CNI Sport News

၂၀၂၃ ခုနှစ်၊ မတ်လ ၇

အသလက်တီကို အသင်းကနေ အငှားနဲ့ လာရောက် ကစားနေတဲ့ ဂျာအိုဖိလစ်က ချယ်လ်ဆီးအသင်းထံ အပြီးသတ် ပြောင်းရွှေ့ဖို့က အသင်းရဲ့ ချန်ပီယံလိဂ် ဝင်ခွင့်အပေါ်မှာ မူတည်တယ်လို့ ပြောလိုက်ပါတယ်။

ဂျာအိုဖိလစ်က “ချန်ပီယံလိဂ်မှာ ကစားရတာက အမြဲတမ်း ကွဲပြားခြားနားပါတယ်။ ဒါဟာ လူတိုင်း ကစားချင်တဲ့ ပြိုင်ပွဲတစ်ခုပါ။ ဒါပေမယ့် ကျနော်ဟာ အခုကစားရမယ့် ချန်ပီယံလိဂ်ပြိုင်ပွဲကို အာရုံစိုက်ထားပါတယ်။ အမှတ်ပေး လိဂ်မှာလည်း ချန်ပီယံလိဂ် ဝင်ရောက်နိုင်ဖို့အတွက် ကြိုးစားဖို့ ပွဲတွေအများကြီး ကျန်ရှိနေပါသေးတယ်။ မပြီးဆုံး သေးပါဘူး။ ဒါပေမယ့် ချန်ပီယံလိဂ်မှာ ကစားရတာကတော့ အရေးကြီးတဲ့ ဆုံးဖြတ်ချက်ပါ။ အနာဂတ်ကို ဘယ်သူ မှ မသိနိုင်တာကြောင့် ဘာဖြစ်သွားမလဲဆိုတာကို ဆက်ပြီး ကြည့်ကြတာပေါ့”လို့ ပြောပါတယ်။

ချယ်လ်ဆီးအသင်းဟာ လာမယ့် နွေရာသီ အပြောင်းအရွှေ့မှာ ဂျာအိုဖိလစ်ကို အပြီးသတ် ခေါ်ယူဖို့ ကြိုးစားနေ တယ်လို့ သတင်းတွေ ထွက်ပေါ်နေပါတယ်။

ပေါ်တူဂီ တိုက်စစ်မှူးကတော့ အနာဂတ်နဲ့ ပတ်သက်တဲ့ ဆွေးနွေးမှုတွေကို ပယ်ချထားပြီး လက်ရှိရာသီကိုပဲ အာရုံစိုက် ထားပါတယ်။

ချယ်လ်ဆီးအသင်းဟာ ပြီးခဲ့တဲ့ ဇန်နဝါရီလ အပြောင်းအရွှေ့က အသလက်တီကို အသင်းထံ ပေါင် ၁၃ သန်းပေးပြီး ဂျာအိုဖိလစ်ကို အငှားနဲ့ ရာသီအကုန်ထိ ခေါ်ယူခဲ့တာ ဖြစ်ပါတယ်။

ဂျာအိုဖိလစ်ကို တွေ့ရစဉ်

ဂျာအိုဖိလစ်ဟာ ချယ်လ်ဆီး ကစားသမားဘဝ ပွဲဦးထွက် ပွဲစဉ်ဖြစ်တဲ့ ဖူလ်ဟမ်အသင်းနဲ့ပွဲမှာ တိုက်ရိုက်အနီကတ် နဲ့ ထုတ်ပယ်ခံခဲ့ရပြီး ၃ ပွဲ ပယ်ခံခဲ့ရပေမယ့် အခုအချိန်မှာတော့ အထင်ကြီးဖွယ်ကောင်းတဲ့ စွမ်းဆောင်ရည်တွေကို ပြသထားပါတယ်။

အခုဆိုရင် ဂျာအိုဖိလစ်ဟာ တိုက်စစ်ပိုင်းမှာ လွတ်လပ်စွာ ကစားခွင့်ရနေပြီး ဝက်စ်ဟမ်းအသင်းနဲ့ ၁ ဂိုးစီ သရေကျ ခဲ့တဲ့ပွဲမှာ ချယ်လ်ဆီး ကစားသမားဘဝ ပွဲဦးထွက် သွင်းဂိုးကို သွင်းယူနိုင်ခဲ့တာ ဖြစ်ပါတယ်။

ချယ်လ်ဆီးနဲ့ အသလက်တီကို အသင်းတို့ ချုပ်ဆိုထားတဲ့ စာချုပ်ထဲမှာ အပြီးသတ် ဝယ်ယူခွင့် မပါဝင်ပေမယ့် လန်ဒန်ကလပ်ကတော့ ဂျာအိုဖိလစ်ကို အပြီးသတ် ဝယ်ယူချင်နေပါတယ်။

ချယ်လ်ဆီးအသင်းဟာ ဒီရာသီမှာ ရလဒ်တွေ ဆိုးရွားနေပြီး အမှတ်ပေးဇယား အဆင့် ၁၀ နေရာမှာ ရပ်တည်နေတာကြောင့် ချန်ပီယံလိဂ်ဝင်ခွင့် ဆုံးရှုံးရနိုင်တဲ့အတွက် ဂျာအိုဖိလစ်ကို အပြီးသတ်ခေါ်ယူဖို့ ခက်ခဲတဲ့ အခြေအနေမှာ ရှိနေပါတယ်။

ချယ်လ်ဆီးအသင်းဟာ မတ်လ ၈ ရက် မနက်ပိုင်းမှာ ချန်ပီယံလိဂ် ၁၆ သင်းအဆင့် ဒုတိယအကျော့ ပွဲစဉ်အဖြစ် အိမ်ကွင်းမှာ ဒေါ့မွန်အသင်းနဲ့ ယှဉ်ပြိုင်ရမှာပါ။ ပထမအကျော့ ပွဲစဉ်တုန်းက ၁ ဂိုး- ဂိုးမရှိနဲ့ အရေးနိမ့်ခဲ့တာကြောင့် နောက်တစ်ဆင့် တက်ဖို့အတွက် အနိုင်ရလဒ် ရယူနိုင်ဖို့ လိုအပ်နေပါတယ်။

Source: Goal

CNI Sport News

၂၀၂၃ ခုနှစ်၊ မတ်လ ၇

ပီအက်စ်ဂျီအသင်း တိုက်စစ်မှူး မက်ဆီက ဘိုင်ယန်မြူးနစ်ကို ကျော်ဖြတ်ပြီး ချန်ပီယံလိဂ်မှာ ခရီးဆက်နိုင်ဖို့ အတွက် ကြီးမားတဲ့ မျှော်လင့်ချက်ရှိတယ်လို့ ပြောလိုက်ပါတယ်။

မက်ဆီက “ကျနော်တို့ဟာ အသေးစိတ် အချက်အလက်တွေနဲ့ ဆုံးဖြတ်ရမှာဖြစ်ပြီး ဘိုင်ယန်ကွင်းမှာ အနိုင်ရဖို့က အလွန်ခက်ခဲပါတယ်။ ဒါပေမယ့် ကျနော်တို့ ကောင်းမွန်စွာ ပြင်ဆင်ထားပြီး အခြေအနေတွေကို ပြောင်းပြန်လှန် အောင် လုပ်နိုင်မယ်လို့ ထင်ပါတယ်။ ကျနော်ကတော့ အခုအချိန်မှာ ကောင်းမွန်နေတယ်လို့ ခံစားရပါတယ်။ အသင်းကလည်း ပြီးခဲ့တဲ့ပွဲ အနည်းငယ်မှာ ပြောင်းသွားတယ်လို့ ထင်ပါတယ်။ ကျနော်တို့မှာ မတူညီတဲ့ မျက်နှာ တွေ ရှိနေပြီး အောင်ပွဲတွေက ကျနော်တို့ စိတ်အေးအေးချမ်းချမ်းနဲ့ လုပ်ဆောင်နိုင်ဖို့ ကူညီပေးခဲ့ပါတယ်။ ချန်ပီယံလိဂ်မှာ ကျနော်တို့ခရီးကို ဆက်သွားဖို့အတွက် ကြီးမားတဲ့ မျှော်လင့်ချက် ရှိပါတယ်။ ဒါကို ကျနော်တို့ ဆက်ပြီး ကြိုးစားသွားရမှာပါ”လို့ ပြောပါတယ်။

ပီအက်စ်ဂျီအသင်းဟာ ချန်ပီယံလိဂ် ၁၆ သင်း အဆင့် ပထမအကျော့ ပွဲစဉ်အဖြစ် အိမ်ကွင်းမှာ ကစားခဲ့တုန်းက ဘိုင်ယန်မြူးနစ် အသင်းကို ၁ ဂိုး- ဂိုးမရှိနဲ့ အရေးနိမ့်ခဲ့တာ ဖြစ်ပါတယ်။

အဲဒါကြောင့် ပီအက်စ်ဂျီအသင်း အနေနဲ့ နောက်တစ်ဆင့် တက်ချင်တယ်ဆိုရင် ဘိုင်ယန်မြူးနစ်အသင်း အိမ်ကွင်း မှာ ကစားမယ့် ဒုတိယအကျော့ ပွဲစဉ်မှာ မဖြစ်မနေ အနိုင်ရယူနိုင်ဖို့ လိုအပ်နေတာ ဖြစ်ပါတယ်။

မက်ဆီကတော့ ဘိုင်ယန်မြူးနစ်ကို အနိုင်ရပြီး နောက်တစ်ဆင့် တက်နိုင်မယ်လို့ ယုံကြည်နေပါတယ်။

မက်ဆီနဲ့ ပီအက်စ်ဂျီအသင်းသားများကိုတွေ့ရစဉ်

ပီအက်စ်ဂျီအသင်းဟာ ဘိုင်ယန်မြူးနစ် အသင်းကို ပထမအကျော့ပွဲစဉ်မှာ အရေးနိမ့်ပြီးနောက် ကစားခဲ့တဲ့ ၃ ပွဲ စလုံး အနိုင်ရလဒ်တွေ ရယူနိုင်ခဲ့တာ ဖြစ်ပါတယ်။

မက်ဆီကလည်း ဒီပွဲတွေမှာ ခြေစွမ်းပြသနိုင်ခဲ့ပြီး ၃ ပွဲစလုံးမှာ ၁ ဂိုးစီ သွင်းယူနိုင်ခဲ့ပါတယ်။ အာဂျင်တီးနား အသင်း ခေါင်းဆောင်ဟာ နန့်တက်စ်အသင်းနဲ့ပွဲမှာ ဂိုးသွင်းယူပြီးနောက် ကလပ်ကစားသမားဘဝ ဂိုး ပါဝင် ပတ်သက်မှု ၁၀၀၀ ပြည့် သွားခဲ့တာလည်း ဖြစ်ပါတယ်။
မက်ဆီဟာ သူ့ရဲ့ ပီအက်စ်ဂျီ ကစားသမားဘဝ ပွဲဦးထွက်မှာ ခက်ခဲခဲ့ပေမယ့် အခုအချိန်မှာ အဆင်ပြေနေပြီလို့ လည်း ပြောခဲ့တာပါ။

မက်ဆီက “ပထမနှစ်မှာတော့ အကြောင်းအမျိုးမျိုးကြောင့် ပဲရစ်မှာ လိုက်လျောညီထွေ ဖြစ်အောင် နေရတာ ခက်ခဲပါတယ်။ ဒီရာသီမှာတော့ ကျနော့်ရဲ့ စိတ်အားထက်သန်မှု၊ ဆန္ဒများစွာတွေနဲ့အတူ စတင်ခဲ့ရတာချင်း မတူညီပါဘူး။ ကျနော့်ရဲ့ ကလပ်၊ မြို့နဲ့ ပဲရစ်ဆိုတဲ့ အရာအားလုံးနဲ့ ပိုပြီး အဆင်ပြေပါတယ်”လို့ ပြောခဲ့တာ ဖြစ်ပါ တယ်။

မက်ဆီဟာ ဒီရာသီမှာ ပီအက်စ်ဂျီ အသင်းအတွက် ၂၉ ပွဲ ကစားထားပြီး ၁၈ ဂိုးသွင်းပြီး ၁၆ ဂိုး ဖန်တီးထားတာ ဖြစ်ပါတယ်။

Source: Talk Sport/Goal

CNI Sport News

၂၀၂၃ ခုနှစ်၊ မတ်လ ၆

ကမ္ဘာ့နံပါတ်တစ် တင်းနစ်သမား ဂျိုကိုဗစ်ဟာ ကာကွယ်ဆေး မထိုးတာကြောင့် အမေရိကန်နိုင်ငံကို ဝင်ရောက် ခွင့် မရတဲ့အတွက် အင်ဒီးယန်းဝဲလ်စ်ပြိုင်ပွဲကနေ နှုတ်ထွက်လိုက်ပြီ ဖြစ်ပါတယ်။

ဂရမ်းဆလမ်း ချန်ပီယံဆုကို ၂၂ ကြိမ် ရရှိထားတဲ့ ဂျိုကိုဗစ်ဟာ ကိုဗစ်ကာကွယ်ဆေး မထိုးရသေးတဲ့အတွက် အမေရိကန်နိုင်ငံထဲကို ဝင်ရောက်ဖို့ အထူးခွင့်ပြုချက် လျှောက်ထားခဲ့တာပါ။

အမေရိကန်နိုင်ငံထဲကို ဝင်ရောက်မယ့် နိုင်ငံတကာ ဧည့်သည်တွေဟာ ကာကွယ်ဆေး ထိုးထားဖို့ လိုအပ်ပြီး အနည်းဆုံး ဧပြီလ ၁၀ ရက်အထိ အထောက်အထားလိုအပ်မှာ ဖြစ်ပါတယ်။ ဂျိုကိုဗစ်ဟာ ကာကွယ်ဆေး မထိုးတာကြောင့် ပြီးခဲ့တဲ့နှစ်က အမေရိကန် အိုးပန်းပြိုင်ပွဲကိုလည်း ယှဉ်ပြိုင်ခွင့် မရခဲ့ပါဘူး။

“ကမ္ဘာ့နံပါတ်တစ် ဂျိုကိုဗစ်ဟာ 2023 BNP Paribas Open ကနေ နှုတ်ထွက်ခဲ့ပါတယ်။ သူ့ရဲ့ နှုတ်ထွက်မှုနဲ့အတူ ဘာဆီလာရှက်ဗေးလ်ဟာ ဝင်ရောက်ယှဉ်ပြိုင်နိုင်မှာ ဖြစ်တယ်”လို့ ပွဲစီစဉ်သူတွေရဲ့ ထုတ်ပြန်ချက်မှာ ဖော်ပြထား တာပါ။

ဂျိုကိုဗစ်ကိုတွေ့ရစဉ်

အင်ဒီးယန်းဝဲလ်စ် ပြိုင်ပွဲဟာ ဂရမ်းဆလမ်း အပြင်ဘက်ရှိ တင်းနစ်ပြက္ခဒိန်တွေထဲက ပြိုင်ပွဲတွေထဲမှာ ဂုဏ်သိက္ခာ အရှိဆုံး ပြိုင်ပွဲတစ်ခုဖြစ်ပြီး မတ်လ ၆ ရက်မှာ စတင်ကျင်းပခဲ့တာ ဖြစ်ပါတယ်။

ပြီးခဲ့တဲ့ သောကြာနေ့တုန်းက အမေရိကန် တင်းနစ်အဖွဲ့အစည်းနဲ့ အမေရိကန်အိုးပန်းတို့က အခုလထဲ ကျင်းပမယ့် အင်ဒီယန်းဝဲလ်စ်နဲ့ မိုင်ယာမီမာစတာ ၁၀၀၀ ပြိုင်ပွဲတွေမှာ ဂျိုကိုဗစ် ပါဝင်နိုင်ဖို့ မျှော်လင့်ထားတဲ့အကြောင်း ပြောခဲ့ပါသေးတယ်။

ဆားဘီးယား တင်းနစ်သမားဟာ ကိုဗစ်ကာကွယ်ဆေး မထိုးထားတာကြောင့် ပြီးခဲ့တဲ့နှစ် ပြိုင်ပွဲ အများအပြားကို မပါဝင်နိုင်ခဲ့သလို သြစတြေးလျနိုင်ငံကနေ ပြည်နှင်ဒဏ် ပေးခံခဲ့ရပါတယ်။

ဂျိုကိုဗစ်က ကိုဗစ်ကာကွယ်ဆေး ထိုးမယ့်အစား ဂရမ်းဆလမ်း ပြိုင်ပွဲတွေကို မယှဉ်ပြိုင်ဘဲ နေသွားမယ်လို့ အဲဒီ တုန်းက ပြောခဲ့ပါတယ်။

ဒါပေမယ့် ဂျိုကိုဗစ်ဟာ အခုနှစ် အစပိုင်းက ကျင်းပခဲ့တဲ့ သြစတြေးလျ အိုးပန်းပြိုင်ပွဲမှာ ပြန်လည် ယှဉ်ပြိုင်ခွင့် ရခဲ့ပြီး ချန်ပီယံဆုကို ရယူနိုင်ခဲ့တာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ မတ်လ ၆

ရီးရယ်လ်အသင်းနည်းပြ အန်ဆယ်လော့တီက ဘတ်စ်တစ်အသင်းနဲ့ ဂိုးမရှိ သရေကျပြီးနောက် အသင်းရဲ့ ဂိုး မသွင်းနိုင်တဲ့ အခြေအနေတွေကို စိုးရိမ်မှုတွေ မြင့်တက်လာခဲ့တယ်လို့ ပြောလိုက်ပါတယ်။

အန်ဆယ်လော့တီက “ဒေါသထွက်တာထက် စိတ်မကောင်း ဖြစ်မိပါတယ်။ ကျနော်တို့ ဂိုးမသွင်းနိုင်တာက ထူးဆန်းပါတယ်။ အရည်အသွေးရှိတဲ့ အသင်းတစ်သင်းက နောက်ဆုံး ၃ ပွဲမှာ ၁ ဂိုးထက် ပိုပြီး မသွင်းနိုင်ခဲ့တာက ပုံမှန်တော့ မဟုတ်ပါဘူး။ ဒါကို တော်တော်လေး စိတ်မကောင်း ဖြစ်ရပါတယ်။ ကျနော်တို့မှာ ဂိုးသွင်းနိုင်တဲ့ အရည် အသွေးတွေရှိပြီး ဒါကို အမြဲတမ်း လုပ်ဆောင်ထားပေမယ့် အခု မလုပ်နိုင်တဲ့အပေါ် ကစားသမားတွေကလည်း စိတ်ပျက်နေကြပါတယ်။ ကျနော်တို့ရဲ့ တိုက်စစ်ပိုင်းက ပြဿနာတစ်ခုခု ရှိနေပြီလို့ ထင်ပါတယ်။ ပိုပြီးတော့ တိကျ သေချာဖို့ လိုအပ်လာပြီ”လို့ သတင်းထောက်တွေကို ပြောခဲ့တာပါ။

ရီးရယ်လ်အသင်းဟာ နောက်ဆုံး ကစားခဲ့တဲ့ ပွဲစဉ် ၃ ပွဲမှာ သွင်းဂိုး ၁ ဂိုးသာ ရယူထားနိုင်ပါတယ်။ အဲဒီပွဲတွေမှာ ၂ ပွဲ သရေ ၁ ပွဲရှုံး ရလဒ်ထွက်ပေါ်ထားတာ ဖြစ်ပါတယ်။

ရီးရယ်လ်အသင်းနည်းပြ အန်ဆယ်လော့တီကိုတွေ့ရစဉ်

လာလီဂါ လက်ရှိ ချန်ပီယံဟာ ချန်ပီယံလိဂ်ပြိုင်ပွဲမှာ လီဗာပူးလ်အသင်းကို ၅ ဂိုး- ၂ ဂိုးနဲ့ ဂိုးပြတ် အနိုင်ရပြီး နောက်ပိုင်းမှာ ရလဒ်တွေဟာ ကျဆင်းလာခဲ့တာပါ။

ရီးရယ်လ်အသင်းဟာ ဒီပွဲမှာ သရေကျခဲ့တာကြောင့် ထိပ်ဆုံးနေရာမှာ ဦးဆောင်နေတဲ့ ဘာစီလိုနာအသင်းနဲ့ ၉ မှတ် ကွာဟသွားခဲ့ပါတယ်။

အန်ဆယ်လော့တီက “ကျနော်တို့ဟာ ချန်ပီယံ ပြေးလမ်းကြောင်းထဲကနေ ထွက်သွားမှာ မဟုတ်သေးပါဘူး။ ကွာဟချက်ကတော့ ကြီးမားပါတယ်။ ဒီတစ်ပတ်လုံးကို ကျနော်တို့ အလုပ်လုပ်သွားဖို့ ရှိနေပါတယ်။ အဆုံးထိ ဆက်ပြီး တိုက်ပွဲဝင်ဖို့ လိုအပ်ပါတယ်။ ကစားရမယ့် ပွဲတွေ အများကြီး ရှိပေမယ့် ကျနော်တို့ တိုးတက်ဖို့တော့ လိုအပ်ပါတယ်”လို့ ပြောခဲ့တာပါ။

ရီးရယ်လ်အသင်းဟာ လာမယ့် စနေနေ့မှာ လာလီဂါပွဲစဉ်အဖြစ် အိမ်ကွင်းမှာ အက်စ်ပန်ညိုအသင်းနဲ့ ယှဉ်ပြိုင် ရမှာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ မတ်လ ၆

ပီအက်စ်ဂျီအသင်း တိုက်စစ်မှူး ဘတ်ပီက ဘိုင်ယန်မြူးနစ်နဲ့ ချန်ပီယံလိဂ် ရလဒ်က ကလပ်မှာ သူ့ရဲ့ အနာဂတ်ကို သက်ရောက်မှုရှိမှာ မဟုတ်ဘူးလို့ ပြောလိုက်ပါတယ်။

ဘတ်ပီက “ဘိုင်ယန်မြူးနစ်နဲ့ ချန်ပီယံလိဂ် ရလဒ်က ကျနော့် အနာဂတ်ကို သက်ရောက်မှု ရှိမယ်လို့ မထင်ပါဘူး။ ချန်ပီယံလိဂ်နဲ့ ကလပ်အနာဂတ်ကို ချိတ်ဆက် လိုက်မယ်ဆိုရင် ကလပ်ကို မလေးစားရာ ရောက်သွားမှာဖြစ်ပြီး ကျနော် အရမ်းဝေးကွာ သွားပါလိမ့်မယ်။ ကျနော် ဒီမှာရှိနေတဲ့အတွက် အလွန်ပျော်ရွှင်ပြီး ပီအက်စ်ဂျီမှာ ကောင်းမွန်တဲ့ နေ့ရက်တွေကို ဖန်တီးဖို့ကလွဲပြီး တခြားဘာမှကို မတွေးနိုင်သေးပါဘူး”လို့ ပြောခဲ့တာပါ။

ပီအက်စ်ဂျီအသင်းဟာ ချန်ပီယံလိဂ် ၁၆ သင်းအဆင့် ပထမအကျော့ ပွဲစဉ်အဖြစ် အိမ်ကွင်းမှာ ဘိုင်ယန်မြူးနစ် အသင်းနဲ့ ကစားခဲ့တုန်းက ၁ ဂိုး- ဂိုးမရှိနဲ့အရေးနိမ့်ခဲ့တာ ဖြစ်ပါတယ်။

အဲဒါကြောင့် ဒုတိယအကျော့ ပွဲစဉ်အဖြစ် ဘိုင်ယန်မြူးနစ် အိမ်ကွင်းမှာ ကစားမယ့်ပွဲမှာတော့ မဖြစ်မနေ အနိုင် ရလဒ် ရယူနိုင်ဖို့ လိုအပ်နေတာပါ။ ပီအက်စ်ဂျီအသင်းဟာ ချန်ပီယံလိဂ်ပြိုင်ပွဲမှာ အောင်မြင်မှုမရရင် ဘတ်ပီရဲ့ အနာဂတ်နဲ့ ပတ်သက်ပြီး သက်ရောက်မှုတွေ ရှိလာနိုင်တယ်ဆိုပြီး ထင်ကြေးတွေ ထွက်ပေါ်လာခဲ့တာ ဖြစ်ပါ တယ်။

ဘတ်ပီကတော့ ချန်ပီယံလိဂ် ရလဒ်ဟာ သူ့အနာဂတ်ကို သက်ရောက်မှုရှိမှာ မဟုတ်ဘူးလို့ ပြန်တုန့်ပြန်ခဲ့တာပါ။

ဘိုင်ယန်မြူးနစ်အသင်းနဲ့ ပီအက်စ်ဂျီ ယှဉ်ပြိုင်နေစဉ်

ဘတ်ပီဟာ ပီအက်စ်ဂျီအသင်းနဲ့ ပြည်တွင်းဖလား အားလုံးကို ရယူနိုင်ခဲ့သလို ပြင်သစ်နဲ့လည်း ကမ္ဘာ့ဖလား ချန်ပီယံဆုကို ရရှိထား ပါတယ်။ ဒါပေမယ့် အခုအချိန်ထိ ချန်ပီယံလိဂ်ပြိုင်ပွဲမှာ အမြင့်ဆုံး အောင်မြင်မှုအဖြစ် ဗိုလ်လုပွဲအထိသာ တက်ရောက်နိုင်ထားတာပါ။

ဘတ်ပီဟာ ပြီးခဲ့တဲ့ ပီအက်စ်ဂျီအသင်းက နန့်တက်စ်အသင်းကို ၄ ဂိုး- ၂ ဂိုးနဲ့ အနိုင်ရခဲ့တဲ့ လီဂူးဝမ်းပွဲမှာ အနိုင်ဂိုး ၁ ဂိုး သွင်းယူခဲ့ပြီးနောက် ပြင်သစ်ကလပ်အသင်းရဲ့ ဂိုးသွင်းအများဆုံး ကစားသမားအဖြစ် စံချိန်သစ် တင်နိုင်ခဲ့ပါတယ်။

ဘတ်ပီဟာ ကာဗာနီရဲ့ စံချိန်ကို ကျော်ဖြတ်ပြီး ၂၀၁ ဂိုးနဲ့ ပီအက်စ်ဂျီအသင်းရဲ့ ဂိုးသွင်း အများဆုံး ကစားသမား ဖြစ်လာခဲ့တာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ မတ်လ ၆

ယူနိုက်တက်အသင်း နည်းပြ အဲရစ်တန်ဟတ်က လီဗာပူးလ်အသင်းကို ၇ ဂိုး- ဂိုးမရှိနဲ့ ဂိုးပြတ် အရေးနိမ့်တဲ့ပွဲမှာ ကစားသမားတွေဟာ ပရော်ဖက်ရှင်နယ်ဆန်တဲ့ စွမ်းဆောင်ရည်ကို ပြသခဲ့ခြင်းမရှိဘူးလို့ ပြစ်တင် ပြောဆို လိုက်ပါတယ်။

အဲရစ်တန်ဟတ်က “ရလဒ်က တော်တော်လေးကို ဆိုးရွားပါတယ်။ ပထမပိုင်းမှာ ကျနော်တို့ ကောင်းမွန်စွာ ကစား နိုင်ခဲ့ပေမယ့် ပထမပိုင်းအပြီးမှာ ကျနော်တို့ဟာ ပွဲကို မြန်မြန်ဆန်ဆန်ပဲ စွန့်လွှတ်ခဲ့ရပါတယ်။

ဘောလုံးနဲ့ ပတ် သက်ပြီး ဆိုးရွားတဲ့ ဆုံးဖြတ်ချက်တွေကို ချခဲ့ပါတယ်။ တတိယဂိုးဆိုရင် တန်ပြန်တိုက်စစ်ကနေ ပေးခဲ့ရတာပါ။ ကျနော်တို့ဟာ ဆုံးဖြတ်ချက်တွေချတဲ့ နေရာမှာ ပရော်ဖက်ရှင်နယ် မဆန်ခဲ့ပါဘူး။ အဝေးကို ပြေးတာတွေ၊ နေရာ လွတ်တွေ ပေးတာတွေနဲ့ နောက်ကို ပြန်ပြီးမလိုက်တာတွေပါ”လို့ ပြောခဲ့တာပါ။

ယူနိုက်တက်အသင်းဟာ ပထမပိုင်းမှာ ၁ ဂိုး- ဂိုးမရှိနဲ့ အရေးနိမ့်ခဲ့ပေမယ့် ဒုတိယပိုင်းမှာ ၆ ဂိုးအထိ ခွင့်ပြုပေးခဲ့ ရပြီး အရှက်ရဖွယ် ရှုံးနိမ့်မှုကို ကြုံတွေ့ခဲ့ရတာ ဖြစ်ပါတယ်။

ဒီပွဲမှာ လီဗာပူးလ်အတွက် ဂိုးတွေကို ဆာလတ်၊ ဂတ်ပိုနဲ့ ဒါဝင်နူနက်ဇ်တို့က ၂ ဂိုးစီ သွင်းယူခဲ့ပြီး ဖာမီနိုက ၁ ဂိုး သွင်းယူခဲ့တာပါ။

လီဗာပူးလ်နဲ့ ယူနိုက်တက် ယှဉ်ပြိုင်နေစဉ်

ယူနိုက်တက်အသင်းဟာ ပြီးခဲ့တဲ့ ရက်ပိုင်းတွေက ကာရာဘောင်းဖလား အနိုင်ရပြီး ၆ နှစ်ကြာ ဆုဖလား လက်မဲ့ ဖြစ်မှုကို အဆုံးသတ်နိုင်ခဲ့သလို အက်ဖ်အေဖလားမှာလည်း ဝက်စ်ဟမ်းအသင်းကို ၃ ဂိုး- ၁ ဂိုးနဲ့ အနိုင် ရရှိခဲ့တာ ဖြစ်ပါတယ်။

အဲဒါကြောင့် လီဗာပူးလ်နဲ့ အရှုံးရလဒ်ဟာ အဲရစ်တန်ဟတ်ကို ဒေါသထွက်စေခဲ့ပြီး ဒီအသင်းကို ယူနိုက်တက်လို့ မထင်ဘူးလို့လည်း ဒတ်ချ်လူမျိုးနည်းပြက ပြောခဲ့ပါတယ်။

ယူနိုက်တက်အသင်းဟာ ၁၉၂၆ က ဘလက်ဘန်း၊ ၁၉၃၀ က အက်စတွန်ဗီလာနဲ့ ၁၉၃၁ က ဝုလ်ဗ်စ် အသင်းတို့ ကိုလည်း ဒီလိုမျိုး ၇ ဂိုး- ဂိုးမရှိနဲ့ အရေးနိမ့်ခဲ့ပြီးနောက် နှစ်ပေါင်းများစွာအကြာမှ ဆိုးရွားတဲ့ရလဒ်ကို ပြန်လည် ရရှိခဲ့တာ ဖြစ်ပါတယ်။

အဲရစ်တန်ဟတ်က “ကျနော်တို့ဟာ ၃ ဂိုး- ဂိုးမရှိနဲ့ အရေးနိမ့်နေတဲ့ အချိန်မှာ အသင်းအဖွဲ့အနေနဲ့ အတူလက်တွဲပြီး အလုပ်လုပ်ရမှာ ဖြစ်ပေမယ့် ကျနော်တို့ ဒါကို မလုပ်နိုင်ခဲ့လို့ အံ့သြမိပါတယ်။ ဒါကို ကျနော်တို့အသင်းမှာ မြင်တွေ့ ခဲ့ရတာကို အံ့သြမိပါတယ်။ ဒါကို ကျနော်တို့လို မထင်သလို၊ ယူနိုက်တက်အသင်းလို့လည်း မထင်ပါဘူး။ မနက်ဖြန် ကျရင် သူတို့နဲ့ ထိပ်တိုက်တွေ့ပြီး ဒီအကြောင်းကို ပြောရမယ်”လို့ ပြောခဲ့တာပါ။

ယူနိုက်တက်အသင်းဟာ ဒီရှုံးပွဲကြောင့် ပရီးမီးယားလိဂ် အမှတ်ပေးဇယား အဆင့် ၃ နေရာမှာ ရပ်တည်နေပြီး လီဗာပူးလ်ကတော့ အဆင့် ၅ နေရာအထိ တက်လှမ်းနိုင်ခဲ့ကာ ချန်ပီယံလိဂ် ဝင်ခွင့် မျှော်လင့်ချက်တွေ ရှင်သန် လာခဲ့တာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ မတ်လ ၄

ရုရှားတင်းနစ်သမား ရူဘလက်ဗ်ဟာ ဒူဘိုင်းတင်းနစ် ချန်ပီယံရှစ် ပြိုင်ပွဲရဲ့ ဗိုလ်လုပွဲကို တက်နိုင်ခဲ့ပြီးနောက် ယူကရိန်းစစ်ပွဲနှင့်ပတ်သက်သည့် ငြိမ်းချမ်းရေးတောင်းဆိုမှုကို ထပ်ပြီး ပြောသွားခဲ့ပါတယ်။

ရူဘလက်ဗ်က “ဘာမှမဖြစ်သလိုမျိုး လုပ်လို့မရပါဘူး။ ဒါဟာ ကြောက်ဖို့ကောင်းပါတယ်။ သာမန်ပြည်သူတွေ အများအပြား ဒုက္ခရောက်ပြီး သေဆုံးနေကြရတာက ရူးသွပ်စရာပါပဲ။ မိုဘိုင်းဖုန်း၊ အင်တာနက်နဲ့ ဆိုရှယ်မီဒီယာ တွေရှိတဲ့ အချိန်မှာ ဒီလိုမျိုးဖြစ်နေတာက မလွယ်ကူပါဘူး။ ကျနော့်ရဲ့ တစ်ခုတည်းသော မျှော်လင့်ချက်က မကြာ ခင်မှာ နိုင်ငံတိုင်း ငြိမ်းချမ်းဖို့ပါပဲ”လို့ ပြောခဲ့တာပါ။

ရူဘလက်ဗ်ဟာ ဒီပြိုင်ပွဲရဲ့ ဆီမီးဖိုင်နယ်အဆင့်မှာ လက်ရှိချန်ပီယံ ဇက်ဗာရက်ဗ်ကို ၆-၃၊ ၇-၆ နဲ့ အနိုင်ရခဲ့တာ ဖြစ်ပြီး ဗိုလ်လုပွဲမှာတော့ ဂျိုကိုဗစ်ကို အနိုင်ရခဲ့တဲ့ တစ်နိုင်ငံတည်းသား မက်ဗီဒက်ဗ်နဲ့ ယှဉ်ပြိုင်ရမှာ ဖြစ်ပါတယ်။

ရူဘလက်ဗ်ဟာ ပြီးခဲ့တဲ့ နှစ်တုန်းက ရုရှားက ယူကရိန်းကို ကျူးကျော်ပြီး ရက်ပိုင်းအကြာ ပြိုင်ပွဲတစ်ခု ယှဉ်ပြိုင်နေချိန် ကင်မရာမှန်ဘီလူးပေါ်မှာ “ကျေးဇူးပြုပြီး စစ်ပွဲမဖြစ်ပါနဲ့”လို့ ရေးသားခဲ့တာပါ။

ရူဘလက်ဗ်ကိုတွေ့ရစဉ်

လက်ရှိအချိန်မှာ တင်းနစ်ပြိုင်ပွဲကို ဝင်ရောက်ယှဉ်ပြိုင်နေကြတဲ့ ရုရှားနဲ့ ဘယ်လာရုစ် အားကစားသမားတွေဟာ ကြားနေအလံအောက်မှာသာ ဝင်ရောက် ယှဉ်ပြိုင်နေကြရတာ ဖြစ်ပါတယ်။

ပြီးခဲ့တဲ့နှစ်က ကျင်းပခဲ့တဲ့ ဝင်ဘယ်လ်ဒန် အိုးပန်းပြိုင်ပွဲမှာ ရုရှားနဲ့ ဘယ်လာရုစ် အားကစားသမားတွေကို ဝင်ရောက် ယှဉ်ပြိုင်ခွင့် ပိတ်ပင်ခဲ့တာကြောင့် ဒီနှစ်ပြိုင်ပွဲမှာ ပါဝင်ခွင့် ရနိုင်မလားဆိုတာကို စောင့်ကြည့်နေ ကြတာပါ။

အသက် ၂၅ နှစ်အရွယ်ရှိ ရူဘလက်ဗ်ဟာ ATP ပြိုင်ပွဲတွေမှာ ချန်ပီယံဆုကို ၁၂ ကြိမ် ရယူထားတာကြောင့် အခု ယှဉ်ပြိုင်ရမယ့် ပြိုင်ပွဲမှာ ၁၃ ကြိမ်မြောက် ရယူဖို့ ရည်မှန်းနေတာ ဖြစ်ပါတယ်။

ရူဘလက်ဗ်ဟာ ဂရမ်းဆလမ်းပြိုင်ပွဲတွေမှာ အမြင့်ဆုံး အောင်မြင်မှုအဖြစ် ကွာတားဖိုင်နယ်အထိသာ တက်ရောက် ထားနိုင်ခဲ့တာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ မတ်လ ၄

တနင်္ဂနွေနေ့မှာ ယှဉ်ပြိုင်မယ့် ယူနိုက်တက်နဲ့ ပရီးမီးယားလိဂ်ပွဲကို ဒါဘီပွဲစဉ်လို ခံစားရတယ်လို့ လီဗာပူးလ် အသင်းနည်းပြ ကလော့ပ်က ပြောပါတယ်။

ကလော့ပ်က “ရိုးရိုးသားသား ပြောရရင် ဒီပွဲက ကျနော့်အတွက်တော့ ဒါဘီပွဲပါ။ ဒါက ကြီးမားတဲ့ ပွဲတစ်ပွဲဖြစ်ပြီး နှစ်တွေ ကြာလာတာနဲ့ အမြဲတမ်းခက်ခဲတဲ့ ပွဲတွေ ဖြစ်ခဲ့ပါတယ်။ သူတို့ လုပ်ဆောင်နေတဲ့ အရာတွေကို လေးစားပါ တယ်။ ဒါကြောင့် ဒီပွဲဟာ ကြီးမားတဲ့ ပွဲဖြစ်လာမှာဖြစ်ပြီး နှစ်သင်းစလုံးအတွက် ၃ မှတ်ထက်ပိုပြီး တန်ပါတယ်။ ဘာကြောင့်လဲဆိုရင် ယူနိုက်တက်အသင်းဟာ အမှတ်ပေးဖလား ရယူနိုင်ဖို့ ၁၀၀ ရာခိုင်နှုန်းတိုက်ပွဲ ဝင်နေတယ် ဆိုတာကို ကျနော်သိသလို၊ လူတိုင်းလည်း ဒါကို သိပါတယ်။ ကျနော်တို့အတွက်လည်း ဒီပွဲက အလွန်အရေးကြီးပါ တယ်။ ကျနော်တို့ သွားချင်တဲ့ နေရာနဲ့ နီးစပ်အောင် နောက်တစ်ဆင့် တက်ရမှာဖြစ်ပြီး ဒါကို လုပ်နိုင်မယ်လို့ ထင် ပါတယ်။ ဒါပေမယ့် ကျနော်တို့ သက်သေပြရမယ်”လို့ ပြောခဲ့တာပါ။

လီဗာပူးလ်အသင်းဟာ ပရီးမီးယားလိဂ်မှာ ရလဒ်ကောင်းတွေ ပြန်လည်ရယူနေပြီး အမှတ်ပေးဇယား အဆင့် ၆ နေရာအထိ တက်လှမ်းလာနိုင်ခဲ့တာ ဖြစ်ပါတယ်။

ဒီနှစ်သင်း ပထမအကျော့အဖြစ် အိုးထရက်ဖို့ဒ်မှာ ကစားခဲ့တုန်းက ယူနိုက်တက်က ၂ ဂိုး- ၁ ဂိုးနဲ့ အနိုင်ရခဲ့ပေမယ့် မနှစ်ကရာသီ အန်ဖီးလ်မှာ ကစားခဲ့တဲ့ပွဲမှာ လီဗာပူးလ်က ၄ ဂိုး- ဂိုးမရှိနဲ့ ဂိုးပြတ် အနိုင်ရခဲ့တာပါ။ လီဗာပူးလ် အသင်းဟာ လက်ရှိအချိန်မှာ ချန်ပီယံလိဂ် ဝင်ခွင့်ရယူနိုင်ဖို့အတွက် အဓိက ပစ်မှတ်ထားနေတာ ဖြစ်ပါတယ်။

 လီဗာပူးလ်နဲ့ ယူနိုက်တက်အသင်းကိုတွေ့ရစဉ်

ကလော့ပ်က “ကျနော်တို့ဟာ အရှေ့မှာရှိတဲ့ အသင်းတွေအကြောင်းကို တွေးနေမှာ မဟုတ်ဘဲ ပွဲတစ်ပွဲပြီး တစ်ပွဲ ကို အရှိန်အပြည့်နဲ့ ကစားသွားမှာပါ။ ပြီးခဲ့တဲ့ ရက်သတ္တပတ် အနည်းငယ်အတွင်းမှာ ကောင်းမွန်တဲ့အရာတွေ အများကြီး ဖြစ်ခဲ့ပေမယ့် ရီးရယ်လ်အသင်းကို အိမ်ကွင်းမှာ အရေးနိမ့်ခဲ့လို့ ဒီလိုမျိုး မခံစားခဲ့ရပါဘူး။ အခုဆိုရင် လမ်းကြောင်းမှန်ပေါ်ကို ရောက်ရှိနေပြီဆိုပေမယ့် နောက်ထပ် ခြေလှမ်းတွေကို ထပ်ပြီးလုပ်ရဦးမှာပါ”လို့ ပြောခဲ့ တာပါ။

လီဗာပူးလ်အသင်းဟာ ချန်ပီယံလိဂ် ၁၆ သင်းအဆင့် ပထမအကျော့ အိမ်ကွင်းပွဲစဉ်မှာ ရီးရယ်လ်အသင်းကို အရေး နိမ့်ထားတာကြောင့် နောက်တစ်ဆင့်တက်ဖို့ ခက်ခဲနိုင်မယ့် အခြေအနေ ရှိတာကြောင့် ဒီရာသီမှာ ဆုဖလား လက် မဲ့နဲ့ ရာသီသိမ်းရဖို့ ရှိပါတယ်။

အဲဒါကြောင့် ပရီးမီးယားလိဂ်ကို အပြည့်အဝ အာရုံစိုက်နေပြီး ချန်ပီယံလိဂ် ဝင်ခွင့်ရဖို့ ကြိုးစားပြီး လုပ်ဆောင်နေ တာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ မတ်လ ၄

ချယ်လ်ဆီးအသင်းကို အားပေးတဲ့ပရိသတ်တစ်ဦးဟာ စပါးအသင်းတောင်ပံကစားသမား ဆွန်ဟောင်မင်ကို လူမျိုးရေးခွဲခြားတဲ့အမူအရာပြုလုပ်ခဲ့တာကြောင့် ဘောလုံးနဲ့ပတ်သက်ခွင့် ၃ နှစ်ပိတ်ပင်ခံလိုက်ရပြီ ဖြစ်ပါတယ်။

သောမတ်စ်ဘာချဲလ်ဆိုတဲ့ ပရိသတ်ဟာ သြဂုတ်လ ၁၄ ရက်နေ့က ကစားခဲ့တဲ့ ချယ်လ်ဆီးနဲ့ စပါးအသင်းတို့ရဲ့ လန်ဒန်ဒါဘီပွဲစဉ်မှာ လူမျိုးရေးခွဲခြားတဲ့အမူအရာပြုလုပ်ခဲ့တာကို ကင်မရာတွေက အမိအရဖမ်းပြီး ရိုက်ကူးနိုင်ခဲ့ တာပါ။ဒီအဖြစ်အပျက်ပုံတွေဟာ ဆိုရှယ်မီဒီယာပေါ်မှာ ရောက်ရှိခဲ့ပြီးနောက် Kick it Out အဖွဲ့အစည်းထံ ပေးပို့ ခဲ့တာဖြစ်ပါတယ်။အဲဒီနောက်မှာ ချယ်လ်ဆီးအသင်းက သူ့ကိုဖော်ထုတ်ခဲ့ပြီး အရေးယူဖို့ လုပ်ဆောင်ခဲ့တာပါ။

သောမတ်စ်ဘာချဲလ်ကလည်း သူဟာ ဒီဖြစ်ရပ်ကို ကျူးလွန်ခဲ့တယ်လို့ ရဲတပ်ဖွဲ့ထံ ဝန်ခံခဲ့ပြီးနောက် လန်ဒန်မြို့ရှိ တရားရုံးက ဒဏ်ကြေးငွေ ၇၂၆ ပေါင်နဲ့ ဘောလုံးပွဲတွေမှာ ပတ်သက်ခွင့် ၃ နှစ်ပိတ်ပင်ခဲ့တာဖြစ်ပါတယ်။

အကြီးတန်းအစိုးရရှေ့နေ ကယ်လ်ဆွန်ရှာက “ဘောလုံးဟာ စိတ်အားထက်သန်မှုအပြည့်ရှိတဲ့ အားကစားတစ်ခု ဖြစ်ပေမယ့် လူမျိုးရေးခွဲခြားစော်ကားမှုတွေကိုတော့ ဘယ်တော့မှ ခွင့်မပြုသင့်ပါဘူး။ဒီလိုအပြုအမူတွေကို မြင်တဲ့ သူတိုင်း ဒါမှမဟုတ် ကြုံဖူးတဲ့သူတိုင်းဟာ ရဲတပ်ဖွဲ့ကို သတင်းပို့ပြီး ဘောလုံးပွဲတွေမှာ လူမျိုးရေးခွဲခြားမှု ကင်းစင် အောင် ကူညီပေးဖို့ ဆက်ပြီးတိုက်တွန်းသွားမှာပါ” လို့ ပြောခဲ့တာပါ။

ပရီးမီးယားလိဂ်ဟာ လူမျိုးရေးခွဲခြားမှုကို တိုက်ဖျက်ဖို့ ပွဲမစခင် ဒူးထောက်တဲ့အစီအစဉ်တွေကို လုပ်ဆောင်ခဲ့ပေ မယ့် ကစားသမားတွေဟာ ဆိုရှယ်မီဒီယာတွေပေါ်ကနေ မကြာခဏဆိုသလို လူမျိုးရေးခွဲခြားမှုကို ခံနေရတုန်း ပဲဖြစ်တယ်လို့ အချက်အလက်တွေအရ သိရတာဖြစ်ပါတယ်။

Source:Goal