CNI Sport News

၂၀၂၄ ခုနှစ်၊ အောက်တိုဘာ ၁၅

မွန်ဇာကွင်းလယ်လူ ဒန်နီရယ်လ်မာလ်ဒီနီဟာ အစ္စရေးအသင်းကို အနိုင်ရခဲ့တဲ့ နေးရှင်းလိဂ်ပွဲစဉ်မှာ ပွဲဦးထွက်ခွင့် ရခဲ့ပြီးနောက် အီတလီအသင်းအတွက် ပါဝင်ကစားတဲ့ မာလ်ဒီနီရဲ့ တတိယမျိုးဆက် ဖြစ်လာခဲ့ပါတယ်။ 

ဒန်နီရယ်လ်ရဲ့ ဖခင်ဖြစ်သူ ပေါ်လိုမာလ်ဒီနီဟာ အီတလီအသင်းအတွက် ၁၂၆ ပွဲကစားခဲ့ပြီး အဖိုးဖြစ်သူ ဆီဆာမာလ်ဒီနီဟာ အီတလီအသင်းအတွက် ၁၄ ပွဲ ပါဝင်ကစားခဲ့တာပါ။

အသက် ၂၃ နှစ်အရွယ်ရှိ ဒန်နီရယ်လ်မာလ်ဒီနီဟာ ဖခင်ဖြစ်သူနဲ့ အဖိုးဖြစ်သူလိုပဲ အေစီမီလန်အသင်းမှာ ကစားသမားဘဝ စတင်ခဲ့ပြီး ဒီရာသီမှာ မွန်ဇာအသင်းထံ အပြီးသတ် ပြောင်းရွှေ့ခဲ့တာဖြစ်ပါတယ်။ 

ဒန်နီရယ်လ်မာလ်ဒီနီဟာ အစ္စရေးအသင်းနဲ့ပွဲမှာ ပါဝင်ခွင့်ရခဲ့ပြီးနောက် အီတလီအသင်းအတွက် အဖိုး၊ ဖခင်နဲ့ သားဖြစ်သူတို့ အားလုံးကစားတာ ပထမဆုံးအကြိမ်ဖြစ်ခဲ့တာပါ။ 

ဒန်နီရယ်လ်မာလ်ဒီနီကို တွေ့ရစဉ်

ဒန်နီရယ်လ်မာလ်ဒီနီက “ဒါက အလွန်ကောင်းမွန်ပြီး အပြုသဘောဆောင်တဲ့ ခံစားချက်ရရှိပါတယ်။ ဒီပွဲကို ဝင်ကစားခွင့်ရလို့ အလွန်ပျော်ရွှင်ပြီး ပွဲကလည်း ကောင်းမွန်စွာ ပြီးဆုံးသွားခဲ့ပါတယ်။ ဒီပွဲကို ကျနော့် မိဘတွေ လာကြည့်တာကြောင့်လည်း အလွန်ဝမ်းသာပါတယ်။ အိမ်ပြန်ရောက်ရင် သူတို့နဲ့ စကားပြောဆိုမှုတွေ ပြုလုပ်မှာ ပါ”လို့ ပြောခဲ့ပါတယ်။ 

ဒီပွဲမှာ အီတလီအသင်းဟာ အစ္စရေးအသင်းကို ၄ ဂိုး-၁ ဂိုးနဲ့ အနိုင်ရပြီး နေးရှင်းလိဂ်ပြိုင်ပွဲရဲ့ ကွာတားဖိုင်နယ်ကို တက်ရောက်ဖို့ နီးစပ်သွားခဲ့တာပါ။ 

အီတလီအသင်းဟာ အုပ်စုပွဲစဉ် ၄ ပွဲကစားအပြီးမှာ ရမှတ် ၁၀ မှတ်နဲ့ ထိပ်ဆုံးနေရာ ဦးဆောင်နေပြီး ပြင်သစ် အသင်းက ၉ မှတ်နဲ့ ဒုတိယ၊ ဘယ်လ်ဂျီယံအသင်းက ၄ မှတ်နဲ့ တတိယ၊ အစ္စရေးအသင်းက ရမှတ်မရရှိသေးတာ ဖြစ်ပါတယ်။ 

အဲဒါကြောင့် အီတလီအသင်းဟာ လက်ကျန် နေးရှင်းလိဂ်အုပ်စု ၂ ပွဲမှာ ၁ မှတ်ရယူနိုင်တာနဲ့ ကွာတားဖိုင်နယ် တက်ရောက်ဖို့ သေချာသွားမှာပါ။

အီတလီအသင်းဟာ နေးရှင်းလိဂ်အုပ်စု နောက်ဆုံးပွဲစဉ်တွေအဖြစ် နိုဝင်ဘာထဲမှာ ဘယ်လ်ဂျီယံ၊ ပြင်သစ် အသင်းတို့နဲ့ ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ အောက်တိုဘာ ၁၅

ပေါ်တူဂီအသင်းနည်းပြ မာတီနက်ဇ်က အသင်းခေါင်းဆောင် ရော်နယ်ဒိုကို စကော့တလန် အသင်းနဲ့ကစားမယ့် နေးရှင်းလိဂ်ပွဲစဉ်မှာ အနားမပေးဘဲ အသုံးပြုမယ်လို့ ပြောခဲ့ပါတယ်။ 

မာတီနက်ဇ်က “ရော်နယ်ဒိုဟာ အသက် ၃၉ နှစ်အရွယ် ကစားသမားတစ်ဦးလို အလုပ်မလုပ်သလို ဒီအသက် အရွယ်လို ပုံစံမျိုးနဲ့လည်း မကစားပါဘူး။ ရော်နယ်ဒိုဟာ ဒီစခန်းမှာ ကောင်းမွန်စွာ လုပ်ဆောင်နေပါတယ်။ ရော်နယ်ဒိုဟာ ပြီးခဲ့တဲ့ပွဲမှာ မိနစ် ၆၀ ကစားပြီးနောက် ဒုတိယမြောက်ပွဲမှာ ပါဝင်နိုင်တယ်ဆိုတဲ့အပေါ် ကျနော် သံသယမရှိပါဘူး။ သူစပြီးပါဝင်မလား ဒါမှမဟုတ် ပွဲအဆုံးထိ ပါဝင်မလားဆိုတာတော့ ကျနော်မသိပါဘူး။ ဒါပေမယ့် သူဒီပွဲမှာ သေချာပေါက်ပါဝင်မှာပါ”လို့ မီဒီယာသမားတွေနဲ့ တွေ့ဆုံချိန်ပြောခဲ့တာပါ။ 

အသက် ၃၉ နှစ်အရွယ်ရှိ ရော်နယ်ဒိုဟာ ပေါ်တူဂီအသင်းက ပိုလန်အသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ပွဲစဉ်မှာ ပွဲထွက် လူစာရင်းပါဝင်ခဲ့ပြီး ၁ ဂိုး သွင်းယူနိုင်ခဲ့ကာ မိနစ် ၆၀ မှာ လူစားလဲခံခဲ့ရတာ ဖြစ်ပါတယ်။ 

ဂလပ်စဂိုမှာကစားမယ့် စကော့တလန်အသင်းနဲ့ပွဲစဉ်မှာ ပေါ်တူဂီအသင်းဟာ ရော်နယ်ဒိုကို အနားပေးဖွယ် ရှိတယ်လို့ ယူဆခဲ့ပေမယ့် နည်းပြ မာတီနက်ဇ်ကတော့ ဒါကို ပယ်ချခဲ့တာပါ။

ရော်နယ်ဒိုကို တွေ့ရစဉ်

ရော်နယ်ဒိုဟာ ပေါ်တူဂီအသင်းအတွက် ကစားပြီးတဲ့ နေးရှင်းလိဂ် ၃ ပွဲစလုံး ဂိုးသွင်းယူနိုင်ခဲ့တာ ဖြစ်ပါတယ်။

ပေါ်တူဂီအသင်း ခေါင်းဆောင်ဟာ ပိုလန်အသင်းနဲ့ပွဲစဉ်မှာ သွင်းယူခဲ့တဲ့ဂိုးကြောင့် နိုင်ငံတကာသွင်းဂိုး ၁၃၃ ဂိုး အထိ ရှိလာပြီဖြစ်သလို သူ့ရဲ့ကစားသမားဘဝ တစ်လျှောက်သွင်းဂိုးက ၉၀၆ ဂိုးအထိ ရှိလာခဲ့တာပါ။ 

ပေါ်တူဂီအသင်းဟာ နေးရှင်းလိဂ်အုပ်စုပွဲစဉ် ၃ ပွဲစလုံး အနိုင်ရရှိထားပြီး စကော့တလန်အသင်းနဲ့ပွဲစဉ်မှာ နိုင်ပွဲ ရယူနိုင်ရင် ကွာတားဖိုင်နယ် တက်ရောက်နိုင်ဖို့ နီးစပ်သွားမှာဖြစ်ပါတယ်။

စကော့တလန်အသင်းကတော့ ၃ ပွဲစလုံး ရှုံးပွဲကြုံတွေ့ထားတာပါ။

ပေါ်တူဂီအသင်းဟာ နိုဝင်ဘာထဲမှာ နေးရှင်းလိဂ်အုပ်စု နောက်ဆုံးပွဲစဉ်တွေအဖြစ် ပိုလန်၊ ခရိုအေးရှားအသင်းတို့နဲ့ ယှဉ်ပြိုင်ရမှာ ဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ အောက်တိုဘာ ၁၄

စပိန်လူမျိုးနည်းပြ ဂွာဒီယိုလာက ဒီရာသီအကုန်မှာ မန်စီးတီးအသင်းနဲ့ စာချုပ်ကုန်ဆုံးမှာဖြစ်ပေမယ့် အနာဂတ် အတွက် ဆုံးဖြတ်ချက်ချရခြင်း မရှိသေးဘူးလို့ ပြောခဲ့ပါတယ်။

ဂွာဒီယိုလာက “ဒီရာသီက မန်စီးတီးနဲ့ နောက်ဆုံးရာသီဆိုတာ မမှန်ပါဘူး။ ဒါနဲ့ ပတ်သက်ပြီး ကျနော်စဉ်းစားမှုတွေ ပြုလုပ်ရမှာပါ”လို့ Che Tempo Che Fa Show မှာ ပြောခဲ့တာပါ။ 

မန်စီးတီးအသင်းနဲ့ ဂွာဒီယိုလာတို့ဟာ စာချုပ်သစ်အတွက် သဘောတူညီမှု မရရှိသေးသလို ဒီရာသီကုန်ဆုံးရင် ဘောလုံးဒါရိုက်တာ ဘီဂီရီစတိန်းဟာ အသင်းကနေ ထွက်ခွာမှာဖြစ်ပါတယ်။

ဂွာဒီယိုလာနဲ့ အလွန်ရင်းနှီးတဲ့ ဘီဂီရီစတိန်းဟာ မန်စီးတီးအသင်းရဲ့ အောင်မြင်မှုတွေမှာ အနောက်ကွယ်ကနေ အဓိကကျတဲ့သူဖြစ်တာပါ။ 

ဂွာဒီယိုလာကို တွေ့ရစဉ်

အဲဒါကြောင့် ဘီဂီရီစတိန်းနဲ့အတူ ဂွာဒီယိုလာပါ မန်စီးတီးအသင်းကနေ ထွက်ခွာနိုင်တယ်လို့ သတင်းတွေ ထွက်ခဲ့ ပေမယ့် ဂွာဒီယိုလာကတော့ အနာဂတ်ကို မဆုံးဖြတ်ရသေးဘူးလို့ ပြောခဲ့ပါတယ်။ 

ဒါအပြင် အင်္ဂလန်အသင်း နည်းပြရာထူးအတွက်လည်း မေးမြန်းခြင်းခံခဲ့ရပြီး ဂွာဒီယိုလာကတော့ လက်ရှိထွက်ပေါ် နေတဲ့ သတင်းတွေက မှန်ကန်မှုမရှိဘဲ သူဆုံးဖြတ်ချက်ချပြီးရင် ပြောမယ်လို့ ဖြေခဲ့ပါတယ်။

ဂွာဒီယိုလာဟာ အင်္ဂလန်အသင်း နည်းပြသစ် ဖြစ်လာနိုင်တဲ့ စာရင်းထဲမှာ ပါဝင်နေပြီး အင်္ဂလန်ဘောလုံး အဖွဲ့ချုပ်(FA)ရဲ့ အဓိကပစ်မှတ်လည်း ဖြစ်တာပါ။ 

အင်္ဂလန်အသင်းကို ယာယီနည်းပြအဖြစ် ကိုင်တွယ်နေတဲ့ လီကာစလေက ဆုဖလားတွေ ရယူနိုင်တဲ့ ကမ္ဘာ့အဆင့် နည်းပြဟာ ဒီနည်းပြရာထူးနဲ့ ထိုက်တန်တယ်လို့ ပြောခဲ့ပါတယ်။ 

ဂွာဒီယိုလာကတော့ လက်ရှိအချိန်မှာ မန်စီးတီးအသင်းနဲ့ အောင်မြင်မှုတွေရယူဖို့သာ အာရုံစိုက်နေပြီး မန်စီးတီး အသင်းဟာ ဒီအပတ်ထဲမှာ ပရီးမီးယားလိဂ် ပွဲစဉ်အဖြစ် ဝုလ်ဗ်စ်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Metro

CNI Sport News

၂၀၂၄ ခုနှစ်၊ အောက်တိုဘာ ၁၄

စပိန်အသင်းကြယ်ပွင့် ယာမဲလ်ဟာ နောက်ထပ် ဒဏ်ရာရမယ့် အခြေအနေကနေ ရှောင်ရှားနိုင်ဖို့အတွက် ဆားဘီးယားအသင်းနဲ့ နေးရှင်းလိဂ်ပွဲစဉ်ကို လွဲချော်မှာဖြစ်ပါတယ်။ 

ယာမဲလ်ဟာ စပိန်အသင်းက ဒိန်းမတ်အသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ပွဲစဉ်မှာ ကြွက်သားဒဏ်ရာ ခံစားခဲ့ရ တာပါ။

အဲဒါကြောင့် ယာမဲလ်ဟာ MRI စကန်ရိုက်ခဲ့ပြီးနောက် စပိန်အသင်း လူစာရင်းကနေ နုတ်ထွက်ကာ ဘာစီလိုနာ အသင်းထံ ပြန်သွားမှာဖြစ်ပါတယ်။

စပိန်ဘောလုံးအဖွဲ့ချုပ်က ကစားသမားရဲ့ ကျန်းမာရေးကို ဦးစားပေးပြီး နောက်ထပ် ဒဏ်ရာရမယ့် အခြေအနေ ကနေ ရှောင်နိုင်ဖို့အတွက် ယာမဲလ်ကို လူစာရင်းကနေ ထွက်ခွာခွင့် ပေးခဲ့တယ်လို့ ကြေညာချက် ထုတ်ပြန်ထား တာပါ။ 

ယာမဲလ်ဟာ ဒိန်းမတ်အသင်းနဲ့ပွဲစဉ်မှာ ကြမ်းတမ်းတဲ့ ဖျက်ထုတ်မှု အများအပြားကို ခံခဲ့ရတာကြောင့် စပိန် အသင်းနည်းပြ ဒယ်လာဖွန်တေက ကွင်းလယ်ဒိုင်လူကြီးအနေနဲ့ ဒီလိုမျိုး အရည်အချင်းရှိတဲ့ ကစားသမားတွေကို ကာကွယ်ရမယ်လို့ ပွဲအပြီးမှာ ပြောခဲ့ပါတယ်။ 

ယာမဲလ်ကို တွေ့ရစဉ်

ယာမဲလ်ဟာ စပိန်အသင်းကို ယူရို ၂၀၂၄ ချန်ပီယံဆု ရယူနိုင်အောင် စွမ်းဆောင်ပေးနိုင်ခဲ့တဲ့သူဖြစ်သလို ဘာစီလိုနာအသင်းမှာလည်း အကောင်းဆုံး ခြေစွမ်းတွေကို ပြသနေတာပါ။ 

စပိန်အသင်းဟာ လူစာရင်းကနေ နုတ်ထွက်ခဲ့တဲ့ ယာမဲလ်ရဲ့နေရာမှာ အသလက်တီကိုအသင်းက ရီကွယ်လ်မီကို အစားထိုး ခေါ်ယူခဲ့ပါတယ်။

စပိန်အသင်းဟာ နေးရှင်းလိဂ် အုပ်စုပွဲစဉ် ၃ ပွဲကစားအပြီးမှာ ၂ ပွဲနိုင် ၁ ပွဲသရေ ရမှတ် ၇ မှတ်နဲ့ အုပ်စုတွင်းကို ဦးဆောင်နေတာဖြစ်ပြီး ဒိန်းမတ်အသင်းက ရမှတ် ၆ မှတ်နဲ့ ဒုတိယနေရာမှာ ရပ်တည်နေတာပါ။

စပိန်အသင်းဟာ အောက်တိုဘာ ၁၆ ရက်မှာ ဆားဘီးယားအသင်းနဲ့ အိမ်ကွင်းပွဲစဉ် ယှဉ်ပြိုင်ရမှာဖြစ်ပါတယ်။

Source: BBC

CNI Sport News

 ၂၀၂၄ ခုနှစ်၊ အောက်တိုဘာ ၁၄

အင်္ဂလန်အသင်းကို ယာယီနည်းပြအဖြစ် ကိုင်တွယ်နေတဲ့ လီကာစလေက အင်္ဂလန်အသင်းရဲ့ အမြဲတမ်းနည်းပြ ရာထူးအတွက် ဆုဖလားတွေရယူထားတဲ့ ကမ္ဘာ့အဆင့်နည်းပြတစ်ဦးခန့်အပ်ဖို့ FA ကို တိုက်တွန်းခဲ့ပါတယ်။ 

လီကာစလေက “အင်္ဂလန်အသင်း နည်းပြရာထူးဟာ ဆုဖလားတွေ  ရယူပြီးသားဖြစ်တဲ့ ကမ္ဘာ့အဆင့်နည်းပြ တစ်ဦးနဲ့ ထိုက်တန်ပါတယ်။ ကျနော်ကလည်း ဒါကိုလုပ်ဆောင်ဖို့ လမ်းကြောင်းပေါ်မှာ ရှိနေပါသေးတယ်။ ကျနော် ဟာ အင်္ဂလန်အသင်းကို ၆ ပွဲကိုင်တွယ်ဖို့ခန့်အပ်ခံထားရပြီး ဒီအတွက်လည်း ကျနော်ပျော်ရွှင်ပါတယ်”လို့ ပြောခဲ့ တာပါ။ 

အင်္ဂလန်အသင်းဟာ ပြီးခဲ့တဲ့ ဂရိအသင်းကို ၂ ဂိုး-၁ ဂိုးနဲ့ အရေးနိမ့်ခဲ့တဲ့ပွဲအပြီးမှာ လီကာစလေက သူဟာ အင်္ဂလန် ယူ-၂၁ အသင်းကို ပြန်လည်ကိုင်တွယ်နိုင်ဖို့ မျှော်လင့်တယ်လို့ ပြောခဲ့တာဖြစ်ပါတယ်။ 

အင်္ဂလန်ဘောလုံးအဖွဲ့ချုပ်(FA)ဟာ ပြီးခဲ့တဲ့ ယူရို ၂၀၂၄ ပြိုင်ပွဲအပြီးမှာ နည်းပြရာထူးကနေ နုတ်ထွက်ခဲ့တဲ့ ဆောက်ဂိတ်ရဲ့နေရာမှာ အစားထိုးဖို့အတွက် နည်းပြသစ်ရှာဖွေနေချိန်မှာ အင်္ဂလန် ယူ-၂၁ အသင်းနည်းပြ လီကာစလေကို ယာယီနည်းပြအဖြစ် ခန့်အပ်တာဝန်ပေးခဲ့တာပါ။ 

နည်းပြ လီကာစလေကို တွေ့ရစဉ်

အင်္ဂလန်အသင်းဟာ ယာယီနည်းပြ လီကာစလေ လက်ထက်ကစားခဲ့တဲ့ နေးရှင်းလိဂ်အဖွင့်ပွဲစဉ် ၂ ပွဲစလုံး အနိုင်ရ ခဲ့ပေမယ့် ဂရိအသင်းနဲ့ပွဲစဉ်မှာ ရှုံးပွဲကြုံတွေ့ခဲ့ရတာ ဖြစ်ပါတယ်။

ဒါပေမယ့် အင်္ဂလန်အသင်းဟာ ဖင်လန်အသင်းနဲ့ ကစားခဲ့တဲ့ပွဲစဉ်မှာ ၃ ဂိုး-၁ ဂိုးနဲ့ နိုင်ပွဲပြန်လည်ရယူနိုင်ခဲ့တာပါ။ 

ဒီပွဲအပြီးမှာ လီကာစလေဟာ အင်္ဂလန်အသင်း နည်းပြရာထူးအတွက် ကမ္ဘာ့အဆင့် နည်းပြတစ်ဦး ခန့်အပ်ဖို့ တိုက်တွန်းမှုပြုလုပ်ခဲ့တာ ဖြစ်ပါတယ်။

လီကာစလေဟာ ဒီလိုပြောခဲ့ပေမယ့် သူကလည်း အင်္ဂလန်အသင်းရဲ့ အမြဲတမ်းနည်းပြရာထူးကို မျှော်လင့်နေ တာပါ။ 

အင်္ဂလန်အသင်းဟာ နေးရှင်းလိဂ်ပွဲစဉ် ၄ ပွဲကစားအပြီးမှာ ၃ ပွဲနိုင် ၁ ပွဲရှုံး ရမှတ် ၉ မှတ်နဲ့ အုပ်စုတွင်း ဒုတိယ နေရာ ရပ်တည်နေပြီး ထိပ်ဆုံးနေရာမှာ ရပ်တည်နေတဲ့ ဂရိအသင်းက ရာနှုန်းပြည့်နိုင်ပွဲ ရရှိထားပါတယ်။ 

အင်္ဂလန်အသင်းဟာ လာမယ့် နေးရှင်းလိဂ် ပွဲစဉ်တွေအဖြစ် နိုဝင်ဘာထဲမှာ ဂရိ၊ အိုင်ယာလန်အသင်းတို့နဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ အောက်တိုဘာ ၁၂

လီဗာပူးလ်အသင်း တိုက်စစ်မှူးဟောင်း အန်ဒီကာရိုးလ်ဟာ ပြင်သစ်ဘောလုံးရဲ့ စတုတ္ထတန်းအထိ ဆင်းခဲ့ရတဲ့ ဘော်ဒိုးအသင်းထံ ပြောင်းရွှေ့ခဲ့တဲ့ ဆုံးဖြတ်ချက်ကို ရှင်းပြခဲ့ပါတယ်။ 

အန်ဒီကာရိုးလ်က “ကျနော် ဒါကိုလုပ်ခွင့်ရခဲ့ပါတယ်။ လီဂူး-၁ ကို ပြန်သွားချင်တဲ့ ပရောဂျက်ရဲ့ စိတ်ကူးကို နှစ်သက်ပြီး ဒါက ကျနော်လုပ်ချင်ခဲ့တဲ့ အရာတစ်ခုပါ။ ဘော်ဒိုးအသင်းဟာ ပရိသတ် အခိုင်အမာရှိတဲ့ အလွန် ကြီးမားတဲ့အသင်းပါ။ ကျနော်ဟာ ဒီအသင်းရဲ့ အစိတ်အပိုင်း ဖြစ်ချင်ပါတယ်”လို့ Foot Mercato ကို ပြောခဲ့ တာပါ။ 

အသက် ၃၅ နှစ်အရွယ်ရှိ အန်ဒီကာရိုးလ်ဟာ Championnat National ၂ ကလပ် ဘော်ဒိုးအသင်းထံ ပြီးခဲ့တဲ့လက ပြောင်းရွှေ့ခဲ့တာ ဖြစ်ပါတယ်။

အန်ဒီကာရိုးလ်ဟာ ဘော်ဒိုးအသင်းထံ ပြောင်းရွှေ့ဖို့အတွက် ပြင်သစ်လီဂူး-၂ ကလပ် အေမီယန်စ်အသင်းကနေ ထွက်ခွာခဲ့တာပါ။ 

ဘော်ဒိုးအသင်းဟာ ပြင်သစ်လီဂူး-၁ ချန်ပီယံဆုကို ၆ ကြိမ် ရရှိထားပြီး အအောင်မြင်ဆုံး ပြင်သစ်ကလပ်တွေထဲက တစ်သင်းလည်း ဖြစ်ပါတယ်။ 

အန်ဒီကာရိုးလ်ကိုတွေ့ရစဉ်

ဒါပေမယ့် ဘော်ဒိုးအသင်းဟာ ဘဏ္ဍာရေး အခြေအနေကြောင့် ဒေဝါလီခံခဲ့ရပြီး ပရော်ဖက်ရှင်နယ် အဆင့်အတန်း ကို စွန့်လွှတ်ကာ လီဂူး-၂ ကနေ Championnat National ၂ အထိ တန်းဆင်းခဲ့ရတာပါ။

ဘော်ဒိုးအသင်းထံ ပြောင်းရွှေ့ခဲ့တဲ့ အန်ဒီကာရိုးလ်ရဲ့ အပြောင်းအရွှေ့ဟာ အံ့အားသင့်စရာ ဖြစ်ခဲ့ပေမယ့် သူကတော့ အသင်းကို အရင်လို အောင်မြင်မှုတွေ ပြန်လည်ရရှိအောင် ကူညီပေးဖို့ စိတ်ဆန္ဒရှိနေပါတယ်။

အန်ဒီကာရိုးလ်ဟာ ဒီရာသီမှာ ဘော်ဒိုးအသင်းအတွက် ၂ ပွဲ ပါဝင် ကစားအပြီးမှာ ၄ ဂိုးသွင်း ယူထားတာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ အောက်တိုဘာ ၁၂

ဗီလာနဲ့ ဂိုးမရှိသရေကျခဲ့တဲ့ ပရီးမီးယားလိဂ်ပွဲစဉ်မှာ ယူနိုက်တက်အသင်းရဲ့ စကားပြောဆိုမှုတွေ အသံဖမ်းခံခဲ့ရပြီး လုံခြုံရေးချိုးဖောက်မှု ဖြစ်ခဲ့တယ်လို့ ဗြိတိန်မီဒီယာတွေက ဖော်ပြထားပါတယ်။ 

ဒီပွဲဟာ ယူနိုက်တက်အသင်းနည်းပြ အဲရစ်တန်ဟတ်အတွက် သူ့ရဲ့ရာထူးတည်မြဲဖို့ အရေးပါတဲ့ပွဲဖြစ်ခဲ့ပြီး နှစ်သင်းစလုံးဟာ ရမှတ်တစ်မှတ်စီ ခွဲယူခဲ့ရတာပါ။

The Sun က ဘောလုံးနောက်ပြောင်သူတစ်ဦးဟာ ယူနိုက်တက်အသင်းရဲ့ ပြောဆိုမှုတွေကို အသံဖမ်းဖို့ ဒီပွဲမတိုင်ခင် ၂ ရက်အလိုမှာ ဗီလာပါ့ခ်ရှိ အဝတ်လဲခန်းထဲကို ဝင်ရောက်ခဲ့တယ်လို့ ဖော်ပြထားတာဖြစ်ပါတယ်။ 

ဗီလာနဲ့ ယူနိုက်တက်အသင်း ပွဲအပြီး နောက်တစ်ရက်အကြာမှာ ယူနိုက်တက်အသင်း ပရိသတ်ဖြစ်တဲ့ နောက်ပြောင်တဲ့သူဟာ လျှို့ဝှက်မှတ်တမ်းတင်ခဲ့တဲ့ အသံဖမ်းစက်ကို လာရောက်ယူခဲ့တယ်လို့ သိရပါတယ်။ 

ယူနိုက်တက်အသင်းသားနဲ့ အဲရစ်တန်ဟတ်ကိုတွေ့ရစဉ်

အက်စတွန်ဗီလာအသင်းကတော့ ဒီဖြစ်ရပ်တွေအတွက် စုံစမ်းစစ်ဆေးမှု ပြုလုပ်နေတာပါ။ 

ယူနိုက်တက်အသင်းဟာ ဒီရာသီ ပရီးမီးယားလိဂ်ပွဲစဉ် ၇ ပွဲ ကစားအပြီးမှာ ရမှတ် ၈ မှတ်သာ ရယူထားနိုင်ခဲ့ပြီး ဆိုးရွားတဲ့ ရာသီစတင်မှုနဲ့ ကြုံတွေ့နေရတာဖြစ်ပါတယ်။ 

ဒတ်ချ်လူမျိုးနည်းပြ အဲရစ်တန်ဟတ်ဟာ ယူနိုက်တက်အသင်းရဲ့ ရလဒ်တွေကြောင့် ဖိအားဒဏ်တွေကို ခံစားနေခဲ့ရတာပါ။ 

ယူနိုက်တက်အသင်း အကြီးအကဲတွေဟာ ပြီးခဲ့တဲ့ရက်ပိုင်းက အဲရစ်တန်ဟတ်ရဲ့ အနာဂတ် အပါအဝင် အခြား အကြောင်းအရာတွေအတွက် ၆ နာရီကြာ တွေ့ဆုံမှုပြုလုပ်ခဲ့ပါတယ်။

ဒါပေမယ့် သူတို့တွေဟာ အဲရစ်တန်ဟတ်ရဲ့ အနာဂတ်ကို ဆုံးဖြတ်ချက် ချခဲ့ခြင်းမရှိဘူးလို့ ဗြိတိန်မီဒီယာတွေက ဖော်ပြထားတာပါ။ 

အဲဒါကြောင့် အဲရစ်တန်ဟတ်ဟာ လာမယ့် ဘရန်ဖို့ဒ်အသင်းနဲ့ ပရီးမီးယားလိဂ်ပွဲစဉ်မှာ ယူနိုက်တက်အသင်းကို ဆက်ပြီး ကိုင်တွယ်ရဖို့ရှိနေတာ ဖြစ်ပါတယ်။ 

Source: Dailymail

CNI Sport News

၂၀၂၄ ခုနှစ်၊ အောက်တိုဘာ ၁၂

ဘိုင်ယန်မြူးနစ်အသင်း နည်းပြဟောင်း တူချယ်လ်ဟာ အင်္ဂလန်အသင်း နည်းပြရာထူးအတွက် ဆွေးနွေးညှိနှိုင်းမှု တွေ ပြုလုပ်နေတယ်လို့ သတင်းထွက်ပေါ်လာခဲ့ပါတယ်။ 

တူချယ်လ်ဟာ ပြီးခဲ့တဲ့ရာသီအကုန်က ဘိုင်ယန်မြူးနစ်အသင်းကနေ ထွက်ခွာပြီးကတည်းက ဘယ်အသင်းကိုမှ ကိုင်တွယ်ရခြင်း မရှိသေးတာပါ။ 

ဂျာမန်လူမျိုးနည်းပြဟာ ဒတ်ချ်လူမျိုးနည်းပြ အဲရစ်တန်ဟတ်ရဲ့နေရာကို အစားထိုး ဝင်ရောက်ပြီး ယူနိုက်တက် အသင်းကို ကိုင်တွယ်နိုင်တယ်လို့ သတင်းထွက်ခဲ့ပေမယ့် Bild က သူဟာ အင်္ဂလန်အသင်း နည်းပြရာထူးအတွက် ဆွေးနွေးနေတယ်လို့ ဖော်ပြထားပါတယ်။

အင်္ဂလန်အသင်းကို လက်ရှိအချိန်မှာ လီကာစလေက ယာယီနည်းပြအဖြစ် ကိုင်တွယ်နေတာဖြစ်ပါတယ်။ 

အင်္ဂလန်အသင်းဟာ ပြီးခဲ့တဲ့ပွဲစဉ်မှာ ဂရိအသင်းကို ၂ ဂိုး-၁ ဂိုးနဲ့ အရေးနိမ့်ပြီးနောက် အမြဲတမ်းနည်းပြတစ်ဦးကို ခန့်အပ်ဖို့ တောင်းဆိုမှုတွေ ပိုပြီးများလာခဲ့တာပါ။ 

အင်္ဂလန်အသင်းသားတွေကို တွေ့ရစဉ်

လီကာစလေကလည်း နေးရှင်းလိဂ် ပွဲတွေအပြီးမှာ အင်္ဂလန် ယူ-၂၁ အသင်းကို ပြန်လည်ကိုင်တွယ်ဖို့ မျှော်လင့် တယ်လို့ ပြောထားခဲ့ပါတယ်။ 

အင်္ဂလန်အသင်း နည်းပြရာထူးအတွက် ဆွေးနွေးနေတဲ့ တူချယ်လ်ဟာ နိုင်ငံအသင်းတစ်သင်းကို ကိုင်တွယ် ချင်ကြောင်း အရင်က ပြောထားခဲ့ဖူးတာပါ။ 

တူချယ်လ်ဟာ ပရီးမီးယားလိဂ်ကလပ် ချယ်လ်ဆီးအသင်းကို ကိုင်တွယ်ခဲ့ဖူးတာကြောင့် အင်္ဂလန်ပရိသတ်အချို့နဲ့ ရင်းနှီးမှုရှိတာ ဖြစ်ပါတယ်။ 

အင်္ဂလန်ဘောလုံးအဖွဲ့ချုပ်(FA)ဟာ အမြဲတမ်း နည်းပြရာထူးအတွက် စဉ်းစားမှုတွေ ပြုလုပ်နေတာကြောင့် နေးရှင်းလိဂ်ပွဲတွေကို ကိုင်တွယ်ဖို့အတွက် လီကာစလေကို ယာယီနည်းပြအဖြစ် တာဝန်ပေးထားတာပါ။ 

အင်္ဂလန်အသင်းဟာ နေးရှင်းလိဂ်ပွဲစဉ် ၃ ပွဲကစားဖို့ ကျန်ရှိနေသေးပါတယ်။

အင်္ဂလန်အသင်းဟာ လာမယ့် နေးရှင်းလိဂ်ပွဲစဉ်အဖြစ် အောက်တိုဘာ ၁၃ ရက်မှာ ဖင်လန်အသင်းနဲ့ အဝေးကွင်း ပွဲစဉ် ယှဉ်ပြိုင်ရမှာဖြစ်ပါတယ်။

Source: Dailymail

CNI Sport News

၂၀၂၄ ခုနှစ်၊ အောက်တိုဘာ ၁၂

နယ်သာလန်အသင်း နောက်ခံလူ ဗန်ဒိုက်ဟာ ဟန်ဂေရီအသင်းနဲ့ ၁ ဂိုးစီ သရေကျခဲ့တဲ့ နေးရှင်းလိဂ်ပွဲစဉ်မှာ နယ်သာလန် ကစားသမားဘဝ ပထမဆုံးအနီကတ်နဲ့ ထုတ်ပယ်ခံခဲ့ရတဲ့ ဆုံးဖြတ်ချက်အတွက် ဒေါသထွက်မိ တယ်လို့ ပြောခဲ့ပါတယ်။ 

ဗန်ဒိုက်က “အနီကတ်က စိတ်ပျက်စရာဖြစ်ပြီး မဖြစ်သင့်ပါဘူး။ ဒါဟာ ကျနော့်အတွက် ပထမဆုံးဖြစ်တာကြောင့် ဒေါသထွက်ပါတယ်။ အသင်းခေါင်းဆောင်ဆိုတာ ဒိုင်လူကြီးနဲ့ စကားပြောနိုင်တဲ့ တစ်ဦးတည်းသောသူဆိုပြီး သူတို့က ပြောကြပါတယ်။ ကျနော် ဒိုင်လူကြီးဆီသွားခဲ့ပြီး ဆိုးရွားတဲ့ပုံစံနဲ့တော့ မဟုတ်ပါဘူး။ အသင်း ခေါင်းဆောင်တောင် ဘာမှပြောလို့မရရင် ဒါတွေက ခက်ခဲမှာပါ”လို့ ပြောခဲ့တာပါ။ 

နယ်သာလန်အသင်းခေါင်းဆောင် ဗန်ဒိုက်ဟာ ဒီပွဲစဉ်ရဲ့ ၃ မိနစ်အတွင်း အဝါကတ် ၂ ကြိမ်ပြသခံခဲ့ရပြီး ထုတ်ပယ် ခံခဲ့ရတာ ဖြစ်ပါတယ်။

ပထမအဝါကတ်က ကွင်းလယ်ဒိုင်လူကြီးကို စောဒကတက်ခဲ့လို့ ပြသခံခဲ့ရတာဖြစ်ပြီး ဒုတိယအဝါကတ်က ပြစ်ဒဏ်ကျူးလွန်ခဲ့လို့ ပြသခံခဲ့ရတာပါ။ 

နယ်သာလန်အသင်း ယှဉ်ပြိုင်နေစဉ် 

ဗန်ဒိုက်ဟာ အနီကတ်ကြောင့် လာမယ့် ဂျာမနီအသင်းနဲ့ပွဲစဉ်မှာ နယ်သာလန်အသင်းအတွက် ပါဝင်နိုင်တော့မှာ မဟုတ်ပါဘူး။ 

နယ်သာလန်အသင်းဟာ ဒီပွဲမှာ ဟန်ဂေရီအသင်းကို ဦးဆောင်ဂိုး ခွင့်ပြုခဲ့ရပြီး ၁ ဦးလျော့နဲ့ ပွဲပြီးခါနီးမှသာ ချေပဂိုး ပြန်သွင်းယူနိုင်ခဲ့တာ ဖြစ်ပါတယ်။ 

နယ်သာလန်အသင်းနည်းပြ ရော်နယ်လ်ကိုးမန်းက အနီကတ်ကြောင့် စိတ်ပျက်မိပေမယ့် လူစာရင်းထဲ နောက်ထပ် ကစားသမားခေါ်ယူမှု ပြုလုပ်သွားမှာမဟုတ်ဘူးလို့ ပြောခဲ့တာပါ။

နယ်သာလန်အသင်းဟာ ဒီပွဲသရေကျခဲ့တာကြောင့် နေးရှင်းလိဂ်အုပ်စုပွဲစဉ် ၃ ပွဲကစားအပြီးမှာ ရမှတ် ၅ မှတ် ရရှိထားပါတယ်။ 

ဂျာမနီအသင်းကတော့ ဒီအုပ်စုတွင်းမှာ ၃ ပွဲကစားပြီး ရမှတ် ၇ မှတ်နဲ့ ထိပ်ဆုံးနေရာမှာ ရပ်တည်နေကာ အောက်တိုဘာ ၁၅ ရက်မှာ ဂျာမနီအသင်းနဲ့ နယ်သာလန်အသင်း ယှဉ်ပြိုင်ရမှာဖြစ်ပါတယ်။

Source: ESPN