CNI Sport News

၂၀၂၄ ခုနှစ်၊ ဇန်နဝါရီ ၅

ဘာစီလိုနာအသင်းနည်းပြ ဇာဗီက လက်စ်ပါးမက်စ်အသင်းကို အနိုင်ရတဲ့ပွဲအပြီးမှာ မိမိတို့အသင်းဟာ စပိန် လာလီဂါပြိုင်ပွဲရဲ့ လက်ရှိ ချန်ပီယံဖြစ်တဲ့အတွက် လေးစားမှုရှိဖို့ ပြောလိုက်ပါတယ်။ 

ဇာဗီက “ကျနော်တို့ဟာ ချန်ပီယံပြေးလမ်းကြောင်းထဲမှာ ပါဝင်နေပါသေးတယ်။ ဒီတစ်ပတ်ကစားခဲ့တဲ့ လာလီဂါ ပွဲစဉ်တွေကို ကြည့်လိုက်မယ်ဆိုရင် ဒီလိဂ်မှာ အနိုင်ရဖို့ ခက်ခဲတယ်ဆိုတာ တွေ့ရမှာပါ။ ဂျီရိုနာက နောက်ဆုံး မိနစ်မှာ အနိုင်ရတယ်၊ ရီးရယ်လ်က မိနစ် ၈၀ မှာ ထောင့်ကန်ဘောကနေ ဂိုးရခဲ့ပြီး ကျနော်တို့က ပင်နယ်တီနဲ့ နောက်ဆုံး အခိုက်အတန့်မှာ အနိုင်ရခဲ့ပါတယ်။ ဘာစီလိုနာအသင်း လာလီဂါဖလားရဖို့ ငြင်းခုံမှုတွေရှိပေမယ့် ကျနော်တို့က လက်ရှိချန်ပီယံပါ။ ဒါကြောင့် လက်ရှိချန်ပီယံကို လေးစားပါ”လို့ ပြောခဲ့တာပါ။

ဘာစီလိုနာအသင်းဟာ လက်စ်ပါးမက်စ်အသင်းနဲ့ ကစားခဲ့တဲ့ လာလီဂါပွဲစဉ်မှာ ၂ ဂိုး-၁ ဂိုးနဲ့ အနိုင်ရရှိခဲ့တာ ဖြစ်ပါ တယ်။

ဒီပွဲမှာ လက်စ်ပါးမက်စ်အသင်းက ဦးဆောင်ဂိုး စတင်သွင်းယူခဲ့တာဖြစ်ပြီး ဘာစီလိုနာအသင်းအတွက် ဖာရန်တော ရက်စ်က ချေပဂိုးနဲ့ ဂန်ဒိုဂန်က နောက်ဆုံးမိနစ် ပင်နယ်တီဂိုးသွင်းပြီး အနိုင် ၃ မှတ်ရယူပေးခဲ့တာပါ။ 

 ဇာဗီကိုတွေ့ရစဉ်

ဘာစီလိုနာအသင်းဟာ ဒီပွဲအနိုင်ရခဲ့ပေမယ့် ထိပ်ဆုံးနေရာက ရီးရယ်လ်၊ ဂျီရိုနာအသင်းတို့နဲ့ ၇ မှတ်အကွာ လာလီဂါအဆင့် ၃ နေရာမှာ ရပ်တည်နေတာ ဖြစ်ပါတယ်။

ဒီပွဲမှာ ဘာစီလိုနာအသင်း နောက်ခံလူ ကန်ဆယ်လိုဟာ ဒူးဒဏ်ရာ ရရှိသွားခဲ့ပြီး နည်းပြ ဇာဗီကတော့ ကစား သမားကို အချိန်အကြာကြီး မဆုံးရှုံးရဖို့ မျှော်လင့်နေတာပါ။ 

ဘာစီလိုနာအသင်းဟာ စပိန်စူပါဖလား ဆီမီးဖိုင်နယ်ပွဲစဉ်အဖြစ် အိုဆာဆူနာအသင်းနဲ့ ကစားဖို့ ဆော်ဒီနိုင်ငံကို မထွက်ခွာခင် ဇန်နဝါရီ ၇ ရက်မှာ စပိန်ကိုပါဒယ်ရေးဖလား ပွဲစဉ်ယှဉ်ပြိုင်ကစားဖို့ ရှိနေပါတယ်။ 

ဘာစီလိုနာအသင်းဟာ စပိန်ကိုပါဒယ်ရေးဖလား ၃၂ သင်းအဆင့်အဖြစ် လိဂ်အဆင့်အတန်းနိမ့်တဲ့ ဘာဘစထရို အသင်းနဲ့ ယှဉ်ပြိုင်ရမှာပါ။

စပိန်စူပါဖလားပြိုင်ပွဲရဲ့ လက်ရှိချန်ပီယံဖြစ်တဲ့ ဘာစီလိုနာအသင်းဟာ ဆီမီးဖိုင်နယ်ပွဲစဉ်အဖြစ် အိုဆာဆူနာ အသင်းနဲ့ ဇန်နဝါရီ ၁၁ ရက်မှာ ယှဉ်ပြိုင်ရမှာဖြစ်ပြီး နောက်ထပ် ဆီမီးဖိုင်နယ်ပွဲစဉ်အဖြစ် ရီးရယ်လ်နဲ့ အသလက်တီကို အသင်းတို့ ယှဉ်ပြိုင်ရမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇန်နဝါရီ ၃

အဲဗာတန်အသင်းဟာ အသင်းလက်မဲ့ဖြစ်နေတဲ့ ယူနိုက်တက်ကစားသမားဟောင်း လင်ဂတ်ကို အခုရာသီ အကုန်ထိ ကာလတိုစာချုပ်ချုပ်ဆိုဖို့ စဉ်းစားနေတယ်လို့ ဗြိတိန်မီဒီယာတွေက ဖော်ပြထားပါတယ်။

အဲဗာတန်အသင်းဟာ ဘဏ္ဍာရေးစည်းမျဉ်းချိုးဖောက်မှုကြောင့် ပရီးမီးယားလိဂ်ရဲ့ ၁၀ မှတ်လျှော့ ပြစ်ဒဏ် ချမှတ်ခံထားရပြီး နောက်ဆုံးကစားခဲ့တဲ့ ၃ ပွဲဆက်တိုက်ရှုံးနိမ့်ထားခဲ့တာပါ။ အဲဗာတန်အသင်းဟာ ဒီရှုံးပွဲတွေ ကြောင့် တန်းဆင်းဇုန်ထဲက အသင်းနဲ့ ရမှတ်ကွာဟမှုကျဉ်းမြောင်းလာခဲ့တဲ့အတွက် အခုအပြောင်းအရွှေ့မှာ ကစားသမားအင်အားဖြည့်တင်းဖို့ ပြင်ဆင်နေတာဖြစ်ပါတယ်။ အဲဒါကြောင့် ပရီးမီးယားလိဂ်ပွဲပေါင်း ၂၀၀ နီးပါး ပါဝင်ကစားထားပြီး အင်္ဂလန်အသင်းအတွက် ၃၂ ပွဲပါဝင်ကစားထားတဲ့ လင်ဂတ်ဟာ အဲဗာတန်အသင်းရဲ့ ပစ်မှတ် ဖြစ်လာခဲ့တာပါ။

လင်ဂတ်ဟာ ပြီးခဲ့တဲ့ရာသီက နော်တင်ဟမ်ဖောရက်စ်အသင်းမှာကစားခဲ့ပြီး ပွဲပေါင်း ၂၀ ပါဝင်ကစားခဲ့တာမှာ ၂ ဂိုးသာသွင်းယူနိုင်ခဲ့တာကြောင့် အသင်းကသူ့ကို စာချုပ်သက်တမ်းမတိုးဘဲ ထွက်ခွာခွင့်ပေးခဲ့တာဖြစ်ပါတယ်။ လင်ဂတ်ဟာ နော်တင်ဟမ်ဖောရက်စ်အသင်းကနေ ထွက်ခွာအပြီးမှာ အသင်းဟောင်း ဝက်စ်ဟမ်းအသင်းနဲ့ လေ့ကျင့်မှုတွေပြုလုပ်ခဲ့ပေမယ့် အပြောင်းအရွှေ့ဖြစ်ခဲ့ခြင်းမရှိပါဘူး။ ယူနိုက်တက်ကစားသမားဟောင်းဟာ စတီဗင်ဂျရတ်ကိုင်တွယ်နေတဲ့ အယ်လ်အက်တီဖတ်အသင်းနဲ့လည်း လေ့ကျင့်မှုတွေပြုလုပ်ခဲ့ပေမယ့် စာချုပ် အကောင်အထည်ဖော်နိုင်ခဲ့ခြင်းမရှိတာဖြစ်ပါတယ်။

အဲဒါကြောင့် လင်ဂတ်ဟာ သူ့ရဲ့ ကြံ့ခိုင်မှုပိုင်းကို ဆက်ပြီးထိန်းနိုင်ဖို့အတွက် တစ်ဦးတည်းလေ့ကျင့်မှုတွေ ပြုလုပ်နေတာပါ။ ယူနိုက်တက်အသင်းမှာ ဆယ်စုနှစ် ၂ ခုကြာဖြတ်သန်းခဲ့တဲ့ လင်ဂတ်ဟာ လက်စတာ၊ ဘာမင်ဂမ်၊ ဘရိုက်တန်နဲ့ ဒါဘီအသင်းတွေမှာလည်း အငှားနဲ့ သွားရောက်ကစားဖူးတာ ဖြစ်ပါတယ်။

Source:DailyMail

CNI Sport News

၂၀၂၄ ခုနှစ်၊ ဇန်နဝါရီ ၃

ဂျပန်နဲ့ အာဆင်နယ်အသင်း နောက်ခံလူ တိုမီယာဆုက ဇန်နဝါရီလထဲ ကျင်းပတော့ အာရှဖလားပြိုင်ပွဲကို ယူရိုပြိုင်ပွဲလို ဇွန်လမှာ ပြောင်းရွှေ့ ကျင်းပသင့်တယ်လို့ ပြောလိုက်ပါတယ်။

တိုမီယာဆုက “ယူရိုပြိုင်ပွဲလိုပဲ အာရှဖလားပြိုင်ပွဲကို ဇွန်လမှာ ကျင်းပစေချင်ပါတယ်။ ဘာကြောင့် ဇန်နဝါရီမှာ ကျင်းပလဲဆိုတာတော့ ကျနော်လည်း မသိပါဘူး။ အာရှဖလားတစ်ခုတည်း မဟုတ်ဘဲ အာဖရိကနိုင်ငံများ ဖလား လည်း ဒီလိုပါပဲ။ ဒီလိုကျင်းပတာက ကစားသမားတွေအတွက် မကောင်းပါဘူး။ ဒါပေမယ့်လည်း ကျနော်တို့ဟာ ဆုဖလားနဲ့အတူ ပြန်လာနိုင်ဖို့ ကြိုးစားရမှာပါ”လို့ Evening Standard သတင်းစာနဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

ပြီးခဲ့တဲ့ အာရှဖလားပြိုင်ပွဲ နောက်ဆုံး ၃ ကြိမ်ကို ဇန်နဝါရီလနဲ့ ဖေဖော်ဝါရီလမှာ ကျင်းပခဲ့တာဖြစ်ပြီး အခုပြိုင်ပွဲ ကိုတော့ ကာတာနိုင်ငံက အိမ်ရှင်အဖြစ် ကျင်းပမှာဖြစ်လို့ ပြိုင်ပွဲဝင်မယ့် နိုင်ငံတွေဟာ ပူပြင်းတဲ့ဒဏ်ကို ခံစားရ တော့မှာ ဖြစ်ပါတယ်။ 

ဂျပန်အသင်းသာ အာရှဖလားပြိုင်ပွဲရဲ့ ဗိုလ်လုပွဲကို ရောက်ရှိခဲ့မယ်ဆိုရင် တိုမီယာဆုဟာ အာဆင်နယ်အသင်း အတွက် ပရီးမီးယားလိဂ်ပွဲစဉ် ၄ ပွဲ အပါအဝင် ပွဲစဉ် ၆ ပွဲအထိ လွဲချော်နိုင်ဖွယ်ရှိနေတာပါ။

တိုမီယာဆုကို တွေ့ရစဉ်

တိုမီယာဆုအပြင် ပရီးမီးယားလိဂ်ရဲ့ ကြယ်ပွင့် ကစားသမားတွေဖြစ်တဲ့ ဆွန်ဟောင်မင်၊ မီတိုမာနဲ့ ဟွမ်ဟီချန်းတို့ ကလည်း အာရှဖလားပြိုင်ပွဲကို ဝင်ရောက်ယှဉ်ပြိုင်ကြမှာ ဖြစ်ပါတယ်။

အဲ့ဒါကြောင့် ဒီကစားသမားတွေဟာ စပါး၊ ဘရိုက်တန်နဲ့ ဝုလ်ဗ်စ်အသင်းရဲ့ ပွဲစဉ်အချို့ကို လွဲချော်ကြတော့မှာပါ။ 

အာရှဖလားပြိုင်ပွဲကို ဇန်နဝါရီ ၁၂ ရက်ကနေ ဖေဖော်ဝါရီ ၁၀ ရက်အထိ ကျင်းပသွားမှာ ဖြစ်ပါတယ်။ 

အာရှဖလားနဲ့ အပြိုင်ကျင်းပမယ့် အာဖရိကနိုင်ငံများဖလား ပြိုင်ပွဲကိုတော့ ဇန်နဝါရီ ၁၃ ရက်ကနေ ဖေဖော်ဝါရီ ၁၁ ရက်အထိ ကျင်းပသွားမှာပါ။

အဲ့ဒါကြောင့် ဆာလက်၊ အိုနာနာ၊ အမ်ရာဘတ်၊ကူဒက်စ်၊ အော်ရီယာ၊ ဆန်ဂါရီနဲ့ အချို့ကစားသမားတွေဟာ အာဖရိကဖလားပြိုင်ပွဲဝင်မယ့် နိုင်ငံအသင်းနဲ့ ပူးပေါင်းတော့မှာ ဖြစ်တဲ့အတွက် သူတို့ကလပ်အသင်းတွေရဲ့ ပရီးမီးယားလိဂ် ပွဲစဉ်တွေကို လွဲချော်တော့မှာ ဖြစ်ပါတယ်။

Source: CNA

CNI Sport News

၂၀၂၄ ခုနှစ်၊ ဇန်နဝါရီ ၃

အီတလီလူမျိုးနည်းပြ အန်ဆယ်လော့တီဟာ ရီးရယ်လ်အသင်းကနေ ထွက်ခွာပြီးတာနဲ့ နည်းပြလောက ကနေအနားယူသွားမယ်လို့ မာယော့ကာအသင်းနဲ့ ကစားမယ့်ပွဲ မတိုင်ခင်ပြုလုပ်ခဲ့တဲ့ ပွဲကြိုသတင်းစာ ရှင်းလင်းပွဲမှာ အတည်ပြုခဲ့ပါတယ်။

အန်ဆယ်လော့တီက “စာချုပ်သက်တမ်းတိုးနိုင်ခဲ့တဲ့အတွက် ကျနော်အလွန်ပျော်ရွှင်ပါတယ်။ စာချုပ်သစ်အတွက် အမြန်ဆုံးသဘောတူညီမှုရယူနိုင်ခဲ့တာဖြစ်ပြီး ရီးရယ်လ်အသင်းမှာ နည်းပြအဖြစ် နောက်ထပ် ၂ နှစ်ကြာ ဆက်ပြီး ရှိရမှာဖြစ်တဲ့အတွက် ပျော်ရွှင်ပါတယ်။ ဒါက ကျနော့်ရဲ့ နောက်ဆုံးခုံတန်းဆိုတာကို အတည်ပြုချင်ပါတယ်။ ဘယ်တော့အဆုံးသတ်မလဲဆိုတာ မသိပေမယ့် ကျနော်တို့ အောင်မြင်မှုရယူနိုင်တဲ့အပေါ်မှာလည်း မူတည် ပါတယ်။ ကျနော် ၂၀၂၈ ခုနှစ်အထိ ရီးရယ်လ်မှာ ဆက်ပြီးရှိချင်တယ်” လို့ ပြောခဲ့တာပါ။

အန်ဆယ်လော့တီဟာ မကြာသေးခင်ကမှ ရီးရယ်လ်အသင်းမှာ ၂၀၂၆ ခုနှစ်၊ဇွန်လအထိ ရှိမယ့် စာချုပ်သစ် ချုပ်ဆိုခဲ့တာဖြစ်ပါတယ်။ အီတလီလူမျိုးနည်းပြဟာ ဘရာဇီးလ်အသင်းရဲ့ နည်းပြသစ်အဖြစ် ခန့်အပ်ခံရဖို့ သတင်းတွေထွက်ခဲ့ပေမယ့် နောက်ဆုံးမှာတော့ ရီးရယ်လ်အသင်းနဲ့ ၂ နှစ်စာချုပ်သစ်ချုပ်ဆိုခဲ့တာပါ။ အန်ဆယ်လော့တီက ဘရာဇီးလ်ဘောလုံးအဖွဲ့ချုပ်နဲ့ ကောင်းမွန်တဲ့ စကားပြောဆိုမှုတွေရှိခဲ့ပြီး သူ့ကို စိတ်ဝင်စားမှုအတွက် ဂုဏ်ယူမိတယ်လို့ ပြောခဲ့ပါတယ်။

အန်ဆယ်လော့တီက “ကျနော် ဘရာဇီးလ်ဘောလုံးအဖွဲ့ချုပ်အကြီးအကဲနဲ့ အဆက်အသွယ်ရှိတယ်ဆိုတာ ရီးရယ်လ်အသင်းရော လူတိုင်းကပါ သိကြပါတယ်။ သူတို့ရဲ့ စိတ်ဝင်စားမှုဟာ ကျနော့်အတွက် ဂုဏ်ယူစရာ ဖြစ်ပေမယ့် ရီးရယ်လ်နဲ့ ပတ်သက်တဲ့အခြေအနေက လူတိုင်းအတွက်ရှင်းပါတယ်။ အဆုံးသတ်မှာတော့ ကျနော်ဒီမှာပဲ ဆက်နေချင်တယ်”လို့ ပြောခဲ့တာပါ။

အသက် ၆၄ နှစ်အရွယ်ရှိ အန်ဆယ်လော့တီဟာ ရီးရယ်လ်အသင်းကို ၂ ကြိမ်ကိုင်တွယ်ထားတာမှာ ချန်ပီယံလိဂ် ဖလား ၂ ကြိမ်၊ လာလီဂါဖလား ၁ ကြိမ်အပါအဝင် အဓိကဆုဖလား ၁၀ ခု ရယူထားနိုင်ခဲ့တာ ဖြစ်ပါတယ်။ ရီးရယ်လ်အသင်းဟာ ဒီရာသီမှာ စပိန်လာလီဂါအမှတ်ပေးဇယားကို ဦးဆောင်နေသလို ချန်ပီယံလိဂ် ပြိုင်ပွဲ မှာလည်း ၁၆ သင်းအဆင့်တက်ရောက်ထားနိုင်ခဲ့ပါတယ်။ 

Source:Besoccer

CNI Sport News

၂၀၂၄ ခုနှစ်၊ ဇန်နဝါရီ ၃

ယူနိုက်တက်နဲ့ ဒေါ့မွန်အသင်းတို့ဟာ တောင်ပံကစားသမား ဆန်ချိုရဲ့ အငှားစာချုပ်အတွက် ဆွေးနွေးမှုတွေ ပြုလုပ်နေတယ်လို့ သတင်းရင်းမြစ်တစ်ခုက ESPN သတင်းဌာနကို ပြောပါတယ်။

ဒေါ့မွန်အသင်းဟာ ဆန်ချိုကို အခုရာသီကုန်တဲ့အထိ အငှားစာချုပ်နဲ့ ခေါ်ယူချင်ပေမယ့် ကစားသမားရဲ့ လုပ်ခလစာ အများစုကို ယူနိုက်တက်အသင်းက ဆက်ပြီး ပေးချေရဖို့ ရှိနေတာပါ။ 

အသက် ၂၃ နှစ်အရွယ်ရှိ ဆန်ချိုဟာ နည်းပြ အဲရစ်တန်ဟတ်နဲ့ လူသိရှင်ကြား ပြဿနာဖြစ်ပွားပြီးနောက် သြဂုတ်လကတည်းက ယူနိုက်တက်အသင်းအတွက် ပါဝင်ကစားခွင့် မရရှိတော့ပါဘူး။ 

ဆန်ချိုဟာ ယူနိုက်တက်အသင်းကြီးနဲ့ လေ့ကျင့်မှုပြုလုပ်ခွင့် မရတော့ဘဲ တစ်ဦးတည်းသာ လေ့ကျင့်မှုတွေ ပြုလုပ်ခဲ့ရတာပါ။

ဆန်ချိုကို ခေါ်ယူဖို့ ဂျူဗင်တပ်စ်နဲ့ လိုက်ပ်ဇစ်အသင်းတို့ကလည်း စိတ်ဝင်စားနေခဲ့ပေမယ့် ကစားသမားကတော့ အသင်းဟောင်း ဒေါ့မွန်အသင်းကိုသာ ပြန်ပြီးသွားရောက်ချင်နေတာ ဖြစ်ပါတယ်။ 

ဆန်ချိုနဲ့အဲရစ်တန်ဟတ်ကို တွေ့ရစဉ်

ဆန်ချိုဟာ ၂၀၂၁ ခုနှစ်က ပေါင် ၇၃ သန်းနဲ့ ဒေါ့မွန်အသင်းက ထွက်ခွာပြီး ယူနိုက်တက်အသင်းထံ ပြောင်းရွှေ့ လာခဲ့တာပါ။ 

ဆန်ချိုဟာ ယူနိုက်တက်အသင်းမှာ ခြေစွမ်းပြသနိုင်ဖို့ ရုန်းကန်ခဲ့ရသလို နည်းပြ အဲရစ်တန်ဟတ်ကို တောင်းပန်ဖို့ ငြင်းဆန်ခဲ့တာတွေကြောင့် အခုအပြောင်းအရွှေ့မှာ အသင်းကထွက်ခွာဖို့ ဖြစ်လာခဲ့ပါတယ်။

ဒါပေမယ့် ဆန်ချိုဟာ ယူနိုက်တက်အသင်းမှာ တစ်ပတ်လုပ်ခပေါင် ၃၀၀,၀၀၀ ရရှိနေတာကြောင့် သူ့ကို ခေါ်ယူ ချင်နေတဲ့ အသင်းတွေဟာ သူ့ရဲ့ လုပ်ခလစာကို ပေးချေဖို့ အခက်တွေ့နေကြတာပါ။ 

အဲ့ဒါကြောင့် ယူနိုက်တက်အသင်းဟာ ဆန်ချိုအငှားနဲ့ ထွက်ခွာချိန်မှာ သူ့ရဲ့ လုပ်ခလစာ တစ်စိတ်တစ်ပိုင်းကို ဆက်ပြီးပေးချေရဖို့ရှိနေတာ ဖြစ်ပါတယ်။ 

အင်္ဂလန်ကစားသမားဟာ ယူနိုက်တက်အသင်းအတွက် နောက်ဆုံးပွဲစဉ်အဖြစ် နော်တင်ဟမ်ဖောရက်စ်အသင်းကို အနိုင်ရရှိခဲ့တဲ့ သြဂုတ် ၂၆ ရက်က ပွဲစဉ်မှာ လူစားဝင်ကစားသမားအဖြစ် ပါဝင်ခွင့်ရခဲ့တာပါ။

အသက် ၂၃ နှစ်အရွယ်ရှိ ဆန်ချိုဟာ ယူနိုက်တက်အသင်းအတွက် ၈၂ ပွဲ ပါဝင်ကစားထားပြီး ၁၂ ဂိုးသွင်းယူကာ စာချုပ်သက်တမ်းက ၂၀၂၆ ခုနှစ်၊ ဇွန်လ ၃၀ ရက်မှာ ကုန်ဆုံးမယ်လို့ Transfermarkt က ဖော်ပြထားတာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇန်နဝါရီ ၂

အင်္ဂလန်ကွင်းလယ်လူ ဘယ်လင်ဂမ်က ၂၀၂၄ ခုနှစ်မှာ ရီးရယ်လ်အသင်းနဲ့ ဆုဖလား အများအပြား ရယူချင်ပြီး သွင်းဂိုးတွေလည်း အများကြီး သွင်းယူချင်တယ်လို့ ပြောလိုက်ပါတယ်။

ဘယ်လင်ဂမ်က “၂၀၂၄ ခုနှစ်အတွက် ကျနော်တောင်းဆိုချင်တာက ဆုဖလား အများကြီးရယူဖို့၊ သွင်းဂိုးတွေနဲ့ အသင်းအနိုင်ရအောင် ကူညီပေးဖို့ ဖြစ်ပါတယ်။ ရီးရယ်လ်ကစားသမား ဖြစ်ရတာကို ကျနော် အလွန်ပျော်ရွှင် ပါတယ်။ ရီးရယ်လ်မှာ အလုပ်လုပ်ဖို့ အတွက်ဆိုရင် အရည်အသွေးတွေနဲ့ စိတ်ဓါတ်ပိုင်းဟာ အဆင့်တစ်ခု ရှိနေရမှာဖြစ်ပြီး ဒီလိုမျိုး တာဝန်ယူရတာက ကျနော့်အတွက် ကြီးမားတဲ့ အခွင့်ထူးတစ်ခုလို ခံစားရပါတယ်။ ရီးရယ်လ်ကို ရောက်ရှိလာတဲ့အချိန်မှာ ကျနော့်အတွက် ရည်မှန်းချက်က အရာအားလုံးကို အနိုင်ယူဖို့ပါ”လို့ ပြောပါ တယ်။

ဘယ်လင်ဂမ်ဟာ ပြီးခဲ့တဲ့နွေရာသီ အပြောင်းအရွှေ့က ပေါင် ၈၉ သန်းနဲ့ ဒေါ့မွန်အသင်းကနေ ရောက်ရှိလာပြီး ကတည်းက ရီးရယ်လ်အသင်းမှာ ခြေစွမ်းပြသနေတာ ဖြစ်ပါတယ်။ 

ဘယ်လင်ဂမ်ဟာ ရီးရယ်လ်အသင်းအတွက် ၂၁ ပွဲ ကစားထားအပြီး ၁၇ ဂိုးအထိ သွင်းယူထားကာ ဒီရာသီ အသင်း ရဲ့ ထိပ်တန်းဂိုးသွင်းရှင်အဖြစ် ရပ်တည်နေပါတယ်။

အင်္ဂလန်ကစားသမား ပြီးခဲ့တဲ့ ၂၀၂၃ ခုနှစ်ထဲမှာ Golden Boy ဆုနဲ့ Kopa Trophy တို့ကိုလည်း ရယူနိုင်ခဲ့ပါတယ်။

ဘယ်လင်ဂမ်ကို တွေ့ရစဉ်

ဘယ်လင်ဂမ်ဟာ ရီးရယ်လ်အသင်းမှာ ဂန္ထဝင်ကစားသမားကြီး ဇီဒန်းရဲ့ ကျောနံပါတ် ၅ အမွေအနှစ်ကို ဝတ်ဆင် နေတာဖြစ်ပြီး ဒီလိုဝတ်ဆင်ရတဲ့အတွက်လည်း ဂုဏ်ယူမိတယ်လို့ ပြောထားတာပါ။

အသက် ၂၀ နှစ်အရွယ်ရှိ ဘယ်လင်ဂမ်ဟာ ဒီရာသီမှာ ရီးရယ်လ်အသင်းနဲ့ ပြသနေတဲ့ ခြေစွမ်းတွေကြောင့် လာလီဂါပြိုင်ပွဲရဲ့ တစ်လတာ အကောင်းဆုံး ကစားသမားဆုကို ၂ ကြိမ်ရရှိထားပြီး အနာဂတ် ဘောလွန်းဒီအော ဆုရှင်အဖြစ်လည်း သတ်မှတ်ခြင်း ခံထားရတာ ဖြစ်ပါတယ်။

ဒီရာသီ လာလီဂါပြိုင်ပွဲရဲ့ အမှတ်ပေးဇယားကို ဦးဆောင်နေတဲ့ ရီးရယ်လ်အသင်းဟာ ဇန်နဝါရီ ၄ ရက်မနက်ပိုင်းမှာ လိဂ်ပွဲစဉ်အဖြစ် မာယော့ကာအသင်းနဲ့ ယှဉ်ပြိုင်ရမှာပါ။ 

ဘယ်လင်ဂမ်ဟာ ပခုံးဒဏ်ရာပြဿနာ ခံစားနေရပေမယ့် ဒီပွဲမှာ ရီးရယ်လ်အသင်းအတွက် ပါဝင်ကစားပေး နိုင်ဖွယ်ရှိနေတာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဇန်နဝါရီ ၂

ဘရိုက်တန်အသင်း ကွင်းလယ်လူ မီတိုမာဟာ ခြေကျင်းဝတ်ဒဏ်ရာကြောင့် အနားယူနေရပေမယ့် အာရှဖလား ပြိုင်ပွဲ ယှဉ်ပြိုင်မယ့် ဂျပန်အသင်း လူစာရင်းမှာ ရွေးချယ်ခံခဲ့ရပါတယ်။

ဂျပန်အသင်းနည်းပြ မိုရီယာဆုဟာ အာရှဖလားပြိုင်ပွဲအတွက် ကစားသမား ၂၆ ဦး စာရင်း ထုတ်ပြန်ခဲ့တာမှာ မီတိုမာအပြင် လီဗာပူးလ်အသင်း ကွင်းလယ်လူ အန်ဒို၊ အာဆင်နယ်အသင်း နောက်ခံလူ တိုမီယာဆု၊ ဆိုစီဒက် အသင်း တောင်ပံကစားသမား ကူဘိုတို့ ပါဝင်ခဲ့တာပါ။ 

ဆဲလ်တစ်အသင်း တိုက်စစ်မှူး ဖူရူဟာရှီ၊ လာဇီယိုအသင်း ကွင်းလယ်လူ ကာမာဒါနဲ့ ဒူဆယ်လ်ဒေါ့ဖ် ကွင်းလယ်လူ တာနာကာတို့ကတော့ ဂျပန်အသင်း လူစာရင်းမှာ ချန်လှပ်ခြင်းခံခဲ့ရပါတယ်။

ဂျပန်အသင်းနည်းပြ မိုရီယာဆုကတော့ မီတိုမာဟာ အုပ်စုပထမပွဲစဉ်မှာ ပါဝင်နိုင်ဖို့ မသေချာပေမယ့် လာမယ့်ပွဲ တွေမှာ ပါဝင်နိုင်ဖို့ မျှော်လင့်တယ်လို့ ပြောထားတာပါ။

မီတိုမာဟာ ဘရိုက်တန်အသင်းနဲ့ ပဲလေ့စ်အသင်းတို့ ၁ ဂိုးစီ သရေကျခဲ့တဲ့ပွဲစဉ်မှာ ခြေကျင်းဝတ်ဒဏ်ရာ ရရှိခဲ့တာ ကြောင့် ၄ ပတ်ကနေ ၆ ပတ်အထိ အနားယူရဖွယ်ရှိတယ်လို့ သတင်းတွေ ထွက်ခဲ့တာ ဖြစ်ပါတယ်။

ဂျပန်အသင်းကို တွေ့ရစဉ်

ဘရိုက်တန်အသင်းနည်းပြ ဒီဇာဘီကတော့ မီတိုမာကို ဂျပန်အသင်းက ရွေးချယ်ခဲ့တာကြောင့် အံ့အားသင့်ခဲ့ တယ်လို့ ပြောထားတာပါ။ 

၂၀၂၃ အာရှဖလားပြိုင်ပွဲကို ကာတာနိုင်ငံမှာ ဇန်နဝါရီ ၁၂ ရက်ကနေ ဖေဖော်ဝါရီ ၁၀ ရက်အထိ ကျင်းပသွားမှာ ဖြစ်ပါတယ်။

ဂျပန်အသင်းဟာ ဒီပြိုင်ပွဲရဲ့ အုပ်စု D မှာ အင်ဒိုနီးရှား၊ ဗီယက်နမ်၊ အီရတ်အသင်းတို့နဲ့ တစ်အုပ်စုတည်း ကျရောက် နေတာပါ။

ဂျပန်အသင်းဟာ အာရှဖလားပြိုင်ပွဲ မတိုင်ခင် ဇန်နဝါရီ ၉ ရက်မှာ ဂျော်ဒန်အသင်းနဲ့ ခြေစမ်းပွဲကစားဖို့ စီစဉ်ထား ပြီး ဇန်နဝါရီ ၁၄ ရက်မှာတော့ အုပ်စုအဖွင့်ပွဲစဉ်အဖြစ် ဗီယက်နမ်အသင်းနဲ့ စတင်ယှဉ်ပြိုင်ရမှာ ဖြစ်ပါတယ်။

ဂျပန်အသင်းဟာ အာရှဖလားပြိုင်ပွဲမှာ ချန်ပီယံဆုကို ၁၉၉၂၊ ၂၀၀၀၊ ၂၀၀၄ နဲ့ ၂၀၁၁ ခုနှစ်တွေမှာ ရယူထားပြီး အခု တစ်ကြိမ်ပြိုင်ပွဲမှာ ချန်ပီယံဆုကို ၅ ကြိမ်မြောက် ရယူနိုင်ဖို့ ရည်မှန်းထားတာပါ။

ဂျပန်အသင်းဟာ ပြီးခဲ့တဲ့ ၂၀၁၉ ခုနှစ်က ပြိုင်ပွဲမှာ ဗိုလ်လုပွဲအထိ တက်နိုင်ခဲ့ပေမယ့် ကာတာအသင်းကို အရေးနိမ့် ကာ ဒုတိယနဲ့သာ ကျေနပ်ခဲ့ရတာ ဖြစ်ပါတယ်။

Source: CNA

CNI Sport News

၂၀၂၄ ခုနှစ်၊ ဇန်နဝါရီ ၂

ရလဒ်ဆိုးတွေကြောင့် ဖိအားတွေအောက်ကျရောက်နေတဲ့ ဝိန်းရွန်နီက ဘာမင်ဂမ်အသင်းနည်းပြအဖြစ် သူ့ရဲ့ အနာဂတ်အတွက် တိုက်ပွဲဝင်သွားမယ်လို့ ပြောလိုက်ပါတယ်။

ဝိန်းရွန်နီက “ကျနော်က ဖိုက်တာတစ်ဦးပါ။ ဘောလုံးနဲ့ ပတ်သက်ပြီး သဘောထားအမြင်တွေကို ကျနော် နားလည်ပါတယ်။ ကျနော်ပိုင်ရှင်တွေနဲ့ စကားပြောပြီးပါပြီ။ ကျနော်တို့ ခက်ခဲတဲ့ကာလကို ဖြတ်သန်း နေရတယ်ဆိုတာ ငြင်းစရာမရှိပါဘူး။ ဒီရလဒ်ဆိုးတွေကနေ ရုန်းထွက်ဖို့ ကျနော်တို့ အကောင်းဆုံး လုပ်ဖို့ လိုပါတယ်။ ကိုယ့်ကိုကိုယ်ယုံကြည်မှုရှိရမှာဖြစ်သလို ဒါကို ကျော်ဖြတ်နိုင်မယ်လို့လည်း ကျနော်တို့ ယုံကြည် ထားရမယ်” လို့ ပြောခဲ့တာပါ။

ဘာမင်ဂမ်အသင်းဟာ လိဒ်စ်အသင်းနဲ့ ကစားခဲ့တဲ့ ချန်ပီယံရှစ်ပွဲစဉ်မှာ ၃ ဂိုး-ဂိုးမရှိနဲ့ အရေးနိမ့်ပြီးနောက် အသင်းဟာ အဆင့် ၂၀ နေရာအထိရောက်ရှိသွားကာ တန်းဆင်းဇုန်နဲ့ နီးကပ်လာခဲ့တာပါ။ ဝိန်းရွန်နီဟာ ဘာမင်ဂမ်အသင်းကို ကိုင်တွယ်ထားတဲ့ ၁၅ ပွဲမှာ ၂ ပွဲသာအနိုင်ရအောင် ကိုင်တွယ်ထားနိုင်ခဲ့ပြီး ရလဒ်ဆိုးတွေနဲ့ ကြုံတွေ့ထားရတာဖြစ်ပါတယ်။ ဘာမင်ဂမ်အသင်းဟာ ဝိန်းရွန်နီ မကိုင်တွယ်ခင်က တန်းတက်ပလေးအောဖ့် ဝင်ခွင့်နေရာအတွက် တိုက်ပွဲဝင်နေပေမယ့် လက်ရှိအချိန်မှာတော့ တန်းဆင်းဇုန်ထဲ မရောက်ဖို့ တိုက်ပွဲဝင် နေရတာပါ။

ဘာမင်ဂမ်အသင်းပရိသတ်တွေဟာ ရလဒ်ဆိုးတွေကြောင့် လိဒ်စ်အသင်းနဲ့ ပွဲစဉ်မှာ ဝိန်းရွန်နီကို အသင်းနည်းပြ ရာထူးကနေ ထွက်ခွာဖို့ တောင်းဆိုမှုတွေရှိလာခဲ့တာဖြစ်ပါတယ်။ ဒါပေမယ့် ယူနိုက်တက်ဂန္ထဝင်ကစားသမား ကတော့ ဘာမင်ဂမ်အသင်းနည်းပြရာထူးအတွက် တိုက်ပွဲဝင်သွားမှာဖြစ်ပြီး ရလဒ်ကောင်းတွေရယူနိုင်ဖို့အတွက် အခုအပြောင်းအရွှေ့မှာ ကစားသမားသစ်တွေခေါ်ယူပေးဖို့ လိုတယ်လို့ ပြောထားတာပါ။ 

ဘာမင်ဂမ်အသင်းဟာ ဒီတစ်ပတ်မှာ FA ဖလားပွဲစဉ်အဖြစ် ဟူးလ်စီးတီးအသင်းနဲ့ ယှဉ်ပြိုင်ရမှာဖြစ်ပြီး ဒီပွဲအပြီးမှာ ချန်ပီယံရှစ်ပွဲစဉ်အဖြစ် ဆွမ်ဆီးအသင်းနဲ့ ယှဉ်ပြိုင်ရမှာဖြစ်ပါတယ်။

Source:Theathletic

CNI Sport News

၂၀၂၄ ခုနှစ်၊ ဇန်နဝါရီ ၂

လီဗာပူးလ်အသင်းတိုက်စစ်မှူး ဆာလက်ဟာ နယူးကာဆယ်အသင်းကို အနိုင်ရခဲ့တဲ့ ပရီးမီးယားလိဂ်ပွဲစဉ်ရဲ့ ပထမပိုင်းမှာ ပင်နယ်တီလွဲချော်ခဲ့ပြီးနောက် ဒုတိယပိုင်းမှာ ဖိနပ်လဲစီးခဲ့တယ်လို့ ပြောလိုက်ပါတယ်။

ဆာလက်က “ပင်နယ်တီလွဲချော်ခဲ့တဲ့ ဖိနပ်က မနေ့က ကျနော်လေ့ကျင့်ရေးကွင်းမှာအသုံးပြုခဲ့တာပါ။ ကျနော့်မှာ ဖိနပ်တွေအများကြီးရှိတဲ့အတွက် ဒါက အယူသီးတာတော့မဟုတ်ပါဘူး။ ဒါပေမယ့် ဒီပင်နယ်တီလွဲခဲ့တဲ့အရာက ခေါင်းထဲကို ရောက်လာမယ်ဆိုတဲ့ ခံစားချက်ကြောင့် ဖိနပ်ကို လဲစီးလိုက်တာပါ။ ဒုတိယပိုင်းမှာတော့ စိတ်ကို တည်တည်ငြိမ်ထားပြီး ပွဲကိုအာရုံစိုက်ခဲ့ပါတယ်။ အဲဒါကြောင့်လည်း ကျနော်ဟာ ကွဲပြားခြားနားမှုကို လုပ်နိုင် ခဲ့ပါတယ်”လို့ Sky Sports ကို ပြောခဲ့တာပါ။

လီဗာပူးလ်အသင်းဟာ ဒီပွဲမှာ နယူးကာဆယ်အသင်းကို ၄ ဂိုး-၂ ဂိုးနဲ့ အနိုင်ရရှိခဲ့တာဖြစ်ပါတယ်။ ဆာလက်ဟာ ပထမပိုင်းမှာ ပင်နယ်တီလွဲခဲ့ပေမယ့် ဒုတိယပိုင်းမှာ ၂ ဂိုးသွင်းယူခဲ့ပြီး ဂတ်ပိုနဲ့ ကာတစ်ဂျုံးစ်တို့က ၁ ဂိုးစီ သွင်းယူ ခဲ့တာပါ။ နယူးကာဆယ်အသင်းအတွက် ချေပဂိုးတွေကိုတော့ အိုင်ဆက်ခ်နဲ့ ဘောဒ့်မန်းတို့က သွင်းယူခဲ့တာ ဖြစ်ပါတယ်။ အသက် ၃၁ နှစ်အရွယ်ရှိ ဆာလက်ဟာ ဒီပွဲကသွင်းဂိုးတွေကြောင့် ဒီရာသီ ပရီးမီးယားလိဂ်သွင်းဂိုး ၁၄ ဂိုးအထိရှိလာခဲ့ပြီး မန်စီးတီးအသင်းတိုက်စစ်မှူး ဟာလန်းနဲ့ သွင်းဂိုးအရေအတွက်ချင်း တူညီခဲ့တာပါ။ 

လီဗာပူးလ်အသင်းဟာ နယူးကာဆယ်အသင်းကို အနိုင်ရရှိခဲ့တာကြောင့် အန်ဖီးလ်မှာ ပြိုင်ပွဲစုံ ၂၂ ပွဲ ဆက် ရှုံးပွဲ မရှိသလို နောက်ဆုံးကစားခဲ့တဲ့ ပရီးမီးယားလိဂ်အိမ်ကွင်း ၅၂ ပွဲမှာ ၁ ပွဲသာရှုံးနိမ့်ထားတဲ့ မှတ်တမ်းကောင်းကို ပိုင်ဆိုင်ထားတာဖြစ်ပါတယ်။ လီဗာပူးလ်အသင်းဟာ ဒီရာသီ ပရီးမီးယားလိဂ်ပွဲပေါင်း ၂၀ ကစားအပြီးမှာ ရမှတ် ၄၅ မှတ်နဲ့ ဒုတိယနေရာက အက်စတွန်ဗီလာအသင်းကို ၃ မှတ်အသာရရှိကာ အမှတ်ပေးဇယားကို ဆက်လက် ဦးဆောင်နေတာပါ။

လီဗာပူးလ်အသင်းဟာ ဒီတစ်ပတ်မှာတော့ FA ဖလားပွဲစဉ်အဖြစ် အာဆင်နယ်အသင်းနဲ့ ယှဉ်ပြိုင်ရမှာဖြစ်ပြီး မကြာသေးခင်က ပရီးမီးယားလိဂ်ပွဲစဉ်အဖြစ် ယှဉ်ပြိုင်ခဲ့တုန်းက ၁ ဂိုးစီသရေရလဒ်နဲ့ ပွဲပြီးဆုံးခဲ့တာဖြစ်ပါတယ်။

Source:DailyMail