင်လဲဆိုတဲ့အပေါ်မှာ မူတည်တာပေါ့။ အစား အသောက် ရောင်းတဲ့အခါကျတော့ ၂ ခုကို လုပ်ရတယ်။ Product ရော Service ရော။ ကိုယ့် Product ကိုလည်း quality ထိန်းဖို့ ကြိုးစားရတယ်၊ နောက်တစ်ခါကျ Product line လို့ခေါ်တာပေါ့။ ဒီ Product ပြီးတဲ့အခါ သူနဲ့ ဆင်တူဘာထုတ်ရမလဲ အဲဒါတွေကိုလည်း စဉ်းစားရတယ်။ နောက်တစ်ခါ service ပိုင်းပေါ့ Product ကို ကောင်းတာတစ်ခုတည်းမဟုတ်ဘူး Service ကလည်း ကောင်းမှ။ တူတော့ မတူဘူးပေါ့လေ။ ကိုယ်ပိုင် လုပ်ငန်းရှင်ကတော့ ပိုပြီးတော့ ခေါင်းကြီးတာပေါ့။ တည်မြဲဖို့အတွက် ကိုယ့်အပေါ်မှာပဲ အများကြီး မူတည်တာ။ Guide ကကျတော့ တစ်ခုခုဖြစ်သွားပြီဆိုရင် ကိုယ့်အတွက်စာရင် အလုပ်ပြုတ်သွားတာလောက်ပဲ ရှိမယ်။ ဖြစ်လာတဲ့ပြဿနာအကုန်လုံးကို ကုမ္ပဏီပိုင်ရှင်က ရင်ဆိုင်ရတာပေါ့ မတူဘူးပေါ့” ဟု ၎င်းက ပြောသည်။

ခရီးသွားဧည့်လမ်းညွှန်(Tourist Guide) လုပ်ကိုင်ရခြင်းအား ဝါသနာပါသည့်အတွက်ကြောင့် မြန်မာနိုင်ငံ၏ ပြည်ပခရီးသွားကဏ္ဍ ပြန်လည်ကောင်းမွန်လာပါက ဧည့်လမ်းညွှန်အဖြစ် ပြန်လည်လုပ်ကိုင်ရန် စဉ်းစား ထားကြောင်းလည်း ၎င်းက ဆက်ပြောသည်။

ထို့အပြင် လက်ရှိ၌ ပြည်ပခရီးသွားဝင်ရောက်မှုမရှိသဖြင့် ခရီးသွားဧည့်လမ်းညွှန်များအပြင် ပြည်ပခရီးသွား လုပ်ငန်းများမှာလည်း အခက်အခဲများရှိကြောင်း ရှမ်းပြည်နယ်မြောက်ပိုင်း ဟိုတယ်လုပ်ငန်းရှင်များအသင်းမှ ဥက္ကဋ္ဌ ဦးဇော်ဇော်က CNI သတင်းဌာနသို့ပြောသည်။

ဧည့်လမ်းညွှန်တစ်ဦးမှ နိုင်ငံခြားသား ခရီးသွားများကို လိုက်လံရှင်းပြနေစဉ်

“တချို့ဆိုရင် ကိုဗစ်ကာလကတည်းက ခရီးသွားလိုင်စင်တောင် သက်တမ်းမတိုးကြတော့ဘူး။ အဲဒီလိုမျိုး ကုမ္ပဏီ လည်း များလာတယ်။ နောက်ပြီးတော့ လက်ရှိလုပ်နေတဲ့ အဓိကကတော့ နိုင်ငံခြားသားနဲ့ဆက်စပ်နေတဲ့ ခရီးသွား ကုမ္ပဏီတွေဆိုရင် တချို့ဆိုရင် လုပ်ငန်းပြန်စဖို့တောင် မနည်းကြိုးစားနေရတယ်ပေါ့။ Tourist Guide တွေ အနေနဲ့ကတော့ တချို့ဆိုရင် လုပ်ငန်းတောင် ပြောင်းကုန်ကြတယ်။ ဒါကလည်း အဓိကဘာလဲဆိုရင် Tourist ဝင်ရောက်မှုလည်း နည်းတာရယ်၊ ပြီးတော့ တချို့ကုမ္ပဏီတွေရဲ့ အလုပ်မဖြစ်တာပေါ့။ ခေါ်တယ် တချို့လည်း မလာချင်ကြဘူး။ တချို့လည်း လာတဲ့ဟာတွေက business လုပ်ငန်းတွေနဲ့ ပတ်သက်ပြီးလာတဲ့ အဲဒီလိုတွေလည်း ဖြစ်တယ်။ နိုင်ငံခြားခရီးသွားဧည့်သည်နည်းတဲ့အတွက် Tourist Guide တွေအနေနဲ့ကတော့ လောလောဆယ် စိန်ခေါ်မှုတစ်ရပ်အနေနဲ့ ဖြစ်နေတာပေါ့နော်။ သူတို့အတွက်တော့ နည်းနည်း ခက်ခဲနေတဲ့ကာလလို့ ကျနော့်အနေ နဲ့ မြင်မိပါတယ်” ဟု ပြောသည်။

ထို့ကြောင့် ခရီးသွားဧည့်လမ်းညွှန်(Tourist Guide)များအား မွေးထုတ်နိုင်ရေးအတွက် ဘာသာစကား သင်တန်း များအား ဟိုတယ်လုပ်ငန်းရှင်များ၊ ခရီးသွားလုပ်ငန်းရှင်များမှ သင်တန်းများ ဖွင့်လှစ်ကာ သင်ကြားပို့ချလျက် ရှိသည်။

ယခုကဲ့သို့ ကျွမ်းကျင်သည့် လူသားအရင်းအမြစ်များကို ဆုံးရှုံးလိုက်ရခြင်းသည် မြန်မာနိုင်ငံ၏ ခရီးသွားကဏ္ဍ အပေါ် ရိုက်ခတ်မှုများရှိကြောင်း ခရီးသွားလုပ်ငန်းရှင်တစ်ဦးက CNI သတင်းဌာနသို့ ပြောသည်။

“ပြောရရင်တော့ အများကြီး ဆုံးရှုံးပါတယ်။ ပြန်ပြီးတော့ ဧည့်သည်ရှိလာမယ်၊ market ရှိလာမယ်၊ demand ရှိလာမယ်ဆိုရင် ဒါတွေက ပြန်လုပ်လို့ရတယ်။ ဒါပေမယ့် တစ်ဖက်ကလုပ်လို့မရတာ ဟိုတယ်ကြီးတွေမှာ စွမ်းအားပြည့်လုပ်နိုင်တဲ့သူတွေကလည်း နိုင်ငံခြားထွက်သွားကြပြီ။ တချို့လည်း နယ်ဒေသ အရပ်ရပ်ကို ရောက်သွားကြပြီ။ ဒီလူတွေ အချိန်မီ ပြန်လာနိုင်မလား၊ ပြန်မလာနိုင်ရင် ရှိတဲ့အင်အားတွေနဲ့ လုပ်တယ်ဆိုရင်တော့ Tourism က စာတတ်ရုံတစ်ခုတည်း၊ စာသင်ကျောင်းက ကျောင်းဆင်းရုံနဲ့မရဘူး။ အတွေ့အကြုံလိုပါတယ်။ 1993, 4 လောက် မှာ စပြီးတော့ ပျိုးလာတာ ၂၀၀၀ ပြည့်လွန်နှစ်မှာ တော်တော်များများ အရှိန်ရလာပေမယ့် ဒီမှာဖြစ်တဲ့ ၂၀၀၇၊ ၈၊ ၉ အရေးအခင်းတွေ၊ နာဂစ်တွေ ဘာတွေနဲ့ ပြန်လွင့်သွားကြတယ်။ ၂၀၁၂ လောက် ပြန်ဖွင့်လာတဲ့အချိန် အုံနဲ့ကျင်းနဲ့ ဝင်လာတဲ့အချိန်မှာ ကျနော်တို့မှာ Shortage ဖြစ်သွားတယ်”ဟု ၎င်းက ပြောသည်။

လက်ရှိ ကိုဗစ်အလွန်ကာလတွင် အိမ်နီးချင်းနိုင်ငံဖြစ်သည့် ထိုင်းနိုင်ငံ၏ ပြည်ပခရီးသွားလုပ်ငန်းမှာ တစ်ရှိန်ထိုး တိုးတက်အောင်မြင်လျက်ရှိသော်လည်း မြန်မာနိုင်ငံတွင်မူ ပြည်တွင်းခရီးသွားများကိုသာ အဓိက အားပြုနေရဆဲ ဖြစ်သည်။

လက်ရှိအနေအထားအရ မြန်မာနိုင်ငံသို့ ပြည်ပခရီးသွားများ ဝင်ရောက်လာရေးအတွက် အများအပြား ကြိုးစားဆောင်ရွက်ရဦးမည်ဖြစ်ကြောင်းနှင့် မလွယ်ကူလှကြောင်း လုပ်ငန်းရှင်များက သုံးသပ်သည်။

CNI News

၂၀၂၃ ခုနှစ်၊ မတ်လ ၃

ရခိုင်ပြည်နယ်အတွင်းရှိ ဆားလုပ်ငန်း လုပ်ကိုင်နေကြသည့် တောင်သူများနှင့် ဆားစက်ပိုင်ရှင်များကို မတ်လ အတွင်း ကျပ်သိန်း ၉၀၀၀ ကျော် ထုတ်ချေးပေးသွားရန်ရှိကြောင်း ရခိုင်ပြည်နယ် ဆားလုပ်ငန်းရှင်များအသင်းထံမှ သိရသည်။

ချေးငွေကြောင့် ဆားလုပ်ငန်း၏ ၃၀ ရာခိုင်နှုန်းမှ ၅၀ ရာခိုင်နှုန်းအထိ လုပ်ငန်းများ လည်ပတ်လာမည် ဖြစ်ကြောင်း၊ ထုတ်ချေးပေးမည့် ချေးငွေကို ဆားလုပ်ငန်းလုပ်ကိုင်ရန် မှတ်ပုံတင်ထားသည့် တောင်သူများသာ ရရှိမည်ဖြစ်ပြီး မှတ်ပုံမတင်ထားသည့် တောင်သူများအနေဖြင့် မှတ်ပုံတင်ရန် လိုအပ်ကြောင်း ရခိုင်ပြည်နယ် ဆားလုပ်ငန်းရှင်များအသင်း ဥက္ကဋ္ဌ ဦးသန်းဝင်းက CNI သတင်းဌာနသို့ ပြောသည်။

၎င်းက “ကျနော်တို့ မှတ်ပုံတင်ထားတဲ့ ဆားတောင်သူတွေရယ်၊ ဆားစက်တွေကို ပေးဖို့အတွက်ကို ကျနော်တို့ အစိုးရဆီကို တင်ပြထားတဲ့ဟာမှာ အစိုးရကတော့ အတည်ပြုပြီးပါပြီ။ လိုအပ်တဲ့ဟာတွေကို အစိုးရကစိစစ် နေပါတယ်ခင်ဗျ။ စိစစ်ပြီးတော့ ကျနော်တို့ကို ၃ လပိုင်း အတွင်းလောက်မှာဆိုရင် ကျနော်တို့ကို ထုတ်ပေးသွားမှာ ဖြစ်ပါတယ်။ ငွေ(ကျပ်သိန်း) ၉၀၀၀ ကျော်ကိုတော့ စိစစ်ကြပ်မတ်ပေးမယ်လို့ ပြောပါတယ်ခင်ဗျ။ သိန်း ၁ သောင်း မဟုတ်ဘူး။ သိန်း ၉ ထောင်ကျော်၊ ၁ မီလီယံအောက် နည်းနည်းပါးပါး လျော့ပါတယ်ခင်ဗျ။ အနည်းဆုံးကတော့ ၁၀၀ မှာ ၃၀၊ ၄၀၊ ၅၀ ရာခိုင်နှုန်းတော့ လုပ်ငန်းလည်ပတ်သွားမှာ ဖြစ်ပါတယ်။ ကျနော်တို့ လုပ်နေတာတော့ ခန့်မှန်းခြေ ဧက ၃၀၀၀ ကျော်၊ ၄၀၀၀ လောက် လုပ်မှာပေါ့။ လိုင်စင်တင်ထားတာက ၁၀၀၀ ကျော်လောက် ရှိမှာ ပေါ့။ လိုင်စင် တင်ထားရင်တော့ ရမှာပါ။
အဓိကကတော့ လိုင်စင်တင်ဖို့ လိုပါတယ်။ နောက်ပြီးတော့ အခက်အခဲ တွေကိုလည်း ကျနော်တို့ကို ပွင့်လင်းမြင်သာစွာ ရှင်းပြဖို့ လိုပါတယ်” ဟု ပြောသည်။

 ဆား တောင်သူများကိုတွေ့ရစဉ်

ရခိုင်ပြည်နယ် ဆားထုတ်လုပ်မှုတွင် ပြီးခဲ့သည့် ၂၀၂၁ - ၂၀၂၂ ဆားရာသီတွင် ဧက ၁၀၀၀ ခန့်သာလုပ်ကိုင်ကြပြီး ဆားတန်ချိန် ၂၀၀၀၀(နှစ်သောင်း)ခန့်သာ ထုတ်လုပ်ခဲ့ကြောင်း၊ ယခုနှစ်တွင် ဆားဧက ၄၀၀၀ အထိ လုပ်ကိုင် လျက်ရှိသည်ဟု သိရသည်။

ဆားတောင်သူများအနေဖြင့် ချေးငွေရရှိသည့်အခါ ဆားဂိုဒေါင်များ တည်ဆောက်ပြီး ဆားကို စနစ်တကျ ထုတ်လုပ်ရန် လိုအပ်ကြောင်း၊ ထို့နောက် ချေးငွေကိုလည်း ဆားလုပ်ငန်းအတွက်သာ အသုံးပြုစေလိုကြောင်း၊ အလွဲသုံးစား မလုပ်ကြရန် လိုအပ်ကြောင်း ဦးသန်းဝင်းက ဆက်ပြောသည်။

၎င်းက “ကျနော်တို့ ဒီငွေက ချေးငွေဖြစ်တဲ့အတွက် ပြန်လည်ပေးဆပ်ဖို့ ခေါင်းမှာထည့်ထားရပါမယ်။ တော်တော် များများ ဒီငွေကို မပေးဆပ်ဘဲနဲ့ အလွဲသုံးစားသာ ဖြစ်သွားမယ်ဆိုရင် ကျနော်တို့ နောက်တစ်ခါတောင် မဟုတ်ဘူး၊ နောက် အနှစ် ၃၀ တောင် ကျနော်တို့ ချေးငှားလို့ရမှာ မဟုတ်ဘူး။ အဲဒါကို အရမ်းသတိထားရပါမယ်။ နောက်ပြီးတော့ အခု ချေးမယ့်ငွေ ၉ ထောင်ကျော် မဟုတ်ဘဲနဲ့ နောက်ထပ် မှန်ကန်တယ်ဆိုရင် ထပ်ပြန်ပေးဖို့ ကျနော်တို့ တောင်းဆိုလို့ ရပါတယ်ခင်ဗျ။ အဲဒါကြောင့် ဒီငွေတွေကို အခု ဆားချေးငွေကို ဆားမှာပဲ အသုံးပြုဖို့၊ တခြားနေရာ တွေမှာ ဖြည့်စွက် မသုံးစွဲဖို့၊ တခြားနေရာတွေမှာ အလွဲသုံးစား မဖြစ်ဖို့အတွက် ကျနော် အနူးအညွတ် တောင်းပန်ပါ တယ်။ အဲလို အလွဲသုံးစားဖြစ်သွားတဲ့ တချို့ ပြည်နယ်နဲ့ တိုင်းမှာဆိုရင် အခုထက်ထိ ချေးငွေထုတ်ပေးတာ မတွေ့ ရပါဘူး။ အဲလို မဖြစ်ဖို့လည်း လိုပါတယ်ခင်ဗျ” ဟု ပြောသည်။

 ဆား တောင်သူများကိုတွေ့ရစဉ်

ရခိုင်ပြည်နယ် ဆားလုပ်ငန်းရှင်များ အသင်းအနေဖြင့် ဆားတောင်သူများကို ထုတ်ချေးရာတွင် ၁ ဧကအား ကျပ် ၃ သိန်းကနေ ၅ သိန်းထိ ထုတ်ချေးသွားမည်ဖြစ်ကြောင်း၊ အတိုးနှုန်း သက်သက်သာသာဖြင့် ထုတ်ချေးမည် ဖြစ်ကြောင်း သိရသည်။
ရခိုင်ပြည်နယ်တွင် ကျောက်ဖြူ၊ ပေါက်တော၊ စစ်တွေ၊ မြေပုံ၊ သံတွဲနှင့် ဂွမြို့နယ်တို့တွင် ဆားကို အဓိက လုပ်ကိုင် ကြပြီး လက်ရှိတွင် အရည်အသွေး ကောင်းသည့် ဆားများကို ထုတ်လုပ်ပြီး တဖက် ဘင်္ဂလားဒေ့ရှ်နိုင်ငံသို့ တင်ပို့ နိုင်ရန်အတွက် နှစ်နိုင်ငံ ကုန်သည်များအကြား ဆွေးနွေးနေကြောင်း ရခိုင်ပြည်နယ် ဆားလုပ်ငန်းရှင်များ အသင်း က ပြောသည်။

ရခိုင်တွင် ၂၀၀၀ ခုနှစ်မတိုင်မီက ဆားလုပ်ကွက် ဧကပေါင်း ၁၀၀၀၀(တစ်သောင်း)ကျော် ရှိခဲ့ရာကနေ ၂၀၀၀ ပြည့်နှစ် အလွန်တွင် ဆားလုပ်ကွက် ဧက ၁၀၀၀(တစ်ထောင်)ကျော် ဝန်းကျင်ခန့်သာ ကျန်ရှိတော့ကြောင်း ရခိုင်ပြည်နယ် ဆားလုပ်ငန်းရှင်များအသင်း၏ စာရင်းအရ သိရသည်။

CNI News

၂၀၂၃ ခုနှစ်၊ မတ်လ ၁

အိန္ဒိယနိုင်ငံသို့ အဓိက တင်ပို့နေသည့် မတ်ပဲ၊ ပင်းစဉ်းငုံ၊ ပဲတီစိမ်း ဈေးနှုန်းများသည် ဖေဖော်ဝါရီလ နောက်ဆုံး ပတ်အတွင်း ဈေးနှုန်းများ မြင့်တက်လာနေပြီး ယခင်နှစ် ကာလတူနှင့် နှိုင်းယှဉ်ပါက ဈေးကောင်းရရှိနေကြောင်း ပဲကုန်သည်များထံမှ သိရသည်။

ပြည်တွင်း ပဲလက်ကျန် နည်းပါးခြင်း၊ ပဲအသစ် ထွက်ရှိမှုနှုန်း လျော့ကျခြင်းနှင့် အိန္ဒိယ ပဲဈေးကွက်အတွက် ပဲဈေးနှုန်းများ မြင့်တက်လာခြင်းကြောင့် ပြည်တွင်း ပဲဈေးနှုန်းများသည်လည်း မြင့်တက်သွားခြင်း ဖြစ်သည်ဟု ဧရာကုန်သွယ်မှုဗဟိုဌာန တာဝန်ခံ ဦးနေဝင်းစိုးက CNI သတင်းဌာနသို့ ပြောသည်။

၎င်းက “ပဲစဉ်းငုံဈေးကောင်းတာက အိန္ဒိယဘက်မှာ ဈေးတက်လာလို့။ အိန္ဒိယဘက်က ၁ ကွန်တယ်ကို ရူပီး ၁၀၀ ကျော်၊ ၁၀၀၊ ၁၅၀ လောက် ဈေးတက်လာတာ။ ပြီးခဲ့တဲ့ ၂ ရက်၊ ၃ ရက်လောက်အထိက ဈေးတွေကျတယ်။ ပြီးခဲ့တဲ့ ၃ ရက်လောက်အထိက ဈေးတွေကျတယ်။ ဒီ ၁ ရက်၊ ၂ ရက်ကျတော့ ဈေးက ပြန်တက်လာတာ။ ၁ ကွန်တယ်ကို ရူပီး ၁၀၀၊ ၁၅၀ အဲဒီလောက် ဈေးတက်သွားတယ်။ ဈေးကွက်ထဲကိုလည်း ပဲစဉ်းငုံ အသစ်ဝင်လာ တယ်။ အသစ်ဝင်လာပြီး ဈေးမြောက်နေတာ။ သူတို့ဘက်မှာ ဈေးတက်တော့ ဒီမှာလည်း ဈေးမြောက်တဲ့ သဘော ပါ။ ၁ တင်းကို ၇ သောင်းအထက်မှာ ရှိတယ်။ ဒီနေ့ ပေါက်ဈေးအတိုင်းဆိုရင် ၇၁၀၀၀ လောက် ရှိတယ်။ ဈေးကောင်းတယ်လို့ ပြောလို့ရတယ် အရင်နှစ်ကထက်စာရင်။ ဘာလို့ဆို ဒီမှာကလည်း ဒီနှစ်က ပဲမျိုးစုံပေါ့နော် ပဲစဉ်းငုံ တစ်ခုတည်း မဟုတ်ဘူး၊ ပဲမျိုးစုံ ပဲအထွက်နှုန်း နည်းနည်းကျတယ်။ အထွက်နှုန်းကျတာတော့ တခြား တော့ မဟုတ်ပါဘူး စိုက်စရိတ် ကြီးတယ်။ စိုက်စရိတ် မြင့်လာတဲ့အတွက်ကြောင့်မို့လို့ သိပ်မစိုက်နိုင်ကြတာရယ်၊ ဆေးဝါး သိပ်မသုံးနိုင်တာရယ် အဲဒါကြောင့်မို့လို့ အထွက်နှုန်း နည်းနည်းကျတယ်။ ဆိုပါစို့ မတ်ပဲဆိုရင် ပုံမှန်ဆိုရင် ၇ သိန်းခွဲ၊ ၇ သိန်းဝန်းကျင်လောက် ထွက်တယ်လေ။ ဒီနှစ်ဆိုရင် ၆ သိန်း ပတ်ဝန်းကျင်လောက်ပဲ ထွက်တယ်” ဟု ပြောသည်။

 မြန်မာ့ပဲမျိုးစုံကိုတွေ့ရစဉ်

ယခင်နှစ် ကာလတူ အချိန်တွင် ပဲစဉ်းငုံ တစ်တင်းလျှင် ၅ သောင်းကျပ် ဝန်းကျင်သာရှိပြီး လက်ရှိတွင် ၇ သောင်း ကျပ် ရရှိနေကြောင်း၊ ထို့နောက် မတ်ပဲသည်လည်း ယခင်နှစ်တွင် တစ်တင်းလျှင် ၅ သောင်းကျပ်ရှိပြီး ယခုနှစ်တွင် ကျပ် ၆ သောင်းကျော် ဈေးနှုန်း ရရှိနေသည်ဟု ပဲဈေးကွက်အတွင်းမှ သိရသည်။

မတ်ပဲနှင့် ပဲစဉ်းငုံကို အိန္ဒိယနိုင်ငံသို့ အဓိက တင်ပို့လျက်ရှိပြီး တရုတ်၊ ဘင်္ဂလားဒေ့ရှ်၊ ပါကစ္စတန်နှင့် သိရိလင်္ကာ နိုင်ငံတို့ကို တင်ပို့ ရောင်းချလျက်ရှိသည်။

တောင်သူများအနေဖြင့် ယခုနှစ်တွင် ပဲစိုက်ပျိုးရာ၌ သွင်းအားစုစရိတ် အဆမတန် မြင့်တက်မှုကြောင့် သွင်းအားစု များ အနည်းငယ်သာ ထည့်ဝင်ထားနိုင်သည့်အပြင် အထွက်နှုန်းများလည်း လျော့ကျလျက်ရှိသည်ဟု တောင်သူ များက ပြောသည်။

ထို့ကြောင့် ယခုနှစ်တွင် ပဲဈေးနှုန်း ကောင်းမွန်သော်လည်း သွင်းအားစုစရိတ်၊ အလုပ်သမားစရိတ်များ မြင့်တက်နေသည့်အတွက် အကျိုးအမြတ် ရရှိမှုသည် သာမန်သာ ဖြစ်သည်ဟု ဧရာဝတီတိုင်းဒေသကြီး၊ ဟင်္သာတမြို့နယ်မှ ပဲစိုက်တောင်သူ ဦးတင်အောင်ချိုက CNI သတင်းဌာနသို့ ပြောသည်။

 မြန်မာ့ပဲမျိုးစုံကိုတွေ့ရစဉ်

၎င်းက “ကောင်းတယ်လည်း ပြောလို့ရတယ်၊ မကောင်းဘူးလို့လည်း ပြောလို့ရပါတယ်။ ဒါက ပုံမှန်ပါပဲ။ ဘာလို့ဆို သွင်းအားစုဈေးတွေ ဈေးကြီးတယ်လေ။ ပဲနုတ်ခတွေ ဈေးကြီးတယ်လေ။ တအားကြီး အဆင်ပြေတယ်လို့လည်း မဟုတ်ပါဘူး။ မနှစ်က ၅ သောင်းနဲ့ ဒီနှစ် ၆ သောင်းနဲ့က အတူတူပဲလေ ဘာမှထူးမှာ မဟုတ်ဘူး။ မနှစ်က ရိတ် သိမ်းခ ကုန်ကျစရိတ်နဲ့ ဒီနှစ် ရိတ်သိမ်းခ ကုန်ကျစရိတ်က ကွာတာက မနှစ်က ပေါင်းသတ်ဆေးတွေ၊ မှိုတက် ဆေးတွေ၊ ပိုးသတ်ဆေးတွေ ဈေးနဲ့ ဒီနှစ် ဈေးတွေ အများကြီး တက်ထားတော့ ဘာမှ သိပ်မထူးဘူးလေ။ တောင်သူတွေ ဘာမှ အလုပ်မရှိတဲ့ဟာ ပဲဈေးက အခုချိန် ၆ သောင်းဖြစ်တယ်၊ ၄ သောင်းဖြစ်တယ်လည်း စိုက် ရမှာပဲ။ အခု ပေါင်းသတ်ဆေး၊ ပိုးသတ်ဈေး ၁ ပုလင်းက ထားပါတော့လေ ပိုးသတ်ဆေး ၁ ပုလင်းက ၅ သောင်း ပဲထား၊ နောက်နှစ်မှာ ပိုးသတ်ဆေး ၁ သိန်းဖြစ်လည်း စိုက်ရမှာပဲလေ” ဟု ပြောသည်။

လက်ရှိတွင် ပဲဈေးကွက်အတွင်း မတ်ပဲ၊ ပဲစဉ်းငုံ၊ ပဲတီစိမ်းများ အသစ်ဝင်ရောက် လာနေကြောင်း၊ အိန္ဒိယနိုင်ငံတွင် ယခုနှစ် ပဲအထွက်နှုန်း လျော့ကျနေခြင်းကြောင့် မြန်မာ့ပဲမျိုးစုံကို ဝယ်ယူမှု မြင့်တက်လျက် ရှိနေကြောင်း သိရသည်။

ထို့ကြောင့် ပြည်ပသို့ တင်ပို့နေသည့် ပဲမျိုးစုံ ဈေးနှုန်းသည် ဆက်လက်၍ မြင့်တက်လာနိုင်မည် ဖြစ်သည်ဟု ပဲကုန်သည်များက ခန့်မှန်းထားကြသည်။

CNI News

၂၀၂၃ ခုနှစ်၊ ဖေဖော်ဝါရီ ၂၈

မြန်မာနိုင်ငံသို့ တင်သွင်းလာသည့် လျှပ်စစ်ကားသည် တန်ဖိုးအားဖြင့် သိန်း ၁၀၀၀ နီးပါးဖြစ်နေခြင်းကြောင့် မည်သည့် လူတန်းစားအတွက် အဓိကထား တင်သွင်းခြင်း ဖြစ်သလဲဆိုသော မေးခွန်းထုတ်မှုများ စီးပွားရေး လုပ်ငန်းရှင်များကြား ထွက်ပေါ်နေသည်။

လက်ရှိ မြန်မာနိုင်ငံသို့ တင်သွင်းနေသည့် EV ခေါ် လျှပ်စစ်ကားများသည် တစ်စီးလျှင် မြန်မာကျပ်ငွေ ၉၉၉ သိန်း ရှိနေခြင်းကြောင့် လျှပ်စစ်ကားကို စီးနိုင်သည့် လူတန်းစားအလွှာသည် အနည်းငယ်ပဲ ရှိမည်ဟု စီးပွားရေးလုပ်ငန်း ရှင်များနှင့် စီးပွားရေးပညာရှင်များက ပြောသည်။

လျှပ်စစ်ကားတွင် အဓိက အရေးပါသည့် ဘတ်ထရီသည် သုံးစွဲမှု နှစ်ကာလ ကြာလာသည်နှင့်အမျှ ခံနိုင်ရည်အား လျော့နည်းသွားကြောင်း၊ ဘတ်ထရီ အသစ်လဲလှယ်ရာတွင်လည်း သိန်း ၁၀၀၀ တန် ကားတစ်စီး၏ ဘတ်ထရီ ၁ လုံးသည် သိန်း ၁၀၀၀ ဖြစ်နေကြောင်း၊ လုပ်ငန်းရှင်များအနေဖြင့် လျှပ်စစ်ကားအသုံးပြု၍ လုပ်ငန်းဆောင်ရွက် မည်ဆိုပါက ဘတ်ထရီ အားသွင်းနိုင်ရန်အတွက် လျှပ်စစ်မီး အခက်အခဲ ရှိနေခြင်းကြောင့် လုပ်ငန်းရှင်များလည်း အသုံးပြုမည် မဟုတ်ကြောင်း၊ အသစ်အဆန်းကို ခုံမင်သည့် ငွေကြေးကြွယ်ဝသည့် သူများသာ အသုံးပြုမည် ဖြစ်ကြောင်း ကားမူဝါဒ ကျွမ်းကျင်သူ ဦးအောင်ပြည့်စုံက CNI သတင်းဌာနသို့ ပြောသည်။

နေပြည်တော် သပြေကုန်းဈေးရှေ့က လျှပ်စစ်ကားအားသွင်းစခန်း တည်ဆောက်နေစဉ်

၎င်းက “လောင်စာဆီမသုံးရတဲ့အတွက် EV ကားကို ဝယ်လိုက်တာတော့ မှန်တယ် နောက်ပြီး ဆီတော့ မကုန်တော့ဘူး။ နောက်ပြီးတော့ ကီလိုမီတာတွေလည်း သွားလို့ရလာပြီ၊ ကြာကြာမောင်းလို့ ရလာပြီ။ ပြဿနာက ဘတ်ထရီသက်တမ်း၊ သိန်း ၁ ထောင်နဲ့ ဝယ်ထားတဲ့ ကားရဲ့ ဘတ်ထရီက ၁၀ နှစ်ပြည့်သွားပြီဆိုရင် သုံးလို့မရတော့ဘူး လဲရတော့မှာ။ အလွန်ဆုံး ၁၅ နှစ်ပဲ အဲဒီဘတ်ထရီက။ အဲဒါဆိုရင် အဲဒီဘတ်ထရီတွေ ပြန်လဲရင် ဘယ်လောက်ပေးရမလဲဆိုတဲ့ မေးခွန်းရှိတော့ အဲဒီဘတ်ထရီတွေ ကားတစ်စီးလုံးကို ပြန်ပြီးတော့ အသစ်တိုင်း မောင်းလို့ရအောင် ကီလိုမီတာတွေ အဝေးကြီးနဲ့ အကြာကြီး မောင်းလို့ရအောင် ပြန်လဲမယ်ဆိုရင် သိန်း ၁ ထောင် တန် ကားတစ်စီးရဲ့ ဘတ်ထရီက သိန်း ၁ ထောင်လောက် ပြန်ကျတယ်။ EV ကားတွေက အစ်ကိုတို့ ဓာတ်ဆီတွေ၊ ဒီဇယ်ကားတွေနဲ့ မတူတဲ့အချက်က သူက နှစ်ကာလကြာလာတာနဲ့အမျှ ကားရဲ့ တန်ဖိုးက လျော့လျော့လာမယ်။ သူက ဓာတ်ဆီ၊ ဒီဇယ်တော့ ဝယ်မထည့်ရဘူး။ သို့သော်လည်း ကားတန်ဖိုး တစ်လုံးတစ်ခဲပေးပြီး တဖြည်းဖြည်းနဲ့ ကားတန်ဖိုး ပြန်လျော့တာ။ အဲတော့ ၁၀ နှစ်လောက်ကြာရင် အဲဒီ EV ကားက ဘတ်ထရီ လဲရတော့မှာ။ လဲရတဲ့အချိန်မှ ပြန်ရောင်းရင် ဒီကောင်က ၁၀ သိန်းလောက်တောင် မတန်တော့ဘူး”ဟု ပြောသည်။

လျှပ်စစ်ကား တင်သွင်းရန်အတွက် ကုမ္ပဏီ ၂၆ ခုကို ခွင့်ပြုထားကြောင်း၊ ရန်ကုန်လေဆိပ်ကို အခြေပြု၍ တက္ကစီ ၁၀ စီးနှင့် နေပြည်တော် သပြေကုန်းဈေးကို အခြေပြုပြီး တက္ကစီ ၁၀ စီး စမ်းသပ် ပြေးဆွဲမည်ဖြစ်ကြောင်း၊ အမျိုးသားအဆင့် လျှပ်စစ်သုံးယာဉ်နှင့် ဆက်စပ် လုပ်ငန်းများ ဖွံ့ဖြိုးတိုးတက်ရေးဦးဆောင်ကော်မတီက ထုတ်ပြန်ထားသည်။

မြန်မာနိုင်ငံသို့ တင်သွင်းလာသည့် တရုတ်ထုတ် BYD ကားတွေ့ရစဉ်

အဆိုပါ လျှပ်စစ်ကား၏ စျေးနှုန်းသည် တစ်စီးလျှင် ကျပ် ၆၇၉ သိန်းဟု ဆိုထားကြောင်း၊ သို့သော် လက်ရှိ တင်သွင်းထားသည့် လျှပ်စစ်ကားသည် သိန်း ၁ ထောင်ဝန်းကျင် ရှိနေသည့်အတွက် ပြည်သူများ ဝယ်ယူနိုင်သည့် ဈေးမဟုတ်ကြောင်း၊ ထို့ကြောင့် ပိုက်ဆံရှိ အထက်တန်းလွှာများအတွက်သာ ဖြစ်နေကြောင်း စီးပွားရေး လုပ်ငန်းရှင်များက ပြောသည်။

လျှပ်စစ်ကား ထုတ်လုပ်ရာတွင် ကုန်ကျစရိတ် လျော့ကျသွားသည့် ကာလနှင့် ရေရှည်အသုံးပြုနိုင်သည့် ဖွဲ့စည်းမှု ပုံစံဖြစ်မှသာ လျှပ်စစ်ကားကို တွင်ကျယ်စွာ အသုံးပြုလာကြမည်ဖြစ်ကြောင်း စီးပွားရေးပညာရှင် ဦးသက်ဇော်က CNI သတင်းဌာနသို့ ပြောသည်။

၎င်းက “တီထွင်မှုတွေ လုပ်ရင်း လုပ်ရင်းနဲ့ ဘတ်ထရီ သက်တမ်းတွေ ရှည်လာမယ်၊ ထုတ်လုပ်မှု စရိတ်တွေက အရေအတွက်များလာရင် ထုတ်လုပ်မှုစရိတ်တွေ လျော့လာရင်တော့ ဝယ်ယူဈေး Market Price တွေ လျော့လာမယ်။ EV ကားတွေ အလွန်အကျွံသုံးနိုင်ဖို့ဆိုရင် အချိန်တစ်ခုတော့ စောင့်ရမယ့် အနေအထားမှာ ရှိပါတယ်။ ထုတ်လုပ်မှု စရိတ်တွေ လျော့မယ်၊ Infrastructure တွေလည်း ကောင်းလာမယ်ဆိုရင်တော့ ၂၀၃၅၊ ၂၀၄၀ ဆိုရင်တော့ တိုင်းပြည်တော်တော်များများက EV အဆင့် ရောက်လာမယ်လို့တော့ ကျနော်တို့ မျှော်လင့်ထားပါတယ်” ဟု ပြော သည်။

မြန်မာနိုင်ငံသို့ တင်သွင်းလာသည့် လျှပ်စစ်ကားကို စစ်ဆေးနေကြစဉ်

ထို့အပြင် မြန်မာနိုင်ငံ၏ မြို့ကြီးများတွင် မိုးတွင်းကာလ၌ ရေဝပ်သည့် အခြေအနေ ရှိသည့်အတွက် လျှပ်စစ်ကား ကို အသုံးပြုရန် အဆင်မပြေနိုင်ကြောင်း၊ ချို့ယွင်းမှု ဖြစ်လာသည့်အခါတွင် ပြုပြင်ရန်အတွက် ကျွမ်းကျင်သူ စက်ပြင်ဆရာများ မရှိသေးကြောင်း၊ မော်တော်ယာဉ် အပိုပစ္စည်း ရောင်းချသည့် ဆိုင်များမရှိသေးကြောင်း မော်တော်ယာဉ် အသိုင်းအဝိုင်းက ထောက်ပြကြသည်။

လျှပ်စစ်ကား ကနဦး ရှေ့ပြေး စီမံကိန်းကာလကို ၂၀၂၃ ခုနှစ်၊ ဇန်နဝါရီ ၁ ရက်မှ ဒီဇင်ဘာ ၃၁ ရက်အထိ သတ်မှတ်ထားသော်လည်း လက်ရှိ မြန်မာနိုင်ငံ၏ လျှပ်စစ်မီး ပြဿနာနှင့် တခြား အခက်အခဲများကြောင့် တွင်တွင်ကျယ်ကျယ် အသုံးပြုနိုင်ရန် အချိန်ယူရမည်ဟု သုံးသပ်နေကြသည်။

CNI News

၂၀၂၃ ခုနှစ်၊ ဖေဖော်ဝါရီ ၂၈

ထိုင်းနိုင်ငံရှိ မြန်မာသံရုံးမှ နိုင်ငံကူးလက်မှတ် အသစ်ပြုလုပ်ပါက စာအုပ်ကြေးအဖြစ် ဘတ်ငွေ ၁၂၅၀ သို့ တိုးမြှင့် လိုက်ခြင်းကြောင့် မြန်မာလုပ်သားများအတွက် ပွဲစားများ၏ ဈေးနှုန်းပါ ပို၍ တိုးလာနိုင်ကြောင်း ထိုင်းရှိ အလုပ် သမားအရေး ဆောင်ရွက်သူများက CNI သတင်းဌာနသို့ ပြောသည်။

မတ်လ ၁ ရက်နေ့မှ စတင်ကာ နိုင်ငံကူးလက်မှတ် စာအုပ်အသစ် ပြုလုပ်မည့် မြန်မာနိုင်ငံသားများအနေဖြင့် စာအုပ်ကြေး ယခင် ဘတ်ငွေ ၈၀၀ အစား ဘတ်ငွေ ၁၂၅၀ သို့ ပြောင်းလဲ သတ်မှတ်လိုက်ခြင်းဖြစ်ပြီး OWIC ကဒ်ဖိုး ဘတ်ငွေ ၂၅၀ အပါအဝင် စုစုပေါင်း ဘတ်ငွေ ၁၅၀၀ အား သက်ဆိုင်ရာ ဘဏ်စာရင်းသို့ ပေးသွင်းရမည် ဖြစ် ကြောင်း ဘန်ကောက်ရှိ မြန်မာသံရုံးက ထုတ်ပြန်ထားခြင်းဖြစ်သည်။

သံရုံးမှ တိုးမြှင့်လိုက်သည့် နှုန်းထားမှာ ဘတ်ငွေ ၄၀၀ ကျော်သာ ရှိသော်လည်း ပွဲစားများမှ တိုးသွားမည့် ဈေးနှုန်း ထားမှာ ထိုပမာဏထက် များပြားနိုင်ကြောင်း FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။

မြန်မာအလုပ်သမားများကိုတွေ့ရစဉ်

၎င်းက “တကယ့်တကယ် ကြည့်လိုက်ရင် ပိုက်ဆံက ၄၀၀ ကျော်လောက်တောင် တင်တယ်ဆိုတာကတော့ နည်း နည်း များတာပေါ့။ ဒါပေမယ့် အလုပ်သမားတွေ အနေနဲ့ကတော့ ၄၀၀ ကျော်တင်လည်း မဖြစ်မနေ ရမယ်ဆိုရင် လုပ်ရမှာပဲ။ ဘာဖြစ်လို့လဲဆိုတော့ ပွဲစားခကြီးပဲ သူတို့က ကြားထဲမှာ ပေးထားတာ ဒီထက် အဆပေါင်းများစွာ ပေးထားတာလေ။ ၄၀၀ တိုးတောင်းတယ်ဆိုရင် ဒီဘက်က ပွဲစားက ဒီဘက်ကိုတခါ ထပ်ပြီးတော့ တိုးတောင်း လိမ့်မယ်။ အဲဒါမှာ ၄၀၀ ထက်ပိုပြီး တိုးတောင်းရင် တောင်းမှာ အလုပ်သမားတွေ ဆီကနေလေ။ ပြောရမယ် ဆိုရင် အလုပ်သမားတွေအတွက် နည်းနည်းဝန်ထပ်ပြီးတော့ ပိမှာပေါ့လေ။ အလုပ်သမားတွေအနေနဲ့ ၁၅၀၀ ဆိုလည်း ပစ်လုပ်လိုက်မှာပဲ။ လုပ်နိုင်တယ်။ လုပ်နိုင်တယ်ဆိုတာ ပိုက်ဆံရှိလို့တော့ မဟုတ်ဘူး။ ရှာပြီးတော့ လုပ်ရတာပေါ့။ ဒါပေမယ့် တကယ်ပေးရတဲ့ နှုန်းက နည်းတာ မဟုတ်ဘူး။ ဥပမာ ကျနော်တို့ နယ်စပ်ကနေပြီး စာအုပ်သွားလုပ်တဲ့ လူတွေဆိုရင် သူတို့ကိုယ်တိုင်လည်း သွားလုပ်လို့မရဘူး။ အလုပ်ရှင်တွေကလည်း မလုပ်ပေးဘူး။ အဲဒီအခါကျ တော့ ပွဲစားနဲ့ပဲ သွားရတယ်။ သွားတဲ့အခါမှာ ပွဲစားကနေ ရက်ချိန်းယူမယ်။ သူတို့ သတ်မှတ်တဲ့ရက် ရောက်ရင် ကားနဲ့ခေါ်ပြီး သွားတယ်။ ကျန်တဲ့ OWIC လုပ်ရမယ်ဆိုလည်း အဲဒါအပါ ဈေးနှုန်းတော့ သူတို့ကွဲမှာပေါ့။ ဒါပေမယ့် အဲဒါကိုပဲ ပေးရတာက ၈၀၀၀၊ ၉၀၀၀ (ဘတ်ငွေ)။ တချို့ ဝေးတဲ့ နေရာတွေဆို သောင်းနဲ့ချီပြီး ပေးရတယ်။ ဒါ စာအုပ်ရရုံ သက်သက်ပဲနော်” ဟု ပြောသည်။

ယခုကဲ့သို့ နိုင်ငံကူးလက်မှတ် စာအုပ်ကြေးအား တိုးမြှင့်ကောက်ခံလိုက်ပါက တစ်ရက်လျှင် စာအုပ်ထုတ်ပေး သည့် နှုန်းထားအားလည်း တိုးမြှင့်၍ ထုတ်ပေးသင့်ကြောင်း၊ ထိုသို့ တိုးမြှင့်ထုတ်ပေးပါက မြန်မာရွှေ့ပြောင်း လုပ်သားများအတွက် ပို၍ အဆင်ပြေမည်ဖြစ်ကြောင်း ထိုင်းရှိ အလုပ်သမားအရေး ဆောင်ရွက်သူများက အကြံပြုသည်။

ထို့အပြင် နိုင်ငံကူးလက်မှတ် စာအုပ်အသစ် ပြုလုပ်ရာတွင် OWIC ကဒ်ဖိုးပါ တစ်ပါတည်း ပေးရခြင်း ဖြစ်သော် လည်း ကဒ်အား ချက်ချင်း မပေးသည့်အပြင် အခြားနေရာတွင် ထိုကဒ်အား သွားရောက် ထုတ်ယူရသည့် အခက်အခဲများကို မြန်မာရွှေ့ပြောင်းလုပ်သားများမှာ ကြုံတွေ့နေကြရကြောင်း ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။

ထိုင်းရှိ မြန်မာသံရုံးရှေ့မှာ ပတ်စပို့ထုတ်နေကြသူများကိုတွေ့ရစဉ်

၎င်းက “တစ်နေရာ ပိုက်ဆံရှင်း၊ နောက်တစ်နေရာ ကဒ်ပြားသွားထုတ်၊ ရက်ချိန်းတွေ ပေးလိုက်တယ်ဆိုတာ ဒါဟာ တစ်နည်းအားဖြင့် လုပ်စားတာပေါ့။ ဘာကြောင့်လဲဆိုတော့ OWIC ကဒ်က စမတ်ကဒ်က သူတို့ စက်တွေ ယူလာ ပြီးသား ဖြစ်တဲ့အတွက် အခုရိုက်ရင် အခုထုတ်ပေးလို့ ရတယ်။ ကုန်ကျစရိတ် ယူပြီးတော့မှ ချက်ချင်း ထုတ်ပေးရင် ရွှေ့ပြောင်း အလုပ်သမားတစ်ယောက်က သူ့ရဲ့ ခံစားမှု တစ်မျိုးသွားတာပေါ့။ အခုဟာက ဒီမှာ ပိုက်ဆံသွင်းလိုက် ပြီးတော့မှ သူတို့သတ်မှတ်ထားတဲ့ မဟာချိုင်ရုံးမှာ သွားထုတ်ရမယ်ဆိုတာကြီးက ကုန်ကျ စရိတ်တွေနဲ့ နောက် သွားထုတ်မယ့်ရက်မှာ အလုပ်နားလို့မရရင် ကြုံတွေ့ရမယ့် အခက်အခဲတွေ အများကြီးပဲ။ အလုပ်အကြောင်းမဲ့ နားလိုက်တယ်ဆိုရင်လည်း လုပ်အားခတွေ ဖြတ်ခံရတယ်။ အလုပ်သမား အများစုအတွက် ဒုက္ခရောက်တာပေါ့။ ဒါတွေဟာလည်း မဖြစ်သင့်တဲ့ ကိစ္စပေါ့။ လုပ်ထုံးလုပ်နည်းကိုက ပြောင်းပြန်တွေ ဖြစ်နေတာ သံရုံးကလေ” ဟု ပြောသည်။

စက်ရုံ၊ အလုပ်ရုံများနှင့် ဆောက်လုပ်ရေးကုမ္ပဏီကြီးများသို့ Mobile Team ဖြင့် လာရောက် အချက်အလက် ကောက်ယူထားသူများ အားလုံးသည် ၁၅၀၀ ဘတ် ပေးသွင်းရမည်ဖြစ်ကာ မတ်လ ဒုတိယအပတ်တွင် နိုင်ငံကူး လက်မှတ် စာအုပ်များအား ထုတ်ပေးသွားမည်ဖြစ်ကြောင်း သံရုံး၏ ထုတ်ပြန်ချက်တွင် ပါရှိသည်။

လက်ရှိတွင် ၂၀၂၃ ခုနှစ်၊ ဩဂုတ်လ ၃၁ ရက်နေ့၌ နိုင်ငံကူးလက်မှတ် သက်တမ်းကုန်မည့် မြန်မာနိုင်ငံသားများ အနေဖြင့် ဘန်ကောက်ရှိ မြန်မာသံရုံး၌ စနေနေ့တိုင်း ရက်ချိန်း လာရောက် ရယူနိုင်ကြောင်းလည်း သံရုံးမှ ထုတ်ပြန်ထားသည်။

CNI News

၂၀၂၃ ခုနှစ်၊ ဖေဖော်ဝါရီ ၂၅

ပြည်ပသို့ ပို့ဆောင်နေသည့် ဆန်ကုန်သည်များသည် ဆန်ဝယ်ယူမှု ရပ်တန့်နေသည့်အတွက် ပြည်တွင်းတွင် ပြည်ပပို့သည့် ဆန်နှင့်ဆန်ကွဲများမှာ ဈေးနှုန်းကျဆင်းနေသည်ဟု ဘုရင့်နောင် ဆန်ကုန်စည်ဒိုင်ထံမှ သိရသည်။

နယ်စပ်ကုန်သွယ်ရေးတွင် ပို့ကုန်ရငွေ၏ ၆၅ ရာခိုင်နှုန်းကို ဗဟိုဘဏ်၏ သတ်မှတ်နှုန်းထားဖြင့် လဲလှယ်ရခြင်း ကြောင့် နယ်စပ်ဆန်ဝယ်ယူမှု ရပ်တန့်နေကြောင်း၊ ပြည်တွင်း ဆန်ဈေးနှုန်း မြင့်တက်မှုကြောင့် ပြည်ပတင်ပို့ရာ တွင် တွက်ခြေမကိုက်သည့်အတွက် ပင်လယ်ရေကြောင်းမှ ဆန်ဝယ်ယူမှုလည်း ရပ်တန့်နေကြောင်း သိရသည်။

ထို့ကြောင့် ပြည်ပပို့သည့် ဆန်နှင့် ဆန်ကွဲဈေးနှုန်းသည် ပြည်တွင်း၌ ဈေးနှုန်းကျဆင်းလာကြောင်း ဘုရင့်နောင် ဆန်ကုန်စည်ဒိုင် အတွင်းရေးမှူး ဦးသန်းဦးက CNI သတင်းဌာနသို့ ပြောသည်။

ဆန်အိတ်များ သယ်ဆောင်နေကြစဉ်

၎င်းက “အခုက နွေဆန်တွေလည်း ပေါ်လာတော့မှာလေ။ နွေဆန်တွေ အခု စပေါ်နေပြီဆိုတော့ ဈေးကွက်က အအေးဘက်ကို ပြန်သွားနေပြီ။ နယ်စပ်သမားကလည်း ဒီလကုန်ရင် ၆၅၊ ၃၅ စမှာဆိုတော့ ဆန်ရော၊ ဆန်ကွဲရော နယ်စပ်သမားက လုပ်လို့မရတော့ အဝယ်ရပ်သွားတယ်။ အဝယ်ရပ်သွားတော့ အခုလောလောဆယ် ဆန်ကွဲ တစ် အိတ်ကို ၁ ထောင်လောက် ကျသွားတယ်။ ဆန်ဈေးကလည်း အဝယ်မရှိသလို အေးသွားတယ်။ ဆန်တစ်အိတ်ကို ၂ ထောင်လောက် ကျသွားတယ် Export ဆန်ပေါ့။ အခုက နယ်စပ်ကုန်သွယ်ရေးက ဆန်ထွက်တာတော့ နယ်စပ် အဝယ်သမားက ရပ်သွားတယ်။ မန္တလေးသမားက အဝယ်ရပ်သွားတယ်။ မူဆယ်ပို့တဲ့သူ အဝယ်ရပ်သွားတယ်။ မြဝတီ ပို့တဲ့သူတွေ အဝယ်ရပ်သွားတယ်။ Normal Trade သမားက နဂိုကတည်းက ရှုံးနေတာဆိုတော့ သူတို့က မကိုက်လို့ နဂိုကတည်းက ရပ်ကြည့်တာ။ အခုဈေး တစ်အိတ်ကို ၂ ထောင်၊ ၃ ထောင်လောက်ချလည်း သူတို့က မဝယ်နိုင်သေးဘူး။ ထပ်ချဖို့ရှိတယ်” ဟု ပြောသည်။

ထို့နောက် ပြည်ပသို့ ပို့ဆောင်နေသည့် ဆန်တန်ချိန်များကို ယခင်လများထက် လျှော့ချပြီး ပို့သွားမည်ဆိုပါက ပြည်တွင်း ဆန်ဈေးနှုန်းများ ကျလာနိုင်မည်ဟု ဆန်ကုန်သည်များက ပြောသည်။

လက်ရှိတွင် ပြည်တွင်း ဆန်ထွက်ရှိမှု နည်းပါးနေသည့်အတွက် ပြည်တွင်း၌ လုံလောက်စေရန်နှင့် များစွာ ပိုလျှံမှု မဖြစ်စေရန် ပြည်ပသို့ တန်ချိန်မည်မျှ တင်ပို့မည်ကို ညှိနှိုင်းနေကြောင်း မြန်မာနိုင်ငံ ဆန်စပါးကုန်သည်များ အသင်းမှ တာဝန်ရှိသူတစ်ဦးက CNI သတင်းဌာနသို့ ပြောသည်။

ဆန်ရောင်းနေစဉ်

၎င်းက “တန်ချိန် ၂ သန်းကျော်လောက် ပို့ဖို့ဆိုရင် ကျနော်တို့က လိုအပ်တဲ့ တန်ချိန်က ၃ သိန်းလောက် သတ်မှတ် ထားတာပေါ့ အခုဘတ်ဂျက်နှစ်ပေါ့။ မတ်လအကုန်ကို ပို့သင့်တဲ့ တန်ချိန် ပမာဏကို လျာထားပြီးတော့ပေါ့။ ဖေဖော်ဝါရီ၊ မတ်လ၊ အခု ဖေဖော်ဝါရီတောင် ကုန်ပါပြီ။ ဖေဖော်ဝါရီ ၁ သိန်းခွဲ၊ မတ်လ ၁ သိန်းခွဲ မှန်းထားတာ။ ဖေဖော်ဝါရီမှာလည်း အဲလောက် မထွက်ဘူးဗျ။ မထွက်တော့ သူ့ဟာသူ ဈေးမကိုက်ရင် သူ့ဟာသူ လျော့သွားတာ ပါ။ အခု ဒီလပိုင်းသာ နည်းနည်းလေး လျော့သွားတာ။ အရင်ကတော့ ရှေ့လတွေကျတော့ ပုံမှန်ပို့ထားတယ်။ ပုံမှန် ပို့ထားပြီးတော့ ဒီလတွေမှာ တအားပို့ထည့်လိုက်ရင် ကျနော်တို့ ပြည်တွင်းမှာ ဒီနှစ်ကတော့ အထွက်နည်းနည်း လျော့တယ်ဗျ။ ဧရာဝတီရော၊ စစ်ကိုင်းတိုင်းဘက်ရော အထွက်နည်းနည်း လျော့တော့ ပို့တာကို ဘယ်လောက် လောက် ပို့သင့်တယ်ဆိုပြီးတော့ ညှိနှိုင်းထားတာပေါ့။ ညှိနှိုင်းထားတာကို ဒီနှစ်ဆိုရင် အဲလောက်ပဲ ထွက်တယ် ဆိုရင်သာ ဒါကို ပြည်တွင်းလည်း လုံလောက်မယ်ပေါ့။ နောက် အများကြီးလည်း မပိုဘူး။ အဲလိုမှန်းတာပါ” ဟု ပြောသည်။

လက်ရှိတွင် ပြည်ပသို့ တင်ပို့နေသည့် ဧည့်မထ ၂၅ မတ် ဆန်ဈေးနှုန်းများ ကျဆင်းနေပြီး တစ်အိတ်လျှင် ၅၃၀၀၀ ကျပ်ခန့် ဈေးနှုန်းရှိကြောင်း၊ နွေစပါးများ ထွက်ပေါ်လာသည့်အချိန်တွင် ဆန်ဈေးနှုန်းသည့် ယခုထက်ပို၍ ကျဆင်း လာမည်ဖြစ်ပြီး ၅ သောင်းကျပ်အောက်သို့ ရောက်ရှိသွားမည်ဖြစ်သည်ဟု ဆန်ကုန်သည်များက သုံးသပ်နေကြသည်။

မြန်မာနိုင်ငံ အနေဖြင့် ပြည်ပသို့ ဆန်တန်ချိန် ၂ သန်းခန့် တင်ပို့ရန် လျာထားပြီး လက်ရှိတွင် ယင်းတန်ချိန်ကို ပြည့်မှီရန်အတွက် ဆန်တန်ချိန် ၃ သိန်းခန့်သာ လိုတော့ကြောင်း၊ ထို့နောက် ယခုဘဏ္ဍာနှစ်အတွင်း ကျန်ရှိသည့် တန်ချိန်ကို တင်ပို့သွားမည်ဖြစ်ကြောင်း၊ ဖေဖော်ဝါရီနှင့် မတ်လတွင် တန်ချိန် ၁ သိန်းခွဲစီ တင်ပို့သွားရန် လျာထား ကြောင်း မြန်မာနိုင်ငံ ဆန်စပါးအသင်းချုပ်ထံမှ သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၂၄

ပြည်ပအလုပ်အကိုင် ရှာဖွေရေး ပွဲစားနှင့် အေဂျင်စီများသည် စာရွက်စာတမ်း အချက်အလက် အထောက်အထားအတုများဖြင့် အလုပ်သမားညွှန်ကြားရေးဦးစီးဌာနသို့ တင်ပြဆောင်ရွက်နေကြကြောင်း စိစစ်တွေ့ရှိရခြင်းကြောင့် လုပ်ငန်းဆောင်ရွက်သည့် ပွဲစား/အေဂျင်စီအပြင် လုပ်ငန်းအပ်နှံသည့် အလုပ်သမား ကိုပါ စိစစ်အရေးယူသွားမည်ဟု အလုပ်သမားညွှန်ကြားရေးဦးစီးဌာနက ဖေဖော်ဝါရီ ၂၄ ရက်နေ့တွင် ထုတ်ပြန် ကြေညာခဲ့သည်။

အဆိုပါ ထုတ်ပြန်ချက်တွင် ပွဲစားများ/ ပြည်ပအလုပ်အကိုင်အကျိုးဆောင်လိုင်စင်ရ အေဂျင်စီများမှ ဦးစီးဌာနသို့ အလုပ်လုပ်ကိုင်ခွင့် ပါမစ်အတု၊ ပြည်ဝင်ခွင့်ဗီဇာအတု၊ လေဆိပ်အဝင်တုံးအတု၊ အလုပ်ရှင်ခွင့်စာအတု၊ ပြည်ပ အလုပ်အကိုင် လမ်းညွှန်သင်တန်းဆင်းလက်မှတ်အတု၊ ဘွဲ့လက်မှတ် သို့မဟုတ် ကျွမ်းကျင်မှု အသိအမှတ်ပြု လက်မှတ်အတု စသည့် စာရွက်စာတမ်း အထောက်အထားအတုများဖြင့် တင်ပြခြင်း၊ လူပုဂ္ဂိုလ်တစ်ဦးတည်းမှ လက်ရေးမူ တစ်ခုတည်းဖြင့် ရေးသားတင်ပြခြင်းများ ဆောင်ရွက်နေသည်ကို စိစစ်တွေ့ရှိလျက်ရှိပါသည်ဟု ဖော်ပြထားသည်။

ထို့ကြောင့် ပွဲစား/အေဂျင်စီများအနေဖြင့် စာရွက်စာတမ်း အချက်အလက် အထောက်အထားအတုများဖြင့် တင်ပြ ဆောင်ရွက်ကြောင်း စိစစ်တွေ့ရှိရပါက လုပ်ငန်းဆောင်ရွက်သည့် ပွဲစား/အေဂျင်စီအပြင် လုပ်ငန်း အပ်နှံ သည့် အလုပ်သမားကိုပါ လိုအပ်သလို စိစစ်အရေးယူဆောင်ရွက်သွားမည်ဟု အလုပ်သမားညွှန်ကြားရေးဦးစီး ဌာနက ပြောသည်။

CNI News

၂၀၂၃ ခုနှစ်၊ ဖေဖော်ဝါရီ ၂၄

နစကမှ အကယ်ဒမီ မီးလင်းအခေါက်ရွှေ ၁ ကျပ်သားလျှင် ၂၇ သိန်း ၉ သောင်းကျပ်ဖြင့် ရောင်းချရန် သတ်မှတ်ခဲ့ သော်လည်း ရွှေဆိုင်များတွင် ဈေးနှုန်းများမြင့်တက်နေဆဲ ဖြစ်ကြောင်း ရွှေဈေးကွက် လေ့လာသူများထံမှ သိရ သည်။

နစက၏ ရွှေနှင့် ငွေကြေးဈေးကွက် စောင့်ကြည့်၊ ထိန်းသိမ်း၊ ကြပ်မတ်ရေးလုပ်ငန်းကော်မတီက ရွှေဆိုင်များနှင့် ရွှေကုန်သည်များ အကယ်ဒမီ မီးလင်းအခေါက်ရွှေ ၁ ကျပ်သားလျှင် ၂၇ သိန်း ၉ သောင်းကျပ်(၂,၇၉၀,၀၀၀ ကျပ်) ဖြင့် တပြေးညီ ရောင်းချကြရန် သတ်မှတ်ခဲ့သော်လည်း ရွှေဆိုင်များတွင် အမှန်တကယ် ရောင်းချနေသည့် ဈေးနှုန်း သည့် ကျပ် ၂၈ သိန်းအထက်တွင် ရှိနေဆဲဖြစ်ကြောင်း ရွှေဈေးကွက် လေ့လာသူများထံမှ သိရသည်။

ဖေဖော်ဝါရီလ ၂၃ ရက်နေ့အတွက် ရန်ကုန်တိုင်းဒေသကြီး ရွှေလုပ်ငန်းရှင်များအသင်း၏ အကယ်ဒမီ မီးလင်း အခေါက်ရွှေ ရည်ညွှန်းဈေးနှုန်းသည် ၁ ကျပ်သားလျှင် ၂,၁၅၄,၈၀၀ ကျပ်ဟု ဖော်ပြထားသော်လည်း ရွှေဆိုင်များမှ ရောင်းချသည့် ဈေးနှုန်းသည် ၁ ကျပ်သား ၂,၈၅၇,၀၀၀ ကျပ် ဖြစ်ပေါ်နေသည်ကို တွေ့ရသည်။

ရွှေရောင်းဘောင်ချာ ဈေးနှုန်းကိုတွေ့ရစဉ်

လက်ရှိတွင် ရွှေဈေးကွက်အတွင်း အရောင်းအဝယ် ပါးနေကြောင်း၊ ရွှေဈေးနှုန်းကို ရွှေအသင်းများအနေဖြင့် ထိန်းချုပ်၍ မရကြောင်း၊ ထိန်းညှိ၍သာ ရသည်ဟု ရွှေဈေးကွက် လေ့လာသူတစ်ဦးက CNI သတင်းဌာနသို့ ပြောသည်။

၎င်းက “သတ်မှတ်လိုက်တာ ရွှေဈေးကွက်အပေါ် ဘယ်လိုသက်ရောက်မှု ရှိလဲဆိုတော့ အရောင်းအဝယ် ပါးသွား တာပဲ အဖက်တင်ပါတယ်။ တကယ်တမ်းကျတော့ အလုပ်မဖြစ်ပါဘူး။ အရင် လုပ်ထုံးလုပ်နည်း အတိုင်းပဲ ဘောင်ချာမှာ တစ်ဈေး၊ ဘောင်ချာမှာ ၂ ဈေး ဖြစ်သွားမှာပေါ့လေ။ အောက်မှာ ပုံစံတစ်မျိုးရေးမယ်၊ ဘောင်ချာမှာ တစ်မျိုးရေးမယ်နဲ့ သွားတာ။ ရောင်းလို့မရဘူးလေ။ ရွှေဆိုင်တွေက အဲလိုသွားလုပ်တော့ မွဲသွားမှာပေါ့။ အဲဒီအခါ ကျတော့ အဓိကကတော့ သူ့ဟာသူ ဘယ်လို သတ်မှတ်သတ်မှတ် မရဘူး ထိန်းလို့မရဘူး။ ဒါသည် ဆိုင်ရဲ့ ဈေးကွက်တစ်ခု ဖြစ်တဲ့အတွက် သူ့ဟာသူ ဘာလို့လဲဆိုတော့ အနေအထားတစ်ခုကို ဟန့်သွားအောင်ပဲ လုပ်လို့ရ မယ်။ လွယ်လွယ်ကူကူနဲ့ ဝင်ပြီး ထိန်းချုပ်လို့ရတဲ့ ကိစ္စ မဟုတ်ဘူး။ ရွှေအသင်းဆိုတာကလည်း အသင်းတစ်ခု မှန် ပေမယ့် အရမ်းကြီး အာဏာစက် သက်ရောက်တဲ့ အဖွဲ့အစည်းလည်း မဟုတ်ဘူးလေ။ ရွှေအသင်းဆိုတာ မှန်ပေမယ့် တကယ့်တကယ် အရောင်းအဝယ် လုပ်တဲ့သူတွေအပေါ်မှာပဲ မူတည်တာ။ သူတို့က ထိန်းညှိပေးရုံ လောက်ပဲ ရမှာ ထိန်းချုပ်လို့ မရဘူး။ ၂၈ သိန်း ၅ သောင်းခွဲမှာပဲ ငြိမ်နေတာပေါ့လေ အခုလောလောဆယ် ကတော့” ဟု ပြောသည်။

ရွှေဈေးနှုန်းကို ၂,၇၉၀.၀၀၀ ကျပ်ဖြင့် ရောင်းချကြရန် သတ်မှတ်လိုက်ခြင်းကြောင့် ရွှေဝယ်သူများ အနေဖြင့် ဈေးကွက်ကို စောင့်ကြည့်လာနိုင်ကြောင်း၊ ထို့နောက် ရွှေဝယ်ယူမှုများ လျော့နည်းသွားမည်ဖြစ်သည့်အတွက် ရွှေဈေးနှုန်းများ ကျဆင်းသွားနိုင်ကြောင်း မြန်မာနိုင်ငံ ရွှေလုပ်ငန်းရှင်များအသင်းမှ အတွင်းရေးမှူး ဦးအုန်းမြင့်က CNI သတင်းဌာနသို့ ပြောသည်။

ရွှေရောင်းချနေစဉ်(Reuters)

၎င်းက “၂၇ သိန်း ၉ သောင်း ဆိုတာက အဲဒါတော့ အဲဒီလောက်ကို သူတို့က ဖြစ်နိုင်အောင် လုပ်ပေးပါဆိုတော့ ရွှေဈေးကို လာပြီးတော့ ဝယ်တဲ့သူတွေဆိုရင်လည်း ဒီဈေးဆိုတော့ အပေါ်မှာဆိုရင်တော့ သူတို့လည်း မဝယ်ဘူး ပေါ့။ အဝယ်လည်း နည်းသွားမှာပေါ့။ အဝယ်နည်းတယ်ဆိုလည်း မရောင်းရဘူး။ မရောင်းရဘူးဆိုရင် ရွှေဈေး ပြန် အေးသွားမှာပေါ့ ဒီလိုမျိုး တွက်တာပေါ့။ အရောင်းအဝယ် အဝယ်လိုက်နေရင်တော့ ရွှေဈေးက ဟိုဟာဖြစ်တာပဲ လေ။ အဝယ်လိုက် နေရင်တော့ ရွှေဈေးက မကျဘူးပေါ့လေ။ အဝယ်ကိုတော့ သူက ဒီဈေးနဲ့ ဖြစ်အောင်လုပ်ပါဆို တော့ ကျော်ပြီးတော့ မရောင်းရဲတာတွေ ရှိတယ်။ တချို့ကျတော့လည်း မဝယ်ရဲတာ ရှိတယ်။ ရွှေဈေးက ဒီလောက်ဖြစ်နေတယ် ခင်ဗျားတို့ ပြောတာကြီးက လွဲနေတယ် သူသူကိုယ်ကိုယ်ပဲလေ။ ဒီဈေးဖြစ်အောင် စောင့်ကြည့်မယ်ဆိုတော့ စောင့်ရင်း စောင့်ရင်းနဲ့ မရောင်းရဘူးဆိုရင် ဈေးက ကျသွားမှာပဲပေါ့” ဟု ပြောသည်။

ပြည်တွင်း ရွှေဈေးနှုန်းသည် ကမ္ဘာ့ရွှေဈေးနှုန်းနှင့် ပြည်တွင်း ဒေါ်လာပေါက်ဈေးအပေါ် မူတည်ပြီး တွက်ချက်ကြ သည့်အတွက် ဈေးနှုန်းတစ်ခု သတ်မှတ်ပြီး လုပ်ဆောင်၍ မရကြောင်း၊ ကမ္ဘာ့ရွှေဈေးနှုန်းနှင့် ပြည်တွင်းဒေါ်လာ ဈေး အတက်အကျပေါ် မူတည်ပြီး ပြည်တွင်း ရွှေဈေးနှုန်းလည်း အပြောင်းအလဲ ဖြစ်သွားမည်ဟု ရွှေဈေးကွက် လေ့လာသူများက ပြောသည်။

လက်ရှိတွင် သတ်မှတ်ထားသည့် ရွှေဈေး တစ်ကျပ်သား ၂၇ သိန်း ၉ သောင်းကျပ်ဖြင့် ရွှေဆိုင်များက ဘောင်ချာ ဖွင့်သော်လည်း အမှန်တကယ် ငွေပေးချေရသည့် ဈေးသည် ကျပ် ၂၈ သိန်းအထက်တွင် တည်ရှိနေကြောင်း ရန်ကုန် ရွှေဈေးကွက်အတွင်း တွေ့ရသည်။

CNI News

၂၀၂၃ ခုနှစ်၊ ဖေဖော်ဝါရီ ၂၄

ထိုင်း-မြန်မာ နှစ်နိုင်ငံနယ်စပ် ဂိတ်ပေါက်များအား ပြန်လည် ဖွင့်လှစ်ခဲ့သော်လည်း လုံခြုံရေးနှင့် ဒေသတွင်း တည်ငြိမ်မှသာ ထိုနယ်စပ်ဂိတ်များမှတဆင့် မြန်မာနိုင်ငံထဲသို့ ထိုင်းခရီးသွားများ ဝင်ရောက်လာနိုင်ကြောင်း မြန်မာနိုင်ငံခရီးသွား လုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။

ယခင်က ကိုဗစ်မတိုင်ခင် ကာလ၌ မြန်မာ-ထိုင်းနယ်စပ် ဂိတ်ပေါက်များကနေ ထိုင်းခရီးသွား ဝင်ရောက်မှု အများ အပြား ရှိခဲ့သော်လည်း လက်ရှိတွင် ထိုင်းခရီးသွားများ အနေဖြင့် နယ်စပ်ဂိတ်ပေါက်များမှ မြန်မာနိုင်ငံအတွင်းသို့ ဝင်ရောက်ရန်မှာ အဆင်မပြေသေးကြောင်းလည်း ၎င်းက ပြောသည်။

ထိုင်းခရီးသွားများ တာချီလိတ်မြို့မှာတွေ့ရစဉ်

ဦးနောင်းနောင်းဟန်က “ထိုင်းခရီးသွားတွေက ဒီနယ်စပ်ဂိတ်ကနေ ဝင်လာဖို့ လောလောဆယ်တော့ အဆင်မပြေ သေးဘူး။ အဓိကက လုံခြုံရေးနဲ့ ဒေသတွင်း တည်ငြိမ်ရေးက ပိုပြီး အရေးကြီးနေတာ ပေါ့နော်။ ဒီမှာ ပဋိပက္ခ ဖြစ် တယ်ဆိုရင် အဆင်မပြေဘူးလေ။ သူတို့ဘက် အခြမ်းကလည်း သိတော့ အဲဒီဘက်လမ်းကတော့ အများကြီး ဝင်လာဖို့ မရှိပါဘူး။ ဒါပေမယ့် ကုန်သွယ်ရေးအနေနဲ့ ကြည့်မယ်ဆိုရင်တော့ ပိုကောင်းသွားတာပေါ့။ အဓိကက နောက်ပိုင်း ဒီလုံခြုံရေးတွေဘာတွေ အဆင်ပြေသွားတယ်၊ ဒေသတွင်း တည်ငြိမ်မှုတွေ ရှိလာရင်တော့ အဲဒီလမ်း ကနေ အများကြီး ဝင်လာဖို့တော့ ရှိပါတယ်။ အခုလောလောဆယ်ကတော့ လေကြောင်းလိုင်းကနေပဲ ဝင်ရောက် မှု ရှိနေပါသေးတယ်။ နယ်စပ်ကနေပြီး ဝင်ရောက်လာတဲ့အခါမှာ ကျနော်တို့ မြန်မာပြည်ဘက်က ကားတွေနဲ့ သွားတာမျိုးရှိသလို ထိုင်းနိုင်ငံရဲ့ မှတ်ပုံတင်ထားတဲ့ ကားတွေနဲ့ ဝင်ရောက်မှုတွေကအစ ရှိခဲ့ပါတယ်။ ဒီကိုဗစ် မတိုင်ခင်ကပေါ့နော်။ နယ်စပ်တွေမပိတ်ခင် အဲဒီအထိအောင် တောက်လျှောက် ဝင်ရောက်မှုတွေ ရှိပါတယ်။ သူ့ ကား သူမောင်းပြီးတော့ ဝင်လာတဲ့ဟာမျိုးတွေလည်း တော်တော်များပါတယ်။ နယ်စပ်ကနေ ဝင်လာပြီးရင် မြဝတီ ဘက်ကနေ တဆင့် ဘားအံပေါ့နော် အဲဒီကနေ ကျိုက်ထီးရိုးဘုရား အထိအောင် လည်ပတ်တာတွေ ရှိပါတယ်။ နောက်တစ်ခါ တစ်ဘက်နိုင်ငံကနေ အုပ်စုလိုက် လာတဲ့ဟာကို ကိုယ့်နိုင်ငံကနေ bus နဲ့ သွားခေါ် ပြီးတော့ လည်ပတ်တာတွေ ရှိပါတယ် နယ်စပ်ကနေလေ။ အဲဒါအများကြီး ရှိခဲ့ပါတယ်” ဟု CNI သတင်းဌာနသို့ ပြောသည်။

ထိုင်း-မြန်မာနှစ်နိုင်ငံ နယ်စပ်ဂိတ်ပေါက်များအား ကိုဗစ်ကြောင့် ၃ နှစ်နီးပါး ပိတ်ထားရာတွင် လူအဝင်အထွက် အများဆုံး အသုံးပြုသည့် မြဝတီ-မဲဆောက် အမှတ်(၁) ချစ်ကြည်ရေးတံတား၊ ကော့သောင်း-ရနောင်း နယ်စပ်ဂိတ်၊ တာချီလိတ်-မယ်ဆိုင် အမှတ်(၁) ချစ်ကြည်ရေး တံတားတို့အား လက်ရှိတွင် ပြန်လည် ဖွင့်လှစ်ထားပြီးဖြစ်သည်။

ထိုင်းခရီးသွားများကို ဗိုလ်တထောင်ဘုရားမှာ တွေ့ရစဉ်

ထိုသို့ နှစ်နိုင်ငံ နယ်စပ်ဂိတ်တံတားများ ပြန်ဖွင့်လိုက်ခြင်းသည် စီးပွားရေးအရ ကြည့်မည်ဆိုပါက ကောင်းမွန်သည့် ရလဒ်တစ်ခုဖြစ်ကြောင်း အလုပ်သမားအရေး ဆောင်ရွက်သူများနှင့် လုပ်ငန်းရှင်များက သုံးသပ်ကြသည်။

သို့သော် လုံခြုံရေးစိုးရိမ်မှုကြောင့် မြန်မာရွှေ့ပြောင်း လုပ်သားများအနေဖြင့် ထိုနယ်စပ်တံတားများမှ အလုံး အရင်းဖြင့် ပြန်လည် ဝင်ရောက်လာခြင်းမျိုး မရှိသည့် အနေအထား၌ ထိုင်းခရီးသွားများ ဝင်ရောက်လာရန်မှာ မဖြစ်နိုင်သည့် ကိစ္စတစ်ခုဖြစ်ကြောင်း မဲဆောက်တွင် ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။

၎င်းက “ကျနော်တို့ ကရင်ပြည်နယ်မှာက စစ်ဇုန်လိုဖြစ်နေတာဖြစ်တဲ့အတွက် နေ့တိုင်းလိုလိုပဲ တိုက်ပွဲအကြီးကြီး မဖြစ်ရင်တောင် အမြဲတမ်း သေနတ်အသံတွေ၊ ဗုံးအသံတွေက ရှိနေတာဖြစ်တဲ့အတွက် ထိုင်းပဲဖြစ်ဖြစ်၊ မြန်မာပဲ ဖြစ်ဖြစ်ပေါ့ နယ်စပ်တံတားတွေဖွင့်လို့ မြန်မာဘက်ကို သွားမယ်ဆိုရင်တော့ အားလုံးကတော့ ကိုယ့် လုံခြုံရေးကို သတိထားဖို့ လိုအပ်တာရယ်၊ နောက်ပြီးတော့ ထိုင်းနိုင်ငံသားတွေအတွက် အထူး စဉ်းစားစရာတွေ ဖြစ်နေတယ် ပေါ့။ မြန်မာအစိုးရက ထိုင်းခရီးသွားတွေ မြန်မာထဲကို ဝင်ဖို့အတွက် လုပ်ဆောင်ပေးမယ်ဆိုတဲ့ ရည်ရွယ်ချက်နဲ့ နယ်စပ်ဂိတ်တွေ ဖွင့်တယ်ဆိုရင်တောင်မှ သူတို့ လုံခြုံရေးကိုတော့ သူတို့က စိတ်မချရတဲ့ အခြေအနေမှာ ဖြစ်နေ တာ အာဏာပိုင်တွေကပေါ့။ အဲဒီတော့ တစ်ဖက်နိုင်ငံက Tourist အဖြစ်နဲ့ သော်လည်းကောင်း၊ ကုန်သည်တွေ သော်လည်းကောင်းပေါ့ မြန်မာနိုင်ငံ နယ်စပ်မြို့ထဲကို ဝင်ဖို့ဆိုတာက သူတို့လုံခြုံရေးကို သူတို့ စိတ်ချမှာ မဟုတ် ဘူး” ဟု ပြောသည်။

ထိုင်းခရီးသွားများကို ရွှေတိဂုံဘုရားမှာတွေ့ရစဉ်

လက်ရှိတွင် မြန်မာနိုင်ငံသို့ ပြည်ပခရီးသွား ဝင်ရောက်မှု၌ ထိုင်းနိုင်ငံသား ခရီးသွားများသည် လူ ၁၀ ဦးခန့် ပါဝင်သော အဖွဲ့ငယ်များဖြင့် ရန်ကုန်နှင့် အနီးတစ်ဝိုက် ပတ်ဝန်းကျင်များအား လာရောက်လေ့လာကြကြောင်း မြန်မာနိုင်ငံခရီးသွား လုပ်ငန်းရှင်များအသင်းမှ သိရသည်။

နိုင်ငံတကာလေကြောင်းလိုင်းများ ပြန်လည်ပြေးဆွဲခွင့် ပြုပြီးနောက်ပိုင်း မြန်မာနိုင်ငံအတွင်းသို့ လာရောက် လည်ပတ်သည့် ပြည်ပခရီးသွားများထဲတွင် ထိုင်းနိုင်ငံသား ခရီးသွားများမှ အဓိက အများဆုံးဖြစ်ကာ ရွှေတိဂုံ၊ ဗိုလ်တထောင်၊ ကျိုက်ထီးရိုး အစရှိသည့် ဘုရားဖူးဒေသများသို့ အဓိက သွားရောက် လည်ပတ်ကြခြင်း ဖြစ် ကြောင်း သိရသည်။