- By CNI
- Category: အားကစား
- Hits: 679
CNI Sport News
၂၀၂၃ ခုနှစ်၊ ဖေဖော်ဝါရီ ၂၈
ပြင်သစ်အစိုးရရှေ့နေတွေဟာ ဖေဖော်ဝါရီလ ၂၇ ရက်က ပီအက်စ်ဂျီအသင်း နောက်ခံလူ ဟာကီမီကို လိင်ပိုင်း ဆိုင်ရာ စော်ကားမှုစွဲချက်နဲ့ စုံစမ်းစစ်ဆေးမှု စတင်ခဲ့တယ်လို့ ဒီဖြစ်ရပ်နဲ့ နီးစပ်သူတစ်ဦးက ပြောပါတယ်။
ဟာကီမီဟာ ဖေဖော်ဝါရီလ ၂၅ ရက်က ပဲရစ် ဆင်ခြေဖုံး ရပ်ကွက်ရှိ သူ့ရဲ့နေအိမ်မှာ လိင်ပိုင်းဆိုင်ရာ စော်ကားခဲ့တယ်လို့ အသက် ၂၄ နှစ်အရွယ်ရှိ အမျိုးသမီးတစ်ဦးက စွပ်စွဲခဲ့တာပါ။
Parisien သတင်းစာမှာ အဲဒီ အကြောင်းအရာကို အတည်ပြုခဲ့ပြီးနောက် အဲဒီအမျိုးသမီးဟာ တနင်္ဂနွေနေ့က ရဲစခန်းမှာ ဖြစ်စဉ်နဲ့ပတ်သက်ပြီး တိုင်ကြားခဲ့ပါတယ်။
ဒါပေမယ့် စွဲချက်တင်ခဲ့ခြင်းတော့ မရှိဘူးလို့ သတင်းရင်းမြစ်က ပြောပါတယ်။
ဒီအမှုကို ကိုင်တွယ်ဖြေရှင်းနေတဲ့ အစိုးရရှေ့နေရုံးကတော့ ဒီအဖြစ်အပျက်နဲ့ ပတ်သက်ပြီး မှတ်ချက်ပေးဖို့ ငြင်းဆိုခဲ့ပေမယ့် မီဒီယာမှာ “သတင်းအချက်အလက်များကို လူသိရှင်ကြား ထုတ်ပြန်ထားပြီးပြီဖြစ်ပါတယ်၊ အမှန်တရားကို သိရှိဖို့ လိုအပ်တဲ့ စုံစမ်းစစ်ဆေးမှုတွေကို ထိခိုက်စေတယ်”လို့ AFP သတင်းဌာနကို ပြောခဲ့ပါတယ်။
မော်ရိုကိုအသင်းနဲ့အတူ ကစားနေတဲ့ ဟာကီမီကိုတွေ့ရစဉ်
ဟာကီမီဟာ တံကောက်ကြော ဒဏ်ရာကြောင့် ပီအက်စ်ဂျီအသင်း နောက်ဆုံး ကစားခဲ့တဲ့ လီဂူးဝမ်းပွဲစဉ် ၂ ပွဲမှာ မပါဝင်နိုင်ခဲ့ပါတယ်။
ဒါပေမယ့် ပီအက်စ်ဂျီ နောက်ခံလူဟာ ပဲရစ်မှာ ကျင်းပခဲ့တဲ့ ဖီဖာ အကောင်းဆုံး ဆုပေးပွဲကို တက်ရောက်ခဲ့ပြီး FIFPro ရဲ့ အမျိုးသား အကောင်းဆုံးအသင်းမှာ ရွေးချယ်ခံခဲ့ရတာပါ။
ဟာကီမီဟာ ပြီးခဲ့တဲ့ ကမ္ဘာ့ဖလားပြိုင်ပွဲမှာ မော်ရိုကို အသင်းနဲ့အတူ ပြသခဲ့တဲ့ ခြေစွမ်းတွေကြောင့် အခုလို အကောင်းဆုံး အသင်းရဲ့ လူစာရင်းမှာ ပါဝင်ခဲ့တာ ဖြစ်ပါတယ်။
မော်ရိုကို အသင်းဟာ ပြီးခဲ့တဲ့ ကမ္ဘာ့ဖလားပြိုင်ပွဲမှာ ဆီမီးဖိုင်နယ်အဆင့်ထိ တက်လှမ်းနိုင်ခဲ့ပြီး စတုတ္တရရှိခဲ့တာပါ။
ကမ္ဘာ့ဖလားသမိုင်းမှာ မော်ရိုကိုအသင်းဟာ ဆီမီးဖိုင်နယ် တက်နိုင်တဲ့ ပထမဆုံး အာဖရိကအသင်းနဲ့ အာရပ် အသင်းအဖြစ် မှတ်တမ်း တင်နိုင်ခဲ့တာလည်း ဖြစ်ပါတယ်။
Source: CNA
- By CNI
- Category: အားကစား
- Hits: 802
CNI Sport News
၂၀၂၃ ခုနှစ်၊ ဖေဖော်ဝါရီ ၂၈
ယူနိုက်တက်အသင်းရဲ့ ဂန္တဝင်နည်းပြကြီး ဆာအဲလက်စ်ဖာဂူဆန်က အသင်းအတွက် ခြေစွမ်းပြ ဂိုးသွင်းနေတဲ့ ရက်ရှ်ဖို့ဒ်ကို တိုက်စစ်မှူးတစ်ဦးလို့ မထင်ကြောင်းနဲ့ နွေရာသီမှာ တိုက်စစ်မှူးတစ်ဦး ခေါ်ယူဖို့ အကြံပေး သွားခဲ့ပါတယ်။
ဆာအဲလက်စ်ဖာဂူဆန်က “ရက်ရှ်ဖို့ဒ်ကို တိုက်စစ်မှူးတစ်ဦးလို့ မထင်ပါဘူး။ သူဟာ ဘယ်ဘက်ခြမ်း ကနေ အတွင်းထဲကို ဝင်တဲ့သူဖြစ်ပြီး သူဟာ တကယ်ကို ကောင်းပါတယ်။ သူ့ရဲ့ အဆုံးသတ်က အမြဲတမ်း ကောင်းမွန်နေ ပြီး၊ တိုက်စစ်မှူးတစ်ဦးအတွက် အလွန်အရေးပါတဲ့ ကန်သွင်းချက်တွေကို အမြဲထိန်းထားနိုင်ပါတယ်။ ကျနော်တို့ အတွက် ကံမကောင်းတာက သူ့ဟာ သွင်းဂိုးတွေရဲ့အဓိက အရင်းအမြစ်လို ဖြစ်နေတာပါ။ ကျနော်တို့ဟာ နောက်ထပ် တစ်ဦးနဲ့ လုပ်နိုင်ပေမယ့် သူကပဲ ဒါကို လုပ်ဆောင်နေတာပါ”လို့ Sky Sports ကို ပြောခဲ့တာ ဖြစ်ပါတယ်။
ဆာအဲလက်စ်ဖာဂူဆန်ဟာ ယူနိုက်တက်အသင်း အနိုင်ရခဲ့တဲ့ ကာရာဘောင်းဖလား ဗိုလ်လုပွဲကို လာရောက် ကြည့်ရှုခဲ့ပြီး ပွဲအပြီးမှာ ချန်ပီယံ ဖြစ်ခဲ့တဲ့အသင်းကို ဂုဏ်ပြုမှုတွေ ပြုလုပ်ခဲ့ပါတယ်။
ယူနိုက်တက်အသင်းနဲ့အတူ ပရီးမီးယားလိဂ် ၁၃ ကြိမ် အပါအဝင် ဆုဖလား အောင်မြင်မှု အများအပြား ရယူနိုင်ခဲ့ တဲ့ ဂန္တဝင်နည်းပြဟာ အဲရစ်တန်ဟတ်ကို နည်းဗျူဟာအချို့ကို အကြံပေးခဲ့ပါတယ်။
နယူးကာဆယ်ဘက်ကို ရက်ရှ်ဖို့ဒ် ဂိုးသွင်းနေစဉ်
အင်္ဂလန်တိုက်စစ်မှူး ရက်ရှ်ဖို့ဒ်ဟာ ဒီရာသီမှာ ယူနိုက်တက် အသင်းအတွက် ပြိုင်ပွဲစုံ ၂၅ ဂိုး သွင်းယူထားကာ အသင်းရဲ့ ထိပ်တန်း ဂိုးသွင်းရှင်အဖြစ် ရပ်တည်နေပါတယ်။
ဆာအဲလက်စ်ဖာဂူဆန်က အံ့မခန်းဖွယ် ဂိုးသွင်းပုံစံကို ပြသထားတဲ့ ရက်ရှ်ဖို့ဒ်ကို ချီးကျူးမှု ပြုလုပ်ခဲ့သလို သူ တစ်ဦးတည်း မဟုတ်ဘဲ နောက်ထပ် ကစားသမားတွေလည်း ဂိုးတွေ သွင်းဖို့ လိုအပ်တယ်လို့ ပြောခဲ့ပါတယ်။
ယူနိုက်တက်အသင်းရဲ့ တိုက်စစ်မှူးတစ်ဦးဖြစ်တဲ့ မာရှယ်ဟာ ဒဏ်ရာကြောင့် မကြာခဏဆိုသလို အနားယူ နေခဲ့ရတာပါ။
အဲဒါကြောင့် နည်းပြ အဲရစ်တန်ဟတ်ဟာ ပြီးခဲ့တဲ့ ဇန်နဝါရီလ အပြောင်းအရွှေ့က ဘန်လေအသင်း တိုက်စစ်မှူး ဝက်ဂ်ဟော့စ်ကို ရာသီအကုန်ထိ အငှားနဲ့ ခေါ်ယူခဲ့တာ ဖြစ်ပါတယ်။
ယူနိုက်တက်အသင်းဟာ လာမယ့် နွေရာသီ အပြောင်းအရွှေ့မှာတော့ တိုက်စစ်မှူးအသစ် ခေါ်ယူသွားဖို့ ရှိနေပြီး စပါးအသင်း တိုက်စစ်မှူး ဟာရီကိန်း၊ နာပိုလီအသင်း တိုက်စစ်မှူး အိုဆင်ဟမ်တို့ကို ပစ်မှတ်ထားနေတာပါ။
ကာရာဘောင်းဖလား ရယူထားပြီး နောက်ထပ် ဆုဖလား ၃ လုံး လမ်းကြောင်းပေါ်မှာရှိနေတဲ့ ယူနိုက်တက် အသင်းဟာ ကြားရက်မှာတော့ ဝက်စ်ဟမ်းအသင်းနဲ့ အက်ဖ်အေဖလား ပဉ္စမအဆင့် ပွဲစဉ်ယှဉ်ပြိုင်ဖို့ ရှိနေတာ ဖြစ်ပါတယ်။
Source: Daily Mail
- By CNI
- Category: အားကစား
- Hits: 630
CNI Sport News
၂၀၂၃ ခုနှစ်၊ ဖေဖော်ဝါရီ ၂၈
အာဂျင်တီးနားနဲ့ ပီအက်စ်ဂျီအသင်း တိုက်စစ်မှူး မက်ဆီဟာ ၂၀၂၂ ခုနှစ်အတွက် ကျင်းပတဲ့ ဖီဖာရဲ့ အကောင်းဆုံး ဆုပေးပွဲမှာ အမျိုးသား အကောင်းဆုံး ကစားသမားဆုကို ဒုတိယအကြိမ်မြောက်အဖြစ် ရရှိသွားခဲ့ပါတယ်။
အသက် ၃၅ နှစ်အရွယ်ရှိ မက်ဆီဟာ ဒီဆုကို ပီအက်စ်ဂျီအသင်းဖော် ဘတ်ပီနဲ့ ရီးရယ်လ်တိုက်စစ်မှူး ဘန်ဇီမာ တို့ကို မဲအသာရပြီး ရရှိသွားခဲ့တာပါ။
ဒီဆုကို အားပေးတဲ့သူတွေ၊ လက်ရွေးစင် အသင်းခေါင်းဆောင်တွေ၊ လက်ရွေးစင် အသင်းနည်းပြတွေနဲ့ နိုင်ငံ အသီးသီးမှာရှိတဲ့ ဂျာနယ်လစ် ၃၀၀ တို့က မဲပေးရွေးချယ်ခဲ့တာ ဖြစ်ပါတယ်။
မက်ဆီက ၅၂ မှတ်နဲ့ ပထမ၊ ဘတ်ပီက ၄၄ မှတ်နဲ့ ဒုတိယ၊ ဘန်ဇီမာက ၃၄ မှတ်နဲ့ တတိယနေရာမှာ ရပ်တည်ခဲ့ ကြတာပါ။
၂၀၂၂ ကမ္ဘာ့ဖလားပြိုင်ပွဲမှာ အာဂျင်တီးနားအသင်း ကမ္ဘာ့ဖလားချန်ပီယံဆု ရရှိအောင် ဦးဆောင်နိုင်ခဲ့တဲ့ မက်ဆီ ဟာ ၂၀၂၁-၂၂ ရာသီမှာ နိုင်ငံနဲ့ ကလပ်အသင်းအတွက် ၄၉ ပွဲ ပါဝင်ကစားပြီး ၂၇ ဂိုး သွင်းယူနိုင်ခဲ့ပါတယ်။
မက်ဆီဟာ ဒီဆုကို ၂၀၁၉ ခုနှစ်က ပထမအကြိမ် ရရှိထားတာကြောင့် အခုတစ်ကြိမ်ဟာ ဒုတိယအကြိမ်မြောက် ရယူနိုင်ခဲ့တာပါ။
ဖီဖာအကောင်းဆုံး အမျိုးသမီးဆုရ ကစားသမားကိုတွေ့ရစဉ်
မက်ဆီက “ဒါဟာ အံ့သြစရာ ကောင်းပါတယ်။ ကြီးကျယ်ခမ်းနားတဲ့ နှစ်တစ်နှစ်ဖြစ်ခဲ့ပြီး ဒီမှာ ရှိနေရတာနဲ့ ဒီဆုကို ဆွတ်ခူးနိုင်ခဲ့တဲ့အတွက် ဂုဏ်ယူမိပါတယ်။ ကျနော့် အသင်းဖော်တွေသာ မရှိရင် ကျနော်လည်း ဒီနေရာမှာ ရှိနေမှာ မဟုတ်ပါဘူး။ ကျနော်ဟာ မျှော်လင့်ထားတာကြာပြီဖြစ်တဲ့ အိပ်မက်ကိုလည်း အောင်မြင်ခဲ့ပါတယ်။ ဒါကို အောင်မြင်အောင် လုပ်နိုင်တဲ့သူက အလွန်နည်းပါးပြီး ဒီလိုလုပ်နိုင်ခဲ့တဲ့အတွက် ကျနော်ကံကောင်းပါတယ်”လို့ ဆုယူ အပြီးမှာ ပြောခဲ့တာ ဖြစ်ပါတယ်။
အာဂျင်တီးနားအသင်းနဲ့အတူ ကမ္ဘာ့ဖလား ရယူနိုင်ခဲ့တဲ့ နည်းပြ စကာလိုနီက အကောင်းဆုံးနည်းပြဆု၊ ဂိုးသမား ဖြစ်သူ မာတီးနတ်ဇ်က အကောင်းဆုံး ဂိုးသမားဆုကို ရယူနိုင်ခဲ့တာပါ။
အမျိုးသမီး အကောင်းဆုံးဆုတွေဖြစ်တဲ့ ကစားသမားဆုကို ဘာစီလိုနာအသင်းက ပူတယ်လက်စ်က ရရှိခဲ့ပြီး နည်းပြဆုကို အင်္ဂလန်အသင်းနည်းပြ ဝီဂ်မန်းက ရရှိခဲ့ပါတယ်။ ဂိုးသမားဆုကိုတော့ အင်္ဂလန်ဂိုးသမား မာရီအာ့ပ်စ်က ရရှိခဲ့တာ ဖြစ်ပါတယ်။
အကောင်းဆုံး သွင်းဂိုးဆုဖြစ်တဲ့ ပွတ်စ်ကတ်ဆုကို လှပတဲ့ကန်ချက်နဲ့ ဂိုးသွင်းယူခဲ့တဲ့ မသန်စွမ်း ဘောလုံးသမား အိုလက်ဆီရဲ့ သွင်းဂိုးက ရရှိသွားခဲ့တာပါ။
ဖီဖာရဲ့ တစ်နှစ်တာ အကောင်းဆုံး အမျိုးသားအသင်းမှာတော့ ကော့တွိုက်စ်၊ ဟာကီမီ၊ ဗန်ဒိုက်၊ ကန်ဆယ်လို၊ ဒီဘရိုင်း၊ မိုဒရစ်၊ ကတ်စမဲရိုး၊ မက်ဆီ၊ ဟာလန်း၊ ဘန်ဇီမာနဲ့ ဘတ်ပီတို့ ပါဝင်ခဲ့ကြတာ ဖြစ်ပါတယ်။
Source: BBC
- By CNI
- Category: အားကစား
- Hits: 639
CNI Sport News
၂၀၂၃ ခုနှစ်၊ ဖေဖော်ဝါရီ ၂၇
လက်ဝှေ့သမိုင်းမှာ ပရိသတ်တွေ မျှော်လင့်နေကြတဲ့ ပွဲတစ်ပွဲဖြစ်တဲ့ တွမ်မီဗျူရီနဲ့ ဂျိတ်ပေါလ်တို့ပွဲမှာ တွမ်မီဗျူရီက အမှတ်ဆုံးဖြတ်ချက်နဲ့ အနိုင်ရရှိသွားခဲ့တာ ဖြစ်ပါတယ်။
ဆော်ဒီမှာ ထိုးသတ်ခဲ့တဲ့ ဒီပွဲမှာ ၈ ချီ ပြည့်တဲ့အထိ အလဲထိုးနိုင်ခြင်း မရှိတဲ့အတွက် ဒိုင်လူကြီး အဆုံးအဖြတ် ခံယူခဲ့တာမှာ တွမ်မီဗျူရီက အနိုင်ရခဲ့တာပါ။
ဒိုင်လူကြီး ၃ ဦးထဲမှာ ၁ ဦးက ဂျိတ်ပေါလ်ကို ၇၅ မှတ်- ၇၄ မှတ်နဲ့ အနိုင်ပေးခဲ့ပြီး နောက်ထပ် ဒိုင်လူကြီး ၂ ဦးက တွမ်မီဗျူရီကို ၇၆ မှတ်- ၇၃ မှတ်နဲ့ အနိုင်ပေးခဲ့တာ ဖြစ်ပါတယ်။
တွမ်မီဗျူရီက ဒီနိုင်ပွဲဟာ သူ့ရဲ့ မွေးကင်းစ သမီးလေး ဘမ်ဘီအတွက် ရည်ညွှန်းခဲ့သလို မကျေပွဲ ထိုးချင်တယ် ဆိုရင်လည်း ထိုးဖို့ရှိတယ်လို့ ပြောခဲ့တာပါ။
တွမ်မီဗျူရီက “လွန်ခဲ့တဲ့ ၂ နှစ်လောက်က ဒီအရာတွေဟာ ကျနော့်ဘဝကို ဆုံးရှုံးသွားစေခဲ့ပါတယ်။ လူတိုင်းက ကျနော်ကြောက်လို့ ပြေးနေကြတယ်လို့ ထင်ပေမယ့် ဒီညမှာတော့ ကျနော့် အမွေအနှစ်အတိုင်း လုပ်နိုင်ခဲ့ပါတယ်။ ဒါက ကျနော့်ရဲ့ ပထမဆုံး အဓိကပွဲကြီးပါ။ ဒီထက်ပိုကြီးမားပြီး ပိုကောင်းအောင် လုပ်မှာပါ။ သူက မကျေပွဲ ထိုးသတ်ချင်ရင် ဆက်သွားလို့ရတယ်”လို့ ပြောခဲ့တာ ဖြစ်ပါတယ်။
တွမ်မီဗျူရီနဲ့ ဂျိတ်ပေါလ်တို့ ထိုးသတ်နေစဉ်
တွမ်မီဗျူရီဟာ ဒီပွဲ အနိုင်ရခဲ့တာကြောင့် ထိုးသတ်ခဲ့တဲ့ ပရော်ဖက်ရှင်နယ် လက်ဝှေ့ပွဲ ၉ ပွဲစလုံး အနိုင်ရခဲ့ပြီး၊ ဂျိတ်ပေါလ် ကတော့ ပထမဆုံးရှုံးပွဲ ကြုံတွေ့ခဲ့တာပါ။
ဂျိတ်ပေါလ်ဟာ ဒီပွဲမတိုင်ခင် ထိုးသတ်ခဲ့တဲ့ ၆ ပွဲစလုံး အနိုင်ရခဲ့ပေမယ့် ဒီပွဲမှာ အရေးနိမ့်ခဲ့လို့ နိုင်ပွဲဆက်မှု ရပ်တန့် သွားခဲ့ရတာ ဖြစ်ပါတယ်။ ဒီပွဲဟာ အရင်ကတည်း ထိုးသတ်ဖို့ အကြိမ်ကြိမ် စီစဉ်ခဲ့ပေမယ့် ပျက်ပြယ်ခဲ့ပြီး အခုမှ ပွဲ ဖြစ်မြောက်ခဲ့တာပါ။
ဂျိတ်ပေါလ်က “တွမ်မီကို လေးစားပြီး သူအနိုင် ရသွားပါတယ်။ ကျနော့်ကို အနိုင်နဲ့ အကဲမဖြတ်ဘဲ အရှုံးနဲ့သာ အကဲဖြတ်ပါ။ ကျနော်ပြန်လာခဲ့မှာဖြစ်ပြီး မကျေပွဲက ထိုက်တန်တယ်လို့ ထင်ပါတယ်။ ဒါဟာ ကြီးကျယ်တဲ့ ထိုးသတ်ပွဲပါ”လို့ ပြောခဲ့တာပါ။
ဒီပွဲကို ကမ္ဘာကျော် ဘောလုံးသမား ရော်နယ်ဒို၊ လက်ဝှေ့ဂန္တဝင် မိုက်တိုင်ဆန် အပါအဝင် အားကစားနဲ့ ဖျော်ဖြေရေး လောကက နာမည်ကျော် အများအပြား တက်ရောက်ပြီး အားပေးခဲ့ကြတာလည်း ဖြစ်ပါတယ်။
Source: BBC
- By CNI
- Category: အားကစား
- Hits: 842
CNI Sport News
၂၀၂၃ ခုနှစ်၊ ဖေဖော်ဝါရီ ၂၇
ဘာစီလိုနာ အသင်းနည်းပြ ဇာဗီဟာ အယ်လ်မာရီယာကို အရေးနိမ့်ခဲ့တဲ့ပွဲမှာ အသင်းရဲ့ စွမ်းဆောင်ရည်ကို အလွန် စိတ်ပျက်နေပြီး ဒီရာသီရဲ့ အဆိုးရွားဆုံးပွဲလို့ ပြောလိုက်ပါတယ်။
ဇာဗီက “ဒါက ဒီရာသီ အဆိုးရွားဆုံးပွဲပါပဲ။ ကျနော်အလွန် စိတ်ညစ်မိသလို ခက်ခဲလွန်းပါတယ်။ ကျနော်တို့ အဲဒီ နေရာမှာ မရှိခဲ့သလို ပွဲအတွင်းမှာလည်း မရှိပါဘူး။ ဒီနေ့ခေတ်မှာ ဆင်ခြေဆိုတာ မရှိပါဘူး။ အနိုင်ရဖို့ မထိုက်တန် ခဲ့ပါဘူး။ ဒါကို ကျနော်တို့ တာဝန်ယူရပါမယ်။ ပထမပိုင်းမှာဆို ကျနော်တို့ စိတ်အားထက်သန်မှု မရှိခဲ့ပေမယ့် ဒုတိယပိုင်းမှာတော့ အားလုံးကြိုးစားခဲ့ကြပါတယ်။ ဒါပေမယ့် ဖြစ်မလာခဲ့ပါဘူး။ ကျနော်တို့ရဲ့ စိတ်ပိုင်းဆိုင်ရာကို မပြောင်းလဲနိုင်ရင် လိဂ်ဖလားကို ဆုံးရှုံးသွားလိမ့်မယ်”လို့ ပြောခဲ့တာပါ။
ဘာစီလိုနာအသင်းဟာ ဒီပွဲမှာ အယ်လ်မာရီယာ အသင်းကို ၁ ဂိုး- ဂိုး မရှိနဲ့ အရေးနိမ့်ခဲ့တာ ဖြစ်ပါတယ်။
အယ်လ်မာရီယာအသင်းဟာ ဒီပွဲမတိုင်ခင်က အမှတ်ပေးဇယား အဆင့် ၁၉ နေရာမှာ ရပ်တည်နေပေမယ့် ဒီပွဲ အနိုင်ရခဲ့တာကြောင့် အမှတ်ပေးဇယား အဆင့် ၁၅ နေရာအထိ တက်နိုင်ခဲ့တာပါ။
ဘာစီလိုနာနဲ့ အယ်လ်မာရီယာ အသင်း ယှဉ်ပြိုင်စဉ်
ဘာစီလိုနာအသင်းဟာ ဒီပွဲ အရေးနိမ့်ခဲ့ပေမယ့် ဒုတိယနေရာက ရီးရယ်လ်အသင်းကို ၇ မှတ်အသာနဲ့ အမှတ်ပေး ဇယားကို ဆက်လက် ဦးဆောင်နေခဲ့တာ ဖြစ်ပါတယ်။
ဘာစီလိုနာအသင်းဟာ ပြီးခဲ့တဲ့ရက်ပိုင်းက ယူနိုက်တက်အသင်းကို ယူရိုပါလိဂ်မှာ အရေးနိမ့်ပြီး ပြိုင်ပွဲကနေ ထွက်ခွာခဲ့ရတာကြောင့် ၂ ပွဲဆက် အရေးနိမ့်ခဲ့တာပါ။
ဒါအပြင် ဘာစီလိုနာအသင်းဟာ အောက်တိုဘာလက ရီးရယ်လ်အသင်းကို အရေးနိမ့်ပြီးနောက် ပြည်တွင်း ပြိုင်ပွဲ မှာ ပထမဆုံး ရှုံးပွဲ ကြုံတွေ့ခဲ့ရတာ ဖြစ်ပါတယ်။ ဘာစီလိုနာအသင်းဟာ အယ်လ်မာရီယာနဲ့ပွဲမှာ ဘောလုံးပိုင်ဆိုင် မှု ၇၂ ရာခိုင်နှုန်းအထိ ရှိခဲ့ပေမယ့် ဂိုးပေါက်တည့်မှု ၁ ကြိမ်သာ ရှိခဲ့တဲ့အထိ အခြေအနေဆိုးခဲ့တာပါ။
ဘာစီလိုနာအသင်းဟာ လာမယ့် ကြားရက်မှာ ရီးရယ်လ်အသင်းနဲ့ ကိုပါဒယ်ရေးဖလား ဆီမီးဖိုင်နယ် ပထမ အကျော့ ပွဲစဉ်အဖြစ် ယှဉ်ပြိုင်ရမှာ ဖြစ်ပါတယ်။
ဘာစီလိုနာအသင်းဟာ ရီးရယ်လ်အသင်းနဲ့ မကြာသေးခင်က စပိန်စူပါဖလား ဗိုလ်လုပွဲယှဉ်ပြိုင်ခဲ့ပြီး အဲဒီတုန်းက ၃ ဂိုး- ၁ ဂိုးနဲ့ အနိုင်ရပြီး ချန်ပီယံဆုကို ရယူနိုင်ခဲ့တာ ဖြစ်ပါတယ်။
Source: Goal
- By CNI
- Category: အားကစား
- Hits: 730
CNI Sport News
၂၀၂၃ ခုနှစ်၊ ဖေဖော်ဝါရီ ၂၇
ပီအက်စ်ဂျီအသင်း တိုက်စစ်မှူး မက်ဆီဟာ မာဆေးလ်အသင်းကို ၃ ဂိုး- ဂိုးမရှိနဲ့ အနိုင်ရခဲ့တဲ့ ပြင်သစ်လီဂူးဝမ်း ပွဲစဉ်မှာ အသင်းအတွက် ၁ ဂိုး သွင်းယူပြီးနောက် ကလပ်ကစားသမားဘဝ သွင်းဂိုး ၇၀၀ ပြည့်သွားခဲ့ပြီ ဖြစ်ပါတယ်။
အာဂျင်တီးနား အသင်းခေါင်းဆောင်ဟာ မာဆေးလ်အသင်းနဲ့ ပွဲမှာ ဂိုးသွင်း ယူခဲ့တာကြောင့် ပီအက်စ်ဂျီအသင်း အတွက် သွင်းဂိုး ၂၈ ဂိုး သွင်းယူထားနိုင်ခဲ့တာပါ။
မက်ဆီဟာ ဘာစီလိုနာအသင်းမှာ ကစားခဲ့တုန်းက ၆၇၂ ဂိုး သွင်းယူထားတဲ့အတွက် ကလပ်ကစားသမားဘဝ သွင်းဂိုး ၇၀၀ ပြည့်ခဲ့တာ ဖြစ်ပါတယ်။
အဲဒါကြောင့် မက်ဆီဟာ ဥရောပထိပ်တန်း ၅ လိဂ်မှာ ကလပ်သွင်းဂိုး ၇၀၀ ပြည့်တဲ့ ဒုတိယမြောက် ကစားသမား လည်း ဖြစ်ခဲ့တာပါ။
မက်ဆီ မတိုင်ခင်က ပြိုင်ဘက်ကြီးဖြစ်တဲ့ ရော်နယ်ဒိုက ယူနိုက်တက်အသင်းမှာ ကစားချိန် အခုနှစ်ရာသီ အစော ပိုင်းက ဒီစံချိန်မှတ်တမ်းကို ရယူနိုင်ခဲ့တာ ဖြစ်ပါတယ်။
မက်ဆီနဲ့ဘတ်ပီကိုတွေ့ရစဉ်
အခုအချိန်မှာတော့ မက်ဆီဟာ ရော်နယ်ဒိုရဲ့ စံချိန်မှတ်တမ်းတစ်ခုကို လိုက်မှီခဲ့တာပါ။ မက်ဆီဟာ ဒီရာသီမှာ ပီအက်စ်ဂျီ အသင်းအတွက် ခြေစွမ်းပြသနေတာ ဖြစ်ပြီး ပြိုင်ပွဲစုံ ၂၈ ပွဲ ကစားထားအပြီးမှာ ၁၇ ဂိုးသွင်းယူကာ ၁၆ ဂိုး ဖန်တီးထားတာ ဖြစ်ပါတယ်။
ဘောလွန်းဒီအောဆု ၇ ကြိမ် ရယူထားတဲ့ မက်ဆီဟာ အာဂျင်တီးနားအသင်းနဲ့ ကမ္ဘာ့ဖလား ရယူနိုင်ခဲ့တာ အပါအဝင် ပြင်သစ်ကလပ်အတွက် ပြသနေတဲ့ ခြေစွမ်းတွေကြောင့် ဖီဖာရဲ့ အကောင်းဆုံးဆုကို ရယူဖို့လည်း ရေပန်းစားနေတာပါ။
မက်ဆီဟာ ဒီဆုအတွက် ပီအက်စ်ဂျီ အသင်းဖော် ဘတ်ပီ၊ ရီးရယ်လ် အသင်းခေါင်းဆောင် ဘန်ဇီမာတို့နဲ့ ယှဉ်ပြိုင်ရမှာ ဖြစ်ပါတယ်။
ပီအက်စ်ဂျီအသင်းဟာ မာဆေးလ်အသင်းကို အနိုင်ရခဲ့လို့ လီဂူးဝမ်းမှာ ၂ ပွဲဆက် နိုင်ပွဲပြန်လည် ရရှိခဲ့တာဖြစ်ပြီး အမှတ်ပေးဇယားကို ၈ မှတ်အသာနဲ့ ဦးဆောင်နေခဲ့တာပါ။
ပြင်သစ် လီဂူးဝမ်းပြိုင်ပွဲရဲ့ လက်ရှိ ချန်ပီယံအသင်းဟာ မတ်လ ၄ ရက်မှာ လိဂ်ပွဲစဉ်အဖြစ် နန့်တက်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: BBC
- By CNI
- Category: အားကစား
- Hits: 619
CNI Sport News
၂၀၂၃ ခုနှစ်၊ ဖေဖော်ဝါရီ ၂၇
ယူနိုက်တက်အသင်း ကွင်းလယ်ကစားသမား ဘရူနိုဖာနန်ဒက်စ်က ကာရာဘောင်းဖလားက အသင်းအတွက် မလုံလောက်သေးဘဲ နောက်ထပ်ဆုဖလားတွေထပ်ပြီး ရယူချင်တယ်လို့ ပြောလိုက်ပါတယ်။
ဘရူနိုဖာနန်ဒက်စ်က “ဒါဟာ အံသြစရာကောင်းတဲ့ ခံစားချက်ပါပဲ။ဒီလိုမျိုးအချိန်တွေကို ကျနော်တို့ ရှာဖွေနေခဲ့တာပါ။ကျနော်တို့ ပရိသတ်တွေ၊ကလပ်အသင်းတွေနဲ့အတူ နောက်ဆုံးမှာ ဆုဖလားရယူပြီး ဒါဟာ ထိုက်တန်တယ်လို့ ထင်ပါတယ်။ဒါဟာ အံသြစရာကောင်းတဲ့ကာလဖြစ်ပြီး ဒီရာသီရဲ့ပထမဆုံးဆုဖလားပါ။ ကျနော်တို့ ဒီထက်ပိုပြီးဆုဖလားရယူချင်ပါတယ်။ဒါဟာ ကလပ်အသင်းအတွက် မလုံလောက်ပါဘူး။ ကျနော်တို့ရဲ့ စံနှုန်းတွေ က ပိုပြီးတောင်းဆိုနေတာကြောင့် ဆုဖလားတွေထက်ပြီး ရယူချင်ပါတယ်။ ဒီဆုဖလားရခဲ့လို့ ကျေနပ်ပေမယ့် ပိုပြီးလိုချင်တယ်” လို့ Sky Sports နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။
ယူနိုက်တက်အသင်းဟာ ကာရာဘောင်းဖလားဗိုလ်လုပွဲအဖြစ် နယူးကာဆယ်အသင်းနဲ့ ကစားခဲ့တာမှာ ၂ ဂိုး- ဂိုးမရှိနဲ့ အနိုင်ရခဲ့တာဖြစ်ပါတယ်။ယူနိုက်တက်အတွက် ဂိုးတွေကို ကတ်စမဲရိုးနဲ့ နယူးကာဆယ် နောက်ခံလူ ဘောဒ့်မန်းက ကိုယ့်ဂိုးကိုယ်သွင်းယူခဲ့တာပါ။ဒီ ဆုဖလားဟာ မန်ချက်စတာကလပ်အတွက် ၆ နှစ်ကြာ ဆုဖလား လက်မဲ့ဖြစ်တာကို အဆုံးသတ်နိုင်ခဲ့သလို နည်းပြ အဲရစ်တန်ဟတ်အတွက်လည်း သူ့ရဲ့ပထမဆုံးရာသီမှာ ပထမဆုံးဆုဖလားရယူနိုင်ခဲ့တာဖြစ်ပါတယ်။
အဲရစ်တန်ဟတ်က “ယူနိုက်တက်ကို သူတို့ရှိခဲ့တဲ့နေရာမှာရောက်အောင် ပြန်လည်လုပ်ဆောင်နေတာဟာ အခုမှ အစပဲရှိပါသေးပြီး ဆုဖလားတွေ ရယူနိုင်ဖို့ပါ။ဒါက ပထမဆုံးတစ်ခုပါပဲ။ကစားသမားတွေဟာ အလွန်ကောင်းမွန်တဲ့ ချိတ်ဆက်မှုတွေရှိပြီး အချင်းချင်းလည်း စိန်ခေါ်မှုတွေရှိပါတယ်။အဝတ်လဲခန်းက တကယ်ကိုကောင်းပြီး ခက်ခဲနေ တဲ့အချိန်မှာလည်း တစ်ဦးနဲ့တစ်ဦးကူညီမှုရှိကြပါတယ်။ ယူနိုက်တက်အသင်းဟာ ဆုဖလားတွေရယူဖို့ ရပ်တည် နေတဲ့အသင်းဖြစ်လို့ ဆုဖလားတွေအတွက် ဆာလောင်မှုနဲ့ စိတ်ဆန္ဒပြင်းပြတယ်” လို့ ပြောခဲ့တာပါ။
ယူနိုက်တက်အသင်းဟာ အခုတစ်ကြိမ်အပါအဝင် ကာရာဘောင်းဖလားချန်ပီယံဆုကို ၆ ကြိမ်မြောက် ရယူနိုင်ခဲ့ တာဖြစ်ပါတယ်။ယူနိုက်တက်အသင်းဟာ ယူရိုပါလိဂ်၊အက်ဖ်အေဖလားနဲ့ ပရီးမီးယားလိဂ်ပြိုင်ပွဲတွေမှာလည်း ချန်ပီယံဆုရယူနိုင်ဖို့ လမ်းကြောင်းပေါ်မှာ ရှိနေတာကြောင့် ဒီရာသီမှာ ဆုဖလား ၄ လုံး ရယူနိုင်ဖို့ မျှော်လင့်ချက် တွေရှိနေတာပါ။
ယူနိုက်တက်အသင်းဟာ လာမယ့်ကြားရက်မှာတော့ အက်ဖ်အေဖလား ပဉ္စမအဆင့်ပွဲစဉ်အဖြစ် ဝက်စ်ဟမ်းအသင်း နဲ့ ယှဉ်ပြိုင်ရမှာဖြစ်ပါတယ်။
Source:Goal
- By CNI
- Category: အားကစား
- Hits: 754
CNI Sport News
၂၀၂၃ ခုနှစ်၊ ဖေဖော်ဝါရီ ၂၅
ရုရှားသမ္မတ ပူတင်ဟာ ဘရာဇီးလ်ဘောလုံး ကြယ်ပွင့်နှစ်ဦးဖြစ်တဲ့ မယ်လ်ကွန်နဲ့ ကလော်ဒင်ဟိုတို့ကို နိုင်ငံသား ဖြစ်ခွင့် ပေးခဲ့တယ်လို့ သိရပါတယ်။
သူတို့နှစ်ဦးစလုံးဟာ ရုရှားထိပ်သီးကလပ် ဇင်းနစ်အသင်းမှာ ကစားနေတာဖြစ်ပြီး အသင်းအတွက် ခြေစွမ်းပြသနေတဲ့ သူတွေ ဖြစ်ပါတယ်။
မယ်လ်ကွန်နဲ့ ကလော်ဒင်ဟိုတို့ဟာ အခွန်အကြောင်းပြချက်နဲ့ သူတို့ရဲ့ အဆင့်အတန်းအသစ်ကို အလိုရှိနေကြတာ ဖြစ်ပါတယ်။
အဲဒီ ကစားသမားနှစ်ဦးဟာ သောကြာနေ့က ရုရှားသမ္မတ ပူတင်ရဲ့ အထူးအမိန့်နဲ့ နိုင်ငံသားဖြစ်ခွင့် ပေးခဲ့တဲ့ နိုင်ငံခြားသား ၃၈ ဦးထဲမှာ ပါဝင်ခဲ့ကြတာပါ။
ဇင်းနစ်အသင်းက “ဇင်းနစ်မှာရှိတဲ့ လူတိုင်းက ရုရှားနိုင်ငံသား ဖြစ်လာတဲ့ မယ်လ်ကွန်နဲ့ ကလော်ဒင်ဟိုကို ဂုဏ်ပြုပါတယ်။ နောက်ထပ် အောင်ပွဲများစွာနဲ့အတူ သူတို့ကံကောင်းစေဖို့ ဆန္ဒပြုကြောင်း”ရေးသားခဲ့တာ ဖြစ်ပါတယ်။
ရုရှားနိုင်ငံသားဖြစ်သွားတဲ့ ဘရာဇီးလ် ဘောလုံးသမားနှစ်ဦးကိုတွေ့ရစဉ်
ယူကရိန်းနိုင်ငံကို ကျူးကျော် ဝင်ရောက်ပြီးနောက် တစ်နှစ်အကြာမှာ ပူတင်ရဲ့ ဒီဆုံးဖြတ်ချက်ဟာ ဝါဒဖြန့်ချိရေး လှုပ်ရှားမှုအဖြစ် ရှုမြင်နိုင်တယ်လို့ သတင်းမှာ ဖော်ပြထားတာပါ။
ရုရှားလူငယ်အသင်း နည်းပြဟောင်း ဖြစ်သူကတော့ ကစားသမားနှစ်ဦးကို ငွေကြေးနဲ့ လှုံ့ဆော်ခဲ့တယ်လို့ ပြောထားခဲ့ပါတယ်။ တာ့ခ်မင်နစ္စတန် အသင်းအတွက် ၁၅ ပွဲ ပါဝင်ကစားခဲ့တဲ့ ဒီမီထရီခိုမုခါဟာ လက်ရှိအချိန်မှာ ရုရှားတတိယတန်းကလပ် ကာလူဂါအသင်းရဲ့ နည်းပြအဖြစ် ဆောင်ရွက်နေတာပါ။
ဒီမီထရီခိုမုခါက “လက်ရှိ အခြေအနေမှာဆိုရင် ရုရှားလက်ရွေးစင်အသင်းဟာ နိုင်ငံအသင်း ပြိုင်ပွဲတွေမှာ ပါဝင်ခွင့် မရထားပါဘူး။ နိုင်ငံခြား အပြောင်းအရွှေ့က ဘောလုံးနဲ့ ဘာမှ သက်ဆိုင်မှု မရှိပါဘူး။ ကစားသမားတွေရဲ့ ငွေကြေး အကျိုးစီးပွားက အခန်းကဏ္ဍတစ်ခုကနေ ပါဝင်ပါတယ်။ ဝင်ငွေခွန်ကို ၁၅ ရာခိုင်နှုန်းအထိ လျှော့ချခဲ့ ပေမယ့် အခုသူတို့ ပေးဆောင်ရတာက အဓိကအကြောင်းအရင်းပါပဲ”လို့ ပြောခဲ့တာ ဖြစ်ပါတယ်။
ဘော်လ်ဒိုး ကစားသမားဟောင်း မယ်လ်ကွန်ဟာ ဇင်းနစ်အသင်းထံ မပြောင်းခင် ၂၀၁၉ က ဘာစီလိုနာအသင်းမှာ ကစားခဲ့တာပါ။ ကလော်ဒင်ဟိုကတော့ ဘရာဇီးလ်ကလပ် ရက်ဘူးလ်အသင်းကနေ လွန်ခဲ့တဲ့ ၂နှစ်က ဇင်းနစ် အသင်းထံ ပြောင်းရွှေ့ခဲ့တာ ဖြစ်ပါတယ်။
Source: The Sun
- By CNI
- Category: အားကစား
- Hits: 656
CNI Sport News
၂၀၂၃ ခုနှစ်၊ ဖေဖော်ဝါရီ ၂၅
နယူးကာဆယ်အသင်းရဲ့ စံချိန်တင် ဂိုးသွင်းရှင်ဖြစ်တဲ့ အလန်ရှီးယားက အသင်းအတွက် ချန်ပီယံလိဂ် ဝင်ခွင့်ရဖို့ ထက် ဆုဖလားရဖို့က ပိုပြီးအရေးကြီးတယ်လို့ ကာရာဘောင်းဖလား ဗိုလ်လုပွဲမတိုင်ခင် ပြောကြားခဲ့ပါတယ်။
အလန်ရှီးယားက “ကျနော်ဟာ ဘောလုံးအသင်းနဲ့ အက်ဒီဟိုဝီ လုပ်ဆောင်နေတဲ့ အရာတွေကို သဘောကျပါ တယ်။ သူတို့ကို ပရိသတ်တွေအတွက် အနိုင်ရစေချင်ပါတယ်။ ဒီပွဲကို ကျနော် မစောင့်ဆိုင်း နိုင်တော့ပါဘူး။ ကျနော်ဟာ ဒီပွဲကို သူငယ်ချင်းတွေ၊ မိသားစုတွေနဲ့ သွားမှာဖြစ်ပြီး အနိုင်ရခဲ့ရင် ကောင်းမွန်တဲ့နေ့ ဖြစ်မှာပါ။ နယူးကာဆယ်ကသာ ဒီဆုဖလားကို ရယူနိုင်ခဲ့မယ်ဆိုရင် မြင်ကွင်းတွေကို ကျနော်ပုံဖော်လို့ ရပါတယ်”လို့ ပြောခဲ့ တာပါ။
နယူးကာဆယ်အသင်းဟာ တနင်္ဂနွေနေ့မှာ ကာရာဘောင်းဖလား ဗိုလ်လုပွဲအဖြစ် ယူနိုက်တက်အသင်းနဲ့ ယှဉ်ပြိုင် ရမှာ ဖြစ်ပါတယ်။
နယူးကာဆယ်အသင်း နောက်ဆုံးအကြိမ် ဆုဖလားရရှိခဲ့တာက ၁၉၆၉ ခုနှစ်က Inter-Cities Fairs ဆုဖလား ဖြစ်ပြီး အခုအချိန်မှာတော့ ယူရိုပါလိဂ်ဖလား ဖြစ်လာခဲ့တာပါ။
နယူးကာဆယ်အသင်းကိုတွေ့ရစဉ်
နယူးကာဆယ်အသင်းဟာ ဆုဖလားတွေနဲ့ ဝေးကွာနေတာကြောင့် တစ်သင်းလုံးကလည်း ကာရာဘောင်းဖလား ချန်ပီယံဆုကို ရယူနိုင်ဖို့ ပစ်မှတ်ထားနေတာ ဖြစ်ပါတယ်။ ဒါအပြင် နယူးကာဆယ် ကစားသမားတွေဟာ ဒီဆု ဖလားကို ရယူနိုင်ခဲ့ရင် အပိုဆုကြေး ပေါင် ၁ သန်း ရရှိမယ်လို့ သိရပါတယ်။
အလန်ရှီးယားက “ကျနော်တို့ကို ဆုဖလားပေးပါ။ နယူးကာဆယ် အနေနဲ့ ဆုဖလားကို ရယူနိုင်ခဲ့ရင် အမှတ်ပေး ဇယား အလယ်ရပ်တည်ပြီး ရာသီကို ကျေကျေနပ်နပ် ပြီးဆုံးမှာပါ။ ဆုဖလားနဲ့ ဝေးတာ တော်တော်ကြာနေပါပြီ။ ကျနော့်ဘဝမှာ နယူးကာဆယ်အသင်း ဆုဖလား ရယူတာကို လိုချင်ပါတယ်။ ကာရာဘောင်းဖလားသာ ရယူနိုင်ခဲ့ မယ်ဆိုရင် နယူးကာဆယ် အနေနဲ့ လာမယ့် ၁၀ နှစ်အတွင်းမှာ ဘယ်လိုဖြစ်လာမလဲဆိုတာ စိတ်ကူးကြည့်နိုင်ပါ တယ်”လို့ ပြောပါတယ်။
နယူးကာဆယ်အသင်းဟာ ကာရာဘောင်းဖလားပြိုင်ပွဲမှာ အမြင့်ဆုံး အောင်မြင်မှုအဖြစ် ၁၉၇၅-၇၆ ရာသီက ဒုတိယသာ ရရှိခဲ့တာ ဖြစ်ပါတယ်။
အခုဆိုရင် နယူးကာဆယ်အသင်းဟာ ဒီရာသီမှာ ရလဒ်ကောင်းတွေ ရရှိနေပြီး ပရီးမီးယားလိဂ် အမှတ်ပေးဇယား အဆင့် ၅ နေရာမှာ ရပ်တည်နေတာ ဖြစ်ပါတယ်။
Source: BBC
- By CNI
- Category: အားကစား
- Hits: 597
CNI Sport News
၂၀၂၃ ခုနှစ်၊ ဖေဖော်ဝါရီ ၂၅
လီဗာပူးလ်အသင်းနည်းပြ ကလော့ပ်က ဒီရာသီမှာ ရုန်းကန်နေရတဲ့အသင်းကို နွေရာသီမှာ ပြုပြင်ပြောင်းလဲမှုတွေ လုပ်သွားမယ်လို့ ပြောလိုက်ပါတယ်။
ကလော့ပ်က “ကျနော်တို့ တိုးတက်အောင်လုပ်ရမယ်ဆိုတာကို သိပြီး အရာရာကို ပြောင်းလဲပြီး လုပ်ဆောင်ရမှာပါ။ကျနော်တို့ အခု မလုပ်နိုင်သေးပေမယ့် နွေရာသီမှာ တစ်ခုခုလုပ်ရမယ်ဆိုတာ ရှင်းလင်းနေပြီးသားပါ။ အခုအချိန်မှာတော့ ဒီအခြေအနေကို ကျော်ဖြတ်ပြီး ပြန်လည်တိုက်ပွဲဝင်ရမှာပါ” လို့ ပြောခဲ့တာပါ။
လီဗာပူးလ်အသင်းဟာ ဒီရာသီမှာ ရလဒ်တွေ မတည်မငြိမ်ဖြစ်နေပြီး နောက်ဆုံးကစားခဲ့တဲ့ ချန်ပီယံလိဂ်ပွဲမှာ ရီးရယ်လ်အသင်းကို ၅ ဂိုး- ၂ ဂိုးနဲ့ ဂိုးပြတ်အရေးနိမ့်ခဲ့သလို ပရီးမီးယားလိဂ်မှာလည်း အမှတ်ပေးဇယားအဆင့် ၈ နေရာမှာ ရပ်တည်နေတာဖြစ်ပါတယ်။လီဗာပူးလ်အသင်းရဲ့ အဓိကကစားသမားတွေဖြစ်တဲ့ မီလ်နာ၊ ချိန်ဘာလိန်၊ ဖာမီနိုနဲ့ ကီတာတို့ဟာ အခု ရာသီအကုန်မှာ အသင်းနဲ့စာချုပ်သက်တမ်း ကုန်ဆုံးတော့မှာပါ။အဲဒါကြောင့် အန် ဖီးလ်ကလပ်ဟာ နွေရာသီမှာ ကစားသမားသစ်တွေ အားဖြည့်ရဖို့ ရှိနေတာဖြစ်ပါတယ်။
လီဗာပူးလ်အသင်းဟာ ဒီရာသီမှာ အဓိကကစားသမားတွေ ဒဏ်ရာကြောင့် အနားယူနေရတာနဲ့အတူ ရလဒ် ကောင်းတွေရရှိဖို့ ရုန်းကန်ခဲ့ရပြီး အသင်းဟာ ချန်ပီယံလိဂ် ဝင်ခွင့်နေရာနဲ့ ၇ မှတ်ကွာဟနေတာပါ။ လီဗာပူးလ် အသင်းဟာ ပြီးခဲ့တဲ့အပြောင်းအရွှေ့တွေမှာ ဒါဝင်နူနက်ဇ်၊ ဂတ်ပိုတို့လို တိုက်စစ်ကစားသမားတွေကို အားဖြည့် ခဲ့တာဖြစ်ပါတယ်။
ကလော့ပ်က “ကျနော်တို့ဟာ ချန်ပီယံလိဂ်မှာ ၅ နှစ်ဆက်တိုက်ကစားခဲ့ပြီး ဗိုလ်လုပွဲကို ၃ ကြိမ်တက်နိုင်ခဲ့ပါတယ်။ ဒါတွေက ငွေကြေးအမြင်အရဆိုရင်တော့ ကြီးမားပါတယ်။ကျနော်တို့ဟာ မှန်ကန်တဲ့ ကစားသမားတွေကို ရှာဖွေဖို့ လိုအပ်ပါတယ်။အများကြီးခေါ်ယူသွားမှာမဟုတ်ဘဲ မှန်ကန်တဲ့ ကစားသမားတွေကိုပဲ ခေါ်ယူဖို့ လုပ်ဆောင်မှာပါ။ လီဗာပူးလ်အသင်းဟာ ငွေကြေးတွေကို အရမ်းကြီးသုံးစွဲမှာမဟုတ်ဘဲ ကျနော်တို့ရဲ့ အပြောင်းအရွှေ့တွေဟာ အမြဲတမ်းအမှတ်ရနေရပါမယ်” လို့ ပြောခဲ့တာပါ။
လီဗာပူးလ်အသင်းဟာ ပြီးခဲ့တဲ့ရာသီက အက်ဖ်အေဖလားနဲ့ ကာရာဘောင်းဖလားတို့ကို ရယူနိုင်ခဲ့ပေမယ့် ဒီရာသီမှာတော့ ဆုဖလားလက်မဲ့နဲ့ အဆုံးသတ်ရဖို့ရှိနေတာဖြစ်ပါတယ်။
Source:BBC
Page 262 of 372
Connect with us
