- By CNI
- Category: အားကစား
- Hits: 1012
CNI Sport News
၂၀၂၄ ခုနှစ်၊ ဩဂုတ် ၃
အိုလံပစ်အမျိုးသားဘောလုံးပြိုင်ပွဲ ကွာတားဖိုင်နယ်ပွဲစဉ်ဖြစ်တဲ့ ပြင်သစ်နဲ့ အာဂျင်တီးနားအသင်းတို့ရဲ့ ပွဲအပြီးမှာ နှစ်ဖက်ကစားသမားတွေဟာ ကွင်းအတွင်း ရန်ပွဲဖြစ်ပွားခဲ့ကြပါတယ်။
ဒီပွဲစဉ်မှာ အွန်နရီ ကိုင်တွယ်နေတဲ့ ပြင်သစ်အသင်းဟာ အာဂျင်တီးနားအသင်းကို တိုက်စစ်မှူး မာတီတာရဲ့ သွင်းဂိုးကြောင့် ၁ ဂိုး- ဂိုးမရှိနဲ့ အနိုင်ရပြီး ဆီမီးဖိုင်နယ်ကို တက်နိုင်ခဲ့တာပါ။
ပြင်သစ်နဲ့ အာဂျင်တီးနားအသင်းတို့ဟာ ၂၀၂၂ ကမ္ဘာ့ဖလားပြိုင်ပွဲ ဗိုလ်လုပွဲပြီးကတည်းက တင်းမာမှုတွေ မြင့်တက်ခဲ့တာ ဖြစ်ပါတယ်။
ပြီးခဲ့တဲ့ ကိုပါအမေရိကဖလားပြိုင်ပွဲမှာ ချန်ပီယံဆုရယူပြီးနောက် အာဂျင်တီးနားကစားသမားအချို့ဟာ ပြင်သစ်လူမည်း ကစားသမားတွေကို လူမျိုးရေးခွဲခြားမှုတွေပြုလုပ်တဲ့ သီချင်းသီဆိုခဲ့ကြတာပါ။
အဲဒါကြောင့် နှစ်သင်းကြား ထိပ်တိုက်တွေ့ဆုံခဲ့တဲ့ အိုလံပစ်ကွာတားဖိုင်နယ်ပွဲစဉ်ဟာ ပြိုင်ဆိုင်မှုပြင်းထန်ခဲ့ပြီး ဒီပွဲမစခင်မှာတင် ပြင်သစ်ပရိသတ်တွေဟာ အာဂျင်တီးနားအသင်းနိုင်ငံတော်သီချင်းသီဆိုချိန်မှာ ကျယ်လောင်စွာ အော်ဟစ်မှုတွေ ပြုလုပ်ခဲ့ကြပါတယ်။
အာဂျင်တီးနားနဲ့ပြင်သစ် ရန်ပွဲကို တွေ့ရစဉ်
ပြိုင်ဘက်ပရိသတ်တွေကြား ထိပ်တိုက်တွေ့ဆုံမှုကို ရှောင်နိုင်ဖို့အတွက် ပွဲကြည့်စင်ပေါ်မှာ ရဲတပ်ဖွဲ့ဝင်တွေချထားပေမယ့် ပွဲအပြီးကွင်းထဲမှာ နှစ်ဖက်ကစားသမားတွေ ရန်ပွဲဖြစ်ပွားခဲ့ကြတာပါ။
လူပေါင်း ၃၀ ပါဝင်တဲ့ ရန်ပွဲဖြစ်ခဲ့ပြီး ရုပ်ဆိုးတဲ့ မြင်ကွင်းတွေ ဖြစ်ပေါ်ခဲ့ပါတယ်။
နောက်ပိုင်းမှာ ပြင်သစ်ကစားသမားတွေဟာ သူတို့ရဲ့ပရိသတ်တွေရှေ့မှာ အောင်ပွဲခံမှုတွေပြုလုပ်နိုင်ခဲ့တာပါ။
ဒီပြိုင်ပွဲမှာ ဗိုလ်စွဲဖို့ ရေပန်းစားနေတဲ့ ပြင်သစ်အသင်းဟာ နိုင်ပွဲကြောင့် ၁၉၈၄ အိုလံပစ်ပြိုင်ပွဲနောက်ပိုင်း ရွှေတံဆိပ်ပြန်လည်ရယူနိုင်မယ့် မျှော်လင့်ချက်တွေဆက်ပြီးရှင်သန်ခဲ့တာဖြစ်ပါတယ်။
ပြင်သစ်အသင်းဟာ အိုလံပစ်ပြိုင်ပွဲကို ၁၃ ကြိမ် ယှဉ်ပြိုင်ထားပြီး ၁၉၈၄ ပြိုင်ပွဲမှာသာ ရွှေတံဆိပ် ရယူနိုင်ခဲ့တာပါ။
အိုလံပစ်အမျိုးသားဘောလုံးပြိုင်ပွဲရဲ့ ဆီမီးဖိုင်နယ်ပွဲစဉ်တွေအဖြစ် ပြင်သစ်နဲ့ အီဂျစ်၊စပိန်နဲ့ မော်ရိုကိုအသင်းတို့ တွေ့ဆုံနေပြီး သြဂုတ် ၅ ရက်မှာ ယှဉ်ပြိုင်သွားကြမှာ ဖြစ်ပါတယ်။
Source:Dailymail
- By CNI
- Category: အားကစား
- Hits: 893
CNI Sport News
၂၀၂၄ခုနှစ်၊ သြဂုတ် ၂
တော့တင်ဟမ်ဟော့စပါးအသင်းဟာ ဘုန်းမောက်တိုက်စစ်မှူး ဒိုမီနစ် ဆိုလန်ကီကို အခုနှစ် နွေရာသီမှာ ခေါ်ယူဖို့ စိတ်ဝင်စားနေတယ်လို့ သိရပါတယ်။
စပါးအသင်းဟာ အသင်းရဲ့ စံချိန်တင် ဂိုးသွင်းရှင် ဟာရီကိန်းရဲ့ နေရာကို အစားထိုးဖို့ ကြိုးပမ်းနေရဆဲ ဖြစ်ပါတယ်။
ဟာရီကိန်းဟာ ပြီးခဲ့တဲ့နွေရာသီက စပါးအသင်းကနေ ဘိုင်ယန်မြူးနစ်အသင်းကို ပြောင်းရွှေ့သွားခဲ့ပါတယ်။
ပြီးခဲ့တဲ့ရာသီက စပါးအသင်းနည်းပြ ပိုစတီကိုဂလူးဟာ ဆွန်ဟောင်မင်နဲ့ ရစ်ချာလီဆင်တို့ကို ဗဟိုတိုက်စစ်မှူး အဖြစ် အသုံးပြုခဲ့ပါတယ်။
ဒါပေမယ့် လုံလောက်တဲ့ တိုက်စစ်ပိုင်းကို မတည်ဆောက်နိုင်သေးတာကြောင့် စပါးအသင်းဟာ ဘရက်ဖို့ဒ် အသင်းက အီဗန်တိုနေးနဲ့ ဂျော်နသန်ဒေးဗစ် တို့ကိုလည်း ခေါ်ယူဖို့ စိတ်ဝင်စားနေပါတယ်။
ဂျာနယ်လစ် Fabrizio Romano ရဲ့ ထုတ်ပြန်ချက်အရ စပါးအသင်းဟာ လက်ရှိအချိန်မှာ ဘုန်းမောက်အသင်းက ဆိုလန်ကီကို ခေါ်ယူဖို့အတွက် ကြိုးပမ်းနေကြောင်း သိရပါတယ်။
ဒါပေမယ့် စပါးအသင်းကတော့ တရားဝင် ကမ်းလှမ်းမှု မလုပ်သေးပါဘူး။ ဆိုလန်ကီဟာ ဘုန်းမောက်အသင်းမှာ အရေးပါနေတာကြောင့် နုတ်ထွက်ဖို့ ခက်ခဲမှာ ဖြစ်ပါတယ်။
စပါးအသင်းနည်းပြ ပိုစတီကိုဂလူးကို တွေ့ရစဥ်
စပါးအသင်းဟာ တောင်ပံကစားသမား တစ်ဦးကို ခေါ်ယူဖို့အပြင် တိုက်စစ်မှူးသစ် တစ်ဦးကိုလည်း ခေါ်ယူဖို့ ကြိးစားနေတယ်လို့ နိုင်ငံတကာ အားကစားသတင်းဌာနတွေက ဖော်ပြထားပါတယ်။
ဆိုလန်ကီဟာ ၂၀၁၉ ခုနှစ်၊ ဇန်နဝါရီလမှာ လီဗာပူးလ်အသင်းကနေ ပြောင်းရွှေ့လာပြီး ဘုန်းမောက်အသင်းရဲ့ အဓိက အစိတ်အပိုင်းတစ်ခု ဖြစ်လာခဲ့တာပါ။
အသက် ၂၆ နှစ်အရွယ်ရှိပြီဖြစ်တဲ့ ကွင်းလယ်လူ ဆိုလန်ကီဟာ ဘုန်းမောက်အသင်းအတွက် ပြိုင်ပွဲစုံ ၂၁၆ ပွဲ ကစားထားပြီး ၇၇ ဂိုး သွင်းယူထားကာ ၃၁ ဂိုး ဖန်တီးမှု ပြုလုပ်ထားပါတယ်။
ဆိုလန်ကီဟာ ၂၀၂၃-၂၀၂၄ ခုနှစ် ပရီးမီးယားလိဂ် ၃၈ ပွဲမှာ ၁၉ ဂိုး သွင်းယူထားပြီး ပရီးမီးယားလိဂ်မှာ စတုတ္ထမြောက် ဂိုးသွင်းအများဆုံး ကစားသမား ဖြစ်ခဲ့ပါတယ်။
ဆိုလန်ကီဟာ ပရီးမီးယားလိဂ် တစ်ရာသီတည်းမှာ ဂိုးအများဆုံးသွင်းနိုင်တဲ့ ဘုန်းမောက်ရဲ့ စံချိန်သစ်ကို မှတ်တမ်း တင်နိုင်ခဲ့ပြီး သူ့ရဲ့ အထင်ကြီးစရာကောင်းတဲ့ ခြေစွမ်းဟာ ပရီးမီးယားလိဂ်ရဲ့ ကလပ်အသင်းကြီး အချို့ရဲ့ အာရုံကို ဖမ်းစားနိုင်ခဲ့တာပါ။
Source: Sport Mole
- By CNI
- Category: အားကစား
- Hits: 779
CNI Sport News
၂၀၂၄ ခုနှစ်၊ သြဂုတ် ၂
အယ်လ်အေဂလက်ဇီအသင်း တိုက်စစ်မှူးဟောင်း ဇလာတန်အီဘရာဟီမိုဗစ်က လိဂ်ပြိုင်ပွဲဟာ စည်းမျဉ်းတွေ များလွန်းတာကြောင့် မေဂျာလိဂ်ရဲ့ ကြီးထွားမှုဟာ နှေးကွေးတယ်လို့ ပြောခဲ့ပါတယ်။
အီဘရာဟီမိုဗစ်က “လမ်းကြောင်းမှန်ပေါ်မှာ ကြီးထွားနေပေမယ့် ကျနော် ဒီမှာရှိခဲ့တုန်းက ဖြည်းဖြည်းချင်း ကြီးထွားနေခဲ့တယ်လို့ ထင်ပါတယ်။ ပိုပြီးမြန်အောင်လုပ်ဖို့ဆိုရင် စည်းမျဉ်းတွေက များလွန်းပါတယ်။ ဒါက လုပ်ငန်းစဉ်ကို နှေးကွေးစေပါတယ်။ ဒါပေမယ့် ပွဲတွေကတော့ ပိုကြီးထွားပြီး ပိုလည်းကောင်းမွန်လာပါတယ်။
ပြီးတော့ နိုင်ငံနဲ့ မေဂျာလိဂ်အတွက် အလွန်အရေးကြီးတဲ့ ၂၀၂၆ ကမ္ဘာ့ဖလားပြိုင်ပွဲလည်း ရှိတယ်”လို့ ပြောခဲ့ တာပါ။
ပြီးခဲ့တဲ့ ဆယ်စုနှစ် ၂ ခုထဲမှာ အကောင်းဆုံး ကစားသမားတွေထဲက တစ်ဦးဖြစ်ခဲ့တဲ့ အီဘရာဟီမိုဗစ်ဟာ အေစီမီလန်အသင်းမှာ ကစားသမားဘဝ အဆုံးသတ်ဖို့ ဥရောပထံ ပြန်မလာခင် အယ်လ်အေဂလက်ဇီ အသင်း အတွက် ၂၀၁၈ နဲ့ ၂၀၁၉ နှစ်ရာသီ ပါဝင်ကစားပေးခဲ့တာ ဖြစ်ပါတယ်။
အီဘရာဟီမိုဗစ် ထွက်ခွာအပြီးမှာ မေဂျာလိဂ်ဟာ အသင်းအရေအတွက် ၂၄ သင်းကနေ ၂၉ သင်းအထိ တိုးခဲ့ပြီး လာမယ့်ရာသီမှာ အသင်းပေါင်း ၃၀ အဖြစ် ဆန်ဒီယေဂိုအသင်းက ပွဲဦးထွက်အဖြစ် ပါဝင်မှာပါ။
မက်ဆီကိုတွေ့ရစဉ်
ဒေးဗစ်ဘက်ခမ်း ပူးတွဲပိုင်ဆိုင်တဲ့ အင်တာမိုင်ယာမီအသင်းဟာ ပြီးခဲ့တဲ့နှစ်က မက်ဆီကို ခေါ်ယူခဲ့ပြီး လိဂ်သမိုင်း တစ်လျှောက် အကြီးမားဆုံး ခေါ်ယူမှုအဖြစ် မှတ်တမ်းဝင်ခဲ့ပါတယ်။
အေစီမီလန်အသင်းမှာ အကြီးတန်း အကြံပေးအဖြစ် တာဝန်ယူနေတဲ့ အီဘရာဟီမိုဗစ်က မေဂျာလိဂ်ပြိုင်ပွဲကို ဥရောပထိပ်တန်း လိဂ်ပြိုင်ပွဲတွေနဲ့ နှိုင်းယှဉ်ဖို့ဆိုရင် လိဂ်ရဲ့ အဆင့်အတန်းကို ဒီထက်ပိုပြီး ကောင်းမွန်အောင် လုပ်နိုင်မယ်လို့ ယုံကြည်ကြောင်း ESPN နဲ့ အင်တာဗျူးမှာ ပြောခဲ့တာပါ။
အသက် ၄၂ နှစ်အရွယ်ရှိ အီဘရာဟီမိုဗစ်ဟာ အယ်လ်အေဂလက်ဇီအသင်းမှာ ကစားခဲ့ချိန်က ၅၈ ပွဲကစားခဲ့ပြီး ၅၃ ဂိုး သွင်းယူနိုင်ခဲ့တာ ဖြစ်ပါတယ်။
Source: ESPN
- By CNI
- Category: အားကစား
- Hits: 1292
CNI Sport News
၂၀၂၄ ခုနှစ်၊ သြဂုတ် ၂
ထိုင်းလိဂ် ၂ ကလပ် ထရတ်အသင်းဟာ ကစားသမားဟောင်းဖြစ်တဲ့ မြန်မာ့လက်ရွေးစင်အသင်း နောက်ခံလူ ဟောင်း ဇော်မင်းထွန်းကို ရာသီသစ်အတွက် ခေါ်ယူလိုက်ပြီလို့ ကြေညာခဲ့ပါတယ်။
ဇော်မင်းထွန်းဟာ ၂၀၂၁-၂၂ ရာသီက ထရတ်အသင်းမှာ ပွဲပေါင်း ၂၃ ပွဲ ကစားခဲ့ပြီးနောက် ချောင်ဘူရီအသင်းထံ ပြောင်းရွှေ့ခဲ့တာပါ။
ဇော်မင်းထွန်းဟာ ပြီးခဲ့တဲ့ရာသီက ထိုင်းလိဂ် ၁ ကလပ် နာခွန်ပသွမ်အသင်းမှာ ကစားခဲ့ပြီး စာချုပ်ကုန်ဆုံးခဲ့တာ ကြောင့် ထွက်ခွာခဲ့တာ ဖြစ်ပါတယ်။
ရာသီသစ်မှာတော့ ဇော်မင်းထွန်းဟာ ထရတ်အသင်းကို ထိုင်းလိဂ် ၂ ကနေ လိဂ် ၁ ကို တန်းတက်နိုင်အောင် ကူညီပေးရတော့မှာပါ။
ဇော်မင်းထွန်းက “ကျနော့်ရဲ့ အရည်အသွေးတွေကို ယုံကြည်မှုအပြည့်နဲ့ အသင်းထံ ပြန်လာရတာကို ကျနော် ပျော်ရွှင်ပါတယ်။ ကျနော့်ရဲ့ အကောင်းဆုံး အရာတွေကို အသင်းထံ ပေးသွားမှာပါ။ လူတိုင်းနဲ့အတူ အမှတ်တရ အခိုက်အတန့်တွေကို ဖန်တီးနိုင်ဖို့လည်း ကျနော်မျှော်လင့်ပါတယ်။ ထရတ်အသင်းကို ထိုင်းလိဂ် ၁ ပြန်ပို့ပေးနိုင်ဖို့ အတွက် အသင်းဖော် အသစ်တွေနဲ့အတူ တိုက်ပွဲဝင်ဖို့ ကျနော် မစောင့်ဆိုင်းနိုင်တော့ပါဘူး။ ကျနော်နဲ့ အသင်းကို အားပေးဖို့ တောင်းဆိုချင်ပါတယ်”လို့ သူ့ရဲ့ ဆိုရှယ်မီဒီယာမှာ ရေးသားခဲ့ပါတယ်။
ဇော်မင်းထွန်းကို တွေ့ရစဉ်
ထရတ်အသင်းဟာ ပြီးခဲ့တဲ့ရာသီက ထိုင်းလိဂ် ၁ ပြိုင်ပွဲမှာ အမှတ်ပေးဇယား အောက်ဆုံးနေရာ ရပ်တည်ကာ တန်းဆင်းခဲ့ရတာပါ။
အဲဒါကြောင့် လာမယ့်ရာသီ တန်းပြန်တက်နိုင်ဖို့ ဝါရင့်နောက်ခံလူ ဇော်မင်းထွန်း အပါအဝင် ကစားသမားအချို့ကို အားဖြည့်ခဲ့တာ ဖြစ်ပါတယ်။
ပြီးခဲ့တဲ့ရာသီက ထိုင်းလိဂ် ၁ ကနေ လိဂ် ၂ ကို ထရတ်အသင်းနဲ့အတူ ချောင်ဘူရီ၊ ပူးလစ်တယ်ရိုအသင်းတို့ တန်းဆင်းခဲ့တာပါ။
မကွေး၊ ရတနာပုံ၊ ဂျီအက်ဖ်အေနဲ့ ရန်ကုန်ယူနိုက်တက်အသင်းတို့မှာ ကစားခဲ့တဲ့ ဇော်မင်းထွန်းဟာ ၂၀၁၉ ခုနှစ် ကတည်းက အာဆီယံကလပ် အသင်းတွေမှာ ကျင်လည်နေတာ ဖြစ်ပါတယ်။
ဇော်မင်းထွန်းဟာ ချောင်ဘူရီ၊ ဆူခိုထိုင်း၊ ပီနန်း၊ ထရတ်နဲ့ နာခွန်ပသွမ်အသင်းတွေမှာ ကစားခဲ့တာပါ။
ဇော်မင်းထွန်းဟာ မြန်မာအသင်းအတွက် ၂၀၁၁ ကနေ ၂၀၁၉ ခုနှစ်အထိ ပွဲပေါင်း ၇၅ ပွဲကစားခဲ့ပြီး ၅ ဂိုး သွင်းယူနိုင်ခဲ့တာ ဖြစ်ပါတယ်။
- By CNI
- Category: အားကစား
- Hits: 1608
CNI Sport News
၂၀၂၄ ခုနှစ်၊ သြဂုတ် ၂
ယူနိုက်တက်အသင်းဟာ ကွင်းလယ်လူ တော်မီနေးအတွက် ဖူလ်ဟမ်အသင်းရဲ့ ပေါင်သန်း ၂၀ နဲ့ ဒုတိယမြောက် ကမ်းလှမ်းမှုကို ရရှိခဲ့တဲ့အတွက် အပြောင်းအရွှေ့ဘယ်လိုဖြစ်လာမလဲ အားလုံးက စိတ်ဝင်စားနေကြတယ်လို့ ဘီဘီစီက ဖော်ပြထားပါတယ်။
ယူနိုက်တက်အသင်းဟာ တော်မီနေးအတွက် ပြောင်းရွှေ့ကြေး ပေါင်သန်း ၃၀ အလိုရှိနေတာကြောင့် ဖူလ်ဟမ် အသင်းရဲ့ ဒီကမ်းလှမ်းမှုကို ပယ်ချဖို့ရှိနေပါတယ်။
တော်မီနေးဟာ ပြီးခဲ့တဲ့ရာသီက ဝက်စ်ဟမ်းအသင်းရဲ့ ခေါ်ယူဖို့ ကြိုးပမ်းခြင်းခံခဲ့ရပေမယ့် ယူနိုက်တက်အသင်းမှာ ဆက်ပြီးရှိနေတာ ဖြစ်ပါတယ်။
အသက် ၂၇ နှစ်အရွယ်ရှိ ယူနိုက်တက်အကယ်ဒမီထွက် တော်မီနေးဟာ သူ့ရဲ့အနာဂတ်နဲ့ပတ်သက်ပြီး မရေမရာ ဖြစ်နေကာ ဒီနွေရာသီမှာ ရောင်းချခံရဖွယ်ရှိနေတာပါ။
ယူနိုက်တက်အသင်းဟာ ကစားသမားသစ်တွေ ဝယ်ယူဖို့အတွက် တော်မီနေး အပါအဝင် ကစားသမားအချို့ကို ရောင်းချမယ့် စာရင်းထဲ ထည့်သွင်းထားတာ ဖြစ်ပါတယ်။
စကော့တလန် ကွင်းလယ်လူဟာ ပြီးခဲ့တဲ့ရာသီက ယူနိုက်တက်အသင်းအတွက် ပရီးမီးယားလိဂ် ၃၂ ပွဲ ပါဝင် ကစားခဲ့ပေမယ့် ၁၄ ပွဲကတော့ လူစားဝင် ကစားသမားအဖြစ်သာ ပါဝင်ခဲ့ရတာပါ။
တော်မီနေးကို တွေ့ရစဉ်
တော်မီနေးဟာ ပြီးခဲ့တဲ့ ဘက်တစ်အသင်းနဲ့ ခြေစမ်းပွဲစဉ်မှာ ယူနိုက်တက်အသင်းအတွက် နံပါတ် ၁၀ နေရာမှာ ပါဝင်ကစားသွားခဲ့တာ ဖြစ်ပါတယ်။
ဒါပေမယ့် ဘရူနိုဖာနန်ဒက်စ်၊ မေဆန်မောင့်၊ ကိုဘီမိုင်နူးနဲ့ ကတ်စမဲရိုးတို့ရှိနေတဲ့ ကွင်းလယ်မှာ တော်မီနေးဟာ ရောင်းချခံရဖို့ ရှိနေတာပါ။
တော်မီနေးဟာ ယူနိုက်တက်အသင်းကြီးမှာ ၂၀၁၇ ခုနှစ်က စတင် ပွဲထွက်ခွင့်ရခဲ့ပြီး ပွဲပေါင်း ၂၅၂ ပွဲ ပါဝင် ကစားထားကာ ၂၉ ဂိုးသွင်းယူပြီး FA ဖလားနဲ့ ကာရာဘောင်းဖလားတို့ကို ရယူနိုင်ခဲ့တာဖြစ်ပါတယ်။
ယူနိုက်တက်အသင်းဟာ တော်မီနေးကို ရောင်းချမယ့် စာရင်းထဲ ထည့်ထားပေမယ့် သူတို့သတ်မှတ်ထားတဲ့ ပြောင်းရွှေ့ကြေး မရရင်တော့ လက်လွှတ်ဖွယ်မရှိတာပါ။
တော်မီနေးဟာ စကော့တလန် လက်ရွေးစင်အသင်းအတွက် ၅၂ ပွဲ ပါဝင်ကစားထားပြီး ၉ ဂိုးသွင်းယူကာ ပြီးခဲ့တဲ့ ယူရို ၂၀၂၄ ပြိုင်ပွဲမှာ နိုင်ငံအသင်းအတွက် ၁ ဂိုးသွင်းယူခဲ့တာ ဖြစ်ပါတယ်။
Source: BBC
- By CNI
- Category: အားကစား
- Hits: 918
CNI Sport News
၂၀၂၄ ခုနှစ်၊ သြဂုတ် ၂
အိုလံပစ်ပြိုင်ပွဲမှာ အငြင်းပွားမှုတွေဖြစ်ခဲ့တဲ့ လက်ဝှေ့ပွဲစဉ်မှာ အီတလီနိုင်ငံသူ ကာရီနီဟာ အယ်လ်ဂျီးရီးယား နိုင်ငံသူ ခီလစ်ဖ်နဲ့ ၄၆ စက္ကန့်သာ ထိုးသတ်ပြီးနောက် ပွဲကိုဆက်မထိုးတော့ဘဲ ငိုကြွေးပြီး အရှုံးပေးခဲ့ပါတယ်။
ခီလစ်ဖ်ဟာ ကျား/မ စစ်ဆေးမှု ပျက်ကွက်ခဲ့လို့ ပြီးခဲ့တဲ့နှစ်က ကမ္ဘာ့ချန်ပီယံရှစ်ပြိုင်ပွဲမှာ ယှဉ်ပြိုင်ခွင့် မရခဲ့ပေမယ့် အိုလံပစ်ပြိုင်ပွဲမှာ ယှဉ်ပြိုင်ခွင့် ပြုခြင်းခံထားရတဲ့ လက်ဝှေ့သမား ၂ ဦးထဲက ၁ ဦးဖြစ်ပါတယ်။
ကာရီနီဟာ ဒီပွဲစဉ်မှာ ခီလစ်ဖ်ရဲ့ ထိုးချက်တွေကို ခံရပြီးနောက် ပွဲကိုဆက် မထိုးတော့ဘဲ အရှုံးပေးသွားခဲ့တာ ဖြစ်ပါတယ်။
ကာရီနီဟာ ပွဲအပြီးမှာ ငိုကြွေးနေခဲ့ပြီး အနိုင်ရခဲ့တဲ့ ခီလစ်ဖ်ကို လက်ဆွဲနှုတ်ဆက်ဖို့ ငြင်းဆန်ခဲ့တာပါ။ ကာရီနီက သူမဟာ ပြင်းထန်စွာ ထိုးခံခဲ့ရတာကြောင့် ဒီပွဲကနေ ထွက်ခွာခဲ့တာလို့ ပွဲအပြီးအင်တာဗျူးမှာ ပြောခဲ့ပါတယ်။
ကာရီနီနဲ့ခီလစ်ဖ် ထိုးသတ်နေကြစဉ်
ကာရီနီက “အလွန်နာကျင်ရပါတယ်။ ဒီလိုမျိုး ထိုးချက်တွေကို တစ်ခါမှ မခံစားခဲ့ရဖူးပါဘူး။ ဒုတိယအကြိမ် ထိုးခံခဲ့ရအပြီးမှာ နာကျင်တဲ့ဒဏ်ကို ပြင်းပြင်းထန်ထန် ခံစားခဲ့ရပါတယ်။ ဒီထက်ဆိုးရွားနိုင်တဲ့ အခြေအနေကြောင့် ပွဲကို အဆုံးသတ်လိုက်တာက ပိုပြီးကောင်းပါတယ်။ ဆက်မလုပ်နိုင်တဲ့အချိန်မှာ အရှုံးပေးလိုက်တာက သိက္ခာရှိရှိနဲ့ လုံလောက်မှုရှိပါတယ်”လို့ ပြောခဲ့တာပါ။
ခီလစ်ဖ်ကတော့ သူဟာ ရွှေတံဆိပ်ရယူဖို့ ဒီကိုလာတာဖြစ်ပြီး ဘယ်သူနဲ့မဆို ထိုးသတ်သွားမယ်လို့ ဘီဘီစီနဲ့ အင်တာဗျူးမှာ ပြောခဲ့ပါတယ်။
ဒီပွဲနဲ့ ပတ်သက်ပြီး အငြင်းပွားမှုတွေ ဖြစ်နေပြီး အီတလီဝန်ကြီးချုပ် မယ်လိုနီက အမျိုးသားဗီဇလက္ခဏာရှိတဲ့ အားကစားသမားတွေကို အမျိုးသမီးပြိုင်ပွဲတွေမှာ ဝင်ရောက်ယှဉ်ပြိုင်ခွင့် မပြုသင့်ဘူးလို့ ဝေဖန်မှုပြုလုပ်ခဲ့ပါ တယ်။
နိုင်ငံတကာအိုလံပစ်ကော်မတီကတော့ အိုလံပစ်ပြိုင်ပွဲ မတိုင်ခင်ကတည်းက ခီလစ်ဖ်နဲ့ ထိုင်ဝမ်က လင်ယူတင် တို့ကို အမျိုးသမီးပြိုင်ပွဲတွေမှာ ယှဉ်ပြိုင်ခွင့်ပြုခဲ့တာပါ။
IOC ကတော့ လက်ဝှေ့သမား ၂ ဦးအပေါ် ခွဲခြားမှုတွေအတွက် စိတ်မကောင်းဖြစ်မိတယ်လို့ ကြေညာချက် ထုတ်ပြန်ထားတာ ဖြစ်ပါတယ်။
Source: The Guardian
- By CNI
- Category: အားကစား
- Hits: 614
CNI Sport News
၂၀၂၄ ခုနှစ်၊ သြဂုတ် ၂
ဖူလ်ဟမ်အသင်းက ယူနိုက်တက်ကစားသမား တိုမီနေးကို ပေါင်သန်း ၂၀ ခန့်နဲ့ ဒုတိယအကြိမ် ကမ်းလှမ်းမှု ပြုလုပ်ခဲ့ပါတယ်။
ယူနိုက်တက်အသင်းဟာ တိုမီနေးကို ရောင်းထုတ်ဖို့ စိတ်ကူးထားပေမယ့် ပေါင် ၂၅ သန်းမှ ပေါင် ၃၀ သန်းအထိ ပြောင်းရွှေ့ကြေးကို သတ်မှတ်ထားပါတယ်။
နောက်ထပ်တစ်နှစ် သက်တမ်းတိုးဖို့ ရွေးချယ်ခွင့်နဲ့ စာချုပ်သက်တမ်း တစ်နှစ်ကျန်ရှိနေတဲ့ စကော့တလန် ကွင်းလယ် ကစားသမားကို ဂါလာတာဆာရေးနဲ့ ဖီနာဘာချီတို့ကလည်း စိတ်ဝင်စားနေကြပါတယ်။
မက်တိုမီနေးကို တွေ့ရစဥ်
ပြီးခဲ့တဲ့ရာသီက ၁၀ ဂိုး သွင်းယူခဲ့တဲ့ တိုမီနေးကို အဲရစ်တန်ဟတ်က သဘောကျပေမယ့် ယူနိုက်တက်အသင်းသာ အားကောင်းလာမယ်ဆိုရင် ရောင်းထုတ်မှာဖြစ်ပါတယ်။
ဒါကြောင့် ဖူလ်ဟမ်အသင်းဟာ သူတို့ရဲ့ ကမ်းလှမ်းမှုကို တိုးမြှင့်ဖို့ ယူနိုက်တက်အသင်းက မျှော်လင့်နေတာပါ။
အဲဒီနောက် ဖီနာဘာချီနဲ့ ဂါလာတာဆာရေးတို့က သူတို့ရဲ့ စိတ်ဝင်စားမှုကို အလေးအနက်ထား ကမ်းလှမ်းမလား ဆိုပြီးတာတော့ စောင့်ကြည့်ရဦးမှာပါ။
တိုမီနေးဟာ ပြီးခဲ့တဲ့ ရာသီက ကွင်းလယ်ခံစစ်ကနေ ရှေ့တန်းအထိ အခန်းကဏ္ဍ အမျိုးမျိုးမှာ ပါဝင်ကစားခဲ့ပါ တယ်။
Source: The Guardian
- By CNI
- Category: အားကစား
- Hits: 686
CNI Sport News
၂၀၂၄ခုနှစ်၊ သြဂုတ် ၁
ချယ်လ်ဆီးအသင်း ကစားသမား ကော်နာဂယ်လာဂါကို ခေါ်ယူဖို့ အသလက်တီကို အသင်းက ကမ်းလှမ်းခဲ့တာမှာ ချယ်လ်ဆီးအသင်းက လက်ခံခဲ့လို့ သဘောတူညီမှုရရှိသွားပြီ ဖြစ်ပါတယ်။
ဂယ်လာဂါဟာ ဗုဒ္ဓဟူးနေ့က ချယ်လ်ဆီးအသင်းရဲ့ စာချုပ်သက်တမ်းတိုးဖို့ ကမ်းလှမ်းချက်ကို ပယ်ချခဲ့ပြီးနောက် အခုလို အသလက်တီကိုအသင်းနဲ့ သဘောတူညီမှု ရရှိခဲ့ခြင်း ဖြစ်ပါတယ်။
ဂယ်လာဂါဟာ ချယ်လ်ဆီးအသင်းရဲ့ ၃ နှစ်သက်တမ်းတိုးဖို့( ၂ နှစ်နှင့် နောက်ထပ်ရွေးချယ်ခွင့် )ကမ်းလှမ်းချက်ကို ပယ်ချခဲ့တာ ဖြစ်ပါတယ်။
အဲဒါကြောင့် ချယ်လ်ဆီးအသင်းဟာ ကစားသမားရဲ့ အနာဂတ်ကို ကူညီဖြေရှင်းပေးဖို့ အသလက်တီကို အသင်းနဲ့ သဘောတူညီမှု ရရှိခဲ့ပြီ ဖြစ်ပါသည်။
ဂယ်လာဂါဟာ အသလက်တီကိုသို့ ပြောင်းရွှေ့ဖို့ စိတ်ဝင်စားနေပြီး ချယ်လ်ဆီးအသင်းကလည်း သူလိုချင်တဲ့ အတိုင်း စပိန်ကို ပြောင်းရွှေ့နိုင်ဖို့အတွက် တတ်နိုင်သမျှ ဆောင်ရွက်ပေးမယ်လို့ ပြောထားပါတယ်။
ကော်နာ ဂယ်လာဂါ ကိုတွေ့ရစဥ်
အသက် ၂၄ နှစ်အရွယ် ရှိပြီဖြစ်တဲ့ ကစားသမားဟာ ၂၀၂၂ ခုနှစ် ဆောင်းဦးပေါက်မှာ စာချုပ်သက်တမ်းတိုးဖို့ ချယ်လ်ဆီးရဲ့ ကမ်းလှမ်းမှုကို ပယ်ချခဲ့တာ ဖြစ်ပါတယ်။
ချယ်လ်ဆီးအသင်းဟာ အခုနှစ် နွေရာသီမှာ ဂယ်လာဂါအတွက် အက်စတွန်ဗီလာထံကနေ ပိုမိုကြီးမားတဲ့ ကမ်းလှမ်းမှုကို လက်ခံရရှိခဲ့ပါသေးတယ်။ ဒါပေမဲ့ ချယ်လ်ဆီးအသင်းဟာ အက်ကစတွန်ဗီလာအသင်းရဲ့ ကမ်းလှမ်းမှုကို လက်မခံဘဲ ပယ်ချခဲ့ပါတယ်။
ချယ်လ်ဆီးအသင်းဟာ ဂယ်လာဂါကို ပရီးမီးယားလိဂ် ပြိုင်ဘက်ထက် ပြည်ပကလပ် အသင်းတစ်သင်းထံကိုပဲ ရောင်းချဖို့ လိုလားနေတာ ဖြစ်ပါတယ်။
Source: SkySport
- By CNI
- Category: အားကစား
- Hits: 673
CNI Sport News
၂၀၂၄ ခုနှစ်၊ ဩဂုတ် ၁
အာဂျင်တီးနားတောင်ပံကစားသမားဟောင်း ဒီမာရီယာက အသက်အန္တရာယ် ခြိမ်းခြောက်မှုကြောင့် ငယ်ဘဝကလပ် ရိုဆာရီယိုထံပြန်မယ့် သူ့ရဲ့အစီအစဉ်ကို စွန့်လွှတ်ခဲ့ရတယ်လို့ ပြောခဲ့ပါတယ်။
ဒီမာရီယာက “ကျနော့်အစ်မရဲ့လုပ်ငန်းကို ခြိမ်းခြောက်မှုပြုလုပ်ခဲ့ပါတယ်။ နဖူးကို သေနတ်ကျည်ဆံမှန်ထားတဲ့ ဝက်ခေါင်းတစ်ခုပါတဲ့ ပါဆယ်တစ်ခု ရောက်လာခဲ့ပါတယ်။
ကျနော်သာ ရိုဆာရီယိုကို ပြန်လာခဲ့ရင် နောက် ခေါင်းတစ်ခုက ကျနော့်သမီးရဲ့ ခေါင်းဖြစ်သွားမယ်လို့ ရေးသားထားတဲ့စာလည်း ပါဝင်ခဲ့ပါတယ်။
အဲဒီလတွေက တကယ်ကိုကြောက်စရာကောင်းခဲ့ပါတယ်။ ဒီအိပ်မက်ကို အကောင်အထည်မဖော်နိုင်ခဲ့တဲ့အတွက် ညတိုင်းထိုင်ပြီး ငိုခဲ့ရပါတယ်”လို့ ပြောခဲ့တာပါ။
ပြီးခဲ့တဲ့ ကိုပါအမေရိကဖလားပြိုင်ပွဲအပြီးမှာ အာဂျင်တီးနားအသင်းကနေ အနားယူခဲ့တဲ့ ဒီမာရီယာဟာ ဘင်ဖီကာ အသင်းနဲ့ စာချုပ်ကုန်ဆုံးပြီးနောက် အသင်းလက်မဲ့ဖြစ်နေခဲ့ပါတယ်။
ရိုဆာရီယိုလူငယ်စီမံကိန်းက ထွက်ပေါ် လာခဲ့တဲ့ အသက် ၃၆ နှစ်အရွယ်ရှိ ဒီမာရီယာဟာ ရိုဆာရီယိုအသင်းကြီးမှာ ၂၀၀၅ ကနေ ၂၀၀၇ ခုနှစ် အထိ ကစားခဲ့တာပါ။
ဒီမာရီယာဟာ သူ့ရဲ့ကစားသမားဘဝကို ရိုဆာရီယိုအသင်းထံ ပြန်ပြီး အဆုံးသတ်ဖို့ အစီအစဉ် ရှိခဲ့တာဖြစ်ပါတယ်။
ဒါပေမယ့် အသက်အန္တရာယ်ခြိမ်းခြောက်မှုတွေကြောင့် ဒီအစီအစဉ်ကို ဒီမာရီယာက စွန့်လွှတ် ခဲ့ရတာပါ။
ဒီမာရီယာဟာ ရိုဆာရီယိုအသင်းက ထွက်ခွာအပြီးမှာ ဘင်ဖီကာအသင်းထံ ပြောင်းရွှေ့ခဲ့ပြီး နောက်ပိုင်းမှာ ရီးရယ်လ်၊ယူနိုက်တက်၊ပီအက်စ်ဂျီ၊ဂျူဗင်တပ်စ်နဲ့ အခု ဘင်ဖီကာအသင်းထံ ပြန်လည်ရောက်ရှိလာခဲ့တာ ဖြစ်ပါတယ်။
ဒီမာရီယာဟာ ဘင်ဖီကာအသင်းနဲ့ စာချုပ်ကုန်ဆုံးပြီးနောက် မေဂျာလိဂ်ကလပ် အင်တာ မိုင်ယာမီအသင်းအပါအဝင် အသင်းအချို့နဲ့ သတင်းတွေထွက်ပေါ်နေတာပါ။ သတင်းအချို့မှာတော့ ဘင်ဖီကာ အသင်းဟာ ဒီမာရီယာကို ၁ နှစ်သက်တမ်းတိုးဖို့ရှိနေတယ်လို့ဖော်ပြထားပါတယ်။
ဒီမာရီယာဟာ ပြီးခဲ့တဲ့ရာသီက ဘင်ဖီကာအသင်းအတွက် ၄၈ ပွဲကစားထားပြီး ၁၇ ဂိုးသွင်းယူခဲ့တာဖြစ်ပါတယ်။
Source:BBC
- By CNI
- Category: အားကစား
- Hits: 861
CNI Sport News
၂၀၂၄ ခုနှစ်၊ သြဂုတ် ၁
အင်္ဂလန်အသင်း နည်းပြဟောင်း မက္ကလာရင်ဟာ ဂျမေကာ လက်ရွေးစင်အသင်းကို ကိုင်တွယ်ဖို့ ယူနိုက်တက် အသင်း နည်းပြအဖွဲ့ဝင် အဖြစ်ကနေ ထွက်ခွာခဲ့ပါတယ်။
ဒတ်ချ်လူမျိုးနည်းပြ အဲရစ်တန်ဟတ် ကိုင်တွယ်ချိန်မှာ ယူနိုက်တက်အသင်းထံ ပြန်ရောက်ရှိလာခဲ့တဲ့ မက္ကလာရင် ဟာ ပြီးခဲ့တဲ့ နှစ်ရာသီမှာ အသင်းနဲ့အတူ FA ဖလား၊ ကာရာဘောင်းဖလားတို့ကို ရယူနိုင်ခဲ့တာပါ။
မက္ကလာရင်ဟာ ဂျမေကာအသင်း နည်းပြအဖြစ် ၂ နှစ် စာချုပ်ချုပ်ဆိုခဲ့တာ ဖြစ်ပါတယ်။
ဂျမေကာဘောလုံးအဖွဲ့ချုပ်က မက္ကလာရင်ရဲ့ ပစ်မှတ်က နိုင်ငံအသင်းကို ၂၀၂၆ ကမ္ဘာ့ဖလားပြိုင်ပွဲ ယှဉ်ပြိုင်ခွင့် ရရှိအောင် လုပ်ဆောင်ပေးဖို့ ဖြစ်တယ်လို့ ပြောခဲ့တာပါ။
ဂျမေကာအသင်းဟာ ကမ္ဘာ့ဖလားပြိုင်ပွဲ ယှဉ်ပြိုင်မှုအဖြစ် ၁၉၉၈ ကမ္ဘာ့ဖလားပြိုင်ပွဲ တစ်ကြိမ်တည်းသာ ယှဉ်ပြိုင် ခဲ့ပြီး ဒီပြိုင်ပွဲမှာ အုပ်စုအဆင့်နဲ့သာ ကျေနပ်ခဲ့ရတာ ဖြစ်ပါတယ်။
မက္ကလာရင်ကိုတွေ့ရစဉ်
၂၀၁၉ ခုနှစ်က ကျူပီအာအသင်း နည်းပြရာထူးကနေ ထုတ်ပယ်ခံရပြီးနောက် ပထမဆုံးအကြိမ် နည်းပြရာထူးကို ပြန်လည်ရယူမယ့် မက္ကလာရင်က ဂျမေကာအသင်း နည်းပြရာထူးကို လက်ခံဖို့ သူ့ဘက်က တုန့်ဆိုင်းမနေခဲ့ဘူးလို့ ပြောခဲ့ပါတယ်။
ယူနိုက်တက်အသင်းမှာ ဆာအဲလက်စ်ဖာဂူဆန်ရဲ့ လက်ထောက်နည်းပြအဖြစ် ဆောင်ရွက်ခဲ့တဲ့ မက္ကလာရင်ဟာ အင်္ဂလန်၊ မယ်ဒယ်ဘရော့၊ တွမ်တီး၊ ဝုလ်ဖ်ဘတ်၊ နော်တင်ဟမ်ဖောရက်စ်၊ ဒါဘီ၊ နယူးကာဆယ်နဲ့ ကျူပီအာ အသင်းတို့ကို နည်းပြအဖြစ် ကိုင်တွယ်ခဲ့တာပါ။
မက္ကလာရင်ဟာ နည်းပြဘဝမှာ အောင်မြင်မှုအဖြစ် မယ်ဒယ်ဘရော့၊ ဒါဘီနဲ့ တွမ်တီးအသင်းတွေမှာ ဆုဖလား ရယူနိုင်ခဲ့ပါတယ်။
မက္ကလာရင်ဟာ ဂျမေကာအသင်းကို လာမယ့် ကွန်ကာကပ်ဖ်နေးရှင်းလိဂ်ပွဲစဉ်တွေမှာ စတင်ပြီးတာဝန်ယူရမှာပါ။
ဂျမေကာအသင်းဟာ စက်တင်ဘာထဲမှာ ကျူးဘား၊ ဟွန်ဒူးရပ်စ် အသင်းတို့နဲ့ နေးရှင်းလိဂ်ပွဲစဉ်တွေ ယှဉ်ပြိုင်ရမှာ ဖြစ်ပါတယ်။
Source: BBC
Page 106 of 375
Connect with us
