CNI News

၂၀၂၃ ခုနှစ်၊ နိုဝင်ဘာ ၁

ကိုးကန့်ဒေသတွင်ဖြစ်ပွားနေသော တိုက်ပွဲများအတွင်း ကြည်းကြောင်း၊ လေကြောင်း စစ်ရေးဆိုင်ရာ နယ်မြေ ကျော်လွန်လာပါက မည်သည့်အဖွဲ့အစည်းမဆို တိုက်ထုတ်သွားမည်ဟု “ဝ”ပြည်နယ်သွေးစည်းညီညွတ်ရေး တပ်မတော်(UWSA)က ထုတ်ပြန်ခဲ့သည်။

UWSA သည် ကိုးကန့်စစ်ပွဲအတွင်း မည်သည့်ဘက်ကိုမှ ပါဝင် တိုက်ခိုက်ပေးမည်မဟုတ်သလို ဘက်မလိုက် သော မူဝါဒကို ကျင့်သုံးလျက်ရှိကြောင်း ထုတ်ပြန်ခဲ့သည်။

ထို့နောက် နှစ်ပွဲ စစ်ပွဲများရပ်တန့်ပြီး တွေ့ဆုံ ဆွေးနွေးကြရန်လည်း UWSA က တိုက်တွန်းထားသည်။

UWSA က “ မိမိတို့ UWSA သည် ချွင်းချက်မရှိ ကိုယ့်ဒေသ ကိုယ့်ပြည်သူကို ကာကွယ်စောင့်ရှောက်ခွင့် အပြည့် အဝ ရှိသည်။ ထို့ကြောင့် လေကြောင်း၊ ကြည်းကြောင်းမှ နယ်ကျော်လာတဲ့ မည်သည့် စစ်ရေးဆိုင်ရာ မှန်သမျှကို တိုက်ထုတ်သွားမည်”ဟု ပြောသည်။

သို့သော် “ဝ”ဒေသအတွင်းသို့ ရောက်ရှိလာသော တိုက်ပွဲရှောင်များကိုတော့ အခမဲ့ ကူညီစောင့်ရှောက်ပေး သွားမည်ဖြစ်ကြောင်း UWSA က ထုတ်ပြန်ချက်ခဲ့သည်။

UWSA ရဲ့ လေယာဉ်ပစ် လက်နက်ကို တွေ့ရစဉ်

မြန်မာအမျိုးသားဒီမိုကရေစီမဟာမိတ်တပ်မတော်(MNDAA)သည် မဟာမိတ်များဖြစ်သော ရက္ခိုင့်တပ်တော် (AA)၊ တအာင်း(ပလောင်)အမျိုးသားလွတ်မြောက်ရေးတပ်မတော်(TNLA)၊ ဗမာပြည်သူ့လွတ်မြောက်ရေးတပ်တော် (BPLA)၊ မန္တလေးပြည်သူ့ကာကွယ်ရေးတပ်ဖွဲ့(MDY-PDF)တို့နှင့် ပူးပေါင်း၍ ရှမ်းပြည်နယ်(မြောက်ပိုင်း)ရှိ မြန်မာ့ တပ်မတော် စစ်စခန်းများကို အောက်တိုဘာ ၂၇ ရက်နေ့က တိုက်ခိုက်သိမ်းပိုက်လျက်ရှိနေသည်။

အဆိုပါ စစ်ဆင်ရေးကို ၁၀၂၇ ဟု နာမည်ပေးထားပြီး ရှမ်းပြည်နယ်(မြောက်ပိုင်း)ရှိ လောက်ကိုင်မြို့နယ်၊ သိန်းနီ မြို့နယ်၊ လားရှိုးမြို့နယ်၊ နောင်ချိုမြို့နယ်၊ ချင်းရွှေဟော်မြို့နယ်၊ မုံးကိုးမြို့နယ်၊ မူဆယ်မြို့နယ် စသည့် မြို့နယ် များက မြန်မာ့တပ်မတော် စစ်စခန်းများ၊ အထွေထွေအုပ်ချုပ်ရေးမှူးရုံးများ၊ ရဲစခန်းများ၊ တိုးဂိတ်များကို တိုက် ခိုက်ခဲ့သည်။

ထို့နောက် မြန်မာ့တပ်မတော်ကလည်း တန်ပြန် တိုက်ခိုက်မှုများ ပြုလုပ်နေသလို မန္တလေးဘက်ကနေ စစ်အင် အားများ ဖြည့်တင်းနေခြင်းကြောင့် တိုက်ပွဲများ ပြင်းထန်လျက်ရှိနေသည်။

လက်ရှိ တိုက်ပွဲဖြစ်ပွားနေသော မြို့နယ်များအနက် လောက်ကိုင်၊ ချင်းရွှေဟော်၊ မုံးကိုး စသည့် ဒေသများသည် UWSA “ဝ”တပ်ဖွဲ့ နယ်မြေနှင့် ထိစပ်လျက်ရှိနေသည်။

CNI News

၂၀၂၃ ခုနှစ်၊ နိုဝင်ဘာ ၁

ကချင်လွတ်လပ်ရေးတပ်မတော် (KIA) အပေါ်ထားသည့် သည်းခံမှု ကုန်သွားပြီဖြစ်ကြောင်း တပ်မတော်က အောက်တိုဘာ ၃၁ ရက်နေ့စွဲဖြင့် ထုတ်ပြန်ခဲ့သည်။

မြစ်ကြီးနား - ဗန်းမော် အဓိက ဆက်သွယ်ရေး ကားလမ်းမကြီးအား လုံခြုံရေး ဆောင်ရွက်လျက်ရှိသည့် တပ်ဖွဲ့ဝင် များအား KIA နှင့် ပူးပေါင်းအင်အားစုများက အင်အား အလုံးအရင်းဖြင့် ဝင်ရောက်တိုက်ခိုက်ခဲ့ကြောင်း၊ အများ ပြည်သူ အသုံးပြုသည့် ဆက်သွယ်ရေးလမ်းဖြစ်၍ အကြမ်းဖက်လုပ်ရပ်များ မပြုလုပ်ရန် ထုတ်ပြန်ချက်တွင် ဖော်ပြ ထား သည်။

ထပ်မံ၍ ပြုလုပ်လာပါက သည်းခံနိုင်စွမ်းကုန်ဆုံးပြီး သင့်လျော်သည့် တုန့်ပြန်မှုများ ဆောင်ရွက်သွားမည် ဖြစ် ကြောင်း နှစ်ကြိမ်တိုင်တိုင် အသိပေး အကြောင်းကြားထားသည်ဟု ဖော်ပြထားသည်။

မြန်မာ့တပ်မတော် သံချပ်ကာ ကားကိုတွေ့ရစဉ်

ထုတ်ပြန်ချက်အရ နှစ်ဖက်တိုက်ပွဲ ပြင်းထန်မည်ဟု ယူဆရကြောင်း၊ KIA အနေဖြင့်လည်း ကချင်ပြည်နယ်ကို ထိန်းချုပ်ရန် ကြိုးစားလာနေကြောင်း ကချင်နိုင်ငံရေးသမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။

၎င်းက “စာအသွားအလာအရတော့ တိုက်ပွဲကတော့ ပြင်းထန်မယ်လို့ တုန့်ပြန်မှုတော့ များမယ်လို့ ယူဆလို့ရပါ တယ်။ ဒါပေမဲ့ အခုလက်ရှိ အခြေအနေမှာ လုပ်နိုင်သလား၊ မလုပ်နိုင်ဘူးလားဆိုတဲ့ အပေါ်မှာလည်း မူတည်ပါ တယ်၊ ဘာဖြစ်လို့လဲဆိုတော့ ကျနော်အမြင်ကို ပြောရရင် အခု KIA ကလည်း KIO ကလည်း ကချင်ပြည်နယ်ကို ထိန်းဖို့ တစ်စစနဲ့ ကြိုးစားလာတဲ့ အခြေအနေမျိုး ဖြစ်တယ်၊ နောက်တစ်ချက်က တစ်ချိန်တည်းပဲ မြောက်ပိုင်း မဟာမိတ်တွေကလည်း ရှမ်းပြည်မြောက်ပိုင်းမှာ တစ်စစနဲ့ စခန်းတွေ သိမ်းလာတယ်ဆိုတော့ ဒီဟာတွေက အခက်အခဲတော့ စကစအနေနဲ့ အခက်အခဲတော့ ရှိမလားလို့ ကျနော်ဒီလိုပဲ မြင်ပါတယ်” ဟု ပြောသည်။

ထို့အတူ KIA ၏ လက်နက်ထုတ်လုပ်သည့် နေရာ အပါအဝင် ခဲယမ်းနှင့် မိုင်းများ ထုတ်လုပ်သည့် နေရာများနှင့် သိုလှောင်သော နေရာများအား သင့်လျော်သည့် တုန့်ပြန်တိုက်ခိုက်မှုများ ဆောင်ရွက်ခဲ့ကြောင်း ထုတ်ပြန်ချက် တွင် ဖော်ပြထားသည်။

KIA တပ်ဖွဲ့၀င် ၂ ဦးကိုတွေ့ရစဉ်

အဆိုပါ ထုတ်ပြန်ချက်နှင့် ပတ်သက်ပြီး KIA ၏ ပြန်ကြားရေးတာဝန်ခံ ဗိုလ်မှူးကြီးနော်ဘူထံ CNI က ဖုန်းဆက် သွယ် ခဲ့သော်လည်း ဆက်သွယ်၍ မရသေးပေ။

ဦးကွမ်ဂေါင်အောင်ခမ်းက “ဒီစကားလုံးကတော့ KIA ကလည်း ပြင်ဆင်မှုကတော့ ထားပါလိမ့်မယ်၊ နောက် တစ်ချက်ကတော့ စကစအနေနဲ့လည်း ဘယ်လောက်အထိ လုပ်မလဲဆိုတဲ့ အပေါ်မှာပဲ မူတည်ပါတယ်၊ ဒါကတော့ စစ်တပ်ဆိုတာ ကျနော်ခါတိုင်း ပြောနေတာကတော့ လက်နက်ကိုင်ပြီးဆိုရင်တော့ အကုန်လုံး သူ့ဟာနဲ့ သူရှိကြ တယ်၊ ဆိုတော့ ကျနော်ကြတော့ လက်နက်ကိုင်တဲ့သူတွေကြတော့ ဘာပဲဖြစ်ဖြစ် အကုန်လုံး သူ့ဟာနဲ့သူ မားမား မတ်မတ်နဲ့ သွားနေတဲ့ သဘောမျိုး ဖြစ်တယ်ဆိုတော့ ထိပ်တိုက်ရင်ဆိုင်တဲ့အပေါ်မှာပဲ မူတည်ပါတယ်ဆိုတဲ့ဟာ ပြောလိုပါတယ်” ဟု ပြောသည်။

မြန်မာ့တပ်မတော်နှင့် KIA ၊ PDF ပူးပေါင်းတပ်တို့အကြား မြစ်ကြီးနား - ဗန်းမော် ကားလမ်းမကြီးတစ်လျှောက် အပါအဝင် ဖားကန့်၊ ဝိုင်းမော်၊ စစ်ကိုင်းတိုင်းဒေသကြီးနှင့် ရှမ်းပြည်နယ်မြောက်ပိုင်းတို့တွင်လည်း တိုက်ပွဲများ ဖြစ်ပွားလျက်ရှိနေသည်။

CNI News

၂၀၂၃ ခုနှစ်၊ နိုဝင်ဘာ ၁

ဖက်ဒရယ်ဒီမိုကရေစီပြည်ထောင်စု တည်ဆောက်ရေး အယူအဆကို တိုင်းရင်းသား လက်နက်ကိုင် အဖွဲ့အစည်း များက ၂၀၂၅ ခုနှစ်နောက်ပိုင်းရောက်လျှင် ပြောင်းလဲသွားလိမ့်မည်ဟု ဗိုလ်ချုပ်မှူးကြီးမင်းအောင်လှိုင်အား ပွင့် ပွင့်လင်းလင်း ပြောကြားထားသည်ဟု ကချင်လွတ်လပ်ရေးတပ်မတော်(KIA)မှ ဒုဗိုလ်ချုပ်ကြီး ဂွမ်မော်က ပြော သည်။

KIC ဒုဥက္ကဋ္ဌအဖြစ်လည်း တာဝန်ယူထားသူ ဒုဗိုလ်ချုပ်ကြီး ဂွမ်မော်သည် ဘီဘီစီမြန်မာပိုင်းနှင့် အင်တာဗျူးမှာ အထက်ပါ အတိုင်း ပြောကြားသွားခဲ့ခြင်း ဖြစ်သည်။

ဒုဗိုလ်ချုပ်ကြီးဂွမ်မော်က “ ကျနော်တို့က ၂၀၁၈ လောက်ကတည်းက ဗိုလ်ချုပ်မှူးကြီးမင်းအောင်လှိုင်နဲ့ ဒေါ်အောင်ဆန်းစုကြည် ဦးဆောင် တဲ့ NLD ကို ကျနော်တို့က ပွင့်ပွင့်လင်းလင်း ပြောခဲ့တာဖြစ်ပါတယ်။ ကျနော်တို့ ပြောတာကတော့ ၂၀၂၅ နောက်ဆုံးထားပြီး အဖြေရှာသင့်တယ်။ ကျနော်တို့ တော်လှန်ရေး အဖွဲ့တွေကနေ ပြော နေတာကတော့ ဖက်ဒရယ်ပြည်ထောင်စု တည်ဆောက်ဖို့ဖြစ်ပါတယ်။ ဒါကြောင့်မလို့ ဒီအချိန်မှာ နိုင်ငံတော် အတိုင်ပင်ခံနဲ့ တပ်မတော်ကာကွယ်ရေးဦးစီးချုပ်တို့က ဦးဆောင်ပါ။ ကျနော်တို့က ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးမှာ ပါဝင်မယ်လို့ ပြောတာဖြစ်ပါတယ်။ ဒါပေမယ့် ဒီအယူအဆကို လက်မခံဘူး ဆိုရင်တော့ ၂၀၂၅ ကျော်သွားလို့ရှိရင် ဒီအယူအဆတွေက ပြောင်းသွားမယ်။ အဲတော့ တပ်မတော်ဟာ ဖက်ဒရယ် ဒီမိုကရေစီ တည်ဆောက်ရေးမှာ ပါမလားဆိုတော့ မေးခွန်းဖြစ်လာမယ်။ အဲဒီ ဒီလို စဉ်းစားချက်တွေ ပြောင်းသွား မယ်လို့ ကျနော်တို့ ၂၀၁၈ အကုန်ပိုင်းကနေ စပြီး ကျနော်တို့ ကာကွယ်ရေးဦးစီးချုပ်ဖြစ်တဲ့ ဗိုလ်ချုပ်မှူးကြီး မင်းအောင်လှိုင်ကို ပွင့်ပွင့်လင်းလင်း ကျနော်တို့ မက်စ်ဆေ့ ပို့ထားပြီးဖြစ်ပါတယ်။ ဒါ ကျနော်တို့ သဘောထား ဖြစ်ပါတယ်”ဟု ပြောသည်။

 ဗိုလ်ချုပ်မှူးကြီးမင်းအောင်လှိုင်နဲ့ ဒုဗိုလ်ချုပ်ကြီးဂွမ်မော်တို့ကို တွေ့ရစဉ်

သို့သော် ဖက်ဒရယ် အယူအဆကနေ ပြောင်းလဲပြီး မည်သည့် နိုင်ငံရေးအဆင့်အတန်းမျိုးအထိ သွားရောက် မည်ကိုတော့ ပြောကြားခဲ့ခြင်း မရှိပေ။

KIA ထူထောင်ပေးခဲ့သော ရက္ခိုင့်တပ်တော်(AA)ကတော့ ဖက်ဒရယ်ထက် အုပ်ချုပ်ပိုင်ခွင့် ပိုမိုရရှိသော ကွန်ဖက် ဒရေးရှင်း သို့မဟုတ် သီးခြား လွတ်လပ်ရေး တစ်ခုကို ထူထောင်မည်ဟု ကြွေးကြော်ထားသည်။

အလားတူ “ဝ”ပြည်သွေးစည်းညီညွတ်ရေးတပ်မတော်(UWSA)နှင့် အမျိုးသားဒီမိုကရေစီမဟာမိတ်တပ်မတော် (မိုင်းလား- NDAA)တို့သည်  ၂၀၀၈ ဖွဲ့စည်းပုံအခြေခံဥပဒေထက် ကျော်လွန်ပြီး ဖက်ဒရယ်မဟုတ်သော ကွန်ဖက်ဒရေးရှင်းအဆင့်အတန်းမျိုးဖြင့် အုပ်ချုပ်လျက်ရှိနေသည်။

KIA သည် ဖက်ဒရယ်ဒီမိုကရေစီပြည်ထောင်စု တည်ဆောက်ရေး ကြိုးပမ်းနေသည်ဟု ပြောသော်လည်း ဝမ်ပေါင် နိုင်ငံထူထောင်ရေး ရည်မှန်းချက်များ ရှိကြောင်း တော်လှန်ရေး အသိုင်းအဝန်းကြားတွင် ပြောကြားလျက်ရှိနေ သည်။ 

KNU၊ RCSS၊ SSPP တို့ကတော့ လတ်တလောအထိ ဖက်ဒရယ်ဒီမိုကရေစီပြည်ထောင်စု တည်ဆောက်ရေး အယူအဆဖြင့် လက်နက်ကိုင် တော်လှန်လျက်ရှိနေသည်။

တအာင်းအမျိုးသားလွတ်မြောက်ရေးတပ်မတော်(TNLA)ကတော့ နိုင်ငံရေး ရေချိန်မြှင့်တက်လာပြီး ပြည်ထောင် စု တည်ဆောက်ရေး မဖြစ်နိုင်ဘဲ အစိတ်စိတ် အမွာမွာ ကွဲ၍ နိုင်ငံငယ်များ ထွက်သွားနိုင်ခြင်းကြောင့် ပလောင် (တအာင်း)လူမျိုးများအနေဖြင့် နိုင်ငံတည်ဆောက်ဖို့ အဆင်သင့်ပြင်ဆင်ထားရမည်ဟု TNLA ၏ အထွေထွေ အတွင်းရေးမှူး ဗိုလ်မှူးချုပ် တားဘုန်းကျော်က ၂၀၂၂ ခုနှစ်၊ သြဂုတ် ၁၈ ရက်နေ့က ပြောကြားထားသည်။

 ဗိုလ်မှူးချုပ် တားဘုန်းကျော်က “ နိုင်ငံရေး ရေချိန်အရ မြှင့်တက်လာမယ်၊ ပထဝီနိုင်ငံရေး အခြေအနေ၊ လက်ရှိ ကမ္ဘာ့နိုင်ငံရေး အခြေအနေတွေအပေါ် မူတည် သွားပြီးတော့ ဒီနိုင်ငံဟာ ပြည်ထောင်စုတောင် မတည်ဆောက် နိုင်တော့ဘူးဆိုရင် အစိတ်စိတ် အမွာမွာကွဲပြီးတော့ နိုင်ငံငယ်တွေလည်း အများကြီး ထွက်သွားနိုင်တယ်။ ဒါကြောင့်မလို့ ကျနော်တို့လူထုတွေ ကျနော်တို့ တအာင်း (ပလောင်)လူထုတွေလည်း ဒါသေချာ စဉ်းစားဖို့လို တယ်။ ကျနော်တို့ကို ကျနော်တို့ သေချာ ပြင်ဆင်နိုင်ဖို့ လိုတယ်။ ဒီပြည်ထောင်စုနိုင်ငံ တကယ် တည်ဆောက် တဲ့အချိန်မှာ ကျနော်တို့လည်း ပြည်နယ်တစ်ခုအနေနဲ့ ကျနော်တို့လူမျိုး ကျနော်တို့ ကာကွယ်သွားဖို့ ၊ တည် ဆောက် နိုင်ဖို့အတွက် အဆင်သင့် ကျနော်တို့ ကြိုးပမ်းဆောင်ရွက် သွားဖို့လိုတယ်။ အဲလိုမှ မဟုတ်ဘူး ပြည် ထောင်စု တည်ဆောက်လို့ မရဘူး၊ ပထဝီနိုင်ငံရေး၊ ကမ္ဘာ့နိုင်ငံရေး တစ်ခုကြောင့် လိုအပ်ချက်ကြောင့် တော် လှန်ရေးတွေ သိပ်အရှိန်မြင့်လာလို့ နိုင်ငံတွေ ထွက်လာမယ်ဆိုလည်း ကျနော်တို့ နိုင်ငံတည်ဆောက်နိုင်ဖို့ အဆင့်လည်း ကျနော်တို့ ပြင်ဆင်သွားဖို့လိုပါတယ်”ဟု ပြောသည်။

ယခု ဖြစ်ပွားနေသော နိုင်ငံရေးအခြေအနေသည် ၅ နှစ်ထက် မကျော်သင့်ဘူးဟု KIA မှ ဒုဗိုလ်ချုပ်ကြီး ဂွမ် မော်က ဘီဘီစီ မြန်မာပိုင်းနှင့် အင်တာဗျူးမှာ ပြောသွားခဲ့သည်။

TNLA ၏ အထွေထွေအတွင်းရေးမှူး ဗိုလ်မှူးချုပ်တားဘုန်းကျော်ကို တွေ့ရစဉ်

၎င်းက “ကျနော်တို့က ၂၀၂၁ ခုနှစ်၊ ဖေဖော်ဝါရီ ၁ ရက်နေ့ကနေ စပြီးတော့ ကြားကာလလို့ သုံးတယ်ပေါ့နော်။ နွေဦး တော်လှန်ရေးဖြစ်တယ် ကြားကာလလည်း ဖြစ်တယ်။ ကျနော်တို့ KIO က ကြားကာလကို ဖွင့်ဆိုတာ ကတော့ ဒီ ၂၀၂၁ ခုနှစ်၊ ဖေဖော်ဝါရီ ၁ ရက်နေ့ကစပြီးမှ ပြည်ထောင်စုတွင် ခိုင်မာသော အစိုးရတစ်ရပ် ပေါ် ပေါက်လာသည့် အခြေအနေအထိလို့ ကျနော်တို့က ကြားကာလလို့ ယာယီသတ်မှတ်ပါတယ်။ ပြည်ထောင်စု တွင်လို့ ကျနော်တို့ သုံးပါတယ်။ ပြည်ထောင်စုမြန်မာနိုင်ငံလို့ မသုံးပါဘူး။ ပြည်ထောင်စုတွင် ခိုင်မာသော အစိုးရ တစ်ရပ် ပေါ်လာသည့် အချိန်အထိ ဒါကို ကြားကာလလို့ သုံးပါတယ်။ ဒါကို ကျနော်တို့ ၅ နှစ်ထက် မကျော်သင့် ဘူးလို့ ကျနော်တို့ ဒီလိုပဲ ခံယူပါတယ်။ သို့သော်လည်းပဲ ဘယ်လောက် ဖြစ်လာမလဲဆိုတာကိုတော့ ကျနော်တို့ အားလုံးရဲ့ ကြိုးစားမှုတွေ၊ နားလည်မှုတွေ၊ ညှိနှိုင်းမှုတွေ၊ တိုက်ပွဲတွေအပေါ်မှာပဲ မူတည်မှာဖြစ်ပါတယ်။ ကျနော်တို့ ဘယ်လောက်ကြာမလဲလို့ ခန့်မှန်းတာထက် ဒီကြားကာလ  ကျနော်တို့အားလုံး ဒုက္ခရောက်နေတဲ့ အချိန် အားလုံး စစ်နဲ့လုံးပန်းနေရတဲ့ အချိန်ဟာ ၅ နှစ်ထက် မကျော်သင့်ဘူးလို့ ကျနော်တို့က ဒီလိုပဲ ပြောချင်ပါ တယ်”ဟု ပြောသည်။

မြန်မာ့တပ်မတော်သည် ၂၀၂၁ ခုနှစ်၊ ဖေဖော်ဝါရီ ၁ ရက်က ဒေါ်အောင်ဆန်းစုကြည် ဦးဆောင်သည့် NLD အစိုးရမှ ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်း သည်ဟုဆိုကာ ဖြုတ်ချခဲ့သည်။

ထို့နောက် မြန်မာ့တပ်မတော်ကို ဖြုတ်ချ၍ စစ်အာဏာရှင် ချုပ်ငြိမ်းရေး တိုင်းရင်းသား လက်နက်ကိုင် အဖွဲ့ အစည်းများနှင့် အမျိုးသားဒီမိုကရေစီအဖွဲ့ချုပ်(NLD)မှ လွှတ်တော်အမတ်ဟောင်းများ၊ နိုင်ငံရေးတက် ကြွ လှုပ်ရှားသူများ ပူးပေါင်း၍ လက်နက်ကိုင် တော်လှန်ရေးကို ဆောင်ရွက်လျက်ရှိနေသည်။

အဆိုပါ လက်နက်ကိုင် ပဋိပက္ခများကြောင့် မြန်မာနိုင်ငံတဝန်းမှာ တိုက်ပွဲရှောင် ၁ သန်းကျော်လာခဲ့သလို နေအိမ်များ မီးရှို့ ဖျက်ဆီးခံရခြင်းနှင့် အရပ်သားများ သေဆုံး ထိခိုက်ဒဏ်ရာရရှိမှုများလည်း ဖြစ်ပေါ်လျက်ရှိ နေသည်။

CNI News

၂၀၂၃ ခုနှစ်၊ အောက်တိုဘာ ၃၁

မြန်မာအမျိုးသားဒီမိုကရေစီမဟာမိတ်တပ်မတော်(MNDAA)၏ ထိုးစစ်ဆင် တိုက်ခိုက်မှုများ အရေးနှင့် ပတ်သက်ပြီး တရုတ်ကွန်မြူနစ်ပါတီ ဗဟိုကော်မတီ၏ အတွင်းရေးမှူးချုပ်ရုံးအဖွဲ့ဝင်၊ နိုင်ငံတော်ကောင်စီဝင်နှင့် ပြည်သူ့လုံခြုံရေးဝန်ကြီး အဖြစ်တာဝန်ယူထားသူ H.E. Mr. Wang Xiaohong နှင့် နစကဥက္ကဋ္ဌ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်တို့ အောက်တိုဘာ ၃၁ ရက်နေ့က တွေ့ဆုံ ဆွေးနွေးခဲ့ ကြသည်။

မြန်မာနိုင်ငံသည် တရုတ်နိုင်ငံအတွက် ယုံကြည်စိတ်ချရသည့် နိုင်ငံတစ်နိုင်ငံဖြစ်သကဲ့သို့ တရုတ်နိုင်ငံသည် မြန်မာနိုင်ငံအတွက် ယုံကြည်စိတ်ချရသော နိုင်ငံတစ်နိုင်ငံဖြစ်ကြောင်း ဗိုလ်ချုပ်မှူးကြီးမင်းအောင်လှိုင်က ပြော သည်။

ထို့နောက် မြန်မာနိုင်ငံ၏ အရှေ့မြောက်ပိုင်းဒေသ(လောက်ကိုင်၊ ချင်းရွှေဟော်၊ မုံးကိုး၊ သိန်းနီ၊ လားရှိုး၊ မူဆယ်၊ နမ့်ခမ်း)တွင် MNDAA (ကိုးကန့်တပ်ဖွဲ့)က လုံခြုံရေးစခန်းများအား တိုက်ခိုက်မှုများ အခြေအနေနှင့် လောက် ကိုင် ဒေသတွင် အွန်လိုင်းလောင်းကစားများ၊ ဆက်သွယ်ရေးလိမ်လည်မှုများ၊ မူးယစ်ဆေးဝါး ထုတ်လုပ်မှုနှင့် ရောင်းဝယ်မှုများ ဆောင်ရွက်နေမှုများအား နှစ်နိုင်ငံ ပူးပေါင်း၍ ဖော်ထုတ်အရေးယူ ဆောင်ရွက်ရေးတို့ကို ဆွေးနွေးခဲ့ကြကြောင်း သိရသည်။

ကိုးကန့် (MNDAA)တပ်ဖွဲ့က ရှမ်းပြည်နယ်မြောက်ပိုင်း သိန်းနီတိုးဂိတ်ကို စီးနင်းထားစဉ်

မြန်မာ့နိုင်ငံရေး အပါအဝင် အခြားကမ္ဘာ့နိုင်ငံအရေးများ၌ ကမ္ဘာ့အင်အားကြီးနိုင်ငံတစ်ခုမှ ဝင်ရောက်စွက်ဖက်၍ ၎င်းတို့နိုင်ငံ၏ အကျိုးအတွက်သာကြည့်ပြီး အခြား နိုင်ငံများအပေါ် Double Standard ဖြင့် ချယ်လှယ်ဆောင် ရွက်နေမှု အခြေအနေများကိုလည်း ဗိုလ်ချုပ်မှူးကြီးမင်းအောင်လှိုင်နှင့် တရုတ်ပြည်သူ့လုံခြုံရေးဝန်ကြီးတို့ ဆွေးနွေးခဲ့ကြသည်။

ဗိုလ်ချုပ်မှူးကြီးမင်းအောင်လှိုင်က ရှမ်းပြည်နယ်မြောက်ပိုင်းဒေသသည် မြန်မာနိုင်ငံလွတ်လပ်ရေး ရရှိပြီးချိန် ကတည်းက တိုင်းရင်းသားအဖွဲ့များအချင်းချင်း အားပြိုင်မှုများဖြစ်ပေါ်ကာ တိုင်းရင်းသား လက်နက်ကိုင် ပဋိပက္ခ များ ဖြစ်ပေါ်ခဲ့မှုနှင့် အချို့တိုင်းရင်းသား လက်နက်ကိုင်အဖွဲ့များသည် ထိုဒေသအတွင်း မူးယစ်ဆေးဝါး များ ထုတ်လုပ်ရောင်းချလျက်ရှိမှုတို့ကို တရုတ်ပြည်သူ့လုံခြုံရေးဝန်ကြီးအား ရှင်းပြခဲ့ကြောင်း သိရသည်။

ထို့နောက် ကိုးကန့်ဒေသအတွင်း “ဖုန်”/ “ရန်”အဖွဲ့တို့ အရေးအခင်း ဖြစ်ပွားခဲ့မှု၊ “ပယ်”အဖွဲ့အား တာဝန်ပေး အပ်ခဲ့မှု၊ အာဏာရလိုမှု၊ လက်နက်ခဲယမ်းများ ထုတ်လုပ်နေမှု၊ လက်နက်ခဲယမ်းများ ဝင်ရောက်မှုများကြောင့် ဒေသတွင်းနှင့် နယ်စပ်ဒေသတည်ငြိမ် အေးချမ်းရေးကို ထိခိုက်ပျက်စီးနေမှု၊ နယ်စပ်ဒေသတွင် တရားမဝင် အွန်လိုင်း လောင်းကစားမှုများနှင့် ဆက်သွယ်ရေး လိမ်လည်မှုများ ဖြစ်ပေါ်လျက်ရှိမှုတို့ကို အရင်းအမြစ်ကစ၍ နှိမ်နင်းဖော်ထုတ်သွားမည့် အခြေအနေများကိုလည်း နစကဥက္ကဋ္ဌက ချပြ ဆွေးနွေးခဲ့သည်။

ဗိုလ်ချုပ်မှူးကြီးမင်းအောင်လှိုင်နဲ့ တရုတ်ပြည်သူ့လုံခြုံရေးဝန်ကြီး အဖြစ်တာဝန်ယူထားသူ H.E. Mr. Wang Xiaohong ကိုတွေ့ရစဉ်

ကိုးကန့်တပ်ဖွဲ့(MNDAA)သည် မဟာမိတ်များဖြစ်သည့် တအာင်းအမျိုးသားလွတ်မြောက်ရေးတပ်မတော်(TNLA )၊ ရက္ခိုင့်တပ်တော်(AA)၊ ဗမာပြည်သူ့လွတ်မြောက်ရေးတပ်တော်(BPLA)တို့နှင့် ပူးတွဲ့၍ ရှမ်းပြည်နယ်(မြောက် ပိုင်း)မှာ အောက်တိုဘာ ၂၇ ရက်နေ့က ၁၀၂၇ စစ်ဆင်ရေးကို ဖော်ဆောင်ခဲ့ရာ နှစ်ဖက် တိုက်ပွဲများ ပြင်းထန် လျက်ရှိနေသည်။

တခြားတစ်ဖက်မှာလည်း ကချင်လွတ်လပ်ရေးတပ်မတော်(KIA)နှင့် မြန်မာ့တပ်မတော်ကြား ကချင်ပြည်နယ် အတွင်းမှာ တိုက်ပွဲများ ပြင်းထန်နေသလို မြစ်ကြီးနား-ဗန်းမော်သွားလမ်းပေါ်ရှိ တပ်မတော်စခန်းများကို KIA က သိမ်းပိုက်လျက်ရှိနေသည်။

CNI News

၂၀၂၃ ခုနှစ်၊ အောက်တိုဘာ ၃၁

ညီနောင်မဟာမိတ် ၃ ဖွဲ့(AA-TNLA-MNDAA)က ဖော်ဆောင်သည့် ၁၀၂၇ စစ်ဆင်ရေးသည် မြန်မာပြည် အလယ်ပိုင်းသို့ ရောက်ရှိလာနိုင်သလားဆိုပြီး နိုင်ငံရေး၊ စစ်ရေးသုံးသပ်သူများကြား အကဲဖြတ် သုံးသပ် ဆွေးနွေး နေကြသည်။

ပြီးခဲ့သည့် ၂၀၂၃ ခုနှစ်၊ အောက်တိုဘာ ၂၇ ရက်နေ့က စတင်ခဲ့သည့် ၁၀၂၇ စစ်ဆင်ရေးသည် ကိုးကန့်ဒေသ အပါအဝင် လားရှိုး၊ သိန္နီ၊ မိုးကုတ်နှင့် နောင်ချို တို့တွင် ထိုးစစ်ဆင် တိုက်ခိုက်ခဲ့သည်။

အဆိုပါ တိုက်ပွဲများအတွင်း ညီနောင်မဟာမိတ်အဖွဲ့တွင် ရက္ခိုင့်တပ်တော် (ULA/AA)၊ ပလောင်ပြည်လွတ်မြောက် ရေးတပ်ဦး (PSLF/TNLA)၊ မြန်မာနိုင်ငံ အမှန်တရားနှင့် တရားမျှတသော အမျိုးသားပါတီ (MNTJP/MNDAA) တို့အပြင် ဗမာပြည်သူ့လွတ်မြောက်ရေးတပ်တော်(BPLA)၊ မန္တလေးပြည်သူ့ကာကွယ်ရေးတပ်တို့လည်း ပါဝင်ခဲ့ သည်။

ထို ၁၀၂၇ စစ်ဆင်ရေးမှာ မြန်မာပြည် အလယ်ပိုင်းဒေသသို့ မရောက်ရှိနိုင်ကြောင်း မြန်မာ့နိုင်ငံရေးနှင့် စစ်ရေး လေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

ရှမ်းပြည်နယ်မြောက်ပိုင်းမှာ ၁၀၂၇ စစ်ဆင်ရေးမှာ ပါ၀င်တိုက်ခိုက်နေတဲ့ ရဲဘော်များကို တွေ့ရစဉ်

၎င်းက “မရောက်နိုင်ပါဘူး။ သူတို့က အားလုံးနေရာစုပြီးတော့ တစ်နေရာတည်းမှာပဲ လိုက်ပြီး လုပ်ရတဲ့ အနေ အထား ရှိတယ်လေ၊ ပြောရလို့ရှိရင်‌တော့ ကျနော်တို့ တပ်မတော်ဘက်ကလည်း လုပ်ဆောင်ချက်တွေမှာ လိုအပ် တာလေးတွေ ရှိခဲ့တာပေါ့နော်၊ အဲဒီအချက်လေးတွေလည်း ပါတယ်ပေါ့၊ ဒါကတော့ တပ်က ဒီမိုကရေစီ အစိုးရ လက်ထက် နှစ်ဆက်မှာ နယ်မြေတွေကို control လုပ်ဖို့အတွက်က ခက်သွားတယ်၊ အဲဒါက ဖွဲ့စည်းပုံအခြေခံ ဥပဒေ အားနည်းချက်ကြီး အဲဒါကို ဘယ်သူမှ မမြင်ဘူး၊ ကျနော်တစ်ယောက်ပဲ၊ အဲဒါကြောင့်မို့လို့ မမျှော်လင့်ဘဲနဲ့ ပြောက်ကြားစစ်ပုံစံ ပြည်တွင်းစစ်ကတော့ ပြန့်သွားတာပေါ့နော်၊ တခြားဝါဒဖြန့်ချီရေး စစ်တပ်နဲ့ ပတ်သက်လို့ အမှောင်သတင်းကလည်း အများကြီး ဖြစ်ခဲ့တာကိုနော်၊ အဲဒီတော့ ဒါတွေက စစ်တပ်ဆိုရင် လူဆိုးလို့ မြင်တာပေါ့၊ အဲဒီလို လူဆိုးလို့ မြင်အောင်လည်း တပ်ကလည်း တချို့ အချက်အလက်လေးတွေမှာ တပ်ဖက်ကနေပြီးတော့ ရည်ရွယ်ချက်မရှိပေမယ့် စီမံခန့်ခွဲမှု အမှားတွေက ဖြစ်ခဲ့တာလေးတွေရှိတာပေါ့၊ အဲဒါတွေကို ပုံကြီးချဲ့လိုက်တဲ့ အခါကြတော့ စစ်တပ်က လူဆိုးကြီး ဖြစ်သွားတဲ့အခါကြတော့ အဲဒီတစ်ချက်ရယ် နောက်ပြီးတော့ ၂၀၀၈ အရ လုံခြုံရေးမှာ စစ်တပ်ကနေပြီးတော့ တာဝန်ယူခွင့် မရှိတာပေါ့၊ ဥပဒေအားနည်းချက်အရ ဒီနှစ်ခုပေါင်းစပ်ပြီးတော့ အခုဖြစ်လာတဲ့ ကိစ္စမှာတော့ နည်းနည်းလေးတော့ အသည်းအသန်တော့ လုပ်ရတဲ့ သဘောတော့ ရှိတာပေါ့” ဟု‌ ပြောသည်။

မိမိတို့ စစ်ဆင်ရေးကို ရှမ်းပြည်နယ် မြောက်ပိုင်းတွင်သာမက ကချင်နှင့် စစ်ကိုင်းတိုင်းဒေသကြီး၊ ထီးချိုင့်မြို့နယ် တွင်လည်း စစ်ဆင်ရေးဖော်ဆောင်နေပြီး တိုက်ပွဲများ ပြင်းထန်နေကြောင်း ညီနောင်မဟာမိတ် ၃ ဖွဲ့က ထုတ်ပြန် ထားသည်။

ရှမ်းပြည်နယ်မြောက်ပိုင်းမှာ ၁၀၂၇ စစ်ဆင်ရေးမှာ ပါ၀င်တိုက်ခိုက်နေတဲ့ ရဲဘော်များကို တွေ့ရစဉ်

ပြည်မအထိ ရောက်ခြင်း မရောက်ခြင်းက ညီနောင်မဟာမိတ်အနေဖြင့် ၎င်းတို့၏ ရည်မှန်းချက်မှာ မည်မျှအထိ မျှော်မှန်းထားသလဲ ဆိုသည့်အပေါ်တွင် မူတည်ကြောင်း ငြိမ်းချမ်းရေးလုပ်ငန်းစဉ်မှာ ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။

၎င်းက “အခုဒီလို လုပ်တာဟာ သူက သုံးဖက်သုံးတန်မှာ မူတည်တာပေါ့၊ နံပါတ်တစ်ကတော့ ထိုးစစ်ဆင်တဲ့ ညီနောင်တပ်ဖွဲ့တွေက သူတို့ ဘယ်အထိ ရည်မှန်းချက်ထားသလဲ အဲဒီရည်မှန်းချက် ပြည့်စုံပြီဆိုရင် သူတို့က ရပ်သွားမလား ဆိုတာလည်း မူတည်မှာပေါ့၊ နောက်တစ်ခုက ဒီကိစ္စကို တပ်မတော်ဖက်က ဘယ်လို ကိုင်တွယ် မလဲ ဆိုတာလည်း ဒါကလည်း အရေးကြီးပါတယ်၊ တပ်မတော်က စစ်ရေးတစ်ဖက်၊ နိုင်ငံရေးတစ်ဖက်၊ သံတမန် ရေး တစ်ဖက်နဲ့ သူက ပါးပါးနပ်နပ်နဲ့ ကိုင်တွယ်တယ်ဆိုလို့ရှိရင်လည်း ဒါဟာ မြန်မြန်ပြီးသွားနိုင်ပါတယ်၊ နောက် ပြီးတော့မှ တစ်ခုကတော့ ကျနော်တို့ရဲ့ အိမ်နီးနားချင်း နိုင်ငံဖြစ်ပါတယ်။ ဒီအိမ်နီးနားချင်း နိုင်ငံတွေက အခုလို ဖြစ်နေတဲ့ကိစ္စ၊ သူ့ရဲ့ နယ်စပ်မှာ တိုက်ပွဲဖြစ်နေတဲ့ ကိစ္စတွေက ဘယ်လို သဘောထားသလဲ ဒါတွေဟာ မရှိသင့် မဖြစ်သင့်ဘူးလို့ သူကလည်း မြင်တယ်၊ ပြဿနာတွေကို အေးအေးချမ်းချမ်းနဲ့ ဖြေရှင်းဖို့ လိုတယ်လို့ သူကလည်း မြင်တယ်ဆိုလို့ရှိရင် ဒါဟာ တပ်မတော်နဲ့ရော ညှိ၊ နောက်ပြီးတော့မှ ညှိနောင်အဖွဲ့တွေနဲ့လည်း ညှိပြီးတော့မှ မြန်မြန်ပြီးသွားနိုင်ပါတယ်ခင်ဗျ၊ အဲဒီလို ဖြစ်ဖို့လည်း ကျနော်မျှော်လင့်ပါတယ်” ဟု ပြောသည်။

ညီနောင်မဟာမိတ် ၃ ဖွဲ့၏ စစ်ဆင်ရေးကြောင့် ရှမ်းမြောက်တွင် အောက်တိုဘာ ၂၇ ရက်က စတင်ပြီး နှစ်ဖက် တိုက်ပွဲများ ပြင်းထန်နေသလို လက်နက်ကြီး ပစ်ခတ်မှုနှင့် လေယာဉ်ကြောင်း တိုက်ခိုက်မှုများလည်း ရှိနေသည်။

ညီနောင်မဟာမိတ်ဖြစ်သော AA၊ TNLA၊ MNDAA တို့သည် စစ်ရေး၊ နိုင်ငံရေးများကို အတူပူးတွဲ လှုပ်ရှားကြသော မြောက်ပိုင်းတိုင်းရင်းသား လက်နက်ကိုင်တပ်ဖွဲ့များ ဖြစ်သည်။

CNI News

၂၀၂၃ ခုနှစ်၊ အောက်တိုဘာ ၃၁

ကချင်ပြည်နယ်၊ မြစ်ကြီးနား-ဗန်းမော် လမ်းမပေါ်ရှိ တပ်မတော်၏ ဂန်ဒေါင်ယန် စခန်းကို ကချင်လွတ်လပ်ရေး တပ်မတော်(KIA)မှ ၂၀၂၃ ခုနှစ်၊ အောက်တိုဘာ ၃၁ ရက်နေ့ နံနက် ၆ နာရီတွင် သိမ်းပိုက်လိုက်သည်ဟု အမျိုးသားညီညွတ်ရေးအစိုးရ(NUG)၏ ဝန်ကြီး ဒေါက်တာတူခေါင်က သူ၏လူမှုကွန်ရက်ပေါ်မှာ ရေးသား ထုတ် လွှင့်ခဲ့သည်။

ထို့နောက် အောက်တိုဘာ ၂၉ ရက်နေ့ကလည်း ရှမ်းပြည်နယ်မြောက်ပိုင်းရှိ KIA တပ်မဟာ ၄ ၊ တပ်ရင်း ၈ မှ နမ့်ဟိုင်း အခြေစိုက် ခမရ ၃၂၄ ကို တိုက်ခိုက် သိမ်းပိုက်ထားသည်ဟုလည်း ရေးသားထားသည်။

 NUG ၏ ဝန်ကြီး ဒေါက်တာတူခေါင်က လူမှုကွန်ရက်ပေါ်မှာ ရေးသားထားသည်ကို တွေ့ရစဉ်

အဆိုပါ စစ်ရေး တိုက်ခိုက်မှုများ ဖြစ်ပွားနေချိန်မှာပဲ မြန်မာ့တပ်မတော်၏ စစ်လေယာဉ်များသည် KIA ဌာနချုပ် လိုင်ဇာမြို့ပေါ်မှာ ပျံဝဲနေကြောင်း ဒေသခံများက ပြောသည်။

ကချင်ပြည်နယ်နှင့် စစ်ကိုင်းဒေသကြီးအတွင်းမှာ KIA သည် PDF- AA တို့နှင့် ပူးပေါင်း၍ စစ်ရေး လှုပ်ရှားလျက် ရှိပြီး မြန်မာ့တပ်မတော်နှင့် တိုက်ပွဲများ ဖြစ်ပွားနေသည်။

CNI News
၂၀၂၃ ခုနှစ်၊ အောက်တိုဘာ ၂၉

ပြန်ကြားရေးဝန်ကြီးဟောင်း ဦးရဲထွဋ်ကို ပုဒ်မ ၅၀၅(က)ဖြင့် အလုံမြို့နယ်မှာ အမှုဖွင့်၍ အောက်တိုဘာ ၂၈ ရက်နေ့ ညပိုင်းက ဖမ်းဆီးလိုက်ကြောင်း သိရသည်။

ဦးရဲထွဋ်ကို ရန်ကုန်တိုင်းစစ်ဌာနချုပ်မှ တာဝန်ရှိသူ တစ်ဦးက အလုံမြို့မရဲစခန်း (ပ)၂၁၆/၂၀၂၃  ရာဇသတ်ကြီး ပုဒ်မ ၅၀၅(က)ဖြင့် အမှုဖွင့်ကာ ဖမ်ဆီးခဲ့ပြီးနောက် အင်းစိန်အကျဉ်းထောင်သို့ ပို့ဆောင်လိုက်သည်။

ဦးရဲထွဋ်သည် ပြည်သူလူထု ထိတ်လန့်စေရန် ကြံရွယ်ပြီး မမှန်သတင်းများ ဖြန့်ဝေခြင်း၊ အစိုးရဝန်ထမ်းများ ပြစ် မှု ကျူးလွန်လာစေရန် ရည်ရွယ်လှုံ့ဆော်ခြင်းတို့ကြောင့် အရေးယူပေးရန် တိုင်ကြားခံရခြင်း ဖြစ်ကြောင်း နီးစပ် သူများထံမှ သိရသည်။

အဆိုပါ ပုဂ္ဂိုလ်သည် သမ္မတဦးသိန်းစိန် အစိုးရလက်ထက်တွင် ပြန်ကြားရေးဝန်ကြီးဌာန၌ ဝန်ကြီးအဖြစ် တာဝန် ထမ်းဆောင်ခဲ့သူဖြစ်ပြီး လက်ရှိမှာ နိုင်ငံရေးနှင့် လူမှုဘဝများကို သုံးသပ်ရေးသားလျက်ရှိသည်။

CNI News
၂၀၂၃ ခုနှစ်၊ အောက်တိုဘာ ၂၇

ရန်ကုန်မြို့အတွင်း အခြေပြု၍ ပြည်ပနိုင်ငံသားများ၏ အချက်အလက်များ ရှာဖွေစုဆောင်းကာ အွန်လိုင်းငွေ ကြေး လိမ်လည်နေသူ ၉၅ ဦးကို ဖမ်းဆီး ရမိခဲ့သည်ဟု နစက-က ထုတ်ပြန်ခဲ့သည်။

၂၀၂၃ ခုနှစ်၊ အောက်တိုဘာ ၂၆ ရက်က ရန်ကုန်တိုင်းဒေသကြီး၊ တာမွေမြို့နယ်၊ ဦးချစ်မောင်လမ်း၊ ဦးချစ် မောင်အိမ်ရာ၊ တိုက်အမှတ်(S-19)တွင် ရုံးခန်းဖွင့်လှစ်ထားသည့် Supportfix Co.,Ltd အား ဝင်ရောက်စီးနင်း ရှာဖွေစဉ် ဇူကျန်း(ခ)လောက်ဖ အပါအဝင် ကျား ၆၆ ဦး၊ မ ၂၂ ဦး စုစုပေါင်း ၈၈ ဦးကို ပြည်ပနိုင်ငံသားများ၏ အချက်အလက်များ စုဆောင်း၍ ငွေကြေးလိမ်လည်နိုင်ရေး ဆောင်ရွက်ရာ၌ အသုံးပြုသော ကွန်ပျူတာ၊ မိုဘိုင်း ဖုန်း စသည့် ဆက်စပ်ပစ္စည်းများနှင့်အတူ ဖမ်းဆီးရမိခဲ့သည်။

ထို့နောက် ဇူကျန်း(ခ)လောက်ဖ၏ ထွက်ဆိုချက်အရ အင်းစိန်မြို့နယ်၊ ကမ်းနားအလယ်ရပ်ကွက်၊ လှိုင်မြစ်လမ်း ရှိ Spring Line ကွန်ဒို၊ (၅)လွှာ၊ အခန်း(၅၀၁)သို့ ဝင်ရောက် စီးနင်းရှာဖွေခဲ့ရာ ကျန်းယွိ အပါအဝင် ကျား ၅ ဦး၊ မ ၂ ဦး စုစုပေါင်း ၇ ဦးအား ဆက်စပ်ပစ္စည်းများနှင့်အတူ ထပ်မံဖမ်းဆီးရမိခဲ့ကြောင်း သိရသည်။

ဆက်လက် ဖော်ထုတ်ချက်အရ Supportfix Co.,Ltd အတွက် ဝန်ထမ်းများ ရှာဖွေပေးသူ ကမာရွတ်မြို့နယ်၊ နာနတ်တောလမ်း၊ Dimond Condo (၇)လွှာနေ Zhan Tu Co.,Ltd ပိုင်ရှင် ရန်လုံရှင်းအား သွားရောက်ရှာဖွေခဲ့ ရာ ထွက်ပြေးတိမ်းရှောင်သွားခဲ့သဖြင့် ရုံးခန်းဖွင့်လှစ်ထားသော ကမာရွတ်မြို့နယ်၊ Time City Office Tower (3)၊ (၁၅)လွှာ၊ အခန်းအမှတ်(၁၅၀၂)အား ဆက်လက်ရှာဖွေ ချိပ်ပိတ် သိမ်းဆည်းခဲ့ကြောင်း နစက၏ ထုတ်ပြန် ချက်တွင် ဖော်ပြထားသည်။

အဆိုပါ အဖွဲ့များသည် ပြည်ပနိုင်ငံသားများထံမှ ငွေကြေးများ လိမ်လည်ရယူနိုင်ရန်အတွက် ပစ်မှတ်များရှာဖွေ စုဆောင်းခြင်း၊ ရရှိသည့် ပစ်မှတ်များ၏ ကိုယ်ရေး အချက်အလက်များ ရယူရန်အတွက် ဝန်ထမ်းများအား အဖွဲ့ တစ်ဖွဲ့လျှင် ၁၀ ဦးစီခန့်ဖြင့် အဖွဲ့ငယ် ၈ ဖွဲ့ ဖွဲ့စည်း၍ WhatsApp လူမှုကွန်ရက်မှတဆင့် ပစ်မှတ်များထံ ဆက် သွယ်ကာ အချက်အလက်များ ရယူလေ့ရှိသည်။

ထို့နောက် ရရှိသည့် အချက်အလက်များအား စုဆောင်း၍ ငွေကြေး လိမ်လည်မည့် အခြား အဖွဲ့များသို့ ပြန်လည် ရောင်းချခြင်းများ ပြုလုပ်လျက်ရှိသည်။

ထိုကဲ့သို့ အွန်လိုင်း လူမှုကွန်ရက်မှတဆင့် ပြည်ပနိုင်ငံသားများထံမှ ငွေကြေးလိမ်လည်မှုပြုလုပ်နေသူ ဖမ်းဆီးရ မိတရားခံ ၉၅ ဦးအား ဥပဒေနှင့်အညီ ထိရောက်စွာ အရေးယူသွားမည်ဟု မြန်မာနိုင်ငံရဲတပ်ဖွဲ့က ပြောသည်။

CNI News

၂၀၂၃ ခုနှစ်၊ အောက်တိုဘာ ၂၇

လေကြောင်းတိုက်ခိုက်မှုနှင့် လက်နက်ကြီးများဖြင့် ပစ်ခတ်တိုက်ခိုက်နေမှုများအပေါ် ဟန့်တားမှု ရရှိနိုင်ရေးအတွက် ၁၀၂၇ စစ်ဆင်ရေးကို ညီနောင်မဟာမိတ် ၃ ဖွဲ့က ဆင်နွှဲလိုက်ကြောင်း ယနေ့ (အောက်တိုဘာ ၂၇ ရက်) ထုတ်ပြန်ခဲ့သည်။

လက်ရှိ တရုတ် - မြန်မာ နယ်စပ်အပါအဝင် မြန်မာနိုင်ငံအတွင်း ကျယ်ပြန့်လာသည့် အွန်လိုင်းလောင်းကစား လိမ်လည်မှု ပပျောက်ရေး၊ Online Game (ကျဖျင်) ကုမ္ပဏီများ နှိမ်နင်းနိုင်ရေး စသည်ရည်ရွယ်ချက်များဖြင့် ပူးပေါင်းဆင်နွှဲကြောင်း ဖော်ပြထားသည်။

ညီနောင်မဟာမိတ်က “မိမိတို့ ညီနောင်မဟာမိတ် ၃ ဖွဲ့သည် ပြည်သူလူထု၏ အသက်၊ အိုးအိမ်၊ စည်းစိမ်များကို ကာကွယ်နိုင်ရေး၊ မိမိကိုယ်မိမိ ခုခံကာကွယ်နိုင်ရေး၊ မိမိတို့ ဒေသကို ယခုထက် ပိုမိုထိန်းချုပ်နိုင်ရေး၊ မိမိတို့အဖွဲ့အစည်းများအပေါ် လေကြောင်း၊ လက်နက်ကြီးများဖြင့် နေ့၊ ည အချိန်မရွေး ပစ်ခတ်တိုက်ခိုက်နေမှုများအပေါ် ဟန့်တားမှုရရှိနိုင်ရေး၊ မြန်မာပြည်သူတစ်ရပ်လုံး၏ လိုလားချက်ဖြစ်သော စစ်အာဏာရှင်စနစ် အမြစ်ပြတ်ရေး” ဟု ပြောသည်။ 

ညီနောင်မဟာမိတ် အဖွဲ့တွင် ရက္ခိုင့်တပ်တော် (ULA/AA)၊ ပလောင်ပြည်လွတ်မြောက်ရေးတပ်ဦး (PSLF/TNLA)၊ မြန်မာနိုင်ငံ အမှန်တရားနှင့် တရားမျှတသော အမျိုးသားပါတီ (MNTJP/MNDAA) တို့ဖြင့် ဖွဲ့စည်းထားသည်။

ယနေ့ နံနက်ပိုင်း ၄ နာရီဝန်းကျင်က စတင်ကာ ပြည်ထောင်စုလမ်းမတစ်လျှောက် တိုက်ပွဲများ ပြင်းထန်ခဲ့ကြောင်း၊ လက်နက်ကြီး ပစ်ခတ်မှုများလည်း ကြားနေရကြောင်း လားရှိုးဒေသခံတစ်ဦးက CNI သတင်းဌာနကို ပြောသည်။

ညီနောင်မဟာမိတ် ၃ ဖွဲ့

၎င်းက “ကျမကြတော့ အကို့လောက်တော့ နှံ့နှံ့စပ်စပ်တော့ မသိဘူးလေ၊ အခုကတော့ ဖြစ်နေတဲ့ဟာတွေကတော့ ဃဂနဏတော့ သိတော့ မသိဘူး။ ဟိုဖက် တိုးဂိတ်ဖက်မှာတော့ ပျက်စီးသွားတာတော့ သိရတယ်၊ လိုင်းပေါ်မှာလည်း တင်ထားကြတယ်၊ ခုတော့ အသံတော့ မကြားတော့ဘူး။ စောစောကတော့ ကြားတယ်၊ အခုတော့ ဒီလမ်းပိုင်းတော့ ကြားနေတာပဲ၊ မူဆယ်ဖက်လည်း သူတို့ပိတ်ထားတယ်၊ ဟိုဖက် ချင်းရွှေဟော် သွားတဲ့ဖက်လည်း သူတို့ ပိတ်ထားတယ်လို့ အဒီလိုမျိုး သတင်းတွေလည်း လိုင်းပေါ်မှာ တက်ထားတာ တွေ့တယ်လေ” ဟု ပြောသည်။

ထို့အတူ လားရှိုး မှ ချင်းရွှေဟော်၊ လားရှိုး မှ မူဆယ် ပြည်ထောင်စုလမ်းမကြီးများကို ၂၀၂၃ ခုနှစ်၊ အောက်တိုဘာ ၂၇ ရက် နံနက် ၆ နာရီမှစတင်ပြီး အရေးပေါ် ပိတ်ပင်လိုက်ကြောင်း MNDAA က ထုတ်ပြန်ထားသည်။

ပြည်ထောင်စုလမ်းမကြီး တစ်လျှောက် တိုက်ပွဲများ ဖြစ်ပွားနေခြင်းကြောင်း ကုန်ကားများ ရပ်နားထားကြောင်း မူဆယ်ကုန်ကားသမားတစ်ဦးက CNI သတင်းဌာနကို ပြောသည်။

၎င်းက “လမ်းကြောင်း မကောင်းသေးတော့ မဆင်းခိုင်းသေးဘူး။ ဂိတ်တွေက၊ ကိုယ့်ဟာနဲ့ကိုယ် အန္တရာယ်မဖြစ်အောင် ကြည့်သွားရတာပေါ့၊ သူတို့ ပါးစပ်ထဲ၊ သူတို့ စိတ်ထဲရှိမှာပဲလေ၊ ကျနော်တို့ကြတော့ ပြည်သူလူထုဆိုတော့ မသိရဘူး။ တိုက်ပွဲ ကျနော်တို့ မူဆယ်မှာတော့ လောလောဆယ် ကျနော်တို့က ၅ မိုင်မှာဆိုတော့ မဖြစ်ဘူးဗျ၊ အဲဒီဖက်ကြော့တော့ ဖြစ်နေတယ်လို့ ပြောတာပဲ၊ လားရှိုးဖက်ကတော့ မနက်ကတော့ ဖြစ်နေတယ်၊ အခုကတော့ မပြောတတ်ဘူး။ အဲဒီလိုတော့ ပြောတယ်၊ ကျနော်တို့ ဒီမှာတော့ အေးအေးချမ်းချမ်းပဲဗျ၊ ဘာမှ မဖြစ်ဘူး” ဟု ပြောသည်။

ညီနောင်မဟာမိတ်ဖြစ်သော AA၊ TNLA၊ MNDAA တို့သည် စစ်ရေး၊ နိုင်ငံရေး များကို အတူပူးတွဲလှုပ်ရှားကြသော မြောက်ပိုင်းတိုင်းရင်းသား လက်နက်ကိုင်တပ်ဖွဲ့များ ဖြစ်သည်။