- By CNI
- Category: အားကစား
- Hits: 572
CNI Sport News
၂၀၂၃ ခုနှစ်၊ ဖေဖော်ဝါရီ ၁၀
နိုင်ငံတကာအိုလံပစ်ကော်မတီ(IOC) ဥက္ကဋ္ဌ သောမတ်စ်ဘတ်ချ်က ရုရှားနဲ့ ဘယ်လာရုစ် အားကစားသမားတွေ ပါဝင်မှုနဲ့ ပတ်သက်ပြီး ၂၀၂၄ အိုလံပစ်ပြိုင်ပွဲကို သပိတ်မှောက်ဖို့ ခြိမ်းခြောက်နေတဲ့ ယူကရိန်းအနေနဲ့ ဒါကို ရုပ်သိမ်းပေးဖို့ တိုက်တွန်း ပြောကြားခဲ့ပါတယ်။
သောမတ်စ်ဘတ်ချ်က “၂၀၂၄ အိုလံပစ်မှာ ရုရှား ဒါမှမဟုတ် ဘယ်လာရုစ် နိုင်ငံကူးလက်မှတ်နဲ့ ကြားနေ အား ကစားသမားတွေရဲ့ ပါဝင်မှုကို တိကျတဲ့ စကားလုံးတွေနဲ့တောင် မဆွေးနွေးရသေးပါဘူး။ ဒါကြောင့် နိုင်ငံတကာ အဖွဲ့ချုပ်တွေ၊ အိုလံပစ်အဖွဲ့ဝင်တွေနဲ့ အနာဂတ်အိုလံပစ် အိမ်ရှင်တွေထံ သူတို့ရဲ့ ဆုံးဖြတ်ချက် ချခြင်းကို ဖိအား ပေးပြီး လွှမ်းမိုးဖို့ ကြိုးပမ်းနေတာကို ရိပ်မိပါတယ်။ ဒါဟာ အလွန်ဝမ်းနည်းဖို့ ကောင်းပါတယ်။ အိုလံပစ် ပဋိညာဉ် စာတမ်းရဲ့အခြေခံမူတွေကို လိုက်နာဖို့က အမျိုးသားအိုလံပစ်ကော်မတီတွေရဲ့ တာဝန်ဖြစ်တယ်”လို့ ပြောခဲ့တာပါ။
နိုင်ငံတကာအိုလံပစ်ကော်မတီဟာ လာမယ့် အိုလံပစ်ပြိုင်ပွဲမှာ ကြားနေအဖြစ် ယှဉ်ပြိုင်နိုင်ဖို့ တံခါးဖွင့်ပေးပြီး နောက် ရုရှားနဲ့ ဘယ်လာရုစ် အားကစားသမားတွေကို ပိတ်ပင်ဖို့အတွက် နိုင်ငံတကာရဲ့ ကျယ်ကျယ်ပြန့်ပြန့် ထောက်ခံမှုကိုရဖို့ ယူကရိန်းက မျှော်လင့်နေတာ ဖြစ်ပါတယ်။
ရုရှားနဲ့ ဘယ်လာရုစ် အားကစားသမားတွေဟာ ရုရှားက ယူကရိန်းကို ကျူးကျော်ပြီး ကတည်းက နိုင်ငံတကာ အားကစားပြိုင်ပွဲ အများအပြားကနေ ပိတ်ပင်ခံခဲ့ရတာပါ။
ပဲရစ် အိုလံပစ် ပွဲတော် ကျင်းပရေး ပြင်ဆင်နေစဉ်(GETTY IMAGES)
ယူကရိန်းသမ္မတ ဇာလန်းစကီးကတော့ အိုလံပစ်ပြိုင်ပွဲကနေ ရုရှားကို ပိတ်ပင်ဖို့ IOC ကို တိုက်တွန်းထားပြီး နော်ဒစ်နဲ့ ဘောလ်တစ်ဒေသရှိ အိုလံပစ်အဖွဲ့တွေနဲ့ လွှတ်တော်ကိုယ်စားလှယ်တွေက ယူကရိန်းကို ထောက်ခံ ထားတာ ဖြစ်ပါတယ်။
IOC ကတော့ သပိတ်မှောက်တာဟာ အိုလံပစ်ပဋိညာဉ်ကို ချိုးဖောက်ရာ ရောက်ကြောင်း၊ ရုရှားနဲ့ ဘယ်လာရုစ် ပါဝင်တာဟာ အိုလံပစ်လှုပ်ရှားမှုအတွင်း ခွဲခြားမှုကို ဆန့်ကျင်တဲ့ ကုလသမဂ္ဂရဲ့ ဆုံးဖြတ်ချက်အပေါ် အခြေခံတယ် လို့ ပြောခဲ့တာပါ။
နိုင်ငံတကာအိုလံပစ်ကော်မတီဟာ ရုရှားနဲ့ ဘယ်လာရုစ် အားကစားသမားတွေကို အာရှခြေစစ်ပွဲတွေကနေ အိုလံပစ်ပြိုင်ပွဲကို ဝင်ခွင့်ရဖို့အတွက် အလံ ဒါမှမဟုတ် နိုင်ငံတော်သီချင်း မပါဝင်ဘဲ ကြားနေအဖြစ် ယှဉ်ပြိုင်ဖို့ ပြီးခဲ့တဲ့လက ကြေညာခဲ့တာ ဖြစ်ပါတယ်။
ပဲရစ်အိုလံပစ်ပြိုင်ပွဲရဲ့ ပွဲစီစဉ်သူတွေကတော့ နိုင်ငံတကာ အိုလံပစ် ကော်မတီရဲ့ ဆုံးဖြတ်ချက်ကို လိုက်နာမယ်လို့ ပြောထားပါတယ်။
Source: CNA
- By CNI
- Category: အားကစား
- Hits: 489
CNI Sport News
၂၀၂၃ ခုနှစ်၊ ဖေဖော်ဝါရီ ၁၀
ရော်နယ်ဒိုဟာ အယ်လ်နာဆာအသင်းက အယ်လ်ဝါဒါအသင်းကို ၄ ဂိုး- ဂိုးမရှိနဲ့ အနိုင်ရခဲ့တဲ့ ဆော်ဒီပရိုလိဂ် ပွဲစဉ်မှာ အသင်းအတွက် ၄ ဂိုးစလုံးသွင်းယူပြီး ကစားသမားဘ၀ လိဂ်သွင်းဂိုး ၅၀၀ ကျော်သွားခဲ့ပြီဖြစ်ပါတယ်။
ရော်နယ်ဒိုဟာ ပြီးခဲ့တဲ့ပွဲတွေမှာ ဂိုးသွင်းခွင့် အများအပြားလွဲချော်ခဲ့လို့ ဝေဖန်မှုတွေခံနေရတာကို ဒီပွဲမှာ စူပါ ဟတ်ထရစ်သွင်းပြီး အဆုံးသတ်နိုင်ခဲ့တာပါ။ပေါ်တူဂီကစားသမားဟာ ဒီပွဲရဲ့ ပထမဂိုးသွင်းယူမှုအပြီးမှာ ကစား သမားဘ၀ လိဂ်သွင်းဂိုး ၅၀၀ ပြည့်တဲ့ သမိုင်းမှတ်တိုင်ကို စိုက်ထူနိုင်ခဲ့တာလည်း ဖြစ်ပါတယ်။ရော်နယ်ဒိုဟာ ကစားသမားဘဝမှာ စပို့တင်းလစ္စဘွန်း၊ ယူနိုက်တက်၊ရီးရယ်လ်၊ဂျူဗင်တပ်စ်နဲ့ အခုအယ်လ်နာဆာအသင်းအတွက် လိဂ်ပွဲပေါင်း ၆၅၆ ပွဲကစားပြီး ၅၀၃ ဂိုးသွင်းယူနိုင်ခဲ့တာပါ။
အယ်လ်ဝါဒါဘက်ကိုသွင်းယူခဲ့တဲ့ ဟတ်ထရစ်ဂိုးဟာ ရော်နယ်ဒိုအတွက် ကစားသမားဘ၀ (၆၁) ကြိမ်မြောက် ဟတ်ထရစ်ဖြစ်ပြီး ၄ ဂိုးနဲ့အထက် သွင်းယူနိုင်တဲ့ (၁၁) ပွဲမြောက်ပွဲလည်းဖြစ်လာခဲ့ပါတယ်။ ရော်နယ်ဒိုကတော့ သူရဲ့စံချိန်မှတ်တမ်းတွေထက် အသင်းရလဒ်ကောင်းရယူနိုင်ဖို့သာ အရေးကြီးတယ်လို့ ပွဲအပြီးမှာ ပြောခဲ့တာပါ။
ရော်နယ်ဒိုက “ဒီနေ့သွင်းခဲ့တဲ့ ဂိုးတွေအတွက် တကယ်ကို ပျော်ရွှင်မိပါတယ်။ဒါပေမယ့် ကျနော့်ကို ပိုပြီးပျော်ရွှင်စေတာက ကျနော့်ရဲ့အသင်းဖော်တွေကို ဒီပွဲမှာ အနိုင်ရအောင် ကူညီပေးနိုင်ခဲ့တာပါ။၄ ဂိုးသွင်းပြီး လိဂ်သွင်းဂိုး ၅၀၀ ကျော်သွားခဲ့တာကတော့ အလွန်ကောင်းမွန်တဲ့ ခံစားချက်ပါ”လို့ ပြောခဲ့တာဖြစ်ပါတယ်။
ရော်နယ်ဒိုဟာ လက်ရှိအချိန်မှာ အယ်လ်နာဆာအသင်းအတွက် (၄) ပွဲကစားထားပြီး (၅) ဂိုးသွင်းယူထားကာ အသင်းကို ဆော်ဒီလိဂ်အမှတ်ပေးဇယားထိပ်ဆုံးနေရာရောက်ရှိအောင် ကူညီပေးထားနိုင်တာပါ။ အယ်လ်နာဆာ အသင်းဟာ ဆော်ဒီပရိုလိဂ်အမှတ်ပေးဇယားမှာ ဒုတိယနေရာက အယ်လ်ရှာဘတ်အသင်းထက် (၁) ပွဲလျော့ ကစားထားပြီး ရမှတ်တူ၊ ဂိုးကွာခြားချက်အသာနဲ့ ဦးဆောင်နေတာ ဖြစ်ပါတယ်။
အယ်လ်နာဆာအသင်းဟာ ဖေဖော်ဝါရီလ ၁၇ ရက်မှာ အယ်လ်တာဝေါင်အသင်းနဲ့ ယှဉ်ပြိုင်ရမှာဖြစ်ပြီး ရော်နယ်ဒို ရဲ့သွင်းဂိုးတွေကို ထပ်ပြီးမြင်တွေ့ရမလားဆိုတာ စောင့်ကြည့်ရမှာလည်း ဖြစ်ပါတယ်။
Source:Goal
- By CNI
- Category: အားကစား
- Hits: 624
CNI Sport News
၂၀၂၃ ခုနှစ်၊ ဖေဖော်ဝါရီ ၉
ဆော်ဒီမင်းသား အယ်လ်ဝါလိဒ် ဘင်တာလယ်ဟာ ဖလာမင်ဂိုအသင်းကို ဆီမီးဖိုင်နယ်မှာ အနိုင်ရပြီး ကလပ်ကမ္ဘာ့ ဖလား ဗိုလ်လုပွဲ တက်နိုင်ခဲ့တဲ့ အယ်လ်ဟီလယ်အသင်း ကစားသမား တစ်ဦးချင်းစီကို ဒေါ်လာ ၂၆၆,၅၀၀ ဆုကြေး ချီးမြှင့်ခဲ့တယ်လို့ သိရပါတယ်။
အယ်လ်ဟီလယ်အသင်းဟာ တောင်အမေရိက ချန်ပီယံ ဖလာမင်ဂိုအသင်းကို ၃ ဂိုး- ၁ ဂိုးနဲ့ အနိုင်ရပြီး ကလပ် ကမ္ဘာ့ဖလား ဗိုလ်လုပွဲ တက်နိုင်ခဲ့တာပါ။
မင်းသား အယ်လ်ဝါလိဒ်ဘင်တာလယ်ဟာ အယ်လ်ဟီလယ်အသင်းရဲ့ အမာခံပရိသတ်ဖြစ်ပြီး စနေနေ့မှာ ကစား မယ့် ဗိုလ်လုပွဲမှာ ထပ်ပြီး အနိုင်ရခဲ့မယ်ဆိုရင် ကစားသမားတွေကို ဒီလိုတူညီတဲ့ ပမာဏမျိုးကို လက်ဆောင် ပေးမယ်လို့ ဆိုရှယ်မီဒီယာမှာ ကြေညာခဲ့တာ ဖြစ်ပါတယ်။
အယ်လ်ဟီလယ် ကစားသမားတွေဟာ ဗိုလ်လုပွဲ တက်နိုင်ခဲ့လို့ နိုင်ငံရဲ့ အားကစားဝန်ကြီး ဆီကနေလည်း ရီယယ် ၅၀၀,၀၀၀ ရရှိမယ်လို့ ဆော်ဒီအားကစားချန်နယ်လ် SSC က ဖော်ပြခဲ့တာပါ။
အယ်လ်အာလီ အသင်းကစားသမားများကိုတွေ့ရစဉ်
ဆော်ဒီအသင်းတွေဟာ ကလပ်ကမ္ဘာ့ဖလား ဗိုလ်လုပွဲကို ပထမဆုံးအကြိမ် တက်ရောက်နိုင်ခဲ့တာပါ။ ပြီးခဲ့တဲ့ နိုဝင်ဘာလက ကမ္ဘာ့ဖလားပြိုင်ပွဲမှာ အာဂျင်တီးနားအသင်းကို အနိုင်ရပြီးနောက် ဆော်ဒီလက်ရွေးစင်အသင်း ဂုဏ်ပြုခံရပြီးနောက် နောက်ထပ် ပြိုင်ပွဲတစ်ခုမှာ အောင်မြင်မှုအဖြစ် နိုင်ငံအစိုးရရဲ့ ဂုဏ်ပြုခြင်း ခံခဲ့ရတာ ဖြစ်ပါ တယ်။
ဆော်ဒီအားကစားဝန်ကြီးက “အနိုင်ရခဲ့တာဟာ မကြာသေးခင်က ဆော်ဒီအားကစားမှာ ကြုံတွေ့ခဲ့ရတဲ့ ကြီးကျယ် ခမ်းနားတဲ့ ထူးခြားမှုကို ထင်သာမြင်သာရှိတဲ့ အတည်ပြုချက်ပါပဲ”လို့ SPA က ထုတ်ပြန်တဲ့ ကြေညာချက်မှာ ပြောခဲ့တာပါ။
အယ်လ်ဟီလယ်အသင်းဟာ ကလပ်ကမ္ဘာ့ဖလား ဗိုလ်လုပွဲအဖြစ် ချန်ပီယံဆုကို ၄ ကြိမ်ရရှိထားတဲ့ ရီးရယ်လ် အသင်းနဲ့ ယှဉ်ပြိုင်ရမှာ ဖြစ်ပါတယ်။
ရီးရယ်လ်အသင်းဟာ ဆီမီးဖိုင်နယ်ပွဲစဉ်မှာ အယ်လ်အာလီအသင်းကို ၄ ဂိုး- ၁ ဂိုးနဲ့ အနိုင်ရရှိခဲ့တာ ဖြစ်ပါတယ်။
Source: Edition
- By CNI
- Category: အားကစား
- Hits: 619
CNI Sport News
၂၀၂၃ ခုနှစ်၊ ဖေဖော်ဝါရီ ၉
မက်ဆီ မရှိခင်တုန်းက ဘာစီလိုနာအကြောင်းကို ဘယ်သူမှမသိဘူးလို့ အစ်ကိုဖြစ်သူ မာတီးယတ်စ်က လာလီဂါ ကလပ်ရဲ့ သမိုင်းကြောင်းကို ထုတ်ဖော် ပြောကြားလိုက်ပါတယ်။
မာတီးယတ်စ်က “ခင်ဗျားတို့အကြောင်း ကျနော်မသိပေမယ့် ဘာစီလိုနာက မက်ဆီကြောင့် လူပိုသိလာခဲ့ပါတယ်။ သူတို့ အကြောင်းကို အရင်က ဘယ်သူမှ မသိပါဘူး။ ဘယ်သူမဆို ဘာစီလိုနာကိုသွားပြီး ပြတိုက်ကို ကြည့်ခွင့်ရ မယ်ဆိုရင် ပြတိုက်က မက်ဆီပဲဆိုတာကို ခင်ဗျားတို့ မြင်တွေ့ရမှာပါ”လို့ ပြောခဲ့တာပါ။
မက်ဆီဟာ ဘာစီလိုနာအသင်းကို ၂၀၀၀ ခုနှစ်ကတည်းက ရောက်ရှိလာခဲ့တာဖြစ်ပြီး ၂၀၂၁ ခုနှစ်မှာ စာချုပ် ကုန်ဆုံးသွားလို့ ပီအက်စ်ဂျီအသင်းထံ ပြောင်းရွှေ့သွားခဲ့တာ ဖြစ်ပါတယ်။
မက်ဆီဟာ ဘာစီလိုနာ အသင်းနဲ့အတူ လာလီဂါဖလား ၁၀ ကြိမ်၊ ချန်ပီယံလိဂ်ဖလား ၄ ကြိမ် အပါအဝင် ဆုဖလား အများအပြား ရယူနိုင်ခဲ့တာပါ။ ဒါ့အပြင် တစ်ဦးချင်း ဆုတွေကိုလည်း မရေမတွက်နိုင်အောင် ရရှိခဲ့တာဖြစ်ပါတယ်။
မက်ဆီ မရောက်လာခင်အချိန်က ဘာစီလိုနာအသင်းမှာ ဂျိုဟန်ခရိုက်ဖ်၊ ဂွာဒီယိုလာ၊ ရော်နယ်လ်ကိုးမန်း၊ ကလွိုင်ဗတ်စတဲ့ နာမည်ကျော် ကစားသမားတွေလည်း ရှိခဲ့တာပါ။
မက်ဆီနဲ့ အစ်ကိုဖြစ်သူ မာတီးယတ်စ်ကိုတွေ့ရစဉ်
ဘာစီလိုနာအသင်းဟာ လာမယ့် နွေရာသီမှာ မက်ဆီကို ပြန်လည်ခေါ်ယူနိုင်ဖို့ ကြိုးစားနေပြီး ပီအက်စ်ဂျီအသင်း ကလည်း စာချုပ်သစ်ချုပ်နိုင်ဖို့ ပြင်ဆင်နေတာ ဖြစ်ပါတယ်။
မက်ဆီနဲ့ ပီအက်စ်ဂျီတို့ ချုပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးတော့မှာပါ။
မက်ဆီဟာ ဘာစီလိုနာ အသင်းကနေ ထွက်ခွာပြီးကတည်းက စပိန်ကလပ် အကြောင်းကို အများကြီး ပြောဆိုခြင်း မရှိတော့ဘဲ ပြင်သစ်ကလပ်နဲ့အတူ ဆုဖလားတွေ ရယူနိုင်ဖို့ အတွက်ကိုသာ အာရုံစိုက်နေတာ ဖြစ်ပါတယ်။
ပီအက်စ်ဂျီ အသင်းနဲ့အတူ ချန်ပီယံလိဂ်ဖလားကို ရယူနိုင်ဖို့ ပစ်မှတ်ထားနေတဲ့ မက်ဆီဟာ ၁၆ သင်းအဆင့်မှာ ဘိုင်ယန်မြူးနစ်အသင်းနဲ့ ယှဉ်ပြိုင်ရမှာဖြစ်လို့ ခက်ခဲတဲ့ စမ်းသပ်မှုတွေနဲ့ ရင်ဆိုင်ရမှာ ဖြစ်ပါတယ်။
မက်ဆီဟာ ဒီရာသီမှာ ပီအက်စ်ဂျီအသင်းအတွက် ၂၅ ပွဲကစားထားပြီး ၁၅ ဂိုး သွင်းယူထားကာ ခြေစွမ်းပြသနေ တာ ဖြစ်ပါတယ်။
Source: Goal
- By CNI
- Category: အားကစား
- Hits: 650
CNI Sport News
၂၀၂၃ ခုနှစ်၊ ဖေဖော်ဝါရီ ၉
ယူနိုက်တက်နည်းပြ အဲရစ်တန်ဟတ်က ပရီးမီးယားလိဂ်ပြိုင်ပွဲမှာ ပြန်လည်ပါဝင်လာပြီး လိဒ်စ်အသင်းနဲ့ပွဲမှာ ဂိုးသွင်းနိုင်ခဲ့တဲ့ တောင်ပံကစားသမား ဆန်ချိုကို ဂုဏ်ယူတယ်လို့ ပြောလိုက်ပါတယ်။
အဲရစ်တန်ဟတ်က “သူလုပ်ခဲ့တာတွေအတွက် ကျနော်ကျေနပ်ပြီး ဂုဏ်ယူပါတယ်။ သူဟာ ခက်ခဲတဲ့ ကာလတစ်ခု ကို ဖြတ်သန်းခဲ့ရပါတယ်။ ဆန်ချိုဟာ ထက်မြက်တဲ့ ဘောလုံးသမားဖြစ်ပြီး မှန်ကန်တဲ့ အဆင့်တွေမှာ ရင်းနှီးမြှုပ်နှံ နိုင်မယ်ဆိုရင် ထူးချွန်တဲ့သူ ဖြစ်လာမှာပါ။ ကျနော် သူ့အနောက်မှာ ရှိသလို နည်းပြတွေနဲ့ အသင်းကလည်း သူနဲ့ အတူ ရှိပါတယ်။ ဒါပေမယ့် နောက်ဆုံးကတော့ သူကိုယ်တိုင် လုပ်ဆောင်ရမှာပါ။ ဒါတွေက သူ့လက်ထဲမှာပဲရှိပြီး သူက အလိုရှိတယ်ဆိုရင် သူလုပ်နိုင်မှာပါ”လို့ ပြောခဲ့တာပါ။
ယူနိုက်တက်အသင်းဟာ လိဒ်စ်အသင်းနဲ့ ၂ ဂိုးစီ သရေကျခဲ့တဲ့ ပရီးမီးယားလိဂ်ပွဲမှာ ဆန်ချိုဟာ လူစားဝင် ကစားခဲ့ ပြီး အသင်းအတွက် အရေးပါတဲ့ ဒုတိယမြောက် ချေပဂိုးကို သွင်းယူပေးခဲ့တာ ဖြစ်ပါတယ်။
အင်္ဂလန်ကစားသမားဟာ ရုပ်ပိုင်းနဲ့ စိတ်ပိုင်းဆိုင်ရာ ပြဿနာတွေနဲ့ ၃ လကြာ ရင်ဆိုင်ခဲ့ရပြီး မကြာသေးခင်ကမှ အသင်းကြီးနဲ့အတူ လေ့ကျင့်မှုတွေ ပြန်လည်ပြုလုပ်နိုင်ခဲ့တာပါ။
အဲရစ်တန်ဟတ်ကိုတွေ့ရစဉ်
ဆန်ချိုဟာ နော်တင်ဟမ်ဖောရက်စ်ကို အနိုင်ရခဲ့တဲ့ ကာရာဘောင်းဖလား ဆီမီးဖိုင်နယ်ပွဲမှာ ယူနိုက်တက်အတွက် လူစားဝင် ကစားသမားအဖြစ် ပါဝင်ခဲ့ရပါသေးတယ်။
လိဒ်စ်နဲ့ပွဲကတော့ ဆန်ချိုအတွက် အနားယူပြီးနောက် ပထမဆုံး ပြန်ကစားခဲ့တဲ့ ပရီးမီးယားလိဂ် ပွဲစဉ်ဖြစ်ပြီး သွင်းဂိုးကိုပါ ရယူနိုင်ခဲ့တာပါ။
ဒီဂိုးဟာ ဆန်ချိုအတွက် စက်တင်ဘာလ နောက်ပိုင်း ပထမဆုံး လိဂ်သွင်းဂိုးလည်း ဖြစ်ခဲ့ပါတယ်။
ဆန်ချိုအနေနဲ့ ဒီပုံစံအတိုင်း ဆက်သွားရင် အသင်းအောင်မြင်မှုတွေ ရရှိအောင် အကူအညီပေးနိုင်မယ်လို့လည်း ဒတ်ချ်လူမျိုးနည်းပြက ထပ်ပြီးပြောခဲ့ပါတယ်။
အဲရစ်တန်ဟတ်က “ဆန်ချိုဟာ အခုဆိုရင် လမ်းကြောင်းမှန်ပေါ်ကို ရောက်နေပါပြီ။ ဒီပုံစံအတိုင်း ဆက်ပြီး သွားနိုင်ခဲ့မယ်ဆိုရင် ကျနော်တို့ သွားချင်တဲ့ ပန်းတိုင်ကိုရောက်အောင် ကူညီပေးဖို့အတွက် ဒီထက်ပိုပြီး လုပ်နိုင်ပါ တယ်။ သူဟာ တည်ငြိမ်တဲ့ ပုံစံရှိရင် ကျနော်တို့အတွက် ကြီးမားတဲ့ သက်ရောက်မှုရှိနိုင်ပြီး သူ့ရဲ့သွင်းဂိုးကို ကျနော် နှစ်သက်ပါတယ်”လို့ ပြောခဲ့တာပါ။
ယူနိုက်တက်အသင်းဟာ လိဒ်စ်အသင်းနဲ့ သရေကျခဲ့တာကြောင့် အမှတ်ပေးဇယား အဆင့် ၃ နေရာမှာ ဆက်လက် ရပ်တည်နေပြီး အဆင့် ၄ နေရာက နယူးကာဆယ်အသင်းထက် ၁ ပွဲ ပိုကစားကာ ရမှတ် ၃ မှတ် အသာရနေတာ လည်း ဖြစ်ပါတယ်။
Source: BBC
- By CNI
- Category: အားကစား
- Hits: 594
CNI Sport News
၂၀၂၃ ခုနှစ်၊ ဖေဖော်ဝါရီ ၉
ရီးရယ်လ်အသင်းဟာ ကလပ်ကမ္ဘာ့ဖလား ဆီမီးဖိုင်နယ်ပွဲစဉ်အဖြစ် အယ်လ်အာလီအသင်းနဲ့ ကစားခဲ့တာမှာ ၄ ဂိုး- ၁ ဂိုးနဲ့ အနိုင်ရပြီး ဗိုလ်လုပွဲ တက်ရောက်နိုင်ခဲ့ပြီ ဖြစ်ပါတယ်။
ရီးရယ်လ်အတွက် ဂိုးတွေကို ဗီနီစီးယက်စ်၊ ဗယ်လ်ဗာဒီ၊ ရိုဒရီဂိုနဲ့ အာရီဘတ်စ်တို့က သွင်းယူခဲ့တာဖြစ်ပြီး အယ်လ်အာလီအတွက် ချေပဂိုးကို မာလူးက သွင်းယူခဲ့တာ ဖြစ်ပါတယ်။
ဒီပွဲရဲ့ ပွဲချိန် ၈၇ မိနစ်မှာ ရီးရယ်လ်အသင်း ပင်နယ်တီ ကန်သွင်းခွင့်ရခဲ့ပြီး မိုဒရစ် ကန်သွင်းတာ မဝင်ခဲ့လို့ ဥရောပ ချန်ပီယံအသင်းရဲ့ အနိုင်ရလဒ်ဟာ ဒီထက်ပိုပြီး မပြတ်သားခဲ့တာ ဖြစ်ပါတယ်။
ရီးရယ်လ်အသင်းဟာ ကလပ်ကမ္ဘာ့ဖလား ဗိုလ်လုပွဲကို ၅ ကြိမ်မြောက်အဖြစ် တက်ရောက်ခဲ့တာဖြစ်ပြီး အရင် ဗိုလ်လုပွဲ တက်ခဲ့တဲ့ ၄ ကြိမ်စလုံး ချန်ပီယံဆုကို ရယူနိုင်ခဲ့တာပါ။
နောက်ဆုံး ရယူနိုင်ခဲ့တာကတော့ ၂၀၁၈ ကဖြစ်ပြီး အယ်လ်အိန်အသင်းကို အနိုင်ရရှိခဲ့တာ ဖြစ်ပါတယ်။ ရီးရယ်လ် အသင်းနည်းပြ အန်ဆယ်လော့တီကတော့ ပွဲအနိုင်ရခဲ့ပေမယ့် အသင်းရဲ့စိတ်နေသဘောထားကို မကျေနပ်ဘူးလို့ ပြောခဲ့ပါတယ်။
ရီးရယ်လ်အသင်း အောင်ပွဲခံနေစဉ်
အန်ဆယ်လော့တီက “ကျနော်တို့ လွယ်လွယ်ကူကူနဲ့ အနိုင်ရခဲ့တာ မဟုတ်ပါဘူး။ ကောင်းမွန်စွာ ကစားရမှာ ဖြစ်သလို ပွဲပြီးဆုံးတဲ့ အချိန်အထိ အာရုံစူးစိုက်မှု အပြည့်ရှိနေရပါမယ်။ မိုဒရစ်ရဲ့ ပင်နယ်တီ မရောက်ခင် အချိန် အထိ ကျနော်တို့ဟာ ခက်ခဲတဲ့ မိနစ်အနည်းငယ်ကို ဖြတ်ကျော်ခဲ့ရပါတယ်။ ကျနော်တို့တွေဟာ ပြင်းပြမှုတွေကို လျှော့ချလိုက်တော့ အနည်းငယ် ခံစားခဲ့ရတာတွေ ရှိခဲ့ပါတယ်။ ဒါပေမယ့် အဆုံးမှာတော့ ကျနော်တို့ ထိန်းနိုင်ခဲ့ပြီး ဗိုလ်လုပွဲ တက်နိုင်ခဲ့ပါတယ်”လို့ ပြောခဲ့တာပါ။
အယ်လ်အာလီအသင်း နည်းပြကတော့ အသင်း အရေးနိမ့်မှု၊ အခွင့်အရေး လွဲချော်မှုတွေအတွက် စိတ်ပျက်ပေမယ့် ဖလာမင်ဂိုနဲ့ပွဲမှာတော့ အကောင်းဆုံး ပြန်လည် တိုက်ပွဲဝင်သွားမယ်လို့ ပြောခဲ့ပါတယ်။
မာဆယ်လ်ခေါလ်လာက “ရီးရယ်လ်အသင်းကို ကောင်းမွန်စွာ ယှဉ်ပြိုင်နိုင်ခဲ့ပေမယ့် ဂိုးသွင်းခွင့်တွေကို အခွင့် အရေး မယူနိုင်ခဲ့တဲ့အတွက် စိတ်ပျက်စရာ ကောင်းတဲ့ရလဒ် တစ်ခုပါပဲ။ ကျနော်တို့ဟာ ဖလာမင်ဂိုနဲ့ ကစားရမယ့် ပွဲမှာ ယုံကြည်မှုအပြည့်နဲ့ ကစားသွားမှာပါ။ ဒီနေ့မှာ ကျနော်တို့ အရေးနိမ့်ခဲ့ပေမယ့် စနေနေ့မှာ ထပ်ပြီးတိုက်ပွဲ ဝင်ရမယ်”လို့ ပွဲအပြီးမှာ ပြောခဲ့တာ ဖြစ်ပါတယ်။
မော်ရိုကိုနိုင်ငံမှာ ကျင်းပနေတဲ့ ကလပ်ကမ္ဘာ့ဖလား ပြိုင်ပွဲ ဗိုလ်လုပွဲအဖြစ် ရီးရယ်လ်အသင်းဟာ ဆော်ဒီကလပ် အယ်လ်ဟီလယ်အသင်းနဲ့ ယှဉ်ပြိုင်ရမှာဖြစ်ပြီး တတိယနေရာ လုပွဲအဖြစ် အယ်လ်အာလီအသင်းနဲ့ ဖလာမင်ဂို အသင်းတို့ ယှဉ်ပြိုင်ရမှာပါ။
ဒီပွဲတွေကို ဖေဖော်ဝါရီလ ၁၁ ရက်မှာ ကျင်းပသွားမှာ ဖြစ်ပါတယ်။
Source:CAN/BBC
- By CNI
- Category: အားကစား
- Hits: 701
CNI Sport News
၂၀၂၃ ခုနှစ်၊ ဖေဖော်ဝါရီ ၈
ဘဏ္ဍာရေး စည်းမျဉ်းစည်းကမ်း ချိုးဖောက်မှု ၁၀၀ ကျော်နဲ့ စွဲချက်တင်ခံထားရပြီး အပြစ်ပေး အရေးယူခြင်း မပြုလုပ်ခင်မှာ နည်းပြ ဂွာဒီယိုလာဟာ မန်စီးတီးအသင်းကနေ ထွက်ခွာသွားနိုင်တယ်လို့ သိရပါတယ်။
ပရီးမီးယားလိဂ်ဟာ မန်စီးတီးအသင်းကို ဘဏ္ဍာရေး ချိုးဖောက်မှု အများအပြား ပြုလုပ်ထားကြောင်း တွေ့ရှိရ တယ်ဆိုပြီး စွဲချက်တင်ထားပါတယ်။
မန်စီးတီးနည်းပြ ဂွာဒီယိုလာဟာ ပြီးခဲ့တဲ့နှစ် မေလက သူ့ကို ဘဏ္ဍာရေးကိစ္စတွေနဲ့ ပတ်သက်ပြီး လိမ်ညာခဲ့ မယ်ဆိုရင် ထွက်သွားမယ်လို့ ပြောထားဖူးပါတယ်။ အဲ့ဒါကြောင့် မန်စီးတီးအသင်းကို အရေးယူမှုတွေ ပြုလုပ်ချိန် မှာ စပိန်လူမျိုးနည်းပြဟာ အသင်းမှာရှိမှာ မဟုတ်တော့ဘူးလို့ The Athletic က ဖော်ပြထားတာပါ။
လွတ်လပ်တဲ့ ကော်မရှင်တစ်ရပ်က ကိုင်တွယ်မယ့် ဒီကိစ္စမှာ မန်စီးတီးအသင်း အနေနဲ့ ပြစ်မှုထင်ရှားခဲ့မယ်ဆိုရင် ရမှတ်လျှော့တာကနေ တန်းဆင်းတဲ့အထိ ပြစ်ဒဏ်ချမှတ် ခံရနိုင်တာ ဖြစ်ပါတယ်။
မန်စီးတီးအသင်းဟာ အခုဖြစ်နေတဲ့ အခြေအနေတွေကို ကိုင်တွယ် ဖြေရှင်းဖို့အတွက် လေးစားခံရတဲ့ နာမည် ကျော်ရှေ့နေ လော့ဒ်ပန်နစ်ခ်ကေစီကို ငှားရမ်းထားပါတယ်။
မန်စီးတီးကွင်းကိုတွေ့ရစဉ်
ဒီရှေ့နေဟာ သူ့ရဲ့မျိုးဆက်တွေထဲမှာ အတော်ဆုံးသူ တစ်ဦးအဖြစ် သတ်မှတ်ခံထားရပြီး အခုအချိန်မှာတော့ တရားရေးတိုက်ပွဲ ဖြစ်လာနိုင်တဲ့ ဒီကိစ္စထဲမှာပါ ပါဝင်လာရတော့မှာ ဖြစ်ပါတယ်။
မန်စီးတီးအသင်းဟာ လော့ဒ်ပန်နစ်ခ်ကေစီ အတွက် တစ်ရက်လုပ်ခ ပေါင် ၈၀,၀၀၀ ဒါမှမဟုတ် တစ်ပတ်လုပ်ခ ပေါင် ၄၀၀,၀၀၀ ကုန်ကျနိုင်တာကြောင့် အသင်းအတွက် ကုန်ကျစရိတ်တွေလည်း များလာနိုင်ပါတယ်။
ဒီကုန်ကျစရိတ်ဟာ အသင်းရဲ့ အဓိက ကစားသမားဖြစ်တဲ့ ဒီဘရိုင်းရဲ့ လုပ်ခလစာနဲ့ ညီမျှနေတာလည်း ဖြစ်ပါ တယ်။ ဂွာဒီယိုလာကတော့ မန်စီးတီးအသင်းနဲ့ ပြီးခဲ့တဲ့ နှစ်ကုန်ပိုင်းမှာ စာချုပ် သက်တမ်း တိုးထားတာကြောင့် ၂၀၂၅ နွေရာသီအထိ စာချုပ်သက်တမ်း ရှိနေတာပါ။
မန်စီးတီးအသင်းဟာ ဒီရာသီမှာ ပရီးမီးယားလိဂ် အမှတ်ပေးဇယား အဆင့် ၂ ၊ ချန်ပီယံလိဂ်ဖလား ၁၆ သင်း အဆင့်နဲ့ အက်ဖ်အေဖလား ပဉ္စမအဆင့်ကို ရောက်ရှိနေတာ ဖြစ်ပါတယ်။
Source: The Sun
- By CNI
- Category: အားကစား
- Hits: 554
CNI Sport News
၂၀၂၃ ခုနှစ်၊ ဖေဖော်ဝါရီ ၈
အာဂျင်တီးနား၊ ချီလီ၊ ပါရာဂွေးနဲ့ ဥရုဂွေးတို့ဟာ ၂၀၃၀ ကမ္ဘာ့ဖလားပြိုင်ပွဲကို ပူးတွဲအိမ်ရှင်အဖြစ် ကျင်းပခွင့်ရဖို့ ဖီဖာထံ တရားဝင် တင်သွင်းလိုက်ပြီ ဖြစ်ပါတယ်။
တောင်အမေရိက ၄ နိုင်ငံဟာ ကမ္ဘာ့ဖလားပြိုင်ပွဲကို “ဘောလုံးမွေးဖွားရာ အရပ်ထံ” ပြန်လာဖို့ တောင်းဆိုခဲ့ကြ တာပါ။
အာဂျင်တီးနား၊ ချီလီ၊ ပါရာဂွေးနဲ့ ဥရုဂွေးတို့ဟာ ပူးတွဲအိမ်ရှင်အဖြစ် ကျင်းပမယ့် စပိန်နဲ့ ပေါ်တူဂီ၊ မော်ရိုကို၊ ဆော်ဒီတို့နဲ့လည်း အိမ်ရှင်အဖြစ် ပြုလုပ်ခွင့်ရဖို့ ယှဉ်ပြိုင်ရဖို့ ရှိနေပါတယ်။
လာမယ့် ၂၀၂၆ ကမ္ဘာ့ဖလားပြိုင်ပွဲကို အမေရိကန်၊ မက္ကဆီကိုနဲ့ ကနေဒါတို့က ပူးတွဲအိမ်ရှင်အဖြစ် ကျင်းပသွား မှာပါ။
၂၀၂၂ ကမ္ဘာ့ဖလားမှာ အာဂျင်တီးနားဗိုလ်ဆွဲခံရစဉ်
တောင်အမေရိက ဘောလုံးအဖွဲ့ချုပ်ဥက္ကဋ္ဌ ဒိုမင်ဂွက်ဇ်က “၂၀၃၀ ကမ္ဘာ့ဖလားဟာ တခြားကမ္ဘာ့ဖလား မဟုတ်ပါ ဘူး။ ဒါဟာ နှစ် ၁၀၀ အတွက် အသိအမှတ်ပြု ဂုဏ်ပြုခြင်းနဲ့ ထိုက်တန်ပါတယ်။ ကျနော်တို့ အရှေ့က ရောက် လာတဲ့ သူတွေရဲ့ ကြီးကျယ် ခမ်းနားမှုကို ယုံကြည်ပြီး ပထမဆုံး ကမ္ဘာ့ဖလား ဖန်တီးခဲ့တဲ့သူတွေကို ဂုဏ်ပြုဖို့ ဖီဖာ မှာ တာဝန်ရှိတယ်လို့ ကျနော်တို့ ယုံကြည်ပါတယ်”လို့ ပြောခဲ့တာ ဖြစ်ပါတယ်။
ကမ္ဘာ့ဖလားပြိုင်ပွဲကို ၁၉၃၀ က ဥရုဂွေးနိုင်ငံမှာ စတင်ကျင်းပခဲ့တာဖြစ်ပြီး ဥရုဂွေးလက်ရွေးစင်က ချန်ပီယံဆုကို ပထမဆုံးအကြိမ် ရယူနိုင်ခဲ့တာပါ။
အာဂျင်တီးနားကတော့ ၁၉၇၈ က အိမ်ရှင်အဖြစ် ကျင်းပခဲ့ပြီး ၂၀၂၂ ကမ္ဘာ့ဖလားမှာ ချန်ပီယံဆု ရယူနိုင်ခဲ့တာ အပါအဝင် ချန်ပီယံဆုကို ၃ ကြိမ် ရယူထားတာ ဖြစ်ပါတယ်။
ချီလီကလည်း ကမ္ဘာ့ဖလားပြိုင်ပွဲကို ၁၉၆၂ မှာ အိမ်ရှင်အဖြစ် ကျင်းပခဲ့တာပါ။
ကမ္ဘာ့ဖလားပြိုင်ပွဲမှာ တောင်အမေရိက နိုင်ငံအသင်းတွေဖြစ်တဲ့ ဘရာဇီးလ်က ၅ ကြိမ်နဲ့ အကြိမ်အရေအတွက် အများဆုံး ဗိုလ်စွဲထားတာဖြစ်ပြီး အာဂျင်တီးနားက ၃ ကြိမ်၊ ဥရုဂွေးက ၂ ကြိမ် ချန်ပီယံဆုတွေကို ရယူနိုင်ခဲ့တာ ဖြစ်ပါတယ်။
Source: BBC
- By CNI
- Category: အားကစား
- Hits: 653
CNI Sport News
၂၀၂၃ ခုနှစ်၊ ဖေဖော်ဝါရီ ၈
ကာတာရင်းနှီးမြှုပ်နှံသူ လုပ်ငန်းစုဟာ လာမယ့် ရက်ပိုင်းအတွင်းမှာ ယူနိုက်တက်အသင်းကို ဝယ်ယူဖို့အတွက် ကမ်းလှမ်းမှု ပြုလုပ်ဖို့ စီစဉ်နေတယ်လို့ သိရပါတယ်။
ယူနိုက်တက် အသင်းပိုင်ရှင် ဂလေဇာ မိသားစုဟာ အလားအလာရှိတဲ့ ဝယ်ယူမယ့် သူတိုင်းကို ဖေဖော်ဝါရီလလယ် နောက်ဆုံးထားပြီး ကမ်းလှမ်းမှု ပြုလုပ်ဖို့ ရက်သတ်မှတ်ထားတာပါ။
ကာတာလုပ်ငန်းစုဟာ ယူနိုက်တက်ကို ဝယ်ယူနိုင်ဖို့အတွက် ယုံကြည်မှု အပြည့်ရှိနေတယ်လို့ ဒေးလီးမေးလ်က ဖော်ပြထားပါတယ်။
ဝယ်ယူဖို့အတွက် သဘောတူညီမှု ရနိုင်ခဲ့မယ်ဆိုရင် ယူနိုက်တက်အသင်းကို အင်္ဂလိပ်ဘောလုံးလောက ထိပ်ဆုံး ပိုင်း ပြန်တက်နိုင်ဖို့ နည်းပြအဲရစ်တန်ဟတ်ကို ကြီးမားတဲ့ ငွေကြေး ထောက်ပံ့မှုတွေပေးဖို့ ရှိနေတာပါ။
ယူနိုက်တက်အသင်းဟာ ကလပ်ကို ဝယ်ယူဖို့အတွက် ပေါင် ၆ ဘီလီယံကျော် ဈေးသတ်မှတ်ထားပြီး ဝယ်ယူတဲ့ သူတိုင်းဟာ အိုးထရက်ဖို့ဒ်ကို ပြန်လည် တည်ဆောက်မယ့် အစီအစဉ်အတွက် ပေါင် ၂ ဘီလီယံထက်ပြီး ကုန်ကျ ဦးမှာ ဖြစ်ပါတယ်။
ယူနိုက်တက်အသင်းကိုတွေ့ရစဉ်
ကာတာရင်းနှီးမြှပ်နှံသူ လုပ်ငန်းစုကတော့ တစ်စိတ်တစ်ပိုင်း အစုရှယ်ယာကို စိတ်ဝင်စားမှု မရှိဘဲ အလုံးစုံ ပိုင်ဆိုင် လို နေတာပါ။ ကာတာလုပ်ငန်းစု အနေနဲ့ ယူနိုက်တက်ကို ဝယ်ယူဖို့ လုပ်ဆောင်နေတဲ့ ဗြိတိန် အချမ်းသာဆုံး ပုဂ္ဂိုလ် ဆာဂျင်မ်ရက်ကလစ်ဖ်နဲ့ ယှဉ်ပြိုင်ရဖို့ ရှိနေပါတယ်။
ရက်ကလစ်ဖ်ဟာ ယူနိုက်တက်အသင်းရဲ့ အမာခံပရိသတ် တစ်ဦးဖြစ်ပြီး ပြင်သစ်ကလပ် နိုက်စ်အသင်းကိုလည်း ပိုင်ဆိုင်ထားပါတယ်။
ဒါပေမယ့် ဝယ်ယူမယ့် သူတွေဟာ ပရီးမီးယားလိဂ်ရဲ့ ခွင့်ပြုချက် လိုအပ်မှာဖြစ်ပြီး ကာတာရဲ့ လူ့အခွင့်အရေး မှတ်တမ်းတွေကြောင့် တိုက်ခိုက်မှုတွေနဲ့ ရင်ဆိုင်ရဖို့တော့ ရှိနေပါတယ်။
ကာတာနိုင်ငံကသာ ယူနိုက်တက်ကို ဝယ်ယူနိုင်ခဲ့မယ်ဆိုရင် မန်ချက်စတာ ကလပ်ဟာ ဥရောပရဲ့ အချမ်းသာဆုံး အသင်းတွေထဲက တစ်သင်းဖြစ်လာမှာဖြစ်ပြီး ပြောင်းရွှေ့ကြေး အများအပြားလည်း ရရှိလာမှာပါ။
ယူနိုက်တက်အသင်းဟာ အသင်းကို ဝယ်ယူဖို့ တရားဝင် ကမ်းလှမ်းမှုတွေကို ဖေဖော်ဝါရီလထဲ အပြီးသတ် လုပ်ဆောင်မှာဖြစ်ပြီး နောက်လမှာတော့ ပိုင်ရှင်သစ်တွေထံ လွှဲပြောင်းပေးသွားဖို့ ရှိနေတယ်လို့ သိရပါတယ်။
Source: Goal
- By CNI
- Category: အားကစား
- Hits: 735
CNI Sport News
၂၀၂၃ ခုနှစ်၊ ဖေဖော်ဝါရီ ၈
ဒီမီရယ်လ်ဟာ သူ စုစောင်းထားတဲ့အရာတွေထဲက ရော်နယ်ဒိုလက်မှတ်ရေးထိုးထားတဲ့ ဂျာစီကို လေလံတင် ရောင်းချသွားမှာဖြစ်ပြီး ရရှိလာတဲ့ ငွေကြေးအားလုံးကို တူရကီငလျင်အတွက် အသုံးပြုသွားမယ်လို့ ပြောလိုက်ပါတယ်။
ဒီမီရယ်လ်က “ကျနော် ခရစ္စတီယာနိုနဲ့ စကားပြောခဲ့ပြီး တူရကီမှာဖြစ်ခဲ့တဲ့အရာတွေအတွက် အလွန် ဝမ်းနည်း တယ်လို့ သူက ကျနော့်ကို ပြောခဲ့ပါတယ်။ကျနော်ရဲ့ စုဆောင်းမှုတွေထဲက ရော်နယ်ဒို လက်မှတ်ထိုးထားတဲ့ ဂျာစီကို ကျနော်တို့ လေလံတင် ရောင်းချသွားမှာပါ။လေလံက ရရှိတဲ့ဝင်ငွေတွေ အားလုံးကို ငလျင်ဇုန်အတွက် အသုံးပြုသွားမယ်” လို့ တွစ်တာမှာ ရေးသားခဲ့တာပါ။
တနင်္လာနေ့က ရစ်ချ်တာစကေး ၇.၇ အဆင့်ရှိ ငလျင်တစ်ခုလှုပ်ခတ်ခဲ့တာမှာ အဆောက်အဦတွေပြိုကျခဲ့ပြီး အနည်းဆုံး ပရော်ဖက်ရှင်နယ်ဘောလုံးသမားတစ်ဦးအပါအဝင် လူထောင်ပေါင်းများစွာ သေဆုံးခဲ့တာ ဖြစ်ပါတယ်။ဒီမီရယ်လ်ကတော့ သဘာဝဘေးအန္တရာယ်ကြောင့် ပျက်ဆီးဆုံးရှုံးခဲ့ရတဲ့သူတွေကို တတ်နိုင် သလောက် ကူညီပေးသွားမယ်လို့ ပြောခဲ့တာပါ။အဲဒါကြောင့် ဒီမီရယ်လ်ဟာ ဂျူဗင်တပ်စ်အသင်းမှာ အတူတွဲ ကစားခဲ့ဖူးတဲ့ ရော်နယ်ဒို လက်မှတ်ထိုးထားတဲ့ ဂျူဗင်တပ်စ်ဂျာစီကို လေလံတင်ရောင်းချဖို့ စီစဉ်ခဲ့တာဖြစ်ပါတယ်။
ဒီမီရယ်လ်က “အခု ကျနော် ဘိုနူချီနဲ့လည်း စကားပြောဖြစ်ခဲ့ပါတယ်။သူ့ကလည်း ဝမ်းနည်းမှုကို ဖော်ပြခဲ့ပြီး တူရကီမှာရှိတဲ့ ကျနော်တို့ရဲ့ ပြည်သူတွေဘက်ကနေ ရပ်တည်ခဲ့ပါတယ်။ဘိုနူချီဟာ သူ လက်မှတ်ရေးထိုးထားတဲ့ ဂျူဗင်တပ်စ်ဂျာစီကို လှူဒါန်းခဲ့ပါတယ်” လို့ ပြောခဲ့တာပါ။
ဒီမီရယ်လ်ဟာ တူရကီပရဟိတအဖွဲ့အစည်း Ahbap ကို လှူဒါန်းဖို့ ရွေးချယ်ခဲ့ပေမယ့် တူရကီ Red Crescent နဲ့ Save The Children တို့ကလည်း တူရကီနဲ့ ဆီးရီးယားက မြေပြင်ရှိပြည်သူတွေကို ကူညီထောက်ပံ့မှုတွေ ပြုလုပ်ဖို့ အလှူငွေတွေလက်ခံနေတဲ့ အခြားအဖွဲ့အစည်းတွေ ဖြစ်တယ်လို့ သိရပါတယ်။
အသက် ၂၄ နှစ်အရွယ်ရှိ ဒီမီရယ်လ်ဟာ စီးရီးအေကလပ် အတ္တလန္တာအသင်းမှာ ကစားနေတာဖြစ်ပြီး တူရကီ လက်ရွေးစင်အတွက် ၃၅ ပွဲ ပါဝင်ကစားထားကာ ၂ ဂိုးသွင်းယူထားပါတယ်။
Source:Goal
Page 268 of 372
Connect with us
