CNI Sport News

၂၀၂၃ ခုနှစ်၊ ဖေဖော်ဝါရီ ၁၈

လီမာဆန်ဟာ VAR အမှားအယွင်းကြောင့် နှစ်ဖက်သဘောတူညီမှုနဲ့ ဒိုင်လူကြီးများ အဖွဲ့ချုပ်ကနေ ထွက်ခွာခဲ့တာကြောင့် ပရီးမီးယားလိဂ်မှာ တာဝန်ထမ်းဆောင်တော့မှာ မဟုတ်ပါဘူး။

အသက် ၅၁ နှစ် အရွယ်ရှိပြီဖြစ်တဲ့ လီမာဆန်ဟာ အာဆင်နယ်အသင်းနဲ့ ဘရန်ဖို့ဒ်အသင်းတို့ ၁ ဂိုးစီ သရေကျခဲ့တဲ့ ပွဲမှာ ပြုလုပ်ခဲ့တဲ့ သူ့ရဲ့ အမှားအယွင်းတွေကြောင့် ရက်ပိုင်းအတွင်းမှာပဲ ထွက်ခွာခဲ့တာပါ။

ဒီပွဲမှာ VAR ဒိုင်လူကြီးအဖြစ် ဆောင်ရွက်ခဲ့တဲ့ လီမာဆန်ဟာ ဘရန်ဖို့ဒ်အသင်း တိုက်စစ်မှူး အိုင်ဗန်တိုနေး သွင်းယူခဲ့တဲ့ ဂိုးမှာ လူကျွံဘော ဖြစ်၊မဖြစ် စစ်ဆေးတဲ့ မျဉ်းကြောင်းကို ရေးဆွဲခဲ့ခြင်း မရှိတာ ဖြစ်ပါတယ်။

အဲဒီ အမှားကြောင့် လီမာဆန်ဟာ ပရီးမီးယားလိဂ်ကနေ ထွက်ခွာဖို့ ဆုံးဖြတ်ခဲ့တာ ဖြစ်ပါတယ်။

အာဆင်နယ်နဲ့ ဘရန်ဖို့ဒ် ပွဲစဉ်မှာ တွေ့ရတဲ့ လီမာဆန်ကိုတွေ့ရစဉ်

အာဆင်နယ်အသင်းကတော့ ဘရန်ဖို့ဒ်အသင်းနဲ့ သရေကျခဲ့ပြီး မန်စီးတီးအသင်းကို ၃ ဂိုး- ၁ ဂိုးနဲ့ အရေးနိမ့် ခဲ့တာကြောင့် ပရီးမီးယားလိဂ် အမှတ်ပေးဇယား အဆင့် ၁ နေရာကို မန်စီးတီးအသင်းထံ လွှဲပေးခဲ့ရတာ ဖြစ်ပါတယ်။

ဒိုင်လူကြီးများ အဖွဲ့ချုပ် အကြီးအကဲ ဟောင်းဝါ့တ်ဝက်ဘ်က အာဆင်နယ်အသင်းထံ ဆက်သွယ်ပြီး ဒီအမှား အယွင်း ဖြစ်ခဲ့တာနဲ့ပတ်သက်ပြီး ရှင်းပြခဲ့ပါတယ်။ အာဆင်နယ်အသင်း နည်းပြ အာတီတာကတော့ တောင်းပန်မှု ကို ရခဲ့ပေမယ့် ဒါကို လက်မခံနိုင်ဘူးလို့ ပြောခဲ့ပါတယ်။
အာတီတာက “ဒါက လူ အမှားမဟုတ်ပါဘူး။ ခင်ဗျားရဲ့အလုပ်ကို နားမလည်တာပါ။ အာဆင်နယ်ဟာ အခုဆိုရင် ဒီရမှတ် ၂ မှတ်ကို ပြန်မရနိုင်တော့ပါဘူး။ ဒီ ၂ မှတ် ပြန်ပေးရင်တော့ ကျေနပ်မှာ ဖြစ်ပေမယ့် ဒါကဖြစ်လာမှာ မဟုတ်ပါဘူး။ အခုတော့ လိဂ်ရဲ့ အခြားတစ်နေရာကနေ ဒီရမှတ်ကို ပြန်ပြီးရှာဖွေရတော့မယ်”လို့ ပြောခဲ့တာပါ။

ဘောလ်တန်ဖွား လီမာဆန်ဟာ ပရီးမီးယားလိဂ်မှာ ဒိုင်လူကြီးအဖြစ် ၁၅ နှစ်ကြာ တာဝန်ထမ်းဆောင်ခဲ့ပြီး ထိပ်တန်းပွဲစဉ်ပေါင်း ၂၈၇ ပွဲကို တာဝန်ယူ ဆောင်ရွက်ခဲ့သူ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဖေဖော်ဝါရီ ၁၈

နေမာဟာ အသင်းဖော် ဘတ်ပီပြောတဲ့ စကားကိုဆန့်ကျင်ပြီး ပိုကာကစားနေတဲ့ ပုံတွေထွက်ပေါ်လာပြီးနောက် နည်းပြဖြစ်သူ ဂယ်လ်တီယာက ဘရာဇီးလ် ကစားသမားအနေနဲ့ အားလပ်ရက်မှာ ကစားခွင့်ရှိတယ်လို့ ပြောခဲ့တာ ဖြစ်ပါတယ်။

ဂယ်လ်တီယာက “ဘတ်ပီအနေနဲ့ ပွဲအပြီး အင်တာဗျူးမှာ ပြောခဲ့တဲ့အရာဟာ အဝတ်လဲခန်းထဲမှာ သူပြောခဲ့တဲ့ အရာအတိုင်း အတိအကျပါပဲ။ ဒါဟာ ရင့်ကျက်တဲ့ စကားလုံးတွေဖြစ်တာကြောင့် လူတိုင်းကို စည်းရုံးနိုင်မှာဖြစ်ပြီး ဒါကို လူတိုင်းကလည်း ကြိုဆိုပါတယ်။ ဘတ်ပီပြောခဲ့တာနဲ့ နေမာရဲ့ပုံတွေ ထွက်ပေါ်လာတာဟာ ကျနော့်အတွက်တော့ ဆက်စပ်မှု မရှိပါဘူး။ ကျနော် နေမာနဲ့ စကားပြောခဲ့ပြီး ကျနော်ထင်တဲ့ အရာတွေကို ကျနော် ပြောဖြစ်ခဲ့ပါ တယ်။ သူ့ရဲ့ အားလပ်ရက်မှာ သူနှစ်သက်တဲ့ ပိုကာကစားခွင့် ရှိပါတယ်။ ဒါတွေနဲ့ပတ်သက်ပြီး ဘာမှ ရှုပ်ထွေးမှု မရှိပါဘူး”လို့ သတင်းထောက်တွေကို ပြောခဲ့ပါတယ်။

နေမာဟာ ပီအက်စ်ဂျီအသင်းက ချန်ပီယံလိဂ် ၁၆ သင်းအဆင့် ပထမအကျော့ပွဲစဉ်မှာ ဘိုင်ယန်မြူးနစ်အသင်းကို ၁ ဂိုး- ဂိုးမရှိနဲ့ အရေးနိမ့်ပြီးနောက် နာရီအနည်းငယ်အကြာမှာ မက်ဒိုနယ်လ်ကို လာရောက်ကာ ပိုကာ ကစားနေ တဲ့ပုံတွေ ထွက်ပေါ်လာခဲ့တာ ဖြစ်ပါတယ်။

 ပိုကာကစားနေ နေမာကို တွေ့ရစဉ်

အဲဒါကြောင့် နေမာရဲ့ အပြုအမူကို အများအပြားက ဝေဖန်ခဲ့ကြသလို အသင်းဖော် ဘတ်ပီရဲ့ ပြောစကားကို ဆန့်ကျင်တယ်ဆိုပြီး ဆိုရှယ်မီဒီယာတွေပေါ်မှာ ရေးသားနေကြတာပါ။

ဘတ်ပီဟာ ဘိုင်ယန်မြူးနစ်နဲ့ပွဲအပြီးမှာ အသင်းဖော်တွေကို အစားကောင်းကောင်းစားပြီး အိပ်ရေးဝဝအိပ်ဖို့ ပြောခဲ့တာ ဖြစ်ပါတယ်။

ဘတ်ပီက “ကျနော်တို့ရဲ့ ကစားသမားတွေ အားလုံးဟာ ဒုတိယအကျော့ ပွဲအတွက် ကျန်းမာရေး ကောင်းနေရမှာ ပါ။ လူတိုင်း အစားကောင်းကောင်းစားပြီး အိပ်ရေးဝဝ အိပ်ဖို့လည်း လိုအပ်ပါတယ်။ ဒါမှလည်း ကျနော်တို့ဟာ နောက်တစ်ဆင့် တက်ဖို့အတွက် အလုပ်ကောင်းမွန်စွာ လုပ်နိုင်မှာ”လို့ ပြောခဲ့တာပါ။

နေမာဟာ မကြာသေးခင်က ပီအက်စ်ဂျီအသင်း အားကစားဒါရိုက်တာ ကမ်ပို့စ်နဲ့ မိုနာကိုအသင်းကို အရေးနိမ့်ခဲ့တဲ့ ပွဲအပြီး အဝတ်လဲခန်းမှာ ပြဿနာဖြစ်ခဲ့တာကြောင့် အသင်းက သူ့ကို စိတ်ပျက်နေတာ ဖြစ်ပါတယ်။

အဲဒါကြောင့်လည်း နွေရာသီမှာ နေမာကို ရောင်းချဖို့ စီစဉ်နေပြီး ချယ်လ်ဆီးအသင်းက ဝယ်ယူဖို့ စိတ်ဝင်စားနေ တယ်လို့ အားကစားသတင်းတွေ အများအပြားက ဖော်ပြထားတာပါ။

ကမ္ဘာ့စံချိန်တင် ပြောင်းရွှေ့ကြေးရှင်ဖြစ်တဲ့ နေမာဟာ ပီအက်စ်ဂျီ အသင်းအတွက် ၁၇၂ ပွဲ ပါဝင်ကစားထားပြီး ၁၁၇ ဂိုးသွင်းယူကာ လီဂူးဝမ်းဖလား ၄ ကြိမ် အပါအဝင် ဆုဖလား အောင်မြင်မှု အများအပြား ရရှိထားတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဖေဖော်ဝါရီ ၁၈

ပရီးမီးယားလိဂ်ထိပ်သီး ယူနိုက်တက်အသင်းကို ဝယ်ယူဖို့အတွက် ကာတာစော်ဘွား ရှိတ်ဂျာဆင် ဘင်ဟာမတ် အယ်လ်သာနီနဲ့ ရက်ကလစ်ဖ်တို့ဟာ တရားဝင် ကမ်းလှမ်းမှုတွေ ပြုလုပ်လိုက်ပြီလို့ အတည်ပြုလိုက်ပါတယ်။

ကာတာနိုင်ငံရဲ့ အကြီးဆုံး ဘဏ်တွေထဲက တစ်ခုဖြစ်တဲ့ QIB ဘဏ်ဥက္ကဋ္ဌ ရှိတ်ဂျာဆင် ဘင်ဟာမတ် အယ်လ်သာ နီရဲ့ ဖောင်ဒေးရှင်းဟာ ယူနိုက်တက်ကို ဝယ်ယူဖို့ လေလံဆွဲမှာ ဖြစ်သလို ရက်ကလစ်ဖ် ပိုင်ဆိုင်တဲ့ Ineos က လည်း အသင်းက သတ်မှတ်ထားတဲ့ နောက်ဆုံးနေ့ မတိုင်ခင် လေလံဆွဲဖို့ တရားဝင် ပြုလုပ်လာခဲ့တာပါ။

ဗြိတိန်ဘီလျံနာ ရက်ကလစ်ဖ်ဟာ ယူနိုက်တက်ရဲ့ အမာခံပရိသတ်ဖြစ်ပြီး အသင်းကို ဝယ်ယူဖို့ စိတ်ဝင်စား ကြောင်း အရင်ကတည်းက ပြောထားခဲ့တာ ဖြစ်ပါတယ်။

၂၀၀၅ ခုနှစ်ကတည်းက ယူနိုက်တက်အသင်းကို ပိုင်ဆိုင်ခဲ့တဲ့ ဂလေဇာမိသားစုဟာ ဗျူဟာမြောက် အခြားရွေးချယ် စရာတွေကို ရှာဖွေနေတာကြောင့် အသင်းကို ရောင်းချဖို့ စဉ်းစားနေတယ်လို့ ပြောထားတာပါ။

အဲ့ဒီအချိန်ကတည်းက ယူနိုက်တက်ကို ဝယ်ယူဖို့ စိတ်ဝင်စားတဲ့ သူတွေ အများအပြား ရှိလာခဲ့တာကြောင့် ဖေဖော်ဝါရီ ၁၇ ရက် နောက်ဆုံးထားပြီး အသင်းကို ဝယ်ယူဖို့အတွက် ကမ်းလှမ်းမှုတွေ ပြုလုပ်ဖို့ ရက် သတ်မှတ် ခဲ့တာ ဖြစ်ပါတယ်။

 ယူနိုက်တက်အားကစားကွင်းကိုတွေ့ရစဉ်

ရှိတ်ဂျာဆင်ရဲ့ ကာတာလုပ်ငန်းစုကတော့ ဒီကမ်းလှမ်းမှုဟာ ယူနိုက်တက်အသင်းကို အရင်အောင်မြင်မှုတွေ ပြန်လည်ရရှိအောင် လုပ်ဆောင်ပေးဖို့ စီစဉ်ထားတယ်လို့ ပြောခဲ့တာပါ။

“အကြွေးကင်းစင်စွာနဲ့ ရှိတ်ဂျာဆင်ရဲ့ Nine Two Foundation က ဘောလုံးအသင်းတွေ၊ လေ့ကျင့်ရေး စင်တာ တွေ၊ အားကစားကွင်းနဲ့ ပိုပြီးကြီးမားတဲ့ အခြေခံ အဆောက်အဦတွေ၊ ပရိသတ် အတွေ့အကြုံတွေနဲ့ ကလပ်က ပံ့ပိုးပေးနေတဲ့ အသိုင်းအဝန်းတွေမှာ ရင်းနှီးမြှုပ်နှံဖို့ ကြိုးစားသွားမှာပါ။ ဒီကမ်းလှမ်းမှုရဲ့ မျှော်မှန်းချက်ကတော့ ယူနိုက်တက်အသင်းဟာ ဘောလုံးထူးချွန်မှုနဲ့ ကမ္ဘာပေါ်မှာ အကြီးအကျယ်ဆုံး ဘောလုံးအသင်းအဖြစ် သတ်မှတ် ခံရဖို့ ဖြစ်တယ်”လို့ ရှိတ်ဂျာဆင်ရဲ့ ကာတာလုပ်ငန်းစု ထုတ်ပြန်ချက်မှာ ဖော်ပြထားတာ ဖြစ်ပါတယ်။

အသက် ၇၀ အရွယ်ရှိ ဗြိတိန်ဘီလျံနာ ရက်ကလစ်ဖ်ရဲ့ Ineos ဟာ အားကစားမှာ ရင်းနှီးမြှုပ်နှံမှု သမိုင်းကြောင်း ရှိပြီး ပြင်သစ်လီဂူးဝမ်းကလပ် နိုက်စ်နဲ့ ဆွစ်ဇာလန်ကလပ် လောဇန်အသင်းတွေကို ပိုင်ဆိုင်ထားတာပါ။

ကာတာဝန်ကြီးချုပ်ဟောင်းရဲ့ သားဖြစ်သူ ရှိတ်ဂျာဆင်ရဲ့ လုပ်ငန်းစုဟာ ယူနိုက်တက်ကို ဝယ်ယူဖို့အတွက် အဆိုပြုထားတဲ့ ပမာဏနဲ့ ပတ်သက်ပြီး အသေးစိတ် အချက်အလက်တွေကိုတော့ ထုတ်ပြောထားခြင်း မရှိပါဘူး။

မန်ချက်စတာကလပ်ကို ဝယ်ယူဖို့ အမေရိကန်နဲ့ ဆော်ဒီနိုင်ငံက လုပ်ငန်းစုအချို့ကလည်း စိတ်ဝင်စားမှုတွေ ရှိနေတယ်လို့ သတင်းမှာ ဖော်ပြထားတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဖေဖော်ဝါရီ ၁၇

ယူနိုက်တက်အသင်းကို ဝယ်ယူနိုင်ဖို့အတွက် သတ်မှတ်ထားတဲ့ နောက်ဆုံးရက် နီးကပ်လာချိန်မှာ ဆော်ဒီ ရင်းနှီးမြှုပ်နှံသူတွေဟာ ပေါင် ၅ ဘီလီယံနဲ့ ဝယ်ယူဖို့အတွက် လေလံပြိုင်ပွဲမှာ ပါဝင်လာခဲ့တယ်လို့ သိရပါတယ်။

သောကြာနေ့မှာ ပိတ်မယ့် နယူးယော့ခ် စတော့အိတ်ချိန်း မတိုင်ခင် ဝယ်ယူဖို့အတွက် ကမ်းလှမ်းမှုတွေဟာ စားပွဲပေါ်ရောက်ဖို့ လိုတယ်လို့ ဂလေဇာမိသားစုက ဖွင့်ဟခဲ့ပါတယ်။

ဆာဂျင်ရက်ကလစ်ဖ်နဲ့ အီလွန်မတ်စ်တို့ကလည်း ယူနိုက်တက်ကို ဝယ်ယူဖို့ စိတ်ဝင်စားနေကြပြီး ဝယ်ယူချင်တဲ့ သူတွေဟာ ကမ်းလှမ်းမှုတွေ ပြုလုပ်ထားတယ်လို့ သိရပါတယ်။

The Telegraph ကတော့ ရီယာ့ဒ်ရှိ အစုအဖွဲ့ အများအပြားဟာ ယူနိုက်တက် အသင်းကို ဝယ်ယူဖို့အတွက် စုံစမ်းမေးမြန်းမှုတွေ ပြုလုပ်ခဲ့တယ်လို့ ဖော်ပြခဲ့တာပါ။

ဆော်ဒီလုပ်ငန်းစုဟာ ၂၀၂၂ က ချယ်လ်ဆီးကို ဝယ်ယူဖို့လည်း စိတ်ဝင်စားမှုတွေ ပြသခဲ့ကြတာ ဖြစ်ပါတယ်။

ဂလေဇာမိသားစုကိုတွေ့ရစဉ်

ဆော်ဒီနိုင်ငံရဲ့ အများပြည်သူ ရင်းနှီးမြှုပ်နှံမှု ရန်ပုံငွေအဖွဲ့(PIF)ဟာ နယူးကာဆယ်အသင်းကို ဝယ်ယူထားပါ တယ်။ ဆော်ဒီရင်းနှီးမြှုပ်နှံသူတွေဟာ အရင်ကလည်း ယူနိုက်တက်ကို ဝယ်ယူဖို့ စိတ်ဝင်စားခဲ့ ပါသေးတယ်။

ဒါပေမယ့် အဲဒီအချိန်တုန်းက ဂလေဇာမိသားစုဟာ သူတို့ပိုင်ဆိုင်တဲ့ အထဲက ရှယ်ယာ ၂၀ ရာခိုင်နှုန်းကိုသာ ပေးဖို့ စိတ်ဝင်စားခဲ့တာပါ။

အခုအချိန်မှာတော့ ယူနိုက်တက်အသင်းကို အလုံးစုံရောင်းချဖို့ ရှိနေတာကြောင့် ဆော်ဒီရင်းနှီးမြှုပ်နှံသူတွေက ပေါင် ၅ ဘီလီယံနဲ့ အသင်းကို ဝယ်ယူဖို့ လုံလောက်မယ်လို့ ယူဆနေတာ ဖြစ်ပါတယ်။

လက်ရှိအချိန်မှာ ယူနိုက်တက်အသင်းကို ဝယ်ယူနိုင်ဖို့အတွက် ကာတာရင်းနှီးမြှုပ်နှံမှု အာဏာပိုင်အဖွဲ့က ရေပန်း အစားဆုံး ဖြစ်နေတယ်လို့လည်း နောက်ဆုံးရ သတင်းတွေအရ သိရပါတယ်။

ပြင်သစ်လီဂူးဝမ်း ချန်ပီယံ ပီအက်စ်ဂျီအသင်းကို ကာတာနိုင်ငံကပဲ ပိုင်ဆိုင်ထားတာကြောင့် ယူနိုက်တက်အသင်း ကို ကာတာရင်းနှီးမြှုပ်နှံသူတွေက ဝယ်ယူမှာကို ပိတ်ပင်ဖို့ ယူအီးအက်ဖ်အေထံ တောင်းဆိုထားတာပါ။

ယူအီးအက်ဖ်အေ စည်းမျဉ်းတွေအရ ပြိုင်ပွဲတစ်ခုတည်းမှာ ယှဉ်ပြိုင်နေတဲ့ ၂ သင်းကို တူညီတဲ့ ကလပ်ပိုင်ရှင် တစ်ခုတည်းက ထိန်းချုပ်လို့ မရဘူးဆိုပြီးတော့ ပါရှိနေတာကြောင့် အခုလို တောင်းဆိုနေကြတယ်လို့ သတင်းမှာ ဖော်ပြထားတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဖေဖော်ဝါရီ ၁၇

လီယွန်နယ်မက်ဆီရဲ့ ဖခင်ဖြစ်သူ ဂျော့ချ်မက်ဆီက သူ့ရဲ့သားဟာ ဘာစီလိုနာအသင်းမှာ ပြန်ပြီး ကစားနိုင်ဖွယ် မရှိဘူးလို့ အနာဂတ်နဲ့ ပတ်သက်ပြီး ပြောလိုက်ပါတယ်။

ဂျော့ချ်မက်ဆီက “လီယိုက ဘာစီလိုနာအသင်းမှာ ထပ်ပြီးကစားမယ်လို့ ကျနော်ကတော့ မထင်ပါဘူး။ ကျနော်တို့ ဘာစီလိုနာအသင်းဥက္ကဋ္ဌ လာပေါ်တာနဲ့ စကားပြောဆိုမှုလည်း မရှိသလို ဘာကမ်းလှမ်းမှုမှလည်း မရှိဘူး”လို့ Sport ကို ပြောပါတယ်။

မက်ဆီနဲ့ ပီအက်စ်ဂျီ အသင်းတို့ ချုပ်ဆိုထားတဲ့ စာချုပ်ဟာ အခုရာသီ အကုန်မှာ ကုန်ဆုံးတော့မှာ ဖြစ်တာကြောင့် အနာဂတ်နဲ့ ပတ်သက်ပြီး မသေချာမှုတွေ ရှိနေတာ ဖြစ်ပါတယ်။

 မက်ဆီနဲ့ ဖခင်ဖြစ်သူ ဂျော့ချ်မက်ဆီကိုတွေ့ရစဉ် 

ပီအက်စ်ဂျီအသင်းဟာ မက်ဆီကို စာချုပ်သစ် ချုပ်ဆိုဖို့ ကြိုးစားနေပေမယ့် အခုအချိန်ထိ သဘောတူညီမှု မရသေး ပါဘူး။ အဲ့ဒါကြောင့် ဘာစီလိုနာအသင်းဟာ မက်ဆီကို ပြန်လည် ခေါ်ယူဖို့ စိတ်ဝင်စားနေပေမယ့် ကစားသမားရဲ့ ဖခင်ဖြစ်သူက လာပေါ်တာနဲ့ ဘယ်လို အဆက်အသွယ်မှ မရှိဘူးလို့ ပြောခဲ့တာ ဖြစ်ပါတယ်။

ပြင်သစ်လက်ရွေးစင်ဟောင်း ဂျရုန်းရိုသန်ကတော့ မက်ဆီကို စာချုပ်သက်တမ်းတိုးမှာက အလွန်ဆိုးရွားတဲ့ အတွေးအခေါ်ဖြစ်တယ်လို့ ပီအက်စ်ဂျီအသင်းကို သတိပေးထားပါတယ်။

အာဂျင်တီးနားအသင်းနဲ့ ကမ္ဘာ့ဖလားချန်ပီယံ ရယူထားတဲ့ မက်ဆီကို မေဂျာလိဂ်ကလပ် အင်တာမိုင်ယာမီ အသင်း ကလည်း စိတ်ဝင်စားနေတာဖြစ်ပြီး ကစားသမားကတော့ အနာဂတ်နဲ့ ပတ်သက်ပြီး ဘာတုန့်ပြန်မှုမှ မရှိသေးပါဘူး။

မက်ဆီဟာ ဒီရာသီမှာ ပီအက်စ်ဂျီ အသင်းအတွက် ခြေစွမ်းပြသ နေတာဖြစ်ပြီး ပြိုင်ပွဲစုံ ၂၆ ပွဲ ကစားထားတာမှာ ၁၅ ဂိုး သွင်းယူထားပြီး ၁၄ ဂိုး ဖန်တီးထားတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဖေဖော်ဝါရီ ၁၇

ပီအက်စ်ဂျီအသင်းနောက်ခံလူ ရာမို့စ်ဟာ ဘိုင်ယန်မြူးနစ်အသင်းကို ရှုံးနိမ့်ခဲ့တဲ့ ချန်ပီယံလိဂ်ပွဲအပြီးမှာ ဓါတ်ပုံဆရာတစ်ဦးကို တွန်းချခဲ့တာနဲ့ပတ်သက်ပြီး တောင်းပန်မှုပြုလုပ်တာကို ဓါတ်ပုံဆရာက လက်ခံပြီး ခွင့်လွှတ်ပေးခဲ့တာဖြစ်ပါတယ်။
ပီအက်စ်ဂျီအသင်းဟာ ဘိုင်ယန်မြူးနစ်အသင်းကို ချန်ပီယံလိဂ် ၁၆ သင်းအဆင့် ပထမအကျော့ပွဲစဉ်အဖြစ် အိမ်ကွင်းမှာ ကစားခဲ့တဲ့ပွဲမှာ ၁ ဂိုး- ဂိုးမရှိနဲ့ ရှုံးနိမ့်ခဲ့တာပါ။ရာမို့စ်ဟာ ဒီအရှုံးရလဒ်ကို စိတ်ပျက်နေပြီး ခံစားချက် တွေကို ဖုံးကွယ်နိုင်ခဲ့ခြင်းမရှိဘဲ ပွဲအပြီး အသင်းပရိသတ်တွေကို လက်ခုပ်တီးနှုတ်ဆက်နေချိန်မှာ ဓါတ်ပုံဆရာကို တွန်းချခဲ့တာဖြစ်ပါတယ်။ဒါပေမယ့် ရာမို့စ်ဟာ ဒီလုပ်ရပ်အတွက် ပြန်လည်တောင်းပန်မှုပြုလုပ်ခဲ့တာပါ။

ရာမို့စ်ရဲ့တောင်းပန်မှုကို ဓါတ်ပုံဆရာဖြစ်တဲ့ ဂီလီယာက လက်ခံခဲ့ပြီး ခွင့်လွှတ်ကြောင်း သူ့ရဲ့ ဆိုရှယ်မီဒီယာမှာ ရေးသားထားတာဖြစ်ပါတယ်။ရာမို့စ်ကလည်း ဓါတ်ပုံဆရာကို ကျေးဇူးတင်တယ်ဆိုပြီး ပြန်တုန့်ပြန်ခဲ့တာပါ။

ဂီလီယာက “မနေ့က ရာမို့စ်ဟာ ကျနော့်ကို ပုဂ္ဂိုလ်ရေးအရ ဆက်သွယ်မှုပြုလုပ်ခဲ့ပြီး သူ့ရဲ့အပြုအမူအတွက် တောင်းပန်မှုပြုလုပ်ခဲ့ပါတယ်။ဒီတောင်းပန်မှုကို ကျနော်လက်ခံခဲ့ပါတယ်။အခုတော့ ဒါကပြီးသွားပါပြီ”လို့ အင်စတာဂရမ်မှာ ရေးသားခဲ့တာဖြစ်ပါတယ်။

ပီအက်စ်ဂျီအသင်းဟာ ဘိုင်ယန်မြူးနစ်အသင်းနဲ့ ပွဲအပါအဝင် နောက်ဆုံးကစားခဲ့တဲ့ ၃ ပွဲဆက်အရေးနိမ့်ပြီး ရလဒ်တွေ ဆိုးနေခဲ့တာပါ။ပြင်သစ်ကလပ်ဟာ ၂၀၂၃ မှာ ပြိုင်ပွဲစုံ ၁၁ ပွဲ ကစားထားအပြီးမှာ ၅ ပွဲနိုင်၊ ၁ ပွဲသရေ၊ ၅ ပွဲရှုံး ရလဒ်ထိ ထွက်ပေါ်ခဲ့တာဖြစ်ပါတယ်။ပီအက်စ်ဂျီအသင်းဟာ ၂၀၂၂ တုန်းက ပြိုင်ပွဲစုံ ၄၆ ပွဲကစားထားပေမယ့် ၄ ပွဲသာရှုံးနိမ့်ခဲ့တာကြောင့် အခုနှစ်ထဲမှာ ရှုံးပွဲပိုပြီး ကြုံတွေ့နေတာပါ။

လီဂူးဝမ်းပြိုင်ပွဲမှာ ဒုတိယနေရာက မာဆေးလ်အသင်းကို ၅ မှတ်ဖြတ်ပြီး ဦးဆောင်နေတဲ့ ပီအက်စ်ဂျီအသင်းဟာ တနင်္ဂနွေနေ့မှာ လိုင်လီအသင်းနဲ့ ယှဉ်ပြိုင်ရမှာဖြစ်ပြီး နိုင်ပွဲပြန်လည်ရှာဖွေနိုင်ဖို့ လိုအပ်နေတာဖြစ်ပါတယ်။

Source:Goal

CNI Sport News

၂၀၂၃ ခုနှစ်၊ ဖေဖော်ဝါရီ ၁၇

ယူနိုက်တက်အသင်း တိုက်စစ်မှူး ရက်ရှ်ဖို့ဒ်ဟာ ယူရိုပါလိဂ် ပလေးအော့ဖ် ပထမအကျော့ ပွဲစဉ်အဖြစ် ကစားခဲ့တဲ့ ပွဲမှာ ဘာစီလိုနာအသင်းနဲ့ ၂ ဂိုးစီ သရေကျခဲ့တာကို စိတ်ပျက်နေပြီး ရှုံးနိမ့်သလို ခံစားရတယ်လို့ ပြောလိုက်ပါတယ်။

ရက်ရှ်ဖို့ဒ်က “ရှုံးနိမ့်သလိုကို ခံစားရတာပါ။ ကျနော်တို့ဟာ ပွဲထဲကို ပြန်ဝင်ရောက် နိုင်ဖို့အတွက် ကောင်းမွန်စွာ လုပ်ဆောင် နိုင်ခဲ့တယ်လို့ ထင်ပါတယ်။ ကျနော်တို့ဟာ အေးဆေး တည်ငြိမ်စွာ နေခဲ့သလို စုစည်းမှုလည်း ရှိခဲ့ ပါတယ်။ ပြီးတော့ အခွင့်အရေးတွေလည်း ဖန်တီးနိုင်ဖို့ အကောင်းဆုံး ကြိုးစားခဲ့လို့ ဒုတိယပိုင်းမှာ လျင်လျင်မြန် မြန်နဲ့ သွင်းဂိုး ၂ ဂိုး ရယူနိုင်ခဲ့ပါတယ်။ ပွဲကိုလည်း ထိန်းချုပ်နိုင်ခဲ့ပေမယ့် သူတို့က ထိပ်တန်း ကစားသမားတွေနဲ့ ကောင်းမွန်တဲ့ အသင်းဖြစ်လို့ ချေပဂိုးကို ပြန်ပြီး ရယူနိုင်ခဲ့တာပါ။ ဒုတိယအကျော့မှာတော့ နောက်ထပ် ပွဲကောင်း တစ်ပွဲ ဖြစ်လာနိုင်ဖို့ မျှော်လင့်ထားပြီး အခုထက် ပိုပြီးလုပ်ဆောင်နိုင်မှာပါ”လို့ BT Sport ကို ပြောခဲ့တာပါ။

ဘာစီလိုနာနဲ့ ယူနိုက်တက် ယှဉ်ပြိုင်နေစဉ်

ဒီပွဲရဲ့ ပထမပိုင်းမှာ ဂိုးမရှိ သရေကျခဲ့ပေမယ့် ဒုတိယပိုင်းမှာ အပြန်အလှန် သွင်းဂိုးတွေကို မြင်တွေ့ခဲ့ရတာ ဖြစ်ပါတယ်။

ဘာစီလိုနာအသင်းက အလွန်ဆိုရဲ့ သွင်းဂိုးနဲ့ စတင်ဦးဆောင် နိုင်ခဲ့ပေမယ့် ရက်ရှ်ဖို့ဒ်က ချေပဂိုး ပြန်သွင်းခဲ့ပြီး ယူနိုက်တက်အတွက် ဦးဆောင်ဂိုး ဖြစ်စေမယ့် ဘာစီလိုနာ နောက်ခံလူ ကွန်ဒေးရဲ့ ကိုယ့်ဂိုးကိုယ် သွင်းယူမှုမှာ လည်း ရက်ရှ်ဖို့ဒ်ရဲ့ ဖန်တီးပေးမှုကနေ ရရှိခဲ့တာပါ။

ဒါပေမယ့် ရာဖင်ဟာက ချေပဂိုး ပြန်သွင်းခဲ့လို့ ၂ ဂိုးစီ သရေရလဒ်နဲ့ ပွဲပြီးဆုံးသွားခဲ့တာ ဖြစ်ပါတယ်။

အင်္ဂလန်တိုက်စစ်မှူးဟာ ဘာစီလိုနာ အသင်းဘက်ကို သွင်းယူခဲ့တဲ့ ဂိုးကြောင့် ဒီရာသီပြိုင်ပွဲစုံသွင်းဂိုး ၂၂ ဂိုးအထိ ရှိလာခဲ့ပြီး သူ့ရဲ့ အကောင်းဆုံး ရာသီဖြစ်ခဲ့တဲ့ ၂၀၁၉-၂၀ ရာသီက သွင်းဂိုး အရေအတွက်ကို လိုက်မှီခဲ့တာပါ။

ရက်ရှ်ဖို့ဒ်က ဒီပွဲစဉ်မှာ သူ့ကို ဘာစီလိုနာ နောက်ခံလူ ကွန်ဒေးက ဂိုးဧရိယာအပြင်ဘက်မှာ ပြစ်ဒဏ် ကျူးလွန်ခဲ့တဲ့ အတွက် ပြစ်ဒဏ်ဘော ကန်သွင်းခွင့် ရသင့်တယ်လို့ ပြောခဲ့ပါတယ်။

ဘာစီလိုနာနဲ့ ယူနိုက်တက် ယှဉ်ပြိုင်နေစဉ်

ရက်ရှ်ဖို့ဒ်က “ဒါက ဒီပွဲရဲ့ ကြီးမားတဲ့ အခိုက်အတန့် တစ်ခုပါပဲ။ ကျနော်ဒါကို ပြန်မကြည့် ရသေးပေမယ့် စည်းကြပ် ဒိုင် ဒါမှမဟုတ် ကွင်းလယ်ဒိုင် လူကြီးက ကျနော် လဲကျတာဆိုပြီး ဘာကြောင့် ထင်နေလဲဆိုတာ ကျနော် နားမလည် နိုင်ပါဘူး။ ကျနော်သူ့ကို ကျော်ဖြတ်နိုင်ခဲ့တယ်။ သူကသာ ကျနော့် ခြေထောက်ကို ထိခဲ့တာပါ။ ဒါဟာ ရှင်းရှင်းလင်းလင်းပါပဲ။ ဒါက ပင်နယ်တီတော့ မဟုတ်ပေမယ့် ၁၀၀ ရာခိုင်နှုန်း ပြစ်ဒဏ်ဘော ပေးရမှာပါ။ ဒါပေမယ့် ကျနော်ခုနက ပြောခဲ့သလိုပဲ ပြန်မကြည့်ရသေးဘူး”လို့ ပြောခဲ့တာပါ။

ယူနိုက်တက်အသင်း နည်းပြ အဲရစ်တန်ဟတ်ကတော့ ကွန်ဒေးဟာ နောက်ဆုံး ကျန်ရှိနေတဲ့ ကစားသမားဖြစ်တဲ့ အတွက် တိုက်ရိုက် အနီကတ်နဲ့ ထုတ်ပယ်သင့်တယ်လို့ ပြောခဲ့ပါတယ်။

ဒါ့အပြင် ဘာစီလိုနာအသင်း နည်းပြ ဇာဗီကလည်း ယူနိုက်တက် ဂိုးဧရိယာအတွင်းမှာ ဖရက် ဘောလုံးကိုလက်နဲ့ ထိခဲ့တာကို ပင်နယ်တီမပေးလို့ ဝေဖန်မှုတွေ ပြုလုပ်ခဲ့ပါတယ်။

ဒီနှစ်သင်းရဲ့ ယူရိုပါလိဂ် ပလေးအော့ဖ် ဒုတိယအကျော့ ပွဲစဉ်ကို ဖေဖော်ဝါရီ ၂၄ ရက် အိုးထရက်ဖို့ဒ်ကွင်းမှာ ယှဉ်ပြိုင်သွားမှာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဖေဖော်ဝါရီ ၁၆

စီးရီးအေကလပ် ဆလာနီတာနာအသင်းဟာ ရက်ပေါင်း ၃၁ ရက် အတွင်းမှာ နည်းပြဖြစ်သူ နီကိုလာကို ဒုတိယ အကြိမ်အဖြစ် ထုတ်ပယ်လိုက်ပြီ ဖြစ်ပါတယ်။

အသက် ၄၉ နှစ်အရွယ်ရှိ နီကိုလာဟာ အတ္တလန္တာအသင်းကို ၈ ဂိုး- ၂ ဂိုးနဲ့ ဂိုးပြတ် အရေးနိမ့်ပြီးနောက် ထုတ်ပယ် ခံခဲ့ရပေမယ့် ၂ ရက်အကြာမှာ နည်းပြအဖြစ် ပြန်လည် ခန့်အပ်ခြင်း ခံခဲ့ရတာပါ။

နီကိုလာဟာ ပြန်လည် ခန့်အပ်ခံရပြီးနောက် ဆလာနီတာနာအသင်းကို ကိုင်တွယ်ခဲ့တဲ့ ၄ ပွဲမှာ ၁ ပွဲသာ အနိုင်ရပြီး ၃ ပွဲ အရေးနိမ့်ခဲ့တာကြောင့် အသင်းဟာ တန်းဆင်းဇုန်အဆင့် ၁၈ နေရာမှာရှိတဲ့ ဗီရိုနာအသင်းနဲ့ ၄ မှတ်အကွာ အဆင့် ၁၆ နေရာမှာ ရပ်တည်နေတာ ဖြစ်ပါတယ်။

အီတလီလူမျိုးနည်းပြဟာ ဆလာနီတာနာအသင်းကို နောက်ဆုံး ကိုင်တွယ်ခဲ့တဲ့ ၁၀ ပွဲမှာ ၁ ပွဲသာ အနိုင်ရခဲ့ပြီး ၇ ပွဲအထိ အရေးနိမ့်ခဲ့တာကြောင့် ထုတ်ပယ်ဖို့ ဆုံးဖြတ်ခဲ့တာ ဖြစ်ပါတယ်။

နည်းပြ နီကိုလာကိုတွေ့ရစဉ်

နီကိုလာဟာ ဆလာနီတာနာအသင်းကို ပြီးခဲ့တဲ့နှစ် ဖေဖော်ဝါရီလက စတင်ကိုင်တွယ်ခဲ့တာဖြစ်ပြီး ကိုင်တွယ်ခဲ့တဲ့ ၃၈ ပွဲမှာ ၉ ပွဲနိုင် ၁၂ ပွဲသရေနဲ့ ၁၇ ပွဲအထိ အရေးနိမ့်ကာ အနိုင် ရာခိုင်နှုန်း ၂၃.၆၈ သာ ရှိတယ်လို့ အချက်အလက် တွေအရ သိရတာပါ။

ဆလာနီတာနာ အသင်းဟာ နီကိုလာရဲ့ နေရာမှာ ဖီအိုရင်တီးနား အသင်းနည်းပြဟောင်း ပေါ်လိုဆိုဆာကို နည်းပြ သစ်အဖြစ် ခန့်အပ်ခဲ့တာ ဖြစ်ပါတယ်။

ပေါ်လိုဆိုဆာဟာ ဆာလာနီတာနာအသင်း ပွဲဦးထွက်အဖြစ် တနင်္ဂနွေနေ့မှာ ကစားမယ့် လာဇီယိုအသင်းနဲ့ စီးရီးအေပွဲစဉ်ကို စတင် ကိုင်တွယ်ရမှာလည်း ဖြစ်ပါတယ်။

ပေါ်လိုဆိုဆာဟာ နာမည်ကြီး အသင်းတွေဖြစ်တဲ့ လက်စတာ၊ ဘေဆယ်လ်၊ ဘော်ဒိုးနဲ့ ပိုလန် လက်ရွေးစင် အသင်းတို့ကိုလည်း ကိုင်တွယ်ခဲ့ဖူးပါတယ်။

စီးရီးအေ အမှတ်ပေး ဇယားအဆင့် ၁၇ နေရာမှာ ရပ်တည်နေတဲ့ စပီဇီယာအသင်းကလည်း ရလဒ်တွေ ဆိုးရွားနေ တာကြောင့် နည်းပြဖြစ်သူ လူကာဂေါ်တီကို ရာထူးကနေ ထုတ်ပယ်ခဲ့တယ်လို့ သိရပါတယ်။

Source: CNA

CNI Sport News

၂၀၂၃ ခုနှစ်၊ ဖေဖော်ဝါရီ ၁၆

အီဘရာဟီမိုဗစ်ဟာ အသင်းကြီးနဲ့ ကစားခဲ့တဲ့ပွဲမှာ အေစီမီလန် ယူ-၁၈ အသင်းအတွက် သားဖြစ်သူနဲ့အတူ ဝင်ရောက် ကစားသွားခဲ့ပါတယ်။

မကြာသေးခင်ကမှ ဒဏ်ရာကနေ ပြန်ကောင်းမွန်လာခဲ့တဲ့ အီဘရာဟီမိုဗစ်ဟာ အသင်းကြီးမှာ ဝင်ရောက် မကစားခင် အေစီမီလန် ယူ-၁၈ အသင်းအတွက် ပါဝင်ကစားခဲ့ခြင်း ဖြစ်ပါတယ်။

ဝါရင့်တိုက်စစ်မှူးကြီးဟာ လူငယ်အသင်းမှာ သားဖြစ်သူ မတ်ဇီမီလီယံနဲ့အတူ တွဲကစားခဲ့ပြီး အီဘရာဟီမိုဗစ်ဟာ လေ့ကျင့်ရေးပွဲစဉ်မှာ သူကစားနေတဲ့ နေရာအတိုင်း ကစားခဲ့ပါတယ်။ သားဖြစ်သူကတော့ တောင်ပံမှာ ကစားခဲ့ပါ တယ်။

အီဘရာဟီမိုဗစ်ရဲ့ နောက်ထပ် သားဖြစ်သူ ဗင်းဆန့်ကလည်း အေစီမီလန်အသင်းမှာပဲ ရှိနေပါတယ်။ အဲဒီ လူငယ် ကစားသမားနှစ်ဦးဟာ ဖခင်နဲ့အတူ တစ်သင်းတည်းမှာ ကစားနေတာပါ။

အီဘရာဟီမိုဗစ်ဟာ ပြီးခဲ့တဲ့ ရာသီအကုန်က ဒူးဒဏ်ရာကို ခွဲစိတ် ကုသမှု ခံယူခဲ့ရပြီး ဒီရာသီမှာ အသင်းအတွက် တစ်ပွဲမှ ပါဝင်ကစားနိုင်ခြင်း မရှိသေးပါဘူး။

အေစီမီလန် ယူ-၁၈ အသင်းမှာ လေ့ကျင့်ခန်းဆင်းနေတဲ့ အီဘရာဟီမိုဗစ်ကိုတွေ့ရစဉ်

ဆွီဒင်လက်ရွေးစင် ကစားသမားဟာ မကြာသေးခင်ကမှ အသင်းရဲ့ လေ့ကျင့်ခန်း အစီအစဉ်တွေမှာ ပြန်လည် ပါဝင်လာခဲ့ပြီး အသင်းကြီးအတွက် အမြန်ဆုံး ပါဝင်ကစားနိုင်ဖို့ ပစ်မှတ်ထား နေတာဖြစ်ပါတယ်။

ဒါပေမယ့် နည်းပြ ပိုင်အိုလီကတော့ အီဘရာဟီမိုဗစ်ကို ချန်ပီယံလိဂ် ရှုံးထွက်အဆင့်အတွက် ကစားသမား စာရင်းမှာ ထည့်သွင်းထားခြင်း မရှိပါဘူး။

အေစီမီလန်အသင်းဟာ ပြီးခဲ့တဲ့ရာသီက စီးရီးအေဖလား ဆွတ်ခူးနိုင်ခဲ့ပေမယ့် ဒီရာသီမှာတော့ ရလဒ်တွေ မကောင်းမွန်တာကြောင့် ထိပ်ဆုံးက ဦးဆောင်နေတဲ့ နာပိုလီအသင်းနဲ့ ၁၈ မှတ် ကွာဟနေပြီး အဆင့် ၅ နေရာမှာ ရပ်တည်နေတာပါ။

ဒါပေမယ့် မကြာသေးခင်က ကစားခဲ့တဲ့ တိုရီနိုနဲ့ စီးရီးအေပွဲမှာ ၁ ဂို- ဂိုး မရှိနဲ့ အနိုင်ရခဲ့သလို စပါးအသင်းနဲ့ ချန်ပီယံလိဂ်ပွဲမှာလည်း ၁ ဂိုး- ဂိုးမရှိနဲ့ အနိုင်ရကာ ရလဒ်ကောင်းတွေကို ပြန်လည် ရှာဖွေနိုင်ခဲ့ပါတယ်။

အေစီမီလန်အသင်းဟာ စနေနေ့မှာ စီးရီးအေ ပွဲစဉ်အဖြစ် မွန်ဇာအသင်းနဲ့ ယှဉ်ပြိုင်ရမှာဖြစ်ပြီး ဒီရာသီ သူ့ရဲ့ ပထမဆုံး ပွဲစဉ်အဖြစ် အီဘရာဟီမိုဗစ် ပါဝင်နိုင်မလားဆိုတာ စောင့်ကြည့်ရမှာလည်း ဖြစ်ပါတယ်။