CNI Sport News

၂၀၂၃ ခုနှစ်၊ ဒီဇင်ဘာ ၂၉

ဝက်စ်ဟမ်းအသင်းကို အရေးနိမ့်ခဲ့တဲ့ ပရီးမီးယားလိဂ်ပွဲစဉ်မှာ VAR အငြင်းပွားမှုတွေကြုံတွေ့ခဲ့ရပေမယ့် ဒါကို အပြစ်တင်လို့မရဘဲ အသင်းအနေနဲ့ ဂိုးတွေသွင်းပြီးအနိုင်ရဖို့ အခွင့်အရေးတွေအများကြီးရှိခဲ့တယ်လို့ နည်းပြ အာတီတာက ပြောလိုက်ပါတယ်။

အာတီတာက “ဒီလိုသွင်းဂိုးကို ခွင့်ပြုတာ မမြင်တွေ့ဖူးပေမယ့် သူတို့ကတော့ ဒါကို အတည်မပြုနိုင်ဘူးလို့ ပြောပါတယ်။ ကျနော်တို့မှာရှိတဲ့နည်းပညာနဲ့ ဘောလုံးက စည်းအပြင်မှာလား၊အထဲမှာလားဆိုတာ ရှင်းရှင်း လင်းလင်းမပြောနိုင်တာက ရှက်ဖို့ကောင်းပါတယ်။ ဒါက ပြီးသွားပါပြီ။ ကျနော်တို့လည်း ဘာမှလုပ်လို့မရပါဘူး။ VAR က ကျနော်တို့အတွက် မလုံလောက်ဘူးဆိုရင် ပွဲကိုအနိုင်ရအောင် ကျနော်တို့ လုပ်ဆောင်ရမှာပါ။ ဒီပွဲမှာ ကျနော်တို့လည်း အနိုင်ရဖို့ မလုံလောက်ခဲ့ပါဘူး” လို့ ပြောခဲ့တာပါ။

အာဆင်နယ်အသင်းဟာ အိမ်ကွင်းမှာ ကစားခဲ့တဲ့ပွဲစဉ်မှာ ဝက်စ်ဟမ်းအသင်းကို ၂ ဂိုး- ဂိုးမရှိနဲ့ အရေးနိမ့်ခဲ့တာ ဖြစ်ပါတယ်။ အာဆင်နယ်အသင်းဟာ ဒီရှုံးပွဲကြောင့် ခရစ္စမတ်နေ့က ဦးဆောင်ခဲ့တဲ့ ပရီးမီးယားလိဂ်အဆင့် ၁ နေရာကို လီဗာပူးလ်အသင်းထံ လွှဲပြောင်းပေးခဲ့ရတာပါ။ ဒီပွဲစဉ်ရဲ့ ပွဲချိန် ၁၃ မိနစ်မှာ ဝက်စ်ဟမ်းအသင်း ရယူသွား ခဲ့တဲ့ အဖွင့်ဂိုးကို ဖန်တီးပေးခဲ့တဲ့ ဘိုဝင်ဟာ ဘောလုံးကိုစည်းကျော်ပြီး ပေးပို့ခဲ့တာဖြစ်ပေမယ့် ဒီဂိုးကို ခွင့်ပြုခဲ့တာ ဖြစ်ပါတယ်။

အာဆင်နယ်အသင်းဟာ နယူးကာဆယ်အသင်းကို အရေးနိမ့်ခဲ့တုန်းကလည်း ဘောလုံးကိုစည်းကျော်ပြီး ပေးပို့ခဲ့ တာကနေ ပေးခဲ့ရတဲ့ ဂိုးကြောင့်ပဲ အရေးနိမ့်ခဲ့တာပါ။ အာဆင်နယ်အသင်းဟာ ဝက်စ်ဟမ်းအသင်းနဲ့ပွဲမှာ ဂိုးပေါက် ကန်သွင်းမှုအကြိမ် ၃၀ အထိရှိခဲ့ပြီး ဝက်စ်ဟမ်းအသင်းဂိုးဧရိယာထဲမှာ ၇၇ ကြိမ်အထိ စံချိန်တင် ဘောလုံးထိ ခဲ့ပေမယ့် ဂိုးမရယူနိုင်ခဲ့တာ ဖြစ်ပါတယ်။ Opta မှတ်တမ်းတွေအရ ဒါဟာ ပရီးမီးယားလိဂ်ပြိုင်ပွဲမှာ ဂိုးမသွင်း နိုင်တဲ့အသင်းတစ်သင်းအတွက် စံချိန်တင်ခဲ့တဲ့အရာဖြစ်ခဲ့တာပါ။

ဝက်စ်ဟမ်းအသင်းဟာ နောက်ဆုံးကစားခဲ့တဲ့ ပရီးမီးယားလိဂ် ၂ ပွဲမှာ ယူနိုက်တက်နဲ့ အာဆင်နယ်အသင်းတို့ကို အနိုင်ရပြီး ရလဒ်ကောင်းတွေ ဆက်တိုက်ရယူနေတာဖြစ်ပါတယ်။ ဝက်စ်ဟမ်းအသင်းဟာ ဒီပွဲအနိုင်ရခဲ့တာ ကြောင့် ပရီးမီးယားလိဂ် အဆင့် ၆ နေရာကို ပြန်လည်တက်လှမ်းနိုင်ခဲ့တာပါ။ အခုရာသီအကုန်မှာ ဝက်စ်ဟမ်း အသင်းနဲ့ စာချုပ်ကုန်ဆုံးတော့မယ့် နည်းပြ မိုယက်စ်က စာချုပ်သစ်အတွက် ဆွေးနွေးဖို့ အဆင်သင့်ဖြစ်နေပြီလို့ ပွဲအပြီးမှာ ပြောခဲ့ပါတယ်။

ပရီးမီးယားလိဂ်ပွဲစဉ် ၂၀ အဖြစ် အာဆင်နယ်အသင်းက ဖူလ်ဟမ်အသင်း၊ ဝက်စ်ဟမ်းအသင်းက ဘရိုက်တန် အသင်းနဲ့ ယှဉ်ပြိုင်ရမှာဖြစ်ပါတယ်။

Source:ESPN

CNI Sport News

၂၀၂၃ ခုနှစ်၊ ဒီဇင်ဘာ ၂၈

ထိပ်သီးအသင်းတွေမှာ ကစားခဲ့တဲ့ ကိုလံဘီယာကြယ်ပွင့် ဂျိမ်းစ်ရိုဒရီဂွက်ဇ်ဟာ ကာတာနိုင်ငံမှာ ဘောလုံးကစား ခဲ့တုန်းက ရုန်းကန်ခဲ့ရတဲ့ အရာတွေကို ဖွင့်ဟခဲ့ပါတယ်။

ဂျိမ်းစ်ရိုဒရီဂွက်ဇ်က “ကာတာနိုင်ငံရဲ့ လူနေမှုဘဝနဲ့ ယဉ်ကျေးမှုက အလွန်ခက်ခဲပါတယ်။ ဘောလုံးလောကမှာ အားလုံးက ရေချိုးခန်းထဲ ကိုယ်လုံးတီးချိုးကြပေမယ့် ဒီမှာတော့ ဒီလိုလုပ်လို့မရဘူးလို့ အသင်းဖော်တွေက ပြောခဲ့ ပါတယ်။ ကျနော်တောင် ကြောက်မိသွားခဲ့ပါတယ်။ ပြီးတော့ သူတို့တွေဟာ အစားစားရင် ဇွန်း၊ ခက်ရင်းတွေ အသုံးမပြုဘဲ လက်နဲ့ပဲ စားကြပါတယ်။ ဒါက ကျနော့်အတွက် ခက်ခဲပါတယ်။ ကျနော် မီးဖိုချောင်သုံးပစ္စည်း တောင်းရင် သူတို့က လက်နဲ့ပဲ စားဖို့ပြောကြပါတယ်။ ကျနော်ကတော့ ဒီလိုမျိုး မစားတက်ဘူးဆိုတဲ့အကြောင်း ပြောလိုက်ပါတယ်”လို့ ဘရာဇီးလ် TV နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့ပါတယ်။

ရီးရယ်လ်၊ ဘိုင်ယန်နဲ့ အဲဗာတန်အသင်း ကစားသမားဟောင်း ဂျိမ်းစ်ရိုဒရီဂွက်ဇ်ဟာ ကာတာလိဂ်ကလပ် အယ်လ်ရေယန်အသင်းမှာ တစ်ရာသီကြာသာ ကစားခဲ့တာ ဖြစ်ပါတယ်။

ဂျိမ်းစ်ရိုဒရီဂွက်ဇ်ဟာ အဲဗာတန်အသင်းကနေ ထွက်ခွာပြီး ၂၀၂၁ ခုနှစ်မှာ ကာတာလိဂ်ကို လာရောက် ကစားခဲ့ တာပါ။ 

ဂျိမ်းစ်ရိုဒရီဂွက်ဇ်ကို တွေ့ရစဉ် 

ဒါပေမယ့် ကိုလံဘီယာ ကစားသမားဟာ အယ်လ်ရေယန်အသင်းအတွက် ၁၆ ပွဲသာ ကစားအပြီးမှာ စာချုပ် ဖျက်သိမ်းကာ ဂရိကလပ် အိုလံပီယာကို့စ်အသင်းထံ ပြောင်းရွှေ့ခဲ့တာ ဖြစ်ပါတယ်။

အဲ့ဒါကြောင့် အသက် ၃၂ နှစ်အရွယ်ရှိ ကစားသမားဟာ ကာတာမှာ ကစားခဲ့တုန်းက သူရုန်းကန်ခဲ့ရတဲ့ အကြောင်းအရာတွေကို ဖွင့်ဟခဲ့တာပါ။

ဂျိမ်းစ်ရိုဒရီဂွက်ဇ်ဟာ ကာတာကလပ်ကနေ ထွက်ခွာချင်ခဲ့တာကြောင့် သူရရှိမယ့် တစ်နှစ်လုပ်ခလစာ ပေါင် ၆ သန်းကို စွန့်လွှတ်ခဲ့ရတယ်လို့ သတင်းမှာ ဖော်ပြထားပါတယ်။

ဂျိမ်းစ်ရိုဒရီဂွက်ဇ်ဟာ လက်ရှိအချိန်မှာတော့ ဘရာဇီးလ်ကလပ် ဆော်ပေါ်လိုအသင်းမှာ ကစားနေတာဖြစ်ပြီး ၁၄ ပွဲ ပါဝင်ကစားထားကာ ၁ ဂိုး သွင်းယူထားပါတယ်။ 

ဂျိမ်းစ်ရိုဒရီဂွက်ဇ်ဟာ ဆော်ပေါ်လိုအသင်းနဲ့ ၂ နှစ်စာချုပ်ချုပ်ဆိုထားတာ ဖြစ်ပါတယ်။

ဆော်ပေါ်လိုအသင်းဟာ ပြီးခဲ့တဲ့ရာသီ ဘရာဇီးလ်စီးရီးအေ ပြိုင်ပွဲမှာ အဆင့် ၁၁ နေရာ ရပ်တည်နိုင်ခဲ့ပြီး ကိုပါလီဘာတေးဒိုးစ်အုပ်စုအဆင့် ယှဉ်ပြိုင်ခွင့် ရရှိခဲ့တာ ဖြစ်ပါတယ်။ 

Source: The Sun

CNI Sport News

၂၀၂၃ ခုနှစ်၊ ဒီဇင်ဘာ ၂၈

ချယ်လ်ဆီးအသင်းနည်းပြ ပိုချက်တီနိုက ပဲလေ့စ်အသင်းကို အနိုင်ရတဲ့ ပရီးမီးယားလိဂ်ပွဲစဉ်အပြီးမှာ ကစားသမားတွေကို စိတ်ဓာတ်ပိုင်းပြောင်းလဲဖို့ တောင်းဆိုလိုက်ပါတယ်။

ပိုချက်တီနိုက “ပရီးမီးယားလိဂ်မှာ တိုက်ပွဲဝင်ဖို့လိုအပ်တယ်ဆိုတာ ကစားသမားတွေနားလည်ထားရပါမယ်။ ကျနော်ကတော့ ပွဲတွေအားလုံးကို အနိုင်ယူပြီး ထိပ်ဆုံးပိုင်းကို တက်ချင်ပါတယ်။ လက်တွေ့မှာတော့ ဒါက အနည်းငယ်ဝေးကွာနေတယ်လို့ ထင်ပါတယ်။ ကျနော်တို့ဆက်ပြီး တွန်းအားပေးရမှာဖြစ်သလို ယုံကြည်မှုလည်း ရှိရပါမယ်။ ဒါကြောင့် ကျနော်တို့ရဲ့ စိတ်ဓါတ်ကို ပြောင်းလဲဖို့လိုတယ်ဆိုတာ ကစားသမားတွေစတင်သိရှိဖို့ အရေးကြီးပါတယ်။ ဒီပွဲမှာ ပြသခဲ့တဲ့ပုံစံမျိုးကို ကျနော်တို့ဆက်ပြီးပြသရမယ်” လို့ ပြောခဲ့တာပါ။

ချယ်လ်ဆီးအသင်းဟာ ပဲလေ့စ်အသင်းနဲ့ ကစားခဲ့တဲ့ ပရီးမီးယားလိဂ်ပွဲစဉ်မှာ ၂ ဂိုး- ၁ ဂိုးနဲ့ အနိုင်ရရှိခဲ့တာ ဖြစ်ပါတယ်။ ဒီပွဲမှာ မူဒရစ်က ချယ်လ်ဆီးအတွက်ဦးဆောင်ဂိုးစတင်သွင်းယူခဲ့ပြီး အိုလီဆီက ပဲလေ့စ်အတွက် ချေပဂိုးသွင်းယူခဲ့တာကြောင့် ၁ ဂိုးစီသရေကျနေခဲ့ပေမယ့် လူစားဝင်လာတဲ့ မာဒူကီက ပွဲချိန် ၈၉ မိနစ်မှာ ပင်နယ်တီကနေ ချယ်လ်ဆီးအသင်းအတွက်အနိုင်ဂိုးသွင်းယူပေးခဲ့တာပါ။ အဲဒါကြောင့် ချယ်လ်ဆီးအသင်းဟာ နိုင်ပွဲရယူနိုင်ခဲ့ပြီး ရလဒ်ဆိုးတွေကို အဆုံးသတ်နိုင်ခဲ့တာဖြစ်ပါတယ်။

ချယ်လ်ဆီးအသင်းနည်းပြ ပိုချက်တီနိုက အနိုင်ဂိုးသွင်းယူပေးခဲ့တဲ့ မာဒူကီကို ချီးကျူးခဲ့ပြီး ကစားသမားတွေ အနေနဲ့ သူ့ကို အတုယူသင့်တယ်လို့ ပြောခဲ့တာပါ။

ပိုချက်တီနိုက “မာဒူကီဟာ ပင်နယ်တီကို ရယူပြီး သူကိုယ်တိုင်ကန်သွင်းခဲ့ပါတယ်။ မာဒူကီက အသင်းအတွက် ပွဲကစားခွင့်မရလို့ စိတ်ပျက်နေတာကို ပြသခဲ့တဲ့ တုန့်ပြန်မှုကို ကျနော်နှစ်သက်ပါတယ်။ မာဒူကီက သူ့ကို ယုံကြည်နိုင်တယ်ဆိုတာ ကျနော့်ကို ပြသဖို့ ဆုံးဖြတ်ခဲ့တယ်လို့ ”ပြောခဲ့ပါတယ်။

ချယ်လ်ဆီးအသင်းဟာ ပဲလေ့စ်အသင်းကို အနိုင်ရရှိခဲ့တာကြောင့် ပရီးမီးယားလိဂ်အမှတ်ပေးဇယားအဆင့် ၁၀ နေရာကို ပြန်တက်လှမ်းနိုင်ခဲ့တာပါ။ ချယ်လ်ဆီးအသင်းဟာ ပရီးမီးယားလိဂ်ပွဲစဉ် ၂၀ အဖြစ် ဒီဇင်ဘာ ၃၀ ရက်မှာ လူတန်အသင်းနဲ့ ယှဉ်ပြိုင်ရမှာဖြစ်ပါတယ်။

Source:Eurosport

CNI Sport News

၂၀၂၃ ခုနှစ်၊ ဒီဇင်ဘာ ၂၈

မန်စီးတီးအသင်းနည်းပြ ဂွာဒီယိုလာက ခြေထောက်ဒဏ်ရာရရှိနေတဲ့ တိုက်စစ်မှူး ဟာလန်းအနေနဲ့ ဇန်နဝါရီမှာ အသင်းအတွက် ပြန်လည်ပါဝင်ကစားပေးနိုင်ဖို့ မျှော်လင့်တယ်လို့ အဲဗာတန်အသင်းကို အနိုင်ရတဲ့ ပွဲအပြီးမှာ ပြောခဲ့ပါတယ်။

ဂွာဒီယိုလာက “ဟာလန်းက တစ်ဦးတည်းလေ့ကျင့်မှုပြုလုပ်နေတာပါ၊အသင်းနဲ့ လေ့ကျင့်မှုပြုလုပ်နေတာ မဟုတ်ပါဘူး။ ဟာလန်းရဲ့ နာကျင်မှုတွေက ဘယ်အချိန်မှ ပျောက်မလဲဆိုတာတော့ မေးခွန်းထုတ်စရာပါပဲ။ ကျနော်တို့ကတော့ ဇန်နဝါရီမှာ သူပြန်လာနိုင်မယ်လို့ မျှော်လင့်ပါတယ်။ ဆရာဝန်တွေအပေါ်မှာလည်း မူတည်ပါတယ်။ ဆရာဝန်တွေက မနက်တိုင်းလာပြီး ဒီကစားသမားကို အသုံးပြုလို့ ရပြီလို့ ပြောပေမယ့် ဒါကမဟုတ်ပါဘူး” လို့ ပြောခဲ့တာပါ။

အသက် ၂၃ နှစ်အရွယ်ရှိ ဟာလန်းဟာ မန်စီးတီးအသင်းက အဲဗာတန်အသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာမပါဝင်နိုင်ခဲ့ပြီးနောက် အသင်းနောက်ဆုံးကစားထားတဲ့ ၆ ပွဲစလုံးကို လွဲချော်ခဲ့တာ ဖြစ်ပါတယ်။ မန်စီးတီးအသင်းဟာ ဒီပွဲမှာ အဲဗာတန်အသင်းကို ဦးဆောင်ဂိုးပေးခဲ့ရပေမယ့် ဖိုဒန်၊ အယ်လ်ဗားရက်ဇ်နဲ့ ဘာနာဒိုဆေးလ်ဗားတို့က ချေပဂိုးနဲ့ အနိုင်ဂိုးတွေသွင်းယူပေးခဲ့တာကြောင့် ပရီးမီးယားလိဂ်မှာ နိုင်ပွဲပြန်လည်ရယူနိုင်ခဲ့တာပါ။

တံကောက်ကြောဒဏ်ရာကြောင့် အနားယူနေခဲ့ရတဲ့ ကွင်းလယ်လူ ဒီဘရိုင်းကတော့ မန်စီးတီးအသင်းအတွက် ပါဝင်ကစားပေးနိုင်ဖို့ နီးစပ်နေပြီး ဟတ်ဒါဖီးလ်စ်အသင်းနဲ့ FA ဖလားပွဲစဉ်မှာ ပြန်လည်ပါဝင်နိုင်ဖွယ်ရှိတယ်လို့ နည်းပြ ဂွာဒီယိုလာက ပြောခဲ့ပါတယ်။ အဲဗာတန်အသင်းကို အနိုင်ရခဲ့တဲ့ပွဲစဉ်မှာ မန်စီးတီးအသင်းနောက်ခံလူ ဂျွန်စတုန်းစ်ဟာ ခြေကျင်းဝတ်ဒဏ်ရာရရှိသွားခဲ့တာကြောင့် ပထမပိုင်းမှာလူစားလဲမှုပြုလုပ်ခဲ့ရတာပါ။ မန်စီးတီး အသင်းနည်းပြ ဂွာဒီယိုလာကတော့ ဂျွန်စတုန်းစ်ရဲ့ ဒဏ်ရာအခြေအနေကို အကဲဖြတ်ဖို့ စောလွန်းသေးတယ်လို့ မှတ်ချက်ပေးခဲ့ပါတယ်။

မန်စီးတီးအသင်းဟာ အဲဗာတန်အသင်းကို အနိုင်ရခဲ့ပြီးနောက် အဆင့် ၁ နေရာက လီဗာပူးလ်အသင်းနဲ့ ၅ မှတ် အကွာ အဆင့် ၄ နေရာမှာရပ်တည်နေပြီး ပရီးမီးယားလိဂ်ပွဲစဉ် ၁ ပွဲကစားဖို့ ကျန်ရှိနေသေးတာပါ။ မန်စီးတီး အသင်းဟာ ဒီဇင်ဘာ ၃၀ ရက်မှာ ပရီးမီးယားလိဂ်ပွဲစဉ် ၂၀ အဖြစ် ရှက်ဖီးယူနိုက်တက်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source:ESPN

CNI Sport News

၂၀၂၃ ခုနှစ်၊ ဒီဇင်ဘာ ၂၇

နယူးကာဆယ်အသင်း ဂန္ထဝင် အလန်ရှီးယားက နယူးကာဆယ်အသင်းအနေနဲ့ ယူနိုက်တက်အသင်း ဂိုးသမား ဟောင်း ဒီဂီယာကို ခေါ်ယူဖို့ တိုက်တွန်းသွားခဲ့ပါတယ်။

အလန်ရှီးယားက “နယူးကာဆယ်က ဂိုးသမား လိုအပ်နေပြီး ဒီဂီယာကလည်း အသင်းမရှိဘူး ဖြစ်နေပါတယ်။ ဒီဂီယာရဲ့ လုပ်ခလစာက မြင့်မားတယ်ဆိုတာ ကျနော်သိပေမယ့် နယူးကာဆယ်အသင်းအနေနဲ့ သူ့ကို ခေါ်ယူမယ် ဆိုရင် ပြောင်းရွှေ့ကြေး ပေးစရာမလိုဘူး”လို့ BBC Radio 5 Live ကို ပြောပါတယ်။

နယူးကာဆယ်အသင်းဟာ အဓိက ဂိုးသမား နစ်ပုပ်ကို ပခုံးဒဏ်ရာကြောင့် ၄ လကြာ အနားပေးရမှာဖြစ်တဲ့ အတွက် ဂိုးသမားသစ်တစ်ဦး အားဖြည့်ဖို့ ပြင်ဆင်နေတာ ဖြစ်ပါတယ်။ 

ဒီနောက်မှာတော့ နယူးကာဆယ်အသင်းဟာ ဒူဘရာကာကို ပွဲထွက်ဂိုးသမားအဖြစ် အသုံးပြုနေပေမယ့် အသင်း ရလဒ်တွေဟာ ဆိုးရွားနေပါတယ်။

နယူးကာဆယ်အသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲစဉ်မှာ နော်တင်ဟမ်ဖောရက်စ်အသင်းကို အိမ်ကွင်းမှာ ၃ ဂိုး-၁ ဂိုးနဲ့ အရေးနိမ့်ခဲ့တာ ဖြစ်ပါတယ်။

ဒီဂီယာကို တွေ့ရစဉ်

နစ်ပုပ် မပါဝင်တဲ့နောက်ပိုင်း နယူးကာဆယ်အသင်း ကစားခဲ့တဲ့ ၇ ပွဲမှာ ၁ ပွဲသာအနိုင်ရခဲ့ပြီး ချန်ပီယံလိဂ်ပြိုင်ပွဲ၊ ကာရာဘောင်းဖလားပြိုင်ပွဲက ထွက်ခွာခဲ့ရသလို ပရီးမီးယားလိဂ်ပြိုင်ပွဲမှာလည်း အဆင့် ၈ နေရာ ရောက်ရှိ သွားခဲ့တာပါ။ 

အဲ့ဒါကြောင့် အလန်ရှီးယားက ဒီဂီယာကို ခေါ်ယူဖို့ နယူးကာဆယ်အသင်းကို တိုက်တွန်းခဲ့တာ ဖြစ်ပါတယ်။ 

ဒီဂီယာဟာ ယူနိုက်တက်အသင်းကနေ ထွက်ခွာပြီးကတည်းက အသင်းအချို့ရဲ့ ကမ်းလှမ်းမှုတွေကို ရရှိခဲ့ပေမယ့် သူ့ရဲ့ လုပ်ခလစာမြင့်မားမှု၊ အသင်းရွေးချယ်မှုတွေကြောင့် အခုထိ အသင်းသစ် မရရှိသေးတာပါ။

အလန်ရှီးယားက အသင်းဟောင်းအနေနဲ့ ရလဒ်ကောင်းတွေ ပြန်ရယူနိုင်ဖို့အတွက် ဂိုးသမား နေရာအပြင် တိုက်စစ်မှူးတစ်ဦး ခေါ်ယူဖို့လည်း အကြံပြုထားပါတယ်။ 

နယူးကာဆယ်အသင်းရဲ့ တိုက်စစ်မှူးတွေဖြစ်တဲ့ အိုင်ဆက်ခ်နဲ့ ဝီလ်ဆင်တို့ ၂ ဦးဟာ ဒီရာသီ ပရီးမီးယား လိဂ်ပြိုင်ပွဲမှာ ၁၆ ဂိုး သွင်းယူထားတာ ဖြစ်ပါတယ်။

Source: Sportkeeda 

CNI Sport News

၂၀၂၃ ခုနှစ်၊ ဒီဇင်ဘာ ၂၇

စပိန်ဂိုးသမား ကီပါဟာ ရီးရယ်လ်အသင်းနဲ့ ချုပ်ဆိုထားတဲ့ အငှားစာချုပ်ကုန်ဆုံးမယ့် အခုရာသီအကုန်မှာ ချယ်လ်ဆီးအသင်းထံ ပြန်လာရဖွယ်ရှိတယ်လို့ စပိန်မီဒီယာတွေက ဖော်ပြထားပါတယ်။

၂၀၁၈ ခုနှစ်က ဘီလ်ဘာအိုအသင်းကနေ ပေါင် ၇၁.၆ သန်းနဲ့ ချယ်လ်ဆီးအသင်းထံ ရောက်ရှိလာခဲ့တဲ့ ကီပါဟာ လက်စွမ်းမတည်ငြိမ်မှုကြောင့် ပွဲထွက်ခွင့်နေရာရဖို့ မန်ဒီနဲ့ ယှဉ်ပြိုင်ခဲ့ရတာပါ။ ဒီရာသီမှာ မန်ဒီဟာ ဆော်ဒီကလပ် အယ်လ်အာလီအသင်းထံ ပြောင်းရွှေ့ခဲ့ပြီး နည်းပြ ပိုချက်တီနိုက ကီပါကို ချယ်လ်ဆီးအသင်းမှာ ဆက်ပြီး ရှိနေ စေချင်ခဲ့တာဖြစ်ပါတယ်။ ဒါပေမယ့် အသက် ၂၉ နှစ်အရွယ်ရှိ ကီပါဟာ ရီးရယ်လ်အသင်းထံ တစ်ရာသီအငှား စာချုပ်နဲ့ ပြောင်းရွှေ့ဖို့ ရွေးချယ်ခဲ့တာပါ။

အဲဒါကြောင့် ချယ်လ်ဆီးအသင်းဟာ နံပတ်တစ်ဂိုးသမားနေရာအတွက် ဘရိုက်တန်အသင်းဂိုးသမား ရောဘတ် ဆန်းချက်ဇ်ကို ခေါ်ယူခဲ့ပေမယ့် ကီပါဟာ အခုရာသီအကုန်မှာ ချယ်လ်ဆီးအသင်းထံ ပြန်လာရဖွယ်ရှိနေတာ ဖြစ်ပါတယ်။ ရီးရယ်လ်အသင်းဟာ အဓိက ဂိုးသမား ကော့တွိုက်စ် ဒူးအရွတ်ဒဏ်ရာကြောင့် ရာသီအကုန်ထိ အနားယူရမှာဖြစ်တဲ့အတွက် ကီပါကို အရေးပေါ်အစားထိုးဖို့အတွက်သာ ခေါ်ယူခဲ့တာဖြစ်ပြီး အသင်းရဲ့ ပထမ ဦးစားပေးရွေးချယ်မှုမဟုတ်ခဲ့ပါဘူး။

ရီးရယ်လ်အသင်းဟာ ကီပါအစား ဆီဗီလာအသင်းဂိုးသမားဟောင်း ဘိုနိုကို ခေါ်ယူဖို့ စီစဉ်ခဲ့ပေမယ့် ဘိုနိုဟာ ဆော်ဒီကလပ် အယ်လ်ဟီလယ်အသင်းထံ ပြောင်းရွှေ့သွားခဲ့တာပါ။ အဲဒါကြောင့် ကီပါကိုခေါ်ယူခဲ့ပေမယ့် သူ့ရဲ့ စွမ်းဆောင်ရည်အချို့ကို ရီးရယ်လ်အသင်းက ကြိုက်နှစ်သက်ခြင်းမရှိတာဖြစ်ပါတယ်။ ကီပါဟာ မကြာသေးခင် ကမှ ဒဏ်ရာကနေ ပြန်သက်သာလာတာဖြစ်ပြီး ရီးရယ်လ်အသင်းရဲ့ပွဲထွက်ခွင့်နေရာကို ယူကရိန်းဂိုးသမား လူနင်နဲ့ ယှဉ်ပြိုင်နေရတာပါ။

ကီပါအနေနဲ့ ချယ်လ်ဆီးအသင်းထံ ပြန်ရောက်လာချိန်မှာလည်း ချယ်လ်ဆီးအသင်းရဲ့ နံပတ်တစ်ဂိုးသမားနေရာကို ရဖို့ ရောဘတ်ဆန်းချက်ဇ်နဲ့ ယှဉ်ပြိုင်ရမှာဖြစ်ပါတယ်။ ကီပါနဲ့ ချယ်လ်ဆီးအသင်းတို့ ချုပ်ဆိုထားတဲ့ စာချုပ်ဟာ ၂၀၂၅ ခုနှစ်အထိ သက်တမ်းရှိနေတာပါ။ ကီပါဟာ ဒီရာသီမှာ ရီးရယ်လ်အသင်းအတွက် (၁၅)ပွဲ ပါဝင်ကစား ထားတာဖြစ်ပါတယ်။

Source:Metro

CNI Sport News

၂၀၂၃ ခုနှစ်၊ ဒီဇင်ဘာ ၂၇

ပေါ်တူဂီအသင်းခေါင်းဆောင် ရော်နယ်ဒိုဟာ အယ်လ်နာဆာအသင်းက အယ်လ်အစ်တီဟတ်အသင်းကို ၅ ဂိုး- ၂ ဂိုးနဲ့ အနိုင်ရခဲ့တဲ့ ဆော်ဒီပရိုလိဂ်ပွဲစဉ်မှာ ဂိုးသွင်းယူပြီးနောက် ၂၀၂၃ ခုနှစ်ရဲ့ ဂိုးသွင်း အများဆုံး ကစားသမား အဖြစ် ဦးဆောင်နေပါတယ်။

ရော်နယ်ဒိုဟာ ဒီပွဲမှာ ပင်နယ်တီကနေ ၂ ဂိုး သွင်းယူပြီးနောက် ၂၀၂၃ ခုနှစ်အတွင်း သူ့ရဲ့ သွင်းဂိုး အရေအတွက် ဟာ ၅၃ ဂိုးအထိ ရှိလာခဲ့တာပါ။ 

အသက် ၃၈ နှစ်အရွယ်ရှိ ရော်နယ်ဒိုဟာ အခုနှစ်အတွင်းမှာ ပေါ်တူဂီလက်ရွေးစင်နဲ့ အယ်လ်နာဆာအသင်း အတွက် ၅၈ ပွဲ ကစားထားအပြီးမှာ ဒီသွင်းဂိုးကို ရရှိခဲ့တာ ဖြစ်ပါတယ်။ 

၂၀၂၃ ခုနှစ်ရဲ့ ဂိုးသွင်းအများဆုံး ကစားသမားစာရင်းမှာ ရော်နယ်ဒိုက ၅၃ ဂိုးနဲ့ ဦးဆောင်ထားပြီး ဟာရီကိန်းနဲ့ ဘတ်ပီက ၅၂ ဂိုးစီ၊ ဟာလန်းက ဂိုး ၅၀ သွင်းယူထားပါတယ်။

၂၀၂၃ ခုနှစ်ထဲမှာ ရော်နယ်ဒိုက အယ်လ်နာဆာအသင်းနဲ့ ၁ ပွဲကစားဖို့ ကျန်ရှိနေသေးပြီး ဘတ်ပီနဲ့ ဟာရီကိန်းတို့က ပွဲကစားဖို့ မရှိတော့ဘဲ မန်စီးတီးအသင်းတိုက်စစ်မှူး ဟာလန်းက ပွဲ ၂ ပွဲကစားဖို့ ကျန်ရှိနေသေးတာ ဖြစ်ပါတယ်။ 

အဲ့ဒါကြောင့် ရော်နယ်ဒိုဟာ ၂၀၂၃ ခုနှစ်ရဲ့ တရားဝင် ဂိုးသွင်း အများဆုံး ကစားသမားဖြစ်ဖို့အတွက် ဟာလန်းနဲ့ ယှဉ်ပြိုင်ရမှာပါ။

ရော်နယ်ဒိုကို တွေ့ရစဉ်

ရော်နယ်ဒိုဟာ အယ်လ်အစ်တီဟတ်အသင်းနဲ့ ပွဲမှာ ၂ ဂိုး သွင်းယူနိုင်ခဲ့တာကြောင့် ဒီရာသီ ဆော်ဒီပရိုလိဂ်ပြိုင်ပွဲမှာ ၁၉ ဂိုး သွင်းယူထားပြီး ဂိုးသွင်းအများဆုံး ကစားသမားအဖြစ် ရပ်တည်နေတာ ဖြစ်ပါတယ်။

ဒါ့အပြင် ရော်နယ်ဒိုဟာ ဂိုးဖန်တီးမှု ၉ ဂိုးနဲ့ ဒီရာသီ ဆော်ဒီပရိုလိဂ်ပြိုင်ပွဲရဲ့ ဂိုးဖန်တီးမှု အများဆုံး ကစားသမား အဖြစ် ဦးဆောင်နေပါတယ်။

ယူနိုက်တက် ကစားသမားဟောင်းဟာ အယ်လ်နာဆာအသင်းအတွက် ပြိုင်ပွဲစုံ ၄၉ ပွဲ ပါဝင်ကစားထားပြီး ၄၃ ဂိုး သွင်းယူကာ သွင်းဂိုး ၅၀ ပြည့်ဖို့လည်း နီးစပ်နေပြီ ဖြစ်ပါတယ်။ 

အယ်လ်နာဆာအသင်းဟာ အယ်လ်အစ်တီဟတ်အသင်းကို အနိုင်ရခဲ့ပေမယ့် ထိပ်ဆုံးနေရာက အယ်လ်ဟီလယ် အသင်းနဲ့ ၅ မှတ်အကွာ ဒုတိယနေရာမှာ ဆက်လက် ရပ်တည်နေပါတယ်။

အယ်လ်နာဆာအသင်းဟာ ၂၀၂၃ ခုနှစ်ရဲ့ နောက်ဆုံးပွဲစဉ်အဖြစ် ဒီဇင်ဘာ ၃၀ ရက်မှာ အယ်လ်တာဝေါင်အသင်းနဲ့ ယှဉ်ပြိုင်ရမှာဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဒီဇင်ဘာ ၂၇

အက်စတွန်ဗီလာအသင်းကို အနိုင်ရခဲ့တဲ့ ပရီးမီးယားလိဂ်ပွဲစဉ်မှာ ယူနိုက်တက်အသင်းကစားသမားဘ၀ ပထမဆုံးပရီးမီးယားလိဂ်သွင်းဂိုးကို သွင်းယူနိုင်ခဲ့တဲ့ တိုက်စစ်မှူး ဟော့ဂျ်လန်းက သူဟာ အခုအချိန်မှာ အပျော်ရွှင်ဆုံးလူသားလို့ ပြောလိုက်ပါတယ်။

ဟော့ဂျ်လန်းက “ကျနော်က အခုအချိန်မှာ အပျော်ရွှင်ဆုံးလူသားပါ။ ဂိုးသွင်းပြီး အောင်ပွဲခံတဲ့အချိန်မှာ ခင်ဗျားတို့ မြင်တွေ့နိုင်ပါတယ်။ ကျနော်တို့ဟာ အဆုံးထိယုံကြည်ခဲ့ပြီး စရိုက်လက္ခဏာအများကြီးကိုလည်း ပြသနိုင်ခဲ့ပါ တယ်။ ဒါက ကျနော့်ဘဝရဲ့ အကောင်းဆုံးနေ့တွေထဲက တစ်နေ့ပါ။ ပရီးမီးယားလိဂ်သွင်းဂိုးရဖို့ စောင့်ဆိုင်း ခဲ့ရတာကြောင့် ပထမဆုံးဂိုးအတွက် ကျနော်အလွန်ပျော်ရွှင်ပါတယ်။ ဒါကိုတည်ဆောက်ပြီး ဆက်သွားနိုင်မယ်လို့ မျှော်လင့်ကြောင်း”ပွဲအပြီး Amazon Prime နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

ပြီးခဲ့တဲ့ နွေရာသီက အတ္တလန်တာအသင်းကနေ ရောက်ရှိလာခဲ့တဲ့ ဟော့ဂျ်လန်းဟာ ချန်ပီယံလိဂ်ပြိုင်ပွဲမှာ ယူနိုက်တက်အသင်းအတွက် သွင်းဂိုးတွေသွင်းယူနိုင်ခဲ့ပေမယ့် ပရီးမီးယားလိဂ်ပြိုင်ပွဲမှာ ဂိုးပေါက်ပျောက်ဆုံး နေခဲ့တာကြောင့် ဝေဖန်မှုတွေခံနေရတာကို ဒီပွဲမှာအဆုံးသတ်နိုင်ခဲ့တာဖြစ်ပါတယ်။ ယူနိုက်တက်အသင်းဟာ ပရီးမီးယားလိဂ် Boxing Day ပွဲစဉ်အဖြစ် ကစားခဲ့တဲ့ပွဲမှာ အက်စတွန်ဗီလာအသင်းကို ၃ ဂိုး-၂ ဂိုးနဲ့ အနိုင် ရရှိခဲ့တာပါ။ 

ယူနိုက်တက်အသင်းဟာ ပထမပိုင်းမှာ အက်စတွန်ဗီလာအသင်းရဲ့ ၂ ဂိုး- ဂိုးမရှိနဲ့ ဦးဆောင်ခြင်းခံခဲ့ရပေမယ့် ဒုတိယပိုင်းမှာ ဂါနာချိုက ၂ ဂိုးနဲ့ ဟော့ဂျ်လန်က ၁ ဂိုးသွင်းယူခဲ့တာကြောင့် နိုင်ပွဲရယူနိုင်ခဲ့တာဖြစ်ပါတယ်။ ယူနိုက်တက်အသင်းဟာ ဒီနိုင်ပွဲကြောင့် ပရီးမီးယားလိဂ်ပြိုင်ပွဲမှာ နောက်ဆုံး ၃ ပွဲဆက်တိုက်နိုင်ပွဲ ပျောက်ဆုံး ခဲ့တာကိုလည်း အဆုံးသတ်နိုင်ခဲ့တာပါ။ ယူနိုက်တက်အသင်းဟာ ဒီနိုင်ပွဲကြောင့် ပရီးမီးယားလိဂ်အမှတ်ပေးဇယား အဆင့် ၆ နေရာကို ပြန်တက်လှမ်းနိုင်ခဲ့ပါတယ်။

ယူနိုက်တက်အသင်းနည်းပြ အဲရစ်တန်ဟတ်ကတော့ တိုက်စစ်မှူးတစ်ဦးအတွက် သွင်းဂိုးတွေက အရေးပါပြီး ဟော့ဂျ်လန်းဆီကနေ နောက်ထပ်သွင်းဂိုးတွေထပ်ပြီးလာဦးမှာလို့ ပြောခဲ့တာပါ။

အဲရစ်တန်ဟတ်က “ကျနော်သူနဲ့ စကားတွေအများကြီးပြောဖြစ်ခဲ့ပါတယ်။ သူဟာ ဒိန်းမတ်အတွက် ဂိုးတွေ အများကြီးသွင်းခဲ့သလို ချန်ပီယံလိဂ်မှာ ဂိုးတွေသွင်းယူနိုင်ခဲ့တာကို ကျနော်ထောက်ပြခဲ့ပါတယ်။ ဒါကြောင့်လည်း သူ့ရဲ့ အရည်အသွေးတွေကို ပြသခဲ့ပြီး ဒါကို ယုံကြည်ရပါမယ်။ သွင်းဂိုးတွေက တိုက်စစ်မှူးတစ်ဦးအတွက် လိုအပ်ပြီး သူ့ဆီကနေ နောက်ထပ်သွင်းဂိုးတွေထပ်ပြီးလာဦးမယ်” လို့ ပြောခဲ့ပါတယ်။

ယူနိုက်တက်အသင်းဟာ ပရီးမီးယားလိဂ်ပွဲစဉ် ၂၀ အဖြစ် ဒီဇင်ဘာ ၃၁ ရက်မှာ နော်တင်ဟမ်ဖောရက်စ်အသင်းနဲ့ ယှဉ်ပြိုင်ရမှာဖြစ်ပါတယ်။

Source:DailyMail    

CNI Sport News

၂၀၂၃ ခုနှစ်၊ ဒီဇင်ဘာ ၂၆

ပေါ်တူဂီဘောလုံးအဖွဲ့ချုပ်(FPF)ဥက္ကဋ္ဌ ဖာနန်ဒိုဂိုးမက်စ်က အသင်းခေါင်းဆောင် ရော်နယ်ဒိုဟာ နိုင်ငံအသင်းအတွက် နှစ်ပေါင်းများစွာကြာ ဆက်ပြီး ကစားနေဦးမှာ ဖြစ်တယ်လို့ ပြောလိုက်ပါတယ်။

ဖာနန်ဒိုဂိုးမက်စ်က “သေချာတာကတော့ ရော်နယ်ဒိုဟာ ကျနော်ဥက္ကဋ္ဌ ရာထူးကနေ ထွက်ခွာပြီးတဲ့အထိ သူဟာ ပေါ်တူဂီအသင်းကနေ အနားယူဦးမှာ မဟုတ်သေးပါဘူး။ သူပြသနေတဲ့ ခွန်အားတွေနဲ့ ရည်မှန်းချက်တွေအတိုင်း ဆက်ပြီးရှိနေမယ်ဆိုရင် နောက်ထပ် နှစ်ပေါင်းများစွာ နိုင်ငံအသင်းမှာ ဆက်ပြီးရှိနေမယ်လို့ ကျနော် ထင်ကြောင်း” ပြောခဲ့ပါတယ်။

ရော်နယ်ဒိုဟာ ကစားသမားဘဝ အဆုံးသတ်တော့မယ့် အသက် ၃၈ နှစ်အရွယ် ရောက်ရှိနေပြီ ဖြစ်ပေမယ့် အမြင့်ဆုံးအဆင့်မှာ အကောင်းဆုံး လုပ်ဆောင်ပြသနေတာ ဖြစ်ပါတယ်။ 

ရော်နယ်ဒိုဟာ ပေါ်တူဂီအသင်း ယူရို ၂၀၂၄ ခြေစစ်ပွဲမှာ ရာနှုန်းပြည့်နိုင်ပွဲနဲ့ ခြေစစ်ပွဲ အောင်မြင်အောင် ၁၀ ဂိုး အထိသွင်းပြီး ခြေစွမ်းပြသနိုင်ခဲ့ပါတယ်။

ရော်နယ်ဒိုနဲ့ ပေါ်တူဂီဘောလုံးအဖွဲ့ချုပ်အကြီးအကဲကို တွေ့ရစဉ်

ရော်နယ်ဒိုဟာ ပေါ်တူဂီအသင်းအတွက် ၂၀၅ ပွဲ ပါဝင်ကစားထားပြီး ၁၂၈ ဂိုးသွင်းယူကာ နိုင်ငံတကာ ဂိုးသွင်း အများဆုံး ကစားသမားအဖြစ် စံချိန်တင်ထားပါတယ်။

ရော်နယ်ဒိုဟာ လာမယ့်နွေရာသီမှာ ကျင်းပမယ့် ယူရို ၂၀၂၄ ပြိုင်ပွဲမှာ ပေါ်တူဂီအသင်းအတွက် ပါဝင် ကစားပေး မယ်လို့ အတည်ပြုထားပေမယ့် ပရိသတ်တွေကတော့ သူတို့ရဲ့ အချစ်တော်ကစားသမား နိုင်ငံတကာ ကစားသမား ဘဝကနေ မကြာခင် အနားယူမယ့် အခြေအနေကို စိုးရိမ်မှုတွေရှိနေပါတယ်။

အဲ့ဒါကြောင့် ပေါ်တူဂီဘောလုံးအဖွဲ့ချုပ် အကြီးအကဲက ရော်နယ်ဒိုနဲ့ ပတ်သက်ပြီး ပရိသတ်တွေစိုးရိမ်တာ လျော့စေမယ့် စကားပြောခဲ့တာ ဖြစ်ပါတယ်။

ရော်နယ်ဒိုဟာ ပေါ်တူဂီအသင်းနဲ့ ယူရို ၂၀၁၆ ၊ ၂၀၁၉ UEFA နေးရှင်းလိဂ်ပြိုင်ပွဲတွေမှာ ချန်ပီယံဆုရရှိထားပြီး ယူရို ၂၀၂၄ ပြိုင်ပွဲမှာ သူ့ရဲ့ လက်ရွေးစင်ကစားသမားဘဝ တတိယမြောက် ချန်ပီယံဆုဖလားကို ရယူဖို့ ပစ်မှတ်ထားနေ တာ ဖြစ်ပါတယ်။

Source: Sportskeeda