CNI News

၂၀၂၄ ခုနှစ်၊ ဒီဇင်ဘာ ၁၁

အင်အားကြီးသည့် အုပ်စုများသည် ဒီမိုကရေစီအသွင်ကူးပြောင်းစ ဖွံ့ဖြိုးဆဲနိုင်ငံများကို ဝင်ရောက်စိုးမိုးခြယ်လှယ် နိုင်ရန်အတွက် မီဒီယာသမားများကို လက်ကိုင်တုတ်အဖြစ် မွေးမြူလာပြီး ဆူပူအုံကြွ၍ တိုင်းပြည်ပြိုကွဲအောင် လုပ်နေသည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၄ ခုနှစ်၊ ဒီဇင်ဘာ ၁၀ ရက်က မြန်မာနိုင်ငံသတင်းမီဒီယာကောင်စီဝင်များ ကတိသစ္စာပြုခြင်း အခမ်းအနားမှာ ၎င်းက ပြောကြားခဲ့ခြင်း ဖြစ်သည်။

သို့သော် မည်သည့် အင်အားကြီးနိုင်ငံများ၊ အုပ်စုများကို ရည်ညွန်းသလဲဆိုသည်ကိုတော့ ထည့်သွင်း ပြောကြားခဲ့ ခြင်းမရှိပေ။

သတင်းသမားများ သတင်းယူနေစဉ်(ဓာတ်ပုံ- Crd)

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က “ ယနေ့အချိန်တွင် နိုင်ငံရေး၊ စီးပွားရေး အင်အားကြီးသည့် အုပ်စု များသည် ဒီမိုကရေစီအသွင်ကူးပြောင်းစ ဖွံ့ဖြိုးဆဲနိုင်ငံများကို ဝင်ရောက် စိုးမိုးခြယ်လှယ်နိုင်ရန်အတွက် မီဒီယာ သမားများကို လက်ကိုင်တုတ်အဖြစ် မွေးမြူလာကြသည့်နည်းကို အသုံးပြုနေကြသည်မှာ အားလုံးအသိပင်ဖြစ် ကြောင်း၊ ယင်းမီဒီယာသမားများမှတဆင့် ပြည်သူများ၏ သဘောထားခံစားချက်များ၊ နစ်နာချက်များကိုပစ်ပယ် ပြီး ၎င်းတို့လိုလားသည့် ပုံစံများအတိုင်း ပုံဖော်သွတ်သွင်းထုတ်လွှင့် ဖော်ပြနေကြသည်ကို တွေ့မြင်ရမည်ဖြစ် ကြောင်း၊ အဆိုးရွားဆုံးမှာ ဖွံ့ဖြိုးဆဲနိုင်ငံငယ်လေးများကို မတည်မငြိမ်ဖြစ်အောင် ပဋိပက္ခများကြီးထွားလာအောင်၊ ဆူပူအုံကြွပြီး တိုင်းပြည်ပြိုကွဲပျက်စီအောင် ရည်ရွယ်ချက် အမျိုးမျိုး၊ ပုသဏ္ဍာန်အမျိုးမျိုးဖြင့် ပြလုပ်နေကြသည်” ဟု ပြောသည်။

သတင်းမီဒီယာသမားများသည် လူသားများပင်ဖြစ်သည့်အတွက် လူ့သဘာဝအတိုင်း အကြိုက်မတူခြင်း၊ ပုဂ္ဂလိ ဓိဋ္ဌာန် အစွဲများ ရှိနေတတ်ခြင်းကို မိမိတို့အနေဖြင့် နားလည်လက်ခံကြောင်း၊ သို့သော်လည်း နိုင်ငံ့အရေး၊ ပြည်သူ့ အရေးကိစ္စများတွင် မိမိအကျိုးစီးပွား အပါအဝင် မိမိယူဆချက်၊ မိမိသဘောထားကို ရှေ့တန်းမတင်ဘဲ အတ္တနောမတိ ကင်းကင်းဖြင့် အရာရာကို ရေးသားရှုမြင် ဆင်ခြင်ပေးကြရန် တိုက်တွန်းလိုကြောင်း နစကဥက္ကဋ္ဌက ပြောသည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

ဗိုလ်ချုပ်မှူးကြီးမင်းအောင်လှိုင်က “ မိမိတို့နိုင်ငံသည် ဒီမိုကရေစီနိုင်ငံရေးစနစ်ကို မှန်မှန်ကန်ကန် စနစ်တကျ ကျင့်သုံးပြီး ဒီမိုကရေစီနှင့်ဖက်ဒရယ်စနစ်ကို အခြေခံသည့် ပြည်ထောင်စုအဖြစ် တည်ဆောက်ရန် ဆောင်ရွက် နေခြင်းဖြစ်ကြောင်း၊ ဒီမိုကရေစီ လူ့အဖွဲ့အစည်းတစ်ရပ်တွင် ဥပဒေအရ လွတ်လပ်စွာရေးသား ထုတ်ဖော် ပြောဆို နိုင်ခွင့်များ ရှိရမည်ဖြစ်သကဲ့သို့ ကောင်းမွန်သည့် အုပ်ချုပ်မှုစနစ်နှင့် ဖွံ့ဖြိုးတိုးတက်မှုများသည်လည်း မရှိမဖြစ်လို အပ်ကြောင်း၊ ယင်းလိုအပ်ချက်များကို လိုက်လျောညီထွေရှိရှိ ဟန်ချက်ညီညီ မျှမျှတတ ဆောင်ရွက်ပေးကြရန်လို အပ်ကြောင်း” ပြောသည်။

အုပ်ချုပ်သူ လူတန်းစားများသည် သတင်းမီဒီယာကို မိတ်ဖက်အဖြစ် ရှုမြင်ကြလေ့ အလွန်နည်းပါးပြီး အတိုက်အခံ အဖြစ်သာ ရှုမြင်ကြလေ့ရှိနေခြင်းကို ပြောင်းလဲသင့်ကြောင်း၊ နစက အနေဖြင့် သတင်းမီဒီယာများကို ကွဲခြား ဆက်ဆံမှု မလုပ်ဘဲ သတင်းအချက်အလက်များကို အချိန်နှင့်တပြေးညီ ပြန်လည် ဖြေကြားပေးခြင်းဖြင့်လည်း နားလည်မှု လွဲမှားခြင်းကို တည့်မတ်ရန်လိုအပ်ကြောင်း၊ ပြည်သူလူထု သိသင့်သိထိုက်သော သတင်းအချက် အလက်များကို မီဒီယာ၏ မေးမြန်းခြင်းကနေတဆင့် ပြန်လည်အသိပေးခြင်းကို အားကောင်းအောင် တည် ဆောက်နိုင်မည်ဆိုပါက နစကနှင့် မီဒီယာအသိုင်းအဝိုင်းကြား ယုံကြည်မှုတည်ဆောက်နိုင်မည်ဟု ထင်ကြောင်း သတင်းမီဒီယာအသိုင်းအဝိုင်းက ထောက်ပြကြသည်။

CNI News

၂၀၂၄ ခုနှစ်၊ ဒီဇင်ဘာ ၁၀

လာမည့် ၂၀၂၅ ခုနှစ်တွင် ကျင်းပမည်ဟု ပြောကြားနေသည့် ရွေးကောက်ပွဲအား နာဂဒေသမှ ပြည်သူများသည်   စိတ်ဝင်စားမှုများရှိနေကြောင်း နာဂအမျိုးသားပါတီ (NNP) ဥက္ကဋ္ဌ ဦးရှုမောင်က CNI သတင်းဌာနသို့ ပြော သည်။

၂၀၂၅ ခုနှစ်တွင် ရွေးကောက်ပွဲ သေချာပေါက် ကျင်းပမည်ဖြစ်ပြီး ရွေးကောက်ပွဲဆိုင်ရာ ကိစ္စရပ်များနှင့် ပတ်သက်၍ ပြည်ထောင်စုရွေးကောက်ပွဲကော်မရှင် (UEC) နှင့် မှတ်ပုံတင်ခွင့်ပြုထားသော နိုင်ငံရေးပါတီ ၅၃ ပါတီမှ ကိုယ်စားလှယ်များ ၂၀၂၄ ခုနှစ်၊ ဒီဇင်ဘာ ၇ ရက်က UEC ရုံးမှာ တွေ့ဆုံဆွေးနွေးခဲ့သည်။

လာမည့် ရွေးကောက်ပွဲသည် ပိုကောင်းသည့် အခင်းအကျင်းတစ်ခု သို့မဟုတ် ပိုကောင်းသည့် အခြေအနေတစ်ခု ဖြစ်လာစေမည်လားဆိုကာ နာဂတိုင်းရင်းသားများမှ မျှော်လင့်နေကြပြီး စိတ်ဝင်စားမှုများရှိနေကြောင်း နာဂအမျိုးသားပါတီ (NNP)ဥက္ကဋ္ဌ ဦးရှုမောင်က CNI သတင်းဌာနသို့ ပြောသည်။

နာဂဒေသ တစ်ခုကို တွေ့ရစဉ် (Lars Krutak)

၎င်းက “နိုင်ငံရေးအနေနဲ့ကတော့၊ နိုင်ငံရေးအနေနဲ့ဆိုတာ နိုင်ငံရေးဆိုတာ ရွေးကောက်ပွဲနဲ့ဆက်စပ်တဲ့ နိုင်ငံရေး က တိုက်ပွဲဖြစ်နေတယ်ဆိုတော့ နိုင်ငံရေးက တစ်တိုင်းတစ်ပြည်လုံးဖြစ်တော့ နိုင်ငံ‌ရေးက သေနေသလို ဖြစ်တာ ပေါ့ဗျာ၊ စစ်ရေးစစ်ရာထဲမှာပဲ ဖြစ်နေတဲ့ အနေအထားမျိုးဆိုတော့ အဲဒီသဘောသဘာဝ ကျနော်တို့ဆီမှာလည်း သက်ရောက်တာပေါ့။ သို့သော်ငြားလည်း အခုက ရွေးကောက်ပွဲလုပ်မယ် ဘာညာဆိုတဲ့ အနေအထားမျိုးတွေ ရှိလာတယ်၊ ရှိလာတဲ့ အခြေအနေတစ်ခုမှာ ပြည်သူတွေက စိုးရိမ်ပူပန်မှုနဲ့ အမြဲတမ်း စိတ်ဆင်းရဲပြီး နေနေရတာ ထက်စာရင်တော့ နိုင်ငံရေးထွက်ပေါက် တစ်ခုအနေနဲ့ တိုင်းပြည်ရဲ့ အခြေအနေတစ်ခုက ပိုပြီးတော့ ကောင်းတဲ့ လမ်းကြောင်းဘက်ကို ရောက်သွားနိုင်မလားဆိုတဲ့ မျှော်လင့်ချက်မျိုးနဲ့ စိတ်ဝင်စားတာမျိုးတွေရှိတယ်၊ စိတ်ဝင်စား တာမျိုးတွေ ရှိတယ်ဆိုတာ ထောက်ခံတယ်၊ ကန့်ကွက်တယ် ဆိုတာမျိုးကို ဆိုလိုတာမဟုတ်ဘူး၊ ပိုကောင်းတဲ့ အခင်းအကျင်းတစ်ခု ပိုကောင်းတဲ့ အခြေအနေတစ်ခု၊ ဒီဟာကြီးက ဘယ်တော့ပြီးဆုံးမလဲ၊ ပြီးဆုံးမဲ့ အရာတစ်ခု အတွက် လမ်းစတစ်ခုများ ဖြစ်လာမလားဆိုတဲ့ သဘောထား အမြင်လေးတွေနဲ့ စဥ်းစားတွေးခေါ် နေကြတဲ့ နိုင်ငံရေးပုံစံမျိုးတော့ ရှိပါတယ်ဗျ” ဟု ပြောသည်။

နာဂတောင်တန်းဒေသသည် ပြည့်စုံမှုမရှိသည့် နယ်မြေတစ်ခုဖြစ်ပြီး ကျောင်းဆရာ/ဆရာမ မလုံလောက်မှု၊ ကုန်စျေးနှုန်းကြီးမြင့်မှု၊ လက်နက်ကိုင် တပ်ဖွဲ့များ၏ အခွန်များ ကောက်ခံမှု၊ ကုန်စည်စီးဆင်းမှု နှောင့်နှေး နေခြင်းများဖြင့် ရင်ဆိုင်နေကြရသည်။

ပြည်မမှ တိုင်းရင်းသား နယ်မြေများသို့ ကုန်စည်စီးဆင်းမှုများသည် နှောင့်နှေးနေပြီး ကုန်ပစ္စည်းတစ်ခုရောက်ဖို့  အနည်းဆုံး ၆ လခန့် ကြာမြင့်ကြောင်း၊ ထို့ကြောင့် နာဂဒေသအနေဖြင့် ရှင်သန်ရပ်တည်နိုင်ရန် ထွက်ပေါက်တစ်ခု အဖြစ် အိန္ဒိယနိုင်ငံကိုသာ အားကိုးနေရကြောင်း သိရသည်။

နာဂဒေသ တစ်ခုကို တွေ့ရစဉ် (Lars Krutak)

လက်ရှိတွင် အိန္ဒိယမှ နယ်စပ်ဂိတ်(ပန်ဆောင်)များ ပြန်လည်ဖွင့်လှစ်လိုက်၍ နာဂဒေသ အနေဖြင့် ကြိုဆိုကြောင်း၊ ရေရှည်အကျိုးစီးပွားလည်း ဖြစ်ထွန်းနိုင်ကြောင်း၊ သို့သော် လွတ်လပ်စွာ ကုန်စည်စီးဆင်းခွင့်နှင့် လုံခြုံရေးထိခိုက်မှု များအား သတိပြုရမည်ဖြစ်ကြောင်း၊ လက်ရှိ နာဂဒေသတွင် စစ်‌ရေးလှုပ်ရှားမှုများ၊ တိုက်ပွဲများမရှိသေးသော် လည်း စိုးရိမ်ပူပန်မှုများ ပြည်သူများတွင် ရှိနေကြကြောင်း နာဂအမျိုးသားပါတီ (NNP) ဥက္ကဋ္ဌ ဦးရှုမောင်က CNI သတင်းဌာနသို့ ပြောသည်။

၎င်းက “နာဂဒေသက လောလောဆယ်တော့ စစ်ရေးလှုပ်ရှားမှုတွေတော့ တိုက်ပွဲ အနေအထားတွေတော့ ဒီလိုတော့မရှိပါဘူး၊ ဒါပေမယ့် တိုက်ပွဲမရှိတော့ လောလောဆယ်တော့ ကျနော်တို့ ငြိမ်းချမ်းသေးတယ်လို့ ပြောလို့ ရတာပေါ့နော်၊ အဲလိုတော့ရှိတယ်။ သို့သော်ငြားလည်း ဒီဘယ်နေ့ဘယ်ချိန်မှာပဲ ကျနော်တို့ဆီ တိုက်ပွဲတွေ ဖြစ်လာ မလားဆိုတဲ့ စိုးရိမ်ပူပန်မှုတွေ ပြည်သူတွေကြားမှာတော့ ရှိပါတယ်။ အဲလိုမျိုးရှိတယ်၊ နောက်ကျန်တဲ့ ဟာတွေက တော့ ပုံမှန်လည်ပတ်နေတဲ့ နယ်မြေတစ်ခု အဲလိုတော့ ‌ပြောလို့ရပါတယ်” ဟု ပြောသည်။

ပြည်သူများ၏ လုံခြုံမှုကင်းမဲ့နေသည့် အခြေအနေ၊ စားဝတ်နေရေး၊ ကုန်စျေးနှုန်း၊ ပညာရေး၊ ကျန်းမာရေး၊ အလုပ်အကိုင်အခွင့်အလမ်း အားလုံးသည် ရွေးကောက်ပွဲမှ ပေါ်ထွန်းလာမည့် အစိုးရအနေဖြင့်  အာဏာခွဲဝေမှု ပုံသဏ္ဍာန် ပြန်ပေါ်လာလျှင် ဆက်လက်ဆောင်ရွက် သွားနိုင်မည်ဖြစ်ကြောင်း နိုင်ငံရေးပါတီများက ပြောသည်။

၂၀၂၅ ခုနှစ်တွင် ရွေးကောက်ပွဲ ကျင်းပသွားမည်ဖြစ်ကြောင်း၊ အနိုင်ရသည့်ပါတီကို နိုင်ငံတော်အာဏာလွှဲပြောင်း ပေးသွားမည်ဖြစ်ကြောင်း နစကဥက္ကဋ္ဌသည် ပြောကြားထားသည်။

CNI News

၂၀၂၄ ခုနှစ်၊ ဒီဇင်ဘာ ၁၀

အဂတိလိုက်စားမှုကြောင့် ကြွယ်ဝချမ်းသာလာသည့် ငွေကြေးနှင့် ပစ္စည်းများကို ပြည်သူ့ဘဏ္ဍာအဖြစ် သိမ်းဆည်း မည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၄ ခုနှစ်၊ ဒီဇင်ဘာ ၉ ရက်က အပြည်ပြည်ဆိုင်ရာ အဂတိလိုက်စားမှုတိုက်ဖျက်ရေးနေ့ အထိမ်းအမှတ် အခမ်းအနားတွင် ၎င်းက ပြောကြားခဲ့ခြင်း ဖြစ်သည်။

အဂတိလိုက်စားမှုသည် လူ့ဘောင်လောကကို အရုပ်ဆိုး အကျည်းတန်စေပြီး ကောင်းမွန်သည့် လူမှုစီးပွားဘဝ ပတ်ဝန်းကျင်ကို ထိခိုက်ပျက်စီးစေသည့် မကောင်းမှု ဒုစရိုက်တစ်ခုပင် ဖြစ်ကြောင်း၊ အဂတိလိုက်စားမှုများကြောင့် လူ့ဘောင်လောကတွင် တရားမျှတမှု ပျောက်ကွယ်ပြီး နိုင်ငံတော်နှင့် အများပြည်သူကို ထိခိုက်စေကြောင်း၊ ထို့ပြင် နိုင်ငံဖွံ့ဖြိုးတိုးတက်ရေး ရည်မှန်းချက်ပန်းတိုင်ကို ပျက်စီးစေရုံသာမက တရားဥပဒေစိုးမိုးရေးနှင့် တည်ငြိမ်အေး ချမ်းမှုကိုလည်း ထိခိုက်စေနိုင်ကြောင်း နစကဥက္ကဋ္ဌက ပြောသည်။

အပြည်ပြည်ဆိုင်ရာ အဂတိလိုက်စားမှုတိုက်ဖျက်ရေးနေ့ အခမ်းအနားမှာ နစကဥက္ကဋ္ဌကို တွေ့ရစဉ်

အဂတိလိုက်စားမှုပြဿနာသည် မိမိတို့နိုင်ငံတွင်သာမက ကမ္ဘာတစ်ဝန်းတွင် ပျံ့နှံ့နေသည့် ရောဂါဆိုးတစ်ခု ဖြစ်နေကြောင်း၊ ဖွံ့ဖြိုးပြီး နိုင်ငံများနှင့် ဖွံ့ဖြိုးဆဲနိုင်ငံများ အစိုးရပိုင်များသာမက ပုဂ္ဂလိကပိုင်းနှင့် အမြတ်အစွန်း မဟုတ်သည့် အချို့ကုသိုလ်ဖြစ် လှူဒါန်းရေးအဖွဲ့များတွင်ပါ အမြတ်တွယ်လာနေသည့် ပြဿနာတစ်ခုဖြစ် ကြောင်း ၎င်းက ပြောသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က “ အဂတိလိုက်စားမှုဆိုသည်ကို သာမန်အားဖြင့် လာဘ်ပေး လာဘ်ယူမှုလောက်သာ ထင်မှတ်ကြသော်လည်း တကယ်တော့ လူ့ဘောင်လောကတွင် ကျယ်ပြန့်နက်ရှိုင်းသည့် မကောင်းမှုကြီးဖြစ်ကြောင်း၊ ခြိမ်းခြောက်ငွေညှစ်ခြင်း၊ လိမ်လည်ခြင်း၊ နိုင်ငံတော်ဘဏ္ဍာနှင့် ပစ္စည်းများကို အလွဲသုံးစားလုပ်ခြင်း၊ ပြည်သူပိုင်ပစ္စည်း ငွေကြေးများကို ကိုယ်ကျိုးအတွက် မသင့်မလျော်သုံးစွဲခြင်း၊ မလျော်ဩ ဇာသုံးပြီး ကိုယ်ကျိုးအတ္တကိုရယူခြင်း စသည်များသည် အဂတိလိုက်စားမှုများပင် ဖြစ်ကြောင်း” ပြောသည်။
အဂတိလိုက်စားမှုကြောင့် ရာဇဝတ်မှုများ ကျူးလွန်ခြင်း၊ အကြမ်းဖက်တိုက်ခိုက်မှုများကို အားပေးခြင်းများ ဖြစ် ပေါ်လာစေကြောင်း၊ ထို့ပြင် တရားဥပဒေစိုးမိုးရေးနှင့် ဒီမိုကရေစီစနစ်ကို ထိခိုက်စေခြင်းတို့ကို ဖြစ်စေခြင်းကြောင့် ကမ္ဘာလုံးဆိုင်ရာ ပြဿနာကြီးတစ်ခု ရောဂါဆိုးကြီးတစ်ခုဟု ဆိုနိုင်ကြောင်း ၎င်းက ပြောသည်။

အပြည်ပြည်ဆိုင်ရာ အဂတိလိုက်စားမှုတိုက်ဖျက်ရေးနေ့ အခမ်းအနားမှာ နစကဥက္ကဋ္ဌကို တွေ့ရစဉ်

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က “ အဂတိလိုက်စားမှုနှင့် ကြွယ်ဝချမ်းသာလာမှုကြောင့် ရရှိသည့် ငွေကြေးနှင့် ပစ္စည်းများကို ပြည်သူ့ဘဏ္ဍာအဖြစ် သိမ်းဆည်းခြင်းကို အဂတိလိုက်စားမှု တိုက်ဖျက်ရေးဥပဒေတွင် အတိအကျ ထည့်သွင်းပြဋ္ဌာန်းထားကြောင်း၊ ထို့ကြောင့် အဂတိလိုက်စားမှု ကျူးလွန်သူများကို တရားစွဲဆို အရေး ယူရုံသာမက အဂတိလိုက်စားမှုကြောင့် ကြွယ်ဝချမ်းသာလာသည့် ငွေကြေးနှင့်ပစ္စည်းများကို ပြည်သူ့ဘဏ္ဍာ အဖြစ် သိမ်းဆည်းခြင်းကို ဥပဒေနှင့်အညီ တိတိကျကျ ထိရောက်အောင် ဆောင်ရွက်ကြရန် လိုအပ်သည်”ဟု ပြောသည်။

အဂတိလိုက်စားမှုကို ပြည်သူလူထုက အလွန်မုန်းတီးကြသည့်အတွက် သက်ဆိုင်ရာ အာဏာပိုင်အဖွဲ့အစည်းများ က ပြည်သူ့အသံကို နားထောင်၍ ဥပဒေနှင့်အညီ ထိရောက်စွာ အရေးယူကိုင်တွယ်မည်ဆိုပါက ပြည်သူလူထုမှ ပူးပေါင်းဆောင်ရွက်ရန် အသင့်ရှိကြောင်း နိုင်ငံရေးအကဲခတ်များက ထောက်ပြကြသည်။

CNI News

၂၀၂၄ ခုနှစ်၊ ဒီဇင်ဘာ ၉

လာမည့် ၂၀၂၅ ခုနှစ်၊ ဇန်နဝါရီလသည် နစက အနေဖြင့် သက်တမ်း ၆ လ ထပ်မံ တိုး/မတိုး ပြည်တွင်းနှင့် နိုင်ငံတကာက စောင့်ကြည့်နေကြသလို မြန်မာနိုင်ငံအတွက်လည်း အလွန်အရေးကြီးကြောင်း ထောက်ပြနေ ကြသည်။

နစက အနေဖြင့် ရွေးကောက်ပွဲအတွက် ပြင်ဆင်ရန် အချိန်ယူရမည်ဖြစ်၍ လာမည့် ၂၀၂၅ ခုနှစ်၊ ဇန်နဝါရီ ၃၁ ရက် နောက်ပိုင်းတွင် သက်တမ်း ၆ လ ထပ်တိုးနိုင်ခြေများကြောင်း၊ ထို့နောက် ရွေးကောက်ပွဲကျင်းပရေး ကာ/လုံသို့ အာဏာပြန်အပ်ရမှာဖြစ်ကြောင်း၊ ကာ/လုံမှ ရွေးကောက်ပွဲ ကျင်းပနိုင်ရေး ကြားဖြတ်အစိုးရပုံစံမျိုး ဆင်တူသည့် သီးသန့် အဖွဲ့ဖွဲ့ပြီး လုပ်ဆောင်နိုင်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

၎င်းက “ပုံမှန် အခြေခံဥပဒေက ပေးထားတဲ့ ရွေးကောက်ပွဲလုပ်ရမယ့် အချိန်ဆိုရင်တော့ ၆ လတိုးပြီးမှပဲ သူက ပြင်ဆင်မယ့်အချိန်နဲ့ ဘာနဲ့ယူမှာဆိုတော့ သက်တမ်းတိုးတဲ့ဟာက ပိုပြီးဖြစ်နိုင်ခြေ များတယ်လို့ပဲ အကြမ်းဖျင်း မှတ်ထားပါတယ်။ ဒါကတော့ အချက်အလက်တွေအပေါ် မူတည်ပြီး တွက်တာပေါ့။ မတိုးဘူးဆိုရင်တော့ သူက နစက ကနေတဆင့် ကာကွယ်ရေးနဲ့လုံခြုံရေးကောင်စီ ကာ/လုံကို တဆင့်လွှဲပြီးတော့မှ ကာ/လုံကနေ ရွေးကောက်ပွဲ ကျင်းပဖို့အတွက် ဆက်စီစဉ်ပေါ့။ တကယ်လို့ သက်တမ်းတိုးရင်တော့ ရွေးကောက်ပွဲအတွက် ပြင်ဆင်၊ ရွေးကောက်ပွဲ လုပ်ငန်းစဉ်ကလည်း တကယ်တမ်း အချိန်တော်တော်လေး ယူရတာဆိုတော့ သက်တမ်း တိုးမယ့် အနေအထားကတော့ ဖြစ်နိုင်ခြေများတယ်လို့ပဲ သုံးသပ်ထားပါတယ်” ဟု ပြောသည်။

ကာ/လုံ အစည်းအဝေး ကျင်းပနေစဉ်

၂၀၂၁ ခုနှစ်၊ ဖေဖော်ဝါရီ ၁ ရက်နေ့က နိုင်ငံတော်ကို အရေးပေါ်ကြေညာကာ မြန်မာ့တပ်မတော်က အာဏာရယူခဲ့ သည်မှာ လာမည့် ၂၀၂၅ ခုနှစ်၊ ဖေဖော်ဝါရီ ၁ ရက်နေ့တွင် ၄ နှစ်ပြည့်မည် ဖြစ်သည်။

လတ်တလော အနေအထားတွင် နစကအနေဖြင့် စစ်ရေး၊ နိုင်ငံရေး အကျပ်အတည်းများ ကြုံတွေ့နေရပြီး လာမည့် ဇန်နဝါရီ ၃၁ ရက်နေ့တွင် မည်ကဲ့သို့သော အပြောင်းအလဲ လုပ်ဆောင်လာမလဲဆိုသည့်အပေါ် နိုင်ငံရေး အသိုင်းအဝိုင်းကြား စောင့်ကြည့်နေသည်။

လာမည့် ၂၀၂၅ ခုနှစ်၊ ဇန်နဝါရီလ ၃၁ ရက်နေ့တွင် နစကမှ နောက်ထပ် ၆ လ သက်တမ်း တိုး/မတိုး ပြည်တွင်း၊ ပြည်ပမှ စောင့်ကြည့်နေကြသည်ဟု ငြိမ်းချမ်းရေးလုပ်ငန်းစဉ်တွင် ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။

ယခင်က ရွေးကောက်ပွဲကို မေလတွင် ပြုလုပ်ခဲ့ကြပြီး ယခုနောက်ပိုင်းတွင် နိုဝင်ဘာလ၌ ပြောင်းလဲ လုပ်ဆောင် လာကြခြင်းဖြစ်၍ နစကအနေဖြင့် ထိုအခင်းအကျင်းကို အသစ်ပြောင်းလဲ လုပ်ဆောင်မလား မှန်း၍မရကြောင်း ၎င်းက ပြောသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

ဦးခွန်းဆိုင်က “အခု လောလောဆယ်ကတော့ အားလုံးက စောင့်ကြည့်နေတာကတော့ ဇန်နဝါရီလ ၃၁ ရက်နေ့မှာ သက်တမ်း တိုးမလား၊ မတိုးဘူးလား အဲဒါကို စောင့်ကြည့်နေကြပါတယ်။ ဒါကို စောင့်ကြည့်နေတာက ကျနော်တို့ တင် မကပါဘူး။ အိမ်နီးနားချင်း နိုင်ငံတွေရော အကုန်လုံးက ဝိုင်းကြည့်နေပါတယ်။ ဒီဥစ္စာဘယ်လိုဖြစ်မယ်ဆိုတာ ကျနော်တို့ ပြောလို့မရပါဘူး။ တကယ်လို့ သက်တမ်းတိုးမယ်ဆိုရင် ရွေးကောက်ပွဲလုပ်ဖို့ အချိန်က ပိုရမှာပေါ့။ ဒါပေမယ့် သက်တမ်း မတိုးတော့ဘူး။ အာဏာအပ်မယ်ဆိုရင်တော့ ရွေးကောက်ပွဲကို ၆ လအတွင်း လုပ်ရမယ်ဆို တဲ့ အခါကြတော့ သူတို့ ဘယ်လိုလုပ်မလဲဆိုတာ ကျနော်တို့လည်း ကြည့်နေတာပဲ။ ဖွဲ့စည်းအုပ်ချုပ်ပုံ ဥပဒေပုဒ်မ ၄၂၉ အရ ဆိုရင်တော့ တကယ်လို့ သက်တမ်း မတိုးတော့ဘူးဆိုရင် ၆ လအတွင်း ရွေးကောက်ပွဲ ကျင်းပရမယ်ဆို တာ ရှိထားတာကို။ သူက ပြောထားပြီးသားပဲ အပိုင်းလိုက်လုပ်သွားမယ်လို့၊ တစ်နိုင်ငံလုံး ဖြစ်လိမ့်မယ်လို့ သူလည်း မပြောထားဘူး။ အဲဒီတော့ အပိုင်းလိုက်လုပ်တာက တကယ်လည်း လုပ်မယ်ဆိုရင် ဖြစ်နိုင်တယ်။ လုပ် လည်း လုပ်ဖူးခဲ့တယ်ပေါ့ဗျာ” ဟု ပြောသည်။ 

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က တပ်မတော်မှ အမျိုးသားဒီမိုကရေစီအဖွဲ့ချုပ်(NLD)အစိုးရကို ၂၀၂၀ အထွေထွေရွေးကောက်ပွဲ မဲစာရင်းအငြင်းပွားမှုကို မဖြေရှင်းပေးဘဲ အစိုးရဖွဲ့စည်းရေး ကြိုးပမ်းသည်ဟု ဆိုကာ ဖြုတ်ချ၍ နိုင်ငံတော်ကို အရေးပေါ် အခြေအနေ ကြေညာကာ လက်ရှိအချိန်ထိ တာဝန်ယူလျက် ရှိနေ သည်။

CNI News

၂၀၂၄ ခုနှစ်၊ ဒီဇင်ဘာလ ၉ 

လာမည့် ၂၀၂၅ ခုနှစ်တွင် ရွေးကောက်ပွဲ သေချာပေါက် ကျင်းပသွားမည်ဖြစ်ကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

ရွေးကောက်ပွဲဆိုင်ရာ ကိစ္စရပ်များနှင့် ပတ်သက်၍ ပြည်ထောင်စုရွေးကောက်ပွဲကော်မရှင် (UEC) နှင့် မှတ်ပုံတင် ခွင့်ပြုထားသော နိုင်ငံရေးပါတီ ၅၃ ပါတီမှ ကိုယ်စားလှယ်များ ၂၀၂၄ ခုနှစ်၊ ဒီဇင်ဘာ ၇ ရက်တွင် UEC ရုံးမှာ တွေ့ဆုံဆွေးနွေးခဲ့သည်။

၂၀၂၅ ခုနှစ်တွင် ရွေးကောက်ပွဲ သေချာပေါက် ကျင်းပမည်ဖြစ်ကြောင်း၊ နိုင်ငံတော်၏ ဂုဏ်သိက္ခာနှင့် ပြည်သူများ ၏ လူမှုဘဝများအတွက် ရွေးကောက်ပွဲသည် အရေးကြီးကြောင်း ပြည်သူ့ပါတီ (PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

၎င်းက “အခုကတော့ ရွေး‌ကောက်ပွဲစနစ်နဲ့ ပတ်သတ်တဲ့ ကိစ္စပေါ့၊ အဲတော့ အရင်ကတော့ နိုင်သူအကုန်ယူပေါ့၊ အဲတော့ FPDP နဲ့ ကျင်းပတာကနေပြီးတော့ PR နဲ့ပတ်သက်လို့ ပြီးခဲ့တဲ့ အစည်းအဝေးတွေမှာလည်း ဆွေးနွေး ညှိနှိုင်းမှုတွေ ရှိတယ်။ ဖြစ်နိုင်ချေရှိတာကတော့ ၂ မျိုးစပ်
ပေါ့၊ နဂို FPDP နဲ့ ကျင်းပတဲ့ဟာလည်းရှိမယ်၊ PR နဲ့ ကျင်းပတာလည်း ရှိမယ်၊ သို့သော် ဒါတွေက အသေးစိတ် ဥပဒေ၊ နည်းဥပဒေတွေ ထွက်တဲ့အခါကျမှပဲ ကျနော်တို့ တိတိကျကျ သိရမယ်ပေါ့နော်။ အဲတော့ သေချာတာကတော့ အခိုင်အမာ ပြောနိုင်တာက ၂၀၂၅ ထဲမှာ ရွေးကောက်ပွဲ ကျင်းပမယ်ဆိုတာကတော့ ကျနော်တို့ အခိုင်အမာ ကတိပြုတယ်ပေါ့နော်၊ အဲတော့ ကျနော်တို့က ၂၀၂၅ ရွေး‌ကောက်ပွဲ လုပ်ပြီးသွားရင် လာမယ့် ၅ နှစ်တာ သက်တမ်း အတောအတွင်းမှာ အာဆီယံအလှည့်ကျ ဥက္ကဋ္ဌတာဝန်တို့၊ ပြီးတော့ ကုလသမဂ္ဂမှာ မြန်မာနိုင်ငံတော်ရဲ့ ကိုယ်စားလှယ်ကိစ္စတို့ အစရှိတဲ့ကိစ္စတွေကိုပါ နိုင်ငံတော်ရဲ့ ဂုဏ်သိက္ခာနော် အဲတာကို ပြန်ပြီးတော့ တည်ဆောက်နိုင်ဖို့အတွက် အင်မတန် အရေးကြီးတယ်လို့ မြင်ပါတယ်။ တစ်ဖက်ကလည်း ပြည်သူတွေရဲ့ လုံခြုံမှုကင်းမဲ့နေတဲ့ အခြေအနေ၊ စားဝတ်နေရေး၊ ကုန်စျေးနှုန်း၊ ပညာရေး၊ ကျန်းမာရေး၊ အလုပ်အကိုင်၊ အခွင့်အလမ်း အဲတာတွေ အားလုံးဟာ ဒီရွေးကောက်ပွဲကနေပြီးတော့ ဖြစ်ပေါ်လာမယ့် အစိုးရအနေနဲ့ အာဏာခွဲဝေမှု ပုံသဏ္ဍာန် ပြန်ပေါ်လာပြီး‌တော့မှ ဆက်လက်ပြီး ဆောင်ရွက်သွား လို့ ရမယ်လို့ ကျနော်တို့ အဲလိုမြင်ပါတယ်ဗျ” ဟု ပြောသည်။

နိုင်ငံရေးပါတီများနဲ့ ဗိုလ်ချုပ်မှူးကြီးမင်းအောင်လှိုင်တွေ့ဆုံစဉ်

လာမည့် ၂၀၂၅ ခုနှစ်အတွင်း ကျင်းပမည့် ရွေးကောက်ပွဲအား ပြည်တွင်း၊ ပြည်ပမှ ရွေးကောက်ပွဲ စောင့်ကြည့် လေ့လာရေးအဖွဲ့များအား စောင့်ကြည့်လေ့လာခွင့်ပြုမည်ဟု ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးကိုကိုက ပြောကြားခဲ့သည်။

ထို့ပြင် သိက္ခာရှိသည့် ရွေးကောက်ပွဲနှင့် လွှတ်တော်တစ်ရပ်အား ဖော်ဆောင်ပေးနိုင်ရေး ကြိုးပမ်းဆောင်ရွက် သွားမည်ဖြစ်ကြောင်း၊ အရည်အချင်းရှိသော လွှတ်တော်ကိုယ်စားလှယ်များ ဖြစ်စေရန် နိုင်ငံရေးပါတီများ အနေ ဖြင့် လွှတ်တော်ကိုယ်စားလှယ်လောင်းများအား ကြိုတင်ရွေးချယ် လေ့ကျင့်ပေးရန်လိုအပ်ကြောင်း UEC ဥက္ကဋ္ဌ ဦးကိုကိုက ပြောကြားခဲ့သည်။

ရွေးကောက်ပွဲသည် အားလုံးအတွက် လိုအပ်ကြောင်းနှင့် နိုင်ငံတကာကလည်း ကြိုဆိုအပ်ကြောင်း  ရခိုင့်ဦးဆောင် ပါတီ (AFP)ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

၎င်းက “နစကရဲ့ ရည်မှန်းချက်ပေါ့ဗျာ၊ ရှေ့လုပ်ငန်းစဥ်ထဲမှာ ရွေးကောက်ပွဲဟာ အဓိက အက္ခရာကျတာပေါ့၊ အဲတော့ အရေးပေါ်ကာလ ဥပဒေပြဋ္ဌာန်းချက်ကိုကြည့်ရင် ကာကွယ်ရေးဦးစီးချုပ်ကို ခေတ္တအာဏာ အပ်နှင်း တယ်။ တည်ငြိမ်အေးချမ်းပြီးမှ ရွေးကောက်ပွဲ ကျင်းပနိုင်တဲ့ အခင်းအကျင်းဖြစ်အောင် ဖန်တီးပေးရတယ်။ အဲဒီ သဘောကို နားလည်ရင် ရွေးကောက်ပွဲဆိုတာသည် လက်ရှိကာလ တပ်မတော်ခေတ္တယူထားတဲ့ ကာလကို ဒီမိုကရေစီ အသွင်းကူးပြောင်းရေး အစိုးရတစ်ရပ် ပေါ်ထွန်းအောင် ဆောင်ရွက်နိုင်တဲ့ နည်းလမ်း၊ တစ်နည်းအား ဖြင့် အခြေခံဥပဒေပါ ပေးထားချက်ကို ခင်ဗျားတို့လည်း သ‌ဘောပေါက်တယ်ဆိုရင် ရွေးကောက်ပွဲသည် အားလုံး အတွက် လိုအပ်တယ်၊ နစကအတွက်လည်း လိုအပ်တယ်၊ လူထုအတွက်လည်း လိုအပ်တယ်၊ နိုင်ငံရေးပါတီများ အတွက်လည်း လိုအပ်တယ်။ အခြေခံဥပဒေရဲ့ ပေးထားချက်ဖြစ်တယ်၊ နိုင်ငံတကာကလည်း ကြိုဆိုအပ်တယ်ဆို တာ တစ်ခုကို တွေ့မှာပေါ့” ဟု ပြောသည်။

ရွေးကောက်ပွဲကော်မရှင်နဲ့ နိုင်ငံရေးပါတီများတွေ့ဆုံစဉ်

လာမည့် ရွေးကောက်ပွဲတွင် မဲစာရင်းများ မှားယွင်းမှု မရှိစေရေး၊ မဲစာရင်းများ မှန်ကန်မှုရှိစေရေး အဓိကဆောင်ရွက်သွားရမည် ဖြစ်ကြောင်း၊ Myanmar Electronic Voting Machine စနစ်ဖြင့် ဆောင်ရွက်သွားမည်ဖြစ်ကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ၂၀၂၄ ခုနှစ်၊ နိုဝင်ဘာ ၁၉ ရက်တွင် ပြောကြားခဲ့ သည်။

၂၀၂၅ ခုနှစ်တွင် ရွေးကောက်ပွဲ ကျင်းပသွားမည်ဖြစ်ကြောင်း၊ အနိုင်ရသည့်ပါတီကို နိုင်ငံတော်အာဏာ လွှဲပြောင်း ပေးသွားမည်ဖြစ်ကြောင်း ၎င်းက ပြောကြားထားသည်။

လွတ်လပ်ပြီး တရားမျှတသော ရွေးကောက်ပွဲ ကျင်းပမည်ဖြစ်ပြီး နိုင်ငံတကာ အကဲခတ်များအားလည်း ဖိတ်ခေါ် မည်ဟု ၂၀၂၄ ခုနှစ်၊ နိုဝင်ဘာလ ၆ ရက်တွင် တရုတ်ဝန်ကြီးချုပ် လီချန်နှင့် တွေ့ဆုံစဥ် နစကဥက္ကဋ္ဌ ဗိုလ်ချုပ်မှူး ကြီး မင်းအောင်လှိုင်က ပြောကြားခဲ့သည်။

တရုတ်အစိုးရက မြန်မာနိုင်ငံ၏ ရွေးကောက်ပွဲ အောင်မြင်စွာ ကျင်းပနိုင်ရန် ဆန္ဒပြုကူညီနိုင်မည်ဟု ပြောကြား ထားသလို ရုရှားနိုင်ငံကလည်း မြန်မာ့ရွေးကောက်ပွဲကို ကူညီမည့်အကြောင်း ရုရှားနိုင်ငံ ဒူးမားလွှတ်တော် ဒုတိယ ဥက္ကဋ္ဌနှင့် ပြည်‌ထောင်စုရွေးကောက်ပွဲကော်မရှင်ဥက္ကဋ္ဌတို့ ၂၀၂၄ ခုနှစ်၊ ဒီဇင်ဘာလ ၄ ရက်တွင် နေပြည်တော်၌ တွေ့ဆုံဆွေးနွေးခဲ့ကြောင်း သိရသည်။ 

ာ

CNI News
၂၀၂၄ ခုနှစ်၊ ဒီဇင်ဘာ ၇

တပ်မတော် ခေါင်းဆောင်ငယ်များ ဖြစ်လာစေရေး လေ့ကျင့်မွေးထုတ်ပေးခဲ့သည့် တပ်မတော်နှင့် အမိ စစ်တက္ကသိုလ်၏ ကျေးဇူးကို မမေ့ရန်လိုကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၄ ခုနှစ်၊ ဒီဇင်ဘာ ၆ ရက်က ပြင်ဦးလွင်မြို့မှာ စစ်တက္ကသိုလ် ဗိုလ်လောင်းသင်တန်း အမှတ်စဉ်(၆၆) သင်တန်း ဆင်းဂုဏ်ပြု စစ်ရေးပြ အခမ်းအနားကို တက်ရောက်ခဲ့ပြီး ပြောကြားခဲ့သည်။

ဗိုလ်ချုပ်မှူးကြီးမင်းအောင်လှိုင်က “ ယခုကဲ့သို့ ထူးချွန်ထက်မြတ်သူများ ဖြစ်လာစေရေး ငယ်စဉ်ကတည်းက ကျွေးမွေးပြုစုပျိုးထောင်ပေးခဲ့သည့် မိဘများ၏ ကျေးဇူးများ၊ အသိပညာများရရှိစေရေး သင်ကြားပေးခဲ့သည့် ဆရာ၊ ဆရာမများ၏ ကျေးဇူးများကို သိတတ်ရန်နှင့် ကျေးဇူးဆပ်ရန် လိုအပ်မည်ဖြစ်ကြောင်း၊ ထို့အတူ ဗိုလ် လောင်း သင်တန်းလေးနှစ်တာကာလအတွင်း တပ်မတော်၏ ခေါင်းဆောင်ငယ်များ ဖြစ်လာစေရေး လေ့ကျင့် မွေးထုတ်ပေးခဲ့သည့် တပ်မတော်နှင့် အမိစစ်တက္ကသိုလ်၏ ကျေးဇူးကိုလည်း မမေ့ရန်လိုကြောင်း” ပြောကြားခဲ့သည်။

မိဘများ၏စကားကို နားထောင်ခြင်း၊ မိဘကို စိတ်ချမ်းသာအောင်ထားရှိခြင်း၊ မိမိတတ်နိုင်သရွေ့ ကျွေးမွေး စောင့်ရှောက်ခြင်းတို့သည် မိဘကျေးဇူးကို ဆပ်ခြင်းပင်ဖြစ်သကဲ့သို့ မိမိကိုယ်ကို ထိန်းသိမ်းနေထိုင်ခြင်း၊ စစ်သား ကောင်း တစ်ယောက်ပီသစွာ နေထိုင်ကျင့်ကြံခြင်းအားဖြင့်လည်း နိုင်ငံတော်နှင့် တပ်မတော်၏ ဂုဏ်ကိုမြှင့်တင်ရ မည်ဖြစ်ကြောင်း ၎င်းက ပြောသည်။

တာဝန်ထမ်းဆောင်ရာတွင်လည်း စစ်သားကောင်း တစ်ယောက်ပီသစွာ နေထိုင်ကျင့်ကြံရမည်ဖြစ်ပြီး နိုင်ငံတော် နှင့် တပ်မတော်၏ တာဝန်များကို ထမ်းဆောင်လျက်ရှိကြသည့် နောင်တော်ကျောင်းဆင်း အရာရှိများ၊ စစ်သည် များထံမှလည်း ကောင်းမွန်သည့် အတွေ့အကြုံကောင်းများကို လက်ဆင့်ကမ်း သင်ယူကြရန်လိုကြောင်း၊ တပ်မတော်သားများသည် ပြည်သူကြားမှ ပေါက်ဖွားလာခြင်းဖြစ်ပြီး တပ်မတော်သည် နိုင်ငံတော်၏ အစိတ်အပိုင်း တစ်ရပ်ဖြစ်ကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။

ထို့ကြောင့် မိမိကိုယ်ကို မိမိအဖွဲ့အစည်းနှင့် နိုင်ငံတော်အပေါ် သစ္စာစောင့်သိ၍ ပေးအပ်သည့် တာဝန်များကို အောင်မြင်ကျေပွန်စွာ ထမ်းဆောင်သွားကြရန် ၎င်းက ပြောသည်။

CNI News

၂၀၂၄ ခုနှစ်၊ ဒီဇင်ဘာ ၆

ရွေးကောက်ပွဲ မတိုင်ခင်ကတည်းက ကြိုတင် ဆွေးနွေးမှုများပြုလုပ်ပြီး သဘောတူညီမှုများ ရရှိထားကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

အမျိုးသားစည်းလုံး ညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC)နှင့် မှတ်ပုံတင် ခွင့်ပြုထားသည့် နိုင်ငံရေးပါတီများ တွေ့ဆုံပွဲကို ၂၀၂၄ ခုနှစ်၊ ဒီဇင်ဘာ ၅ ရက်မှ ၆ ရက်အထိ နေပြည်တော်မှာ ကျင်းပခဲ့ကြသည်။

ဖက်ဒရယ်နှင့် ဒီမိုကရေစီကို ဦးတည်သော ပြုပြင်ပြောင်းလဲမှုများအား သဘောတူညီမှု ရရှိထားကြောင်း၊ ရွေးကောက်ပွဲ မတိုင်ခင် ကြိုတင်ညှိနှိုင်းဆွေးနွေးမှုများ ပြုလုပ်ထားသောကြောင့် လာမည့် ရွေးကောက်ပွဲသည် ယခင်ရွေးကောက်ပွဲများနှင့် မတူကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

၎င်းက “ကျနော်တို့ အခုတစ်ကြိမ်မှ ဒါဆွေးနွေးတာ မဟုတ်ပါဘူး၊ အရင်ဆွေးနွေးတဲ့ ဆွေးနွေးပွဲမှာကတည်းက သဘောထား စုစည်းချက်တွေ ပြုစုထားတာရှိပါတယ်။ အဲတော့ အဲထဲမှာ သဘောထားတူညီတဲ့ အချက်တွေ၊ မူအားဖြင့် တူညီပြီးတော့ အသေးစိတ် ဆွေးနွေးရမယ့် အချက်တွေ နောက်ပြီးတော့ ထပ်မံဆွေးနွေးရမယ့် အချက် တွေဆိုပြီးတော့ ကျနော်တို့ အစုတွေ ခွဲထားတာရှိပါတယ်။ အသေးစိတ်ကိုတော့ ကျနော်တို့ ပြောလို့မရသေး ပေမယ့်လို့ ဖက်ဒရယ်ကို ဦးတည်တဲ့ ပြုပြင်ပြောင်းလဲမှုတွေ ကျနော်တို့ သဘောတူညီမှု ရထားတာ ရှိပါတယ်၊ နောက်တစ်ခါ ဒီမိုကရေစီဆိုင်ရာ ပြုပြင်ပြောင်းလဲမှုတွေ၊ ပြီးတော့ အပြန်အလှန် စစ်ဆေး ထိန်းကျောင်းမှုဆိုင်ရာ လိုအပ်ချက်တွေ၊ အဲတာတွေနဲ့ ပတ်သက်လို့ ကျနော်တို့ သဘောတူညီ ထားတာတွေ ရှိပါတယ်။ သို့သော် တရားဝင်ဖွဲ့စည်းပုံ ပြင်ဆင်တယ်ဆိုတာကတော့ လွှတ်တော်ပေါ်လာပြီးမှ လွှတ်တော်မှာ ပြင်ဆင်ရမှာပေါ့။ အဲတော့ ကျနော်တို့ အခုဆွေးနွေးနေတာတွေက အရင့်အရင် ရွေးကောက်ပွဲတွေမှာက ကြိုတင်ဆွေးနွေးညှိနှိုင်းမှု ဘာမှမရှိဘဲနဲ့ ရွေးကောက်ပွဲဝင်သွားကြတယ်၊ အဲတော့ ပြီးတဲ့အခါကျတော့ လွှတ်တော်ထဲရောက်ပြီးမှ ဖွဲ့စည်းပုံ ပြင်ဆင်ရေးဆိုင်ရာ ထိပ်တိုက်ဖြစ်မှုတွေ ကျနော်တို့ ကြုံတွေ့ခဲ့ရတယ်။ ဒါကြောင့်မို့လို့ အခုတစ်ခေါက်ကတော့ လာမယ့်ရွေးကောက်ပွဲဟာ အရင့်အရင် ရွေးကောက်ပွဲတွေနဲ့ မတူဘဲနဲ့ ရွေးကောက်ပွဲ မတိုင်ခင်မှာကတည်းက ကြိုတင်ညှိနှိုင်းဆွေးနွေးမှုတွေ လုပ်ပြီး သဘောတူညီမှု တချို့ကို ကျနော်တို့ ရရှိထားပြီးတော့မှ လွှတ်တော်၊ ရွေးကောက်ပွဲကို သွားတာက ပွတ်တိုက်မှုနည်းနည်းနဲ့ သိသာထင်ရှားတဲ့ ပြုပြင်ပြောင်းလဲ မှုတွေဖြစ်မယ်” ဟု ပြောသည်။

NSPNC နှင့် နိုင်ငံရေးပါတီများကို တွေ့ရစဥ်

ထိုဆွေးနွေးပွဲတွင် ဖွဲ့စည်းပုံအခြေခံဥပဒေ (၂၀၀၈ခုနှစ်)မှ ပြင်ဆင်ရန်သင့်သည်ဟု သုံးသပ် ယူဆရသည့် ပြဋ္ဌာန်း ချက်များအပေါ် နိုင်ငံရေးပါတီများနှင့် ဆွေးနွေးမှု အခြေအနေများ၊ NCA ကို အခြေခံသည့် ငြိမ်းချမ်းရေး လုပ်ငန်း စဥ် ဖော်ဆောင်မှု အခြေအနေများအား ဆွေးနွေးခဲ့ကြသည်။

ထို့ပြင် ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စု တည်ဆောက်နိုင်ရေး၊ လွတ်လပ်ပြီး တရား မျှတသည့် ပါတီစုံဒီမိုကရေစီ အထွေထွေရွေးကောက်ပွဲ အောင်မြင်စွာ ကျင်းပနိုင်ရေးဆိုင်ရာ ကိစ္စရပ်များအား လည်း ရှင်းလင်းပြောကြားခဲ့ကြောင်း သိရသည်။

နိုင်ငံရေးပါတီများ အနေဖြင့် ရွေးကောက်ပွဲနှင့် ပတ်သက်၍ အကြံဉာဏ်များ၊ ဝေဖန်သုံးသပ် ချက်များအား ဆွေးနွေးညှိနှိုင်းခဲ့ကြကြောင်း နာဂအမျိုးသားပါတီ (NNP) ဥက္ကဋ္ဌ ဦးရှုမောင်က CNI သတင်းဌာနသို့ ပြောသည်။

၎င်းက “ရွေးကောက်ပွဲနဲ့ ပတ်သက်တဲ့ ကိစ္စတွေနဲ့ ပတ်သက်ပြီး ကျနော်တို့ ဒီနိုင်ငံရေးပါတီတွေ အနေနဲ့ ဘယ်လို ပြင်ဆင်သင့်သလဲ၊ သို့မဟုတ် ရွေးကောက်ပွဲပေါ်မှာ ကျနော်တို့က ဘယ်လို ရပ်တည်သင့်သလဲ၊ နောက်ပြီးတော့ ဒီရွေးကောက်ပွဲ ဖြစ်လာခဲ့ရင် ကျနော်တို့က ဘယ်လိုပုံစံမျိုးနဲ့ ရွေးကောက်ပွဲကို ကျင်းပရင်ကောင်းမလဲ မဲပေးတဲ့ စနစ်တွေ အပါအဝင်ပေါ့နော်၊ ရွေးကောက်ပွဲ အခင်းအကျင်းကြီး တစ်ခုလုံးကို ကျနော်တို့က ဘယ်လိုလုပ်ရင် ကောင်းမလဲဆိုတဲ့ အဲဒီအကြံဉာဏ်တွေ၊ ဝေဖန်သုံးသပ်ချက်တွေနဲ့ လုပ်လို့ကိုင်လို့ရမယ့် အနေအထားတစ်ခုကို ပွင့်ပွင့်လင်းလင်း ဆွေးနွေး ညှိနှိုင်းကြတဲ့ အစည်းအဝေးလို့လည်း ပြောလို့ရပါတယ်” ဟု ပြောသည်။

NSPNC နှင့် နိုင်ငံရေးပါတီများကို တွေ့ရစဥ်

ဒီမိုကရေစီနှင့်ဖက်ဒရယ်ကို အခြေခံသည့် ပြည်ထောင်စုအား တည်ဆောက်ရမည်ဟု မြန်မာ့တပ်မတော်၊ လက်နက်ကိုင် အဖွဲ့အစည်းများနှင့် နိုင်ငံရေးပါတီများ အားလုံးက လက်ခံထားသောကြောင့် ဖွဲ့စည်းပုံအခြေခံ ဥပဒေကို ပိုမို၍ ဖက်ဒရယ်ဆန်သော ဖွဲ့စည်းပုံမျိုးဖြစ်ရန် ပုဒ်မပြဋ္ဌာန်းချက်များ၊ ဥပဒေပြဋ္ဌာန်းချက်များအား မည်သို့ ပြဋ္ဌာန်းရမည်ဆိုခြင်းများကို ဆွေးနွေးခဲ့ကြောင်းလည်း နိုင်ငံရေးပါတီများက ပြောသည်။

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကတော့ ၂၀၂၅ ခုနှစ်တွင် ရွေးကောက်ပွဲ ကျင်းပပေးသွားမည် ဖြစ်ကြောင်း၊ ရွေးကောက်ပွဲတွင် အနိုင်ရသည့် ပါတီကို နိုင်ငံတော်အာဏာ လွှဲပြောင်းပေးသွားမည် ဖြစ်ကြောင်း ပြောကြားထားသည်။

CNI News

၂၀၂၄ ခုနှစ်၊ ဒီဇင်ဘာ ၅

အမျိုးသားစည်းလုံးညီညွတ်ရေးနှင့်ငြိမ်းချမ်းရေး ဖော်ဆောင်မှုညှိနှိုင်းရေးကော်မတီ(NSPNC)နှင့် နိုင်ငံရေးပါတီများ တွေ့ဆုံ၍ ဆွေးနွေးကြကြောင်း သိရသည်။ 

အဆိုပါ တွေ့ဆုံ ဆွေးနွေးပွဲကို နေပြည်တော်မှာ ကျင်းပနေခြင်းဖြစ်ပြီး ၂၀၂၄ ခုနှစ်၊ ဒီဇင်ဘာ ၅ ရက်မှ ၆ ရက်အထိ ဆွေးနွေးမည်ဖြစ်သည်။

ဆွေးနွေးပွဲသို့ နိုင်ငံရေးပါတီများဘက်က ပြည်ထောင်စုရွေးကောက်ပွဲကော်မရှင်(UEC)မှ မှတ်ပုံတင် ကျထားသော ပါတီများဖြစ်ပြီး ပါတီ ၅၁ ပါတီတက်ရောက်ခဲ့ကြောင်း သိရသည်။

ဒီဇင်ဘာ ၅ ရက်နေ့တွင် အိန္ဒိယဖက်ဒရယ်စနစ်၊ ဒီမိုကရေစီနှင့်ဖက်ဒရယ် အခြေခံသည့် ပြည်ထောင်စု တည်ဆောက်ရေး ဆိုသော အချက် ၂ ချက်ကို ဆွေးနွေးကြကြောင်း၊ ဒီဇင်ဘာ ၆ ရက်နေ့တွင် ရွေးကောက်ပွဲနှင့် လုံခြုံရေး၊ အထွေထွေ တို့ကို ဆွေးနွေးကြမည်ဖြစ်ကြောင်း သိရသည်။

CNI News

၂၀၂၄ ခုနှစ်၊ ဒီဇင်ဘာ ၅

မြန်မာ့ရေပိုင်နက်အတွင်းသို့ ဝင်ရောက်လာသည့် ထိုင်းငါးဖမ်းစက်လှေကို ဖမ်းဆီးထားခြင်းနှင့်ပတ်သက်၍ သေချာမဖြေရှင်းနိုင်ပါက ထိုင်းနှင့်မြန်မာကြား သံတမန်ဆက်ဆံရေး ဆိုးဝါးလာနိုင်သလားဆိုသည့်အပေါ် နိုင်ငံရေးအကဲခတ်များကြား မေးခွန်းထုတ်နေကြသည်။

မြန်မာရေပိုင်နက်ထဲ ဝင်ရောက်လာခြင်းကြောင့် မြန်မာရေတပ်မှ ဖမ်းဆီးထားသည့် ထိုင်းငါးဖမ်း စက်လှေသမား ၄ ဦးကို ပြန်လွှတ်ပေးရန် မြန်မာအာဏာပိုင်များနှင့် ညှိနှိုင်းနေပြီး ၎င်းတို့မှာ လုံခြုံဘေးကင်းစွာ ရှိနေသည်ဟု ထိုင်း ဝန်ကြီးချုပ် ပေတုန်တန်က ဒီဇင်ဘာ ၃ ရက်နေ့က သတင်းထောက်များကို ပြောကြားခဲ့သည်။

ထိုပြဿနာအား မြန်မာဘက်မှ သေချာစွာ မဖြေရှင်းနိုင်ပါက ထိုင်းနှင့် မြန်မာအကြား ပဋိပက္ခများ တဆင့် တိုးလာ နိုင်သည်ဟု ယူဆကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ထိုင်းဝန်ကြီးချုပ် ပေတုန်တန်ကို တွေ့ရစဉ်

၎င်းက “အခုကတော့ ထိုင်းမှာတက်လာတဲ့ အစိုးရသစ်နဲ့ မြန်မာစစ်ကောင်စီက ဆက်ဆံရေးကတော့ တော်တော် လေး အဖုအထစ်တွေ များလာတယ်။ တော်တော်လေးလည်း ပြောစရာဆိုစရာတွေ ရှိလာပါတယ်။ အဲဒီတော့ တလျှောက်လုံး စစ်ကောင်စီကို ထောက်ခံလာတဲ့ ထိုင်းစစ်အစိုးရနဲ့ အခုက သက်ဆင် မျိုးနွယ်စုရဲ့သမီး ဝန်ကြီးချုပ် ဖြစ်လာတဲ့အခါမှာ သိသာထင်ရှားတဲ့ အမြင်မတူမှုတွေ သဘောထား မတိုက်ဆိုင်မှုတွေ အဲဒီကနေ အခု ပဋိပက္ခ တွေ ဖြစ်လာတယ်လို့ ယူဆပါတယ်။ အဲဒါကြောင့် ဒါတွေနဲ့ပတ်သက်ပြီးတော့ သေချာစွာ မထိန်းချုပ်ရင်၊ တရား မျှတစွာ သင့်တင့်လျောက်ပတ်စွာ ဖြေရှင်းမှုမလုပ်ရင် ထိုင်းနဲ့ မြန်မာနိုင်ငံ စစ်ကောင်စီ ကြားထဲမှာ ပဋိပက္ခတွေက တဆင့် တိုးလာစရာရှိတယ်လို့ ယူဆပါတယ်”ဟု ပြောသည်။

နိုဝင်ဘာ ၃၀ ရက်နေ့က ထိုင်းငါးဖမ်းစက်လှေ တစ်စီးသည် မြန်မာနိုင်ငံ၊ ကော့သောင်းမြို့ မြန်မာ့ရေပိုင်နက် အတွင်းသို့ ရောက်ရှိလာသည်ကို မြန်မာစစ်ရေယာဉ်မှ စစ်ဆေးတွေ့ရှိသဖြင့် ဖမ်းဆီးခဲ့ခြင်းဖြစ်သည်။

ထိုစက်လှေအတွင်းမှာ မြန်မာနိုင်ငံသား ကျား ၂၇ ဦးနှင့် ထိုင်းနိုင်ငံသား ကျား ၄ ဦးတို့ကို ဖမ်းဆီးရမိခဲ့ကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဒီဇင်ဘာ ၂ ရက်နေ့က ထုတ်ပြန် ပြောကြားခဲ့သည်။

ယခုကိစ္စသည် နှစ်နိုင်ငံအကြား ဆက်ဆံရေး တင်းမာပျက်ပြားရန်အထိ မမြင်သေးကြောင်း ငြိမ်းချမ်းရေး လုပ်ငန်း စဉ်တွင် ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။

နစက ပြောခွင့်ရ ဗိုလ်ချုပ်ဇော်မင်းထွန်းကို တွေ့ရစဉ်

၎င်းက “ဒီကိစ္စကတော့ တင်းမာပြီးတော့မှ ဆက်ဆံရေး ပျက်ပြားသွားဖို့တော့ အခုလောလောဆယ် မမြင်သေး ဘူး။ ထိုင်းဘက်ကလည်း ကိုယ်စားလှယ်တွေ လွှတ်ပြီးတော့မှ SAC နဲ့ ဆွေးနွေးတာရှိတယ်။ နောက် ဒီလအတွင်း မှာပဲ tringle plus ဆိုပြီးတော့မှ သုံးပွင့်ဆိုင် အပေါင်းဆိုပြီးမှ လုပ်ဖို့ သူက ကြိုးစားနေတယ်။ အဲဒီတော့ ဒီဥစ္စာကို တော့ အပျက်မခံသေးဘူးပေါ့။ သို့သော်လည်း တစ်ဖက်ကလည်း ပြည်သူတွေအတွက် သူတို့ တတ်နိုင်သလောက် ပြောပေးရမယ်ထင်တယ်။ ပြီးခဲ့တဲ့ မ‌နေ့တစ်နေ့ကလည်း သံအမတ်ကြီးနဲ့ တွေ့တယ်။ နောက် ထိုင်းသံအမတ် ကလည်း နိုင်ငံခြားရေးဝန်ကြီးဌာနနဲ့ တွေ့တယ်။ အဲဒီတော့ သူတို့ကြိုးစားနေတယ်ပေါ့။ ဒီဥစ္စာ အဖြေ ဘယ်လိုရ မလဲ မသိသေးဘူး” ဟု ပြောသည်။

အဆိုပါ ငါးဖမ်းစက်လှေသည် ထိုင်းနိုင်ငံ၊ ရနောင်းမြို့မှာ နေထိုင်သည့် ထိုင်းနိုင်ငံသား တစ်ဦးပိုင်ဆိုင်ကြောင်း၊ နိုဝင်ဘာ ၂၉ ရက်နေ့ ညနေ ၃ နာရီက ထွက်ခွာလာပြီး မြန်မာ့ရေပိုင်နက်အတွင်းသို ည ၉ နာရီမှာ ရောက်ရှိ၍ ငါးဖမ်းဆီးခဲ့ကြောင်း စစ်ဆေးတွေ့ရှိသည်ဟု ဗိုလ်ချုပ်ဇော်မင်းထွန်းက ပြောသည်။

ထိုနောက် ထိုင်းငါးဖမ်းစက်လှေတွင် လုပ်ကိုင်ကြသူများအနက် ထိုင်းလူမျိုး တစ်ဦးလျှင် တစ်လ လုပ်ခလစာ ထိုင်းဘတ်ငွေ ၁၅၀၀၀ ရပြီး မြန်မာနိုင်ငံသား တစ်ဦးလျှင် တစ်လလုပ်ခလစာ ထိုင်းဘတ်ငွေ ၁၂၀၀၀ ရရှိကြောင်း သိရသည်။

ထိုင်းသတင်းမီဒီယာများကတော့ ထိုင်းငါးဖမ်းစက်လှေ ဖမ်းဆီးခံရမှုတွင် တစ်ဦးသေဆုံးခဲ့ကြောင်း၊ ထိုင်းပိုင်နက် အတွင်း ဖမ်းဆီးခံရခြင်းဖြစ်ကြောင်း ဖော်ပြလျက်ရှိသည်။

သေဆုံးသူမှာ ထိုင်းငါးဖမ်းစက်လှေကို မြန်မာဘက်မှ ပစ်ခတ်ခဲ့ချိန် ရေထဲခုန်ချခဲ့သဖြင့် ရေနစ်သေဆုံးခဲ့ခြင်း ဖြစ်ကြောင်းနှင့် မြန်မာရေပိုင်နက်အတွင်း ဝင်ရောက်ခဲ့သည်မှာ မှန်ကန်ကြောင်း ထိုင်းရေတပ်မှ အတည်ပြုထား သည်။