CNI Sport News

၂၀၂၃ ခုနှစ်၊ ဇန်နဝါရီ ၂၅

မက်ဆီဟာ ပီအက်စ်ဂျီအသင်းမှာ သူ့ရဲ့အနာဂတ်ကို စဉ်းစားနေပြီး လီဂူးဝမ်းချန်ပီယံအသင်းနဲ့ စာချုပ်သစ် ချုပ်ဖို့အတွက် စိုးရိမ်မှုတွေရှိနေတယ်လို့ အားကစားသတင်းတွေမှာ ဖော်ပြထားပါတယ်။

၂၀၂၁ က ပီအက်စ်ဂျီအသင်းကို ၂ နှစ်စာချုပ်နဲ့ ရောက်ရှိလာတဲ့ မက်ဆီဟာ အခု နွေရာသီမှာ စာချုပ်ကုန်ဆုံး တော့မှာဖြစ်ပြီး သက်တမ်းတိုးစာချုပ်ချုပ်ဆိုဖို့အတွက် ဆွေးနွေးမှုတွေကလည်း တိုးတက်မှုမရှိသေးပါဘူး။ မက်ဆီ ဟာ ပီအက်စ်ဂျီအသင်းမှာ သူ့ရဲ့အနာဂတ်နဲ့ပတ်သက်ပြီး စိုးရိမ်မှုတွေ တိုးလာတာကြောင့် အသင်းဟောင်း ဘာစီလိုနာအသင်းက သူ့ကိုပြန်ခေါ်ယူနိုင်ဖို့ ထိပ်ဆုံးကနေ ဦးဆောင်နေတာဖြစ်ပါတယ်။

စပိန်မီဒီယာမာကာကတော့ အသက် ၃၅ နှစ်အရွယ်ရှိ ကစားသမားဟာ ပီအက်စ်ဂျီအသင်းနဲ့ စာချုပ်သစ်ချုပ်ဆို နိုင်ဖို့ မျှော်လင့်ထားပေမယ့် အခုအချိန်မှာတော့ သူ့ရဲ့ သဘောထားဟာ ပြောင်းလဲသွားပြီး ပြင်သစ်မှာ သူ့ အနာဂတ်ကို စဉ်းစားနေတယ်လို့ ဖော်ပြထားတာပါ။ မကြာသေးခင်က ကမ္ဘာ့ဖလားချန်ပီယံဆုကို ရယူနိုင်ခဲ့တာ ကလည်း မက်ဆီရဲ့စိတ်ကို ပြောင်းလဲမှုဖြစ်သွားစေနိုင်တယ်လို့လည်း အဆိုပါ သတင်းရဲ့ ဖော်ပြချက်အရ သိရပါတယ်။

ဘာစီလိုနာအသင်းကတော့ မက်ဆီရဲ့အခြေအနေကို အနီးကပ်စောင့်ကြည့်နေပြီး ကစားသမားကို အသင်းထံ ပြန်လာဖို့ လမ်းဖွင့်ပေးထားတယ်လို့ မကြာခဏဆိုသလို ထုတ်ပြောထားတာပါ။ဒါ့အပြင် မေဂျာလိဂ်ကလပ် အင်တာမိုင်ယာမီ၊ ဆော်ဒီကလပ် အယ်ဟီလယ်အသင်းတို့ကလည်း မက်ဆီကို ခေါ်ယူဖို့ စိတ်ဝင်စားနေကြတာ ဖြစ်ပါတယ်။မက်ဆီရဲ့ အဓိကပြိုင်ဘက်ဖြစ်တဲ့ ရော်နယ်ဒိုဟာ ဆော်ဒီကလပ် အယ်လ်နာဆာအသင်းကို ပြောင်းခဲ့ ပြီးနောက် အယ်လ်ဟီလယ်အသင်းကလည်း မက်ဆီကို လုပ်ခလစာအများအပြားနဲ့ ခေါ်ယူဖို့ ကြိုးပမ်းနေတာပါ။

မက်ဆီဟာ ဒီရာသီမှာ ပီအက်စ်ဂျီအသင်းအတွက် ခြေစွမ်းပြသနေပြီး ၂၁ ပွဲ ပါဝင်ကစားထားကာ ၁၃ ဂိုးသွင်းယူပြီး ၁၄ ဂိုးဖန်တီးထားတာဖြစ်ပါတယ်။အာဂျင်တီးနားအသင်းခေါင်းဆောင်ဟာ ပီအက်စ်ဂျီအသင်းရဲ့ ပြီးခဲ့တဲ့ ပေးစ်ဒီကတ်ဆဲလ်အသင်းနဲ့ ပြင်သစ်ဖလားပွဲစဉ်မှာတော့ အနားပေးခံခဲ့ရပြီး မပါဝင်ခဲ့ပါဘူး။ဒါပေမယ့် ရိမ်းစ် အသင်းနဲ့ ကစားမယ့် လီဂူးဝမ်းပွဲစဉ်မှာတော့ မက်ဆီဟာ ပီအက်စ်ဂျီအတွက် ပါဝင်လာဖို့ ရှိနေတာ ဖြစ်ပါတယ်။

ပီအက်စ်ဂျီအသင်းဟာ အခုရာသီ လီဂူးဝမ်းပွဲစဉ် ၁၉ ပွဲ ကစားအပြီးမှာ ဒုတိယနေရာက လန်းစ်အသင်းကို ၃ မှတ် အသာနဲ့ အမှတ်ပေးဇယားကို ဦးဆောင်နေတာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဇန်နဝါရီ ၂၄

ရီးရယ်လ်နဲ့ စပါးအသင်း ကြယ်ပွင့်ဟောင်း ဂါရတ်ဘေးလ်ဟာ ပရော်ဖက်ရှင်နယ် ဘောလုံးလောကကနေ အနား ယူပြီးနောက် ရက်သတ္တပတ် အနည်းငယ်အကြာမှာ PGA Tour ဂေါ့ဖ်ပြိုင်ပွဲမှာ ပါဝင်ယှဉ်ပြိုင်မယ်လို့ ပြောလိုက် ပါတယ်။

ဂါရတ်ဘေးလ်က “ကျနော်ဟာ လာမယ့်လအစပိုင်း AT&T Pebble Beach Pro-Am မှာ ပါဝင်ယှဉ်ပြိုင်သွားမယ် ဆိုတာကို ကြေညာရတာ ဝမ်းသာတယ်”လို့ အင်စတာဂရမ်မှာ ရေးသားထားတာ ဖြစ်ပါတယ်။

အသက် ၃၃ နှစ်အရွယ်ရှိ ဂါရတ်ဘေးလ်ဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာ ဝေးလ်စ်အသင်း ပါဝင်ခွင့်ရအောင် ကူညီနိုင်ခဲ့သလို နောက်ဆုံးကစားခဲ့တဲ့ လော့အိန်ဂျလိစ် အသင်းကိုလည်း မေဂျာလိဂ်ဖလား ရရှိအောင် စွမ်းဆောင် ပေးနိုင်ခဲ့တာပါ။

ဂါရတ်ဘေးလ်ကို ချန်ပီယံလိဂ်ဖလားနဲ့အတူတွေ့ရစဉ်

ဒါပေမယ့် ဂါရတ်ဘေးလ်ဟာ ဇန်နဝါရီ ၇ ရက်မှာတော့ ဘောလုံးလောကကနေ အနားယူပြီလို့ အတည်ပြုခဲ့တာ ဖြစ်ပါတယ်။

ဂါရတ်ဘေးလ်ဟာ ရီးရယ်လ်အသင်းမှာ ၉ နှစ်ကြာ ကစားခဲ့ပြီး ချန်ပီယံလိဂ်ဖလား ၅ ကြိမ် အပါအဝင် အောင်မြင် မှု ဆုဖလား အများအပြား ရယူနိုင်ခဲ့သလို စပါးအသင်းမှာလည်း ၂ ကြိမ် ကစားခဲ့တာပါ။

ဂါရတ်ဘေးလ်ဟာ ဂေါ့ဖ်အားကစားနည်းကို စိတ်ဝင်စားတာကြောင့် ဘောလုံးကစားနေချိန် အတွင်းမှာလည်း ကစားခဲ့လို့ ဝေဖန်မှုတွေ ခံခဲ့ရပါသေးတယ်။ အခုအချိန်မှာတော့ ဂေါ့ဖ်ပြိုင်ပွဲမှာ ပါဝင်ကစားဖို့ ဂါရတ်ဘေးလ်က စီစဉ်လာခဲ့တာပါ။

ဂါရတ်ဘေးလ် ပါဝင်မယ့် ဒီပြိုင်ပွဲမှာ အမေရိကန် အိုးပန်းချန်ပီယံဆုရှင် ဖစ်ဇ်ပတ်ထရစ်၊ အနုပညာရှင်တချို့နဲ့ အပျော်တမ်း ၁၅၆ ဦး ပါဝင်မှာ ဖြစ်ပါတယ်။ ကာလီဖိုးနီးယားမှာ ၄ ရက်ကြာ ကျင်းပမယ့် ဒီပြိုင်ပွဲမှာ ဆုကြေး အဖြစ် အမေရိကန် ဒေါ်လာ ၉ သန်း ချီးမြှင့်သွားမယ်လို့ သိရပါတယ်။

Source: Goal

CNI Sport News

၂၀၂၃ ခုနှစ်၊ ဇန်နဝါရီ ၂၄

ပြီးခဲ့တဲ့ ၄ လအတွင်းမှာ အရင်းနှီးဆုံး မိတ်ဆွေ ၂ ဦး ကွယ်လွန်ခဲ့တာကြောင့် ပူဆွေးနေရတဲ့ ကွန်တီဟာ ဘောလုံးပွဲ အပြင်ဘက်မှာ ခက်ခဲတဲ့ အချိန်တွေကို ဖြတ်သန်းနေရတယ်လို့ စပါးအသင်းတိုက်စစ်မှူး ဟာရီကိန်းက ပြောလိုက်ပါတယ်။

ဟာရီကိန်းက “ကွန်တီဟာ သူ့ရဲ့ ကိုယ်ပိုင်ဘဝနဲ့အတူ ဘောလုံးအပြင်ဘက်မှာ ခက်ခဲတဲ့ အချိန်တွေကို ဖြတ်သန်း နေရပါတယ်။ အသင်းတစ်သင်းရဲ့ အစိတ်အပိုင်း ဖြစ်နေတာက ကစားသမားတွေသာမကဘဲ နည်းပြရော၊ ဝန်ထမ်း အဖွဲ့တွေရော အားလုံးအတူတူရှိနေကြတာပါ။ နည်းပြလိုပဲ ကျနော်တို့ဟာ ဆက်ပြီး တိုက်ပွဲဝင်သွားရမှာပါ။ သူက စိတ်အားထက်သန်တဲ့ နည်းပြဖြစ်ပြီး ကျနော်တို့က သူ့အတွက် ဆက်ပြီး ကြိုးစားသွားရမယ်”လို့ ပြောခဲ့တာပါ။

ကွန်တီရဲ့ အရင်းနှီးဆုံး မိတ်ဆွေတွေဖြစ်တဲ့ စပါးအသင်း ကြံ့ခိုင်ရေးနည်းပြ ဂျီယန်နဲ့ အသင်းဖော်ဟောင်း ဗီယာလီ တို့ ကွယ်လွန်ခဲ့တာကို စပါးအသင်းနည်းပြဟာ ဝမ်းနည်းပူဆွေးနေတာ ဖြစ်ပါတယ်။

အသင်းရဲ့ ရလဒ်ဆိုးတွေနဲ့အတူ ကွန်တီဟာ ဖိအားတွေ အောက်လည်း ကျရောက်နေပြီး အခုရာသီ အကုန်မှာ စပါးကနေ ထွက်ခွာသွားနိုင်တယ်လို့ သတင်းတွေ ထွက်ပေါ်နေခဲ့တာပါ။ ဒါပေမယ့် စပါးအသင်းဟာ ဖူလ်ဟမ် အသင်းကို အနိုင်ရပြီး ရလဒ်ဆိုးတွေကို ရပ်တန့်နိုင်ခဲ့တာ ဖြစ်ပါတယ်။

ဟာရီကိန်းကိုတွေ့ရစဉ်

စပါးအသင်းက ဇန်နဝါရီ ၂၄ ရက် မနက်ပိုင်းက ကစားခဲ့တဲ့ ပရီးမီးယားလိဂ်ပွဲမှာ ဖူလ်ဟမ်အသင်းကို ၁ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး ၂ ပွဲဆက် အရေးနိမ့်တာကနေ နိုင်ပွဲပြန်လည် ရှာဖွေနိုင်ခဲ့တာပါ။

စပါးအတွက် တစ်လုံးတည်းသော ဂိုးကို ဟာရီကိန်းက သွင်းယူခဲ့တာဖြစ်ပြီး ဒီဂိုးကြောင့် အင်္ဂလန်တိုက်စစ်မှူးဟာ အသင်း ဂန္တဝင် ဂျင်မီဂရေ့ဗ်ရဲ့ သွင်းဂိုး ၂၆၆ ဂိုးနဲ့ တူညီသွားခဲ့တာ ဖြစ်ပါတယ်။

ဟာရီကိန်းက “ကျနော်တို့ သွားချင်တဲ့ နေရာက အနည်းငယ် နောက်ကျနေပေမယ့် ဒီညက အရေးကြီးပါတယ်။ ကျနော်တို့ဟာ အချင်းချင်း စကားတွေလည်း ကောင်းကောင်းမွန်မွန် ပြောခဲ့ကြပြီး ကောင်းမွန်စွာ လုပ်နိုင်ခဲ့ပါ တယ်။ နောက်ဆုံး ၂ ပွဲအပြီးမှာ အနိုင်ရတဲ့ နည်းလမ်းကို ပြန်ရဖို့က ကျနော်တို့အတွက် တကယ်ကို အရေးကြီးခဲ့ပါ တယ်”လို့ ပြောခဲ့တာပါ။

စပါးအသင်းဟာ ဒီနိုင်ပွဲကြောင့် အဆင့် ၄ နေရာက ယူနိုက်တက် အသင်းနဲ့ ၃ မှတ်အကွာ အဆင့် ၅ နေရာမှာ ဆက်လက် ရပ်တည်နေတာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဇန်နဝါရီ ၂၄

ဘတ်ပီဟာ ပေးစ်ဒီကတ်ဆဲလ်အသင်းကို အနိုင်ရခဲ့တဲ့ပွဲမှာ ၅ ဂိုးသွင်းပြီး ပီအက်စ်ဂျီအသင်း သမိုင်းတစ်လျှောက် တစ်ပွဲတည်း ၅ ဂိုး သွင်းယူနိုင်ခဲ့တဲ့ ပထမဆုံး ကစားသမားအဖြစ် စံချိန်သစ် တင်လိုက်ပါတယ်။

ပီအက်စ်ဂျီအသင်းဟာ ပြင်သစ်ဖလား ၃၂ သင်းအဆင့် ပွဲစဉ်အဖြစ် ကစားခဲ့တဲ့ပွဲမှာ ဆဌမတန်းကလပ် ပေးစ်ဒီ ကတ်ဆဲလ်အသင်းကို ၇ ဂိုး- ဂိုးမရှိနဲ့ အနိုင်ရခဲ့တာပါ။ ဘတ်ပီရဲ့ ၅ ဂိုးအပြင် နေမာနဲ့ ဆိုလာတို့က ၁ ဂိုးစီ သွင်းယူ ခဲ့တာ ဖြစ်ပါတယ်။

ဘတ်ပီဟာ ဒီပွဲမှာ ပီအက်စ်ဂျီအသင်းကို အသင်းခေါင်းဆောင်အဖြစ် ဦးဆောင်ခဲ့ပြီး ခြေစွမ်းပြ သွင်းဂိုးတွေ သွင်းယူကာ ၁၆ သင်းအဆင့် ပို့ဆောင်ပေးခဲ့တာပါ။

ဘတ်ပီက “ဒီအဆင့်မှာ ပြိုင်ဘက်အသင်းကို လေးလေးစားစားနဲ့ ကစားဖို့ ဒီကိုရောက်ရှိလာခဲ့တာပါ။ ကျနော်တို့ လုပ်ဆောင်ခဲ့တဲ့ အရာအတွက် ပျော်ရွှင်ပါတယ်။ ဒါက သူတို့အတွက်ရော ကျနော်တို့အတွက်ပါ အခွင့်အရေး ကောင်း တစ်ခုပါပဲ။ ဘာကြောင့်လဲဆိုရင် ကျနော်တို့ဟာ အပျော်တမ်း ဘောလုံးလောကကနေ လာတယ်ဆိုတာ ကို သတိပေးတဲ့ အရာမို့လို့ပါ။ တစ်ပွဲတည်း ကစားရရင်တောင် ဒီလိုမျိုးအရာတွေကို သိမ်းထားဖို့ အရေးကြီးပါ တယ်”လို့ ပြောခဲ့တာပါ။

ပီအက်စ်ဂျီအသင်းကိုတွေ့ရစဉ်

အသက် ၂၄ နှစ်အရွယ်ရှိ ဘတ်ပီဟာ ဒီရာသီမှာ ပီအက်စ်ဂျီအသင်းအတွက် ၂၄ ပွဲ ကစားထားအပြီးမှာ ၂၅ ဂိုး သွင်းယူထားနိုင်ခဲ့တာ ဖြစ်ပါတယ်။

ပြင်သစ်တိုက်စစ်မှူးဟာ ပီအက်စ်ဂျီအသင်းကို ရောက်ရှိပြီးကတည်းက သွင်းဂိုး စုစုပေါင်း ၁၉၆ ဂိုး သွင်းယူထားပြီး အသင်းရဲ့ ဂိုးသွင်း အများဆုံး ကစားသမားဖြစ်တဲ့ ကာဗာနီရဲ့ စံချိန်ကို လိုက်မှီဖို့ ၄ ဂိုးသာ လိုအပ်တော့တာပါ။

တိုက်စစ်မှူးဟောင်း ကာဗာနီဟာ သွင်းဂိုး ၂၀၀ နဲ့ ပီအက်စ်ဂျီအသင်းရဲ့ ဂိုးသွင်း အများဆုံး ကစားသမားအဖြစ် ရပ်တည်နေတာ ဖြစ်ပါတယ်။

ပေးစ်ဒီကတ်ဆဲလ်အသင်းကို အနိုင်ရခဲ့တဲ့ ပီအက်စ်ဂျီအသင်းဟာ ၁၆ သင်းအဆင့်မှာ ပြိုင်ဘက်ကြီး မာဆေးလ် အသင်းနဲ့ ယှဉ်ပြိုင်ရမှာပါ။ ပီအက်စ်ဂျီအသင်းဟာ ပြင်သစ်ဖလားပြိုင်ပွဲမှာ ချန်ပီယံဆုကို စံချိန်တင် ၁၄ ကြိမ် ရယူထားတာ ဖြစ်ပါတယ်။

ပြင်သစ်လီဂူးဝမ်း လက်ရှိ ချန်ပီယံအသင်းဟာ ဒီတစ်ပတ်မှာ လိဂ်ပွဲစဉ်အဖြစ် ရိမ်းစ်အသင်းနဲ့ ယှဉ်ပြိုင်ရမှာပါ။

ပီအက်စ်ဂျီအသင်းဟာ နောက်ဆုံးကစားခဲ့တဲ့ လီဂူးဝမ်းပွဲစဉ်မှာ ရီးနတ်စ်အသင်းကို အရေးနိမ့်ထားခဲ့ပေမယ့် အမှတ်ပေးဇယားကို ၃ မှတ်အသာနဲ့ ဦးဆောင်နေတာ ဖြစ်ပါတယ်။

Source: AP

CNI Sport News

၂၀၂၃ ခုနှစ်၊ ဇန်နဝါရီ ၂၃

မန်စီးတီးအသင်းနည်းပြ ဂွာဒီယိုလာက အသင်းအနေနဲ့ ဟာလန်းအတွက် လိုက်လျောညီထွေဖြစ်စေဖို့ ကစားပုံ စတိုင် အချို့ကို ပြောင်းလဲဖို့ လိုအပ်တယ်လို့ ပြောလိုက်ပါတယ်။

ဂွာဒီယိုလာက “ဟာလန်းရဲ့ အရည်အသွေးကို ကျနော်တို့ သိပါတယ်။ သူနဲ့ ကစားလို့မရတဲ့ ကစားပုံ လှုပ်ရှားမှု တချို့ကိုတော့ လိုက်လျောညီထွေ ဖြစ်အောင် လုပ်ရမှာပါ။ သူ့ဆီ ရောက်ဖို့အတွက် တက်နိုင်သလောက် ဘောလုံး ကို များများပေးပို့ရမှာပါ။ သူ့နားမှာဆိုရင် ထူးချွန်ကောင်းမွန်တဲ့ ကစားသမားတွေ ရှိပါတယ်။ ဒါပေမယ့် ပထမဆုံး ဂိုးမှာဆိုရင် ဒီဘရိုင်းရဲ့ ပေးပို့မှုက အလွန်ကောင်းမွန်ခဲ့သလို သူကလည်း အဆင်သင့် ရှိနေတာပါ”လို့ ပြောခဲ့တာပါ။

ဟာလန်းဟာ ဝုလ်ဗ်စ်အသင်းကို ၃ ဂိုး- ဂိုးမရှိနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ မန်စီးတီး အသင်းအတွက် ဟတ်ထရစ် ဂိုးသွင်းယူနိုင်ခဲ့တာ ဖြစ်ပါတယ်။

ဒီဟတ်ထရစ်ဟာ နော်ဝေတိုက်စစ်မှူးအတွက် ဒီရာသီ ပရီးမီးယားလိဂ်မှာ ရရှိတဲ့ ၄ ကြိမ်မြောက် ဟတ်ထရစ် ဖြစ်ပြီး ၁၉ ပွဲ ကစားအပြီးမှာ ၂၅ ဂိုး သွင်းယူထားတာပါ။ ဟာလန်းရဲ့ လက်ရှိ သွင်းဂိုးဟာ ပြီးခဲ့တဲ့ရာသီ ပရီးမီးယားလိဂ်မှာ ရွှေဖိနပ်ဆုရခဲ့တဲ့ သူတွေထက် ဂိုးအရေအတွက် များသွားခဲ့တာ ဖြစ်ပါတယ်။

ဟာလန်းနဲ့ မန်စီးတီးအသင်းကိုတွေ့ရစဉ်

ဂွာဒီယိုလာက “ဟာလန်းက သူ့ရဲ့ ပရော်ဖက်ရှင်နယ်၊ အလုပ်၊ ဝါသနာနဲ့ အချစ်တွေအတွက် ၂၄ နာရီကြာ နေထိုင် နေတာပါ။ ကောင်းတာပဲဖြစ်ဖြစ်၊ ဆိုးတဲ့ အရာတွေပဲဖြစ်ဖြစ် သူဟာ ဖိအားတွေ အများကြီး မရှိဘဲ အေးဆေး တည် ငြိမ်ပါတယ်။ သူဂိုးသွင်းတဲ့ အချိန်မှာ ဟတ်ထရစ် ဒါမှမဟုတ် ဂိုးဘယ်လောက်အထိ ရမလဲဆိုတာကို ကျနော် မသိ ပါဘူး။ သူဟာ ကျနော်တို့အသင်းရဲ့ ဖြေရှင်းတဲ့အရာပါပဲ။ သူ ဂိုးမသွင်းနိုင်ဘူးဆိုရင်တော့ အသင်းမှာ ပြဿနာတွေ ရှိတယ်”လို့ ပြောခဲ့တာပါ။

မန်စီးတီးအသင်းဟာ ဝုလ်ဗ်စ်ကို အနိုင်ရခဲ့တဲ့ ပွဲအပါအဝင် နောက်ဆုံး ကစားခဲ့တဲ့ ပရီးမီးယားလိဂ် ၂ ပွဲဆက် အနိုင် ရပြီး ထိပ်ဆုံးနေရာက အာဆင်နယ်အသင်းကို ၅ မှတ်အကွာနဲ့ ဒုတိယနေရာကနေ ဆက်ပြီး ဖိအားပေးနေတာ ဖြစ်ပါတယ်။

မန်စီးတီးအသင်းဟာ ဒီတစ်ပတ်မှာ အာဆင်နယ်အသင်းနဲ့ အက်ဖ်အေဖလား ပွဲစဉ်ယှဉ်ပြိုင်ရမှာပါ။ ပြီးခဲ့တဲ့ နွေရာသီက ဒေါ့မွန်ကနေ ရောက်ရှိလာတဲ့ ဟာလန်းဟာ မန်စီးတီးအသင်းအတွက် ၂၆ ပွဲ ကစားထားပြီး ၃၁ ဂိုး သွင်းယူထားတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇန်နဝါရီ ၂၃

ပေါ်တူဂီက စည်းမျဉ်းအသစ်ကို မိတ်ဆက်ပြီးနောက် စပို့တင်းလစ္စဘွန်းနဲ့ ဘင်ဖီကာတို့ ကစားခဲ့တဲ့ပွဲစဉ်မှာ ကွင်းလယ်ဒိုင်လူကြီးဖြစ်သူက အဖြူရောင်ကတ်ကို ပြသသွားခဲ့တာ ဖြစ်ပါတယ်။

ဘောလုံးပရိသတ်တွေဟာ ကစားသမားတွေနဲ့ နည်းပြအဖွဲ့ဝင်တွေကို အပြစ်ပေး အရေးယူတာမှာ အဝါကတ်နဲ့ အနီကတ်ပြသတာကို မြင်တွေ့ခဲ့ကြတာ ဖြစ်ပါတယ်။

ပေါ်တူဂီပရိသတ်တွေကတော့ စပို့တင်းလစ္စဘွန်းနဲ့ ဘင်ဖီကာအသင်းတို့ရဲ့ အမျိုးသမီးဖလား ပွဲစဉ်မှာ ကတ်အသစ် ပြသတာကို မြင်တွေ့ခဲ့ရတာပါ။ ဘင်ဖီကာအသင်းက ၃ ဂိုး- ဂိုးမရှိနဲ့ အနိုင်ရခဲ့တဲ့ ဒီပွဲစဉ်မှာ အရန်ခုံတန်းပေါ်မှာရှိ တဲ့ တစ်စုံတစ်ဦးဟာ နေမကောင်း ဖြစ်နေခဲ့တာ ဖြစ်ပါတယ်။

ဒီအချိန်မှာ ၂ သင်းစလုံးရဲ့ ဆေးအဖွဲ့ဝင်တွေဟာ အဆိုပါ လူကို အမြန်ဆုံး အကူအညီပေးဖို့ ရောက်ရှိသွားခဲ့တာပါ။

ဒီလို လုပ်ဆောင်ခဲ့တဲ့ ဆေးအဖွဲ့ဝင်တွေကို ကွင်းလယ်ဒိုင်လူကြီးက အဖြူရောင်ကတ် ထုတ်ပြသွားခဲ့တာ ဖြစ်ပါ တယ်။ ပရိသတ်တွေကလည်း ဒီအဖြစ်အပျက်ကို မြင်တွေ့ပြီးနောက် လက်ခုပ်တီးပြီး တုန့်ပြန်မှုတွေ ပြုလုပ်ခဲ့ကြ တာပါ။

အမျိုးသမီးအသင်းကိုတွေ့ရစဉ်

အဖြူရောင်ကတ်ဟာ ပေါ်တူဂီမှာ စတင်လုပ်ဆောင်နေတဲ့ စည်းမျဉ်းအသစ်ရဲ့ အစိတ်အပိုင်းလည်း ဖြစ်ပါတယ်။

အဝါကတ်နဲ့ အနီကတ်ဟာ အပြစ်ပေးတာမှာ အသုံးပြုပေမယ့် အဖြူရောင်ကတ်ကတော့ မျှတတဲ့ ကစားပွဲအတွက် အသင်းတွေကို အသိအမှတ်ပြု ချီးကျူးတဲ့ အနေနဲ့ အသုံးပြုတာပါ။

ဒီစိတ်ကူးဟာ အားကစားမှာ ကျင့်ဝတ် တန်ဖိုးထားတဲ့ သူတွေကို အားပေးဖို့ စတင်ခဲ့တာ ဖြစ်တယ်လို့ သိရပါ တယ်။

အဖြူရောင်ကတ်ကို ကျယ်ပြန့်စွာ အသုံးမပြုသေးပေမယ့် ဒါဟာ ဘောလုံးလောကရဲ့ နောက်ဆုံးထွက်ရှိတဲ့ စည်းမျဉ်းအသစ်အဖြစ် ရှိလာခဲ့တာ ဖြစ်ပါတယ်။

Source:The Sun

CNI Sport News

၂၀၂၃ ခုနှစ်၊ ဇန်နဝါရီ ၂၃

အာဆင်နယ်အသင်း ကြယ်ပွင့် ကစားသမား ဆာကာက ယူနိုက်တက်အသင်းကို ၃ ဂိုး- ၂ ဂိုးနဲ့ အနိုင်ရပြီးနောက် ဒီပုံစံကို ဆက်ထိန်းထားကြဖို့ အသင်းဖော်တွေကို တိုက်တွန်းခဲ့တာ ဖြစ်ပါတယ်။

ဆာကာက “အခုအနေအထားက ကျနော်တို့ ဂုဏ်ယူနိုင်တဲ့ အရာတစ်ခုဖြစ်ပေမယ့် ကျနော်တို့ နှိမ့်ချဖို့တော့ လိုအပ်ပါတယ်။ အခုမှ ရာသီရဲ့ တစ်ဝက်သာ ရှိသေးတာကြောင့် အဖြစ်အပျက်တွေဟာ အလွန်လျင်မြန်စွာ ပြောင်းလဲသွားနိုင်ပါတယ်။ ဒါပေမယ့် ကျနော်တို့မှာ ရှိနေတဲ့ ပုံစံအတိုင်း ဆက်ပြီး ကစားသွားရင်တော့ ရာသီ အကုန်မှာ ကောင်းမွန်တဲ့ နေရာမှာရှိနေမှာပါ။ ဒါကို ရာသီအကုန်ထိ ထိန်းထားဖို့ပဲ လိုအပ်တယ်”လို့ ပြောခဲ့တာပါ။

ဆာကာဟာ ယူနိုက်တက်အသင်းကို အနိုင်ရတဲ့ပွဲမှာ အာဆင်နယ်အတွက် ဂိုးသွင်းယူနိုင်ခဲ့သလို ပြိုင်ဘက်နောက် တန်းကို တစ်ပွဲလုံး ဒုက္ခပေးနိုင်တဲ့အထိ ခြေစွမ်းပြသနိုင်ခဲ့တာ ဖြစ်ပါတယ်။

အာဆင်နယ်အသင်းဟာ ဒီနိုင်ပွဲကြောင့် ဒုတိယနေရာက မန်စီးတီးအသင်းထက် ၁ ပွဲလျော့ ကစားထားပြီး ရမှတ် ၅ မှတ်အသာနဲ့ အမှတ်ပေးဇယားကို ဦးဆောင်နေခဲ့တာပါ။ ဆာကာကတော့ ယူနိုက်တက်အသင်းကို ပြန်ပြီး အနိုင် ရခဲ့လို့ ပျော်ရွှင်ကြောင်းလည်း ပြောခဲ့ပါတယ်။

အာဆင်နယ်နဲ့ ယူနိုက်တက်အသင်း ယှဉ်ပြိုင်နေစဉ်

ဆာကာက “ ဒါဟာ လူတိုင်းအတွက် ဘယ်လောက်ထိ အဓိပ္ပါယ်ရှိလဲဆိုတာကို ခင်ဗျားတို့ မြင်တွေ့နိုင်မှာပါ။ သူတို့ ဟာ ဒီရာသီမှာ ကျနော်တို့ကို အနိုင်ယူထားတဲ့ တစ်သင်းတည်းသော အသင်းဖြစ်လို့ ပရိသတ်တွေအတွက် တကယ်ကို အနိုင်ယူပေးချင်ခဲ့တာပါ။ ကျနော်တို့ဟာ အကောင်းဆုံး မစတင်နိုင်ခဲ့တဲ့အတွက် ဒါဟာ မလွယ်ကူခဲ့ပါ ဘူး။ ဒါပေမယ့် ကျနော်တို့ဟာ ပြန်လာပြီး အနိုင်ရအောင် လုပ်ဆောင်နိုင်တဲ့ စရိုက်လက္ခဏာတွေကို ပြသနိုင်ခဲ့ ပါ တယ်”လို့ ပြောခဲ့ပါတယ်။

အာဆင်နယ်အသင်းဟာ စက်တင်ဘာလ အစောပိုင်းက ယူနိုက်တက်အသင်းကို ပထမအကျော့ ပွဲစဉ်မှာ အရေးနိမ့် ပြီး ကတည်းက ပရီးမီးယားလိဂ်မှာ ရှုံးပွဲမရှိတာဖြစ်ပါတယ်။

လက်ရှိအချိန် ရှုံးပွဲမရှိတာ ၁၃ ပွဲအထိ ရှိသွားခဲ့ပြီ ဖြစ်ပါတယ်။

လက်ရှိ ပရီးမီးယားလိဂ် ၁၉ ပွဲ ကစားအပြီးမှာ ရမှတ် ၅၀ အထိ ရယူထားတဲ့ အာဆင်နယ်အသင်းဟာ ရာသီကုန် ချိန်မှာ ရမှတ် ၁၀၀ ကျော် သွားနိုင်တယ်လို့တောင် သုံးသပ်နေကြတာ ဖြစ်ပါတယ်။

အာဆင်နယ်အသင်းဟာ အခုအပတ်မှာတော့ အက်ဖ်အေဖလား ပွဲစဉ်အဖြစ် မန်စီးတီးအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဇန်နဝါရီ ၂၃

အယ်လ်နာဆာ အသင်းနည်းပြ ရူဒီဂါစီယာက အယ်လ်အီတီဖတ်နဲ့ ပွဲမှာ ပါဝင်ပြီး နိုင်ပွဲရဖို့ ကူညီတာမှာ အဓိက ကျခဲ့တဲ့ ရော်နယ်ဒိုရဲ့ အသင်းအပေါ် လွှမ်းမိုးမှုကို ချီးကျူးသွားခဲ့တာ ဖြစ်ပါတယ်။

ရူဒီဂါစီယာက “ရော်နယ်ဒိုလို ကစားသမားရှိနေရင် ဒါက အပေါင်းလက္ခဏာဆောင်တဲ့ အရာဖြစ်သလို ကျနော်တို့ ဂိုးသွင်းလို့ရအောင် ပြိုင်ဘက် နောက်ခံလူတွေကို အာရုံပြောင်းအောင် လုပ်ဆောင်နိုင်ပါတယ်။ ဒါက ကျနော်တို့ ဂိုးသွင်းတဲ့အချိန်မှာ ဖြစ်ပျက်ခဲ့တဲ့ အရာပါ။ ဒီနေ့မှာဆိုရင် ကျနော်တို့က သူ့အတွက် အခွင့်အရေးတွေကို ဖန်တီး နိုင်ခဲ့ပြီး ကစားသမားတွေကိုလည်း သူနဲ့ တာလီစကာကြားက ပွဲကို ကွဲပြားအောင်လုပ်ဖို့ တောင်းဆိုခဲ့ပါတယ်။ သူဟာ ပီအက်စ်ဂျီနဲ့ ခြေစမ်းပွဲမှာ ပါဝင်ပြီး လုံလောက်တဲ့ အနားယူမှု မရှိဘူးဆိုတာကို ကျနော်တို့ မမေ့သင့် ပါ ဘူး”လို့ သတင်းထောက်တွေကို ပြောခဲ့တာပါ။

ရော်နယ်ဒိုဟာ အယ်လ်နာဆာ အသင်းနဲ့အတူ ဆော်ဒီလိဂ် ပွဲဦးထွက်အဖြစ် အယ်လ်အီတီဖတ်အသင်းကို ၁ ဂိုး- ဂိုး မရှိနဲ့ အနိုင်ရတဲ့ပွဲမှာ အသင်းခေါင်းဆောင် အဖြစ်နဲ့ ပွဲထွက်ခဲ့တာ ဖြစ်ပါတယ်။

ရော်နယ်ဒို နောက်ပြန်ကန်ချက်နဲ့ ဂိုးသွင်းဖို့ ကြိုးပမ်းနေစဉ်

ရော်နယ်ဒိုဟာ ပွဲချိန်ပြည့် ပါဝင်ကစားခဲ့ပြီး နောက်ပြန် ကန်သွင်းချက်နဲ့ ဂိုးရဖို့ ကြိုးစားခဲ့ပေမယ့် လွဲချော်ခဲ့လို့ ပွဲဦးထွက်ပွဲမှာ ဂိုးမသွင်းနိုင်ခဲ့ပါဘူး။

ပရိသတ်တွေ အများအပြားကလည်း ဒီပွဲမှာ ရော်နယ်ဒို ပုံ ပါဝင်တဲ့ စာတန်းတွေ၊ ရော်နယ်ဒိုရဲ့ နာမည်နဲ့ ကျောနံပါတ်ပါ အယ်လ်နာဆာ အသင်းဂျာစီကို ဝတ်ဆင်ပြီး အားပေးခဲ့ကြတာ ဖြစ်ပါတယ်။

ရော်နယ်ဒိုဟာ ပြီးခဲ့တဲ့ အယ်လ်နာဆာအသင်းရဲ့ ၂ ပွဲမှာ ပွဲပယ်ပြစ်ဒဏ်ကြောင့် မပါဝင်နိုင်ခဲ့ပေမယ့် ပီအက်စ်ဂျီ အသင်းနဲ့ ခြေစမ်းပွဲမှာ ဆော်ဒီပွဲဦးထွက်အဖြစ် စတင်ကစားခွင့်ရခဲ့တာပါ။ ဒီပွဲမှာတော့ ရော်နယ်ဒိုဟာ ၂ ဂိုး သွင်း ယူခဲ့ပြီး အကောင်းဆုံး ကစားသမားဆု ရခဲ့တဲ့အထိ ခြေစွမ်းပြသနိုင်ခဲ့တာပါ။

ရော်နယ်ဒိုရဲ့ ဦးဆောင်မှုနဲ့အတူ အယ်လ်အီတီဖတ်ကို အနိုင်ရခဲ့တဲ့ အယ်လ်နာဆာအသင်းဟာ ဆော်ဒီ ပရော်ဖက်ရှင်နယ်လိဂ်ရဲ့ ထိပ်ဆုံးနေရာကို ပြန်ပြီး ဦးဆောင်နိုင်ခဲ့တာ ဖြစ်ပါတယ်။

အယ်လ်နာဆာအသင်းဟာ ဒုတိယနေရာက အယ်လ်ဟီလယ် အသင်းထက် ၁ ပွဲလျော့ ကစားထားပေမယ့် ရမှတ် ၁ မှတ် အသာရထားတာပါ။ အယ်လ်နာဆာအသင်းဟာ ဇန်နဝါရီ ၂၇ ရက်မှာ ဆော်ဒီစူပါဖလား ပွဲစဉ်အဖြစ် အယ်လ်အီတီဟတ်အသင်းနဲ့ ယှဉ်ပြိုင်ရမှာဖြစ်ပြီး ရော်နယ်ဒိုကပဲ အသင်းကို ဦးဆောင်ပြီး ပွဲထွက်လာနိုင်တာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ ဇန်နဝါရီ ၂၁

ပရီးမီးယားလိဂ်ကို ဦးဆောင်နေတဲ့ အာဆင်နယ်အသင်းဟာ ရာသီရဲ့ ဒုတိယပိုင်းမှာ ပိုပြီးကောင်းမွန်အောင် ကစားနိုင်တယ်လို့ နည်းပြ အာတီတာက ပြောလိုက်ပါတယ်။

အာတီတာက “ကျနော်တို့ဟာ ပွဲတွေအများကြီးကို အနိုင်ရခဲ့ပါတယ်။တနင်္ဂနွေနေ့မှာလည်း ဒီလိုပဲလုပ်နိုင်ဖို့ မျှော်လင့်ပါတယ်။ပြီးရင် ကျနော်တို့နိုင်ပွဲတွေကို ဆက်ပြီးသယ်ဆောင်သွားပါမယ်။ဒါကို အောင်မြင်အောင် ကြိုးစားနိုင်ဖို့အကောင်းဆုံးနည်းလမ်းက ပိုပြီးကောင်းအောင် ကစားဖို့ပါပဲ။ကျနော်တို့အသင်းဟာ အခုထက် ပိုပြီးကောင်းမွန်အောင် ကစားနိုင်ပါသေးတယ်” လို့ ပြောခဲ့တာပါ။

အာဆင်နယ်အသင်းဟာ တနင်္ဂနွေနေ့မှာ ပရီးမီးယားလိဂ်ပွဲစဉ်အဖြစ် ပြိုင်ဘက်ကြီး ယူနိုက်တက်အသင်းကို အိမ်ကွင်းမှာ လက်ခံယှဉ်ပြိုင်ရမှာဖြစ်ပါတယ်။အာဆင်နယ်အသင်းအနေနဲ့ ဒီပွဲကို အနိုင်ရအောင် ကစားနိုင်ခဲ့မယ် ဆိုရင် ပရီးမီးယားလိဂ် ၁၉ ပွဲကစားအပြီးမှာ ရမှတ် ၅၀ အထိ ရယူနိုင်မှာဖြစ်ပြီး ပရီးမီးယားလိဂ်သမိုင်းမှာ စံချိန်တင်ရမှတ် ၁၀၀ ရရှိခဲ့တဲ့ မန်စီးတီးအသင်းရဲ့ စံချိန်ကို လိုက်မှီနိုင်ဖို့ မျှော်လင့်နေတာပါ။

အာတီတာက ဒီရာသီ ပရီးမီးယားလိဂ်ဖလားကို ရယူနိုင်ဖို့အတွက် ရမှတ် ၉၀ ကျော် ရယူမယ်လို့ အရင်က ပြောထားခဲ့ပေမယ့် ဒီပစ်မှတ်ကို ရယူနိုင်ဖို့အတွက် အသင်းဆီကနေ ကြီးမားတဲ့အားထုတ်မှုကို ရယူနိုင်ဖို့ လိုအပ်တယ်လို့ ပြောခဲ့ပါတယ်။
အာတီတာက “စွမ်းဆောင်ရည် တသမတ်တည်းရှိဖို့ဆိုတာ အခက်အခဲဆုံးအရာတွေထဲက တစ်ခုပါ။ ထိပ်ဆုံးမှာ ရှိဖို့အတွက် ပွဲတွေအများကြီးအနိုင်ရချင်တယ်ဆိုရင်တော့ ဒါက အရေးကြီးဆုံးအရာတွေထဲက တစ်ခုပါ။ကျနော်တို့ ထိပ်ဆုံးနေရာကို ရောက်ရှိနေတယ်ဆိုပေမယ့် ဒါကို ဆက်ပြီးလုပ်ဆောင်နေဖို့ လိုပါတယ်” လို့ ပြောခဲ့တာပါ။

အာဆင်နယ်အသင်းဟာ ၁၉ နှစ်အကြာမှ ပထမဆုံးပရီးမီးယားလိဂ်ချန်ပီယံဆုကို ဒီရာသီမှာ အရယူနိုင်ဖို့ စိတ်ပိုင်း ဖြတ်ထားသလို ဒီရာသီပရီးမီးယားလိဂ်မှာ သူတို့ကို အနိုင်ယူထားတဲ့ တစ်သင်းတည်းသော အသင်းဖြစ်တဲ့ ယူနိုက် တက်ကို ပြန်ပြီးအနိုင်ယူဖို့လည်း မျှော်လင့်နေတာဖြစ်ပါတယ်။

Source:BBC