- By CNI
- Category: အားကစား
- Hits: 588
လေ့ကျင့်မှုတွေ ပြန်လုပ်နေပေမယ့် အာဆင်နယ်နဲ့ပွဲမှာ ဆန်ချို မပါဝင်နိုင်
CNI Sport News
၂၀၂၃ ခုနှစ်၊ ဇန်နဝါရီ ၁၉
ယူနိုက်တက်အသင်းဟာ လေ့ကျင့်မှုတွေ ပြန်လည်ပြုလုပ်နေပြီဖြစ်တဲ့ ဆန်ချိုကို အသင်းထံ အလျင်စလိုနဲ့ ပြန်လာစေမှာ မဟုတ်တာကြောင့် အာဆင်နယ်အသင်းနဲ့ပွဲမှာ ပါဝင်နိုင်မှာ မဟုတ်ဘူးလို့ သိရပါတယ်။
ဆန်ချိုဟာ အောက်တိုဘာလကတည်းက ယူနိုက်တက် အသင်းအတွက် မကစားရသေးဘဲ ဒီဇင်ဘာလမှာ ယူနိုက်တက်နည်းပြ အကြံပြုထားတဲ့ နည်းပြတွေနဲ့အတူ နယ်သာလန်မှာ ကိုယ်ပိုင် လေ့ကျင့်မှုတွေ ပြုလုပ်ခဲ့တာ ဖြစ်ပါတယ်။
ဆန်ချိုဟာ ဒီရာသီမှာ ရုပ်ပိုင်းနဲ့ စိတ်ပိုင်းဆိုင်ရာတွေမှာ ရုန်းကန်နေရပြီး အခုနှစ်ထဲမှာ ယူနိုက်တက်ဆီ ပြန်ရောက်လာခဲ့ပေမယ့် နည်းပြက သူ့ကို ဂရုတစိုက် ကိုင်တွယ်နေတာပါ။
အင်္ဂလန် ကစားသမားဟာ ဒီတစ်ပတ်ထဲမှာ အသင်းကြီးရဲ့ လေ့ကျင့်ရေး အစီအစဉ်မှာ ပြန်လည် ပါဝင်လာခဲ့တာ ဖြစ်ပါတယ်။ ဆန်ချိုဟာ ပဲလေ့စ်အသင်းနဲ့ ကစားခဲ့တဲ့ ယူနိုက်တက်အသင်းရဲ့ လူစာရင်းထဲမှာလည်း မပါဝင်ခဲ့ ပါဘူး။
ယူနိုက်တက်အသင်းဟာ တနင်္ဂနွေနေ့မှာ ပရီးမီးယားလိဂ် ချန်ပီယံဆုကို ရယူဖို့ ပစ်မှတ်ထားနေတဲ့ အမှတ်ပေး ဇယား ထိပ်ဆုံးက အာဆင်နယ်အသင်းနဲ့ ယှဉ်ပြိုင်ရမှာ ဖြစ်ပါတယ်။
ဒေးလီးမေးလ်က ဆန်ချိုအနေနဲ့ အာဆင်နယ် အသင်းနဲ့ပွဲအတွက် လူစာရင်းမှာ ပါဝင်ခဲ့မယ်ဆိုရင် အံ့အားသင့်စရာ တွေ ဖြစ်လာလိမ့်မယ်လို့ ဖော်ပြထားတာပါ။
နည်းပြ အဲရစ်တန်ဟတ်နဲ့ ဆန်ချိုကိုတွေ့ရစဉ်
အသက် ၂၂ နှစ်အရွယ်ရှိ ဆန်ချိုဟာ လီဗာပူးလ်နဲ့ လက်စတာ အသင်းဘက်ကို ဂိုးသွင်းပြီး တောက်ပတဲ့ ရာသီ တစ်ခုကို စတင်နိုင်ခဲ့ပေမယ့် လွန်ခဲ့တဲ့ ၃ လက ချယ်လ်ဆီးအသင်းနဲ့ ၁ ဂိုးစီ သရေကျပြီး နောက်ပိုင်း အသင်း အတွက် မပါဝင်နိုင်တော့တာ ဖြစ်ပါတယ်။
ယူနိုက်တက်နည်းပြ အဲရစ်တန်ဟတ်က ဆန်ချို ပြန်လာတာကို အမြန်ဆုံး လိုချင်ပေမယ့် စိတ်ရှည်ဖို့တော့ လိုတယ်လို့ ပြောခဲ့တာပါ။
အဲရစ်တန်ဟတ်က “ဖြစ်နိုင်မယ်ဆိုရင် ဂျေဒန် အမြန်ဆုံး အသင်းအတွက် ပြန်လာတာကို လိုချင်ပါတယ်။ ကျနော့် မှာရှိတဲ့ အရာတွေအတိုင်း အားလုံးကို လုပ်ဆောင်မှာပါ။ ဒါပေမယ့် အတင်းအကြပ် လုပ်လို့မရတဲ့ လုပ်ငန်းစဉ် တချို့ရှိနေပြီး ဒါကလည်း ဒီထဲမှာ ပါဝင်နေတဲ့ အရာပါ။ ဒါကြောင့် စိတ်ရှည်ဖို့ လိုပါတယ်။ သူက မှန်ကန်တဲ့ လမ်း ကြောင်းပေါ်မှာ ရှိနေပေမယ့် ဒီအချိန်မှာ မလုံလောက်ပါဘူး။ သူအမြန်ဆုံး ပြန်လာဖို့ မျှော်လင့်ပေမယ့် ဘယ် လောက် ကြာမယ်ဆိုတာ မပြောနိုင်ပါဘူး”လို့ အခုလ အစောပိုင်းက ပြောထားတာ ဖြစ်ပါတယ်။
၂၀၂၁ ခုနှစ်က ဒေါ့မွန်ကနေ ရောက်ရှိလာတဲ့ ဆန်ချိုဟာ ယူနိုက်တက်အသင်းအတွက် ၅၂ ပွဲ ပါဝင်ကစားထားပြီး ၈ ဂိုး သွင်းယူထားတာ ဖြစ်ပါတယ်။
Source: Metro
- By CNI
- Category: အားကစား
- Hits: 723
CNI Sport News
၂၀၂၃ ခုနှစ်၊ ဇန်နဝါရီ ၁၉
စပိန်တင်းနစ် ကစားသမား ရာဖေးလ်နာဒယ်လ်ဟာ ဩစတြေးလျ အိုးပန်းပြိုင်ပွဲကနေ ထွက်ခွာချိန်မှာ ရခဲ့တဲ့ တင်ပါးဒဏ်ရာကြောင့် ၆ ပတ်ကနေ ၈ ပတ်အထိ အနားယူရဖွယ် ရှိနေတယ်လို့ ပြောလိုက်ပါတယ်။
ရာဖေးလ်နာဒယ်လ်က “အခုအချိန်မှာ အနားယူရမှာဖြစ်ပြီး ရောင်ရမ်းနေမှုကို သက်သာစေဖို့အတွက် ရုပ်ပိုင်း ဆိုင်ရာ ကုထုံးခံယူရဖို့ အချိန်ရောက်ပါပြီ။ ပုံမှန်အတိုင်း ပြန်လည် ကောင်းမွန်ဖို့အတွက် ၆ ပတ်ကနေ ၈ ပတ် ကြာ နိုင်ပါတယ်”လို့ ကြာသပတေးနေ့က တွစ်တာမှာ ရေးသားခဲ့တာ ဖြစ်ပါတယ်။
ဂရမ်းဆလမ်း ချန်ပီယံဆုကို ၂၂ ကြိမ် ရရှိထားတဲ့ ရာဖေးလ်နာဒယ်လ်ဟာ ဩစတြေးလျ အိုးပန်းပြိုင်ပွဲရဲ့ ဒုတိယ အဆင့်မှာ အမေရိကန် တင်းနစ်ကစားသမား မက်ဒိုနယ်လ်ကို ၆-၄၊ ၆-၄၊ ၇-၅ နဲ့ အရေးနိမ့်ခဲ့တာပါ။
ဒီပွဲမှာ ရာဖေးလ်နာဒယ်လ်ဟာ ဒဏ်ရာတွေကြောင့် ရုန်းကန်ခဲ့ရပြီး ပုံမှန်လက်စွမ်း မပြသနိုင်ခဲ့တာ ဖြစ်ပါတယ်။
ရာဖေးလ်နာဒယ်လ်ကိုတွေ့ရစဉ်
ရာဖေးလ်နာဒယ်လ်ဟာ သူ့ရဲ့ ဘယ်ဘက်တင်ပါးကို မဲလ်ဘုန်းမှာ MRI စကန်ရိုက်ခဲ့ပြီးနောက် စပိန်နိုင်ငံကို ပြန် အရောက်မှာ ရုပ်ပိုင်းဆိုင်ရာ ကုထုံးကို စတင်ကုသဖို့ စီစဉ်ထားတာပါ။
ဩစတြေးလျအိုးပန်းပြိုင်ပွဲရဲ့ လက်ရှိချန်ပီယံဖြစ်တဲ့ ရာဖေးလ်နာဒယ်လ် အနေနဲ့ ဒဏ်ရာကနေ ပြန်လည် သက်သာပြီး ကြံ့ခိုင်မှုပြည့်ဝမယ်ဆိုရင် ၂၀၂၃ ရာသီရဲ့ ပထမဆုံး မာစတာပြိုင်ပွဲအဖြစ် မတ်လမှာ ကျင်းပမယ့် အင်ဒီးယန်းဝဲလ် ပြိုင်ပွဲကို ဝင်ရောက် ယှဉ်ပြိုင်နိုင်တယ်လို့ သတင်းမှာ ဖော်ပြထားတာ ဖြစ်ပါတယ်။
မြေစေးကွင်း ဘုရင်အဖြစ် တင်စားခြင်း ခံထားရတဲ့ ရာဖေးလ်နာဒယ်လ်ဟာ ဒီပြိုင်ပွဲတွေမှာ မပါဝင်နိုင်ခဲ့ရင် ပြင်သစ်အိုးပန်းပြိုင်ပွဲမှာတော့ ပါဝင်နိုင်ဖို့ မျှော်လင့်နေတာပါ။
ရာဖေးလ်နာဒယ်လ်ဟာ ပြင်သစ်အိုးပန်းပြိုင်ပွဲရဲ့ လက်ရှိချန်ပီယံဖြစ်သလို ၁၄ ကြိမ်အထိ ဗိုလ်စွဲထားကာ စံချိန် တင် ၁၅ ကြိမ်မြောက် ရယူဖို့ ပစ်မှတ်ထားနေတာလည်း ဖြစ်ပါတယ်။
Source: BBC
- By CNI
- Category: အားကစား
- Hits: 653
CNI International News
၂၀၂၃ ခုနှစ်၊ ဇန်နဝါရီ ၁၉
မက်ဆီဟာ အာဂျင်တီးနားအသင်းကို ကမ္ဘာ့ဖလား ရယူနိုင်အောင် ဦးဆောင်နိုင်ခဲ့ပြီးနောက် ဂုဏ်ပြုမှု အမျိုးမျိုး ခံခဲ့ရတာမှာ နောက်ဆုံးတစ်ခု အနေနဲ့ သူ့ရဲ့မျက်နှာနဲ့ ပုံဖော်ထားတဲ့ ပြောင်းဖူးခင်းကို မြင်တွေ့ခဲ့ရတာ ဖြစ်ပါတယ်။
လယ်သမားတစ်ဦးဟာ ကော်ဒိုဘာပြည်နယ် အလယ်ပိုင်းရှိ လယ်ကွင်းမှာ အယ်လ်ဂိုရီသမ်ကို အသုံးပြုပြီး မျိုးစေ့ ချခဲ့ပြီး မက်ဆီရဲ့မျက်နှာကို ပုံဖော် စိုက်ပျိုးခဲ့ပါတယ်။ ဒီလို စိုက်ပျိုးထားရာကနေ ပြောင်းဖူးခင်းတွေ ကြီးထွား လာချိန်မှာ မက်ဆီရဲ့ကြီးမားတဲ့ ပုံရိပ်ကို မြင်တွေ့ခဲ့ရတာပါ။
ဒါကို လုပ်ဆောင်သူ စပီနာဇီက “ကျနော့်အတွက်တော့ မက်ဆီက အနိုင်ယူဖို့ ခက်ခဲတဲ့သူပါ။ အခုသူတို့က ကမ္ဘာ့ချန်ပီယံတွေ ဖြစ်သွားပါပြီ။ ဒါကို ဒီလိုစိုက်ပျိုးပြီး ဖော်ထုတ်နိုင်ခဲ့တဲ့အတွက် ကျနော်ဝမ်းသာပါတယ်”လို့ ပြောပါတယ်။
ဘောလုံးကို ရူးသွပ်တဲ့ တောင်အမေရိကနိုင်ငံရဲ့ အဓိက လုပ်ငန်းဟာ စိုက်ပျိုးရေး လုပ်ငန်းဖြစ်ပါတယ်။ ဒါကြောင့် လည်း ကမ္ဘာ့တတိယ အကြီးမားဆုံး ပြောင်းတင်ပို့သူတွေ ဖြစ်နေတာပါ။
မက်ဆီကိုတွေ့ရစဉ်
လယ်ယာလုပ်ငန်းဟာ သူတို့ရဲ့ ပို့ကုန်မောင်းနှင်မှုဖြစ်ပြီး သူတို့ရဲ့ လုပ်ဆောင်နိုင်တဲ့ အရာနဲ့ ဘောလုံးကို ပံ့ပိုး ပေးခဲ့တာပါ။ လယ်ယာအင်ဂျင်နီယာ တစ်ဦးဖြစ်တဲ့ ကားလို့စ်ဟာ မျိုးစေ့တွေကို ကြဲတဲ့စက်တွေအတွက် ကုဒ် နံပတ်တွေကို ရေးဆွဲခဲ့ပြီး နောက်ဆုံးပုံသဏ္ဍာန်ကို ဖော်ဆောင်နိုင်ဖို့ ဖန်တီးကာ တိကျတဲ့ပုံစံတွေနဲ့ စိုက်ပျိုးနိုင် ခဲ့တာ ဖြစ်ပါတယ်။
ကားလို့စ်က “ကျနော်ကတော့ မက်ဆီရဲ့ မျက်နှာကို ဂုဏ်ပြုဖို့အတွက် မျိုးစေ့ထည့်တဲ့ ကုဒ်တစ်ခုကို ဖန်တီးဖို့ စိတ်ကူးရှိခဲ့ပါတယ်။ ဒါကို စိုက်ချင်တဲ့ လယ်သမားတွေအတွက် ကုဒ်ကို ထုတ်ပေးခဲ့ပါတယ်”လို့ ပြောခဲ့တာပါ။
မက်ဆီရဲ့ မျက်နှာ အစိတ်အပိုင်း အသီးသီးအတွက် ခြားနားမှုကို ဖန်တီးနိုင်ဖို့ တစ်စတုရန်းမီတာမှာ မျိုးစေ့တွေ ဘယ်လောက် ထည့်ရမလဲဆိုတာ စက်ယန္တရားတွေက သိတယ်လို့လည်း သူက ပြောခဲ့တာ ဖြစ်ပါတယ်။
အာဂျင်တီးနားအသင်းဟာ ပြီးခဲ့တဲ့ ၂၀၂၂ ကမ္ဘာ့ဖလားဗိုလ်လုပွဲမှာ ပြင်သစ်အသင်းကို ပင်နယ်တီ အဆုံးအဖြတ်မှာ အနိုင်ရပြီး ချန်ပီယံဆုကို ၃ ကြိမ်မြောက်အဖြစ် ရယူနိုင်ခဲ့တာပါ။
မက်ဆီကလည်း ဒီပြိုင်ပွဲမှာ ပြသခဲ့တဲ့ စွမ်းဆောင်ရည်တွေကြောင့် ပြိုင်ပွဲရဲ့ အကောင်းဆုံး ကစားသမားဆုကို ရယူနိုင်ခဲ့တာ ဖြစ်ပါတယ်။
- By CNI
- Category: အားကစား
- Hits: 491
CNI Sport News
၂၀၂၃ ခုနှစ်၊ ဇန်နဝါရီ ၁၉
ယူနိုက်တက်၏ အဓိကကွင်းလယ်လူ ကတ်စမဲရိုးဟာ အာဆင်နယ်နဲ့ ပွဲမှာ ပွဲပယ်ခံရမှာဖြစ်ပေမယ့် သူမပါတဲ့ ပထမအကျော့မှာတောင် အာဆင်နယ်ကို အနိုင်ရခဲ့တယ်လို့ နည်းပြ အဲရစ်တန်ဟတ်က ပြောလိုက်ပါတယ်။
အဲရစ်တန်ဟတ်က “နောက်ဆုံးတွေ့ဆုံတုန်းက ကတ်စမဲရိုးမပါဝင်ဘဲ ကျနော်တို့ သူ့တို့ကို အနိုင်ရခဲ့ပါတယ်။ အခုလည်းဒီလိုပဲ ကျနော်တို့ထပ်ပြီးလုပ်ဆောင်ရမှာပါ။သူက ကျနော်တို့အတွက် တကယ်ကို အရေးကြီးတဲ့ ကစားသမားပါ။ဒါက ကျနော်တို့ အခုအနေအထားမှာရှိနေတဲ့ အကြောင်းရင်းပါပဲ။ကျနော်တို့ အနိုင်ရပြီး ပွဲကို ထိန်းချုပ်နိုင်ခဲ့ပေမယ့် ကံမကောင်းခဲ့တဲ့ အချိန်တွေရှိခဲ့ပါတယ်။ကျနော်တို့ဟာ ရှေ့ဆက်သွားပြီး အာဆင်နယ်နဲ့ ပွဲအတွက် အစီအစဉ်ကို လုပ်ရပါမယ်” လို့ ပြောခဲ့တာပါ။
ယူနိုက်တက်အသင်းဟာ ဒီပွဲမှာ ဘရူနိုဖာနန်ဒက်စ်ရဲ့ ဂိုးနဲ့ ဦးဆောင်နိုင်ခဲ့ပေမယ့် မိနစ် ၉၀ ပြည့်ပြီး နာကျင် အချိန်ပိုမှာ အိုလီဆီက ပဲလေ့စ့်အတွက် ချေပဂိုးသွင်းယူခဲ့လို့ ၁ ဂိုးစီသရေရလဒ်နဲ့ ပြီးဆုံးခဲ့တာ ဖြစ်ပါတယ်။ ကတ်စမဲရိုးဟာ ပွဲချိန်မိနစ် ၈၀ မှာ အဝါကတ်ပြသခံခဲ့ရတာဖြစ်ပြီး ပရီးမီးယားလိဂ်စည်းမျဉ်းအရ အဝါကတ် ပြသခံရတာ ၅ ကြိမ်ပြည့်တဲ့ ကစားသမားဟာ ၁ ပွဲပယ်ခံရမှာပါ။အဲဒါကြောင့် ကတ်စမဲရိုးဟာ ဒုတိယအကျော့ အာဆင်နယ်နဲ့ပွဲကို ပါဝင်နိုင်တော့မှာ မဟုတ်ပါဘူး။
ဒီဂီယာကတော့ “ကတ်စမဲရိုးကို ဆုံးရှုံးရတာဟာ အသင်းအတွက် ကြီးမားတဲ့ထိုးနှက်ချက်”လို့ ပြောခဲ့ပါတယ်။ အာဆင်နယ်နဲ့ပွဲမှာ ကတ်စမဲရိုးကို ဆုံးရှုံးရမှာက ကျနော်တို့အတွက် ကြီးမားတဲ့ထိုးနှက်ချက်ပါပဲ။အခု ပွဲကြီး ပွဲကောင်းမှာ ကျနော်တို့ရဲ့ အဓိကကစားသမားကို ဆုံးရှုံးရတော့မယ်၊ဒါက ကြီးမားတဲ့ ဆုံးရှုံးမှုပါ”လို့ ဒီဂီယာက ပြောခဲ့တာဖြစ်ပါတယ်။
အသက် ၃၀ အရွယ်ရှိ ကတ်စမဲရိုးဟာ ရီးရယ်လ်အသင်းကနေ ပေါင်သန်း ၇၀ နဲ့ ရောက်ရှိလာပြီးကတည်းက ယူနိုက်တက်အသင်း ရလဒ်ကောင်းတွေ ရယူနိုင်ခဲ့တာမှာ အဓိကအခန်းကဏ္ဍကနေ ပါဝင်ခဲ့တာပါ။ ယူနိုက်တက် အသင်းဟာ နောက်ဆုံးကစားထားတဲ့ ပြိုင်ပွဲစုံ ၂၀ မှာ ၁ ပွဲသာ ရှုံးနိမ့်ထားပြီး ပဲလေ့စ်အသင်းကို သရေကျခဲ့တာ ကြောင့် ထိပ်ဆုံးက အာဆင်နယ်နဲ့ ၈ မှတ်အကွာ အဆင့် ၃ နေရာမှာ ရပ်တည်နေတာဖြစ်ပါတယ်။
ယူနိုက်တက်အသင်းဟာ ဒီရာသီ ပရီးမီးယားလိဂ်မှာ အာဆင်နယ်အသင်းကို အနိုင်ယူထားတဲ့ တစ်သင်းတည်း သောအသင်းဖြစ်ပြီး ပထမအကျော့အဖြစ် ကစားခဲ့တုန်းက ၃ ဂိုး- ၁ ဂိုးနဲ့ အနိုင်ရခဲ့တာဖြစ်ပါတယ်။
Source:BBC
- By CNI
- Category: အားကစား
- Hits: 735
CNI Sport News
၂၀၂၃ ခုနှစ်၊ ဇန်နဝါရီ ၁၈
ရုရှားလက်ရွေးစင်အသင်း နည်းပြဟောင်း ဆလပ်စကီးက ချယ်လ်ဆီးအသင်းဟာ ယူကရိန်းကြယ်ပွင့် မူဒရစ်ကို ခေါ်ယူခဲ့တာမှာ ပြောင်းရွှေ့ကြေး ပိုပြီးပေးခဲ့ရတယ်လို့ ပြောပါတယ်။
ဒီလို ငွေကြေး ပိုပေးရခြင်းက အန္တရာယ်များတယ်လို့လည်း သူက ဆက်ပြောပါတယ်။
ဆလပ်စကီးက “ချန်ပီယံလိဂ်မှာ ပွဲအများအပြား ကစားဖူးတဲ့ ကစားသမားတစ်ဦးအတွက် ယူရိုသန်း ၁၀၀ က ဘယ်လိုဖြစ်သွားတာလဲ။ ဒီအပြောင်းအရွှေ့ကို ကျနော် နားမလည်နိုင်ပါဘူး။ ချယ်လ်ဆီးက အနာဂတ်အတွက် အသင်း မဟုတ်ပါဘူး။ သူတို့ဟာ လက်ရှိမှာ ရှိနေတဲ့အသင်း ဖြစ်ပါတယ်။ အနာဂတ်အတွက် ကစားသမားတစ်ဦး ကို သန်း ၁၀၀ လောက် မကုန်ကျသင့်ပါဘူး။ ဒါက မရိုးရှင်းနိုင်ပါဘူး”လို့ YouTube Chanel တစ်ခုကို ပြောပါ တယ်။
ချယ်လ်ဆီးအသင်းဟာ မူဒရစ်အတွက် ပြောင်းရွှေ့ကြေး ယူရိုသန်း ၇၀ နဲ့ သဘောတူညီမှု ရယူနိုင်ခဲ့ပေမယ့် ကစားသမားရဲ့ စွမ်းဆောင်ရည်၊ အပိုဆုကြေးတွေ အပေါ် အခြေခံပြီး ပြောင်းရွှေ့ကြေးဟာ ယူရိုသန်း ၁၀၀ အထိ မြင့် တက်သွားနိုင်ပါတယ်။
ရုရှားအသင်းနည်းပြ ဆလပ်စကီးကိုတွေ့ရစဉ်
ချယ်လ်ဆီးအသင်းဟာ မူဒရစ်ကို အာဆင်နယ်အသင်းနဲ့ အပြိုင် ခေါ်ယူခဲ့တာဖြစ်ပြီး ၈ နှစ်ခွဲ စာချုပ်ချုပ်ဆိုခဲ့တာပါ။
မူဒရစ်ဟာ ကလပ်အသင်းအတွက် ၆၅ ပွဲသာ ကစားထားတာဖြစ်ပြီး ဒီလို ကစားသမားမျိုးကို ပြောင်းရွှေ့ကြေး ကြီးကြီးမားမား ပေးပြီး ခေါ်ယူတာက ချယ်လ်ဆီးအတွက် အန္တရာယ်ရှိတယ်လို့လည်း ရုရှားနည်းပြဟောင်းက ပြောခဲ့တာ ဖြစ်ပါတယ်။
ဆလပ်စကီးက “မူဒရစ်မှာ အံ့သြစရာကောင်းတဲ့ မြန်နှုန်းရှိပြီး ဒါက ပြောနေစရာတောင် မလိုပါဘူး။ သူက ကျနော့် အတွက်ရော၊ အခုအချိန်မှာရော အလွန်ကောင်းတဲ့ ကစားသမားပါ။ အာဆင်နယ်က သူ့ကို စိတ်ဝင်စားတာကြောင့် ချယ်လ်ဆီးက သူ့ကိုသန်း ၁၀၀ ပေးခဲ့ပါတယ်။ ဒါပေမယ့် ဒါက အန္တရာယ်များပါတယ်”လို့ ပြောခဲ့တာပါ။
ပဲလေ့စ်အသင်းကို အနိုင်ရခဲ့တဲ့ ပရီးမီးယားလိဂ်ပွဲမှာ ချယ်လ်ဆီး ကစားသမားသစ်အဖြစ် တရားဝင် မိတ်ဆက်ခဲ့တဲ့ မူဒရစ်ဟာ ဒီတစ်ပတ်ကစားမယ့် လီဗာပူးလ်နဲ့ပွဲစဉ်မှာ ချယ်လ်ဆီးအတွက် ပွဲဦးထွက်အဖြစ် ပါဝင်လာနိုင်တာ ဖြစ်ပါတယ်။
Source: အာတီ
- By CNI
- Category: အားကစား
- Hits: 768
CNI Sport News
၂၀၂၃ ခုနှစ်၊ ဇန်နဝါရီ ၁၈
သြစတြေးလျအိုပန်းပြိုင်ပွဲရဲ့ လက်ရှိချန်ပီယံ ရာဖေးလ်နာဒယ်လ်ဟာ ပြိုင်ပွဲရဲ့ ဒုတိယအဆင့်မှာ အမေရိကန် တင်းနစ်ကစားသမား မက်ဒိုနယ်လ်ကို အရေးနိမ့်ပြီး ပြိုင်ပွဲကနေ ထွက်ခွာသွားခဲ့ရပြီ ဖြစ်ပါတယ်။
အသက် ၃၆ နှစ်အရွယ်ရှိ စပိန်တင်းနစ်သမားဟာ ဒီပွဲမှာ ဒဏ်ရာတွေကြောင့် ကောင်းမွန်စွာ ကစားဖို့ ရုန်းကန် ခဲ့ရပြီး ဒုတိယပွဲအပြီးမှာ ဆေးကုသမှုအချိန် ကုန်သွားခဲ့တာကြောင့် ပွဲကိုဆက်ပြီး ကစားခဲ့ရတာပါ။
အဲ့ဒါကြောင့် ရာဖေးနာဒယ်လ်ဟာ ၆-၄၊ ၆-၃၊ ၇-၅ နဲ့အရေးနိမ့်ကာ ပြိုင်ပွဲကနေ ထွက်ခွာခဲ့ရတာ ဖြစ်ပါတယ်။ ရာဖေးလ်နာဒယ်လ် အတွက်တော့ ၂၀၁၆ နောက်ပိုင်း သြစတြေးလျအိုးပန်းကနေ အစောဆုံး ထွက်ခွာခဲ့ရတာပါ။
မက်ဒိုနယ်လ်က ရာဖေးလ်နာဒယ်လ်ဟာ ဒဏ်ရာ ရရှိနေပေမယ့် ပြိုင်ပွဲဝင်ဖို့ ဆန္ဒအပြည့်အဝ ရှိနေတာကြောင့် အလွန်လေးစားပြီး ချီးကျူးတယ်လို့ ပွဲအပြီးမှာ ပြောခဲ့ပါတယ်။
“သူဟာ မယုံနိုင်လောက်အောင် ကောင်းမွန်တဲ့ ချန်ပီယံတစ်ဦးပါ။ သူဟာ ဘယ်လို အခြေအနေ မျိုးမှာပဲဖြစ်ဖြစ် အရှုံးမပေးပါဘူး။ ဒါကြောင့် ဒီလို ထိပ်တန်းအဆင့် ရှိတဲ့သူနဲ့ ရင်ဆိုင်ရတာဟာ ခက်ခဲပါတယ်။ ကျနော်ဟာ ကိုယ့်ကိုယ်ကိုပဲ အာရုံစိုက်ပြီး ကျော်ဖြတ်နိုင်ခဲ့ပါတယ်”လို့ မက်ဒိုနယ်လ်က ပြောခဲ့တာပါ။
ရာဖေးလ်နာဒယ်လ်နဲ့ ပြိုင်ဘက်ကစားသမား နှုတ်ဆက်နေကြစဉ်
မက်ဒိုနယ်လ်ဟာ တတိယအဆင့်မှာ နီရှီအိုကာနဲ့ ဆဗာစီနာတို့ ပွဲစဉ်က အနိုင်ရတဲ့သူနဲ့ ယှဉ်ပြိုင်မှာ ဖြစ်ပါတယ်။
အသက် ၂၇ နှစ်အရွယ်ရှိ အမေရိကန် တင်းနစ်သမားဟာ သြစတြေးလျ အိုးပန်းပြိုင်ပွဲမှာ အမြင့်ဆုံးအဖြစ် စတုတ္တ အဆင့်ထိသာ တက်နိုင်ခဲ့တာပါ။ မက်ဒိုနယ်လ်အတွက်တော့ ဂရမ်းစလမ်းပြိုင်ပွဲတွေမှာ အအောင်မြင်ဆုံးက စတုတ္တအဆင့်ထိသာ တက်နိုင်ခဲ့တာလည်း ဖြစ်ပါတယ်။
၂၀၂၃ သြစတြေးလျ အိုးပန်းပြိုင်ပွဲကို ဇန်နဝါရီ ၁၆ ရက်ကနေ ၂၉ ရက်အထိ ကျင်းပနေပြီး အမျိုးသားတစ်ဦးချင်း ပြိုင်ပွဲမှာ နာမည်ကြီး ကစားသမားတွေဖြစ်တဲ့ ဂျိုကိုဗစ်၊ ကတ်စပါရုဒ်၊ ဆစ်စီပတ်စ်၊ ရူဘလက်ဗ်နဲ့ မက်ဗီဒက်ဗ်တို့ ပါဝင်ယှဉ်ပြိုင်နေတာ ဖြစ်ပါတယ်။
Source: BBC
- By CNI
- Category: အားကစား
- Hits: 746
CNI Sport News
၂၀၂၃ ခုနှစ်၊ ဇန်နဝါရီ ၁၈
မက်ဆီ ဦးဆောင်တဲ့ အာဂျင်တီးနားအသင်းဟာ ဖီဖာခြေစမ်းပွဲကစားဖို့ ဇွန်လအတွင်းမှာ ဘင်္ဂလားဒေ့ရှ်ကို လာရောက်ဖို့ ရှိတယ်လို့ ဘင်္ဂလားဒေ့ရှ်ဘောလုံးအဖွဲ့ချုပ်ဥက္ကဋ္ဌ ကာဇီဆာလာဟူဒင်က ပြောပါတယ်။
ကာဇီဆာလာဟူဒင်က “ဘင်္ဂလားဒေ့ရှ်ကို လာရောက်မယ့် အာဂျင်တီးနားအသင်းရဲ့ ခရီးစဉ်ဟာ အပြီးသတ်လု နီးပါး ဖြစ်နေပါပြီ။ ဖီဖာရဲ့ နိုင်ငံတကာပွဲစဉ်တွေ ကစားဖို့ သတ်မှတ်ထားတဲ့ ဇွန်လထဲမှာ လာမယ်လို့ သူတို့က ကျနော်တို့ကို အကြောင်းကြားထားပါတယ်။ အခုဆွေးနွေးထားတဲ့ အရာတွေအားလုံး အဆင်ပြေရင်တော့ သူတို့ လာမယ်ဆိုတာ ပြောလို့ရတယ်”လို့ ပြောခဲ့တာပါ။
ဘင်္ဂလားဒေ့ရှ်မှာရှိတဲ့ ပရိသတ်တွေဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲ တစ်လျှောက် ချန်ပီယံဖြစ်ခဲ့တဲ့ အာဂျင်တီးနားအသင်းကို အမာခံ အားပေးခဲ့ကြတာဖြစ်ပြီး ကမ္ဘာပေါ်မှာရှိတဲ့ မီဒီယာတွေမှာ သူတို့ရဲ့ အောင်ပွဲခံ ပုံတွေဟာ ပျံ့နှံ့ခဲ့တာ ဖြစ်ပါတယ်။
ဘင်္ဂလားဒေ့ရှ်က အာဂျင်တီးနားအသင်း ပရိသတ်များကိုတွေ့ရစဉ်
အဲ့ဒါကြောင့် ဘင်္ဂလားဒေ့ရှ် ဘောလုံးအဖွဲ့ချုပ်ဟာ အာဂျင်တီးနား လက်ရွေးစင်အသင်းကို နိုင်ငံအတွင်း ခေါ်ဆောင်ဖို့ ဆွေးနွေးမှုတွေကို အရှိန်အဟုန်နဲ့ လုပ်ဆောင်လာခဲ့တာပါ။
ဒီပွဲကို လက်ခံကျင်းပဖို့အတွက် ဘန်ဂါဘန်ဒူ အမျိုးသားအားကစားကွင်းကို ပြုပြင်မွမ်းမံမှုတွေ ပြုလုပ်နေတယ်လို့ သတင်းမှာ ဖော်ပြထားတာ ဖြစ်ပါတယ်။
လက်ကျန် လုပ်ဆောင်နေမှုတွေကို ဇွန်လမှာ အပြီးသတ်ဖို့ အမျိုးသား အားကစားကောင်စီက သဘောတူခဲ့တယ် လို့ ဆာလာဟူဒင်က ပြောခဲ့တာပါ။ အာဂျင်တီးနား ဘက်ကတော့ ၂၀၂၃ အတွင်း သူတို့ကစားမယ့် ပွဲစဉ်တွေနဲ့ ပတ်သက်ပြီး မကြာခင်မှာ ထုတ်ပြန်လာဖို့ ရှိနေတာ ဖြစ်ပါတယ်။
အာဂျင်တီးနားအသင်း ဘင်္ဂလားဒေ့ရှ်ကို နောက်ဆုံး လာရောက်ခဲ့တာက ၂၀၁၁ ခုနှစ်၊ စက်တင်ဘာ ၆ ရက်က ဖြစ်ပြီး နိုင်ဂျီရီးယားအသင်းနဲ့ ခြေစမ်းပွဲ ကစားခဲ့တာ ဖြစ်ပါတယ်။
Source: dhakatribune
- By CNI
- Category: အားကစား
- Hits: 528
CNI Sport News
၂၀၂၃ ခုနှစ်၊ ဇန်နဝါရီ ၁၈
ဗြိတိန်ဘီလျံနာ ဆာဂျင်မ်ရက်ကလစ်ဖ်ရဲ့ ကုမ္ပဏီ Ineos က သူတို့ဟာ ယူနိုက်တက်ကို ဝယ်ယူဖို့ တရားဝင် ကမ်းလှမ်းလိုက်ပြီလို့ ပြောလိုက်ပါတယ်။
ယူနိုက်တက်ပိုင်ရှင် ဂလေဇာ မိသားစုက သူတို့ဟာ မဟာဗျူဟာမြောက်တဲ့ အခြားရွေးချယ်စရာတွေကို ရှာဖွေနေတာကြောင့် ကလပ်ကို ရောင်းချဖို့ စဉ်းစားနေတယ်လို့ နိုဝင်ဘာလက ပြောထားခဲ့တာပါ။
ရက်ကလစ်ဖ်ဟာ ငယ်ဘဝကတည်းက ယူနိုက်တက်အသင်းရဲ့ အမာခံ ပရိသတ်ဖြစ်ပြီး ဗြိတိန်ရဲ့ အချမ်းသာဆုံး ပုဂ္ဂိုလ်လည်း ဖြစ်ပါတယ်။ ရက်ကလစ်ဖ်ဟာ အေဘရာမိုဗစ်ချ်က ချယ်လ်ဆီးအသင်းကို ရောင်းချဖို့ ဆုံးဖြတ်ပြီး နောက် ပေါင် ၄.၂၅ ဘီလီယံနဲ့ ကမ်းလှမ်းခဲ့ပေမယ့် မအောင်မြင်ခဲ့တာပါ။
ရက်ကလစ်ဖ်ဟာ ချယ်လ်ဆီးအသင်းကို ဝယ်ယူဖို့ မအောင်မြင်ပြီးနောက် ယူနိုက်တက်ကို ဝယ်ယူဖို့ ကြိုးစားလာခဲ့ ပါတယ်။
ဒီနောက်မှာတော့ ဂျိုရယ်လ်နဲ့ အေဗရန်ဂလေဇာတို့ ညီအစ်ကိုနှစ်ဦးနဲ့ တွေ့ဆုံခဲ့ပါတယ်။ အဲ့ဒီတုန်းက မရောင်းချချင်ဘူးလို့ ပြောခဲ့တာကြောင့် ဗြိတိန်ဘီလျံနာဟာ နောက်ဆုတ် သွားခဲ့တာ ဖြစ်ပါတယ်။
အခုအချိန်မှာတော့ ဂလေဇာမိသားစုရဲ့ ရပ်တည်ချက် ပြောင်းလဲလာတာကြောင့် ဝယ်ယူဖို့ လုပ်ငန်းစဉ်တွေမှာ ပါဝင်လာခဲ့တာပါ။
ယူနိုက်တက်အသင်းကိုတွေ့ရစဉ်
Ineos အဖွဲ့ဟာ ပြင်သစ်ကလပ် နိုက်စ်နဲ့ ဆွစ်ဇာလန်ကလပ် လူဇန်အသင်းတို့ကို ပိုင်ဆိုင်ထားတာ ဖြစ်ပါတယ်။
၂၀၀၅ ကတည်းက ယူနိုက်တက်အသင်းကို ပိုင်ဆိုင်ခဲ့တဲ့ ဂလေဇာ မိသားစုဟာ ပရိသတ်တွေရဲ့ ဆန့်ကျင် ကန့်ကွက်မှုတွေကြောင့် အသင်းကို အမြန်ဆုံး ရောင်းချနိုင်ဖို့ လုပ်ဆောင်နေတာပါ။
ယူနိုက်တက် ပရိသတ်တွေဟာ ဂလေဇာမိသားစုကို ဆန့်ကျင်တဲ့ ဆန္ဒပြမှုတွေကို မကြာသေးခင်က နှစ်တွေမှာ အများအပြား ပြသထားကြတာ ဖြစ်ပါတယ်။
ယူနိုက်တက်အသင်းက “ဘုတ်အဖွဲ့ဟာ ကလပ်ထံကို ရင်းနှီးမြှုပ်နှံမှုအသစ်၊ ရောင်းချတာ ဒါမှမဟုတ် ကုမ္ပဏီနဲ့ ပတ်သက်တဲ့ အခြားလွှဲပြောင်းမှုတွေ အပါအဝင် ဗျူဟာမြောက် ရွေးချယ်စရာတွေကို ထည့်သွင်းစဉ်းစား သွား မယ်”လို့ နိုဝင်ဘာလက ထုတ်ပြန်ခဲ့တာ ဖြစ်ပါတယ်။
ယူနိုက်တက်အသင်းဟာ ဒီရာသီ နည်းပြ အဲရစ်တန်ဟတ် လက်ထက်မှာ အကောင်းဆုံးပုံစံ ပြန်လည်ရရှိနေပြီး ပရီးမီးယားလိဂ် အမှတ်ပေးဇယား အဆင့် ၄ နေရာမှာ ရပ်တည်နေတာ ဖြစ်ပါတယ်။
Source: BBC
- By CNI
- Category: အားကစား
- Hits: 643
CNI Sport News
၂၀၂၃ ခုနှစ်၊ ဇန်နဝါရီ ၁၇
ယူနိုက်တက်အသင်းဟာ ရက်ရှ်ဖို့ဒ်နဲ့ ၅ နှစ် စာချုပ်သစ်အတွက် ဆွေးနွေးမှုတွေ ပြုလုပ်နေပေမယ့် တစ်ပတ်ပေါင် ၃၀၀,၀၀၀ သိန်းထက်ပိုပြီး မပေးချင်ဘူးလို့ သိရပါတယ်။
ယူနိုက်တက်အသင်းဟာ လစာပေးချေဖို့နဲ့ ပတ်သက်ပြီး ပြန်လည် ပြုပြင်ထားတဲ့ အရာကို မချိုးဖျက်ချင်တာ ကြောင့် ဖြစ်ပါတယ်။
ယူနိုက်တက်အသင်းဟာ ဆန်းချက်ဇ်ကို ခေါ်ယူခဲ့တုန်းက တစ်ပတ်လုပ်ခ ပေါင် ၅၀၀,၀၀၀ ပေးခဲ့ရလို့ အသင်း အတွင်း အဆင်မပြေမှုတွေ ရှိခဲ့တာကြောင့် ကစားသမားတစ်ဦးကို ပေါင် ၃၀၀,၀၀၀ သိန်းထက် ကျော်လွန်ပြီး မပေးချင်တော့တာပါ။
ယူနိုက်တက်အသင်းဟာ ပြီးခဲ့တဲ့ နှစ်တွေမှာ ရော်နယ်ဒိုနဲ့ ပေါ့ဘာတို့ကို လုပ်ခလစာ အများကြီးပေးခဲ့ရတာ ဖြစ်ပါတယ်။
အသက် ၂၅ နှစ်အရွယ်ရှိ ရက်ရှ်ဖို့ဒ်ဟာ လက်ရှိအချိန်မှာ တစ်ပတ်လုပ်ခပေါင် ၂၀၀,၀၀၀ ရရှိနေပြီး စာချုပ်သစ် အတွက် လစာရဲ့ ၅၀ ရာခိုင်နှုန်း တိုးပေးဖို့ ရှိနေတာပါ။
ရက်ရှ်ဖို့ကို တွေ့ရစဉ်
ယူနိုက်တက်အသင်းရဲ့ လုပ်ခလစာ အများဆုံး ရရှိတဲ့ ကစားသမားက ဂိုးသမား ဒီဂီယာဖြစ်ပြီး တစ်ပတ်လုပ်ခ ပေါင် ၃၇၅,၀၀၀ သိန်း ရရှိနေတာ ဖြစ်ပါတယ်။
ဒါပေမယ့် ဒီဂီယာနဲ့ ယူနိုက်တက်တို့ ချုပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးတော့မှာပါ။
အဲ့ဒါကြောင့် ဒီဂီယာဟာ ပေါင် ၂၇၅,၀၀၀ သိန်းလျှော့ယူပြီး စာချုပ်သစ် ချုပ်ဆိုဖို့ ပြင်ဆင်နေတာ ဖြစ်ပါတယ်။
ယူနိုက်တက်အသင်းဟာ အသင်းရဲ့ လုပ်ခလစာ အများဆုံးရ ကစားသမားတွေကို တစ်ပတ်လုပ်ခ ပေါင် ၂၀၀,၀၀၀ ကနေ ၃၀၀,၀၀၀ ကြားထဲမှာသာ ထားချင်နေတာပါ။ ဒါက အဝတ်စား လဲခန်းအတွင်းမှာ အဆင်ပြေအောင် ကူညီ ပေးနိုင်လိမ့်မယ်လို့ ယူနိုက်တက်နည်းပြ အဲရစ်တန်ဟတ်က ယုံကြည်နေတာ ဖြစ်ပါတယ်။
မန်ချက်စတာကလပ်ဟာ ရက်ရှ်ဖို့ဒ်ကို စာချုပ်သစ် ချုပ်ဆိုဖို့အတွက် ဦးစားပေးအဖြစ် လုပ်ဆောင်နေတာဖြစ်ပြီး ဒီဇင်ဘာလကမှ စာချုပ်ပါ အချက်အတိုင်း ၁ နှစ် သက်တမ်းတိုးခဲ့တာပါ။
ရက်ရှ်ဖို့ဒ်ကို ခေါ်ယူဖို့ ပီအက်စ်ဂျီအသင်းက စိတ်ဝင်စားနေတာကြောင့် ကလပ်အသင်းက ကာလကြာရှည် စာချုပ် တစ်ရပ်ကို ချုပ်ဆိုဖို့ လုပ်ဆောင်နေတာ ဖြစ်ပါတယ်။ အင်္ဂလန်ကစားသမားဟာ ဒီရာသီမှာ ယူနိုက်တက် အသင်း အတွက် ခြေစွမ်းပြသနေပါတယ်။
ရက်ရှ်ဖို့ဒ်ဟာ ဒီရာသီမှာ ယူနိုက်တက် အသင်းအတွက် ၂၅ ပွဲ ပါဝင်ကစားထားပြီး ၁၅ ဂိုး သွင်းယူထားတာ ဖြစ်ပါတယ်။
Source: Thu Sun
- By CNI
- Category: အားကစား
- Hits: 758
CNI Sport News
၂၀၂၃ ခုနှစ်၊ ဇန်နဝါရီ ၁၇
ယူကရိန်းသံအမတ်ကြီးက လူအုပ်ကြီးထဲမှာ ရုရှားအလံကို မြင်တွေ့လိုက်ရပြီးနောက် အရေးယူပေးဖို့ တောင်းဆို ခဲ့တာကြောင့် ဩစတြေးလျတင်းနစ်ဟာ ပြိုင်ပွဲမှာ ရုရှားနဲ့ ဘယ်လာရုစ်အလံကို ဇန်နဝါရီ ၁၇ ရက်က ပိတ်ပင်ခဲ့တာဖြစ်ပါတယ်။
ဩစတြေးလျတင်းနစ်က “ဩစတြေးလျအိုးပန်းမှာ ရုရှားနဲ့ ဘယ်လာရုစ်အလံတွေကို ပိတ်ပင်ထားပါတယ်။ မနေ့က အလံတွေ့ခဲ့တဲ့အဖြစ်အပျက်တစ်ခုရှိပါတယ်။ဒီ ပိတ်ပင်မှုက ချက်ချင်းကို အကျိုးသက်ရောက်မှု ရှိစေ မှာပါ။တင်းနစ်အားကစားမှာ အကောင်းဆုံးဖြစ်နိုင်ခြေရှိတဲ့ ပတ်ဝန်းကျင်ဖြစ်လာနိုင်အောင် ကစားသမားတွေ၊ ပရိသတ်တွေနဲ့ဆက်ပြီး လက်တွဲလုပ်ဆောင်သွားမှာပါ” လို့ ထုတ်ပြန်ခဲ့တာပါ။
ရုရှားရဲ့ အဖြူရောင်၊ အပြာရောင်နဲ့ အနီရောင်အစင်းကြား ပါဝင်တဲ့အလံကို ယူကရိန်းက ဘိုင်ဒယ်လ်နဲ့ ရုရှားက ရာခီမိုဗာတို့ တွေ့ဆုံခဲ့တဲ့ ပထမအဆင့်ပွဲစဉ်အတွင်းမှာ တွေ့မြင်ခဲ့ရတာဖြစ်ပါတယ်။ရုရှားဟာ ယူကရိန်းကို ကျူးကျော်ပြီးကတည်းက ရုရှားနိုင်ငံရဲ့ အားကစားသမားတွေဟာ ကြားနေအလံအောက်မှာသာ ပြိုင်ပွဲဝင်ရောက် ယှဉ်ပြိုင်ခွင့် ရရှိခဲ့တာပါ။ဩစတြေးလျနဲ့ နယူးဇီလန်နိုင်ငံဆိုင်ရာ ယူကရိန်းသံအမတ် မိုင်ရိုရှနီချန်ကိုက အလံ တွေ့မြင်ပြီးနောက် အရေးယူပေးဖို့ ပြောခဲ့တာဖြစ်ပါတယ်။
မိုင်ရိုရှနီချန်ကိုက “ဩစတြေးလျအိုးပန်းဝင်ရောက်ယှဉ်ပြိုင်နေတဲ့ ယူကရိန်းကစားသမားရဲ့ ပွဲအတွင်းမှာ ရုရှား အလံကို လူအများရှေ့မှာပြသထားတာကို ပြင်းပြင်းထန်ထန်ရှုတ်ချပါတယ်။ဩစတြေးလျတင်းနစ်အနေနဲ့ ကြားနေ အလံမူဝါဒကို ချက်ချင်းလိုက်နာဖို့ တောင်းဆိုတယ်လို့” တွစ်တာမှာ ရေးသားခဲ့တာပါ။
ဒီပွဲမှာ ဘိုင်ဒယ်လ်က ၇-၅ ၆-၇၊ ၆-၁ နဲ့ အနိုင်ရပြီး ဒုတိယအဆင့်မှာ အမေရိကန်က မက်နယ်လီနဲ့ ယှဉ်ပြိုင်ရမှာ ဖြစ်ပါတယ်။မိုင်ရိုရှနီချန်ကိုဟာ ပြီးခဲ့တဲ့အပတ်ကတည်းက ဩစတြေးလျအိုးပန်းပြိုင်ပွဲမှာ ရုရှားနဲ့ ဘယ်လာရုစ် ကစားသမားတွေကို ပိတ်ပင်ဖို့ တိုက်တွန်းခဲ့တာပါ။
ပြီးခဲ့တဲ့နှစ်က ဝင်ဘယ်လ်ဒန်အိုးပန်းဟာ ရုရှားနဲ့ ဘယ်လာရုစ်ကစားသမားတွေကို ပိတ်ပင်ခဲ့လို့ တင်းနစ် အဖွဲ့ချုပ်က ဒီပြိုင်ပွဲရဲ့ ရမှတ်တွေကို ဖယ်ရှားပစ်ခဲ့တာဖြစ်ပါတယ်။
Source:ChannelNewsAsia
Page 257 of 354
Latest News
Connect with us
