CNI Sport News

၂၀၂၃ ခုနှစ်၊ ဇန်နဝါရီ ၂၁

ဝါရင့်နောက်ခံလူ ဒန်နီအဲလ်ဗတ်စ်ဟာ လိင်ပိုင်းဆိုင်ရာ စော်ကားမှု သံသယနဲ့ သောကြာနေ့က ဖမ်းဆီးခံလိုက် ရပြီး နောက်မှာတော့ မက္ကဆီကိုကလပ် ပူးမတ်စ်အသင်းက သူနဲ့ ချုပ်ဆိုထားတဲ့ စာချုပ်ကို ဖျက်သိမ်းလိုက်တာ ဖြစ်ပါတယ်။

အသက် ၃၉ နှစ်အရွယ်ရှိ ဒန်နီအဲလ်ဗတ်စ်ဟာ ဒီဇင်ဘာလ ၃၀ ရက်က ဘာစီလိုနာမှာရှိတဲ့ နိုက်ကလပ်တစ်ခုမှာ အမျိုးသမီးတစ်ဦးရဲ့ မဖွယ်မရာကို ထိခဲ့တယ်လို့ စွပ်စွဲခံခဲ့ရပြီး ဖမ်းဆီးခံခဲ့ရတာပါ။

ဘာစီလိုနာ ကစားသမားဟောင်းက ဒါကို ငြင်းဆန်ထားပေမယ့် တရားသူကြီးရဲ့ ရှေ့မှောက်မှာ ဖမ်းဆီးခံခဲ့ရတာ ဖြစ်ပြီး အာမခံမပေးဘဲ ချုပ်နှောင်ထားဖို့ အမိန့်ပေးခဲ့တာ ဖြစ်ပါတယ်။

ဒီလိုဖြစ်ပြီးနောက် မက္ကဆီကိုကလပ် ပူးမတ်စ်အသင်းဟာ ၂၀၂၃ ခုနှစ်၊ ဇူလိုင်လအထိ စာချူပ်သက်တမ်းရှိနေတဲ့ ဒန်နီအဲလ်ဗတ်စ်နဲ့ ချုပ်ဆိုထားတဲ့ စာချုပ်ကို ချက်ချင်း ဖျက်သိမ်းခဲ့တာပါ။

 ဒန်နီအဲလ်ဗတ်စ်ကို ရဲတပ်ဖွဲ့က ဖမ်းဆီးသွားစဉ်

ပူးမတ်စ်အသင်းဥက္ကဋ္ဌ လီယိုပိုလ်ဒို ဆေးလ်ဗားက “ကလပ်အနေနဲ့ အသင်းအဖွဲ့မှာရှိတဲ့ ဘယ်သူပဲဖြစ်ပါစေ အသင်းရဲ့ စိတ်ဓါတ်နဲ့ သူ့ရဲ့တန်ဖိုးတွေကို ဆန့်ကျင်တဲ့ အရာတွေကို သည်းခံသွားမှာ မဟုတ်ပါဘူး။ လူတစ်ဦးရဲ့ အပြုအမူကြောင့် ကျနော်တို့ရဲ့ အလုပ်အတွေးအခေါ်ပိုင်း ထိခိုက်ပျက်ဆီးမှာကို ခွင့်မပြုနိုင်ပါဘူး”လို့ ပြောခဲ့ပါ တယ်။

ဒန်နီအဲလ်ဗတ်စ်ဟာ ဘာစီလိုနာကနေ ထွက်ခွာပြီးနောက် ပြီးခဲ့တဲ့နှစ် ဇူလိုင်လကမှ မက္ကဆီကိုကလပ် အသင်းထံ ပြောင်းရွှေ့လာခဲ့တာဖြစ်ပြီး ၁၃ ပွဲ ပါဝင်ကစားခဲ့တာပါ။ သူဟာ ပြီးခဲ့တဲ့ ဇန်နဝါရီ ၈ ရက်က ကလောဆိုရာနဲ့ ပွဲမှာ ပါဝင်ကစားခဲ့ပေမယ့် ဆန်းတို့စ်လာဂူနာကို ၃ ဂိုး- ဂိုးမရှိနဲ့ အရေးနိမ့်ခဲ့တဲ့ ပွဲမှာတော့ ပါဝင်နိုင်ခဲ့ခြင်း မရှိပါဘူး။

အဲလ်ဗတ်စ်ဟာ ဘာစီလိုနာအသင်းမှာ ပွဲပေါင်း ၄၀၈ ပွဲကစားခဲ့ပြီး အောင်မြင်မှု အများအပြား ရယူနိုင်ခဲ့သလို ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲဝင် ဘရာဇီးလ်အသင်း လူစာရင်းမှာလည်း ပါဝင်ခဲ့တာပါ။

ဒေသခံ ရဲတပ်ဖွဲ့ကလည်း အသေးစိတ် အချက်အလက်တွေကို ရိုက်တာနဲ့ အေအက်ဖ်ပီ သတင်းဌာနတွေကို အတည်ပြုခဲ့တာ ဖြစ်ပါတယ်။

Source: Goal/BBC

CNI Sport News

၂၀၂၃ ခုနှစ်၊ ဇန်နဝါရီ ၂၁

ဂျူဗင်တပ်စ်အသင်းရဲ့ အပြောင်းအရွှေ့ကိစ္စရပ်တွေကို စုံစမ်းစစ်ဆေးမှုတွေပြုလုပ်ပြီးနောက် ၁၅ မှတ်လျှော့ ပြစ်ဒဏ်ချမှတ်လိုက်တယ်လို့ အီတလီဘောလုံးအဖွဲ့ချုပ်(FIGC) က ပြောလိုက်ပါတယ်။

စီးရီးအေကလပ်ဟာ အပြောင်းအရွှေ့တွေမှာ မှန်ကန်မှုမရှိတဲ့ အမြတ်တွေနဲ့ သူတို့ရဲ့ လက်ကျန်ရှင်းတမ်းတွေကို ပြုပြင်ခဲ့တယ်လို့ စွပ်စွဲခံခဲ့ရပြီး အခု အမှတ်လျှော့ခံရတာကြောင့် အဆင့် ၃ ကနေ အဆင့် ၁၀ အထိ ကျဆင်းသွား ခဲ့တာပါ။ကလပ်အသင်းဥက္ကဋ္ဌဟောင်း အက်ဂ်နယ်လီ၊ ဒုဥက္ကဋ္ဌဟောင်း နတ်ဗတ်တို့ အပါအဝင် ကလပ်ရဲ့ ဒါရိုက်တာဘုတ်အဖွဲ့တွေဟာ နိုဝင်ဘာလက ရာထူးကနေ နုတ်ထွက်ခဲ့တာဖြစ်ပါတယ်။

ဂျူဗင်တပ်စ်ဘက်ကတော့ ဘာအမှားယွင်းကိုမှ ပြုလုပ်ခဲ့ခြင်းမရှိဘူးလို့ ငြင်းဆိုခဲ့သလို အခု ချမှတ်ခဲ့တဲ့ ပြစ်ဒဏ် ကို အယူခံဝင်သွားမယ်လို့ ပြောခဲ့တာပါ။

ကလပ်အသင်းရဲ့ ထုတ်ပြန်ချက်မှာတော့ “အခုလို ဆုံးဖြတ်ခဲ့တဲ့ အကြောင်းပြချက် ထုတ်ပြန်တာကို စောင့်မျှော် နေတယ်”လို့ ဖော်ပြခဲ့ပေမယ့် အီတလီအိုလံပစ်ကော်မတီရဲ့ အားကစားအာမခံဘုတ်အဖွဲ့ထံ အယူခံဝင်ခဲ့တယ်လို့ သိရပါတယ်။တရားလိုရှေ့နေတွေက ဂျူဗင်တပ်စ်အသင်းကို ၉ မှတ်လျှော့ပြစ်ဒဏ်ချမှတ်ဖို့ တောင်းဆိုခဲ့တာထက် အီတလီဘောလုံးအဖွဲ့ချုပ်ရဲ့ ပိတ်ပင်မှုက ပိုမိုပြင်းထန်ခဲ့တာပါ။

လက်ရှိစပါးအသင်းမှာ ဘောလုံးအကြီးအကဲရာထူးတာဝန်ယူထားတဲ့ ဂျူဗင်တပ်စ်ရဲ့ အားကစားဒါရိုက်တာဟောင်း ပါရာတီချီကို ဘောလုံးနဲ့ပတ်သက်ခွင့် လ ၃၀ ကြာပိတ်ပင်ခဲ့ပြီး၊ အက်ဂ်နယ်လီနဲ့ အမှုဆောင်အရာရှိချုပ်ဟောင်း အာရီဗာဘီနီကို ၂ နှစ် ပိတ်ပင်ခဲ့ပါတယ်။ဒါ့အပြင် လက်ရှိအားကစား ဒါရိုက်တာရာထူး ရယူထားတဲ့ ချီရူဘီနီ ကိုလည်း ၁၆ လ ပိတ်ပင်ခဲ့တာပါ။နတ်ဗတ်ကတော့ ၈ လ ပိတ်ပင်ခဲ့ပြီး လက်ရှိ အမှုဆောင်အရာရှိ ၁၁ ဦးကိုလည်း ပိတ်ပင်မှုတွေ ရှိခဲ့ပါတယ်။

ဂျူဗင်တပ်စ်အသင်းဟာ အက်ဂ်နယ်လီရဲ့ သက်တမ်း ၁၃ နှစ်အတွင်းမှာ စီးရီးအေဖလား ၉ ကြိမ်ဆက် ရယူနိုင်ခဲ့ ပေမယ့် ပြီးခဲ့တဲ့ရာသီက အဆင့် ၄ နေရာမှာသာ ရပ်တည်နိုင်ခဲ့ကာ ယူရို ၂၅၄ သန်း အရှုံးပေါ်ခဲ့ပါတယ်။ ဂျူဗင်တပ်စ်အသင်းဟာ လက်ရှိအချိန်မှာ ကလပ်လိုင်စင်နဲ့ ဘဏ္ဍာရေး မျှခြေစည်းမျဉ်းကို ချိုးဖောက်မှု ဖြစ်နိုင်ဖွယ်ရှိတဲ့ အခြေအနေအတွက် ယူအီးအက်ဖ်အေရဲ့ စုံစမ်းစစ်ဆေးမှုတွေနဲ့လည်း ရင်ဆိုင်နေရတာပါ။

ဂျူဗင်တပ်စ်အသင်းဟာ ၂၀၀၆-၀၇ ရာသီတုန်းကလည်း လုပ်ပွဲအရှုပ်တော်ပုံကြောင့် ကနဦး ရမှတ် ၃၀ လျော့နဲ့ စီးရီးဘီကို တန်းဆင်းခဲ့ရတာဖြစ်ပြီး တစ်နှစ်အကြာမှာပဲ ချန်ပီယံအဖြစ်နဲ့ တန်းပြန်တက်နိုင်ခဲ့တာဖြစ်ပါတယ်။ ဂျူဗင်တပ်စ်အသင်းဟာ တနင်္ဂနွေနေ့မှာတော့ စီးရီးအေပွဲစဉ်အဖြစ် အတ္တလန္တာအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဇန်နဝါရီ ၂၀

ကမ္ဘာ့ဝင်ငွေ အကောင်းဆုံး ကလပ်အသင်း ၂၀ စာရင်းကို ထုတ်ပြန်ခဲ့ရာ ပရီးမီးယားလိဂ်မှ အသင်း ၁၁ သင်းအထိ စံချိန်တင် ပါဝင်နေပါတယ်။

Deloitte က ၂၀၂၁-၂၂ ရာသီက ကိန်းဂဏန်းတွေကို အခြေခံပြီးတော့ စာရင်းကို ပြုစုခဲ့တာဖြစ်ပြီး စစ်တမ်း ကောက်ယူမှုရဲ့ ၂၆ နှစ်အတွင်း ပထမဆုံးအကြိမ်အဖြစ် လိဂ်တစ်ခုတည်းက အသင်း ၁၁ အသင်းက ဒီစာရင်းထဲမှာ ပါဝင်လာတာ ဖြစ်ပါတယ်။

ဝင်ငွေ အကောင်းဆုံး ကလပ်အဖြစ် မန်စီတီးအသင်းက နှစ်နှစ်ဆက်တိုက် ရပ်တည်နေပြီး လက်ရှိ ပရီးမီးယား လိဂ် ချန်ပီယံဖြစ်ရာ ပြီးခဲ့တဲ့ရာသီမှာ ဝင်ငွေယူရို ၇၃၁ သန်း ရှိခဲ့ပါတယ်။

ဒုတိယနေရာမှာ လာလီဂါကလပ် ရီးရဲလ်မက်ဒရစ် ရှိနေပြီး စပိန်အင်အားကြီး အသင်းဟာ ပြီးခဲ့တဲ့နှစ်မှာ ယူရို ၇၁၃ ဒသမ ၈ သန်း ရရှိခဲ့ပါတယ်။ တတိယနေရာမှာ လီဗာပူးလ်အသင်းက ရှိနေပါတယ်။

ကြိုးကြာနီတို့ဟာ ပြီးခဲ့တဲ့နှစ်တုန်းက ဒီစာရင်းရဲ့ အဆင့် ၇ နေရာသာ ရှိခဲ့ပေမယ့် ဝင်ငွေ ၇၀၁ ဒသမ ၁ သန်း ရရှိခဲ့ တာကြောင့် တတိယနေရာအထိ ရောက်ရှိလာခဲ့တာပါ။

လီဗာလ်ပူးအသင်းက ဆာလတ်စ်ကိုတွေ့ရစဉ်

ဒါကြောင့် လီဗာပူးလ်ဟာ သူတို့ရဲ့ အစဉ်အလာ ပြိုင်ဘက် မန်ယူအသင်းကိုလည်း ပထမဆုံးအကြိမ် ကျော်တက် နိုင်ခဲ့ပါတယ်။ မန်ယူအသင်းဟာ ဒီအဆင့်ရဲ့ အဆင့် ၄ နေရာမှာ ရှိနေပြီး အဆင့် ၅ နေရာမှာတော့ ပြင်သစ် ချန်ပီ ယံ ပီအက်စ်ဂျီအသင်းက ရပ်တည်နေပါတယ်။

ကွင်းဝင်ကြေး မြင့်တက်လာမှုကြောင့် လက်ရှိ ပရီးမီးယားလိဂ် အမှတ်ပေးဇယားကို ဦးဆောင်နေတဲ့ အာဆင်နယ် အသင်းဟာ ဒီစာရင်းရဲ့ အဆင့် ၁၀ နေရာမှာရှိနေပြီး သူ့အထက်မှာ မြို့ခံပြိုင်ဘက်တွေဖြစ်တဲ့ ချယ်လ်ဆီးနဲ့ စပါး အသင်းတို့က အဆင့် ၈ နဲ့ ၉ အဖြစ် အသီးသီး ရပ်တည်နေပါတယ်။

နယူးကာဆယ်အသင်းကိုတွေ့ရစဉ်

နောက်ထပ် စပိန်အင်အားကြီး ကလပ် တစ်ခုဖြစ်တဲ့ ဘာစီလိုနာ အသင်းရဲ့ ရပ်တည်ချက်ကတော့ ပြုတ်ကျသွား ခဲ့ပြီး မနှစ်က အဆင့် ၄ နေရာမှာ ရှိခဲ့ပေမယ့် ဒီနှစ် ထုတ်ပြန်ချက်မှာတော့ အဆင့် ၇ ကို ရောက်ရှိနေခဲ့ပါပြီ။

ဘိုင်ယန်မြူးနစ်အသင်းဟာ ဘာစီလိုနာရဲ့ အထက်အဆင့် ၆ နေရာမှာ ရှိနေပါတယ်။

အဆင့် ၁၀ ကနေ ၂၀ အတွင်းမှာ ဂျူဗင်တပ်စ်၊ အက်သလက်တီကို၊ ဒေါ့မွန်၊ အင်တာမီလန်၊ ဝက်စ်ဟမ်း၊ အေစီမီ လန်၊ လက်စတာ၊ လိဒ်ယူနိုက်တက်၊ အဲဗာတန်နဲ့ နယူးကာဆယ် အသင်းတွေက အသီးသီး ရပ်တည်နေပြီး ပြီးခဲ့တဲ့ ရာသီမှာ ဒီအသင်း ၂၀ ဟာ စုစုပေါင်း ယူရို ၉ ဒသမ ၂ ဘီလီယံဝင်ငွေ ရရှိခဲ့ပါတယ်။

၂၀၂၂-၂၁ ရာသီနဲ့ယှဉ်လျှင် ၁၃ ရာခိုင်နှုန်း မြင့်တက်လာခြင်းလည်း ဖြစ်ပါတယ်။ ဒီလိုမျိုး ဝင်ငွေ မြင့်တက်လာခြင်း ဟာ ကိုဗစ်နဲ့ပတ်သက်တဲ့ ထိန်းချုပ်ကန့်သတ်မှု များအပြီး ပရိတ်သတ်တွေ ကွင်းထဲ ပြန်လည် ဝင်ရောက်ခွင့် ရရှိ လာခြင်းကြောင့်ဖြစ်ပြီး ကွင်းဝင်ကြေးဟာလည်း ၂၀၂၀-၂၁ ရာသီရဲ့ ယူရို ၁၁ သန်းနဲ့ယှဉ်ရင် ၂၀၂၁-၂၂ မှာ ယူရို ၁ ဒသမ ၄ ဘီလီယံအထိ မြင့်တက်လာခဲ့တာ ဖြစ်ပါတယ်။

Source: BBC/ Goal

CNI Sport News

၂၀၂၃ ခုနှစ်၊ ဇန်နဝါရီ ၂၀

စီးရီးအေကလပ် ဆလာနီတာနာ အသင်းဟာ ပြီးခဲ့တဲ့ နှစ်ရက်ကမှ ပူပူနွေးနွေး ထုတ်ပယ်ခဲ့တဲ့ နည်းပြဖြစ်သူကို အသင်းမှာ ပြန်လည် ခန့်အပ်ခဲ့ပါတယ်။

ပြီးခဲ့တဲ့ တနင်္ဂနွေနေ့က အတ္တလန္တာအသင်းကို ၈ - ၂ ဂိုးနှင့် အရှက်တကွဲ ရှုံးနိမ်ခဲ့ပြီးမှာ အသင်းဘက်က နည်းပြ ဒေးဗစ်နီကိုလာကို ထုတ်ပယ် လိုက်ပြီလို့ ကြေညာခဲ့ပါတယ်။

ဒီရှုံးပွဲဟာ အသင်းရဲ့ နောက်ဆုံးလိဂ် ၅ ပွဲအတွင်း ၄ ကြိမ်မြောက် ရှုံးနိမ့်မှုဖြစ်ပြီးတော့ အသင်းဟာလည်း အမှတ်ပေး ဇယားရဲ့ အောက်ခြေအဆင့် ၁၆ နေရာကို ရောက်ရှိသွားခဲ့ပါတယ်။

အီတလီမှလာတဲ့ သတင်းတွေအရ ဆာလာနီတာနာအသင်းဟာ ဝါရင့်နည်းပြ ဘင်နီတက်ဇ် အပါအဝင် နည်းပြ တော်တော်များများနဲ့ ချိတ်ဆက်ခဲ့ပေမယ့် သဘောတူညီမှု မရရှိခဲ့ဘူးလို့ သိရပါတယ်။

ဒါ့ကြောင့် နည်းပြဟောင်းဘက်ကို ပြန်လှည့်ခဲ့တာ ဖြစ်ပြီးတော့ နီကိုလာကို ထုတ်ပယ်ပြီး ၄၈ နာရီအတွင်းမှာပဲ သူ့ကို နည်းပြသစ်အဖြစ် ပြန်ခန့်ဖို့ ဆုံးဖြတ်ခဲ့တာ ဖြစ်ပါတယ်။

 နည်းပြ နီကိုလာကိုတွေ့ရစဉ်

အသင်းဥက္ကဋ္ဌကိုယ်တိုင် သူ့ကို ဖုန်းခေါ်ခဲ့ပြီး ရာထူးပြန်ပေးခဲ့တဲ့ အကြောင်းနဲ့ပတ်သက်ပြီး နီကိုလာက အခုလိုပြော ပါတယ်။

“အမှန်အတိုင်းပြောရရင် ကျနော့်ကို ဥက္ကဋ္ဌက မနေ့က ဖုန်းဆက်ခဲ့ပါတယ်။ သူ့ ဘာကြောင့် ကျနော့်ကို ရာထူး ကနေ ထုတ်ဖို့ ဆုံးဖြတ်ခဲ့ရသလဲဆိုတာကို ရှင်းပြခဲ့တယ်။ ကျနော့်ဘက်ကလည်း ရှုံးပွဲအတွက် တောင်းပန်ခဲ့ပြီး တော့ ဒီကိစ္စအတွက် ကျနော့်မှာ အပြည့်အဝ တာဝန်ရှိတဲ့ အကြောင်းကို ပြန်ပြောပြခဲ့ပါတယ်။ ဒီအသင်းနဲ့ ဒီလူတွေအပေါ် ကျနော် ယုံကြည်ပါတယ်။ ဒါ့ကြောင့် ဥက္ကဋ္ဌကို သူ့ဆုံးဖြတ်ချက်နဲ့ ပတ်သက်ပြီး ပြန်စဉ်းစားဖို့ ကျနော့်ဘက်က တောင်းဆိုခဲ့ပါတယ်။ အသင်းဒါရိုက်တာနဲ့ ကျနော့်ကို ပြန်ခန့်ခဲ့တဲ့ အသင်း ဥက္ကဋ္ဌကို ကျေးဇူးတင် ပါတယ်။ အဲ့ဒီအတွက် ကျနော် ပြန်လည် ပေးဆပ်သွားပါမယ်”လို့ နီကိုလာက သူ့ရဲ့ တွစ်တာမှာ ရေးသားခဲ့ပါ တယ်။

အသင်းဟောင်းအပေါ် နည်းပြသစ်အဖြစ် ပြန်လည် တာဝန်ယူခွင့်ရခဲ့တဲ့ နီကိုလာဟာ သူ့ရဲ့ဒုတိယအကြိမ်မြောက် နည်းပြဘဝအစကို လာမည့် စနေနေ့ နာပိုလီနဲ့ ရင်ဆိုင်ရမှာ ဖြစ်ပါတယ်။

အခုရာသီ ပုံစံကောင်း ပြနေကာ အမှတ်ပေးဇယား ထိပ်ဆုံးမှာ ရှိနေတဲ့ နာပိုလီအသင်းကို နီကိုလာနဲ့ ဆလာနီတာ နာအသင်းသားတွေ ဘယ်လို တုန့်ပြန်သွားမလဲဆိုတာ စိတ်ဝင်စားဖို့ ကောင်းနေပါတယ်။

Source: The Sun

CNI Sport News

၂၀၂၃ ခုနှစ်၊ ဇန်နဝါရီ ၂၀

ယူနိုက်တက် ကစားသမားဟောင်းဖြစ်သူ လင်ဂတ်က အသင်းမှာရှိချိန် သူ့ရဲ့ ကစားသမားဘဝကို ဖြတ်သန်းဖို့ ရုန်းကန်ရချိန်မှာ နာကျင်ခဲ့ရလို့ ဒီနာကျင်မှုတွေကို မေ့ပျောက်အောင် ကြိုးစားဖို့အတွက် အရက်သောက်ခဲ့တယ်လို့ ပြောလိုက်ပါတယ်။

လင်ဂတ်က “နာကျင်မှုကို မေ့ပျောက်အောင် ကြိုးစားနိုင်ဖို့အတွက် တစ်ခုခု လိုအပ်နေခဲ့ပါတယ်။ တစ်နည်းနည်းနဲ့ စိတ်သက်သာရာ ရစေဖို့အတွက် ညအိပ်ယာမဝင်ခင်မှာ အရက်သောက်ပါတယ်။ အခု ပြန်တွေးကြည့်တော့ ငါဘာတွေ လုပ်ခဲ့တာလဲဆိုပြီးတော့ ဖြစ်ခဲ့ပါတယ်။ ဖြစ်ပျက်ခဲ့တဲ့ အရာတွေကို မေ့ဖို့ ကြိုးစားခဲ့တာပါ။ ဒါပေမယ့် အဲ့ဒါက ၁၀ ဆ ပိုပြီးတော့ ဆိုးစေပါတယ်”လို့ The Diary Of A CEO podcast ကို ပြောခဲ့တာပါ။

အသက် ၃၀ အရွယ်ရှိ လင်ဂတ်ဟာ ယူနိုက်တက်အသင်းကို အသက် ၇ နှစ်အရွယ် ကတည်းက ရောက်ရှိလာခဲ့တာ ဖြစ်ပြီး ပွဲပေါင်း ၂၃၀ ကျော် ပါဝင်ကစားခဲ့ပေမယ့် ပြီးခဲ့တဲ့ရာသီက အသင်းမှာ ပါဝင်ကစားခွင့်ရဖို့ ရုန်းကန်ခဲ့ ရပါ တယ်။

အဲ့ဒါကြောင့် လင်ဂတ်ဟာ စာချုပ်ကုန်ဆုံးချိန်မှာ နော်တင်ဟမ်ဖောရက်စ်အသင်းထံ အလွတ်နဲ့ ပြောင်းရွှေ့ခဲ့တာ ဖြစ်ပါတယ်။ ဒါ့အပြင် လင်ဂတ်က သူ့ရဲ့ မိခင်ဖြစ်သူ စိတ်ကျရောဂါကြောင့် ဆေးရုံတက် ကုသရချိန်မှာ ရုန်းကန်ခဲ့ ရတဲ့ အတွေ့အကြုံတွေကိုလည်း ပြောသွားခဲ့ပါတယ်။

နော်တင်ဟမ်ဖောရက်စ်အသင်းရောက်သွားတဲ့ လင်ဂတ်ကိုတွေ့ရစဉ် 

လင်ဂတ်က “သူမ(မိခင်)က စိတ်ကျဝေဒနာကို ခံစားရတာက တကယ်ကို ဆိုးရွားခဲ့ပါတယ်။ တကယ်ကို မထိန်း ချုပ်နိုင်တော့ဘဲ အဝေးကို ထွက်သွားပြီး အကူအညီ ရယူနိုင်ဖို့ လိုအပ်ခဲ့ပါတယ်။ အဲ့ဒီတုန်းက ၁၁ နှစ်အရွယ် ညီမနဲ့ ၁၅ နှစ်အရွယ် ညီလေးကို ထားခဲ့ပြီး ကျနော်လည်း ကိုယ်လုပ်ရမယ့် အရာတွေနဲ့ ဖြတ်သန်းနေခဲ့ရပါတယ်။ အဲ့ဒီ တုန်းက ကျနော်ဟာ သူတို့လိုချင်တဲ့ အစ်ကိုကြီး မဖြစ်ခဲ့ပါဘူး။ ကျနော်ဟာ ဘောလုံးလည်း မကစားချင်ခဲ့သလို၊ ကွင်းထဲမှာလည်း ရှိမနေချင်တော့ပါဘူး။ ဘောလုံးလောကကနေလည်း မထွက်ခွာချင်ခဲ့ပါဘူး။ အနားယူဖို့ လိုအပ် ခဲ့တာပါ”လို့ ပြောခဲ့တာ ဖြစ်ပါတယ်။

လင်ဂတ်ဟာ နည်းပြဟောင်း ဆိုးလ်ရှား လက်ထက်မှာ နေရာရခဲ့ပေမယ့် ယာယီနည်းပြ ရက်ဂ်နစ် လက်ထက်မှာ နေရာ ပျောက်ဆုံးခဲ့ပြီး ပါဝင်ကစားချိန်မှာလည်း ခြေစွမ်းပိုင်း ကျဆင်းခဲ့လို့ ပရိသတ်တွေရဲ့ ဝေဖန်မှုတွေနဲ့လည်း ရင်ဆိုင်ခဲ့ရတာပါ။

လင်ဂတ်ဟာ ဒီရာသီမှာတော့ နော်တင်ဟမ်ဖောရက်စ်အတွက် ၁၆ ပွဲ ကစားထားပြီး ၂ ဂိုး သွင်းယူထားတာ ဖြစ်ပါတယ်။

Source: BBC

CNI Sport News

မန်ချက်စတာ၊ ဇန်နဝါရီ - ၂၀

ပရီးမီးယားလိဂ် ထိပ်သီး မန်ချက်စတာ ယူနိုက်တက်အသင်းကို ရောင်းချတော့မယ်လို့ အသင်းပိုင်ရှင်တွေ ဖြစ်တဲ့ ဂလေဇာမိသားစုက ထုတ်ဖော် ပြောဆိုခဲ့ပြီးနောက်မှာ အသင်းပိုင်ရှင်သစ်နဲ့ ပတ်သက်ပြီးတော့ မီဒီယာတွေမှာ ထင်ကြေးပေး ပြောဆိုမှုတွေ များစွာ ပေါ်ထွက်လာခဲ့ပါတယ်။

ဗြိတိန်ဘီလီယံနာ တစ်ဦးဖြစ်သူ ဂျင်မ်ရတ်ကလစ်ရဲ့ ကုမ္ပဏီဖြစ်တဲ့ INEOS ကလည်း ဒီကစားပွဲတွေကို ဝင်ရောက် လာခဲ့ပြီး မန်ယူအသင်းကို ဝယ်ဖို့အတွက် စိတ်ဝင်စားတယ်လို့ အင်္ဂါနေ့မှာ ပြောခဲ့ပါတယ်။ ဒါ့ကြောင့် မန်ယူအသင်း ရဲ့ အနာဂတ်ပိုင်ရှင် ဖြစ်လာသူတွေထဲက တချို့ကို ဖော်ပြလိုက်ပါတယ်။

မန်ယူအသင်းကို ၀ယ်ချင်နေတဲ့ ဂျင်မ်ရတ်ကလစ်ကို တွေ့ရစဉ်

ဂျင်မ်ရတ်ကလစ်
***************
ပရီးမီးယားလိဂ် ပြိုင်ပွဲရဲ့ ကာလရှည် ပရိတ်သတ်တစ်ဦးဖြစ်တဲ့ ဂျင်မ်ရတ်ကလစ်ဟာ ပြီးခဲ့တဲ့ သြဂုတ်လမှာ မန်ယူ အသင်းကို ဝယ်ဖို့ စိတ်ဝင်စားတယ်လို့ ထုတ်ပြောခဲ့ဖူးပါတယ်။

ဒါပေမယ့် ပိုင်ရှင်ဖြစ်တဲ့ ဂလေဇာမိသားစုက အဲ့ဒီအချိန်တုန်းက အသင်းကို ရောင်းဖို့ ငြင်းဆိုခဲ့ပါတယ်။ အင်္ဂါနေ့မှာ တော့ ရတ်ကလစ်ရဲ့ ကုမ္ပဏီက မန်ယူအသင်းကို ပိုင်ဆိုင်ခွင့် ပြိုင်ပွဲထဲ ပြန်လည် ဝင်ရောက်လာခဲ့ပါတယ်။

ဒါဟာ မန်ယူပရိတ်သတ် အများစု ကြားချင်နေတဲ့ သတင်းဖြစ်ပေမယ့် သူဟာ အသင်းရဲ့ အမှန်တကယ် တန်ကြေး ထက် လျှော့ပြီး ဈေးခေါ်မှာကိုတော့ စိုးရိမ်နေမှုလည်း ရှိနေပါတယ်။ ရတ်ကလစ်ဟာ ပြီးခဲ့တဲ့နှစ်မှာ မန်ယူအသင်း ရဲ့ ပြိုင်ဘက် ချဲလ်ဆီးအသင်းကို ဝယ်ဖို့ကြိုးစားခဲ့ပေမယ့် အမေရိကန် ရင်းနှီးမြုပ်နှံမှုအုပ်စုကို အရှုံးပေးခဲ့ရပါတယ်။

အရှေ့အလယ်ပိုင်းမှ ရင်းနှီးမြုပ်နှံသူများ
************************************
အရှေ့အလယ်ပိုင်းက ရေနံသူဌေးတွေဟာ ဘောလုံးအားကစားနဲ့ အစိမ်းသက်သက်တော့ မဟုတ်ပါဘူး။ မန်ယူရဲ့ မြို့ခံပြိုင်ဘက် မန်စီးတီးကို အဘူဒါဘီ ယူနိုက်တက်အုပ်စုက ပိုင်ဆိုင်ထားသလို ဆော်ဒီရင်းနှီးမြုပ်နှံမှု ရံပုံငွေ အဖွဲ့က နယူးကာဆယ်အသင်းကို ၂၀၂၁ မှာ သန်း ၃၀၀ နဲ့ဝယ်ခဲ့ပါတယ်။

ကာတာအားကစား ရင်းနှီးမြုပ်နှံမှုအဖွဲ့က ပီအက်စ်ဂျီအသင်းကို ပိုင်ဆိုင်ထားတာကြောင့် မန်ယူအသင်းရဲ့ နောက်ထပ် ပိုင်ရှင်အသစ်ကလည်း အရှေ့အလယ်ပိုင်းက သူဌေးတွေ ဖြစ်လာနိုင်တယ်လို့ အသံတွေ ထွက်နေပါတယ်။

ကာတာအားကစား ရင်းနှီးမြုပ်နှံမှုအဖွဲ့ QSI က မန်ယူ၊ စပါးနဲ့ လီဗာပူးလ် တစ်သင်းသင်းကို ဝယ်ဖို့ ပစ်မှတ် ထားနေတယ်လို့ Bloomberg သတင်းမှာ ရေးသားခဲ့ပေမယ့် စပါးဘက်ကတော့ အသင်းကို မရောင်းဘူးလို့ ငြင်းထားပါတယ်။

ဆော်ဒီက မန်ယူအသင်းကို ဝယ်ဖို့ စိတ်ဝင်စားနေတယ်လို့ အားကစားဝန်ကြီးက အတည်ပြုထားကြောင်း Sky Sports သတင်းမှာ ဖော်ပြထားပြီး အမေရိကန်နှင့် အာရှဘက်က ရင်းနှီးမြုပ်နှံသူတွေကလည်း မန်ယူကို ဝယ်ဖို့ စိတ်ဝင်စားမှု ရှိနေတယ်လို့ The Times သတင်းမှာ ဖော်ပြထားပါတယ်။

မန်ယူအသင်း ပိုင်ရှင်ကို ထွက်သွားဖို့ ပရိသတ်တွေ တောင်းဆိုနေစဉ်

RED KNIGHTS
***************
အင်္ဂလိပ်ဘောလုံးအဖွဲ့ချုပ် ဥက္ကဋ္ဌဟောင်း ကိတ်ဟားရစ်၊ စီးပွားရေးပညာရှင် ဂျင်မ်အိုနေးလ်နဲ့ ဗြိတိန်လူမျိုး ရင်းနှီး မြုပ်နှံသူ ပေါ်လ်မာရှယ်တို့ ပါဝင်တဲ့ Red Knights အဖွဲ့ဟာ ၂၀၁၀ မှာ မန်ယူအသင်းကို ဝယ်ဖို့ ကြိုးစားခဲ့ပေမယ့် အမှန်တကယ်ထက် ဈေးပိုများနေခြင်းကြောင့်လို့ဆိုကာ ထိုအစီအစဉ်ကို ရပ်နားခဲ့ပါတယ်။

ဒါ့ကြောင့် အိုနေးလ်တို့ အဖွဲ့အနေနဲ့ မန်ယူအသင်းကို ပြန်ဝယ်ဖို့ စဉ်းစားနေတယ်လို့ Manchester Evening News မှာ ဖော်ပြထားပြီး ဂလေဇာ မိသားစုအနေနဲ့ လက်ရှိ ခေါ်ထားတဲ့ မဖြစ်နိုင်တဲ့ ဈေးနှုန်းထက် လျှော့ပေးမှသာလျှင် အရောင်းအဝယ်ဖြစ်ဖို့ အလားအလာရှိတယ်လို့ ဆိုပါတယ်။

BBC က မေးမြန်းခဲ့ရာမှာလဲ မန်ယူအသင်းကို ဝယ်ဖို့အတွက် ပေါင် ၄ ဘီလီယံကျော်သုံးဖို့ တကယ် လိုအပ် သလား မသေချာသေးကြောင်းနဲ့ စောင့်ကြည့်ဖို့ အိုနေးလ်က ပြန်လည် ဖြေကြားခဲ့ပါတယ်။

ဂလေဇာ မိသားစုဟာ မန်ယူအသင်းကို ၂၀၀၄ ခုနှစ်မှာ ပေါင် သန်း ၇၉၀ နဲ့အပြီးသတ် လွဲပြောင်းရယူ ခဲ့တာဖြစ်ပြီး အသင်းကိုပေါင် ၄ ဘီလီယံ ရရင် ရောင်းချသွားမယ်လို့ ကြေညာထားပါတယ်။

Source: CNA

CNI Sport News

၂၀၂၃ ခုနှစ်၊ ဇန်နဝါရီ ၂၀

အူစိန်ဘို့စ်ဟာ သူ့ရဲ့အကောင့်ကနေ ပေါင် ၁၀ သန်းကျော် ပျောက်ဆုံးသွားပြီးနောက် ဂျမေကာရှိ ပုဂ္ဂလိက ရင်းနှီးမြုပ်နှံမှုကုမ္ပဏီကို တရားစွဲမယ်လို့ ခြိမ်းခြောက် ပြောကြားလိုက်ပါတယ်။

အိုလံပစ်ရွှေတံဆိပ်ဆု ၈ ကြိမ် ရရှိခဲ့တဲ့ အူစိန်ဘို့စ်ရဲ့ ရှေ့နေဖြစ်သူတွေက အခုလ အစောပိုင်းမှာ လိမ်လည်မှု တစ်ခုအဖြစ် ဖော်ထုတ်ခဲ့ပြီး အားကစားသမားဟောင်းရဲ့ လက်ကျန် ငွေစာရင်းကို စစ်ဆေးခဲ့တာမှာ ပေါင် ၉,၇၀၀ သာ ကျန်ရှိတော့တာပါ။

အူစိန်ဘို့စ်ဟာ အားကစားသမား ဘဝကနေ အနားယူသွားပြီ ဖြစ်ပေမယ့် သူအနားမယူခင် အချိန်မှာ သူ့ရဲ့ ဝင်ငွေဟာ တစ်ရာသီကို ပေါင်သန်း ၂၀ လောက်အထိ ရရှိနိုင်တယ်လို့ ခန့်မှန်းထားတာ ဖြစ်ပါတယ်။

အခုအချိန်မှာတော့ ပျောက်ဆုံးနေတဲ့ အူစိန်ဘို့စ်ရဲ့ ငွေကြေးတွေကို ပြန်ပေးဖို့ အဲဒီကုမ္ပဏီကို ၁၀ ရက် နောက်ဆုံး သတ်မှတ်ပေးထားပါတယ်။

ပြေးခုန်ပစ် ချန်ပီယံ အူစိန်ဘို့စ်ကိုတွေ့ရစဉ်

အူစိန်ဘို့စ်ရဲ့ ရှေ့နေ လင်တန်ပီဂေါ်ဒွန်က “အဆိုပါ အကောင့်ဟာ အူစိန်ဘို့စ်ရဲ့ အနားယူမှုနဲ့ တစ်သက်တာ စုဆောင်းငွေရဲ့ တစ်စိတ်တစ်ပိုင်း ဖြစ်ပါတယ်။ ဒါက ကျနော်တို့ရဲ့ အားကစားသမားအပေါ်မှာ ကြီးလေးတဲ့ လိမ်လည် လှည့်ဖြားမှုကို ကျူးလွန်တာပဲ”လို့ ပြောခဲ့တာပါ။

Stocks & Securities Limited ကုမ္ပဏီမှာ ရင်းနှီးမြုပ်နှံထားတဲ့သူ အများအပြားဟာ သူတို့ရဲ့ ငွေကြေးတွေ ပျောက်ဆုံးနေတယ်လို့ သတင်းတွေမှာ ဖော်ပြထားပြီး ဂျမေကာဘဏ္ဍာရေးဝန်ဆောင်မှု ကော်မရှင်ကလည်း အရေးယူဖို့ စုံစမ်းစစ်ဆေးမှုတွေ လုပ်ဆောင်နေတာ ဖြစ်ပါတယ်။

အိုလံပစ် ရွှေတံဆိပ်ဆု ၈ ကြိမ် အပါအဝင် ကမ္ဘာ့ချန်ပီယံဆုကို ၁၁ ကြိမ် ရရှိခဲ့တဲ့ အူစိန်ဘို့စ်ဟာ ၂၀၁၇ မှာ ပြေးခုန်ပစ် အားကစားသမား ဘဝကနေ အနားယူဖို့ ဆုံးဖြတ်ခဲ့တာပါ။

ကမ္ဘာ့တာတို အပြေးချန်ပီယံ အဖြစ် စံချိန်တင်ထားနိုင်ခဲ့တဲ့ အူစိန်ဘို့စ်ဟာ ပြေးခုန်ပစ် အားကစားသမားဘဝက အနားယူပြီးနောက် ၂၀၁၈ က ပရော်ဖက်ရှင်နယ် ဘောလုံးလောကကို ကူးပြောင်းဖို့ စဉ်းစားခဲ့တာ ဖြစ်ပါတယ်။

အဲ့ဒီနောက်မှာ သူဟာ ဩစတြေးလျ အေလိဂ်ကလပ် စင်ထရယ်ကို့စ် မာရီနာ အသင်းအတွက် ခြေစမ်းပွဲ တစ်ပွဲ ပါဝင်ကစားခဲ့တာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဇန်နဝါရီ ၂၀

မန်စီးတီးအသင်းနည်းပြ ဂွာဒီယိုလာက စပါးအသင်းကို ၄ ဂိုး- ၂ ဂိုးနဲ့ အနိုင်ရတဲ့ ပရီမီးယားလိဂ် ပွဲအပြီးမှာ အသင်း ပရိသတ်တွေကို ဝေဖန်မှုတွေ ပြုလုပ်သွားခဲ့တာ ဖြစ်ပါတယ်။

ဂွာဒီယိုလာက “ကျနော်တို့ရဲ့ ပရိသတ်တွေက ၄၅ မိနစ်လောက် တိတ်ဆိတ်နေကြပါတယ်။ ကျနော့် ပရိသတ်တွေ ကို ကျနော် ပြန်လိုချင်ပါတယ်။ ဒီမှာရှိနေတဲ့ ကျနော့်ရဲ့ ပရိသတ်တွေကို လိုချင်ပါတယ်။ အဝေးမှာရှိနေတဲ့ ပရိသတ်တွေ မဟုတ်ပါဘူး။ သူတို့က အကောင်းဆုံးတွေပါ။ ဒါပေမယ့် နေရာတိုင်းနဲ့ လှုပ်ရှားမှုတိုင်းကို အားပေးတဲ့ ကျနော်တို့ရဲ့ ပရိသတ်တွေက ဒီမှာပါ။ ရှုံးလို့ လှောင်ပြောင်ခဲ့ကြပေမယ့် ဒုတိယပိုင်းမှာ ကျနော်တို့ ကောင်းမွန်စွာ ကစားနိုင်ခဲ့ပြီး အခွင့်အရေးတွေလည်း ပိုပြီးရခဲ့ပါတယ်”လို့ ပွဲအပြီးမှာ ပြောခဲ့တာပါ။

မန်စီးတီးအသင်းမှာ ဒီပွဲရဲ့ ပထမပိုင်းမှာ စပါးအသင်းကို ၂ ဂိုး- ဂိုးမရှိနဲ့ အရေးနိမ့်နေခဲ့တာဖြစ်ပြီး ဒုတိယပိုင်းမှာ ၄ ဂိုး ပြန်လည်သွင်းယူကာ နိုင်ပွဲရယူနိုင်ခဲ့တာ ဖြစ်ပါတယ်။

မန်စီးတီးအသင်းဟာ ဒီပွဲ အနိုင်ရခဲ့တာကြောင့် အဆင့် ၁ နေရာမှာ ရှိနေတဲ့ အာဆင်နယ်အသင်းနဲ့ ၅ မှတ်အကွာ ဒုတိယနေရာမှာ ရပ်တည်နိုင်ခဲ့တာပါ။ ဒီပွဲရဲ့ ပထမပိုင်းမှာ အသင်း အရေးနိမ့် နေခဲ့တာကြောင့် ပရိသတ်တွေဟာ လှောင်ပြောင်မှုတွေ ပြုလုပ်ခဲ့ကြတာ ဖြစ်ပါတယ်။

မန်စီးတီးအသင်းနဲ့ စပါးအသင်း ယှဉ်ပြိုင်နေစဉ်

မန်စီးတီးအသင်းဟာ ဒီပွဲမတိုင်ခင် နောက်ဆုံးကစားခဲ့တဲ့ ကာရာဘောင်းဖလားပွဲမှာ ဆောက်သမ်တန်ကို အရေးနိမ့်ခဲ့သလို ပရီးမီးယားလိဂ်မှာ ယူနိုက်တက်ကို အရေးနိမ့်ကာ ၂ ပွဲဆက် အရေးနိမ့် ထားတာကြောင့် ပရိသတ်တွေရဲ့လှောင်ပြောင်မှုနဲ့ ကြုံတွေ့ခဲ့ရတာပါ။

အဲ့ဒါကြောင့် မန်စီးတီးအသင်းနည်းပြ ဂွာဒီယိုလာက ပရိသတ်တွေကို ပြန်ပြီးတုန့်ပြန်ခဲ့သလို အသင်းရဲ့ စွမ်းဆောင်ရည်ကိုလည်း မေးခွန်းထုတ်ခဲ့တာ ဖြစ်ပါတယ်။

ဂွာဒီယိုလာက “ကျနော်တို့ ကံကောင်းခဲ့ပြီး ဒါကို မပြောင်းလဲနိုင်ရင် အမှတ်တွေ လျော့သွားနိုင်ပါတယ်။ ပိုမို ကောင်းမွန်အောင် ပြင်ဆင်ရမှာဖြစ်ပြီး ဘယ်လောက် ပျော်ရွှင်နေလဲဆိုတာကို ငြင်းလို့မရပေမယ့် အသင်းရဲ့ ပုံစံနဲ့ကတော့ ဝေးကွာနေပါတယ်။ ကျနော်တို့ဟာ စိတ်အားထက်သန်မှုနဲ့ ပထမမိနစ်ကနေ အနိုင်ယူချင်တဲ့ ဆန္ဒတွေ ပျောက်ဆုံးနေပါတယ်”လို့ ပြောခဲ့တာပါ။

မန်စီးတီးအသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် အိမ်ကွင်းမှာ ဝုလ်ဗ်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇန်နဝါရီ ၂၀

ရော်နယ်ဒိုဟာ ဆော်ဒီပွဲဦးထွက်အဖြစ် ပီအက်စ်ဂျီအသင်းနဲ့ ခြေစမ်းပွဲမှာ ဆော်ဒီအောလ်စတားအသင်းအတွက် ပါဝင်ခဲ့ပြီး ခြေစွမ်းပြသနိုင်ခဲ့တာကြောင့် ဒီပွဲရဲ့ အကောင်းဆုံးကစားသမားဆုကို ရရှိသွားခဲ့ပါတယ်။

ဒီ ခြေစမ်းပွဲမှာ ပီအက်စ်ဂျီအသင်းက ဆော်ဒီအောလ်စတားအသင်းကို ၅ ဂိုး- ၄ ဂိုးနဲ့ အနိုင်ရရှိခဲ့တာပါ။ ရော်နယ်ဒို ဟာ ဒီပွဲမှာ သူ့ရဲ့ကာလကြာရှည်ပြိုင်ဘက်ကြီးဖြစ်တဲ့ မက်ဆီ၊ အသင်းဖော်ဟောင်းတွေဖြစ်တဲ့ ရာမို့စ်၊ နာဗတ်စ်တို့ အပြင် နေမာ၊ ဘတ်ပီတို့နဲ့လည်း ထိပ်တိုက်တွေ့ဆုံခဲ့ရတာဖြစ်ပါတယ်။ ဆော်ဒီအောလ်စတားအသင်းရဲ့ အသင်း ခေါင်းဆောင်အဖြစ် ပွဲထွက်ခဲ့တဲ့ ရော်နယ်ဒိုဟာ ပွဲချိန် ၆၁ မိနစ်အထိ ပါဝင်ကစားခဲ့ပြီး ၂ ဂိုးသွင်းယူခဲ့တာပါ။

အဲဒါကြောင့်လည်း ဒီပွဲရဲ့အကောင်းဆုံးကစားသမားဆုကို ရော်နယ်ဒိုက ရရှိသွားခဲ့တာဖြစ်ပါတယ်။ မက်ဆီနဲ့ ဘတ်ပီတို့ဟာ ဒီပွဲမှာ ပီအက်စ်ဂျီအတွက် ၁ ဂိုးစီသွင်းယူနိုင်ခဲ့ပြီး နေမာကတော့ ပင်နယ်တီ ကန်သွင်းခွင့် ရခဲ့ပေ မယ့် ဂိုးမဝင်ခဲ့ပါဘူး။ပရိသတ်တွေကတော့ မက်ဆီ၊နေမာ၊ဘတ်ပီနဲ့ ရာမို့စ်တို့လို ကစားသမားတွေ ပါဝင်တာ တောင် ရော်နယ်ဒိုက အကောင်းဆုံးကစားသမားဆုကို ရယူနိုင်ခဲ့တဲ့အတွက် ချီးကျူးမှုတွေ ပြုလုပ်ခဲ့ကြတာ ဖြစ်ပါတယ်။

ရော်နယ်ဒိုက “ကွင်းထဲကိုပြန်လာရတာနဲ့ ဂိုးတွေသွင်းနိုင်ခဲ့လို့ ပျော်ရွှင်ပါတယ်။ပြီးတော့ မိတ်ဆွေဟောင်း တွေနဲ့လည်း ပြန်တွေ့ခွင့်ရတဲ့အတွက် ဝမ်းသာတယ်” လို့ တွစ်တာမှာ ရေးသားထားတာပါ။

ဆော်ဒီကလပ် အယ်လ်နာဆာအသင်းကို ပြောင်းရွှေ့ခဲ့ပြီးနောက် ယူနိုက်တက်မှာ ကစားချိန်က ရခဲ့တဲ့ ၂ ပွဲပယ် ပြစ်ဒဏ်ကြောင့် ပွဲထွက်ခွင့်မရသေးတဲ့ ရော်နယ်ဒိုအတွက်တော့ ပီအက်စ်ဂျီအသင်းနဲ့ ခြေစမ်းပွဲက သူ့ရဲ့ ပထမဆုံး ပွဲစဉ်ဖြစ်ခဲ့ပါတယ်။ဒီပွဲဟာ ရော်နယ်ဒိုနဲ့ မက်ဆီအတွက် ဥရောပပြိုင်ပွဲပြင်ပမှာ ပထမဆုံးအကြိမ် ထိပ်တိုက် တွေ့ဆုံခဲ့ကြတာဖြစ်ပြီး နှစ်ဦးစလုံးဟာ ပွဲအတွင်း ပွေ့ဖက်နှုတ်ဆက်နေတာကို သူတို့ရဲ့ ဆိုရှယ်မီဒီယာမှာ တင်ထားခဲ့တာပါ။

ရော်နယ်ဒိုဟာ ဒီတစ်ပတ်မှာကစားမယ့် ဆော်ဒီလိဂ်ပွဲစဉ်မှာ အယ်လ်နာဆာအသင်းအတွက် စတင်ပွဲထွက်နိုင်ဖွယ် ရှိနေတာဖြစ်ပါတယ်။

Source:DailyMail