CNI News
၂၀၂၅ ခုနှစ်၊ ဧပြီ ၁၇ 

၂၀၂၅ ခုနှစ်၊ ဒီဇင်ဘာလမှာ ကျင်းပရန် ကြိုးပမ်းနေသည့် အထွေထွေရွေးကောက်ပွဲ အောင်မြင်ဖို့အတွက် ပြည်သူ လူထုက ပူးပေါင်းပါဝင်ကြရန် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ ဧပြီ ၁၇ ရက်တွင် ကျရောက်သည့် မြန်မာ့နှစ်သစ်ကူး နှစ်ဆန်းတစ်ရက်နေ့ နှုတ်ခွန်းဆက်မင်္ဂလာ စကား ပြောကြားစဉ် ၎င်းက ထည့်သွင်း ပြောကြားခဲ့ခြင်း ဖြစ်သည်။

နစကဥက္ကဋ္ဌက “ နိုင်ငံတော်မှာ စစ်မှန်စည်းကမ်းပြည့်ဝတဲ့ ပါတီစုံဒီမိုကရေစီစနစ် ခိုင်မာစေရေး၊ ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စု တည်ဆောက်ရေးကို ကျနော်တို့ အစိုးရက ရည်မှန်းချက်ထား ဆောင်ရွက်လျက်ရှိနေပါတယ်။ ပြည်သူလူထု လိုလားတဲ့ ပါတီစုံဒီမိုကရေစီစနစ်ကို အမြန်ဆုံး ပြန်လည် အကောင်အထည်ဖော်ပေးနိုင်ဖို့ လည်း လာမယ့် ဒီဇင်ဘာလအတွင်းမှာ လွတ်လပ်ပြီး တရားမျှတမှု အပြည့်ရှိတဲ့ ပါတီစုံဒီမိုကရေစီ အထွေထွေရွေး ကောက်ပွဲကို ကျင်းပပေးနိုင်ဖို့ ကြိုးပမ်းဆောင်ရွက်လျက်ရှိနေပါတယ်။ ပါတီစုံ ဒီမိုကရေစီစနစ်ကို အမှန်တကယ် လိုလားတယ်ဆိုရင် အဓိကဖြစ်တဲ့ ရွေးကောက်ပွဲ အောင်အောင်မြင်မြင် ပြီးမြောက်နိုင်ဖို့အတွက် မိဘပြည်သူများအနေနဲ့ ပူးပေါင်းပါဝင်ဆောင်ရွက်ပေးကြဖို့ မေတ္တာရပ်ခံလိုပါတယ်။ နိုင်ငံ တော်က ဆက်လက် လျှောက်လှမ်းမယ့် ပါတီစုံဒီမိုကရေစီစနစ်မှာ နိုင်ငံသူ/သားများ အားလုံး ပူးပေါင်း ပါဝင် ဆောင်ရွက်ကြပါဆို့လို ပြောကြားလိုပါတယ်”ဟု ပြောသည်။

နစကသည် ရွေးကောက်ပွဲကို ၂၀၂၅ ခုနှစ်၊ ဒီဇင်ဘာလ တတိယအပတ်နှင့် စတုတ္တအပတ်တွင်လည်းကောင်း၊ ၂၀၂၆ ခုနှစ်၊ ဇန်နဝါရီလ တတိယအပတ်နှင့် စတုတ္တအပတ်တွင်လည်းကောင်း ကျင်းပပြီးစီးရန် ပြင်ဆင်လျက် ရှိကြောင်း သိရသည်။ 

တခြားတစ်ဖက်မှာတော့ တိုင်းရင်းသားလက်နက်ကိုင်များ(EAOs)၊ ပြည်သူ့ကာကွယ်ရေးတပ်ဖွဲ့(PDF)၊ အမျိုးသား ညီညွတ်ရေးအစိုးရ(NUG)နှင့် တက်ကြွလှုပ်ရှားသူများက နစကကျင်းပမည့် ရွေးကောက်ပွဲကို မပျက်ပျက်အောင် ဖျက်မည်ဟု ကြေညာထားသည်။

ဖက်ဒရယ်နှင့် ဒီမိုကရေစီအရေး ကြိုးပမ်းနေသူတချို့ကတော့ နိုင်ငံရေးသဘောတူညီချက် တစ်ခုကို ကြိုတင် ရယူ ထားပြီးမှ ရွေးကောက်ပွဲ ကျင်းပမည်ဆိုပါက ပိုမိုသင့်တော်ကြောင်း၊ သို့မဟုတ်ပါက ရွေးကောက်ပွဲ ကျင်းပပြီး နောက်ပိုင်း ပေါ်ပေါက်လာမည့် အစိုးရသစ်လက်ထက်မှာ ပိုမို အကျပ်အတည်းများဖြင့် ရင်ဆိုင်ရနိုင်ကြောင်း ထောက်ပြလျက်ရှိသည်။

CNI News
၂၀၂၅ ခုနှစ်၊ ဧပြီ ၁၇

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ဧပြီ ၁၇ ရက်နေ့ နှစ်ဆန်းတစ်ရက်နေ့တွင် ဘွဲ့တံဆိပ်များ ချီးမြှင့်ပေးအပ်လျက်ရှိသည်။

အဆိုပါ ဘွဲ့တံဆိပ်များသည် နိုင်ငံတော်ဖွံ့ဖြိုးတိုးတက်ရေးအတွက် လုပ်ငန်းနယ်ပယ်အလိုက် ထူးချွန်ပြောင် မြောက်စွာ ကြိုးပမ်းဆောင်ရွက်ခဲ့ကြသည့် ပုဂ္ဂိုလ်များကို ဂုဏ်ထူးဆောင်ဘွဲများ ချီးမြှင့်ခြင်းဖြစ်သည်။

ဧပြီ ၁၇ ရက်တွင် ပေးအပ်ခဲ့သည် စည်သူဘွဲ့ကို နစကအဖွဲ့ဝင်များ၊ အနုပညာရှင်များ၊ မြန်မာ့တပ်မတော် ဒုတိယဗိုလ်ချုပ်ကြီးများ၊ အရပ်ဘက် အဆင့်မြင့်ဝန်ထမ်းများ၊ ပြည်နယ်ဝန်ကြီးချုပ်များ ရရှိခဲ့သည်။

CNI News
၂၀၂၅ ခုနှစ်၊ ဧပြီ ၁၇

မြန်မာနှစ်သစ်အခါသမယ အထိမ်းအမှတ်အနေဖြင့် အကျဉ်းထောင်/အချုပ်ထောင် အသီးသီးတွင် ပြစ်ဒဏ်ကျခံ လျက်ရှိသော အကျဉ်းသား/သူ ၄၈၉၃ ဦးကို နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ဧပြီ ၁၇ ရက်တွင် လွတ်ငြိမ်းချမ်းသာခွင့် ပေးလိုက်ကြောင်း ထုတ်ပြန်ခဲ့သည်။

ထို့နောက် နိုင်ငံခြားသား ၁၃ ဦးကိုလည်း လွတ်ငြိမ်းချမ်းသာခွင့် ပေးလိုက်ကြောင်း ထုတ်ပြန်ခဲ့သည်။

CNI News
၂၀၂၅ ခုနှစ်၊ ဧပြီ ၁၄

အာဆီယံအလှည့်ကျဥက္ကဋ္ဌ မလေးရှားဝန်ကြီးချုပ် အန်ဝါနှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ လာမည့် ရက်ပိုင်းအတွင်း ထိုင်းနိုင်ငံ၊ ဘန်ကောက်မြို့မှာ တွေ့ဆုံဆွေးနွေးကြမည်ဖြစ်သည်။

အဆိုပါ တွေ့ဆုံမှုတွင် ထိုင်းဝန်ကြီးချုပ်ဟောင်း အာဆီယံဥက္ကဋ္ဌ အကြံပေး သက်ဆင် ရှင်နာဝပ်လည်း ပါဝင်မည် ဖြစ်ကြောင်း သိရသည်။

အာဆီယံဥက္ကဋ္ဌနှင့် နစကဥက္ကဋ္ဌတို့ မည်သည့် အရေးကိစ္စများကို တွေ့ဆုံ ဆွေးနွေးကြမည်ကိုတော့ မသိရသေးပေ။

သို့သော် မြန်မာငလျင်ဘေးသင့် ပြည်သူများအတွက် လိုအပ်သော အကူအညီများနှင့် ဆေးဝါး အကူအညီများ ပေး အပ်နိုင်ရေး အပါအဝင် အကူအညီများ ပေးအပ်သည့်အခါ လွယ်ကူချောမွေ့စေရေးတို့ကို ဆွေးနွေးရန်ရှိကြောင်း အာဆီယံအလှည့်ကျဥက္ကဋ္ဌ မလေးရှားဝန်ကြီးချုပ် အန်ဝါက ပြောကြားထားသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ဧပြီ ၄ ရက်က ထိုင်းနိုင်ငံ၊ ဘန်ကောက်မြို့မှာ ကျင်းပခဲ့သည့် ကဏ္ဍစုံ နည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) အစည်းအဝေးကိုလည်း တက်ရောက် ဆွေးနွေးခဲ့သေးသည်။

အဆိုပါ အစည်းအဝေး၏ ပြင်ပတွင် ထိုင်းဝန်ကြီးချုပ် ပေတုန်တန်နှင့်လည်းကောင်း၊ အိန္ဒိယဝန်ကြီးချုပ် မိုဒီနှင့် လည်းကောင်း၊ သီရိလင်္ကာဝန်ကြီးချုပ်နှင့်လည်းကောင်း၊ ဘူတန်ဝန်ကြီးချုပ်နှင့်လည်းကောင်း၊ နီပေါဝန်ကြီးချုပ် နှင့်လည်းကောင်း အသီးသီး တွေ့ဆုံ ဆွေးနွေးခဲ့သေးသည်။

အလားတူ ထိုင်းဝန်ကြီးချုပ်ဟောင်းလည်းဖြစ် အာဆီယံဥက္ကဋ္ဌ အကြံပေးလည်းဖြစ်သူ သက်ဆင်နှင့်လည်း တွေ့ဆုံ ဆွေးနွေးခဲ့သေးကြောင်း သိရသည်။

CNI News
၂၀၂၅ ခုနှစ်၊ ဧပြီ ၁၂

မြန်မာနိုင်ငံမှာ လှုပ်ခတ်ခဲ့သော ဖျက်အားပြင်း ငလျင်ကြောင့် လူဦးရေ ၁ ဒသမ ၁ သန်းကို လူသားချင်း စာနာ ထောက်ထားမှုဆိုင်ရာ အကူအညီများပေးနိုင်ရန်အတွက် အမေရိကန် ဒေါ်လာ ၂၇၅ သန်း လိုအပ်ကြောင်း ကုလသမဂ္ဂက ထုတ်ပြန်ခဲ့သည်။

အဆိုပါ အကူအညီလိုအပ်ချက်သည် ပြန်လည်ထူထောင်ရေးအတွက် မပါသေးဘဲ လတ်တလော ငလျင်ဘေးသင့် သူများအတွက် လိုအပ်သည့် ကူညီကယ်ဆယ်ရေးနှင့် စားဝတ်နေရေးအတွက် လိုအပ်ချက်သာရှိသေးကြောင်း သိရသည်။

မြန်မာနိုင်ငံဆိုင်ရာ ကုလသမဂ္ဂရုံးက “ မြန်မာနိုင်ငံမှာ အဖျက်အားကြီးတဲ့ ငလျင်ကြီး လှုပ်ခဲ့အပြီး  ၂၀၂၅ ခုနှစ် လူသားချင်းစာနာမှုဆိုင်ရာ လိုအပ်ချက်များနှင့် တုန့်ပြန်ရေး အစီအစဉ်ရဲ့ နောက်ဆက်တွဲ အရေးပေါ် အဆိုပြု လွှာတစ်ခုကို ရေးဆွဲခဲ့ပါတယ်။ ထိခိုက်မှု အပြင်းထန်ဆုံး ဒေသတွေက လူဦးရေ ၁ ဒသမ ၁သန်းကို အကူအညီတွေ ပေးနိုင်ဖို့ ကန်ဒေါ်လာ ၂၇၅ သန်းလိုအပ်ပါတယ်”ဟု ထုတ်ပြန်ခဲ့သည်။

မြန်မာနိုင်ငံတွင် ၂၀၂၅ ခုနှစ်၊ မတ်လ ၂၈ ရက်က မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင်ကြီးတစ်ခုနှင့် နောက်ဆက်တွဲ ငလျင်ငယ်များ လှုပ်ခတ်လျက်ရှိသည်။

အဆိုပါ ငလျင်ကြောင့် ၂၀၂၅ ခုနှစ်၊ ဧပြီ ၁၁ ရက်အထိ စာရင်းအရ သေဆုံးသူ ၃၆၇၅ ဦးရှိပြီး ထိခိုက်ဒဏ်ရာရရှိသူ ၅၀၂၀ ဦးနှင့် ပျောက်ဆုံးနေသူ ၁၄၁ ဦးရှိသည်။

ထို့နောက် လမ်းတံတားများ၊ လူနေအိမ်များ၊ ဟိုတယ်များ၊ ဘာသာရေး အဆောက်အအုံများ၊ အစိုးရရုံးများ၊ ဝန်ထမ်းအိမ်ယာများ၊ စာသင်ကျောင်းများ၊ ဆေးရုံများ၊ ဆက်သွယ်ရေးကွန်ရက်များ၊ လျှပ်စစ်ဓာတ်အား ဖြန့်ဖြူး ရေး ကွန်ရက်များ ပြိုကျပျက်စီးခဲ့သည်။

CNI News
၂၀၂၅ ခုနှစ်၊ ဧပြီ ၁၂

DENKO နှင့် MAB ဘဏ်ဥက္ကဋ္ဌ ဦးချစ်ခိုင်သည် မန္တလေး အိုးဘိုထောင်ကနေ လွတ်ငြိမ်းချမ်းသာခွင့်ဖြင့် ယနေ့ (ဧပြီ ၁၂ ရက်) နံနက်ပိုင်းက ပြန်လွတ်လာပြီးဖြစ်ကြောင်း မိသားစုနှင့်နီးစပ်သူက CNI သတင်းဌာနသို့ ပြောသည်။

၎င်းက “ဒီနေ့ ဦးချစ်ခိုင်ကို မန္တလေး အိုးဘိုထောင်ကနေ လွတ်ငြိမ်းနဲ့လွှတ်ပေးလိုက်တယ်။ အခု အပြင်ရောက် နေပြီး”ဟု ပြောသည်။

အလားတူ ဇေကမ္ဘာဦးခင်ရွှေ၏ သားဖြစ်သူ ကိုဇေသီဟလည်း ရန်ကုန် အင်းစိန်ထောင်ကနေ လွတ်ငြိမ်းချမ်းသာ ခွင့်ဖြင့် ပြန်လည်လွတ်မြောက်လာကြောင်း နီးစပ်သူများထံမှ သိရသည်။

ကိုဇေသီဟကို တွေ့ရစဉ်

ထို့ပြင် စားအုန်းဆီကို မတရားဈေးတင်၍ ရောင်းချခြင်းနှင့် မသမာမှုများ ပြုလုပ်၍ ဖမ်းဆီးခံထားရသော စားအုန်ဆီ ကုန်သည်များလည်း ပြန်လည်လွတ်မြောက်လာကြောင်း သိရသည်။

ဦးချစ်ခိုင်သည် ၂၀၂၂ ခုနှစ်၊ ဧပြီလက ဖမ်းဆီးခံခဲ့ရခြင်းဖြစ်ပြီး ၂၀၂၅ ခုနှစ်၊ ဧပြီ ၁၂ ရက်မှာ လွတ်ငြိမ်းချမ်းသာခွင့် ဖြင့် ပြန်လွတ်လာခြင်းဖြစ်သည်။

ကိုဇေသီဟသည် ၂၀၂၂ ခုနှစ်၊ မတ်လ ၂၂ ရက် ဖမ်းဆီးခံခဲ့ရခြင်းဖြစ်ပြီး ၂၀၂၅ ခုနှစ်၊ ဧပြီ ၁၂ ရက်မှ လွတ်ငြိမ်းချမ်း သာခွင့်ဖြင့် ပြန်လွတ်လာခြင်းဖြစ်သည်။

CNI News
၂၀၂၅ ခုနှစ်၊ ဧပြီ ၁၁

အဆောက်အဦများ ဆောက်လုပ်ရာတွင် အနည်းဆုံး ရက်ချ်စတာစကေး ၈ အထိခံနိုင်သည့် အဆောက်အဦများ ဆောက်လုပ်ရမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ ဧပြီ ၁၁ ရက်က ငလျင်ဘေးသင့် အင်းလေးဒေသသို့ သွားရောက်စစ်ဆေး၍ ပြည်သူများဖြင့် တွေ့ဆုံ စဉ် ၎င်းက ပြောကြားလိုက်ခြင်း ဖြစ်သည်။

အဆောက်အဦများ ဆောက်လုပ်ရာတွင် ယခင် မိမိတို့နိုင်ငံ၌ အမြင့်ဆုံးလှုပ်ခတ်ခဲ့သည့် ရက်ချ်တာစကေး ၈ အထိ ခံနိုင်သော အဆောက်အဦများ ဆောက်လုပ်ရမည်ဖြစ်သော်လည်း ဆောက်လုပ်ခဲ့ခြင်း မရှိမှုများကြောင့် အချို့ အဆောက်အဦများမှာ ပျက်စီးပြီး ထိခိုက်သေဆုံးမှုများ ဖြစ်ပေါ်ခဲ့ခြင်းဖြစ်သည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

၎င်းက “နောင်အချိန်တွင် ယခုကဲ့သို့ ပျက်စီးမှုများ မရှိစေရေး အဆောက်အဦများ ဆောက်လုပ်ရာတွင် အနည်းဆုံး ရက်ချ်စတာစကေး ၈ အထိခံနိုင်သည့် အဆောက်အဦများ ဆောက်လုပ်ရန် ညွှန်ကြားထားပြီးဖြစ်ကြောင်း၊ အဆောက်အဦများ တည်ဆောက်ရာတွင် နောက်လာနောက်သားများ၏ ကာလ၌ ငလျင်ဒဏ်ကြောင့် ထိခိုက်မှု မရှိစေရေး မိမိတို့အနေဖြင့် တည်ဆောက်ရေး လုပ်ငန်းများ ဆောင်ရွက်ရာ၌ စနစ်တကျဖြင့် ကြိုတင်ပြင်ဆင် ဆောင်ရွက်ပေးသွားရမည်”ဟု ပြောသည်။

နိုင်ငံတော်ပြန်လည်ထူထောင်ရေး လုပ်ငန်းများ ဆောင်ရွက်ရာတွင် တစ်ဦးနှင့်တစ်ဦး ညီညီညွတ်ညွတ်ဖြင့် တောင်ပေါ်မြေပြန့် မခွဲခြားဘဲ ဝိုင်းဝန်း ဆောင်ရွက်သွားကြရမည်ဟု နစကဥက္ကဋ္ဌက ပြောသည်။

နစကဥက္ကဋ္ဌသည် အဆောက်အဦများ ဆောက်လုပ်ရာတွင် ရက်ချ်စတာစကေး ၈ အထိ အနည်းဆုံးခံနိုင်ရမည်ဟု ညွှန်ကြားမှုသည် ကောင်းမွန်ကြောင်း၊ သို့သော် ကန်ထရိုက်တာများနှင့် စည်ပင်သာယာရေးကော်မတီ/ဌာနများက ထိုညွှန်ကြားချက်ကို လိုက်နာရန် ပို၍ အရေးကြောင်း၊ မြန်မာနိုင်ငံရှိ အဆောက်အဦများသည် စံချိန်စံနှုန်း မီခြင်း မရှိဘဲ ကန်ထရိုက်တာများနှင့် စည်ပင်သာယာရေးကော်မတီ/ဌာနများက လာဘ်ပေးလာဘ်ယူဖြင့် အဆင်ပြေ သလို ဆောက်နေကြကြောင်း ရန်ကုန်မြို့နေ ကိုမင်းမင်းက ပြောသည်။

၎င်းက “နစကဥက္ကဋ္ဌ ညွှန်ကြားတဲ့အတိုင်း အောက်ခြေက ဌာနဆိုင်ရာတွေက ကန်ထရိုက်တာတွေကို ကြပ်မတ် ရင်တော့ ကောင်းတာပေါ့။ အခုက အဆောက်အဦ ဆောက်မယ်ဆိုရင် စည်ပင်နဲ့ ကန်ထရိုက်တာနဲ့က လာဘ်ပေး လာဘ်ယူလုပ်လိုက်ပြီးတော့ အဆင်ပြေသလို ဆောက်နေကြတာ။ အဆောက်အဦ ပြီးလို့ ဝယ်သူတွေကို ကန်ထရိုက်တာက အပ်တဲ့အခါမှာ စံချိန်စံနှုန်း မပြီးလို့ ဝယ်သူတွေက ဌာနဆိုင်ရာကို တိုင်ကြားတဲ့အခါမှာလည်း အရေးယူ တာမရှိဘူး၊ လာစိစစ်တာလည်းမရှိဘူး စိစစ်ခဲ့ရင်လည်း ကန်ထရိုက်တာဆီက သူတို့ ငွေယူထားတဲ့ အတွက် သူတို့ပါ ပြန်ထိမှာဆိုတော့ ကန်ထရိုက်တာက အမှန်ပဲ လုပ်သွားကြတာ။ ရန်ကုန်က အဆောက်အဦတွေ လိုက်စစ်ကြည့်လိုက်ရင် ပေါ်လာပါလိမ့်မယ်။ မန္တလေးနဲ့ စစ်ကိုင်းကို အခြေပြုပြီးတော့ မတ်လ ၂၈ ရက်က လှုပ်ခဲ့ တဲ့ ပြင်းအား ၇ ဒသမ ၇ အဆင့်ရှိတဲ့ ငလျင်သာ ရန်ကုန်မှာ လှုပ်ကြည့် အကုန်ပြိုကျမှာ။ အကုန်နီးပါး သေသွားနိုင် တယ်”ဟု ပြောသည်။

မြန်မာနိုင်ငံ၊ မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင်တစ်ခု ၂၀၂၅ ခုနှစ်၊ မတ်လ ၂၈ ရက်က လှုပ်ခတ်ခဲ့သည်။

အဆိုပါ ငလျင်ကြောင့် ၂၀၂၅ ခုနှစ်၊ ဧပြီ ၁၁ ရက်အထိ စာရင်းအရ သေဆုံးသူ ၃၆၇၅ ဦးရှိပြီး ထိခိုက်ဒဏ်ရာရရှိသူ ၅၀၂၀ ဦးနှင့် ပျောက်ဆုံးနေသူ ၁၄၁ ဦးရှိသည်။

ထို့နောက် လမ်းတံတားများ၊ လူနေအိမ်များ၊ ဟိုတယ်များ၊ ဘာသာရေး အဆောက်အအုံများ၊ အစိုးရရုံးများ၊ ဝန်ထမ်းအိမ်ယာများ၊ စာသင်ကျောင်းများ၊ ဆေးရုံများ၊ ဆက်သွယ်ရေးကွန်ရက်များ၊ လျှပ်စစ်ဓာတ်အား ဖြန့်ဖြူး ရေး ကွန်ရက်များ ပြိုကျပျက်စီးခဲ့သည်။

ထို့ကြောင့် ပြည်သူလူထုများသည် ငလျင်ဘေးသင့်ကာ အိုးမဲ့အိမ်မဲ့ဘဝရောက်၍ လမ်းပေါ်များတွင် အိပ်နေကြရ သလို တချို့ကလည်း ငလျင်စိုးရိမ်မှုကြောင့် နေအိမ်များကနေ ထွက်ခွာပြီး လမ်းမနှင့်ကွင်းပြင်များမှာ နေထိုင်နေ ကြရသည်။

ဤအခြေအနေများကြောင့် စံချိန်စံနှုန်းများ ပြည့်မီအောင် မဆောက်ဘဲ ကိုယ်ကျိုးအတွက် ကြည့်၍ အထပ်မြင့် အဆောက်အဦများ ဆောက်လုပ်နေသည့် ကန်ထရိုက်တာများနှင့် အရည်အသွေး မမှီသည်ကို သိလျှက်နှင့်ခွင့်ပြု ပေးနေသော ဌာနဆိုင်ရာများကို ထိထိရောက်ရောက် အရေးယူပေးရန် ပြည်သူလူထုက တောင်းဆိုလျက်ရှိသည်။

CNI News

၂၀၂၅ ခုနှစ်၊ ဧပြီ ၁၁

ငလျင်လှုပ်ခတ်မှုကြောင့် မန္တလေးမြို့ရှိ Sky Villa ကွန်ဒိုပြိုကျသည့်အထဲမှာ ရှမ်းပြည်တိုးတက်ရေးပါတီ(SSPP)မှ နာယက ဗိုလ်ချုပ်ကြီး စဝ်ဆေထင်နှင့် စိန်ကျော့ပြည်သူ့စစ်ခေါင်းဆောင် စဝ်လွယ်မောဝ် (ယခု SSPP နဲ့ ပြန်လည် ပူးပေါင်းထား)တို့၏ မိသားစုဝင်များလည်း ပါဝင်သွားကြောင်း သိရသည်။

၂၀၂၅ ခုနှစ်၊ မတ်လ ၂၈ ရက် လှုပ်ခတ်ခဲ့သော ငလျင်ကြောင့် Sky Villa ကွန်ဒိုပြိုကျ၍ လူပေါင်းမြောက်မြားစွာ သေဆုံးခဲ့သည်။

အဆိုပါ ငလျင်ကြောင့် သေဆုံးမှုအတွင်းမှာ SSPP မှ ဗိုလ်ချုပ်ကြီး စဝ်ဆေထင်နှင့် စဝ်လွယ်မောဝ်တို့၏ သား/သမီး၊ မြေးမြစ်များ အပါအဝင် မိသားစု ဝင် ၁၀ ဦးဝန်းကျင် ကွယ်လွန်ခဲ့ရကြောင်း နီးစပ်သူများထံမှ သိရသည်။

ထို့နောက် ဧပြီ ၁၁ ရက် နံနက်က ကွယ်လွန်သွားသူများအား ရည်စူး၍ ကျန်ရစ်သူ မိသားစုများက ရှမ်းပြည်နယ်၊ ကျေးသီးမြို့နယ်ရှိ ရှမ်းပြည်တိုးတက်ရေးပါတီ(SSPP)၏ ဝမ်ဟိုင်းဌာနချုပ်တွင် ပရိတ်တရားနာ ရေစက်ချခြင်း၊ အမျှပေးဝေခြင်းများကို ပြုလုပ်ခဲ့ကြောင်း သိရသည်။  

အဆိုပါ အခမ်းအနားကို SSPP မှ နာယက ဗိုလ်ချုပ်ကြီးစဝ်ဆေထင်နှင့် စဝ်လွယ်မောဝ် အပါအဝင် မိသားစုဝင် များနှင့် ဆွေမျိုးများ တက်ရောက်ခဲ့ကြောင်း သိရသည်။ 

ကွယ်လွန်သွားခဲ့သူများသည် ရှမ်းပြည်နယ်မြောက်ပိုင်းတွင် စစ်ပွဲများကြောင့် တိုက်ပွဲလာရှောင်နေကြသူများ ဖြစ်ကြောင်း နီးစပ်သူများထံမှ သိရသည်။

CNI News

၂၀၂၅ ခုနှစ်၊ ဧပြီ ၁၁ 

ငလျင်ဘေးကြောင့် ပျက်စီးဆုံးရှုံးခဲ့ရမှုများအား ပြန်လည်ထူထောင်ရေးနှင့် ပြန်လည်တည်ဆောက်ရေး လုပ်ငန်း များ ဆောင်ရွက်သွားရန်အတွက် နိုင်ငံတော်အနေဖြင့် ငွေကြေးမြောက်မြားစွာ လိုအပ်မည်ဖြစ်၍ ထုတ်ကုန်များ တိုးမြှင့်ထုတ်လုပ်ရန်လိုအပ်သည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ ဧပြီ ၁၀ ရက်က ရှမ်းပြည်နယ်(တောင်ပိုင်း)နှင့် ပအိုဝ်းကိုယ်ပိုင်အုပ်ချုပ်ခွင့်ရဒေသသို့ ရောက်ရှိစဉ် ၎င်းက ပြောကြားခဲ့ခြင်း ဖြစ်သည်။

နစကဥက္ကဋ္ဌက “ ယခု ငလျင်သဘာဝဘေး ဖြစ်ပေါ်ခဲ့မှုကြောင့် ပျက်စီးဆုံးရှုံးခဲ့ရမှုများအား ပြန်လည်ထူထောင်ရေး နှင့် ပြန်လည်တည်ဆောက်ရေး လုပ်ငန်းများ ဆောင်ရွက်သွားရန်အတွက် နိုင်ငံတော်အနေဖြင့် ငွေကြေးမြောက် မြားစွာ လိုအပ်မည်ဖြစ်ကြောင်း၊ ထုတ်ကုန်များ တိုးမြှင့်ထုတ်လုပ်နိုင်မှသာ ပို့ကုန်တိုးမြင့်လာမည်ဖြစ်ပြီး နိုင်ငံခြား ဝင်ငွေများ ရရှိနိုင်မည်”ဟု ပြောသည်။

ဦးဇော်ဇော်က နစကဥက္ကဋ္ဌကို အလှူငွေပေးအပ်နေစဉ်

ငလျင်ဘေးကြောင့် ရထားလမ်း၊ မော်တော်ကားလမ်းများ၊ ဘူတာရုံများ၊ တံတားများ ထိခိုက်ပျက်စီးခဲ့၍ လမ်းပန်း ဆက်သွယ်မှုများ အမြန်ဆုံး ပြန်လည်ကောင်းမွန်ရေးအတွက် နိုင်ငံတော်အနေဖြင့် ဆောင်ရွက်ပေးလျက်ရှိ ကြောင်း၊ စာသင်ကျောင်းများ ကျောင်းဖွင့်ချိန်အမီ ပြန်လည်ဖွင့်လှစ်နိုင်ရေး ဆောင်ရွက်နေ ကြောင်း ၎င်းက ပြောသည်။ 

ထို့နောက် ငလျင်ဘေးဒဏ်သင့်သည့် ဒေသများမှ ပြည်သူများ မိုးရာသီမရောက်မီ အမိုးအကာအောက်၌ လုံခြုံစွာ နေထိုင်ရေး စီစဉ်ဆောင်ရွက်ပေးလျက်ရှိကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

မြန်မာနိုင်ငံတွင် ၂၀၂၅ ခုနှစ်၊ မတ်လ ၂၈ ရက်က မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင် လှုပ်ခတ်ခဲ့ခြင်းကြောင့် ဧပြီ ၉ ရက်နေ့အထိ သေဆုံးသူ ၃၆၄၅ ဦးရှိပြီး ထိခိုက်ဒဏ်ရာရရှိသူ ၅၀၁၈ ဦးရှိကြောင်း သိရသည်။

နစကဥက္ကဋ္ဌ ရှမ်းပြည်တောင်ပိုင်းမှာ တွေ့ဆုံပွဲလုပ်စဉ်

ထို့ပြင် လမ်းတံတားများ၊ လူနေအိမ်များ၊ စာသင်ကျောင်းများ၊ ဘာသာရေး အဆောက်အအုံများ၊ အစိုးရရုံးများ၊ ဝန်ထမ်းအိမ်ယာများ၊ ဟိုတယ်များ စသည့် အဆောက်အအုံပေါင်း ထောင်နှင့်ချီ ပြိုကျပျက်စီးခဲ့သည်။
အဆိုပါ ငလျင်ဘေး ကူညီကယ်ဆယ်ရေးနှင့် ပြန်လည်ထူထောင်ရေးအတွက် အမေရိကန် ဒေါ်လာ ဘီလီယံချီ လိုအပ်မည်ဖြစ်သည်။

လက်ရှိမှာတော့ မြန်မာငလျင်ဘေးသင့် ပြည်သူများ ကူညီရေးအတွက် အမေရိကန်က ဒေါ်လာ ၉ သန်း၊ Quad ( အမေရိကန်-အိန္ဒိယ-ဂျပန်-ဩစတြေးလျ)က ဒေါ်လာ သန်း ၂၀၊ ကုလသမဂ္ဂက ဒေါ်လာ ၉၃ သန်း၊ တရုတ်က ယွမ်ငွေ ၁ ဘီလီယံကျော်၊ ဩစတြေးလျက ဒေါ်လာ ၂ သန်း၊ ဥရောပသမဂ္ဂက ဒေါ်လာ ယူရို ၁၃ သန်း စသဖြင့် ထောက်ပံ့ရန် ကတိပြုထားသည်။

အလားတူ ပြည်တွင်းရှိ စီးပွားရေး လုပ်ငန်းရှင်များနှင့် ခရိုနီ သူဋ္ဌေးကြီးများကလည်း ငလျင်ဘေးအတွက် ဧပြီ ၁ ရက်က လှူဒါန်းကြရာမှာ ကျပ်ငွေ ၁၁၆ ဒသမ ၈၄ ဘီလျံရရှိကြောင်း နစကဥက္ကဋ္ဌက ပြောကြားခဲ့သည်။