CNI Sport News
၂၀၂၄ ခုနှစ်၊ မတ်လ ၉

ဆော်ဒီနိုင်ငံမှာ ထိုးသတ်ခဲ့တဲ့ ဟဲဗီးဝိတ်လက်ဝှေ့ပွဲမှာ ဗြိတိန်လက်ဝှေ့သမား အန်သိုနီဂျိုရွှာဟာ UFC ဟဲဗီးဝိတ် ချန်ပီယံဟောင်း အန်ဂါနူကို ဒုတိယအချီမှာ အလဲထိုးနဲ့ အနိုင်ရရှိသွားခဲ့ပါတယ်။

အန်သိုနီဂျိုရွှာဟာ ဒီပွဲမှာ အသာစီးနဲ့ ထိုးသတ်ခဲ့ပြီး ဒုတိယအချီမှာ သူ့ရဲ့ပြင်းထန်တဲ့ လက်သီးချက်ကြောင့် အန်ဂါနူဟာ လက်ဝှေ့ကြိုးဝိုင်းထဲ လဲကျသွားခဲ့ပြီး အရှုံးပေးခဲ့ရတာပါ။

အန်ဂါနူဟာ သူ့ရဲ့ ပရော်ဖက်ရှင်နယ် လက်ဝှေ့သမားဘဝ ပထမဆုံးပွဲအဖြစ် တိုင်ဆန်ဗျူရီနဲ့ ထိုးသတ်ခဲ့တုန်းက အကောင်းဆုံး ထိုးသတ်မှုပြုလုပ်ပြီး ဆုံးဖြတ်ချက်တွေကြောင့် ရှုံးနိမ့်ခဲ့ပေမယ့် ဒီပွဲမှာတော့ အန်သိုနီဂျိုရွှာကို ယှဉ်ထိုးနိုင်ခဲ့ခြင်းမရှိတာ ဖြစ်ပါတယ်။

အန်သိုနီဂျိုရွှာကတော့ အန်ဂါနူဟာ ချန်ပီယံတစ်ဦးဖြစ်ပြီး လက်ဝှေ့ကြိုးဝိုင်းထဲ ထပ်ပြီး ဝင်ရောက် လာနိုင်သေး တယ်လို့ ပြောခဲ့ပါတယ်။

အန်သိုနီဂျိုရွှာက “အန်ဂါနူဟာ ချန်ပီယံတစ်ဦးဖြစ်ပြီး သူ့ရဲ့စွမ်းဆောင်နိုင်ရည်ကနေ ဘာမှယူဆောင်သွားလို့ မရပါဘူး။ သူ့ကို လက်ဝှေ့ကနေ မထွက်ခွာဖို့ ကျနော်ပြောခဲ့ပါတယ်။ သူဟာ နှစ်ပွဲထိုးသတ်ခဲ့တာမှာ အကောင်းဆုံး ထိုးသတ်နိုင်ခဲ့ပါတယ်”လို့ ပြောခဲ့တာပါ။

အန်ဂါနူကတော့ ဒီပွဲအပြီး သူ့ရဲ့ ဆိုရှယ်မီဒီယာမှာ ရှုံးပွဲကြောင့် တောင်းပန်ခဲ့ပြီး ဒီနေ့က သူ့အတွက် ဆိုးရွားတဲ့နေ့ ဖြစ်ခဲ့တယ်လို့ ရေးသားခဲ့ပါတယ်။

ဟဲဗီးဝိတ်ချန်ပီယံဟောင်း အန်သိုနီဂျိုရွှာဟာ အူဆက်ခ်ကို အရေးနိမ့်ပြီး ချန်ပီယံခါးပတ်တွေကို လက်လွှတ်ခဲ့ ရပြီးနောက်ပိုင်း ထိုးသတ်ခဲ့တဲ့ ၄ ပွဲစလုံး နိုင်ပွဲရယူထားတာပါ။ 

အန်သိုနီဂျိုရွှာရဲ့ လက်ဝှေ့ပွဲစီစဉ်သူ အက်ဒီဟန်းဟာ အန်သိုနီဂျိုရွှာကို တိုင်ဆန်ဗျူရီနဲ့ အူဆက်ခ်တို့ထဲက တစ်ဦးဦး နဲ့ ပွဲစီစဉ်ပေးဖို့ ရှိနေတယ်လို့ သိရပါတယ်။ 

တိုင်ဆန်ဗျူရီနဲ့ အူဆက်ခ်တို့ဟာ မေလမှာ အငြင်းပွားဖွယ်မရှိ ကမ္ဘာ့ဟဲဗီးဝိတ် ချန်ပီယံဆုအတွက် ယှဉ်ပြိုင်သွား မှာဖြစ်ပြီး ဒီနှစ်အကုန်ပိုင်းမှာ မကျေပွဲ ပြန်လည်ထိုးသတ်ဖို့ ရှိနေတာဖြစ်ပါတယ်။

Source: BBC