CNI News

၂၀၂၃ ခုနှစ်၊ စက်တင်ဘာ ၂၂

မြန်မာနိုင်ငံ၏ ပြည်တွင်းလက်နက်ကိုင် ပဋိပက္ခအလွန် တည်ငြိမ်ရေးကာလ ရောက်လာပါက လူထုကြားစိမ့်ဝင် နေသော လက်နက်များကို မည်ကဲ့သို့ ထိန်းချုပ်မလဲဆိုသည့်အပေါ် ငြိမ်းချမ်းရေး လုပ်ငန်းများ လုပ်နေသူများနှင့် နိုင်ငံရေးအသိုင်းအဝိုင်းကြား ဆွေးနွေးသုံးသပ်နေကြသည်။

လက်ရှိတွင် နိုင်ငံတစ်ဝှမ်း လက်နက်ကိုင် ပဋိပက္ခဖြစ်ပွားနေပြီး ပြည်တွင်းသို့ လက်နက်အများအပြား ရောက်ရှိနေ သည်။

လူထုကြားစိမ့်ဝင်နေသော လက်နက်များကို ပြန်ရုပ်သိမ်းရန် မလွယ်ကူကြောင်း၊ ပဋိပက္ခဖြစ်ပွားနေသော နှစ်ဖက် အဖွဲ့အစည်း ခေါင်းဆောင်များအပေါ်တွင် တာဝန်ရှိကြောင်း လီဆူအမျိုးသားဖွံ့ဖြိုးတိုးတက်ရေးပါတီ (ဒူးလေးပါတီ)မှ ဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။

၎င်းက “ဒါကတော့ ကျနော်တို့ အမြင်ကတော့ နိုင်သည်ဖြစ်စေ၊ မနိုင်ဘူးဖြစ်စေပေါ့။ ပြည်တွင်းပဋိပက္ခကတော့ ချုပ်ငြိမ်းဖို့ကတော့ အတော်အတန် အချိန်ယူရဦးမှာ နိုင်ရင်လည်း ဒီပဋိပက္ခက ချုပ်ငြိမ်းသွားမှာ မဟုတ်ဘူး။ မနိုင် ရင်လည်း ချုပ်ငြိမ်းသွားမှာ မဟုတ်ဘူး။ လူတွေရဲ့ လက်ထဲမှာ လက်နက်တွေ ရှိနေသရွေ့ကတော့ ရှင်းရှင်းပြော မယ်ဆိုရင်တော့ လက်နက်နဲ့ ငွေရှာတာက လွယ်တယ်လေ၊ ငွေရှာတာက လွယ်တယ်၊ လက်နက်မပါဘဲနဲ့ ရှာတာ က နည်းနည်းပင်ပန်းတယ်၊ အဲဒီအခါကြတော့ ပြည်တွင်းမှာ အခုတော့ လက်နက် အမြောက်အများ ရောက်နေပြီ။ လက်နက်အမြောက်အများ ကိုင်နေကြပြီဆိုတော့ ဒီဟာကို လက်နက်ပြန်ရုပ်သိမ်းဖို့၊ ပြန်စုစည်းဖို့ လွယ်တော့ မလွယ်လောက်ဘူးလို့ ကျနော်တို့က အဲဒီလို မြင်တာပေါ့နော်၊ ဒါပေမဲ့ ဒါကတော့ နိုင်ငံတော်အကြီးအကဲတွေ နှစ်ဖက်စလုံးမှာရှိတဲ့ တာဝန်ရှိ ပုဂ္ဂိုလ်တွေပေါ့။ အခု နိုင်ငံတော်အကြီးအကဲတွေပေါ့။ တစ်ဖက်မှာရှိတဲ့ ဆန့်ကျင် ဖက် အင်အားစု ပုဂ္ဂိုလ်တွေရဲ့ စွမ်းဆောင်ရည် အပေါ်မှာလည်း မူတည်တာပေါ့ကွာ သူတို့က နိုင်ငံကို ချစ်တယ်၊ နိုင်ငံကို ကောင်းစားချင်တယ်၊ နိုင်ငံက သူများနိုင်ငံလို ရင်ဘောင်တန်းနိုင်အောင်တော့ အကောင်းဆုံးနည်းလမ်းက သူတို့ လုပ်လိမ့်မယ်လို့ မြင်တာပေါ့၊ ကျနော်တို့တော့” ဟု ပြောသည်။

စစ်ကိုင်းတိုင်းဒေသကြီးအတွင်းမှာ လက်နက်ခဲယမ်းများ ဖမ်းဆီးရမိစဉ်

အဆိုပါ လက်နက်များအား မထိန်းချုပ်နိုင်ပါက ပြည်သူများအနေဖြင့် ကျီးလန့်စာစား နေရမှာဖြစ်ကြောင်း၊ ခိုးမှု- သတ်ဖြတ်မှုများ ပိုမိုများပြားလာမှာဖြစ်ကြောင်း ၎င်းက ပြောသည်။

တိုင်းပြည်တည်ငြိမ်ပြီးနောက် ပထမဆုံး လုပ်ရမည့်ကိစ္စမှာ လက်နက်ဖြုတ်သိမ်းရေးဖြစ်ကြောင်း၊ ထိုကိစ္စအား ဖိဖိစီးစီး လုပ်ဆောင်ရန် လိုအပ်ကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

၎င်းက “အဲဒါကတော့ ရာဇဝတ်ဂိုဏ်းတွေပေါ့နော်၊ ဒါကတော့ ဒီလိုပါပဲ။ ဆိုဗီယက်ယူနီယံကြီး ပြိုကွဲတဲ့အချိန်မှာ ရာဇဝတ်ဂိုဏ်းတွေပေါ်လာတယ်၊ ဒီလိုပါပဲ ကျနော်တို့ နိုင်ငံတစ်နိုင်ငံဟာ နိုင်ငံရေးစစ်တွေပဲဖြစ်ဖြစ် ပြီးသွားတဲ့ အခါမှာ လက်နက်တွေကို မထိန်းချုပ်နိုင်ဘူးဆိုရင် ဒါကတော့ ရာဇဝတ် ဒါတွေ သုံးလာမယ်ဆိုတာကတော့ နိုင်ငံတိုင်းရဲ့ လက္ခဏာဖြစ်တာပေါ့၊ ဒါကတော့ ကျနော်တို့ ဖိဖိစီးစီး လုပ်ဖို့ပဲလိုပါတယ်။ သိပ်ပြီးတော့ စိုးရိမ်စရာ တော့ မရှိပါဘူး” ဟု ပြောသည်။

ပြည်သူ့ကာကွယ်ရေးတပ်ဖွဲ့၀င်များကို တွေ့ရစဉ်

မြန်မာပြည်၏ နယ်စပ်ဒေသများတွင် သာမက ယခင်က လက်နက်ကိုင်ပဋိပက္ခ မရှိခဲ့သော ပြည်မဒေသများတွင်ပါ တိုက်ပွဲများ ဖြစ်ပွားလာပြီး လက်နက်ခဲယမ်းများ ရောက်ရှိထားသည်။

ထို့အတူ လက်နက်ခဲယမ်း ပေါများလာခြင်းနှင့်အတူ ဓါးမြမှု၊ ခိုးမှု၊ လုယက်မှု၊ သတ်ဖြတ်မှုများ ဖြစ်ပွားနေပြီး ပြည်သူများအနေဖြင့် လုံခြုံရေးစိုးရိမ်နေရသည်။

ပြီးခဲ့သည့် သြဂုတ် ၁၀ ရက်နေ့က စစ်ကိုင်းတိုင်းဒေသကြီး၊ မုံရွာမြို့၊ ထန်းတောရပ်ကွက်၊ အင်းဖြတ်လမ်းရှိ နေအိမ် တအိမ်ကို သေနတ်များကိုင်ဆောင်ထားသော အမျိုးသား ၆ ဦးက ဓားပြတိုက်၍ မွေးဖွားရန် ၃ ရက်သာ လိုတော့ သည့် ကိုယ်ဝန်ဆောင် အမျိုးသမီးကိုပါ သတ်သွားခဲ့သည့် ဖြစ်စဉ်များရှိခဲ့သည်။ 

CNI News

၂၀၂၃ ခုနှစ်၊ စက်တင်ဘာ ၂၂

တော်လှန်ရေးကာလ ချင်းပြည်ဖွဲ့စည်းပုံအခြေခံဥပဒေ ပေါ်ပေါက်လာရေး ညီလာခံ တစ်ရပ် ခေါ်ယူ ကျင်းပရန် ချင်းလက်နက်ကိုင်များ အပါအဝင် ချင်းလွှတ်တော်အမတ်များ၊ မြို့နယ်နှင့်ဒေသအခြေပြု အဖွဲ့အစည်းများက သဘောတူခဲ့ကြကြောင်း သိရသည်။

အဆိုပါ ညီလာခံ ဖြစ်မြောက်ရေးအတွက် Working Committee for Chinland Council Conference (WCCCC)ကို ဖွဲ့စည်းခဲ့ကြောင်း၊ ချင်းပြည် ဖွဲ့စည်းပုံအခြေခံဥပဒေ ရေးဆွဲနိုင်ရေး ဆွေးနွေးပွဲကို Pre-Plenary Meeting for Chinland Council ကို နယ်စပ်တစ်နေရာတွင် ၂၀၂၃ ခုနှစ်၊ စက်တင်ဘာ ၇ ရက်မှ ၉ ရက်နေ့ အထိ ကျင်းပခဲ့ကြောင်း WCCCC က ယနေ့ (စက်တင်ဘာ ၂၂ ရက်) ထုတ်ပြန်ခဲ့သည်။

WCCCC ထုတ်ပြန်ချက်ကို တွေ့ရစဉ်

လက်ရှိတွင် WCCCC သည် တော်လှန်ရေးကာလ ချင်းပြည်ဖွဲ့စည်းပုံအခြေခံဥပဒေ မူကြမ်းရေးဆွဲခြင်းကို ဆောင်ရွက်လျက်ရှိကြောင်း၊ Chinland Council ညီလာခံကြီး ကျင်းပပြုလုပ်နိုင်ရေးအတွက် လိုအပ်သည့် ပြင်ဆင်မှုများကိုလည်း ဆောင်ရွက်လျက်ရှိကြောင်း ပြောသည်။

WCCCC သည် ချင်းပြည်နယ်ဖွဲ့စည်းပုံအခြေခံဥပဒေ ပေါ်ပေါက်လာရေး၊ ချင်းပြည်ကောင်စီ ဖွဲ့စည်းရေးနှင့် ချင်းပြည်၏ ဥပဒေပြုရေး- အုပ်ချုပ်ရေး- တရားစီရင်ရေးမဏ္ဍိုင်(၃) ရပ် ဖွဲ့စည်း ထူထောင်ရေးအတွက် ညီလာခံ ခေါ်ယူ ကျင်းပရန်လည်း ပြင်ဆင်လျက်ရှိသည်။

ချင်းပြည်နယ်သည် ၂၀၂၁ ခုနှစ်၊ ဖေဖော်ဝါရီ ၁ ရက်နေ့မှ စတင်ကာ ပေါ်ပေါက်ခဲ့သော နွေဦးတော်လှန်ရေးတွင် ပါဝင်နေပြီး လက်နက်ကိုင် ပဋိပက္ခများလည်း ပြင်းထန်စွာ ဖြစ်ပွားလျက်ရှိနေသည်။

CNI News

၂၀၂၃ ခုနှစ်၊ စက်တင်ဘာ ၂၁

တိုင်းရင်းသား လက်နက်ကိုင် အဖွဲ့အစည်းများရှိရာ ဒေသများတွင် လွတ်လပ်ပြီး တရားမျှတသည့် ပါတီစုံ ဒီမိုကရေစီ အထွေထွေရွေးကောက်ပွဲ အောင်မြင်စွာ ကျင်းပနိုင်ရေး ပူးပေါင်းဆောင်ရွက်ရန် ရှမ်းပြည်ပြန်လည် ထူထောင်ရေးကောင်စီ(RCSS)နှင့် အမျိုးသားစည်းလုံးညီညွတ်ရေးနှင့်ငြိမ်းချမ်းရေး ဖော်ဆောင်မှု ညှိနှိုင်းကော် မတီ(NSPNC)တို့ တွေ့ဆုံ ဆွေးနွေးကြသည်။

အဆိုပါ တွေ့ဆုံ ဆွေးနွေးမှုကို ၂၀၂၃ ခုနှစ်၊ စက်တင်ဘာ ၂၁ ရက်နေ့က နေပြည်တော်ရှိ အမျိုးသားစည်းလုံးညီ ညွတ်ရေးနှင့် ငြိမ်းချမ်းရေးဖော်ဆောင်မှုဗဟိုဌာနမှာ ကျင်းပခဲ့သည်။

ထို့နောက် NCA နှင့် NCA (၈)နှစ်မြောက် နှစ်ပတ်လည်နေ့ အခမ်းအနားအား အလေးအနက်ထား၍ ကျင်းပနိုင် ရေး၊ တိုင်းရင်းသား လက်နက်ကိုင်အဖွဲ့အစည်းများရှိရာ ဒေသများတွင် လွတ်လပ်ပြီး တရားမျှတသည့် ပါတီစုံ ဒီမိုကရေစီ အထွေထွေ ရွေးကောက်ပွဲ အောင်မြင်စွာ ကျင်းပနိုင်ရေး ပူးပေါင်း ဆောင်ရွက်ရန်ကိစ္စတို့ကို RCSS နှင့် NSPNC တို့ ဆွေးနွေးခဲ့ကြသည်။

အလားတူ တိုင်းရင်းသား လက်နက်ကိုင် အဖွဲ့အစည်းများရှိရာ ဒေသများတွင် လူသားချင်း စာနာမှု အကူအညီ ပေးအပ်နိုင်ရေး ပူးပေါင်း ဆောင်ရွက်ရန်၊ ဖွဲ့စည်းပုံအခြေခံဥပဒေ (၂၀၀၈ ခုနှစ်)တွင် ပြင်ဆင်သင့်သည့် ပုဒ်မများ နှင့် ဒေသခံဖွံ့ဖြိုးတိုးတက်ရေး၊ စီးပွားရေးဆိုင်ရာ လိုအပ်ချက်များအပေါ် RCSS မှ ဆွေးနွေးချက်များအား အပြန် အလှန် ဆွေးနွေး ညှိနှိုင်းခဲ့ကြသည်။

၂၀၂၃ ခုနှစ်၊ စက်တင်ဘာ ၂၁ ရက်နေ့က RCSS နှင့် NSPNC တွေ့ဆုံ ဆွေးနွေးနေစဉ်

ထို့နောက် ဆွေးနွေးပွဲကို စက်တင်ဘာ ၂၂ ရက်နေ့တွင် ဆက်လက် ကျင်းပသွားရန် နှစ်ဖက် သဘောတူညီခဲ့ကြ သည်။

အဆိုပါ တွေ့ဆုံ ဆွေးနွေးပွဲသို့ RCSS ဘက်မှ အတွင်းရေးမှူး(၁) စဝ်စိုင်းငင်း၊ ဗဟိုအလုပ်အမှုဆောင်ကော်မတီ ဝင် စဝ်ဆောင်းဟန်နှင့် စဝ်အုမ်ခေး၊ ဗဟိုဦးစီးကော်မတီဝင် စဝ်စိုင်းဟန်နှင့် စဝ်စိုင်းလျဲန်းတို့ တက်ရောက်ခဲ့ သည်။

NSPNC ဘက်ကတော့ အတွင်းရေးမှူး ဒုတိယဗိုလ်ချုပ်ကြီး မင်းနိုင်နှင့် ညှိနှိုင်းရေးကော်မတီ အဖွဲ့ဝင်များ တက်ရောက်ခဲ့ကြသည်။

RCSS သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ကို ၂၀၁၅ ခုနှစ်၊ အောက်တိုဘာ ၁၅ ရက်နေ့က တခြားသော လက်နက်ကိုင် ၇ ဖွဲ့နှင့်အတူ လက်မှတ်ရေးထိုးထားသည်။

CNI News

၂၀၂၃ ခုနှစ်၊ စက်တင်ဘာ ၂၁

မြန်မာနိုင်ငံတွင် ဖြစ်ပွားနေသော လက်နက်ကိုင် ပဋိပက္ခများချုပ်ငြိမ်းရေးနှင့် ငြိမ်းချမ်းရေး လုပ်ငန်းစဉ်များ အောင်မြင်စွာ ဆောင်ရွက်နိုင်ရေးအတွက် သီးသန့်လုပ်ဆောင်မည့် ဝန်ကြီးဌာနတစ်ခု လိုအပ်ကြောင်း နိုင်ငံရေး သမားများနှင့် ငြိမ်းချမ်းရေးလုပ်ငန်း လုပ်ကိုင်နေသူများက ပြောသည်။ 

အဆိုပါ ဝန်ကြီးဌာနမှာ တခြားသော ကဏ္ဍများကို ဆောင်ရွက်ရန် မလိုဘဲ ငြိမ်းချမ်းရေးလုပ်ငန်းစဉ်ကိုသာ တစိုက် မတ်မတ် လုပ်ဆောင်ရမည်ဟုလည်း အကြံပြုကြသည်။

လက်ရှိ နစကလက်ထက်တွင် ၎င်းကဲ့သို့ ဝန်ကြီးဌာနတစ်ခု ဖွဲ့စည်းရန် မဖြစ်နိုင်ကြောင်း၊ ၆ လတစ်ကြိမ် သက်တမ်းတိုး၍ သွားနေသည့် လမ်းကြောင်းအရ အခက်အခဲ ရှိနိုင်ကြောင်း ပအိုဝ်းအမျိုးသားလွတ်မြောက်ရေး အဖွဲ့ချုပ် (PNLO) မှ နာယက ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

၎င်းက “MPC တုန်းကလည်း ဝန်ကြီးဌာနမရှိဘူး။ သို့သော် ဒေါ်အောင်ဆန်းစုကြည် လက်ထက်မှာတော့ ဝန်ကြီး ဌာန လိုတယ်၊ ဘာကြောင့်လဲဆို‌တော့ တာဝန်ပေးတဲ့လူတွေက ဒေါက်တာတင်မျိုးဝင်းတို့ ဘာတို့က လုပ်နည်းလုပ် ဟန် အားနည်းတဲ့အခါကြတော့ ကျနော်တို့က အကြံပေးတယ်၊ သို့သော် ဒေါ်အောင်ဆန်းစုကြည်က လက်မခံခဲ့ ဘူး။ ပယ်ချတာပေါ့၊ ပယ်ချတဲ့အတွက် အခု နောက်ထပ် အပြောင်းအလဲ‌တွေ ဖြစ်လည်းပဲ ဝန်ကြီးဌာန မရှိတော့ ငြိမ်းချမ်းရေး လုပ်ငန်းစဉ်က လမ်းစပြတ်သွားသလို ဖြစ်သွားတာပေါ့၊ အဲဒီတုန်းက ကျနော်တို့ အကြံပေးတဲ့အတိုင်း ဝန်ကြီးဌာန ဒေါ်စုက ထားခဲ့မယ်ဆိုရင် နောက်တက်မယ့် ဘယ်သူပဲတက်လာ၊ တက်လာ ဝန်ကြီးဌာန ရှိနေရင် အခြေခံ အုတ်မြစ်ခိုင်တာပေါ့၊ အဲဒီလိုတော့ ရှိပါတယ်။ သူတို့က (နစက) ၆ လ၊ ၆ လ သက်တမ်းတိုးနေတဲ့ လိုင်းထဲ မှာရှိတော့ သူတို့ကတော့ ကြားကာလ ပုံစံပဲဖြစ်မယ်ဗျ၊ ကြားကာလ ပုံစံပဲ ဖြစ်နေတော့ ဝန်ကြီးဌာန ထားလောက် အောင်လည်း အခြေအနေ မပေးဘူးလို့ ကျနော်ထင်တယ်၊ နောက်တစ်ခုကလည်း ဝန်ကြီးဌာန ထပ်တိုးဖို့ မပြောနဲ့ ရှိတဲ့ ဝန်ကြီးဌာနတွေ ဘယ်လောက် အလုပ်ဖြစ်လဲဆိုတာ ကြည့်တော့ နည်းနည်းတော့ ကမောက်ကမ ဖြစ်ချင် တာတွေ တွေ့နေတော့ အခုအချိန်မှာတော့ ထားလို့တော့ နည်းနည်းခက်မယ်လို့ ထင်တယ်” ဟု ပြောသည်။

NSPNC ဥက္ကဋ္ဌ ဒုတိယဗိုလ်ချုပ်ကြီးရာပြည့်ကို တွေ့ရစဉ်

လက်ရှိတွင် နစကသည် ဒုတိယဗိုလ်ချုပ်မှူးကြီးစိုးဝင်း ဦးဆောင်သည့် အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု လုပ်ငန်းကော်မတီ(NSPWC)နှင့် ဒုတိယဗိုလ်ချုပ်ကြီးရာပြည့် ဦးဆောင်သော အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ (NSPNC)ကို ဖွဲ့စည်း၍ ငြိမ်းချမ်းရေးလုပ်ငန်းစဉ်ကို ဖော်ဆောင်လျက်ရှိသည်။

သို့သော် NSPNC ဥက္ကဋ္ဌဖြစ်သူ ဒုတိယဗိုလ်ချုပ်ကြီးရာပြည့်သည် ငြိမ်းချမ်းရေး လုပ်ငန်းစဉ် တစ်ခုတည်းကိုသာ အာရုံစိုက် လုပ်ဆောင်ရခြင်းမဟုတ်ဘဲ ပြည်ထဲရေးဝန်ကြီးရာထူး အပါအဝင် နစက အဖွဲ့ဝင်၊ အမျိုးသားလုံခြုံရေး ဆိုင်ရာအကြံပေးဆိုသော တာဝန်များကိုလည်း ထမ်းဆောင်နေရသူဖြစ်သည်။ 

ငြိမ်းချမ်းရေးကို တစိုက်မတ်မတ် လုပ်ဆောင်နိုင်မည့် ဝန်ကြီးဌာန တစ်ခုရှိနေမည်ဆိုပါက ပို၍ သင့်တော်မည် ဖြစ်ကြောင်း ရခိုင်အမျိုးသားပါတီ (ANP) မှ မူဝါဒရေးရာ ဦးဆောင်ကော်မတီဝင် ဦးထွန်းအောင်ကျော်က CNI သတင်းဌာနသို့ ပြောသည်။

၎င်းက “ဟုတ်ကဲ့ ကျနော်လည်း ထောက်ခံပါတယ်။ လိုအပ်တယ်လို့လည်း မြင်ပါတယ်။ အဓိက ဦးစားပေးပြီးတော့ မှ စောက်ချပြီးတော့မှ နိုင်ငံရေးပြဿနာကို နိုင်ငံရေးနည်းနဲ့ ဖြေရှင်းနိုင်တဲ့ တွေ့ဆုံညှိနှိုင်း စေ့စပ်ဆွေးနွေးရေး ကိစ္စဟာ အလွန်တရာ အရေးကြီးတယ်၊ ပြင်းထန်ကြီးမားတဲ့ ပဋိပက္ခကို ဒီလိုစေ့စပ်ညှိနှိုင်း တိုင်ပင်ပြီးတော့မှ ကျော်လွှားနိုင်မယ်လို့ အလေးအနက် ယုံကြည်တဲ့အတွက် ဒီကိစ္စကို ဦးစားပေးပြီးတော့ တစိုက်မတ်မတ် အာရုံ စူးစိုက်ပြီးတော့ နိုင်ငံရေးအတွေးအခေါ်ရှိတဲ့ ပုဂ္ဂိုလ်တွေနဲ့ ဖွဲ့စည်းထားတဲ့ ဝန်ကြီးဌာနတစ်ခု ရှိနေရင် ပိုပြီးတော့ သင့်တော်မယ်လို့ အလေးအနက် ယုံကြည်ပါတယ်ခင်ဗျ” ဟု ပြောသည်။

NCA ထိုး ၇ ဖွဲ့နဲ့ NSPNC ဆွေးနွေးစဉ်

မြန်မာ့အရေး ဖြေရှင်းနိုင်ရေး မည်သည့်လမ်းကြောင်းဖြင့် ဖော်ဆောင်မလဲဆိုသည့် အပေါ်တွင် မူတည်ကြောင်း ပလောင်နိုင်ငံရေးသမား မိုင်းအုဏ်းခိုင်က CNI သတင်းဌာနသို့ ပြောသည်။

မိုင်းအုဏ်းခိုင်က “လောလောဆယ် တွေ့ဆုံညှိနှိုင်း အဖြေရှာမှု နည်းလမ်းကို ဘယ်လို နည်းလမ်းနဲ့ သွားကြမလဲ၊ ဘယ်လို လမ်းကြောင်းကို ရှာကြမလဲ၊ ဝန်ကြီးဌာနဖွဲ့သော်လည်းပဲ ကျန်တဲ့အဖွဲ့ သဘောထား ဘယ်လို ရှိမလဲ၊ ဘယ်လို လမ်းကြောင်းနဲ့ ဖော်ဆောင်မလဲဆိုတဲ့ တွေ့ဆုံညှိနှိုင်း အဖြေရှာတဲ့ လမ်းကြောင်းက လုပ်ထားရမှာ၊ အဲဒါမှ သာလျှင် ကျနော်တို့ ဘယ်လမ်းကြောင်းကို ရွေးကြမလဲ။ ဌာနတစ်ခုဖွဲ့ပြီးတော့မှ ဆောင်ရွက်သွားမလား။ အဖွဲ့အစည်း တစ်ခုအနေနဲ့ ဖွဲ့စည်းပြီးမှ သွားကြမလား စတဲ့လမ်းကြောင်းက ရမှာပေါ့” ဟု ပြောသည်။

လက်ရှိတွင် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA)ထိုးထားသည့် လက်နက်ကိုင် ၇ ဖွဲ့ အပြင် NCA မထိုးရသေးသည့် ရှမ်းပြည်တိုးတက်ရေးပါတီ(SSPP)၊ အမျိုးသားဒီမိုကရေစီမဟာမိတ်တပ်မတော် (NDAA)၊ “ဝ"ပြည်သွေးစည်းညီညွတ်ရေးတပ်မတော်(UWSA)တို့နှင့် နစကသည် ငြိမ်းချမ်းရေးလုပ်ငန်းစဉ်များကို ဆောင်ရွက်လျက်ရှိသည်။

CNI News

၂၀၂၃ ခုနှစ်၊ စက်တင်ဘာ ၂၀

နိုင်ငံခြားသုံးငွေကြီးကြပ်မှုကော်မတီဥက္ကဋ္ဌ အဖြစ်ကနေ ဒုတိယဗိုလ်ချုပ်ကြီး မိုးမြင့်ထွန်းကို ဖယ်ရှားလိုက်ပြီး ဒုတိယဝန်ကြီးချုပ်နှင့် ပို့ဆောင်ရေးနှင့်ဆက်သွယ်ရေးဝန်ကြီး ဗိုလ်ချုပ်ကြီးမြထွန်းဦးကို အစားထိုး ခန့်အပ် တာဝန် ပေးလိုက်ကြောင်း သိရသည်။

၂၀၂၃ ခုနှစ်၊ စက်တင်ဘာ ၁၈ ရက်နေ့က နိုင်ငံခြားသုံးငွေကြီးကြပ်မှုကော်မတီကို ပြင်ဆင်ဖွဲ့စည်းလိုက်ကြောင်း သိရသည်။

အဆိုပါ ပြင်ဆင် ဖွဲ့စည်းသည့် ကော်မတီတွင် ဥက္ကဋ္ဌအဖြစ် ဗိုလ်ချုပ်ကြီးမြထွန်းဦး၊ အတွင်းရေးမှူးအဖြစ် ရင်းနှီး မြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီး ဒေါက်တာကံဇော်၊ အဖွဲ့ဝင်များအဖြစ် ဒုတိယဝန်ကြီးချုပ်နှင့် စီမံကိန်းနှင့်ဘဏ္ဍာရေးဝန်ကြီး ဦးဝင်းရှိန်၊ နစကဥက္ကဋ္ဌ အကြံပေး ဒုတိယဗိုလ်ချုပ်ကြိး ညိုစော၊ စီးပွားရေးနှင့် ကူးသန်းရောင်းဝယ်ရေးဝန်ကြီး ဦးအောင်နိုင်ဦး၊ ဗဟိုဘဏ်ဥက္ကဋ္ဌ ဒေါ်သန်းသန်းဆွေတို့ တာဝန်ယူကြမည်ဖြစ် သည်။

ဒုတိယဗိုလ်ချုပ်ကြီး မိုးမြင့်ထွန်းသည် အဂတိလိုက်စားမှုဖြင့် စစ်ဆေး အရေးယူခံထားရသည်။

နစကနှင့်နီးစပ်သူ တချို့ကတော့ ဒုတိယဗိုလ်ချုပ်ကြီး မိုးမြင့်ထွန်းသည် ပြီးခဲ့သည့် ရက်ပိုင်းက နုတ်ထွက်စာ တင်သွားပြီးဖြစ်ကြောင်း၊ လက်ရှိမှာ ရုံးထိုင်ခြင်း မရှိတော့ကြောင်း ပြောသည်။

CNI News

၂၀၂၃ ခုနှစ်၊ စက်တင်ဘာ ၂၀

မြန်မာ့နိုင်ငံရေး အကျပ်အတည်းကို ဖြစ်ပေါ်စေခဲ့သော နွေဦးတော်လှန်ရေးကို စတင်ခဲ့သူများ ကိုယ်တိုင်ဖြေရှင်းမှ ရမည်ဟု ရခိုင်အမျိုးသားပါတီ(ANP)မှ ပြည်သူ့လွှတ်တော်ကိုယ်စားလှယ်ဟောင်း ဦးဘရှိန်က CNI သတင်းဌာနသို့ ပြောသည်။

လက်ရှိ တော်လှန်ရေးကို စတင်ခဲ့ပြီးနောက် မည်ကဲ့သို့သော ဆက်လက်လှုပ်ရှားမည်ကို မသိနိုင်ကြောင်း၊ ပြဿနာ ဖြေရှင်းရေးတွင်လည်း အဆိုပါ အဖွဲ့အစည်းများအပေါ် မူတည်ကြောင်း ၎င်းက ပြောသည်။

ဦးဘရှိန်က “နွေဦးတော်လှန်ရေးကို ဖြေရှင်းဖို့ကြ နွေဦးတော်လှန်ရေးကို ဘယ်သူက စလုပ်တာတုန်း၊ နွေဦးတော်လှန်ရေးကို လုပ်တဲ့သူတွေ သူတို့က သူတို့ရဲ့ Destinations က ဘာလဲ၊ သူတို့ Destinations ကို ဘယ်လို သွားမှာလဲ။ ဝရုန်းသုန်းကားနဲ့ နွေဦးတော်လှန်ရေးလို့ ထအော်တာလား၊ အဲဒါတွေကလည်း ကိုယ့်ဟာကို သေချာ classify လုပ်ပြီးတော့ နိုင်ငံရေးအရ တကယ်ဖြတ်သန်းမယ်ဆိုလို့ရှိရင် အစီအစဉ်ချပြီးတော့ လုပ်တာဆို လို့ရှိရင်တော့ သူတို့မှာ အစီအစဉ်တွေ ရှိမှာပေါ့နော်၊ နွေဦးတော်လှန်ရေးဆိုတာလည်း နွေဦးတော်လှန်ရေးကို ဘယ်သူတွေက စပြီးတော့ လှုံ့ဆော်လိုက်တယ်၊ ဒါမှမဟုတ်ရင်လည်း စပြီးတော့ သန္ဓေတည်ပေးလိုက်တဲ့ အဲဒီလူ တွေမှာ ဒီကိစ္စတွေကို သူတို့ ဘာပြောကြလဲ၊ အဲဒါအရေးကြီးတာပဲ” ဟု CNI သတင်းဌာနသို့ ပြောသည်။

PDF ရဲဘော်နဲ့ NUG ကာကွယ်ရေး၀န်ကြီး ဦးရည်မွန်ကိုတွေ့ရစဉ်

၂၀၂၁ ခုနှစ်၊ ဖေဖော်ဝါရီ ၁ ရက်က မြန်မာ့တပ်မတော်မှ NLD အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချခဲ့ပြီးနောက် အာဏာရယူလိုက် သည်။
ထို့နောက် မြန်မာ့တပ်မတော်ကို ပြန်လည် ဖြုတ်ချနိုင်ရေး NLD အမတ်များနှင့် ဒီမိုကရေစီ အင်အားစုများမှ နွေဦးတော်လှန်ရေးအား ဆင်နွှဲခဲ့ကြသည်။

အဆိုပါ နွေဦးတော်လှန်ရေးကနေ လက်နက်ကိုင်ပဋိပက္ခမှာ နှစ်နှစ်ကျော်လာသည့်တိုင် ပြေလည်နိုင်ခြင်း မရှိသေးဘဲ မြန်မာနိုင်ငံသူ/သားများမှာ အကျပ်အတည်းပေါင်းစုံဖြင့် ရင်ဆိုင်နေရသည်။

မြန်မာ့နိုင်ငံရေးပြဿနာကို ဖြေရှင်းရာမှာ တွေ့ဆုံညှိနှိုင်းသည့် လမ်းကြောင်းထက် ကောင်းသည့် နည်းလမ်း မရှိသောကြောင်း ပလောင်နိုင်ငံရေးသမား မိုင်းအုဏ်းခိုင်က CNI သတင်းဌာနသို့ ပြောသည်။

မြန်မာ့တပ်မတော်ကို တွေ့ရစဉ်

၎င်းက “အကောင်းဆုံး နည်းလမ်းက တွေ့ဆုံညှိနှိုင်းရေး နည်းလမ်းပဲလေ၊ ဒီနည်းလမ်းထက်ကောင်းတော့ မရှိ တော့ဘူး ထင်တာပဲ၊ တွေ့ဆုံညှိနှိုင်းရေး နည်းလမ်းကပဲ ငြိမ်းချမ်းရေးကို သွားနိုင်မယ့် နည်းလမ်းဖြစ်တယ်။ အဓိက ကတော့ ကျနော်တို့ ပြည်တွင်းမှာ ရှိနေတဲ့ အင်အားစုတွေက စုပေါင်းပြီးမှ ညီညီညွတ်ညွတ်နဲ့ တောင်းဆိုကြမယ် ဆိုရင်တော့ ရနိုင်မယ်လို့ မြင်တာပေါ့” ဟု ပြောသည်။

ပြည်တွင်းနိုင်ငံရေးကို ဖြေရှင်းရန် ပြည်တွင်းရှိ နိုင်ငံရေးအင်အားစု အဖွဲ့အစည်းအချို့၊ အာဆီယံ၊ ကုလသမဂ္ဂ အပါအဝင် နိုင်ငံတကာက ကြိုးပမ်းလျက် ရှိနေသည်။

သို့သော် ပဋိပက္ခတွင် ပါဝင်ပတ်သက်နေသော အဖွဲ့အစည်းများမှာ တွေ့ဆုံဆွေးနွေးရေး လမ်းကြောင်းထက် တစ်ဖက်နှင့် တစ်ဖက် အပြုတ်တိုက်ရေးကို ပိုမိုအားသန်ကြကြောင်း သုံးသပ်မှုများလည်း ရှိနေသည်။

လက်ရှိ မြန်မာနိုင်ငံ၏ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ တနင်္သာရီတိုင်းဒေသကြီး၊ ချင်းပြည်နယ်၊ ကရင်ပြည်နယ်၊ ကယားပြည်နယ်၊ ကချင်ပြည်နယ်၊ မွန်ပြည်နယ်တို့တွင် လက်နက်ကိုင် ပဋိပက္ခများ ဖြစ်ပွားလျက် ရှိနေသည်။

အဆိုပါ လက်နက်ကိုင် ပဋိပက္ခများကြောင့် တိုင်းပြည်၏ နိုင်ငံရေး၊ စီးပွားရေး၊ ပညာရေး၊ ကျန်းမာရေး စသည့် အခန်းကဏ္ဍများမှာ အဖက်ဖက်က ယိုယွင်းကျဆင်းလျက် ရှိနေသည်။

CNI News

၂၀၂၃ ခုနှစ်၊ စက်တင်ဘာ ၁၉

တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) ကို ပဋိပက္ခဖြစ်ပွားနေသော နှစ်ဖက် အဖွဲ့အစည်းများက အသုံးချနေကြောင်း ပအိုဝ်းအမျိုးသားလွတ်မြောက်ရေး အဖွဲ့ချုပ် (PNLO)မှ နာယက ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

NCA ကို မြန်မာ့တပ်မတော် အပါအဝင် လက်မှတ်ရေးထိုးထားသော တိုင်းရင်းသားလက်နက်ကိုင် အဖွဲ့အစည်းများ အနေဖြင့် အင်အားသုံးပြီး ပြဿနာကို ဖြေရှင်းခြင်းက NCA မူများနှင့် မကိုက်ညီကြောင်း ၎င်းက ပြောသည်။

ဗိုလ်မှူးကြီး ခွန်ဥက္ကာက “နှစ်ဖက်စလုံးကတော့ ဒီလိုပဲပေါ့ဗျာ ကိုယ့်အတွက် ကိုယ်ရပ်တည်နေတဲ့ နိုင်ငံရေး Position ကို ကြည့်ပြီးတော့ NCA ကို ကိုင်စွဲကြတာပါပဲ ရှင်းရှင်းပြောရရင်တော့ ဘယ်ဖက်ကမဆို NCA ကို အတိ အကျ လိုက်နာမယ်ဆိုရင်တော့ အင်အားသုံးပြီးတော့ ပြဿနာရှင်းတာ NCA မူနဲ့တော့ မကိုက်ပါဘူး။ ဘယ်ဖက်က ဖြစ်ဖြစ် အကြမ်းဖက်တာတို့ အင်အားသုံးတာတို့က NCA မူထဲမှာ မပါဘူး။ ဒါပေမဲ့ အားလုံး ပဋိပက္ခမှာ ပါနေတဲ့ ဘက်ပေါင်းစုံက အင်အားတွေ သုံးနေကြတော့ ဒါတော့ NCA မူ မဟုတ်တာတော့ သေချာတယ်၊ ထို့အတူ ပဲ NCA ထိုးပြီးတော့မှ လက်နက်ကိုင်ပဋိပက္ခထဲမှာ ပါသွားတဲ့အဖွဲ့က ၃ ဖွဲ့ပဲ ရှိပါတယ်။ တခြမ်းတခြမ်းစီ ပါကြတာ CNF တစ်ဖွဲ့ကတော့ နည်းနည်း အပြည့်အဝ ပါသလိုရှိပေမဲ့ KNU မှာ တခြမ်း တခြမ်းစီပါပါတယ်၊ ခေါင်းဆောင် တချို့ က NCA အပေါ်မှာ နေတယ်၊ ခေါင်းဆောင်တချို့က NCA အပေါ် မနေဘူး။ ထို့အတူပဲ ABSDF ဆိုလည်း ခေါင်းဆောင်တချို့က လက်နက်ကိုင်ပဋိပက္ခမှာပါတယ်၊ ခေါင်းဆောင်တချို့ကတော့ NCA လမ်းကြောင်းပေါ်မှာ ပူးတွဲလုပ်နေတာရှိတယ်၊ အဲဒီလို အပဲအရွဲ့လေးတွေတော့ ရှိတာပေါ့ဗျာ၊ ဒါပေမဲ့ အဲဒီလိုဖြစ်လို့ NCA တစ်စုံလုံး ဥပဒေစာတမ်း တစ်စောင်လုံး ပျက်ပြယ်သွားတယ်ဆိုတာတော့ မရှိပါဘူး” ဟု ပြောသည်။

NCA စာချုပ် လက်မှတ်ထိုးခြင်း အခမ်းအနားမှာ တွေ့ရသော လက်နက်ကိုင် ခေါင်းဆောင်များ

NCA စာချုပ်၏ အခန်း (၃)တွင် တပ်မတော်နှင့် တိုင်းရင်းသား လက်နက်ကိုင်များအကြား တစ်ဖက်နှင့် တစ်ဖက် နယ်မြေစိုးမိုးမှု တပ်လှုပ်ရှားခြင်း၊ ကင်းထောက်ခြင်း၊ အင်အားတိုးချဲ့ခြင်း၊ လက်နက်ကိုင် တိုက်ခိုက်မှုများ၊ မိုင်း ထောင်ခြင်း၊ အကြမ်းဖက် တိုက်ခိုက်မှုများနှင့် ထိုးစစ်ဆင်ခြင်းများကို ရပ်ဆိုင်းရန် စသော အချက်များ ပါဝင်သည်။

ထို့အတူ ဘာသာရေး အဆောက်အအုံ၊ စာသင်ကျောင်း၊ ဆေးရုံ၊ ဆေးခန်း ပရဝဏ်များအတွင်းနှင့် ယဉ်ကျေးမှု ရိုးရာဓလေ့ဆိုင်ရာ နေရာ၊ လူထုနှင့် ပတ်သက်သော နေရာများတွင် စစ်ရေးဆိုင်ရာ တပ်စခန်းချထားခြင်း မပြုလုပ်ရန်လည်း ပါရှိသည်။

NCA ပျက်ပြယ်ခြင်း၊ မပျက်ပြယ်ခြင်းက လက်မှတ်ရေးထိုးထားသော အဖွဲ့အစည်းများ၏ သဘောထားအပေါ်တွင် မူတည်ကြောင်း ရခိုင်အမျိုးသားပါတီ (ANP) မှ မူဝါဒရေးရာ ဦးဆောင်ကော်မတီဝင် ဦးထွန်းအောင်ကျော်က CNI သတင်းဌာနသို့ ပြောသည်။

၎င်းက “NCA လက်မှတ်ထိုးတာကတော့ အခမ်းအနားနဲ့ နိုင်ငံခြား သံတမန်များ၊ နိုင်ငံခြားပုဂ္ဂိုလ်များ ရှေ့မှာပဲ အလေးအနက်ထား ချုပ်ဆိုခဲ့ကြတာပဲခင်ဗျ၊ အဲဒါကြောင့် တော်တော်ကြီးကို တန်ဖိုးရှိတဲ့ အပစ်အခတ် ရပ်စဲရေး အတွက် ဦးထိပ်ထားပြီးတော့ ဆောင်ရွက်ကြတဲ့ သဘောတူညီချက်တစ်ခု NCA လက်မှတ်ထိုးထားတဲ့ သဘောတူ ညီချက်တစ်ခုလို့ ကျနော်တို့ မြင်ပါတယ်၊ အဲဒီတော့ မိမိတို့ရဲ့ လွတ်လပ်တဲ့ ဆန္ဒနဲ့ လုပ်ကြတဲ့အခါမှာ လူပုဂ္ဂိုလ်တွေ ရဲ့ စိတ်ဆန္ဒအရ မိမိတို့က သဘောမတူတော့ဘူး ဆိုရင်လည်း အဲဒီဆန္ဒကို ကျနော်တို့က ဘယ်လို ပိတ်ပင်လို့ ရမလဲ၊ အဲဒါကြောင့် အဓိကကတော့ လူပုဂ္ဂိုလ်တွေရဲ့ လွတ်လပ်တဲ့ ဆန္ဒအပေါ်မှာပဲ မူတည်တယ်၊ သူတို့ရဲ့ သဘော ထား အပေါ်မှာပဲ အဓိက မှီတယ်လို့ပဲ ကျနော်တို့ အဲဒီလိုပဲ သုံးသပ်ပါတယ်” ဟု ပြောသည်။

NCA စာချုပ် လက်မှတ်ထိုးပြီးနောက် အမှတ်တရ ဓာတ်ပုံရိုက်ကြစဉ်

၂၀၂၁ ခုနှစ်၊ ဖေဖော်ဝါရီ ၁ ရက်က မြန်မာ့တပ်မတော်မှ NLD အစိုးရကို ဖြုတ်ချပြီးနောက် အာဏာရယူလိုက်ခြင်း ကြောင့် NCA မှာ ပျက်ပြယ်ပြီဟုဆိုကာ လက်မှတ်ရေးထိုးထားသော လက်နက်ကိုင်အဖွဲ့အစည်း တချို့က တော်လှန်ရေး အင်အားစုများနှင့် ပူးတွဲကာ တပ်မတော်ကို တိုက်ခိုက်လျက်ရှိသည်။

ထို့နောက် ကရင်ပြည်နယ်၊ ချင်းပြည်နယ်၊ ကယားပြည်နယ်၊ ကချင်ပြည်နယ်၊ စစ်ကိုင်းတိုင်းဒေသကြီး၊ မကွေး တိုင်းဒေသကြီးတို့တွင် တိုက်ပွဲများ ဖြစ်ပွားလျက်ရှိနေသည်။

NCA စာချုပ်ကို သျှမ်းပြည်ပြန်လည် ထူထောင်ရေး ကောင်စီ (RCSS)၊ ကရင်အမျိုးသားအစည်းအရုံး (KNU)၊ ချင်း အမျိုးသားတပ်ဦး(CNF)၊  ပအိုဝ်း အမျိုးသား လွတ်မြောက်ရေးအဖွဲ့ချုပ် (PNLO)၊ မြန်မာနိုင်ငံလုံးဆိုင်ရာ ကျောင်း သားများ ဒီမိုကရက်တစ်တပ်ဦး (ABSDF)၊ မွန်ပြည်သစ်ပါတီ(NMSP)၊ ဒီမိုကရေစီ အကျိုးပြု ကရင်တပ်မတော် (DKBA)၊ ကရင်အမျိုးသားအစည်းအရုံး/ ကရင် အမျိုးသားလွတ်မြောက်ရေး တပ်မတော်/ငြိမ်းချမ်းရေးကောင်စီ ( KNU/KNLA-PC)၊ ရခိုင်ပြည်လွတ်မြောက်ရေး ပါတီ(ALP)၊ လားဟူဒီမိုကရက်တစ် အစည်းအရုံး (LDU)တို့ လက်မှတ် ထိုးထားသည်။

လက်ရှိတွင်လည်း အပစ်ရပ် လက်မှတ်ရေးထိုးထားသည့် KNU၊ CNF၊ ABSDF တို့သည် မြန်မာ့တပ်မတော်နှင့် တိုက်ပွဲများ ဖြစ်ပွားလျက်ရှိနေသည်။

CNI News
၂၀၂၃ ခုနှစ်၊ စက်တင်ဘာ ၁၈

တရုတ်နိုင်ငံခြားရေးဝန်ကြီးဌာန အာရှရေးရာအထူးကိုယ်စားလှယ် မစ္စတာ တိန့်ရှီးကျွင်းသည် မြန်မာနိုင်ငံသို့ ရောက်ရှိနေသည်။

ထို့နောက် ၂၀၂၃ ခုနှစ်၊ စက်တင်ဘာ ၁၈ ရက်နေ့က နေပြည်တော်မှာ နစက၏ ဒုဝန်ကြီးချုပ်နှင့်နိုင်ငံခြားရေး ဝန်ကြီး ဦးသန်းဆွေနှင့် တွေ့ဆုံကာ ငြိမ်းချမ်းရေး ပူးပေါင်း ဆောင်ရွက်ရန် ဆွေးနွေးခဲ့ကြသည်။

အဆိုပါ တွေ့ဆုံမှုတွင် မြန်မာ-တရုတ် နယ်စပ် ဒေသတစ်လျှောက် ငြိမ်းချမ်းရေးနှင့်တည်ငြိမ်းရေးကို ပိုမိုမြှင့်တင် ရန်အတွက် ဆက်လက် ပူးပေါင်းဆောင်ရွက်သွားရေး၊ ပြည်တွင်းငြိမ်းချမ်းရေးနှင့် အမျိုးသား ပြန်လည်သင့်မြတ် ရေး လုပ်ငန်းစဉ်နှင့်ပတ်သက်၍ နောက်ဆုံးဖြစ်ပေါ် တိုးတက်မှု အခြေအနေများကို ဆွေးနွေးခဲ့ကြကြောင်း သိရသည်။

တရုတ်ထံ UWSA မှ ဖမ်းဆီးရမိသူများကို လွှဲပြောင်းပေးနေစဉ် (WSTV)

ထို့နောက် မြန်မာနိုင်ငံဖွံ့ဖြိုးတိုးတက်ရေး ကြိုးပမ်းအားထုတ်မှုများတွင် တရုတ်နိုင်ငံမှ အပြုသဘော ဆက်လက် ကူညီ ဆောင်ရွက်ပေးသွားမည့် ကိစ္စရပ်များ၊ ဒေသတွင်းနှင့် နိုင်ငံတကာမျက်နှာစာ အထူးသဖြင့် အာဆီယံနှင့် ကုလသမဂ္ဂတို့တွင် ပိုမို နီးကပ်စွာ ပူးပေါင်းဆောင်ရွက်သွားရေး စသည့် ကိစ္စရပ်များကိုလည်း ဆွေးနွေးခဲ့ကြသည်။

တရုတ်အထူးကိုယ်စားလှယ် မစ္စတာတိန့်ရှီးကျွင်းသည် မြန်မာနိုင်ငံသို့ ၃ ကြိမ်ထက် မနည်း လာရောက်ထားသူ ဖြစ်သည်။

တရုတ်နိုင်ငံသည် မြန်မာနိုင်ငံအတွင်းမှာ ရင်းနှီးမြှုပ်နှံမှုများ အများအပြားရှိသလို မြန်မာ-တရုတ် နယ်စပ် တစ်လျှောက်မှာလည်း တိုင်းရင်းသား လက်နက်ကိုင် အဖွဲ့များရှိနေသည်။

အလားတူ တရုတ်နိုင်ငံသား အများအပြားသည် တိုင်းရင်းသား လက်နက်ကိုင်များ၏ နယ်မြေဖြစ်သည့် “ဝ”၊ မိုင်းလား၊ ကိုးကန့်ဒေသများတွင် အွန်လိုင်း လောင်းကစား လုပ်ငန်းများ ကျယ်ကျယ်ပြန့်ပြန့် လုပ်ကိုင်နေသလို မူဆယ်မြို့နယ်အတွင်းမှာလည်း အွန်လိုင်းလောင်းကစား လုပ်ငန်းများ လုပ်ကိုင်နေခြင်းကြောင့် တရုတ်အစိုးရ က ဖမ်းဆီးနိုင်ရေး ကြိုးပမ်းလျက်ရှိသည်။

CNI News

၂၀၂၃ ခုနှစ်၊ စက်တင်ဘာ ၁၈

မိမိတို့ လက်နက်ကိုင် အဖွဲ့အစည်းအနေဖြင့် ကွန်ဖက်ဒရေးရှင်းကို မျှော်မှန်းထားကြောင်း မွန်ပြည် ကာကွယ်ရေးတပ်(MSDF)ဥက္ကဋ္ဌ ဒေါက်တာ သီရိမွန်ချမ်းမှ CNI သတင်းဌာနသို့ ပြောသည်။

လက်နက်ကိုင်တပ်နှင့် ပြည်သူလူထုတို့ တစ်ပေါင်းတစ်စည်းတည်း ဖြစ်ပေါ်လာပါက မိမိတို့အနေဖြင့် အကောင်အထည်ဖော် ဆောင်ရွက်၍ရကြောင်း ၎င်းက ပြောသည်။

ဒေါက်တာ သီရိမွန်ချမ်းက “လက်နက်ကိုင်ဆောင်ထားတဲ့ ကျနော်တို့ မွန်ပြည်နယ်မှာရှိတဲ့ မွန်လက်နက်ကိုင် တပ်တွေရဲ့ အင်အား ဘယ်လောက်ရှိလဲ၊ အဲဒီ hard power နောက်ပြီးတော့ Soft Power ကြတော့ ကျနော်တို့ ပြည်သူပြည်သားတွေရဲ့ မျိုးချစ်စိတ်ဓါတ်တွေ တခြားယဉ်ကျေးမှုတို့ စီးပွားရေး အခြေအနေတို့၊ နောက်ပြီး ပညာရေး အခြေအနေတို့၊ လူမှုရေးအခြေအနေတို့ နောက်ပြီးတော သံတမန်ရေးရာ အဆက်သွယ်တွေပေါ့နော်၊ အဲဒီ နှစ်ခုပေါင်းစည်းပြီးမှ တကယ်လို့ ခိုင်မာတောင်းတင့်တဲ့ အမျိုးသား အင်အားရှိလာရင်တော့ ခုနလိုမျိုးပေါ့နော်၊ ကွန်ဖက်ဒရေးရှင်းပဲ ဖြစ်ဖြစ်၊ ဒီဖက်ဒရေးရှင်းပဲ ဖြစ်ဖြစ် လုပ်လို့ ရပါတယ်” ဟု ပြောသည်။

မွန်ပြည်ကာကွယ်ရေးတပ်(MSDF)သည် ၂၀၂၁ ခုနှစ်၊ ဖေဖော်ဝါရီ ၁ ရက်နေ့ နောက်ပိုင်း ပြောင်းလဲလာသော နိုင်ငံရေး အခင်းအကျင်းအရ လက်နက်ကိုင်လှုပ်ရှားလာသော မွန်တပ်ဖွဲ့ဖြစ်သည်။

AA ခေါင်းဆောင် နှစ်ဦးကိုတွေ့ရစဉ်

ထို့နောက် မွန်ပြည်နယ်တောင်ပိုင်းနှင့် တနင်္သာရီတိုင်းဒေသကြီးအတွင်း အခြေပြု လှုပ်ရှားလျှက်ရှိပြီး စစ်ဆင်ရေးများကို မဟာမိတ်များနှင့် ပူးတွဲလှုပ်ရှားလျက်ရှိကြောင်း သိရသည်။

ကွန်ဖက်ဒရေးရှင်းဆိုသော စကားလုံးအား ရက္ခိုင့်တပ်တော် (AA) က စတင် သုံးစွဲလာခြင်းကြောင့် ကွန်ဖက်ဒရေးရှင်း၏ အဓိပ္ပာယ်အား AA ထံ မေးသင့်ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “အဲဒါကတော့ AA ကိုပဲ မေးကြည့်ပါ AA က ပြောရေးဆိုခွင့်ရှိတဲ့ ခိုင်သုခကိုပဲ မေးပါ၊ ကျနော်တို့ကို မေးလို့ သိပ်ပြီးတော့ ပြည့်စုံလုံလောက်တဲ့ အဖြေမရနိုင်ပါဘူး။ ဒါပေမဲ့ ကျနော်တို့ကတော့ ဖက်ဒရယ်ဒီမိုကရေစီ ပြည်ထောင်စုကြီးအဖြစ် မြန်မာနိုင်ငံ ဆက်လက် ရပ်တည်နေတာကို မြင်လိုတဲ့ အားပေးထောက်ခံလိုတဲ့ အင်အား စုတွေ ဖြစ်ပါတယ်” ဟု ပြောသည်။

ကွန်ဖက်ဒရေးရှင်းစနစ်မှာ ပြည်နယ်များသည် သီးခြားအချုပ်အခြာ အာဏာပိုင်ဆိုင်ရမည် ဖြစ်ပြီး တနည်းအားဖြင့် အခွန်ကောက်ခွင့် အာဏာ၊ ကိုယ်ပိုင်အစိုးရ၊ လွှတ်တော်၊ တရားစီ‌ရင်ရေး၊ ကိုယ်ပိုင်တရားရေးဌာန၊ ကိုယ်ပိုင် လက် နက်ကိုင်တပ် စသဖြင့် သီးခြားအုပ်ချုပ်ခြင်း ဖြစ်ကြောင်း သိရသည်။

UWSA တပ်ဖွဲ့ကိုတွေ့ရစဉ်

မိမိတို့အနေဖြင့် အခြေအနေအပေါ် မူတည်၍ လွတ်လပ်သည့် ဖက်ဒရယ်နိုင်ငံအနေဖြင့်လည်း လက်ခံကြောင်း ဒေါက်တာ သီရိမွန်ချမ်းက ပြောသည်။

၎င်းက “ခုနက ကျနော်ပြောထားသလိုပေါ့နော်၊ ရခိုင် AA လည်း ဒီအတိုင်းပါပဲ၊ ကျနော်တို့လည်း ဒီအတိုင်းပါပဲ၊ ဒါက အခြေအနေပေါ်မှာ မူတည်တာပေါ့နော်၊ ယုတ်စွအဆုံး စစ်မှန်တဲ့ ဖက်ဒရယ်နိုင်ငံပေါ့နော်၊ လွတ်လပ်တဲ့ ပြည်နယ်အနေနဲ့လည်း ကျနော်တို့ လက်ခံလို့ရပါတယ်။ ဘာဖြစ်လဲဆိုတော့ လွတ်လပ်ခွင့်ဆိုတာ ကိုယ့်ကိုယ်ကို ဖန်တီးခွင့်ရတဲ့ နောက်ပြီးတော့ ကိုယ့်ကံကြမ္မာကို ကိုယ်ဖန်တီးခွင့်ရတဲ့ အာဏာနဲ့ ပြည့်ဝတဲ့ ပြည်နယ်အနေနဲ့ ဖက်ဒရယ်နိုင်ငံမှာလည်း လွတ်လပ်ခွင့် ရထားပေးပေါ့နော်” ဟု ပြောသည်။

ကွန်ဖက်ဒရေးရှင်းစနစ်မှာ အချုပ်အခြာပိုင်ဆိုင်မှုရှိပြီး ဥပဒေပြဋ္ဌာန်းခြင်း၊ တရားစီရင်ခြင်း အပါအဝင် ငွေကြေး မူဝါဒ၊ နိုင်ငံသားမှတ်ပုံတင်၊ သယံဇာတ တူးဖော်ခြင်း၊ နိုင်ငံခြားဆက်ဆံရေးများမှာလည်း လွတ်လပ်စွာ လုပ်ပိုင်ခွင့် ရှိသည့်အတွက် နိုင်ငံငယ်တစ်ခုအဖြစ် သက်ရောက်မှု ရှိကြောင်း သိရသည်။

လက်ရှိ မြန်မာနိုင်ငံအတွင်းရှိ "ဝ" ပြည်သွေးစည်း ညီညွတ်ရေးတပ်မတော် (UWSA) သည်လည်း ကွန်ဖက်ဒရေးရှင်း ကဲ့သို့သော ကိုယ်ပိုင်အုပ်ချုပ်ခွင့်အာဏာများ ရရှိထားသည်ဟု သုံးသပ်လျက် ရှိနေသည်။