CNI Sport News

၂၀၂၃ ခုနှစ်၊ မတ်လ ၁၄

မန်စီးတီးအသင်းနည်းပြ ဂွာဒီယိုလာက အသင်းကို သူကိုင်တွယ်နေတဲ့ခေတ်မှာ ချန်ပီယံလိဂ်ဖလား ရယူနိုင်ခြင်း ရှိ၊ မရှိနဲ့ အကဲဖြတ် ခံရလိမ့်မယ်လို့ ပြောလိုက်ပါတယ်။

ဂွာဒီယိုလာက “ဒါနဲ့ ပတ်သက်ပြီး သဘောတူတယ်လို့တော့ မဟုတ်ပေမယ့် အတိအကျ ပြောရရင်တော့ ဒီပြိုင်ပွဲ အတွက် ကျနော်တို့ အကဲဖြတ်ခံရမှာပါ။ ကျနော့်ရဲ့ ပထမဆုံး ချန်ပီယံလိဂ်ပွဲဖြစ်တဲ့ ၂၀၁၆ တုန်းကလည်း ခင်ဗျား ဒီမှာ ချန်ပီယံလိဂ်ဖလား ရယူမှာလားလို့ သူတို့မေးကြပါတယ်။ ကျနော်သာ ရီးရယ်လ်နည်းပြ ဆိုရင်တော့ ဒါကို နားလည်နိုင်မှာ ဖြစ်ပေမယ့် ကျနော် လက်ခံခဲ့ပါတယ်။ ကျနော်ဖြတ်သန်း နေရသလောက်တော့ ဒါက ပြောင်းလဲ သွားမှာ မဟုတ်ဘူး”လို့ ပြောခဲ့တာပါ။

ဂွာဒီယိုလာဟာ မန်စီးတီးအသင်းကို ကိုင်တွယ်ထားချိန်မှာ ပရီးမီးယားလိဂ်ဖလား ၄ ကြိမ်၊ အက်ဖ်အေဖလား ၁ ကြိမ်နဲ့ လိဂ်ဖလား ၄ ကြိမ် ရယူထားနိုင်ခဲ့ပေမယ့် ချန်ပီယံလိဂ်တော့ ရယူနိုင်ခြင်း မရှိသေးပါဘူး။

ချန်ပီယံလိဂ်ပြိုင်ပွဲမှာ မန်စီးတီးအသင်း အမြင့်ဆုံး အောင်မြင်မှုကတော့ ၂၀၂၁ က ဒုတိယ ရရှိခဲ့တာပါ။ မန်စီးတီး အသင်းဟာ ဗိုလ်လုပွဲမှာ ပရီးမီးယားလိဂ် ပြိုင်ဘက် ချယ်လ်ဆီးအသင်းနဲ့ ယှဉ်ပြိုင်ခဲ့ရပြီး ၁ ဂိုး- ဂိုးမရှိနဲ့ အရေး နိမ့်ခဲ့တာ ဖြစ်ပါတယ်။

ဂွာဒီယိုလာနဲ့ ချန်ပီယံလိဂ်ကို တွေ့ရစဉ်

မန်စီးတီးအသင်းဟာ ဒီရာသီ ချန်ပီယံလိဂ် ပြိုင်ပွဲမှာတော့ ၁၆ သင်းအဆင့်ကို ရောက်ရှိနေပြီး ပထမအကျော့ ပွဲစဉ် အဖြစ် ကစားခဲ့တုန်းက ၁ ဂိုးစီ သရေကျခဲ့တာပါ။

အဲဒါကြောင့် ဒုတိယအကျော့အဖြစ် ကစားရမယ့်ပွဲမှာ နောက်တစ်ဆင့် တက်ဖို့အတွက် အနိုင်ရလဒ် ရယူဖို့ လိုအပ်နေတာ ဖြစ်ပါတယ်။ ဟာလန်းဟာ ဒီရာသီမှာ မန်စီးတီး အသင်းအတွက် ပြိုင်ပွဲစုံ ၃၄ ဂိုး သွင်းယူထား ပေမယ့် ဂွာဒီယိုလာကတော့ တိုက်စစ်မှူးအနေနဲ့ ဘက်ပေါင်းစုံကနေ တိုးတက်ဖို့ ရှိသေးတယ်လို့ ပြောခဲ့တာပါ။

ဂွာဒီယိုလာက “ဧရိယာထဲမှာ ဂိုးတွေသွင်းယူဖို့ ကျနော်တို့က သူ့ဆီကနေ လိုအပ်ပါတယ်။ ပြိုင်ဘက်ရဲ့ ဧရိယာနဲ့ ဝေးကွာနေတဲ့ နေရာမှာဆို သူ ဂိုးမသွင်းယူနိုင်ပါဘူး။ ဟာလန်းအနေနဲ့ ပိုပြီးတက်ကြွဖို့ လိုအပ်ပါတယ်။ ကျနော်တို့ က သူ့ကို ကြည့်နေရမယ်၊ ကျနော်တို့ လုပ်တဲ့အရာတွေမှာ သူပါဝင်နေရပါမယ်။ သူဟာ တိုးတက်လာ ရမယ်၊ ပိုပြီးတော့ ကောင်းနေရမယ်”လို့ ပြောခဲ့ပါတယ်။

မန်စီးတီးအသင်း တိုက်စစ်မှူး ဟာလန်းဟာ လိုက်ပ်ဇစ်နဲ့ မန်စီးတီး တွေ့ဆုံခဲ့တဲ့ အကြိမ်များအတွင်းမှာ ၆ ဂိုးအထိ သွင်းယူထားပါတယ်။

Source: CNA

CNI Sport News

၂၀၂၃ ခုနှစ်၊ မတ်လ ၁၄

လန်ဒန်အခြေစိုက် ကလပ်အသင်းတွေက ကစားသမားတွေနဲ့ နည်းပြတွေကို ရွေးချယ်ချီးမြှင့်တဲ့ ၂၀၂၃ လန်ဒန် ဘောလုံးဆုပေးပွဲမှာ အာဆင်နယ်အသင်းက အဓိကဆုတွေကို ရယူနိုင်ခဲ့ပါတယ်။

အာဆင်နယ် အသင်းခေါင်းဆောင် အိုဒီဂတ်က ဒီဆုပေးပွဲမှာ ပရီးမီးယားလိဂ် တစ်နှစ်တာ အကောင်းဆုံး ကစား သမားဆုကို ရရှိသွားခဲ့ပါတယ်။

အိုဒီဂတ်ဟာ အာဆင်နယ်အသင်းကို နှစ်ပေါင်း ၁၉ နှစ်အကြာမှ ပထမဆုံးအကြိမ် ပရီးမီးယားလိဂ်ဖလားကို ရယူ နိုင်ဖို့အတွက် အမှတ်ပေးဇယား ထိပ်ဆုံးနေရာ ရပ်တည်နိုင်အောင် အဓိကစွမ်းဆောင် ပေးထားတဲ့ သူတွေထဲက တစ်ဦး ဖြစ်ပါတယ်။
အိုဒီဂတ်ဟာ ဒီဆုကို စပါးအသင်း တိုက်စစ်မှူး ဟာရီကိန်း၊ ဘရန်ဖို့ဒ် တိုက်စစ်မှူး တိုနေး၊ ဖူလ်ဟမ် တိုက်စစ်မှူး မီထရိုဗစ်နဲ့ အာဆင်နယ်အသင်းဖော် ဆာကာတို့ကို အသာရပြီး ရယူနိုင်ခဲ့တာ ဖြစ်ပါတယ်။

အိုဒီဂတ်က “ဒါကို အသင်းသားတွေ အားလုံးနဲ့ မျှဝေချင်ပါတယ်။ အသင်းအတွက် ဆုတွေအားလုံးနဲ့ အသိအမှတ် ပြုခံရတာကို မြင်ရတာက အလွန်ကောင်းပါတယ်။ ဒီနှစ်မှာ ကျနော်တို့ လုပ်နေတဲ့ အရာတွေက အလွန်ထူးခြားပြီး ကျနော်တို့ဟာ ကလပ်အသင်းအနေနဲ့ ဘယ်လောက်ထိ ရောက်နေပြီလဲဆိုတာကို ပြသနေတယ်လို့ ထင်ကြောင်း” ပြောခဲ့ပါတယ်။

အာဆင်နယ် အသင်းနည်းပြ အာတီတာနဲ့ အသင်းခေါင်းဆောင် အိုဒီဂတ်ကိုတွေ့ရစဉ်

ဆာကာကတော့ အကောင်းဆုံး လူငယ်ကစားသမားဆုကို ရရှိသွားခဲ့ပါတယ်။

ဆာကာဟာ ၂၀၂၁ ကလည်း ဒီဆုကို ရခဲ့တဲ့အတွက် အခုတစ်ကြိမ် ရရှိတာက ဒုတိယအကြိမ်မြောက် ရရှိခဲ့တာပါ။

အကောင်းဆုံး ဂိုးသမားဆုကို အာဆင်နယ် ဂိုးသမား ရမ်စဒေးလ်က ရရှိသွားခဲ့ပါတယ်။ ရမ်စဒေးလ်ဟာ အာဆင်နယ် အသင်းရဲ့ ဂိုးပေါက်ကို အကောင်းဆုံး ကာကွယ်မှုတွေ ပြုလုပ်နိုင်ခဲ့တာကြောင့် ဒီဆုကို ထိုက်ထိုက် တန်တန် ရရှိခဲ့တာပါ။

အကောင်းဆုံး နည်းပြဆုကို အာဆင်နယ် အသင်းနည်းပြ အာတီတာက ရရှိသွားခဲ့တာ ဖြစ်ပါတယ်။

အာတီတာက “ကျနော့်ရဲ့ လုပ်ဖော်ကိုင်ဖက်တွေ၊ ဝန်ထမ်းတွေ၊ ကလပ်မှာရှိတဲ့ သူတိုင်းနဲ့ ကျနော်တို့ကို အားပေးတဲ့ ပရိသတ်တွေအားလုံးကို ဒီဆုရရှိခဲ့တဲ့အတွက် အလွန်ကျေးဇူးတင်ပါတယ်”လို့ ပြောခဲ့ပါတယ်။

အမျိုးသမီး အကောင်းဆုံး ကစားသမားဆုကို အာဆင်နယ်နဲ့ အင်္ဂလန်အသင်း တိုက်စစ်မှူး ဘန်မီက ရရှိခဲ့ပြီး အကောင်းဆုံး သွင်းဂိုးဆုကို စပါးအသင်း တောင်ပံကစားသမား ဆွန်ဟောင်မင် သွင်းယူတဲ့ဂိုးက ရရှိသွားခဲ့ပါ တယ်။

အာဆင်နယ်အသင်းဟာ လက်ရှိအချိန်မှာ ဒုတိယနေရာက မန်စီးတီးအသင်းကို ၅ မှတ်ဖြတ်ပြီး ဦးဆောင်နေကာ ၂၀၀၄ နောက်ပိုင်း ပထမဆုံးအကြိမ် ပရီးမီးယားလိဂ် ဆုဖလားကို ပြန်လည်ရယူနိုင်ဖို့ ပစ်မှတ်ထားနေတာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ မတ်လ ၁၃

ကွင်းလယ်ကစားသမား ပေါ့ဘာဟာ နိုင်ငံတကာ ပွဲစဉ်တွေအပြီးမှ ဂျူဗင်တပ်စ် အသင်းအတွက် ပြန်လည် ပါဝင် ကစားနိုင်မယ်လို့ နည်းပြဖြစ်သူ အယ်လီဂရီက ပြောလိုက်ပါတယ်။

အယ်လီဂရီက “ကျနော်စိတ်ကူးထားတာက ရာဘီယော့ကို မိနစ် ၆၀ ကစားခိုင်းပြီး ပေါ့ဘာကို မိနစ် ၃၀ ကစား ခိုင်းဖို့ပါ။ ဒါပေမယ့် ပေါ့ဘာက ဒဏ်ရာ ရရှိသွားခဲ့ပါတယ်။ ပေါ့ဘာဟာ ပြစ်ဒဏ်ဘောတွေ ကန်သွင်းနေရင်း ဒဏ်ရာ ရရှိသွားခဲ့တာပါ။ သူ့ရဲ့ ဒဏ်ရာ အခြေအနေကို စစ်ဆေးမှုတွေ ပြုလုပ်သွားမှာ ဖြစ်ပေမယ့် ကြာသပတေး နေ့နဲ့ တနင်္ဂနွေနေ့ ပွဲစဉ်တွေမှာ သူပါဝင်နိုင်မှာ မဟုတ်ပါဘူး။ ဒါပေမယ့် နိုင်ငံတကာပွဲစဉ်တွေအပြီးမှာ သူ့ကို ပြန်ပြီးမြင်တွေ့ရမှာပါ”လို့ DAZN ကို ပြောခဲ့တာပါ။

ပေါ့ဘာဟာ ဂျူဗင်တပ်စ်အသင်းကို ရောက်ရှိလာကတည်းက ဒဏ်ရာတွေကြောင့် အနားယူနေခဲ့ရပြီး ဖေဖော်ဝါရီလကုန်ပိုင်းမှသာ ပြန်ပြီး ပါဝင်ကစားနိုင်ခဲ့တာ ဖြစ်ပါတယ်။

ပေါ့ဘာဟာ ပြီးခဲ့တဲ့ ယူရိုပါလိဂ် ပွဲစဉ်မှာ စည်းကမ်းပိုင်းဆိုင်ရာ အကြောင်းပြချက်နဲ့ လူစာရင်းကနေ ချန်လှပ် ခံခဲ့ရ ပေမယ့် ဆမ်ဒိုးရီးယားနဲ့ စီးရီးအေပွဲမှာ နည်းပြက သူ့ကို အသုံးပြုဖို့ ရည်ရွယ်ထားခဲ့တာပါ။

ဒါပေမယ့် ပေါ့ဘာဟာ ဒဏ်ရာ ထပ်မံရခဲ့လို့ လူစာရင်းမှာ မပါဝင်ခဲ့တာ ဖြစ်ပါတယ်။

ပေါ့ဘာနဲ့ နည်းပြကိုတွေ့ရစဉ်

ပေါ့ဘာဟာ ဒီရာသီမှာ ဂျူဗင်တပ်စ် အသင်းအတွက် ၂ ပွဲသာ ပါဝင်ကစားထားနိုင်ပြီး နည်းပြ အယ်လီဂရီရဲ့ ပြော စကားအရ ကစားသမားဟာ ဧပြီလ ၁ ရက် ဗီရိုနာနဲ့ ကစားမယ့် စီးရီးအေပွဲစဉ်မှသာ အသင်းအတွက် ပြန်လည် ပါဝင်နိုင်ဖွယ် ရှိနေတာပါ။

ပေါ့ဘာဟာ ဂျူဗင်တပ်စ်အသင်းမှာ ပထမအကြိမ် ကစားခဲ့တုန်းက ခြေစွမ်းပြသနိုင်ခဲ့ပေမယ့် ဒုတိယအကြိမ် ပြန်ကစားတာမှာတော့ ခြေစွမ်းပြနိုင်ဖို့ထက် ဒဏ်ရာတွေကြောင့် အနားယူနေရတာ ဖြစ်ပါတယ်။

ဂျူဗင်တပ်စ်အသင်းဟာ ဆမ်ဒိုးရီးယားအသင်းကို ၄ ဂိုး- ၂ ဂိုးနဲ့ အနိုင်ရခဲ့ပြီးနောက် စီးရီးအေ အမှတ်ပေး ဇယား အဆင့် ၇ နေရာအထိ တက်လှမ်းနိုင်ခဲ့တာပါ။

အပြောင်းအရွှေ့ ကိစ္စရပ်တွေကြောင့် ၁၅ မှတ် လျှော့ခံထားရတဲ့ ဂျူဗင်တပ်စ်အသင်းဟာ နောက်ပိုင်းပွဲတွေမှာ ရလဒ်ကောင်းတွေ ပြန်လည် ရရှိနေပြီး အဆင့် ၄ နေရာက အေစီမီလန်အသင်းနဲ့ ၉ မှတ်ကွာဟနေတာ ဖြစ်ပါ တယ်။

ဂျူဗင်တပ်စ်အသင်းဟာ လာမယ့် ကြားရက်မှာတော့ ယူရိုပါလိဂ် ၁၆ သင်းအဆင့် ဒုတိယအကျော့ ပွဲစဉ်အဖြစ် ဖရိုင်းဘတ် အသင်းအိမ်ကွင်းမှာ သွားရောက် ယှဉ်ပြိုင်ရမှာပါ။ ဒီနှစ်သင်း ပထမအကျော့အဖြစ် ဂျူဗင်တပ်စ် အိမ်ကွင်းမှာ ကစားခဲ့တုန်းက စီးရီးအေကလပ်က ၁ ဂိုး - ဂိုးမရှိနဲ့ အနိုင်ရရှိခဲ့တာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ မတ်လ ၁၃

ဘာစီလိုနာအသင်းဟာ ဒိုင်လူကြီးတွေကို ငွေပေးချေမှု အရှုပ်တော်ပုံတွေနဲ့ ပတ်သက်ပြီး စွဲချက်တွေနဲ့ ရင်ဆိုင်နေရ ချိန်မှာ အသင်းဥက္ကဋ္ဌ လာပေါ်တာက သူတို့ အပြစ်ကင်းကြောင်း ပြသသွားမယ်လို့ ပြောလိုက်ပါတယ်။

လာပေါ်တာက “ဘာစီလိုနာ ပရိသတ်တွေ အေးဆေးတည်ငြိမ်စွာနေပါ။ ဘာစီလိုနာအသင်းဟာ စွပ်စွဲထားတဲ့ အရာတွေအတွက် အပြစ်ကင်းသလို လူတိုင်း ပါဝင်နေတဲ့ အပုပ်ချမှုတွေမှာ သားကောင်လို ဖြစ်နေတာပါ။ ဒါနဲ့ ပတ်သက်ပြီး အံ့သြစရာတော့ မရှိပါဘူး။ ကျနော်တို့ဟာ ဘာစီလိုနာကို ကာကွယ်ရမှာ ဖြစ်သလို ကလပ်အပြစ် ကင်းကြောင်းကိုလည်း ပြသသွားမှာပါ”လို့ တွစ်တာမှာ ရေးတင်ထားတာပါ။

ဘာစီလိုနာအသင်းဟာ ၂၀၀၁ ခုနှစ်ကနေ ၂၀၁၈ ခုနှစ်ကြားမှာ ဒိုင်လူကြီးများ နည်းစနစ်ကော်မတီဒုဥက္ကဋ္ဌဟောင်း ဟိုဆေးမာရီယာကို ငွေပေးချေမှု ပြုလုပ်ခဲ့တာနဲ့ ပတ်သက်ပြီး အစိုးရရှေ့နေတွေဟာ ကလပ်အသင်းကို စုံစမ်းစစ် ဆေးမှုတွေ ပြုလုပ်နေတာ ဖြစ်ပါတယ်။

ဒီငွေပေးချေမှုဟာ ယူရို ၇ သန်းဝန်းကျင် ရှိခဲ့တယ်လို့ သိရပေမယ့် လာပေါ်တာကတော့ သူတို့အသင်းဟာ ဘာ အပြစ်မှ ပြုလုပ်ထားခြင်း မရှိဘူးလို့ ပြောထားတာပါ။

လာပေါ်တာကို တွေ့ရစဉ်

ဘာစီလိုနာမြို့က ကလပ်အသင်းရဲ့ လုပ်ဆောင်ချက်တွေအပြင် ဥက္ကဋ္ဌဟောင်းတွေဖြစ်တဲ့ ဘာတိုမြူနဲ့ ရိုဆဲလ်တို့ ကို ရှုတ်ချမှုတွေ ပြုလုပ်ခဲ့ပါတယ်။

လာလီဂါ အကြီးအကဲ တီဘတ်စ်ကတော့ လာပေါ်တာအနေနဲ့ ဒီငွေပေးချေမှုနဲ့ ပတ်သက်ပြီး ရှင်းမပြနိုင်ဘူးဆိုရင် ရာထူးကနေ နှုတ်ထွက်သင့်တယ်လို့ ပြောခဲ့တာပါ။ ဒါအပြင် လာလီဂါကလပ် အသင်းတွေကလည်း ဘာစီလိုနာကို အရေးယူမှုတွေ ပြုလုပ်ဖို့ တောင်းဆိုမှုတွေ ရှိနေကြပါတယ်။

ဘာစီလိုနာအသင်းဟာ အခုနှစ်ရာသီ လာလီဂါပြိုင်ပွဲမှာ ရလဒ်ကောင်းတွေကို ရယူနေပြီး ဒုတိယနေရာက ရီးရယ်လ် အသင်းကို ၉ မှတ်ဖြတ်ပြီး အမှတ်ပေးဇယားကို ဦးဆောင်နေတာပါ။

ဘာစီလိုနာအသင်းဟာ ဥရောပပြိုင်ပွဲတွေဖြစ်တဲ့ ချန်ပီယံလိဂ်နဲ့ ယူရိုပါလိဂ်ကနေ ထွက်ခွာခဲ့ရပေမယ့် ကိုပါဒယ်ရေးဖလား ပြိုင်ပွဲမှာ ဆီမီးဖိုင်နယ်အဆင့် ရောက်ရှိနေသလို စပိန်စူပါဖလား ပြိုင်ပွဲမှာလည်း ချန်ပီယံဆုကို ရယူထားနိုင်ခဲ့တာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ မတ်လ ၁၃

အာဆင်နယ်အသင်းနည်းပြ အာတီတာက ဖူလ်ဟမ်အသင်းကို အနိုင်ရခဲ့တဲ့ ပရီးမီးယားလိဂ်အဝေးကွင်းပွဲမှာ ဂိုးမပေးရဘဲ အနိုင်ရခဲ့တဲ့အတွက် ပျော်ရွှင်တယ်လို့ ပြောလိုက်ပါတယ်။

အာတီတာက “အလွန်ပျော်ရွှင်ပါတယ်။ဖူလ်ဟမ်အသင်းဟာ စနစ်တကျနဲ့ ဖွဲ့စည်းထားတဲ့အသင်းဖြစ်ပြီး သူတို့ ကွင်းမှာ လာပြီးယှဉ်ပြိုင်ရတာက ခက်ခဲပါတယ်။ကျနော်တို့ပွဲကို ကြီးစိုးနိုင်ခဲ့သလို အခွင့်အရေးတွေ အများကြီး ဖန်တီးနိုင်ခဲ့ပါတယ်။ပြီးတော့ အလွန်အရေးပါတဲ့ ဂိုးမပေးရအောင်လည်း လုပ်နိုင်ခဲ့ပါတယ်။ယုံကြည်မှုရှိရှိနဲ့ ပွဲကို အနိုင်ရခဲ့တာကလည်း အလွန်ပျော်ဖို့ ကောင်းတယ်” လို့ ပြောခဲ့တာပါ။

အာဆင်နယ်အသင်းဟာ ဖူလ်ဟမ်အသင်းကို ၃ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး ဂိုးတွေကို ဂါဘရီရယ်လ်၊ မာတင်နယ်လီနဲ့ အိုဒီဂတ်တို့က သွင်းယူခဲ့တာဖြစ်ပါတယ်။အာဆင်နယ်အသင်းဟာ ဒီ နိုင်ပွဲကြောင့် ပရီးမီးယား လိဂ် ပြိုင်ပွဲပြီးဆုံးဖို့ ၁၁ ပွဲသာ လိုတော့တဲ့အချိန်မှာ ဒုတိယနေရာက မန်စီးတီးအသင်းကို ၅ မှတ်အသာရပြီး ထိပ်ဆုံးနေရာမှာ ဦးဆောင်နေတာပါ။

အာတီတာက “၉၆ မိနစ်အထိ ကစားသမား ၁၁ ဦးစလုံးက ခံစစ်ပိုင်းကို အကောင်းဆုံး ကာကွယ်နိုင်ခဲ့ပါတယ်။ ကျနော်တို့ဟာ နိုင်ပွဲတွေဆက်ပြီး ရယူချင်တယ်ဆိုရင် ခံစစ်ပိုင်းကောင်းမွန်စွာလုပ်နိုင်ဖို့လည်း အရေးကြီးပါတယ်။ အသင်းကနေ တစ်ဆင့်ဖြန့်ဝေတဲ့ သွင်းဂိုးတွေကို မြင်ရတာက အလွန်ကောင်းပါတယ်။ကျနော်တို့ လေ့ကျင့်မှု အများအပြားပြုလုပ်ခဲ့ပြီး ဒီနေ့မှာ လှပတဲ့သွင်းဂိုးတွေလည်း သွင်းယူနိုင်ခဲ့ပါတယ်” လို့ ပြောခဲ့ပါတယ်။

ဖူလ်ဟမ်အသင်းကို အနိုင်ရတဲ့ပွဲမှာ ဒဏ်ရာကြောင့် ကာလကြာရှည်အနားယူနေရတဲ့ တိုက်စစ်မှူး ဂျီးဆပ်စ်ဟာ လူစားဝင်ကစားသမားအဖြစ် ပါဝင်ကစားသွားခဲ့ပေမယ့် ပွဲထွက်ခွင့်တစ်နေရာအတွက် အာမခံချက်မရှိဘူးလို့ နည်းပြ အာတီတာက သတိပေးခဲ့ပါတယ်။

အာတီတာက “ဒါဟာ သူ့ရဲ့ပထမဆုံးခြေလှမ်းပါ။သူ့ရဲ့ကစားချိန်က မှန်ကန်မှုရှိ၊မရှိဆိုတာ မသိပေမယ့် သူ့ မျက်လုံးတွေက ကျနော်အဆင်သင့်ဖြစ်နေပြီဆိုတာကို ကျနော့်ကို ပြောခဲ့ပါတယ်။အခုအချိန်မှာတော့ သူလည်း အခြားကစားသမားတွေလို သူ့ရဲ့နေရာကို ပြန်လည်ရယူနိုင်ဖို့ လိုအပ်ပါတယ်” လို့ ပြောခဲ့တာပါ။

အာဆင်နယ်အသင်းဟာ လာမယ့်ကြားရက်မှာ ယူရိုပါလိဂ် ၁၆ သင်းအဆင့် ဒုတိယအကျော့ပွဲစဉ်အဖြစ် အိမ်ကွင်းမှာ စပို့တင်းလစ္စဘွန်းအသင်းနဲ့ ယှဉ်ပြိုင်ရမှာဖြစ်ပြီး ပထမအကျော့ပွဲစဉ်က ၂ ဂိုးစီသရေကျခဲ့တာ ဖြစ်ပါတယ်။

Source:Metro

CNI Sport News

၂၀၂၃ ခုနှစ်၊ မတ်လ ၁၃

ဆောက်သမ်တန်အသင်းနဲ့ ဂိုးမရှိသရေကျခဲ့တဲ့ပွဲမှာ ဒိုင်လူကြီးက ပွဲကိုလွှမ်းမိုးခဲ့တယ်ဆိုပြီး ယူနိုက်တက်နည်းပြ အဲရစ်တန်ဟတ်က ဒိုင်လူကြီး အန်တိုနီတေလာကို ပြစ်တင်လိုက်ပါတယ်။

အဲရစ်တန်ဟတ်က “ကတ်စမဲရိုးက ဥရောပမှာ ပွဲပေါင်း ၅၀၀ ကစားခဲ့ပြီး အနီကတ်တစ်ကြိမ်မှ မပြသခံခဲ့ရပါဘူး။ အခု ပရီးမီးယားလိဂ်မှာ သူဟာ အနီကတ်နှစ်ကြိမ် ပြသခံထားရပါပြီ။ သူ မပါဝင်နိုင်တာက ပြဿနာ မဟုတ်ပါဘူး။ ဒါကို ကျနော်ကိုင်တွယ်လို့ရပါတယ်။ ဒီပွဲကို ဒိုင်လူကြီးက လွှမ်းမိုးသွားခဲ့ပါတယ်။ ကတ်စမဲရိုးက တကယ်ကို မျှတမှုရှိတဲ့ ကစားသမားပါ။သူဟာ ကြမ်းတမ်းပေမယ့် မျှတမှုရှိတဲ့သူပါ”လို့ ပြောခဲ့တာပါ။

ကတ်စမဲရိုးဟာ ဒီပွဲစဉ်ရဲ့ပထမပိုင်းမှာ ဆောက်သမ်တန်ကစားသမား အယ်လ်ကာရတ်ဇ်ကို ဖျက်ထုတ်ပုံ ကြမ်းတမ်းခဲ့တယ်ဆိုပြီး ကွင်းလယ်ဒိုင်လူကြီး အန်တိုနီတေလာက အစောပိုင်းက အဝါကတ်ပြသခဲ့ပေမယ့် နောက်ပိုင်းမှာ VAR ကြည့်ပြီး တိုက်ရိုက်အနီကတ်ပြသခဲ့တာ ဖြစ်ပါတယ်။ ကတ်စမဲရိုးဟာ ဒီအနီကတ်ကြောင့် အလွန်စိတ်ပျက်နေပြီး အသင်းဖော်တွေက သူ့ကိုဝိုင်းပြီး နှစ်သိမ့်ပေးခဲ့ရတာပါ။ ဒီအနီကတ်ဟာ ကတ်စမဲရိုး အတွက် ယူနိုက်တက်ကစားသမားဘဝမှာ ဒုတိယမြောက်ရရှိခဲ့တဲ့ တိုက်ရိုက်အနီကတ်လည်း ဖြစ်ပါတယ်။

ဘရာဇီးလ်ကစားသမားဟာ တိုက်ရိုက်အနီကတ်ကြောင့် ပြည်တွင်းပွဲစဉ် ၄ ပွဲ ပွဲပယ်ခံရမှာဖြစ်လို့ ယူနိုက်တက် အတွက် ကြီးမားတဲ့ ထိုးနှက်ချက်ဖြစ်လာခဲ့ရတာပါ။ ဒီပွဲစဉ်ရဲ့ပထမပိုင်းမှာပဲ ရက်ရှ်ဖိုဒ့်ရဲ့ ဖြတ်တင်ပေးမှုကို ဆောက်သမ်တန်ကစားသမားက ဂိုးဧရိယာအတွင်းမှာ လက်နဲ့ထိန်းသလိုဖြစ်ခဲ့ပေမယ့် ကွင်းလယ်ဒိုင်လူကြီးက VAR နဲ့ ပြန်စစ်ဆေးပေးဖို့ ငြင်းဆိုခဲ့တာဖြစ်ပါတယ်။

အဲရစ်တန်ဟတ်က “ကွဲလွဲနေတဲ့အရာတွေကြောင့် ကစားသမားတွေက မူဝါဒက ဘာလဲဆိုတာကို မသိတော့ပါဘူး။ဒီနေ့မှာ ကျနော်တို့ ပင်နယ်တီရနိုင်တဲ့ အခြေအနေနှစ်ခုရှိပါတယ်။ဒါပေမယ့် သူတို့ဆီက စစ်ဆေးမှုတွေ မရခဲ့ပါဘူး။ဒါက လက်ထိဘောဆိုတာ ရှင်းရှင်းလင်းလင်းပဲလို့ ကျနော်ထင်ပါတယ်။ဒါဆို မူဝါဒတွေက ဘာတွေလဲ” လို့ ပြောခဲ့တာပါ။

ယူနိုက်တက်အသင်းဟာ နောက်ဆုံးကစားခဲ့တဲ့ ပရီးမီးယားလိဂ် ၂ ပွဲဆက်တိုက်နိုင်ပွဲ ပျောက်ဆုံးခဲ့ပေမယ့် အမှတ်ပေးဇယား အဆင့် ၃ နေရာမှာ ဆက်လက်ရပ်တည်နေပြီး အဆင့် ၄ နေရာက စပါးအသင်းကို ၂ မှတ် အသာ ရရှိထားတာဖြစ်ပါတယ်။

ယူနိုက်တက်အသင်းဟာ လာမယ့် ကြားရက်မှာတော့ ဘက်တစ်အသင်းနဲ့ ယူရိုပါလိဂ် ၁၆ သင်း အဆင့် ဒုတိယ အကျော့ပွဲစဉ် ယှဉ်ပြိုင်ရမှာပါ။ပထမအကျော့ပွဲစဉ်တုန်းက ယူနိုက်တက်အသင်းဟာ ၄ ဂိုး- ၁ ဂိုးနဲ့ အနိုင်ရရှိခဲ့တာ ဖြစ်ပါတယ်။

Source:Goal

CNI Sport News

၂၀၂၃ ခုနှစ်၊ မတ်လ ၁၀

ကမ္ဘာ့ဒိုင်လူကြီး အကြီးအကဲ ကော်လီနာက ပိုတိကျတဲ့ အချိန်ပမာဏကို အသုံးပြု လိုက်မယ်ဆိုရင် ပရီးမီးယား လိဂ် ကစားသမားတွေဟာ အချိန်ဖြုန်းတာကို ရပ်တန့်သွားလိမ့်မယ်လို့ ပြောလိုက်ပါတယ်။

ကော်လီနာက “အက်စတွန်ဗီလာနဲ့ ဘရန်ဖို့ဒ်တို့ ပွဲမှာဆိုရင် ထိရောက်မှုရှိတဲ့ အချိန်က ၄၃ မိနစ်ပါပဲ။ ၄၃ မိနစ် ကြာတဲ့ ပွဲစဉ်ကို ကြည့်ရှုဖို့ တစ်စုံတစ်ယောက်က ပိုက်ဆံပေးချင်တယ်လို့ မထင်ပါဘူး။ ကစားသမားတွေက အချိန် ဖြုန်းတာဟာ အဓိပ္ပါယ် မရှိမှန်းသိရင်တော့ အချိန်ဖြုန်းတာကို လျှော့ချနိုင်မယ်လို့ ကျနော်ယုံကြည်ပါတယ်။ ဘာကြောင့်လဲဆိုရင် အဲဒီအချိန်ကပြန်ပြီး အစားထိုးသွားမှာ ဖြစ်လို့ပါ”လို့ ပြောခဲ့တာပါ။

ပရီးမီးယားလိဂ် ပွဲစဉ်တွေရဲ့ ထိရောက်တဲ့ အချိန်ဟာ ၅၄.၄၉ မိနစ်သာရှိပြီး ချန်ပီယံလိဂ် ပွဲတွေမှာဆိုရင် ထိရောက်တဲ့ အချိန်ဟာ ၅၈.၀၇ မိနစ် ဖြစ်တယ်လို့ နာမည်ကျော် ဒိုင်လူကြီးဟောင်း ကော်လီနာက ကိန်းဂဏန်းတွေနဲ့ ပြောခဲ့တာ ဖြစ်ပါတယ်။

နိုင်ငံတကာ ဘောလုံးအဖွဲ့အစည်း ဘုတ်အဖွဲ့က ဘောလုံးပွဲတွေရဲ့ အဓိက ၅ ခုဖြစ်တဲ့ လူစားလဲလှယ်မှုတွေ၊ ကစားသမားဒဏ်ရာ၊ ပင်နယ်တီ ကန်သွင်းမှု၊ အနီကတ်၊ VAR နဲ့ ဂိုးသွင်းပြီး အောင်ပွဲခံချိန်တွေ ကနေ အမှန် တကယ် ယူရမယ့် အချိန်ပမာဏကို ဆုံးဖြတ်ခဲ့တာပါ။

အချိန်ပို ကြေညာနေစဉ်

ဒါပေမယ့် ခန့်မှန်းချက်ထက် အလုံးစုံ ရပ်တန့်ချိန်ကို တွက်ချက်ရာမှာ အသုံးပြုသင့်တယ်လို့ ပြောခဲ့တာ ဖြစ်ပါ တယ်။ လမ်းညွှန်ချက် အသစ်တွေကို မှန်ကန်စွာ ကျင့်သုံးခဲ့မယ်ဆိုရင် လီဗာပူးလ်က ယူနိုက်တက်ကို ၇ ဂိုး- ဂိုး မရှိနဲ့ ဂိုးပြတ် အနိုင်ရတဲ့ပွဲမှာ အချိန်ပိုကို ဒီထက်ပိုပြီး ပေးသင့်တယ်လို့လည်း ကော်လီနာက ပြောခဲ့တာပါ။

ကော်လီနာက “ပြီးခဲ့တဲ့ အပတ်က ပရီးမီးယားလိဂ်မှာ ၁၀ ပွဲရှိခဲ့ပါတယ်။ လီဗာပူးလ်ပွဲမှာဆိုရင် နာကျင်အချိန်ပို ၄ မိနစ်ပဲ ပေးခဲ့ပါတယ်။ ပထမပိုင်းမှာ ၁ မိနစ်၊ ဒုတိယပိုင်းမှာ ၃ မိနစ်ပါ။ ဒါပေမယ့် ဒုတိယပိုင်းမှာ ၆ ဂိုး သွင်းယူ ခဲ့ပါ တယ်။ နှစ်သင်းကြား ကွာဟချက်ကြီးမားလို့ အချိန်ပို အများကြီး မပေးရဘူးဆိုရင်တော့ အနာဂတ် ကျနော်တို့မှာ စည်းမျဉ်းတစ်ခုတော့ ရှိကောင်းရှိပါလိမ့်မယ်။ ၇ ဂိုး- ဂိုးမရှိဖြစ်နေတဲ့ အချိန်မှာ မှန်ကန်တဲ့ အချိန်ကို ပြဖို့ဆိုရင် နားလည်ရ ခက်မယ်ဆိုတာ ကျနော်သိပါတယ်”လို့ ပြောခဲ့ပါတယ်။

ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာ ဖီဖာဟာ ကစားသမားတွေ အချိန်ဖြုန်းတာကို ရပ်တန့်ဖို့အတွက် နာကျင် အချိန်ပိုကို အများအပြားပေးခဲ့တာ မြင်တွေ့ခဲ့ရတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ မတ်လ ၁၀

ယူနိုက်တက်အသင်းက ခေါ်ယူဖို့ စိတ်ဝင်စားမှုတွေ ရှိနေပေမယ့် ဘာစီလိုနာမှာ ပျော်ရွှင်ပြီး နှစ်ပေါင်းများစွာ ဆက် နေချင်တယ်လို့ ကွင်းလယ်ကစားသမား ဒီဂျောင်က ပြောလိုက်ပါတယ်။

ဒီဂျောင်က “ကျနော် ဒီမှာ အေးအေးဆေးဆေးပဲရှိပြီး ဘာစီလိုနာမှာ အလွန်ပျော်ရွှင်ပါတယ်။ ကျနော် ဘာစီလိုနာ အသင်းမှာ နောက်ထပ် နှစ်ပေါင်းများစွာကြာ ဆက်ပြီး နေချင်ပါတယ်”လို့ ပြောခဲ့တာကို RAC1 က ဖော်ပြခဲ့တာပါ။

နွေရာသီ အပြောင်းအရွှေ့ မတိုင်ခင်မှာ ဒီဂျောင်ရဲ့ အပြောင်းအရွှေ့ သတင်းတွေဟာ ထပ်ပြီး ထွက်ပေါ်လာခဲ့တာ ဖြစ်ပါတယ်။

ပြီးခဲ့တဲ့ အပြောင်းအရွှေ့တွေက ဒီဂျောင်ဟာ ဘာစီလိုနာ အသင်းကနေ ရွှေ့ဆိုင်းထားတဲ့ လုပ်ခလစာ ရဖို့ရှိတာ အပြင် အင်္ဂလန်ကို လာရောက်ဖို့အတွက် စပိန်ကလပ်ကနေ ထွက်ခွာလိုခြင်း မရှိတာကြောင့် ယူနိုက်တက်နဲ့ အပြောင်းအရွှေ့ ပျက်ပြယ်ခဲ့တာပါ။

ဒီဂျောင်ဟာ အရင်ကတည်းက ဘာစီလိုနာမှာ ပျော်ရွှင်တယ်လို့ အကြိမ်ပေါင်းများစွာ ပြောခဲ့တာ ဖြစ်ပါတယ်။

ဒါပေမယ့် ယူနိုက်တက်နည်းပြ အဲရစ်တန်ဟတ်က ဒီဂျောင်ကို ခေါ်ယူဖို့ အလိုရှိနေတာကြောင့် ယူနိုက်တက် အသင်းဟာ လာမယ့် နွေရာသီ အပြောင်းအရွှေ့မှာ ခေါ်ယူဖို့ ချိတ်ဆက်မှုတွေ ပြုလုပ်နေတာ ဖြစ်ပါတယ်။

ယူနိုက်တက်နဲ့ပွဲမှာ တွေ့ရတဲ့ ဒီဂျောင်

အဲရစ်တန်ဟတ်ဟာ ဒီဂျောင်နဲ့ အေဂျတ်ဇ်အသင်းမှာ အတူလက်တွဲဖူးတာကြောင့် ကစားသမားရဲ့ အရည်အချင်း တွေကို သိတာဖြစ်ပါတယ်။ အဲဒါကြောင့် ယူနိုက်တက်အတွက် လိုအပ်နေတဲ့ ကွင်းလယ်နေရာအတွက် ဒီဂျောင်နဲ့ အားဖြည့်ချင်နေတာပါ။

ဘာစီလိုနာ အသင်းကတော့ ဘဏ္ဍာရေး အခက်အခဲတွေကြောင့် ဒီဂျောင်ကို ရောင်းချချင်ခဲ့ပေမယ့် ကစားသမား က ဆက်နေချင်တဲ့ ဆန္ဒကြောင့် ဆက်ထားခဲ့ရတာ ဖြစ်ပါတယ်။ ဒီဂျောင်ဟာ နည်းပြ ဇာဗီရဲ့ အထင်ကြီးမှုကို ရရှိ ပြီး ဘာစီလိုနာအသင်းရဲ့ ကွင်းလယ်တစ်နေရာကို သိမ်းပိုက်ထားတာပါ။

ယူနိုက်တက်နဲ့ ဘာစီလိုနာ အသင်းတို့ဟာ ဒီရာသီ ယူရိုပါလိဂ် ပလေးအော့ဖ် အဆင့်မှာ တွေ့ဆုံခဲ့တာကြောင့် ဒီဂျောင်ဟာ ယူနိုက်တက်အသင်းနဲ့ ထိပ်တိုက် တွေ့ဆုံခဲ့ရသေးတာ ဖြစ်ပါတယ်။

ဒီဂျောင်ဟာ ဘာစီလိုနာအသင်းမှာ ပျော်ရွှင်တယ်လို့ ပြောနေပေမယ့် ယူနိုက်တက်အသင်းက ခေါ်ယူဖို့ ထပ်မံ ကြိုးစားလာတာနဲ့ စပိန်ကလပ်က ငွေကြေးလိုအပ်တာတွေကြောင့် အပြောင်းအရွှေ့ သတင်းတွေထပ်ပြီး ထွက် ပေါ်လာဖို့ ရှိနေတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ မတ်လ ၁၀

ယူနိုက်တက်နည်းပြ အဲရစ်တန်ဟတ်က ဘတ်စ်တစ်အသင်းကို အနိုင်ရခဲ့တဲ့ ယူရိုပါလိဂ် ၁၆ သင်းအဆင့် ပထမ အကျော့ပွဲမှာ ဘရူနိုဖာနန်ဒက်စ်ဟာ ကွင်းထဲမှာ အကောင်းဆုံး ကစားသမားလို့ ချီးကျူးသွားခဲ့ပါတယ်။

အဲရစ်တန်ဟတ်က “ဘရူနိုက ကွင်းထဲမှာ အကောင်းဆုံး ကစားသမားပါ။ သူဟာ ပိုပြီးလေးနက်တဲ့ အခန်းကဏ္ဍ ကနေ ကစားခဲ့တာဖြစ်ပြီး သူက ထက်မြက်သလို အခွင့်အရေးတွေ အများကြီးကိုလည်း ဖန်တီးနိုင်ခဲ့ပါတယ်။ သူ ဟာ ဒီပွဲမှာဆိုရင် ပထမမိနစ် ကတည်းက အသင်းကို ဦးဆောင်ခဲ့ပြီး ဂိုးလည်း သွင်းနိုင်ခဲ့သလို ဂိုးလည်း ဖန်တီးနိုင် ခဲ့ပါတယ်။ အဲဒါကြောင့် ကျနော် ပျော်ရွှင်ပါတယ်။ သူ့ရဲ့ ပင်ကိုယ်စရိုက် လက္ခဏာတွေလည်း ပြသ နိုင်ခဲ့ပါတယ်။ ဘရူနိုဟာ စိတ်အားထက်သန်မှု အရမ်းများလာရင် အားနည်းချက် ဖြစ်လာနိုင်လို့ ဒါက သူထိန်းချုပ်ရပါမယ်။ ဒါကို သူလည်း သိပါတယ်”လို့ ပြောခဲ့တာပါ။

ယူနိုက်တက်အသင်းဟာ လီဗာပူးလ်အသင်းကို ၇ ဂိုး- ဂိုးမရှိနဲ့ ဂိုးပြတ် အရေးနိမ့်တဲ့ပွဲအပြီး ကစားခဲ့တဲ့ ယူရိုပါလိဂ် ပွဲမှာ ဘတ်စ်တစ် အသင်းကို ၄ ဂိုး- ၁ ဂိုးနဲ့ အနိုင်ရရှိခဲ့တာ ဖြစ်ပါတယ်။

ယူနိုက်တက် အသင်းအတွက် ဂိုးတွေကို ရက်ရှ်ဖို့ဒ်၊ ဘရူနိုဖာနန်ဒက်စ်၊ အန်တိုနီနဲ့ ဝက်ဂ်ဟော့စ်တို့က သွင်းယူခဲ့ပြီး ဘတ်စ်တစ်အတွက် ဂိုးကိုတော့ ပီရတ်ဇ်က သွင်းယူခဲ့တာပါ။ ယူနိုက်တက်အသင်းဟာ ဘတ်စ်တစ် အသင်း အိမ်ကွင်းမှာ ဒုတိယအကျော့ ကစားဖို့ ကျန်ရှိသေးပေမယ့် ဒီပွဲရလဒ်ကြောင့် ကွာတားဖိုင်နယ်တက်ဖို့ နီးစပ်ခဲ့တာ ဖြစ်ပါတယ်။

ယူနိုက်တက်အသင်းသားများကိုတွေ့ရစဉ်

ဘရူနိုဖာနန်ဒက်စ်ဟာ ပြီးခဲ့တဲ့ လီဗာပူးလ်နဲ့ပွဲက အပြုအမူတွေကြောင့် ဝေဖန်မှုတွေ ပြင်းပြင်းထန်ထန် ခံခဲ့ရပြီး အသင်းခေါင်းဆောင် လက်ပတ် ပေးမဝတ်ဖို့ တောင်းဆိုမှုတွေ ရှိခဲ့တာပါ။

ဒါပေမယ့် နည်းပြ အဲရစ်တန်ဟတ်က ဘရူနိုဖာနန်ဒက်စ်ကို ကာကွယ်ပေးခဲ့ပြီး မက်ဂွဲယား ကွင်းထဲမရှိတဲ့ အချိန် မှာ ပေါ်တူဂီကစားသမားက အသင်းခေါင်းဆောင် လက်ပတ်ကို ဆက်ပြီး ဝတ်ဆင်မယ်လို့ ပြောခဲ့တာ ဖြစ်ပါတယ်။

ဘရူနိုဖာနန်ဒက်စ်ကတော့ ဝေဖန်မှုတွေကို ဘတ်စ်တစ်နဲ့ပွဲမှာ ခြေစွမ်းပြပြီး တုန့်ပြန်ခဲ့တာပါ။

အဲရစ်တန်ဟတ်က “လူအုပ်ကြီးရဲ့ တုန့်ပြန်မှုကို ကျနော် ကျေနပ်ပါတယ်။ ပထမ မိနစ်ကနေစပြီး သူတို့က အသင်း အနောက်မှာ ရှိနေပါတယ်။ အသင်းဘက်ကလည်း အကောင်းဆုံး စွမ်းဆောင်ပြီး သူတို့ကို ပြန်ပေးပါတယ်။ အသင်းနဲ့ ပရိသတ်တွေကြားမှာ ကောင်းမွန်တဲ့ ဆက်ဆံရေးရှိလို့ ဒါကို ကျနော် ကျေနပ်ပါတယ်။ ပထမပိုင်းမှာ ကတည်းက ၃ ဂိုး- ဂိုးမရှိနဲ့ အနိုင်ရသင့်ပေမယ့် အမှားတစ်ခုကြောင့် ကျနော်တို့ အပြစ်ပေး ခံခဲ့ရပါတယ်။ ဒုတိယ ပိုင်းမှာတော့ ကျနော်တို့ ကောင်းမွန်တဲ့ ဂိုးတွေ သွင်းယူနိုင်ခဲ့ပါတယ်”လို့ ပြောခဲ့တာ ဖြစ်ပါတယ်။

ယူနိုက်တက်အသင်းဟာ တနင်္ဂနွေနေ့မှာ ပရီးမီးယားလိဂ် ပွဲစဉ်အဖြစ် ဆောက်သမ်တန်အသင်းနဲ့ အိမ်ကွင်းမှာ ယှဉ်ပြိုင်ရမှာ ဖြစ်ပါတယ်။

Source: Daily Mail