- By CNI
- Category: အားကစား
- Hits: 824
CNI Sport News
၂၀၂၃ ခုနှစ်၊ စက်တင်ဘာ ၃၀
သမိုင်းဝင် အငြင်းပွားဖွယ်မရှိ ဟဲဗီးဝိတ်တန်းချန်ပီယံ ထိုးသတ်ပွဲအဖြစ် တိုင်ဆန်ဗျူရီနဲ့ အူဆက်ခ်တို့ကြား လက်မှတ် ရေးထိုးလိုက်ပြီး ဒီပွဲကို ဆော်ဒီနိုင်ငံ၊ ရီယက်ဒ်မှာ ကျင်းပသွားမှာ ဖြစ်ပါတယ်။
ဒီပွဲ ထိုးသတ်မယ့်နေ့ အပါအဝင် နောက်ထပ် အသေးစိတ် အချက်အလက်တွေကိုတော့ ထုတ်ပြန်ထားခြင်း မရှိသေးပါဘူး။
အသက် ၃၅ နှစ်အရွယ်ရှိ ဗြိတိန်နိုင်ငံသား တိုင်ဆန်ဗျူရီဟာ WBC ချန်ပီယံဖြစ်ပြီး အသက် ၃၆ နှစ်အရွယ်ရှိ ယူကရိန်းနိုင်ငံသား အူဆက်ခ်ကတော့ WBA, WBO နဲ့ IBF ချန်ပီယံဆုတွေကို ပိုင်ဆိုင်ထားတာပါ။
ဒီပွဲကို ဒီဇင်ဘာ ၂၃ ရက်မှာ ကျင်းပဖို့ ပစ်မှတ်ထားနေပေမယ့် လာမယ့်နှစ် အစောပိုင်းကိုလည်း ပြန်ပြီး ရွှေ့သွားနိုင်တာ ဖြစ်ပါတယ်။
ဒီပွဲ အနိုင်ရတဲ့သူဟာ ချန်ပီယံခါးပတ် ၄ ခုစလုံးကို ရယူနိုင်မယ့် အငြင်းပွားဖွယ်ရာ မရှိတဲ့ ပထမဆုံး ဟဲဗီးဝိတ် ချန်ပီယံအဖြစ် မှတ်တမ်းတင်နိုင်တော့မှာပါ။
ပွဲစီစဉ်သူ ဖရန့်ခ်ဝါရမ်က ဒီပွဲကို ဖြစ်မြောက်အောင် လက်မှတ်ထိုးနိုင်ခဲ့လို့ ဝမ်းသာမိပြီး ဒီပွဲဟာ လက်ဝှေ့ အားကစားသမိုင်းရဲ့ အကြီးမားဆုံး ထိုးသတ်ပွဲ ဖြစ်နိုင်တယ်လို့ ပြောခဲ့ပါတယ်။
တိုင်ဆန်ဗျူရီဟာ ပရော်ဖက်ရှင်နယ် လက်ဝှေ့ပွဲတွေ စတင်ထိုးသတ်ခဲ့တဲ့ ၂၀၀၈ ခုနှစ်ကတည်းက ၃၄ ပွဲမှာ ၃၃ ပွဲ အနိုင်ရခဲ့ပြီး ၁ ပွဲ သရေကျကာ ရှုံးပွဲမရှိ သေးပါဘူး။
တိုင်ဆန်ဗျူရီနဲ့ အူဆက်ခ်ကို တွေ့ရစဉ်
အူဆက်ခ်ကလည်း ထိုးသတ်ခဲ့တဲ့ ပရော်ဖက်ရှင်နယ် လက်ဝှေ့ပွဲပေါင်း ၂၁ ပွဲစလုံး အနိုင်ရခဲ့ပြီး သြဂုတ်လကမှ သူ့ရဲ့ ချန်ပီယံခါးပတ်တွေကို ကာကွယ်ထားနိုင်ခဲ့တာ ဖြစ်ပါတယ်။
ဖရန့်ခ်ဝါရမ်က ဒီပွဲဟာ ရာစုနှစ်ရဲ့ အကြီးမားဆုံး လက်ဝှေ့ပွဲ ဖြစ်လာမယ်ဆိုတာ သံသယမရှိဘူးလို့ ထပ်ပြီး ပြောခဲ့တာပါ။
၁၉၉၉ ခုနှစ်က ဟိုလီဖီးလ်ကို အနိုင်ရပြီး WBA,WBC နဲ့ IBF ခါးပတ်တွေကို ကာကွယ်နိုင်ခဲ့တဲ့ လူးဝစ်နောက်ပိုင်း အငြင်းပွားဖွယ်မရှိတဲ့ ဟဲဗီးဝိတ်ချန်ပီယံတွေ ထွက်ပေါ်လာခဲ့ခြင်း မရှိတော့တာ ဖြစ်ပါတယ်။
ဆော်ဒီနိုင်ငံဟာ မကြာသေးခင် နှစ်တွေအတွင်းမှာ နာမည်ကြီးပွဲ အများအပြားကို လက်ခံကျင်းပခဲ့ပြီး ဒီအထဲမှာ ၂၀၂၂ ခုနှစ်၊ သြဂုတ်လက အန်သိုနီဂျိုရွှာကို အနိုင်ရခဲ့တဲ့ အူဆက်ခ်ရဲ့ ပွဲလည်း ပါဝင်ခဲ့တာပါ။
ဆော်ဒီနိုင်ငံဟာ လက်ရှိအချိန်မှာ ရော်နယ်ဒို၊ နေမာ၊ ဘန်ဇီမာတို့ အပါအဝင် နာမည်ကြီး ဘောလုံးသမား အများအပြားကို ခေါ်ယူပြီး ဒေသတွင်းလိဂ်ကို လူစိတ်ဝင်စားမှု မြင့်မားလာအောင် လုပ်ဆောင်နေတာ ဖြစ်ပါ တယ်။
Source: BBC
- By CNI
- Category: အားကစား
- Hits: 699
CNI Sport News
၂၀၂၃ ခုနှစ်၊ စက်တင်ဘာ ၃၀
ဒဏ်ရာပြဿနာရှိနေကြတဲ့ ဆာကာ၊ ဒီကလန်ရိုက်စ်နဲ့ ဆာလီဘာတို့ ၃ ဦးဟာ ဘုန်းမောက်နဲ့ ပရီးမီးယားလိဂ်ပွဲစဉ် ကစားဖို့ ရောက်ရှိလာခဲ့တဲ့ အာဆင်နယ်အသင်း လူစာရင်းမှာ ပါဝင်ခဲ့တာဖြစ်ပါတယ်။
အာဆင်နယ်အသင်းရဲ့ အဓိက ကစားသမား ၆ ဦးဟာ ဒဏ်ရာတွေကြောင့် အခုအပတ်ထဲမှာ အသင်းနဲ့ လေ့ကျင့်မှု တွေ ပြုလုပ်နိုင်ခဲ့ခြင်း မရှိပါဘူး။
ဆာကာနဲ့ ဒီကလန်ရိုက်စ်တို့ဟာ စပါးအသင်းနဲ့ ပရီးမီးယားလိဂ်ပွဲစဉ်မှာ ရရှိခဲ့တဲ့ ဒဏ်ရာကြောင့် ကြားရက်က ဘရန်ဖို့ဒ်အသင်းနဲ့ ကာရာဘောင်းဖလား ပွဲစဉ်မှာ အာဆင်နယ်အသင်းအတွက် မပါဝင်နိုင်ခဲ့တာပါ။
မာတင်နယ်လီနဲ့ ထရိုဆာ့ဒ်တို့ကလည်း စပါးအသင်းနဲ့ ပွဲစဉ်မတိုင်ခင်ကတည်းက ဒဏ်ရာတွေကြောင့် အနားယူ နေရတာ ဖြစ်ပါတယ်။
အာဆင်နယ်အသင်းနည်းပြ အာတီတာက စက်တင်ဘာ ၂၉ ရက်က ပြုလုပ်ခဲ့တဲ့ သတင်းစာ ရှင်းလင်းပွဲမှာ ဒီကစား သမားတွေအပြင် ဆာလီဘာနဲ့ ဗီအဲရာတို့ကလည်း ဒဏ်ရာတွေရနေခဲ့တယ်လို့ ပြောခဲ့တာပါ။
ဒီကလန်ရိုက်စ်ကိုတွေ့ရစဉ်
သူတို့တွေဟာ အာဆင်နယ်အသင်းရဲ့ နောက်ဆုံး လေ့ကျင့်ခန်း အစီအစဉ်မှာလည်း မပါဝင်ခဲ့ပေမယ့် ဆာကာ၊ ဒီကလန်ရိုက်စ်နဲ့ ဆာလီဘာတို့ ၃ ဦးဟာ ဘုန်းမောက်အသင်းနဲ့ ပွဲစဉ်အတွက် လူစာရင်းမှာ ပါဝင်လာခဲ့ပြီး ဟိုတယ်ကို ရောက်ရှိလာခဲ့တာ ဖြစ်ပါတယ်။
အာဆင်နယ်အသင်းဟာ ဒီရာသီ ပရီးမီးယားလိဂ်ပြိုင်ပွဲ ၆ ပွဲ ကစားအပြီးမှာ ရှုံးပွဲမရှိ ရမှတ် ၁၄ မှတ်နဲ့ အမှတ်ပေး ဇယား အဆင့် ၅ နေရာမှာ ရပ်တည်နေတာပါ။
အာဆင်နယ်အသင်းဟာ ဘုန်းမောက်အသင်းနဲ့ ပွဲစဉ်ပြီးရင် ချန်ပီယံလိဂ်ပွဲစဉ်အဖြစ် လန်းစ်၊ ပရီးမီးယားလိဂ် ပွဲစဉ် အဖြစ် မန်စီးတီးအသင်းတို့နဲ့ ပွဲကြီးပွဲကောင်းတွေ ဆက်တိုက်ယှဉ်ပြိုင်ရမှာ ဖြစ်ပါတယ်။
အာဆင်နယ်အသင်းနည်းပြ အာတီတာကတော့ မန်စီးတီးအသင်းနဲ့ ပွဲမတိုင်ခင်မှာ ဒဏ်ရာရ ကစားသမားတွေ ပြန်သက်သာလာပြီး ဒီပွဲမှာ အသုံးပြုနိုင်ဖို့ မျှော်လင့်နေတာပါ။
လန်ဒန်ကလပ်ဟာ အခုနှစ် ဘောလုံးရာသီမှာ မန်စီးတီးအသင်းနဲ့ အပြိုင် ပရီးမီးယားလိဂ်ချန်ပီယံဆုကို ရယူနိုင်ဖို့ ပစ်မှတ်ထားနေတာ ဖြစ်ပါတယ်။
Source: Metro
- By CNI
- Category: အားကစား
- Hits: 682
CNI Sport News
၂၀၂၃ ခုနှစ်၊ စက်တင်ဘာ ၂၉
စပိန်အစိုးရရှေ့နေတွေရဲ့ စုံစမ်းစစ်ဆေးမှုတွေ ပြုလုပ်ခံနေရတဲ့ ဘာစီလိုနာအသင်းကို ဒိုင်လူကြီးတွေက ဘယ်တုန်းကမှ မျက်နှာသာပေးတဲ့ ဆုံးဖြတ်ချက်တွေ ချခဲ့ခြင်းမရှိဘူးလို့ နည်းပြ ဇာဗီက ပြောလိုက်ပါတယ်။
ဇာဗီက “နီဂရီရာရဲ့ အမှုနဲ့ ပတ်သက်ပြီး နောက်ထပ် သတင်းတွေက ထပ်ပြီးထွက်ပေါ်လာဦးမှာပါ။ ဒိုင်လူကြီး တွေက ကျနော်တို့ကို မျက်နှာသာပေးပြီး ဆုံးဖြတ်တယ်ဆိုတဲ့ ခံစားချက်မျိုး ဘယ်တုန်းကမှ မဖြစ်ခဲ့ဖူးပါဘူး”လို့ ပြောခဲ့တာပါ။
ဘာစီလိုနာအသင်းဟာ လာဘ်ပေးလာဘ်ယူမှု သံသယနဲ့ စွဲချက်တင်ခံထားရပြီး တရားဝင် စုံစမ်းစစ်ဆေးမှုတွေ လည်း ခံယူနေရတာ ဖြစ်ပါတယ်။
ဘာစီလိုနာအသင်းဟာ စပိန်ဒိုင်လူကြီးများကော်မတီရဲ့ ဒုဥက္ကဋ္ဌဟောင်း နီဂရီရာနဲ့ ချိတ်ဆက်ထားတဲ့ ကုမ္ပဏီတွေ ထံ ပေါင်(၆)သန်း ပေးချေခဲ့တယ်ဆိုပြီး စွပ်စွဲခံထားရကာ ဒီအရှုပ်တော်ပုံဟာ လွန်ခဲ့တဲ့ ၆ လကတည်းက လူအများ အပြားရဲ့ အာရုံစူးစိုက်မှု ခံနေရတာပါ။
ဘာစီလိုနာအသင်း နည်းပြ ဇာဗီကိုတွေ့ရစဉ်
စပိန်ရဲတပ်ဖွဲ့ဟာ ဘာစီလိုနာအသင်းက နီဂရီရာပိုင်ဆိုင်တဲ့ ကုမ္ပဏီတွေထံ ငွေပေးချေမှုအပေါ် စုံစမ်းစစ်ဆေးမှု အဖြစ် မက်ဒရစ်မြို့အနီးရှိ စပိန်ဘောလုံးအဖွဲ့ချုပ်ရုံးတွေကို ဝင်ရောက်စီးနင်းမှုတွေ ပြုလုပ်ခဲ့တာ ဖြစ်ပါတယ်။
ဘာစီလိုနာအသင်းကတော့ သူတို့ဘက်က ဘာအမှားအယွင်းကိုမှ ပြုလုပ်ထားခြင်း မရှိဘူးလို့ အခိုင်အမာ ပြောထားတာပါ။ ဘာစီလိုနာအသင်းအနေနဲ့ အပြစ်ရှိကြောင်း တွေ့ရမယ်ဆိုရင် ကြီးမားတဲ့ ပြစ်ဒဏ်ချမှတ် ခံရဖွယ် ရှိနေပါတယ်။
ဥရောပဘောလုံးအဖွဲ့ချုပ်(UEFA)က စုံစမ်းစစ်ဆေးမှုတွေ ပြုလုပ်နေချိန်အတွင်း ဘာစီလိုနာအသင်းကို ချန်ပီယံလိဂ်ပြိုင်ပွဲမှာ ယှဉ်ပြိုင်ခွင့် ပေးခဲ့ပေမယ့် အရေးယူခံရမယ်ဆိုရင်တော့ ချန်ပီယံလိဂ်ပြိုင်ပွဲကနေ ထုတ်ပယ်ဖွယ်ရှိတယ်လို့ သတင်းတွေမှာ ဖော်ပြထားပါတယ်။
Source: Goal
- By CNI
- Category: အားကစား
- Hits: 594
CNI Sport News
၂၀၂၃ ခုနှစ်၊ စက်တင်ဘာ ၂၉
ရီးရယ်လ်အသင်း နည်းပြဟောင်း ဇီဒန်းဟာ မာဆေးလ်အသင်းကို ဆော်ဒီထံ ရောင်းချခဲ့မယ်ဆိုရင် နည်းပြအဖြစ် ကိုင်တွယ်ဖို့ မူအားဖြင့် သဘောတူညီမှု ရရှိထားတယ်လို့ သတင်းတွေ ထွက်ပေါ်နေပါတယ်။
France Blue Provence က ဇီဒန်းဟာ မာဆေးလ်အသင်းကို နည်းပြအဖြစ် ကိုင်တွယ်ဖို့ ခေါင်းညိတ်ခဲ့တယ်လို့ ဖော်ပြခဲ့တာပါ။
ဒါပေမယ့် မာဆေးလ်အသင်းကို ဆော်ဒီထံရောင်းချဖို့ အဆိုပြုထားတာကို အကောင်အထည်ဖော်နိုင်မှသာ ဇီဒန်း ဟာ ပြင်သစ်ကလပ်ရဲ့ နည်းပြသစ်အဖြစ် ဝင်ရောက်လာမှာ ဖြစ်ပါတယ်။
လက်ရှိအချိန်မှာတော့ ပိုင်ရှင်ဖြစ်သူ မက်ကော့က မာဆေးလ်အသင်းကို ရောင်းချမှာ မဟုတ်ဘူးလို့ ပြောထားတဲ့ အတွက် ဇီဒန်းဟာ ပြင်သစ်ကလပ်ကို ကိုင်တွယ်နိုင်ဦးမှာ မဟုတ်သေးပါဘူး။
ဇီဒန်း ရီးရယ်လ်အသင်းမှာ နည်းပြလုပ်စဉ်
ဆော်ဒီဘက်ကတော့ မာဆေးလ်အသင်းကို ဝယ်ယူဖို့ စိတ်အားထက်သန်နေပြီး နယူးကာဆယ် အသင်းလိုမျိုး ပြောင်းလဲပေးနိုင်ဖို့ မျှော်လင့်နေတာပါ။
ဇီဒန်းကလည်း မာဆေးလ်အသင်းကို နည်းပြဖြစ် ကိုင်တွယ်ရမယ်ဆိုရင် အသင်းကို ပြောင်းလဲမှု ပြုလုပ်ဖို့အတွက် ပြောင်းရွှေ့ကြေး အသုံးစရိတ် ပေါင်သန်း ၂၆၀ ပေးဖို့ တောင်းဆိုထားတယ်လို့ သတင်းတွေမှာ ဖော်ပြထားပါတယ်။
ဇီဒန်းရဲ့ တောင်းဆိုမှုကို ဆော်ဒီဘက်က ထုတ်ပေးဖို့ သဘောတူညီမှု ရထားပေမယ့် မာဆေးလ်အသင်းပိုင်ရှင် မက်ကော့က နောက်ဆုံး ဆုံးဖြတ်ချက် ချရမယ့်သူအဖြစ် ရှိနေတာပါ။
ဒါပေမယ့် မာဆေးလ်အသင်းဟာ ပြီးခဲ့တဲ့ရက်ပိုင်းကမှ အီတလီလူမျိုးနည်းပြ ဂတ်တူဆိုကို နည်းပြသစ်အဖြစ် ခန့်အပ်ထားတာ ဖြစ်ပါတယ်။
ဂတ်တူဆိုဟာ မာဆေးလ်အသင်းရဲ့ အရောင်းအဝယ် မပြီးဆုံးမချင်း နည်းပြအဖြစ် ဆက်ပြီးရှိနေမှာ ဖြစ်ပေမယ့် ပိုင်ရှင်အသစ် ပြောင်းလဲပြီးသွားရင်တော့ ဇီဒန်းက ဂတ်တူဆိုရဲ့နေရာကို အစားထိုး ဝင်ရောက်နိုင်ဖွယ် ရှိနေတာပါ။
မာဆေးလ်အသင်းဟာ အောက်တိုဘာ ၅ ရက်မှာ ယူရိုပါလိဂ်ပွဲစဉ်အဖြစ် ဘရိုက်တန်အသင်းနဲ့ ယှဉ်ပြိုင်ရမှာဖြစ်ပြီး အုပ်စုအဖွင့် ပွဲစဉ်တုန်းက အေဂျတ်စ်အသင်းနဲ့ ၃ ဂိုးစီ သရေကျထားတာ ဖြစ်ပါတယ်။
Source: Goal
- By CNI
- Category: အားကစား
- Hits: 831
CNI Sport News
၂၀၂၃ ခုနှစ်၊ စက်တင်ဘာ ၂၉
ဂီတာဖေးအသင်းဟာ ယူနိုက်တက်အသင်းကနေ အငှားနဲ့ လာရောက်ကစားနေတဲ့ တိုက်စစ်မှူး ဂရင်းဝုဒ်ကို ပြိုင်ဘက်အသင်း ပရိသတ်တွေက လာလီဂါပွဲစဉ်တွေမှာ ပစ်မှတ်ထား အော်ဟစ်နေတဲ့အပေါ် ပြစ်တင်လိုက်ပါ တယ်။
ဘီလ်ဘာအိုနဲ့ ဂီတာဖေးအသင်းတို့ ကစားခဲ့တဲ့ ပြီးခဲ့တဲ့ လာလီဂါပွဲစဉ်ရဲ့ ပွဲချိန်အတွင်းမှာ ဘီလ်ဘာအိုအသင်း ပရိသတ်အချို့က ဂရင်းဝုဒ်ကို သေလိုက်ဆိုပြီး အော်ဟစ်မှုတွေ ပြုလုပ်ခဲ့ကြတာပါ။
ဂရင်းဝုဒ်ဟာ ပြီးခဲ့တဲ့ ဖေဖော်ဝါရီလကမှ သူ့အပေါ် စွဲချက်တင်ထားတဲ့ မှုဒိမ်းမှု အပါအဝင် ရာဇဝတ်မှုဆိုင်ရာ အမှုတွေကနေ လွတ်မြောက်ခဲ့တာ ဖြစ်ပါတယ်။
အင်္ဂလန်တိုက်စစ်မှူး ဂရင်းဝုဒ်ဟာ ပြီးခဲ့တဲ့ နွေရာသီ အပြောင်းအရွှေ့ကာလ နောက်ဆုံးနေ့မှာ ယူနိုက်တက် အသင်းကနေ ဂီတာဖေးအသင်းထံ ရာသီအကုန်ထိ အငှားစာချူပ်နဲ့ ပြောင်းရွှေ့လာခဲ့တာပါ။
ဂရင်းဝုဒ်ကို ပရိသတ်များ နှုတ်ဆက်နေကြစဉ်
ဂရင်းဝုဒ်ဟာ ဂီတာဖေးအသင်းအတွက် ပွဲဦးထွက်ခဲ့တဲ့ အိုဆာဆူနာအသင်းနဲ့ လာလီဂါပွဲစဉ်မှာလည်း ပြိုင်ဘက် အသင်း ပရိသတ်တွေရဲ့ ပစ်မှတ်ထား အော်ဟစ်ခြင်းတွေကို ခံခဲ့ရတာဖြစ်ပါတယ်။
ဘီလ်ဘာအိုအသင်းနဲ့ ၂ ဂိုးစီ သရေကျခဲ့တဲ့ လာလီဂါပွဲစဉ်မှာပါ ဒီလို အလားတူ ကြုံတွေ့ရပြီးနောက် ဂီတာဖေး အသင်းက ဒီလိုလုပ်ရပ်တွေဟာ လက်ခံနိုင်စရာမရှိသလို စော်ကားတိုက်ခိုက်မှုတွေဟာ ပိုပြီးဆိုးရွား လာနေတယ် လို့ သူတို့ရဲ့ ထုတ်ပြန်ချက်ထဲမှာ ဖော်ပြထားတာပါ။
အသက် ၂၁ နှစ်အရွယ်ရှိ ဂရင်းဝုဒ်ဟာ ဘီလ်ဘာအိုအသင်းနဲ့ ၂ ဂိုးစီ သရေကျခဲ့တဲ့ လာလီဂါပွဲစဉ်မှာ ဂီတာဖေး အသင်းရဲ့ ပွဲထွက်လူစာရင်းမှာ ပါဝင်ခဲ့ပြီး ဂိုးဖန်တီးမှု ၁ ကြိမ်ပြုလုပ်ကာ ခြေစွမ်းပြသနိုင်ခဲ့တာ ဖြစ်ပါတယ်။
ဂရင်းဝုဒ်ဟာ လက်ရှိ ခြေစွမ်းတွေကြောင့် လာမယ့် ဂီတာဖေးအသင်းရဲ့ ပွဲစဉ်တွေမှာလည်း ပွဲထွက်လူစာရင်းထဲ ပါဝင်လာနိုင်ပြီး သွင်းဂိုးတွေရယူနိုင်ဖို့ မျှော်လင့်နေတာပါ။
ဂီတာဖေးအသင်းဟာ စက်တင်ဘာ ၃၀ ရက်မှာ လာလီဂါပွဲစဉ်အဖြစ် ဗီလာရီးရယ်လ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: BBC
- By CNI
- Category: အားကစား
- Hits: 964
CNI Sport News
၂၀၂၃ ခုနှစ်၊ စက်တင်ဘာ ၂၉
ရိုးမားအသင်းဟာ စီးရီးအေပွဲစဉ်မှာ ဂျီနိုအာအသင်းကို ၄ ဂိုး- ၁ ဂိုးနဲ့ ဂိုးပြတ် အရေးနိမ့်ပြီးနောက် နည်းပြ မော်ရင်ဟိုက ဒါဟာသူ့နည်းပြဘဝမှာ အဆိုးရွားဆုံးရာသီ စတင်မှုလို့ ပြောလိုက်ပါတယ်။
မော်ရင်ဟိုက “ရိုးမားအတွက်ရော ကျနော့်နည်းပြဘဝမှာရော အဆိုးရွားဆုံးရာသီ စတင်မှုဆိုတာ အမှန်ပါပဲ။ ဒါပေမယ့် ကျနော်ရောက်လာအပြီးမှာ ရိုးမားအသင်းက သမိုင်းတစ်လျှောက် ပထမဆုံးအကြိမ် ဥရောပပြိုင်ပွဲ ဗိုလ်လုပွဲကို ၂ ရာသီ ဆက်တိုက် ကစားရတာကလည်း အမှန်ပါပဲ။ ကျနော်တို့ဟာ လက်ရှိ အခြေအနေကနေ ရုန်းထွက်ရမှာဖြစ်ပြီး ရလဒ်ဆိုးတွေကြောင့် ငိုဖို့အချိန်မရှိပါဘူး။ မနက်ဖြန်မှာ ကျနော်တို့ အလုပ်ပြန်လုပ်ပြီး လာမယ့်ပွဲက ကျနော်တို့အတွက် အလွန်အရေးကြီးတဲ့ ပွဲတစ်ပွဲဖြစ်လာမှာပါ”လို့ ပြောခဲ့တာပါ။
ရိုးမားအသင်းဟာ အခုနှစ် ဘောလုံးရာသီ စီးရီးအေ ၆ ပွဲကစားအပြီးမှာ နိုင်ပွဲ ၁ ပွဲသာ ရရှိထားပြီး ရမှတ် ၅ မှတ်နဲ့ ရလဒ်တွေ ဆိုးရွားနေခဲ့တာ ဖြစ်ပါတယ်။
ရိုးမားအသင်းရဲ့ ဒီရလဒ်ဆိုးတွေကြောင့် မော်ရင်ဟိုအတွက်လည်း နည်းပြဘဝ အဆိုးရွားဆုံး မှတ်တမ်းသစ် တစ်ခု ကို ပိုင်ဆိုင်သွားခဲ့တာပါ။ ပေါ်တူဂီလူမျိုးနည်းပြရဲ့ အရင်အဆိုးရွားဆုံး မှတ်တမ်းက ၂၀၁၅-၁၆ ရာသီတုန်းက ချယ်လ်ဆီးအသင်းကို ကိုင်တွယ်ချိန် ရာသီအဖွင့် ၆ ပွဲမှာ ၇ မှတ်ရယူနိုင်ခဲ့တာ ဖြစ်ပါတယ်။
ရိုးမားအသင်းကို တွေ့ရစဉ်
ဂျီနိုအာအသင်းကို ၄ ဂိုး- ၁ ဂိုးနဲ့ အရေးနိမ့်တဲ့ ပွဲအပြီးမှာ ရိုးမားအသင်း ပရိသတ်တွေက နည်းပြမော်ရင်ဟိုနဲ့ ကစားသမားတွေကို “ကျနော်တို့အပေါ် လေးစားမှုရှိပါဦး”၊ “ဒီလောက်ဆိုရင် ကျနော်တို့အတွက် လုံလောက်ပါပြီ” စတဲ့ အော်ဟစ်မှုတွေကို ပြုလုပ်ခဲ့ကြတာပါ။
မော်ရင်ဟိုဟာ အသင်းတစ်သင်းကို ကိုင်တွယ်တဲ့ တတိယမြောက် ရာသီရောက်ရင် ထုတ်ပယ်ခံရတက်တဲ့ အစဉ်အလာတွေ ရှိနေတာကြောင့် ဖိအားဒဏ်တွေကို စတင်ခံစားနေရပြီ ဖြစ်ပါတယ်။
ရိုးမားအသင်းအနေနဲ့ လာမယ့်ပွဲတွေမှာ ရလဒ်တွေ မကောင်းဘူးဆိုရင်တော့ မော်ရင်ဟိုရဲ့ နည်းပြရာထူးဟာ လှုပ်ခတ်လာတော့မယ်လို့ သတင်းမှာ ဖော်ပြထားတာပါ။
ရိုးမားအသင်းဟာ အောက်တိုဘာ ၂ ရက်မှာ စီးရီးအေပွဲစဉ်အဖြစ် ဖရိုစီနိုနီ၊ အောက်တိုဘာ ၆ ရက်မှာ ယူရိုပါလိဂ် ပွဲစဉ်အဖြစ် ဆာဗတ်တီအသင်းနဲ့ ယှဉ်ပြိုင်ရမှာ ဖြစ်ပါတယ်။
Source: Daily Mail
- By CNI
- Category: အားကစား
- Hits: 719
CNI Sport News
၂၀၂၃ ခုနှစ်၊ စက်တင်ဘာ ၂၈
ဟူစတန်ဒိုင်နမိုအသင်းကို အရေးနိမ့်ခဲ့တဲ့ US Open ဖလားဗိုလ်လုပွဲမှာ ဒဏ်ရာကြောင့် မပါဝင်နိုင်ခဲ့တဲ့ မက်ဆီဟာ လာမယ့်ပွဲတွေမှာ အင်တာမိုင်ယာမီအသင်းအတွက် ပြန်လည်ပါဝင်နိုင်မယ်လို့ နည်းပြ မာတီနိုက ပြောခဲ့ပါတယ်။
မာတီနိုက ”ဒီပွဲမှာ မက်ဆီကို မိနစ်အနည်းငယ်အသုံးပြုရင်တောင် အန္တရာယ်ကများလွန်းပါတယ်။ သူဟာ လာမယ့်လိဂ်ပွဲတွေမှာ ပါဝင်ကစားနိုင်မှာဖြစ်ပေမယ့် ဆေးအဖွဲ့ရဲ့ တစ်ပွဲပြီးတစ်ပွဲအကဲဖြတ်မှုပေါ် မူတည်ပြီး ကျနော်တို့ အသုံးပြုသွားမှာပါ”လို့ ပွဲအပြီး မီဒီယာတွေကို ပြောခဲ့တာပါ။
အင်တာမိုင်ယာမီအသင်းဟာ မက်ဆီမပါဝင်တဲ့ ဗိုလ်လုပွဲမှာ ဟူစတန်ဒိုင်နမိုအသင်းကို ၂ ဂိုး- ၁ ဂိုးနဲ့ အရေးနိမ့်ပြီး ဆုဖလားလက်လွှတ်ခဲ့ရပါတယ်။ မက်ဆီဟာ ဒီပွဲမှာ ဝင်ရောက်မကစားနိုင်ခဲ့ပေမယ့် ပွဲကြည့်ပရိသတ်အနေနဲ့ အင်တာမိုင်ယာမီအသင်းကို လာရောက်အားပေးခဲ့တာပါ။ မက်ဆီဟာ အာဂျင်တီးနားအသင်းနဲ့ ၂၀၂၆ ကမ္ဘာ့ဖလား ခြေစစ်ပွဲမှာ ဒဏ်ရာရပြီးနောက် အင်တာမိုင်ယာမီအသင်းအတွက် တိုရွန်တိုအသင်းနဲ့ ပွဲစဉ်မှာ ဝင်ရောက် ကစားပေးခဲ့တာကြောင့် ဒဏ်ရာအခြေအနေ ပိုပြီးဆိုးသွားခဲ့တာဖြစ်ပါတယ်။
မက်ဆီဟာ အင်တာမိုင်ယာမီအသင်းကို ရောက်ရှိပြီးကတည်းက US Open ဖလားဗိုလ်လုပွဲအပါအဝင် စုစုပေါင်း ပွဲစဉ် ၄ ပွဲကို လွဲချော်ခဲ့တာပါ။ အင်တာမိုင်ယာမီအသင်းဟာ စက်တင်ဘာ ၃၀ ရက်မှာ မေဂျာလိဂ်ပွဲစဉ်အဖြစ် နယူးယော့ခ်စီးတီးအသင်းနဲ့ ယှဉ်ပြိုင်ရမှာဖြစ်ပြီး ဒီပွဲမှာ မက်ဆီပါဝင်လာနိုင်ဖွယ်ရှိ၊မရှိ စောင့်ကြည့်ရဦးမှာ ဖြစ်ပါတယ်။
အင်တာမိုင်ယာမီအသင်းဟာ မေဂျာလိဂ်ပြိုင်ပွဲရဲ့ အရှေ့ပိုင်းဇုန်အမှတ်ပေးဇယား အဆင့် ၁၄ နေရာမှာ ရပ်တည် နေတာကြောင့် ပလေးအော့ဖ်ယှဉ်ပြိုင်ခွင့်ရဖို့အတွက် လက်ကျန်ပွဲစဉ် ၅ ပွဲစလုံးရလဒ်ကောင်း ရယူနိုင်ဖို့ လိုအပ် နေပါတယ်။
- By CNI
- Category: အားကစား
- Hits: 1009
CNI Sport News
၂၀၂၃ ခုနှစ်၊ စက်တင်ဘာ ၂၈
ပြင်သစ်လီဂူးဝမ်းကလပ် မာဆေးလ်အသင်းဟာ နည်းပြရာထူးက နုတ်ထွက်သွားခဲ့တဲ့ မာဆယ်လီနိုရဲ့နေရာမှာ ဂတ်တူဆိုကို နည်းပြသစ်အဖြစ် ခန့်အပ်လိုက်ပါတယ်။
အသက် ၄၅ နှစ်အရွယ်ရှိ ဂတ်တူဆိုဟာ မာဆေးလ်အသင်းနဲ့ ၂၀၂၄ ခုနှစ်၊ ဇွန်လအထိ စာချုပ်ချုပ်ဆိုခဲ့တာဖြစ်ပြီး စာချုပ်ကုန်ဆုံးရင် နောက်ထပ်တစ်နှစ် ထပ်မံ သက်တမ်းတိုးခွင့် ရှိနေတာပါ။
မာဆေးလ်အသင်း နည်းပြဟောင်း မာဆယ်လီနိုဟာ ပြင်သစ်ပရိသတ်တွေနဲ့ ဆက်ဆံရေး တင်းမာခဲ့တာကြောင့် နည်းပြရာထူးကနေ နုတ်ထွက်ခဲ့တာ ဖြစ်ပါတယ်။
မာဆေးလ်အသင်းဟာ နောက်ဆုံးကစားခဲ့တဲ့ ပြင်သစ်လီဂူးဝမ်းပွဲစဉ်မှာ ပီအက်စ်ဂျီအသင်းကို ၄ ဂိုး- ဂိုးမရှိနဲ့ ဂိုးပြတ် အရေးနိမ့်ပြီး အဆင့် ၈ နေရာမှာ ရပ်တည်နေတာပါ။
အီတလီနာမည်ကြီး ကစားသမားဟောင်း ဂတ်တူဆိုဟာ စပိန်လာလီဂါကလပ် ဗလင်စီယာအသင်းကို နောက်ဆုံး ကိုင်တွယ်ခဲ့တာဖြစ်ပြီး ၇ လကြာသာ ကိုင်တွယ်ခဲ့ရကာ ၂၀၂၃ ခုနှစ်၊ ဇန်နဝါရီလက ရာထူးကနေ ထုတ်ပယ်ခံခဲ့ရ တာ ဖြစ်ပါတယ်။
ဂတ်တူဆိုကို တွေ့ရစဉ်
အသက် ၄၅ နှစ်အရွယ်ရှိ ဂတ်တူဆိုဟာ နည်းပြဘဝမှာ အေစီမီလန်၊ နာပိုလီအသင်းစတဲ့ ထိပ်သီးအသင်းတွေ ကိုလည်း ကိုင်တွယ်ခဲ့တာပါ။
ဂတ်တူဆိုဟာ ကစားသမားဘဝမှာ အေစီမီလန်အသင်းနဲ့ ချန်ပီယံလိဂ်၊ စီးရီးအေဖလားတို့ကို ရယူနိုင်ခဲ့သလို အီတလီ လက်ရွေးစင်အသင်းနဲ့ ၂၀၀၆ ကမ္ဘာ့ဖလား ချန်ပီယံဆုကို ရယူနိုင်ခဲ့တာ ဖြစ်ပါတယ်။
ဒါပေမယ့် ဂတ်တူဆိုဟာ နည်းပြဘဝမှာတော့ နာပိုလီအသင်းနဲ့ ကိုပါအီတာလီယာဖလား ၁ ကြိမ်သာ ရယူနိုင်ခဲ့ပြီး အောင်မြင်မှု ကြီးကြီးမားမား မရယူနိုင်ခဲ့ပါဘူး။
မာဆေးလ်အသင်းဟာ အောက်တိုဘာ ၁ ရက်မှာ လီဂူးဝမ်းပွဲစဉ်အဖြစ် မိုနာကို၊ အောက်တိုဘာ ၅ ရက်မှာ ယူရိုပါလိဂ် အုပ်စုပွဲစဉ်အဖြစ် ဘရိုက်တန်အသင်းနဲ့ ယှဉ်ပြိုင်ရမှာဖြစ်ပြီး ဂတ်တူဆိုဟာ ပြင်သစ်ကလပ်အသင်းရဲ့ နည်းပြအဖြစ် ဒီပွဲတွေကို စတင်ပြီး တာဝန်ယူရတော့မှာ ဖြစ်ပါတယ်။
Source: BBC
- By CNI
- Category: အားကစား
- Hits: 692
CNI Sport News
၂၀၂၃ ခုနှစ်၊ စက်တင်ဘာ ၂၈
ချယ်လ်ဆီးအသင်းနည်းပြ ပိုချက်တီနိုက ဘရိုက်တန်အသင်းကို အနိုင်ရပြီး ကာရာဘောင်းဖလား ပြိုင်ပွဲမှာ နောက်တစ်ဆင့် တက်နိုင်ခဲ့ပြီးနောက် အသင်းဟာ အနိုင်ရဖို့ အပြည့်အဝ ထိုက်တန်တယ်လို့ ပြောလိုက်ပါတယ်။
ပိုချက်တီနိုက “ဒါက အသင်းရဲ့ ကောင်းမွန်တဲ့ တုံ့ပြန်မှုပါပဲ။ အသင်းရဲ့ စွမ်းဆောင်ရည်ကို အလွန်ကျေနပ်သလို နိုင်ပွဲနဲ့အတူ နောက်တစ်ဆင့်တက်နိုင်ခဲ့လို့ ကျနော်ပျော်ရွှင်ပါတယ်။ ကျနော်တို့ရဲ့ ယုံကြည်မှုနဲ့ အရှိန်အဟုန်ကို တည်ဆောက်ရပါမယ်။ ဒီလိုအရှိန်အဟုန်ကို ဆက်ပြီးသယ်ဆောင်သွားနိုင်ဖို့လည်း မျှော်လင့်ပါတယ်။ မဖြစ်မနေ အနိုင်ရမယ့်ပွဲမှာ ကျနော်တို့ဟာ ပွဲကိုကြီးစိုးနိုင်ခဲ့တာကြောင့် အနိုင်ရဖို့ အပြည့်အဝ ထိုက်တန်တယ်”လို့ ပြောခဲ့ တာပါ။
ပရီးမီးယားလိဂ်ပြိုင်ပွဲမှာ ရလဒ်တွေဆိုးပြီး နိုင်ပွဲပျောက်ဆုံးနေတဲ့ ချယ်လ်ဆီးအသင်းဟာ ကာရာဘောင်းဖလား တတိယအဆင့်ပွဲစဉ်မှာ ဘရိုက်တန်အသင်းကို ၁ ဂိုး- ဂိုးမရှိနဲ့ အနိုင်ရရှိခဲ့တာ ဖြစ်ပါတယ်။
ချယ်လ်ဆီးအသင်းဟာ ဒီပွဲအနိုင်ရရှိခဲ့တာကြောင့် နိုင်ပွဲပျောက်ဆုံးနေတာကို အဆုံးသတ်နိုင်ခဲ့သလို ၃ ပွဲ ဆက် တိုက် ဂိုးမသွင်းနိုင်တဲ့ မှတ်တမ်းဆိုးကိုလည်း ရပ်တန့်နိုင်ခဲ့တာပါ။
ချယ်လ်ဆီးအသင်းကို တွေ့ရစဉ်
ဘရိုက်တန်အသင်းနဲ့ ပွဲမှာ ချယ်လ်ဆီးအသင်းအတွက် အနိုင်ဂိုးကို တိုက်စစ်မှူး ဂျက်ဆန်က သွင်းယူခဲ့တာ ဖြစ်ပါတယ်။
ဒီဂိုးဟာ ပြီးခဲ့တဲ့ နွေရာသီ အပြောင်းအရွှေ့ ကာလက ဗီလာရီးရယ်လ်အသင်းကနေ ပြောင်းရွှေ့လာခဲ့တဲ့ ဂျက်ဆန် အတွက် ချယ်လ်ဆီးအသင်း ကစားသမားဘဝ ဒုတိယမြောက်သွင်းဂိုးလည်း ဖြစ်လာခဲ့တာပါ။
ချယ်လ်ဆီးအသင်းနည်းပြ ပိုချက်တီနိုက တိုက်စစ်မှူးတစ်ဦးအတွက် ဂိုးသွင်းနိုင်ဖို့က အရေးကြီးတယ်လို့ ပြောခဲ့ပါတယ်။
ပိုချက်တီနိုက “သူ့အတွက် ကျနော်အလွန်ပျော်ရွှင်ပါတယ်။ တိုက်စစ်မှူးတစ်ဦးအတွက် ဂိုးသွင်းတာက အမြဲတမ်း အရေးကြီးပါတယ်။ သူ့အတွက် ဂိုးတွေရဖို့ လိုအပ်ပြီး ဒီပွဲဟာ သူ့အတွက် အလွန်အရေးကြီးတဲ့ ပွဲဖြစ်ခဲ့ပါတယ်”လို့ ပြောခဲ့တာပါ။
ချယ်လ်ဆီးအသင်းဟာ ကာရာဘောင်းဖလား စတုတ္တအဆင့်မှာ ဘလက်ဘန်းအသင်းနဲ့ ယှဉ်ပြိုင်ရမှာဖြစ်ပြီး လာမယ့် ပရီးမီးယားလိဂ်ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာဖြစ်ပါတယ်။
Source: Daily Mail
- By CNI
- Category: အားကစား
- Hits: 991
CNI Sport News
၂၀၂၃ ခုနှစ်၊ စက်တင်ဘာ ၂၈
ကာရာဘောင်းဖလား တတိယအဆင့်ပွဲစဉ်မှာ နယူးကာဆယ်အသင်းကို အရေးနိမ့်ပြီး အခုနှစ် ဘောလုံးရာသီ ဆုဖလား ၄ လုံး ရယူနိုင်မယ့် အိပ်မက် အဆုံးသတ်သွားခဲ့ပြီးနောက် မန်စီးတီးအသင်းဟာ ဆုဖလား ၃ လုံး ရယူနိုင်ခဲ့ရင် ပိုပြီးပျော်ရွှင်မှာလို့ နည်းပြ ဂွာဒီယိုလာက ပြောခဲ့ပါတယ်။
ဂွာဒီယိုလာက “ဒီရာသီ ဆုဖလား ၄ လုံး ရယူနိုင်ဖို့ ပစ်မှတ်ထားနေတယ်လို့ ခင်ဗျားတို့ ထင်နေတာလား။ ၃ လုံး ရယူနိုင်ခဲ့ရင် ပိုပြီးပျော်ရွှင်မှာပါ။ ကျနော်တို့ဟာ မယုံနိုင်လောက်အောင် ပွဲတစ်ပွဲကို ကစားခဲ့ပါတယ်။ နယူးကာဆယ် အသင်းကလည်း အလွန်ကောင်းမွန်တဲ့အတွက် သူတို့ ဂိုးသွင်းယူနိုင်ခဲ့ပါတယ်။ နောက်တစ်ဆင့် တက်သွားတဲ့ နယူးကာဆယ်အသင်းကို ဂုဏ်ပြုပါတယ်”လို့ ပွဲအပြီး Sky Sports နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။
ဒီပွဲမှာ နယူးကာဆယ်အသင်းက မန်စီးတီးအသင်းကို ၁ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး အနိုင်ဂိုးကို တိုက်စစ်မှူး အိုင်ဆက်ခ်က ပွဲချိန် ၅၃ မိနစ်မှာ သွင်းယူခဲ့တာ ဖြစ်ပါတယ်။
ပြီးခဲ့တဲ့ ဘောလုံးရာသီက ဆုဖလား ၃ လုံး ရယူနိုင်ခဲ့တဲ့ မန်စီးတီးအသင်းဟာ အခုနှစ် ဘောလုံးရာသီမှာ ဆုဖလား ၄ လုံးရယူနိုင်ဖို့ မျှော်လင့်ခဲ့ပေမယ့် ကာရာဘောင်းဖလား တတိယအဆင့်ကနေ စောစီးစွာထွက်ခွာပြီး မျှော်လင့် ချက်တွေကို အဆုံးသတ်ခဲ့ရတာပါ။
မန်စီးတီးနဲ့ နယူးကာဆယ် ယှဉ်ပြိုင်နေစဉ်
ဂွာဒီယိုလာဟာ နယူးကာဆယ်အသင်းနဲ့ ပွဲမှာ နော်တင်ဟမ်ဖောရက်စ်အသင်းကို အနိုင်ရခဲ့တဲ့ ပရီးမီးယားလိဂ် ပွဲစဉ်က ပွဲထွက်လူစာရင်းကို ၇ ဦးအထိ အပြောင်းအလဲ ပြုလုပ်ခဲ့ပြီး တိုက်စစ်မှူး ဟာလန်းကို အရန် လူစာရင်း ထဲမှာသာ ထားခဲ့တာဖြစ်ပါတယ်။
စပိန်လူမျိုးနည်းပြကတော့ မန်စီးတီးအသင်း အရေးနိမ့်ခဲ့ပေမယ့် အသင်းရဲ့ ကစားပုံကို သဘောကျ နှစ်သက်ခဲ့ပြီး ဆုဖလား ၃ လုံးကို ထပ်ပြီးရယူနိုင်ဖို့သာ အာရုံစိုက်ဖို့ ရှိနေတာပါ။
နယူးကာဆယ်အသင်းဟာ မန်စီးတီးအသင်းကို အနိုင်ရခဲ့တာကြောင့် ကာရာဘောင်းဖလား စတုတ္တအဆင့်မှာ ယူနိုက်တက်အသင်းနဲ့ ယှဉ်ပြိုင်ရမှာ ဖြစ်ပါတယ်။
ဒီနှစ်သင်းဟာ ပြီးခဲ့တဲ့နှစ် ကာရာဘောင်းဖလား ဗိုလ်လုပွဲမှာ တွေ့ဆုံခဲ့တာဖြစ်ပြီး အခုနှစ်မှာတော့ စောစီးစွာ လာရောက် တွေ့ဆုံနေခဲ့တာပါ။
နယူးကာဆယ်အသင်းဟာ စက်တင်ဘာ ၃၀ ရက်မှာ ပရီးမီးယားလိဂ်ပွဲစဉ်အဖြစ် ဘန်လေအသင်းနဲ့ ယှဉ်ပြိုင်ရမှာ ဖြစ်ပါတယ်။
မန်စီးတီးအသင်းကတော့ ပရီးမီးယားလိဂ်ပွဲစဉ်အဖြစ် ဝုလ်ဗ်စ်အသင်းနဲ့ ယှဉ်ပြိုင်ရမှာပါ။ နယူးကာဆယ်နဲ့ မန်စီးတီး အသင်းတို့ဟာ လာမယ့်ကြားရက်မှာ ချန်ပီယံလိဂ်ပွဲစဉ်တွေ ယှဉ်ပြိုင်ဖို့ ရှိနေပါတယ်။
Source: Goal
Page 256 of 428
Connect with us
