CNI News

၂၀၂၅ ခုနှစ်၊ အောက်တိုဘာ ၂၂

ငါတို့အားလုံးသည် မြန်မာ(We are Myanmar)ဆိုသည့်စိတ် မွေးရန် နိုင်ငံတော်လုံခြုံရေးနှင့် အေးချမ်းသာယာရေး ကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ အောက်တိုဘာ ၂၁ ရက်တွင် နေပြည်တော်ရှိ မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန(MICC-1) ၌ ပြည်ထောင်စုတိုင်းရင်းသား လူမျိုးများဖွံ့ဖြိုးရေးတက္ကသိုလ်ပညာရေးဘွဲ ၅ နှစ်သင်တန်း အမှတ်စဉ်(၇)မှ ကျောင်းသား/သူများဖြင့် တွေ့ဆုံစဉ် ၎င်းက ပြောကြားခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ မောင်တို့မယ်တို့ တိုင်းရင်းသားများသည် မြန်မာစိတ်မွေးပြီး ငါတို့အားလုံး သည် မြန်မာ(We are Myanmar)ဆိုသည့်စိတ်၊ တစ်သွေးတစ်သားတည်း စည်းလုံးညီညွတ်သည့် အမျိုးသားစိတ် ဓာတ်များဖြင့် နိုင်ငံတော်အေးချမ်းသာယာရေး ဖွံ့ဖြိုးတိုးတက်ရေးကို လက်တွဲ အကောင်အထည်ဖော် ဆောင်ရွက် ကြရန် လိုသကဲ့သို့ ဒေသအသီးသီးက တမည့်ကျောင်းသား လူငယ်များကိုလည်း အကောင်းမြင်စိတ်၊ ပူးပေါင်းပါဝင် ဆောင်ရွက်လိုစိတ်၊ စည်းလုံး ညီညွတ်မှုစိတ်၊ ရိုင်းပင်းကူညီစိတ် စသည့် စိတ်ဓာတ်များ ရှင်သန်ဖြစ်ထွန်းနေအောင် လေ့ကျင့် ပျိုးထောင်ပေးကြရန် မှာကြားလိုတယ်”ဟု ပြောသည်။

နိုင်ငံတော်၏ လွတ်လပ်ရေးနှင့် အချုပ်အခြာ အာဏာကို ထိန်းသိမ်းကာကွယ်ရေးသည် ပြည်ထောင်စုသား အားလုံး မွေးရာပါ တာဝန်ဖြစ်ခြင်းကြောင့် နိုင်ငံသူ/သား အားလုံးက စည်းလုံးညီညွတ်စွာဖြင့် ပြည်ထောင်စု စိတ်ဓာတ် အရင်းခံကာ နိုင်ငံတော်ကို ဝိုင်းဝန်း ကာကွယ်စောင့်ရှောက် ထိန်းသိမ်းသွားကြရန်လိုကြောင်း ၎င်းက ပြောသည်။

ဗိုလ်ချုပ်မှူးကြီးမင်း‌အောင်လှိုင်ကို တွေ့ရစဉ် 

လက်ရှိ မြန်မာနိုင်ငံသည် ၁၉၄၈ ခုနှစ် လွတ်လပ်ရေး ရပြီးကတည်းက တိုင်းရင်းသား တန်းတူရေး၊ ကိုယ်ပိုင် ပြဋ္ဌာန်းခွင့်နှင့် ကိုယ်ပိုင်အုပ်ချုပ်ခွင့်ရရှိရေး၊ ဒီမိုကရေစီနိုင်ငံ ဖြစ်တည်ရေး၊ ဖက်ဒရယ်ပြည်ထောင်စု တည်ထောင် ရေး စသည့် အရင်းခံ အကြောင်းတရားများကို မဖြေရှင်းနိုင်သည့်အတွက် ပြည်တွင်းစစ် ဖြစ်ပွားလာသည်မှာ ယနေ့ထိဖြစ်သည်။

ထို့ကြောင့် လူမျိုးရေး အမြင်များ တည်ရှိလာပြီး “We are Myanmar”ဆိုသည့် အခြေအနေကို တည်ဆောက်ရန် ခက်ခဲလျက်ရှိနေသည်။

၂၀၀၈ ဖွဲ့စည်းပုံအခြေခံဥပဒေ ပုဒ်မ ၄၅၀ တွင် မြန်မာစာသည် ရုံးသုံးစာ ဖြစ်သည်ဟု ပြဋ္ဌာန်းထားသည်။

အဆိုပါ ပြဋ္ဌာန်းချက်အရဆိုလျှင် မြန်မာစာနှင့် မြန်မာစကားသည် ဗမာစာနှင့်ဗမာစကား ဖြစ်နေသည့်အတွက် “မြန်မာ”သည် “ဗမာ”ဖြစ်သည်ဟု ယူဆစရာဖြစ်သွားကြောင်း၊ ထိုသို့ ယူဆချက်များကြောင့် ဗမာမဟုတ်သော လူမျိုးများသည် “We are Myanmar”ဆိုသော အခြေအနေကို လက်ခံရန် ခက်ခဲသွားနိုင်သလား စဉ်းစားရန် လိုအပ်ကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

CNI News

၂၀၂၅ ခုနှစ်၊ အောက်တိုဘာ ၂၂

လာမည့် ရွေးကောက်ပွဲတွင် ဝင်ရောက်ယှဉ်ပြိုင်မည့် နိုင်ငံရေးပါတီများသည် တပ်မတော်နှင့် ပေါင်းမှ အာဏာရ မည်ဆိုသည့်ပုံစံမျိုး လုပ်နေသည်ဟု စည်းလုံးညီညွတ်သော တိုင်းရင်းသားလူမျိုးများမဟာမိတ် (UNA)မှ ဦးမျိုးကျော်က CNI သတင်းဌာနသို့ ပြောသည်။

မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ ၂၈ ရက်၌ ရွေးကောက်ပွဲ အပိုင်း(၁)ကို ကျင်းပမည်ဖြစ်ပြီး နိုင်ငံရေးပါတီ ၅၇ ပါတီနှင့် တစ်သီးပုဂ္ဂလ ၉၅ ဦး စုစုပေါင်း ကိုယ်စားလှယ်လောင်း ၅၀၀၀ ဝန်းကျင် ဝင်ရောက်ယှဉ်ပြိုင်ကြမည်ဖြစ် သည်။

ရွေးကောက်ပွဲ ဝင်ပြိုင်မည့် ပါတီများသည် တပ်နှင့်ပေါင်းမှ မိမိတို့ အာဏာရမည်ဆိုသည့် အနေအထားမျိုးဖြင့် လုပ်ဆောင်နေကြကြောင်း စည်းလုံးညီညွတ်သော တိုင်းရင်းသားလူမျိုးများမဟာမိတ် (UNA)မှ ဦးမျိုးကျော်က CNI သတင်းဌာနသို့ ပြောသည်။

၎င်းက “တပ်မတော်ထဲမှာရှိနေတဲ့ ဗိုလ်ချုပ်ကြီးတွေကနေအစပေါ့ ဗိုလ်ချုပ်တွေ၊  ဗိုလ်မှူးကြီးတွေ၊ ဗိုလ်မှူးချုပ် တွေ အဲဒီ အရာရှိတွေ အများစုကိုပဲ ဒီမှာနေပြီး ဝင်ပြိုင်ဖို့ဆိုပြီးတော့ ပါတီထဲထည့်တဲ့ဟာလည်း တွေ့နေရတာ ပဲလေ ယူနီဖောင်း ဝတ်ထားတဲ့ကနေပြီးတော့ စစ်သားတွေပေါ့။ သူတို့ ဒီရွေးကောက်ပွဲ အခင်း အကျင်းကို ဖန်တီးတယ်၊ စီစဉ်တယ် တစ်ဖက်မှာကတော့ တိုက်ပုံဝတ်ထားတာ ကနေပြီးတော့ ဒီစစ်သားတွေပဲ ဒီအာဏာရှင်တွေပဲ သူတို့ပြန်ပြီး‌တော့ တစ်ဖက်လက်နဲ့ အာဏာယူဖို့အတွက် လုပ်တာပါ။ တစ်ခါ ဒီထဲမှာနေ ပြီးတော့ register လုပ်ပြီး တော့ ရွေးကောက်ပွဲ ဝင်ပြိုင်မယ်ဆိုတဲ့ ဟာတွေကလည်း တပ်နဲ့ပေါင်းမှ ငါတို့အာဏာ ရမယ်ဆိုတဲ့ အနေမျိုးနဲ့ လုပ်တာ ဖြစ်တဲ့အတွက် ဒီရွေးကောက်ပွဲနဲ့ ဒီမှာပါဝင်နေတဲ့ နိုင်ငံရေး အစုအဖွဲ့တွေပေါ့။ ပါတီတွေ‌ကိုက အစ ကျနော်တို့ ပြည်သူတွေအနေနဲ့ လုံးလုံးလျားလျားကို ဆန့်ကျင်ရလိမ့်မယ် ဘယ်လောက်ပဲ ပေးပေး တစ်မဲနဲ့ပဲရရ နှစ်မဲနဲ့ပဲရရ သူတို့အစိုးရ လုပ်ချင်လည်းလုပ်ပေါ့။ ဂုဏ်သိက္ခာမဲ့စွာနဲ့ပဲ အစိုးရလုပ်တာလို့ပဲ ကျနော်တို့ကတော့ ပြောချင်ပါတယ်”ဟု ပြောသည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

လက်ရှိ မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီ ၁ ရက်က NLD အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ မြန်မာ့တပ်မတော်မှ ဖြုတ်ချ၍ အရေးပေါ် အခြေအနေ ကြေညာပြီး အုပ်ချုပ်လျက်ရှိသည်။

ထို့နောက် ၂၀၂၃ ခုနှစ်၊ ဇန်နဝါရီ ၃၁ ရက် နိုင်ငံရေးပါတီများ မှတ်ပုံတင်ခြင်းဥပဒေကို ပြဋ္ဌာန်း၍ နိုင်ငံရေးပါတီများ ကို ပြန်လည် မှတ်ပုံတင်ခိုင်းခဲ့သလို ရွေးကောက်ပွဲ ကျင်းပနိုင်ရေးအတွက်လည်း ပြင်ဆင်လျက်ရှိသည်။

နိုင်ငံရေးပါတီများ ရွေးကောက်ပွဲဝင်ခြင်းက ပြည်သူပေးမည့်မဲကို ရရှိအောင် ကြိုးစားကြခြင်းဖြစ်ပြီး အာဏာမလို ချင်သည့်ပါတီ ဒီလောကတွင် မည်သည့်ပါတီရှိလဲဟု ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)မှ ပြောရေးဆိုခွင့်ရှိသူ ဦးသိန်းထွန်းဦးက CNI သတင်းဌာနသို့ ပြောသည်။

 နိုင်ငံရေးပါတီ ကိုယ်စားလှယ်များကို NCA (၁၀)နှစ်ပြည့်ပွဲမှာ တွေ့ရစဉ်

၎င်းက “နိုင်ငံရေးပါတီ တစ်ခုဆိုတာလေ နိုင်ငံတော်နဲ့ နိုင်ငံသား ကောင်းကျိုးကို သူတို့ ကောင်းကျိုးပြုချင်ကြလို့ သာ နိုင်ငံရေးပါတီ ထောင်ကြတာကို။ အဲဒီလို ကောင်းကျိုးပြုပြီးတော့ လုပ်ဆောင်ဖို့ လုပ်ပိုင်ခွင့် ရဖို့ဆိုတာက ပြည်သူအပ်နှင်းတဲ့ မဲကိုရရှိအောင်လို့ ဘယ်နိုင်ငံရေးပါတီမဆို ကြိုးစားကြမှာပဲ။ အဲလို ကြိုးစားမှုပေါ်မှာတော့ အာဏာမလိုချင်တဲ့ အနိုင်မလိုချင်တဲ့ပါတီ ဒီလောကမှာ ဘယ်ပါတီရှိလဲ။ ဘာကြောင့်လဲဆိုလို့ရှိရင် ပြည်သူ အတွက် နိုင်ငံအတွက် လုပ်မယ်ဆိုရင် လုပ်ပိုင်ခွင့်ဆိုတဲ့ဟာ ရှိမှသာလျှင် လုပ်လို့ရတယ်။ ပါတီတိုင်းဟာဆိုလို့ရှိရင် ရွေးကောက်ပွဲ အောင်နိုင်ရေး ရည်မှန်းချက်ဆိုတဲ့ဟာကို ချမှတ်ပြီးဆောင်ရွက်ကြတာ ပါတီတိုင်း ဖြစ်ပါတယ်။ ဒါကြောင့်မို့ အခြားသော ဝေဖန်နေကြသောသူများ ၎င်းတို့ကိုယ်တိုင် သက်ဝင်ယုံကြည်သော ပါတီကရော ဘယ်လို ရပ်တည်ခဲ့သလဲ တပ်နဲ့ပေါင်းချင်း မပေါင်းချင်းကတေ အဓိက မကျဘူး။ ဟိုဟာနဲ့ပေါင်းတယ် ဒီဟာနဲ့ပေါင်းတယ်ဆို တာကတော့ အလကား ပြောနေကျတဲ့ လူတစ်စုရဲ့စကားသာဖြစ်တယ်။ ဒီပေါ်မှာတော့ ကြိုက်သလိုသုံးသပ် ကြိုက် သလို ဝေဖန်မှုလုပ်ကြမှပဲ ပါတီတစ်ခုက ရပ်တည်ချက် ဆောင်ရွက်နေမှုရဲ့ မူဝါဒပေါ်မှာပဲ အခြေခံတယ်”ဟု ပြော သည်။

လက်ရှိမြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ ၂၈ ရက်၌ မြို့နယ် ၁၀၂ မြို့နယ်မှာ ရွေးကောက်ပွဲ အပိုင်း(၁)ကို ကျင်းပမည်ဖြစ်ပြီး ၂၀၂၆ ခုနှစ်၊ ဇန်နဝါရီလမှာတော့ မြို့နယ် ၁၀၀ မြို့နယ်မှာ ရွေးကောက်ပွဲ ဆက်လက် ကျင်းပ မည်ဖြစ်သည်။

ထို့နောက် ၂၀၂၆ ခုနှစ်၊ ဖေဖော်ဝါရီလတွင် လွှတ်တော် ခေါ်မည်ဖြစ်ပြီး မတ်လ၌ အစိုးရသစ်ကို ဖွဲ့စည်းကြမည် ဖြစ်သည်။

၂၀၂၆ ခုနှစ်တွင် ပေါ်ပေါက်လာမည့် အစိုးရကို မြန်မာ့တပ်မတော်က ဦးဆောင်ဖွဲ့စည်းသော အစိုးရတစ်ရပ်သာ ဖြစ် လာကြမည်ဖြစ်ကြောင်း၊ နိုင်ငံရေးပါတီများကတော့ မြန်မာ့တပ်မတော်မှ ဦးဆောင်ဖွဲ့စည်းမည့် အစိုးရအဖွဲ့ထဲမှာ ရွေးချယ်ခံရဖို့ စောင့်မျှော်ရမည့် အခြေအနေသာရှိကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြ သည်။

CNI News

၂၀၂၅ ခုနှစ်၊ အောက်တိုဘာ ၂၂

ရှမ်းပြည်ပြန်လည် ထူထောင်ရေးကောင်စီ(RCSS) အနေဖြင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ကို စက္ကူစုတ်တစ်ခုအဖြစ် မမြင်ကြောင်း RCSS ၏ ပြောရေးဆိုခွင့်ရှိသူ ဒုတိယဗိုလ်မှူးကြီး အုမ်ခေးက CNI သတင်းဌာနသို့ ပြောသည်။

၂၀၂၁ ခုနှစ်တွင် မြန်မာ့တပ်မတော်မှ အာဏာသိမ်းလိုက်ခြင်းသည် NCA စာချုပ်၏ အနှစ်သာရ၊ အခြေခံမူများနှင့် ရည်မှန်းချက်များကို ပြောင်ပြောင်တင်းတင်း ဖျက်ဆီးလိုက်ပြီဖြစ်၍ စာချုပ်သည်လည်း စက္ကူစုတ်တစ်ခုအဖြစ် ရောက်သွားစေသည်ဟု NCA လက်မှတ်ထိုးထားသည့် တိုင်းရင်းသား လက်နက်ကိုင်များနှင့် အဖွဲ့ကွဲများ စုစုပေါင်း ၆ ဖွဲ့က အောက်တိုဘာလ ၁၃ ရက်တွင် ပူးတွဲထုတ်ပြန်ခဲ့သည်။

ထိုအဖွဲ့များမှာ NCA စာချုပ်တွင် လက်မှတ်ရေးထိုးခဲ့သော ကရင်အမျိုးသားအစည်းအရုံး(KNU) ၊ မြန်မာနိုင်ငံ လုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) ၊ ချင်းအမျိုးသားတပ်ဦး(CNF) တို့အပါအဝင် NCA ထိုးထားသည့် အဖွဲ့များထဲမှ နှစ်ခြမ်းကွဲသွားသော မွန်ပြည်သစ်ပါတီ (NMSP-AD) ပအိုဝ်းအမျိုးသား လွတ်မြောက် ရေးအဖွဲ့ချုပ် (PNLO) ၊ လားဟူဒီမိုကရက်တစ်အစည်းအရုံး (LDU)တို့ ဖြစ်ကြသည်။

RCSS အနေဖြင့် NCA စာချုပ်ကို စက္ကူစုတ်အဖြစ် မမြင်သည့်အပြင် အလေးထား လိုက်နာကြောင်း RCSS ၏ ပြောရေးဆိုခွင့်ရှိသူ ဒုတိယဗိုလ်မှူးကြီး အုမ်ခေးက CNI သတင်းဌာနသို့ ပြောသည်။

RCSS မှ ဒုတိယဗိုလ်မှူးကြီးအုမ်ခေးကို တွေ့ရစဉ်

၎င်းက “ကျနော်တို့ RCSS အနေနဲ့တော့ အဲဒီလိုမျိုး မမြင်ပါဘူး။ ကျနော်တို့အဖွဲ့ အနေနဲ့တော့ NCA ကို အလေး ထားပြီးတော့ စိတ်ဝင်တစား၊ စိတ်ရောကိုယ်ပါ ကြိုးစားပြီးတော့ လိုက်နာနေဆဲပဲ။ ဆောင်ရွက်နေဆဲပဲ။ အဲဒါက တော့ သူများပြောသလိုတော့ အဲဒီလိုမမြင်ပါဘူး။ တိုင်းရင်းသား လိုလားချက်ကတော့ တစ်ဖွဲ့နဲ့တစ်ဖွဲ့ မတူကြဘူး ပေါ့နော်။ အမျိုးမျိုးပဲ အဲဒါကတော့။ သူ့ဘက် ကိုယ့်ဘက်ချည်းပဲပေါ့။ အဲဒါကတော့ ဝေဖန်စရာ မလိုဘူး၊ မရှိဘူး ပေါ့” ဟု ပြောသည်။

NCA စာချုပ်ကို ဦးသိန်းစိန် အစိုးရလက်ထက် ၂၀၁၅ ခုနှစ်၊ အောက်တိုဘာ ၁၅ ရက်တွင် စတင်ရေးထိုးခဲ့ကြခြင်း ဖြစ်ကာ ၂၀၂၅ ခုနှစ်၊ အောက်တိုဘာ ၁၅ ရက်၌ (၁၀) နှစ်ပြည့်ခဲ့ပြီ ဖြစ်သည်။

သို့သော် NCA စာချုပ်၏ လုပ်ငန်းစဉ်များသည် ၂၀၂၀ ပြည့်နှစ် နောက်ပိုင်းမှ စတင်ကာ ရပ်တန့်သွားသည်မှာ ယနေ့အထိဖြစ်ကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

NCA စာချုပ်ကို KNU, RCSS, ALP, DKBA, KNU/KNLA-PC, PNLO, CNF, ABSDF, NMSP နှင့် LDU တို့ စုစုပေါင်း ၁၀ ဖွဲ့က လက်မှတ်ရေးထိုးခဲ့ကြခြင်းဖြစ်သည်။

သို့သော် ၂၀၂၁ ခုနှစ် နိုင်ငံရေး အပြောင်းအလဲဖြစ်ပြီး သဘောထားကွဲလွဲမှုများကြောင့် NCA လက်မှတ်ထိုးထား သည့် ၇ ဖွဲ့ဖြင့်သာ ဆောင်ရွက်နေကြခြင်းဖြစ်သည်။

ဗိုလ်ချုပ်ကြီးယွတ်စစ်နဲ့ ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ် 

ငြိမ်းချမ်းရေးသည် NCA မှ အခြေခံပြီး နှစ်ဦးနှစ်ဖက် သဘောတူညီထားသည့် စာချုပ်ပါအတိုင်း လိုက်နာမှုရှိစွာ ဆောင်ရွက်သွားရန်လိုကြောင်း RCSS ၏ ပြောရေးဆိုခွင့်ရှိသူ ဒုတိယဗိုလ်မှူးကြီး အုမ်ခေးက CNI သတင်းဌာနသို့ ပြောသည်။

၎င်းက “ငြိမ်းချမ်းရေးအနေနဲ့ ပြောရမယ်ဆိုရင်တော့ NCA ကနေ အခြေခံတာပေါ့။ အဲဒီတော့ တိုင်းပြည် တည် ဆောက်တဲ့ နေရာမှာရော၊ ရွေးကောက်ပွဲကိစ္စကရော။ ဒါကတော့ ကျနော်တို့အဖွဲ့ အနေနဲ့တော့ ဘာမှမပြောလို ဘူးပေါ့။ ဒါပေမယ့် NCA အကောင်အထည်ဖော်တဲ့ နေရာမှာပဲ အရေးကြီးတယ်‌ပေါ့။ အဲဒါကြောင့် ခုနက ပြောသလို ပဲ နှစ်ဦးနှစ်ဖက် သဘောတူညီထားတဲ့ စာချုပ်အတိုင်း ဆောင်ရွက်သွားဖို့လိုတယ် အဲဒီလိုပဲ ပြောလိုပါတယ်။ အဲဒီ ယုံကြည်မှု တည်ဆောက်တဲ့ နေရာမှာ ဥပမာ ခြုံပြီးပြောမှာပေါ့နော်။ နှစ်ဦးနှစ်ဖက် တည်ဆောက်ထားတဲ့ သဘော တူညီမှုတွေ ရရှိထားတဲ့ NCA စာချုပ်ပါတွေအတိုင်း လိုက်နာမှုရှိရှိနဲ့ ဆောင်ရွက်သွားဖို့တော့ လိုတာပေါ့နော်။ အဲဒီ အထဲမှာ အများအားဖြင့်တော့ လွှမ်းမိုးတာတွေတော့ အများကြီး ရှိသေးတာပေါ့။ စာချုပ် သဘောတူထားသည့် အတိုင်း မဆောင်ရွက်နိုင်ခဲ့တာ အများကြီးရှိတာပေါ့။ ဒါပေမယ့် အသေးစိတ်တော့ မပြောလိုတော့ပါဘူး” ဟု ပြောသည်။

NCA စာချုပ်တွင် ပြုပြင်စရာအချက် သိပ်မရှိပဲ ပြည့်စုံသော်လည်း ယခုလက်တွေ့နှင့် အလုပ်မဖြစ်သည့် အချက် များအား သုံးသပ်၍ ပြုပြင်သင့်သည်များကို ပြုပြင်သွားရမည်ဖြစ်ကြောင်း နိုင်ငံရေးအကဲခတ်များက အကြံပြုကြသည်။

လက်ရှိတွင် NCA စာချုပ်ကို ပျက်သွားပြီဟုဆိုကာ ABSDF၊ CNF၊ KNU တို့က ကြေညာ၍ မြန်မာ့တပ်မတော်နှင့် တိုက်ပွဲများ ဖြစ်ပွားနေသလို PNLO၊ ALP၊ LDU၊ NMSP သည်လည်း ၂ ဖွဲ့ကွဲသွားကာ NCA ကနေ နုတ်ထွက်သူနှင့် NCA လမ်းကြောင်းပေါ်မှာ ဆက်လက် ရပ်တည်သူဆိုကာ ဖြစ်တည်နေသည်။

CNI News

၂၀၂၅ ခုနှစ်၊ အောက်တိုဘာ ၂၁

ပအိုဝ်းနှင့် အင်းသားတို့အကြား ဒေသတွင်း ပဋိပက္ခများ ဖြစ်ပေါ်စေရေး၊ လူမျိုးရေး ပဋိပက္ခများ ဖြစ်ပေါ်စေရေးတို့ အတွက် အပြင်းအထန် လှုံ့ဆော်ဖန်တီးနေကြသည်ကို သတိကြီးစွာထား၍ ရှောင်ရှားရုန်းထွက်ကြရန် ပအိုဝ်း အမျိုးသားဖက်ဒရယ်ကောင်စီ(PNFC)က တိုက်တွန်းခဲ့သည်။

၂၀၂၅ ခုနှစ်၊ အောက်တိုဘာ ၂၁ ရက်တွင် PNFC က (၁၀)နှစ်မြောက် အင်းသားအမျိုးသားနေ့သို့ ပေးပို့သော ဂုဏ်ပြုသဝဏ်လွှာ၌ ယခုလို တိုက်တွန်း ထားခြင်းဖြစ်သည်။

PNFC က “ယနေ့အချိန်အခါတွင် ပအိုဝ်းနှင့်အင်းသားတို့အကြား ဒေသတွင်း ပဋိပက္ခများ ဖြစ်ပေါ်စေရေး၊ လူမျိုးရေး ပဋိပက္ခများ ဖြစ်ပေါ်စေရေးတို့အတွက် စစ်အာဏာရှင်များနှင့် လက်ကိုင်တုတ်များက မဖြစ်ဖြစ်အောင် အပြင်းအထန် လှုံ့ဆော်ဖန်တီးနေကြသည်ကို သတိကြီးစွာထား၍ ရှောင်ရှားရုန်းထွက်ကြပါရန် ပအိုဝ်းပြည်သူများ နှင့် အင်းသားပြည်သူများအား အလေးအနက် ပန်ကြားတိုက်တွန်းပါသည်”ဟု ပြောသည်။

ပြည်ထောင်စုအရေးသည် ပအိုဝ်းနှင့် အင်းသားတို့၏ အရေးဖြစ်သကဲ့သို့ ပအိုဝ်းနှင့်အင်းသားတို့၏ အရေးသည် လည်း ပြည်ထောင်စုအရေးဖြစ်သည်ဟု ခံယူချက် တူညီကြသူများဖြစ်ကြောင်း PNFC ၏ သဝဏ်လွှာမှာ ဖော်ပြ ထားသည်။

PNFC ၏ သဝဏ်လွှာကို တွေ့ရစဉ်

အင်းလေးလူထုလှုပ်ရှားမှုအဖွဲ့ အပါအဝင် အင်းသားတော်လှန်ရေး အဖွဲ့အစည်းများစုပေါင်း၍ ခိုင်မာကျယ်ပြန့် အားကောင်းသော အင်းသားနိုင်ငံရေး ကိုယ်စားပြု ဦးဆောင်မှုတစ်ရပ် ပေါ်ပေါက်ရေးသည် အင်းသား တော်လှန် ရေးနှင့်အတူ လူထုနွေဦး တော်လှန်ရေး၏ လိုအပ်ချက်တစ်ရပ်ဖြစ်သည်ဟု ထိုသဝဏ်လွှာတွင် ပြေထားသည်။

ထိုဦးဆောင်မှုကို စုပေါင်းဖော်ဆောင်ကြရာတွင် ပအိုဝ်းအမျိုးသားဖက်ဒရယ်ကောင်စီ အနေဖြင့် မိမိတတ်စွမ်းသမျှ အပြည့်အဝ ပူးပေါင်းဆောင်ရွက်သွားမည်ဟု PNFC က ပြောသည်။

PNFC သည် ၂၀၂၁ ခုနှစ်၊ ဖေဖော်ဝါရီ ၁ ရက်တွင် မြန်မာ့တပ်မတော်က NLD အစိုးရကို ၂၀၂၀ အထွေထွေ ရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချခဲ့ပြီး နိုင်ငံတော်အား အရေးပေါ် အခြေအနေ ကြေညာခြင်းကို ဆန့်ကျင်ရန် ဖွဲ့စည်းခဲ့သော ပအိုဝ်းလက်နက်ကိုင် ဖြစ်သည်။

PNFC ကို ဦးဆောင်သူ ခွန်မြင့်ထွန်းသည် ပအိုဝ်းအမျိုးသားလွတ်မြောက်‌ရေးအဖွဲ့ချုပ်(PNLO)မှာ ဥက္ကဋ္ဌ အဖြစ် တာဝန်ယူခဲ့သူဖြစ်သလို တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ကို လက်မှတ်ရေးထိုး ခဲ့သူဖြစ်သည်။

သို့သော် ၂၀၂၁ ခုနှစ်၊ ဖေဖော်ဝါရီ ၁ ရက်နေ့ နောက်ပိုင်း နိုင်ငံရေး အပြောင်းအလဲတွင် ခွန်မြင့်ထွန်းသည် PNFC ကို ထူထောင်၍ မြန်မာ့တပ်မတော် ဖြုတ်ချရေးနှင့် စစ်အာဏာရှင် တော်လှန်ရေးဆိုကာ လက်နက်ကိုင် တော်လှန်ရေး အား ဆင်နွှဲလျက်ရှိသည်။

CNI News

၂၀၂၅ ခုနှစ်၊ အောက်တိုဘာ ၂၁

လာမည့် ရွေးကောက်ပွဲ အပိုင်း (၁)အတွက် အဝေးရောက် ကြိုတင်မဲပေးကြရန် ပုံစံ ၁၅ လျှောက်ရသည့်အခါ အထောက်အထား အပြည့်အစုံ တောင်းဆိုမှုများကြောင့် ရခိုင်တိုက်ပွဲရှောင်များ စိုးရိမ်မှုရှိနေကြသည်ဟု ရခိုင် တိုင်းရင်းသားများပါတီ(RNP)ဥက္ကဋ္ဌ ဦးဘရှိန်က CNI သတင်းဌာနသို့ ပြောသည်။

မြန်မာနိုင်ငံ ပြည်တွင်းရှိ မဲစာရင်းပါရှိသည့် သက်ဆိုင်ရာ မြို့နယ်ပြင်ပရောက် မဲဆန္ဒရှင်များ ကြိုတင်မဲပေးနိုင် သော အခြေအနေနှင့်ပတ်သက်ပြီး ပြည်ထောင်စုရွေးကောက်ပွဲကော်မရှင်(UEC)မှ ၂၀၂၅ ခုနှစ်၊ စက်တင်ဘာ ၁၅ ရက်တွင် ထုတ်ပြန် ကြေညာခဲ့သည်။

ကြိုတင်မဲ ပေးနိုင်ရေးအတွက် ပုံစံ ၁၅ လျှောက်ရသည့်အခါ ကိုယ်ရေးအချက်အလက် အပြည့်အစုံ လိုအပ်သော် လည်း လက်ရှိ အာရက္ခတပ်တော်(AA)နှင့် မြန်မာ့တပ်မတော်တို့၏ စစ်ရေး တင်းမာမှုများကြောင့် နေရာဒေသ အသီးသီးသို့ ရောက်ရှိနေသည့် ရခိုင်တိုက်ပွဲရှောင်များမှာ စိုးရိမ်မှုများ ရှိနေခြင်းဖြစ်သည်။

ရခိုင်တိုက်ပွဲရှောင်များကိုတွေ့ရစဉ်

ရခိုင်တိုင်းရင်းသားများပါတီ (RNP)ဥက္ကဋ္ဌ ဦးဘရှိန်က “အခု အဝေးရောက်မဲ လူတွေကတော့ ကြိုတင်မဲလို့ ပြောကြ တယ်။ ပုံစံ ၁၅ နဲ့ အဝေးရောက်မဲ ပေးမယ့်အခါကြတော့လည်း ဒီလူတွေက ဒုက္ခသည်အနေနဲ့ပဲ ပြည်မ ရောက်နေ တာ၊ အခြားနေရာတွေ ရောက်နေတာ။ အဲဒီဒေသမှာ ပုံစံ ၁၅ နဲ့ လျှောက်မယ်လို့ဆိုတဲ့ အခါကြတော့ မှတ်ပုံတင် တောင်းတယ်၊ သူတို့တည်းခိုနေတဲ့ ဧည့်စာရင်းတွေ‌ တောင်းတယ်၊ မိတ္တူတွေ တောင်းတယ်၊ ဟိုဟာတွေ တောင်း တယ်၊ ဒီဟာတွေတောင်းတယ်။ အဲဒီတောင်းတာကလည်း ဌာနဆိုင်ရာရဲ့ ညွှန်ကြားချက်အတိုင်း တောင်းတာတွေ ဖြစ်ပါလိမ့်မယ်။ ဒါပေမယ့် အလိုလိုကြောက်နေတဲ့ လူတွေက သူတို့အကြောင်းအရာတွေကို ဘာတွေ လာတောင်း ပြန်ပြီလဲ။ ဒီလူတွေ ဘာလုပ်ကြမလဲဆိုပြီးတော့ စိုးရိမ်ကြောင့်ကြမှုတွေနဲ့ ဖြစ်နေတယ်ဆိုတာကတော့ အန်ကယ် တို့ အဲဒီလူတွေဆီက ပြန်ပြောပြတဲ့ မိတ်ဆွေတွေဆီက သိရပါတယ်။ ဒါပေမယ့် ဒီအခက်အခဲတွေကြားကပဲ ပုံစံ ၁၅ နဲ့ ကြိုတင် မဲပေးလို့ရအောင်၊ လျှောက်တဲ့လူတွေကလည်း အသင့်အတင့်တော့ ရှိကြပါတယ်” ဟု ပြောသည်။

ရွေးကောက်ပွဲအား လာမည့် ဒီဇင်ဘာ ၂၈ ရက်နေ့တွင် အပိုင်း (၁) ကို စတင် ကျင်းပသွားမည်ဖြစ်ကြောင်း UEC က တရားဝင် ထုတ်ပြန်ထားသည်။

ရခိုင်ပြည်နယ်တွင် မြန်မာ့တပ်မတော်နှင့် AA တို့အကြား တစ်ကျော့ပြန် တိုက်ပွဲများ ဖြစ်ပွားနေသည်မှာ ၂၀၂၃ ခုနှစ်၊ နိုဝင်ဘာလမှ စတင်ခဲ့ခြင်းဖြစ်ပြီး လက်ရှိမှာတော့ ၂ နှစ်ပြည့်တော့မည် ဖြစ်သည်။

ထိုကာလအတွင်း AA ဘက်မှ ရခိုင်ပြည်နယ်ရှိ မြို့နယ် ၁၇ မြို့နယ်ထဲမှာ ၁၄ မြို့နယ်နှင့် ပလက်ဝမြို့တို့ကို သိမ်းပိုက် အုပ်ချုပ်ထားပြီး မြန်မာ့တပ်မတော်က စစ်တွေ၊ ကျောက်ဖြူ၊ မာန်အောင်တို့ကိုသာ ထိန်းချုပ်ထား နိုင်သည်။

ရခိုင်တိုက်ပွဲရှောင်များကိုတွေ့ရစဉ်

ထိုပဋိပက္ခများကြား မဲပေးကြရမည့် ရခိုင်ပြည်သူလူထု အနေဖြင့် စိတ်အားထက်သန်မှု ရှိကြရန်မှာ ခက်ခဲကြောင်း ရခိုင်တိုင်းရင်းသားများပါတီ (RNP)ဥက္ကဋ္ဌ ဦးဘရှိန်က CNI သတင်းဌာနသို့ ပြောသည်။

၎င်းက “သက်တောင့်သက်သာ နေရထိုင်ရတဲ့ဘဝနဲ့ ပြေးလိုက် လွှားလိုက်၊ ရုန်းလိုက် ကန်လိုက်၊ ထမင်းတစ်လုပ် စားဖို့တောင် သတိမရနိုင်၊ ဟင်းတစ်လုပ် စားဖို့တောင် သတိမရနိုင်၊ ညအိပ်တာ ဘယ်နေရာမှာ အိပ်ရမှန်းမသိတဲ့ လူတွေနဲ့ အခြေအနေခြင်း မတူကြဘူး။ အဲဒီမှာ ပဋိပက္ခတွေ၊ အခက်အခဲတွေ ရှိနေကြတဲ့နောက် မဲပေးတဲ့သူတွေ လည်း စိတ်အား ထက်ထက်သာသာ ရှိဖို့အတွက် ခက်ခဲပါတယ်” ဟု ပြောသည်။

ရွေးကောက်ပွဲကော်မရှင်က စက်တင်ဘာ ၁၄ ရက်နေ့တွင် ရွေးကောက်ပွဲ မကျင်းပဖြစ်သည့် တိုင်းဒေသကြီးနှင့် ပြည်နယ် ၈ ခုမှ မြို့နယ် ၅၆ ခုကို ကြေညာခဲ့သည်။

ထိုအထဲတွင် လက်ရှိ အာရက္ခတပ်တော် (AA) ထိန်းချုပ်ထားသည့် အမ်း၊ သံတွဲ၊ တောင်ကုတ်နှင့် ဂွမြို့တို့ မပါဝင် သည်ကို တွေ့ရသည်။

မြန်မာ့တပ်မတော် အနေဖြင့် အမ်း၊ သံတွဲ၊ တောင်ကုတ်နှင့် ဂွမြို့တို့မှာ စစ်ရေးအရ အာမခံချက် ရှိသောကြောင့် ရွေးကောက်ပွဲ မကျင်းပ

CNI News

၂၀၂၅ ခုနှစ်၊ အောက်တိုဘာ ၂၁

စစ်ကိုင်းတိုင်းဒေသကြီးအထက်ပိုင်း၊ လဟယ်မြို့နယ်အတွင်းရှိ နာဂအမျိုးသားဆိုရှယ်လစ်ကောင်စီ-ကပ္ပလန်/ယုံးအောင် (NSCN-K/YA)အဖွဲ့၏ စခန်းတစ်ခုကို အိန္ဒိယက ၂၀၂၅ ခုနှစ်၊ အောက်တိုဘာ ၂၀ ရက် နံနက်ပိုင်းတွင် တိုက်ခိုက်ခဲ့သည်ဟု နီးစပ်သူများထံမှ သိရသည်။

အိန္ဒိယသည် လဟယ်မြို့နယ်၊ ကမ်မော်လောရီကျေးရွာရှိ NSCN-K/YA ၏ စခန်းတစ်ခုကို တိုက်ခိုက်ခဲ့ခြင်းကြောင့် NSCN-K/YA ၏ အနောက်မြောက်တိုင်းမှူး ဗိုလ်ချုပ်ပီး‌အောင်၏ နေအိမ်ထိမှန်ခဲ့ကြောင်း ဒေသတွင်း သတင်းရင်း မြစ်များထံမှ သိရသည်။

အဆိုပါ တိုက်ခိုက်ခံရမှုကြောင့် ဗိုလ်ချုပ် ပီးအောင်၏ သားတစ်ဦးနှင့် မိခင်ဖြစ်သူ သေဆုံးသွားခဲ့ကြောင်း၊ ထိုတိုက် ခိုက်မှုကြောင့် ဗိုလ်ချုပ်ပီးအောင်နှင့် ရဲဘော်တစ်ဦးလည်း ဒဏ်ရာရရှိခဲ့ကြောင်း ဒေသတွင်းသတင်းရင်းမြစ်များက ပြောသည်။

NSCN-K/YA အဖွဲ့သည် အာရုနာချယ် ပရာဒေ့ရှ်ပြည်နယ်၊ ချန်လန်(Changlang)ခရိုင်၊ မန်မော်(Manmao) အုပ်စု အတွင်းရှိ ဟာ့စ်မန်(Hatman)ကျေးရွာအနီးက အာသံရိုင်ဖယ်(Assam Rifles)စခန်းကို အောက်တိုဘာ ၁၅ ရက် ရက်က တိုက်ခိုက်ခဲ့သည်။

NSCN-K/YA အဖွဲ့ကို တွေ့ရစဉ်

NSCN-K/YA အဖွဲ့၏ တိုက်ခိုက်မှုကြောင့် အာသံရိုင်ဖယ်တပ်ဖွဲ့မှ ၄ ဦးထက်မနည်း ဒဏ်ရာများရရှိခဲ့သည်။

အိန္ဒိယသည်  စစ်ကိုင်းတိုင်းဒေသကြီး၊ နာဂကိုယ်ပိုင်အုပ်ချုပ်ခွင့်ရဒေသ၊ လေရှီးမြို့နယ်အတွင်းရှိ NSCN-K/YA၊ ULFA(I) အဖွဲ့တို့၏ စစ်စခန်းများကို ၂၀၂၅ ခုနှစ်၊ ဇူလိုင် ၁၃ ရက်က ဒရုန်းဖြင့် တိုက်ခိုက်ခဲ့ခြင်းကြောင့် NSCN-K/YA က အောက်တိုဘာ ၁၅ ရက်တွင် ပြန်လည် တိုက်ခိုက်ခဲ့ခြင်းဖြစ်သည်။

ထို့နောက် အိန္ဒိယက NSCN-K/YA ၏ လဟယ်မြို့နယ်အတွင်းက စခန်းတစ်ခုကို အောက်တိုဘာ ၂၀ ရက်တွင် ဒရုန်းဖြင့် တိုက်ခိုက်မှု ထွက်ပေါ်လာခြင်းဖြစ်သည်။

NSCN-K/YA သည် အိန္ဒိယ-မြန်မာ နာဂလူမျိုးများကို စုစည်း၍ လွတ်လပ်သော နာဂပြည်ထောင်စု နယ်မြေကို ထူထောင်ရန် လက်နက်ကိုင်တော်လှန်လျက်ရှိသည်။

CNI News

၂၀၂၅ ခုနှစ်၊ အောက်တိုဘာ ၁၉

နိုင်ငံတော်ငြိမ်းချမ်းရေးနှင့် ဖွံ့ဖြိုးရေးဆိုသည်မှာ အစိုးရ မည်သူပဲ ပြောင်းသွားသွား မူဝါဒအားဖြင့် လုပ်သင့် လုပ်ထိုက်သည့် ကိစ္စများက တစ်သမတ်တည်း ဖြစ်ရန်လိုကြောင်း ပြည်သူ့ပါတီ(PP)မှ ဦးကိုကိုကြီးက CNI သတင်းဌာနသို့ ပြောသည်။

မြန်မာနိုင်ငံ အစိုးရများသည် နိုင်ငံတကာနှင့် ပူးပေါင်းဆောင်ရွက်သည့် စီမံကိန်းများကို ဖော်ဆောင်ရာတွင် ရှေ့အစိုးရလုပ်သွားသည့် ကိစ္စဖြစ်၍ နောက်တက်လာသော အစိုးရက ဖျက်သိမ်းခြင်း၊ ဆိုင်ငံ့ခြင်း၊ ပြန်လည် ဆွေးနွေးမှု အသစ်များ ပြုလုပ်ခြင်းများရှိသည်။

ထိုလုပ်ရပ်အပေါ် ပြည်ပရင်းနှီးမြှုပ်နှံသူများက မကြိုက်နှစ်သက်ကြသလို အယုံအကြည် ကင်းမဲ့မှုများ ဖြစ်လာပြီး ရင်းနှီးမြှုပ်နှံမှုများ လုပ်ရန်ရှောင်လာကြသည်ဟု စီးပွားရေးလုပ်ငန်းရှင်များက ထောက်ပြကြသည်။

ရွေးကောက်ပွဲအလွန် ပေါ်ပေါက်လာမည့် အစိုးရက နိုင်ငံတော်ငြိမ်းချမ်းရေးအား အစိုးရမည်သူပဲ ပြောင်းပြောင်း မူဝါဒအားဖြင့် တစ်သမတ်တည်းထားရန် လိုအပ်ကြောင်း ပြည်သူ့ပါတီ(PP)မှ ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။ 

၎င်းက “အဓိက,ကတော့ မကြာခင်မှာ ရွေးကောက်ပွဲတွေ ကျင်းပတော့မယ်ဆိုတော့ ကျင်းပလို့ နိုင်ငံရေး အခင်း အကျင်းအသစ် ပေါ်လာတဲ့အခါမှာ အဲဒီရွေးကောက်ခံရတဲ့ ကိုယ်စားလှယ်တွေ လွှတ်တော်အစိုးရ အနေနဲ့ ဒီနိုင်ငံ တော်ရဲ့ ငြိမ်းချမ်းရေး ကိစ္စဆိုတာက အစိုးရဘယ်သူပဲ ပြောင်းသွားသွား သူက မူဝါဒအားဖြင့် နောက် လုပ်သင့် လုပ်ထိုက်တဲ့ ဟာတွေက တစ်သမတ်တည်း ဖြစ်ဖို့တော့ လိုတယ်ဆိုတော့ အခုလုပ်နေတဲ့ဟာတွေက ရွေးကောက်ပွဲ ပြီးသွားတဲ့ အခါကြတော့ ကိုယ့်သဘောနဲ့ကိုယ် နောက်တစ်မျိုးတွေ လုပ်ရင် သူက အဆက်အစပ် သိပ်မရှိဘူး။ ဒါကြောင့်မို့လို့ ဒီလိုမျိုးရွေးကောက်ပွဲတွေ မတိုင်ခင်မှာ ဆွေးနွေးပွဲတွေ လုပ်တယ်။ ဒီကနေ အကြံပြုချက်တွေ ဆွေးနွေး ချက်တွေကို စုစည်းထားတယ်ဆိုတာက ရွေးကောက်ပွဲအလွန် နိုင်ငံရေး အခင်းအကျင်းအတွက်က ဆက်ပြီးတော့ သယ်ဆောင်နိုင်ဖို့ အများကြီး အထောက်အကူ ဖြစ်မယ်လို့ မျှော်လင့်ပါတယ်”ဟု ပြောသည်။

ဦးသန်းရွှေ ဦးဆောင်သော အစိုးရလက်ထက်က တရုတ်နှင့် မြစ်ဆုံစီမံကိန်း အကောင်အထည်ဖော်ရန် သဘောတူ စာချုပ်ချုပ်ဆိုခဲ့သော်လည်း ဦးသိန်းစိန် အစိုးရလက်ထက်မှာတော့ ဆန့်ကျင်ကွန့်ကွက်မှုများကြောင့် ယာယီရပ်ဆိုင်းကြောင်း ကြေညာခဲ့သည်။

ထို့နောက် ၂၀၁၅ အထွေထွေရွေးကောက်ပွဲနှင့်အတူ ရွေးကောက်တင်မြှောက်ခံရသော ဒေါ်အောင်ဆန်းစုကြည် အစိုးရတက်လာသည့် အခါမှာလည်း မြစ်ဆုံစီမံကိန်း ပြန်လည် စတင်နိုင်ခြင်း မရှိခဲ့သလို လက်ရှိ တပ်မတော်က NLD အစိုးရကို ဖြုတ်ချ၍ နိုင်ငံတော်အား အရေးပေါ် အခြေအနေ ကြေညာ၍ အုပ်ချုပ်နေချိန်မှာလည်း မြစ်ဆုံ စီမံကိန်း ပြန်မစတင်နိုင်ဘဲ ရပ်ထားရသည်။ 

ငြိမ်းချမ်းရေးသည် ထိပ်တန်း ဦးစားပေး အနေဖြင့် ရှိနေမှာဖြစ်ပြီး ယခု လက်နက်ကိုင်ပဋိပက္ခ ဖြတ်သန်းမှုတွင် အမြင့်ဆုံး အခြေအနေဖြစ်ကြောင်း ပြည်သူ့ပါတီ(PP)မှ ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။ 

၎င်းက “ကျနော်တို့ အဓိက,ကတော့ ဒါငြိမ်းချမ်းရေးမှာ ထိပ်တန်းဦးစားပေး ကိစ္စအဖြစ်နဲ့ ဆက်ရှိနေလိမ့်မယ်လို့ ကျနော်တို့ မျှော်လင့်တယ်၊ အဲတော့ ဘာကြောင့်ဆိုတော့ ဒီလက်နက်ကိုင် ပဋိပက္ခက ပြောရရင် ကျနော်တို့ ဖြတ်သန်းမှု တစ်လျှောက်လုံးမှာက အမြင့်ဆုံး အခြေနေတစ်ခုကို ရောက်လာခဲ့တယ်။ ရောက်လာခဲ့တော့ လက်ရှိ အစိုးရလက်ထက်မှာ တတ်နိုင်သလောက် ဆောင်ရွက်နေတာတွေ ရှိပေမယ့်လို့ နောက်အစိုးရ လက်ထက်မှာ ဆက်ပြီးတော့ ဒါတွေကို အရှိန်အဟုန်မြင့်ဖို့ အားကောင်းအောင် ဆောင်ရွက်ဖို့ လိုတယ်လို့ မြင်ပါတယ်”ဟု ပြောသည်။ 

လက်ရှိ မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ ၂၈ ရက်၌ မြို့နယ် ၁၀၂ မြို့နယ်မှာ ရွေးကောက်ပွဲ အပိုင်း(၁)ကို ကျင်းပမည်ဖြစ်ပြီး ၂၀၂၆ ခုနှစ်၊ ဇန်နဝါရီလမှာတော့ မြို့နယ် ၁၀၀ မြို့နယ်မှာ ရွေးကောက်ပွဲ ဆက်လက် ကျင်းပ မည်ဖြစ်သည်။

ထို့နောက် ၂၀၂၆ ခုနှစ်၊ ဖေဖော်ဝါရီလတွင် လွှတ်တော် ခေါ်မည်ဖြစ်ပြီး မတ်လ၌ အစိုးရသစ်ကို ဖွဲ့စည်းကြမည်ဖြစ်သည်။

CNI News
၂၀၂၅ ခုနှစ်၊ အောက်တိုဘာ ၁၈

ကိုကိုးကျွန်းသည် မိမိတို့နိုင်ငံအတွက် ပထဝီ အနေအထားအရ အရေးပါသည့် နေရာတွင် တည်ရှိသောကြောင့် လုံခြုံရေးသတိရှိကြရန် နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင် လှိုင်က ပြောသည်။

၂၀၂၅ ခုနှစ်၊ အောက်တိုဘာ ၁၈ ရက်တွင် ကိုကိုးကျွန်း တပ်နယ်ရှိ အရာရှိ၊ စစ်သည်၊ မိသားစုများဖြင့် တွေ့ဆုံစဉ် ၎င်းက ပြောကြားခဲ့ခြင်း ဖြစ်သည်။ 

ဗိုလ်ချုပ်မှူးကြီးမင်းအောင်လှိုင်က “ ကိုကိုးကျွန်းသည် မိမိတို့နိုင်ငံအတွက် ပထဝီ အနေအထားအရ အရေးပါသည့် နေရာတွင် တည်ရှိသောကြောင့် ကိုကိုးကျွန်း တပ်နယ်တွင် တာဝန်ထမ်းဆောင်လျက်ရှိသည့် အရာရှိ၊ စစ်သည် များသာမက မိသားစုဝင်များ အနေဖြင့်လည်း အမြဲ လုံခြုံရေးအသိ၊ လုံခြုံရေးသတိဖြင့် နေထိုင်ကြရန်လိုသည်” ဟု ပြောသည်။ 

တပ်မတော်ဆိုသည်မှာ နိုင်ငံတော်ကာကွယ်ရေး တာဝန် ထမ်းဆောင်သည့် အဖွဲ့အစည်းဖြစ်ပြီး အဆင့်အလိုက် တာဝန်ထမ်းဆောင် နေကြသူများ အားလုံးက ကာကွယ်ရေး အမြင်များ ရှိရန်လိုကြောင်း၊ တပ်မတော်သားများ ဖြစ်သည်နှင့်အညီ အမြဲ တိုက်ပွဲဝင် အသင့်ဖြစ်စေရေး ကြိုတင်လေ့ကျင့် ပြင်ဆင်ခြင်းများကို ဆောင်ရွက်နေရမည် ဟု ၎င်းက ပြောသည်။ 

မိမိတို့နိုင်ငံ၏ နိုင်ငံရေးအခြေအနေအရ တပ်မတော်အနေဖြင့် အမျိုးသားနိုင်ငံရေး ဦးဆောင်မှု အခန်းကဏ္ဍတွင် ပါဝင်နေရခြင်းဖြစ်ကြောင်း ကော်မရှင်ဥက္ကဋ္ဌက ပြောသည်။

ရွေးကောက်ပွဲကို မကြာမီ အချိန်အတွင်း ကျင်းပပေးသွားမည်ဖြစ်ကြောင်း၊ ရွေးကောက်ပွဲသည် ဒီမိုကရေစီ နိုင်ငံ တစ်ခုကို တည်ဆောက်ရန်အတွက် မဖြစ်မနေလိုအပ်ကြောင်း၊ ရွေးကောက်ပွဲ အောင်မြင်စွာ ကျင်းပနိုင်ရေး အရာ ရှိ၊ စစ်သည် မိသားစုများ အနေဖြင့် ဝိုင်းဝန်း ဆောင်ရွက်ပေးကြစေလိုကြောင်း ၎င်းက ပြောသည်။

CNI News
၂၀၂၅ ခုနှစ်၊ အောက်တိုဘာ ၁၇

စစ်ကိုင်းတိုင်းဒေသကြီးအထက်ပိုင်း၊ ဗန်းမောက်မြို့နယ်အတွင်းက ကဒူးတိုက်ပွဲရှောင် ၂၀၀ ကျော်ကို ရှမ်းနီအမျိုး သားများတပ်မတော်(SNA)၏ တပ်မဟာ ၆၁၄ က ၂၀၂၅ ခုနှစ်၊ အောက်တိုဘာ ၁၇ ရက်တွင် ကယ်ထုတ်လာခဲ့ ကြောင်း သိရသည်။

ဗန်းမောက်မြို့ကို KIA,PDF,ကဒူးတပ်ဖွဲ့က ၂၀၂၅ ခုနှစ်၊ စက်တင်ဘာ ၁၅ ရက်တွင် ထိုးစစ်ဆင် တိုက်ခိုက်ခဲ့ ပြီးနောက် အောက်တိုဘာ ၂၀ ရက်၌ မြို့ကို သိမ်းပိုက်ခဲ့သည်။

ထို့နောက် ဗန်းမောက်မြို့အနီးရှိ သခွက်သာ၊ ခိုနန်းကျေးရွာမှ ကဒူးတိုက်ပွဲရှောင် ၂၀၀ ကျော်သည် တိုက်ပွဲ အတွင်း မိတ်ပိနေသည့်အတွက် SNA ဘက်က သွားရောက်ကယ်ထုတ်၍ ဘေးလွတ်ရာသို့ ခေါ်ဆောင်လာကာ စောင့် ရှောက်ပေးလျက်ရှိသည်။ 

KIA,PDF,ကဒူးတပ်ဖွဲ့တို့၏ ဗန်းမောက်မြို့သိမ်း တိုက်ပွဲရှောင် ဒေသခံ စုစုပေါင်း ၅၀၀၀ ကျော် တိုက်ပွဲရှောင်နေကြ ရပြီး SNA သည် အများစုကို စောင့်ရှောက်ထား၍ စားနပ်ရိက္ခာများနှင့် ဆေးဝါးများ ထောက်ပံ့ပေးလျက်ရှိသည်။

သို့သော် တိုက်ပွဲရှောင်များအတွက် စားနပ်ရိက္ခာနှင့် ကျန်းမာရေး စောင့်ရှောက်မှုများ အရေးပေါ် လိုအပ်လျက်ရှိ သည်။

အဆိုပါ တိုက်ပွဲရှောင်များအတွက် အစိုးရ၊ နိုင်ငံတကာအဖွဲ့အစည်းတို့မှ တစ်စုံတစ်ရာ အကူအညီ ပေးခြင်းမရှိ ကြောင်း သိရသည်။