CNI International News

ဆစ်ဒနီ၊ ဧပြီ ၂

တရုတ်ကို ဆန့်ကျင်ရန် ဩစတြေးလျနိုင်ငံဆိုင်ရာ ထိုင်ဝမ်သံတမန် ဒေါက်ဂလပ်စ် ဆူး (Douglas Hsu) က ဩစတြေးလျနိုင်ငံကို တိုက်တွန်းခဲ့သည်ဟု  Nikkei Asia မှ ဖော်ပြခဲ့သည်။

ဖေဖော်ဝါရီလက အတွင်းက ဩစတြေးလျနိုင်ငံအရှေ့ပိုင်း ကမ်းရိုးတန်းအနီးတွင် ကျည်အစစ်များဖြင့် စစ်ရေး လေ့ကျင့်နေသည့် တရုတ်သင်္ဘောသုံးစင်းကို မြင်တွေ့ခဲ့ရပြီး ထိုင်ဝမ်အနီး၌ တရုတ်၏ စစ်ရေးလေ့ကျင့်မှုများကို ပြန်လည်သတိရစေခဲ့ကြောင်း ဒေါက်ဂလပ်စ်က ပြောသည်။

“အဲဒီဖြစ်စဉ်က မကြာသေးမီ နှစ်တွေတုန်းက ထိုင်ဝမ် ရေလက်ကြားမှာ ဖြစ်ပျက်ခဲ့တဲ့ အဖြစ်အပျက်တွေကို သတိ ရစေခဲ့ပါတယ်။ ဒီလိုစစ်ရေး လေ့ကျင့်မှုတွေကို ကျနော်တို့က အမြဲတမ်း မြင်တွေ့ခဲ့ရတာပါ”ဟု ၎င်းက ဆိုသည်။

ထိုင်ဝမ်၏ သံတမန်ရေးရာ ကိုယ်စားလှယ်များသည် တရုတ်နိုင်ငံ၏ တင်းမာသော လုပ်ရပ်များကို တွန်းလှန်ရန် သြစတြေးလျကို မကြာခဏ တောင်းဆိုခဲ့ကြသည်။

 တရုတ်နဲ့ ဩစတြေးလျ သံတမန်ဆက်ဆံရေးကို တွေ့ရစဉ်

တရုတ်နှင့် သံတမန် ဆက်ဆံရေးများ ထူထောင်ထားသည့် ပစိဖိတ်ကျွန်းနိုင်ငံများသည် တရုတ်ကို စိုးရိမ်ထိတ်လန့် နေကြသဖြင့် ထိုင်ဝမ်နှင့် ထိတွေ့ဆက်ဆံရန် တွန့်ဆုတ်နေကြသည်ဟု ဒေါက်ဂလပ်စ် ဆူးက ပြောသည်။

ထို့ကြောင့် ဒေသတွင်း တရုတ်၏ သတင်းအမှား ဖြန့်မှုများနှင့် အနိုင်ကျင့်မှုများကို တန်ပြန်ရန် ထိုင်ဝမ်နှင့် ဩစတြေးလျအကြား ပူးပေါင်းဆောင်ရွက်သည့် အားထုတ်ကြိုးပမ်းမှုများ လိုအပ်ကြောင်းလည်း ဒေါက်ဂလပ်စ်ဆူး က ပြောကြားခဲ့သည်။

ပြီးခဲ့သည့်နှစ် မေလကလည်း ထိုင်ဝမ်နိုင်ငံခြားရေးဝန်ကြီးဟောင်း ဂျိုးဆက် ဝူ(Joseph Wu) က တရုတ်၏ လှုပ်ရှားမှုများနှင့် ပတ်သက်ပြီး လေ့လာသုံးသပ်မှုများကို မျှဝေရာတွင် အဆင်ပြေ ချောမွေ့စေရန်အတွက် ထိုင်ဝမ်သို့ စစ်သံမှူးတစ်ဦး စေလွှတ်ပေးရန် ဩစတြေးလျကို တိုက်တွန်းခဲ့သည်။

အမေရိကန်၊ ဂျပန်နှင့် စင်္ကာပူကဲ့သို့ နိုင်ငံအချို့သည် ထိုင်ဝမ်ထောက်လှမ်းရေးအဖွဲ့နှင့် ဆက်သွယ်မှုများကို ထိန်းသိမ်းရန် စစ်သံမှူးများ ထားရှိခဲ့ကြောင်း ၀ူက ပြောကြားခဲ့သည်။

ထိုပြောကြားချက်များအရ အင်ဒို-ပစိဖိတ်ဒေသတွင် မြင့်တက်လာသည့် တရုတ်၏ ဩဇာလွှမ်းမိုးမှုကို အင်အား ချိန်ခွင်လျှာ ထိန်းညှိရန်အတွက် ဒီမိုကရေစီ မဟာမိတ်များနှင့် ထိတွေ့ဆက်ဆံမှုကို တိုးမြှင့်နေသည့် ထိုင်ဝမ်၏ မဟာဗျူဟာကို မီးမောင်းထိုး ဖော်ပြနေသည်ဟု ကျွမ်းကျင်သူများက သုံးသပ်ခဲ့သည်။

Source: Nikkei Asia